إيمان.(وحطات يدها فوق كتف رغد)الله يفرجها عليك أبنتي هدشي لي نقدر نقول .. (وبعدها مشات خرجات وسدات الباب وراها بعدما قطعات ليها حالة رغد قلبها)
رغد.انا ماشي بحال نوال ماشي بحالها أهئ أهئ .. (بقات كتردد نفس الكلمات وقلبها كيتشوا لداخل على قبل شخص ولا على باله، تادازت شي نص ساعة تقريبا)
[#خارج_الغرفة]
إيمان.من لما فاقت وهي كتبكي ماوقفاتش
جهاد.ماقالتش لك شنو واقع معاها؟
هي.لا أولدي وتامن باك فاش لقاها فالطريق ماقالت ليه والو من غير داكشي لي قلت ليك
جهاد.(وحط يدو فوق كتفها)وخا صافي انا غنشوف معاها
هي.وخا أولدي انا غنمشي للمركز التجاري باش نجيب ليها شي حوايج .. (طلع جهاد للفوق ومشا ديريكت لبيتو، وقف حدا الباب ودقو)
المكان.(الصمت)
هو.(ممكن ندخل، ودق مرة آخرى)
المكان.(الصمت، حل الباب ودخل وقف وكيشوف قدامو بنت ناعسة مدورة لجهة الحيط وكتبكي بصوت مبحوح)
هو.السلام عليكم
رغد.(الصمت)
هو.(وزاد خطوات للقدام، جبد كرسي وجلس مقابل مع رغد، ربع يدو وبقى كيشوف فيها وساكت بقى هكاك مدة طويلة وهي غير مازايدة فحالتها لا وقفات بكأها ولا دورات تشوف شكون كاين موراها، قلبها تحرق وهي متدمرة. بقات غير كتفكر فأيام حياتها لي ماعاشت تايوم فيهم وهي فرحانة، عيات من كولشي وماكرهاتش تموت وترتاح فمرة)...
جهاد.(بعد مدة طويلة من الصمت)بعض المرات كنوصلو لواحد المرحة كنوليو نختصرو كلامنا حيت كثرة الهضرة كتزيد غير تحطمنا، وبعدها كتكتشف انك كتمر من مرحلة فارغة وقاتلة، ومبقات تاحاجة كتلفت إنتباهك فهذ الدنيا حيت كل الأيام بالنسبة لك كيوليو متشابهين، ومشاعرك كتولي باردة لحد الجمود، كولشي بالنسبة لك ولا ممل لدرجة انك كتفكر فأمور غريبة مكتناسبش عقلك الناضج، وهذي كيقولو ليها مرحلة اليأس من كل شئ، كتبغي تناعزل بوحدك وكيولي الصمت هو طلبك الواحد وصوت واحد كتسمعو هو صوت بكأك تماما بحالك أنتي، وسبب واحد كيتسبب فهدشي هو الحب او الفراق بنسبة 80%
رغد.(من أول لحظة سمعات فيه صوت جهاد لتزمات الصمت ؤولات حالا وذنيها وكتسمع كل كلمة كيخرجها من فمه، ستغربات منه حيت هو الوحيد لي قدر يفسر حالتها وداكشي لي كتحس بيه بقات كتسأل هو كيفاش عرف هدشي كامل، ؤولا عندها فضول تعرْف على هذ الشخص كيف داير، مسحات دموعها ودورات عندو ومع الدورة كتصدم برجل آية فالجمل)
هو.(مع إبتسامة صغيرة)بغيت منك سبب مقنع يخليك تخرجي مع 2 داليل!!
هي.(وبلعات ريقها وكتشوف فيه)كنبغيه وهو رفضني
جهاد.هذا ماشي السبب الكافي لي يخليك تخرجي!!
هي.رفضني وبعدها عطاني أمل بلي يقدر شي نهار يبغيني ولكن هو بنفسه لي حطم هذ الأمل
هو.ودبا باش كتحسي من جهته؟
هي.حاليا كنراجع أحاسيسي لأنو ربما نكون غالطة حيت مستحيل نكون كنبغي واحد حيوان
هو.علاش حيوان؟
هي.حيت كون كان بنادم كان غيحس بيا وخا ميبغينيش مايعاملنيش بديك الطريقة السيئة
هو.ربما يكون كيبغي انسانة أخرى
هي.(وعقدات حواجبها)اه هو كيبغي وحدة اخرى
هو.وخا لنفترض انا كنبغيك انتي واش غتبغيني؟
هي.لا
هو.علاش؟
هي.حيت كنبغي سيف
هو.تماما بحالو هو مايقدرش يبغيك انتي حيت كيبغي وحدة اخرى
هو.(وكيتبسم)لا تقدري ماحدك كاتنزلي دموعك الحب غيتلاشى فقلبك من قلة الإهتمام ومن كثرة الكره لي غيتولد ابتدأ من هذ اللحظة
رغد.(بحروف مخلطة مع الدموع)لا صعييب أهئ أهئ صعيب عليا ننساه
هو.أنا غنعاونك
هي.(وهزات راسها كتشوف فيه)شنو!!
هو.كيما سمعتي أنا غنعاونك
(#تمريرة_سريعة_للأيام)
🍁.. فعلا جهاد كان عند وعده، ساعد رغد لكن مايمكنش نقول ساعدها ونسات حيت هدشي مستحيل ففترة قصيرة وخا دبا شهر داز، نعم 30 يوم مرو من حياة رغد، نصهم داز فبكاء والحسرة على لي فات والنص الأخر دوزاتو وهي كلها أمل وتفاؤول للحياة وللي جاي، جهاد قدر يبدل 90% من طريقة تفكيرها، ولات دبا كتفكر بعقلها وعلى مهل وبلا ماتسرع، واخيرا قدرات تفهم ان الحب ماشي هو كولشي فالحياة، وخا هي باقة كتبغي سيف لحد الآن، لكن الأمر عندها عادي حيت الحب ماعمرو كان كيقتل الواحد، ربما غيخليك تمر فمرحلة صعيبة من حياتك لكن ماشي دايما، كاتكون بحال قطار هز فئة من الناس وحطهم فالمحطة الثانية، وستمر فالسير ديالو، رغد الضحكة رجعات لوجهها وهذا بفضل جهاد وإيمان، كل يوم كدير حصة مع جهاد لمدة3 ساعات، الساعة الاولى كتخوي ليه لي فقلبها والساعة الثانية جهاد كيهضر وهي كتبقى تسمع ليه تاللأخير وفالساعة الثالثة كيدوزوها فالرسم .. نعم الرسم هذي هواية رغد المفضلة ومن أول مرة عرف فيها جهاد ان الرسم عزيز عليها عمر ليها غرفتها بالألوان واللوحات، هي لقات راحتها مع جهاد والجزء لي كان فارغ فقلبها وكانت كاتسنى سيف يعمرو مع الأسف جهاد سبقو وعمرو هو ومراتو جنى لي بدورها تاهي مابخلاتش على رغد بنصائحها وبمساعدتها، وببناتها صفا ومروة قدرات تخلي باقي ايام رغد كلهم فرح وسعادة، ؤولات عندها عائلة جديدة، عائلة مهتمة بها وكتفكر فيها ورادة ليها البال، اما خواتتها ريم وعبير بقات على تواصل دائم معاهم لكن مازال ماقالتش ليهم ان نوال باقة حية وباقي الحكاية، هي فضلات تبقى ساكتة باش تخليهم مرتاحين بلا ماتصدعهم وهما مازال كيقراو،)...
