يسرا:(خارجة من لافاك وكتهضر فتيلي)ماما راه خرجت من لافاك ودابا غادية لاصال
مجدولين:واخا احبيبة متعطليش راه عيد ميلاد خالتك هاد العشية
يسرا:اوكي باي(ردات تيلي فصاكها..ومشات فاتجاه سيارتها لي كان فيها زيد كيتسناها..حل ليها الباب الخلفي ومزال على نفس الحال ..منزل عينيه لارض وكيتفادا شوفاتها ...كان مغوبش والقردة كتشطح فوق راسو..)سلام
زيد:اهلا (حادر عينيه...سد الباب وجلس بلاصتو ..ساق لوطو فاتجاه لاصال)
يسرا:احم كتبان هاد النهار مبدل ...
زيد:نو مواقع والو
يسرا:معرفتش كتبان نضراتك وحتى حركاتك غريبة؟؟
زيد:نو مدام كلشي مزيان
يسرا:(عصباتها هاديك مدام...كانت كتحاول طول هاد الفترة أنها تتعامل معاه بطريقة مختلفة عن غيرو...وقفات لوطو قدام لاصال..حلات الباب راسها ومتسناتوش...تقدمات لمدخل لاصال تسجلات عندهم..ودخلات تبدل حوايجها فغرفة تبديل ....لبسات كولون سبور فلكحل ولبسات معاه سوتيام ديال سبور فلكحل...جمعت شعرها لفوق...وخرجات لعندو كان كيدير تسخينات هيجها شكلو سيكسي...عضلات بطنو المرسومة وحركاتو الرياضية كانت كافية تجننها...تقدمات عندو )انا واجدة
زيد:(ضار عندها كيطلع فيها ويهبط..مبغاهاش تتدرب بهاد لبس قدام لكليان لي كانو تابعينها بعينهم..)اوكي مغاديش ندربو هنا!!
يسرا:وفين؟؟
زيد:يلاه معايا(داها لغرفة خاصة فيها حلبة خاصة بلبوكسين ومعدات رياضية...بداو بالاحماء والتسخينات وعينين يسرا متبعين غضلاتو لي كيطلعو وينزلو...طلعو لحلبة لبوكسين ..لبس ليها لكاسك على راسها ولقفزات لخاصين بالبوكسين ..وبدا يعلمها بشوية لحركات الاولى لي خاصها تتعلم..وكان كلما لمسها كلما طلعات معاها سخونية وقلبها كيتسارع نبضو كانت متاكدة من إعجابها الشديد بيه...دورها لعندو. كيعلمها طريقة الدفاع عن النفس ...يسرا كانت مبنجة بشكل كلي..قربات لعندو وبلا متشعر طارت على فمو طبعت عليه قبلة سخونة...معرفاتش منين جاتها الجرأة انها دير هكا..بعد عليها شوية مفاهم والو غير كيشوف فيها وفتصرفها لي دارت..نزل من الحلبة وهز تيلي ديالو وضرب الباب حتى تهز...اما هي خلاها مصدومة فبلاصتها مزال مقدراش تستوعب الشي لي وقع.
صفية:(حاطة تيلي على ودنها)افينك ابنت الحرام ساعة باش تجاوبي
صفية:واخا تكون خدامة فلقصر الملكي..هادشي لي بان ليا ماشي شغل عرض ازياء كاينة شي حاجة كبر من هكا...مهم ديها فخوتك وقابليهم..مزال معرفت شحال غادي نقعد هنا
ريم:واخا امي مانساينيش بقا علميني بالجديد...
صفية:يلاه سيري(قطعات عليها ونزلات لتحت ..كتحاول تعرف كل صغيرة وكبيرة ...والشي لي خلاهم يوصلو هنا.)
