الحب ليس بالكلمات الجزء الثامن

السعدية : اوا صباح لخير ا الالة الأميرة عاد فايقة

لينا: الصمممممت

خديجة: هي فايقة خاسرة تاني

لينا: الصممممت

السعدية: نوضي تتغداي راه باقي حقك من لبسطيلة و الدجاج

ناضت بلا ماتدوي مع حد مشات لكوزينة جبدات داكشي حطاتو فوق الطابلة و طاحت كاتاكل مغددة و عينيها عامرين بالدموع

لينا:(فمها عامر) علاش يمشي علااش بنتكدم كياسيار اشكيكترتسسكستةهروو (خوات فمها كاتبكي) حمار كيدار اهنننننننننن (عمرات فمها) مشا و خلاني ففففففففززهفف فففففف (خواتو) خلاني حتى ولفتو و هرب و الله ماكايسوا

كملات ماكلتها بالنكير و لبكا كل شوية تتقج و تبكي و تنوح، ناضت ساخطة و رجعات عندهوم للبيت شافو وجهها حمر باين فيها لبكا

سي عزيز: امالكي ا بنتي

لينا:والو غير تجيفت

سي عزيز: اوا رضي لبال

السعدية: ايمتا لكار !?

خديجة: مع الثمنية

السعدية: اوا نتلاقاو تما

هند: علااش مانتزاحموش

معاذ: على حساب جدارمية

فهمات لينا من هضرتهم بلي شي غايمشي فطوموبيل ديال سي عزيز و شي فالكار و بقات جالسة مغبنة بوحدها ماكاتهضرش و عقلها مرفوع كاتفكر اش كايدير يونس! واش وصلو !! كون كان حداها دابا كون شبع نظرات و غمزات و غرقها كلام حلو ، بقات ساهية شحااال و كاتنهد حتى شافتهوم ناضو و بدا كاينغزها خوها

معاذ: وا لعمالة وا درب السلطان

لينا: اش

معاذ: المشماش وا نوضي تهزي بدلي حوايجك راه راجعين و نتي مغبنة بحال ميت ليك الراجل لهاد الدرجة متعلقة بأمين كاع ماكاتديري عليا هاكدا لحسك

لينا:(ناضت) بعد مني ماقانعاش ليك

مشات لبيتها طالعة ليها لقردة لصطاح و غير عاقدة حجبانها مشات لفاليز جبدات سروال جينز مزير عليها مع شوميزة فالغوز بارد بلا كمايم الصدافي ديولها فالأبيض لبساتهوم و خشاتها فالسروال و دارت صمطة بيضة شدات بيها السروال و لبسات صباط pلا ابيض و خلات شعرها مهزوز ذيل حصان و خرجات شي شعيرات من الجناب رشات ريحة و السنسلة لي عطاها كل شوية تتحسسها و تتفكرو بيها جمعات فاليزتها و خرجاتها برا هبطاتها و حطاتها ، جلسات فوق كرسي كاتسنا كولشي حتى تجمعو خرجو برا، عطاو الساروت لمول لفيلا و ركبات لينا و السعدية و معاذ و سمر و هند فطوموبيل ديال سي عزيز داسيا كحلة اما خديجة و سي حمد فغادي يرجعو فالكار ... بداو كايبعجو على لفيلا لي حملات اجمل ذكريات لينا مع يونس و كل قنت فالقنات كايشهد على شرارة حب مخفي لينا ماعارفاهش بلي كاينمو فقلبها و يونس واهم راسو بلي مجرد اعجاب و لكن لي كان بينهوم اكثر من اعجاب فوقت قليل تحولات كراهية لحب دفين ماحسوش بيه حتى بعدو على بعضياتهوم و ماعرفوش واش غادي يتلاقاو باقي ولا لا.

وصلو لأكادير مع اذان الفجر كولشي ناعس ما عدا سي عزيز لي سايق كايتناوب هو ولدو، توجهو نيشان لدارهوم ... وصلو و بلاصاو لوطو و فيقو الناعسين ، هبطو كاملين فصمت باش مايبرزطوش الجيران و كل واحد هز فاليزتو و طلعو لدار و معاهوم حتى هند ... غير تحل لباب دخلات لينا هي لولا مشات لبيتها مبوقة بالنعاس حطات الفاليز ديالها و تخشات فالفراش نعسات ماعقلات على حتى حاجة وحداخرا.

أذن الضهر وبسباب صوتو حلات لينا عينيها ، هزات راسها مقلوبة ضورات عينيها فالبيت لقات راسها فبيتها و رجعات حطات راسها فوق المخدة ساهية كاتفكر فيونس ، اول حاجة طاحت فبالها كي حلات عينيها هو يونس علاش و كيفاش ماعرفاتش ، ناضت طاير ليها لمورال دخلات لطواليط قضات حاجتها و غسلات وجهها و خرجات لقات سي عزيز فايق كايتفرج و السعدية كاتوجد لغدا اما سمر كيف العادة خاشية راسها فكتاب، رجعات لينا لبيتها سدات عليها بدلات حوايجها لبسات بيجامة خفيفة و نعسات فوق الفراش حلات لبيسي ديالها و شدات لويفي و مشات لفيلم كانت ديجا متيليشارجياه ديال Me before you بقات كاتفرج باش تفوج شوية و تنساه و لكن فكل لقطة رومانسية كاتشوفها كاتفكر يونس و كاتمشي يدها لا إراديا للسنسلة تشدها تبقا تلعب بيها ، دقات عليها مها باش تتغدا و حبسات لفيلم خرجات تغدات لقات معاذ يالاه فاق و هند كذلك كاياكلو مقلوبين بالنعاس كولشي ساكت كاياكلو الطاجين فصمت ... كملو لماكلة هزو الطبلة نقاو الدنيا و رجعات لينا لبيتها كملات فيلم منين حبس حتال النهاية و طلقات الدموع لي كانو محبوسين فعينيها حيتاش فيلم حزين و لكن ماشي هدا هو السبب الرئيسي غير سبة جات فالطريق خلاتها تبكي و تبرد على قلبها

