أنا و الشقيقان الجزء الخامس

آدم رجع مكره لبلاصتو لعب بالجهد هو هاد المرة ومقندش تا حد ناقدر يهضر معاه.. سالا بزربة وانا كنت كلعب لكرش..داز من حدايا خنزر فيا ومشى..حبست وبقيت نشوف فيه غادي..وشي بنات قبالتي حاضيينو وكيهضرو عليه باينة عجبهم..خنزرت فيهم وهزيت حوايجي وقفتلو فباب لفيستيير كنساينو يخرج..تا بان ليا خارج.. آدم شافها فلباب كتساينو تفاجئ.. شيماء:سمحلي علا قبايلا غي كنت عيانة باللعب.. آدم:سبور كتفتح الدماغ وكتخلي بنادم ينسى همو ويحيد لينيغجي نيكاتيف ماشي يتقلق.. شيماء تعصبات وطلعات غوباشتها بغات تمشي حيت شافتو غي ما زايد فيه.. شدها من يديها:فين غادية دبا؟؟ شيماء كتشوف بعيد ومعصبة:غنمشي ندوش.. آدم:سيري ها انا نساينك نفطرو بجوج.. عجبني لحال ملداخل وبغيت نتفشش:بلا ماتلف وقتك علا ودي.. آدم عيى صابر وضحك:سيري وباراكا من قصوحية الراس ولا ماغيعجبك حال.. حنيت راسي ومشيت دوشت ولبست جمبسوت ثوب العسكر مع صبادري خفيفة فالزيتي وشعري كان فازك طلقتو يتهوا وخرجت لقيتو علا برا كيساين.. آدم:بالصحة.. شيماء:يعطيك الصحة ..تا نتا بصحتك.. آدم:هههه علا سلامتك لي تفكرتي..ياله نفطرو.. بسمت ومشيت معاه . جلسنا طلبنا فطور وسولتو:داك النهار ماعجبتينيش كنتي بحالا مبدل ياك لاباس؟؟ آدم:انا نهارر؟؟ شيماء:فاش كنتي عندنا فالدار.. آدم:امم اه..لا والو غير ضغط لخدمة دارها.. شيماء:ماتفهمنيش غلط مي بغيت نسولك حيت كنعتابرك ا امي ديالي وبغيت نطمن.. آدم غي سمع داك امي تفكر كلشي وتزير:امم عارف..تا انا كنعتابرك امي..شكرا بزاف.. ماعرفت علاش جوابو ماعجبنيش حنيت راسي وسكت.. آدم:كيبقات ماماك وخوتك؟ شيماء بابتسامة:حمدلله..ماما عندها نتا عزيز مين مشيتي وهي كتشكر فيك.. آدم بسم:لقلب عالقلب.. عليت عيني فيه وتمنيت هاد لكلمة تكون ليا(سمحيلي ا ماما خخخخ) سالينا لفطور ونضنا نخرجو.. آدم:ياله نوصلك.. شيماء:لا بلاش.. آدم:هضرة وحدة قلتها.. مشيت معاه كنشوف لداك الهيبة والرجولة ديالو..وخصوصا فاش كلقى لبنات حاضيينو ماكنكرهش نبعدو علا الانظار.نخبيه مايشوفو حد من غيري..استغربت فراسي وفتفكيري بسمت بوحدي وخنزرت فلبنات حيت مفتخرة براسي غادية معاه وهما لااا خخخ..

ركبت معاه طلق ليا الموسيقى لي كتعجبو..كانت كالم وزوينة واخة مافهمتهاش.. شيماء:ديالاش هاد النوع ديال الموسيقى؟؟ آدم:جاز مي كالم..عجباتك؟؟ شيماء:اممم بزااف.. بقينا غاديين موسقين تا وصلنا..ماسخيتش بيه الصراحة..جبد سي دي وعطاه ليا:هدا بحال دقبايلا تصنتي فيه اكيد غيعجبك.. خديتو عاجبني لحال:ميغسي.. مديت يدي ليه تسالمنا وخرجت وقفت فباب لعمارة وهو حاضيني بسمت ليه وشيرتلو ومشى..ماكانش يسحابلي بلي هاد اللقاء غيوقع بعد منو حوايج بزااف لي ماكنتش متوقعاهم. طلعت لدار كنغني وناشطة..بست ماما ودخلت لبيتي..تا لقيت منصف كيصوني عليا..علمني بلي كاين عرض فمدينة خرا بعد اسبوع مي خصنا نمشيو بعد غدا..فرحت ولخلصة كانت مزيانة.قلتها لماما وبديت نوجد راسي عاجبني لحال.. آدم رجع لدار تكى كيفكر ويعاود يفكر وفالتالي اقتانع بداكشي لي فبالو.. سافرت وكان اسبوع متعب وطويل..كنت غنعرض 2قفاطن..عييت غي باش ختارولي لي ناسبني..قنطت بزااف كنساين غي فوقاش نرجع..منصف لي كان مونسني وكيصبرني.. اخيرا لعرض..بقوة لي عييت من لبروفات كنساين غي فوقاش يبدا لعرض ونتهناو..دوزتو ابهى حلة كلشي فرحو بيا..وفاش سالا كان ليل رتاحيت حيت عييت داك النهار..ولاغدا رجعنا... وصلنا اخيرا كنت مشتاقة لخوتي وماما..و واعدتهم بلي نرتاح غي شوية ونسافرو حيت الصيف..وتاهما قنطو.. دخلت لبيتي تكيت..جا علا بالي آدم قلت نصافط ليه مساج خيت شحال هادي ماهضرنا"سلام..صافا؟؟" بقيت نساين طلعلي لاكيزي دغيسيبصيو(وصول لمساج)ساعا ماطلعاتش ليا..قلت يمكن غي ريزو بلاتي تا يوصل علا خاطرو هاد لمساج هههه فوقما جا لخير ينفع.. حسام هاد الايام كان مصبر راسو بزز بقاو تقريبا يوماين ويتسالاو الانتخابات..كيساين غي فوقاش يتفك..واخة سمع بسفر شيماء فرح حيت من الافضل تكون بعيدة واخة مايمنعش دي ابيل كانو هضروهم بلا مايحبد سيجي غي كيحاول يدير بلاصتو فقلبها.. داز نهار ولاكيزي ماجاتش..قلت نصوني عليه..ساعا عطاني طافي..استغربت بزافف آدم عمرو طفى تلفون ديالو..جاتني فشكل بزااف.. دازو تقريبا يوماين.وكلما كنصوني والو مافهمتش يقدر يكون بدل نمرتو..قلبت فلواتس لقيتو مي ماطلعش ليا فوقاش دخل..صافت تماك مساج.والو..طلعات ليا شرطة وحدة تفووو دبا انا باش غنعرف..اوفف زايدون انا مالي علاش دايرة حالة..دبر راسوو.. حسام اخيرا جا نهار لي غيتعنى من لمختاري وعائلتو..لمختااري نجح فالانتخابات ودخل لبرلمان كيف لعادة.كانت فرحتو كبيرة.بخلاف بسمة لي كانت عارفة كلشي واخة هكاك كان عندها أمل وحسام عمرو ماعطاها تا شوية دالاهمية واخة حاولات..اللعبة تسالات صاافي وغادي يفسخو لخطابة... كنت فالصالون تا سمعت ماما تنهدات دخلت لقيتها شادة فقلبها.. انا بخوف:م ماما مالك؟؟ ماما:و والو غي ضراتني هاد لبلاصة.. انا:لااا شتي علاش كنقولك ما تجهديش راسك..شتي اماما شنو كديري فصحتك..واش باغية تقتلي راسك؟؟ ماما:آ بنتي عادي كندير شغال خفيف غي لي كتب الله وصافي.. انا:ياله لبسي نديك لطبيب.. ماما:لا ماكاين لاش!! انا:شوفي راه هشرت معاك..شحال هادي ماكانش عندنا باش نداواو ودبا حمدلله..ماغاديش نخليك هكا بلا مانعرف شنو فيك..ياله اجي لبست جلابتك ونمشيو.. ماما:واااخة ابنتي...

لبسنا وشدينا طاكسي ومشينا لوبيطال لي كانت دارت فيه العملية.. دخلنا وسولنا علا لبروفيسور لي دارها ليها.. بدا يقلبها ودار ليها راديو وصور اشعة.. دكتور:لا لاباس..ماكاين والو غي يمكن حيت تحركات فشي لحظة بزربة وقعلها هكا..حمدلله بيخير.غنعطيك غي شي فيتامينات مزيانين تاخدهم باش تولي حسن.. انا رتاحيت:اووو حمدلله..شكرا دكتور.. ماما:شتي ابنتي!قلتلك ماكاين والو.. انا:مي هكا حسن جينا واطمنا.. دكتور:اه برافو عليك..بنادم خصو يكشف بكري قب ماكتزيد الخالة تعقد.. بسمت وسلمنا عليه وخرجنا.. كنا خارجين تا دزنا من حدا لبيت لي كانت ناعسة فيه ايام العملية..لهلا يعاودها ايام.. بقات ماما كتشوف تماك وهبطنا ركبنا طاكسي ورجعنا لدار.. رتاحينا شوية سمعت تيلي صونا..كان حسام.. قلت لماما:هدا حسام.. ماما:جاوبيه.. حليت لخط:الو سي حسام.. حسام:سي ههه غي حسام(تفكرت آدم بهاد لهضرة)سافا؟؟ انا:حمدلله ونتا؟ حسام:مزيان..مهم بغيت نقولك كاين واحد لعرض وماكرهتش نتشاوفو نهضرو فهادشي.. انا:بصاح عرض!..اوك كون قلتيها ل منصف هو لي مسؤول علا الاعمال.. حسام:ههه لا لمهم نتي تعرفي فلول.. استغربت وشفت ماما كتبسم بوحدها:اممم اوك..معاياش؟؟ حسام:مع داك 7:30 ندوز عليك واخة؟! انا:اوك..بسلامة.. قطعت معاه وياله جيت نهضر مع ماما وهي تقولي.. ماما:تفكرت فين شفتو ههه.. حليت عيني فيها:شكون؟؟ ماما:آدم ههه اخيرا تفكرت فين شايفاه.. انا بابتسامة:فالتلفزة؟ههه ماما:فلوبيطال.(عقدت حجباني)جا وسلم عليا وسولني علا حالتي..وفاش سولتو شكون..قالي من اطر الاطباء لي دارولي لوبيغاسيو.. انا:ا آدم!!عانداك غي يكون تخالط ليك مع شي حد؟. ماما:لا انا متأكدة..ضحكة ديالو ماتلفش ليا..واصلا كنت متأكدة فايتة شايفاه من قبل.. انا:م ماعرفت والله..مافهمتش.. ماما:وانا كنقول مالو عزيز عليا هكا ههه صدق جا وزارني..