***********(الى باريس)
جواهر:(دخلات لمقر التدريب كانو عارضات من كل انحاء العالم ..من بيهم(جيجي حديد وختها بيلا...كيندال جينر..ايرينا شايك...والقائمة تطول هههه هادشي لي كنعرف من العارضات)كانت جواهر كدور عينيها فهاد العارضات وجمالهم ..والثقة لي عندهم فلمشي..جاتها المرافقة ديالها لي طلبات منها تتفضل لغرفة تغير الاخذية...عطاوها طالون طويل فيه كاروات بين الابيض والاسود..ووقفت فصف لي دايرين العارضات بقاو كيتمشاو حتى وصلات النوبة ديالها رفعات راسها لفوق خرجات صدرها وتمشات بانسيابية فوق هداك الممر كلشي حل فمو فيها كانت اكثر من رائعة ..خصوصا جمال جسمها ووجها لي خلاهم ساهيين فيها..رجعات للصف من جديد وتسنات دورها يجي...بقاو فتدريب لمدة ساعة تقريبا ...دخلوهم لغرفة المقسات شدو مقساتهم وعطاوهم كسيوات على قياسهم..ورجعو كيمشو على هداك الممر من جديد..ساعتين دازت على جواهر مهلوكة وعيانة..حسات براسها دارت فوق جهدها...واخيرا سلاو من التدريب..بدلات حوايجها ..وهزات صاكها خرجات عيانة والجوع قاتلها..هزات تيلي لاقتو مصوني ليها اربع مرات..ترسمت بسمة على شفاها وبسرعة ركبات رقمو..بعد لحضات قليلة جاوب:
فهد؛الو
جواهر:امم..لقيتك صونيتي ليا!!
فهد:وي..مي مجوبتيش؟؟
جواهر:يلاه سالينا التدريب..
فهد:اوكي خليك فبلاصتك..جوج دقايق وانا عندك
جواهر:اوكي(ردات تيلي لصاك وكلها كترعش حاسة باحساس زوين اول مرة كتحس بيه..ماهي الى دقيقتين وقفات قدام رجليها لوطو من نوع فيراري فلكحل...شافت فيها ورجعت شافت فجهة لاخرى تشوفو.واش جاي..نزل جاج لوطو ونطق...
فهد:مغاديش طلعي؟؟
جواهر(:دارت عندو بزربة...تبسمات..وتوجهات لكرسي لي جنبو..).
فهد:(ضار لعندها شافها شحال خايفة ..نقص فالسرعة..حتى حلات عويناتها)ديزولي مكنتش نعرف بلي كتخافي من السرعة
جواهر:(تبسمات ليه وشافت قدامها)
فهد:ايه كيف داز التدريب اليوم؟؟
جواهر:اوووف متسولش رجليا كيضروني بالتعب هاد النصارى مكيعرفوش اي حاجة من غير الخدمة و....(بدات تهضر وتحرك ايدياتها ومرة مرة كترد شعرها...فهد غير ساهي فحركاتها وعفويتها لي باين من عيونها..سكتات وشافت فيه)برزطتك ياك راه ان...(مكانش معاها نهائيا كان غير سارح فجمالها وكيشوف فيها..نزلت شعرة على عينيها جات تردها سبقها ليها وبعدها بشوية من على عينيها..حتى تكونسات بقات غير كترمش...)شكرا
فهد:(تبسم)امم بما انك عيانة باينة غادي تكوني جيعانة؟؟؟
جواهر:اووف مستعدة ناكل جمل بوحدي
فهد:'ههه(ضحك من كل قلبو حتى بانو سنيناتو بيضين ومستفين)
جواهر:(سرحات فضحيكتو زوينة..)
فهد:ههه واخا الالة غادي نديك لواحد المطعم فيها شي لي غادي يعجبك ويشبعك فنفس الوقت
جواهر:امممم بزربة عافاك ..(كانت جميع الحواجز بيناتهم متلاشية..جواهر مبقاتش خايفة منو ومن صرامتو حيت تاكدات بلي هداك مجرد ماسك دايرو قدام الناس لي مكتعرفو نسات الاتفاق ونسات الخدمة لي جمعتها مع علي ...كلشي كتنساه ملي تكون معاه..شنو مخبية ليها الوقت مزال معرفات.)
