انا بغيت غير نهضر معاه اي كلام غير نشووف واش غادي يعقل عليا ،ساعة والو متفكرنييش معقلش على نهار لي شافني فيه ملي جاب لينا ديك المرا الغريبة فديك الليلة !!
دخلت مزال الدار ف نهاية الكلام وبقينا كنهضرو ومجبدتش ليه شنو وقع وانا نقول ليه !!
عفاك بغيت نسولك على شي حاجة.
قالي تفضل سول شنو كاين ؟؟
معقلتيش على واحد الليلة كنتي وصلتي واحد الجثة معينة المشرحة لي فالمكان الفلاني كنشتاغل فيها انا والوليد واش عرفتيها ؟؟
قالي اه انا عارف المشرحة اولدي سمح ليا معقلتش عليك حيت دزت من شي مشاكل صعيبة.
وانا نقوليه بغيت نسولك على واحد الجتة !!
قالي ولدي اش كتقوول على شحال قدني نعقل شحال هزيت و شحال وصلت شكون باقي عاقل.
قلت ليه لا غير عقل هادي جثة معينة ماتت في حريق بحال هكا فير عقل مزيان انا خديتها منك و سولتك اشنو وقع ليها و شنو حكايتها وانت شفتي فيا و ممرتاحش ومقدرتيش تعاود ليا عليها !!
وهو ينوض من بلاصتو قبل ما نكمل وهو يقولي واش كحلة !!! اعوذ بالله من الشيطان الرجيم .
وهو يقولي خرج من هنا و بدا يغوت عليا ويقوليا متبقاش تجبد ليا سميت هاد المرا تاني ماباغي نعرف عليها والووو انت منين تصلطتي عليا خرج بحالك !!
انا بالعكس مستغربتش من ردت الفعل ديالو انا عاد زدت تاكدت بلي هاد الراجل عارف شي حاجة وبلي هاد شي لي شفت كامل حقيقي وانا نقوليه عفاك برد برد شوية وخلينا نهضرو وانا مغديش نخرج حيت جيت نهضر معاك بهدوء وحتى انت تكلم معيا بهدوء وبغيتك تعاود ليا وهو رفض يتكلم وانا بديت نعاود ليه شنو وقع ليا ولختي والوليد.
انا باغي نعرف منك شحال من حاجة وانت لا ماتكلمتيش غادي تكون ساكت على الحق.
فعاد الحظة جلس وبقا يسمع مني شنو وقع ليا ولختي والوليد من نهار جات هاد السيدة المشرحة.
وهو بدا يهضر بلا منطلب منو والووو قالي شووف اولدي نصيحة مني تخلص من هاد الجثة بأي طريقة قبل ما يوقعو تاني شي مصائب !!
لوحها الكلاب ولا دفنها ولا لوحها فالبحر مهم متخليهاش فبلاصتها ديك المرا ماشي طبيعية ديك المرا راها شيطانة !!!
كل واحد تعامل معها بشكل او اخر لازم حياتو تكمل وتقلب.
وحمد الله حيت انت مزال عايش تال دابا.
انا ماعارف لا هي منين ولا اصلها منين انا لي نعرفوو غادي نعاودو ليك ..
واخا انا مبغيتش نتفكر ولكن لازم نعاود ليك.
مهم وصلنا واحد البلاصة وكانت الناس مجمعة تما وكان واحد الحريق كبير بزاف وصلنا وبقينا واقفين حيت الدور ديالنا ماشي هو نطفيو العافية ، الدور ديالنا هو نستالمو الناس المصابين ولا الميتين.
كانو الناس واقفين وعلى وجه كل واحد منهم الخوف انا كنت نصحابهم خايفين من النار لي شاعلة ولكن عرفت بلي الخوف كان من حاجة اخرى.
النار لي شاعلة كانت شاعلة غير من الخارج كانت كتاكل المباني غير من الخارج صافي..
كانت نار مخرجاش من الشراجم كانت دايرة بيهم من الخارج صافي.
عارف النار ملي كتكون شاعلة غير من الخارج والعافية مخرجاش من الشراجم راه بحال ما هكا !!
