ولأني عقيم الجزء الثاني

بديت اول يوم ليا فالخدمة كان زوين بزاف نشطت مع الملائكة الصغار كيحمقو دوزت معاهم وقت زوين وحتا هما تعلقو بيا دغيا وارتاحو ليا ..مديرة الروض حتا هي فرحت بيا حيت خاطري دايراه للدراري الصغار دازو احلى ايام مع الاطفال كلشي ولفني وحتى للي خدامين تما من بين اللي خدامين كان واحد العساس مازال شاب وكان ديما كيشوف فيا وكلشي لاحظها عليه انا مبغيت نعطيه امل كنت مداياها فراسي ومخصني مشاكل ومخاصني امال فارغة انا مطلقة وعاقر من الفوق شكون غيبغيني هادشي باش كنت قانعة راسي بهادشي حتى واحد النهار ساليت خدمتي وجيت نخرج حتى كنسمعو كيعيط ليا كان حشمان بزاف قاليا :مروى انا نجيك مالاخر نتي من النهار سلبتي ليا عقلي بثباتة ديالك ودخولك سوق راسك ومنكدبش عليك حتى جمالك والى قبلتي عليا انا ناوي الحلال ومنلقاش حسن منك انا تصدمت وجاوبتو ولكن انا تطلقت حيت مكنولدش واش نتا عارف هادشي قالي :اه انا عارف عليك كلشي وميهمنيش هادشي انا بغيتك نتي ...صدماتني هضرتو كتر مكنش يصحابلي انه كاينين رجال فالدنيا هاكا جاوبتو :يكون خير انشاء الله هاد الجملة بحال الى ردات فيه الروح ضحك وقالي بارتباك انا غنقولها للواليدة ديالي ونتافقو فوقاش يجيو عند الواليد ديالك مشيت وانا كنتأمل يوم مشرق وحياة منكن تضحك مرة اخرى الغد ليه مشيت ولقيت تما واحد المرة في بداية الستينات سلمت عليها وعرفت انها ام الخطيب شافت فيا باعجاب وبدات كتسولني منين انا وشحال فعمري وتشاركه معانا الحديث شي بنات خدامين تما الى ان قالتلي وحدة انشاء الله امروى يعوضك الله مع هادا كل ماداز عليك فالزواج اللول وديك الساعة امه تصدمات وقالت اينا زواج واش نتي كنتي مزوجة من قبل جاوبتها ب اه سولات مجددا وعلاش تطلقتي حنيت راسي وقلت ليها على الاولاد زادت الصدمة ديالها تنهدات وقالتلي شوفي ابنتي نتي رزقك عند الله مكتوب والله غيديرلك تاويل الخير فحياتك ولكن انا مبغيتش ولدي يتزوج وحدة عاقر حتى انا بغيت نشوف حفايدي متديش على الاعجاب اللي داير بيك دابا الزواج ماشي غا ليلة الزواج عمر كله الله يجيبليك شي خير ابنتي ولدي مغيصلاحش ليك 

سمعت كلامها وبقا فيا الحال بزاف ولكن مبينتش قلتليها امين اخالتي ناضت مشات وانا كملت على خدمتي جيت نخرج لقيت العساس قالي مروى انا باغيك وميهمني حتى واحد فالدنيا شفت فيه وقلت ليه كلشي قدر ومكتوب حسيت بيه معجبوش الحال كان باغيني وقالي مروى انا مستعد نتزوج بزاز عليهم انا باغيك متحرمبنيش منك قلتلو رضا ميمتك بالدنيا ومافيها متخافش غتنساني وغتعيش حب مع المرة اللي غتختارليك ماماك سير اولد الناس انا مغنصلاحش ليك مشيت وخليتو انا واخا شايفا فعيونو الحب ولكن كنت كنشوف فعيون محمد حب اكتر من هادا وفالاخر تلاشى ونساني بسهولة اكيد حتى هادا غينساني بسهولة حتى هو مبقيتش كنتيق فالدنيا قدره هادا مكنش خاصني نحلم من جديد خليني غي مع الملائكة الصغار هادشي وبزاف عليا فالحياة باراكة عليا

دازو ايام وانا مرتاحة فخدمتي الاطفال كلشي فرحانين بيا كنعقل على سمياتهم واحد بواحد الاء ميساء عز الدين بو عينين كبار تسنيم الغزالة ضياء وهيثم وكرم كلهم اطفال دخلو لقلبي وليت فينما نمشي نلقاهم مورايا حبابي كيحماقو عليا وكنحماق عليهم هما اللي مصبريني على هاد الحياة دوزت ايام ولا اروع مع الملائكة الصغار مبقيتش كنحتك بزاف مع اللي خدامين تما داخلة سوق راسي مكنهضر مع حد حدودية بزاف حتى واخد النهار جا عند المديرة واحد الرجل فبداية الخمسينات انيق وباينة علبه العز من طوموبيلتو الفارهة دخل لمكتب المديرة وانا