بقيت ندورها فدماغي تا عييت والووو.. جات لعشية..نضت لبست كسيوة خضر مغلوق بلا كمام وحد الركبة مجموعة علا الذات مي مامعيقاش..طلقت شعري مع ميك اب خفيف ولبست صباط وصاك فلكحل..ساينت يصوني عليا وغي صونا هبطت عندو.. سلمت عليه ومشينا..دخلنا لمطعم وجلست قبالتو.. حسام:كيبقيتي صافا؟؟كيداز السفر؟؟ شيماء:اممم حمدلله ربي يخليك..ونتا صافا؟؟ حسام:حمدلله.. شيماء:حقى كيبقى سي آدم..لاباس؟؟ حسام:لاباس مي راه سافر.. حليت عيني فيه:سافر لخدمة؟؟ حسام:ماكنضنش..واقيلا لقى خدمة مزيانة فالخارج وغيستقر تماك.. تصدمت مابقيتش قادة نهضر:ا اممم مزيان.. حسام:وي واخة موالفو قدامي مي هو ختار يسافر..وماقديتش نمنعو حيت من ديما حياتو هكا وماكيبغيش يبقى فبلاصة وحدة.. بقيت ساكتة كنساينو حيت مابقالي مانقول ومع بالي كنفكر"علاش سافر وماقاليش!دبا صافي ماغاديش يرجع؟ولا نشوفو..زعما كان لقاءنا آخر مرة هو ديال النادي..بففف". حسام:اوا كاين شي خدمة؟. حاولت نتبت راسي:هادشي علاش جيت عندك..حيت قلتي كاين عرض ليا.. حسام بسم:الصراحة ماقصدتش عرض فالخدمة!!. جاوبتو:وشنو؟؟ حسام:قصدت نفكرك بالعرض ديالي.. قلتلو باستغراب:انا عرض؟؟ حسام:دغيا نسيتي؟زعما فاش عرضت عليك الزواج.. حسيت براسي تزيرت:اممم اه تفكرت.. حسام:شيماء انا ليوم فسخت لخطابة ديالي مع بسمة..وجيت نطلب منك للمرة التانية الزواج.. بقيت كنشوف فيه شحال:الصراحة حيت كنتي خاطب مافكرتش فالزواج.وو.. حسام:مي انا قلتلك فكري علا خاطرك تا نحل مشكلتي وها انا حليتها.. عييت نكابر فالتالي سولتو:سي حسام ماما قالتلي بلي آدم زارها فلوبيطال..وهي من شحال كتمنى تعقل فين شافتو ياله عقلات..زعما آدم زار ماما؟؟ حسام عقد حجبانو حيت هو كيهضر فموضوع وهي فموضوع جاوب بلا مايفكر:امم طبيعي حيت هو لي دفع تكاليف العملية.. تصدمت وقربت عندو وهو قبالتي فالطبلة:ش شنو؟؟هو لي المحسن لي دار لماما لعملية؟؟ حسام عاد عاق براسو شنو دار:ا اممم..الصراحة هو لي تبرع..من اول ماشافك كتبكي فاش جيتي طلبتيني ومشيتي..سولني عليك وعاودت ليه كلشي قالي بلي هو لي غيتبرع..وكان موصيني مانقولك والو..ساعا ها انا قلتهالك بلا مانحس..ههه شتي شنو درتي فيا؟؟ انا حنيت راسي كندورها فراسي وغانحماق"لا مايمكنش..بففف قداش كنت مكلخة.علاش ماحسيتش؟آدم نفس الشخص لي طلبتو وبغى يستاغلني فالتالي عاوني..مافهمت والو اوووف" حسام شافها سهات بدا يفيقها بهضرتو:شيماء.كتسمعيني.فين مشيتي؟؟ انا:ا أ انا معاك.. حسام:مهم خلينا فموضوعنا..واش تقبلي تزوجي بيا؟؟ عليت عيني فيه ومتأكدة من راسي:سمحلي كنت نتمنى مي مانقدرش..الله يسهل علبك فماحسن مني.. حسام تصدم ماكانش متوقع يكون هكا جوابها.بقى مشوكي.. نضت من بلاصتي:بسلامة عليك وشكرا علا لعشا.. مشيت بلا تفكير ركبت طاكسي ودموعي هابطين..علاش آدم سافر؟وعلاش ماقالي والو؟اوفف حاسة بشي حاجة مهمة ناقصاني..علاش مشيتي ا آدم علاااااش؟؟ وصلت لدار..دخلت لبيتي شافتني ماما تبعاتني.. ماما:بنتي مالك؟؟ انا:م ماما عرفتي علاش زارك آدم فلوبيطال؟؟ ماما:لااا علاش؟؟ انا بحسرة:حيت هو المحسن لي خلص تكاليف العملية من لول لتالي.. ماما:مسكين الله يكثر خيرو ويعطيه علا قد لخير لي دار فينا.. بديت نبكي وماما تصدمات:ب بنتي مالك؟(عنقاتني)علاش كتبكي؟؟ انا:آدم سافر..مشى علا برا اهئ اهئ ماعنديش تا كيندير نشوفو ولا تا نشكرو علا شنو دار معانا..

حسام بقى كيشرب شحال فداك المطعم حيت ماتوقعش يترفض..عمرها جاتو لبالو يوصل لدرجة يخطب بنت وترفضو.علاش زعما؟شنو فيه ناقص علا عباد الله؟؟ياك كثر من نص لبنات كيتمناوه وهادي لي تمناها هو مابغاتوش..ناض خلص وعينيه حومر باش يرجع لدار.. ماما:شوتتت ماتبكيش..واش تالهاد الدرجة مقهورة حيت سافر.. عنقتها كنبكي ماعرفتش شنو نجاوب واش اه ولا لا..مي فري انا مقلقة حيت سافر ومابغيتش نفقدو..حاسة براسي مخنوقة ومابقيت قادرة ندير والو.. نوضاتني ماما دخلت دوشت كماعالله نرتاح شوية و والو..خرجت تكيت ودرت لكيت فودني بقيت نتصنت علا الاغاني.طحت غي فالاغاني العاطفية لي كدمر..درت راسي ناعسة مي قلبي ضارني ودموعي هابطين..كلشي نعس نضت لبالكون جلست فالضو خافت كنسمع وبدات اغنية إليسا"سلملي عليه" بقيت نسمعها ونتخيل احداث وقعات بيني وبين آدم من اول نهار شفتو فيه فالطواليط..لباقي الايام لي كنت ماكنحملوش وكنتهرب تا من الشوفة فيه..ودبا ها انا كنتمنى نشوفو.. "سلملي عليه..روح وسلملي عليه..قلو مشتاقة ليه..قلو مافي مثلو حدا..حبيبي عاطول المدى روح سلملي عليه...مشتاقة كثير نرجع نتلاقا يوم..ننسى العتب واللوم..نحكي سوا نضحك سوا نتمشى عدروب الهوا..نام واصحى عا اديه..." تفكرت نهار كنا فلوبيطال وكنساينو منصف يفيق وحليت عيني لقيت راسي بين يديه ومتكيين علا بعضياتنا..آخر وجه شفتو قبل مانعس واول وجه شفتو فاش فاق..حسيت براسي تزيرت وبغيتو دابا يكون حدايا..نعنقو ونسبو حيت سافر وبعد بلا مايقولي والو..آهههه شحال توحشتو وشحال عرفت اهميتو فحياتي..ياخسارة ماكنحسو بقيمة الحاجة تا كنفقدوها..فري هادا غلط فينا وكون بقى حدايا ماشي بسهولة غنعرف بلي فري وليت كنبغيه ومانقدرش نعيش حياتي بلا بيه..اوووووففف واخيرا فهمت احساسي والتضارب لي كان كيوقعلي فاش كنشوفو مي للاسف فهمت معطلة..