لينا: (كاتبكي) علااااش علااااااش تخليها حشووومة عليك كانت قابلة عليك واخا معاااق 😭😭 حرااااام عليك لاش تموت ا زبل عيش معااق 😭😭 ديما كاتمشيو و تهربو خليتيها حتى تعلقات بيك و قررتي تقتل راسك 😭😭😭

بكات حتى بردات على قلبها و قلباتها the good doctor تفرجات فالحلقات لي دازوها ماخرجات من لبيت حتى طاح الظلام و غير كرشها سبابها

مشات لصالون لقات السعدية جالسة لابسة بيجامة و خديجة معاها لابسة جلابة حداها بنتها هند و سمر مقنتة هازة كتاب ... طالقين التلفازة كايتفرجو و محطوط فوق الطبلة طبسيل ديال الحلوة و الخبز الزيت الفرماج العسل و طرح ديال لمسمن و براد اتاي مشحر بنعناعو و الكيسان فالسينية ... جلسات معاهوم بلا ماتهضر كبات ليها امها كاس اتاي و هزات مسمنة دارت فيها فرماجة و بدات كاتاكل و كاتفرج و حجبانها غير مقرونين

خديجة: اوا ا لينا فين كنتي غاطسة

لينا: الصمممت

خديجة: توحشتي أمين دغيا راه سيمانة جاية هاهوا معاك حتى يطلع ليك فراسك

هند:(بمزاح) ياكما كانت عينيك فخويا و فاش تزوج كعيتي

لينا: (بعصبية) نتي غادي تديها ف*** ولا ماغايعجبك حال بقاي حاضيا ليا ترمتي

السعدية:(بغضب) لينا اش هاد الهضرة مابقا لا أداب لا احترام

لينا:(شداتها لبكية) وا بعدو مني خليوني عليكوم (كاتاكل و كاتبكي) اش بغيتو عندي واش كانسوق ليك واش كانهضركم 😭

خديجة:(حطات يدها على خدها) ا مالك ا بنتي اش واقع ليك ! لا لا بنتك ماعاجبانيش ا السعدية

السعدية: مالك ا بنتي من لبارح و نتي غير كاتبكي

لينا: ماماليش غير خليوني عليكوم 😭

هزات كاسها و مسمنتها و مشات لبيتها كاتبكي سدات عليها

خديجة: نوضي شوفي مالها !

السعدية: غاتكون غير قربات تجيها هي هاكداك فاش كاتقرب تجيها العادة الشهرية كاتولي غير كاتبكي

هند: كاتولي حساسة بزاف كانت كاتوقع ليا شحال هادي

خديجة: انا شاطة فبنتك كاتحب شي واحد

السعدية: (ضحكات من قلبها) هههههههههه لينا تحب 😂😂 هاديك راه موحال واش غاتزوج ماكاتشوفش فالرجال فخطرة و ماكاتحملهومش

خديجة: عندي احساس ياختي بلي بنتك غارقة فالحب

السعدية: بنتي و عارفاها داكشي مامعمراش بيه راسها

خديجة: و معاذ ! (جمعات يديها فحجرها) حاسة بلي عندو شي حاجة ماشفتيهش كل شوية هاز تيليفون و كايتوشوش

السعدية: هاداك عندو صحيبتو (ضورات راسها) احياااااني على هاداك (ضربات صدرها) ولدي هاداك و انا لي خابزاه و عاجناه مصاحب و شفت تصاورها

هند:(بلهفة) كيفاش دايرة زوينة ولا خايبة ?! كيفاش شفتيها

السعدية: كان وراني شي تصاور ديال واحد طوموبيل باغي يشريها و خليتو حتى ضار و بديت كانقلب فالتصاور حتى لقيتهوم هي مقبولة مابيهاش و لكن انا بغيت بنت ختي لولدي

هند: (حشمات) ويلي ا خالتي

السعدية: تي غير gري gري معاذ كايعجبك ياك

هند:(بخجل) اويلي ا خالتي (حادرة راسها)

خديجة: هيهيهيهيهي اوا حتى حنا مانلقاوش ماحسن منكوم لبنتنا معاذ بحال ولدي عزيز عليا مربي متخلق و خدام مسك عليه الله الحمد لله

السعدية: اوا غير نتفك من هاد خيتي و نجيو نخطبو معاذ ماغاتديه غير هند

هند:(حشمانة حادرة راسها) هيهيهي

توالت الأيام و لينا شوية بشوية كاتنسا فقدانها ليونس و باقة حابسة راسها فبيتها نهار و ماطال و هي كاتتفرج فالأفلام و المسلسلات، بزز باش كايديها معاذ للبحر باش تبدل الجو شوية ... رجع أمين و مراتو و شي كايجي عند شي و شي كايمشي عند شي و فهاد الصيف العلاقة مابين رانيا و عجوزتها خديجة قوات و ولات دايراها كيف بنتها بدلات رأيها فيها بعدما عرفات الجوهر ديالها و كاتعامل معاها كيبحال إلا امها ماشي ام زوجها و الحاجة الزوينة كاتسيفطها لخديجة و شوية بشوية حتى دخلات لقلبها و ولات كاتقطر ليها من عينها.

داز الصيف بحرارتو و دخل شهر شتنبر و بداو الناس لقرايا و رجعو الناس للمدن ديالهوم اما لينا فمزال حاجبة فدار باها كون ماكان معاذ لي كايبزز عليها تخرج معاه كون بيضات كتر من لقياس .... كسائر الأيام فاقت معطلة تال 12 لابسة بيجامة بسروالها دافية شوية بسباب البرد لي بدا كايتحرك ، مشات لطواليط قضات حاجتها و غسلات وجهها و سنانها و خرجات جارة رجليها فبانطوفة مزغبة ... وقفات على امها فالكوزينة

السعدية: اوا على السلامة مني فقتي حتى حماض بولك

لينا: اوففف بدينا تاني وا يالاه فايقين كاتسمميني بهاد الهضرة ولا كاتفطريني بيها !