بقيت مع الصغار شوية لقيت خرج من المكتب وجاي لعندي بقا كيشوف فيا وقال :نتي جديدة هنا جاوبتو اه وديك الساعة شاف فيا من الفوق لتحت ورجع للبيرو بقا كيهضر مع المديرة انا كملت الخدمة ديالي كالمعتاد اما السيد ودع المديرة ومشا جات عندي ديك الساعة واحد البنت خدامة تما قاتلي راه هاد السيد من العائلة ديال المديرة وباللي سمعاتو كيسول المديرة عليا انا استغربت ولكن قلت فنفسي ربما سول حيت شافني هنا اول مرة وجاه فضول يعرف شكون انا خصوصا اني كما عرفت انه كيزور المكان بزاف كملت خدمتي ومشيت وانا غادية فالطريق وقفت عندي نفس الطوموبيل استغربت جدا هبط الجاج وقالي بواحد الثقة مروى..طلعي بغيت نهضر معاه فشي حاجة مهمة انا شفت مزيان قلتلو لا سمحلي وزدت لقتو خرج من الطوموبيل وتبعني وقالي راكي متكبرة مع راسك ..وحاسة براسك ولكن تستاهلي حتى انا كيعجبوني اللي بحالك ... خرجت فيه عيني قلتلو خليني نمشي عفاك شدني من يدي وفجر القنبلة فوجي قالها بالفن المليان تمشي معايا للدار نشطو شوية وميخصك معايا خير ...انا ديم الساعة تصدمت غوتت عليك وفلتت يدي منه وجريت وانا كنبكي ومحروق قلبي

اش هاد الحياة يا ربي شنو درت حتى يطرالي هادشي عمري ما اذيت شي حد علاش الناس خايبة علاش اللي مطلقة كلشي كيشوفها مجرد وسيلة لتفريغ الشهوات كلشي كيشوف فيها نظرة جنسية هادشي علاش المرة الاولى مبغاش بابا يخليني نخرج حيت خايف من هادشي حيت عارف الدنيا عامرة ذيابة ...مشيت للدار دخلت وبقيت كنبكي وكنفكر كيفاش حتى فكر فيا دتك الكلب هاكا انا ماشي شي وحدة اللي معرية ولا كنتعوج على الرجال مفيا حتى شي حاجة اللي تجبد علاش هاكا ولا هما كيعجبعم ينوعو يجربو كل الانواع ..استغفرت الله وطلبت منو يحميني من هاد الانواع يا الله عاوني ..الصبح فقت صليت وفطرت مشيت كما العادة للخدمة حاولت منفكرش فداكشي ديال البارح مللي مشيت قالولي البنات باللي المديرة كتسول فيا مللي مشيت عندها دابزت معايا وقالتلي باللي داك الراجل ديال البارح كيتهمني باللي كنعرض راسي عليه وباللي اخلاقي منحلة ومغاناسبش الدراري الصغار معطاتنيش فرصة ندافع على راسي وبخاتني وقالتلي هادا اخر انذار ليك شكوة اخرى منك غادي تمشي بحالك انا بقيت مصدومة خرجت من عندها نزل عليا الباطل وانا معرفتشندافع على راسي مكان فيدي الا نجلس نبكي على زهري مشيت لبلاصتي المعتادة فين كنحط حوايجي وانا نلقا ورقة تما فتحتها ولقيت مكتوب فيها " هادي قرصة ودن صغيرة نتمنى من موراها ديري عقلك وتوافقي على داكشي اللي قلتلك البارح والا مصرة تعصبيني غتشوفي وجه اخر ديالي " هاد الورقة طيحات مني النص الله يا ربي واش اللي تحافظ على شرفها فهاد الزمان تاكل الدق الله يا ربي اش غيوقعلي اكتر من هادشي بقيت كنبكي بزاف والاطفال كل واحد منين كيواسيني مساكن معارفين شنو كاين بقيت هكاك مقادرة نهضر غا كنبكي واحد شوية جات وحدة من الامهات شافتني فداك الحالة وجات عندي بقات كتسولني مالك وانا بحال الى كان خاصني غا لمن نفرغ قلبي عاودتليها كلشي بلا منحس فرغت قلبي من نهار تزوجت الى ان وصلت لهاد الزمر اللي باغي مع من يدوز الوقت كنعاود وكنبكي وهي كتسمع بقيت فيها عمقاتني ونصحاتني قاتلي واياك تفرطي فشرفك وباللي انا كبرت فنظرها بزاف حيت مغرونيش الفلوس ديال داك الراجل وقلتو لا رتاحيت معاها فالهضرة ومسحت دموعي ونضت نكمل خدمتي ومشيت بحالي صليت ودعيت الله يخرجني من هاد المحنة ويبعد عليا داك الحيوان وامثاله ...الغد ليه مشيت نخدم وقاتلي واحد البنت راه كاين شي حد بغا يشوفك مشيت نشوف شكون وكانت المفاجأة ...

