صفقة زواج من متعجرف الجزء 21

الطبيب: اش غادي نقوليكم 

الكل: 😨😨

ياسين: هضر ا دكتور متخلعناش 

الطبيب: ..............

ياسين غمض عينيه و سالت دمعة حارة على خدوا كاع الأحاسيس دازو عليه حاس باعصار في الداخل ديالو باغي يغوت و لكن صوتو مكيطلعش باغي يهرس و يدكدك و لكن حاس براسو مكتف الباتول طاحت الأرض كتبكي و كتردد " بنتي لا بنتي 😭" ايمن عينيه عمرو بالدموع و شد في راسو غير بزز و كيردد " ختي مديريهاش عافاك انا مصدقتش لقيتك "سوما كتقوي راسها و مقدراتش حتى نهارت حتى هي بالبكاء 😢 لمياء الصدمة من جديد معرفات متقول غير كتدور في عينيها أما حنان غير سمعت هضرة الطبيب متحملاتش طاحت سخفانة بين ايدين مروان 

#بعد_مرور_6_اشهر

ست اشهر دازت على العائلة طراو فيها بزاف ديال الحوايج منهم فوزية لي تسطات و دخلوها لمشفى المجانين و احلام لي سافرت و قررات تبدى حياتها من جديد تقرى و تخدم تما تسامحت معاهم و مشات تشوف طريقها بطبيعة الحال بمساعدة عمها 

و موسيو العلوي لي رجع لشركتو باش يشد الخدمة لي بقات في نص الطريق و حتى واحد ممسوق ليها و صوفيا لي تكلف بيها فؤاد و لفق ليها تهمة مساعدة مسجون على الفرار و غرقها في الحبس 

و مروان لي ديما مضارب مع حنان باش تديها في صحتها و في داكشي لي هازا في كرشها لأنها هملاتو و سوما لي ديما مع الباتول كتحاول تخفف عليها و تخرجها من الصدمة لي هي فيها و ايمن لي لقى صعوبة في الاول باش يخرج لمياء من صدمتها رغم أنه حتى هو كان محتاج لي يوقف معاه و راوية " اخت ياسين إلى عقلتو عليها " لي جات و بدات القرايا في كازا و خوها سكنها معاهم و دابا راها كتدير ستاج في المشفى 

اخيرا المتعجرف ديالنا بطلنا لي ولى معصب غير مع دبان وجهو و رجع للبوكس يفرغ فيه و سد على راسو تاني عايش غير بدكراياتهم 😢😢 (فينك ا زينب ترجعيه لينا كيفما كان)

عند سوما 

فاقت و مشات نيشان لبيت الباتول فيقاتها 

سوما: نوضي راه خاصنا نمشيو 

الباتول: شحال في الساعة 

سوما: 10 هادي

الباتول: أو تعطلنا زيدي زيدي 

ناضو بدلات الباتول حوايجها و هزو شي حوايج و سيكانهم و خرجو كيجريو 

عند لمياء لي جالسة في الاتوليي ديالها حتى دخل عليها ايمن(بس: لمياء دارت اتوليي تخدم فيه في الدار ديال الغابة باش تبقى قريبة من ايمن) 

ايمن: حبيبتي 

لمياء سمعات صوتو ابتاسمت: حبيبي 

ايمن: احححح ولات كتخرج بالزربة عقلتي شحال شحفتيني باش قلتيها 

لمياء سرحات في خيالها و كتفكر 

#فلاش_باك 

لمياء رجعات دخلات في صدمة و مهضراتش شهر و ايمن كيحاول معاها باش تهضر و هي والو حتال واحد النهار كان ايمن داخل منهار و حتى هو جامع بزاف في قلبو 

ايمن: حبيبة عافاك هضري معايا محتاجك محتاج شي واحد لي نخوي عليه قلبي

لمياء : الصمت 

ايمن: عافاك حسي بيا راها مساهلاش عليا حتى انا 

لمياء: الصمت 

ايمن تعصب و ناض كيغوت و يهرس : حتال امتى حتال امتى راه حتى انا مقادرش كلشي مجموع عليا و كنخبي كنكتم في قلبي خبيت ضعفي من نهار عرفت عائلتي تخلات عليا نهار تزاديتي و شديتك و ربيتك واعدت نفسي نكون و نعم الأخ حتال نهار خاني قلبي و بغاك خبيت هربت حيت خفت نخون تقة عائلتك خفت نتلقى الرفض بسباب أنني ممعروفش شكون انا ولى منين جاي حتال نهار عرفت قصة عائلتي و لقيت لي من لحمي و دمي و........... 😭😭 علااااااش علااااااش 

بقى كيضرب و يهرس حتى تجرح ناضت لمياء كتجري عندو و عينيها شلال ديال الدموع عنقاتو بالجهد و همسات ليه في وذنو 

لمياء: صافي سمح ليا 😭😭

نزل عليه صوتها بحال الماء بارد طفى العافية لي كانت شاعلة فيه شدها حتى هو و عنقها بكل قوتو حتى كان غادي يفلعصها تفكات منو و قالت 

لمياء: اجي نعقم ليك الجرح 

ايمن ابتسم وسط دموعو: يخليلي الممرضة ديالي 

مشات خدات علبة الإسعافات الأولية و بدات كتداوي ليه في الجرح و مركزة حتى خرجها من تركيزها بكلامو 