السعدية: سكتي الله يسكت ليك الحس اللسان ماضي و الدراع gاضي سيري شوفي لالياتك معاياش فاقو و نتي مافايقة حتى قرب يدخل بااك من الخدمة

لينا:(كاتفطر) اييه مزيان

السعدية: (كاتطيب الخبز) شوفي غير مرات الحداد لي حدانا و بناتها الحداكة و التباتة و الرزانة و الأخلاق و السترة

لينا: المزوق من برا اش خبارك من لداخل (شربات اتاي)

السعدية: سكتي 😡 بزاااف عليك هادوك مشات امهم لسبيطار جلسات فيه شهر بناتها بجوجات لي قابلو الدار و يجوجات صغر منك هوما لي يسيقو و يطيبو و يعجنو و يقابلو خوهوم الصغير و باهوم و يديو لأمهم الماكلة و كايمشيو لمدرسة

لينا: الله شبعت مازال عندك ماتقولي

السعدية: اوا سيري الله يلقيها ليك ا بنتي

خرجات لينا من لكوزينة دايرة ودن ميكة طلعات ليها هاد الهضرة فالراس نفس الموال يوميا حتى حفضاتو و ماعندها حتى حل من غير انها تخدم و تخوي الدار باش ترتاح، ضربات ضورة فالدار لقاتها مصايبة كاملة رجعات لبيتها قادات فراشو و ضربات فيه شطابة خفيفة و سمعات لباب كايصوني، مشات حلات لباب و دخلات سمر لي نجحات و طلعات لسانكيام ،لابسة سروال جينز و تريكو كحل و كويرة كحلة تحت منها طابيلة بيضة دايرة نضاضر ديال الشوف مضورين و طالقة شعرها دايرة لكيت مامسوقاش ، دخلات بلا ماتهضر مع لينا عايشة فعالمها بوحدها ... سدات لينا لباب و مشات لصالون شعلات التلفازة تلاقات مع اخبار الضهيرة ديال 2M ... غير شافت لوجو ديال 2M و تفكرات يونس و رجع ليها الحنين إلى الماضي ، سهات فالتلفازة عقلها مامعاهاش حتى بانت ليها روبورطاج يونس الهلالي مع اخرين و بدا قلبها كايضرب و ابتسامات لا شعوريا و بقات حاضية التلفزة مع كل روبورطاج لاتبان ليها سميتو ولا تسمع صوتو كايعلق ، كملات الأخبار بلا ماتسمع ولا تشوف حاجة تانية .... سمعات صونيط و ناضت حلات لقاتو معاذ مع سي عزيز دخلو بجوج ...ظ مشا سي عزيز نيشان لطواليط باش يتوضى و يصلي الضهر و لينا جرات معاذ لبيتها

لينا: امضرا اش درتي ليا فداكشي

معاذ: هضرت مع صاحبي و قاليا صافي من غدا تبدا

لينا: (بفرحة) من نيتك 😍😍

معاذ: لا من ترمتي طلقي مني خليني نرتاح شوية

لينا:(باستو) سير الله يغطيك بالرضا و يفرشك بالرضا

معاذ: و زيدك هضرت مع لواليد حتى هو و قاليا بلي ماعندوش موشكيل

لينا: سير الله يزوجك بمريم و يحضرني فعرسك

معاذ: درقي عليا زلافتك بقاي كل شوية قولي مريم مريم حتى تسمعك لواليدة

لينا:(بسخرية) عاااارفة ا بب

معاذ: اش عارفة

لينا: اوا اجي جلس باش تعرف اش كايضور موراك غير حيتاش خويا و عزيز عليا غادي نقوليك

معاذ:(جلس فوق الفراش) سربي طلقيني خاصني نمشي نصلي

لينا: مارضيتيش لبال بلي هند ولا معششة عندنا تضور ضورة و تجي

معاذ: كاتجي عند خالتها عادي

لينا:(قلزات ليه) ها لي عادي احبيبي مك لالاهوم السعدية بقات كاتنفخ الراس لممنونخة ديال هند و طمعاتها فيك قالت ليها بلي غادي تتزوج بيها و غاتسكن غير هنا و زي و زيد و هي كيف الهبلة تيقات

معاذ:(طلع حواجبو) من نيتك

لينا: لا من ريتي وا نووووض تشلل لما غادي تحتك و نتا حال فمك كيف لبقرة كايخططو و يبلانيو على ضهرك و زيدك شافت تصاور صاحبتك

معاذ: (خرج عينيه) ايمتا شافتهوم

لينا: شي مرة خليتي ليها تيلي و شافتهوم ضرب الحديد ما حدو سخون و سير خطب البنت لاكنتي باغيها بصح قبل ماتقوليك مك ها السخط ها الرضا

معاذ: مافهمتش علاش دارت هاكدا (بعصبية) بقات كاتطمع فالبنت على والو

لينا:(طلعات حواجبها و عوجات فمها) واش بقات فيك هند

معاذ: بقا فيا راسي و هند و مريم ، اودي هاد العيالات بربي حتى كايخرجو على ولادهوم مافهمتش علاش كايبقاو يبلانيو بلا خبر ولادهوم و لكن و الله مانعقل على حد مريم مواعدها بالزواج و باغيها و الراجل هو الكلمة

لينا: (بسخرية) و المرا بالترمة 😂

معاذ: مسالية نتي و الله (ناض) لمهم شكرا فيقتيني من لقلبة لي كنت فيها

خرج من لبيت و تبعاتو مشات جلسات فالصالون و بعد شوية تجمعو كاملين على لغدا

عزيز: لينا جمعي راسك غدا راه السيد وصيناه عليك

لينا: ماتخافش غانحمر وجهكم

السعدية: علاش اش كاين

معاذ: لينا غاتبدا لخدمة

السعدية:(طلعات حواجبها) و انا اخر من يعلم

عزيز: اوا راه يالاه تافقنا مع السيد

لينا: ياك غير غانتعلم فالأول

معاذ: عندك شهر ديال السطاج تعلمي و رضي لبال حيتاش من بعد غادي تخدمي

لينا: بالكونطرا !

