قصتي مع الخليجية الجزء 11

صافي دازت سيمانة جا داك الوفد ستقبلناهم ، درنا واحد لاجتماع هضرنا فيه على الخدمة كان كولشي حاضر واحد لوقيتة و هو يجي دور ديالي باش نهضر نضت شعلت بروجيكطور وريتهم التصاميم لي دررت و بديت كانسبيكي غا ب لانجليزية تا من رؤى بقات مصدومة فيا صافي ملي جلست كولشي صفقلي عجباتهم خدمتي ، سالينا لاجتماع داك الوفد مشا للاوطيل يرتاح فالليل عندنا واحد الحفلة بمناسبة نجاح الصفقة ، كرينا واحد الفيلا كبيرة تما فين غانديرو الحفلة ديالنا ، صافي مشيت عند رؤى هنأتني قالتلي والله ماصحتبلي كاتهدر لانجليزية بهاد الطلاقة قلتلها اوا وشنو كيسحابليك راه كريم هادا و اجرك على الله ههه ، صافي انا هزيت واحد الف درهم من المصروف ديالي مشيت تفرركست مزيااان و دزت عند واحد الحلاق عشيري اسمو مروان تاهو تهلا فيا مزيان قادلي الشعر و اللحية طلعت دوشت و ساليت لقيتها 18:00 صافي جمعت الوقفة شديت طاكسي لعند رؤى باش نمشيو مع بعضنا تلاقيتها هي هاديك مع الباب لابسة واحد الكسوة وردية طويلة و طالقة الشعر و دايرة العكر حمر انا كليتها غا بعيني ههه صافي ركبنا فالطوموبيل تحرركنا و وصلنا للفيلا خرجنا مع بعضنا من طوموبيل كولشي كيشوف فينا جينا مع بعضنا ، دخلنا جلسنا فواحد الطابلة عامرة ماكلة و الشكلاط من كل لانواع و شراب غا الغالي ، واحد شوية و هوما يوصلو نورة و جمال بصراحة مبوكصين جاو مع بعضهم ، بدينا كانهدرو و نضحكو و انا و جمال غا كانشوفو فبعضنا كليتو بعيني مايقدرش يهدر دابا لحقاش عارف كرو غادي نحويه هاد المررة ، انا بديت كانحس بالملل مشيت وقفت مع واحد لابيسين مقابل معاها حتى جا شي حد من ورايا دارلي يدو فكتفي دررت لقيتو واحد من الوفد ، بدا كيهدر معايا بالهليجية ديالو انا قلت ليه سمحلي ماكانعرفش اش كاتقول هدر انجليزي داك ساع فهم كرو و بدا كيهدر معايا ب انجليزية : 

مايد : انا اسمي مايد انا هو رئيس د الشركة لي غادي تعقدو معاها الصفقة 

انا : متشرفين انا كريم 

مايد : فالصباح عجباتني طريقة ديالك فالهضرة و عرفتي كيفاش تقنعنا برافو ليك 

انا : شكرا اخاي 

صافي بدينا كانهدرو شوية حتى طلبلي النمرة قالي باش نبقاو على اتصال نقدر نحتاجك ، عطيتو نمررتي سجلها عندو و مشا ، انا تزيرت مشيت للطواليط لي كاين لداخل غا دخلت سمعت جمال كيهدر بالشوية و خايف يسمعو شي حد كان كيهدر مع شي حد فالتيليفون .

جمال : صافي انا عارف اش غاندير بلا ماتوصيني ا سيدي غادي نبدل العقد د الشريكة د رؤى بالعقد د سيادتكم نعام اسيدي و غادي نربحو هاد العقد 

انا عرفت تما شي حاجا جبدت تيلي ديالي درت فيديو و سجلت لهدرة لي قال كاملة باش نشوف اش ندير معاه ، ولاكن بغيت غا نعرف علاش هادشي كامل على هاد العقد ديال لاماراتيين بقيت كانفكر و مالقيتش جواب ، صافي سلات الحفلة كلشي نشط و كلا و فرح و عاجبو الحال ، ركبنا انا و رؤى فالطوموبيل حنا ماشيين فالطريق و كانقول مع راسي واش نوريها الفيديو ولا لا و فكرت مزيان و قررت نوريلها الفيديو 

يتبع.....