الى كنتي كاضن بلي ابطال الروايات هوما ملائكة منزلين من السماء ،والشياطين ضايرين بيهم ،كايحاولو يخربو حياتهم ،ويوضعو العراقيل فطريقهم ، باش يبانو وااو، ويكسبو تعاطفكم، حيت هوما مضلومين .. ابطال رواية البارون غير !!.. هوما مجرد بشر ،مامعصومينش من الغلط !.. كل فرد فهاد الرواية ، بطل لقصة حياتو .. وكل فرد فهاد الرواية ،دار غلطة كبر من راسو !.... كنظن أن ماضي الأسود ديال كل واحد فيهم ، كيمنعنا اننا نحكمو على شكون فيهم اقذر، واوسخ من الثاني؟ .. فالمقدمة ديال الجزء الأول كتبت رسالة الى ابليس " الأمور هنا تسير على النحو الذي تريد، حيث الناس أصبحوا أكثر سوءًا منك " فكيف يستلد بني أدم كأس الذنب ،وبقعر الجحيم ماءٌ صديـد؟ و كيف يجرئون على المعاصي، وفي النار حمم تدوب منه الجلود ... لكن الله جاعل باب التوبة داائما مفتوح .
و يبقى السؤال المطروح : عندما تهب عاصفة على حقل ، من الصبار من يتألم أولا ؟.
تقدر تكون الريح قوية بما يكفي انها طيح الصبار على صدر الأرض ، فتهدأ الرياح ، وينام الصبار وتبقى الأرض بوحدها متمسكة بجدورو ، خشية أن يموت، رغم ألم أشواكه .. كاتحبس المها ، وكاتحصرو كما لو أنها باغيا تبان قوية بزاف وقادرا تصبر ، خصها ماتنعسش وفجوارها موتى ، خصها ماتبكيش خوفا من إيقاظهم .. الأرض هي الأم الساهرة ، هي القلب لي مخانش جدور الصبار وإحتضنه بداخله . الأرض هي روح الإنسان لي كايتألم فصمت بعدما ترتكب النفس أسوء الكبائر .. وحدها الروح لي كاتتحمل المسؤولية لأفعالك .. روحك يعني ضميرك لي ماعمرو كايرتاح بعدما ترتكب النفس المعاصي .
توالت علي العائلة، والأصدقاء، الصدمات من كل جانب . باتريسيا ، عرفت تنتقم منهم وفضحت كل أسرارهم . وجوههم كانت مصفرة وكل واحد ساد فمو وساكت ماقدر حتى شي واحد يفتح فمو يلوم الثاني .
إستقام فجأة صخر وخرج من الصالة كايجري فقال بهجت بريبة :
- جبل تبع خوك لايدير شي حاجة فراسو .
استقام جبل وخرج تبعو كايجري فناض حتى رافاييل وأسد وياسين وبغاو يتبعوه لكن بهجت قال بإعتراض :
- ماتبعوهمش .
توقفو الرجال وضارو شافو فيه بإستغراب فكمل بهجت وهو كايطقطق بعكازو خارج من الصالة :
- من الأفضل كل واحد يهتم بشؤونو .
خرج بهجت وبقاو لبقية كالسين على أعصابهم بالخصوص روعة لي فهمت أخيرا قصد رؤية فاش قالت ليها بلي علاقتها بجبل كانت مستحيلة .. اذن جبل خالها خو مها وهي كانت عارفا بالموضوع .. يمكن عاود ليها الحقيقة بعدما لاحظ إصرارها وحبها ليه فوضع نقطة نهاية لداك الحب الطفولي الحرام قبل مايبدا .
إقترب أسد من نورسين وكلس حداها .. تمسك بيديها وقال بصوت مستعطف :
- كانضن بلي دابا تأكدتي أنني ماقتلتش إيزيك ..
سكت شويا وكمل :
- خلينا نرجعو كيف كنا .. ماتخليش بحال هاد المشاكل تخرب زواجنا انورسين .
سحبت نورسين يديها وهي كاتحس بالغل والكره تجاهو يمكن الوحم هو السبب الله اعلم لكن مشاعرها تجاهو فديك اللحظة كانت منفرة وكارهة حتى لريحتو حتى لصوتو حتى لوجهو ... ماكانتش عندها الرغبة باش تشوف فيه فقالت بحدة :
- هذا مكاينفيش أنك رجعتي نضميتي لديك المنظمة بلا علمي ولعبتي عليا وستغليتي عملي لصالح منضمتك الحقيرة ، تزوجتيني للمصلحة ولعبتي بيا كيف بغيتي .
وقفات وكملت :
- غادي نخرج نشم شويا دلهواء ومابغيتكش تتبعني .
حركت نورسين رجليها باش تخرج فإستوقفتها روعة وهي كاتقول:
- نورسين !. غادي نجي معاك .
قربت منها نورسين وتمسكت بيديها عاونتها فالمشي ثم خرجت هي وروعة تاركة خلفها عيون أسد كايشوفو فيها بحسرة وما لبث كوم رأسه بين يديه وتنهد تنهيدة طلعها من أعماق قلبو .. لكن قبالتو كانت كالسا تاليا وكاتحاول تمنع دموعها ، كاتمسحهوم ويخونوها ويهبطو فإستغل رافاييل الفرصة بما ان جبل وصخر ماكاينينش ، ناض كلس حداها وقال بهمس:
- ماتقلقيش ؟.
علات عينيها البكيانين شافت فيه وهي مستغربة كيفاش مالامهاش على داكشي لي قالت باتريسيا على علاقتها مع هاري فجاوبها رافاييل على سؤال لي كانت عيونها كاطرحو:
- كنت عارف ...
وكمل بعدما تنهد :
- ولكن مكايهمنيش ..
تزادت وتيرت بكائها وولات هاد المرة كاتبكي وتشهق قدامهم فاستقام رافاييل وهو متمسك بيدها ، سحبها خلفو وخرجو من الباب ديال الصالة لي كاتخرج للمسبح .. توقفو خلف شجرة كبيرة ديال التفاح وضم تاليا وسط حضنو وهمس بصوتو الرجولي :
- رغم أنوف الحاقدين ، أنا كانبغيك ، كانبغيك لدرجة ، لدرجة مكايهمني حتى شي حرف من داكشي لي قالت باتريسيا ..
عنقاتو بقوة حتى هي و تزادت شهقاتها المقهورة وهي كاتقول :
- أنا ... أنا كانبغيك ارافاييل .. كانبغيك بزاااف .. نتا هو أحسن وأجمل رجل شهم شفتو فحياتي .. كانترجاك ماتخلاش عليا .