معاذ: اوا شنو شنو باغة تترسمي !!

لينا: اوا شكون كره

معاذ: بقاي تحلمي

السعدية:(بتمياق) و فين غاتخدم?

معاذ: فواحد البنكة

السعدية: اوا مزيان بعدا تتبرضي شوية و نتي مقابلة غير النعاس النعاس النعاس

عزيز: (بعصبية) خليونا ناكلو بحال الناس باراكة من النكير

داز نهارهم عادي مرة مرة المناوشات مابين السعدية و لينا و معاذ كايبلاني باش يخلي السعدية تقبل على مريم بلا صداع و مشاكيل ... صبح الصباح فاقت لينا مع السبعة مقلووبة بالنعاس مامولفاش تفيق بكري ز لكن بزز منها تفيق ، بعيون شبه مغلوقة لبسات بانطوفتها و مشات لطواليط كاتجر فرجليها ، دخلات قضات حاجتها و غسلات وجهها و حكات سنانها و خرجات لقات كولشي فايق شي غادي للخدمة و شي غادي للقراية ، رجعات لبيتها ه تكسلات حتى طرطقو عضامها و تفوهات، حلات لماريو بقاتش حال كاتشوف فيه ماعارفة ماتلبس ... بعد تفكير مطول هزات سروال ديال توب كحل كلاص لبساتو و لبسات معاه قميجة بيضة مزيرة عليها خشاتها فالسروال و هزات فيست كحلة شيك ... خرجات لبرا جلسات فطرات معاهوم و باها و خوها مغرقينها نصائح ديري هادي و ماتديريش هادي ... كملات فطورها و ناضت مشات لبيتها جلسات فوق الكرسي تقابلات مع المرايا و مشطات شعرها سرحاتو و جمعاتو على شكل كعكة و خلات خصلات خارجين من الجناب دارت مكياج عادي اي لاينر لعيونها و برانزر لخدودها و gلوص ماط فالبوردو ... خلات السنسلة لي عطاها يونس فعنقها مزيناه و دارت ساعة كحلة شيك فيديها ليسرية ، ناضت جبدات صباط اسود عالي مقمقم من لقدام على شكل مثلث، لبساتو و زادت طوالت اكثر ما فيها طويلة ... هزات صاك اسود مربع الشكل من برادا دارت فيه حاجياتها و خرجات من الدار و امها كاتدعي معاها ... شدات طاكسي حطها قدام لبنكة دخلات مشات نيشان للبلاصة لي قاليها خوها و عطاوها اش تدير .... بدات خدمتها بكل حيوية و نشاط و ناسية شي واحد سميتو يونس و كيفما كايقولو بعيد عن العين بعيد عن القلب، كونات صداقات جداد و تعرفات على عالم ثاني كولو ارقام و فلوس و شوية بشوية حتى تأقلمات و ولات معروفة تما بمولات لعوينات الخوضر دازو الأشهر و هي فرحانة بخدمتها و بالصالير لي ولات كاتشد ، تهناو عائلتها منها و ولات مرا و قادة براسها مشات لينا لمبرهشة و جات لينا الجدية لي كل وقتها عاطياه للخدمة بجانب المسلسلات لي متبعة لي ضروري منهوم ... اليوم ككل الأيام فاقت مشات لخدمتها ، جلسات فالبيرو ديالها خاشية راسها فالبيسي مركزة فالخدمة حتى سمعات صوت تيلي كايصوني، هزاتو لقات نمرة ماكاتعرفهاش جاوبات و بقات ساكتة

....: الوو

لينا:(بجدية) شكون معايا

....: وايلي ماعرفتينيش

لينا: شوفي ا سي غاتقول شكون نتا ولا غاديي نقطع

...: انا عبد المنعم

لينا: شكون منعم

منعم: صاحب أمين راه تلاقينا فعرسو

لينا: اااااه سي منعم

منعم: عافاك بلا ديك السي

لينا: هههه واخا مي منين جاتك نمرتي

منعم: طلبتها لأمين و بعد وقت طويل عطاها ليا

لينا: اه اوا كيداير مع شي برد و شتا

منعم: هاحنا كانتسناو هاد شهر 12 يخرج باش يمشي معاه لبرد ديالو

لينا: اوا الصبر

منعم: اوا لمهم بغيت غير نسول فيك

لينا: يسول فيك لخير شكرا

منعم: يالاه بسلامة عليك سجلي نمرتي

لينا: واخا ضاروري هههه يالاه بسلامة

قطعات و حطات تيلي مستغربة من هاد المكالمة العجيبة و حسات بلي كاينة إن تما .... كملات خدمتها و خرجات كاع من بالها المكالمة ... جا وقت الغدا و خرجات هازة لمظل على حساب الشتا شيرات لطاكسي وقف ليها و طلعات فيه حطها قدام دارها خلصاتو و هبطات دخلات لدار لقاتهوم كايتسناوها للغدا... حيدات صباطها و دخلات لصالون تجمعو على طاجين اللحم بجلبانة و البطاطة و خيزو

عزيز: لينا بنتي عندي لي شي خبار

لينا: (فمها عامر) خير ان شاء الله

عزيز: نتي مابقيتيش صغيرة كبرتي و تبارك الله دابا توضفتي ماخاصاك حتى حاجة اوا و راه جايين فيك لخطاب

سمعات هاد الجملة الأخيرة و تشللات فبلاصتها قلبها ولا كايضرب بالزربة يديها كاترعد و حسات بالبرودية طلعات معاها مامصدقاش مابغاتش تتزوج عندها طموحات و افكار و باغة تبقا سيليباطير مابغاتش ترتابط بواحد يكحل عليها عيشتها ماخرجها من افكارها غير صوت امها لي زغرتات

السعدية: روروروررورروري (بفرحة) شكون هادا !!