************(نرجعو لربى لي كانت كتجمع حوايجها..وعينيها كيخرج منهم بريق الانتقام والكره لي حابساه شحال هادي فخاطرها..... واليوم قررت تكشف المستور وتحكي كلشي لخالة عائشة(المرأة لي كانت كتجيها)..الشي لي خلا عايشة تعاونها وقنعاتها ترجع لمدينة وتدوقهم لمرار وتعيشهم الشي لي عاشتو وعاناتو بوحدها. ..جاولد عايشة يوسف كيعاونها فلحوايج وعيينه عليها مزال ممصدق هاد الجمال كلو يعاني فحياتو بهاد الطريقة ...حط حوايجها فلكوفر وركبات حداه...خدم لوطو ونطالقو فاتجاه لمدينة.).
يسرا:(دخلات للقصر وجها كيتلون حابسة دموعها بزز ..حسات بكره لنفسها خصوصا بعد تصرف لي دار معاها...رمات صاكها وتلاحت على فراشها كتغبن وتبكي)
*********
جواهر:(حاطة راسها فطبسيل تاكل وتبنن ..كانت ميدة فيها من انواع الاكل لي كيرضي ذوقها...حسات بكرشها تنفخات جرات طبسيل التحلية لي كان عبارة عن تيراميسو مشكل...هزات معلقة وبدات تبنن وتغمض عويناتها مع كل لقمة..فهد كتفى بكاس قهوة لي كان فيدو كيجغم منو وفنفس الوقت مراقب حركات جواهر:
جواهر:(شدات نفس وتبتات راسها..حيت فهد دقيق ومغاديش يفلت اي حركة ديرها وبدات تعاود ليه الكدبة لي حفضها علي ملي يسولها على عائلتها)الاب ديالي مكنعرفش عليه بزاااف فاش وصلت 10 سنين طلق من ماما...وعشت مع ماما .....طول هاد الفترة كنت كنشوفو مرة مرة ومؤخرا قليل لقائي بيه لذلك خدمتو وحياتو العملية ممطلعاش عليها وتقدر تقول معرفاهاش....فبلا متستغرب الى قلت ليك عمرني خرجت برا لمغريب حيت منقدرش نخلي ماما بوحدها وهادي اول مرة ليا هنا ..الوقت لي فرضت عليا نكون هنا....
فهد:(كيجغم من كاسو ومتبع معاها واخا مدخلش لراسو الشي لي كتقولو.)
جواهر:(هزات كاس الماء وشربت منو...طلعت عويناتها فيه لقاتو كيشوف فيها...)ا..نمشو؟؟
فهد:(حرك راسو بالايجاب وخرجو من المطعم...جواهر كانت مخربقة بشكل كلي قلبها كيضرب بالخلعة ورجليها بسيف شادا فيهم ركبات حداه وسكتات...دور لوطو فاتجاه لاوتيل وسط هدوء قاتل ..نزلات بعد ما لوحات ليه بيدها ودخلات كتزرب فلمشية الخوف ومايدير....حلات غرفتها وطاحت على فراشها كتشد نفس ..جبدات تيلي ديالها وركبات رقم علي:
(فوسط منزل بسيط... وبالضبظ فصالة عادية مفرشة بزراباي ومخاد بلديين...كانت ميدة صغيرة من لخشب...فوقها كيسان من اتاي ولحرشة وطبيسيل ديال زين لعود....كانت كتمد يدها لهاديك لحرشة تاكل منها شوية ودوز باتاي....حتى سمعات صوتو جا...حطات لكاس ومسحات يديها:
عائشة:ولدي يوسف جيتي؟؟
يوسف:(كيحيد صباطو)اه الواليدة كان ميتكال
عائشة:دخل اولدي لي قسم الله راه حطيناه.
