أنا و الشقيقان الجزء الثالث

قادوني مزيان ومشيت لقيتو كيسايني بسم ومدلي يديه شديت فيها.. صابر هضر بالجهد حدا كلشي:شيماء هي العارضة الرئيسية ديال الكوليكسو الجديدة.. كلشي استغرب وبغاو يصورو وهو حبسهم:بلاتي..شيماء غتكون لمفاجئة..ماغاديش تبان تا يكون لعرض..اي تسريب لمعلومات غتحاسبو عليه..ودبا غنبداو لخدمة معاها باش ماتبقاش سطريسي.. وداكشي لي وقع شي كيعلمني نمشي بالطالون..شي كيوريوني كفاش لمشية دالعارضات وشي كيلفت انتباهي لملامح وجهي لي كلها ثقة.. بداو يفيدوني وتمحنت باش قاديت مشيتي بالطالو ناري عياني..حيدتو ريحت رجلي حسيت بالعيى ديال خدمتي لولا هههه ناري تا هادو كيعياو مساكن ههه.. داز نهار كامل تماك وانا كنتعلم ونحاول عاد رجعت لدار فطاكسي خلصها ليا سي صابر..ناري بديت نحس براسي كنعيش خخخ.. آدم هو وحسام دوزو نهار كامل غير فالخدمة.. وصلت لدار كلهم استغربو حسو بلي شي حاجة مبدلا فيا وهي غير لاسيغ ههههه.. بداو الايام يدوزو ويكدب عليك لي يقولك داك لجو ماكيحمسش فالخدمة..وليت نتمشى مزيان حمدلله وعجبني لحال بديت نرسم الثقة علا وجهي وكل مرة شنو كلبس مرة سروال مرة جيب مرة كسيوة..ودبا عطاوني قفطان كحل كيحمق..لبستو وتمشيت بيه تا سي صابر فرح بيا وحس بلي اختيارو فمحلو..كلما كنت كنخاف كنتفكر الناس لي قللو مني ولي شكو فقدراتي شي لي كيخليني نتعافر باش نوصل وتولي عندي قيمتي حدا الناس حيت دبا اي واحد كيقدروه بجيبو وصافي ماشي بحاجة خراا.. دازت السيمانة ناشطة وتبدل فيها بزااف دالحوايج.. صافي قررت نبقى فهاد لخدمة واكيد مبادئي ماغيتبدلوش.. ليوم صابر عرض علا حسام وآدم وبغى يبين ليهم بلي شيماء كابابل باش تكون عارضة.. دخل عندي لبيت لي كيقادولي لميك اب فيه.. صابر:شيماء الضيوف جاو بغيتك تبقاي مرتاحة كيف كنتي وهادشي غيفيدك باش ماتبقايش تخافي.. جاوبتو بخوف:غ غنحاول ماتخافش.. صابر حنى عندها:انا ثايق فيك.. بسمت:شكراا

خرج وعطاوني قفطان بلوغوا وصباطو..طلعولي شعري شوية وخرجت بحالا غندير بروفا..بقيت غادية بتباتة تا وصلت حدا لبوديوم تنفست مزيان حيت عارفاهم علا برا وبسملت وذكرت الله وخرجت مطلعة راسي فالسما وكنتمايل وشادة جلايل لقفطان فيدي..بقيت كنشوف قبالتي فين غيكونو الصحافة وراسمة القوة فعيني وغير زدت جوج خلفات مابقاش عندي مشكل.. آدم غير شافها خارجة حل عينيه مزيان ودوخاتو وزاد كمل مين شافها كتمشى برقي وثقة حمقاتو وقلبو ضرب بالجهد بحال كل مرة كيشوفها وهنا تأكد بلي كيبغيها وبزااااف كاع.. حسام كان مامهتمش مي غير علا عينيه تصدم لقاها غادية باحترافية لحالا ماشي اول مرة غتعرض.. صابر راسم ابتسامة انتصار واكتشاف لموهبة غتكسر الدنيا ههه.. دخلت كنرجف لكواليس..كلشي بقاو يعاونوني تا بدلت.. صابر غير دخلات شيماء دار شاف فيهم:كيجاتكم ههه.. آدم بسم:اختيار فمحلو.. حسام غير ساكت..صابر مشى حداه:مالك ساكت؟. حسام:لا والو..صافي بلا ماتزرب تا العرض ونشوفو.. صابر:آهاااا مازال زايد فيه..اوك تالعرض ونشوفو ههه.. مشاو لدار وحسام الصورة د شيماء ماحيداتش من بالو واخة مارضاش يقولها.. أما آدم كان فرحان وعاجبو لحال ليها حيت غتقدر تبني حياتها من لول وفلحظة تزير وتفكر بلي غيكونو عندها معجبين وغتبعد عليه كثر.. رجعت لدار فرحانة ومفتخرة براسي..وكان قالي بلي العرض غيكون بعد اسبوعين حيت مابقات تا حاجة ناقصاني.. تحط الاعلان وكلشي كان تالف مع العرض..تعرفت علا بنات بزاف كانو غيعرضو معايا..شي حسيت بيهم مزيانين وشي قباح وحاقدين..دازت فترة زوينة وكل نهار كيتهلاو فيا بالكريمات والمساجات بعدما كنتدرب..وجهي ولا كيلمع بالاهتمام..لبست لي عمرني تخيلت لبسو..كليت لي مازال تا ماعرفتش سميتو..احتكيت بناس جداد راقيين كيعانوني نتقدم ولا كيحاولو يعرقلوني..وتا فالدار خوتي وماما كانو كيريحوني وكيخليوني نشبع نعاس باش نبان فاحسن حلة..واكيد سبور لي كان كيديرها معايا كوتش فالصبح باش نربي سوفل ونحيد الستريس والطاقات السلبية.. فهاد لفترة حسام وآدم كانو متحمسين ليا بزاف مي تا واحد ماقالها لاخور..اما رحاب كانت ماشي سافا.كتبكي وماكلتها قلالت نهار علا نهار لموضوع ديالها مع حسام كيتنسى..صافي بدات تفقد الامل واخة حبها ليه مازال هو هو.. جا العرض فقت الصبح دوشت بزربة وفيا الخلعة..قلبي كان غبسكت وماما كتهدني..قلت لماما وخوتي مع الربعة يجيو عندي باش يحظرو وخليتلهم الانفيطاسيو.. مشيت قادوني وكيحاولو يتلفوني جا عندي صابر كيحاول يخفف خوفي وفري صعيب حيت اول مرة.. جا آدم وحسام جلسو حدا الناس وتلاقاو ب بزاف دالناس منهن بسمة وباها وهبة ونرمين لي حاولو يتلصقو علا آدم حبسهم بلا مايطول معاهم ومشى جلس كيساين لعرض بفارغ الصبر او بمعنى اصح كيساين يشوف شيماء...

لداخل كان لجو مرون صافي طلقات الموسيقى ودخلو العارضات.. بقيت علا اعصابي كنساين نوبتي.. ماما وخوتي كانو كيساينو علا اعصابهم..وآدم وحسام حدا بعضياتهم وحداهم بسمة بحكم انها خطيبة حسام.. واخيرا جات نوبتي كلشي داز بين عيني ولي لداخل شجعوني تنفست وقلت بسم الله ودخلت.. بقيت غادية متبتة ولخوف فيا وكندعي الله فلداخل ديالي..عليت راسي بعنفوان وانا هازة جلايل القفطان لحمر المرصع باحجار كريمة ولمضمة لي رقيقة كلها احجار..وصباط عالي كحل وفري ميك اب ديالي وشعري لي مرفوع لفوق علا شكل كوتشوفال وهو مخرس وانثوي وزغيبات هابطين علا عيني لي غلقوهم..وقفت فاش وصلت لاخر لمنصة بانتصار والصحافة قدامي وراسي لفوق..كلشي كيصور والناس كيصفقو.. آدم غير شافها داخ وغار عليها من انظار الناس..مامات شيماء وخوتها كيصفقو بحماس ومفتاخرين بختهم وحسام حال عينيه مركز وابتسامة بانت علا وجهو لمغوبش..رحاب كانت معروضة وتفاجئت بشيماء لبنت البسيطة لي خدامة اقل خدمة فين وصلات دبا..ماقداتش ماتفرحش ليها حيت تستاهل تنقد عائلتها وتعيش.. رجعت دخلت فرحانة وخرجنا كاملين شي مور شي وصابر شدني من يدي غير وقفو هما حنا دزنا وسطهم متشادين باليدين وف حانين ورجعنا دخلنا..تعانقت مع كلشي كانت فرحتي كبيرة وانا ماضيعتش تعب شخص تاق فيا وبدا معايا من الصفر الله يكثر خيرو لي عمرني نساه.. بدلت عليا وجا عندي سي صابر.. صابر:ههههه برافو عليك شيماء ومبروك الشهرة هههه.. انا:ههه الله يبارك فيك..نتا بعد الله لي عندك الفضل فهادشي..شكرا بزااف.. صابر:ماتقوليش هكا تا نتي كنتي محتاجة غي لفرصة مزيانة باش تبيني مواهبك..ونشاءلله هادي غير لبداية.. انا:انشاءلله.. صابر:شوفي نوصيك دبا ماتقولي والو حدا الصحافة حيت اي كلمة غيؤولوها..دبا نسكتهم انا بجوج كلمات..ومن بعد غنديرو مؤتمر باش نعرفوك علا ناس لمجال.. انا:اوك حسن..شنو دبا نخرجو؟؟ صابر:اه ياله.. جرني صابر وخرجنا ملور.. عارضة 1:شوفي ياختي جات مورانا وسرقات عشانا بففف.. عارضة 2:اممم هانتي كتشوفي.. آدم وحسام كيساينو حدا لباب.. آدم:شفتي لبنت لي هينتي؟شتي شنو دارت ههه.. حسام:صابر عندو بعد نظر وهاظ لمرة كنعتارف بخطئي..

