سفيان:اودي اش نقوليك ...باك لي بداه مع عمتك كملو مع بنتها..حق رب حتا ذنوبهم غيرخجو فيهم ...شفتي ديك البنت لي داز عليها انا لي راجل والله منصبر ليه ...عمتك مرضات مرضة خايبة وسماح سمحات فقرايتها باش تقابلها وكانت تخدم ليل ونهار ..نعقل واحد نهار الوليدة جات كتوحد عليها ..مشات عند باك طلباتو يعاونها تعالج مها ورجعها فوجها ...
سماح كانت كتمسحالكيسان ترجعهم لبلاصتهم ودايرة راديو مصبحة على راديو شدى(احح على هدى وجميلة شحاال كنحماق عليهم ..ادماني صباحي 😍🤣) حتى كتشوف تيليفون كيصوني لقات حياة وهي تبتاسم
سماح:هاي هاي هاي ..مصبحة عليا ..الالة ..
حياة:اختي باش نبدا ليك ....
سماح:بداي برجليا عاد.طلعي ليديا ههه..مالكي كتفتفي تقولي شفتي جن
حياة:وراه شفتو ..عرفتي شكون شفت دبا وهدر معايا
سماح:الشيخ زايد ال نهيان ..عشو ...عشو..عشو
حياة:الله ينعل شيطانك..انا فين وهي فين..وراه ولد خالك ..داك تيتيز طويل لسمر ..يا ختي جا كيقلب عليا
سماح بخوف:اويلي اش كَلتي ليه..عنادك تكوني كَولتي شي حاجة
حياة:ننكَل انشاء الله ..راه درت فيه وشعلت معاه وهربت لصالون(كتشوف لزنقة)مزال باقي فبلاصتو كيكمي ومرة مرة يشوف لجيتي ...
سماح:صافي قطعي نتي ..الله يفك هاد لحريرة على خير ...(قطعات كتهدر بحدها وتنكر) اويلي هذا لي ناقص غير يصعر حتا هو ..ما بدوه فيل زادوه فيلا.واش فهاد لعواشر رجال كيدوزاو ...غير مصعور فدار ومقصور فزنقة ...صبر با ربي صبر بلا قدر ..(كتصوني على معاذ كيقطع عليها)ينعلديلملت شيطان ...يعطي لعكَر للبغلة ...وزحمة للبقرة ..اوعدي جاوب ..(كيقطع وتعاود تصوني حتى سخفها عاد شد الخط)
معاذ:بنت العمة
سماح:ياك لباس من صباح ونتا تقطع
معاذ:مراشقاش ليا نهدر..ولا نقول عارف اش غتقولي ..وانا نختاصر مغنتحرك منا حتا ناخذ لي بغيت ..طارت معزة..نزلة بقرة..زحفت جملة ..منك ولا منها مهم نعرف لي وقع
سماح تنهدات:اش غيكون وقع ..والو لي وقع راه فراسك صافي ..ملي وصلت عند حياة راك عرفت لي خاصك تعرفو ..تما سالات لحكاية وتعرفت على زاكي وها انا مزوجة ...صافي
معاذ:سبحان الله معرفتش علاش متيقتكش ...(تسيف كيهدر مغدد) شفتي برب المعبود حتا نعرف واليوم ...(قطع عليها خلاها تولول فبلاصتها )
سماح كتندب:هاااا سعدي لي سكن ترمة غراب ..ها زهري لي مجدام ومجراب ...ها يامي لي غير ما زايدة وتغرق فلخراب ...ياكا معاذ ياك ..ياك اولد خالي ...باغي تزيد فعذابي ..وتنغص عليا فرحتي ..ها العرس لي غنعرس..بمسبتي غير فيا شي عظم مهرس ...ها زين صافي من جيه وها قنب بلادي فكَع من جيه ...الاقيها من مين ولا منين يا خوااااتشي
عيات تفكر وملقات قدامها غير الحاجة
سماح:مَّا ...آمَّا ...اعتقيني نتي في عار الله ونبي رسول الله ...(جلست حداها كتتغبن ) واش انا لهاد درجة زغبية ..وذنوب شلاهبية خارجين فيا ..على طول ليل وصبحية ..
الحاجة موالفة معاها كتلاشي بعض المرات:اش وقع ..الا ملحتبه ندوزوه بالماء والا مسوس هذاك حالو ساهل قبصة ملح تقاد المداق
سماح:وااا مر دفلة ..حامض حنضل ..ماء قاطع ا مَّا ...
