البرهوش الجزء 39

رجعنا لدار مداني نعاس غير بزز مزال شاداني لخلعة عنداك غير يعرف بلي تزوجت أنا ومو ويجي يصفيها ليا وأنا ناعس.. لغد ليه فقت فطرت مع دار لواليد ولواليدة ومهدي ومراتو باركين داوين فنفس لموضوع مهدي ولواليد مطلعييينها عليا على صباح هيا راه خيبة حتال تعاويد تزوج لصاحبك بمو.. خرجت غادي لدار عند عبدو وهيا تلصق فيا مرات لخوادري نوصلها معايا لشي جامعة فطريقي غادين فكرتها فين شافتني شحال هادي عرفتها قبل ميشوفها مهدي.. وصلتها وغادي عند مهدي قربت لدار وهو يصونيلي سيد رجع ومزال تيعيط فشي وقيتات لهربة جاوبتو سلام سلام قاليا دوز لعندي لدار قلت ليه أنا كنت جاي فطريق عند لباب دبا خرج لعندي.. باش وقفت خرج لعندي هاز واحد صاك ضربو فلكوفر وطلع حدايا.. نعتلي واحد لأرض ديالي خارجا على لمدينة غادين ليها قاليا واش عاود عيطلك خونا لي باغيك تقسم معاه؟ قلت ليه لا قاليا صافي نساه دويت معاه معمرو يعاود يقرب ليك ولا لفلوسك.. تنسول فيه واش غادي تعاود تمشي تاني؟ قاليا لا مغادي نعاود نمشي لحتى بلاصة مبقى عندي علاش نخدم مع شي واحد هاد لخدمة لي فاتة هيا لخرة ديالي غادي نهز عائلتي ونسافر لشي بلاصة أخرى.. واش هدا كيضحك عليا قالك غيدي عائلتو وغيمشي معلابالوش بلي غيدي مراتي معاه.. قاليا سكت حتى نوصلو خلينا نسمعو لعضومتنا شويا قلت ليه وخا سيد راجع مراشقالو على والو وصلنا قاليا وقف طوموبيل وسط ديك لأرض حدا واحد شجرة قلت ليه وخا مشيت تحتها نزلت لاش جايبنا هنا واش دافن شي كنز هنا؟ وهو يجبد داك صاك حلو فيه بالة وفاس وايلي واش بصح كين كنز؟ قاليا أه كان مخليه ليك لحاج خونا حسب 4 لخطوات من شجرة قاليا حفر هنا وأنا من نيتي تنضرب ونعاود غير هبيلة وقالو ليها زغرتي خونا بارك تيتفرج وأنا تنضرب تنضرب بداك لفاس شي ساعة وصرف وأنا تنضرب شي ميترو قلت ليه ساط راه قريب نطلع لما واش متأكد كين هنا؟ قاليا تكا فديك لحفرة بقيت تنشوف فيه واش كتضحك؟ وهو يهز ديك لبالة فيدو قاليا شحال من مرة قلت ليك بعد على لواليدة مبغيتيش نتا سباب هادشي دبا تكا تما ديك ساعة وخا تنموت بالصدمة ولخلعة ولكن لغريزة ديال محارب أساط قلت ليه وخا ملي غيكون قبري خليني نوسعو قاليا لا باش هزيت داك لفاس ضربتو لرجليه شمال أسطوري باش طاح طلعت أنا من لحفرة جريا وحدة فداك لحرة اساط مكنتلفتش كنسمعو غير تيسب وتابعني غيجي واحد نهار أينفعوك غير رجليك عرفتي بالخلعة تزعزعليا (GPS) كتباليا لحاجة قدامي وكنضرب فيها وباش طايح باش نايض أساط أصلا الهروب نصف الشجاعة تيباليا غير واحد لواد قدامي صافي غادي نقز أنا خفيف هو تقيل مغاديش يقدر ينقز ولا يعوم بحالي واحد مولاتي تنقيزة خونا مقدرش ينقز عرفتي واقف كنرتاح وتنشوف فيه غلبات عليا ضحكة تنقوليه خويا ندويو غير بالعقل والله حت.. متقولش ليا خويا ونتا تزوجتي بلواليدة خونا غادي تيجري لقنطرة قريبة لتما باش يقطع لعندي تندورها فدماغي