شهقت بين دموعها وكملت بقهرة :
- أنا كانبغيييك .. كانبغييييك .
سعادة رافاييل فديك اللحظة وهو كايسمع ديك الهضرة منها خلاتو يجن من الفرحة .. ضمها لصدرو بقوة أكثر حتى كتم أنفاسها ثم بعدها عليه بسرعة و ركع على ركابيه للأرض وهو كايقول بصوت خايف ومترقب :
- واش تقبلي تتزوجي بيا
كانت صدمت تاليا قوية بحيث أنها ماقدراتش تصدق
وبقات ساكتة وكاتشوف فيه فكرر رافاييل بإصرار هاد المرة :
- تاليا .. واش تقبلي تكوني مرتي .
أخيرا ظهرت إبتسامة وهن بين دموعها وكانت هاديك أجمل إبتسامة شافها على وجهها .. مسحت دموعها بأصابعها وقالت :
- اه .. موافقة .
إستقام رافاييل وضمها لصدرو بقوة الفرحة ومن بعد بعدها عليه شويا وأخد يرتشف من رحيق شفتيها .. باسها بعمق وحب وهو كايتخيلها مرتو ديالو ملكو ليه بوحدو .
لكن في الداخل تمسكت أسية بيد ياسين وناضت وهي كاتقول :
- غادي نخليوكم تهضرو على راحتكم .
أومأ الدون ماركيز بإمتنان وبقا متبعهوم بعينيه حتى خرجو وبقا ساكت كيما ساكتين كاملين وماقادرين ينطقو بحتى كلمة حتى قاطع هدوئهم صوفي وهي كاتنوض :
- حتى أنا غادي نخرج ونخليكم تهضرو على راحتكم .
لكن قبل ماتتحرك تمسكت بيديها رؤية وجرتها لعندها وهي كاتقول :
- نتي ماشي غريبة .. ومن حقك تعرفي وتسمعي الحقيقة من ألسنتهم .
حنات صوفي راسها للأرض وهي كاتحاول ماتبكيش ثم قالت بتردد:
- الله يعينك على أب بحال دون ماركيز ارؤية .. لكن أنا خليتو ليك ، وقررت نطلق سراحو للأبد باش مايبقاش مقيد بيا وحاسب راسو اب مسؤول عليا حيت بانلي ان المسؤولية ديالو غادي تزيد ... تهلاو فراسكم . وفرصة سعيدة حيت تعرفت عليكم .
حركت رجليها باش تخرج لكن إستوقفها دوك ماركيز بصوت رجولي مقهور :
- بلاتي ابنتي ..
ضارت صوفي شافت فيه فكمل دون ماركيز بوهن :
- أنا عارف انني مانصلاح نكون أب لحتى شي وحدا فيكم ، وعارف انني ضلمتكم حيت انا فعلا عديم المسؤولية لكن كوني متأكدة ابنتي أن ماماك هي الوحيدة لي غادي تصلاح ليك فهاد الفترة وانا مانقدرش نسرق تعب سنوات فتربيتك وناخدك ببرودت دم .
تنهدت صوفي بقلت صبر وهي كاتفكر فهاد الأب لي مازال كايخلق لنفسو اعدار واهية ، ماهو افضل يجيها نيشان ويقول ليها مابغيتكش فحياتي ولا من الأول ماينسبش إسمها على إسمو .. كانت باغيا تخرج وماترجعش تشوفي للأبد الأبدين لكن مدام علياء استوقفتها بقولها :
- تفصلي كلسي ابنتي حتى تسمعي شنو عندي ومن بعد نتي حرة تقدري تمشي .. والى مابغيتيش أنا نقدر نتبناك وتبقاي قريبة من ختك .
تصدمات صوفي فيها وتسعق داوود مارضاش بالهضرة لي قالت علياء وللمرة العاشرة هاد نهار غادي يبان بلي هو كايكرهها وماباغيهاش ولكن اعباد لله شكون يفهم بلي هو مكايكرهش بنتو هو باغيها تبقا فأمان مع مها فڤالينسيا..
- نتا كنتي عارف بعلاقتي مع داوود ابرهان ومع ذلك بززتي عليا نتزوج بـالرجل لي ختارتيه ليا باش تنجح الصفقة ديال مشروعك .
زمجر برهان فوجهها بغيظ:
- عليااااء !! دايراها قد راسك وكاتلوميني انا!!
قاطعاتو هي بصراخ:
-وحتى نتا ماعندكش الحق تلومني على حتى حاجة .. نتا السبب فهادشي كامل لي وقاع .
تسمر برهان كايشوف فيها بإستنكار بينما ضارت علياء براسها عند رؤية وقالت:
- رؤية بنتي .. حبيبتي أنا غادي نعاود ليك كولشي .
مسحت رؤية الدموع من عينيها فكملت علياء بصوت حزين :
- أول مرة ابنتي حبيت فحياتي كنت مازالة مراهقة فسن ختك صوفي .. كان داوود شاب مراهق بحالي وكان كايبغيني حتى هو .. على الأقل هادشي لي كانضن
رد عليها داوود بحدة وهو مصر يبين وجهة نظرو ويخرج من دائرة الأب القاسي الظالم:
- حبيتك من صميم قلبي وعشقتك حد الجنون ، حفرت سميتك فقلبي ، لكن من بعد فهمت انني أسرفت فحبك فاش خليتيني فمنتصف الوعد وتزوجتي بلا خباري فبلاما تحاولي تبيني راسك نتي هي الضحة هنا وأنا الجلاد ... كنتي مخطوبة لهداك الراجل وكاتلعبي عليا أنا
تسمرت علياء كاتشوف فيه بدهشة فكمل داوود بصوت ملئ بالحقد واللوم وهو كايشوف فبناتو :
- كنت مسافر مع الوليد الله يرحمو لشي عمل خيري خارج لبلاد وفاش رجعت كانلقا عرس مدام علياء قايم وكولشي فرحان ..
شاف فرؤية وكمل :
- دعست على قلبي و كرهتيني فجنس النساء ، دمرت حياتي بسببها ، حتى الواليد مات وهو ساخط عليا .. سحب مني كل الورث ونكرني .