عزيز: غدا غاتشوفيه جايين يشوفو لبنت و يهضرو فيها

حلقها نشف الدغمة وقفات فالطريق مابقاتش باغاها تزيد لفمها، وجهها صفار الافكار تخربقو حاولات انها تبين ليهوم انها طبيعية حيتاش ماشي اول مرة يجيو فيها الخطاب ولفاتها كل مرة جايين و رفضاهوم و لكن هاد لمرة حاجة فشكل داخلها تحركات ماشي رافضة غير الزواج بل رافضة اي راجل يقرب ليها بالمرة و بمجرد التفكير فانها تتزوج بشي واحد من غيرو كاتخلي جسمها يتشوك عليها ، هادا لي خلاها تبات تفكر فيه و تفيق على صورتو و على لحظاتهوم مع بعض نفس الشخص لي كاتحاول ترفض و تكبت مشاعرها جيهتو فكل مرة تفكراتو ماعمرو ماسول فيها من نهار تفارقو واخا غير بميساج كاتدخل للواتساب كاتلقا الصورة ماكايناش و حتا اخر ضهور ماكاينش بحال الا مبلوكيها هادشي خلاها تنساه او تتوهم بلي راها نساتو و دابا اش غاتدير غاتبقا حياتها كلها كاتتسناه و هي ماقادراش تشوف راسها مع غيرو .... ناضت من الطبلة ساهية غسلات يديها و دخلات للبيت تجبدات فيه و هو يدخل عليها معاذ و جلس حداها

معاذ: لفنون مالكي !

لينا: والو

معاذ: ماتخافيش الى مابغيتيهش حد ماغاديش يفرضو عليك

لينا: عارفة

معاذ: و لكن حتال ايمتا غادي تبقاي بوحدك دابا عندك 24 غادي تولي ف 25 ها 26 شوية 30 ماغاديش تديري وليداتك و راجلك و دارك... تفرحي براسك

لينا: مابغيتش

معاذ: اوا انا باغي نشوف ولادك ماكرهتش شي لينا صغيرة تبقا تضور عليا هنا و لهيه عويناتها خضيضرين بحال ديولك و نديها نخرجها و نشري ليها و تبقا تقوليا خالي معاذ

لينا: ربيت حتى راسي عاد باش نربي لولاد راه غادي تخرج تريكة عوجة

معاذ: عارفة راسك زيرو اخلاق

لينا: لباراكة فيك نتا و أمين

معاذ: لمهم فكري مزياااان فلي قلت ليك و ماتعرفي هادا لي يجي يكون سعيد الحظ و تتفاهمي معاه

لينا: يكون خير

باسها فجبهتها و خرج خلاها مكورة فوق الفراش و هضرتو دخلات من ودن و خرجات من ودن و لي فراسها فراااسها ... بقات مجبدة شحال مركزة فنقطة وحدة و يدها على السنسلة كاتذكر لحظاتها مع يونس لي غايبقاو راسخين فدماغها حياتها كلها ، لحق وقت لخدمة و ناضت قادات مكياجها و هزات مونطو ديالها و مظلتها و خرجات شدات طاكسي تحطات قدام البنك دخلات مشات للبيرو ديالها و تلفات راسها بالخدمة و شدات لغد ليه روبو حيتاش عارفة بلي غاتكون فالدار نهار كامل .

كملات خدمتها و رجعات لدار ماكاتهضر ماكاتتكلم غير جالسة كاتخمم و يدها كاتلعب فالسنسلة حتى شدها النعاس و مشات نعسات بلا ماتتعشا.

صبح الصباح حلات عينيها ضرباتها ريحة البخور ، دوزات يديها حدا نيفها كاتحاول تحيد الريحة و تنقي لهواء نايضة خاسرة خصها غير معامن، لبسات بانطوفة فرجليها و خلاجات مشات لكواليط قضات حاجتها و غسلات وجهها و حكات سنانها مزيان و جمعات شعرها كعكة مهملة و مشات للكوزينة لقات امها مع خديجة فالكوزينة كايطيبو الدغميرة ديال الدجاج كاتطيب فوق لبوطة و لبسطيلة ديال لحوت فالرفران و gاميلة عامرة باللحم كاتطيب ... عاد المسمن و لبغرير و لكيك موجدين الشهيوات تحل فيهوم فمك ، جلسات فوق لكرسي بإنزعاج ماحاملة والو ، كبات ليها امها اتاي بلا ماتهضر معاها و عطاتوا المسمن و الحلوة باش تفطر

كملات فطورها و الحرف مانطقاتوش و حتا السعدية ماقالت والو غير من الشوفة عرفاتها كاعية ... خرجات من لكوزينة شافت الدار كاتشعل بالنقا مشات لصالون لقاتو مجبد مقاد وفوق الطبلة محطوطين الفواكه الجافة و المملحات و الحليب العصير و بلاطوات ديال الحلوة ... تبعاتها السعدية و ضوراتها

السعدية: الناس شي نص ساعة و غادي يجيو مع بااك و خوك سيري لبسي ديك لفراشة لي فالصومو لي شريت ليك فالصيف باقة زوينة و جديدة و قادي شوية حالتك و نتي صفرة كيف الخرقوم

