عجوز في العشرين الجزء الثامن

فقت مع 6 ديال صباح ماشي حداكة مني ولكن حيت وجه الحاجة حليمة تطراسا فالوسادة .. هزيت صاكي وخرجت برا دار كنتسلت .. تخبيت فواحد القنيتة وبديت كنقاد وجبدت تصويرة جدة كنقل منها لا نزگل شي تكميشة وهادشي كلو على انغام ??عطيني صاكي باغا نماكي باغا نبان ليوم عگوزة ?? من بعد ماساليت رجعت وأنا نشوف وجه البغريرة واقف حدا الباب وكايخنزر فيا صبحنا على الله وماصبحنا على على عبدو

-(بغضب) فين كنتي ؟؟؟

-(بسخرية) كنت فجيبووووتي .. مشيت نقضي حاجتي ياعلى سؤال .. قجني عليها تاهيا .. هاااااه (بصوت الباتول)

دزت فيه ودخلت .. عارفاه دابا محتاجني ومايقدر يدير ليا والو .. تلاقيت مع سي مصطفى كان كايقلب عليا

-حليمة فين كنتي تخلعت ملي مالقيتكش.. بتي ماصبحتي ؟؟

-(بدلع) يتخلع عدوك لي مايبغيك .. علاش كاتقلب عليا أسي مصطفى يكما تكون تكركبتي فيا

-واخفت لا يكون جنون كركبوك من هاد جبل ... بغيتك تمشي مع سي أمين لسوق .. بغا يشري شي حويجات ومويعنات لدار وشي حاجة لحسنى

-ممم واخا .. ولكن إلى تعطت علم جدارمية .. لا يمشي يصفيها لي فشي قنت .. راه لا تقة فعتيقة

خرجت لقيتو كيتسناني فطونوبيل .. نوصفها ليكم ؟؟ بحال والو جاهدات فالحرب العالمية التانية .. بعدا لاندوشين دااااايزة عليها مايحيدهاش ليها طبيب .. تواضعت وركبت معاه فالقدام .. على اخر ايامك أأحلام وليتي تركبي مع واحد عندو سوابق .. كن يسيق ليك باك الخبار يشير بيك لگوانتانمو ديال كوكب زمردة .. وأنا كنفكر فنفسي ماحسيت براسي تا وليت كنفكر بجهد

-خمسطاشرعام وانت فلبنيقة وباقي عاقل تسوگ (عقت براسي ) احم تبارك الله عليك خمسة وخمامس والحرمل فالكمامس راك كبابل أ؟؟ .. ممم دابا كن مجاكش العفو الملكي كن راك باقي مكسل فعكاشة ياك ؟؟؟ گالوليا كانو الخميس يعطيوكم العدس بصح ؟؟ كانو يدير...

-غاتسكتي ولا غاتحسبي سنانك

-غاميكة أش فيهم مايتحسب .. تبقى توزن كلامك راني قد مك لالاك .. عمر شي حد قلل عليا الإحترام .. كلشي يبوس ليا يدي وراسي ويترجاو رضايا .. إلا انت.. زريعة كحلة الله يستر

-واش دابا كتقلبي عليا؟؟؟

-نقلب عليك ؟؟ مصطفى الأغا ؟؟ .. عرفتي بير جريلز ومافيهش هاد نفخة لي فيك .. على من زيناتو ويفطر غابلبخاخش

هنا شفتو زير على يدو و بغا يفراني .. وانا نضربها بسقلة .. وقلبتها تسبيح واستغفار تا داني نعاس .. ما حليت عيني تا حسيت بيديه كاتحركني

-خليني آ مي نعس غير شوية عافاااك (توگضت لقيتو محول فيا عينيه ) شكون انت ؟؟ (أي نسيت مابدلتش صوت) احم اححححح احم .. مال صوتي واقلة تشيرت .. بحال والو تكون سكناتني عيشة