شاف فعلياء وكمل بصوت ملئ باللوم:
- فاش عرفت انك حاملة من بعد عرسك بسيمانة .. كنت متأكد أن لجنين لي فكرشك مني .. مشيت فرحان ديك اللييلة عند الواليد قلت ليه وعتارفت ليه أنني انا هو الأب ديال الولد لي فكرشك ، لكن الواليد مكانش عندو استعداد يدمر زواح ختي ليليا من بركات بسببي .. كان عارف ان بهجت ماغاديش يتقبل الأمر وغادي ينوضو لمشاكل لي لواليد مكانش قدهم فديك الفترة لي كان بهجت معتلي عرش الثروة والسلطة والمال .. خيرني بين السخط والرضا الى قلت شي حاجة لبهجت وفضحت لأمر لكنني ختارت السخط فسبيل حبك .. وفلحظة لي عتبت فيها على باب دار سمعت اقسى الكلام من عندو ودعوات السخط من لسانو لي مازال كايتردد فودني لحين اللحظة.
شاف فصوفي وكمل :
- وفاش مشيت لعند علياء بغيت نقابلها .. كنت باغي نقول ليها بلي أنا مستعد نتسناها لعمر كامل غير تطلق من داك بنادم وترجعلي ونربيو بنتنا بجوح .. لكنها رفضتني ورفضات تشوفني ومن بعد يوماين سمعت بلي سافرت مع راجلها لأمريكا وبقيت أنا بحال لحمار مليوح فزنقا .. ماأنا بعائلة ماأنا برزق ما أنا برضات الواليدين ..
غمض داوود عينيه بألم كايسترجع دوك الدكريات ثم كمل بعد صمت:
- بقيت كانتلاوح هنا وهناك لسنوات .. خدمت فكل شي حتى السيارات غسلتهم باش ومانادمش حيت انا راجل وتحملت مسؤولية غبائي وثقتي فوحدا بحالك ..
شاف فصوفي وكمل :
- بقيت على داك الوضع حتى مات بركات وقدرات ختي تتحرر من عبودية وإستبداد بهجت ليها ولاقاتني براجلها الثاني لي تهلا فيا وخدمني معاه الله يجازيه بيخير.. ومن بعد بسنوات قليلة .. ولات عندي لفلوس ووقفت على رجلي من جديد وتما طلاقيت مع ماماك اصوفا ...
أومأت صوفي بإصغاء فكمل داوود :
- كان يحسابلي أنها كاتبغيني .. لكنها حبات فلوسي كتر مني ..وفاش تزوجنا وزاد طمعها وزاد جشعها وماقدرتش نصبر على داك الوضع وتفارقنا وهي حاملة بيك اصوفيا لكن الرغبة ديالي فتحمل المسؤوليتك تلاشت بعدما تعرضت لخيبت امل من علياء فقدت فيها اعز انسان على قلبي وربحت منو السخط .. هذا علاش مابقيتش كانأمن بالعائلة والأسرة ومابقاتش عندي الرغبة نكونها .. هذا علاش ماتزوجتش لحد الأن .. الذنب ديال رؤية كاتتحملو علياء ودنب صوفي أنا لي كانتحملو .. بجوج بيكم تضلمتو معانا .
عم الصمت عليهم وتعالت الهمهمات والتنهيدات .. كل فرد كان كايعتابر نفسو ضحية ومضلوم لكن القدر هادشي لي جاب بين طيات صفحاتو .. رؤية زادت حقدت على علياء بسبب تخليها على باباها الحقيقي وصوفي زادت حقدات على داوود وهي كاتسمعو كايقول بفمو بلي تخليت عليك بإرادتي حتى قاطع الصمت برهان وهو كايقول :
- أنا لي بززت على ختي تتزوج .. هي مكانتش باغيا
علا داوود راسو شاف فعلياء لي كانت كاتمسح دموعها وقال بحدة :
- لكنها تزوجات فالأخير وماضحاتش على قبلي كيما ضحيت انا وتعدبت ، كل لي عرفات ديرو هي تهرب وتبعد .
في الأعلى :
داخل غرفة بهجت كان صخر كايقلب بحال شي مجنون على دفتر المذكرات لي قالت عليه باتريسيا .. قلب السرير و زلع لحوايج فالأرض .. قلب الكنبايات رون لفراش دار حالة وجبل وبهجت واقفين كايشوفو فيه كايتسناوه يسالي من هاد الجنون حيت حاولو معاه باش يوقفوش لكنه مابغاش وإستمر في بحثه العقيم حتى تعب وضار شاف فبهجت وغوت بأعلى صوتو :
- فين هواااا ؟؟... فين هو الدفتر ؟.
تنهد بهجت وقال بقلة حيلة :
- بقا فقلعة ميخور وأكيد غادي يكون تحرق .
شاف فيه صخر بنظرت إستنكار وكان مستعد يسمع بهجت سم ديال الهضرة لكن جبل تدخل وقال بحدة :
- خلينا نكلسو ونتناقشو غير بالعقل اصخر .. هادشي لي كادير فيه وهاد العصبية ماعندها باش تفيدك
ألتفت صخر شاف فجبل بنظرات طويلة ثم قال بصوت حاقد :
إذن باتريسيا عندها الحق !.. الأب ديال جبل يعني هو الأب ديال صخر ..للمرة المليار غادي يتمنى لو أنه ماشي توأم جبل للمرة لتريليون غادي يتمنى لو أنه تولد يتيم ولا لاحوه فشي خيرية ولا تكون عندو عائلة بحال هادي ..
ضرب فاز كبير ديال الورد بيديه حتى تشقف فالأرض وغوت :
- هدا علاش كتب ليك الوكالة ديال كل املاكو .. باش يخليك تسمح ليه ويكسب رضاك بالرشوة .. هذا علاش كنتي نتا هو المفضل ديما !!..
أشر لبهجت بإصبعو بإستحقار وكمل :
- حيت عارف اسرارو لموسخة . بينما هاد لكلب لي معيشو معاه داير فيه مابغا .
شد بهجت فقلبو وإنهار على السرير كالس .. ديك الهضرة ألمت قلبو وقصحاتو .. لكن يمكن جاء الوقت لي بهجت غادي يخلص ثمن كل أغلاطو .. ويمكن العقاب لي ختارو ليه الله هو عائلتو .. ديك العائلة لي حارب حياتو كاملة باش يحافض على شملها مجموع ، جاء الوقت لي ربي يبتليه فيها .. مهو الله إبتلاه فالأول وسلبو ولدو لكبير بركات هذاك الولد لي تضلم معاه بزاف ، رفع بهجت راسو شاف فصخر وهمس بصوت ضعيف :
- صخر ! ..ولدي
لكن قاطعو صخر بصراخ وغضب :
- ماتقوليش ولدي ... انا ماشي ولدك لا نتا ولا ديك العاهرة لي ولدتيني معاها .
تدخل هاد المرة جبل وغوت على صخر وماكرهش يدخل فيه براس :
- صخر احتارم راسك فاش تهضر على ليليا الله يرحمها .