لينا: ماعنديش مورال ا ماما

السعدية: وا نتي اش خاصرة شوفي غير الراجل لي جا عجبك هو هاداك ماعجبكش رفضيه

مشات لينا بلا ماتجاوب امها دخلات لبيت حلات لماريو بالزعفة و جبدات الفراشة لبساتها على دو بياس جاتها خطيرة فراشة نص كم كول v صدرها كايبان و مهزوز واقف و الترمة كاتبان العبار ... محجرة من الصدر بحجيرات فالأسود طويلة و فيها شق فالجنب كايبين شوية من رجليها البيضين، لبسات معاها صندالة كحلة طالعة شوية بالصميطات شكلها زوين ... تقابلات قدام لمرايا دارت اي لاينر جبدات بيه عينها و كبرات شفارها بماسكارا و gلوص ماط فالغوز عطاها فوليم اكثر لشفايفها، اكتفت بهاد المكياج لخفيف ماعندهاش مع الفوندوتان حيتاش اصلا ماعنداهاش ماتخبي وجهها صافي ...طلقات شعرها و مشطاتو مزيان و فرقاتو من النص و خلاتو مطلزق على راحتو ... سمعات صوت الرجال و عرفات الناس جاو ماقدراتش تفرز الأصوات حيتاش كولشي كايدوي دقة وحدة ... بقات كاتشوف فراسها فالمرايا و عينيها متبتيين على السنسلة ديال يونس دايرة يدها على خدها ماحاملاش كاع هاد الزواق ولا اللبس باغة غير ايمتا يسولوها واش مواقفة وتقول بلي رافضة .... بقات جالسة ساهية شحااال حتى سمعات الدقان فالباب ، خدات نفس عميييق و ناضت حلاتو لقات السعدية لابسة قفطان فالباج بلا مضمة محجر من الصدر دايرة فولارو و واقفة مبندة

السعدية: اوا مزيان مني لبستي ... زيدي باش تسلمي على الناس

لينا: (قلبات عينيها) ضاروري !!!

السعدية: وا غير زيدي و الله و تعرفي شكون يا حتى تتصدمي

مشات السعدية كاتفرنس سبقات لينا لي تابعاها و شدها الفضول باغة تعرف شكون ... دخلات السعدية للصالون بإبتسامة كاترحب و تعاود ترحب و تبعاتها لينا دايرة ابتسامة زائفة حادرة راسها دايرة فيها حشمانة، بالفعل حشمات فاش دخلات و ماشافتش شكون كاين ... هزات راسها بشوية و بدات السلام من ليمن لقات رانيا جالسة لابسة جلابة فالغوز مفتوح طالقة شعرها دايرة مكياج خفيف ... سلمات عليها و مادات ماجابت قالت بلي غير جات مع أمين و خديجة ... سلمات على أمين لي بجانب رانيا ... غير ضارت شافت شكون حدا أمين و تصدمات ، لقات محمد علي لابس سروال بيج مع قميجة بيضة مرجع شعرو لور ... مد يدو ليها و سلمات عليه مصدومة

سلمات عليه مصدومة و فراسها الف سؤال تخلعات قالت بلي هو العريس ... ابتاسم ليها و حيدات يديها من يدو و قلبها كايضرب لقات حداه حسن و بحال الى زادت تأكدات تبدلو ملامحها للخلعة سلمات على حسن بالزربة و على مراتو رقية كذلك و باغة غير ايمتا تمشي ... حدرات راسها و بان ليها فالقنت شخص ماتوقعاتوش تسرحو حجبانها و حسات بالبرودة طالعة معاها قلبها كايضرب حتى شكات بلي كولشي سمعو كاع الدم طلع ليها لوجهها ... ابتاسم ليها و عينيه الكحلين كايلمعو لابس سروال كحل مع قميجة بيضة مزيرة عليه حال ليها صدافي الفوقانيين حاط لفيستة حداه ساعة فيديه المزغبة .... لاحظات بلي زاد تفورما اكثر و زاد زيان لحيتو مقادة و نفس النظرة الغامضة باقة عندو ... مرجع شعرو لور كايبان بوكوص ، مد يدو ليها و مدات يديها كاترعد مابقات فاهمة والو كولشي ترون فعقلها و الرعدة شاداها ... تلامسو الأيدي و حسات بالتبوريشة طلعات معاها و بحال الى الضو ضربها جسمها كامل ... ماسخاش يطلق منها و هو كايشوف فعيونها الخوضر و لكن خوها و باها كاينين ... طلق منها بزز منو و فاقت من لgلبة مابقاتش عارفة واش تgلس ولا تمشي بقات كاتشوف فيهوم و هوما كايشوفو فيها ماحسات براسها حتى خرجات من الصالون و خلاتهوم كايضحكو عليه .... دخلات لبيتها سداتو عليها و تكات على لباب شدات قلبها لي كايضرب فالتسعين .. كاتنهج بحال الى كانت كاتجري داتها كلها كاترعد تلفات مابقاتش فاهمة شي حاجة اش كايدير يونس هنا واش هو لي جا يخطب ولا خالو و فين كان علاش ماسولش فيها ... حسات بحلقها نشف الدوخة شداتها ... جلسات فوق الفراش شدات راسها و غير كاتنهج ... بقات مدة عاد قدرات ترتاح شوية و ترتب أفكارها ... سمعات صوت الدقان فالباب و وقفات جمعات النفس و رخاتها و حاولات تكالمي راسها... حلات لباب لقا السعدية واقفة و موراها يونس وتقف مبتاسم داير يديه فجيبو

السعدية: يونس بغا يهضر معاك واحد الشوية، ماتتعطلوش راه باك و خوك مشاو غير لجامع باش يصليو الجمعة يجيو يلقاوكم فبيت واحد يهدو الدار فوق راسي

يونس: ماتخافيش ا خالتي دغيا غير نهضر معاها و نشوف اش باغة و نخرج

السعدية: اوا دخل ا ولدي الله يرضي عليك

دخل يونس و الفرحة باينة من عيونو اما هي فزادت تلبكات مالقات ماتقول.... مشات السعدية و سد لباب بالساروت و ضار شاف فيها ... جرها من يديها و خشاها بين ذراعو عنقها و زير عليها بزااف ، خشا راسو فعنقها كايشم ريحتها اما هي تصدمات موحشاه بزااف ماقدراتش تحبس مشاعرها و بادلاتو العناق و زيرات عليه و حسات بالبكية

يونس: توحشتك توحشتك توحشتك ا الشويطينة ديااااالييييي (هزها) شوية كنت نحماق (حطها) دخلتي ليا وسط لعضام ا لينا مخي رونتيه ليا(شاف فيها) ماتتصوريش كيفاش كانت هاد الشهورة بلا بيك

لينا:(بصوت مخنوق) اش جاي كاتدير هنا !

