المصخوط الجزء 34

ديك لعائلة معرفتش علاش مدخلاتش ليا لخاطري وخا دايرين معايا رب ديال لخاطر وساط مرجع ليا فلوسي وتيعاملني بحال شي ملك.. لمهم دوزنا معاهم دوك ليوماين غير فدارهم داك خوه غير ولا كيعيط ليا غير نسيب حطو ليه قربو ليه.. وليت شاك فيهم مهلين فيا باش نسمان ويضحيو بيا ولا شي لعبة.. غادين راجعين لدارنا وداك خوه تيجر فيا بقاو معانا غير هاد سيمانة قلت ليه لله يجعل لبركة تا هوما راه غادين ليوم لدارهم وبصح حنا خارجين وتا هوما خونا قدامو خوه وعائلتو جريتو لقنة قلت ليه إلا نسيتي راه 3 رواح غير حيت هضرو عليها بالخايب تحط عليها يديك ولا تدير معاها لعيب راه لي نديرولك ما نقولولك حدااري.. رجعنا لدار عارف راسي غادي نموت بجوع مزوج بعشيري تيعرف يطيب غا داكشي لي كيكالي جوع مكينش ليدام وتغماس عندو فلقاموس ديك ليوماين قهراتني غير بليباط وخضرة مسلوقة تقول فصبيطار ولمشكل متنخرجش بزاف غا دار ديك لأيام تنلقا غير داكشي قدامي تتعيط ليا لخويلة ها لعار لاما عتقينا بشي طاجين ولا شي حاجة شهيوة سيدة مسافرا سو لحل لوحيد وهو نخرج شوميشة لي عندي فلداخل دخلت لكوزينة شديت داك طاجين وأنا نبدع فيه منعرف داكشي فين مخبي طاجين تقاد ف 4 سوايع ولكن عمري كليت فحالو ليومنا هدا كلاو فيه 4 دناس أنا آية خوها وختي طاجين متغسلش لحسوه بنت ناس درت ليها لحماس ولات كتخربق شي لعيبة كتزعم شويا فشهيوات ولكن بلاصة لخويلة بقات مجبدة.. لمهم سيمانة مورا لعرس طتعيط ليا ام داك لولد لي كان مقابل لصال قالت ليا ولدي تقدر تجي لعندي دبا سولتها شنو كاين قالت ليا غير أجي ونقولك.. هادشي لي درت مشيت لعندها لقيتها لابست جلابتها و واقفا عند لباب غير وقفت طلعات قالت ليا ولدي راه عيط ليا فواحد صبيطار فلبلاصة لفلانية معارفاهاش فين كاينا ونتا لولد لوحيد لي كيعرفو وعندو طوموبيل لله يرضي عليك ويرحم..مقدرتش نقول لا سيدة مخلوعة على ولدها وكبيرة فسن انخليها غاديا بوحدها تولي واقعا ليها شي حاجة ديك ساعة شدينا طريق عيطت على آية راه غادي نتعطل وها علاش وعلاش وا قولو الله يعز لحكام.. طريق كلها ولواليدة ديالو كتدوي كتوصي فيا داكشي ديال تربية ولمصروف وزواج كلشي كلشي مسكتاتش ولكن هضرتها معقولة لقينا داك صبيطار مع 4 يلاه سالاو زيارات سيكيريتي مخلاهاش تدخل قلت ليها صبري شرحتليه لبلان ودرتليه 50 فيدو قاليا لبيرو ديال لإدارة على ليمن شوف معاهخ زرب قبل ميخرجو.. هيا هاديك مشينا ومخلاوهاش تا تشوفو عاد تخرجو كتبكي ودارت ليهم شوهة إلا كان مات قولوها ليا شافو تا عياو وخلاوها تدخل بوحدها أنا تسنيتها فديك الإدارة مع واحد لفرمليات يا سلام مستوردينهم ولا منعرف محسيتش بالوقت تا خرجات لوجه لي دخلات بيه ماشي هو لي خارجا بيه سولتها عليه قالت ليا بيييخير راه بحال لمش ب9 رواح غدا نخرجوه قلت ليها إن شاء الله 3 سوايع ونص ديال طريق صعيبة شويا نمشيو ونتمو راجعين غدا خرجنا كنقلبو على شي اوطيل تما ملقيناش رجعنا لباركينغ لي حدا صبيطار طوموبيل كبيرا رجعات لور وانا بقيت بارك لقدام تكيت لكرسي وارا برغ شاد تيليفون فيلم مورا فيلم تا داني نعاس ضرباتني لفيقة مع ديك 3 تنشوف فسيدة معدبة فنعستها هاد مصخوط لواليدن غادي يكون سبابها.. كيعطي لفول غير لي معندو ضراس ديتها صلات فطرنا بقينا كنتسناو تا حلو وبقات كتقاد ليه فواحد لورقة باش يخرجوه وديك لكوميسارة لي خاص يقادولنا ديك لورقة مجموعين فيها غير هوما عين باين وقدامي قاليها سيري تال غدا ورجعي وإلا كان عندك صرف راه غادي نطلقوك دبا تمشي سيدة مفهمات والو يحساب ليها واش شي تنبر ولا جبدات بزطامها كتقوليه شحال؟ بقى غير تيشوف حرجاتو تا هيا جبدت داك لبزطام إلا مكانش عامر والله ما بقيتي تقاد شي غرض فهاد لبلاد خونا غير خدا قهيوة ديالو قاليا تسناو برى واحد شويا وهو يمدها لينا مشينا خرجنا داك ولد لعبد مشافش ليا فوجهي حشمان زعما طريق كلها ومو كتخاصم عليه وصلتهم لدار بغات تعطيني شي فلوس مبغيتش نشدهم قلت ليها من بعد وندوز نشوفو نزلو غادي محرك تنشوف فبلاصتها لقيت ديك 500درهم عرفتها حطاتها بلعاني تراه كونصير.. رجعت لدار دوشت ولبست حوايجي بركت مع دوك ولاد ناس سولتهم واش جا شي واحد سول عليا ولا واش سمعو شي حاجة فدار موقع والو مسول عليا حد بارك داوي مع ختي بلي غادي نديها تشوف مها ديال بصح كنسمع دقان فلباب ديال برى مشا خو آية تيجري حل لباب قاليا تكلم لنسيبك جمعت لوقفة هيا ليوم انعرفو شنو باغي هاد ولد ناس خرجت لعندو سلم عليا قلت ليه دخل قاليا غي يلاه نمشيو لقهوة حسن هادشي لي درت خرجنا لواحد لقهوة باركين تيسول فيا كيف داير وكدا بقينا داوين كنتسناه يقول ديك لمهم ويقولي شنو باغي ولكن خونا دار ليا دورة ديال لخضارة قاليا لله وصانا على لعمل وتحرك مزيانا تا لصحة قلت ليه راه تنتحرك راه حليت واحد لصال قريب وتنمشي ليه مرة مرة.. مزيان ولكن خاصك خدمة ديال بصح وفنفس لوقت تخلي ليك وقت نتا مزال صغير ويلاه مزوج.. مبغيتوش يبقى يدور ويضيع فلوقت والحجرة قلت ليه أرا شنو تحت داك راس كين شي معقول شي خدمة فيها صرف؟ قاليا وا لخدمة راه عندك خاصك غير نتا تعرف ليها دوك لفلوس لي عندك راه إلا عرفتي كيفاش تخدم بيهم راه تعيش بيهم ولاد ولادك ولكن خاصك تكون تا نتا دماغ وأنا عارفك دكي ورويجل و.. كنقوليه دوي بالعربية بلا الغاز اشمن خدمة هادي؟ قاليا خلي حتى نرجع من واحد لعمرة وغادي نتوكلو على الله و.. خونا غير ديال تزرع ليه كاس ففمو وصافي متيعطكش راس لخيط قلت ليه لله يتقبل ونضت لدار وشكون كنلقا فيها لخويلة جات تشوفنا باركين تنسولها كيف دايرين معجباتنيش ديك لحمد لله ديالها بقيت تنجر ليها فلسانها قالت ليا خونا عينو زايغا ومتيدخل تا كيقرب لفجر, أنا راه من نوع لي يتشفى فيك إلا كلامو طلع هو لي صحيح.. قلتهاااليك و يلاه كنت مع خوه لكبير دبا باغيني نخدم معاه ولا قولي ينصب عليا متبدل والو نفس لقصة ديال ديما غير نتي الله يهديك كون كنتي كتسمعي ولكن تا دبا مزال موقع والو بغيتي بغيتي نفرتكو رمانة نفرتكوها عنداك تخافي زعما غادين تجبديلي شي صداع ولا منعرف دوك لأفكار لي تيطيحو عليك ديما راه تيخافو مني ملي خرجت من لحبس.. قالت ليا ديك خليني حتى نشد عليه شي حجة واااع مسحت داك لفيديو كون راه غيزتليه ليوم ولكن هانية بحال ليوم بحال غدا لمهم ترجع هاد بنت ناس غا نوليو ناكلو فحال ناس.. دوزات ديك لعشية معانا فدار ورجعات لدارها لغد ليه ديت لخوادرية شافت مها وطليت على دار شويا من تما دوزتها لعند ناس لي رباوها باش منتسماش كداب شافوها شريتليها شي لعبات فطريق دخلتها لدار ومشيت لصال داك شيباني كان كيتسناني مبقاش باغي يقابل لصال قاليا صافي ليوم أخر نهار ليا غدا شوف لي يقابلو هيا هاديك مشيت لدار داك ولد ناس لقيت مو مزال باركا ليه عند راسو وهو ناشر رجليه شرب زوج جغمات ديال لما غيبقى ناعس عام قلت ليه غدا أترجع تقابل لصال وغادي نزيدك فصالير غير دير عقلك طرقت معاه لمسمار مخلاتنيش مو نخرج تا تعشيت معاهم رجعت لدار فلييل طالع مع دروج وهيا تصونيلي خت عماد جاوبتها سلام سلام كتقوليا مغاديش تيق شكون بارك قدامي دبا سولها فين نتي بعدا؟ بلاتي بلاتي متقوليش ليا عماد؟؟

يتبع