[#الآن]
الطبيب.مع الأسف المرض نتشر ليك فالجسم كامل
سيف.يعني ماكاين تاشي أمل للعلاج!!
الطبيب.راك عارف اصعب مرض يقدر يتعالج هو السرطان انت جيتي فمرحلة متأخرة ومبقات فايذة فالعلاج
سيف.وخا شكرا .. (سلم على الطبيب ومشا حل الباب وبعدها خرج من المستشفى، اما رغد فهذ اليوم هو يوم عيد ميلادها، والكل محتفل بيه، وعلى قبلها زينو الدار وعرضو على عائلتهم وخا هو غير عيد ميلاد ماشي شي حاجة كبيرة لكن فرحة رغد هي الأولى فقائمة أولوياتهم)
إيمان.(وعنقاتها)انتي راك عروسة وغتبقاي فعينينا ديمة عروسة انتي غير خلي الضحكة مرسومة على وجهك هدشي كافينا
جنى.واشتي شنو باغة كثر من هكا
صفاء.حال تي زيييتي زوييناء (بصوت الأطفال)
جهاد.(ودخل للغرفة)أمورتنا فين وصلات مازال ماهداك الله تهبطي راني تشهيت ديك الحلوة لي لتحت
رغد.(وميتة بالضحك)ماكانش احسابلي انت مضروب على كرشك
جنى.سي جهاد ياكما نسيتي الهدية ديال رغد؟
جهاد.ننسى كولشي وماننساش رغد .. (دار اشارة لجنى باش تغمض عينيها لرغد، وبزربة هزات يدها وحطاتها على عينيها)
رغد.(ومستغربة)شنو كاين علاش مغطية ليا عيني
جنى.(وجراتها للبالكون)اجي جهاد عندو لك مفاجأة
رغد.مفاجأة!!
جنى.اه ودبا غتعرفيها، (حلات ليها عينيها ومع الحلا رغد كتشوف طموبيلة كبيرة فالجردة لونها حمر، {رغد.شنو هدشي!!
جهاد.هذي هدية صغيرة مني (وعطاها السوارت)
رغد.(بصدمة، وشدات السوارت)لاااا مايمكنش ، (وبعدها بقات كتنقز من الفرحة، وفرحات كثر فاش جهاد قال ليها انهم غيسافرو مجموعين لتركيا وغيبقاو تما الصيف كامل))
نعم هذا ما وقع في أجزاء هذا اليوم .. الحياة غريبة، كاتخليك تاتوصل للحافة وكتقولك "لن تسقط" وكترجعك تاني لبلاصتك، وهكا كتختابرك باش تعرف لأي حد انت صبور، وبعض المرات كتخسر ناس باش تكسب ناسي ثانيين، وكما يقول المثل شي كينسيك فشي، خصوصا فاش كتلاقا بنفس الأشخاص لي تلاقات بيهم رغد، هي بعد كل معاناتها وعذبها لي كان مرافق حياتها، واخيرا الحياة تبسمات ليها وخا جرحها باقي بلاصته ولكن مابقاش كيضرها
..🍂 بعدما خرج سيف من المستشفى، مشا ركب طموبيلتو وديمارا بسرعة كبيرة، وبعد دقائق قليلة من الصوگان كيشوف رغد قدامو، اوقف الطموبيلا بالزربة وعينو عليها، حل الباب وهبط وهو كيجري لعندها)
رغد.تستاهل هدشي لي وقع ليك
سيف.(الصمت)
رغد.هذا جزائك حيت ماقبلتيش حبي لك ولكن صافي دبا فات الفوت وحبي لك تحول لكره .. (بقات نفس الكلمة كتردد فراسو) الكره الكككره الكررره .. (وبعد ثواني قليلة كينقز من بلاصتو وفاق من حلمه وهو فصدمة!! .. هز كاس من فوق الكوافوزة وشرب وقلبو كيضرب بالجهد ورجع كله عرقان، وعلاش لا وهو حلم حلم زعزع ليه قلبو، هذي أول مرة يحلم بحاجة غريبة بحال هذي فالأول كان فالمستشفى وبعدها خرجات ليه رغد فالطريق!! .. ناض من بلاصتو بعدما ظبط انفسه وحل باب بيتو وخرج هبط للتحت، وهو فالدروج تليفونو كيصوني، جبدو وجاوب فالبلاصة)
معاذ.سي سيف مع الأسف البلاصة لي قال لينا داك السيد ماكايناش فيه
سيف.(وزير على يدو)هذي مهمتك انت بغيتك تلقاها واليوووم راه شهر وحنا كنقلبو مايمكنش نخرجو من هدشي ونربعو يدينا بحالا ماواقع والو
معاذ.انا درت كيما طلبتي مني وكنراقب نوال وجاد ولكن هذ المرة كنظن ماعندهم تاشي دخل فإختفاء مدام رغد
سيف.هدشي ماشي شغلي!! بغيتك تلقاها وخا تكون عايشة تحت الأرض .. (قفل الخط ومتسناش رد معاذ .. خشا تليفونو فجيبو وخرج من الڤيلا وهو معصب، ركب طموبيلتو ومشا كيقلب على رغد كيما كيدير كل يوم، نعم هذا دبا شهر وسيف عمرو شاف الراحة، ليل ونهار كيقلب على رغد لي غبرات ومابقى بان لها أثار، صحتو رجعات اللور من قلة الأكل والنعاس، بقى غير كيفكر فيها، وهي الواحيدة لي خدات ليه كل عقله وخا مازال احساب ليه بلي هي وجاد وقعات بيناتهم شي حاجة لكن بقى كيلوم راسو حيت قصح معاها الهضرة ونسى ان جاد خطفها بالغصب ومامشاتش عندو بإرادتها، ربما هذي ريحة مشاعر متاجهة لقلب سيف او ربما ضميره كيأنبو حيت أذاها بزاف وعذبها ظلما، .. جبد گارو وشعلو وبقى كيكمي وهو صايگ، حيت هو الواحيد لي يقدر يهدنو ويخفف من عصبيته، ولا كايكمي اكثر من 2 باكيات فالنهار بلا مايفكر فراسو ولا فصحته،..