الحاجة:استغفري ابنتيتي ..وقوليلي مالكي
سماح كتتغبن: شفتي معاذ ياكا..ولد خالي ياكا ..داك لي كيغير منو زين الصافي ياكا ..كينبش باغي يعرف اش دار فيا باه ومو ياكا..والا عرف غيصعر ياكا ...والعرس لي كنوجد ليه غيرجع مزفوف بصداع بلاصة الفرح ...دبا اش ندير انا ..مال زهري عوج هكا ..كرهت وقنط من راسي حتا كنقول تقدت وتجي على فمها ...
شافت الحاجة حتا عيات :اش غنقولك ابنتي ..استغفري مولاك ..ومتقوليش هاد الهدرة ..ولا تقنطو من رحمة الله ..ان بعد العسر يسر ...والا معاذ بغا يعرف راه من حقو ..ما هواش غريب عليك ..حكي ليه وغير بلعقل وتفاهمو..غير يكون فصورة وميغلطش فيك ..
سماح:راك معارفاتوش كيف داير ...حتى كيكحلها عاد كيفكر والا فكر عاد ..مكيتسوق لحد ومكيخاف من حد ..والا غلط فيه شي حد كيف ما كان مكيعقلش عليه ويكون هو باه ..راه دبا كنشوفو رجع بعقلو شوية ..زمان كان شكون يقدر يهدر معاه ...وانا خفت لا نحل فمي ويصدق هو قالب ليهم دار ومنوض صداع ..ويزيد يقلب عليا انا لي محكيتش ليه من نهار الاول
الحاجة:هدري معاه ومتقوليش ليه كلشي غير الحاجة لخفيفة لي متنوض مصادع ولا تكحل قلوب وتقطع المراضع
سماح بيأس:اش خفف لي وقع ..راه لي داز حاجة كفس من الاخرى وغير لي تقتل ما تحيي...واش نقوليه كنت من دار لدار كيف العطار حتى وصلت عشت فدار وسط الفساد ولا نقوليه ربي سترني من الاغتصاب ..ولا شنو من القطران لي عشت ..غير الله يسمح لي كان سباب ..
الحاجة حطت يدها على كتفها:ربي كبير ورحمتو واسعة ..و وخا يوقع لي يوقع هادوك عائلتك ولحم منين يخناز يهزوه ماليه
سماح:هادو رماو لحم وهو طري ..اما لو كان خناز العالم الله اش كانو غيديرو فيه ..ودبا هذاك واقف للبنت عند الكراج ديالها مخليها تفافي
الحاجة:تعرفي اس غادي ديري..صوني ليه قوليه يجي
سماح:ياك امَّا بغيتي ولدك ينحرني ..راه مكيحملوش ..الا عرفو جا هنا غادي يسخط عليا ..
الحاجة:داري هادي وانا لي بغيتو يجي ..هذاك جمل شارف الا هدر انا نجاوبو نتي خاطيك
سماح دوزات نمرة معاذ:هاكي هدري نتي ..
معاذ جاوب منرفز:مال رهطك كَالبالي طني بصونيت
الحاجة:وعليكم السلام اولدي ..كيراك داير؟
معاذ سب فخاطرو وتحشم معاها جاوب مفعفع:اااه الح..الحمد لله ..ونتي الحاجة لباس ؟
الحاجة:ايوا اولدي كنتمشاو مع الوقت ..واشتا عندك اولدي اليوم ؟
معاذ:هاد ساعة عندي واحد الغرض..ستحقيتيني فشي حاجة ؟
الحاجة:بغيتك تجي تتغذا معانا اليوم ..وبغيت نهدر معاك فواحد الموضوع (بغا معاذ يتحجج مخلاتش ليه الفرصة) راه مغنحطو لغذا حتا تكون
معاذ عيا يشوف ووافق ...فضولو مخلاهش يرفض كتر ..وعندو احساس بلي الحاجة لي غتحط ليه اش بغى ...
بعد صلاة ظهر بدقائق تسمع سرسار فدار الحاجة ناضت سماح دارت فولارها وهبطات فتحات الباب كتترعد غير بحدها وغصة خانقاها...رحبت بمعاذ ودخلو سلم على الحاجة شوية وهي تحط سماح لغذا ..تجمعو عليه بثلاثة ولا نقولو لغذا لي تجمع عليهم ..نقرو من طبسيل شدوكَة على رؤوس الاصابع جمعات سماح وطرفات دنيا وجلسو شي كيشوف فشي ...كسر صمت معاذ
معاذ:الحاجة فتيليفون ..كنتي ..