بكيت تا بردت ودخلت لبيتي غطيت راسي بمخدة ونعست بزز.. صباح جديد واحداث جداد.. شخص خرج من طوموبيل وهز عدة الصيد من لكوفر متاجه لشاطئ بعيد حط لكرسي ديالو وجلس ورمى الصنارة.. شخص:نشوفو ليوم شنو غتعطينا ا لبحر.. بقى جالس شوية عاد صيد وغي طلع حوتة مقادة بسم وعلاها حدا وجهو.. آدم:ديما كاين أمل.. بقى مكمل فالصيد تا جا حداه رجل كبير فالسن:بونجوغ موسيو.. آدم:بونجوغ اونكل.. الرجل:كيل جولي بواصون.. آدم:ميغسي اونكل..تي بو لا غوكيبيغي.. الرجل:نو..جو بو كاغدي اين اوطخ بلي جولي هاهاهاها.. آدم:هههه اوك اون فا فواغ.. بقاو كيتعاندو ويشوفو شكون يصيد كثر ولي يقدر يصيد اكبر وحدة.. فقت عيني مبوقين شفت فالسقف تفكرت كلشي استغفرت الله ونضت غسلت وجهي وتوضيت وصليت.. خرجت نشوف خوتي وماما..لقيتهم كيفطرو ومنصف معاهم.. منصف:صباح لخير ا نعاسة.. انا:صباح نور.عليكم كاملين.. ماما:اجي تفطري ابنتي.. انا:مافيا لي ياكل.. منصف بقى كيشوف:مالك؟واش فيك شي حاجة؟؟ انا ماقديتش نهضر ميلت راسي زعما لا.. منصف حسها مدمرة:شوفي سيري لبسي حوايجك نديك لواحد لبلاصة.. انا:مافيا لي يخرج.. منصف:هاء وراه هادشي مهم لخدمة.. انا:ماقادة ندير والو أجل كلشي.. منصف:لاااا هادشي ديالك بزاف..شوفي غتمشي وتلبسي شنو ماعجبك لمهم تلبسي وغتمشي بزز منك..راه انا مدير اعمالك ومازال ماستخدمتش كاع صلاحياتي معاك..تشوفيني ضريف تحكريني..مي لخدمة خدمة.. تعصبت وخنزرت فيه والدموع وقفولي فعيني:وا ماقاداش اعباد الله.. منصف بقات فيه وزاد غوت عليها:عندك 10دقايق اما تسربي راسك ولا ماغاديش نتفاهمو.. تعصبت ودخلت كنزدح فلباب لبست كيطمة كحلا وكاسكيط بيض وشعري جمعت حادر ودرت نظاظر وصبادري كحلا.. ماماها:حشومة عليك اولدي هس ماشي بيخير ونتا كضغط عليها.. منصف:ماتخافيش اخالتي انا اصلا غنخرجها باش نبعدها علا كاع لهموم وغنسيها داكشي لي مديرونجيها كوني هانية.. ماماها:اوك ولدي.. يسرا:اوا فطر بعدا قبل ماتمشيو!! منصف بسم وشاف فيها:اوك نفطر علاش مانفطرش ههه.. حشمات وحدرات راسها.. خرجت عندو مغطية وجهي تقريبا كامل..شافني غلباتو الضحكة.. منصف:ياله نمشيو. ماما:غنساينوكم فالغدا.. هزيت راسي وخرجت.. ركبنا فالطوموبيل وبقى سايق ماعرفتو فين غادي ومابغيتش اصلا نسول..شنو لفايدة؟؟ وقف غبلاصة عالية وخرجنا..طليت كيبان ليا لبحر تحت منا..شفت فيه.. منصف:جبتك لهنا حيت فينما كنكون انا و واحد صاحبي مديرونجيين ولا مقلقين كانجيو لبحر..وثيقيني كرتاحو..حيت لبحر كيسمعنا ويفهمنا وماكيجاوبش..وحنا محتاجين نهضرو ونقولو ونغوتو ومايعاتبنا حد ولا يعطينا نصائح..بغيتي ترتاحي وتخرجي اعصابك..غوتي هنا ماكاينش لي يسمعك من غيري وغيرو.. شفت فيه وحيدت نظاظري دموعي هبطو..وطلقت اكبر غوتة فحياتي عمرني تخيلت راسي غنغوتها.. انا:آآآههههههههههههههههههه.. منصف كيشوفها كتغوت من قلبها وتبكي وتعاود تغوت تا طاحت لأرض وتسالا جهدها..جلسات دايرة يديها علا وجهها وكتشهق.. مشى بزربة خدا مناديل من الطوموبيل وعطاهم ليها تمسح بيهم.. خديتهم من عندو مسحت وجهي وشفت فيه..حنى عندي منصف:دبا شوية؟؟ عليت راسي مع ابتسامة مجروحة:امممم. جلس حدايا:ودبا عاوديلي مالك..علا حد علمي كلشي غادي معاك مزيان..شنو لي خلاك توصلي لهاد الحال؟؟

بقيت كنشوف قبالتي ونتخيل صورتو قدامي.. انا بصوت مبحوح:صافي مشى... منصف:شكون؟؟ شفت فيه:آدم!! منصف باستغراب:ونتي علاش مقلقة تالهاد الدرجة حيت مشى.. غلبوني دموعي:ح حيت عرفت بلي كنبغيه اهئ اهئ اهئ.. منصف تصدم:ب بصاح..كتبغي آدم؟؟وحسام؟!! شفت فيه بزربة:علاش مالو حسام؟؟ منصف:ياك حسام خطبك ونتي موافقة عليه.. تصدمت:ك كفاش؟شكون قالك وافقت؟واصلا باش عرفتيه خطبني وانا ماقلتها لتا واحد؟؟ منصف تلف حس براسو زرب:امم ا والوو والو.. خنزرت فيه:لاااا نتا تحت راسك كاين شي حاجة..قولي باش عرفتي؟ منصف:آدم قالي.. انا بصدمة:ا آدم؟؟ منصف:آه حسام قال لخوه بلي طلبك لزواج ونتي وافقتي.. تعصبت:لااا لا مستحيل..مايمكنش حسام يكون دار هكاا..علاش علاش كدب..انا والله ماوافقت بالعكس هو قالي خودي وقتك فكري وانا مافكرتش اصلا حيت ماكانش عندي لغرض بيه..ولبارخ تلاقينا ورفضتو بلا مانطول معاه..وفالتالي يقول عليا وافقت عليه..حشومة عليه لاش دار فيا هكا؟ منصف:هاء تا انا مافهمتش..هكا قالي آدم! جاوبتو:وقالي بلي آدم هو لي تبرع لماما بفلوس لعملية.. منصف:قالهالك؟؟ خنزرت فمنصف:ك كنتي عارف؟؟ منصف داخ مابقى عارف لا يخبي وولا يسكت.. انا:واصلا اجي علاش عاودلك آدم..وليتو صحبة تالهاد الدرجة؟؟جاوبني نتا عارف هادشي منين فهمني.. منصف استسلم:انا عارف كلشي من لول.. بقيت مركزة معاه باغية نفهم.. منصف:آدم...هو اعز صاحب عندي واقرب واحد ليا(حليت فيه فمي)سنين وحنا عشران..وفاش شافك محتاجة لمدير اعمال قالها لصابر وكنت انا ساليت من واحد لخدمة ماعاجبانيش وعرض عليا نخدم معاك.باش يبعدك علا كاع الطرق السلبية لي ممكن توصلي ليها فالدومين..هو كان عارف بلي نتي نقية وخاف عليك من اي واحد..وكان ثايق فيا حيت كيعرفني مزيان..واي عرض كان كيجيك كنقولهالو وكندرسوه بجوج عاد كنشوفو واش يصلاح ليك ولا لا..جاوك بزااف دالعروض رفضناهم حيت ماغينفعوكش..وكان ديما كيسول علا اخبارك ويحاول يساعدك واخة كان عارفك ماكتحمليهش رغم كاع لمحاولات لي حاول معاك..بعدما غلط فحقك..(حنيت راسي عرفتو عارف شنو عرض عليا فلول)كان مأزم وكاره راسو..آدم كنعرفو مزيان عمرو حاول يستغل شي حد فالحاجة..اصلا ماناقصينوش بنات وكيقيلو تابعينو مي هو فاش دار معاك هكاك حس بغلطو وندم حيت عطاك صورة غالطة عليه..زايدون كلشي مقدر.يمكن وقع هكاك باش توصلو لهنا.. بقيت شحال كنشوف فيه:و علاش خبيتو عليا؟. منصف:ماكانش باغي يحسسك بلي هو مساندك.حيت غتقولي بلي كيحاول يرشيك باش تسامحيه.. انا:وعلاش هادي ماسميتهاش رشوة؟. منصف:هادا سميتو اهتمام..هو ديما كان كيهضر عليك ويفكر فيك..وعول يتقرب منك ويخطبك كاع(عيني فرحو)حيت فريمو كيبغيك..مي فاش حسام قالو وافقتي عليه حاول يبعد فمرة حيت ماغيقدرش يشوفك مع خوه بعدما تمناكي ليه..

بقيت كنشوف فيه تا هبطو دموعي..حنيت راسي كنبكي.. منصف:غتبقاي كتبكي؟؟باراكة راك طيبتي عينيك.. جاوبتو:توحشتو والله اهئ اهئ.. منصف:ههه مستغرب منك..فوقاش اصلا بغيتيه ونتي كنتي كتقيلي تهربي منو وتعامليه ولا أسوء ههه.. بسمت كنمسح دموعي:والله ماعرفت فوقاش..(شفت فيه بجدية)م منصف بليز بغيت نعرف فين مشى.. منصف:علاش باغية تعرفي؟زعما شنو غديري؟؟ انا:ماعرفتش والله مي بغيت نعرفو فين وصافي.. منصف:انا براسي ماحددش ليا..قالي غيمشي علا برا ومين سولتو فين بالضبط قالي تا يستقر ويقولي.. انا:مي حسام قالي لقى شي خدمة فالخارج ومشى يخدم فيها.. منصف:هاديك غي هضرة وصافي..قالها باش يخلي خوه يتفهم.. انا:اممم اوك..ودبا شنو باش نقدرو نعرفو فين كاين؟؟ منصف:عطيني وقت ونحاول نعرفلك فين بالضبط..منها تا ترتاحي نفسيا وتقدري تأكدي من مشاعرك اتجاهو.. هزيت راسي بالايحاب.. منصف:ياله نمشيو؟؟ انا:اوك..وشكرا بزااف حسيت براسي ارتاحيت.. منصف:ههه تا انا سيغطو فاش عرفتك كتبغي صاحبي ههه.. حشمت وحدرت راسي.. منصف:ناري علا لحشمة..فينك ا آدم فينك خخخ.. بسمت ودورت وجهي منو:وا صافي..مي نطلبك طلب.. منصف:آمري الالة ههه.. انا:ماتقول والو ل آدم..بغيتو يسمعها من عندي.. منصف:كوني هانية من هاد الناحية.. ركبنا الطوموبيل ورجعنا لدار.. حسام مشى لخدمة حاس بغربة فضيعة..ناس كلهم سمحو فيه بقى بوحدو..بدات القضية ب رحاب ومن بعد آدم ودبا شيماء..ولا يحس براسو منبوذ وتا واحد ماباغيه غي مجرد تفكيرو بهاد الطريقة..زرع فيه ألم وقهرة كبيرة كتأثر عليه فحياتو..فكر انه ل ربما يركز علا خدمتو اكيد غينسى شوية..عيط علا سي لمختاري.. لمختاري:ألو سي حسام صافا؟؟ حسام:ألو..صافا حمدلله طوا؟؟ لمختاري:حمدلله..نهار كبير هدا سمعنا صوتك.. حسام بجدية:شكراا..شوف عيطت عليك بغيت نطمن كن القضية لي قلتيلي علا الملتقى العالمي.. (لمختاري صرط ريقو):امم اه راه مازال كنحاول..ونشاءلله مايكون غي لخير.. حسام:حيت شفت هادشي طول بزااف..ونورمالمو مابقاش لوقت بزااف.. لمختاري:اممم كون هاني غندير كثر من جهدي.. حسام:اوك نتمناو خير ياله بسلامة.. لمختاري:بسلامة..تيييط تييط..ناري مشيت فيها..هادو مالقيتش كيندير نتواصل معاهم واصلا ماغيديوش بوصايتي حيت هاد العام خدامين فيه لي جون..تفووو شنو غندير فهاد الوحلة..الا مادخلوش لهاد الملتقى حريرتي غتكون حريرة بففف... حسام قطع معاه ومافراس مايتعاود..كمل خدمتو مع كريمة لي لاحظات التغيير عليه..مابقاش يغوت عليها وكيهضر مأدب بحالا تهرسلو الراس وكيبان عليه الهم..بقى فيها ولكن فاش كيكون هكا كيكون حسن..