بقى غادي فالطريق وهو كيقلب من قنت لقنت وكيسول وخا ماعندوش صورة رغد لكن بقى كيوصفها للناس لكن مع الأسف بدون جدوى الوصف ماعاونو فوالو، شوية تفكر الرسم، وبالزربة رجع الطموبيلا للطريق المعاكسة وتاجه لواحد البلاصة كيكونو فيها الرسامين كيعرضو لوحاتهم، زاد فالسرعة وماوقف تاوصل للمكان المقصود، نزل وهو كيجري بقى كيقلب بعينو على شي واحد يعاونو تاشاف واحد الولد تقريبا عندو 22 سنة، مشا عندو ؤوقف قدامو)
سيف.ممكن تعاوني؟
الشخص.غتسنى شي نص ساعة هكاك حيت عندي واحد اللوحة خصني نكملها لواحد السيدة قبل ماتجي
سيف.غناخد من وقتك غير 5 دقائق ومابغيتش الرسم فلوحة غير ورقة بغيتك ترسم ليا واحد البنت
الشخص.وخا تقدر تعطينا صورتها وانا غنرسمها
سيف.مع الأسف ماعنديش صورة البنت اختفات وانا كنقلب عليها وبغيت ندير عليها اعلان باش لي شافها يقولها ليا
الشخص.صافي تقدر تعاود ليا ملامحها كيف دايرة وانا غنشوف واش نقدر نجيبها هي هاديك
سيف.وخا اخويا شكرا .. (بقى سيف، واقف وكيهضر كيقول ملامح رغد بكل تفاصلها، وداك الولد بقى كيرسم كيما طلب منه، وماكانتش الا 6 دقائق وهو يسالي الرسم)
هو.صافي اسيدي ساليت شوف واش هي؟؟
سيف.(شد من عندو الورقة، ومن الشوفة الاولى كيسهى، نعم كانت رغد بكل تفاصلها المملة، وراسمة إبتسامة عريضة فوجهها، الإبتسامة لي عمر سيف رد ليها بالو، هاااه ولا اصلا فين عمرو خلاها تبسم وتضحك باش يشوفها ويرد ليها باله، .. باقى كيشوف وساهي والولد كيسولو واش هي ولا لا .. وهو ولا على بالو، تاناض من بلاصتو وحركو فيدو)
سيف.(ورد بالو)نعم !!
الولد.واش هي اسيدي
سيف.اه هي كنشكرك بزاف، خلصو الثمن لي طلب منو وبعدها مشا ركب طموبيلتو وتاجه لأقراب جريدة، كانت خطته يدير إعلان على رغد باش لي لقاها يتاصل بيه، وهذا آمله الواحيد بعدما تسدو گاع البيبان فوجهو، هو عرفها مشات بخاطرها حيت دات گاع حوايجها ولكن كان شاك ان جاد يقدر يخطفها بعدما يعرف انها خرجات لكن هذ المرة جاد ماعندو تاشي داخل فلي وقع، هو بنفسو غبر ودخل سوق راسو، أولا يمكن جالس كيرسم خطط ثانيين حيت مايمكنش يكون تخلا على كولشي ببساطة وستسلم،..
(بعد مدة طويلة ديال الطريق سيف وصل للجريدة لي كان قاصد، دخل والرسمة فيدو، وكان الحظ لاقاه بنفس الشخص لي قرا معاه فصغرو، وهو بنفسه مول الجريدة، بقاو كيهضرو لكن طبعا على رغد، حيت قلب سيف طاب بفراقها وخا ماهاز تاشي مشاعر فقلبو من جهتها لكن فراقها وجعو، وحاس كأن طرف من قلبو تقطع ومشا، .. ( سيف بعدما تافق هو ومول الجريدة على عنوان الإعلان والصورة لي غتحط، شكرو بزاف حيت عاونو ودبا مابقى عندو غير يتسنى تال غدا عاد غيخرج الخبار فجريدة صباحية،)
[#في_مكان_آخر بعد #مرور 8 ساعات]
رغد.(وكضحك في صفرة عشاء)انا بعدا المذاق ديالو جاني مختالف
جنى.يلاه تصبحو على خير .. (سلمات عليهم هي وجهاد ومشاو داو البنات وخرجو)
أحمد.تا انا غنقولكم تصبحو على خير
رغد.وانت من أهل الخير أعمي
إيمان.شوية ونلحق عليك
رغد.خالتي قولي ليا شكون ديك البنت لي لابسة قفطان خضر فحفلة عيد ميلادي؟؟
ايمان.اه هاديك بنت صاحبتي كنت غنخطبها لولدي جهاد ولكن ماكانش باغي
رغد.(بإستغراب)علاش؟
هي.هذي قصة طويلة ابنتي
رغد.غير عاودي ليا راه عزيز عليا شي واحد يعاود ليا على الناس هههه
إيمان.(وكضحك)ههه مهم أبنتي هذا سر زعمة بغيت نقولك هذا سر جهاد انا كنت غانزوجو ديك البنت ولكن الله بغا حاجة أخرى، وتزوج بجنى وخا ماكانش كيبغيها تزوجها باش يسترها
رغد.(بصدمة)كفاش؟
هي.انا غنعاود لك كولشي باش تفهمي .. جنى قرات معاه وكانو صحاب بزااااف وخطبها واحد الولد ولكن غير كيتفلا عليها وعائلتها كانو محافظين لواحد الدرجة كبيرة بزاف راكي شفتي جنى كدير حجاب شرعي مهم ففترة ديال الخطوبة داك الولد قال ليها مالين الدار عرضو عليك باش تعشاي عندنا ايوة مسكينة تيقاتو ومشات معاه بلا خبار والديها داها لواحد الدار وتكرفس عليها بزاااف..