قاطعاتو الحاجة:لفضول اولدي يجر مولاه لتهلكة ...ولي نبش لمقابر لعقارب ولحنوشة بنغزوه بشوكة..وديك ساعة سم لي فيهم يا يقتلو يا يخليه عايش على سكة ..ما هو من العايشين ما هو من الميتين شد الارض وتكة ..
معاذ خربقاتو بكلامها:مفهمتش ..اش كتقصدي
نطقات سماح بلا متهز فيه العين:كتقصد اولد خالي ..لي فات مات وحنا ولاد اليوم ..لي داز صفحة وتطوات والا تجبدات عاود بحر لوجاع غيفيض وبلاصت ما كن مغرقني غير انا غيدوز علينا كاملين جرة وحدة ..
الحاجة:نعل شيطان اولدي ..وخلي ختك تفرح متنغصشي عليها نهارها ..يكفي القهرة لي عاشت ..خلي هاد العرس يدوز على خير ..
معاذ:وحتا انا مقلت والو ..بغيت غير نعرف لي وقع ..(شاف فسماح) الا كتعتابربني غريب عليك نحلف ليك برب لمعبود مندخل فيك ..والا كتشوفيني خوك كيف كنعتابرك ختي وامانة عمتي على رقبتي ..حلفتك بمعزتها تقولي لي وقع
سماح نشل حلقها على اخر كلامو ..كيفاش قدر يدير لها هكذا يحلفها بمعزت روحها لي فقدات ...عينيها دمعو ..ملقات باش تجاوب سكتات شوية ونطقات.....
سماح:بنت العشرين داز عليها فعام ماداز على غيرها على طول التسعين ...كان كل همها تعيش هانية وتتوسد صدر مها لحنين ..حتى قسات عليهم دنيا وملقاو لا حنين ولا رحيم كلهم عليهم غافلين ..طاحت بيهم ليام وتكاو عليهم رجلين ..ها لي يوطا وها لي يعفس عليهم ويذلهم بجميل ..حتى لهنا ولبنت من الحامدين شاكرين ..مهون عليها ليل وهي لعينين مها من ناظرين ..حتى لواحد نهار لقات دوك لعينين مغمضين ..ومها عند الله من الطالعين ..رجعات من الميتين والبنت ما بقات ليها بلاصة وسط الحيين..غذرها زمان وغذروها اقرب الاقربين..قاسو بيها لزنقة بلا عوين ..عاشت بين صالحين والفاسدين ...وربي برحمتو كفلها و على لحرام عمى ليها العينين...تكرفسات وقاسات نذلات وعانات ولا كانت من الخاضعين ..حتى لنهار لي ربي حط فطريقها داك المعين ..آواها وصانها وخا مكانش ليها من العارفين...لقات فيه الخير لي ملقاتوش فلي واجب عليهم يكونو ليها حافظين ..دازت ليام وضكات ليها وجازاها ربي على صبرها بداك كحل العين ..رجعات حلالو وليه كانت من شاكرين ..ونهار رجعات مرات فلان ورجع ليها همة وشان رجعات لعائلتها هي مومو العين ..دوك ناس لي ليها رماو وعلى دمعها وجرها وطاو رجعو فدارها يتجمعو ويكونو من ضاحكين ...دوك لي فقرحها كانو من شامتين ..وفعزت حتياجها ليهم كانو من الغذرين ..دبا وهي فعز شانها رجعو ليها مونسين ..فهمت اولد خالي وو صلك معنى كلامي ولقيت جوابي
معاذ عاض على شفتو تحتانية بعصبية وكيهزز فرجلو مقدرش يغوت ولا يخرج داك شي لي كيحس بيه وهو كيشوف دموعها مع كل كلمة خرجتها ..كيحس براسو شماتة لي مقدرش يحميها ولا يوقف جنبها ..وقف وتمشى ناحيتها باس جبهتها وبصوت كيرجف نطق
معاذ:سمحيلي ابنت عمتي ..وحقك على رقبتي و عهدي ليك دمعتك نار ليهم
سماح شافت فيه:مبغيت والو ..حقي عند الله محفوظ ..وانا ما ناقسني خير الحمد لله ..بغيتك غير متسمحش فيا كيف قبل ..محتاجة نحس بلي دمي مكاليني باش الا شي نهار ربي قدر نلقى علامن نحط ظهر
ابتاسم ليها وخرج مقدرش يزيد دقيقة يشوف فيها معندوش لوجه لي يزيد حتا كلمة معاها ..ندم على نهار لي لامها فغفلتو على لي داز عليها ..زلي زاد ازمو انها كانت تقدر تجاوبو وتحط ليه كلشي فطبلة ولكن هي سكتات واستحملات كلامو وسرطات كيتها قدامو ...
