ادم: اه ... ختك حملات من العلاقة لي دارت مع داك الشماتة ... هي غلطات عندكم الحق تغضبو وديرو ديك ردة الفعل ولكن ماتنساوش حتى هي تظلمات... كون كنتو موفرين ليها داك العطف و كنتو حاضرين كرجال فحياتها ممانتش غتلجأ للبراني ... كان تعاملكم معاها قاسي وكتفرضو عليها الوجود ديالكم ... شنو كان غيوقع كون ضسرتوها وخليتوها تاخد الراحة بيناتكم ... تنصحوها بالكلام الحنين و الرأفة فالتعامل ... تصاحبو معاها وتعطيوها الحنان لي خاصها ... حيت هذا طبع كل انثى كتبغي غير الحنان والعطف والاهتمام مالقاتوش فاقرب ناس ليها قلبات عليه فجوايه اخرى واخا النتيجة ... غتقول ليا بسمة تربات نفس تربية ختها مالها خرجات شادة الطريق .. غنقول ليك ما هي غير مسألة الشخصية شخصياتهم مختالفة .. بسمة خوافة ولكن حوراء عندها شوية شخصية متمردة واخا هكاك كتسمع الهضرة والنصيحة و الدليل هاهي راجعة ليكم دابا ... حوراء راه رجعات لقرايتها و واجهت بزاف الامور خايبة .. منها نسب ولدها و ولات محامية لاش توقف على شؤونها راسها ... لي بغيت نقول ليكم .. بنتكم ولات اقوى ... ومتحملة مسؤولية بوحدها ... وشحال من وحدة مقداتش دير هادشي لي دارت هي .. كان ممكن طيحو و لا تلوحو فالخيرية و حتى فاش ولداتو جاتها فرصة باش تبيعو وتربح فلوس ... ولكن مادارتهاش ... كان ممكن تخرج وتبيع لحمها ولكن مادارتهاش ... صبرات وكافحات وخدمات و تمحنات و قرات و صهرات الليالي و ها المتيجة قدامكم .. هي ماقدراتش تواجهكم .. غير خوفا منكم ... كيفاش بغيتو تيق فيكم وهي مالقاتكمش فالشدة ... علاش متدافعتوش عليها وخديتو حقها .. الغلط ماشي غير ديالها ... ديالكم نتوما لي موقفتوش معاها حتى هربات ... عطيوها فرصة 5 سنين دازت راه خاصكم تكونو تهدنتو و يكون ولو غير شوية ديال الشوق ليها ... و هانتا شفتي حفيدك و بغيتيه و نتا ماعارفوش من لحمك ودمك ...
حوراء قربات لباها وجلسات عند رجليه ... و كتشوف 5يه بعيون باكية ..
حوراء: ندمت ابابا. .. ندمت لي ماحافظتش على راسي ... سمح ليا حيت وطيت ليك رايك للارض و رجعت نصلح الغلط ديالي ... بغيت غير رضاك وتسامحوني نتا وخويا ... محتاجاكم فحياتي ... عافاك ابابا مترضهاش فوجهي رحمني ابابا ...
عبد الرحيم حط امجد وتحنا هزها من درعانها وخشاها بين ايديه ... عنيه دامعين و حناكو طايحين بالحزن ... وشحال زوين داك الحضن لي تخشات فيه بكات حتى تقطع فيها النفس ... كتحس بايديه على ظهرها كيرلتو و كتزيد فوتيرة البكاء دورات ايديها على عنقو مزيرة عليه ... واخيرا حسات بيه كأب و داك الامان لي غير مجرد وجودو فحياتك كتحس بيه ... كتسمع فيه كيقول سمحيلي ابنتي و هي مامتيقاش شنو زعما .. صافي سامحها ... سالاو همومها كولشي مخاوفها و عوائقها تحلو ... جرها قدامو ومسح دموعها ..
عبد الرحيم: ديت على كلام الناس و نسيت بلي نتي طرف مني واولا عليهم ... ماحميتكش وماخافظتش عليك ... توحشتك و كنت خايف عليك 5 سنين دازت عليا انا وخوك صعيبة وحنا ماعارفين والو ...
حوراء: لا ابابا انا لي غلطت ... انا لي ماسمعتش كلامك بحال ختي ... سمح ليا ابابا سمح ليا ... حتى انا توحشتكم
عبد الرحيم: صافي مسحي دموعك ابنتي .. داكشي فات وحنا ولاد اليوم ... مرحبا برجوعك ابنتي و مرحبا بحفيدي تاهو ..
تحنات كتبوس ايديه وتعاود وهو كيضحك بعينين باكيين ..
عبد الرحيم : الله يرضي عليك ابنتي ... انا فخور بيك ابنتي ...
حوراء: الله يطول ليا فعمرك ابابا ...
دارت عند يوسف كتشوف فيه حتى حل ايديه و دغية مشات لعندو عنقاتو وعنقها ... عمرها عنقات خوها حتال اليوم .. شي حاجة فشكل ... حسات بيه زير عليها و لاس راسها و قابلها معاه ...
يوسف: كون تعرفي شحال قلبت عليك خوفتيني عليك اختي ... عرفت بقيمتك واخا مكنتيش كتسمعي الكلام .. ادم فيقني على شحال من حاجة .. كان عليا نكون صديق لخواتاتي ماشي ولكن حيت انا الكبير كنت صارم شوية معاكم .. ولكن ربي لي شاهد عليا غير لمصلاحتكم .. دابا منين سمعت مناش دزتي حتارمتك و كبرتي فعينيا وحتى انا فخور بختي الصغيرة و مرحبا برجوعك نتي و ولدك ... كولشي ديالك باقي فبلاصتو ... عمرنا قطعنا الياس بلي غترجعي لينا ... واخا هادو دارو الغلطة منين عرفوك فين كاينة وماقالو لينا والو ..
حوراء: كولشي مني اخوبا انا مابغبت بان حتى نصلح اغلاطي وتكومو راضيين عليا ...
يوسف: صافي نساي اختي ... و سمحي لينا تاحنا كملنا عليك ... كنت ضربتك داك الضرب لحد دابا كنتفكرو وكنكره راسي عليه ...
حوراء: راك قلتيها نساو علينا داكشي ... لي كيهمني هو يصفى خاطركم من جيهتي ...
يوسف رجع عنقها ...
عبد الرحيم: وا حgلي كنقول هاد الفزغول خرج كيشبه ليوسف فصغرو ...
يوسف: شتي خرج لخالو ...
سناء: راه خرج لماماه ويوسف حيت هما لي كيتشابهو ..
بسمة: هههه وا اما فين طوعتوني ...
سعاد: وا حتى تزوجي نتي وخطيبك و ولدي شي فنيكيش يشبهك هههه
هبط امجد من رجلين جدو ومشا عند خالو لي حدا ماماه هزو وجلسو عندو و باسو ...
يوسف: عرفتيني شكون انا ...
امجد: لا ...
يوسف: انا خو ماماك ... يعني خالك ... من دابا لقدام غتقول ليا خالو ...
امجد: ههه واخا اخالو ههه
دوزو النهار على طولو معاهم ... تعاودو و حيدو الوحش من بعضياتهم ... واصر عليها باها باش ترجع لدارها ... و هي فرحات اكتر غترجع بيناتهم و قالها ليها ونا فكرش فكلام الناس ... باينة تعلم درس من هروب بنتو...
دازو ايام عاونوها ادم ويوسف وقدرات توفر ابارتومو زوينة دارتها مكتب ديالها ... فرشاتها قادات المكاتب وداكشي لي لازم ... دارت اعلان بلي خاصها شي سكريتر ... و دغيا قدرات توظف وحدة ومباشرة رفعات قضية على نسب ولدها ... بطبيعة الحال ساندوها خوها وباها ووقفو معاها ... و اخيرا قدرات تسجلو ... امجد العماري على اسم امو حوراء العماري ... كتشوف فيها كتضحك ... فرحانة واخيرا كولشي ولا هو هذاك ...عايشة بين عائلتها و وولدها قدرات تاخد حقو ... ولات محامية وقادرة تهز ولدها بوحدها مامحتاجا حد ... اليوم الاول ليه فالمدرسة واخا تعطل بشي شهراين ولكن تقبل حيت كان كيقرى فالدار ...
