دازت عليهم سيمانة وهما على نفس الحال.. هضرتهم قلالت بزااف وكيهضرو غير الا دعات الضرورة وقليل فاش كيتلاقاو..هو ما باغيش يزيد يجبد معاها الموضوع على ديك الليلة حيت عارف راسو ما ايصبرش اذا جبدو ومخليها على راحتها واي حاجة تقدر تعصبها كيحاول يبعد عليها وحتا هو بعد راسو عليها حيث فيما كتشوفو كتبدا تبكي وتقلب وجهها عليه منفخة وبدا كيتفادى أنه يتحاك معاها..هي كل مرة كتقول ها هو ايجي يعتذر او يجبد معاها الموضوع ولكن والو ظنونها كتخيب وما بقاش كيعمر معاها لبلاصة لي كتكون فيها كيخويها وقليل فين رجعات كتشوفو..كل واحد فيهم وكيفاش كيفسر وكيحلل وحتا واحد فيهم ما فاهم لاخور..هو فاهمها غالط وهي كذلك وبقاو هاكاك حتا كملات السيمانة وهما شي كيشرق شي كيغرب..
☀ناضت هاد الصباح فحال ديما بوحدها فالبيت تحت عينيها كحال ووجهها صفار وضحكتها ما بقاتش بانت ماكلتها قلالت ونفسيتها مرضات..ناضت عوالة اليوم اتدير حد لهاد الحالة لي هي فيها..ما بقاتش قادرة تصبر انها تعيش مع إنسان شاك فيها ولو غير شوية او ما بقاش معبرها فمرة وقررات قرار لا رجعة فيه..دخلات للحمام دوشات باش تصحصح مزيان وخرجات لبسات سروال ابيض طاي هوت وكريشتها باينة منو صغييرة ومكورة مع كبوط اوف سايز قصير ابيض وفيه رسمة فالاحمر..صباردين نايك سوداء سرحات شعرها بلبلاك وجمعاتو كوتشوفال مرخوف وفرقات القصة فالوسط..حطات ماكياج خفيف وتعطرات ودارت جبدات لافاليز ديالها لي جابت من لبلاكار حطاتها حدا الباب وحطات فوق منها صاكها والجاكيط السوداء ديالها وخرجات هابطة مع الدروج باش تفطر وكتقلب عليه بعينيها..جلسات فالصالة مونجي كتفطر ساهية حتا سالات وناضت قلبات عليه فأرجاء الفيلا ما لقاتوش وسولات عليه عرفاتو ما كاينش من البارح زادت تعصبات وطلعات لبيتها مباشرة كتلبس جاكيط ديالها بعصبية وكتبركم
رؤيا:(بغصة)واااخة اسي فراس!حتا لهاد الدرجة ما بقيتيشي حامل تشوف كمارتي..هانا انهنيك منها..شدانا حنا لهاد لقرع نمشطولو صليعتو..نبقا يانا كنتسناك حتااا ترشقلك عااد تجي تهضرني..ولفتيني ديييما ماشة على كانتك(حصلاتلها يديها فيد الجاكيط)اوووووف الزمر شعندك نتينا عاااود الزبل الله يخليها سلعة
لبساتها وجبدات شعرها خرجاتو منها عكسات يد الصاك الطويل فوق كتفها وجرات لا فاليز ديالها وخرجات جاراها وهبطاتها هاكاك فالدروج جاراها وهي كتزدح موراها..وجهها كيوحي بالجدية عاقدة حجبانها ومكمشة فمها..خرجات مع باب الفيلا ومشات للجيهة لي مصافين فيها السيارت وقفات حدا وحدة وشيرات لواحد من الرجال باش يعطيها السوارت..قرب منها مهبط عينيه وشاف فلافاليز ورجع دار غمز واحد اخور وخلاها واقفة كتسناه يجيبلها السوارت وهي كتغلي وتفيفري برجليها..حتا تم راجع عندها حاني راسو
الحارس:سمحيلي امدام ما نقدرش نعطيهوملك..وما نقدرش نسمحلك تخرجي
رؤيا:(شافت فيه مطولا كتسوط)بالنااااقص كاااع غيير ربحو بداك الزبل..عطا الله الطاكسيات
دازت فيه جارة لافاليز ديالها متاجهة جيهة الدخلة دالفيلا لي بعيييد شوية على الباب دالدار ورجالو موزعين كل واحد فقنت بوحدو مهبطين راسهم ما كيشوفوش فيها وهي كتخنزر فيهم واحد واحد حتا وقفات عليهم فالباب باش يفتحولها
رؤيا:(بأمر)فتح هاد الباب
الحارس:الصمت
رؤيا:وااا بنااادم هضرنا معاك فتح هاد الويل ونتينا كتفرج فيا
الحارس:مدام عافاك ما تحطيناش فموقف خايب..ما نقدروش نفتحوهلك وما نقدروش نخليوك تخرجي بلا إذن من السي سلطان
رؤيا:واااش يانا فحبس ولا شنييي!!شهاااد المرض..شو بلا مااا تحمقني فتح راه ما عنديش الوقت لي نضيعو معاك
بقات كتمشيلو من هنا وهو كيرجعلها من لهيه حتا عصبها ووقفات فبلاصتها كتغلي زفرات بقوة وضربات رجليها مع الارض ورجعات كتجر فاليزتها بالنترة وتزدح فيها حتا تهرساتلها الرويدة وبقات كتزيط عليها وشافت فيها معصبة وزدحاتها مع الارض وضرباتها برجليها ودخلات للفيلا طلعات نيشان لبيتها وبقات غادة جاية كتفكر وتاكل فضفرانها بعصبية حتا وقفات فبلاصتها وفعينيها نظرة تحدي
رؤيا:وااخة ها حنا انشوفو شكون لي ايغلب!!انخرج هي انخرج ولي عندو باب وحدة الله يسدها عليه
فتحات الباب بالزربة وهبطات مع الدروج ومشات مباشرة للكوزينة وفبالها فكرة وحدة خاصها تنفذها....
الصراحة البنات بغيت نهضر فواحد الموضوع ونوضح واحد النقطة لي قريتها عند واحد الاخت فتعليق وثارت إنتباهي..وكما قالت البنت بلي هي القصة رجعات كتجيها مملة بزاااف ورجعات عارفة شنو ايوقع وديما نفس الشيء رؤيا كتزبلها وفراس كينوضها معاها من حقك أختي يجيك الملل والله أنا عندي عااادية هااانيتون كنت فلول كنتقلق دابا تعلمت نتقبل كلشي...مهم أنا غير بغيت نوضح ليك اختي واحد الحاجة وليكم البنات بلي أنا القصة من نهار بديتها وأنا حاطة فكرة وحدة فراسي أنني أنركز فيها فقط على البطل والبطلة سي توووو وكان منظوري للقصة من لول أنني نهضر عليهم وعلى المشاكيل الزوجية لي كتوقع بيناتهم بسبب إختلاف شخصياتهم وتناقضها ونركز علييييييهم هماااا فقط بمعنى هي كتشرق وهو كيغرب وهادشي لي خالق دييييما هاد الجو دالصراع الخفي بيناتهم وهادشي كنشوفوه حتا فالواقع حيث شحاااال من وحدين واقعينلهم مشاكيل وطلقو كاع غير بسبة الشخصيات ديالهم لي كتكون لا علاقة ببعضها وفالقصة عنصر واحد لي مخلي الابطال صابرين على بعضهم هو حبهم لقوي لي جامعهم وهنا كيحضر عنصر الخيال شوية حيث فالواقع ما كاينشي لي يصبر عليك او يبغيك بهاد الشكل...وأنا كون بغيت ندخل شي عنصر آخر فالقصة او نزيييد شي دراما فالقصة كنت نقدر نعملها من زمااااان حيث جاوني بزاف دالفرص وما استغليتهمشي او بالأصح انا ما بغيتشي نستغلهم...نتينا أختي جاتك مملة وكاين لي ايتوافق معاك فالرأي حقكم وكنقولها من نيتي والله☺ وكاين لي ايقول عليها روتينية يعني غادة بنمط عااادي وهادشي ديجا تقال وعندكم الحق كتبقى وجهة نظر...وكاين لي ايصنفها ويقول عليها حلوة..وكاين لي ايقول دايزة بجغيمة دالماء😂 وكاين لي ايقول هاد خيتي 220 جزء والزايد وهي غير كتخور وحتا هي عااادي غير ما تقولوهاليشي فوجهي لميمة حيث سووو توتشي هاد الكلمة😂 وكاين لي ايقول عليها زوييييينة وهنا يحصلي الشرف☺...ولكن أنا كنفضل نصنفها ضمن القصص الهااادئة حسن..هي من نهار لول قلتلكم قصة انفوجو بيها مع بعضنا ماااشي العكس..عليها كنحااول نبعد على كثرة الدراما وحريق الرااس حيث أنا ما باغاهشي ماشي حيث ما عنديشي أفكار أو ما قادراشي...مي كما سبقلي وقلت أنا عندي واحد المنظور على القصة كيفاش باغاها تكون وعلاش باغاها تهضر وما تفهمشي هضرتي زعما بمعنى قراها او كاعلك نننننن ابدا عندااك اختي ماشي هذا قصدي انا ما كرهتشي كون كلشي تعجبو قصتي مي انكون كنحلم بالكولور وباغة نعيش في كوكب زمردة 😅 حيث شي حاجة مستحيييل تعجبي كلشي حيث كتبقى مسألة اذوااااق وغير فالمغرب 40 مليون واحد واش كلشي ايعجبو هادشي لي كنكتب؟ أكيد لا كلها وكيفاش ايشوفها وكلها وكيفاش ايصنفها وأختي اذا جاك الملل فقصتي شماش نئولك الغاالب الله هذا الجهد 😂 انقولك واحد الحل فاش ما يجيكشي النعاس شي نهار قراها بعدا تكون فادتك فشي حاجة بعداااااا بعداااا 😂 وراه والله ما كنطنز ولا راه من نيتي كنهضر حسبا قصة مااا قبل النوم 😂...و اااه حاجة ياخرا ما تنساشي أن هادي أول قصة لختك يعني عااادي ما تكونشي واااااو انا هاد القصة كنحسبها فحال شي سطاج كندوزو دابا وإن شاء الله لمسgي ايكون ماجي فطريق الااااااااا كتاب وحتا هادوك لي ماجين فطريق عااارفاهم ما ايعجوشي كلشي علاااااش حيث الموضوع موضووووع أذوااااااق ☺ ورأيك يحترم ونيييت كنت بااغة حتا انا نشرح هاد القضية ديال علاش القصة ماشة بنمط واحد وجات على يديك نتي..كثر الله خيرك ياااا أختاه :* ..وهانتينا تشوف لي فيا ما هناني ما كنعرفشي نسكت ونجمع دقمي ضروري نهضر الربعة دالصبح هادي الناس ناعسين وأنا جالسة نتفلسف 😂
تبسماتلها رؤيا بمجاملة وهما دارو كيكملو شغالهم وهي دايرة راسها كتشرب حتا سالات الكاس وحطاتو وهزات فيديها شي حاجة مخبعاها وتمات خارجة
رؤيا:مهم هانا طلعت ننعس..اذا ما كانشي لغذا واجد بلااا ما تبرزطوني
خرجات وخلاتهم واقفين كيشوفو شي فشي وطلعات للبيت بسرعة..سدات الباب موراها ووقفات حاطة يديها على جنابها كتفرج فالبيت وكتفكر
رؤيا:زعم ارؤيا شغايوقع كاااع غير زعم..اوووف انعملا ولي ليها ليها يا ربحة يا ذبحة..المهم نمشي فحالي ما انزيدشي نضرب الضربة هنايا
هزات راسها بعزيمة وقربات من لبلاكار جبدات اي حاجة دلحوايج كتلقاها قدامها ورماتهم حدا الناموسية فالارض ودوراتهم بيها..هزات مجموعة من المجلات كتقطع فيهم وترمي فوق لحوايج فالارض..سالات وحنات هزات ورقة وجبدات لبريكة من جيب الجاكيط لي هزات من الكوزينة وحطاتها قبالة عينيها شعلاتها وحطات الورقة فوق منها حتا شدات فيها لعافية مزيان ورماتها فوق الكومة دالاوراق والحوايج..هزات ورقة من جهة اخرى شعلاتها ورماتها عاود وبقات هاكاك والعافية غادة وكتشد فالاوراق والحوايج بشوية حتا شافتها بدات تشد مزيان وهزات صاكها وبعدات جهة الباب فتحاتو بالزربة وهي كتشوف فيها غادة وكتشعل وتشد فالناموسية وفالزرابي وسارحة فالبيت خلاتها هاكاك وسدات الباب بالساروت وهبطات مع الدروج كتجري وصوت إنذار الحرائق خدام كيسرسر..بانولها الخدامات جايين كيتجاراو من الكوزينة وتخبعات تحت الدروج كتفرج فيهم كيغوتو ويعيطو على الرجال وكيقلبو منين جاية لعافية لي شعلات الانذار..