ايمن: كنبغيك ا حبيبتي بغيت نسمعها منك 

لمياء تقلبات معدتها و قلبها كيضرب في 120 و ايديها ولات كترعد و تزنكات و معرفات متقول ولات غير كتدخل و تخرج في الهضرة: اا اه لا ماشي هي لا هاديك اشنو كيفاش عاود 

ايمن: ششششششش شششش هادي غير كلمة طيرات ليك الفريخ 

قرب ليها حتى ولات انفاسو كتضرب في وجهها و قال

ايمن: اوا إلى درنا شي حاجة اخرى اش يجرى 

لمياء بكترة الصدمة و كلشي تجمع عليها مبقاتش قادرة حتى سخفات ليه في ايديه ضحك عليها ايمن حتى شبع و ناض هزها لفراشها و تخشى حداها 

فاق الصباح على ايدين كيلعبو ليه في وجهو 

ايمن: صباح الحب 

لمياء: صباح الخير 

ايمن حابس الضحكة: حبيبة مالك البارح 

لمياء ضرباتو و مشات الحمام غسلات حالتها و خرجات مشات للكوزينة عاد ناض هو كيضحك و حالف حتى يسمع من فمها كلمة كنبغيك نزل دخل الكوزينة لقاها كتصاوب في الفطور 

ايمن: اممم الحداكة 

لمياء: اجي تفطر 

ايمن: مبغيتش هاد الفطور 

لمياء: و اش بغيتي 

ايمن: داكشي لي قلت البارح 

لمياء فهماتو و جلسات كتدور في عينيها 

ايمن: كنتسنى 

لمياء: الصمت 

ايمن: صافي سمحي ليا واقيلا فهمت غلط ديري راسك مسمعتي والو مني 

دار راسو تقلق و تم خارج للجردة 

لمياء خرجات عينيها و عيطات ليه : ايمن

مجوبهاش و كمل طريقو و خرج للجردة مشات كتجري تبعاتو و غوتات غوتا وحدة تسمعات في الغابة كلها 

لمياء: و كنبغيييييييييييييك كنحمااااااااق عليك 

هو سمعها حبس و ضحك ضحكة انتصار و دار فتح ليها دراعو حتى طارت تخشات في حضنو 

🔙 ههههههه 

لمياء ضرباتو لصدرو و كتضحك: تفليتي عليا 

ايمن: اوا كون مدرتش هكدا منسمعهاش و دابا نوضي وجدي راسك خاصنا نمشيو 

لمياء: وايلي على شحال في الساعة 

ايمن: غتكون شي 11 

لمياء: اوكي هانا 5 دقايق و انا معاك 

ايمن: اياه عارف خمسة دقايق ديالك

عند حنان لي ولات كرشها لفمها و مقاتلة معاها باقا ناعسة كتشخر حتى دخل مروان فيقها 

مروان: الدب النائم فيقي 

حنان: امنننن مممم 

مروان: نوضي ا حبيبتي نوضي نتي راه ولى خاصك تراكس يهزك 

حنان مقلوبة بالنعاس و داوية: بزاف عليك على شكون دار ليا هاد الحالة 😏

مروان: ااااححح غير تولدي و ندير لحبيبتي كرش أخرى كتباني كتحمقي و نتي منفوخة 

حنان: بعد مني هادي و التوبة بغيت تولد هزهم نتا 

مروان: ههه نوضي يالهبيلة راه خاصنا نمشيو 

حنان: واخا هانا نايضة عيطتي على امين وصل 

مروان: اه راه وصل 

في المشفى عند راوية 

راوية: اووف عييت 

الشخص من وراها: يالاه بديتي و عييتي دكاترة آخر الزمان 

راوية: و شكون نتا لي كتدوي معايا بهاد الأسلوب سوقك 

الشخص: احتارمي راسك و عرفي معامن كتهضري 

راوية: حتى تحتارم راسك نتا بفففف بنادم مكيدخلش سوق راسو 

تمات غادية و هو يجرها من ايديها و تفكات بسهولة من ايديه و بحركة بسيطة دارت ايديها على عنقو كتهديد و لكن حتى هو مكانش ساهل و بسرعة حيد ايديها و كالاها مع الحيط بكتفو و هز البادج لي معلق في عنقها 

الشخص: اممممم راوية بنصابر ميتخافش عليك حركاتك سريعة و لكن هاد المرة ولي تشوفي الخصم ديالك واش قادرة تغلبيه ولى لا عقلي عليا و غادي نعرفك شكون انا 