رد عليه صخر وهو كايقول بين اسنانو بغيظ:
- لهلا يرحمها من عندي انا .. لهلا ينزل عليها شي رحمة فهاد نهار ..
- صاااااخر .
غوت بيها جبل لكن صخر قاطعو بلؤم :
- اشنوووو !!... لي تخون راجلها مع باه شنو نسميوها هادي وتزيد تنسب ولادها على راجلها بكل وقاحة.. ولادها لي هوما فالاصل خوتو .. إذن هذا علاش بدلتي كنيتك ووليتي جبل محمد إبراهيم مرتجى وخليتيني انا لحمااار صخر بركات بهجت مرتجى .
تنهد جبل ومابقاش قادر يصبر على وقاحة صخر لكن مع ذلك قال وهو كايحاول يتصنع الهدوء :
- نتا ماعارف والو من الأفضل تسكت .
كان غادي يحماق صخر وغايتسطا بقوة الفقصة ... ملي هو ماعارف والو ؟ .. اشنو كايتسناو علاش مايعرفوهش ويشرحو ليه الأمور لي هو غافل عليها ؟.
- بغيتي تعرف شنو كاين فالمذكرات
همس بها بهجت بوهن وكمل :
- خليني نعاودلك أحداثو على لساني.
رفع عينيه شاف فصخر وكمل :
- يمكن يخوني التعبير فبعض الأحيان لكن هادشي لي غادي تقولو كولو صحيح . تفضل كلس .
قلب صخر الكنبة لي كانت مليوحة فالأرض وكلس عليها وهو كولو فضول باش يعرف تفاصيل القصة بينما تنهد جبل وكلس على السرير وهو كايدير فبهجت نظرات حادة .
قبل سنواات وسنوات ،بعدما إفتتحت أول شركة ليا كونت مجموعة من الموضفين الأوفياء .. كانو لحال صحابي وعائلتي وهذا هو السبب لي خلا تجارتي تزدهر والجريدة تزيد تكبر وتكبر .. لكن وسط دوك الموضفين كان عندي صحفي خطير بمعنى الكلمة ، سميتو "مصطفى بن كيران" شخص متمرس وخدوم فمهنتو لدرجة من بعد ولا هو النائب ديالي وكسب بعض الأسهم فالجريدة ، بعدما كان صحفي عادي ولا هو يدي ليمنية كاينوب عليا فاش كانكون غايب ولا مريض . وديما هاز الجريدة فوق أكتافو .
كنت كل لليلة أحد كانعرض عليه يجيو يتغداو عندي فقلعة ميخور وكانو كايجيب معاه مرتو و أولادهم. وكاندوزو الويكاند مجموعين وسط جو عائلي جميل وبعد لمرات كانخرجو فرحلات سياحية مجموعين . وهاد الموضف الوفي كانت عندو زوجة حسناء وثلاثة ديال البنات وولد "بهية" لكبيرة و "ليليا" لمتوسطة و "جميلة" ومن بعدها لولد صغير "داوود" ولي هو "دون ماركيز" ... وأنا كان عندي "بركات" لكبير و "برهان" المتوسط" و"علياء" هي صغيرة فخوتها ولمفششة ... كانو ولاد مصطفى هوما ولادي وولادي هوما ولاد مصطفى ..
بعد لمرات ولادي كايمشيو للمغرب يكلسو مع ولادو بالأيام فالعطل وفوقت الدراسة كايرجعو مجموعين يستقرو فإيبيزا .. حيت مصطفى كان مستقر فإيبيزا على قبل خدمتو وكان جايب وليداتو ومرتو معاه .. كانو لوليدات مازالين صغار .. كبيرهم عندو 13 لعام وصغيرهم بحرا 4 سنين... ودااازت لأيام وكبرو لوليدات مجموعين وكانو أكتر من أصدقاء بل خوت وحباب .
وليليا ديك البنت لي سابقة عمرها لا فلعقل ولا فالجسد كانت بنت مراهقة عندها شعر أسود كسواد ليالي الريف .. الى ضفراتو موصيبة والى طلقاتو كايسافر حول جسدها وقوامها الصغير ... بشرتها بيضاء وشكل وجهها بيضوي .. فاش كاضحك تبرز جمال وجنتيها وعيونها الزيتونية وفاش تكون غضبانة وكاتبكي تقدر تراضيها غير بنكتة سخيفة ولا بأيسكريم ديال الحليب .. كان عزيز عليها بزاف وكنت ديما كانوصي لالة مريم تشريه خصيصا ليها باش فاش تجي نهار لأحد تلقاه وتاكلو ..
شاف بهجت فصخر وإبتسم وهو كايقول :
- كانت بحالي كاتشوف فصوفي .. طفولية ودمها خفيف .. كاضحك على كولشي وكاتبكي على أتفه الأسباب ..
إبتسم صخر لا شعوريا وهو كايتفكر حركات صوفي فكمل بهجت كايقول :
- فاش كانشوف حركات صوفي كانتخيل غير ليليا قدامي .. الى بغات شي حاجة تاخدها منك بسيف ولا بالخاطر .. كانت مجنونة صغيرة كولشي عزيزة عليه
رد عليه جبل بحدة :
- حتى نتا كانت عزيزة عليك .
رد عليه بهجت وهو كايبتاسم بهدوء:
- بزاااف .
كشر جبل على أنيابو وقال بغضب :
- لأي درجة .. عزيزة عليك كبنتك ولا كنتي كاتشوف غير لحمها لي كليتيه بسنانك المجرم لـ ...
قاطعو بهجت بحدة :
- كانت عزيزة عليا بحال بنتي وماعمري شفت فيها بشي نظرة اخرى والله لي شاهد عليا . هي وعلياء مكانش الفرق بيناتهم فكيفاش أنا غادي نشوف فبنتي شي شوفا ماشي هي هاديك .
كوم جبل قبضة يديه وضربها مع الحيظ وغوت :
- كدااااب . نتا إنسان مختل عقليا
ضرب بهجت عكازو مع الأرض بقوة وغوت :
- سد فمك ولا أقسم بالله حتى نوض نهرسو ليك .. كايحسابلك راني كبرت مانقدرش نديرها ..واش يحسابلك صافي كبرتي وربيتي لكتاف وغادي تعلا عليا البرهوش . أنا بهجت مرتجى البارون الأعضم لي غير سميتو كاتزرع الرعب فقلوب الناس فماتخلينيش نزرع الرعب فقلبك حتى نتا حيت والله ونويتها حتى نديرها ونعيشك فالكوابيس .. صبرت عليك وصبرت على طيشك ولكن صافي باراكا زدتي فيييه .
