المصخوط الجزء 24

أسيدي هيا هاديك راحة تسركيل تبرهيش تا وصل لعيد كتمشي تقدا شي موس جديد وداك لعجب لخويلة غير حطيت لموس فدار وهيا تغبرو عليا زعما راه غادي ندابز انمشي نهزو ولا شي لعبة جات ديك بنت ناس لعندنا ب بيجامة وزيف ولحنة ومنعرف ومزال كندوب انا واحد آية ولات 24 ساعة على 24 معانا فدار نهار لعيد فقت مشيت صليت فجامع رجعت لقيتها ضاربة شورط وكتصلخ مع باها رجولة ماشيي طلعت ليك دوك ولاد ناس لسطح مكين غير ربط دوز ربط دوز خت ساط مكتقدرش تشوف لعيد كيتدبح ويييع مكرهتش نعطي كاع داكشي لي فراس مالي ويهزو دماغ آية يحطوه فراس هاد خيتي ونموت معاها اتكون كاملة الأوصاف ناري تفكرت داك ديسك ديال كامل الأوصاف فتني والعيون السود خدوني من هواهم رحت أغني آه يا ليلي آه يا عيني يا ليل لخوت ديال 2000 (error 404).. راشقالي ليوم على لغنا راه كنت مبلوكي.. شي دياسك معاقلش تا فين سمعتهم ولا إمتى ولكن لاصقينلي فدماغي معمرين ليا لميموار غي هكداك شاك فلواليد كان كيغنيهم ليا باش نعس فصغري.. وصلات وقيتة ديال لغدا تيبانو ليا كيقليو فبطاطة ولا منعرف شداكشي كيتبعصو عليا بولفاف؟ شي موناضة؟ معيد بوحدي وصافي بارك حدا لمجمر ودخان دخان تا كتدخل آية لا سلام لا كلام بركات كتعمر أخويا وكتحط أاا وكتاكل مع لعلم اتكون فاراتها فدارهم معرفتش واش نتخلع ولا شندير لمهم كلشي باين بغيتي تبعصيص وزين ها طريقو بغيتي لمعقول وصح ها طريقو ديك ساعة وأنا ندير يخ من خت خونا علاش انحاول ونبدا فيلم تاني من لول سيدة كتڭرد معايا لحوالا كتضرب بداك شاقور تا كيباليك لعضم تفرتك يعني غير إلا مبغيتيش وصافي راه بحالا مزوج بصاحبك وماشي أي صاحبك صاحبك رجولة قلت ليها متبقايش تمشي لصال ولات كتمشي ليه غير بتخبية وخا هيا دارت لي فراسها ولكن كتحس بيها كتحاول تسمع لهضرة يعني عاطياك قيمة فليل وهيا تصيفطلي مساج ولد ناس لقيت ليك مشروع مخير تدير فيه شويا من داك رزق لي عندك.. أييه وشنو هو هاد لمشروع؟ شوف دير شي حاجة لدوام بنادم غيبقى ديما محتاجها متموتش لماكلة ولا شي لصال وباليا غادي تصرع شي لصال ايكون حسن شفتي لي حدانا غير صغير شحال فيه دبنادم خونا رجع راس مالو فقل من عام و واحد عمي نشوفلك معاه عندو ماتيريال براني وأي ماكينة بغيتي عندو وإلا مشيت معاك لعندو غادي يتصاوب معاك بقاليك غير لمحل شريه حسن من لكرا ودوش و.. لمهم بنت ناس دمااغ بقات غير كتخطط ليا قلت ليها عرفتي شنو ندخل معاك بلفلوس ودخلي نتي بالخبرة قالت ليا مبيناتناش ديك ديالي وديالك انا غير بنتي ليا بقيتي كتفكر بزااف وكلشي غير قدامك.. تراه كنت انتخور تخويرة دبصح كون زربة وخليت هاد بنت ناس.. لاقاتني بداك عمها تراه عمها قدي تقريبا وفشكل عزيزا عليه قول أيربح معايا غير الله يرحم لواليدين وصافي تا هو بقى كيقري فيا سرابس قاليا عارف شي محل كبير واجد غادي يدويلي مع مولاه فثمن بغينا نتفرقو فلعشيا قلت ليه ديك لله يرحم لواليدين وهو يقوليا وا غير تهلالنا فلبنت صافي واقيلا عائلتهم كلها عارفاني معاها راجعين لدار بدات كتدير ديك لعيبة ديال دقان فلخوامي أا حڭا ولواد مكرهتش نتزوج من غدا.. شبعتي لحم واقيلا أبنت ناس بردي بردي غا تا تكملي ديك 20.. بقينا تنقادو فلوراق كنتسناو مول داك لمحل تا هو شنو أيدير معانا وليت مشغول