خرجنا وكان حشد كبير من الصحافة والمصورين وانا بقوة بخلعة تلفت حيت كانو كيتزاحمو..ناري هادشي كامل درتو ههه..حسام وآدم تفاجئو بتصرفات الصحافة لي باغيين يعرفو شكون هي هاد لبنت لي عرضات ل صابر عمور وقنعاتو بتجربتها.. صابر تدخل:خوتي وحبابي كيق كتعرفو حنا ياله سالينا لعرض والتعب..دونك صبرو علينا شوية واكيد غيكون عندنا موعد نتلاقاو فيه وباش نأكد ليكم غنديرو مؤتمر وغتشاركو فيه كاملين..ودبا سمحولينا.. تدخلو لي كارد وبعدو الصحافة ودخلنا لطوموبيل.. مامات شيماء وخوتها كانو مشاو لدار حيت ماخلاوش من غير الشخصيات لمعروفة والصحافة يوقفو فلباب.. ركبنا وتحركنا بسرعة..صابر شاف فيا لقاني تالفة بسم.. صابر:ههه هادشي غتولفي بيه من بعد كوني هانية.. آدم وحسام لحقو عليه وتلاقاوه فبلاصة محددة.. نزل صابر لقاهم واقفين هضر معاهم وعيطلي خرجت.. آدم بعد شوفات كلهم حب:مبروك شيماء لعرض كان رائع وكنتوقعلك نجاح باهر.. جاوبتو ناشفة:شكرا.. آدم تكره مي تبت راسو وسكت.. حسام:الصراحة لعرض كان زوين وزدتيه جمالية..تباركلله عليك.. جاوبتو كلي ثقة واخة كنت فرحانة ملداخل بهضرتو:شكرا ليك سي حسام..والحمدلله لبنت لبسيطة لي كانت خدامة غير فالميناج ماحشماتكمش.. حسام تزير عرفها مقصحة من هضرتو معاها لولا وهو ماكرهش يبدا معاها صفحة جديدة.. شفت فسي صابر:ممكن نمشي لدار دبا..ماما وخوتي غيكونو كيساينوني.. صابر:اه اكيد..انا غنوصلك ونرجع عند الدراري.. شيماء:بلا ماتعذب راسك نقدر نمشي بوحدي.. صابر:اوووهوووو نتي دبا فحمايتي وماغاديش نخلي عارضتي العالمية تمشي بوحدها..نخاف يخطفوك ليا ههه.. آدم تزير واستأذن:ها حنا غنسبقوك لكلوب ديال ديما.. صابر:اوك شوية ونجي عندكم.. ركب حسام حدا خوه وعينيه علا شيماء وآدم كسيرا خلا لعجاج موراه بقوة لفقصة..حبيبتو ولات مشهورة وحياتها لمهنية كتفرض عليها تكون هكا ديما كفاش غيقظر يصبر..اما حسام كيساين غير لفرصة لي يذوبها بسحرو ويجذبها عندو.. ركبنا ووصلت لدار حتافلو بيا خوتي وفرحو بيا وماما عجبها لحال وشجعاتني ماحدي ماكندير تا حاجة عيب..و واعدتها بلي فاش ندير علاياش نولي غنحبس ونتفرغ ليهم.. رحاب رجعات لدار محبطة كلشي جا موراها وكيتقدم وهي مازالة فبلاصتها..بدات تفكر شوفات حسام لشيماء حيت كان قبالتها..حسات باحساس فشكل..وشكون فينا ماكيفهمش شوفات الحبيب واخة يكونو ماشي ليه..بقات مفقوصة تا حسات بالدوخة ومشات كتقيى وزادت فلبكى..حسات بلي تا صحتها تدهورات بسباب غلط ماخصوش يوقع..تكات كتمسح دموعها تا جلسات بحالا تفلاشات وبدات تحاول تسترجع حيويتها..ناضت دوشات ولبسات بيجامة جديدة..نشفات شعرها وطلقات موسيقى..حاولات تاكل ماقداتش وفكرات تمشي عند اخصائية تغذية ديرلها بروغرام جديد باش تقوي نفسها وصحتها..

صباح جديد الدراري كان فايقين بكري واخة قصرو..مشاو لخدمة كيف لعادة.. انا فقت تكيت ورتاحيت تعلمت طقوس جديدة..ندوش وندهن كريمات..يدي خصني نحافظ عليهم مي دبا مازالة ماما محتاجاني دونك غنخدم بيهم وصافي.. دخلت لكوزينة لقيت لفطور واجد ولكوزينة مقادة وماما دايرة لغدا يطيب.. انا:م ماما؟؟شكون دار هادشي؟ ماما:انا ههه..شوفي ابنتي نتي من دبا لفوق خصك تكوني مرتاحة ومهلية فراسك كلك حيت هاداك راسمالك..وبطبيعة لحال ماغاديش تحطي يديك فما بارد..وداكشي لي دوزتيه من قبل فمرضي نسايه..خيت دبا حمدلله انا قادة بداري.. انا باستغراب:و واش كتهضري بصاح؟راه مايمكنش نتي مازالة عيانة و.. قاطعاتني:انا عيانة حمدلله لعملية داز عليها كثر من شهر ورتاحيت بما فيه لكفاية دبا جات نوبتك ههه..الله يوفقك ابنتي ويسهل عليك.. عيني دمعو:آمييين اماما..مي صحتك عندي بالدنيا ومافيها..وماغاديش نتخلا عليك بسباب شغالي الجظيد ونخليك تعذبي بوحدك..ضروري نعاونك.. ماما:ههه عنيدة بحال باباك الله يرحمو.. انا:ههه الله يرحمو..ياله نعاونك فشي حاجة؟؟ ماما:فطري بعدا وديري سالاظ صافي ههه.. جلست نفطر كنضحك..وغير ساليت سمعت دقان فتحت لقيت سي صابر.. صابر:صباح نور بيست موديل ههه. انا:ههه صباح نور سي صابر..تفضل..دخلنا وسلم علا ماما بقى يعاودلي علا انطباعات لجميع وفتالي قال:مهم ليوم جيت باش نعطيك هاد الامانة.(جبد اونفولوب من جيبو)تفضلي.. انا:شنو هادا؟؟ صابر:خلصتك ههه..ولا ماباغياش تخلصي.. خديتها مبسمة:شكرا. صابر:فتحيها.. فتحتها لقيت جوج شيكات..واحد من سي صابر فيه 4مليون تصدمت وااه ليلة وحدة شو شنو دارت فيا ههه..فرحت مي مين شفت شيك لاخور لقيتو ديال سس حسام فيه مليون استغربت:هادا علاش؟؟ صابر:سي حسام بغى يتهلا فيك حيت زينتي لعرض وحيت هو مساند رسمي بالاثواب قرر يعطيهلك ك كادو لتعبك وانجاحك لعرض.. رجعتولو:تفضل..هادا ماعندي ماندير بيه..انا نهار خدمت خدمت معاك نتا اسي صابر ونتا لوحيد لي غنقدر نتخلص منو..اما سي حسام ماشي غير راعي رسمي يخلصني..انا درت خدمتي عادي وماكاين لاش من لفلوس(بقيت نفكر مع راسي حيت ماكنبغيش شي حد يمن عليا ولا يحسب عليا لخاوي..انا ماشي طماعة ولا كنطلب..ومانبغيش من دبا يبدا بنادم يعطيني فلفلوس غير هكاك حيت يقدر يجي ليوم لي يبغي لمقابل..هادي سياستي فالحياة وماغاديش تبدل..كلشي بالمقابل) صابر:اوك كنحتارم قرارك.. بقينا جالسين كنهضرو وحددلي موعد غدا غيكون لمؤتمر الصحفي..عطاني شي نصائح ومشى فحالو.. كنت غنطير بالفرحة اول مرة نشد 4مليون حمدلله ياربي..فكرت نفطح خوتي وماما..مليون نشريو بيها حوايج لينا و3نخبعوهم ومع لوقت غيزيدو بخدمتي نشاءلله.. رحاب كانت فالمكتب تا عيط ليها حسام.. حسام:رحاب بغيتك تصلحي هاد لغلط فهاد الوثيقة وتجيبيهالي دبا.. رحاب:اوك سيدي كون هاني.. حسام:وفطريقك جيبيلي ملف الصفقات كاملين لي عندنا حاليا.. رحاب راسها ضارها وكتحاول تصبر:امم اوك.. خرجات كتشد فراسها دخلات لوثيقة فالسكانير وبدات تقادها وناضت تقلب علا لملف..صوبات كلشي بزز وببطئ.. دخلات عند حسام وهي مسالية هو تعصب:واش هادشي خصو هاظ لوقت كامل؟فيقي معايا وسربي راسك شنو هاد لخدمة الثقيلة.. رحاب حطات لملف وكتعتاذر:والله اسي حسام الا.... قاطعها:شوفي لخدمة مافيهاش لعب ولوقت ماكاينش باش نضيعوه.. رحاب عيات تشد فراسها وتصبر مي فوسط كلامو طاحت علا طولتها.. حسام شافها طاحت تصدم ناض كيجري:رحاببب رحااااب..كيحاول يفيقها و والو.. خرج بزربة كيعيط بالجهد:كريمة كررررريمة..طلبو الاسعاف رحاب غيبات هنا.. كريمة سمعات مشات كتجري وآدم سمع لغوات خرج مشاو كلهم وتا الموضفين ديال داك ليطاج..كريمة خدات تيلي دالشركة وكتعيط من مكتب رحاب وعطاتهم لعنوان..