إيمان.ورجعها كلها دمايات ومشا خلاها وهرب، ومسكينة كانت خايفة من والديها وماعندها شكون تتاصل بيه باش طلب منه يعاونها، ايوة كان جهاد هو صديقها الواحيد فديك الفترة وتاصلات بيه وهو مترددش باش يساعدها بالعكس مشا عندها كايجري وجابها عندنا لدار وتاصلات بوالديها وقالت ليهم انها غتبات عند صاحبتها وانا هضرت معاهم وطلبت إذنهم باش يخليوها وقلت ليهم انا مامات صاحبتها بلا ماتخافو عليها هي فآمان، مهم بقات معانا ديك اليلة ومسكينة دوزاتها غير بالبكاء وكانت خايفة بزاف حيت والديها الا عرفو داكشي لي وقع ليها غادي يقطعوها طراف طراف وفكرات تنتاحر ولكن جهاد وقف معاها وقفة العمر وقرر هو لي يتزوج بيها، ايوة صافي البنت رجعات لدارها وقالت ليهم بلي داك السيد لي خطبها تاصل وفسخ الخطبة وبعد اسبوع حنا مشينا خطبناها وفاش مشات عند الطبيبة تشوف حالتها، الطبيبة صدماتها صدمة كبيرة، وقالت ليها بلي هي حاملة، صافي جهاد قال العرس غيكون فداك الشهر نيت حيت الا زدنا تسنينا جنى غيبان عليها الحمل ويتكسف كلشي، ايوة وجدنا كولشي ودرنا احلى عرس لجنى وبعد 8 شهور ولدات جوج تويميات وانا لي سميتهم صفا ومروة ايوة البنت عاشت حياتها عادي وكملاتها مع جهاد وخا ماكاينش حب بيناتهم ولكن كانت شي حاجة أقوى وهي الصداقة ودبا داز على هدشي لي كنعاود ليك 3 سنوات
رغد.(وكتمسح دموعها)مسكينة جنى تاهي حياتها كانت عذاب
إيمان.لا بالعكس هي مع جهاد تخطات داكشي ونسات الماضي وكتصرف عادي وجهاد دار صفاء ومروة بناتو وعمرو حسسهم انهم ماشي باهم
رغد.ياريت لو كانو گاع الرجال بحال جهاد
إيمان.ايوة ابنتي داكشي هداية من عند الله يلاه نوضي تنعسي راه غدا تابعنا السفار
رغد.(وكتبسم)ااااه نسيييت تركيا تنادي
إيمان.(وعنقاتها)الله يخليك ديما فرحانة ابنتي .. (طلعات رغد لبيتها، لبسات بيجامتها ومشات تخشات بلاصتها ونعسات وهي كتقارن بين سيف وجهاد، وخا ماعندهم تاشي علاقة ببعضياتهم ولكن الشيطان غرها، جهاد بالنسبة ليها بحال الملاك فالوقت لي سيف هو الشيطان ومع الأسف هي بغاتو من قلبها وكيما قال ليها جهاد أول مرة فاش تلاقى بيها "الحب غيتلاشى فقلبك من قلة الإهتمام والكره غيتولد بلاصته"..
وفعلا جهاد كان عندو الحق، هي جات عند ناس دخلو الفرحة لقلبها وخلاوها تنسى قرحها شوية بشوية، غمضات عينيها ونعسات بلا ماتجبد ذكراياتها المؤلمة حيت ولاو من الماضي)،
[عند #سيف_الراضي]🎬
سيف. كنتي كتعذبي بحال هكا!! واش غتكوني دبا كتألمي حيت مابقيتيش معايا؟؟ ياك كنتي كتبغيني علاش مشيتي وخليتيني (كيقول هذ الكلمات وهو غارق فدموعو لأول مرة، وفيدو كاس ديال الشراب، خلاه يسكر ومابقى عاقل على راسو، قلبو كيوجعو على فراق رغد، ولا كيشوف حياتو كلها كحلة بلا بيها، مع العلم ان هي فعينو غلطات، لكن مع ذلك كيتألم وبزاااااف،🎬 فالوقت لي رغد ناعسة وهي مرتاحة وفرحانة ومابقات تاحاجة كتهمها، وصل الصباح ورغد باقة ناعسة ومجبدها ؤواخدا راحتها ع الأخير)
🎬🎬🎬🎬🎬🎬🎬
جهاد.لا غير خليوها ناعسة ايلا عرفات هدشي تقدر ترجع لحالتها القديمة
إيمان.ولكن أولدي هي عندها تليفون تقدر تشوف هدشي فمواقع التواصل الإجتماعي ومتنساش ان الجريدة هي ايضا جريدة الكترونية
جهاد.انا غانحييد ليها التليفون وبعدها غنمشي للجريدة بنفسي باش نعرف هذ السيد علاش رجع كيقلب عليها من بعد هذشي كامل لي دار فيها
إيمان.ماتسرعش أولدي تهدن يقدر يكون ندمان وبغاها ترجع ليه وتسامحو
جهاد.(بعصبية)اخيييير حاجة طلبيهااا مني هي نتهدن وداك السيد الا قرب من رغد حسابو غيكون معاياااا أنااا
إيمان.(يلاه بغات تهضر وهو يقاطعها وهز يدو وقفها)
هو.صافي أماما ماتقولي والو
هي.ولكن أولدي...
هو.(ماتصنطش ليها ومشا طلع عند رغد كيجري، حل الباب بشوية وطل بنص عين ياكما فايقة، ولقاها باقى ناعسى ودخل بخطوات مهيلة وهز تليفونها من فوق الكوافوزة ورجع باش يخرج)
هو.لا لا ماشي داكشي اصلا الطيارة غتمشي مع 10 داليل وحنا غانمشيو للمطر غير مع 8
هي.اه وفين جنى واش ماجاتش
هو.لا مشات تودع والديها عاد تجي لهنا
هي.اه وخا صافي غير سير ...
(تبسم ليها جهاد ومشا خرج وهي ناضت من بلاصتها ومارداتش البال لتيلفونها، مشات دخلات للحمام غسلات وجهها ومشطات شعرها وخرجات بدلات حوايجها بكسوة طويلة فالصومو مع شال فالبيض، وبعدها هبطات للتحت وهي كتغني فالدروج، وغير وصلات للصالون وهي توقف)
رغد.(وسلمات عليها)صباح النور أخالتي شنو كاين ياكما واقعة شي حاجة
هي.لا لا أبنتي كولشي بخير جلسي تفطري
رغد.واش جهاد مشا؟
هي.اه حيت عندو شي خدمة
جميلة.ختي رغد نكب لك العصير ولا القهوة
رغد.امم العصير شكرا .. (كباتو ليها وجلسو كيفطرو مجموعين مع جميلة وخا هي الخدامة ديالهم ديما كتاكل معاهم فالطبلة وماعمرهم حسسوها انها خدامة)
رغد.عمي مشا بكري لخدمة؟
إيمان.(الصمت، وساهية)
رغد.(بقات كتشوف فيها وحسات ان شي حاجة واقعة، ودغيا تسدات ليها الشاهية وتغير حالها وتقبط عليها قلبها وخا هي ماعارفة والو ولكن قلبها حسسها بكولشي)
[تغيير الوجهة]🎬
جهاد.اه وماقالش لك علاش بغاها؟
الشخص.قال بلي هي مراتو ويمكن تخطفات مهم شي حاجة بحال هكا، واش ممكن نعرف شكون انت اسيدي؟ الا كنتي كتعرف شي حاجة على البنت راه سيف كيتسنى شي اتصال اليوم باش يعرف مكانها
جهاد.لا صافي انا غنتاصل بيه شكرا .. (خرج جهاد من الجريدة وخدا رقم سيف لي حطو فالجرنال وبعدها تاصل وبقى التليفون مدة طويلة وهو كيصوني تاسمع)
سيف.(بصوت ثقيل)ألوو
جهاد.سيف الراضي؟
سيف.اه شكون معايا؟
جهاد.واش ممكن نتلاقا بيك؟
سيف.(مع انه شرب بزااف البارح تفكر الإعلان لي حطو)واش تاصلتي على قبل رغد؟؟ قول كتعرف شي حاجة عليها؟
جهاد.كنعرف عليها بزاااف عطيني العنوان انا نجي عندك حيت داكشي لي غنقولو لك طويل
سيف.(وكله آمل)وخا .. (قال ليه العنوان وبعدها قطع، وجهاد مشا ديريكت لعندو ومادار لتاشي جهة أخرى.. وبعد نصف ساعة كيوصل)...