ترونات الفيلا كلشي كيجري والرجال كيتسباقو وكيقلبو حتا غوتات وحدة من الخدامات لي طلعات للطابق الفوقاني
طلعو الرجال كيتسابقو لقاو الدخاخن خارجة من بيتها والخدامة عينيها خارجين وكترجف
الخدامة:المدام..المدام ناعسة لداخل اهئ اهئ عتقو
الحارس:(وهو كيحاول يفتح الباب المفتوح)علمو ميسيو فراااس دغيااااا
ما بغاتش تفتحلو وضربها بكتافو فرعها ورجع بعد وجهو هرب من العافية لي كانت اضرب فيه..لقا البيت شاااخدة فيه العافية من كل قنت وعامر دخاخن ما لقى كي يدير يدخل وما قدر يشوف والو وسط الدخان وحط يدو على فمو كيكح
الخدامة:اوييلي المدااام..اويلي شعلات فيها العافية!
الرجال كلهم يتسابقو بالمانطات فازكين والتيويات دالماء والطفايات دالحرائق..مهم كلشي كيجري باش يطفي العافية لي غير غادة وكتزيد والماء هابط من الرشاشات لي فالسقف والخدامات تجمعو الفوق كيبكيو وكيعاونوهوم حتا هما باش قدرو حتا بدات العافية كتنقص بشوية بشوية..
فديك الاثناء لي كانو هما كيجريو وخايدين كيطفيو فالعافية استغلات رؤيا الفرصة وخرجات كدور بجنابها وتشوف واش كاين شي واحد وفيما يبانلها شي واحد كتخبع حتا كيدوز وترجع كتسلت حتا خرجات مع باب الفيلا ولقات راسها فالشارع..ضرباتها بجرية غادة وكتشوف فالطريق واش يبانلها شي طاكسي حتا وقفات واحد وطلعات فيه كتلهت وكتشوف موراها
رؤيا:اووف لا(سرطات ريقها)لاgار..دغيا
تحرك بيها الطاكسي وهي حطات راسها على الكوسان مغمضة عينيها وحاطة يديها فوق قلبها كترد النفس..وجهها ايطرطق بقوة لحمورية ديال الخلعة والجري لي جرات وما تهدنات حتا ضرب بيها الطاكسي النص فالطريق..
وقف بيها الطاكسي حدا محطة التران جبدات لفلوس خلصاتو ونزلات بحالها كتمشى بالزربة حتا دخلات واتاجهات مباشرة نلي جيشي
رؤيا:السلام عليكم
الشاب:وعليكم السلام
رؤيا:عافاك التران ديال طنجة فوقاش خارج
الشاب:لقيتيه عاد دابا كي خرج..والتران لي موراه ما غايجي حتا لمن دابا 3 دالسوايع
رؤيا:اححم..شو اخاي واش تقدر تعمل فيا خير وتاخذني كورصة برا لمدينة؟
السائق:كيفاش؟لا وااالو اختي ما نقدرش غير سمحيلي
رؤيا:شو عااافاك نعطيك شحال مااا بغيتي غير عمل فيا هاد لبليزير..مزروبة بزاااف والتران فاتني وخاصني نبقا نتسناه شحااال ويانا معنديشي الوقت..الله يخليك والثمن لي حليتي عليه دقمك يجيك غير فوكني!
السائق:اختييي راه ما نقدرش..ما عنديش الحق و واخة نgولو نغامرو معاك ونغطيو لاgريما..الطاكسي اصلا ماشي ديالي..ومولاه الا عرف ما ايبغيش..غير سمحيلي اختي شوفي شي حد خور وصافي
رؤيا:اوووووف وا غيير توكل على الله مولاه باش غادي يعرف؟وراه والله حتا نتهلا فيك بالمعقول
السائق:(كيفكر)اممم ما عرفتش والله..فين نتي باغة تمشي بعدا؟
رؤيا:ااا طنجة!
السائق:الله اكبر..طنجة على قدها..لا والو اختي الطريق بعيدة خاصني هي لقليلة 10 دالسوايع مشي ومجي ونمشي كنطير فالطريق..ننن غير هبطي اختي ما انقدرش نعاونك..نطمع فلفلوس ونخرج على خدمتي فخطرة..راه gالوها ناس زمان لي بغاها كلها كيخليها كلها
رؤيا:(ضربات الكوسان)تفووووو..صافي صافي واخة ماشي مشكيل..كتعرف شي اجونص ديال الطوموبيلات قريبة من هنا؟
السائق:اهاااه موجوودين غير هما
رؤيا:اووك ديني عند اقرب وحدة فيهم
السائق:كنعرف واحدة قريبة فيها الطومويلات ديال لفريع الا بغيتي والا بغيتي ناخدك لشي واحدة كيعاوطو فيها الثمن
رؤيا:الثمن ماشي مشكيل غير شلط راسك دغيا.. خوذني عند اقرب واحدة
السائق:اوك..بسم الله
ديمارا السائق وهي حاطة يديها على فمها كتلعب بصباعها متوترة وكل مرة تسولو واش قربنا حتا وقف بيها قدام اجونص من بابها باينة اجونص VIP..خلصاتو وخلاتلو الصرف ونزلات كتجري وتشوف موراها..ودخلات كتقلب بعينيها حتا وقف عليها شاب بطقم عمل زوين كيرحب بيها
رؤيا:اااااه اوك..غير طلقني دغيا وما يكون غير خاطرك
الشاب:ههه اوك مرحبا
مشات موراه كدور فعينيها وفالخدامة لي كل واحد وفين شاد بلاصة فلاجونص ودخل هو وياها لواحد المكتب حيطانو زجاجية كيبان منهم شنو واقع برا وشنو واقع لداخل
بعد مدة قليلة خرجات سايقة الاوطو لي اختارت وكسيرات شادة الطريق خارجة من الرباط وقبطات الطريق السيار المتاجه لطنجة..
سايقة وبالها كلو مع فراس..يكون عرف شني عملت؟..يكون وصل للفيلا؟..شني اتكون ردة فعلو؟..اكيييد غادي يصعر فاش يعرفني خرجت بلا خبارو..زعما يكونو طفاو العافية ولا تكون شبرات فالفيلا كاملة؟..اوووووف..عنداك يكون شي واحد تآذى بسباب العافية لي شعلت؟..لا لا اكيييد لا ما يمنكشي ما ايوقع والو اكيد!..شني زعما دابا يقدر يلحقني؟..والا لحقني شني ايعمل زعما هاء؟..أصلا ما عندو كي يعمل يجبرني..GPS لي يقدر يجبرني بيه ما عندو كي يعملو حيث خليت تيلي فالبيت يعني ما ايجبرني حتا نكون وصااااالت ندارنا وديك الساع يقرب مني الا قدر..المسعور ياااخور..أصلا محال يحمق حتا راسو يفتش عليك الحمقة وبحال والو تجيه من جنة وناس حيث تهنى منك..هادشي لي كان باغي هو أصلا..
هاكة بقات غادية فالطريق..فكرة تديها وفكرة تجيبها وفيما تفكرو عينيها كيتغرغرو بالدموع حتا كتبقا تشوف غير الضبابة وتزير عينيها حتا كيهبطو الدموع مكركبين..دازت على اول محطة اداء فالطريق خلصات ورجعات تحركات مكسيييرية وساهية بالها مرفوع حتا..زيييييييييط طيييييط طيييييط..الصمت
بمجرد ما نزلات بيه طيارتو الخاصة وهبط لابس سروال ثوب اسود مع قميجة شيبي ومونطو اسود قصير وصباط كلاص اسود..وقف قدامو واحد من رجالو مخلوع وعينيه كيلعبو بقوة الخلعة ما قادرش حتا يهضر معاوط
الراجل:اا مييسيو!
فراس:(مطلع حاجبو وهاز راسو)شكاين؟
الراجل:اا ميسيو..الفيلا!