تغدينا وتهاودنا شوية..وناض منصف يمشي..ويسرا وصلاتو لباب.. منصف:بسلامة زوينة.. يسرا بسمات بحشمة:بسلامة.. خرج فرحان وهي غي شدات لباب تكات عليها شادة فقلبها وكضحك.فيقها خوها لي عيط ليها.. عماد:يسراااا جيبي كاس دالما.. يسرا تنهدات ومشات جابتو ليه وجلسات حداهم.. انا علا غفلة شفت ف يسرا بانت ليا مبدلا وعينيها كيلمعو..كنلاحظ هادشي ديما ف شوفاتها بعدما كيمشي منصف.. وقفت:يسرا اجي معايا لبيت محتاجاك فشي حاجة.. يسرا:ا اممم اهاه.. دخلنا وجلسنا بقيت كنشوف فيها:عاوديلي.. يسرا بخلعة:شنو؟؟ ربعت يدي:منصف!! يسرا تصدمات حنات راسها لأرض.. شديت ليها يديها وبسمت:مالك ماتخافيش مني..انا سولتك حيت حسيت بشوفاتك اتجاهو تبدلو..دونك كاين شي حاجة..قوليلي احبيبة انا ختك ونبغيلك غير لخير.قوليلي باش نفهم ونقدر نعاونك.. يسرا:و والو..غي شوفات وصافي.. انا:واش كتحسي بيه كيبادلك المشاعر.. يسر:الصراحة..هو لي خلاني اصلا نحس اتجاهو هكا.. انا:كفاش؟؟ يسرا:كنت كنعاملو عادي مي هو كان مرة كيبسملي مرة كيقولي شي كلمة..وكيحسسني بلي انا مهمة عندو بزااف..هادشي علاش عجبني لحال وولفتو بزربة و... كملت انا:و ولا يعجبك هههه.. يسرا هزات راسها مزنكة.. عنقتها وبستها:الصغيورة ديالي تا هي بدات تهتم وتبغي..هههه ياسلام..وشكون اعز صديق عندي واصلا مانتمنالكش شي حد حسن منو ههه..(خرجت راسها وقابلتو معايا)لمهم عندي تكوني فرحانة وتا هو يكون كيعاملك مزيان وباغيك..اي حاجة تلفاتك ولا ماعرفتيش تصرفي فيها اجي قوليهالي وانا معاونك..ماتسرعيش وحافظي علا راسك وقيمتك حداه..حيت هادشي لي كيخليك ديما عزيزة واخة حبيبة؟؟ يسرا:اوك ختي كوني هانية.. خرجنا حداهم عاوتاني وماما عارفة بلي كاينة شي حاجة بيناتنا مي مابغاتش تدخل. آدم هز قفتو لي صيد فيها كثر من داك الراجل..تسالمو وكل واحد مشى فطريقو.. ركب طوموبيلتو ومشى لدارو لي خارجة علا لمدينة..دخل لكوزينة حط لحوت ونقاه ودارلو لملحة وليبزار والحامض وبدا كيشويه ويقليه..غي لقياس لي ياكل..قطع سالاظ بزربة وحط ماكلتو وكان جاه الجوع بجو لبحر..كلا وهو حاط تيلي فيه صورة شيماء قبالتو ومين حس بلي حرام عليه يشوف فيها وهي غتكون مرات خوه..طفى تيلي وناض طالع ليه الدم..دخل نيشان لدوش يحيد ريحة الحوت وخرج ب بينوارو وتكى يرتاح...

صونا منصف علا آدم لقى تيلي طافي..خلا تالمن بعد ويعيط ليه.. دازت فترة وكل واحد مشغول فحياتو..شيماء سافرت مع عائلتها الصغيرة يخيمو..دوزو وقت زوين ولكن ديما ناقصاها شي حاجة.رجعو ومرة كتخدم مرة كترتاح..حسام وقتو ولا غي لخدمة.صافي مابقى يتلاقا ب تاواحد ومسبق حياتو لمهنية علا الشخصية لي كيشوفها فاشلة.. آدم تكلف بالعلاقات الخارجية ديال الشركة..لقى خدمة زوينة ومريحة وفاش كيحتاجو خوه فشي سفر كيديرو واصلا هو ديما علا علم بمتطلبات الشركة وبالصفقات لي خصها ديرهم وهو راسم مخطط لخدمتو كاملة بالفترات ومتأكد من شنو كيدير.. رحاب كدوز نهارها فالخدمة وبداو يبانو عليها ملامح الحمل..وكتحاول تجمع فلوس بزااف باش تقدر تصرف علا ولدها ولا بنتها لي فالطريق وضروري تعاون ختها حيت تاهي عايشة معاهم..واخة ختها كترفض مي هي حقانية وكيبقى داك الفلوس مال يتامى وهي مستحيل تاكلهم فلوسهم وهما اكثر وحدين محتاجين ليها.. حسام مابقاش قاد يصبر حيت بداو يتعرفو شكون غيشاركو فداك الملتقى..وهو مازال ماوصلو خبار والو..عيط لمختاري وغوت عليه باش يعرف الجديد وهنا تفاجئ بلي لمختاري مالقاش وسيلة باش يتدخل..تعصب وسبو وقطع عليه..حس بلي كان مغفل فاش ثاق بلي واحد بحال لمختاري يقدر يعاونو يدخل لبحال داك الملتقى..تعصب وبقى يهرس ويغوت..كريمة خافت تدخل عندو خلاتو تا برد وخرج من لمكتب فمرة..وعيطات علا لميناج جاو قادو لمكتب من لول لتالي..كانت متأكدة بلؤ كاين سبب كبير خلاه يوصل لهاد الدرجة..ولا غيكون تشارجا بزااف وجا ليوم لي خصو يتفركع فيه.. حسام مشى لبلاصة بعيدة ولا حاس بخنقة كبيرة..توحش خوه وكان فامس الحاجة ليه..عيطلو باش يكالميه شوية حيت هو لي كيعرف كفاش.. حسام بصوت مبحوح:ألو آدم.. آدم:ههه حسام..عاش من سمع صوتك.. حسام:غي لخدمة ا خويا وصافي..نتا لي فين غابر من شحال هادي ماسولتي؟؟ آدم:غي الدهاوي وصافي..اوا كاين شي جديد.. حسام:لا والو..عرفتي داك الملتقى لي قلتلك عليه.وكنت شبه متأكد اننا غنشاركو فيه!! آدم:اه اههه عرفتو.. حسام:ماغنقدروش نشاركو فيه.. آدم:علاش شكون قالهالك؟؟ حسام:تا واحد مي لي غيشاركو فيه جاهم لخبار وبقالو بخيسك سومين دونك حنا ماكاينينش.. آدم:اوك قطع دبا انت غنعيط لواحد لامي يقدر يفيدني فيه.. حسام:اوك واخة عارف لاغيزيلطا..

قطع آدم معاه ودار اتصالاتو..اما حسام بقى مع الوحدة ديالو..حس بلي صافي تا حاجة مامقادة..كلشي ترون فوق راسو..تنهد وبقى كيشوف فداك لبلاصة بعينين كلهم حزن..شوية دار وركب طوموبيلتو ومشى.. دخل لدار والوقت كان تعطل حطو ليه لعشا.. لعاليا حسات بيه مبدل مي مابغاتش تكثر عليه.. لعاليا:بصحتك اولدي(بغات تمشي) حسام:جلسي كولي معايا.. لعاليا تشوكات.حسام لي كيقول هكا دارت شافت فيه:مالك اولدي؟؟ حسام:ماماليش غي مابغيتش نبقى بوحدي.. لعاليا حطات يديها علا كتفو:واخة اولدي.. جلسات كتاكل معاه وتشوف فيه كياكل بزز وبحالا هموم الدنيا فوق كتافو تا صونا ليه تيلي.. شاف لقاه آدم حل لخط بزربة.. حسام:آدم صافا؟؟ آدم:صافا صافا؟؟ههه وجظ راسك.. حسام:لاياش؟.مافهمتش.. آدم:حنا غنشاركو فالملتقى ههههه.. حسام وقف مصدوم:حلف.. آدم:أقسم بالله هههه هضرت مع صاحبي مسؤول تماك وقالي تا حنا كاينين.. حسام:هاء وعلاش مافخبارناش تالدبا؟؟ آدم:حيت مازال ماتعلنوش كاع السميات..زايدون صافي قلتلك وجد راسك السيمانة الجاية تجي تحظر.. حسام:ههه اوك..شكرا بزااف اخويا فرحتيني بزاف.. آدم:ههه عادي تا نتا بجوج بينا بحال بحال..ياله تهلا.. قطع آدم وحسام بقى يضحك بوحدو وفرحان سولاتو لعاليا.. لعاليا:امدرا اولدي شنو كاين؟. حسام بفرحة:غنشاركو فالملتقى العالمي للاثواب ففرنسا.. لعاليا:ههه مبررروك مبرروك ا ولدي.. حسام بلا مايشعر عنقها وحس بلي محتاج يتقاسم الفرحة ديالو مع شي حد.. منصف عيط لآدم وبشرو بالخبر..وتا كان منصف غيقولو علا شيماء وفتالي تراجع حيت هي لي باغية تقولهالو.. منصف سول آدم:اوا كيداير اصاحبي؟؟ آدم:عايشين.. منصف:واييه فهمنا.مي كيدايرة احوالك؟ آدم:حمدلله..مقابل غير لخدمة وصافي.. منصف:وتيتيز ديال بلجيكا؟؟ههه آدم:ههه لا والو مامساليش ليهم.. منصف:اوك مزيان هكاك حسن ليك.. آدم:خليك مني..كيدايرة لمدام دالمستقبل هههه؟؟ منصف:ههه لاباس حمدلله.. آدم بغى يسول علا شيماء وماقدرش:اوك ياله بسلامة عليك.. منصف:اوك صاحبي بسلامة.. قطع منصف وهو حاس بصاحبو مشتاق وماقادرش يعبر...كان للحظة غيصوني عليه ويقولو ولكن تراجع..وبلا مايزيد يطول هاد المهزلة ناض لبس عليه وخرج سايق ومامترددش ملي ناوي يديرو...