[تغيير الوجهة]🎬
جميلة.بلاتي انا غنمشي نجيبهم لك
رغد.لا انتي غير كملي داكشي لي فيديك انا غانمشي نشرب فالكوزينة .. (خرجات رغد من بيت الصابون لي كانت فيه هي وجميلة ومشات ديريكت للكوزينة هزات الكاس باش تشرب وهو يتطيح من يدها وتهرس)
هي.أااي يالطيف .. (هبطات للأرض وهزات الزاج لي تفرتت ومشات تلوحو فالطارو دالزبل .. ولقات جريدة فالفوق وقالت مع راسها تهزها وتحط الزاج لداخلها باش لي كيجمع الزبل مايتجرحش بيه، حلاتها ومع الحلا كتجي عينيها فصورتها رمات الزاج فالطارو ورجعات خطوة للوراء وفيديها الجريدة، كتقرى وهي مصدومة ومخرجة عينيها)
[تغيير الوجهة]🎬
جهاد.رغد بدات حياة جديدة وممستعداش تدخل فالصدمات مرة أخرى
سيف.(بكل عصبيته)رغد مرااااتي وأنا غنرجعها للدار
جهاد.باش تعذبها ياك هدشي لي بغيتي!!
سيف.رغد كتبغيني
جهاد.هدشي قديم عارفينو كيبان لي انت لي يلاه عرفتيها
سيف.دبا واش غتقول ليا فين هي ولا نمشي نقلب عليها براسي
جهاد.بلا ماتعذب راسك حيت رغد مابقاتش فالمغرب
سيف.(بصدمة)ككفاااش!!
جهاد.كما سمعتي وغير نساها عليك وماتبقاش تقلب عليها .. (قال ليه هذ الكلمات لي زلزلو قلب سيف وبعدها مشا ركب طموبيلتو وديمارة تاجه ديريكت للدار، .. جهاد ماكانش باغي رغد ترجع كيما كانت، بغا يحميها من سيف، هو وعدها بلي غيعاونها تاتنساه وهاهو الآن كيوفي بوعده ولهذا السبب قرر يدوزو الصيف فتركيا وتبعد على هذ الجوو لي يدور يدور يفكرها بسيف وماضيها،)
[عند #رغد] 🎬
هي.(وكتبكي وجالسة فوق الناموسية)علاااالش أهئ أهئ عاد قلت غننساك وانت تبان تااااني علاش درتي هدشي علاش رجعتييي أهئ أهئ .. (هزات الجريدة وقطعاتها طراف طراف وبعدها فرتاتها فالبيت وحطات راسها فوق المخدة وهي كتشهق بالبكاء، احساب ليها نسات سيف ومابقات تاحاجة كتهمها ولكن دبا بان العكس، هي فقط كانت غتغطي الشمس بالغربال والآن كولشي رجع بان عن أول وجديد .. (فهذ اللحظة جهاد رجع للدار وطلع ديريكت عند رغد باش يقول ليها تجمع حوايجها ويلاهيها باش ماتسيقش الخبار لداكشي لي واقع .. يلاه كان غيدق الباب وهو يسمع صوت بكأها، وستغرب شنو بكاها!! وأول حاجة طاحت فبالو هي أنها تقدر تكون عرفات بأمر الجريدة، ودخل عندها بالزربة وهو ميت من خوفه عليها)...
هو.(وكيتسناها تدور لجهته)رغد!! .. (وغير سمعات صوته وهي تنوض من بلاصتها ومشات تلاحت فصدرو وعنقاتو وهنا تأكد انها فعلا عرفات كولشي)
هو.(وكيطبطب على راسها)صافي شششت أنا معااك
هي.بغا يحرق لي قلبي رجع باش يعذبني
جهاد.(الصمت وكيتصنط ليها)
هي.هو ماكيبغينيش ومع ذلك رجع أهئ أهئ هو حيت كيستمتع بعذابي
هو.لا غايتيقك حيت مارجعش على قبلك هو رجع حيت كيتعذب وضميره كيأنبو من جهتك
هي.(ومسحات دموعها)اه هو ماكيبغينيش
إيمان.(ودخلات عندهم)ولدي واحد الراجل جا كيسول على رغد
جهاد.(الصمت وكيشوف فيها)
رغد.سيف!! .. (خرجات بالزربة من الغرفة ونزلات فالدروج وهي كتجري وكلها ثقة وقوة وفلحظة سيطرات على دموعها بشوية دالكره لي ولات كتحس بيه جهة سيف .. مشات للباب ولقاتو واقف كيتسنى وغير شافها وهو يزيد خطوات للقدام ؤوقفاتو)
هي.(ومقصحة الهضرة)وقف بلاصتك وياااك تقرب شنو!! احسابليك الا رجعتي غنطير لعندك بحالا تاحاجة ماوقعات اه ولا ولفتي رغد القديمة لي ذلات راسها وخلات لي يسوى ولي مايسواش يعفط عليها وعلى كرامتها هاااه دبا ضميرك فاق؟ وجيتي كاتجري لعندي لاء وداير عليا إعلان من الفوق!! خسارة غير خسرتي وقتك وضيعتيه على والو، وبلا ماتعذب راسك جايتك عندي ماكتسوى عندي والو حيت داكشي لي درتي فيا ماااااشي قليل ظلمتيني!! ظلمتيني بزااااف كتشوف لي بغيتي وكتيق لي بغيتي وعمرك عطيتيني فرصة نشرح ولا نبرر عرفتي علاش؟؟ حيت انا قدامك جرتيلة ماكنسوى عندك والو ودبا فحياتي حطيت حدود وقوانين لذلك تفضل رجع منين جيتي حيت انت غير مرحب بك فحياتي
سيف.(الصمت، وجرها عندو وعنقها تحت أنظار إيمان وجهاد،).....
أما رغد فاداكشي كامل لي بناتو وعلاتو طار فلحظة وديك الثقة الزايدة بالنفس والقوة طارو للسماء، وأتعاب جهاد راحو على الفاضي، بقاو فنفس الوضع سيف معنق رغد، وجهاد بغا ينقذ الموقف وجر رغد لعندو)
جهاد.كنظن كلام رغد كان واضح!!
سيف.(الصمت، وشوفاتو موجهين لرغد لي بدورها تاهي كتبحلق فعويناته)
جهاد.هي مابقاتش باغاك حيت انت غير مصدر عذب وقهر ليها
سيف.(بصوت ثقيل)خليها هي تقول هدشي
رغد.(الصمت)
جهاد.رغد هضري ديري حد لهدشي
هي.أه انا مابقيتش باغاك صافي كان حب ودبا راح وخلا رماد
سيف.هذا ماشي كلامك!!