لقيت ديك السيدة اللي شكيت عليها همي البارح وكانت مع واحد السيدة اخرى فبداية الثلاثنيات انيقة بزاف وجميلة بزاف سلمت عليهم وجلست عرفتني على ديك السيدة وقالت : انا عاودت قصتك لمدام منال هضرات السيدة منال وقالت :انا الصراحة بعدما عاوداتلي عليك صاحبتي وشكراتلي فيك تشجعت اني نجي ونهضر معاك حيت قصتك مشابهة لقصة خويا ..حنا من شحال هادي كنقلبو على شي وحدة بحالك ...خويا شاب تزوج بواحد البنت واكتشف انه مكيولدش وللاسف تخلات عليه وهذا سبب ليه ازمة نفسية خلاته تبدل علينا ...العقم ماشي نهاية الحياة ممكن تبداو نتي واياه حياة جديدة تكونو فيها كوبل زوين خصوصا ان بجوج بيكم مكتولدوش ونتي صغيرة وزوينة واي واحد يتمناك الى كنتي موافقة على الموضوع حددي لينا موعد مع داركم نجيو بطريقة رسمية وكوني متأكدة مغيخصك خير معانا ..خويا عندو دارو ومهندس ناجح فخدمتو فعمرو 35 سنة ومغيكون عندك مشكل فحتى حاجة ..رتاحيت لهضرتها بزاف وابتسمت ليها وفكرت انه ممكن نبدا حياة جديدة ننسى فيها الماضي الحب ماشي مهم المهم هو نرتاح من هاد الدوامة اللي راني فيها .. كنا كنهضرو حتى شفت داك الحيوان جاي وكيضحك داز عند المديرة تصدمت وليت حمرا قاتلي منال مالكي قلتليها باللي هداك هو الرجل اللي كيهددني ..جبدات تلفونها هضرات معا شي حد واللي فهمتو انها قالتلو يجي فورا متعطلناش بزاف وانا مرعوبة حتى وقفات واحد الكاتكات خرج منها واحد الرجل ضخم الجثة لابس لباس راسمي وداير نظاظر شاف فمنال حنا راسو احتراما ليها طلبات من وحدة من البنات تمشي تعيط على داك الرجل وملي خرج شاف فيها واحد النظرة عبرها مزيان ولكن كان موراها داك القلدة قاتلو بكل ثقة بالنفس انا مدام منال المختاري ابنة صاحب سلسلة فنادق المختاري وزوجة رجل الاعمال كمال القادري اكيد راك سامع بيهم بجوج هو تزنك ديك الساعة وحمار وقاليها طبعا كاين شي حد مسمعش بيهم كيداير الواليد لاباس عليه والزوج ديالك سلميلي عليهم بزاف امدام انا بقيت غا حالة فمي عيطات عليا جرتني عندها وقالتلو هادي خطيبة خويا رشيد المختاري المهندس المعماري المعروف تما زاد تصدم اكثر قالتلو منوليش نسمع تعرضتي ليها خاف على راسك نتا ماقاد على صداع معانا اعتذر ليها حالا ...سمحيلي الالة معرفتكش شكون سمحيلي هادي اخر مرة تشوفي فيها كمارتي ...انا بعد كل هادا بقيت حالا فمي زعما كاع هادا زهر عند الفقيه ..واش كنحلم هادو شكون وعند من جاو عندي انا اكيد كنحلم ولكن بعد هاد شي زاد اصراري اني نتزوج من هاد العائلة اسمهم كافي انه يحميني من بحال هاد الذئاب توازعت مع منال بعدما خدان نمرتي هاد المرأة فشكل متواضعة ولكن وقت الجد كتلقاها مرا ونص وحتى واخد ميقدر عليها تمنيت نكون بحالها