حسام حس بالذنب لبنت مريضة وغوت عليها هكا..اما آدم كيشوف دقات قلبها وحاول يهزها يحطها علا لفوتوي.. آدم:غي قولي واش غوتي عليها ولا طاحت بوحدها؟ حسام:بففف الصراحة غوت عليها مي هادي ايام وهي ماشي نورمال وخدمتها ولات عيانة.. آدم تأفف:فوقاش غتبدل اخويا ودير عقلك..راه كلنا بشر وعندنا ظروف.. حسام:صافي دبا بففف.. آدم سكت حيت هادا طبع حسام عمرو ماكيعترف بخطئو و فاش كيدير شي حاجة كيبقى يتهرب من لهضرة.. جاو الاسعاف وكريمة مشات معاها اما آدم بقى مستغرب فخوه لي مامشاش..خنزر وهبط خدا طوموبيلتو ولحق عليهم حيت رحاب عزيزة عليه.. وصلو لوبيطال دخلو رحاب يفحصوها وكريمة كتساين..تا وصل آدم.. آدم:شنو مازال ماسالاو لفحص؟ كريمة:مازال اسيدي.. بقاو بجوج كيساينو..ولداخل علقو ليها سيروم وفاقت.. رحاب:ف فين انا؟؟ ممرضة:عييتي شوية وجبناك لوبيطال.. رحاب عقلات شنو وقع.. دخل الطبيب وكانو وجدو ليه باش يدارولها راديو لكرشها كلها..بدا كيقلب ويشوف فالمعدة شوية هبط لمصارن..شوية هبط لكرشها لتحت شاف شي حاجة فشكل..شاف فيها وزاد فالفوليم بدا كيتسمع صوت متسارع غريب هي شافت فيه وهو يسولها.. طبيب:بنتي كنتي عارفة راسك حاملة؟؟ رحاب تصدمات:ش شنو؟حام لة؟ طبيب:اه وخصك تكوني عارفة..تقريبا شهراين..مبروك ليك ابنتي.. رحاب عينيها دمعو وماعرفات مادير..تهربات من الشوهة. رحاب:الله يبارك فيك.. طبيب:خصك راحة بزاف وفيتامينات والماكلة متوازنة..عارف بلي فاقدة الشهية وهاظشي سببو لوحم وباين عليك التعب وقلة الاكل..مي انا غنكتبلك دوايات يعاونوك..(ناض)علا برا كاينين ناس جاو معاك..نخرج نفرحهم.. رحاب بزربة:لا لا بلاش من بعد ونقولها ليهم.. طبيب:اوك تقدري تبقاي هنا تا يتسالا سيروم وتمشي لدار ترتاحي..وانا غنصافط ليك لوغدونونص..مايكون عندك باس.. رحاب:شكرا دكتور.. خرج الطبيب وسمح ليهم يدخلو.. رحاب كانت فقمة الصدمة غطات كرشها وهي كتحسسها وتخيل بلي غتكبر بعد فترة..ناري حاملة ومن شكون؟من حسام لي ماعندو تا غرض بيها..شنو غدير وكفاش غتصرف فهادشي.. دخل آدم وكريمة عندها وهي كتقلب بعينيها علا حسام..تصدمات مين ماكانش معاهم..هو غوت عليها وزعما سكرتيرتو وخوه صدق خايف عليها كثر منو..الله يستر ماكلفش تا نفسو وبريستيجو يجي يشوف بنت خدمات بالغالي والنفيس وعطاتو اغلى ماعندها..مي هي لي غلطات وتستاهل كثر من هادشي..

آدم:رحاب سافا؟كيبقيتي؟؟ رحاب فاقدة الامل:حمدلله دبا شكرا سي آدم.. آدم:ياك قلتلك اهتمي بصحتك شوية وفاش تكوني مريضة ماتكلفيش علا راسك.. كريمة:اه شوفي حالتك كيف ولات اصاحبتي.. رحاب مرفوعة:اممم نشاءلله.. آدم رجع لشركة وخلا كريمة مع رحاب تعاونها تمشي لدار.. آدم دخل لمكتب ديالو..شوية حسام جا عندو.. حسام:جيتي؟كيبقات رحاب؟ آدم:صافا دبا..خليت كريمة توصلها فاش يتسالا سيروم لدار.. حسام:وشنو وقعلها..علاش طاحت؟ آدم:طبيب قالينا غير ارهاق وقلة ماكلة.. حسام:اممم اوك.. رجع حسام لمكتب ديالو كلو تفكير لاول مرة تفكر ليلة لي دوزها مع رحاب..كفاش كانت وهي بين يديه..كانت اول تجربة ليها حيت بانت من تصرفاتها..هو قدر انها دارتها معاه مي ماقدرش يستعملها كوسيلة يفرغ فيها رغباتو وهو ماعندو بيها غرض.. رحاب بقات فدارها كتبكي. شنو غدير فهادشي؟قدما خايفة من لي جاي قدما فرحانة انها هازة طرف من حسام حبيبها لي تالدبا رغم كاع تصرفاتو معاها ماقاداش تنساه.. حسام كان خدام تا دخل عندو صابر..تسالمو وبقاو يهضرو تا جبد صابر شيك وعطاهلو.. حسام باستغراب:علاش مازال عندك؟ صابر:عطيتولها ومابغاتوش.. حسام بصدمة:كفاش؟؟وعلاش؟ صابر:قالتلي بلي مايحتاش تعطيها كشكر..هي دارت غير خدمتها وانا هو لوحيد لي غتخلص منو علا لخدمة..وهي كانت غدير هكاك فالعرض صوا كنتو نتوما الراعي الرسمي ولا شركة خراا.. حسام نزل عليه الزيت وحس بلي خطتو انه يجدبها عندو فشلات..وكيف كلنا عارفين لحاجة لي كتستعصى علينا كتعزاز بزاااف وكتحفر فالعقل بزربة.. صباح جديد كلو امل وحيوية فنظري..فقت خرجت درت لاماغش شوية..تقضيت لدار لي عجبني وكنت قلت ل سي صابر غندوز لشركة لي كنت خدامة فيها..نحط استقالتي ونشكرهم علا تعاملهم معايا ومن تما نتجمعو كاملين ونمشيو لمؤتمر نشاءلله.. فطرت مع خوتي اخيرا بحال كاع الناس ودخلت لبست كسيوة حد الركبة وبالكمام فيها وريدات صغار..مع ليباموص وصباط عالي..طلقت شعري سامبل وشوية دالميك اب لخفيف عبارة عن شرطة خفيفة وعكار لون شنايف هزيت صاك خفيف وخرجت.. بست ماما ودرت نظاظر هادشي كانو عطاوهلي فالخدمة..شديت طاكسي ومشيت لشركة..

وصلت لشركة دخلت حاطة لبادج ديالي باش يدخلوني وطلعت فالاسونسور..وصلت لايطاج ديالهم دقيت فباب سي حسام ودخلت.. شيماء:سلام.. حسام علا عينيه شافها قبالتو بسم:اهلا شيماء مرحبا دخلي.. شيماء:شكرا..جيت غير باش نشكركم علا لي درتوه معايا فهاد الشركة ونقولكم بلي غنقطع علا العمل.. حسام:تفضلي جلسي ماتبقايش واقفة بعدا. حسيت بطريقتو مبدلا معايا بسمت بحسن نية وجلست.. حسام:تشربي شي حاجة؟ شيماء:لا شكرا.. حسام:اوك لي بغيتي واخة راني مقلق منك.. شيماء:علاش؟ حسام بضحكة جنب:كاع ماقبلتي لكادو لي صافطت ليك.. شيماء:ههه لا شكرا..لكادو ديالي هي لفرحة ديالكم بيا.. حسام:اوك الالة علا خاطرك.. آدم دخل مزروب يسول علا لخدمة:حسام ش..(فاش شاف شيماء تماك تصدم..حس بيهم جالسين مفاهمين وكيهضرو فشي حاجة بيناتهم)س سمحولي دخلت مايسحابليش عندك ضيوف.. حسام:عادي غير شيماء جات تبلغنا بانقطاعها عن العمل..شفتي شحال مصوابة وكتفهم فالاصول(حسام كيهضر ويشوف مبسم ف شيماء).. آدم:اه الله يوفقك واكيد نشاءلله تكون مسيرتك حسن من هنا.. شيماء حنات راسها:شكرا ليك.. حسام جاه تيلي من عند بسمة ناض مزروب:سمحولي دقيقة ونرجع.. آدم هز راسو وهو خرج.. جلس قبالتها كيفكر شنو يقول:م مبروك كان لعرض زوين وعطيتي صدى واعر..ماشفتيش الصحافة شنو كتبات عليك؟؟ شيماء بهدوء ولا اكثرات:مازال ماشفت.. آدم:امم..شيماء..(علات عينيها فيه)الصراحة من شحال هادي بغيت نعتاذر منك وماجاتش فرصة.. شيماء بجدية:علاياش؟ آدم:علا شنو وقع قبل..انا غلطت وغلطي كان كبير..نتمنى تنساي داكشي عليا حيت انا ماشي هكاك . شيماء:بلا مانجبدو داك الموضوع دبا بليز..وحمدلله كل واحد غيمشي فطريقو باش تا داك التفكير مايبقاش.. آدم تكره حيت عارفها ماكتحملوش وعمرها تبدل رأيها عليه.. رجع حسام لمكتب آدم عطاه لورقة لي جا يسول عليها..جاوبو كان غيمشي وصابر يدخل.. صابر:صباح التجمعات الزوينة.. كلشي:صباح نور.. صابر:راه قرب وقت المؤتمر مستاعدين؟ شفت فيه:علاش غنمشيو كلنا؟ صابر:اه ضروري.. شيماء:اوك.. آدم:انا غنقاد لخدمة لي فيدي ونلحق عليكم.. حسام:اوك وحنا غنسبقوك دبا..بحرا شيماء ترتاح نفسيا قبل ماتبدا.. آدم حنى راسو وخرج..