رغد.ايوة هدشي على حسب عينيك اشكيشوفو واش انا نيت لي كنهضر
سيف.انا رجعت على قبلك
رغد.(وزيرات على يدها حيت الكلمة لي قال حركات قلبها وأحسيسها)فات الفوت دبا غير كمل أجرك ورجع منين جيت ودي المشاعر لي خلاوك تجي وخا عارفة بلي ماكينينش أصلا
سيف.اه غنرجع
جهاد.(وكيشيير للباب)يلاه سير هالباب قدامك .. (سيف شد يد رغد ودور باش يخرج)
رغد.شنووو كادير
سيف.كناخد المشاعر لي خلاوني نجي
جهاد.(بعصبية، وحيد يد رغد من يدو)ماعندكش الحق تديها معاااك
سيف.بالعكس انا أكثر واحد عندو الحق باش يديها حيت هي مراتي ويلا قدر شي واحد فيكم يقوني غير يوقفني .. (رجع شد يد رغد وجرها معاه بوحشية وهي بقات كدفعو وتغوت)
هي.(وكضربو فعضلات يدو)خليييينييييي الحيواااان مابغيتش نرجع معااااك .. (حل باب الطموبيل ولاح فيها رغد وسد الباب ومشا ركب بلاصتو وهدشي كله وجهاد واقف كيشوف وماقادر يدير والو .. ديمارا بسرعة كبيرة ورغد بقات كتغوت وضرب الباب ديال الطموبيل)
سيف.بلا ماتعذبي راسك على والو وجلسي تبتي لأرض
رغد.كنكرهك كنكررررهك
هو.(ودور راسو كيشوف فيها)تانوصلو للدار ونناقشو هذ الموضوع .. (سيف طول الطريق وهو ملتزم الصمت اما رغد فجميع أنواع السبان قالتهم فحق سيف وهي كتغوت وضرب الزاج والباب والكوسان (وبعد مدة طويلة ديال الطريق كيوصلو للدار، هبط سيف ومشا حل ليها الباب وجرها معاه لداخل الڤيلا، دخل وسد الباب وراه وهي نترات يدها منه ومشات كضرب الباب باش تخرج)..
سيف.(وجرها من يدها)أجييي لهنااا .. (وقفها قدامو ومخرج فيها عينو)
هو.درتيييه محامييي وصيفطيه وبقى كيتفلسف علياااا أااا دبا قولي ليه يجي يفكك من بين يديييي
رغد.هو بعدا كيما يكون كيبقى مرجل عليك أشماتا .. (ومزال گاع ماكملاتهاش وهو يشدها من خصرها وزدحها معاه)
هو.سولي راسك شنو درتي ليا!! مشيتي خرجتي وغبرتي ومبقى بان لك أثار واش عرفتي مناش دزت؟؟ كل يوم كنتعذب ونلوم راسي حيت قصحت معاك الهضرة فالوقت لي كان عليا نسولك ونفهم منك شنو واقع
هي.(وحطات يدها فوق جبهتو)انت بخير؟ ياكما طالعة لك السخانة!!
هو.انا كنعتذر منك وبغيتك تسمحي ليا
هي.ومن بعد؟
هو.ومن بعد انا كنسحب الكلام لي قلتو لك ديك اليلة
هو.يعني؟
هو.واش ممكن تعطيني فرصة
رغد.(الصمت ومصدومة)
هو.انا دبا تالف ومابقيت عارف اشواقع ليا ولا شنو بغيت لكن الحاجة الواحيدة لي باغيها هي انك تكوني معايا .. (وتقرب منها تاولاو يتنفسو انفاس بعضياتهم، وهنا رغد بدلات كل تفكيرها ولات تقول مع راسها ان سيف يقدر يكون واقع فحبها داكشي علاش كيحس بالضياع ومابقى عارف شنو باغي، فهذ اللحظة بداو يتقربو من بعضياتهم شوية بشوية تاشمات رغد ريحة غريبة وبعدها دفعاتو وبعدات عليه حيت عرفاتو ماشي فوعيه، شمات ريحة الشراب القوية لي خارجة من فمه، عقدات حواجبها وبقات كتشوف فيه وهي حاقدة، ولات كتشوف واحد مدمن قدامها)
سيف.مالك!!
هي.(تنهدات وعرفات ان مابقى عندها اي مكان تمشي ليه سوى تقبل وضعها الحالي، مشات طلعات للفوق ودخلات للبيت لي كان بيتها، بقات تما وكتفكر فوضع سيف وشنو دير معاه وتعب جهاد لي مشا غير هكاك، تاسمعات صوت التهراس فالڤيلا، وخرجات من بيتها كاتجري للتحت وماوقفات تاشافت جاد قدامها هاز فردي على سيف)
جاد.واخيييرا تجمعتو شحال تسنيت هذ اللحظة
سيف.(وكيرجع باللور)شنووو بغيتي هذ المرة
جاد.باين شنو باغي انت غطلق هذ الحثالة وبعدها غتكتب ليا كل أملاكك ولا هذ الفردي غنفضيه فراس واحد فيكم.
سيف.أملاكي؟؟!!
رغد.(الصمت، بلعات ريقها وشدات فالحديدة ديال الدروج وهي كترعد)
جاد.(وضحك)كل يوم كتبهريني بذكأك، فعلا انا ماغنقتلكش حيت باقي ماخديتش داكشي لي بغيت ومازال محتاجك بزااف دالأمور
سيف.شنوو كتقصد بهذ الكلام!!
جاد.كتسولني!! واش من نيتك ياك هي قالت لك كولشي، علاش داير راسك باقي ماعارف والو؟
رغد.(كتشوف فسيف وهي حابسة دموعها وتعابرها كيقولو، "لا قلت لك كولشي انت لي متيقتينيش")
جاد.المهم لي نطولوه نقصروه المحامي فالطريق ومعاه الوراق واليوم غانساليو هدشي كامل .. (ومازال گاع ماكملش كلامه وهما يسمعو صوت الباب تحل، دورو لجهته وهما يلقاو معاذ)
سيف.معاذ سييير من هنااا
معاذ.سي سيف وقعات واحد الحاجة
جاد.كنظن راك سمعتي كلامه سير فحالك قبل مانصيفطك للقبر
الشخص.(ودخل)ياخسااااارة .. يااااخساااارة
جاد ورغد وسيف.(الصمت، وكيتسألو شكون هذاك)
الشخص.(ودور جهة معاذ)دخلهاااا
معاذ.وخا ألالة .. (خرج معاذ وبعد لحظات دخل وهو جار نوال من يدها)
سيف.(بإستغراب)معاذ شكون هذ السيدة!!
معاذ.(الصمت والصدمة خلاتو يضرب الطم)
الشخص.(بكل ثقة)أنا إقبال تاج الراضي زوجة علي الراضي لي هي الأم الحقيقية ديالكم
جاد.(الصمت،وهبط الفردي)
سيف.(بالصدمة)ككفاااشش!!