كاع مجاوبني ونزل من طنوبيل وتبعتو

-هو : شنو خصنا نشريو لدار ؟؟

-واقول شنو كاين فدار باش مانشريوهش .. راه تاحاجة مكاينة .. تا غاوجد فلوسك وزيد تبعني

كان سوق كبييير .. وصوت ديال لبياعا وشرايا واصل لسما .. كان موالين لمواعن فقنت وموالين الخضرة فقنت والمفضل عندي"" البال "" فقنت أخووور وكبييير .. أخخخخ كن كانت معايا عطيطيف "عواطف" كن فليناه بياسة ببياسة.. علم الله فين شاداها دابا .. ولكن تا دابا مكاين باس

-أنا : زييييد نمشيو لهيه

-أش غانديرو تما راه كاينة غاجوطية

-أم أم هداك بال كاين فرق بين جوطية والبال .. جوطية كاتباع فيها الملابس المستعملة المغربية .. والبال الملابس المستعملة الخارجية .. ركز على داك الخارجية تلبسو وانت مرتاح .. أما جوطية تلبسو وانت خايف تكون كاتهضر مع مولاه .. على أنا ما قلتلكش شنو طرا ليا ملي تلاقيت مع مولات الحوايج لي كنت لابسة من جوطية .. ضرباتها ليا بواحد مولاتي تريشة شعري بكترة لحفاري لي وسطو تقول فيه تونية .. سيمانة نحك فتومة ..(مشا وخلاني كي الهبلة وانا تابعاه كنكمل ليه ) طلعو حوايج مشفورين .. وااازيد بنتك ما عندها ماتلبس

قنعتو بالجملة لخرة ومشا معايا كيهرنن إيوا وبدينا " هادي تجي قدها .. هادي تجيــني مع لون وجهي .. هادي تقول مفصلة عليا سبحان الله .. هادي محالش تعجبها ولكن أنا حمقاتني نديها ليا .. هااااادي تجي معاها .. ولكن عندها الكرش خليها ليا أنا "

-أجي شفتك كاتخدي غاليك ؟؟

-(هزيت واحد البياسة ختاريتها ليها) لا هادي ليها

-( هز بياساااااات هما) وهادو ليك

-احم (شفت واحد البالة ديال دراري صغار وتلفتو بيها) أيگووووو شحال زوينين .. حسنى باش حاملة ببنت ولا ولد ؟؟

-ماعرفتش

-تاخصك الإعدام ماشي غا الحبس .. كاين شي أب مكايعرفش بنتو باش حاملة ؟؟ من كرشها لمفرقة باينة عندها بنت

وبديت كنعزل ونتخير .. شحال كان حلمي نجي لحويجات دراري صغار أنا و شي راجل ونبداو نتعزلو ونتخيرو .. ومن بعد يخلص هو.. ولكن مع راجل يكون حلالي ماشي عندو سوابق مهم نقضيو بهادشي لي عطا الله .. زهري راه غادي في تحسن ملحوظ .. إيواسالينا البال وكملنا شرا و دوران... تا تلاقينا بمروان خو العروسة البوگوص المرتبط

-مروان : الحاجة حليمة أش كاديري هنا ؟؟ شحال وحنا نقلبو عليك البارح ؟؟؟

-أمين : الحاجة حليمة فين كاتعرفي هدا ؟؟؟

-مروان : الحاجة حليمة اش كاديري مع هدا ؟؟؟

-أمين : الحاجة حليمة اش بينك وبين هذا ؟؟؟

كانو معصبين ومقابلين مع بعضياتهم بحال شي تيار كهربائي .. وأنا فجنبهم قلبي كيفرفر بالسعادة .. أول مرة نشوف جوج رجال طولا وعرضا كيدابزو عليا .. إحساس زوين حسيت براسي أنا هي المرأة القوية دو بونغ سون .. ولكن فرحتي ماطولاتش ملي بدات شتا تصب مجهدة وهما مزال كايدابزو على الحاجة حليمة .. أما الحاجة حليمة إختفت مع المطر