متنحكش راسي بنت ناس لي جايبينها تعيد معانا والله ما بقيت لاقي وقت نشوف فيها هادي مؤامرة ماسونية باش نتشغل ومنلقاش وقت نبرك فدار.. هو هدا رجعات ختنى لدارهم بقيت تنعيط ليها نسول فيها مرة مرة خوها موصيني.. داك نهار هارج ما عليا ما بيا وهو يتلقالي بات آية فلباب قاليا لبطل بغيت ندوي معاك نديرو قهيوة ولا تجي تدخل لدار قلت ليه مرحبا لقهوة حسن تحركنا بركنا وهو يقوليا ولدي أنا غير سمعت ديك ولدي عرفت راسي قوتها ولا شي لعبة خطيرة جايا من وراها سيد كما قلتلك شحال هادي عندو زوج كلمات فلقاموس ديالو لبطل لمحارب ومرة مرة فاش تتكون راشقاليه تيزيد ديك شباب ديك ولدي جاتني فشكل ياكما باغيني نسلفو.. قاليا اوا كيما كتعرف راكم كبرتو وآية عزيزا على كلشي فلعائلة وشحال من واحد داوي ليا فيها وأخر واحد هو ولد خالتها مقديتش نقوليه يه ولا لا تنسولها كتقوليا و وليد قلت ندوي معاك كنتي باغيها قولها ليا كنتي غير غتبقى غادي جاي قولها ليا تانا دوزت كاع هاد تبرهيش وعارف بنتي بحال يدي راه مغادي تدي معاها لا حق لا باطل... تراه بقى داوي داوي جا سرباي قلت ليه جيب لسيد هواي وأنا شي كحلا فطاص يلاه نعصر بيها مع هاد خونا.. وخا هكداك حسيت بلواليد داوي معايا هضرة دلمعقول قلت ليه صافي غندير وغنقولها لخويلة وغادين نجيو لعندكم وندويو ان شاء الله قاليا وخا ومشا لدارو واااع بغاو يزربو عليا أنا مزال غا هبيل غير لبارح كنت مزال تناكل تراب وييع ضعت مزال مشفت ما لعبت وهو يبرك حدايا سرباي هاد سرباي ماشي شي معرفة ولكن تيشوفني بزااف وهو تيزعم على بنادم لي تيبرك تما داوين داوين عرفتو سمعنا فاش كنا داوين قلت ليه شباليك بقا داوي تا هو مسكتش نعتلي واحد دار ديال سميتو عليهم قاليا لابدة تمشي ليها قول للحاجة من لعائلة ديال زغلول وقريب غادي تزوج اتهلا فيك هههههه فديك ساعة كنت تنقول مغنمشيش غا بقيت أنا وشيطان قاليا خويا نتا كنتي فلحبس ومن لحبس لدار عامرا تمالك ماشي بنادم سير لهدف أسمى هو إكتساب الخبرات تستتمرها فالحلال منبعد.. شيطان لا دين له.. فليل بغيت نعس والو أخويا را تنقولكم شيطاني فشكل وقفت دخلت لدوش راك فاهم وبدلت حوايجي عاد قصدت ديك دار لمباركة في نصاصات ليل وطالق(knocking on heavens door) ديال بوب ديلان زعما ناوي على خزيت صافي واحد سيمانة ديال الحرام ولفواحش وموراها غنتوب وديك ساعة إلا بغاوني نتزوج نتزوج هاانية لمهم أخوتي هيا هاديك تخايل معايا بقيت معطل فطوموبيل راك فاهم تاني ستجمعت شجاعة ديالي نزلت سورت طوموبيل أول مرة فحياتي نتأكد من لبيبان واش مسدودين وقفت صيفطت بعدا لخويلة مساج راه نقدر نتعطل ولا نبات عند واحد صاحبي متخلعيش طفيت تيليفون باش ميديرونجينيش درتو فجيبي غادي قاطع شارع لديك دار يا وكتوقف قدامها صطافيط ديال صحاب لوقت كانت غتجيني سكتة قلبية ديك ساعة.. باش بانو ليا نزلو باش درت راجع لطوموبيل شفتهم قشعوني طلعوها عليا غي أجي أجي زهر عندك يربحك لمليون ألمصخوط.. عرفتي طلعت لطوموبيل واحد تبوريشة يا خويا والله حتى مرضي لواليدن تيبانو ليا مخرجين بنادم مكمد فمانطات لا حول ولا قوة الا بالله وكيصورو فيهم سير يا داك زغلول ليزغلل ليك طرمة كنتي غادي ترجعني لحبس وبشوهة كبر هاد لمرة ولكن فلت منها لحمد لله طلع البرد علينا...

يتبع