ليوم الملتقى.. آدم فاق من النعاس كيتكسل تا لقى مساج من خوه.. حسام"خويا سمحلي ماغنقدرش نحظر الملتقى..تقدر نتا تمشي فبلاصتي؟؟وماتخافش انا حجزت ليك طيارة من بلجيكا ل فرنسا مع 12:00 اوك؟؟سمحلي بزااف خليتك تالآخر لحظة..ومتأكد غتمثل شركتنا أحسن تمثيل..صباحك مبروك" آدم قراه بدا يحك فراسو وكيخمم فهادشي لي ماكانش متوقعو..هز تيلي عيط ل حسام..والو ماكيجاوبش..شاف الساعة لقاها 9:30 دونك مازال فيديه لوقت..دخل دوش بزربة وخرج تعطر وتقاد لبس خفيف تيشورط كحل وسروال جينز فلونو وصبادري بيضة جا تيتيز هههه..هز البلاستيكة لي فيها الكوستيم الجديد ديالو كان مخليه لمناسبة بحال هادي..وهز صاك فيك كاع لي غيحتاج ومشى باتجاه المطار.. دخل نيشان سول علا الحجز لقاه كاين جبد باسبور ديالو وخدا تيكي دالطيارة..حط لباكاج وجلس فقاعة الانتظار كيساين وقت الاقلاع..شوية بدا النداء..ناض ودخل لطيارة وبدات الرحلة ديالو.. اخيرا وصل رتاح وهو كيشوف راسو فهاد المدينة الساحرة اي زارها بزااف دالمرات ومايقدرش يحسب شحال..خدا طاكسي ومشى لدار عند صاحبو..كلما كيزور لمدينة كيلقى الساروت تحت الغرس لي حدا لباب..كيهزو وكيدخل اكيد بعدما كيستأذن منو.. دخل حط حوايجو وترخى فوق الكنابيا وكيحاول يريح دماغو حيت ليلة غتكون طويلة وخصها نفس طويل..الملتقيات كتكون عامرة بالناس من مختلف الثقافات وخص يكون عند صبر وحسن معاملة باش تكسب حب وثقة هاد الناس وتقدر تعقد معاهم صفقات عالمية تخليك تزيد لقدام.. ناض طلب ديليفري..كلا وتخشى فبلاصتو بعدما ريكل لغيفيي علا 18:00 حيت لحفلة كتبدا تالداك 20:00.. قربات العشية..نعس مزيان وفاق ناشط قبل تا مايضوني لغيفيي..دخل دوش ومشط لحيتو لكحلا طلع شعرو مشوك بوحدو وتعطر عاد لبس شوميز بيضة معاها كرافاط كحلا وفيست وسروال نفس اللون..ناري مع هو حروفو كوحل جا كيحمق..دار دي بوطون غاليين لشوميز شكلهم مستطيل فالاغجونطي فيهم زخارف كيبينو عراقتهم مع هو مبلي بزااف بيهم..ولبس صباط كلاس رش فالهواء عطر جيورداني غولد مان..باش ريحتو تكون منتشرة فالجو وكلشي يلاحظ وجودو خخخ..استنشقها مزيان وبسم لمرايا وخرج..ركب طوموبيلتو متاجه لاوطيل لي فيه الملتقى.. فاش وصل اسطالا الطوموبيل ودخل فالوقت المناسب عطاهم الاسم ديالو وتأكدو منو..عطاوه بادج فيه سميتو وسمية شركتو..عاد دخل كيشوف اهم اصحاب الشركات العالمية للنسيج موجودين هنا..وكل واحد معاه اطر قلال باش يعرف علا جودة منتوجاتو وطريقتها فجذب الانظار..بقى يفكر بوحدو"علاش ماجبتش شي حد معايا يعرف بمنتوجاتنا ويعطي صور عليها وعلا صناعتها..تفووو حسااام دارهالي علا قد فمي..زرب عليا وماخلانيش نقاد الامور كيفما موالف" بدا يتسارا ويسلم علا الناس تا جاه انصال بصعوبة باش سمعو بان ليه منصف لي كيصوني.. حل لخط وبعد علا الصداع:األو.. منصف:ألو صاحبي 100عام باش تجاوب.. آدم:وا راه بزز سمعتو..شوف راني فالملتقى خلي من بعد ونهضرو دبا مشغول.. منصف:لا لا ساين هادشي اصلا علاش عيطت.. آدم:هضر شنو؟؟ منصف:أنا علا برا خرج عندي راه مابغاوش يدخلوني.. آدم:هههه حلف نيت والله قنطان..اوك ها انا خارج.. منصف:ماتعطلش هانا كنساينك حدا الدخلة د القاعة.. آدم:صافي قطع هانا جاي ههه.. قطع آدم وهو متحمس بعدا منصف غيكون معاه وماغاديش يحس بالغربة هنا وهو بوحدو...

خرج آدم كيقلب مع جنابو مستغرب حيت مابانش ليه منصف عيى يقلب بقى يهضر بوحدو"ياكما لمو دايرلي كاميرا كاشي وكيتفلا..والله تا نخرجها من باباه"..جبد تيلي يصوني عليه تا تحطات علا كتفو يد تنهد وعاد رتاح بلي ماكذبش عليه.. 

آدم:حمدلله لي ماكذبتيش عليا(كيدور لعندو)ولا كون راني...

آدم غي شاف شكون قبالتو تصدم تسالا ليه لهضرة بقى حال فمو خايف يثيق.. 

شيماء بابتسامة مخلطة مع دموع واقفين فالعينين:سلام..

آدم تبلوكا بقى كيطلع فيها ويهبط وهز يدو دارها علا وجهها:ش شيماء؟؟ شيماء:هههه آهه انا ماتخافش هادي حقيقة وماشي حلم..

آدم:و ولكن كفاش؟كفاش جيتي لهنا وعلاش قوليلي؟؟ بسمات ليه وتذكرات باش تعاود ليه.. 

#فلاش_باك..

منصف كان متأكد من شنو عوال يدير وتاجه لفيلا صاحبو..دخل بعدما حلو ليه لقى حسام مستغرب من جيتو فهاد لوقت.. حسام:م منصف؟ياك لاباس؟ منصف:جيت نهضر معاك فموضوع مهم لابد تعرفو.. حسام:اوك جلس انا كنسمعك.. منصف بلا تفكير:آدم..(حسام كيتصنت بتركيز وعاقد حجبانو)آدم كيبغي شيماء.. حسام تصدم.. منصف:وقبل منك كاع..عارف لوقت لي عاون ماماها راه كان مهتم بيها ونوى معاها كاع لمعقول.. حسام بتعجب:و وعلاش ماقالهاليش؟؟ منصف:فاش كان غيقولها حس بيك بديتي تهتم بيها خاف يضرك..ولكن نتا فداك الساع جيتي وقلتيلو طلبتيها و وافقات عليك.. حسام حنى راسو منصف:وقرر يمشي حيت ماغاديش يوقف فطريقكم..حس بلي هو لي زايد فالقصة وبغى يتغرب منو يحاول ينساها ومنو مايضرش خوه الوحيد.. حسام تصدم:م ماكانش فخباري والله..كون غي صارحني.. منصف:شنو كتقول؟كفاش يصارحك ونتا قلتيلو تفاهمتو بجوج.. حسام:مي دبا مابقى والو بيني وبينها..شيماء مابغاتش نرتابطو.. منصف:تقدر تكون تاهي كتبغي آدم؟!! حسام علا عينيه بزربة منصف:ماعرفتي شنو كاين!! حسام:انا غنمشي نهضر معاها ونفهم وثيق بيا كيفما خويا تمنالي لخير وبعد باش نعيش السعادة..تا انا ماغديش نبخل عليه نشاءلله.. منصف:اوك يكون حسن..مي ماشي دبا خلي تالصبح دبا تقدر ديرونجيهم كينعسو شوية بكري.. حسام:اوك عندك لحق.. ناض منصف مشى بحالو وهو مرتاح نفسيا..اخيرا غيجمع دوك الجوج لي كيتعذبو ففراقهم...