مشى و خلاها كتنهج و مغددة و حلات واحد الغرفة و دخلات ليها كتسوط 

في نفس المشفى داخل بطولتو و بتخنزيرتو المعهودة لي تعودوا عليها ست شهور هادي بشعرو مخربق و اللحية لي زادت عمرت و قامتو لي متبدلاتش من غير العضلات لي زادو قصاحو و بانو دخل و داز على الممرضات لي ولاو عارفينو و دخل للغرفة دور وجهو لقى الكل مجموع موسيو العلوي سوما الباتول لمياء ايمن حنان مروان علي مريم امين كريمة و حتى راوية عاد وصل البلاصة لي فيها محبوبتو ملاكو لي هادي 6 أشهر و هي في نفس الوضع ناعسة مكتهدر مكتكلم غير ناعسة مني قال ليهم الطبيب راها دخلات في غيبوبة و معارفينش امتى تفيق محبوبتو لي من نهار خرجت من العملية و هو حدا راسها تحول للمشفى ولى هو دارو ساكن فيه الكل كيعرفو بقى معاها ست اشهر بالتمام و الكمال عمرو مل و لا كل و دايما عندو امل انها غتفيق كيهضر معاها يوميا و كيعاود ليها اي حاجة طرات في يومو على أساس أنها كتسمعو محبوبتو لي الكل جا شافها و هضر معاها حتى من مو جات من طنجة شافتها و تسامحت مع باه و رجعات و اليوم قرروا يتجمعوا كاملين حيت الطبيب خبرهم انه كاين استجابة للعلاج و يمكن إلى سمعات أصوات كاع لي كتعرف تفيق 

قرب حداها و شد ايديها و قربها لشفايفو و باسها حتى حس بيها كتحرك ووجهها كتبان عليه حركات الكل نطف قلبو و ياسين اكتر واحد يالاه باغي يطلق من ايديها و ينوض باش يعيط للطبيب و هي تفيق قافزة و مخرجة عينيها

زينب : هاااااء 😳😳 التخرج 

دورات عويناتها و عاودات دوراتهم كتحس بجسمها ممطاوعهاش باغية تنوض و مقاداش محسات غير بايدين محاوطينها و مدخلينها لواحد الصدر دافئ بعدات شويا و نطقات الكلمة لي صدماتو 

😨😨😨😨

زينب: شكون نتا 

ياسين على اتر هاد الكلمة بعد عليها ووقف حال فمو ممتيقش اش سمع:😳😳

هي دورات وجهها بان ليها علي و قالت 

زينب: علي تعطلنا ياك 

علي :على اش 

زينب: مالك ا صاحبي على التخرج 

علي حل فمو و في خاطرو " راه حنا تخرجنا هادي عام" 

في حين زينب دورات وجهها تاني بانت ليها سوما و قالت 

زينب: اووه سوما اش كتديري هنا ياكما الباتول خافتني منمشيش ناخد الكرطونة و نتصور بالطربوش 

سوما غير كتشوف بحال الكل معارفينش باش يجاوبوها 

دورات عينيها تاني و شافت موسيو العلوي واحد البريق خرج من عينيها حيت كتحتارمو و كتعتابرو قدوة ليها جرات علي لعند وذنيها

زينب: اجي لهنا اشنو كيدير موسيو العلوي هنا 

علي : جا يشوفك 

زينب حلات عينيها على جهدهم: يشوفني انا 😳😳 

هزات عينيها و شهقاات 

زينب: هاااااااء حناااااااان اش داكشي في كرشك المسخوطة يالاه خليتك البارح صحة سلام 

حنان: تي اش كتخربقي اشمن البارح 

راوية: حنان بلاتي نمشي نعيط على الطبيب حالتها ماشي عادية يا رب ميكونش داكشي لي كنفكر فيه 

خرجات باش تعيط على الطبيب لي متابع حالة زينب و لكن للأسف ملقاتوش مشات سولات الممرضة 

راوية: نرجس بروفيسور عوماري مكاينش 

نرجس : لا واخد كونجي 

راوية: كيفاش 

نرجس: مالك ياك لاباس 

راوية: المريضة ديالو فاقت 

نرجس: اواه ديال الغيبوبة الحمد لله ربي كبير 

راوية: وي الحمد لله 

نرجس: راه حول كاع المرضى ديالو للتيتيز لي جا اليوم 

راوية: التيتيز 

نرجس : اه الدكتور أسد الأزرق 

راوية: و هدا فين نلقاه 

نرجس: البيرو الآخر على اليمين 

راوية: ميرسي 

مشات في اتجاه الغرفة دقات عطاه الاذن بالدخول دخلات و هي تحل فمها 😳😳😳😳كان نفس الشخص لي تلاقات معاه قبل و ضاربات معاه شافها حالة عينيها و دار ابتسامة جانبية

اسد: اهلا القبيحة 

راوية عاد توكدات: بروفيسور الأزرق المريضة ديال الغرفة 1088 فاقت من الغيبوبة 

أسد: فحصتيها 

راوية معرفات متقول حيت مدارتش خدمتها: الصراحة لا 

أسد: ههه و كتقولي قبيلة عييتي باش بالسلامة 

راوية: الصراحة المريضة كتخصني مرت خويا و مني شفتها فاقت بالصدمة خرجت نقلب على بروفيسور عوماري 

أسد: اوكي يالاه نشوفو حالتها 

توجهوا للغرفة لقاو زينب شادة في راسها و كتغوت حيت عرفات راسها في المشفى 

دخلو خرجو الكل و بقى أسد و راوية و جوج ممرضات فحصها و هضر معاها و عطاها مهدئ و خرج عند العائلة

الكل تجمع عليه 

الباتول: مالها ا دكتور 

أسد: خاصنا نديرو (ct scane) طبقي محوري باش نقطعو الشك 

ياسين: و فاش شاك ا دكتور 

اسد: فقدان الذاكرة 

سوما: ولكن راها تعرفات علينا 

أسد: يقدر يكون جزءي 

دار عند راوية 

أسد: طلبي منهم يوجدو بلاصة الراديو و ديو المريضة تما هانا جاي 

راوية: اوكي دكتور 

مشات و خلات العائلة كلها حالة فمها خرجو زينب و مشاو دارو ليها الفحوصات اللازمة و رجعوها جا أسد باش يخبرهوم نتائج الفحوصات 

