معاناتي مع شبحة الجزء الرابع

بسمة : والو غير ( قبل ما تكملها شافت يديه المجرووحة و هزاتها ) ايييه 😱 مالك اياسر اشوقع ليك ؟! ايمتا تجرحتي ؟! البارح كنتي صحة سلام !!

ياسر ( جر يديه منها ) : ماشي شي حاجة ! دابا لقسمك قبل ميشوفنا شي حد ...

مشا و خلاها مزيرة البكية محملاتش التصرف ديالوو .. طاحت دمعة من عينيها و تبعوها دمووع هما .. بقات تبكي حتى بردات و مشات للقسم قبل ما تدخل سمعاتو قال : تعطلتي !! جيبي ورقة سماح بالدخول ! ( قال هاد  الهدرة بلاما يشوف فيها )

تصدمات و بقات مشوكية بلاصتها .. 😨

ياسر : عندك جوج دقايق تكوني هنا ..

مشات بسمة للحراسة كذبات عليهم و تيقوها حيت عمرها وصلاتهم ملي بدات تقرى .. دخلات للقسم حانية راسها ووجها حمر بالبكا حطات ليه الورقة فوق البيرو مشات بغات تجلس و هو يقاطعها : كنظن ما قلتش ليك جلسي !! و هاد الورقة راك تعطلتي باش جبتيها !!

بسمة طلعات ليها القردة للراس و هي تبدا تغوت : هيييه زدتي فيه !! مالنا ياك لاباس ؟! جاي هاز شوكتك مع الصباح بايت تحلم بيا !!! 😠

قالت هاد الهدرة و خرجات شدات الطوبيس و رجعات لدارهم ..

فالقسم ملي خرجات بسمة كلشي بقا حال فمو خصوصا التلاميذ حيت عارفينها مكتنوضش الدجاجة على بيضها عمرهم شافوهاا هكا .. ياسر خرج لبرا و جلس فواحد العتبة ..

ياسر جلس حابس البكية و مخنوق محملش يشوفها فديك الحالة و لكن صبر راسو حيت مبغاهاش تتعرض للاذى بسبابو .. دخل للقسم من بعد ما برد شوية .. و كل مرة كيهز راسو فبلاصة بسمة لي بقات خاوية دازت عندو الحصة ثقيلة بلا بيها .. ما كمل دوك سوايع غا بزز ...

😢 عند بسوومة😢

وصلات لدارهم و دخلات دازت فماماها و مهدراتش معاها ...دخلات بيتها و شعلات القرآن على الجهد و بدات تبكي تا بردات و ناضت كتجمع فبيتها و تتهدر غا بوحدها : انا يدير ليا هكاا .. هاا انا بسمة بنت العثماني يدير ليا هكا ( بس ماشي رئيس الحكومة🙄 ) البارح الحب و الغرام ودابا قلب عليا وجهوو ..

بقات تتهدر و تغوت بوحدها تا طاحت ديك الورقة لي كان جاب ليها داك الدري الصغير ( عقلتو ياكا ) رماتها فالزبل و بقات تتجمع تاسالات دخلات عليها مها و بدات تتهدر معاها على القرايا و جمعو داك الزبل و داوه بغاو يرميوه للبركاصة ... بقات غادة بسمة و هدرة ياسر تدور فراسها : واخا اسي ياسر !! ياااااااسر 😱😱😱😱

مشات تتجري خطفات السطل من مها و خواتو كامل بدات تتقلب فدوك الورااق و هي تلقاها و حلاتها و قراتها ( الى بقيتي قريبة من ياسر راك قريبة من الموت ) كمشاتها و مشات بالجرى للدار هزات سوارت و الفلووس و خرجات تاني شدات طاكسي لعنوان ياسر ...

وصلات و هبطات بلا عقل دقات عليه بالجهد حل ليها كان لابس سروال بيجامة و عريان من الفووق 🙈

شافتو و قالت مع راسها : حشومة هاد الزين يغوت عليه شي حد .. هزات فيه العين و هي دخل سد  الباب و دخل لقاها تتقلب فالدار ..

ياسر : بسمة اش كديري هنا ؟! علاش كتقلبي ؟!