يوسف:(دخل عليهم لصالة ..وعينه تابعينها...كانت حانية راسها و جامعة ايديها لعندها...)
عائشة:شنو درتي اولدي؟؟
بوسف:صافي الواليدة شديت الخدمة...سيكيرتي لي كان قبل.. باه مريض وشد شهر ..وشدوني انا بلاصتو
عائشة:ايوة الحمد لله هكا غادي توصلنا المعلومات ..غير خاصك تفتح عينيك وتراقب كل حاجة
بوسف:(تلفت لربى)ربى خاصك توريني صوروهم وحتى اسمائهم باش نعرفهم
ربى:واخا..انا نوريهم ليك(خرجات من الصالة ومشات لبيت فين كاين حوايجها..جبدات مجلات وجرائد فيها صورهم وكل واحد فيهم داير عليه دائرة حمرا.)
***********
صفية:(حاطت قدامها طبسيل ديال لمكسرات وحداه كاس ديال لعصيرر..كتقلب القنوات ودايرة رجل فوق رجل)ايه يا الدنيا...فين كونتو وفين وليتو....
ماما:صفية نتي هنا!!!
صفية:(قدات القعدة..)ههه غير سمحيلي ليا تلهيت مع هاد المسلسل
ماما:خودي راحتك...
صفية:احم..جواهر امتى غادي تجي؟؟
ماما:معرفتش قالت ليا عندهم شي اسبوع تماك
صفية:امم الله يرضي عليها كتخدم على رأسها واخا هاد الخدمة واعرة وصعيبة
ماما:ايوة اللهم هاد الخدمة اولا تبقى تغسل وتنقي فلقهاوي
صفية:عندك الحق والله مكرهت بنتي ريم حتى هي تلقى شي خديمة ترتاح فيها..
ماما:يجيب الله اصفية..يلاه انا نمشي ننعس..تصبحي بخير
صفية:تصبحي على خير.ّّّ..(خاصني نعرف شنو وراكم ...باركيين على حاجة كبيرة نتي وبنتك...)
جواهر:(بعد محاولات عديدة بلاتصال بعلي لي مكيجاوبش ...حطيت تيلي ودخلت لدوش...شديت دوش خفيف ودخلت فمانطتي كنحاول ننعس حيت غدا عندي العرض ...غميت وجهي بلمانطا وحاولت ننعس..كلما حاولت نغمض عينيا كلما جات صورتو فبالي..رميت لمانطا ولبست بينوار فوق لكسيوة لي لابسة وحليت لبالكون...خليت البرد كيضرب شعري ووجهي بقيت شحال واقفة فبلاصتي كنخمم فشي لي رميت فيه نفسي ونعاتبها...وليت ندمانة على هاد الاتفاق لي درت .. بغيت نريح ضهري من هاد الحمل لي وليت كنحس بيه كيتقل عليا...سست جميع الافكار من راسي.ورجعت لفراشي كنحاول ننعس🌛🌛
**********
مضيفة:مرحبا بيكم فمطار مراكش الدولي...نتمنى من المسافرين الكرام التوجه لبوابة الخروج رقم 5
ايلينا:(كدور راسها فكل بلاصة مفهماش شنو كتقول لمضيفة..تبعات الناس فين خارجين..وخرجت حتى هي جارا باليزتها وراها....بدات تقلب عينها على الشخص لي كيتسناها..واخيرا لمحت اسمها مكتوب فلوحة بيضاء..مشات تجري لعند الشخص لي كان هاز سميتها..
ايلينا:انا هي ايلينا
الشخص:(دور وجهو يمين وشمال)تبعيني.