صباح جديد فاق فيه حسام عوال يشوف شيماء ويهضر معاها قبل ملخدمة.. مشى تحت دارهم وصونا عليها تهبط.. كنت كنوجد لفطور مع ماما تا سمعت تيلي مشيت شفتو لقيتو حسام بقيت نفكر نحل لخط ولا لا..فالتالي فتحتو.. حسام:ألو شيماء صباح لخير.. شيماء:صباح نور سي حسام.. حسام:شيماء انا تحت داركم الا كان ممكن تهبطي بغيت نهضر معاك فشي حاجة!! شكيت فيه باغي يعاود معايا نفس الموضوع:ماكاين فاش نهضرو ا سي حسام و.. قاطعها:شوفي مايمشيش بالك بعيد..بغيت نهضر معاك بخصوص ا آدم.. غي سمعت آدم تخلعت:آدم؟مالو ياك لاباس فيه شي حاجة؟؟ حسام عرفها كتبغيه من لهفتها عليه:امم ماتخافيش ماوقعلو والو..هبطي وغتعرفي واكيد ماغاديش تندمي.. شيماء:اوك اوك..ها انا هابطة.. بسم حيت عرف هضرت منصف علا صواب وبقى يساينها.. انا سمحت فكلشي درت عليا جلابة خفيفة وقلت لماما عندي شي شغال وهبطت..غي دخلت فالطوموبيل سولتو:خلعتيني ياك لاباس؟! حسام:كاين كافي قريبة هنا نجلسو ونقولك.. شيماء:اوك.. مشينا شوية لقيناها ودخلنا جلسنا.. شيماء:هانا كنسمعك.. حسام:شيماء آدم يمكن تا هو كيبغيك..(تصدمت)وانا ماكنتش عارف والله..بسبابي بعد وخوى من هنا..باش نقدرو نتزوجو..مي ها حنا..وانا مايرضينيش خويا يتعذب وانا نتفرج فيه..كيفما هو فكر فسعادتي تا انا غادي نفكر فيها..والموضوع كلو ولا مقتصر عليك..الا كنتي تا نتي باغياه انا مستعد ندير اي حاجة باش نجمعكم من جديد.. بقيت حالا فمي فيه والدمعة وقفاتلي فعيني.. حسام:جاوبي ماتحشميش.. شيماء:انا الصراحة ماعرفتش شنو نقول ليك..آدم ولا بالنسبة ليا هو كلشي قبل تا مانعرف بلي هو لي عاون ماما وعاوني فمسيرتي دالخدمة ووقف معايا فمواقف كنت شايفاهم..(هبطات دمعة من عيني)ونهار عرفتو مشى قلبي تخطف مني وحسيت بلي شي حاجة ناقصاني..فقدت الامل انه غيرجع وعرفت راسي خسرتو.. حسام:مازال ماخسرتيه..انا كنت مستغرب من التغيير ديال خويا الايجابي وياله فهمت بلي لحب هو لي خلاه يولي هكاك..وانا غنكون اكبر اناني الا فرقتكم بيدي..داكشي علاش انا قررت نصافطك عندو..(بسمت)غتمشي نهار لملتقى وتلاقايه تما..غتكون احسن مفاجئة فحياتو..غيفرح بيك انا متأكد.. شيماء بفرحة:ب بصاح..مي صعيب عليا نسافر تماك بوحدي.. حسام:ههه هادي مقدور عليها..مدير اعمالك شنو كيدير؟؟خخخخ شيماء:هههه وي مي ماعنديش فيزا.. حسام:انا غنوفر ليك كلشي ياك عندك باسبور؟. شيماء:اه درتو فاش بديت لخدمة.. حسام:اوك.دبا غرجعو لدار غتعطيه ليا وانا غنتكلف بالباقي.. بسمت بعينين مدمعين:شكراا سي حسام خيرك عمري نساه.. حسام:سميتي غي حسام وغنكون خو راجلك نشاءلله هههه.. بسمت بحشمة ونضنا لدار عطيتو كاع لوراق فرحانة وهو ومنصف تكلفو بكلشي..عاودت لماما علا شنو وقع وحذراتني اني نخسر حبيب قلبي مي فنفس لوقت نحافظ علا راسي باش تبقى ديما قيمتي لفوق.. داز الاسبوع وحسام خلا تالآخر لحظة وعلم خوه بالتعذر ديالو علا السفر ومابقاش يجاوبو باش تكون نيت مفاجئة.. سافرت انا ومنصف فرحانين ومتشوقة غي نوصل ونشوف حبيبي..رتاحينا ف اوطيل و وجدت راسي فصالون تماك..لبست قفطان أسود مرصع باحجار كريمة من تصنيع الشركة ديالهم بلا كمام وكيلمع مع مضمة رقيقة .صباط عالي كحل وصاك واعر نفس اللون..ميك اب غامق شوية فالعينين وعكار لون الشنايف..شعري جمعولي جيهة وزيدوهلي لجيهة تانية جيت توتة وتأكدت من منصف ههه.. منصف:حالفة تحمقي الراجل هاد نهار هههه.. حشمت وضربتو يسكت.. مشينا باتجاه لاوطيل ومابغاوش يدخلونا..وهو منصف يعيط ل آدم يدخلنا..

تخبعنا ليه وشفتو وهو خارج بمشيتو الرجولية وزينو لي كيدوخني..ضحكت وهو معصب كيساين يلقى صاحبو شوية وتسالا صبري هزيت قفطاني بين يدي ووقفت موراه كنشم ريحتو لي معمرة المكان وتوحشتها..حطيت يدي عليه كنساين ردة فعلو..وغي شافني حسيت باشتيقاتو وقلبي ضرب فالمياتاين معقول هادا هو لحب لي جميع الحواس كتلغى فيه وكتخدم غي لغة العينين ونبضات القلب..بقيت نركز فيه حيت توحشتو بزاااف وهو كذلك وغي حط يديه علا وجهي تا انا تأكدت بلي ماشي حلم هههه...

#الرجوع_إلى_الواقع..

منصف كيتفرج فيهم بجوج وعاجبو المنظر.. آدم ضحك وبانت اشراقة فعينيه ماحس تا جرها عندو وعنقها مزيان وغمض عينيه بجمال اللحظة لي مابغاهاش تسالا.. حسيت بروحي رجعاتلي وقلبي مرتاح بحالا لقى بلاصتو.شكون هو هاد الشخص لي خلاني نحس بحال هكا؟؟كفاش قدر يمتلكني ونحس بطعم الحياة تا يكون حدايا..فري انا كنت عايشة مي لأول مرة كنعرف بلي ماكنتش عايشة بصاح..بحالا اليوم تولدت من جديد مع الانسان لي كنبغي..لي ضحى بكلشي علا ود سعادتي ولي فضلني علا نفسو وعاوني وقت احتاجيتو..اكيد تا حد مايستاهل حبي من غيرو..كنت فحضنو وحاسة بلي ملكت العالم وماكاينش شي حد فرحان دبا كثر مني.. آدم خرج راسو وهو مازال شدها من وجهها:شكون جابك هنا؟ درت وشيرتلو ل منصف لي كان متكي فالكولوار كيشوف فينا.. آدم ضحك من قلبو ورخى شيماء واخة مازال شادها من خصرها من جيهة وحدة.. منصف مشى باتجاههم وعنق آدم مزيان.. آدم شاف فيه فرحان:كيدرتيلها؟؟ منصف:حطيت النقط علا الحروف وصافي.. آدم تفكر خوه:هاء وحسام؟؟ منصف:اصلا حسام هو صاحب لفكرة.. آدم بقى كيشوف تالف قلتلو:صافي من بعد ونعاود ليك.. آدم بسم:اوك ياله ندخلو دبا.. منصف:اوك.. شاف فيا ضحكت ليه عطاني يديه شديت فيها مرتاحة..ناري صبيبعاتو شحال رطبين ههه.. مشينا ب3 وهضر آدم مع لي كارد والمسؤوليين وقبلو يدخلونا...

دخلنا وكنتفاجئ بجو الصراحة عمرني حضرتو..بسم ليا آدم ورديتلو الابتسامة.. منصف كيفكر مع بالو"ماكرهتش كون تا انا جات معايا يسرا كون تا حنا نحبو ههه شهاوني فهادشي لمساخط ههه" وقفنا مع ناس وسلمو علينا هنا عرفت بلي لخدمة بدات آدم واخة كلشي ماطلقش مني وكيهضر علا أثوابهم وانا كنسى فيه كنبقى حاضية غي تعابير وجهو وكفاش كيهضر مع كلشي..كلما كيسلم علا شي حد كيقربو عندي وهو كيبقى حاضيهم..بزااف توقعو اننا كوبل وشكروني ليه وطلبو منو يحافظ عليا وانا كنزيد نتنفخ هههه..وحداهم كيهز يدي كيبوسها ويرجع يكمل هضرتو علا لخدمة..الله يكون فعوانو انا غي ساكتة وعييت وهو مسكين لي كيتلاقاه كيسولو وكياخد لقفطان ديالي كأداة لجذبهم للاثواب..حسيت براسي عييت ومنصف قبالتي..استأذنت من آدم ومشيت عند منصف.. منصف:ههه عييتي؟!! شيماء:اممم عييت بالوقوف ونسمع نفس الهضرة..ههه الله يكون فعوان آدم.. منصف:اوا هادي هي لخدمة..سيغطو فهاد الملتقيات كتكون غي الاعادة ههه..بيني وبينك..هادشي لي خلاني نبعد علا خدمة البيرويات ونبدل.. بقيت كنشوف فآدم:امم عندك لحق..مي آدم قاد بشغالو انا متأكدة ههه.. منصف:ناري لحب كيطمس لعينين هههه.. ضحكت:هههه بااااز.. دار آدم وضحك ليا وهو كيكمل خدمتو ومركز معاهم..حاط يديه فجيبو وبريق مرسوم فعينين خلاه يصبر علا هاد الملتقى خخخ.. شوية بديت نشوفو كيوقف مع بنات..كيسلمو عليه ويضحكو معاه بقيت حاضياهم وطلعلي الدم.. منصف شافني قندشت فيهم:شيماء عادي راهم غي امي دالخدمة.. بقيت ساكتة كنشوف فيهم تا دار آدم..بقيت هكاك هو بسملي وانا مخنزرة.شوية سمح فيهم وجا عندي مدلي يديه:اجي معايا.. شديت يديه وشفت فمنصف بسم.. وقفني حداهم وحط يديه علا كتفي..لبنات لي كانو واقفين تلونو وانا عاد رتاحيت وتحليت مع راسي عاجبني لحال.. آدم(حوار بالفرنسية):نقدم ليكم شيماء..العارضة الرئيسية لشركتنا..و.. بقيت كنشوف فيه وهو يقولي:و حبيبتي ههه.. ضحكت ليه وهما تلفو.. وحدة فيهم:جيتو زوينين بجوج ههه.. جاوبتها:ميغسي.. بقى شادني وهو كيشرح علا الاثواب ديالهم.. منصف كيدور ويهضر مع ناس باش يتلف.. واخيرا لحفلة قربات تسالي..مشينا كلينا من لبوفؤ بجوج.. آدم:عييتي ياك؟؟ انا:اممم..مي عارفة نتا غتكون عييتي كثر مني وبزااف.. آدم:ماحدك معايا ماحاسش بالعيى كاع ههه.. انا:ههه..اجي بعدا شنو داك لكلمة لي قلتيلهم عليا؟؟ آدم كيدير راسو مافاهمش:امم انا كلمة.. ضربتو لصدرو حيت عقت بيه كيتفلا.. آدم:ههههه(جرني عندو)قلتلهم نتي حبيبتي..ياك نتي حبيبتي؟؟