فتح جبل فمو باش يرد عليه بالمثل لكن صخر قاطعو بصراخ :
- صافييي سكتونا ..
ضار براسو عند بهجت وكمل :
- من بعد شنو لي وقاع ؟؟
تنهد بهجت بقلة حيلة وكمل :
-كان ولدي بركات في أول مراهقتو .. مراهق قوي ووسيم أي بنت فالعالم تتمناه .... ولأول مرة جات ليليا مع عائلتها فاش كانت صغيرة للقلعة قدرت نشوف نظرت الإعجاب فعيون ولدي ، لكنها ماعمرها بادلاتو نفس النظرة ولا الإعجاب ... كان ولد خويا إبراهيم عايش معايا فديك الفترة وكنت كانعتابرو واحد من ولادي ، علمتو أصول التجارة كيما علمت ولادي لكن نظرة الإعجاب فعينيها كانت من مصيب محمد .... كانو فينما يتجمعو كانبقا مراقبهم ومراقب محاولات ولدي بركات باش يلفت إنتباهها ولو مرة لكنها على ما اظن كانت كاتعتابرو مجرد صديق وأخ عزيز لا غير بينما مع محمد ولد خويا كنت كانشوفهم بعد المرات متمسكين فيدين بعض خفية .. ماعجبنيش داك الوضع وماحملتش ان ولدي يكون العجلة الثالثة وهوما كايتحابو بيناتهم . حاولت نقنع بركات يتوقف على حبها .. إقترحت عليه بزاف ديال البنات على الله يغير رأيو لكن وااالو كان كايبغيها لدرجة كبيرة .. مرت الأيام والسنوات .. ودوك المراهقين كبرو قدام عيني بمشاغبتهم ومغامراتهم حتى ولاو شباب يافعين وعلى قد المسؤولية لكن مع ذلك بركات كان كايزيد يتعلق بيها كتر وكتر .. ولا مجنون بيها . فإقترحت على ولدي نمشيو نخطبوها .. وكان غادي يطير بالفرحة فديك الليلة لي فتحت معاه الموضوع ولكنه بقا متردد بشأن قبولها بيه حيت عارفها مكاتبغيهش ..
شاف بهجت فجبل وقال :
-ولدي كان أفضل شاب فكيفاش بنت موظف عادي غادي ترفض ولدي أنا ..
حرك جبل راسو يمين وشمال وهو كايدير فيه نظرات الغيظ فكمل بهجت بحدة:
- هذا علاش أخدت أنا بزمام الأمور بالنيابة على ولدي وتكلمت معاها على إنفراد وإقترحت عليها نجيو نخطبوها من عند لواليد ديالها لكنها رفضت بطريقة لبقة وعبرتلي على أسفها مازال عاقل مزيان فاش قالت لي :
- سمحلي اعمي .. بركات أنا كانعتابرو بحال خويا لي ماولداتوليش ماما ونتا كانعتابرك بمثابة الأب ديالي وسمحلي بزاف لكنني ماغاديش نقدر نقبل هاد الزواج أنا مازالة باغيا نكمل قرايتي .. وحلمي هو نشتغل فوكالة ناسا ونراقب النجوم والكواكب والفضاء أما زواج فهو أخر حاجة نفكر فيها حاليا قبل مانحقق حلمي
سولتها وقلت ليها :
- بلاما ديري السبة بالنجوم وناسا .. قوليلي واش فحياتك شي رجل أخر .
فردت عليا بتردد وخجل :
- أنا كانبغي ولد خوك محمد .. لكننا متافقين بلي ماغادي نتزوحو حتى نحقق حلمي .. وداكساع غادي ننتاقلو أنا وياه نعيشو فأمريكا ونخدم أنا فوكالة ناسا وهو يدير شي مشروع تما ونعيشو حياتنا ونولدو وليداتنا ولكن اعمي كيف كاتشوف هادشي حاليا مازال بعيد وخصو سنوات باش يتحقق .
ضحك بهجت بتهكم وقال :
-محمد مكانش أقل من الجمال ولا القوة والشجاعة ولا الرجولة من بركات لكنه كان متميز بواحد الصفة أخرى لي مكانتش فولدي ولي هي الجرأة واللسان الحلو ... كان كايعرف ينضم الأبيات الشعرية وكايعرف يتغزل بيها وياكلها لعقل بالهضرة ديال الشباب التافهة ، عكس بركات ... لكنه كايبقا ولدي ...ولو طلب عيني بدل ليليا لقلعتهم من بلاصتهم وعطيتهوم ليه .
عقد صخر حواحبو بفضول وقال :
- شنو درتي ليهم ؟
علا بهحت أكتافو بغير إهتمام وقال ببساطة:
-اول حاجة درتها .. حطيت محمد بين شرق أوروبا وأسيا.. سيفطتو لكازاخستان..
ضحك بتهكم وكمل:
- ماشي هو لي كان باغي يحقق ليها حلمها باش تولي رائدة فضاء ولا مانعرفت شنو!! .. أنا سيفطتو لمركز إقلاع صواريخ روسيا للفضاء .. هاهاها.
شافو فيه صخر وجبل بغيظ حتى كمل الضحك ديالو وقال :
- غير كانضحك بلاما تعصبو ... سيفطتو لكازاخيستان على قبل شي خدمة ، باش يتمم بعض الصفقات .
وضع بهجت رجل على رجل وكمل بهدوء ورزانة:
-لكن فديك الفترة بالضبط توفات الزوجة ديالي الله يرحمها ويسكنها فسيح جناته فمن صواب جات ليليا كلسات فالقلعة طول فترة العزاء ولعفريتا عرفت تواسي بركات على فراق مو كيما واسات برهان وعلياء وطلعتهم من الجو ديال الكأبة لي عاشوه طول الشهرين .
تنهد وكمل :
- لكن أنا .. ماكانش عندي لي يطلعني من الإكتأب لي أصابني بعد موت حبيبتي الوحيدة .. مرتي الله يجعل قبرها رياض من الجنة والله يسمحلي منها .. كانت مستحملاني فكل حالاتي .. فعصبيتي فكل شئ وربات ولادي أحسن تربية .. هذا علاش ماقدرتش نتخطاها ونتخطى طيفها لي كان عايش معايا كل نهار فدار واخا ماتت .. وحده الشراب لي كان كاينسيني فيها .. الويسكي .. تيكيلا .. الفودكا .. سكوتش .. جاودار .. بايجيو ... الراكيا .. الشراب كان هو المرسات ديالي .. حتى جا داك النهار لي واخا نشرب كحول العالم كامل ماينسينيش فيه .
