عجوز في العشرين الجزء الرابع

وصلات العشية العروسة كانت محتاجة شي حاجة وطلبات من خوها يديها لمارشي بطنوبيلتو .. هاد الأخير لي طلب من جداتو تمشي معاهم وهاد الأخيرة طلبات نرافقهم .. بغيت نرفض ولكن شميت ريحة الكفتة تمة .. 100% غادي يشري ليهم شي حاجة فيها القص على شوهة لي درت ليهم فالغدا .. هزيت صاكي لي فيه المكياج لايخونوه ليا البعالك وتبعتهم .. عندو واااااحد طنوبيلة بيضة بحال ديال مول الخبز ههه ركبات ختو لقدام وانا وجداتهم لور .. قتلااتني بجماعة .. ليوم حطمت راقم لقياسي فالهضرة فمي ضرني .. هو زوين تكوني عكوزة تسولي على لي بغيتي بلا حشمة بلا حياء .. تسبي وتعايري لي جا قدامك بلا مايرد عليك الهضرة .. ومن الفوق كلشي كايحتارمك وكايبوس ليك يدك وراسك .. صراحة بديت كنستمتع .. وكيفما توقعت مشينا عند واحد مول شواية ..شبعنا كفتة ومونادة .. وشحال عزيز عليا الماكلة ديال زنقة فابور .. مهم من بعد ما سالينا دوران .. شدينا طريق رجعة وشكون قال داك دار عمرنا غارجعو ليها .. فالطريق تلاقينا عمي العريس واقف مع واحد البنت شاد ليها فيديها ومن البوز لي دايرين باااااينة كايناقشو القضية الفلسطينية هه .. إيوا محس براسو تا جاوه جوج بونيات فالعين الواحدة من عند بطلنا العزيز .. رجع لطنوبيل وكسيرا .. هو يسب ويعاير والعروسة تبكي وتندب وجداتهم تولول وتستغفر وأنا مكيمشة ماعرفت باش تبليت .. مهم طريق لي جابتنا ماشي هي لي رداتنا .. وعرفت بلي حنا مراجعينش لدار .. بغيت نقول ليه ينزلني ولكن ظلام طاح .. سكتت وفبلاصتي تكمشت .. وهو واقلة نساني بلي أنا معاهم وزايدون مداها غي فيا همو كبير وموصيبتو كتر .. الحاصول ماوقفات طنوبيل تا طلع الفجر وشرقات شمش ديال نهار جديد .. فقت ونعست وفقت ونعست .. و أخيرا وصلنا .. وقفنا حدا واحد جبل .. ناري كانو غايطيحو ليا الما فركابي كن قالولي دار فوق داك جبل .. ساعة بانت ليا دار قدامنا .. نتفست تنفس الصعداء هما دخلو وانا بقيت برا بغيت نصوني على عواطف نطمنها عليا ونعاود ليها شنو جرا .. ولكن مالقيت تا شرطة ديال ريزو .. بديت كنطلع شوية فداك جبل عالله كنقلب .. كاتبان وحدة يالاه كنبغي نصوني كاتمشي .. بقيت طالعة طالعة طالعة ..وانا حاطة عيني على تليفون .. تا بانو ليا جوج عاد وقفت .. عيطت ليها وهضرت معاها وقلت ليها فأقرب فرصة نجي لعندها وتحلفت عليها لا تمشي لدارهم بلا بيا .. يسيقو ليا واليديا الخبار يقطعو ورقتي من لحالة المدانية .. وأنا مزالا كنبكرك ونهدد وهو يطفى ليا تليفون ديشارجا .. لعجب كان عامر ؟؟.. باتري ديال شينوا أش كانتسنى منو .. المهم داكشي لمهم راه قلتو .. هزيت راسي نشوف فين أنا .. لقيت راسي جبل كلو طلعتو .. لاااا مستحييييل .. وانا باقي كنلوي راسي كي الحنش بانت ليا واحد دار الفوق شوية .. نكمل ليها نطلب ليهم كويس ديال لما ولا نرجع منين جيت ؟؟..بعد أخد ورد ومد وجزر مع راسي قررت نكمل ليها .. وياك أنا غير امرأة شارفة ماعندهم ما يديو مني ... أصلا مكانتش بعيدة دغيا وصلت ليها شهقت وعيني حوالو ورقبتي عواجت ملي بديت نبركك.. وااا شحال كبيرة .. 100 % غاتكون غير ديال شي سياسي بو كرش ولا ديال شي مافية كايخزنو فيها الحشيش

-أخخخخخ كن كانت داري نعمرها دراري .. وشي راجل كيوت لا لا بغيتو حرش ديال زمان مرجل ومايكونش تيتيز يحس بجنابو.. وشي جوج خدامات ولا تلاتة يعاونوني على هاد الخير ...لا بلاش فلوسهم نحطهم فبزطامي .. مافيها باس شوية ديال الغمولية كتقوي المناعة .. لا لا صافي أنا خصني غير لوراق ونمشي لبرشيد .. نمشي بحالي هاد الخير كامل ماشي شريبة

ضرت نمشي بحالي .. وانا نسمع شي صوت من لور قاصدني

-أش حب لخاطر أشريفة ؟؟

-شريبة ديال لما تلقايها فجنة إن شاء الله

-زيدي مرحبا

-لا نتسناك غاهنا

-لا دخلي عليك لامان مكاينش لي يقيسك

-يا بسم الله

كانت بنت تكون قدي فالعمر لابسة سروال دجين وتريكو طويل مرسومة فيه واحد الفراشة مدايراش الفولار .. ووجها مبشور زويونة تگول خارجة من شي فيلم .. مهم هي غادة وأنا تابعاها .. دخلنا لدار جمد فيا دم ملي شفتها من لداخل هادي محالش واش فيها قطرة ديال لما .. واش غانقول ليكم خربة مهجورة تقول دازت فيها الحرب العالمية تالتة الحيوطة مقشرين والأرض مكاتبانش واش بوطون ولا زليج بكترت التراب والغبرة .. تبلوكيت رجلي ماقداتش تزيد .. ولي طيح ليا الما فركابي فاش قالت ليا

-زيدي أ أحلام

مع دار خاوية أحلام تعاودات بصدى شي مائة مرة .. أويلي أش هادشي .. صافي لقيتها

-احم عواطف فيقيني .. راني طولت فنعاس .. فيقيني الله يرحم مك .. أويلي شكون لي جالس حدايا يفيقني هادشي راه مابقاش يعجب

-انت مكاتحلميش هادشي بصح

وتاني بصح بدات تعاود مع صدى .. هنا مابقيتش عاقلة على راسي لي متأكدة منو رجليا مابقاوش هازيني .. يمكن سخفت يمكن غيبت يمكن الله يرحمني ويوسع عليا