فراس:هضر مقاد ونتا كتفافا عليا تما انبات معاك هنا
الراجل:(سرط ريقو)ميسيو الفيلا شعلات فيها العافية
فراس:هاااا كييفاش؟..شكااتخربق شمن فيلا؟
الراجل:(حادر راسو)احم الفيلا لي جالسين فيها اميسيو..والبيت ديال المدام هو لي شعلات فيه بالضبط
فراس:شكاااااتخربق(شنق عليه)كيفاش شعلاات العااافية..شنووو وقع هضااااار شنووو وقعلهااااا؟
الراجل:(بخوف)ااا اميسيو انا انا ما عارفش غير قالولي بلي العافية شعلات فبيت المدام وبلي خاصني نعلمك
طلق منو ودفعو جابو فالارض ووقف فمكانو مصدوم بدون حركة وعينيه على بلاصة وحدة..حتا فجأة تقدم بسرعة لسيارتو وهو كيعاير فيهم ويغوت ويبعدهم من طريقو ما باغيش يتيق أنه يمكن يكون وقع لي فبالو..دمو كيغلي وذاتو كلها رجعات حمرا كينهج..فتح باب الاوطو وجبد السائق من الكول ديالو لاحو برا الطوموبيل وركب فبلاصتو وكسيرا حتا تسمعات التزييطة ديالها مع الطريق ورجالو طلعو كيتجاراو فسياراتهم وتبعوه
وقف فباب الفيلا ودخل كيجري خلا الباب دلوطو محلولة لقا الروينة نايضة فيها..ما كاين غير جري يا ما تجري..الماء مهرق فكل جيهة ورجالو غير شافوه وقفو كيترعدو كلهم عرقانين وفيهم لي وجهو موسخ بلكحولية دالعافية..ما شافش حتا فيهم طلع مباشرة كيجري فالدروج ويخلف درجة اه وربعة لا حتا وقف فباب البيت لي رجع رمااااد..العافية ما خلات فيه حتا قنت وحيوطو كلهم كوحل والدخان مزال طالع منو..دخل كيقلب بعينيه فكل قنت بخوف ذاتو كلها كترجف ورجع خرج لقا بعض من رجالو واقفين فالكولوار وهو يشنق على واحد فيهم
فراس:(بغضب)فيييين هياااااااا؟..فيييييييين
الراجل:ااا سس..سي فراس مم.ما عرفننناش مم.. ما لقيناهاش فالبيت وممالقينا حتا جثة..ما عرفناش فين هي
تنهد لوهلة براحة فاش سمعو قال بلي ما كايناش الجثة ديالها ولكن سرعان ما تملكاتو حالة من الغضب
فراس:(قاطعو ببونية لوجهو جابو طايح) سكووووووووووت(وقف مزير على القبضة ديالو وكيشوف فيهم بغضب كينهج)كيفاش ما كاينااش فيين غاتكون مشاااات..هضرووو الله يحرق ******
الراجل2:ميسيو فراس حنا قلبنا الفيلا كاملة وما لقيناهاش..ما عرفناش فين هي
فراس:(بدى يكلاكي فيهم هي وفين جات)وااااااااش كتفلاااو علياااا..كيفاااش ما عارفينش؟..شنووو هي خدمتكوووم!؟شنووو تشقات الارض وسرطااتهااا!
الراجل:(كيتوجع)اااااخ ميسيو..سمعني..هي اخر مرة شفناها كانت باغة تخرج وجارة واحد لا فاليز معاها وحنا ما خليناهاش..والخدامات قالو بلي هي قالت ليهم بلي اتطلع تنعس فبيتها ومن تما ما بقاو شافوها حتا شعلات العافية فبيتها وسحابنا هي فيه وفاش طفينا العافية ما لقيناها لا فيه لا فالفيلا..ما عرفناش فين اتكون مشات
زير على الفك ديالو وخنزر فيهم واحد واحد كيدور هضرتهم فراسو ودار ضرب يديه على لحديدة دالدروج لي كطل على الطبقة السفلية..يله بغا يدور يهضر وهو يوقف عليه واحد من رجالو كان طالع فالدروج كيجري
الراجل:ميسيو فراس..المدام!
فراس:(شاف فيه بالزربة)لقيتوها؟
الراجل:لا اميسيو..مي شفناها فالكاميرات المدام خرجات من الفيلا
فراس:شنووووو كيفاش خرجات فين مشات؟
الراجل:وي ميسيو فاش كنا حنا ملهيين كنطفيو العافية خرجات هي بلا ما يحس بيها حتا واحد وكانت مخبعة تحت الدروج عليها حتا واحد ما شافها..وو زيد عليها هي لي ااا
فراس:(عقد حجبانو كأنه كيفكر وشاف فيه بغضب)طلق راسك دغيااا شنو هي لي؟ونتوما كل واااحد فين كيبيض عليا فقنت
الراجل:احم زيد عليها التسجيل دالكاميرات دالبيت قبل ما يتحرقو كيبين بلي المدام هي لي شعلات العافية فبيتها
فراس:نعاااام!هه كيفاش هي لي شعلات العافية واش كضحكو عليا..مالها مسطية تشعل العاف..
حبس لكلام كأنه تفكر شي حاجة وملامحو زادو تزيرو كثر ما هما مزيرين وبان فيه الغضب ديال بصح وعروقو غير ما زادو تنفخو..جمع القبضة ديالو حتااااا جمعها ودار ضرب فاز كبييير مزخرف موقفينو فوسط الكولوار حتا تشتت كاامل وغوت باعلى صوتو
فراس:رؤياااااااااااااااااااااااااااا😡
وقف عينيه خارجين فالفاز وصدرو كيطلع ويهبط حتا نطق نفس الراجل
الراجل:ميسيو حنا دايرين جهدنا ومن بعد ما عرفناها خرجات سيفطت الرجال يقلبو عليها وما ايرجع..
هز يدو قدام وجهو كحركة باش يسكت ورجع خشا يدو فجيبو جبد تيلي ديالو كيقلب فيه وعينيه خارج منهم الشرار..حتا طلعات ليه نقطة حمراء كتحرك فوسط خريطة وزير على الفك ديالو بعصبية ونزل كيجري مع الدروج وكيزول المونطو رماه فالدروج ولي لقاه فطريقو كيدفعو يجيبو لاصق فالحيط..ركب فسيارتو وخرج مكسيري خلا غير لعجاجة موراه..وحط تيلي قدامو متبع النقطة فين غادة
فرانات الاوطو وعينيها خارجين وقلبها غايسكت قابطة الفولون بزوج يدين ومزيرة عليه وكلها بدات كترجف وحطات يديها كتكلاصوني بعصبية حتا حبسات من بعد ما ركزات الشوفة وبدات كتمتم غير بوحدها وعينيها كيلعبو فبلاصتهم
رؤيا:اواعدي لا..اواعدي لا هو والله حتا هو
خرجات عينيها فالسيارة لي وقفاتلها فالطريق حابساها واضطراتها توقف فجأة من بعد ما عياااا كيكلاكصوني عليها ويعاود وهي ما كتسمعش حيث كانت ساهية وبقات غادية وما وقفاتش..عصباتو وفاتها بالاوطو بمسافة لا بأس بيها وعاد فرانا باش يخليلها مساحة فين توقف
نزل من السيارة بالزربة وعينيه غير عليها وهي كتشوف فيه جاي وكيقرب منها..عرفات الطرح ما ايخرجش بسلام وبدات كتفتف تزول السمطة حيداتها بالزربة وحلات الاوطو باغة تهرب يله دارت مع الباب وهو يشدها من شعرها جارها
رؤيا:كنت ماااشة فحااالي اهئ اهئ نرجع لدااارنا دار با ومي اهئ اهئ كنت باااغة نتهنى منك ومن هاد الزمر لي رجعت عااايشة فيه اهئ اهئ
شاف فيها بصدمة وعقد حجبانو وتقلبات النظرة ديالو لنظرة غضب شديييييد عينيه كون كانو قرطاس كون قتلوها وهي كتفيفري ووجهها بين يديه..طلق منها ومن شعرها بالنترة كيطلع فيها ويهبط وهي كتمسح فدموعها ودافعة جبهة واخة غتموت بالخوف..بقى كلامها كيتعاود فوذنيه ومع كل كلمة كيزير على القبضة ديالو وعلى فمو بعصبية ويزيييد يكمش جبهتو ويزفر..غمض عينو بقوة وهز يديييييه حتاااا لفوق ونزل بيها طاااااااااااااااااق
رؤيا:وااااااااااااع اهئ اهئ
حطات يديها على وذنيها بقوة الخلعة..وكتشوف فيه بنص عين كيفاش بزط لغطاء دالموطور ديال الاوطو من بعد ما نزل عليه بالقبضة ديالو وبقى على نفس الوضع ما تحركش كينهج وما قدرش يضربها او يهز يدو عليها..كلامها بقا كيحفر فيه بحال السم وهز يدو كيضرب ويعاود فلغطاء ويغوت وكيحااول يبرد داك الحر لي فيه باش ما يخرجوش فيها حتا بعزو مزيان وعاد هز عينيه لي فحال جغمة ديال الدم لقاها بعدات عليه بخطوات وكتشوف فيه وتبكي وترعد فبلاصتها خلف لعندها بالزربة وشدها من دراعها جارها موراها وهي كتعافر معاه والسيارة لي دازت من حداهم كيبقاو ركابها متبعينهوم بعينيهم حتااا كيغبرو
فراس:(وقف وقابلها مع وجهو بغضب وهز صبعو عليها)بربي وكنقسم ليك بمن بعث محمد..والله وما تزيدي وتسدي داك الفم حتا نحسب ربي عممممرو ما خلقك..والله حتا نقتلك كتسمعيييييي😡!نقتتلك ونقتل رااااسي ونتهنااا من هاد لحزاااق كاااامل..مصبر راااسي بزز وما باغيييش نرجع نديير شي حاجة لي ندم علييها..ودااابا اتحركي قدامي وما تلعبيليش على اعصابي كثر من هاكة!
خلعها بصوتو الخشن لي باين فيه الغضب وعينيه لي باااين فيهم الجدية وان تهديدو ما كانش مجرد تهديد والسلام..تبورشات بقوة الخلعة وضربات الطم فخطرة حتا الشهقة دلبكا ما بقاتش كطلع ورجعات صفراااء عمرها خافت منو فحال هاد النهار وهي كتشوف فيه بقاتلو نقطة واحدة ويتفركع..جرها مرة اخرى موراه وهي تابعاه مرفوعة وكتحاول تجاري خطواتو السريعة حتا لقات راسها جالسة فالاوطو والباب لي جيهتها تزدحات..دارت على يسارها شافتو ركب حداها عينيه مركزين قدامو دار سمطتو وديمارا الاوطو
فراس:(تحت سنانو)ديري سمطتك
رؤيا:الصمت
فراس:(زير على الفولون)ديييييريييي سمطتك
فيقها من القلبة لي كانت فيها بصوتو لي زعزعها وجرات السمطة بشوية وقاداتها ورجعات كتشوف قدامها وكأنها فعالم اخر حتا حسات براسها مشى وجا من بعد ما كسيرا بالاوطو بسرعة وما رجعش شاف فيها وهز تيلي صرد شي حاجة ورجع حطو
بقات هاكاك ساكتة وفيما دور تشوف فيه تلقاه مركز فالطريق قدامو وكلو عرقان وحمممر ومخنزر وبعض الشعرات هابطين على جبهتو السوميج لاصقة على صدرو ودراعو بقوة لعرق وكل شوية كيزفر بالجهد..سهات كتلعب فصباعها وبالها غير كيفاش قدر يلقاها؟كيف دار عرف بلاصتها؟ياك هي خلات تيلي فالبيت؟ايوا كيفاش دارلها؟بقات هاكاك كتسائل مع راسها وتفكر فجو من الصمت حتا كتبانلها بلاكة مكتوب فيها"مرحبا بكم الرباط"ودارت شافت فيه ورجعات حدرات عينيها..حتا فرانا السيارة بقووة ونزل هو لول زدح الباب وهزات راسها مخرجة عينيها وكتشوف فجنابها ما فاهمة والو...