متكية فالبيت بعد نهار طويل ديال الخدمة ... دخل عليها امجد كيجري و محيح ...
حوراء: مزيااان ولدي الزوين دغيا دار الصحاب عجباتك المدرسة؟ ..
امجد: اه اماما عجباتني بزاف ...
حوراء: اوى مزيااان ... واعنقني راه توحشتك ...
عنقها وتلاح عليها كيبوسها ويضحك ...
حوراء كتلعب معاه و مقتانعة بلي الكريقة لاش كتربي ولدها صحيحة ... كتفكر الاغلاط لي دارو معاها واليديها وكتصححهم فتربية ولدها ... ديما كدير ليه استنطاق و كتعرف تحركاتو فالنهار كامل ... فين مشا وفين جا ومعامن كان و اش كلا واش نعس ... كولشي... بهاد الطريقة غيتعلم هو يعاود لماماه بلا متفكرو هي ... مصاحبة معاه وكتعاملو على قد عقلو ... و هادشي مزيان فتربية الولاد ... حتى الى تعرض لشي مواقف .. بحال التحرش الجنسي غيجي ويعاود لماماه حيت هي محيدة داك الحاجز و هو عارف بلي هي صديقتو و يقدر يتيق فيها ... وهي غتعرف كيفاش تعامل مع اي وضع ... هكا غيكبر صديق امو احسن ما تكون غير الام ديالو لي عندها سلطة عليه ... و كيتسنا غير تعاقبو على اي فعلة دارها.... عمرها ضرباتو ... و لا استعملات العنف فتربيتو .. حيت عارفة مزيان بلي هو ولد صغير و فسن حساس يقدر يتأتر باي حاجة ... واصلا فات الوقت لي كانو فيه الولاد كيترباو بالضرب .. دابا زمان اخر مابقاتش كيقضي فيهم الضرب وانما الحيلة .. الاباء خاص يكونو اذكياء فالتعامل مع ولادهم ... و هادشي كينطابق حتى فالتعليم ... علاش داك الضرب وفاش نافع ... اشنو هي منفعة المدرسة الى كان التلميذ يجي كل صباح و هو خايف ومرعوب وحتى شهية الفطور مسدودة وهو خايف من العصا لي غياكل من عند الاستاذة ... الاساتذة خاص تكون عندهم واحد المنهجية و طريقة فالتعامل مع التلامذ بعيد على الضرب والعصا ...
يوسف: والو ... عرفتي غنجيك من الاخر .. عجباتني و بغيت نعرف واش مرتابطة ولا شي حاجة ...
حوراء: هههه ااااه فهمت ...
يوسف: شوفي اه ... واللهتا غنجمعها معاك ...
حوراء: هههه صافي غنسكت ... هي مامرتابطة ماتاحاجة ... و بصراحة كنت باغيا نجبد معاك هاد الموضوع غير خفتك تقمعني ... بغيتها ليك .. ظريفة وبنت الناس ...
يوسف: ياك بعدا ... نتي ختي و عشتي معاها 5 سنين يعني عارفة عليها كولشي ..
حوراء: ااه اخويا ... هي لي سانداتني و علماتني نشوف ايجابيات الحياة ... هي براسها دوزات وقت خايب .. راك عارف كبرات بلا اب .. عمرها بغات تبين هادشي لخوها وامها وديما كنحصلها كتبكي بوحدها ... تستاهل الخير تاهي مسكينة . وانت واخا قبيح واحد الشوية ولكن راك ظريف و حنين واخا كتبين العكس ...
يوسف: ههههه وهي لا هضرتي معاها وحاولتي تعرفي واش كتفكر فالزواج .. راك كتشوفي فيا خاصني ندير داري تانا ...
يوسف: وا عنداك ندتبقاي تقولي ليها قبيح وعصبي و داكشي ... قولي ليها ظريف و حنين و داكشي هههه القصة منشورة على قصص مدرب..
حوراء: هههههه واخا اخويا الحنين ...
يسوف: نعول عليك ...
داز عام ونصف ...
ادم و بسمة تزوجو وسكنو مع سعاد حيت مقدرش يخلي امو بوحدها و بسمة مالقاتش موشكل حيت تفهماتو واصلا هي وياها متفاهمين وبحال الام وبنتها... غزلان ويوسف تزوجو و دارو دارعم بوحدهم ...
حوراء باقية مع واليديها... قدرات دير بلاصتها وتشهر فظرف سنة ديال الخدمة وهادشي بداك الاصرار و الجدية فالعمل لي ولفات عليهم ... ولدها ديما كيسولها على الاب ديالو و هي كتحاول ما امكن تهرب من هاد الاسئلة حتى يكبر وتقدر تفهمو بعض الحوايج لي مغايفهمهمش دابا ... ماقدراتش تكدب عليه ...حيت غيكبر يعرف غيلومها ... دارت طوموبيل و سيفاطات والديها للحج ... رجعات مهلية فراسها ... ولات كتلبس واحد الستيل ديال اللبس مستور وعلى الموضة حيت ماقدراتش تدير الخمار وهادشي عن اقتناع كيقولو قدما زاد فكر المرأة قدما تستر جسمها... و دخلات لاصال تقاد دوز فيها الوقت و تنفس على الطاقة ديالها و نيت تدير فورمة زوينة ورشيقة وصحية ...
كل سبت و احد كتخصصو غير لولدها ولي بغاها كديرها معاه ... نخارطات فمجموعة ديال الجمعيات لي كيخصو المرأة عامة وكتطوع باش تعاونهم فالقضايا القانونية ديالهم ... تشهرات بين الجمعيات و دارت بلاصتها ... اهدافها كلهم كيتمحورو عليها هي و على ولدها وهكا عايشة و سط روتينها اليومي ...
اليوم السبت مواعدا ولدها يمشيو يلعبو فسندباد ... لبسو ب2 و طلعاتو لور فالسيارة و و ركبات ...
حوراء: والآن ....
امجد: الى سندباااااد ...
جوراء: وووووو ....
امجد: ههههه ماما نتي حمقاء ...
حوراء: ههههه الحمق هو نتا ...
امجد: لا نتي لي حمقاء ديما كتقولها ليك طاطا بسمة وجداتي
حوراء: وانت يا العفريت كتبقى تضحك فبلاصة ماتدافع على مامي ...
امجد: لا ... كندافع عليك حيت انا كنبغيك غير نتي ...
حوراء دارت راسها سخفت وشادة قلبها...
حوراء: احح ا قلبي ولدي كيبغيني ...
امجد: ههههه
حوراء: ههههه فراسك انا لي كنبغيك و كنموت عليك و كنتسطى عليك
امجد؛ لا انا اكتر ...
حوراء: نتخاطرو ...
امجد: علاياش ...
حتى نوصلو ونقول ليك ...
وقفو فالسطوب و هي محيحة هي وولدها فلوطو طالقين المزيكة وكيغنيو مامسوقين لتاحد ...السائق لي واقف حداها لفت انتباهو الصداع لي حداه ... شاف امراة باقية فمقتبل العمر كتغني لحال شي درية صغيرة وكتضحك ... دايرة الحجاب و وجها بريئ مافيهش الماكياج ... هادشي كولو قشعو فديك اللقطة لي سها فيها ... عجبو المنظر ديالها... فلحظة قال واش هادي حمقة كتغني بوحدها حتى قشعها مدات شي حاجة لور عاد عرف بلي هازا معاها وليد صغير .. جا الضو الاخضر و زادت ...
عاد فيقو صويت صغير لور كيقول ...
.....: وا بابا نعستي ولا مالك ههه
.....: هههه انا معاك احبيبة ...
زاد بالسيارة وكتبان ليه سيارتها قدامو حتى وقفو فالنفس المكان ...
