قصة المشرحة

انا سمير عندي 25 سنة طالب وكنخدم مع الوليد ديالي مرة مرة وعندي خويا وختي صغر مني سميتها هند هاد شي لي يمكن نقولو على راسي .

الوليد ديالي خدام في مشرحة اغلب سنين عمرو دوزهم ما بين الاموات و الثلاجة ديال الاموات والتغسيل وتكفين الاموات.

قلبي كان قاصح مكنخافش من حتى حاجة انا كنت كنعونو نهز معاه الاموات لي كيجيو كندخلوهم الثلاجة ولا نخرجوهم من المشرحة نسلموهم لماليهم يدفنوهم وخى هكك مكنخافش من هاد شي حاجة وحدا لي كانت كتهز ليا قلبي هي وقت الغسيل ولكن مكنتش كنحضر ليه بزاف.

كانو كيجيبو لينا بزاف المشرحة الناس لي بدون هوية بحال الناس لي محروقين ولا غارقين وهاد شي خاصكم تشفوه ماشي يعودو ليكم ولا تشوفوه فالافلام الملامح ماكيبقاوش كلشي تشوه حتى حاجة ما كتبقا معروفة..

الميت ملي كتشوفو قدامك كتحس بلي غادي يوقف يهضر معاك واخا هاد شي ماشي منطقي وكاين لي كتحس بلي راه غير ناعس وكاين لي كتحس بلي هما قراب من الوحوش ماشي من الناس وكاين لي كتشوف على وجهو بحال فيه شي علامات غريبة وكاين شي اموات كتخاف تقرب منهم على قبل وجهم..

وفي هاد الفترة لي خدمت مع الوليد شفت جتث لي مييت عادي على سرير ولي مييت محروق و لي غرقان

حكايتي بدات مع صوت غوات الاسعاف في نص الليل كنت جالس مع والدي جالسين وكنهضرو كان البرد والشتاء والبرق وقفات الاسعاف قدام باب المشرحة وهبطو منها جوج رجال حلو الباب اللوراني ديال الاسعاف ونزلوو منها واحد الجثة ديال شي حد كانو مغطينها بواحد المانطة وهاد الشكل ماغريبش عليا حيت ديما كيجيونا بحال هاد الجتث لاوينهم فمانط ولا ملايات ولا ميكات كحلين على حساب.

انا كيف العادة وقفت باش نستلم الجثة والوليد ديالي دخل يوجد الثلاجة باش ندخلو الجثة.

سولت داك شخص شكون هاد الميت لي جبتو وشنو سباب الموت ديالوو .

جاوبني قالي بلي هي مرا وسكت معبرنيش معرفتش علاش .

حطيناها فوق البياص وقالي سيني ليا على هاد الورقة وخلاني ومشا بحالوو بالزربة.

الوليد جا يعاوني باش ندخلو الجثة الثلاجة، دخلناها ودااك نهار مجاناش حتى شي حد من غير ديك الجثة سدينا المشرحة بالقفل وسلاسل القديمة كيف هو متعود ومشينا الدار داز النهار الاول عادي نهار الثاني الوليد مريض مقدرش يخدم قالي غادي نتاصل بمدير المستشفى نطلب شي ايام نرتاح شوية ويشوفو شي واحد غيري يخدم بلاصتي ويكون مجود فالمشرحة .

انا بقيت عليه باش نقنعو نخدم بلاصتو باش ميقطعوش ليه فلوس الراحة وقلت ليه خليني نخدم بلاصتك واش متايقش فيا !! 

قلت ليه خليني نزل نخدم راه متعود على هاد شي متخافش.

الوليد رفض فالاول ولكن انا بقيت عليه حتى قنعتو بزز قالت ليه علاه انت شايف بلي انا ماشي قد المسؤلية ولا كيفاش ؟؟

داك شي راه عادي انا نستالم جتث لي كتجي وندخلهم الثلاجة وصافي سالينا ولا لا ؟؟

قالي انا موافق ولكن بشرط !!!

تدخل الجتث التلاجة وتخرجهم تعطيهم تصريح دفن صافي باش تكفن ولا تغسل لا انا نتصرف ونجي اوكي ؟؟

صافي انا وافقت وقلت ليه متخافش انا منديرش هاد الحوايج اصلا غير كون هاني الوليد.

صافي وافقت ونضت هبطت نمشي المشرحة، انا قلت بلي مكنخافش وقلبي بارد ولكن هادي اول مرة انزال المشرحة بوحدي.

كنت ديما متعود على صوت الوليد و صوت الراديو ديالو واغاني ام كلثوم القديمة وريحت السجائر ديالو وصوت ملعقة الشاي ديال الوليد وانا نقول ربي يعطيه الصحة ولاهلا تحرمنا منو ياربي.

حسيت بمعنى انك تبقى بحدك وماشي بحدك فشي بلاصة عادية بيتك ولا داركم !!

راه بحدك في مشرحة وسط الاموات اول مرة كنحس بلي المشرحة كبيرة وخاوية بحال هكا تخيل معيا دابا انت فغرفة صغيرة تقريبا قد بيت نعاس و الزليج ديال الارض ديالها ابيض وفيها 8 ولا 9 ثلاجات ماشي ثلاجة ديال الدار ولا ديال مول الحنوت لي كايحط فيها المشروبات الغازية .

هادي راه ثلاجات فيها ميييتييييين !!!

الموقف كان مرعب طبعا وحسيت بلي انا مقادرش نتنفس مزيان وانا نقول خاصني نخرج قدام الباب نشم الهواء هنا قلبي تقبط عليا..

خرجت وخليت ضوء ديال المشرحة شاعل وقفت قدام الباب وكانت الدنيا خاوية قليل فين كانت مرة مرة كادوز شي طموبيل على الطريق.