بسمة : كنقلب على حبيبة القلب فينها تخرج عندي .. هاك شد ( عطاتو الورقة ) شووف لالة ام هاني ديالك اش صيفطات ليا  ... كتهددني المشروطة لووخرا .. 😠

ياسر : اشمن ام هاني ولا ام كلثووم 😠 بسمة مالك ..!!

بسمة : مالي ها ( بدات تبكي ) ملي انت عندك مراتك و عندك حياتك لاش مدخلني ليها لااااش 😭 واش ماشي حشوومة عليك تعطيني اماال على والو 😭😭

ياسر يالاه كان ايعنقها و هو يشووف ديك ختنا هازة واحد الجنوي و واقفة وراا بسمة

ياسر : الى ساليتي هاد الدراما خرجي فحالك دابا و نساي عليك شي حد سميتوو ياااسر ..

بسمة بحال الى سرفقتيهاا بهاد الهدرة شافت فيه اخر شووفة و خرجات لبرا و سد عليها الباب و بقات حدا الباب شحاال تتبكي و مشات ..

اما ياسر بقا كيهرس اي حاجة جات قداامووو ....

عند بسمة وصلات للدار و دخلات للدووش خففات راسها من كثرت التفكير  و مشات صلات و نعسات ...

مع 2:30 ديال الليل كتحلم ياسر كلوو دم و كيغووت بسمة عاونيني 😨 فااقت مفزوعة !!

بسمة : ياسر !! اعووذ بالله مم الشيطان الرجيم .. تكون واقعة ليه شي حاجة !! لا لا هادي غير حلمة

رجعات بغات تنعس و حلف النعاس لا جاها ..

ناضت لبسات عليها مونطو و هزات شكارة و خرجات .. بقات فالشارع شحاال تتسنى طاكسي .. اخيرا وقف ليها واحد وصلها لعند ياسر .. هبطات قبل ما دق عليه جبدات تيليفون عيطات لزياد فيقاتو من النعااس : الوو بسمة !!

بسمة : زيزوو بب محتاجاك ضرووري !!

زياد : ياك لاباس !!

بسمة : انا دابا خارجاا الى عيطات ليك ماما لبق ليها شي كذبة عافاك من بعد و نفهمك

كانت اتكمل الهدرة سمعات شي اصوات داخل الدار و قطعات عليه !!

زياد حط تيليفون و رجع ينعس !! شوية فاق قافز : اووو علاه شحال ساعة ( 2:45 ) اويلي هادي فين خارجا فهاد الوقت 😱😱😱 انا نعاود نصوني ليها ..

بقا كيصوني ليها واالو مكتجاوبش ..

عند بسمة ..بغات تدق ولكن شافت العافية من الشرجم و هي تشهق : هيييه 😱😱 ..

بدات تدق بالجهد : يااااسر ! ياااااسر حل الباب 😨😨

ما جاوبهاش و تتسمع الغوات الداخل شافت فالشانطي بانت ليها واحد الحجرة و مشات هزاتها و هرسات الشرجم و دخلات يديها وسط الزاج حلات الشرجم  و دخلات راسها شوية دخلات كاملة بقات تدوور وسط الدار كلها شاعلة بالعافية بان لبها ياسر ناعس كلو عرقان .. ما كان معاه تا وااحد مشات كتفيقوو فاق مفزووع شاف بسمة قدامو و عنقها : بسمة انت بيخير ؟! ما وقع ليك والو ؟! هاا جاوبني ؟

بسمة : انا لابااس ، نووض يالاه نمشيو !!

ناضو فاتجاه الباب و هما يلقاوه مسورت و مشات باش تحلو و هي طيح واحد الخشبة شاعلة فيها العافية ... ياسر جرها عندوو بالخف و مشاو فاتجاه بيتو دخلو و سد الباب دغيااا و مشا كيقلب على تيليفونو ملقاهش و جبد القرآن و بدا كيقرى بالجهد و يغوت على حر جهدوو و بسمة ما فاهمة والو ... شوية داك الغوات لي كان تيتسمع مبقاش ... و هو يسكت ..مشا عند بسمة جرها من يديها و خرجها للصالوون لي غير شافتوو بسمة حلات فمها هلى قدو 😱😱😱 : ياك يالاه كانت العافية !! فين مشات 😨 ياسر شرح ليا اش واقع هناا ...