خرجات حوراء و حلات على ولدها السيارة وخرجو مشادين ب2 ... غاديين وكيهضرو مع بعضياتهم ... دخلو كيتمشاو ... حتى وقفو فلعبة و طلعو فيها كانت عبارة عن قطار غيدور بيهم فواحد المسار عالي ... داك الشخص الوقت كولو وهو وراها مافهمش علاش دار هكاك ولكن باينة الفضول ديالو من جيهتها لي قادو ... ركب هو وبنتو فنفس المركبة ... ولكن بعاد عليهم ..
حوراء: هانتا غنركبو ولي ماغوتش هو لي كيبغي لاخر اكتر...
امجد: صافي مشات ...غنغلبك ...
حوراء: انا لي غنغلبك ...
امجد: احنا غنشوفو ...
بدا كيتحرك بيهم وغادي وكتزيد السرعة ... امجد بغا يطلق الغوات وسد فومو بايديه وحوراء بدات كتضحك ...
باغي يغوت بديك السرعة وداك العلو ولكن خاصو يربح امو باي تمن ويتبت ليها بلي كيبغيه ... شافتو مصر وهي تغوت باش تخسر قدامو و هو يغوت كيف بغا ...
غوتات وشاف فيها كيضحك ... و حماوها غوات ب2 ... حتى سلات الحولة وهبطو ...
مشات حوراء شادا فولدها ... وخلات الراجل شاد بنتو و كيشوف فيها بخيبة امل ... صدقات مزوجة وعندها ولد ...
هو: اوى احبيبة ديالي ... صافا دابا ...
البنيتة: صافا ابابا ... مابقيتش دايخة ...
هو: نمشيو ناكلو شي حاجة ...
هي: بغيت 2 بيرجر و بزاااف الفريت و كولا والكلاص
هو: هههه غتولي عندك الكريشة ... و تولي طبيبزة ...
هي: لا بغيبتهم ..
هو: هههه ياله ناكلو دابا و نديرو السبور ابخي...
هي: اه ... ياله ...
مشات حوراء وولدها من لعبة للاخرى ... شبعو سقاطة ومن بعد جلسو يتغداو .. طلبات دي سوندويش و كولا و جلسو ياكلو وهما كيهضرو ...
لاحظت عينيه فين كيشوفو... كانو قدامهم عائلة فيها ام واب و 2 وليداتهم ... كيهضرو ويضحكو بيناتهم ... شافت فعينيه حزن ... هنا عرفات راسها واخا دير لي دارت بلاصة الاب ماكايعمرها غير الاب ... واخا كدير لي فجهدها باش مايحسش بهاد النقص ولكن هذا هو الواقع ...
حوراء: امجد ... الى كنت ماماك وعزيزة عليك ماتبقاش تجبد ليا هادشي ...
تراجع امجد بحال العادة وسكت ...
بقى فيها ولدها بزاف ... الشي الوحيد لي ماقدراتش توفرو ليه ... هو الاب ...
سالاو النهار ديالهم ورجعو فحالهم لدارهم ...
بعد اسبوع كانت عندها ندوة مجموعين فيها مختلف الجمعيات ... و كانت غتمتل وحدة من الجمعيات لي منخارطة فيهم ... يعني كانت غتقدم واحد العرض بسيط ...
طلعات تقدم عرضها ... شافت كتير من الناس حاضرين رجال وعيالات ... وصحافة كيلتاقطو الصور ... حسات بالخوف فالاول و لكن بما انها واجهات بحال هاد المواقف في فقرايتها فراه عندها خبرة صغيرة ... رسمات بسمة صغيرة وبدات كتهضر بتلقائية ... فوسط الحضور كانو جالسات 2 منخرطات كيتصنتو ويعضرو ...
قصة منسوخة من 9esa.com.. ....: كتعجبني هاد المحامية ماشاء الله عليها .. واصلة ودارت بلاصتها فسن صغيرة ...
.....: عندك الحق مؤخرا وليت كنشوفها بزاف ... كولشي فيها زوين طريقة هضرتها و عقليتها و كتبان ناضجة و عارفة اش كدير ...
....: ااه سمعت بلي لجد الان اي قضية كتاخدها كدير فيها جهدها حتى كتربحعا واغلب قضايا كيعالجو قضايا المرأة
....: وايبه على مافخباركش حيت هي فواحد الوقت كانت بحالهم ...
.....: كيفاش؟؟؟
.....: كيقولو بليي هي ام عازبة .. يعني عندها ولد غير شرعي... ماعرفناش ميفاش واش اغتصاب ولا غلطة ولكن لمهم هو عولات على راسها وكافحت على قبلو حتى وصلات لهاد المرتبة ...
.....: كون غير البنات عندنا فالجمعية ياخدوها متال و ياخدو هادشي بمحمل الجد وياخدوها قدوة ليهم ... كون غير كولشي البنات يفكرو بحالها ...
.....: بالصح .. ولكن صعيب المجتمع ماكايرحمش واخا تبغي تكافح ولكن كولشي كيفشلك ... مهم انا عجباتني المحامية العماري و احتارمتها منين عرفت هاد الشوية عليها ... و خلينا نسمعوها اش كتقول بعدا ...
هاد الكلام كولو طاح فمسمع واحد الشخص كان حداهم ... منين دخلت وهو مستغرب و منداهش فلي شاف ... ديك الحالة لي كانت عليها فالبارك ... لابسة عادي و كتلعب وتضحك مع ولدها مختالفة على الحالة لي كيشوفعا دابا ... لباس رسمي ديال الخدمة واقفة بتقة و صرامة كتشوف فعينيهم مباشرة وكتلقي خطابها بتقة وعقلانية ... وكتجاوب على الاسئلة بابتسامة خفيفة على وجها .. كولشي فيها كيبهر وكيجدب ... كيشوف فيها وكيفكر ... ودابا عاد وضاح شوية من الغموض من جيهتها... وجود وليد فحياتها بلا اب ... حتى هو احتارمها و قدرها على هاد النيفة لي وصلات ليه و هادشي باقي غير ماعرف شنو قاصات ... قاطع تفكيرو التصفيق الحار المقدم ليها ... هبطات و جلسات فالصف قدامو ... جات نوبتو باش يقدم عرضو حتى هو... طلع و حوراء مادات ماجابت تصنتات لعرض ديالو باهتمام و عرفات بلي حتى هو محامي معروف كانت كتسمع باسمو ولكن عمرها عرفاتو من وجهو ... كان كيلقي خطابو و كيدور يشوف فيها وهادشي جسمو لي كيديرو ماشي عقلو ... هي استغربات شوية وعاد بدات كترجع ذاكرتها حيت حسات بلي شافتو فشي قنت ...
هبط و صفقو عليه و كملات الندوة على هاد المنوال... سالات وخرجو فحالهم واولهم حوراء لي كيتساناها ولدها باش تجيبو من المدرسة ...
حلات السيارة حتى استوقفها صوت ...
....: سمحي ليا ا انسة عافاك ...
حوراء دارت عندو باستغراب وقالت ...
حوراء: نعام ..
.....: انا سعد الناجيمي محامي ... كنت حاضر معاك فالندوة ..
حوراء: ااه عرفتك ...انا ...
سعد: حوراء العاميري المحامية الناجحة ديالنا ومن لا يعرفها ...
حوراء: ههه شوية وكان شكرا ...
سعد: مكانقول غير لي كاين بلاش ماتواضعي هه ...
حوراء: احم سمح لي هاصني نمشي
سعد:بان ليا ماعقلتيش عليا ...
حوراء: لا ... واش فايت لينا تلاقينا ...
سعد: انا لي كنت مع بنتي هاد الاحد فالبارك ... و جيتي عاونتيني ...
حوراء: ااااه عقلت ... لاباس عليها ..
سعد: حمد الله نفعها داك الدواء النهار كولو وعي كتنقز ليا عند الراسي ...
حوراء: ههه مزيان تهلا فيها ... الله يعاونك ...
بلا ميزيد كلمة ركبات وخلاتو ... هكا مولفة تعامل مع اي واحد حسات بيه كيتغزل بيها حيت بكل بساطة حيدات العنصر الذكري من حياتها ... حيت ماكايهمها غير ولدها ... هو بقا كيشوف حتى عيا وركب فسيارتو ومشا
وصلات حوراء عند ولدها للمدرسة و داتو معاها للدار ...