حشمت مي واخة هكاك هزيت راسي.. آدم:لا قوليها.. انا:اممم.. آدم بدا يشوف مع جنابو:تفو الدنيا عامرة بزااف.. بسمت:ههه..ناكلو شي حاجة؟؟ آدم:كتبدلي سيجي هههه اوكك.. طلق مني وهزينا لماكلة ورجع سلم علا كاع الناس وكنتوقع غيعقد صفقات بزااف من هاد الملتقى.. عيطت علا منصف ومشينا.. منصف:اخيرا سالينا من هاد الحفلة.. آدم:ماتكونش بحالي هههه.. بقيت نشوف فيه وساكتة.. آدم تلف فشوفاتها مابقى قادر يقول والو.. منصف انتابه وجاتو الضحكة:مهم انا غناخد طاكسي نرجع لاوطيل.. آدم:لا خليك تا نوصلك.. منصف:لا بلاتي عليكم..انا عييت بزااف خصني نرتاح..لمهم ماتنساش توصل شيماء ههه.. آدم:كتوصيني علا حبيبتي؟!ههه انا تزنكت وحنيت راسي.. منصف:حشمتيها هههه صافي هانا مشيت..شيماء ماتعطليش راه ماماك وصاتني عليك اهيا هههه.. آدم:ههه ماغاديش نعطلها كون هاني.. مشى منصف وآدم شد يدي باسنا:ياله ركبي.. ركبت معاه.شد لباب ومشى لجيهتو..ساق بينا تا وصلنا لبلاج زوين مضويينو وفيه دي كوبل بعاادين.. جرني من يدي وحيدت صباطي وقربنا حدا لبحر وجلسنا فالرملة حدا عافية مشعولة تماك. جلس وجلسني متكية عليه.. آدم:شحاااال توحشتك(باسني فراسي مزير عليا)كنت غنموت باش نشوفك.. عليت راسي ودفعتو وبقيت نضربو لصدرو:اصلا علاش مشيتي؟علاش خليتيني؟؟عرفتي شحال تعذبت وانا محرومة من شوفتك وحاسة بلي عمرنا غنتلاقاو مرة خرا..حراام عليك عمرك تعاود ديرها.. جرني عندو:عمرني نخليك..كوني هانية..مي داك الساع ماكانش عندي حل آخور..حسام كان باغي يتزوج بيك وقالي بلي.. شديتلو فمو:والله ماوافقت عليه..هو توقع انا غنقول آه مي انا ماقلتهاش ليه..وقالي خلي وقت تفكري فيه وانا حيت ماحاسة بوالو اتجاهو مافكرتش اصلا وغي عاودها عليا فاش فسخ خطابتو قلتلو لا حيت تأكدت بلي.. آدم:بلي شنو؟؟ انا:بلي نتا لي فبالي.. آدم:عاوتاني خصك تعذريني انا توقعتك غتكوني لخويا..داكشي علاش بعدت..مي فوقاش حسيتي براسك كتميلي ليا؟؟ انا:ماما تفكراتك هههه وعرفات فين شافتك(آدم تزنك)فلوبيطال..وفاش تلاقيت حسام سولتو علاش تكوني زرتي ماما وهو بزربة قالي نتا كنتي المتبرع..شكراا ليك بزااف.. آدم كيحيدلها شعر علا وجهها:شوتت مابيناتناش..اصلا كان خصني نعاونك فاول لحظة..مي... قاطعتو:صافي نسى انا والله نسيت..ونزيدك عرفت بلي منصف صاحبك ههه(ضربتو)كذاااب ههه.. آدم:كان ضروري نحميك واخة من بعيد حيت داك الدومين صعيب بزااف..(بسمت وهزيت راسي)مي قوليلي علا حسام..مافهمتش.. انا:حسام عرف من منصف كلشي وهو جا وسولني علا مشاعري اتجاهك ومين تأكد قالي غتسافري عندو..حيت كيفما نتا تخليتي علا حبك بسبابو هو ماغيكونش اقل منك.. بسم آدم:مسكين..غتكون حالتو فشكل دبا!!.. انا:اممم مي نشاءلله كلشي غيتقاد مع لوقت ياك؟؟ آدم عنقني:وي.كاينة.. بقينا معانقين شحال..حيد لفيست ديالو ودارها عليا..اصلا ماكنتش حاسة بالبرد ويديه محاوطيني ومخشية فصدرو بحال بنت صغيرة..اممم علا احساس شحال زوين.. هزلي راسي:شيماء.. انا:اممم.. آدم:كنبغيك.. فرحت وعيني دمعو:تا انا..جريتو من عنقو عنقتو وهو خاشي راسو فعنقي وباسني تماك و فخدي..تا حسيت بيه غيقرب مني تلفن مي هو طلع راسو وباسني فراسي:نصبرو دبا ههه تا يجي وقتها احبيبة.. حنيت راسي حشمانة.. كنا مستمتعين باللحظة تا ناض:صافي باراكة الا بقيتي هنا غتمرضي..ياله نوصلك ترتاحي.. انا:اوك.. نضنا ركبنا الطوموبيل باش يوصلني لاوطيل..

حسام جالس فالجردة ساهي ماعارف باش كيحس..واش مدمر من فقدانو لكاع الناس لي كانو قدامو ولا فرحان لخوه ولشيماء بجمعتهم مع بعضياتهم..جات عندو لعاليا.. لعاليا:ولدي..مازال مانعستي؟لوقت تعطل بزااف.. حسام:ماجانيش النعاس.. لعاليا:مالك اولدي شنو بيك؟؟ حسام:حاس براسي بوحدي..واول مرة نحس بهاد الغربة بعد مامت لواليدة.. لعاليا عنقاتو:لا اولدي نتا ماشي بوحدك..انا معاك و آدم غي تحتاجو يجي كيجري عندك..نتا محبوب بزااف غيكونو بزااف دايرينك قدوة ليهم وكيبغيوكم مي الحواجز كتخليهم يبقاو بعاد.. حسام:لأ تا واحد ماكيبغيني.. لعاليا:ههه ما يمكنش..اي واحد اولدي عندو شي حد كيبغيه بزااف فهاد الدنيا.. حسام سهى بقى يفكر تا جات فبالو رحاب:اه يمكن عندك لحق.. لعاليا بابتسامة:اذن تفكرتي شي حد؟؟ حسام:اممم يمكن وحدة بغاتني بزااف وحاولات تقرب مني بأي طريقة..وضحات ب بزاف دالحوايج علا ودي.. لعاليا:اوا شتي شنو قلتلك..و فين هي هاد لبنت؟حيت الا لقيتي شي وحدة بحال هادي وضيعتيها موحال تلقى بحالها.. حسام:مشااات..تاهي ماقدراتش تصبر عليا وخلاتني بحال كاع الناس.. لعاليا:لا اولدي..يمكن تجرحات بزااف ومشات باش ماتزيدش تجرح..ماتشوفش ديما شوفة الضحية..خصك تعطي لكل واحد حقو فالتفكير..الا حطيتي راسك بلاصتها كنتي غتبقى ولا تمشي.. حسام تفكر بلي كانو عاشو ليلة حميمية وماقدرش هادشي..ومن بعد خطب بسمة وهي حداه وماهتمش لمشاعرها..هز راسو وشاف فالعاليا.. حسام:اممم عندك لحق..كنت غنمشي.. لعاليا:شفتي اولدي..خصك قبل ماتحكم علا شي حد دير بلاصتك فبلاصتو..منها تا تعرف واش داك الانسان غالط معاك ولا لا.. حسام بضحكة استهزاء:دبا اصلا مشات ويمكن كون بقات قدامي عمري نتابه ليها واخة يوقع لي وقع.. لعاليا:اوا الله يسهل عليها فينما مشات ونتا اكيد غتلقى لي مكتابلك تكمل معاها.. حسام شد يد لعاليا وباسها..هي استغربات حيت ماموالفاش ليه يديرها وحسات بالدمعة قريبة لعينيها.. حسام:شكرا ادادة..ريحتيني وبعدا لقيت معامن نفش قلبي.. لعاليا:مرحبا اولدي فأي لحظة غتحتاجني غتلقاني معاك.. حسام بابتسامة:دادة..توحشتي آدم؟؟ لعاليا:اكيد راك عارف بلي ماكنقدرش علا فراقكم.. حسام:هههه اوك غدا غنهضر معاه نقولو يرجع واخة؟؟ لعاليا:تكون درتي احسن حاجة هههه.. حسام:اصلا حنا خصنا مانتفارقوش..هادي وصية لواليد والواليدة.. لعاليا:الله يرحمهم.. ناضو ينعسو واخيرا حسام استرجع قوتو بحالا كان محتاج جرعة حنان من عند شي حد باش يفضفض ويرتاح نفسيا..