خبرت عائلتي بالطلب ديال المرا وعاودتليهم على كلشي بالتفاصيل ورحبو بالفكرة بزاف وحددو موعد وخبرت منال بكلشي ..النهار المعلوم جاو الناس رحب بيهم بابا وخوتي واستقبلهم فبيتنا المتواضع جات منال وماماها وخوها رشيد وراجلها وباباها واخا باينة عليهم كلاس بزاف وفوق المستوى ولكن كانو متواضعين بزاف معانا انا ديك الساعة دخلت الصينية فيها العصير ودخلت جبتها للضياف وانا حانية راسي وعيني فالارض مع الدخلة كنسمع تبارك الله على عروستنا غزالة ماشاء الله عليها هادي كانت ماماه للي هضرات عطيت للناس العصير وانا مازال عيني فالارض مشيت جلست حدا عجوزتي بقات كتشكر فيا وانا حناكي حمر وحشمانة ..كانو منسجمين بزاف فالهضرة مللي نطقو بالصداق عطاوني مبلغ لوكان بقيت مع محمد وبقا كيصرف عليا حياتو كاملة ماكان غيوصل لداك المبلغ اما على العرس قالت ماماه انا بغيت نفرح بوليداتي ونديرو عرس كبير قاطعها رشيد ..لا انا مبغيت عرس ..انا مطلق وهي مطلقة مكاين لاش نزيدو مازال فشي زواق ..انا مللي سمعت ديك الهضرة قلبي بحال الى دخلتي فيه موس وكان لازم اني نفيق من الكلبة انا مطلقة ومخصنيش ننسى هادشي وبلا منلعب دور المخطوبات زواج هادا وصاف ...نطقت بعد شهيق وقلت انا متافقة مكاين لاش نديرو العرس ..هو بحال الا ارتاح بعد ديك الهضرة بعد هادشي اتافقو على نهار اللي نديرو فيه العقد ومنو نكون وجدت راسي صافي مشاو الناس ومشيت نفتح الكادوات اللي جابو اش منك يا بارفانات واش منك يا ثواب ناري هادشي غزال وباين غا الغالي عمري توقعت اني نشد هادشي فحياتي سبحان الله كنت مع محمد مكنطلب والو غا نعيش فسعادة كنت مستعدة نعيش معاه فخم ديال الدجاج غا يبغيني ونبغيه ولكن للاسف حتى حاجة مكتلقاها كيف بغيتي اما اليوم لقيت وشديت فيدي الغالي ومازال ولكن فين هو الحب فين هي السعادة

وجدت كل ما نحتاج للزواج ديالي شريت لي شوميز دو نوي فكل الالوان وشريت مكياج وخلخال للرجل وشريت فساتين وعطور وكريمات كل ما كنت كنتمنى شريتو وحتى منال وصاتني الى حتاجيت شي حاجة نعلمها شريت كل ما بغيت دهاز ديال العروسة بالمعقول ماشي بحال الاول بارد ههههه وصل النهار اللي نديرو فيه العقد كنت فرحانة ومرتاحة لان هاد الناس وفرولي كلشي وحسسوني اني عندي قيمة بعدما كنت فقدتها تماما جابو العدول لدارنا انا لبست قفطان ابيض مرصع بالاحجار الكريمة جابتولي عجوزتي ورشيد لبس كوستوم كيبان انيق جدا وزوين كتبنا العقد وسط الزغاريد والصلاة على النبي عائلتي فرحو بزاف مقلناها لحتى واحد فالعائلة ولكن انا متأكدة ان عمتي ومحمد غيوصلهم الخبار فكرت فيه رغم كل هادشي اللي كيدار ليا مقدرتش ولكن ربي عطاني الصبر وضحكت وفرحت ربي كبير وكيعوض كل واحد على الصبر ديالو ...سالينا كلشي وركبا فالطوموبيل مع رشيد ودموعي فعيني مشينا مهضرش طول الطريق حتى انا سكتت وكنفكر فعائلتي وخفت غنبدا حياة جديدة معارفة خفاياها وكيفاش غنعيشها مشينا راحد المسافة حتى دخلنا فواحد الحي راقي بزاف فيه شي فيلات زوينين شوية تفتح باب ديال واخد الفيلا بطريقة اوطوماتيكية دخل رشيد بالطوموبيل مشينا وقف عند الفيلا كان تصميمها رائع من برا بحال الى مرانيش فالمغرب نزل هو من الطوموبيل وتلفت عندي بحال الى كيقولي نزلي بتعبير وجهه دخلنا كانت من الداخل اكثر من رائعة مزيج بين التقليدي والعصري ولقيت واحد السيدة فالخمسينات ومعاها شابة باينة هما المدبرة والخادمة دالفيلا كان وجهها بشوش واستقبلاتني بابتسامة ورحبات بيا ..