***************************
بعد يومين جالس معاذ فدارهم مجبد رجليه وشاد تيليكوموند فيديه وفنجان قهوة حداه وجداتو فكروستها مقابلة تلفازة وفجنبو ختو متكية على كتفو كتلعب كلمات كراش فتيليفون ومرة مرة يعاونها هو ..حتى كيشوف باه داخل لونو تالف كينهج ومكشكش ومرتو تابعاتو كعرفات باش تبلات وقف فباب لبيت
عبد القادر:واش داك شي درت ...ااااه ...واش باغي تهبلني ولا مالك
معاذ مبرد:اش درت
ع.ق:وكتسول يا دينك ..كتسول ...واش خارج عليا وتقولي واشتا ..كاتب عليها داري لي طلعتها بعرق كتافي وتقولي واشتا
معاذ قلب لاذاعة اخرى:حقها ..دار بدار ..ياك كيقولك العين بالعين وسن بسن ..وحتا هادي دار بدار ...ساهلة الوليد
ع.ق:واشتا راك تخ** عليا ...خرجان لعقل هذا ..ابربي ومترجع دار كيف كانت حتى نقربلوها
معاذ جمع الوقفة وخنزر فيها:غتبلعو ..غننسى بلي نتا الوليد وغنكركب جدك مع لباب ..خليني موقر ديك جغمة ديال دم لي بيناتنا..واحد اخر قبل ما يعلى صوتو نقبرو فبلاصتو..يبالي ناسي بلي هاد لحز** كامل بسميتي ...يعني رزقي..ندير بيه كيف نبغي ..ياك مكاتبين بيع وشرا وخلينا مزيانين العميم ..
ع.ق:ياك ا بَّا...رجعنا هكذا ..هذا هو خيري..خليت ليك رزقي كامل باش تخرج ليك الفيزا بغيت تضمسني فيه ..حتى وصلتك لي نتا فيه ..تجي دبا تستحمرني وترزيني فشقى عمري
معاذ كيغوت: هاديك هي نخليك على ضس تتبرد..باش حسيت درك ااااه..بلحشية ياك ...نفس لي حساتو بنت ختك نهار لي خورتيها فرزقها ورميتيها لزنقة ..لكلاب اسيد رجااال ...الوليد لي يتضرب بيه المثل ...نتا دير فديك ليتيمة داك شي ..ترمي دمك لزنقة ...(شاف فختو) مبعيداش غذا من الغذ نلقاي رامي حتا هادي ..
نطقات مو:نعل شيطان ...راه باك هذا واش بغيتي تدي السخط
معاذ ضحك :لا شكون كيهدر ..نتي بعدا لو كان جيت فبلاصتك نحشم ..سبحان الله تاويتو نتي لفعة وهو شيطان ...شفتي لو كان جا الواحد يقدر يبدل وليديه كنت نكون بدلتكم زمان ...بلاصت مترديلو عقلو طججتيه ..زايدة تكوردي جدو حتى رجعتو مثقلين بذنوب عيباد الله ...(شاف فختو)بغيتي تبقاي معاهم ها هما بغيتي تعيشي هانية من غذا نشوف كيف ندير نطلعك معايا
نسرين غير كتبكي:نعلو شيطان حرام عليكم شوهتونا وسط جيران...عفاك اخويا ...
قاطعها بلغوات:جاوبي رهضي ....
نسرين غير كتبكي:نعلو شيطان حرام عليكم شوهتونا وسط جيران...عفاك اخويا ...
قاطعها بلغوات:جاوبي رهضي
شافت فمها لي كتخنزر وبخوف نطقات:معاك اخويا ..نمشي معاك
شاف فواليديه:ها جوابها حتا هي ..باش تعرفو قيمتكم عند ولادكم ...
طلع هو وختو جمعو لحوايج المهمين لي يستحقو وخرجو من تم خلاو باه ومو شي كيشوف فشي وشي كيلوم فشي ...وجداهم طول داك صداع مقابلة تلفازة محايبة ليهم خبار
******************
جالسة سماح هي وزكرياء والحاجة مقابل معاهم معاذ ونسرين
معاذ:سمحو لينا جيناكم بلا منعلمو قبل
الحاجة :لااا اولدي مرحبا دار داركم ..راكم بحال ولادي
معاذ:الله يكبر بيك الحاجة..جيت قاصدكم ..بغيت نخلي نسرين هنا شي يمات بلما لقيت شي دار لي نستقرو فيها
سماح بصدمة:اويلي شنو وقع ؟؟..قربلتيها معاهم يااك ...شفتي علاش كنت ساكتا ...كنعرفك مكتعرفش تتفاهم ...