ياسر : انت اش جابك هناا علاش جيتي ياك قلت ليك بعدي مني

بسمة بدات تبكي : 😢 تخلعت عليك حسيت بلي انت محتاج ليا 😭😭

شد ليها وجها بيديه و قال ليها : ما بغيتكش تآذااي بسبابي ابسمة .. قيمتك عندي كبيرة و الى وقعات ليك شي حاجة غادي نحمااق و عمرني نسامح راسي ..

بسمة : ما عند ما يوقع ليا حدك انت معاياا 😢

ياسر بدا كيغوت : لاااا راكي غالطة مدام انا معاك حياتك اتكوون فخطر .. خاصك تخرجي ابسمة اللهم الدقة تجي فيا و لا تجي فيك ..

شاف بسمة غادة جهة الباب و هو يرتاح شوية سداتو و رجعات عندووو و شدات يديه : ...

شدات ليه يديه و قالت : انا ما عارفاش اش واقع هنا بالضبط .. و لكن متأكدة بلي انت محتاج ليا و مدام احساسي كيقول ليا هكاا عمرني نخليك سمعتي !!

ياسر جرها عندو و عنقها : علااااش اسيدي ربي كيوقع ليا هكاا 😭😭 علاش ما مكتابش ليا نبغي هاد الانسانة فظرووف حسن علااش

شوية سمعو صووت التصفااق داروو بجوج و بانت ليهم هاديك ختناا واقفة تتصفق و عريانة كما العادة 😳 شافتها بسمة و هي تزير على يد ياسر و حتى هوو زاد قرب بسمة ليه ... حتى نطقات .

...: جيتي للمووت برجليك .. سبق ليا حذرتك و ما بغيتيش تبعدي عليه .. و دابا عيشوو اخر لحظة بجوج 😈

ياسر بدا كيقرى القرآن بالزربة و هاديك تتخنق ...

مشا هو و بسمةللبيت و سدو عليهم و بدا كيقرى القرآن تاني .. بسمة فهمات اش واقع نسبياا .. و هي تهدر : ياسر شووف خاصك تقول ليا اش واقع باش نقدر نعاونك ..

ياسر : ما عندناش الوقت لي نعاود ليك فيه كلشي ... و لكن شوفي فيا كثيقي فيا ياك ( حركات راسها ب اه ) تكالمااي و خاصك تفهمي بلي هادي لي كنتعاملوو معاها ما كايناش فالواقع .. يعني ماتت ..

بسمة تفرشخاات بالضحك 😂: ههههه دابا شنو هاديك شبح عووووو بحال داكشي د افلام الرعب 😂😂

ياسر عرفها تصدمات بقا كيشوف فيها تضحك بهستيرية ..

بقا كيشووف فيها و معرفش كيفاش يوصل ليها الهدرة شد وجها و هي تسكت و بقات تتشوف فيه : بسمة سمعي انا متنضحكش راه بصح هاديك ميتة و حنا راه تنشوفو الشبح ديالها ..

بعدات منو و هي تعاود تفرکع بالضحك 😂😂 : عوووو انا شبح عووو 👻 هههههههه

ياسر معرف ما يدير و هو يصرفقها 😳 سكتات و هي طيح دمعة من عينيهاا 😢 حط جبهتو على جبهتها و قال ليها : ثيقي فيا غادي يكون كلشي مزيان عافاك ابسمة

بسمة : حياتي كاملة كنخااف من هادشي و معمري تشجعت نواجه المخاوف ديالي .. ( شدات فيديه ) و لكن دابا انواجهم على قبلي و على قبلك .. ( شدات وحهو بيديها ) ما غاديش نخليك بووحدك واخا ..

ناضت كتمشي و تجي فالبيت و هي تنقز : لقيتها !! لقيتها 😍

هزات تيليفون من شكارتها و دوزات نمرة ديال زياد هادشي تحت انظار ياسر لي مفهمش اش بغات دير .. شد ليها الخط : الو زياد كتسمعني ...

زياد: بسمة فينك ؟! واش حماقيتي خارجاا فهاد الوقت من الدار !!

بسمة : ماشي وقت المعاتبة دابا انا محتاجاك تعاوني ..

زياد : واخا ولكن فااش .. !!

بسمة : غادي تجيب البيفان ديالك و شي سيدي ديال القرآن انا محتاجة بيهم .. غادي نصيفط ليك العنوان دابا فميساج ..