خونا مسوفلي أنا عييت غادي غادي يشدني ولا مكينش لي يفك تما وأنا نرجع حتى نرجع بغيت نقز تاني مصدقاتش لعيد غير مرة فلعام كملتها عومان غادي تنجري لطوموبيل سابقو واحد شويا طيارة نيشان لطوموبيل سارد وحالتي تنديماري وهيا تعكس بالخلعة مبقيتش عارف كيفاش نديماري غير شعلات وأنا نعطيها خليت ليه غير لغبرة وخليتو تما غادي نيشان لدارو ومخلطة دعوة خلعة وفرحة وضحكة وصلت لدار تيحبس فيا سيكيريتي قاليه عبدو متخليهش يدخل وهيا تباليا سعاد خارجة جات كتجري مالك شنو واقع؟؟ قلت ليها عبدو عرف شنو واقع كان غادي يدفني فقبر حفرتو بيدي وحق الله ما مطلعها زربي جمعي حوايجك واحد نص ساعة غادي يكون هنا هزي أي حاجة بغيتيها قالت ليا صبر دخلات كنتسنى فيها وتنغسل من واحد روبيني فزنقا تراه حالة لكلاب واحد طوموبيل بحالا كنت تنحارب بيها كلها تراب خرجات وحنا نتحركو قلت ليها ديك لهضرة لي قلتي ليا شحال هادي ديال نبعدو واش مزال فكلمتك؟ قالتلي أه ولكن يلاه رجع ومزال ما.. دبا هو عارف مغاديش يعطلني حتى تشوفيه تاني تنقولك سيد كان غيدفني حي.. غادين تنعاود ليها وهيا كتضحك كتضحك ضحكيي نتي لي طالعا ليك أصلا بلاد ديال باك صاحبي ديروها بزوج وفلخر يقولك كلشي من دري هو لي شيطان لمرا مسكيينة(غي تنضحك😅) وصلنا لدار لواليدة كتسول أويلي مالك شنو واقعليك؟؟ مقديتش نقوليها هزيت شي حوايج ديالي و وراقيا وفلوس وخرجت بزربا تحركنا فين غنمشيو فين غنمشيو كتباليا غير دارنا لقديمة داك درب ديما عامر ولكوميسارية قريبة لدار وأصلا مغاديش يعرفنا تما.. مشينا لديك دار لواليدة نكحات ليا تيليفون معيطالي كتر من 100 مرة عيطتلها قلت ليها بلي عندي شي مشاكل مع عبدو إلا جا تيسول عليا فدار قولو ليه بلي هزيت حوايجي ومعارفينيش فين مشيت غادي يبرد وأنرجعو.. وهيا تبدا قلناااهاا ليك ونتا مكتسمعش راسك قاصح كدير غير لي.. بزز باش سكتها وقطعت تنشوف فختنى صافي رتاحيتي دبا فاش قلتيها ليه؟ كتحلف ليا مقالتها ليه.. اوا كيفاش عرف عاااد تفكرت ديك خيتي لي سيفط حضرات لينا فاش تزوجنا مشاااتلي من بالي واااع 100% هيا لي قالتها ليه ولا مراتو مقداتش تصبر.. بقينا فدار لواليد ديما تيخلص لما وضو.. بارك تنعاود ليها هادي هيا دار لي كبرت فيها.. خرجتها تقدا وحطيت طوموبيل للفاج تغسل كانت حاالتها مسالات حتى وجدات طوموبيل حطيتها عند واحد لغرديان ورجعنا لدار كتوجد فشي حاجة وكتسول فيا شنو باغي دير قلت ليها ديار ديال الله تنقولك هربتليه غير بزز غير لقطة باش هربتليه خاص يديروها فيلهم بحال (127hours) ولا(buried) نيشان لبوكس أوفس.. بدات كتعاود ليا حتى هيا كيفاش وقع ليها حتى عطاتو لخيرية فاش كانت صغيرة قطع ليا فقلبي حولو معندو قلب ولد لعبد مدوز لحرب.. أول مرة تعاود ليا هيا داكشي وبقات كتعاود وأنا عاجبني لحال بحال فاش تيبدا يعاودلك لواليد فاش كان فلعسكر المهم داك نهار كما تيقولو هو اليوم الأول لبقية حياتي...