أسد: كيفما كنت متوقع فقدان داكرة جزئي غير هو معرفتش الفترة 

ياسين: من نهار التخرج 

أسد: شحال هدا باش تخرجات 

علي : شي عام و الزيادة 

اسد: و في هاد العام طرات ليها شي حاجة لي صدمتها 

ياسين زير على ايديو حيت تفكر اش وقع ليها نقز ايمن 

ايمن: اه طراو حاجات 

أسد: إذن عقلها كيحاول ينساهم 

لمياء: هي مغتبقاش عاقلة علينا 

اسد : اي واحد تعرفات عليه من ورى التخرج اكيد مغتبقاش عاقلة عليه 

الباتول: و هاد الداكرة ا دكتور متقدرش ترجع

أسد: على حسب رغبة المريضة المهم هو متضغطوش عليها و ممكن تعاودو ليها بشويا بشويا باش متنهارش عوتاني 

موسيو العلوي: و بالنسبة لصحتها ا دكتور 

أسد: الحمد لله معندها حتى مشكل تعافات بالكامل غير خصها حصص ترويض باش تولي تمشي حيت 6 أشهر و هي ناعسة و بما أن الآنسة(شير لرواية ) فهي تهتم بيها 

ياسين: اوكي شكرا دكتور 

مشى أسد و هما دخلو عند زينب لقاوها مغمضة عويناتها قرب منها ياسين و بعد الشعر من على وجهها و باسها في راسو و قال 

ياسين: دابا انا حبيبتي معاقلاش عليا 

حلات عينيها فيه نيشان جات عينيها في عينيه و ريحتو هزاتها لعالم آخر بدأت كترعد و قلبها بدى يزدح هي معرفاتش اش هادشي فسراتو على أنه خوف منو و غوتات 

زينب: بعد مني ماما 😢

ياسين شافها جامعة البكية و خايفة بعد عليها قربات ليها الباتول و جراتها هضرات في وذنيها 

زينب: شكون هدا لي كيبوسني قدام كلشي و نتي عاجبك الحال ساكتة 

الباتول: لا رااه 

زينب قاطعتها :نتي راه خرجو رجليك الشوالي فين هو العربي نقولها ليه 

الباتول تصدمت و معرفت متقول ليها و الدموع تجمعوا في عينيها 

زينب: امالك مقلتيش ليا شكون هادا 

الباتول: راجلك 

زينب شرعات عينيها و فمها و شعرها وقف و تفركعات بالضحك: هههههههههههههههه وااااع الباتول شحال عزيز عليك التقشاب 

شافتهم مكيضحكوش عرفاتها بصح و هي تخرج عينيها 

زينب:😨😨😨😨 كيفاش

زينب: دابا انا زينب المضربة على الزواج تزوجت و من من واحد باينة في وجهو متعجرف ا لا لا قولو ليا غير كدبة أبريل هادي 

ياسين تبسم بمجرد مسمع كلمة متعجرف عارف انه الداكرة مشات و لكن القلب حاضر 

زينب شافتو كيضحك: امالك كتضحك لاقي بزطام كي درتي ليها حتى تزوجتيني اكيد هزيتي عليا شي فردي حتى سنيت 

امين: خرجو عليك الأفلام ا بنيتي 

زينب شافتو ضحكات: حبيبي 

قرب حداها عنقاتو 

امين: الحمد لله على سلامتك باش كتحسي 

زينب: كنحس بعضامي كاع مدكدكين و رجلي منملين أما راسي كيعطيني واحد الحريق 

ياسين تخلع قرب بلى ميشعر: كيفاش؟! اش كيضرك؟! واش نعيط للطبيب؟!

زينب كتشوف فيه و محاملاهش: و غير إلى بعدتي مني غنولي مزيان 

ياسين تعصب: زينب 😡 

زينب: اشنو مالي كدبت انا مكنعرفكش و نتا جيتي السلام عليكم انا راجلك اش بغيتيني ندير ليك 

ياسين: الهضرة ماشي دابا حتى تبراي 

قرب ليه ايمن و جرو 

ايمن: صافي أ صاحبي عندها الصح السيدة راها فاقدة الداكرة و نتا درتي ليها سلم عليه زرب عليه 

زينب سمعاتو: شفتي لي كيفهم 

طلعات عينيها في ايمن و ابتسمت و قالت ليه 

زينب: شكرا 

ايمن قرب حداها و شد ايديها: العفو 

زينب: يااي نتا زوين و ضريف ماشي بحال شي وحدين😏 اشنو سميتك 

ايمن: سميتي ايمن 

لمياء: و انا متبغيش تعرفي سميتي 

قربات ليها و شافتها زينب و قالت بفرح 

زينب: اه بغيت 

لمياء: احححح ا صحايبتي شحال توحشتك و توحشت زبايلك 

زينب: وايلي كنت كندير فيكم الزبايل 

مروان: كنتي مخرجاها منا حتى في نهار عرسي 

زينب شافت فيه و قالت: و نتا شكون 

مروان: انا صديقك مروان و راجل هاد مو كرش 

زينب ضحكات : ههههه وليتي بحال البالون لي كيديرو بيه الرياضة 

حنان خنزرات: بزاف عليك أ موكا 

امين: بديتو تاني 

كريمة: حبيبتي الحمد لله على سلامتك 

زينب: كاري 😍 الله يسلمك 

موسيو العلوي: الحمد لله على سلامة بنتي 

زينب كتشوف فيه و بنفس البريق ديال الاحترام لي في عينيها و هاد المرة بتساؤل و كتقول في خاطرها " كيفاش كيقوليا بنتي" 