وصل آدم شيماء لاوطيل.. آدم هز يديها:ماسخيتش بيك.. شيماء:تا انا..مي خصني نطلع لبيت.. آدم:اوك ياله نوصلك بعدا ونهضرو.. دخلنا بجوج دزنا لريسيبسيو خدينا سوارت وطلعنا لبيت..وقفنا حدا باب لبيت.. آدم:تصبحي علا خير احبيبة.. حسيت بالتبوريشة فاش قالها ليا:تصبح علا خير.. آدم:حقى غدا غنجي موراكم..جمعو حوايجكم غتبقاو معايا فالدار اوك.. بسمت:اوك نشاءلله(مافكرتش تا للحظة اني نشك فيه حيت ثايقة بلي هو اكثر شخص فالدنيا كيخاف عليا كيحميني تا من نفسو) بسمتلو جرني باسني فخدي بوسة طويلة ودخلت..شديت لباب فرحانة هادشي تاريخي وعمرني غنقدر نساه.. آدم حك راسو وهبط ناشط هز طوموبيلتو ومشى لدارو كلو أمل وتفاؤل.. دخل لبيتو بدل عليه وتلاح فوق لفراش معنق الخدية وريحتها مازالة فيديه كيشمها ويحسها محاوطاه من كل جهة..معقول آدم وقعلو هادشي؟علاش هي بالضبط؟تفكر نهار شافها فالطواليط غلباتو الضحكة وبدا يخشي وجهو فالمخدة كيتحك معاها..هبط ريدو دبيتو وحاول ينعس.. صباح جديد.. فاقو الابطال ديالنا كيتكسلو وناشطين..شيماء حيت كتعيش اجمل لحظات فحياتها مع حبيبها لي لقاتو اخيرا..آدم حيت تجمع مع لبنت لي خطفات قلبو دون الملايين لي كانو دايرين بيه..حسام حيت اخيرا استرجع قوتو وحس براسو مرتاح نفسيا لشي لي دارو..ورحاب حيت ليوم غتقدر تعرف جنس المولود ديالها لي ولات معمرة دماغها غي بيه باش تسانس بالحياة الجديدة لي كتعيشها.. صونا عليا آدم حيت غيجي مورانا..نضت وجدت راسي مزيان لبست سروال جينز مع طوب كحل وشوميز بلا كمام حمرا معقودة من الخصر وصدرها هابط..كريبيت شعري بالبابيليز خفيف وطلقتو درت فوق منو نظاظر كوحل ولبست صبادري كحلا..مع ميك اب طبيعي شرطة خغيفة وعكار غرونا..هزيت صاك جنب كحل وتعطرت ومشيت ندق علا منصف..كان لبس..هزينا لباكاج ديالنا وهبطنا لتحت ساينا شوية عاد وصل آدم..خرج سلم عليا بالوجه وسلم علا منصف وخدا لباكاج خبعو..بغيت نركب لور احتراما ل منصف ههه ساعا مابغاش وركبت حدا آدم..منصف تكى لور عاجبو لحال..آدم شد يدي وبقى سايق بيد وحدة..ضحكت ليه وكملنا طريقنا.. حسام مشى لشركة نورمال بدا يخدم بلا غوات بالعكس ولا مزيان ومبرد دمو.. دنيا دخلات عند ختها:حبيبة واجدة؟؟ رحاب:اممم.. رحاب لبسات كسيوة بلوكاناغ حد الركبة كلوش كتبين لكريشة شوية كتيفاتها عريانين وضفرات شعرها جنب مع صباط بلا بيض وصاك صغير هزاتو فيديها.. دنيا:تباركلله علا الفنيونا ديالي (رحاب ضحكات بخجل)ههه ياله نمشي نهز صاكي ونمشيو.. رحاب:الله يبارك فيك احبيبة اوك ها انا كنساينك.. تجمعو بجوج وخرجو من الدار بعدما شدوها بالسوارت علا الدراري لي كانو مرفوعين مع الرسوم خخخخ... ركبو طاكسي وهي دنيا تسولها:شنو درتي مع لخدمة؟؟ رحاب:عادي قلتلهم عندي كونطرول وغنمشي مور 12.. دنيا:مزيان.. وصلو عند الطبيبة كيساينو النوبة عاد دخلو.. تكات رحاب علا الباياص وقلبها كيضرب..دنيا حسات بيها وشداتها من يديها.. جات الدكتور دهنات ليها لبرودوي وحطات سماعة الايكو علا كرشها..وبدا يتسمع الصوت خفيف(تك تك تك).. دكتورة:تباركلله كلشي مزيان.. رحاب ودنيا فرحو:حمدلله.. دكتورة:وجنس لبيبي باين(غمزاتهم)بغيتو تعرفووو؟؟ دنيا حالة عينيها كتساين لخبر ورحاب مبتسمة حيت اي حاجة من عند الله خير وبركة.. دكتورة:وجدو راسكم.(كلشي كترقب)ونوصيك بحاجة وحدة ا رحاب ههه لبسي دبا لي عجبك حيت غيجي لي يبقى حاضيك ويغير عليك كثر من نفسو..ههه دنيا ضحكات:ولد؟؟!! دكتورة:ولد كيحمق نشاءلله هههه.. رحاب هبطو دموع من عينيها حيت فري فالاعماق ديالها تمنات يجيها ولد باش ياخد ملامح باباه وتقدر معاه تعيش بعيد علا حبيبها:حمدلله يا ربي اهئ اهئ.. دنيا عنقاتها حيت حسات بيها وهي مجربة ديجا هاد اللحظة..اما الدكتورة سكتاتها.. دكتورة:شوفي نقصي من الدموع. بغينا لولد يكون ناشط ومزيان ومرتاح نفسيا..وهاد الدموع تقدر تأثر عليه فهمتي.. رحاب:ههه اوك اوك غي دموع لفرحة وصافي..

دزنا فطرنا خفيف فريسطو فالطريق وكملنا طريقنا.. وصلنا لدار آدم لي بحالا شي مزرعة خفيفة..دخلنا وانا كنكتشف المكان..آدم هز فاليز ديالي دخلها لبيت حدا بيتو..ومنصف لبيت آخور..وانا غي كندور ونشوف فرحانة كانت بحال الجنة احساس ولا اروع.. آدم حشى يديه مع خصرها وعنقها وهي كتشوف فالمنظر ودار راسو فوق شعرها حدا عنقها.. آدم:عجباتك الدار احبيبة؟؟ شيماء:اكيد..كتحمق واصلا كيفما كانت غنبغيها(دورات نص راسها تشوف فيه)حيت فيها ريحتك.. آدم بسم وباسها حدا شنايفها تزنكات وحنات راسها.. آدم:هههه نتي السبب..ماغنقرش نقاومك بزااف ماحدك قدامي وحدايا.. شيماء:صافي هي نمشي بحالي ههه.. آدم:لا لا كلشي الا تمشي..اصلا ماغاديش نآذيك ونتي عارفة هادشي..لمهم عندي دبا هو تكوني حدايا ومعنقك صافي.. منصف:احم احم.. آدم ضحك وطلق من شيماء كيحك راسو.. منصف:ماتنساوش بلي ماشي بوحدكم ومعاكم واحد شيطان ههههه.. حنا:ههههه.. آدم:ياله وجدو راسكم نخرجو نشويو فالجردة.. منصف:متأكدين باغيين نبقى معاكم ههه.. آدم:اكيد نتا لخير والبركة بحرا ديما تشعل لينا الضو لحمر خخخخخ.. انا تزنكت وهو جرني من عنقي كيضحك وخرجنا لجردة كلشي مقاد..الشواية والطبلة والخضر ولحم مشى يجيبو من الكوزينة.. منصف:مازال لحال.. شيماء:بحرا نوجدو هادشي يقدر ياخد وقت ههه.. منصف:اخيرا هضرات الاميرة النائمة خخخخ.. آدم:والله يامك وماسكتي تا نوريك هههه كتحشمها.. منصف:ماتحشميش مني..تا انا كون كانت معايا حبيبتي موحال نحبسو واخة تشعلولي كاع الضواو ماشي غي لحمر هههههه.. شيماء:هههههههه..آدم قلو يبعد مني باغي يفسدلي اخلاقي.. آدم:لا كلشي الا الاخلاق..شنو نجريو عليه احبيبة؟. شيماء:لا الله يسامح هاد المرة ههه.. منصف:لا ماقلت عليك اميرة تا كنتي اميرة نيت هههه شكرا لعطفك عليا..ايييه تلات بيا الايام هههه.. بقينا فجو من المرح والضحك.كنوجدو كل واحد شنو كيدير..تكلفت بالخضر واي سالاظ وآدم كيشعل الشواية ومنصف كيجمع الحطب ويهرسو هههه.. رحاب رجعات لخدمة كلها اشراق..تلاقاها زميلها فالخدمة سميتو طلال.. طلال رجل فالثلاثينات كان مزوج وطلق وعزيزة عليه رحاب حيت داخلة سوق راسها استغرب انها مطلقة(كيفما قالت)وعارفها حاملة.. طلال:علا سلامتك.. رحاب:الله يسلمك ا خويا.. طلال:ياك كلشي بيخير؟؟ رحاب:حمدلله..ربي يخليك.. طلال:كون رتاحيتي النهار كامل علاش جيتي؟؟ رحاب:لا بلاش مزيان نقدر نكمل.. طلال بابتسامة:اوك مزيان.. جلسات رحاب تخدم بجدية.. دنيا رجعات لدار لقات وليداتها كيتفرجو بحال الملائكة هههه..مشات توجد ليهم لغدا وهي تفكر راجلها لي مات فعز شبابو هبطات دمعة من عينيها..وبقات فيها ختها لي هاهو راجل لي كتبغي عايش مي ولدها غيتربى يتيم بحال وليداتها..فكرات تقلب عليه وتقولو شنو كاين..مي خافت من رحاب ودارت فبالها تجبد سيجي مع ختها تا يكونو كيهضرو تجس نبضها..

يتبع