بقات كدور فعينيها ما فاهمة والو حتا فتح عليها الباب ووقف كيشوف فيها بجدية وفعينيه شوفة قاصحة..عطاها إشارة يعينيه باش تنزل وهي بقات كتشوف فيه بدون حركة
فراس:(بعصبية)راني كنتسناك!
رؤيا:(بتوتر)فاين انمشيو؟
فراس:نزلي
رؤيا:حتا تقولي فاين ماشين؟علاش جينا هنا؟
فراس:(بلغوات)واااا نزلييييييييييي
حطات يديها على السمطة فتحاتها بالزربة وهي كتفافا وهبطات بشوية عليها وعينيها كتهزهوم فيه تلقاه مخنزر فيها وترجع تهبطهم كتشوف فالارض..زدح الباب بالجهد وشاف فيها شوفة ناااقصة وجرها من دراعها غادي بيها فوسط الساحة الخاوية لي فيها غير بعض من رجالو كل واحد فين واقف..وطائرة خاصة واقفة فوسط الساحة..طلع دافعها قدامو فالدروج دالطائرة وهي غير كتدور فعينيها وضاربة الطم..رحبات بيهم بنت فالباب ودخلها حتا وقفو وسط الطائرة وطلق منها بالزعفة وقلب الدورة دخل لإحدى الغرف وخلاها هي واقفة ما عارفة ما دير وغير كتشوف بعينيها..تسدات الباب وتقدمات عندها نفس البنت بإبتسامة وطلبات منها تجلس ودير السمطة ديالها حيت ايقلعو..شافت فيها بحيرة ورجعات شافت فالكرسي لي كنعتلها تجلس فيه وجلسات مرفوعة ما فاهمة والو حتا حسات بيد قاست خصرها وشافت فالبنت لي سداتلها السمطة وبعدات عليها كتبتسم..
بقات جالسة كتستوعب وهزات عينيها كتكتاشف ارجاء الطائرة لي فيها..لقات على جنبها زوج كراسى بويض دالجلد ملاصقين بحال لي جالسة عليه وقدامهم طبلة خشبية كتبري وموراها جلسة دايرة على طبلة مستطيلة بنفس لكراسى..زكات بصوت خفيف حيث تفاجآت منين حسات بالطائرة طالعة ورجعات ترخات كتشوف فجنابها..
المضيفة:اوك..اتمشي على طول الكوليدور واتلقاه على ليمن
رؤيا:اه اوك شكرا
المضيفة:مرحبا امدام
وقفات رؤيا زولات جاكيطتها دالجلد حطاتها فوق الكرسي وهبطات الكبوط لي لابسة حيت طلعلها شوية وتمشات بخطى بطيئة حتا وصلات فين ذلاتها ودخلات قدات حاجتها وغسلات يديها وخرجات كدور عينيها وتكتاشف ارجاء الطيارة..شافت على ليسر ديالها بانلها كولوار قصير وفنهايتو مكتب صغير فالابيض وتقدمات كتمشى حتا لقات راسها فغرفة نوم..السرير فالوسط واخذ مساحة كبيرة بفراش فالابيض والذهبي فحال الالوان لي غالبة على الاثاث لي فالطائرة وزوج كراسى واسعين واحد على ليمن وآخر على ليسر ديالها والخزانات دايرين على جناب الغرفة وفوق منهم نوافذ الطائرة..وقفات فالوسط عينيها عليه وهو متكي فوق الناموسية حاط رجل فوق رجل..يد فوق جبهتو ويد فوق كرشو..مغمض عينيه وعاقد حجبانو
بقات كتشوف فيه من بعيد وشفايفها كيرجفو وترجع تزيرهم باش تحبس البكية..هو ما دار حتا ردة فعل بقى على نفس الوضع كأنه ناعس واخة حس بيها وشم ريحة عطرها منين دخلات وخلاها يشوفها شنو غادي دير..قربات منو كأنها خايفة تخلف حتا وقفات عند راسو وصدرها كيطلع ويهبط وعينيها كيتأملو كل شبر فيه..وقفات كدقق فوجهو كأنها شحااال ما شافتو وعاضة على سنانها بغصة..جمعات النفس مزيااان وطلقاتها ومسحات عينيها وحطات يديها على كتفو كتزعزعو
رؤيا:(بالنفخة)هييي فييق
فراس:الصمت
رؤيا:واا فييق..معااك كنهضر..نوض
فتح عينيه بسرعة وشاف فيها بغضب كارز على فمو حتا خلعها وهزات يديها من على دراعو ورجعات خطوة لور وطلعات حاجبها دافعة جبهة
فراس:(رجع جلس مخنزر)شوفي نهضر معاك..ما تشوفينيش سااااكت يسحابك راسك دوزتلك هادشي لي درتي وتبدااي تفرعني..راه غيييير داير بحساب انك مريضة وهازة روح فكرشك اما انا راكي عااارفاني بلااا ما نgولك..ودابا اتمشي تجلسي وتقطعي حسك ما نسمعوووش ولا راه بربي حتا كتقلبي عليا نطيح مها هاد الطيارة ونتهنااااو حناااا فخطرة..
شاف فيها مطولا مخنزر وهي واقفة قدامو كتسرط فريقها بالخوف من كلامو ونظرتو القاصحة لي كتوحي بجدية هضرتو..ناض وقف بالزربة ورجعات هي لور خايفة شاف فيها مطلع حاجبو ورجع خرج فحالو وخلاها واقفة فبلاصتها كدور هضرتو فراسها زيرات على راسها وخرجات موراه مكمشة فمها وعاقدة حجبانها..توجهات للمكان لي كانت جالسة فيه لقاتو حتا هو تما عاطيها بالظهر وجالس فالكرسي لي كانت جالسة عليه وطالق رجليه مسرحهم وحاط يديه على فخاضو وراسو متكيه لور..هز راسو وجات عينو عليها وهي واقفة على يسارو ورجعات جلسات حتا هي فلكراسى لي من الجيهة الاخرى قرب الشرجم كطل منو..قلب عينو فيها وشير للمضيفة قربات عندو بابتسامة ودارت رؤيا شافت فيها كطلع وتهبط وتشوف فيه هو مخنزرة..عاد رداتلها البال شنو لابسة وكيف دايرة..كانت بنت ملامحها عربية ومزيونة..جامعة شعرها الاسود بضفيرة سبولة واصلة لنص فظهرها ولباس رسمي عبارة جيب تحت الركبة بشوية جرونة مع سوميج بيضة وكابة جرونة ووشاح على عنقها..حاطة ماكياج خفيف مي واخة هاكاك زينها باين..زفرات بعصبية وبقات كتفيفري برجليها ما بغاتوش يهضر معاها
فراس:(مغمض عينيه ومتكي راسو)جيبيلي شي كينة دالراس
المضيفة:(بلطافة)اوك ميسيو..مي واش واكل شي حاجة بعدا باش ما ضركش؟
فراس:(خنزر فيها)ماش..
رؤيا:(نقزات هي قبل حتا ما يهضر هو)ونتينا شغلك؟ضرو ولا ما ضروشي شعندك الطبيبة ديالو؟اولا غير خاصك تدي وتجيب معاه فالهضرة
فراس:شاف فيها بنص عين متفاجئ ومطلع حاجبو
المضيفة:نووو مدام ما تفهمينيش غلط..انا كندير غير خدمتي..حيت من مسؤوليتي نوقف على راحتكم..ومن واجبي نتأكد من سلامتكم
رؤيا:حنا مرتااااحين الحبيبة غير تهنا نتينا ومشي جلس عطي الراحة غير نراسك
فراس:(بسخرية)ونتي مالك تعصبتي..خلي لبنت دير خدمتها
حسات براسها وسرات معاها شنو قالت وسرطات ريقها ما رضاتش وبقات كدور فعينيها ما عرفات ما تقول وبدات كتقول اي حاجة جاتها لبالها
رؤيا:ضبر رااسك نتينا وياها..يانا ماشي شغلي غير خليوني نعس صدعتوني بالهضرة..اصلا يانا ما عندي دخلة فيك موت كااااع شكون داها فيك ولا فغييرك
فراس:(باستخفاف)عنداكي طرطقي غييير بشوية عليك(قلب وجهو كيتمتم)بقات لمك غير الغيرة..(شاف فالمضيفة)جيبيلي نتي لي gلتلك وصافي
المضيفة:اوك ميسيو
قلبات وجهها كطل من الشرجم مزيرة على فمها كتمتم
رؤيا:تفوووو الله يعطيني اللقوة..يييخ مني فيا الطيكوك..دابا ايزيالو غير جاتني الغيرة عليه وايبدا يتنفخ عليا كثر ما هو منفخ..انهنننن تفووووو عليك الحمارة
بقات هكاك قالبة وجهها ما رجعاتش شافت فيه كطل من النافذة وساهية كتسمع صوت زفيرو ومرة مرة كيسوط بالجهد على إثر لحريق لي فراسو واخة شرب الكينة حتا بداو عينيها كيتغمضو بشوية بشوية..
بعد مدة هز راسو لي كان متكيه ومرجعو لور وفتح عينيه..حرك راسو يمين وشمال وقلب عينيه شاف فيها..لقاها ناعسة وراسها معوج حاطاه على زجاج النافذة والقصة هابطة مغطيالها عينيها..
حط مرفقيه على ركابيه وحط فمو على يديه لي جامعهم فوسط بعضهم على شكل قبضة وحدة وكيشوووف فيها بتمعن كيفكر عاقد حجبانو وكيتنهد..قلب وجهو ورجع ناض تاجه جيهتها هزلها راسها بشوية وحط يدو تحت من رقبتها ويد تحت ركابيها وهزها بخفة وعينيه ما حيدوش على وجهها..تكمشات فيه وخشات راسها فصدرو ما حاسة بوالو..وتقدم هازها متاجه بيها لغرفة النوم ونفسو كضرب فوجهها وتحرك القصة لي على عينيها..حطها برفق فوق لفراش وغطاها بشوية وجلس بجنبها كيشوف فيها بحسرة بعدلها الشعر على وجهها وتنهد..قلب وجهو حاط يديه مور رقبتو وخاشي راسو بين ركابيه كيتنهد كأنه هاز جبال فوق كتافو..بقى على نفس الوضع لمدة وناض وقف وخرج بحالو من البيت..