مرحبا والف مرحبا بمولات الدار فرحت باستقبالها عرفاتني على راسها ووراتني الفيلا وكل مكان فيها وداتني لبيت ديالي كان كبير وموسع وخلاتني فيه وقالتلي باللي سي رشيد دخل المكتب ديالو كالعادة باش يكمل الخدمة ديالو ومن بعد يطلع ينعس داكشي اللي كان استغليت الفرصة لبست واحد الشوميز دو نوي حمرا معرية شوية من الصدر ودرت ماكياج خفيف وصاوبت شعري تعطرت مزيان وجلست كنستنى رشيد يجي ينعس ...تسنيت بزاف تعطل مطلع خفت عليه وجاني النعاس وقررت ننزل نشوفو ونعيطلو باراكة عليه من الخدمة راه مشا الحال يكون عيا ..نزلت بهدوء ومشيت للمكتب ديالو فالفيلا دقيت مفتحش قررت نفتح الباب وندخل مللي دخلت لقيت...

مللي فتحت باب المكتب لقيت رشيد ناعس على واحد السداري تما شفت فيه تصدمت واش هادي فعلة كيديرها عريس ليلة الدخلة ديالو مالو لاش نعس هنا واش هرب مني ..ناري عنداك يكون ماشي راجل لا منظلموش يمك عيا كان خدام النهار كامل ونعس هنا بالعيا ..واش نفيقو ولا لا ..من الاحسن ندير راسي ماجيتش كاع باش منحشمش راسي نمشي ننعس بحوايجي باش يلا سولني نقولو راني تسنيتك تعطلتي وداني نعاس ..مشيت نعست الصباح فقت ولقيت راسي بوحدي طليت من البالكون بانتلي طوموبيلتو مكايناش بدلت حوايجي ومشيت سولت المدبرة ديال الفيلا قاتلي راه خرج الصباح بكري مشيت نفطر وجلست فالجردة حتى شفت عائلة راجلي جاو وفرحانين سلمو عليا وسولوني على رشيد اضطريت نكدب ونقول راه مشا يشوف شي حاجة مهمة فالخدمة جبدت خاو التليفون ديالها وصوناتلو قاتلو مهما كانت الخدمة اللي عندك متخليش مرتك بوحدها فصبحيتها سدات التليفون هاد منال شخصياها قوية مع كلشي وكلامها مسموع ...شوية لقينا رشيد جا سلم على ماماه وعلى ختو وجلس حدايا بابتسامة كنشوف فيه كان ناشط مع عائلتو ..جلسو شوية وناضو يمشيو سلمو عليا ومشاو خلاونا انا ورشيد بوحدنا ..استغليت الفرصة وقلت نهضر معاه وندير المبادرة للحديث المشترك بينا شاف فيا واحد النظرة دالاحتقار ومجاونيش وطلع للبيت ديالو انا بقا فيا الحال وقلت ندير راسي بحال الى موقع والو تبعتو للبيت لقيتو داخل يدوش استغليت الفرصة بدلت حوايجي ولبست شوميز دو نوي قلت نلبس الابيض ندير فال خير بلا مندير الالوان درت الماكياج وتستيتو يخرج من الدوش مللي خرج شاف فيا وبدا كيضحك بطريقة هستيرية كيضحك كيضحك حتى بقيت كنشوف راسي واش فيا شي حاجة اللي كتضحك ولا لبست شي حاجة بالمقلوب ولا شي حاجة فيا ماشي هي هاديك محبسش من الضحك كيشوف فيا كيزيد يضحك معجبنيش الحال مللي سالا الضحك جا عندي وقالي "واش من نيتك ..واش تيقتي راسك ..واش نتي كتخيلي اني انا عرفتي شناهيا انا ..ممكن نقيسك نتي ولا نقرب منك اجلاخة ..ممكن نوسخ راسي بيك ..متيقيش راسك ..الى بغيتي تعيشي سدي فمك وعيشي على قدك ومتطاوليش على سيادك "