انا ركزت مع الراجل باش نفهم حيت انا ماشي رجل مطافئ مهم جاني الامر غريب !!
حيت الحيوط شاعلة فيهم العافية بحال شي واحد كب عليهم ليصانص..
الحيوط كانو مشققين وكتخرج منهم النار !!
الناس لي واحلين فالديور كيغوتو على الناس لي لتحت يعتقووهم !!
وسمعت واحد فيهم كيقوول هادي غادي تقتلنا كاملين.
انا عاقل على هاد الكلمة تقالت ، مكنتش فاهم علاش قال داك الشخص هكا معرفتش شكون ولا كيفاش هادي لي غادي تقتلنا ، وفوسط الكلام سمعت واحد قال هادي ملعوونة !!
قربنا من المبنى باش ندخلو ليه وكان مستحيل ندخلو المبنى بأي شكل من الاشكال !!
الباب ديال المبنى كان مسدود وشاعلة فيه العافية بحال شي بركان.
ورجال المطافئ كيضربو الباب بالماء بالجهد ووالو حتى حاجة ما تغيرات !!
وكانت كتحصل حاجة غريبة تاني ، كانو رجال المطافئ كيطلعو السلوم الجيهت الشراجم باش يعتقو الناس وكان السلوم غير كيوصل حتى كيقرب الشرجم وكيمشي الجهة الاخرى بحال لا كان رافض يعتق اي شخص من الناس لي واحلين داخل المبنى !!!
كان واضح بلي هاد الناس صافي غادي يموتو غادي يموتو !!
انا ملي شفت هاد شي واقع بديت نقرا القرآن حيت حيت فبحال هاد المواقف هادا هو الحل لي بقا عندنا ، شوية كنسمع الناس كيقولو نقزو من المباني لي فجنب من السطوحة ونحاولو نعتقو ناس لي واحلين تما وفعلا هاد شي لي داروو بانو ليا شي وحدين كينقزو من الفوق من سطح لسطح..
وغير وصلو السطح ديال المبنى لي فيه العافية ووقفو حيت شعلات العافية ودارت بالدار من الفوق بحال شي صور ديال النار !!
وشوية وهي يتبان خرجات من وسط البالكون لي فالمبنى خرجات والعافية شاعلة فيها بحال شي وحدة خارجة من جهنم.
خرجات وشادة فيدها كتاب !! كان باين كحل وحلاتو ، وفديك اللحظة انا تأكدت بلي ماشي كنحلم ولا كنهلوس ولا مجنون حيت لقيت واحد من الناس لي واقفين التحت كيقول ملك الموت ها هو بان ولكن لا يمكن يكون هو !! كل واحد وشنو كيقوول ، شيطانة خرجات من وسط النار وهدا هو الجواب لي يمكن يكون اقرب من الصح !!!
في هاد اللحظة بدات تشوف فالكتاب وانا نحس بشعور غريب بزاف ، حسيت براسي مكنسمع حتى حاجة !!
عارف ملي تكون انت فقدتي حاسة سمع ؟ مكنسمع حتى حاجة والووووو !!
ششششششش صمت !!
ما بقى حتى شي صوت ديال شي بشر ولا حيوان ، حتى من الناس لي كيغوتو من الشراجم شايفهم ولكن ماكنسمعهمش !!
لقيت الناس لي حداية كل واحد كيضرب في ودنيه ، وهدا معناه اني ماشي بحدي لي مكنسمع والوو .
وانا ما فاهم والووو وشكون لي دار فينا هاد شي ،وحنا نسمعووو واحد الصرخة مرعبة وسط داك الصمت لي كان !!
في نفس الوقت لي سمعنا ديك الصرخة رجع لينا السمع من جديد ولين نسمعو عادي..
وشوية بانت لينا كتقرى الكتاب من جديد وبدينا نسمعو اصوات غريبة مرعبة بحال شي ناس كتصرخ و كتعدب تحت الارض و بحال الارض كتحرك شوية !!
وبلا ما نحس لقيت واحد الجثة طاحت من البالكون وجات قدامي ، قدامي انا !!!