مشى آدم لمكتب ديالو مقصح فقلبو كان كيشوف شوفات خوه ف شيماء تعصب..كتعاملو اسوء معاملة ورغم هادشي ماقادرش يمنع راسو يفكر فيها.. مشينا لمقر لي غيكون فيه مؤتمر جلسنا نساينو لوقت اما آدم سالا خدمتو ولحق علينا.. خرجت نقاد ماكياجي وغيت نرجع تا كيبان قدامي آدم جاي..تفكرت اعتذارو ليا..آه هو غلط معايا وبزاف وقصحني بتصرفو مي كيبقى انه رضى واعتاذر مني.نحاول نتعامل عادي وندير احتياطي منو حيت لحد الان ماكيدخلوليش لبواب.. آدم وقف قبالتها:جيت فالوقت المناسب؟ شيماء:اه.. آدم:ياله نمشيو.. شيماء:اوك.. آدم رتاح شوية واخة كتعاملو فحدود مي حسن ماتجاهلو.. دخلنا لمقر جر ليا لكرسي شفت فيه بسم دورت وجهي وجلست..وهو جلس قدامي..وصابر من الجيهة لخرا وحسام جلس حدا صابر.. شوية بداو داخلين الصحافة.. بسمنا ليهم تا جلسو مزيان..وبدا لمؤتمر.. صابر وضح ليهم بلي الاسئلة الشخصية ماكاين لاش منها واي حاجة عندها علاقة بالعرض مرحبا.. صحافي 1:سي صابر فين تعرفتي علا شيماء؟؟ صابر:فالشارع..(تفكر وبدا يضحك)كنت غيوقعلي معاها اكسيدو ههه.. كلشي بقى يضحك وتا انا بسمت حيت فري صظفة واشمن صدفة.. صحافي 2:شنو لي خلاك تشوف فيها العارضة الرئيسية؟ صابر:لبراءة والجمال الطبيعي والهدوء الملفت للانظار.. بسم ليا وتا انا رديتها ليه.. صحافي 3:شيماء..واش عمرك كنتي كتخيلي تكوني عارضة رئيسية من اول اطلالة؟؟ بسمت:نو عمرني اصلا كنت متخيلة ندخل هاد المجال..ولولا ثقة سي صابر فيا واقناعو ليا اني غنقدر ماكنتش غنساير فهادشي.. صحافي 4:سي آدم..شنو كان ردة فعل الشركة فعارضة مبتدئة تقدم لعرض لي نتوما راعي رسمي ليه؟ آدم:الصراحة كان شوية التخوف وبالنسبة ليا ماشي علا الشركة مي علا شيماء حيت صعيب الانسان يساير فهاد المجال..مي اين فوا شفنا لبروفا معاها كنا جد منباهرين بيها.. بسمت..هاد لهضرة حسيتها من قلبو ولاحظتها فتصرفاتو لولين.. صحافي 5:سي حسام..واش كنتي متوقع هاد النجاح من عارضة مبتدئة؟؟ حسام:هههه(جاتو لفرصة يطلق السلوكية خخخ)اكيد..غير شفنا لبروفا كيف قال الاخ ديالي توقعت وساندت اختيار سي صابر ليها.. انا تفكرت تصرفو لول معايا ووليت نعلت الشيطان.. بقينا كنجاوبو تا سالا المؤتمر..تصورنا بربعة وخرجنا.. كانت من احسن لحظات حياتي واخة كيكون داك البروتوكول والصباغة والنفاق مي اغلبية لهضرة لي قالو عجباتني وديجا كنت حسيت بيها فتصرفاتهم.. ودعناهم وخرجت مع سي صابر..وصلني وقالي فليل غتكون حفلة علا شرفي فالفيلا ديالو مع ناس داك المجال باش يتعرفو عليا عن قرب..تا ماما وخوتي معروضين..واني خصني ندوز لاثوليي نختار قفطان مناسب نبان بيه وهما يتكلفو بيا.. عجبني لحال يمكن دارت الدنيا وهدا ولا وقت شيماء راضي هههه..

مشيت لدار دوشت وتقاديت باش نمشي يكملولي..فهاد لوقت هبة كانت فصالون كتقاد علا اكمل وجه حيت تاهي معروضة..وبسمة فكرات حسام بلي خصهم يمشيو بجوج..هو ماعجبوش لحال وندم اصلا لي دخل فهاد اللعبة.. آدم كان هاني من الصداع واخة صونات عليه هبة ماجاوبهاش.. مشيت قادوني مزيان ولبسوني قفطان كحل فيه لي زيزطخاص..مع صباط باج وصاكو..شعري خلاوهلي بحالا طبيعي مسرح ومبوكل لتحت ديالو..وعيني خلاوهم خفاف مع عكار حمر ناري جيت توتة..لقيت شيفور كيسايني اوووه علا حياة الرفاهية ههه..ركبت و وصلني تا لباب.. كلشي كان وصل لفيلا سي عمور..حنا فلباركينغ والطوموبيلات بزاااف..صونيت علا سي صابر خرج مورايا دخلني من باب ثانيا استعذينا وخرج شاد فيا.. صابر:هاهي وصلات نجم حفلتنا نبغيكم كاملين ترحبو بيها بيناتنا.. كلشي صفق والدراري كيصفرو بسمت ليهم..آدم شافها ضحك ليها عاجب لحال ليها..وحسام خطيبتو حداه وهو مكره حيت يقدر هادشي يعرقل علاقتو مع شيماء.. ماما وخوتي لابسين ومقادين فرحانين بيا وهادشي كافيني.. هبة اكسبري بغات تجي معطلة..دخلات ماداها فيها حد..مشات عند آدم مقصدة.. هبة:آدم..توحشتك.. آدم:هبة اهلا.. هبة:فين غبرتي عليا تا فالتيلي ماكتجاوبش.. آدم:ماكنتش مسالي وصافي.. هبة دارت راسها مثيقاه مي فاش شافتو كفاش كيشوف ف شيماء بطلة لحفلة تسالاو ليها:اييي شوفيا هنا..فيمن كتشوف؟. آدم:تا شوفان كدخلي فيه خخخ.. هبة:معلوم علا نتا ماشي حبيبي؟؟ آدم شاف فيها ودور وجهو لجيهة شيماء.. صابر بدا يعرفني علا ناس كنسلم ونضحك معاهم ونحاول نعقل علا سمياتهم مي كثرو ههه عليت عيني بالصدفة شفت آدم قدامي..بسم ليا وعينيه كيلمعو مافهمتش شوفتو بقيت مستغربة ودورت وجهي.. كانت كلما الصدفة كتخليني نشوف فشي بلاصة كنتصادفو بالعينين..تا حشمت حيت بحالا كنديرها بلعاني..وهو واخة كيكون مع دراري وبنات شوفتو ماكتبدلش..ماعمرتش راسي بداكشي وبقيت مكملة لحفلة..حسام حاضيها ومستمتع وهو كيشوفها..بداو الناس يشطحو علا موسيقى هادئة صابر جر شيماء وزادو لوسط توترات.. صابر:غير ترخاي وتمايلي مع لموسيقى..ماتخافيش.. شيماء:اوك لهلا يحشمنا.. صابر:هههه.. آدم واخة عارف بلي صابر كيتعامل عادي مي شعلات فيه لعافية..حسام تمنى كون ماكانتش معاه بسمة كون حيدها لصابر من يديه.. هبة:بيبي آدم نشطحو؟؟ آدم حط لكاس وهبة فرحات..مي سمح فيها وتاجه عند صابر.. آدم:ممكن ناخد منك نجمة لحفلة؟؟ صابر بسم:بكل فرح.. أنا تزنكت تفووو علاش كيحطوني فهاد لمواقف.. هبة تفرشات وحسات براسها غتموت..بنت مامعروفش تا اصلها جات طيرات ليها حبيبها قدام عينيها.. آدم كيشطح مع شيماء فرحان:مالك؟علاش خايفة؟ شيماء:لا وا والو.. آدم:فخبارك شطيحك زوين..دونك بلا ماتوتري.. شيماء للحظة نسات كلشي وهضرات بعفوية:بصاح؟؟ آدم ضحك:والله ههه.. شيماء عاد حسات براسها وهي تالفة..كانت كلما كتعلي عينيها فيه كتلقاه مركز فيهم بقوة وثقة وشي حاجة خرا ماتفهماتش ليها.. حسام بقى حاضيهم كيشوف فيهم بجوج كفاش كيشطحو وفالتالي خرج باش يسترجع قوتو حيت شاف شي حاجة ماحملش يشوفها.. هبة كتغزز ضفارها معصبة مالقات مادير.. عليت عيني فسي آدم:صافي باراكا.. آدم:اوك علا خاطرك..واخة ماسخيتش.. شفت فيه وحنيت راسي وشي حاجة فهضرتو اثرات فيا.. مشيت حدا صابر بقى يضحك معايا ومفتخر بيا..شوية مشيت حدا ماما وخوتي كنتهاود معاهم مرتاحة حيت من دبا عييت بالمجاملات خخخ