رد عليه جبل بغضب قاتل :
- نهار لي غتاصبتي ليليا
إستقام صخر واقف بقوت الصدمة وقال :
- كيفاااش !! غتاصبتيها .
غمض بهجت عينيه بأسف وقال :
- كنت سكران ديك الليلة ... رجعت معطل للقلعة .. وكانت هيا مازالة كالسا فالحديقة كاتحفض لإمتحان لي كان عندها فالغد .
قاطعو جبل بحدة:
- صافي سكت ... شبعت من البروبغاندا المجنونة لي كاتحاول تلعبها على صخر كايبانلي خدمتك فالصحافة زمان مازالة مأثرة عليك.. أنا غادي نقول داكشي لي سمعتو بودني من فم ليليا .
ضار عند صخر وكمل :
- عرفتي شنو دار ...مشا لعندها بحال شي حيوان وجرها من شعرها .. عيات ماتغوت وترغبو باش يبعد عليها لكن الحيوان لي كان مسيطر عليه رفض كل توسلاتها ..
أشر بيديه لبهجت بغضب وقال :
- هاد الحيوان جرها بلا رحمة ولا شفقة للترسانة ديال الأسلحة تحت الأرض وإغتصبها تما .
غمض صخر عينيه وهو كايهمس بألم ودموع محصورين فعينيه :
- مايمكنش .. مايمكنش .
دار بهجت راسو بين يديه بأسف بينما قال جبل بصوت عالي وغاضب :
- لا يمكن .. يمكن وهادشي غير لقليل .. خافها لاتفضحو وسد عليها تحت الأرض لمدة شهر كااااامل .. كولشي كان كايقلب عليها وهي قريبة منهم لو فقط عطاو فرصة لودنيهم تتصنت ... كانو غادي يسمعو صوت وألمها تحت الأرض..
قاطعو بهجت وقال بأسف :
- ماكنتش قاصد:
ماقدرش جبل يسيطر على أعصابو وضرب بقبضة يديه الحيط مرات ومرات وغوت :
- ماكنتيش قاااااصد ... ماكنتيش قاصد تغتصبها كل نهار لمدة شهر كاااامل.. كل نهار كاتحل عليها لقبر وتفرغ فيها الكبت ديالك وترجع تدفنها كل نهااااار .
تمتم بهجت كايدافع على نفسو :
- انا كنت
لكن جبل قاطعو بصراخ وهو كايمسح الدموع لي غلبوه وخرجو :
- كنتي خايف على الصمعة ديالك لاتقااص .. لاتولي مجرم من المجرمين لي كاتقتلوهم فمنظمة النفاق ديالك ... أول مجرم خص الأسياد يقتلوه هو نتا ابهجت ... نتااااااااا .
تمتم بهجت بصوت منخفض :
- شراب كان مطيرلي لعقل اولدي .
تجاهل جبل أعذار بهجت الواهية وقال وهو كايشوف فصخر :
- ومن بعدما شاف ان الوضع طواااال والى بقا على داك الوضع ليليا غادي تموت .. هددها الى قالت شي حاجة غادي يقتل عائلتها كلها وبزز عليها تتزوج ببركات بسيف عليها باش تبقا تحت عينيه ويحرص أنها ماغاديش تفضحو ..
تنهد جبا وهو كايسترجع دوك الكلمات لي سمعهم من لسان ليليا وكمل بألم:
- دار ليهم عرس كبير بعدما طلق صراحها بسيمانة .. والى لاحظتي اصخر فتصاور ديال عرسهم بركات كان طاير بالفرحة لكن ليليا كانو عينيها كايطلبو النجدة .. ومن بعد العرس بيوماين عرفت راسها حاملة بينا ومن ميين من بهجت
سكت شويا كايشوف فالدموع لي فعيون صخر وكمل :
- ودابا كانضن بلي إستوعبتي مزيان اننا تولدنا نتيجة إغتصاب .. نتيجة نزوة حيوانية
خبع صخر عينيه بيديه وبدا كايبكي بقهرة الرجال وهو كايقول بصوت باكي
- علاش ؟؟ ... علااااش ؟؟
تقطع قلب بهجت على بكاء صخر وقال بصوت حنين ومتوسل :
- ماتبكيش اولدي .
إنتفض صخر بقوة وقلب الطبلة الزجاجية حتى تناثر زجاجها فالأرض وغوت بألم:
- ماتقوليش ولديييي .. أنا ماشي ولداااااك ..
رد عليه بهجت بعناد قوي وصراخ :
- نتا ولدي بغيتي ولا كرهتي .. هي كانت باغيا تقتلكم .. كانت باغيا دير الإجهاض لكن أنا ماخليتهاش .
غوت صخر بأعلى صوتو والدموع فعينيه :
- علااااااش .. علاااااش .. الموت أهون من هاد الحياة والكدوب لي عيشتيني فيييه .
لأول مرة غادي يبان التأثر على ملامح بهجت وقال بعدما تنهد :
عض صخر على شفتو السفلية باش يكتم شهقة قهر وكمل بهجت بصوت ملئ باللوم :
- لحسن الحظ الدكتور لي مشات عندو ليليا كان صاحبي عيطلي وقالي بلي باغيا تقتلكم ... فلحقتها فأخر لحظة حتى دخلوها لغرفة العمليات .. وصدمتي كانت كبيرة فاش شفتكم فالإيكوجرافي .. كنتو توأم فغشاء واحد .. جوج دلأجسام وروح وحدا .. كونتو صغارين بزاف وماعندكم حتى شي ذنب فداكشي لي درت أنا .. هذا علاش خرجتها من تم بزز منها وهددتها أنني غادي نقتل باباها وصديقي الوحيد الى حاولات تقتل ولادي وباش نثبت ليها أنني جاد فكل كلمة كانقولها ...