بعد مدة ناضت على يدين كيحركو فيها ببطء وصوت حنين كيعيطلها وحلات عينيها بشوية لقات المضيفة واقفة عند راسها كتفيقها
فراس:طلقي راسك دغيا..ولا ولفتي حتااا نجرك مورايا عاد تزعزعي
رؤيا:(عقدات حجبانها)بلااا ما تغوت الله يخليك..غير بشوية عليا..ما ياناشي كنتسابق
فراس:(بعصبية)راه انمشي ونسمح فوالديك فهاد لخلا ونخليك..عندك زوج دقايق ما نلقاكش حدايا ما تلومي غير راسك
خرج وخلاها متبعاه بعينيها كتخنزر فيه..ناضت بالزربة هزات لغطاء عليها كتسوط ودازت للحمام غسلات وجهها بالزربة وخرجات لقات المضيفة واقفة مداتلها جاكيط ديالها..قبطاتو منها ولبساتو وخرجات مع الباب
ضرب فيها هواء بااارد لوجهها وكمشات راسها فالكول دالجاكيط وخشات يديها فجيابها وهبطات كتشوف فجنابها..لقات راسها فوسط ساحة واسعة شوية جات فموقع فحال الحفرة فوسط مجموعة من الجبال لي مغطيين بالشجر وحتا حد من غيرهم ما كيبان فديك المكان غير الطيارة لي هبطات منها وهيليكوبتير واقفة بعيدة عليها..هزات راسها كتشوف فداك المنظر الطبيعي الخلاب لي جات فوسطو واشعة الشمس لي بدات كتغرب كتبان من مور أحد الجبال والسماء ملونة بلون أحمر ومغيمة شوية..حلات فمها ما متيقاش وما عرفاش فين هي حتا سمعاتو كيغوت ودارت لقاتو جالس فالهيليكوبتير فمكان السائق وحاط الكاسك على راسو
فراس:واااا المرض طلقي راااسك شحال انبقا نتسنااك
شافت فيه باستغراب وتقدمات عندو بخطى سريعة ودارت من الجيهة لوخرا لقات الباب مفتوحة وطلعات جلسات حداه ما فاهمة والو
فراس:واااش ما غتسكتيش..راه انرمي مك من هنا سدي فمك وهنينا من الصداع..ما انقتلكش غير ارتاحي..كون بغيت نديرها ما نحتاجش نجيبك هاد الطريق كاااااملة..بلحق حتا دابا اتزيدي هضرة واحدة غادي دورلي فلخوا ونديرهالك على قد نيتك
جمعات فمها عندها وتكمشات فالكرسي كتشوف فيه بنص عين وهو مركز فالطريق قدامو..قلبات عينيها فالسرجم وسهااات فالمناظر لي تحت منها..الشجر فكل بلاصة والارض ما كتبانش لكثافة الاشجار لي مرة طالعة مرة نازلة على شكل هضاب وجبال..شهقات حاطة يديها على فمها وعينيها على النهر لي دازو من فوقو والاشجار دايرين على ضفافو من زوج جوايه وضوء الشمس نعاكس على سطحو فمنظر خلاب سحرها وخلا ابتسامة اعجاب ترسم على وجهها..حتا بعدو عليه ورجعو كيبانولها غير الشجر مرة اخرى
هبطو فوسط مكان خاوي نوعا ما من الاشجار ما كانوش بنفس الكثافة..ونزلو فوق دائرة كبيرة مخصصة لهبوط الطائرات..نزل ونزلات موراه حالة فمها والخلعة شاداها..وعينيها كيتساراو فالمكان لي هي فيه..تقدم هو وتبعاتو لاصقة فيه خيفانة وكتشوف راسها قدام بيت من طابقين..طابق سفلي واااسع وطابق علوي مسقفين مسافة صغيرة منو والباقي مخليينو على شكل طيراس..كلو من الخشب المثين وحيطانو دايرة بالزاج كاملة كتبين الداخل ديالو..والشجر داير بيه من كل جيهة..دخل مع الباب ودخلات هي موراه بالزربة مخلوعة
فراس:(هز راسو فيها بجدية)ترجعي فحالك هه ما عندك فين ترجعي غير ارتاحيلي مع راسك..هنا اتبقاي فهاد لخلا ولقيفار غير انا وياك الراس فالراس..باش نشوفوك فين اتوصلي بهادشي ديالك..صافي انا ما بقالي شغل(هز يدو لفوق)سالييييييت..انبقى مقاابلك غير نتي دابا ما عندي شغل من غيرك..يا إما تقادي وتمشي معايا نيشان ونعيشو هاانيين..ويا إما تقصحي راسك وترجعي للعب والتبرهيش وحتااا انا انتبرهش معاك ديك الساع وفلخر يا نقتلك يا تقتليني..ونتي اختاري لي يسلكك دابا يا إما و يا إما..أنا صافي هزيت يدي والكرة رجعات عندك نتي لي اتقرري..(تبسم بسخرية)وهاد المرة ما عندك فييين تهربي واخة تشعلي ماشي غير لعافية..وانجيك من اللخر(تجلس حاط يديه على ركابيه)وسمعيني ابنت الناس..اناااا هو لي ما عندك فراق عليه واخة طيييري وتنزلي..وgلتها وانرجع نعااااودها انا وياك ما يفرقنا غييير لموت والا بغيتي تفارقي عليا قتليني بعدا..هانا قدامك والله ما نحبسك غير اجي..أما ما حد النفس مزالة كطلع وتهبط فيا فما عندي فراق عليك..حيث اولا الحاجة ديااالي عمري ما كنسمح فيها واخة يوقع لي يوقع..وثااانيا عمرك تنساي بلي داك الولد لي فكرشك ولدي ونتي مو وانا عمري ما نفرط لا فيه لا فيك..سواء كنتي باغة تعيشي معايا ولا ما كنتيش باغة..كرهتيني ولا بغيتيني..ارتاحيتي معايا ولا ما ارتاحيتيش..ما كيهمنييش وآخر همي..اتعيشي معايا بزز ولا بلخاطر..والا كنت نتي صبرتي عليا فحتااااا انا راني صبرت عليك وعلى هبالك ومرضتيني فحياتي غييير بلعصب ولغوات كل مرة وبالي دييييما مشطون غير معاك ومع مشاكيلك..ودابا هادشي لي عطا الله ابنت الناس دابا نتي مراتي وهازة فكرشك ولدي وما بقالنا فييين نرجعو سواء بغينا سواء لا..انا وياك ما بقالنا فرااااق الالة والا كنتي باقة كتفكري فداك خينا غير نسايه حسن ليك حيث صافي بااااااح مشى تزوج ورااااه كيتفطح مع راسو هو ومراتو..ونتي من غيري والله لا كنتي لشي حد....
هو كيهضر وهي واقفة متبعة معاه بدون حركة غير كتسمع وعينيها مغرغرين بالدموع حتا بداو يهبطو غير بوحدهم..سكت وبقى كيشوف فيها شحااال فصمت عاقد حجبانو وكيتسناها تهضر
فراس:ما اتgولي والو؟
رؤيا:(مسحات دموعها وضحكات بسخرية)هه علاش نتينا خليتيلي ما نقول(هزات كتافها)ياك نتينا قررتي ونفذتي وجاي كتقولي ختاري!شني باغيني نختار!نختار واش نعيش ولا نموت؟هه من نيتك؟(زيرات على فمها حابسة لبكية)
فراس:هادشي لي عندي..بغيتي مرحبا ما بغيتيش شغلك هداك..غير ما تنسايش بلي نتي دابا هازة ولدي فكرشك..وحتا وإذا افترضنا انني بغيت وقبلت نتفارقو فدابا مستحيييل انني نديرها غير على قبلو على الاقل..ونتي دابا بزز منك خاصك تعيشي مع هاد بنادم لي محرم عليك العيشة وصااابرة عليه بزز
رؤيا:ايوا قول هايدا من شحااال هادي علاش جالس دور وتلعب بالهضرة!!اجيني نيييشان وقولي باغي غييير ولدك..اهئ اهئ قولي بلي هادشي لي مزااال مخليك عايش معايا اهئ انهئ..ونتينا كل مرة تقولي عامل بحسابك وحساب لي فكرشك هه ونتينا ما هامك غييير ولدك اهئ اهئ ورؤيا طووووز تموت كاع شكون داها فيها ياك؟؟
فراس:(بعصبية)مالكي دابا مااالكي!علاش رجعتي كتقلبي غيير على السبة وكتنبشي على الصداع فيما كان؟واش اعبااد الله من الصباح وانا نهضر هادشي ما فهمتي نتي؟من هضرتي كااااملة هذا ما بااانلك؟
فراس:(وقف مخنزر)نتي ما صالحاليش للهضرة..حتااا تكالماي وتبداي تفهمي وتستوعبي وتكبري عقلك عااااد اجي نهضرو الاااا بغيتي..اما دابا ما فيا لي نبدا نتغاوت معاك وفلخر نصدقو فشي طاب وشي ما طاب وغير انحرق دمي معاك وصافي..
تخطى الطبلة وداز قدامها وطلع للطابق الفوقاني وخلاها واقفة كتاكل وجنابها وتبكي..تبعاتو بعينيها حتا طلع وتقدمات جلسات فوق لفوطوي حاطة جبهتها على يديها وخاشية راسها بين ركابيها كتخنصص..بقى كلامو كيدور فراسها وكل مرة وكيفاش تبدا تفسر وتحلل وتفصل كيما بغات
بعد مدة هزات راسها وبعدات القصة على وجهها كتمسح وجهها وناضت وقفات كتقلب بعينيها فأرجاء البيت وكدخل هنا وتخرج من لهيه حتا لقات بيت النعاس لي جاي فحال الا وسط الطبيعة حيطانو الزجاجية كتبين كلشي لي على برا والشجر داير بيه من كل جيهة..فراشو كامل فالابيض والرمادي والارضية ديالو والسقف من الخشب اللامع ذو لون داكن..شافت فيه بإعجاب وفلخر رجعات تنهدات وفتحات السنسلة دالجاكيط زولاتها ورماتها فوق لفراش وقلبات الدورة دخلات للحمام..قضات حاجتها وناضت غسلات يديها وتوضات وخرجات كتقلب بعينيها على باش تصلي لقات الصلاية محطوطة فركن من اركان البيت هي والقرآن هزاتها وهزات ليزار لي مفرشينو فوق الناموسية تغطات بيه وتوجهات للقبلة كتصلي داكشي لي فاتها
بقى هو جالس فلاطيراس بوحدو شحال..مسرح عينيه قدامو مربع يديه وبالو ماشي معاه وتعابير وجهو كتوحي بالجدية..داز عليه الوقت حتا حس براسو تهدن وهبط يشوفها فين هي..بقى كيقلب عليها وعاقد حجبانو حتا دخل عليها للبيت لقاها كتصلي تنهد ودخل حتا هو توضى وهز صلاية اخرى وخرج كيصلي برا
سالات وناضت طوات صلايتها وزولات عليها ليزار حطاتو فوق الناموسية وخرجات وقفات عند راسو كتسناه يسالي..تحى وسلم وناض وقف كيطوي السجادة وشاف فيها مطلع حاجبو
رؤيا:(كتعوج فمها)بغيت نبدل حوايجي
فراس:بدلي شكون شدك
رؤيا:وباش بغيتيني نبدل؟..شني انلبس؟ياك جريتيني موراك حتا حوايجي ما علمتينيشي باش نجمعم؟
فراس:(بسخرية)علاش فاش كنتي هربانة ما جمعتيهومش
رؤيا:بركة من الطنز عافاك..دابا واش يانا انبقى هايدا
شاف فيها وتبسم ابتسامة جانبية وعطاها بالظهر وتقدم هز تيليكوموند وترمى فوق واحد الفوطي على ظهرو وشعل التلفازة
فراس:سيري شوفي فلبلاكار راه حوايجك تما
رؤيا:حوايجي؟فوقاش جبتيهوم؟
فراس:الصمت
خلاتو كيتفرج ودخلات للبيت فتحات لبلاكار لقاتو عامر..بقات كتقلب فجيهتها لقات حوايج جداد وعوجات فمها كتشوف فيهم وتجبد تشوف وترجع تردهوم..اختارت بيجامة سروال لاصق و الفوقاني ديالو واسع باليدين فحال شي فراشة فالزيتي والباج لبساتهم وحنات كتفتح فلمجورة لي لتحت جبدات بانطوفة خفيفة فالابيض لبساتها وخرجات لقاتو مزال متكي كيتفرج قلبات عينيها فيه وخلاتو ودخلات للكوزينة لي شافتها قبايلة..فتحات الثلاجة كتشوف شنو فيها لقاتها عاامرة بالخضرة والديسير واللحم والحوت على الاشكال والسقاطة وأي حاجة طيح فبالها..بقات كتشوف شحال ما عرفات ما دير وهي ما موالفاش طيب..وحطات يديها على فمها كتفكر..بغات تهز الخبز والشكلاط تدهنو فيه شاف فيه حتا عيات ورجعات حطاتو فبلاصتو..