الحاجة قاطعتها:مرحبا بيك وبيها ..دار حسبوها داركم ..حتى تلقاو على خاطركم لي بغيتو ...
معاذ:الله يكتر خيرك الحاجة ..ولكن انا ميصلاحش نبقى هنا ..غير نسرين نأمن عليها معاكم
نطق زكرياء لي كان غير كيقيم الوضع جالس بأريحية فوق سداري رامي يدو مور ظهر سماح ويد كيلعب بتيليفون يدورو بين صبعو :كاين بيت لضياف لفوق مرحبا بيك وختك تتوانس مع سماح هنا لتحت (سماح دورت وجها تشوف فيه كتتأكد واش هو لي هدر)...ونيت سماح محتاجة لي يعاونها فتوجاد للعرس مغتلقاش حسن من بنت خالها (شاف فيها مبتاسم) ياك ادويبة
سماح حركات راسها بالايجاب وعلى شفاها ابتسامة وفعينيها نظرة حنينة نظرت شكر وامتنان ليه ..جمع الوقف قبل ميسمع جواب معاذ..كأنو كيقول بلا متزيد تتناقش ...تعشاو ومن بعد دخلات سماح هي ونسرين للبيت ..واكيد سموحة خاصها تعرف اش وقع فداى خالها ..حكات ليها نسرين كلشي من طق طق لسلام وعليكم ...بقاو فيها ووجعها قلبها عليهم وخا صرفو فيها غير شر بصح عزو على قلبها ...نعسو وهي كتخمم كيفاش تفك هاد لحريرة...هي مبغات لا دار ولا دوار ..بغات غير تيساع وتعيش هانية وتكمل فرحتها وتتجمع مع حبيب قلبها ..وفنفس الوفت مبغاتش سعادتها تتبنى على تعاست غيرها وحلفات حتى قبل ميوصل نهار لعرس تكون كل الامور هانية ولقلوب صافية ..وخا صعيب تنسى لي دارو فيها بصح خذات قرار باش تعيش خانية ومتمرضش راسها تتناسى لي فات ...
فصباح فطرو مجموعين من بعد معاء خرج يقضي شغالو ونسرين بقات مع الحاجة جالسة من عادتها مكدير والو ومكتعرف لوالو لهذا سماح خلاتها ترتاح على راحتها واصلا لي فيها كافيها كتشوف فرمشة عين دارهم تقلبات وشملهم تشتت.. هاد صباح هو اول صباح لزكرياء شاد كونجي للعرس ..واقف مكروازي رجليه ومتكي بظهرو على لبوطاجي وسماح حداه كتنصب فلغذا وتهدر
سماح:دبا اش غنديرو ..لبارح حكات ليا نسرين اش وقع ..قصح معاهم فالهدرة ..مبغيتوش ياخذ سخط وليديه باش يرجع ليا حقي
زكرياء كيشوف فيها مطلع حاجبو:بقى فيك ولا
سماح وقفات على تقطاع لبصلة ميقات فيه عينيها مدمعين:من نيتك العمر ..واش هذا وقت الغيرة ...مشايفش حالهم
زكرياء قرب باسها جنب فمها:لغيرة طاعون ابب كتنهش لعظم ..دبا كاين حل واحد
سماح:لي هو ؟!
زكرياء:بنسبة ليه هو لي دار راه رجع ليك حقك بيه ..وبنسبة لخالك خسر رزقو كيف كيقول ولدو غذرو ودارها بيه ...نتي غترضي جميع الاطراف وتكوني محايدة
سماح باستغراب:وكي نديرلها انا لهادي
زكرياء:قبل نسولك باش نعرف ..نتي باغية لي خسرتي سؤجع ليك ..ولا مرتاحة هكذا
سماح غلباتها ضحكة:اش ندير الا الراجل عندي منحرف وكيستنى غير امتى تغفل عليه الحكومة ...ناري وتشدك مقنتني هكذا
زكرياء قرب عنكشها بلحيتو فخذها :وها نتي بديتي تخسري اسنطرال ...ورزقي اعباد الله ..حلالي ودايرين عليه الحصار .. راه هذا هو زواج مع وقف التنفيذ ..