حسام رجع سولاتو بسمة مالو ماقال والو..اما آدم عاجبو لحال..صابر جاب حسام وآدم.. صابر:نعرفكم علا مامات شيماء..لي عطاتنا هاد الجوهرة ههه.. ماما:الله يبارك فيك اولدي.. آدم غير ساكت خاف تفكر ببي زارها فلكلينيك..اما حسام بغى يدير بلاصتو.. حسام:سلام خالتي.. آدم دار بزربة شاف فيه مصدوم..ناري حسام كيقول خالتي ماهادا يا هادا ههه.. بسمات ماما:اهلا ولدي.. شافت ف آدم بقات مطولة الشوفة.. آدم حس بيها كتشوف فيه:سلام..انا آدم..مدير فالشركة لي كانت خدامة فيها شيماء.. ماما:مرحبا بيك اولدي.. انا:هاد الناس عاونوني بزاف وهما لي ليهم الفضل فوصولي لهنا.. ماما:الله يكثر من امثالهم.. مشاو الدراري وماما بقات تشوف مركزة.. انا:مالك اماما؟؟ ماما:بنتي داك سي آدم بحالا شايفاه من قبل.. انا:اه يمكن شفتيه شي مرة فالتلفازة!! ماما:لا موووحااال مي صافي نساي.. بقات مكملة لحفلة جات عندي شي بنت.. لبنت:سلام.. انا:سلام.. لبنت:ماعرفتينيش؟ انا:لا.. لبنت:انا هبة حبيبت آدم.. عليت حاجبي فيها:اهاه متشرفين.. هبة:اما انا ماكيشرفنيش نعرفك..باينة فيك من خدمتك خطافة رجال.. انا ضحكت باستهزاء:اوك.. سمحت فيها ومشيت واخة عصباتني هضرتها مي ماكيهمنيش كفاش كتشوفني.. آدم شافها سمحات ف هبة لي بان عليها لغضب وهزات كاس عصير متاجهة لشيماء..مشى بزربة نقد لموقف تالآخر لحظة.حيدلها لكاس.. درت شفتو كيحيد ليها لكاس وهي مورايا عرفتها كانت ناوية عليا..ناري شنو هاد لمريضة تسلطات عليا..حمدلله لي حبسها.. خنزرت ومشيت عند سي صابر قلتلو عليها.. جاوبني:ماتديش عليها راها كتقيل لاصقة فآدم وحيت مامعبرهاش ماكتبردش ليها..خوي دماغك من داك النوع.. انا:زعما ماشي اون كوبل؟؟ صابر:ههه فين عمر آدم كان اونكوبل..كيقيلو يدورو بيه لبنات وهو ماعلابالوش ويقدر يدوز معاهم وقت ويبقى بوحدو من بعد.. بقيت نفكر مع راسي(دونك بو بنات..ونيت راها باينة عليه..اصلا كون ماكانش واعدها بشي حاجة ماتلصقش فيه هكا تفووو علا جنس)زدت كرهتو علا تصرفاتو..شفت فحسام لقيتو واقف مع خطيبتو دورت وجهي وبقينا متلفين لوقت تا سالات لحفلة ورجعنا لدار.. آدم رجع لدار نعس اما حسام وصل بسمة عاد مشى لدار... رحاب بدات تحسن وفكرات ترجع لخدمة ومع ليوم الاحد كلشي عطلة فكرات تخرج تبدل جو كماعالله تولي لاباس..

داز نهار نورمال اهم حاجة فيه صابر طلب من آدم يرشح مدير اعمال لشيماء حيت من دبا بداو يجيوها لعروض..وداكشي لي دار آدم واول واحد فكر فيه هو منصف..حيت وقعلو مشكل فخدمتو وكان باغي يدير خدمة خفيفة وممتعة وماغيلقاش حسن من ماناجمنت..واصلا ماغايثيقش فشي حد كثر منو.. منصف سمع كلشي من آدم وعجبو لعرض وداك الساع فهم بلي آدم كيبغي شيماء وكيفكر فيها وفمصلاحتها بزاااف.. رحاب رجعات لخدمة حسام عاملها عادي شي لي قصحها بزاف حيت ماسولش فيها..كلما كانت كتبغي تقولو قصة حملها كتولي تسكت وهي كتخيل غواتو وطلبو انها تجهض وهي ماتقدرش دير هكا.. دازت فترة وتعرفت علا مدير اعمالي كان شخص ضريف وكيحاول يوصلني بطريقة نقية ومزيانة.. منصف:تشرفت بمعرفتك شيماء.. شيماء:الشرف ليا.. منصف:نتمنى لخدمة تكون مزيانة بيناتنا.. شيماء بابتسامة:انشاءلله.. منصف كيهضر مع بالو(فري آدم كيعرف يختار وباينة فيها ضريفة فوق لقياس).. اما حسام كان كيساين فوقاش تسالي الانتخابات ويتهنى من داك الخطوبة المزورة ويقدر يبني حياتو علا اساس.. رحاب كلما كتحاول تفتح لموضوع مع حسام ماكتقدرش.ولا كتوقع شي حاجة توقفها..ولاو يجيوني عروض فكاع المدن المغربية.. مرة كنسافر مرة كنخدم فمدينتي وركبت طيارة اخيرا ههه..تباركلله كنجمع فلوسي وبديت نقلب علا دار فموقع زوين نعيشو فيها وابتداءا من لعام جاي خوتي غنقريهم انشاءلله فالخاص وغنخسر عليهم فلوس بزااف باش يخدمو احسن خدمة ويتعلمو احسن تعليم..ونشاءلله غنتسجل فباك حر باش ندوزو صيف الجاي..ماما صحتها ولات سافا حمدلله وديما كندير ليها كونطرول.. ليوم رحاب فاقت وعوالة تقول كلشي لحسام.. مشات لخدمة وهي كطمن ولدها بلي باباه غيعرفو كاين.. وصلات لخدمة دخلات لمكتبها كانو متحمسةتا شافت حسام داخل هو وبسمة وشادالو فيديه..تصدمات جاوها الدموع..هزات ليهم راسها بابتسامة خارجة من قلب مجروح.. حسام:جيبي لينا جوج قهوة..ياك أ بسمة؟ بسمة:وي بيبي.. جرها حسام ودخلو تزدحات رحاب فوق لكرسي عرفات بلي ماكاينش مجال باش تكون هي معاه..ناضت وجدات لقهوة.. حسام جلس علا لمكتب وبسمة قبالتو.. حسام:علاش جيتي هنا ليوم؟ بسمة:بابا قالي خصنا نبينو بلي لخطوبة حقيقة.. حسام:اوووف خطوبة خطوبة والله حتى ندمت علا الساعة لي سايرت فيها باباك علا هاد لفعلة.. بسمة تقصحات مي صبرات راسها:تا نتا مابقى والو تقريبا شهر ونص وتسالا الانتخابات وكل واحد يشد طريقو.. حسام بلا حشمة قاليها:كنتمنى.. بسمة صرطات لمسران بزبلو وسكتات.. اما رحاب دخلات لقهوة وعينيها فالارض عطاتها ليهم وخرجات مقررة انها تقدم استقالتها وتمشي فمرة..