ولا رجال المطافئ ولا حنا صحاب الاسعاف حتى واحد ما قدر يدير شي حاجة كلشي واقف وما فاهم والووو..
كاين لي شاف داك المنضر وسخف الناس تلاحت فدقة وبحال لا بغاو ينتاحرو واش سمعو شي حاجة فالوقت لي حنا كان مشى لينا السمع الله وعلم !!
الناس لي قررات طيح من الفوق شافو شي حاجة حنا مشفنهاش داك شي لي خلاهم ينتاحرو شافو شي حاجة كتر من الانتحار مليون مرة..
كنا ساكتين ما قدرنا نقولو ولا نديرو والوووو معرفناش شكون سبب حيت هي براسها بدات كتصرخ و كتوجع وحتى واحد ما في جنبها وشاعلة فيها العافية وكتشد في عنقها بحال شي واحد كيقج فيها !!!
وفلحظة طاحت من الشرجم حتى هي فالارض بحال شي حد لاحها !!
وطاحت قدامنا ميتة دمها غرق المكان كلو وناس هربت من البلاصة حتى واحد ما بغا يشوفها ولا يقرب منها !!
انا عمري شفت داك المنظر بحال الجحيم فتح ابوابو على ديك العمارة الناس طايحين الارض و دماء والعافية شاعلة فالمبنى انا عمري نسى داك المنظر طول حياتي!!
ناس هاربين كل واحد منين هرب وسيارات الاسعاف والمطافئ ضواو ديالهم شاعلين و الجثة قدامنا منضر كان رهيب وغير طاحت المرا الملعونة
غير طاحت المر والعافية طفات بحدها وشي ناس هزو شي حجر وسدو بيه باب العمارة بحاى لا سدو باب الجحيم..
وعدد الجتث كان عشرين جثة ،في لحظة قتلات عشرين واحد وماتت معاهم !!!
علاش وكيفاش الله وعلم !!
انا من هول صدمة لي انا فيها بقيت مسمر في بلاصتي حتى قالي صاحبي سمير واش انت غادب تبقى واقف هكا ولا شنو هز جوج ديال الجتث وسير بحالك..
قلت ليه كيفاش هز جوج جتث وسير ؟؟
انا راه مبقيت عاقل على والو شنو كاين ؟؟
قالي راه كلشي دا الجتث لي كانو والبوليس داىو تحقيق بزربة بحال لا كانو خايفين وبغاو يسدو الموضوع !!
حتى البوليس لي كانو واقفين تما كانو واقفين وخايفين !!
قلت ليه حاضر حاضر انا غادي نهز جوج جتث ونمشيو.
قالي لا انت ما غادي تهز والو !!
هز غير ديك المرا هي لي بقات صافي .
قلت ليه شنو !!!؟؟؟
نهز ديك المرا واش خرج ليك العقل ؟
قالي راه هزو كلشي وانت باقة ليك غير هاد المرة العفريتة صافي !!
قلت ليه كيفاش ؟؟
قالي اه كيف كاتسمع .
كلشي الجتث تهزو وبقات غير هي هزها و سير ديها المشرحة وخلاص سالينا..
قلت ليه لا انا نهز اي واحد الا هادي !!
قالي عي لي بقات هزها يربينا خلينا نمشيو من هنا.
كان مكتاب عليا نهزها ف سيارت الاسعاف لي انا خدام فيها ونديها المشرحة لي انت فيها طوينة الجتة في واحد الخنشة ديال البلاستيك وطول الطريق وانا كنترعد ومركز مع المراية غادي وكنشوف فيها وكنقوول يمكن تفيق !!
دماغي كانت غادي تنفاجر من التفكير مقادش نستوعب داك شي لي شفت هاد النهار واشنو طرا.
شوية ملي كنت كنشوف فالمراية بانت ليا الخنشة ديال البلاستيك لي لاويينها فيها كتحرك حركة خفيفة جدا !!!!
المشرحة الجزء الرابع
محتوى القصة
يتبع
التنقل بين الأجزاء