سماح:طلب حكم الاستئتاف ولا صبر حتى ليوم الافراج ..مبقاش بزاف ابب ..ةظبا بعد راه صهد ولبوطة زادت عليا ونتا كتر ...شوية وتلقاني ندوب بين يديك ..ديك ساعة عتتقطع بالمعقول
زكرياء:ديك ساعة نجيب شكلاط اخرى
سماح بانفعال:بغيت ليك لحناش يخورو ليك ترمة (شهقت مع اخر حرف نطقاتو وتزنكات)
زكرياء ضحك:عادي ابب سمعت منك ما كثر ..منديرش عليك
سماح:وصافي سير خليني نكمل شغلي ..(جا خارج ونطقات عاطياه بظهر) لعشية الا بغيت خرجني بغيت نقضي واحد الغرض ...
تغذاو مجموعين من غير معاذ لي اعتاذر كيجري على شي وراق باغي يوجدهم فأقرب وقت ..ومع الصهد والحومان بنادم يبغي يكَيَّل (القيلولة) ويرجع راسو شوية مشات الحاجة ونسرين فرشو زوج لحوفة فبيت خاوي ومبرد اما سماح فلبست جلابتها ودارت شالها وخرجات هي وزكرياء ...فطريقهم طلبت منو غير يوصلها ويمشي حتى ترجع تصوني عليه هي ..بغات تاخذ راحتها ..وصلت بوجهتها وقبل متنزل تنهدات وشافت فيه
سماح:لااا خاصني نفك هاد لحريرة بوحدي ..يكفيك الهم لي هزيتي معايا حتا لدبا ..(قربت خذات وجهو بين يديها وباستو بوسة حنينة فشفافو )الله لا يحرمني منك
نزلت خلاتو حط يديه على لفولا وتكا براسو عليهم تنهد من الاعماق:العذاااب ابنت العبد العذااااب ..
دقات بعد مدة بسيطة فتحات ليها مرات خالها دايرة طابلية على لباسها وشدة فوق راسها مزراها وليم عند نواظرها...
سماح:شداتك شقيقة بشوفتي امرات خالي لعزيزة..(دفعاتها ودخلات لقات خالها جالس داير كاس قهوة حداه وشاد كارو فيديه مشاات بلا متهدر حيداتو ليه من يدو وطفاتو مخلياهم غير كيشوفو فيها معرفوها منين خرجات جلست شافت فمرات خالها لواقفة عند لباب) جلسي احبيبتي جلسي ...
الخال:صافي وصلاتك وجيتي تاخذي حقك..(بلغوات) ابربي منخرج من هنا حتا نطيح روح
سماح محافظة على هدوءها:ششششش ناس كتسمع ..متغوت عليا منغوت عليك ..جيت نقوليكم زوج كلمات وكلها يشد حال سبيلو ...جلسي الالة نزهة جلسي ..وغير باش نريحكم مباغية منكم غير تيساع هذا هو ربح عندي منكم ..
نزهة:ويا لالة منين بغيتي غير تيساع ..علاش مشيتي كوردتيه حتى كتبها ليك وشتتي لينا شمل عاد جاية دبا تقولي بغيتي تيساع
سماح ضحكات:كوردته ههههه مالو حولي ...نتي عارفة ولدك كتر مني حقاني وميبغيش ظلم ...ونتوما ماشي غير ظلمتوني ..بلا منجبد الذي مضى ...لي فراس جمل راه فراس جمالة...
نزهة:وشنو باغية علاش جيتي ..ولا جيتي تتشفاي
سماح:الله يسمح ليك ..(شافت فخالها) مزال عندي امل فيك يجي نهار وتعرف اش درت ...مهم قبل منقوليك علاش جيت ..ما فيها باس نعقلك على واحد الحاجة تقدر تكون غفلتي عليها ..ولا غفلاتك عليها دنيا ونعايمها..ما دايم غير وجه الله والعمل الصالح اخو مي...