رحاب كملات لخدمة بزز فداك النهار وخلات ورقة فوق مكتبها فيها استقالتها..دخلات عند حسام.. رحاب:سي حسام انا ساليت خدمتي نقدر نمشي؟؟ حسام:آه سيري.. بقات رحاب كتشوف فيه بعينين مدمعين ومقداتش تخيل بلي هادي آخر مرة غتشوفو.. حسام شافها بقات واقفة:مالك خصك شي حاجة؟ رحاب:ل لا..تهلا فراسك اسي حسام وبونصواغي.. حسام حنى راسو يكمل شنو بقى ويمشي بحالو.. هبطات رحاب وهي كتودع لمكان..حسات بقهرة كبيرة فقلبها..شنو كانت متوقعة وشنو وقع مي كلشي اقدار والولد لي فكرشها هو لي غيصبرها علا فراق حبيبها.. مشات لدار جمعات حوايجها والصبح عطات سوارت لكاري وشدات التران باتجاه لمدينة لي ساكنة فيها ختها دنيا.. صباح جديد ليا..مشيت لكافي وتماك تلاقيت ب منصف..شربنا قهوة.. منصف:جاك عرض جديد.. انا:بصاح؟؟ منصف:وي وغير فكازا..مي غتعرضي فيه 2لباسي..والمبلغ 2مليون..انا وافقت وتوقعتك توافقي.. انا:اوك صافي..مي فوقاش باش نوجد راسي؟؟ منصف:غدا نمشيو وغديري بروفا وبعد غدا العرض.. انا:اوك.. تلاقا منصف ب آدم وهضر ليه علا العرض وبلي وافقو بجوج وغيكون فافخم اوتيل فكازا.. آدم:علاش ماقلتيهاليش فلول؟؟انا هاد لعرض مارتاحيتش ليه.. منصف:علاش مالو؟؟ آدم:فين عمر لعرض كيكون بين ليلة ونهار..نورمالمو سيمانة كاع كيتعرفو علا الطاقم والخدمة والمصمم والقفاطن ماشي غير يوماين..هادو واش غير كيلعبو..اصلا اوتيلات كازا كيكونو فيهم ناس فشكل.. منصف:اصاحبي ماتخافش..مالك..راه غنكون معاها كون هاني..وتا حاجة ماغتوقع فشكل.. آدم:مي والله قلبي مامرتاحش.. منصف:هاداك غير بعدك عليها كيخليك فهاد لحالة خخخ.. آدم:وا هنينا اصاحبي.. منصف:هههه ها هو ساكت.. رحاب الطريق كلها وهي كتبكي وتمسح تامدليها واحد الشاب كلينيكس.. رحاب خداتو ومسحات نيفها لي ولا حمر:ش شكرا.. شاب:باراكة عليك من لبكى..راه الدموع ماكيرجعو والو.. رحاب زادت فوتيرة لبكى بحال شي حد مقهور فحياتو.. شاب:اي حاجة عندها حل بلا ماديري فراسك هكا.. رحاب حنات راسها ساكتة وكتبكي فصمت.. مشيت لدار وجدت راسي وجمعت حوايجي..قلتها لماما دعاتلي بالتوفيق وخرجت لقيت منصف كيساين ركبت معاه باش نوصلو فليل نرتاحو وغدا تبدا لخدمة.. كان عاجبني لحال بحياتي واخة فيها تمارة مي فيها حيوية ونشاط عمرني حسيتهم قبل.. آدم رجع لدار وعيى يخوي دماغو من داكشي والو..مشى جمع فاليز ديالو وقال لخوه بلي غيسافر يوماين حيت قنط..وحسام مامانعش حيت شافو تبدل وولا من الخدمة لدار.. مشى آدم..هز طوموبيلتو وسافر واخة معطل مي فرحان حيت غيكون قريب لحبيبتو..

وصلات رحاب لدار ختها تسالمو مزيان.. دنيا:توحشتك اختي بزاااف والله.. رحاب:ههه صافي ها انا جيت فمرة ومافتبقايش توحشيني كاع.. دنيا بلهفة:حلفي؟ رحاب:والله هههه.. دنيا:اممم وعلاش زعما؟ رحاب:صافي قنطت من لعيشة بوحدي باراكة عليا.. دنيا:اوا مرحبا بيك تا انا و وليداتي ديما بوحدنا.. رحاب بسمات وقلبها محروق.. دنيا لفرحة ديالها بختها ماخلاتهاش تنتابه لحالة ختها دنيا:نوضي بدلي حوايجك احبيبة وانا غنحط ليك لعشا غتكوني عييتي بالسفر.. رحاب:واخة اختي.. وصلات شيماء ومنصف لاوطيل لي غيباتو فيه..خداو جوج بيوت حدا بعضياتهم ودخلو ينعسو حيت عياو فالطريق.. آدم غادي فالطريق ناشط وعاجبو لحال.صونا علا منصف فيقو من نعاس.. منصف:اممم الو.. آدم:هههه افيق معانا اصاحبي.. منصف:شنو بغيتي ا صاحبي راه ياله حطيت راسي.. آدم:بغيت نعرف غير فين نتوما ابوراس خخخ.. منصف:حنا فاوطيل ... لي شومبر 455 و 456 كاين شي اوامر خرا؟ آدم:ههههه صافي هادشي لي بغيت بونوي.. منصف:وا تلااااح وهنينا.. آدم:اوا واخة فيك هههه لقيتيني ناشط وصافي اما كون وريت مك كفاش نتلاح خخخ.. منصف:ههه بونوي.. قطع آدم وكمل طريقو..وصل اخيرا لاوطيل طلب شومبر قريب ليهم.. دخل وتلاح فوق لفراش مبتسم.شوية ناض دوش ونعس.. رحاب سالات لعشا وناضت تجمع ودنيا نعسات ولادها ورجعات.. دنيا:شنو كديري؟رتاحي راك عاد جيتي انا غنجمعها.. رحاب:عادي اختي تا نتي كتعياي.. تعاونو وجمعو ومشاو ينعسو فبيت واحد ودنيا قابلاتها.. دنيا:رحاب مالك احبيبة؟حالتك ماعجباتنيش.. رحاب:عيانة بزااف بالسفر..غدا نشاءلله نهضرو اخيتي.. دنيا عنقاتها حيت حسات بيها مهمومة:اوك رتاحي دبا من بعد ونهضرو.. نعسو بجوج ورحاب حيت مهدودة من السفر وكانت محتاجة تحس بالحنان دغيا نعسات.. صباح جديد واحداث جديدة.. فقت كنتكسل..دوشت ودهنت كريماتي وجمعت شعري تا نمشي ويقادوهلي لبست جامبسوت بيضة مع صباط باج وصاك ديالو وميك اب خفيف حيت غيقادوني ابخي..صونيت علا منصف باش نفطرو ونمشيو لبروفا..وخرجت من بيتي تا كنتفاجئ بمنظر قبالتي..ناري سي آدم هنا مافهمتش شنو جا يدير هنا.. آدم شافها قبالتو عجبو لحال بسم وزاد قدامها مبتسم:صباح نور شيماء..

شيماء كدور عينيها:صباح لخير.. آدم:اكيد مستغربة بلي انا هنا؟؟ شيماء:الصراحة آه.. آدم:ههه تا انا معروض لحفلة د غدا.. شيماء:آه اوك.. آدم:غادية تفطري ياك؟ شيماء:غادية نشوف منصف باش نهبطو نفطرو.. آدم:اوك ياله نشوفوه بجوج.. شيماء:علاش نتا كتعرف منصف؟ آدم تلف:ا لا غير شايفو معاك شي مرات.. شيماء:امم اوك.. مشينا خطوة بخطوة بجوج..دقيت علا منصف وهو يخرج لابس.. منصف:ا شيماء تلاقيتي آدم؟؟ آدم حل عينيه فيه وعض علا شنافتو تحتانية:امم كتعرفني ا سي منصف؟ منصف عاد توكض:ا آه وشكون مايعرفكش اسي آدم نتا وسي حسام.. بسمت ليه:ياله نهبطو نفطرو خصني ظانتعطلش علا لبروفا.. منصف:آه اوك ياله.. شد منصف لباب وزاد حداهم وآدم ركلو برجليه تا جاتو الضحكة..اما شيماء ماسايقة خبار.. هبطنا جلسنا مجموعين وفطرنا ب 3..آدم كان قبالتي كلما كنعلي عيني كيبسم ليا..ماعرفت مين طولت فيه الشوفة شفت حاجة جديدة مازال مافهمتها..شنو كيقصد؟وعلاش مين كيشوف فيا هكا كنسى شنو دار من قبل؟لا لا من الافضل نبقى بعيدة عليه..سالينا لفطور ونضنا مشينا بعدما سلمنا عليه.. آدم بقى بوحدو متبعهم بعينيه وكيحك راسو ويضحك..اما شيماء مشات تالفة من شوفاتو لي كتعيى تهرب منهم بزز منها كتبقى عاقلة عليهم وفبالها.. رحاب حلات عينيها تبدل عليها لجو تا شافت راسها فبيت ختها عاد استوعبات شنو وقع..حسات برغبة تشوف حسام..شافت فالساعة لقاتها 9:00 بقات تفكر انها فهاد اللحظة كتكون فالمكتب وكتشوف حسام..حطات يديها علا قلبها لي مقصح بزااف شوية هبطات يديها لكرشها وتفكرات ولدها تنهدات حيت اكيد خصها تقول لختها كلشي.هادشي ماغيتخباش بزااف.. حسام اول مادخل لمكتب انتابه ان رحاب ماكايناش استغرب ودخل لمكتب ديالو حيت توقع تكون تعطلات وصافي.. رحاب غسلات وجهها ومشات تفطر مع ختها.. رحاب:صباح نور.. دنيا:صباح لخير حبيبة..نعستي مزيان؟؟ رحاب:امم مزيان..مشاو الدراري لمدرسة؟ دنيا:ههه اه ماكيمشيو تا كيحمقوني خخخ..