يونس:(طلع حواجبو) زعما ماعرفتيش ! جاي ناخد واحد الكاورية مزورة ديالي درتها ليك على قد فمك و جيت لداركم باش نخطبك و تكوني ديالي قدام الله و قدام واليديك و قدام الناس عرفتي علاش !!!

لينا:(كاتبكي) علاش !!

يونس:(ضور يد على خصرها و لصقها مع سدرو و هز ليها راسها و شاف فعيونها و قال بحب) حيتاش كانبغيييييك ا لينا كانبغيييييييك

قرب باش يبوسها و حتى تخالطو انفاسهوم و مابقا وااو و قلبات وجهها و جات لبوسة فخدها

يونس: مالكي !??

لينا: (بنرفزة) كاتبغيني !!! نتا كاتبغيني !!! شكون كدب عليك

يونس:(معجب) علاش اش درت ليك !! مالكي مقلقة مني

لينا: مامقلقاتش (مسحات دموعها و بعدات منو) علاش غاتنقلق اصلا انا وياك مابيناتنا والو تلاقينا فعرس و كل واحد مشا فطريق و مابقيناش على تواصل

يونس: (جرها حتى تخبطات مع صدرو و حكمها بيديه) امممم (ابتاسم) حيتاش ماسولتش فيك داكشي علاش لهلا يوريك ا ليلو ديالي اش وقع راه تيلي تفورماطا ليا و مشاو ليا كاع النوامر ماشي غير ديالك و مالقيتش باقي منين نعيط عليك و أمين بيني و بينو خلافات على قبلك ماقدرتش نسولو عرفت بلي غاتقلب صباط و رانيا سولتها لقيتها ماعندهاش و راه مالقيتش كيفاش نشد كونجي و نجي نشوفك تزيرت بالخدمة كاع لي غادي يشدو بلاصتي ماكاينينش يدخل واحد من لكونجي و يخرج لوخر يالاه جات نوبتي و خرجت فهاد الأيام و كي جيت لهنا دويت مع أمين على قبلك و هو قالها لباااك .... و اللّٰه مانسيتك كنتي فبالي فكل لحظة (هز يديها باسهوم) أقسم بالله إلا كانبغيك و باش نبين ليك جيت خطبتك عرفتي علاش !!

لينا:(بصوت باكي) علااش !

يونس: حيتاش لاموغ ماعمرو ماكان مجرد أقوال لاموغ أفعاال و هادي خطوة باش نبين ليك بلي بصح كانبغيك مادخلتش من الشرجم و إنما من الباب كان بإمكاني فهاد الوقت فاش نجي نقلب على داركوم و نتعرض ليك و نغرقك كلام حلو و ضوران و شد من هنا و طلق من لهيه حتى تيقي بيا و نبقاو غير كانخيطو الزناقي و شي مفيد ماكاين مي انا ختاريت هاد الطريق لي راضي عليها ربي و حتى واليديك و دابا اش قلتي (تحنا على ركبتو و شاد ليها يديها) تقبلي تتزوجي بيا!

بقات كاتشوف فيه و كاتبكي بلا صوت كايتسمعو غير شهقاتها و حركات راسها بالإيجاب و ابتاسمت وسط بكاها .... ضحك و باس يديها و ناض باس راسها من لفوق و هز ليها وجهها مسح ليها الدموع و باسها فعينيها بجوج و طول لبوسة فيهوم عاد شاف فيها

يونس: ماتبكيش دموعك غاليين عندي ا حبيبة ديالي

ابتاسمات تلقائيا فاش سمعات حبيبة ديالي حيتاش اول مرة يقولها ليها

يونس: عجباتك كلمة حبيبة ديالي

قلبات وجهها بخجل و بقات كاتضور فعينيها حتى حسات بيه عنقها و صدرو كايتهز بالضحك

يونس: احح ا سليعفانة مبيتاني بلا نعاس (باسها فجبهتها) غادي ناكلك و الله ماتتصوري قداش توحشتك (باسها فخدودها) نتي ماغاديش تقولي ليا شي كليمة حلوة بحالك

بقات كاتضور فعينيها و حناكها حمرين بالخجل لسانها تسرط مابقاتش عارفة ماتقول

يونس: دابا غادي نبوسك لمهم انا علمتك هاد لعكر لي دايرة من قبيلة شهاني فالبوسة

خرجات عينيها بالصدمة و يالاه فتحات فمها باس تهضر حسات بشفافو فوق شفافها و يديه وحدة فضهرها و لوخرا مور عنقها ... غمضات عينيها و ندامجت معاه نسات كولشي و حسات براسها طايرة فالسما قلبها تفجرو فيه احاسيس جديدة و لي اخيرا تقبلاتهوم فاش شافت الصدق ديال يونس و قراتو فعينيه اما هو فعقلو توقف ديك لي بغا قلبو و سهران ليالي بسبابها اخيرا بين يديه ... كملو القبلة الفرنسية ديالهوم و مسح ليها جناب شفافها و شاف فيها بحب

يونس: جيتي ليوم قرطاسة دخلات قلبي سكتاتو مسكين ... ناري شحال زيانيتي (كايفرق قبل على وجهها) وا نارييي غادي نحماق بالفرحة و الله مامتيق