الخال ما عاجبو حال:اجي من تالي وكَولي لي عندك
سماح ضحكات جنب: لا زربة على صلاح اخالي ...كتعرف السبع الموبقات المهلكات لي ذكرهم غير خلق الله عليه صلاة والسلام ..(شافت فيهم) صليو على نبي
الخال ومراتو:عليه صلاة وسلام
سماح: من زمان كثر الوصايا والكلام ..من صروح الإسلام...ربي ونبي عليه السلام ..عززونا بسيرة والقرآن..ونهاونا على الغيبة والمنكر وظلم الإنسان ..وشلى وشلايل غيرهم وصايا وعبر وأحكام ..منهم ظلم اليتيم وأكل رزقو بلا موجب شرع ولا قانون يعزز لحكام..وحق ليتيم يجيه يجيه وخا يدوز عليه عوام ...نبدا ليكم حكايتي ونتمنى نكون خفيفة وما تزربو على نهايتي وتاخذو منها لي يفيدكم ولي نور طريقكم وتكون هدايتكم على يديداتي
نزهة:جيتي دبا تخبري علينا وديري فيها ما قال الله ما قال الرسول
سماح:صبري امرات خالي سمعي اش عندي ولاش جيت وعاد هدري..ما عرفتي نيتي ولا ما جايبة خبيرتي ..ولا حتى لمراد من جيتي وغايتي ..صبر نعمة ..ولي ما صبر تعمى
▶️يا له من ظلم عظيم ..هو ذاك ظلم اليتيم ..يتيم وحيد فقد سنده في دنيا فقد الحضن الدافئ والذرع الحامي فقد ابويه ..فقد الشعور بالإنتماء..فقد طعم الحياة ..وذاق قهر الزمان وعذاب الأيام والشعور بالوحدة وعدم الإتزان...وطامة الكبرى انه لا يكفي بعد البشر ما يخالجه من قهر ..بل يتكالبون عليه فيزيدون على ما به ..ان كان له حقوق عقروها وان كان له مال سلبوه اياه وان كان له جاه اردوه من فوقه ..جعلوه ارذل الرعية ..اذلوه وايتحقروه واستعبدوه ..كل هذا لأنه يتيم ..لأنه الحلقة الأضعف في زمن استحيونة البشر..والعالم صار غابة والبقاء فيه للأقوى ..والضعيف محله فيه جيفة على جنب ضفة ينهش منه المارة بخفة ...وهل تعلمون اغلب من استعبد اليتيم ؟!! انهم اهله ..الأوصياء عليه..من يرى فيهم سندا في دنيا هم من استندو عليه ودكوه دكا حتى صار بساطا تحت اقدامهم ..انه اليتيم من اوصى عليه عز وجل وخص له آية في قرآنه ..انه اليتيم انه انسان ..دم ولحم ومشاااعر وقلب فطر ..انه اليتيم ذاك من نراه على الارصفة مشرد تلك من نراها بين شقاء البيوت وبين ارذل القوم عليها الكل يتسيد ..انها تلك من لجأت الى الهوى وصارت منه تهوى وبه تروى وياااا حال القلب داخله يدما..وألسنة القوم نار لها تحرق ولسكوت لا تأبى..كلمات خصت لها لكن الأجدر ان تخص لمن كان سببا في هلاكها ..ابدا لم ترغب واي منا تحلم ان تصبح بين ايدي الكلاب تلعب ..اي منا يا حواء تتمنى ان تصير دمية للمتعة تتعب ...كل منا ترى نفسها في الاعالي تتموج وبالمكانة تسمى وتتوهج ...ليست هناك من ادارت ان تدفن تحت الأنقاض ..انقاض الدنيا وهمومها ...كل هذا لأنها يتيمة ..حرام ان تحلم ..حرام ان تترقى ..حرااام في زمن صار الأخ يتكالب على اخيه ...اي زمن هذا ولجنا إليه...يا وجع قلبي من هذا زمان ..يا وجع قلبي من ظلم اليتيم وااااه عليك يا قلب اليتيم ..