جبدات الخس وماطيشة والفرماج والخبز حطاتهم فوق البوطاجي ورجعات هزات حبات دبطاطا من لمجر وحطاتهم فلافابو غسلاتهوم وبدات كتقشر فيهم ومقاتلة مع بطاطا منين ما دوزات الموس كتقطع النص فيها..قطعاتها وسالات وناضت كتقلب على الزيت حتا لقاتو هزات مقلة كبيرة من لبلاكارت لتحت وعمراتها بالزيت حتا لشلاgم باغة تقلي بطاطة..شعلات البوطة وحطات عليها المقلة وقبل حتا ما تسخن هزات بطاطا دارتها وخلاتها كتقلى ومشات كتغسل الخس
غسلاتو هو وماطيشة وحطاتها فوق القطاعة باش تقطعها..ورجعات طلات على بطاطا منين سمعات الزيت بدا كيدير الصوت..هزات صفاية دالزيت ووقفات كتحاول تحركها وما بغاتلاش لقاتها لصقات فالقاع وبقات كتقاتل معاها وهي كتفتت وتقطعلها وبدات كتسوط معصبة
رؤيا:اوووووف المرض شعندا هاد الزمر لصقات..تأ كي انعملا دابا
بقات كتشوف فيها تالفة ورجعات خلاتها وهزات راسها لفوق باش تجبد شي طبسيل لي تزولها فيه وتدير قلية جديدة..تجبدات حتا لحقاتو ورجعات دارت بالزربة وما رضاتش البال حتا ضربات يد المقلة لي خلاتو مقلوب جيهتها..حتا طاحت المقلة فالارض على جهدها وتهرق الزيت سخون وطار فيها هي جا فرجلها حتا غوتات ربي لي خلقها وطيحات الطبسيل من يديها تشخشخ وبقات واقفة كتفركل برجليها وتبكي..
دخل عليها للكوزينة مخلوع من بعد ما سمع غواتها ورجع سمع داكشي طاح ما فهم والو وناض فلبلاصة طااااير عندها وبلحفى لقاها واقفة كتوجع وتخنصص كتحاول تبعد السروال على لحمها ووجهها حمااار..جرى عندها وما شافش الزيت لي فالارض حتا زهق فيه وحس بداكشي شوطو فرجليه من التحت وبعد رجلو بالزربة وخيب وجهو مقصح ورجع قرب منها كينهج
رؤيا:بعد مني الله يخليك..لي فيا يكفيني ما تزيدنيشي ااااااي بشوية راك كتشوطني انننهنن
هز راسو فيه مخنزر ورجع هبط راسو كيسوطلها على الحرقات ويدهن فالبوماد باش يبرد عليها.. سهات فيه وبقات ساكتة مزيرة على فمها وعينيها عليه حتا سالالها وناض حط البوماد من يدو وقرب من لبلاكار وواحد الرجل كيزطم عليها غير بطرف صباعو وهي هبطات راسها كتشوف فرجليها واش تحرقات بزاف وكتنش عليهم باش يبردو حيت كيوزوزو..بقى كيقلب وجبدلها شورط قصير خفيف وواسع ورجع عندها لبسولها بشوية باش ما تمسحش البوماد..سالا ورجع كيقلب فرجليها واش خلا شي بلاصة بلا دواء وهز راسو فيها
فراس:(بأسى)واش كضرك بزاااف؟
رؤيا:ها!!ااا لا شوية وصافي ما بقاتشي كضرني بزاف
فراس:(تنهد)اووووف الحمد لله..(خنزر فيها)لا حول ولا قوة الا بالله..كطييييري الله يحفظ تفوووووو
ناض وقف وخلاها جالسة كتعوج فمها وعينيها وتمشى قدامها كيعرج وهي كتشوف فيه باستغراب حتا دخل للحمام وهز رجليه عندو كيشوفها لقاها كااملة حمراااااا من لتحت وتسلخات من واحد الجيهة بفعل الزيت وحيت تمشى عليها بالزربة زاد سلخها..هز الرشاشة كيفزكها وكيسوط ويخيب سيفتو ورجع خرج هازها من الارض وكينقز برجل واحدة وجلس حداها فوق الناموسية وحط رجلو على ركبتو كيديرلها البوماد
فراس:(بعدلها رجليه من بين يديها ورجع كيدهن بشوية)والو غير زطمت فالزيت
رؤيا:(بصدمة)زطمتي فالزيت؟..عليها كنتي كتعرج!!(سكتات شوية كتشوف فيه وبصوت خافت فيه نبرة حزينة هضرات)..تحرقتي وواخة هايداك هزيتيني كتداويني وخليتي راسك!!!...
رؤيا:تحرقتي وهزيتيني كداويني وخليتي راسك؟شو رجليك كي تسلخات واش ما حسيتيشي بيها!
هز راسو شاف فيها عاقد حجبانو ورجع قلب وجهو كيدهن وما جاوبهاش..بقات كتشوف فيه وكيفاش كيزير على فمو ويسوط على رجليه لي تسلخاتلها الجلدة من جيهة الصبعان وبانت اللحمة حمراء قلبها ضرها وبقات هاكاك ساهية فيه فصمت وعينيها مغرغرين بالدموع كتجمع لبكية وفيما يتقصح كتكمش جبهتها فحال الا هي لي تقصحات..بقات كتشوف فيه كيفاش ما فكرش فراسو وفالحريق لي فيه وفكر فيها هي اللولة واخة واصلة بيه للعظم والحرقة لي تحرق هو صعب من ديالها ولكن بقى حتااا تأكد من أنها مزيانة وعاااد ضرب الفكر فراسو..زيرات على لفراش بيديها حابسة لبكية وحابسة راسها بزز حتا ما بقاتش قادرة تصبر وتلاحت عليه عنقاتو وطلقاتها وبدات كتشهق وتبكي بالجهد ويديها دايرين على عنقو ومزيرين عليه وخاشية راسها فيه..خلعاتو وما فهم والو وبقى هاز يديه مصدوم ورجع حط يدو على كتافها كيحاول يبعدها عليه
رؤيا:اهئ انهنننننئ(خشات راسها فعنقو)كنبغييييييك يانا اهئ اهئ والله حتا كنبغيييك وما نقدرشي نعيش بلا بيك اهنهئ اههههئ
تصدم ورخى منها شوية كيستوعب شنو قالتلو وهي كتبكي وتهضر وكلامها كيتسمع مقطع بقوة ما كتشهق..تبسم بشوية وصدرو كيطلع ويهبط ودور يدو عليها وزييييرها عندو زاااد خشاها فيه وخشا راسو فعنقها كيتنهد
فراس:ااااااااه وانا كنمووووت عليك يا اغلى ما عندي..اخخخخخخ شحال توحشت نسمعها منك
رؤيا:(بعدات وجهها عليه كتبكي)اهئ اهئ يانا والله حتا كنبغيك غير نتينا اهننهئ اهئ اصلا يانا انهن يانا ما نقدرشي نبغي شي واحد من غيرك اهئ انهئ يانا ديك النهار والله ما بكيت عليه حيتاش بقى فيا الحال اهئ انههنئ يانا ما عرفتشي علاش بكيت هايداك اصلا اهنئ اهئ يانا غير كنت خايفة منك وما عرفتشي كيفاش وقعلي اهئ انهنههئ
فراس:صافي دابا ششش نساي عليك هادشي
رؤيا:لا لا ما انساشي اهنهئ اهئ نتينا كيزيالك بلي يانا كنبغيه بلحق يانا والله ما كنفكر حتااا فيه انهنننننئ نتينا خاصك ثيق فيا يانا كنبغيك غير نتينا ونتينا بووووحدك اهئ انهننئ وعمري ما نبغي شي واحد من غيرك اهنهننئ اهئ
شاف فيها بأسى وهي كتبكي ودخل وتخرج فالهضرة وتشهق ووجهها كلو تجخلط بالدموع ولخناين ورجع حمر وحط يديه على حناكها جرها عندو باسها من جبهتها بقووووة وجرلها راسها خشاه فصدرو
فراس:صافي بركة من لبكى احبيبة..نتي حياتي نتي كنبغيييك وكنحمااق ونتسطى عليك وما نبغيش لي يقرب منك..مي ديك النهار ما عرفتش كيفاش وقعلي وما تحكمتش فراسي..راكي والله ما كتحسي بيا شنو كيوقعلي فاش كنفكر انك تكوني لشي حد من غيري او غيير تكوني كتفكري فيه..كنترفع ارؤيا ما كنبقى نشعر بوااالو
رؤيا:صافي غير عليا كيما بغيتي اهنههئ اهئ وعمل لي بغيتي غير ما ترجعشي تبعد عليا انهننئ اهئ كنت انحماق هاد السيمانة ونتينا منخلني اههئنهن ومبعد عليا
فراس:ما خليتكش كنت حداك غير فالبيت لي لاصق عليك!وكنت كل ليلة كنجي نجلس فوق راسك باش نشبع منك حتا كيقرب يصبح الحال عاد كنخرج بحالي
رؤيا:اهئ وعلاش ما كنتيشي كتجي عندي بالنهار باش نشوفك اهنئ يانا زيالي خليتيني مسيبة تما وما تسوقتيشي ليلي اهننن
فراس:من نيتك ارؤيا..انا ما نتسوقش ليك؟راه ننسى راسي وما ننساكش..نتي لي خليتيني نغبر عليك هاكاك..حيت فاش شفتيتي بلا ما نgولك شنو درتي..gلت هادي ما بقااتش حاملة تشوفني اجي نهنيها مني هه والطبيب زاد كمل عليا gال لواه ما خاصش شي حاجة تعصبك..ونتي فيما كنتي تشوفيني تبداي تبكي وتغبني حتا كتصعري ملتي تgول شفتي عدوك ماشي راجلك!صافي ما بغيتش نزيد نكمل عليك وgلت نخليك ترتاحي وحاولت نبعد عليك غيير باش ما يوقعلك والو..ديك الليلة ونتي غارقة فدماياتك ما بغاتش تنسالي..وصورتك كانت ديما قدام عيني هي لي كتخليني فيما نبغي نجي عندك نرجع بحالي..حتااا gالك هاد الراس عندك تنوضي تشعلي العافية وتهربي تما ما بقالي فيين عاد نبعد
رؤيا:لا لا ماشي هايداك والله..يانا كنت كنبكي غير حيت مقلقة منك ماشي حيت ما باغاشي نشوفك..