ياسين قرى التعابير ديال وجهها : هادا الوليد يعني بابات راجلك 

زينب خنزرات فيه على كلمة راجلك و دارت عند موسيو العلوي 

زينب: متشرفين ا موسيو العلوي 

ضحك و قال 

موسيو العلوي: اوا مصدقت امتى حيدتها منك رجعتيها تاني عيطي ليا عمي 

زينب: اوكي عمي 

دورات وجهها تاني على لي مكتعرفوش بانت ليها راوية و قالت 

زينب: و نتي اشنو سميتك 

راوية شافت فيها: راوية و انا خت هاد السيد(شيرات لياسين ) 

ياسين: و انا مبغيتيش تعرفي سميتي 

زينب بتقة: عارفاها 

ياسين: اشنو يالاه 

زينب: حبيبي المتعجرف 

ياسين: 😨😨😨😨😳😳😳😳

الكل تصدم و خرجو عينيهم أما واحد ياسين فكان غادي يطير بالفرحة و ممتيقش اش سمع وهي شرعات فمها بالدهشة ديال هادشي لي خرج من فمها و كيفاش قالت حبيبي لواحد مكتعرفوش و قالت 

زينب: هاااااء انا اش قلت 

ياسين مبتسم: شوفي نتي دابا اشنو كتفلاي علينا 

زينب خنزرات فيه: بعد مني انا اصلا معرفتش اش قلت و لاش قلتها 

ياسين: كيفاش هادشي مفهمت والو راوية واش تفكرت 

راوية: لا ولكن داكشي لي تعود عليه لسانها كيخرج ليها بلى متحس 

قربات منها الباتول و قالت 

الباتول: الله ابنتي و شحال توحشتك 

زينب: يخليك ليا فين بابا خدام 

الباتول غرغرو عينيها: بنتي راك مبقيتيش عاقلة على عام كامل داز من حياتك 

زينب: اه عرفت قالها ليا الطبيب و هاديك الزوينة لي سميتها راوية 

الباتول: اوا في هاد العام طراو بزاف ديال الحوايج 

زينب قاطعتها: غير متقوليش ليا الزواج راه مداخل ليا من هنا ما خارج ليا من لهيه 

ياسين: و علاش ياك لاباس 

زينب: حيت باينة وحدة في جوج يا تزوجتيني تحت التهديد و لا مكنتش في كامل قوايا العقلية 😏 

ياسين: اوا باز شحال فيك نتي هي كيم كاردشيان نهددك

زينب: انا حسن منها المتعجرف 😡 اصلا معرفتش علاش كنهضر مع واحد بحالك 

ياسين باغي يجبدها و صافي باغي يطول معاها في الهضرة توحش تبرهيشها صوتها زبايلها كلشي : كي جيتك 

زينب: كي زيت بالفرونسي 😡😡

ايمن شافها تعصبات و نفخات قنانفها: امالك نتا مع ختي

زينب كتهضر مع امين: اشتي ا راس الطنك لقينا الخير في البراني صافي انا من اليوم هاد البوكوص هو خويا 

امين: صافي دغيا بعتيني 

زينب: تستاهل 😛 و من الصباح و انا كنسول فين بابا 

الباتول: بنتي باك الله يرحمو 

زينب غرغرو عينيها و حسات بالدوخة و طاحت عيطات راوية للطبيب و جا فحصها و دق ليها ابرة قال ليهم يحاولو ميقولوش ليها شي حاجة لي تصدمها أو تقلقها و مشا من بعد ما عيط على راوية تبعو و فعلا خرجات تبعاتو بقاو العائلة شويا مع زينب لي كانت ناعسة اتر المهدئ لي عطاوها طمأنو عليها و مشاو الكل بقى غير ياسين مقابلها رغم أنها معاقلاش عليه رغم أنها متيقاتوش مني قالو ليها انه راجلها و رغم أنها متقبلاتوش و غير مغوبشة فيه الا انه طاير من الفرحة حيت فاقت و حيت شاف عويناتها و حيت سمع صوتها و حيت ضاربت معاه و تعصبت عليه حس بقلبو يالاه رجع للحياة 6 أشهر و هو مكينبضش كيفما كينبض قدامها و قدام صوتها و عويناتها بقى كيلعب ليها بشعرها و يدوز ايدو على خدودها حتى حس بيها كتحرك بالزربة و كتدور راسها يمين يسار و كتمتم ب " بابا لا بابا لااا لاا" 