ايلينا:(تبعاتو جارا باليزتها..طلعو لوطو لي كانت من نوع فياط كحلة..طول طريق ساكتين..ايلينا غير كدور عينيها فهاد لبلاد لي اول مرة كتجي ليها..تلفت لعندها شافها ساهية ونطق:
هو:مهمتك مغاديش تكون هنا؟؟
ايلينا:(دارت عندو)وفين؟؟
هو:ف......
ايلينا:وعلاش جينا هنا..كنت مشيت نيشان لمدينة لي قلتي!!
هو:خدمتنا غادي تكون سرية حيت الشخص لي غادي تمشي لعندو مسهلش يقدر يمحينا كلنا فرمشة عين هكاك لاش جبناك هنا
ايلينا:اوووف ...
هو؛نضن بلي مسيو جون وراك الخطة لي غادي تمشي عليها؟؟
ايلينا:اه فراسي كلشي..
هو:ومع دالك انا غادي نعاودها ليك..انا خدام فشركة عندهم شي خمس سنين هادي جاتني ترقية وليت متكلف بالموضفين.كنراقبهم ونراقب خدمتهم يعني عندي صلاحية نجري عليهم من الخدمة وهادشي فصالحنا
ايلينا:بمعنى؟؟
هو:..بمعنى السكرتيرة ديال هاداك الشخص غادي نحاول نخلق ليها شي مشكل ونجري عليها وهنا غادي تجي نتي بما انك كتهضري الألمانية والإنجليزية فغادي يفيدنا هادشي فسيفي ديالك غادي ندخلك بلاصتها والخدمة لاخرى عليك..مخاصاكش تفوتي شهر تماك..هادا اهم شرط.
ايلينا:يعني فضرف شهر خاصو يكون نعس معايا؟؟
هو:بالضبط...اووه وصلنا غادي نرتاحو هاد ليلة هنا غدا غادي نسافرو فصباح باش نبداو خدمتمنا
ايلينا:(شدات نفس وخرجات تابعاه جرات باليزتها وجرات معاها بزاف ديال التسؤلات والافكار لي شغلوها.)
(على اشعة الشمس القليلة فهاد الجو البارد فاقت جواهر بزربة كتوجد راسها والخلعة كتزعزعها خصوصا اليوم ..أول أيام اسبوع الموضة..هاد الاسبوع لي كيكون عالمي بكل المقاييس..ومكان للشهرة ...توجهات للدوش قدات حاجتها غسلات وجها وصايبات شعرها لبسات سروال دجينز لاصق دارت معاه بودي بيض وفيه كتبات بلكحل لبسات فوقو فيستا ديال لكوير فلكحل وكاسيطة سوداء وسباط كتفات بمكياج بسيط وخلات شعرها مطلوق هزات صاكها وخرجان لعند الشيفور لي كان كيتسناها كانت متعطلة بعشر دقائق ..شيفور داير مسكين كتر من جهدو كيفوت طوموبيلات يمين وشمال ولكين عرقلة السير زادت عطلاتها...تجمعو الدموع فعينيها..معرفاش شنو دير تدريب بدا عليها شي نصف ساعة دابا...تخربقات ومعرفات مدير..حتى حسات بصوت تيلي ديالها صونا:
جواهر:(بصوت ممزوج بغصة الدموع).ا.الو
فهد:جواهر!فينك لحتى دابا؟؟تاصلو بيا من الشركة المنضمة كيسولو عليك؟؟
جواهر:مسيو فهد هئ هئ عافاك سمحلي.هئ هئ راه انا فطريق ولكين كاين زحام وانا مفقتش بكري..هئ هئ عافاك سمحلي من اول نهار داير هاد المشكل هئ هئ
فهد:شووووش متبكيش..جواهر كتسمعيني..... جواهر!!
جواهر:هئ هئ شنو؟؟
فهد:قلت ليك متبكيش..التدريب مغادي يبدا حتى تجي..سمعتيني
شيفور:معرفتش؟؟(بدا كيرجع لور ..وشد طريق اخر اول مرة كيدوز منو...وقف قدام لوطو كحلة ..ونزل يجري حل ليها الباب..جواهر بقات مصدومة مفهماش شنو كيوقع هزات صاكها ونزلات..شافتو واقف حدا لوطو كيتسناها...مشات لعندو مفهماش شنو واقع ...)