إمتلأ صدر بهجت بالحقد وكمل بحدة:
- هاد الهضرة لي غادي نقولها عارف مزيان انها ماغاديش تعجبكم لكن هادشي لي وقاع مع الأسف ... باش نعاقبها حبستها فالغابة وسط سيارة مقفولة ومصفحة وزاج ديالها كحل باش واخا تحاول تهرس الزاج ماتقدرش وخليتها تما ليلة كاملة بالجوع وفصبح سيفطت اربع مجرمين إختطفو باباها مصطفى وهو خارج من دارو ... داوه للغابة وبالضبط حدا السيارة لي كانت فيها ليليا بنتو وضربوه بلا رحمة حتى تسببو ليه فالشلل النصفي وكسور فالعمود الفقري .. ضربوه وهي كاتشوفو بعينيها وماقادرا دير حتى حاجة باش تنقد باباها . وفاش رجعت لعندها غير حليت باب السيارة طاحت عند رجلي كاترغبني باش مانقتلش باباها وقلت ليها بلي الى حاولت تقتل ولادي غادي نقتل مصطفى ومن بعد غانقتل مها وخوتها واحد بواحد وفالأخير غادي نقتلها هي .. وواعدتني أنها ماغاديش تأديكم مازال ... عيشتها فالرعب طول ديك الشهور والسنوات .. وكنت ديما كانشوفها كاتبكي .. وبعدما كانت زهرة مفتحة ولات وردة دابلة وباردة وسط مقبرة وعايشا بين الموتى ...ومن بعد بشهور رجع محمد من السفر لكنني ماعطيتوش فرصة يقرب منها هددتو حتى هو بالقتل حتى أنني هددتو بلي الى قرب منها غادي نقتل باه ولي هو خويا ياحصرة لكن حتى حاجة مكانت كاتهمني من غير سلامتكم نتوما حتى هي مكانتش كاتهمني كانقسم ليكم ... كان حتى بركات كايتعذب معاها حيت هو كان عارف بلي مكاتبغيهش وعايشا معاه غير بزز .. لكن فاش عرفها حاملة فرح بزااف .. فرحتو كانت ماتوسعش الدنيا بكبرها .. وفرحت حتى أنا فاش صدق ديك الكذبة ودازت عليه .. عشت مرتاح حتى تزاديتو لدنيا .. وكنتو جوج رجال ملي تزاديتو .. عمرت بيكم عيني وقلت هادو هوما مستقبل العائلة هادو هوما لي غادي يورتو إسمي لأجيال وأجيال .. ربيتكم وكبرتكم وأنا فقمة سعادتي ، واخا كنتو كاتعيطولي جدي وماشي بابا كنت كانفرح بزاف .. كنتو كاتكبرو وكاتزيدو تزيانو وكاتزيد الحياة تحلى بيكم .. واحد كان مشاغب والثاني كان هادء .. كنتو فولة ومقصومة لنصفين مكانفرقوش بيناتكم .. حتى توصلت ليليا لقرار أنها غادي تبقا تطرز ليكم أسمائكم على لحوايج باش نفرقو بيناتكم ... كانت كاتبغيكم بزاف .. ومكانتش كاتفرق بيناتكم ولا دير الفرزيات .. كانت أم حنينة بزاف.. وعشنا فسعادة لمدة ستة سنين ... لكن حبل الكوب قصير وحتى حاجة مكادوم ...
سكت بهجت واحد شويا ثم كمل وهو كايشوف فالأرض:
- فواحد الفترة ولدي بركات مرض بالسرطان فالعمود الفقري ولكن ماقالها لحتى شي واحد .. لكن مع ذلك ولدي هذاك ومايخفاش عليا .. الى غير كان معصب كاتبان على وجهو حراك لكان مريض لكن مع ذلك تغافلت على الأمر وماهتميتش بيه مزيان .. قلت يمكن غير بعض المشاكل مأثرة عليه .لكن مسكين كان كايتعالج وكان كايرجع مهدود بحال الجثة بلا روح حتى قال ليه طبيب ديالو بلي خصو يزرع نخاع عضمي جديد وخصو ضروري متبرع وأفضل متبرع كانو هوما أولادو حسب توصيت الطبيب .
سكت بهجت وجبد منديل من جيبو مسح بيه دموعو لي نزلو على ذكرى ولدو بهجت بينما بقا صخر مبلوكي قدام داك الكم الهائل من الإجرام لي رتاكبو الرجل لي كان كايعتابرو القدوة ديالو فالأم لي ولداتو .. فليليا لي كان مكاينعس حتى كايعنق صورتها فحظنو هي والرجل لي كان كايضن بلي هو الأب ديالو ماقادرش يصدق هادشي كامل .. لو عاش حياتو كاملة مستحيل كان يشك أن بهجت هو الأب ديالو الحقيقي وبلي بركات خوه ماشي باه. . ديك الصدمة كانت كافياه باش يعيش كامل وسط دوامة حزن وحقد وكره .
تنهد جبل وهو كايشوف خوه صخر كايبكي .. بقا فيه بزاف .. ومكانش باغيه يعرف الحقيقة بهاد الطريقة كان مستعد يخبي عليه الحقيقة حتى يموت غير باش مايشوفش خوه كايتعذب كيما تعذب هو فطفولتو كاملة ، كان قادر يستحمل كره صخر ليه والغيرة ديالو منو حيت كايضن بلي ليليا ختارتو هو وسمحت فصخر بعدما تزوحات هذا علاش كان صخر حاقد على خوه لكن دابا ماستحملش دموعو واخا ضربو شحال من مرة وهاد المرة بقا فيه صخر بزاف .
قرب لعندو كلس حداه ثم طبطب على كتفو وقال :
- فواحد نهار غادي تكون عاقل عليه مزيان أخويا...
رفع صخر راسو شاف فيه بعيون دامعين ولأول مرة غادي يتأثر فاش يناديه جبل بكلمة "خويا" فكمل جبل وهو كايشوف فيه :
- كونا كانلعبو بجوج و جاء لعندنا بركات وقال ليك نتا سير خليني نهضر مع خوك ولكن نتا رفضتي.
أومأ صخر براسو وقال بوهن:
- كنت باغي نسمع حتى انا شنو غادي يقول ليك .. لكن فلخر شد ليك فيديك وداك معاه وخلاني أنا كانبكي وهاديك كانت أخر مرة شفتو فيها.