ياسين: حبيبتي فيقي غير حلم فيقي 

ناضت طافجة و تخشات في حضنو

بقات مخشية في حضنو كتبكي و تنخصص و معنقاه بايديها بجوج معارفاش اصلا شكون لي خاشيها في حضنو إلا أنها حاسة بالأمان و انه حضن متعودة عليه بقاو هاكداك في حضن بعضياتهم و هو كيدوز ايدو على راسها و كيهديها و حاس بقلبو باغي يخرج من بلاصتو بسبب بكاها حس بيها ترخات في حضنو عرفها نعسات قادها في بلاصتها بغى ينوض و لكن هي مخشية فيه و شادة في تريكوه شاف ايديداتها تبسم و قادها و تخشى حداها واخدها في حضنو و استسلم حتى هو للنعاس لي 6 أشهر هادي ماداقو 

أصبحنا وأصبح الملك لله 

فاقت زينب كتحس براسها مكتفة هزات راسها بان ليها ياسين معنقها و ناعس بدا عوتاني قلبها كيضرب و ايديها تحرك لا اراديا لوجهو و لشعرو و لكن سرعان ما خطفتها و توكدات و قالت 

زينب: انا اش كندير 😏 و هدا اش كيدير ناعس حدايا 😡 

دفعاتو من كتفو و بدات تفيق فيه 

زينب: اسي نوض نوض اش منعسك حدايا 

ياسين كيحل عينيه بتتاقل: مالكي اش واقع 

زينب: وا نوض باشمن حق ناعس حدايا و مكتفني هاكدا 

ياسين: اولا حيت راجلك و تانيا البارح فالليل نتي لي بقيتي تقولي ليا نعس حدايا 

زينب: كداب 😡😡

ياسين كيبتسم كيعجبو يعصبها ناض من حداها كيتكسل: ااااه شحال منعست بحال هاد النعسة 

زينب: كنس كي داير آخر مرة تقرب ليا و لا تنعس حدايا 

ياسين: منواعدكش ا حبيبتي 

زينب: اوووووووووف

ياسين بلا ما يحس : اش قلنا على التأفئيف

زينب حتى هي بدون شعور دارت ايديها على فمها: اووبس نسيت 

شويا خرجات عينيها 😳😳 

زينب: كيفاش نسيت و علاش نتا كتخلعني 

ياسين: هههه حمقة 

زينب: منسمحش ليك 

بعدات الغطا و بغات تنوض ساعة كانت غتجي على فمها كون مشقمها ياسين 

ياسين: مالك تطرطاي جلسي الأرض راك متقدريش تتحركي 

زينب غرغرو عينيها: 😢 دابا انا غنبقى ديما هكدا 

ياسين قرب ليها و شد خدودها بين ايديه و مسح بصبعو الدمعة لي خرجات من عينيها: لا غير سيمانة ديال الترويض و غتولي مزيان راه مساهلاش 6 أشهر و نتي ناعسة خمرتي هههه 

زينب ساهية في ضحكتو و في هضرتو و الطريقة باش شاد ليها خدودها و الفراشات كيلعبو في كرشها و قلبها نايضة فيه الدقة المراكشية مهضراتش حتى فيقتها واحد الضربة صغيرة على نيفها 

ياسين: فين مشيت قلت ليك لاش كنتي باغية تنوضي 

زينب: بغيت نمشي نغسل وجهي 

ياسين: اوكي انا ندي بوكاهونتاستي 

زينب ابتاسمات لهاد الاسم حساتو كيخصها و هو هزها و مشى بيها للحمام جلسها على لافابو و تخشى وسط رجيلاتها و طلق الماء كيغسل ليها حتى كيلاحضها خسرات سيفتها و سدات عينيها بالجهد و شدات راسها تخلع هز ليها راسها و قال 

ياسين: زينب مالكي نعيط للطبيب 

زينب هزات راسها من بعد ما مشى الصداع: لا لا غير راسي ضرني شويا 

ياسين: مالك باش حسيتي 

زينب: معرفتش شفت شي واحد كنغسل ليه في وجهو و عاود شفت بحال هاد الوضعية لي حنا فيها و لكن الملامح ديال الشخص بحال إلى ممحية 

ياسين: هداك غير انا ا حبيبتي 

زينب غوبشات: باش عرفتيها اون بليس انا محبيبة حد متبقاش تقولها ليا 😠

ياسين ضحك على هبالها عرف راسو مغترجع هاد الداكرة حتى تحمقو هزها و رجعها لبلاصتها حتى دخل الطبيب هو و راوية لي غتبدى معاها حصص الترويض 

راوية: صباح الخير مرت خويا 

زينب: شوفي بغيتي نبقاو انا وياك زوينين و تفاداي زبايلي متبقايش تقولي ليا هاد مرت خويا انا ما مرت حد 