رؤيا: لا ماشي هايداك والله..يانا كنت كنبكي غير حيت مقلقة منك ماشي حيت ما باغاشي نشوفك
فراس:(مطلع حاجبو)اهاااه عليها كل مرة تgوليلي عييت منك وطلعتيلي فراسي وكرهت العيشة معاك ياك؟
رؤيا:(حطات راسها على صدرو ومدورة يديها على كرشو)والله ما قصدت..كنت معصبة ولي جات على دقمي كنخرجا بلا ما نفكر فيها..عارفة راسي قصحتك بهضرتي بلحق راه ماشي لخاطري(تنهدات)يانا كنبغيك افراس هادي خاصك تعرفا..ونهار بغيتك..بغيتك كيما نتينا!..عاارفاك قاصح وصعيب ومغياااار وفاش كتعصب ما كتبقااشي تعقل لا عليا لا على غيري..ولكن واخة هايداك قلبك كبييير وحنيييين وتغوت عليا وما تخلي لي يغوت عليا ولا يقرب مني..وما كتعصب عليا غير حيث كتخاف عليا!(هزات عينيها فيه)وأهم حاجة فيك هي أنك كتبغيني وكتحسسني بلي بجنبي راجل حاميني وايبقى معايا..وعمرو يسمح فيا..ونهار نحتاجو انجبرو واقف معايا ومشبرلي فيدي
فراس:(حط وجهها بين يديه)وعمري ما نخليك..وانبقى معاك وليك حياتي كاملة هذا وعد مني
رؤيا:وحتا يانا كنواعدك ما تفرقني عليك حتا حاجة من غير ربي لي جمعنا
فراس:(حط نيفو على نيفها وكيحركو يمين شمال ويضحك)هههه يخليلي لي كيفهم..دابا كيفاش زعما هادشي ديالك هممم؟..كون ما تحرقناش ما نسمعوش هاد لعسل كامل ههه كون راحنا مزالين غارقين فالقطران ياك ههه!!
رؤيا:اااااه فكرتيني ارى نشوف رجليك
بعدات عليه وحنات باغة تهز رجلو عندها لي موقفها مع الارض على كدمو وبعدها عليها بابتسامة
فراس:لا لا غير خليها عليك..هانا انديرلها الدواء ومريضنا ما عندو باس!
رؤيا:شمن قالاك..ارى رجليك نشوف
هزات رجليه لعندها حطاتها على حجرها وهو تجلس مكالي بيديه موراه
رؤيا:(بأسى)اووووف تشوطاتلك بزااف..كثر مني يانا!
فراس:ايوا هذا زهري معاك..نتي ديريها وانا نحصل فيها ههه..اصلا هذا ما كيجيني منك ههه
رؤيا:ياااااااااك افراس..شني بغيتي تقول دابا يانا منحوسة؟
رؤيا:اهاه ما كدبتيشي..منحووسة والنحس راكبني من ساسي حتا لراسي..وأكبر دليل هو انني زوجت بيك نتينا
فراس:ههههههههههه لا معلمة..اجي اجي نبوسك
جرها عندو على غفلة وحط وجهها بين يديه وبرك على حناكها وباسها ففمها بقووووة حتا تقصحات عاد بعد
فراس:اححححح شحال توحشتك وتوحشت هاد لفيم
رؤيا:اااااي قصحتييني
فراس:ههه التقصيحة دبصح عاد جاية فالطريق احبيبة..راه سيماااانة(كيهضر ويخطف بوسات من فمها)وانا مقطوع..ومحروم..ومعذب..ومحن..وجيعاااان احححح
رؤيا:ههه صافي صافي بركة ههههه خليني دابا نشوفلك رجليك(شافت فيه باستغراب)واش ما كضركشي!
فراس:ههه كضرني شوية..مي شكون داها فيها دابا
رؤيا:ههه الله يعفو عليك هه..ارى ارى ديك لبوماد لهنا..مكلالي!
فراس:(دار موراه هزها)ها هي الالة
شداتها منو بابتسامة وبدات كتدهنلو فرجليه بشوية وتسوط عليها ومرة مرة رجلو كتهز بشوية فاش كيتقصح حتا سالات وهزات رجلو سرحاتها فوق لفراش
رؤيا:خليك هايدا انجيب لفاصمة ونجي
فراس:(كيوقف)اجي فين غادة..جلسي انا انجيبها
رؤيا:لا خليك ما تزطمشي عليها..انا انجيبا!
فراس:لا الالة قاد براسي..غير جلسي نتي..اتمشي تعgري رجليك ونحصل فيك غييير بقوة لفشوش هههه
رؤيا:ايوا بازلك يانا كنتفشش..جلس جلس ما ايوقعلي والو يانا غير تهنا..نتينا لي رجليك تسلخاتلك وخاصك تعطيها الراحة ماشي حتاااا تخماجلك وعاااد نحصلك فيك ديك الساع يااانا هههه
فراس:(ضربها بخفة لفخضها وهي واقفة)ههه يله سيري وبشوية عليك
ضحكات معاه وتمشات قدامو فرحااانة وكضحك غير بوحدها وهو كثر منها فحال الا عاد رجعات فيهم الروح..دخلات للحمام كتقلب فإحدى الخزانات عبارة عن مستوصف صغير..هزات الفاصمة والمقص وخرجات كتمشى عاادي ورجليها بردو عليها ما بقاوش كيضروها وإنما مزالة الطبعة فيهم حمراء شوية..لقاتو مزال جالس كي خلاتو وجلسات عند رجلو كدور الفاصمة على رجليه وتضحك هيا وياه حتا سالات وهزات راسها فيه بابتسامة
رؤيا:ما تزطمشي عليها باش ما تعقراشي دابا وساعة
فراس:ههه هي لي ما تعاودش ادكتورة
رؤيا:ههه..(شافت فيه كتفكر)دابا شني انعملو فالماكلة!!..والله حتا في لموووت دالجوع من الصباح ما كليت شي حاجة
فراس:ما كليتي والو فالطيارة!
رؤيا:لا..اصلا منين طلعت ويانا ناعسة فوقاش كليت!
فراس:علاش نتي خليتي شي حد بعقلو..نوضي نوضي اجي معايا!
رؤيا:ورجليك؟
فراس:وا نوضي راه ماشي انموت غير حرقة ودابا تبرا..يله زيدي!
جرها من يدها ودفعها قدامو حاط يديه مور خصرها ورجليه كيحاول ما يزطمش عليها حتا وقفها فالباب دالكوزينة ووقف حتا هو كيشوف فديك الروينة لي فيها..شاف فيها بنص عين وتنهد خلاها واقفة ورجع لور دخل لصالة قبالتها لبس كلاكيطتو لي كانت مزالة فين خلاها فاش ناض وطفى التلفازة ورجع عندها
فراس:اممم ما عرفتش فين حاطين داك التخربيق.. اااه شوفي فواحد البيت ها هو حدى لحمام لي برى واش فيه؟
رؤيا:اه واخة
خرجات كتقلب حتا لقات البيت لي نعتلها..كان بيت صغير تحت الدروج فتحاتو ولقات كاع مواد التنظيف لي تقدر تحتاج كلشي مستف ومقاد ونقي كيشعل..هزات سطل بالشطابة ديالو فحال الجفاف وقرعة ديال مسحوق التنظيف وخرجات دازت على الحمام عمراتو شوية ودارت فيه التيد وهزاتو..دخلات للكوزينة لقاتو جمع كاع ديك الروينة وبقى غير الزيت لي فالارض وكيحط الاواني لي ايتغسلو فالغسالة ديالهم ونقى البوطاجي كامل..خشات الشطابة فالماء مرغوي وهزاتها حطاتها فمكان فحال الشبكة فجنب السطل عصراتها شوية وبدات كدوز وتمسح وترجع تعصرها وتفزكها حتا سالات وبغات تهز السطل ووقفها
فراس:اري انا انديه
رؤيا:واخة..بلحق كوب داك الماء وعمل واحد نقي جيبولي نشف هادشي
فراس:واخة..وعنداك تزهقي عاود..لصقي فالحيط حتا نجي ما تحركيش
رؤيا:ههههه واخة
ضحك معاها وهز السطل مشى عمرو ورجع عندها لقاها متكية على البوطاجي كتشوف فضفارها وتلعب برجليها العريانين تبسم وحطلها السطل
فراس:(باسها فحنكها)يله هانتي كملي وانا انبدا نوجد شي حاجة ناكلوها
رؤيا:اه واخة..بلحق واش كتعرف؟
فراس:هه حسن منك بعدا
رؤيا:(عوجات فمها)اممم ايوا دابا نشوفو
شاف فيها بابتسامة جانبية وهو كيلبس طابلية فالاسود وعقدها من الخلف وهي خلاتو ودارت كتكمل وتمشي وتجي وتميل مع الشطابة وهو كيجبد الخضرة من الثلاجة وداكشي لي ايحتاج ومتبعها بعينيه بابتسامة اعجاب على وجهو..حتا شافها سالات وبغات تحني تهز السطل
فراس:غير خليه..دفعيه حدا الباب وخليه حتا نهزو
رؤيا:راه خفيف ماشي ثقيل بزاف
فراس:لا غير خليه اللهم سلامة ولا ندامة..دفعيه واجي جلسي
رؤيا:واخة لي بغيتي
حنات كدفعو وعاطياه بالظهر وجسمها كيما تحركات كيغريه وما كيقدرش يبعد عينو عليها.. رجعات غسلات يديها فلافابو ووقفات حداه حاطة مرفقها على البوطاجي ومكالية وجهها وكتشوف فيه حاضياه شنو كيدير بتعجب..هو كيقلي ويشحر ويقطع ويحرك هنا ولهيه وهي حالة فمها فيه
رؤيا:(قلبات عينيها فيه كتعوج وتميق فيه حتا غلباتها الضحكة وعاد شافت فيه)اوك صافي ههه اححم احم
شاف فيها بابتسامة جانبية وهو مكاليها بيديها ومقوس ظهرو شوية..حطات يدها على حنكو وتعلات على صباعها باش تبوسو وعينيها مرة على فمو مرة على عينيه وهو غمض عينيه بشوية وكيتنفس ببطء..حتا حس بيديها بعدات على حنكو وكمش جبهتو باستغراب
رؤيا:(حابسة الضحكة)لا لا هايدا معذبة..أو شحال قادني نتعلى..هاء راه بزاااف..شعندك طواليتي هايدا
فراس:(مطلع حاجبو)كتفلاي ياك؟
رؤيا:شكون يانا!!بلعمى!