رحاب بسمات وجلسات تاكل.. دنيا جلسات حداها:راه مازال مانسيت لهضرة دلبارح..خصك تقوليلي شنو لي خلاك تقرري تجي لهنا.. رحاب ساكتة وهي تكمل:انا عارفة بلي مخبية عليا شي حاجة..ومن الافضل تخوي قلبك عليا مادمتي ضربتي هاد طريق كاملة تالهنا.. رحاب شافت فيها بجدية:متأكدة باغية تعرفي؟؟ دنيا تخلعات:ا اه اكيد..قولي دغيا.. رحاب حنات راسها:انا حاملة.. دنيا تصدمات ماعرفات باش تبلات:ح حا شنو؟؟؟ رحاب:انا غلطت مع مديري ودبا حاملة منو.. دنيا:لا لا مايمكنش هادشي لي كنسمع..نتي ختي رحاب لي ربيتها علا يدي دير هكا..لا اكيد كنحلم اهئ اهئ مايمكنش.. رحاب كتبكي:كتاب عليا اختي اهئ اهئ والله كانت اول وآخر مرة..وماشي حيت باغية نغلط مي حيت كنت من شحال هادي كنبغيه وفاش سافرنا بجوج وصلني لبيتي ووقع لي وقع والله ماقديت نحبسو اهئ اهئ عقلي غاب وقلبي خاني أهئ وتالدبا ماعارفاش كفاش غندير باش نساه..قلبي كيتحرق اقسم بالله اهئ اهئ حاسة براسي خسرت كلشي الا هاد لولد لي فكرشي..تقدري تقولي عليا مانسواش ومكلخة وحقيرة مي ولدي هو لي مصبرني علا لي انا فيه..عرفتي علاش؟حيت طرف من حسام حبيبي اهئ اهئ كنبغيه بزاااف وماعرفتش هادشي تاليوم فاش ماشفتوش وانا متعودة نشوفو..فاش ماسمعتش صوتو واخة يكون كيغوت عليا..كيغاندير نساه وحبو كيجري فدمي..حاسة براسي كنموت اهئ اهئ.. ناضت دنيا كتبكي عنقات ختها كتهدنها:شوتتتت تهدني صافي اهئ اهئ انا ماباغياش نخسرك..اجي رتاحي ومن بعد نكملو هضرتنا.. جرات ختها ودخلو لبيت خلاتها ترتاح وشوية وجدات ليها لفطور وداتو ليها.. وصلت لموقع لبروفا كان كلشي تماك..دخلت انا ومنصف تعرفنا علا المصمم والعارضات ودخلت قادوني وبديت نقيس ونتمشى بالقفاطن كيف لعادة.. منصف كان كيوصل الاخبار ل آدم وشي مرات كيصور شيماء ويصافطلو..وهو كيفرح وكيبقى يحقق فكل فوطو مستمتع..لبنات جلسو قبالتو عاجبهم وحاطين عليه..هو علا عينيه شافهم تحت نظاظرو.ماداهاش فيهم حيت صافي شيماء عمرات ليه عينيه..شوية ناض خلص ومشى يتسارا ويبدل لجو بالطوموبيل.. حسام عيى صابر وفتالي خرج لقى رحاب مازال ماجات تعصب حيت ولات تخدم بالرشوق وماكلفتش راسها تعلمو بغيابها وهو محتاجها فالخدمة بزااف..مشى لجيهة مكتبها لقى ورقة حاطاها وفوقها ستيلو باش ماطيرش.. هزها وقراها. "سي حسام..سمحلي بزاف..كنت باغية نقولك بلي ماغاديش نبقى نخدم هنا مي ماقدرتش..كنتمنى تقبل استقالتي وتعرف بلي هدا كان اصعب قرار كان ممكن ناخدو..شكرا بزااف علا كلشي وسمحلي مرا خراا..نتمناك تكون بيخير ديما" حسام ماعجبوش لحال هو كان مرتاح فالخدمة معاها بزااف وولف طبعها وتصرفاتها..حس بلي داك الغلطة اثرات عليها حيت من نهار وقع داكشي واحوالها تبدلات يمكن يكون هكا حسن.اصلا كان كيحس بيها كتأزم فاش كيكون مع بنت خرا وهو مايتمناش يشوفها كتعذب خصوصا انها بغاتو بزااف وعطاتو اهم حاجة فحياتها بلا تردد واخة هو ماقدرش يبغيها ولا حتى يفهمها شنو وقعلو..هز لورقة دارها فجيبو ودخل لمكتب عيط علا كريمة حيت نيت آدم مسافر وهي لي استلمات لخدمة فبلاصة رحاب...

سالينا لبروفا ورجعت لاوطيل انا ومنصف..طلعت لبيت رتاحيت ومن بعد دوشت وبدلت عليا لبست جلابة خفيفة فلخضر حد الركبة مخيطة بلكحل و واسعة جاية مستيليا بالكمام وشعري طلقتو كيف كان مصوب طبيعي ولبست صباط كحل عصري.قاديت وجهي خفيف دغيا وهبطنا نتعشاو.. تماك لقينا سي آدم شاد طبلتو وكيساين لعشا..بدا منصف كيقولي حشومة نخليوه ياكل بوحدو وفري جاتني حشومة واخة انا كنت ماباغياش نديرونجيوه يقدر يكون كيساين شي حد.. منصف:سي آدم سافا؟؟ آدم:سافا حمدلله سي منصف.. منصف:الا بغيتي تعشا معانا مرحبا..هادشي الا ماكنتيش كتساين شي حد.. آدم:لا ههه بالعكس مرحبا انا اصلا ماكنبغيش ناكل بوحدي.. منصف:عارف.(بدا يتلف)ا زعما كلشي كتجيه صعيبة ياكل بوحدو.. آدم كيبقى يتفقص من اغلاط منصف لي كثير شك شيماء وفنفس لوقت كتجيه الضحكة علا شنو ولا كيدير.. جلست ساكتة وآدم جبدني:كيداز نهارك ولبروفا ديالك؟ شيماء:بيخير حمدلله..ناس مزيانين.. آدم:اممم هادشي لي بغينا.. شيماء:كفاش؟؟ آدم:اممم زعما ها...مهم مزيان.. هزيت راسي ليه وسكت.. حطو لينا لموني وانا مازال ماتعلمت الاغلبية دالاكلات.. منصف:شنو تاكلي اشيماء؟ آدم حس بيها توترات وماعرفات ماتقول بغى ينقد الموقف.. آدم:تسمحيلي شيماء نختارلك اكلة ماغتندميش الا جربتيها؟؟ انا حسيت براسي رتاحيت وهو مبسم كيشوف فيا..عجبني لحال وهزيت راسي:آه علاش لا؟؟ آدم ابتسم تا بانو سنيناتو كاملين:اوك.. عيط لكارصون وطلب ليا وليه نفس لبلا ومنصف طلب لراسو.. جابو لينا لماكلة دقتها الصراحة زوينة مي ماقديتش مانسولش.. آدم:شنو رأيك؟؟ شيماء:زوينة بزااف مي بغيت نعرف شنو هو لمكون الرئيسي ديالها.. آدم:صومو..سمك صومو من اجمل واحلا انواع السمك عندي..(كناكل ونتصنت ليه بتمعن حيت بغيت نفهم)هنا دايرينو مدخن مع خضر كتناسب معاه.. شيماء:اممم بنين اصلا اي حاجة مدخنة كتكون لذيذة.. آدم:وي كاينة.. منصف:تا انا بغيت ندوق خخخ.. آدم:نطلبلك بلا اخور؟؟ منصف:لا انا ندوق غير من عند..(خنزر فيه آدم وهو يبدل شنو كان غيقول)م من عندك ا سي آدم تسمحلي؟. آدم:هه وي خودو تا كلو انا فليل ماكناكلش بزاف.. شيماء:علاش لا؟راه تقدر تجوع.. آدم:ولفت هاد السيسطيم وتا نتي خصك تولفيه.. شفت فيه بنظرة استغراب.. آدم:باش يبقى جسمك قابل لخدمة عرض الازياء خصك تحافظي علا صحتك وتنقصي من لعشا حيت هاد لوجبة هي لي كتزيد الكالوريز بزافف دونك تغلاضي بلا ماتحسي..سيغطو الا تبعتي بحال هاد الاكلات لذيذة.. شيماء:لا مامستاعداش ندفن شبابي وانا حارمة راسي..بالعكس ناكل وندير سبور باغاليلمو.. آدم بسم حيت شاف انها كتشبهلو فطريقة اختيارها لعيش دون قيود.. آدم:اممم اصلا الا كنتي ديما هكا صدوندار ماتخافيش علا راسك ههه..