إقبال.انا لي غنهضر!! قولو ليا شنووو هذ الحرب لي منوضينها!! انا ماتافقتش مع سي علي على هدشي!!
جاد.واش عارفة راسك اشكتقولي!!
هي.(ومشات عندو)هكا كتستقبل مك؟
سيف.الأم ديالنا ماتت مدة هذي
هي.(وكتشوف فيه)لا أولدي هذيك ماشي مكم، زينب جعفر غير رباتكم، حيت باكم طلقني وخداكم مني...
إقبال. ؤوعدني بلي غيربيكم تربية حسنة وماعمرو غيسمح للشطان يدخل بيناتكم لكن دبا سي علي مات والشيطان خدا بلاصته وخلاكم تشتتو بسبب الورث وأكبر غلط دارو باكم هو الوصية لي دار حيت كون ماكانش هكاك گاعما ينوض هذ الصداع كامل
وتفرقو وكل واحد كيخطط من جهة باش يقضي على لاخر
جاد.(يلاه بغا يهضر وهي تسكتو)
هي.انت اخيييير واحد يهضررر واش هكا كايديرو الناس مع خوتهم!! صدمتيني فيك مستحيل نكون انا لي ولدتك واش الفلوس لي حاط عليهم عينيك غاتديهم للقبر؟؟ أااا واش ماكفاكش انك سرقتي من خوك مراتووو واش هكا علمك باااك؟؟ عرضتي ناس أبرياء للخطر وهما ماعندهم تاشي ذنب فهدشي كااامل!! والأكثر من هدشي انت قتلتي حفيدي الواحيد
جاد.انااا ماقتلت حد
هي.(وهزات يدها لسابع سماء وضرباتو فوجهو)واااش نسيتي انني مك لي ولداتك وكنعرف شنو كيدور لك فراااسك انااا عارفة كولشي غير من عينيك بلااا ماتكذب وتمثل
سيف.نتي مشيتي خليتينا هذ المدة كلها وبعدها جيتي باش تمثلي علينا دور الأم!!
رغد.(غير سمعات كلام سيف وهي تمشي لحداه بالزربة وشداتو فيدو حيت خافت لايمشي يدير شي ردة فعل متسرعة ويتصرف خايب معاها)
هي.من حقكم تقولو هكا ولكن انا مامشيتش وخليتكم غير هكاك وعلى حسب هوايا انا كنت مضطرة، باكم مابقاش باغيني وانا ماعندي ماندير بواحد ماكيبغينيش وخا جامعنا رباط قوي وهو نتوما ولكن الا ماكانتش الراحة والسعادة الموت حسن، والحياة كانعيشوها غير مرة وحدة لذلك طلقت من باكم ومشيت عشت حياتي وتاهو عاش حياته مع الانسانة لي كيبغي وانا ماحشماناش نقول هدشي بالعكس حيت انا جيت باش نخليكم تانتوما تعيشو حياتكم وديرو لي بغيتو ولكن كايبان لي تعطلت .. تعطلت بزاااف وبقيت تافات الفوووت
سيف.(وباقي مصدوم)بابا مات سنين هاذي علاش ماجيتيش ديك الساعة!!
هي.(وهزات يدها وحطاتها فوق وجهو)ماكنتش باغة نجي ونصدمكم بحال هكا ونحرق قلب زينب لي كايسحاب ليكم هي مكم وعنداكم تفكرو انني نسيتكم فمرة حيت بديت حياة جديدة انا قلبي كان كل ليلة كيتقطع بالوجع من حر فراقكم كنت كنشوف الدنيا مظلمة فعز النهار...
إقبال.ولكن ماغتعرفوش بحق هدشي حيت مازال ماعندكمش الولاد داكشي علاش بلا مانعذب فراسي ونعاود ليكم على الجرح لي خلا فيا فراقكم هذي سنين
سيف.(وحابس دموعو)هذ المدة كلها خليتينا نعيشو فكذبة
هي.(وكتبكي)ماشي لخاطري أولدي
جاد.(لاح الفردي فالأرض وجلس فوق الفوتوي وراسو كيضرو من كثرة الصدمة ورجليه مابقاوش هازينو)
سيف.غيخصنا وقت طويييل باش نقدرو نتقبلو هذ الحقيقة الصادمة
رغد.(وهمسات فوذنو)ماتجرحهاش بكلامك شوف حالتها كيف دايرة
هي.بنتي نوال أجي
رغد.(خرجات عينيها من كثرة الصدمة ومافاهمة والو كيفاش تقول ليها بنتها وهي وجاد كانو السباب فكولشي؟!!،)
إقبال.جلسي . (جلسات حدا جاد وطلبات من سيف تاهو يجلس ورغد ماقالت ليها والو)
إقبال.هذ الحرب لي بيناتكم اليوم بغيتها تسااالي وفهذ اللحظة
سيف.(بعصبية)مشيتي غالطة بزااف اخير حاجة نهضرو فيها دبا هي هدشي .. (ناض من بلاصته ومشا طلع فالدروج وتاجه ديريكت لبيتو، وتبعاتو رغد بخطوات متسرعة، دخلات ولقاتو يلاه ركل الپلاكار بيدو وهو معصب)
هي.(بصوت هادئ)سيف
هو.(الصمت وكيخرج النفس ويهبطو بصوت عالي، دورات رغد جهة الباب وسداتو وبعدها مشات عندو ؤوقفات قدامو، هزات عينيها شافت فيه ولقات عينو مدمعة)
هي.(ويدها على خد سيف، ويلاه بغات تهضر وهو يدفعها وبعدها منو، ودار يدو فجيبو وجبد گارو باش يكميه)
رغد.(رجعات عندو بالزربة وحيدات ليه داكشي من يدو ولاحتو فالأرض)
هو.(كيهضر ومخرج عينو)حييديييي من قداااامي
رغد.سيف!!
هو.(وقرب حدا وجهها، وغوت)ماااابغيتش نشووووف تاوااااحد .. (قال ليها هذ الجملة لي خلاتها ترعد فأرضها ومشا دخل للدوش، ولكن مستسلماتش خافت من الصدمة لي دخل ليها وبغات تخفف عليه وتوقف فجنبو، مشات تبعاتو ولقاتو حال الروبيني وكيغسل وجهو وتأثير الشرب مشا منه)...
رغد.بغيت نعاونك
هو.(ودور كيشوف فيها وكيخرج الهضرة بين سنانه)وأنااا بغييتك تعطيني بالتسااااع
هي.(ومشات عندو، ودموعها كايسيلو)جبتيني باش تقول ليا هذ الهضرة!! وخا ماتخافش هاهي غاتمشي دبا وعنداك غير ترجع تقلب عليا مرة أخرى، (دورات جهة الباب ودموعها على خدها، ويلاه بغات تخرج وهو يشدها من يدها وهي غير حسات بلمسة يدو غمضات عينيها)
هي.(حطات يدها على قلبها)شي حاجة هنا كتخليني نتألم كل يوم .. وكنقول بلي نقدر ننسا ونمشي كأن تاحاجة ماوقعات غير باش نكذب إحساسي لي كاياكلني كل مرة شوية بشوية
هو.سمحي ليا
هي.(وتبسمات فعز بكأها)الذنب ماشي ذنبي، الذنب ذنب قلبي حيت هو لي بغاك!!