قطعات مع زياد و صيفطات ليه اللوكيشن 📍 ديالهم .. و مشات عند ياسر تشرح ليه الخطة

بسمة : ياسر سمعني زياد غادي يجي هنا خاص واحد فينا يخرج عندو يحل ليه الباب باش يركب الضوو للبيفان و من تما غادي خصنا نحضروو هاديك الموصيبة باش يقضي عليها القرآن .. فهمتي !!

ياسر : و لكن باش عرفتي بلي القرآن كافي باش نتغلبوو عليها ..

بسمة : واش مكتشوفش فاش تتبدا تقرى القرآن كتخنق و تتبقا تبعد .. حنا غادي نجربو و نخليوها فيد الله ...

بقاو شوية حتى وصلها مساج من عند زياد 📩 ( انا قدام الدار دابا ) ...

بسمة : زياد وصل خاصني نخرج ..

ياسر : حماقيتي لا ؟ انا لي غادي نخرج و انت وياااااك ثم وياااك تخرجي من هاد البيت !! واعديني.

بسمة بقات تتضور فعينيها : ا اكنواعدك 😁

قبل ليها ياسر راسها و خرج دغيا وسد عليها الباب ...

بقا شحاال تقريبا شي نص ساعة .. بسمة مقدراتش تصبر .. بقات غادة جاية فالبيت و كلها تترعد و مشات جهة الباب ما سمعات تا حس بحال الى غير هي لي كاينة فالدار ..تخلعات و بقات تدق فالباب و تعيط : ياسر .. يااااسر واش كتسمعني ؟! ياسر ..

ما جاوبهاش و بقات تتخمم تا طاحت عبنها على واحد المووس مشات هزاتوو و بقات مدابزة مع الباب تا حلاتوو .. خرجات و يا ريتها ما خرجات كااان برااا عالم اخر غير الببت لي كانت فيه ... غواات ياسر مسمووع بالحهد و العافية عاودات شعلات .. و صووت واحد الضحكة شريرة كيتعاود ...

بقات غادة جهة الصالوون تا شافت ياسر معلق فالسماا بحال الى شي حد شادوو من عنقوو  و كيغوت الرووح قربات تخرج ليه .. يالاه كانت اتمشي جهتو تا تشرط ليها لحمها معرفاتش مناش و لكن ما استسلماتش كملات و كل خطوة تتزيد كيزيدو الضرابي تا ولات كلها مشرطة .. مقدراتش تصبر و هي تهرب جهة البيت هزات تيليفون دارت فيه القرآن و بقات غادة تا وصلا الشرجم و عيطاات بالحهد زيااااااد 🔊🔊 زياد سمع الغوات و ناض تالف بانت ليه فالشرجم كلها دمايات تخلع فالاول و لكن نااض

زياد : بسمة مالك بسمة 😨

بسمة : البرييييييز ، البرييييز

عطاها البريز و دخلات و هي فحال الى كيقطروو عليها الشمع رجعات كلها مشووهة 😟 دارت البريييز فالضوو و خدموو البيفااان بالجهد 🔊 سورة البقرة ..

طاح ياسر للارض و سخف بسمة بقات تتشوف اش غادي يوقع شوية سمعات صرخة قوية : لااااااااااا

تهرس كااع الزااج ديال الداار و العافية طفاات و تشقق السقف و خرج منوو واحد الشعاع مجهد ⚡⚡  و هو يتسد الشق و رجعات الدار لطبيعتها 😳

مشات بسمة تتزحف لعند ياسر كتقيص النبض ديالوو لقاتو مزال عايش مشات كتزحف للباب عيطات على زياد لي دخل غير شافها بقا حال فموو فيهاا

بسمة : ماشي وقت الصدمات دابا 😢 ( كتغوت ) زياااد توگض معايا خاصنا نديوه للسبيطار ( شافت فيه مزال مصدوم و هي طرشوو ) زياااد فيق معايا راني محتاجة ليك ( الاصدقاء ديال بصح بحاال المشعكك😍) توگض زياد و هز ياسر على كتافو و داه جهة طوموبيل و مشاو بيه للسبيطار طريق كاملة و بسمة تتبكي و تتغوت على زياد لي مبغاش يسكت من الاسئلة ...

يتبع