فهاد الوقيتة بديت نحس بالخوف بسبب غير معروف حيت بديت نحس بلي شي حد واقف ورايا !!

انا واقف وحاس بلي شي حد واقف ورايا اعوذ بالله من الشيطان الرجيم واش انا تفكير ديالي غادي يزيد يخوفني كثر من هاد الخوف لي حاس بيه ووليت نحس بلي شي حد واقف ورايا !!!

درت نشوف ورايا مكان حتى حد وبقيت نقرا القرآن ونعل الشيطان !!

ولكن حسيت بشي نفس جاية من وراية على قفاية تحت شعري نفس هواء سخوون دافي بحال شي حد كايتنفس ورايا !!!!

درت ورايا تاني نشوووف شكون لي كيتنفس ورايا وانا نشووف المشرحة ولقيت بلي الباب لي قدامي كيتحل واحد اليد خارجة من الثلاجة وكتحاول تخرج منها من غير ما نفكر سديت الباب ومشيت كنجري وانا كنجري وكنقوول واش عفاريت ولا شنو لا لا هاديك المرا لي جابو لينا البارح يمكن مزال عايشة خصني نعتقها مشيت المستشفى

لي فجنب المشرحة ولقيت جوج حراس جالسين كيشربو الشاي وقفت كنلهت بالجري والخلعة .

هما كيعرفوني وغادي يصدقوني لا عاودت ليهم شنو كاين وهما يقولو ليا..

مالك سمير اش واقع ياك لاباس مالك كتجري ووجهك صفر ؟؟

قبل ما نعاود ليهم قلت نوضو اجيو معيا عندي مشكيل فالمشرحة !!!

وحنا ندخلو المشرحة وانا نتصدم !! 

مكان والو الباب ديال الثلاجة مسدود وكلشي هو هداك ..

قالو ليا الحراس فين هو المشكيل ؟؟

قلت ليهم لا لا غير شميت ريحت الغاز وخفت لا توقع شي كارثة ونتحرقو هنا الله يستر ..

صدقوني واخا انا ومصدقتش راسي حيت كانت باينة عليا كنكدب .

بقاو كيشوفو لفي بعضياتهم وهو يقولي حاضر اجي نشوفو الجعابي ديال الغاز ونحيدو الشك.

بقاو يقلبو على ليمن وعلى ليسر وانا واقف قدام الباب ديال الثلاجة لي تحلات وانا عارف راسي داك شي مكنتش كنتخيلوو !!

انا شفت الباب تحل ودراع خارجة منو الله وعلم كون تسنيت شوية كون خرجات كلها من هنا ..

وانا نقول لواحد فيهم عفاك ممكن نسولك ؟؟

بالي خود راحتك شنو كاين ؟

قلت ليه واش ممكن شي واحد من الاموات يكون جا هنا المشرحة وهو مزال ما مات ؟؟ 

قاليا اه ممكن ولكن هاد شي قليل فين كيوقع !!

واش شي حاجة بحال هكا وقعات هنا ؟؟

قلت ليه لا لا مكاين والووو.

صوت راجل خلعني وقال بسم الله رحمان رحيم شنوو هاد شي ؟؟؟؟

وعينيه خارجين كايشووفو تحت رجلي ؟؟؟

انا تخلعت وشفت تحت رجلي باش نشوف شنو كاين ؟؟؟؟ 

وانا نغووووت بجهد تخلعت بزز مني !!!!

الارض لي انا واقف فوق منها وتحت الثلاجة كانت عبارة عن بركة الدم وانا واقف فوق منها !!! 

بقيت كنهز فرجلي باشي نحييد من فوق الدم و لحت الحداء ديالي لي كان عامر بالدم لحتو.

والغريب فالأمر هو الدم كان غير تحت مني وتلاجة نضيفة هاد دم جاي منين ؟؟؟؟

وهما يقولو ليا واش انت نيت كنتي جاي تورينا هاد الدم ولا شنووو ؟؟؟

لا لا انا جبتكم تشوفو ريحت الغاز جاية منين الدم مكانش هنا !!!

واش هاد شي متعودين تشوفوه هنا ولا لا ؟؟

لا اول مرة انا انشووف هاد شي !! 

المهم سلام عليكم غادي نمشيو من هنا.

اجيو نتوما غادين فين ومخليني ؟؟

لا حنا غادي نمشيو هاد البلاصة حرمة ميتين واش بغيتي الدم يجي علينا كيف جا عليك هاد شي راه غلط غلط هاد شي لي وقع ليك غلط.

لا عفاك متخليونيش وتمشيو !!

وهو يمشي واحد فيهم والاخر بقا معيا وقالي عرفتي حل الثلاجة لي قدامها الدم !!

لا منقدرش حلها انت !!

كيفاش نحل انا الثلاجة شكوون لي مكلف هنا انا ؟، 

شنو داير انت ومخبيه علينا ؟؟

لا انا مدرت والوووو شفتك باغي تلصق ليا مونتيف انا غير خايف ومنقدرش نحل باب الثلاجة !!

بلاتي انا نحل الباب وقفت قدام باب الثلاجة وقلت بسم الله رحمان الرحيم ، بسم الله الرحمان الرحيم ،بسم الله الرحمان الرحيم.

ايدي مقدارش تحل الباب مقدراتش تشد يد الثلاجة !!

الراجل قالي تا حل الباب سربينا !!!

اول ما حليت الباب كانت المرا لي دخلت البارح بالليل انا والوليد الثلاجة وكانت متكيا على الباب غير حليت وهي طيح عليا انا غوت بالخلعة .

وحنا نسمعو صوت شي حد صرخ واحد الصرخة كتخوف كتر من الخوف لي انا فيه ..

يتبع