لينا:(عنقاتو) غير تيق ا حنيني

يونس: وا ناري يا سليعفانة راه سخنت

لينا:(بعدات منو) سير سير لاتصدق داير جريمة

يونس: و الله الا سخنت (جرها و باسها ففمها) يالاه هاني غانمشي عنداك فاش يسولوك واش قابلة تقولي ليهوم لاا و الله يا مك يا حتى ندوز عليك بموس حافي من لودن تال لودن (شد السنسلة فيديه) احححح تاني السنسلة باقة لابساها

لينا: وا سييير قبل مايجي بابا

يونس: (باسها) من بعد و نتشاوفو

طلق منها بزز و خرج وجهو حمر مزير سخن بداك الإحتكاك و لكن كولشي كايهون بالنسبة ليه على قبل لينا

رجع لصالون وجهو حمر و مزنطط ... جلس و تقنت و هز وسادة صغيرة حطها على حجرو باش مايتفضحش ... لقا غير العيالات بوحدهوم مجمعات الرجال كولهوم مشاو يصليو الجمعة ما عدا هو لي بقا باش يهضر مع لينا ... بدا كايسوط حل صدافي القاميجة و بقا جالس مزير بين عينيه غير شفاف لينا لي شبع فيهوم بوسان ... كل شوية يتنهد حتى رضات ليه رلنيا لبال و جات جلسات حداه

رانيا: ا مالك مزنك

يونس: وال والو

رانيا: اوا هضرتي مع لعروسة

يونس: وي (كايضور راسو)

رانيا:هضرتو ولا درتو ههههه (مسات ليه فمو كان فيه شوية ديال لgلوص) فضيحتك فضيحة هههههههه

يونس:(ساط من نيفو) توحشتها اش ندير

رانيا: شكون كان يقول بو لبنات يطيح على زنافرو و يولي يحب

يونس: لقلب ماكايشاورش

رانيا: صراحة عرفتي تختار زويونة و ضريفة و على لي قالت خالتي السعدية راه حادكة غير معكازة

يونس: نطيب انا غير نتزوجو

رانيا:(ضحكات من قلبها حتى تسدو عينيها) كون غير كانو كاع الرجال بحالك

يونس:(كايسوط) كااااينين غير مخبيين لبنات الناس

رانيا: (عوجات فمها) بحال الا نتا فقيه الجامع سكت سكت

يونس: انا ا رانيا ماعمرني ماواعدت شي وحدة بالزواج من الديبار كانكون واضح مع لبنت و هي كاتقبل يعني ماشي كانتفلا عليها كولشي بإرادتها و بليس انا ماعمرني ماحطيتو فشي وحدة بالعربية تاعرابت

رانيا:(طلعات حاجب هبطات لوخر) زعما صابر هاد السنين كولها

يونس: (ضور وجهو) عندي ماندير بليس لاش كاندوي معاك فهادشي سيري من حدايا

رانيا: اوا نسيتك شوية شوف وجهك رجع فيه اللون ديالو بعدا ماتدير خير مايطرا باس

ناضت من حداه و خلاتو جالس فارق رجليه و داير مخدة فحجرو و مدوز يديه فوق الوسادة مرتاح فالجلسة ... رجع راسو لور و غمض عينيه مرتاح نفسيا بعدما شافها و كايشم فريحتها لي لصقات فحوايجو ... تنهد كأن هم و انزاح على كتافو مافارقاتش بالو هاد الأشهر كاملة صابر حتى يشوفها و يشبع منها و لكن باقي ماشبعش منها بالعكس عاد توحشها اكثر و اكتر ... دخلو الرجال جلسو فالصالون بداو الهضرة تاني و تخلطو الأصوات و تعالت الضحكات و لينا غادة جاية فبيتها غادي تطير بالفرحة و الإبتسامة مامفارقاهاش قلبها كاتحس بيه غادي يخرج من بلاصتو و عقلها غادي يتقسم عليها بكاع الأفكار لي فيه ... عاودات قادات وجهها و زادت ليه براونزر و هايلايتر و داير اي شادو فالأسود زاد برز لون عيونها أكثر و أكثر ... سمعات الدقان و تهزات من بلاصتها مشات كاتجري حلات لباب لقاتها السعدية

السعدية: زيدي تتغداي

خرجات لينا مرفوعة كايصحابها غاتغدا معاه حتى كاتصدم و كاتلقا غير العيالات فالصالون الثاني ... ابتاسم مجاملة و دخلات جلسات و تحطات البسطيلة كلات لينا بأدب واخا ماكاينش شي واحد غريب غير امها و خالتها و رانيا و رقية مرات حسن و ختها سمر و بنت خالتها هند ... كملو لبسطيلة و لينا متبتة كاتشوف بالقياس و ترمش بالقياس طالقة زينها حتى قالت

لينا:(بصوت حنين) فينها خالتي راوية !

رانيا:(تنهدات) ماجاتش

لينا: علاش !

رانيا: ماقابلاش على الزواج دارت ليه مسكين العصا فالرويضة

تصدمات لينا و تصلبو ملامحها بحال الى طرشاتها خافت باها يعكس الى عرف بلي ام يونس ماراضياش على الزواج كاع ديك الفرحة تقلبات حزن لاحظت ملامحها خديجة و عتقات الموقف

خديجة: هيهيهي و لكن سي عزيز ماقال والو فاش عرف بلي راوية مابغاتش حيتاش السبب تافه بزاااف قالتلك ا لالة حيتاش نتي ماشي شلحة 100%

رانيا: الحمد لله سي عزيز مارفضش يونس بسباب هادشي مني عرف بلي الى تزوجو ماغاديش تسكن معاها بالعكس غاتبعد و بزااااف كاع

رجعات فيها الروح فاش سمعات هاد الهضرة و بقات غير كاتضور فعينيها تسدات ليها الشهية مابقاتش حاملة كاع تاكل

يتبع