تعشينا فجو مرح اول مرة نحس بلي سي آدم مريح تالهاد الدرجة..بديت شوية بشوية نسى شنو قالي اول مرة واخة انا ماباغياش نسى..سبحان الله كأنه ماشي نفس الشخص لي كان رئيسي واحتاجيتو ومالقيتوش..كأن هدا واحد آخور لفرصة عرفاتني بيه وخلاتني نكتشف جانب محبوب ومتواضع فيه.. حسام رجع لدار تعشى وتكى فبلاصتو حاس بلي كلشي ضدو هاد الايام..علاش وكفاش يمكن حيت كان كيختار ديما الطريق الساهلة لي عقدات دبا عليه حياتو كلها.. طلعنا لبيوتنا كاملين..سلمت عليهم:تصبحو علا خير.. آدم:تصبحي علا خير.. منصف:بونوي شيماء.. دخلت لبيتي خليتهم واقفين بجوج.. آدم غير شدات شيماء لباب شنق علا منصف ودخلو معاه لبيت.. آدم:واش لمك بعقلك ولا ل؟ا راك حمقيتيني ديما كتبغي تكحلها كتعميها.. منصف غير كيضحك:والله ماكنعرف منين كتسلط عليا داك البلادة ههه مي بزز مني اصاحبي سنين دالعشرة ضروري مانعرفك مزيان ونغلط حداها.. آدم:واراه كنعيى نوصي فيك اصاحبي.. منصف:شوفف واخة نعياو نخبيو غيجي ليوم لي تعرف فيه كلشي.. آدم:وي جوسي مي ماشي دبا.. منصف:جيسبيغ خخخ.. مشى منصف لبيتو وخلا آدم غارق فاحلامو الوردية..اول مرة يتعشى معاها ويهضرو بحال كاع الناس هدا فحد داتو انجاز ههه.. جا الصبح فقت دوشت ولبست بزربة باش نلتحق بالعرض.. منصف دق عليا وهبطنا مزروبين كلينا دغيا ومشينا من دام الساع وحنا فالتحضيرات.. رحاب فاقت لليوم تاني بعيدة علا حسام وكتحاول تقنع راسها بلي هكا حسن..ولاد ختها كيحاولو يضحكوها ويلعبوو معاها حيت عزيزة عليهم مي هي سرعان ماكتفكر كلشي وكتسهى غير ختها لي كتحس بيها وحاولات تنسى لغلط لي دارت وباغية تخرجها من شنو هي فيه..آه رحاب لي كان عقلها كلو فالخدمة والقراية وباغية توصل بعيد بتخطيطها لمستقبلها وعمرها مادارت الدراري فراسها ها هي نهار بغات تخلات علا كلشي وضحات ولكن هي لي جات فيها..رحاب فليل كانت عاودات لختها كلشي علا حسام وبلي خطب بنت من طبقة راقية شي لي خلاها ماتصارحوش تا بحملها..دنيا فنظرها هادشي غلط حيت تاهو خصو يتحمل المسؤولية معاها ولكن مين شافت ختها مصرة وحسات بلي مابغاتش تنزل من قيمتها وطيح كرامتها حداه فهماتها..اصلا واحد خاطب وبرجوازي اكيد غيقولها طيحيه ولا غيفرض عليها تبعد..اللهم تبعد لراسها بلا ماتساينو يقول ويجرحها...

بدا العرض كنت ولفت هاد لجو لبست قفطاني لي فالاحمر ملكي جابني تيتيزة وشعري زيدوهلي جنب واحد مع ميك اب زوين فالعينين وعكار لون الشنايف..كنت متألقة لدرجة ان كلشي اشاد بجمالي.. جات نوبتي ودخلت كلي ثقة واخة ضروري من شوية ديال التوتر..بقيت ماشية تا شفت آدم قبالتي فكرسي..بسم ليا طولت فيه الشوفة وكملت لمشي ديالي... دخلت وكنت فرحانة بزااف ماعرفتش علاش فينما دورت وجهي جيهة شي مرايا كنتخيل شوفتو فيا..سالينا لعرض وبدلنا علينا..دخل عندي منصف.. منصف:مبروك شيماء كنتي واعرة.. شيماء:هههه شكرا ربي يخليك..(كنقلب بعيني مع جنابو) منصف:مالك كتقلبي علا شي حد.. شيماء:ا لا والو..ياله نمشيو؟؟ منصف اوك غنساينك برا.. مصمم العرض تدخل:لا مستحيل ضروري تكملو معانا لحفلة.. شيماء:غير سمح لينا مرا خرا.. لمصمم:لا والو..اكيد خصك تبقاي نتي كنتي من اهم لعارضات عندي..اصلا بزاف عجبهم لخدمة ديالك وهكا تقدري تلقاي عروض..دونك بقاي.. منصف شاف فيا:اوك حنا غنبقاو.. شفت فمنصف حيت حسيت بلي مامرتاحاش:كون غير خليتينا نمشيو.. منصف:لا حشومة هو طلبنا بزااف دونك خصنا نبقاو ومنها تعرفي علا ناس وعروض جداد.. شيماء:اممم اوك.. كنت لابسة كسيوة زرقا طويلة بالكمام والضهر مشبك مع صباط مارو. منصف:ياله مشينا.. شيماء:اوك.. خرجت كنشوف شكون كاين والجميل ان لقاعة لاصقة فمكان لعرض..نيشان دخلنا انا ومنصف ولجو جاني فشكل..كاينين ناس كيديرو شوفات فشكل فكاع لبنات ماكنتش مرتاحة..ومابانش ليا آدم..حسيت بالخنقة وحنا تما..انا عروض غيجيوني من عند ناس كيحسبو طاي دلبنات بعينيهم..هادشي كنا كنعرضو لقفاطن اما كون كنا عرضنا حوايج مثيرين ماعرفت شنو يديرو.. شيماء:منصف انا مامرتاحاش فهاد لبلاصة بليز خلينا نمشيو.. منصف:صافي تانتي الله يهديك..غير شوية ونمشيو هكا باش مانخسرو علاقتنا مع تا واحد..راك عارفة بحال هادشي كيتحسب علينا دونك نصبرو شوية..لابد من النفاق الاجتماعي.. شيماء:بفففف شوف كفاش دايرين وكفاش كيشوفو فلبنات كاملين..كرهوني فهاد لحفلة.. منصف:ضروري تلقاي بحال هاد الناس..حيت هادو هما لي كيخسرو اموال الدنيا باش يشاركو فهاد العروض ويستمتعو ويمتعو كاع لبنات..بالنسبة ليهم هادشي هو كلشي.. شيماء:تفووو علا ناس.. منصف:خصك تعودي..مي اكيد حنا غنبقاو بعادين عليهم.. كنت كنكمل هضرتي معاه تا شفت واحد قبالتي عاض علا شنافتو وداير فيا شوفة مقززة..تصدمت بقيت نتأكد واش كيشوف فيا ومين تأكدت خنزت فيه مزيان.. تعصبت وشفت ف منصف:شوف انا غنمشي بحالي وماغنبقى تا دقيقة هنا..بغيتي تمشي معايا اوك سي نو بقى هنا.. منصف:شوووتت تهدني صافي ياله نمشيو.. خرجنا مزروبين وكانت معصبة حيت مايشرفنيش نكون فبحال هاد البلايص لي كلهم وسخ وطمع فلبنت.. هاداك لي شاف ف شيماء شير لرجالو يخرجو موراهم انتقاما علا الشوفة ديال التقزز لي شافتها فيه..

آدم كان كيساين فطوموبيلتو حيت منصف قالو شوية ويمشيو ومين شافهم تعطلو بقى يصوني علا منصف لي كاع ماجاوب حيت تيلي سيلونص..آدم مابغاش يعيق ويدخل وبقى كيساين علا برا.. منصف نسى كاع آدم ومابقاش علا بالو.. خرجنا متاجهين حدا الطوموبيل تا كنحسو بشي حد مورانا..فهاد اللحظة كان آدم كيقلب فتيلي ويصوني وماردش لبال.. ماحسيت تا لقيت شي حد شدلي فمي باش مانغوتش ولاخور ضرب منصف تصدمت بديت نتنثر منو ومحاول نغوت والو بحال شي فيدور مالقيت كينديرلو..لخوف سيطر عليا كنت غنسخف ومنصف قدامي داخ وكبحاول ينوض كيولي يركلو ولاخور شتدني وجارني لبلاصة خرا.. بدام لخر لي فيا هزيت رجلي وركلتو ملور تا طلق مني وغوت باعلى جهدي.. شيماء:عتقووووووناااااا.. مامات شيماء كانت ناعسة وفاقت كتغوت:بنتييييي...اعود بالله من الشيطان الرجيم..اعوذ بالله من الشيطان الرجيم الله يحفظك ليا ابنتي..يسرا ناضت بصوت لغوات جات كتجري.. يسرا:ما ماما مالك؟ياك لاباس؟ ماماها:كابوس ابنتي الله يحظر السلامة..عيطيلي علا ختك بغيت نطمن عليها دبا..قلبي مامهنينيش.. يسرا شافت الساعة:غتكون مازالة فالخدمة وراكي عارفة فوقت لخدمة كطفي التلفون.. ماماها:لا جربي ابنتي بغيت نطمن عليها دبااااا.. يسرا:اوك اوك تهدني انا دبا نصونيلها.. بدات يسرا تصوني"الرقم المطلوب غير موجود فالخدمة المرجو اعادة الاتصال لاحقا.." يسرا:ماما كيف قلتلك طافي.. ماماها كتحك صدرها بالخوف:شوفي منصف عاوتاني ابنتي الله يرضي عليك.. يسرا:اوك.. بدات تصوني شحال ماكيجاوبش.. يسرا:ماجاوبنيش باينة مشغولين.. ماماها:والله حتى قلبي واكلني عليها.. يسرا:تهدني اماما هاداك غير حلم ونشاءلله مامنو والو..شوية تسالي خدمتها وتصوني طمنا وتلقاي راسك خفتي علا والو.. ماماها:انشاءلله.. تكات يسرا حدا ماماها معنقاها وبقاو يساينو يجي شي اتصال يطمنهم علا شيماء...

يتبع