فهد:صباح الخير انعاسة
جواهر:صباح النور
فهد:يلاه طلعي قبل متعطلي كتر
جواهر:ولكين....
فهد:(كيشوف فيها )شنو:؟؟
جواهر:(تبسمات وركبات حداه دارت سمطة ومشا من طريق مختصرة)احم صوتك زوين فاش كتكوني تبكي
جواهر:(خرجات عينيها)سمحلي والله معرفتش علاش مفقتش بكري هاد الصباح!!
فهد:شنو شاغل بالك(بغمزة)
جواهر:(تخربقات مبقاتش قادرة تشوف فيه)ا..كاين صهد ياك(كتنش على راسها).
فهد:ههه لي بان ليا الشي لي شاغلك خلاك تالفة ..حتى مبقيتي عارفة تفرقي بين البرد والصهد
جواهر:(صرطات ريقها..وبقات تلعب بصباعها..)
فهد:(تبسم وعرف الشي لي كيدور فمهخا واخيرا قدر يكشف الشي لي موجود فراسها واخا منطقاتش ولكين حركاتها وتصرفاتها كانت كافية تبين ليه كلشي...)
جواهر:(تبسمة )شكرا...(مدات ليه ايديها كتودعو بيها...محسات براسها حتى جرها من يدها لعندو وطبع قبلة على خدها خلاتها مبلوكية فبلاصتها ..جرات ايدها منو بشوية وخرجات من عندو مبنجة( هادي غير قبلة على الخد ودارت فيك هاد الحالة غير وجدي راسك احنينتي مزال تابعك بزاااف😉😉)...توجهات لمكان التدريب..لقات لعارضات جالسين كيتسناو صاحبة السمو تجي..شافت فيها وحدة من العارضات بمكر وضربتها بكتفها..جواهر مزال مبنجة مسيكينة مفاقت من الحالة لي فيها حتى جراتها البنت المرافقة ليها دخلاتها لغرفة الاحذية وعطاتها طالون لي غادي تلبس ترسمات بسمة على شفاه جواهر وبدات تمس خدها لي بقات فيه ريحة فهد...غمضات عينها وغفلاتها المرافقة بصورة ليها:
جواهر:(خرجت لعند لبنات بعدما لبست طالون ديالي بدينا فالتدريب..لي شد منا تقريب ساعتين..كنت كلما مشية فلممر كلما تفكرت كلامو حركاتو ضحكتو واهم حاجة قبلتو واخا كانت غير على الخد ولكين كانت كافية تخلق فيا نوع من السعادة الداخلية لي اول مرة كنحس بيها...سالينا التدريب وتوجهنا لبوفي لي كان محضر لينا شديت ماكلتي وجلست مع شي عارضات..بداو كيهضرو وانا كل تفكيري معاه كان مسيطر على بالي بشكل لايوصف...مفيقني من حالتي غير صوت شي وحدة جلست حدايا:
هي:(الحديث بالفرنسية)شنو المميز فيك حتى خليتينا نتسناوك هاد الوقت كلو؟؟(كتهضر بكل كره وغضب).
جواهر:مفهمتش؟؟واصلا شكون نتي حتى تحاسبيني؟؟
هي:اووه وزايداها بطول لسان..