دوزات ماتبقى من العشية هكاك حتى تعشاو ودخلات لبيتها نعساتو فالسرير ديال ختها لي ولا ديالو ... و مشات قدام المراية كتمشط شعرها ... دخلات امها عندها و خدات من عندها المشطة و كملات لبها فالمشيط ...
سناء: شعرك طوال...
حوراء؛ اش بان ليك نقص منو ..
سناء: لا خليه طويل كيجي معاك ... بنتي الغزالة ما شاء الله عليك الف واحد يتمناك ...
حوراء: وانا مكنتمنا حد باغية غير نكبر ولدي باااركة علبا ..
سناء: لاواه ابنتي ... ياله فعمرك 24 عام باغية تدفني شبابك ... ولدك راه كتكبريه ولكن ضروري حتى نتي تلقاي شي رجال يكملك و يحميك نتي و ولدك ...
حوراء: مابغيت حد ... الرجال ماكايجي منهم غير المصايب و حريق الراس ... عارفة بلي ولدي محتاج اب ولكن ماعندي ماندير ليه ... هادشي لي مكتب علينا الله ... غيكبر شوية و غينسا ...
سناء: غير كيبان ليك ابنتي ... غيجي واحد الوقت ولدك غيحتاج راجل يوجهو ... و ماشي كولشي الرجال بحال بحال الى الاول ماصدقش راجل كاين سيد سيدو ابنتي ماتجمعيش كولشي ...
حوراء؛ مكايهمنيش اماما ... انا ضربت على الرجال ... وسيري تنعسي و رتاحي شوية ...
سناء: وا الله يهديك ابنتي و يلين قلبك شوية ... تصبحي على خير...
تحنات على خدمتها و دوزات داك الصباح فالخدمة ... حتى وصلات 1 و ناضت خرجات ... كانت ديجا معيطة لباباعا باش يخرج امجد من المدرسة ... وصلات للشركة وطلعات خبرات السكريتير بلي وصلات و دخلاتها عندو ...
حوراء: السلام وعليكم ...
المدير: وعليكم السلام تفضلي ااستاذة ... دخلات لعندهم م
و جلسات كيفما طلب منها وهي نقشع شكون جالس فالجهة الاخرى لي كان بنفسو مصدوم من رؤيتها
المدير: هذا المحامي سعد الناجيمي ...
حوراء: فرصة سعيدة ا استاذ
سعد: ههه الدنيا صغيرة ...
المدير: مزيان منين كتعرفو بعضياتكم حيت هادشي غيسهل عليا وهليكم الموضوع ... مهم انا عارفكم بغبتكم فواحد القضية لي طولات وبلا قياس ... انا سمعت بلي نتوما من بين احسن محاميين فهاد البلاد و لغيتكم توقفو ليا على قضيتي ...
سعد: مرحبا
حوراء: ممكن تقول لينا اشمن نوع من القضايا حبت الى كنتي نتا الطرف الظالم من هنا نقوليك بلي مغانفعكش
المدير: هههه لا كوني هانية ...انا هادي 4 اشهر تعرضت للنصب وسط شاركتي ... دخل واحد الصديق قديم شريك معايا ودا ليا النصف من املاكي غير هكاك .. تقت فيه وطعني ... ماتسنيتهاش منو ... و الى بقيت هكا يقدر يدي كولشي داكشي علاش بغيتكم تبداو القضية فاسرع وقت ممكن ...
حوراء: اااه فهمت ...
سعد: ممكن تعطينا معلومات اكتر ...
بقاو كيناقشو القضية و كيطرحو تساؤولات عليه وهو كيجاوب ... وافقت حوراء تعاونو وواعدوه باش غاياخدو ليه حقو ...
سعد: واش ممكن ناخد الكارت فيزيت ديالك باش نبقاو على تواصل ...
حوراء: مرحبا ..
جبداتها وعطلتها ليه ...
سعد: وها ديالي ... تشرفت بمعرفتك ...
حوراء: حتى انا .. ياله بسلامة عليك ...
ركبات وخلانو بلاكة عاوتاني ..
ضحك ضحيكة جانبية و ركب فسيارتو ...
داز و 2 اسابيع شافتو فيه شي 6 المرات ... فينما كيتلاقاو ماكيهضر معاها غير فالخدمة ... لاحظات بلي ماكيعاملهاش بحال بقية الرجال لي كتصادفهم ... بالعكس كيحتارم السبايس لي راسماها بيناتهم .. و عمرو تجرأ عليها ... معاملتو فحدود الاحترام و كيتعامل معاها على اساس زميلة عمل ... توافقو فالآراء و مالقاوش صعوبة فالتواصل بيناتهم... الشيء لي خلاها ترتاح ليه ...
اليوم بعد اجتماع بينهم وبين مدير الشركة خرجو ب2 كيناقشو الموضوع حتى خرجو للباركينغ ..
حوراء: ياله بسلامة عليك نتلاقاو نهار الخميس
سعد: اجي لهنا بلاتي ... مكرهتش نتغداو ب2 اليوم ..
حوراء: واش بافي شي حاجة لاغي ناقشوها ..
سعد: نبعدو شوية على روتبن اخدمة و القضايا .. بغيت غير ندردشو شوية طبعا الى قبلتي ...*لاحظ نظرتها تبدلات* متفهميش غلط مناوي والو غير غداء بين 2 اصدقاء وصافي ...
حوراء: اوكي... واخا ...
سعد: واخا ركبي فسيارتك وتبعيني ...
حوراء: ههه اوكي ...
ابتاسم ليها بحماس وكل واحد ركب فسيارتو ... وقفو فواحد ريسطو ودخلو ب2 ...
خداو بلاصة وجلسو فيها ...
قصة مأخوذة من 9esa.com.. سعد: كيعجبني هاد ريسطو ...مولف نجي انا وملاك لهنا ...
حوراء؛ مراتك ؟؟
ابتاسم وقال ليها : انا راجل اعزب مامزوجش ... ملاك راه بنتي ...
حوراء: اااه ... واش مطلق ...
جمع الضحكة شوية وشاف فالشرجم ..
حوراء: سمح لي دخلت يمكن فمالايعنيني ...
سعد: لا بالعكس ... خودي راحتك .. حنا اصدقاء ... مهم هادي 7 سنين تزوجت بواحد البنت عن حب ... دوزنا وقيت قبل الزواج و قررت ناخدها حيت بغيتها وشفت بلي تستاهل نكمل معاها حياتي ... مهم داز عام ونصف على زواجنا .. وحملات بالغلط حيت ماكناش ناويين نولدو فالاول ... قلت ليها ماعليش مكتاب نولدو دابا .. هي مابغاتش وكانت باغيو تطيحو وولاو بيناتنا المشاكل على هاد الموضوع ..
حوراء: واش طاينة شي مراة ماتبغيش تحمل وتولد ؟؟ شنو سبب رفضها للحمل ..
سعد: هي كانت من بنات الفشوش ...داك النوع لي عزيز عليه اللعب والخروج وكل عطلة فبلاصة ... كانت عندها عقلية فشكال ماوالمهاش الاستقرار و المسؤولية .. فترة حملها دازت كلها مخاصمة وصداع حتى ولدات بنتي ملاك ... داز عام ورى الولادة المشاكل غير مازادو كترو ...دغيا فطمات البنت و كانت كتهملها وتخليها للمربيات وهي كتخرج و تدير لي بغات مع الكليكات ... الامومة محركات فيها وااالو حتى طلقتها مابقيتش صبرت ليها وهي هادشي لي كانت باغية و حتى داز على طلاقنا عامين عمري بقيت شفتها حيت مشات سافرات لشي قنت ماعرفتش فين ... عمرها سولات فملاك ... عرفت راسي تزوجت غير ببرهوشة باغية تلعب ... مهم هكاك بقات حتى وصلني خبر موتها بكسيدة ... كانت سايقة سكرانة ... و تضربات فالراسها وماتت بنزيف فالدماغ ...
حوراء: كنتأسف لهادشي لي وقع ... بقات فيا ملاك مسكينة ..