هو.كان عليا نفكر قبل نتسرع ونظلمك
هي.صافي داكشي داز
هو.تقدراي تنساي داكشي لي دزتي منه بسبابي!!
هي.أصلا نسيتو، وحاجة وحدة ماقدرتش ننساها هي حبي لك وخا انت ماكتبغينيش لكن حبي لك كبر أكثر من الأول خصوصا فاش عطيتيني فرصة باش نكسب الرهان لي بيناتنا ولكن مع الأسف من أول نهار فشلت وخسرتو
سيف.(وحط عينو فالأرض)لا ماخسرتيهش انا لي خسرتك بغبائي وتسرعي درت تصروف طائش وطفولي أنا سمعت لجاد وماسمعتش لك انتي!! ماعطيتكش فرصة تافين تبرري وتشرحي
هي.ربما انا لي درت تصروف طائش يمكن ماكانش عليا نخرج ديك الليلة كنت نتسنى تاتبرد ونهضرو، درت ردة فعل سريعة لعصبيتك. لكن صافي هدشي داز ؤولا من الماضي
هو.(حط عينو فعينيها)دبا الا عطيتك فرصة ولا ماعطيتهاش لك انا باغيك حدايا مابغيتكش تمشي وتخليني مرة أخرى
هي.(ومسحات دموعها)واش عارف معنى هدشي؟
هو.لا ماعارفش ومابغيتش نعرف مابقات تاحاجة كتهمني غيرك داكشي لي خليتيني ندوز فيه علمني بزاف دالحوايج دبا عاد عرفت باش كنتي كتحسي فكل مرة كنرفضك فيها...
سيف.كنتي كتوجعي ياك وكنتي كتألمي وقلبك بحالا شاعلة فيه النار؟؟ تا انا توجعت بحالك وتألمت بزاااف وفكل مرة كنرجع فيها للدار بلا مانلقاك كان قلبي كيتحرق لداخل والنعاس ماكيبغيش يديني كنت كانحل عيني تاللصباح وبعدها كنخرج بحال شي هبيل وكنبدا نقلب تاني
هي.(وكتبلع ريقها)ياريت لو كنت عارفة هدشي ياريت لو انك وقفتيني ديك الليلة وطلبتي مني نبقى، ماكنتيش غتعذب هكا وماكنتش تا انا غنتعذب وانا كنحاول ننساك ولكن كل محاولات فشلوو الحب كان اقوى مني
هو.هدشي لي كنحس بيه حاليا ماعمري حسيت بيه من قبل تامع نوال ربما حيت حبي ليها ماكانش حقيقي ودبا تحول للكره
هي.مايمكنش تكره شي واحد كتبغيه وخا يحط راسك فالمشنقة
سيف.ولكن انا قدرت نكرهها
هي.سيف متأكد من كلامك؟؟
هو.اه متأكد نوال وخا تكون قدامي ماكنشوفهاش
رغد.(يلاه بغات تهضر وهي تسمع صوت الباب)
سيف.(ودغيا تبدلو تعابر وجهه)خلييك هنا انا غانمشي نشوف شكون
سيف.(رسم ابتسامة صغيرة رغم الصدمة لي ولا فيها، ورغد خرجات من الحمام ومشات حلات الباب ومع الحلا كتلقى ام سيف)
إقبال.(بإستغراب)هذي غرفة ولدي؟
رغد.(وكتبسم ليها)اه اخالتي هدي غرفة س..(يلاه بغات تكمل وهي توقفها)
إقبال.اييه وانتي شنو كديري فيها!!
رغد.مافهمتش؟
هي.كنظن فاش نوال رجعات نتي غتمشي فحالك ياك
رغد.(بالصدمة)شنو!!
هي.مالك مصدومة ماتقوليش ليا ناوية تاخدي راجل ختك؟
رغد.(الصمت وكلام إقبال نزل عليها بحال السخط)
إقبال.يلاه خرجي وهذي اخير مرة نشوفك كتقربي لبيت ولدي
رغد.ولكن انا...
هي.(وقاطعاتها)باينة راسك قاصح نزلي للتحت انا غانجيب ولدي ونهبطو باش نوضعو حد لهذ المسخرة لي واقعة فوسط داري، .. (شافت فيها راغد بنظرات الحزن والحگرة وهي مصدومة وكتفكر غير فسيف، دارت بكلامها وهبطات للتحت بخطوات ثقيلة، وهي مخرجة عينيها وساهية، تامن دموعها جمدو ليها فعينيها فمرة..
مشات للصالون وجلسات وهي مقابلة مع نوال لي تعابرها تاهي كيدلو على الحزن والصدمة فنفس الوقت وعلاش لا وهي كانت ضحية جاد لي لعب بعقلها وجرها للهاوية، بقاو جالسين وكل وحدة ساهية، تاسمعو صوت خطوات فالدروج، دورات رغد راسها وهي تشوف سيف نازل وموراه إقبال .. (وغير شافتهم وهي تنوض من بلاصتها ؤوقفات، وبقات كتشوف فسيف)
إقبال.بنتي نوال أجي .. (ناضت ومشات عندها)
إقبال.سيري قولي لجاد يجي راه فبرا مع معاذ .. (مشات نوال بلا ماتجاوبها، وسيف بقى كيتسنى اشغتقول)
إقبال.(وخنزرات فرغد)كنظن كان عليا نجي من شحال هذي
جاد.(ودخل)شنو كاين؟
هي.اجي لهنا جلس أولدي
جاد.(بقا واقف بلاصتو وماجلسش حيت تاهو باقي مصدوم ومعصب لأنها مشات وخلاتهم)
إقبال.مهم الكلام لي عندي ماكيتأجلش داكشي علاش جمعتكم دبا، حيت الا تسنيت غير دقيقة وحدة اعلم الله اشغديرو
سيف.وياك تقولي نتقبلوك ونقولو لك ماما بهذ السرعة وندخلوك لحياتنا
هي.قلتيها أولدي ولا ماقلتيهاش أنا كنبقى ماماك بالشرع والقنون وهدشي تاواحد مايقدر يبدلو ودبا تصنطو ليا، وغنبدا بجاد بالنسبة لك أولدي كايبان لي زينب الله يرحمها فشلات فتربيتك وخرجتي ليها من يدها ولكن هذا ماشي ذنبها انما ذنب باكم لي دار فيها الثقة وسلمها أمركم والآن انا باغة نصلح لي بقى مايتصلح انت غطلق نوال
الأسد الجائع الجزء الرابع
محتوى القصة
التنقل بين الأجزاء