راوية ابتسمت: واخة الالة ميكون غير خاطرك 

أسد: اش خبار مريضتنا كي بقيتي 

زينب: شوية ا دكتور امتى يمكن ليا نخرج 

أسد: دغيا باغية تخرجي 

زينب: وياك قلتو 6 أشهر و انا هنا كيفاش دغيا 

أسد: اه هادي غلبتيني فيها و دابا سمحي ليا نفحصك 

فحصها أسد مزيان و قاليهم معندها والو 

ياسين: دكتور قبيلة ضرها راسها و تفكرات شي حاجة 

أسد: مزيان اشنو تفكرتي 

زينب: غير شي صور و لكن مواضحاش و الشخص لي كان معايا ملامحو ممحية 

أسد: مزيان هدا يعني أنك باغية تتدكري و لكن متجهديش راسك 

زينب: اوكي شكرا دكتور 

استئدن منهم أسد و خرج و قال ياسين 

ياسين: راوية بقاي معاها انا واحد الساعة و نرجع 

راوية: اوكي كون هاني 

زينب بلا ما تحس: فين غادي

شاف فيها مبتسم و قرب خدا ايديها بين ايديه و قال 

ياسين: غتوحشيني ياك 

زينب جرات ايديها و غوبشات فيه: بعد مني معرفتش اصلا لاش سولتك 

ياسين: من حقك تسولي هه غنمشي نبدل ندوش و نبدل حوايجي و نرجع 

زينب: و لاش كتعود ليا مسوقيش 

خربق ليها شعرها و خرج مبتاسم 

مشات عندها راوية و عوناتها توقف و بقات معاها في الاول بحركات بسيطة و كتهضر هي وياها و كيتعرفو 

عند لمياء لي ناعسة دخل عليها ايمن 

ايمن: كوالا وا نوضي تي إلى خلاوك ناعسة متفيقي حتال غدا بحال هاد الوقت 

لمياء جرات الغطا على وجهها: امممنن بعد مني خنيني نعس 

ايمن: ا نوضي المعكازة 

لمياء: اش هاد التبرزيط على الصباح مالك مفيقني على النبوري كتسالني الكرا 

ايمن: بحال داكشي على ماشي ساكنة عندي واكلة شاربة 😏

لمياء: اوا باز عولنا عليك تهزنا نتا غير شويا لي كناكل تابعني عليه 

ايمن: نهز حبيبتي انا حياتي كلها 

لمياء: اوه نعتابرو عرض زواج بطريقة غير مباشرة 

ايمن: ولاو عندك شي استنتاجات الله يحضر السلامة و لكن عاجبيني 

لمياء: و هي إلى جبتي 4/4 من الحاجة و جيتي تخطب 

ايمن: و انا كرهت كنتسنى غير اختي العزيزة تتفكرني 

لمياء: اه فكرتيني في زينب يحسن عوان ياسين كوراه شيباتو 

ايمن: خليه يستاهل عقلتي نهار خلعيني و قال ليا بعد عليها 

#فلاش_باك 

في السطح ديال المشفى كاين ايمن و ياسين واقفين كيضرب فيهم البرد 

ياسين: كيبقات لمياء 

ايمن: مزيان نقزاتها 

ياسين: إذن صافي رجعها للدار 

ايمن قفز : علاش 😳 

ياسين: كيفاش علاش اشنو ناوي تخليها ساكنة عندك ديما و لا كيفاش 

ايمن: مكرهتش 

ياسين: كيفااش 

ايمن: ياسين الصراحة انا كنبغي لمياء 

ياسين: كيفاش عاود مسمعتكش اش قلتي 

ايمن: كنبغيها و من شحال هدا و مقدرتش نصارح حتى واحد سمح ليا ا صاحبي 

ياسين شنق عليه: سمعني مزيان اش غنقوليك اليوم ترجعها لدارهم و عمرك تعرفها 😡 سمعتيني راعيت حيت خويا أما كون كانت هضرة أخرى 

ايمن: كيفاش اش كتقول ا ياسين فهمني راه كنبغيها راه تعلقت بيها و بكلشي فيها انا لي ربيتها و كنت معاها في كل خطوة مبغيتش نخون تقتكم و بعدت و عمرني عاملتها اكتر من اخت حتال النهار لي حسيت براسي ممكن نخسرها عاد اعترفت ليها منقدرش نبعد عليها كتسمع منقدرش 

ضار ياسين و عطاه بونيا و قال

ياسين: هادي حيت كل نهار كنت كنتسناك تجي و تعتارف ليا 

ايمن خرج عينيه:😳 كنتي عارف 

ياسين مد ايديه: نتا راك هنا ههه و منلقاش لختي احسن منك 

ايمن ضحك و هز ايدو لكمو حتى هو : هادي حيت طيرتيها مني خلعة 

ضحكو بجوج و تعانقو عناق رجولي و هبطو 

🔙 لمياء: ههههههه

ايمن : كتضحكي لمك نوضي غسلي و جمعي حوايجك راه جاتنا أوامر نرجعو للفيلا كاملين 

لمياء: حاضر شاف 

ناضت قدامو كتمختر و تضحك و تلعب بشعرها 

عند راوية لي سلات لزينب الحصة و جات الباتول خلاتها معاها و خرجات 

غادية في الكولوار حتى وقفها واحد الشخص

الشخص: احم ممكن نهضر معاك 

راوية: وي تفضل 

الشخص : ممكن نخرجو برا و نهضرو 

راوية: لا سمح ليا إلى كانت خاصاك شي حاجة في المشفى مرحبا غير دلك سمح ليا 

الشخص : عافاك متفهمينيش غلاط غير عجبتيني و بغيت نمرة ديال التيليفون ديالك 

راوية: لا سمح ليا معندي منعطيك 

و تمات غادية و هو يجرها من ايديها مخرجها لبرى 

الشخص: كاملين كتقولو بحال هكدا غير يالاه معايا غيعجبك الحال راوية محاولاتش تقاومو أو تتنتر منو و تبعاتو 