سعد: هي ماعقلاش على امها حيت خلاتها عندها عام .. كانحاول نعطيها صورة زوينة عليها والله يسمح ليا فينما تسولني كنكدب عليها باش تخلي ليها ذكرى زوينة عليها ...
حزراء: انت ماكادير غير الخير كون كنت فبلاصتك غندير لولدي نفس شي لي درتي انت ... الله يرحمها ويغفر ليها ... مهم هو بمتك دابا تكون مرتاحة نفسيتها ...
سعد: الحمد الله ولكن واخا هكاك ... كاين النقص انا كنحاول نعوضها و لكن حنان الام بوحدو ..
حوراء: فاهماك مزياااان شنو كتحاول تقول ... حتى ولدي نفس المشكل كانواجه معاه ... معندوش باه ... و ديما فصراع بارد معاه ... حتا انا كنحاول نعوضو على الاب و لكن مايمكنش صعيب بزاف ...
سعد: و علاش ماتقلبيش على باه ...
حوراء: هذيك لي عمرني نديرها واخا نعرف نموت ..
سعد: وعلاش ؟؟
حوراء: باه ماشي راجل ... حيوان وبزااف عليه ...
سعد: واش تعرضتي للاغتصاب؟؟
حوراء شافت فيه وقالت: بلا منتعمقو فالموضوع ... حيت تقدر تبدل هاد النظرة لي واخدها عليا ...
سعد: حنا ولاد اليوم ... المهم هو شنو نتي فهاد اللحظة ...
حوراء بقات كتشوف فيه و قالت؛ واخا ... انا كنت واحد المراهقة طايشة وماكنسمعش الهضرة ... كنت نية وهادشي لي طيحني مع واحد الشماتة ... كنت نمنك ندير شي امور خايبة على قبلو ... تقت فيه اكتر من اللازم فاش وهمني بالخطبة وجاب ناس ماشي والديه خطبوني من دارنا ... تيقتي بيه وصلاتني لبين ايديه ودار فيا مابغا تحت اسم كنبغيك و نتي مراتي ... غير سالا وقلب وجهو ... عرفت راسي صافي قفرتها ... مابقا كيبان ليا لاحب لازالو .. وليت باغاه غير يتزوج بيا ونستر المصيبة قبل مانتفضح ساعة قلب علبا فخطرة مبقاش كيسول فيا حتا هداه الله و قدرت نتلاقاه و صدق ولد الحرام قال ليا نقلب عليه ولا غيشوهني بشي صور كانو عندو .. انا ماقديتش عليه عرفت بلي لاباس عليه وولد الفشوش و كولشي كان غير تمتيل حتى من سميتو ماشي صحيحة ... داز الوقت بابا وخويا عرفو فاش جاني صاحب خويا يخطبني تقت فيه وعاودت ليه اشنو كاين باش مانغشوش ولكن حطني بوجهي ... و قال ليهم كولشي ... كليت ماكلة الطبل نهار العيد فداك النهار ... و داك النهار نفسو لي عرفت راسي حاملة ... داز الوقت حبسوني ... لا قراية لاشرف لا مستقبل وزايداها بكرش فالحرام من الفوق ... ماعقت حتى هزيت حوايجي وهربت ...*عاودت ليه كولشي* اوى هادي قصتي ..
سعد: مممم فهمت ...
حوراء: ههه غير قول لي عندك ... عارفة باي انا لي غلطت وبلي كان عليا نحافظ على راسي مهما كان التمن ...
سعد: لا ماغانقولش ليك هاد الكلام كنظن سمعتيه بما فيه الكفاية ... انا ماشي احسن منك باش نلومك كولنا فهاد الدنيا كنغلطو ... المهم هو نتي دابا وفين وصلتي .. احتارمتك و كبرتي فعيني منين سمعت قصتك ومنك ... كون شي وحدة اخرى كراه باعت لحمها و لاحت ولدها ولا بقات تشمكر فالزناقي ولا تخرج تطلب و لكن لا انت ختاريتي تحداي المجتمع و الظروف و صبرتي ...و هانتي ما شاء الله عليك نجحتي ..
حوراء شافت فيه و منباهرة بردة فعلو لي كتعكس عقليتو المتفتحة و ماشي استصغرها كيف دارو شحال من واحد : شكرا ...
سعد: علاش كتشكريني بالعكس ماقلت غير لي كاين ... خاصك تهزي راسك و تقولي اااه درتها فالماضي وتعلكت من اخطائي و اخطائي لي وصلوني لهاد المرتبة حيت صححتهم ... عمرك تبرري لشي حد مايهمك غير راسك لاغير ...
سعد: واخا و ولدك ... مكاتفكريش ديري هاد الخطوة على قبل ولدك ... غايوصل واحد الوقت لي غيجيك صعيب تحكمي فيه و مغايمكنش ليك تفهميك كامرأة و هادشي خدمة الاب ...
حوراء ضربات طاان فراسها عمرها فكرات بهاد الطريقة ...
سعد:هادشي لي قلت ليك نفسو منطابق على بنتي ملاك ... غتوصل تاهي لواحد المرحلة وغاتحتاج امراة لي توجها وتوريها ... راك عارفة علاياش كنهضر ..
حوراء: وي فهمتك ...
سعد: داكشي علاش غنجيك من الاخر و نقول ليك .. علاش منعطيوش لبعضياتنا فرصة تانية ...
حوراء: كيفاش ؟؟
سعد: انت باقية صغيرة علاش تحرمي راسك وماتعطيش نفسك فرصة اخرى و تعيشي حياتك... و ديري وليدات اخرين ... انا ماكرهتش تكملي معايا حياتك و نتعاونو على ولادنا كيفما كتشوفي ولدك خاصو اب وبنتي خاصها ام ... وحتى انا مكرهتش تكون عندي زوجة نحط عليها الراس و نتعاونو على الحياة بزوج ... الوحدانية صعيبة وخاصة لكان عندك مسؤولية ... اشنو بان ليك ... صارحيني عافاك ...
سعد قاطعها: سمعي انا شفتك فهاد المدة كاملة ... عجبني شكلك و عقلك ... انسانة ناضجة و متخلقة و محتارمة و انا كنقلب على امرأة لي تكون قادا تربي بنتي و حتى ولادنا فالمستقبل علاش لا ... عمرني ماصادفت شي امراة بهاد المواصفات حتى تلاقيتك نتي ...
حوراء: زعما ماعندكش مشكل تزوج بمراة ياله عرفتيها معرفة سطحية ... و باقي ماوصلتي لمرحلة انك تبغيها...