فراس:انجبدهوملك
رؤيا:(بغنج)شعندك دابا..راه دبصح معذبة ورجلي ضروني بقوة التجباد!
فراس:واااااخة ها حنا انشوفو
حط يديه على خصرها وهزها بخفة جلسها فوق البوطاجي
فراس:يله هانتي دابا..ايوا طلقينا لفراجة
شافت فيه مبهوضة وحالة فمها وهو حاط يديه على جنابها ومطلع حاجب ومهبط لاخور كيتسناها
فراس:ما عوالاش؟
رؤيا:الصمت
فراس:واا معا اممممم
قطعاتو هي ونقزات عليه ودورات يديها على عنقو ورجليها على خصرو مزيرة عليه وكتبوسو بقوة وبلهفة وشوق..رجع زوج خطوات للخلف حتا شد التوازن ديالو ودور يديه على ظهرها زيرها عندو وهاز رجليه لي مضرورة موقفها على طراف صبعانو..طلب غير بوسة وهي عطاتو بوسات هما شداتو ما بغاتش طلقو وحتا هو عجبو حالو ومشى معاها فهواها..نساو راسهم والقبلة رجاعت قبلة عنيفة كتعبر على مدى الشوق لي بيناتهم..حطها فوق البوطاجي مجلسها وحاط يدو موراها مزيرها عندو وكيميلها للخلف حتا كيعواج ظهرها وهي حاكماه برجليها حتا تقطع فيها النفس فمرة وعيات من التجابيد والتعنكيش وبعدات وجهها بشوية كتنهج وصدرها طالع هابط بوتيرة سريعة وحطات يديها على وجهو مغمضة عينيها وهو كذلك..بقاو هكاك الجبهة عند الجبهة والنيف فوق النيف والعين كتشوف فالعين باشتياق
فراس:توحشتك
رؤيا:(بخجل)هه حتا يانا
فراس:الله قلبي الله..لا لا نتي ما يفكني معاك هاد الليلة غير لي خلقك
رؤيا:ههه
فراس:اخخخ اربي كتساليهوملي(خطف بوسة) بلحق ماشي دابا حتاااا نوكلك مزيااان باش تصحصحي معايا..ماشي تجيني حتا لنص الطريق وتسخفيلي ههه والله ما نعقل عليك ههه
رؤيا:(ضرباتو لكتفو)اوووف باسل ههه
سيفطلها بوسة فلهواء وهو كيبعد عليها ووقف كيحرك المقلة ويكمل طيابو وهي بقات جالسة كتلعب برجليها فوق لبوطاجي وتجمع معاه وتنقب
رؤيا:فرااااس!!
فراس:وي!
رؤيا:ما قولتيليشي..فاين حنايا؟
فراس:ههه فجزيرة الوقواق
رؤيا:لواه لقاوقاو..دبصح فاين حنا..شفت غير يانا وياك لي فهاد قرطاخانا لي جيبتينا ليها!
فراس:ههه الله يستر..حنا دابا فالغرب دألمانيا على الحدود الفرنسية والسويسرية..وهاد المنطقة كيسميوها بادن فورتم بيردج وبالضبط بالضبط فلبلاك فوريست يعني الغابة السوداء
رؤيا:واااااااو..وكيفاش هاد اللعبة ديال سوداء علاش سماوها هايدا؟
فراس:حيت معروفة بالشجر لكثييير فيها والشمس اغلبية ما كتوصلش للداخل ديالها وكيكون فيها الظلااام بزاف اكثرية فالليل!
رؤيا:اواااااه يانا هادي اول مرة نسمع بيها..لا واالو غذا ان شاء الله اتخرجني تساريني فيها ياك؟
رؤيا:اااه وقولي شني اسمو داك الواد لي دزنا من فوقو؟
فراس:ههه هذاك اسمو نهر الراين معرووف بزاف فألمانيا
رؤيا:وااااااعر والله..نتينا سبقلك جيتي نهنا
فراس:ماشي بزاف غير شي زوج مرات وهادي الثالثة..فاش كنكون مسالي كيعجبني نجي لشي بلاصة فحال هادي غييير بوحدي
رؤيا:اممم ايوا دابا غير نسى شي حاجة اسمها بوحدي..دابا يانا كاينة وزيد عليها وليدي حبيبي..ياكحبيب ماما ما نتفاكوشي معاه..انبقاو لاصقين فيه فيما مشى ونحرموها عليه
فراس:ههه تحرموها عليا..شكون كذب عليك..بلعكس..شحال هادي كنت كنرتاح وانا بوحدي ودابا ما بقيت كنرتاح غير وانا معاك ومع ولدي ههه(حط يدو على كرشها)فهم هاد لمكلخة دمك اولدي..عطيها شوية من الجينات دالذكاء لي اتورثهم من عندي
مجبد فوق الناموسية..زول التيشورط لي كان لابس وبقى غير بسروال دالنعاس فالخزي وهاز تيلي فيديه كيبقشش فيه..غير خرجات هز عينو فيها ورجع دار حط التيلي بجنبو
فراس:على سلامتك..فين هو؟
رؤيا:(جلسات حداه متعجبة)هااا!كيفاش..علامن كتهضر؟
فراس:(كيقرب)كنهضر على ولدي..انا gلت بهاد التعطيلة اتكوني ولدتي
رؤيا:هاء..علاش دابا هادي كتسميها تعطيلة!!
فراس:(خشاها تحت منو)خلينا من الهضرة دابا..منين انبداك همم؟
رؤيا:هههه
فراس:هه اناااكلك مااكلة نتي اممم
هبط كيبوسها فأنحاء وجهها وعنقها وهي كيضحك وتعوج فعنقها وهو مبتاسم حتا حسات بعضة فعنقها
رؤيا:ااححح بشوية!!قصحتيني!
فراس:بنينة..بنييينة وما بقاش كافيني فيك البوسان ههه
رؤيا:هههه
شافت فيه كتضحك وهو كيتبسم معاها بشوية ومكالي بيديه فوق منها..سهاات فعينيه وسهى فعينيها وكل واحد فيهم كيتأمل لآخر بحب حتا هزات يديها بزوج وحطاتهم على وجهو كتلعب فلحيتو بصبعانها والابتسامة مرسومة على وجهها..هبط راسو عندها ببطء حتا تلقات شفايفهم وكانت هاديك هي إنطلاقة رحلته الليلية الى ما لا نهاية وما بعدها..
أذن عليهم لفجر فالتيليفون ديال فراس لي محققو باش يأذن مع اوقات الصلاة..كانو فأحضان بعضهم هي حاطة راسها على صدرو وكتلعب فالزغب لي نازل معاه وهو كيلعب فشعرها ويداعب حنكها وكيهضرو..ناض هو لبس البوكسور ديالو ولبسات هي تيشورط ديالو لي جاها حد لفخاض ودخلو للحمام يدوشو..وجدات هي الحمام وهو جلس كيحط فاصمة أخرى فحال لبلاستيك ما كتخليش الماء يدخل..لواها على رجليه مزيان وعاد ناض لقاها مخشية فالبانيو وكتلعب فالرغوة دخل حداها كيداعبها ويضحكو ودوشو بزوج وعاد خرجو لبسو حوايجهم ووصلاو لفجر مع بعضهم وتلاحو فوق الناموسية..خشاها فيه معنقها وكيسمعلها وهي كتهضر وتعبر وتضحك وتلعبلو فوجهو وكتلمس كل ملامحو بعفوية وبإعجاب وهو ساهي فيها حتا بدات كتديه عينو بشوية بشوية واستأذن منها ينعس.. هز تيليكوموند من حداها دوز الريدوات كاملين ديال البيت وغمض عينيه ومشى فلبلاصة وهي بقات شحال كتلعبلو فوجهو ما بغاش يديها النعاس حيت نعسات فالطيارة بزاف..وبقات هاكاك حتا داتها عينها حتا هيا ونعسو بزوج معانقين ومكمشة فيه حتا صبح عليهم الحال..
ناض هو اللول وبقى متكي كيشوف فيها وما بفاش ينوض باش ما يفيقهاش وهي مرمية عليه ومعنقاه..خلاها وهز تيلي كيخربق فيه ويتلف الوقت وكيتسناها تفيق..بعد مدة ناضت حتا هي فرحانة وبعد كلام الغزل والحب الصباحي ناض هو دخل للحمام ورجع خرج من بعد ما غسل وجهو وفمو وتوضى..وناضت حتا هي دخلات موراه.. خرجات لبسات حوايجها لي عبارة عن سروال فالابيض وكبوط مزير مشرط بالالوان واسع طويل من الخلف وقصير من القدام..خرجات عندو كتقلب عليه لقاتو فالكوزينة كيحط الطبلة دلفطور وكيقلي فالبيض باستو وهزات حتا هي كتعاونو وتحط معاه وجلسو كياكلو فجو رومانسي..
رؤيا:فراس!
فراس:وي حبيبة؟
رؤيا:عطيني نهضر معاهم فالدار..توحشتهم!
فراس:اوك..سالي فطورك وعاد نعيطولهوم
رؤيا:لا صافي ساليت..غير عطيني
فراس:واخة..يله هاكي
حط الفورشيط من يدو وسرح رجليه تحت الطبلة باش يجبد تيلي من جيبو..ومدولها بابتسامة شداتو منو ودوزات صبعها على الشاشة وتفتح وبانتلها صورتها وهي ناعسة وحاطة يديها على دراعو وهزات راسها فيه لقاتو كياكل وهز راسو شاف فيها باستغراب ورجعات حدرات عينيها بابتساامة فرح ودوزات نيم ديال هنية هي اللولة..هضرات معاها طمنات عليها وعلماتها بالجديد وسولاو على جدها ورجعات عيطات لاحمد وجلال وطلب منها دير الهوتباغلوغ هضرو معاهم بزوج ونفس الشيء بالنسبة لرقية وزينب..وفالاخير عيطات لشامة وطولااات معاها فالهضرة كتسولها وشامة ما بغاتش تطلقها كتعاودلها كلشي بالتفاصيل وتوصفلها شنو شرات وشنو خيطات وشنو باقي وعلى ياسين وتعاملو معاها..
خلقت له الجزء 16
محتوى القصة
التنقل بين الأجزاء