جواهر:سيري اختي قلبي ساعة بخرا راني شحال هادي منتفت شي حد
هي:عقلي على هاد الكمارا مزيان
جواهر؛سيري سيري احنينتي من حدايا..على بشار كيدار
البنت:بنات يلاه كملو ماكلتكم بزربة ..العرض غادي يبدا بعد ساعتين:
جواهر(كملت ماكلتي غسلت فمي ودخلت لصالة المكياج والشعر ..بدات البنت كتصايب ليا شعري ودري كيقاد ليا مكياجي بداو المصممين كيوضعو المسات الأخيرة..ومراقبين شعرنا ومكياجنا كيشوفو واش لايق للالبسة لي صممومها....بدات القاعة كتعمر بالضيوف وبدات الحركة كتزيد...توجهت لغرفتي لبست دو بياس خاصين بلبسة وتبعتني لبنت كتعاوني فلكسيوة لي كانت طويلة وفلون لبيجي..وضعت لمسات الأخيرة ووقفت فصف المستقيم مع العاضرات بداو العارضات كيدخلو ..شربت شوية ديال الماء..ودخلت تابعة البنت لي قدامي مشيت بشكل انسيابي وكنت كنحاول نبين راسي بلي مرتاحة فشي لي لابسة واخا كان العكس تماما..وقفت قدام كاميرات حطيت يدي على خصري وتبسمة..شفتو جالس حاط رجل فوق رجل ومتبعني بعينيه...جات عيني فعينو..رمالي غمزة ..حسيت معاها بارتجاج على مستوى المخ..غمزة وحدة كانت كافية أنها تخربقيني وتلفني على الطريق...كنت غادي نتصاطح مع البنت لي ورايا شديت فراسي. ودخلت لغرفة...بدلت من جديد .ورجعت خرجت حاولت هاد المرة نبعد عن انضارو وشوفاتوليا...كان اول يوم لاسبوع الموضة ناجح ...استطعت نبرز راسي قدام العارضات..ونبين نفسي معاهم..توجهت لغرفة تبديل..بدلت حواجي..وهزيت صاكي غادي نخرج:
بنت:مدموزيل جواهر هادي ليك
جواهر :(كانت عبارة عن مجموعة كبيرة من الورد الاحمر..جريت لكارت وقريت لمكتوب)
«كنتي ساحرة العرض..نتمنى متاترش عليك غمزاتي مرة اخرى»
جواهر:(شدني ضحك.والخوف فنفس الوقت واحد لكوكتيل ديال الاحاسيس فشكل...هزيت لورد بين ايديا وبديت نشمو حتى سمعت صوت تيلي ديالي...)
عائشة:ربى بنتي نوضي تتعشاي
ربى:(كانت ناعسة فصالة بلا متحس...حكات عويناتها)لا اخالتي مفياش جوع
عائشة:غير شوية ابنتي!!
ريى:والله مافيا بغيت غير ننعس
عائشة:ايوة نوضي احبيبة لبيت نعسي فيه راه وجدت ليك فراشك
ربى:واخا تصبحو على خير
عائشة:وانتي من اهل الخير...(جلسات مع ولدها على الطبلة وبدات تقطع الخبز)مسكينة هاد البنت شحال تكرفسات فحياتها
يوسف:غادي تنتاقم منهم واحد واحد ...مغاديش نخليها بوحدها
عائشة:ولدي يوسف هادو راه ناس فوق منا..ولدي شد احتياطاتك وشوف شي طريقة توصل بيها ربى لهدفها بلا متنضرو
يوسف:يكون خير الوليدة ..غدا إنشاء الله غادي نبدا الخدمة
عائشة:ايوة الله يكون معاك اوليدي
*********
الخدامة:(كدق على باب غرفتها)لالة يسرا
يسرا:'(ناعسة ففراشها رجل يمين ورجل شمال شعرها نازل على وجها وعويناتها ونيفها حمرين بلبكى..توجهات لعند لباب كتعوج مدوخها النعاس..حلات الباب:شنو بغيتي؟؟
الخدامة:لالة يسرا مدام مجدولين بغاتك تنزلي تعشاي
يسرا:مفياش جوع سيري قلبي عليا ومدقوش عليا مرضتوني
الخدامة:واخا الالة تبصحي على خير
يسرا:(رجعات لفراشها شدات فانيدة ديال راس تخفف عليها شوية ديال الالم وطاحت على فراشها نعسات من جديد.)