ضحك شوية وقال: داك الحب ديال الروايات و الافلام ماكانآمنش بيه ... حيت بكل بساطة مكاينش ... انا كنآمن بالمحبة الطاهرة لي كتجمع كل زوج ... انا قلت ليك عجبتيني ماشي بغيتك عرفتي علاش ؟؟
حوراء: علاش ؟؟
سعد: الانسان باش تقول ليه كلمة كنبغيك خاص يكون علاش؟؟ متلا واليديك كيبغيوك ..هذاك حب فطري و كيبغيوك حيت هما لي ولدوك ونتي طرف منهم وكذلك حتى نتي كتبغيهم حيت واليديك ... خوتك كتبغيهم حيت عندكم نفس الوالدين ومن دم واحد وكتعيشو مع بعضياتكم كاين لي كيكونو صحاب وكاين لي لا المهم كاين الحب بيناتهم ... العائلة ماكاتبغيهمش بنفس الطريقة باش كتبغي اسرتك الصغيرةالا اذا كنتي قريبة من شي حد فيهم بحال عمامك ولا جدودك الخ ... الصحاب ميمكنش ليك تقولي لشي وحدة كنبغيك من اول لقاء بيناتكم ... خاص تكون عشرة و مواقف لي تبين ليك واش نيت صحبة حقيقية ولا نفاق ... واش وقفات معاك فالسراء والضراء ولا لا ... واش كتبغي ليك الخير ولا لا واش سانداتك ولا لا ... هاد الامور هي لي كتحدد ليك واش بغيتي ديك الصديقة ولا لا .. وعاد جا الحب بين لي كوبل ... فهاد الوقت دابا كيتعارفو غير شوية وكيوليو يقولو كنبغيك ... لا الحب بينهم غيبان بالعشرة ... واخا يتصاحبو قبل ... واخا يطولو مدة الخطوبة والو ماغاتنفعهمش ...علاش؟؟ حيت مايمكنش الانسان يعرف شخصية داك الشريك الا اذا سكن معاه تفيقي عليه وتنعسي عليه و تاكلو ب2 دخلو وتخرجو ب2 هنا غيبانو عيوبو وايجابياتو... وانت غتشوفي راسك واش قادرة تعايشي مع داك الشخص ولا لا و حتا هو نفس الشيء ... وباش يسكنو ب2 خاص يتزوجو داكشي علاش الدين امرنا باش مانطولوش مدة الخطوبة ... وديك مدة التعارف لي كتكون فالاول من الاحسن الزوجة ترد البال وماتولدش ..باش مايندموش من بعد وحتى الى ماتفاهموش و تفارقو .. كيخرجو بخسائر اقل ... لي بغيت نقول ليك مكايهمش الى حتى تزوجنا عاد تعارفنا ... حيت بهكا غيبان الحب .. لي غيكون نقي وبدون دوافع حيت غنكونو تخطينا جميع الحدود لا انا طامع فشي حاجة ولا نتي كذلك ... ماكايهمش الحب قبل الزواج ولا بعد الزواج ... لي كيهم هو شخصية دوك لي كووبل واش بعقلهم واش عارفين يتعاملو مع الاوضاع الجديدة واش قادرين على المسؤولية واش ناضجين ولا لا ..واش صبارين ولا لا.. راه جدودنا تزوجو ببعضياتهم و ماتشاوفو حتال ليلة العرس .. كاينين فيهم لي زواجهم نجح و هادو نسبتهم كتيرة .. وكاين لي لا ... كيفما دابا كيتزوجو عن حب .. كاين لي كينجح زواجهم وكاين لي لا ... واش وصلاتك الفكرة ديالي ؟
سعد: و تأنا قلت ليك بلي هاد القرار غتاخديه ليك نتي ولولدك بدرجة اكبر... فكري فالموضوع وشاوري مالين دار ماتسرعيش وانا غناستنا القرار ديالك بفارغ الصبر...
حوراء: اوكي ... غنفكر ...
سالاو الغداء ديالهم وكل واحد رجع لخدمتو ... من بعدما دوزات ديك العشية ديال الخدمة ... رجعات لدارها .. دخلات لقات سعاد و يوسف و مراتو وادم و مراتو فالدار... حيت غدا الويكاند وعارضينهم للعشاء سلمات عليهم وجليات عاد خرج ولدها كيحنقز عنقها...
حوراء: مهم بقينا كندردشو حتى عاود ليا على حياتو ... وحتى انا زعمت وعاودت ليه ... حيت حسيت بيه تاق فيا و حتى انا مامانعتش ... ولكن لي بهرني هو ردة فعلو فاش عرف قصتي... واتفهمني وماحكمش عليا ... قال ليا حتى هو انسان و كيغلط بحالي بحالو يعني ماعندوش الحق يحكم عليا ... تصوري وااو عجلني تقريبا هو الوحيد لي سمعت منو بحال هاد الكلام ... مهم من خضرتو قريت عقليتو و السيد نيفو ديالو طااالع وبزاااف ... كلامو كان منطقي و قدر يخليني نشوف شي امور من جهة اخرى ... و بدل رأيي فشحال من موقف كنت واخداه ... مهم فالاخير قال ليا نجيك نيشان ... بغيت نتزوج بيك و تكوني ام لبنتي ونكون اب لولدك
بسمة وغزلان: 😮😮😮
حوراء: هههه قال لي نعطيو بعضياتنا فرص تانية ونعيشو لي باقي مع بعضياتنا و نتعاونو على ولادنا ب2 ...
غزلان: اووو ماااي قااااد .... (بالقاف ماشي ب g 😂)
بسمة: ناري مك وساكتة ...
حوراء: مالك راه غير اليوم ..
غزلان: وباش جاوبتيه ... تقولي ليا رفضتي ندبح مك من ودن لودن و نقردك ونلوحك للكباب يهنشروك ..
حوراء: هههه قلت ليه حتى نفكر ..
بسمة: ويييف حمد الله ... واسمعيني مزيان ... هادي فرصة جاتك .. الى ضيعتيها ها واحد الصبع ... عرفتي علاش حيت انت باقية شابة باقية صغيرة تستاهلي تعيشي من جديد كامراة و ماشي كأم ... وهد السيد جاك من الاخر ماطولش عليك و ماطلب لا مصاحبة لا والو ... طلبك ام لبنتو يعني شافك تستاهلي و قادرة على هاد المسؤولية راه ماشي اي واحد كيأمن ولادو على شي حد ... راك ام وفاهمة هاد القضية ... علاش دفني شبابك وصغرك ... الى كان اول واحد فحياتك شماتة مكايعنيش انهم كاملين بحال بحال ...
غزلان: من هادشي لي قلتي عليه باينة فيه انسان ناجح و معقول و انت حاgرة راسك راك حلم كل راجل ... عرفتي شنو هي امراة كاملة مكمولة قارية وواعية ومتقفة و واصلة و غزالة و و فورمة كتحمق و محجبة ومتدينة عرفتي شنو نتي راك تحفة ... الى ضيعتي رلسم وشيدبابك غتحاسبي على هادشي من بعد وهادشي الاااا مندمتيش ... فكري فراسك شوية وراه حتى ولدك مستفيد اكبر فعادشي وحتى ديك البنيتة غتربح ام .... انا جاني قبلي بيه و توكلي على الله ...
حوراء: زعما زعما ... يعني خفت لا...
بسمة: متخليش امور الماضي تاتر فيك و جربي شنو غاتخسري اش عرفك بلي هو نيت انسان معقول و غتعيشي مرتاحة معاه راه ماغتعرفي حتى تجربي ...
حوراء: هههه واماتسبقيش العصا على الغنم ... و خليوني دابا مني انا و قولو ليا نتوما كيف غاديين مع شي زواج ..
بسمة: انا الحمد الله ... خالتي و ادم مرتاحة معاهم ... غير ادم كيغبر امتر مني فالخدمة مكانتشاوفوش بزاف ...
غزلان: نتي مرتاحة مع داك العجل و انا مدوزة الحرب مع داك البوليسي الصغع ...
حوراء: اويلي مالك .. ياكما كيضربك ولا شي حاجة
غزلان: لا لا لا اويلي يضربني نعاودو ...
بسمة وحوراء: ههههه مانصحوكش ...
حوراء: ولكن مالكم ؟؟
غزلان: والو اختي ... بغانا نولدو دابا ...
بسمة: وشنو فيها ...
غزلان: اويلي باقي شوية ... انا باقية باغية ندوزو فترة بيناتنا بلا ولاد
حوراء: ولكن خاصك تشوفي الامور من المنظور ديالو هو ... علاش زرب فالزواح فنظرك ... راه كيشوف بلي هو وصل ل35 سنة وخاصو يدير ولادو وانت ياله 25 ...
بسمة: غير توكلو على الله ... راه الحياة بوجود الوليدات عندها طعم اخر ..
غزلان: يااك .. ومالك ماولدتي حتى نتي ..
بسمة: ههه اوى ماحد خوك ميك حتى انا ميكة ...
حوراء: ههههههه ماشي مشكل ديري ليه خاطرو ... منضنش غتلقاي مشاكل مع خويا ... مادام عشتي معاه هاد عام ونصف دابا فراك حفظتي النمط ديالو ..
غزلان: وي عندك الحق ..
حوراء: اوى ماصافي توكلو عالله ...
غزلان: واقلة عندك الحق ...
بسمة؛ وا نوضو ياله نخرجو عندهم ...
ناضو البنات خرجو عندهم و جلسو معاهم ... و تحط العشاء و من بعدماسالاو بقاو جالسين مجمعين حتى بسمة بدات كتنغز ختها ...