هاد اللقطة كاملة دازت قدام أسد لي معجبوش الحال و كارز على ايديه و تبعهم بلى ما يحس 

مشات راوية مع الشخص حتى خرجو للجردة ديال المشفى و بعدو على الناس شويا عاد نترات ايدها منو و طرطقات عنقها من جوج جوايه 

الشخص: حبيبة علاش وقفتي 

راوية: ممكن تعاود ليا اشنو بغيتي 

الشخص: الصراحة عجبتيني و سيرتو مع الزي ديال الطبيبة كتباني سو سيكسي مكرهتش 😉

راوية: و انا اش قلت بعد مني ياك 

الشخص : وراك باينة عاجبك الحال أما لاش تبعتيني 

راوية : باش نربيك 

الشخص:هههههه اوا اجي ا حبيبة ربيني 

تم جاي باغي يعنقها بحركة بسيطة منها كانت شادة ايديه لاوياها و هي وراه هزات ايدها و عطاتو بمرفقها لضهرو حتى طاح قدامها و دارت رجليها في رقبتو و قالت 

راوية: و دابا اشنو 

الشخص: ط ط طلقيني 

راوية: عمرني باقي نشوفك هنا و لا نوريك وجهي الآخر 

طلقاتو ناض وقف و بانت ليه واحد الحديدة خلاها حتى عطاتو بالضهر و مشى هزها و غادي لرواية 😨😨

قبل ميوصل عندها كان أسد شاد الحديدة لي موجهة لراوية و عينيه كي الجمر انتبهت راوية و دارت تفاجأت باسد شد هاداك الشخص من عنقو و عينيه مكيبشروش بالخير بقى خانقو و الشخص كيتركل تحت منو و عينيه خرجو حتى غوتات راوية 

راوية: صافي أسد غادي يموت في ايديك طلقو 

أسد سمع صوتها طلقو طاح للأرض و تم جاي لجيهتها شدها من ذراعها و جرها دخلها للبيرو و سد وراه الباب دفعها على المكتب و معصب 

أسد: اش داك تخرجي معاه دوي 😡 دابا كون مجيتش كون خلاك غارقة في دمايتك و زاد 

راوية: انا خرجت باش نربيه 

أسد بالغوات: واربيتي حتى راسك 

راوية معصبة: منسمحش ليك 😡 انا مربية احسن تربية و زيدون شكون نتا علاش كتهضر معايا هكدا عونتيني شكرا رغم أنني مطلبتكش و لكن المرة الجاية رد البال لهضرتك ا دكتور 

قالت كلامها و تمات غادية حتى كتحس بوجهها في صدرو و يدو ضاغطة عليها 

أسد: بغيتي تعرفي شكون عطاني لحق هانتي قدامو سوليه 

راوية هزات عينيها فيه كتستفسر: كيفاش 

أسد كيشير جيهة قلبو: هو لي عطاني الحق من نهار تخاصمتي معاه و هو كيضرب غير بسميتك 

راوية غير كتشوف ولات مزنكة و كنقفقف عمرها كانت بهاد القرب من شي راجل و كان لي دوا معاها كتطبق عليه الكاراطي لي تعلمت حتى مبقى حتى شي واحد يقدر يقرب ليها : 👀 ب بغيت نمشي ف في حالي 

اسد: غتهربي و تخليك هاكدا 

راوية: خ خليني 

طلقها طارت مشات الحمام كتغسل وجهها و كتستوعب الوضع لي كانت فيه 

عند زينب لي كانت مع ماماها و سوما كلات شويا و عطاتها للحتيت معاهم حتى دخل ياسين مخفف اللحية و مرجع شعرو اللور و لابس السبور و ضروري الأسود و ريحتو سابقاه هزات فيه عينيها و قلبها بدا عوتاني كيضرب بالجهد و طلع معاها الصهد و ولات كترعد و معارفاش اشناهو هاد الاحساس لي كيشدها فينما كتشوفو في الاول فسراتو انه خوف لأنها مكتعرفوش و دابا معارفاش اشنو هادشي بقات حالة فمها فيه و تفكيرها ممعاهاش حتى فيقها بقبلة فوق راسها خلاتها ترجع لعندهم و تخنزر فيه 

زينب: علاش كتبوس ليا راسي انا جداك

الباتول: ويلي يا هاد البنت راه راجلك هداك 

زينب: وا الباتول راني قلت ليك راني معندي راجل أو باغين تلصقوه فيا بزز 

سوما: إلى مبغيتيهش هي نشوف ليه شي عروسة 

زينب بلا متشعر: باش نخرج ليه مسارنو و نقجو بيهم 

الباتول: يخ منو و عيني فيه هي ديالك ابنيتي 

ياسين: 😂😂😂😂😂😂 معرفنا منين نشدوك 

زينب: 😠😠😠 بعد مني اصلا لاش جاي عندي 

ياسين: باش نشوف مرتي 

زينب: وا مرتكش انا بعد مني 

دخل ايمن و لمياء 

ايمن: طوم و جيري فينما نجيو نلقاوكم مضاربين 

زينب: اوه البوكوص جيتي 

لمياء: بان ليك غير هو و انا 😏

ايمن: مغيارة راه طبيعي نبان ليها غير على ماشي ولد مها و باها 

قالها بلا ميرد البال لاشنو قال حتى سمعها غوتات 

زينب: كيفااااااش

يتبع