خدامة:مدام لالة يسرا قالت موكلاش .بغات ترتاح
مجدولين:هاد البنت مالها من ساعة لي جات فيها من لاصال وهي غير ساد عليها
الخدامة:يمكن عيانة امدام
مجدولين:علي فين؟؟
الخدامة:كيهضر فجردة امدام
مجدولين:واخا تقدري تمشي.
جواهر:(حطات لورد من بين ايديها وجاوبات)الو
علي:جواهر صافا!!
جواهر:الحمد لله كلشي مزيان
علي:لقيت اتصالاتك اليوم؟؟
جواهر:اه كنت بغيت نهضر معاك..
علي:ياك لاباس وقعت شي مشكلة
جواهر:(سدات الباب ورجعت هضرت معاه)لا غير كنت خايفة شوية حيت البارح....(وبديت نعاود ليه الشي لي وقع لي فلمطعم مع فهد)
علي:متخافيش ..هو كيحاول يخليك ضعفي قدامو باش يقدر يعرف اي حاجة عليك ...بلا متخافي اوكي
جواهر:تصبح بخير(قطعات الاتصال ودارت تيلي ديالها فصاكها...هزت الورد بين ايديها وخرجات لعند الشيفور لي كيتسناها..وتوجهات للاوتيل..بدلت حوايجها.ودخلت ترخي عضيماتها فلجاكوزي لي وجدات.. حطات على طرف لجاكوزي طبسيل فيه حلوة من الكراميل وكاس ديال عصير.ليمون...حطات سماعات فودنيها وغمضات عويناتها كتحاول تريح نفسها وتخوي راسها من جميع الافكار لي مسيطرة عليها.)
*********
(فاشهر متحف فباريس «متحف اللوفر»..كانت لوحات لاشهر الرساميين مغطية احيط المتحف..فغرفة اخرى خاصة بالتماثيل والمنحوتات الشهيرة..كان واقف بهيبتو ووقفتو الرجولية..حاط يديه فجيبوبو وعينيه مركزة على نصف تمثال مطير ليه راس وبقية جسمو منحوتة بطريقة محترفة..بعد ثواني وقف حداه شخص لابس كومبلي اسود..مربع ايديه لصدرو وتقابل مع التمثال كيشوف فيه حتى هو...بعد صمت نطق بطلنا بصوت روجولي:
فهد:شنو رأيك فهاد المنحوتة؟؟
الشخص:متقنة..وحتى طريقة النحت فريدة من نوعها
فهد:(بصوت مليء بالثقة)صح..ولكين فنضرك علاش هاد الفنان مدارش راس لهاد الجسم المتقون؟؟
الشخص:(صرط ريقو عرفو على شنو كيلمح)مع..مع. معرفتش!!.
فهد:(ضار عندو هاز حاجبو فيه وعينيه بحال صواريخ فراسو قرب من ودنو ونطق)اي شخص يفكر يستغباني اولا يلعب من ورا ضهري نهايتو غادي تكون بحال هاد المنحوتة...
الشخص:(كيمسح لعرق من جبينو)مسيو..م...مسيو فهد ..كنت مجبور..سمحلي اخر مرة نقسم ليك براس ولدي اخر مرة..
فهد:(طلع فيه وهبط ومشا خلاه تابعو كيرغب ويطلب فيه ..)
الشخص:عافاك..عافاك مسيو فهد شوف من حالي عافاك....(الناس كلها دارت لعندو مفهمينش شي لي واقع...خرج فهد من المتحف حل ليه الشيفور الباب الخلفي وخلا الشخص تابعو يطلبو...عطا اشارة براسو لكارد لي واقفين وتكلفو بيه..بينما فهد كمل طريقو.)
الساحرة و عالم المشاهير الجزء الثامن
محتوى القصة
التنقل بين الأجزاء