حوراء: اويلي تي مالك ...
بسمة: هادي هي الفرصة ...
حوراء: اويلي حماقيتي ..
بسمة: بابا ... ماما .. حوراء بغاتكم فشي موضوع و بما انكم مجموعين فهذا هو الوقت المناسب ..
حوراء حشملت وحطاتها بوجها و كولشي كيتسناها اش غتقول ...
عبد الرحيم : اش عندكم ابنتي ..
حوراء: احم ... جاني واحد العرض ... المحامي لي هضرت ليكم عليه قبايلة ... بغاني للزواج ..
سناء: ييويويوي اوى مبروك ...
حوراء: تي اشمن مبروك بلاتي نكمل ...
عبد الرحيم: كملي ابنتي ...
حوراء: هو عارف بقصتي وعارف عندي ولد ... وهو تاهو فايت مزوج و كان طلقها وماتت و خلات ليه بنيتة قد ولدي ... و قبايلة عرض عليا نتزوجو انا وياه باش نعوضو ولادنا ونتعاونو عليهم ب2 ... راكم عارفيني انا ماعمري فكرت فالزواج مزال .. ولكن على قبل امجد فكرت نوافق اش بان ليكم ..
عبد الرحيم: انت كبرتي ابنتي ومابقيتيش صغيرة .. وليتي عارفة ماغاديش نفرض عليك قرار ديالي ... لي بغيتي غنوقف معاك ابنتي وغنساندك ...
حوراء: بالصح ابابا ..
عبد الرحيم: اااه ابنتي ... بغيت نشوفك مرتاحة فحياتك ... ولكن خاصني نتعرف عليه فاقرب وقت ..
حوراء: واخا ابابا ...
يوسف: حتى انا بغيت نتعرف عليه نهار تبغي تجيبيه للدار عيطو ليا ..
حوراء: هههه انت هو انت ماغاتبدلش ... عنداك غير تخلعو يهرب هههه
يوسف: هههه متخافيش مانجريش ليك على عريس الغفلة .. انا بغيندا نشوفو ونعبرو اشمن نوع ديال البشر ...
حوراء: مممم ...
سناء: واخيييرا ربي لان قلبك و فكرتي بعقلك شوية ..
حوراء: على مالي باش كنت كنفكر اماما😂😂
سعاد: الله يقدم ليك لي فيه الخير ونفرحو بيك ابنتي ..
حوراء: ربي يخليكم ليا اخالتي ...
كملو سهرتهم و تفرق المجمع وكولها مشا لحال سبيلو ...
اليوم السبت فيقات ولدها كيف العادة تدوز معاه نهار على برى ب2 ... طاح فبالها فكرة وعيطات للسعد ...
سعد: الو ... حوراء لاباس عليك ..
حوراء؛ حمد الله وانت لاباس ...
سعد؛ حمد الله ... اشنو قررتي؟؟
حوراء: اه قررت ... و بغيت نتلاقاو اليوم فالبارك لي تلاقينا فيه اول مرة وجيب معاك ملاك .. حتى انا غنجيب امجد ...
سعد: ههه واخا ... ساعة و نكونو تما ..
حوراء: واخا نتلاقاو ...
هبطات حوراء من السيارة وخرجاتو شادة فيه و دخلو ...
امجد: شكون لي هضرتي معاه قبايلة وقلتي ليه وصلنا ..
حوراء: ماعندي مانتسالك حاضي صواريك ... غنعرفك على واحد الناس يقدرو يعجبوك ...
امجد: امممم ...
مشاو مشادين حتى وصلو لواحد الكافي و دخلو بان ليها ودخلات عندهم ..
حوراء: سلام ..
سعد وقف مبتاسم ليها وقال: وعليكم السلام ..
حوراء: تعطلنا عليكم ..
سعد: بالعكس ياله وصلنا .. تفضلو ..
جلسات حوراء وجلسات حداها ولدها ...
القصة مستضافة على موقع قصة بالدارجة حوراء: امجد حبيبي سلم على عمو سعد ...
امجد: سلام عمو سعد ...
سعد: سلام البطل ... ملاك ... ماتسلميش على امجد؟؟
ملاك: سلام انا سميتي ملاك وانت ...
امجد: ياله باباك قاليك سميتي امجد نسيتي ..
ملاك: ههه ماردينش البال
حوراء وسعد: ههههه ...
حوراء: واش عقلتي علينا املاك ...
ملاك: اه نتي لي عاونتيني داك النهار ...
حوراء: ما شاء الله عليك الغزالة ... دكية وعقلتي عليا
سعد: انا بنتي العكس قليل فين كنلقاها مع الوليدات .. كتلعب غير بوحدها ... و جاني امجد ممكن يخرجها من هاد الانعزال ديالها.. داكشي علاش عندي امل كبير فانك توافقي
حوراء: انا موافقة ... ولدي محتاج اب و منقدرش نكون انانية ... فعاد الموضوع .. و بغيت ندير بكلامك و نعطيو لبعضياتنا فرصة تانية ..
سعد ضحك حتى بانت ضرسة العقل: ههه كنت عارف بلي ماغترفضيش ... كانواعد مغتندميش على عاد القرار وغندير لي فجهدي باش نحميكم و نديركم تحت جناحي و نخليكم مرتاحين وميخصكم والو .. و ولدك راه من هاد اللحظة هو ولدي بالتساوي مع بنتي ملاك ...
حوراء: نفس الشي ... كنواعدك غنكون ام لبنتك و غنعوضها و نخليها ترتاح وتخرج من عزلتها ..
سعد: ان شاء الله تايق فبك .. اوى امتى نجي نخطب ... بصراحة راني زربان ...
حوراء: واليديا بغاو يشوفوك بعدا هو الاول ..
سعد: ايه مرحبا علاش لا ... الموعد لي موالمكم انا موجود ...
حوراء: واخا غدا مزيان؟؟
سعد: بورفيكت ...
حوراء ابتاسمت ليه و تاهو .. و عيطو لولادهم ...
حوراء: شنو بغيتو تشربو...
امجد: انا بغيت حليب او شوكولا ..
حوراء: وانت احبيبة ...
ملاك: انا بغيت بحالو ...
عيك سعد وطلب ليهم وطلبات حوراء تاهي ... بقاو كيهضرو ويتحتتو مع وليداتهم و يزيدو يتعرفو ببيهم ...
حوراء: عجباتها الطريقة باش كيهضر معاهم و يضحك معاهم وتاهو بدورو عجبو كيفاش كتهتم بيهم وتمسح ليهم الى عمرو ..
ناضو و خرجو يلعبو فالملاهي و قبل مانساتش تعطيهم الدواء ديال الدوخة وطلقوهم يلعبو ب2 ...
حوراء: بان ليا توافقو واتافقو ...
سعد: هادشي لي بان ليا شحال انا الوحيد لي كتلعب معايا بهاد الطريقة ... امجد بعقلو ... ذكي ما شاء الله عليه...
ملاك: مزيبان ..بسلامة ا امجد غدل نجيب ليك معيا ديك اللعبة لي قلت ليك ..
امحد: واخا ... بسلامة ملاك ... بسلامة عمو ...
سعد: باااي ...
حوراء: ههه ياله ادومان ...
رسعد: ان شاء الله
ركبات حوراء و مشات عاد ركب سعد ومشا حتى هو
تلاقا بواليديها و عجبهم ... و دارو الخطبة فالسبوع لي تبعو جاب عمو و 2 خواتاتو حيت والديه ميتين ... عجباتهم وتافقو معاها حيت كل وحدة تاهي واصلة وماعندهومش داكشي ديال اللويسات وديك الهضرة الخاوية... تافقو على العرس لي رفضات حوراء ديرو ... حيت بغات تفرح غير بينها وبين عائلتها لي غيفرحو ليها من القلب ... والفلوس لي تخسرهم على العرس زايدين فيهم هما نيت ... علاش غدير عرس تجمع فيه غير المنافقين ولحاسين الكابة ... كولشي احتارم رايها واخا امها بقات كتخاصم عليها ...داز حفل صغير و زوين وراقي حضرو فيه حتى عائلتو و سناو العقد وعطاها صداقها .. لي عطاتو لواليديها ...