تنهد جبل وقال :
- كان ممكن تكون نتا فبلاصتي كون ختارك وكنتي غادي وتعيش داكشي لي عشتو أنا ، وصدقني ماكنتش نتمنا ليك ديك الحياة أو نتمناها لأي طفل صغير .. فاش طلب منك تمشي ، هضر معايا بركات وهو كايبكي .. كنت صغير باش نعرف مالو .. بدا كايبوسلي فيدي ويطلب مني سماحة .. مازال عاقل مزيان على لهضرة لي قال لي ." ولدي حبيبي .. سمحلي بزاف حيت غادي نتسبب ليك فشويا ديال الألم .. لكنني مضطر .. بغيت نعيش معاكم فترة طويلة ونربيكم أحسن تربية .. واش تبغي تعطيني طريف منك ؟" . قلت ليه بكل برائة .. "ماعنديش بزاف ولكن غادي نقصم معاك ". كان كايحسابلي كايهضر على لبيسكويت لي فيدي فقصمت منو وعطيتو طريف فديك اللحظة عنقني بركات وبقا كايضحك على سداجتي .. داني معاه للمستشفى ووصاني نخليه سر بيناتنا .. دخلني لعند الدكتور وداك الدكتور داني لغرفة وحداخرا ومن بعدما ضربلي واحد شوكا مابقيت حاس بوالو حتى لواحد الفترة نضت وأنا كانحس بالألم فيدي ولقيتو واقف عند راسي وكايشوف فيا بنظرات قاسية و لأول مرة غادي نشوفها على وجهو وقالي " شكون نتا ؟" وغوت "ولد من نتااا ؟ "
.... أنا مافهمت والو فديك اللحظة بقيت كانشوف فيه بخوف لكنه كان معصب بزاف .. هز ملف من جنب السرير وضربني بيه لوجهي وبدا كايغوت "شكون نتا؟ ... شكون نتا؟... ولد من نتا؟ " وانا كنت كانبكي وكانقوليه "نتا بابا " وهو كايغوت حتى وصل بيه الأمر كايضرب فيا بلا رحمة ويقول " شكون نتا؟ "ويضربني بقسوة حتى تدخلو بعض الممرضين وفرقو بركات عليا .
غمض جبل عينيه بألم وهو كايسترجع دوك الذكريات القاسية وكمل :
- ومن بعد جرني بحال شي كلب ركبني فالسيارة وطريق كاملة وهو معصب وكايغوت ويسب وماباغيش يشوف فيا وأنا كنت خايف منو وخايف لايضور ويضربني حتى وصلنا للدار وغير وقفت السيارة حليت الباب وهرب ليه باش مايضربنيش ومشيت كانجري عند ليليا تخبيت موراها وأنا كانبكي وهي كاتسول فيا " مالك اولدي؟" شافت أثر الضرب على وجهي وكملت بخوف "شكون ضربك؟" لكن قبل مانجاوبها ، سمعت صوت بركات كايغوت ، وكايعيط لليليا بأعلى صوتو وفاش لقاها فالكوزينة .. جرها من شعرها وبدا كايضرب فيها لكن ماستحملتش نشوفو وهو كايضربها وبرغم من خوفي وحجمي الصغير هجمت عليه بديت كانضربو بكل قوتي باش يبعد عليها لكنه كلما جرها كايجرني حتى أنا حيت كنت لاسق فيها وكانضربو حتى طلعو لبيتهم وهزني بركات بقوة ولاحني حتى تضرب ضهري مع الحيط وطحت للأرض وبسرعة سد الباب ...كنت كانسمع ليليا كاتبكي وكاتقول ليه "علاش ضربتي جبل ؟ .. علاش لحتيلي ولدي؟ .. خليني نشوف ولدي مكانسمعش صوتو" كنت كانشوف المقبض ديال الباب كايضور فمحاولة انها تحل الباب وتخرج لعندي لكن بركات كان كايمنعها ويضربها .. ماقدرتش نوض من الأرض لأن الضربة كانت قوية على طفل صغير عندو بحرا ستة سنين
تسللت دمعة من عين جبل فسارع فمسحها وكمل :
- أنا كنت خايف وكانبكي .. وكانسمع بكاء ليليا وهي كاتضرب وتتعنف .. كنت كانسمع كل ضربة كاتنزل عليها وكل صفعة .. وهو كايقول ليها " خليتيني نحس انني البطل ديالك والرجل الوحيد لي فحياتك خليتيني نحس براسي قوي بزاف وعندي كلمة وكبرياء.. تغرمت بيك لدرجة تعميت وماشفتش الخيانة ديالكم ليا ومافهمتش انك قبلتي تزوحي بيا غير باش تبقاي قريبا منو .. ضحكتي عليا حيت كنت نيا بزاف وكانتيق فيك ... انسان غبي سهل تقنعيه وتلعبي بيه وتزيدي ضحكي عليه وتغدريه من بعد وتعتابريه بليد وتخونيه نتي وهداك عديم الضمير .. ليليا نتي طلعتي بنت رخيصة وماعندك قيمة دخلتي للدار على قبل العشيق ديالك وستاغليتيني وخنتيني مع برهااان " قالت ليه ليليا وهي كاتبكي " اشنو كاتقووول ابركات ؟؟" رد عليها بصراخ " ديت جبل باش ندير ليه التحاليل باش نشوف واش النخاع العضمي ديالو يصلاح ليا ولكن طلعو التحاليل كايقولو بلي جبل ماشي ولدي لكن فيه نسبة ديال جينات القرابة .. ومكاينش من غيرو برهان لي خنتيني معاااه "
رفع جبل عينيه شاف فصخر وكمل :
- واخا كنت صغير إلى أنني فهمت انه حنا ماشي ولاد باركات ..ومن بعد بدات ليليا كاتعاود ليه الحقيقة لي سمعتها بودني وعاودتها ليك وكانت وكاتطلب منو السماح .. لكنه مابقاش طلع ليه صوت ملي عرف بلي مول الفعلة هو بهجت باه ماشي برهان .. جاتو إنتكاسة دماغية بقوة الصدمة وبدات ليليا كاتغوت وتطلب المساعدة وتبكي .. وجات سيارت الإسعاف وهزاتني أنا وياه دخلوني دارولي سكانير ولقاو عندي ثلاثة ديال الضلعات مهرسين فضهري بسبب ديك الضربة لي دارلي بركات مع الحيط ...بينما هو ...
تنهد جبل وقال بحزن :
- هو دخل فغيبوبة لمدة اسبوع ومن بعد دا مول الأمانة أمانتو ومات .
عم الصمت فالأرجاء بين الرجال .. بهجت كايبكي على ولدو لي حيات الذكرى ديالو بعد سنوااات وصخر شاد راسو بيديه وكايشوف فالأرض وكايخمم ويربط بين الأحداث لي مازال عاقل عليهم ، بينما جبل كايسترجع دكريات طفولتو القاسية حتى كسر الصمت أخيرا وقال :
- فنهار واحد تقلبات حياتنا كلها .. وليت كانحمل نفسي مسؤولية موتو .. لو أنني رفضت نقصم معاه لبيسكويت ديالي مكانش غادي يديني لطبيب ومكانوش الفحصات غادي يكشفو انني ماشي ولدو من صلبو وكان بركات غايبقا عايش وكنا غانبقاو عايشين وسط ديك الكذبة فسعادة .
البارون الأعظم الجزء 83 حبل الكذب قصير
محتوى القصة
التنقل بين الأجزاء