بعدما سالاو الحفل ... جا وقت يمشيو ... خلاو ولادهم عند جداتهم سناء باش ياخدو راحتهم ...
وصلات هي وياه وطلعو للآبارتومون ديالهم ... حيت بغا ليلة الدخلة تكون فدارهم ...
سعد: سمي الله وسبقي الرجل اليمين ..
دارت بكلامو بابتسامة خفيفة .. ودخلات شادة فايدو ... وصلو للبيت و حيد صباطو وهي جالسات كتشوف ... ايديها عرقانين وحشمانة منو حد الموت ... كتحس بحناكها غيطرطقو من السخونية ..
لاحظ و حيد لافيست ديالو وجلس حداها ...
شد ايديها ودورها عندو وراسها باقي محدور ..
سعد: قبل من اي حاجة ... بغيت نقول ليك بلي .. كنواعدك واهد الرجال بلي غنكون الزوج الصالح ليك والاب لولدك ... كنواعدك عمري نحونك ولا نشوف من غيرك ... بغيتك تيقي فيا كل التقة و تعرفي بلي دابا انت انراة مزوجة وعندك زوج يوقف معاك ويساندك فحياتك ... غنحتارمك ونقدرك ونحطكم فعينيا ..
حوراء: ان شاء الله انا تايقة فيك اسعد .. وماوافقت عليك حتى عرفتك راجل و قادر على هاد المسؤولي لي اكيد غنقسمعا معاك .. و غتلقا فيا الزوجة الصالحة لي تعز بيها راسك و غنوقف معاك ونساندك مهما كانت الظروف ..
سعد: ياله نصليو الفجر ...
ناضت حوراء ... و سرحو الصلايات وحدة القدام والتخرى لور ... صلاو ب2 و و قرى الدعاء ... و من بعد ناضو ...
حوراء: انا غندوش ... و نخرج ..
سعد: واخا غنتسناك ...
دخلات حوراء ودخلات شنو غتلبس معاها .. حيداات القفطان ديالها ... و دوشات وخلات شعرها ماغسلاتوش ... نشفات راسها وتعطرات و تزينات ولبسات شوميز خفيفة فالابيض .. طلقات شعرها و خدات نفس و لاحتو ...
حوراء: اوووف .. تقدري ديرها .. هو دابا راجلك ... و من حقو ... كولشي غيكون مزيان واحسن ... تشجعي احوراء ...
لاحت شعرها للجنب بتقة وحلات الباب.. كان قدامها كيبدل .. غير شافها و تحلو عينيه .. حوراء من ديما كانت قدامو مستورة بلباس راقي ومستور .. عمرو شاف شعرها و لا شي تفصيل من جسمها .. دابا قدامو لايحة شعرها على طولو فوق كتافها و كتبان وحدة اخرى .. بلباسها الجريئ و شكل جسمها المغري و ريحتها الغزالة لي وصلاتو ...
حوراء: احم ..
سعد: ما شاء الله ... هاد الزين كولو كان مخبي ...
حوراء: حدرات راسها حشمانة ...
قرب لعندها وجرها لعندو من ايديها ...
سعد: اجمل ماشافت عيني ماشاء الله عليك ... عمرك فشلتي تبهريني بيك ... لا من جهة ذكائك و نجاحك و لا جمالك و لا قوتك ... ولا احترامك لداتك و لا تواضعك .. كولشي فيك كيجدب ... متأكد بلي ماغلطتش فالاختيار ..
ماغاديش نقول اصبح الصباح حيت بدات كتشرق الشمس وغنقول دازو سويعات نعسو فيهم فاحضان بعض ... فاقت حوراء هي الاولى ... كتحك فعينيها .. شافت حولها .. بيت آخر على لي موالفة تنعس فيه ... عرفات راسها فدارها الجديدة مع زوجها وولداها ب2 ... شافت فيه ناعس حداها .. وتفكرات شنو داز ... تبسمات وهي فرحانة ... قدرات تجاوز الخوف ديالها ببساطة ... حيت طمنها وخلاها تعيش معاه لحظة بلحظة ... ناضت للدوش و من بعد صلات لي فاتها وخرجات للكوزينة توجد ليهم ما ياكلو ...
وجدات الطابلة و دخل عندها مدوش و لابس حوايجو و كينشف شعرو ...
هاد القصة مأخوذة من قصة بالدارجة سعد: صباح الورد والياسمين يا احلى عروس ..
حوراء: هههه صباح الخير ..
قرب ليها وباسها ...
سعد: اممم الحداكة ...
حوراء: شوية وصافي .. اجي جلس نوجد اتاي...
جلس و هي جلسات حداه و كبات ليه اتاي وجلسو ياكلو ...
سعد: الله يعطيك الصحة ..
حوراء: لهلا يخطيك ... غير شي حاجة خفيفة مزال دوق طيابي ان شاء الله ..
سعد: ههه ان شاء الله ... امجد وملاك لاباس عليهم ..
حوراء: اااه عيطت ليهم .. محيحين مع جداهم ههه
سعد: نتفكو منهم واحد السمانة هههه
حوراء؛ هههه واللهما كذبتي ...
سعد: ياله دغيا باش متفوتناش الطيارة ...
حوراء: وااخا ..
سافرو واحد السيمانة ديال العسل🐸 لجزر الباهاماس ههه غير ضاحكة مشاو غير فرنسا ... ضارو ودوزو وقيت زوين ... شراو بزاف الكادةات لولادهم ... و رجعو ... جابو ولادهم للدار عندهم و دخلوهم ...
سعد: انا لي شريت ليك ا امجد و ماماك شرات ليك املاك ...
ملاك شافت فيها ورجعات شافت فباها ... جبد لعاب ديال الدراري عطاهم لامجد ناض كينقز وكيحل وهو فرحان كيغوت حيت لقا داكشي لي عجبو ... و جبد لملاك و هو كيترقب ردة فعلها ... عطاها واحد الصندوق فالغوز ومزين بالحجيرات ... ظن انها مغاتعجبهاش لانها من حوراء وعاد عمرو جاب ليها هاد النوع من الهدايا ... عطاه ليها وهزاتو كتشوف فيه متحمسة واخا مكتبينش ... سعد وحوراء كيشوفو فبعضياتهم و كيراقبوها حطاتو فالارض وحلاتو لقاتو على شكل طبقات من الداخل وفيه مجورة صغار فيه ماكياج فالوان طفولية وشكيلات ديال البنيتات الصغار فيه اكسيسوارات ديال الايد وديال الشعر مشيطات و شحال من حاجة كتهز وتحط وفرحانة بيه ...
كملو لي باقي من سقاطة وداكشي لي جابوه ليهم وعطاوه ليهم ...
سعد: اما ندخل ندوش ...
حوراء: واخا انا غاديا معاك ...
خلاو وليداتهم كيلعبو و دخلو للبيت ... هو كيحبد حوايجو وهي كتجبد ليه مايلبس ...
سعد: هههه بان ليا ملاك بدات كترطاب كن جيهتك ..
حوراء: قلت ليك تيق فيا انا عارفة كيفاش نوصل لقلبها ومززال ان شاء الله ...
سعد: حوراء فكرت فواحد الحاجة ..
حوراء: نعام ..
سعد: بغيت نحط امجد فالحالة المدنية ديالي و تولي كنيتو امجد الناجيمي بحال ملاك الناجيمي اش قلتي ..
دارت عندو متفاجئة وقالت ...
حوراء: واش باغي تعطيه اسمك ؟؟
سعد: بغيتو يكون ولدي حتى قانونيا ومايبقاش عليه غير معروف الاب ...
حوراء: هههه فرحتيني ...
قرب ليها ضاحك و باس راسها و دخل للحمام ...
حوراء حمدات الله ... على هاد الخير لي جا فخطرة ... رجعات الحوايح لبلاصتهم و قدت البيت وخرجات تشوف الولاد ... لقات امجد داير حالة غير بوحدو فالصالوة وملاك غابرة ...
الحوراء الجزء الخامس
محتوى القصة
التنقل بين الأجزاء