قال صلى الله عليه وسلم"اجتنبو السبع الموبيقات المهالكات ..منها اكل مال اليتيم " قال تعالى:"إن اللذين يأكلون اموال اليتامى ظلما إنما يأكلون في بطونهم نارا وسيصلون سعيرا"... جزاء من استقوى على اليتيم وسلبه حقه ..جزاء من استضعفه وقهره ..فليبشر يوم البعث بنار في جوفه تحرقه كما اكل مال اليتيم ..نار في جوف الإنسان ..واي نار؟!نار الجحيم ...من يدافع عن هذا اليتيم ؟!..من يأخذ حقه ..من؟!!.. ذو العزة والجلالة ..وكفى بالله وكيلا..ولهذا انكر الله على كل من يأكل مال اليتيم "كلا بلا تكريمون اليتيم ..ارأيت الذي يكذب بالدين فذالك الذي يدع اليتيم "
الصحابة رضوان الله عليهم ...لما وصلتهم هذه الآيات خافو ..من الفتنة من ان يعقرو مال اليتامى بغير قصد من ايهتكو حرمتهم على غفلة منهم ..كان اكثر الصحابة كأبي بكر وابي سعيد الخضري يكفلون ايتاما عندهم ..لما فطنو هته الآيات فصلو زادهم عن زاد اليتامى خوفا من العذاب....فأنزل الله عز وجل :"يسألونك عن اليتامى قل اصلاح لهم خير وان تخالطوهم فإخوانكم "
اي كلو معهم وجالسوهم واشركو رزقكم برزقهم ..لأن الله عليم بذات الصدور..يعلم خبث الانسان ويعلم صلاحه ...على دراية بمن يريد ان يأخذ اموالهم وعلى علم بما يريد ان يكفلهم ويعاشرهم بالمعروف ويدخل السرور على قلوبهم ..قال تعالى:"إن تخالطوهم فإخوانكم والله يعلم المفسد من المصلح "
في احد الأيام رجل اصيب بشلل في يده مصاحب بألم شدييد ..الم مهول ..فضيع..فجأة بلا اي سابق انذار او عوارض مسبقة ...شلّت يده هكذا ..جال وفحصه عدد من الاطباء من اماكن ومدن مختلفة وكل التشخيصات تدل على ان اليد سليمة ..معافات ..ما بها اي اذى ...سبحان الله كيف ذلك يده مشلولة وما بصحته اي بأس ؟! عجيييب!!..بعد ان يئس من التشخيصات والأدوبة الغير نافعة وذهاب وسفر وإياب بدون جدوى .. بعد ان نصحوه بالاستعانة براقي لعل الله يشفيه قرر ان يرقي نفسه ..القرآن الشفاء..فذهب عند شيخ قرأ عليه ..كلما يقرأ عليه آية يزداد الألم ..حتى صار فوق قدرة استحماله..قال له شيخ "تذكر يا اخي لعلك بيدك هته ظلمت انسانا..فأجابه :انا اظلم ..لعوذ بالله من ظلم انا ما ظلمت احدا " غضب الرجل وخرج مسرعا من عنده ..وبعد ايام عاد اليه وأحس يده شفيت ..فلما جلس عنده قال "يا شيخ اتذكر كلامك ..تذكرت عجوزا كانت مع ايتام اخذت ارضهم ظلما ..فلما ذكرت لي ذاك الكلام تذكرتهم فذهبت اليها واشتريت لهم ارضا واعطيت لهم مالا وارضيتها بما ترضى وتأمر فما إن اصبحت بعدها الا وقد ذهب جزء من الالم وها انا اليوم احرك يدي ..قد زال الألم كله ..واصابه ما اصابه لأنه ظلم يتيما عاقبه الله لأنه اخذ ما ليس له واستضعف عبدا من عباده ..قال تعالى:"ولا تأكلو اموالهم الى اموالكم " اياكم ومال اليتيم يوليكم الله عليهم فأحسنو إليهم ..بل امرنا نبي الكريم بالتجارة حتى لا تأكل اموالهم الصدقة ..فيكبر اليتيم ولا يجد امواله ..لأن تجارة تزيد من الرزق والاستثمار يضاعف الارباح ..هل تعلمون ان لليتيم رفعة ...يكفيهم فخرا ان خير خلق الله كان يتيما ....ما رأى اباه وفقد امه صغيرا ..فقد حنان ابويه ومع ذلك اصلح الله به الارض ..اصلح البشرية على يد يتيم ..ليس خو فقط من كان يتيما بل كثير من صحابة كانو يتامى ..حواري النبي وصاحبه واحد المبشرين بالجنة الزبير بن العوام ولد ونشأ يتيما رضي الله عنه
سماح:يكفي ليتيم انه اول من سل سيفا في سبيل الله كان يتيما ...بغيت نوصل ليك بلي ليتيم الا ماجاه حقو فدنيا كيوصلو فالاخرة ..وحساب ظالم مكيكونش ساهل ..راه اي حاجة درتيها صغيرة ولا كبيرة غتتحاسب عليها.. الا كانت خير ليك اجر والى كانت شر عقابك عليها واصلك وخا تكون تقيم لفجر ..
خالها ساهي فكلامها نطقات نزهة متوترة :دبا شنو باغية غير دار راكس خذيتيها وخذيتي حقك وبزيادة عاد
..سماح: والو ..مبغيت حتا حاجة ..مسامحة ليكم دنيا واخرة .. فكلشي وعلى كلشي ...غتجيك عجب ياك (ضحكات باستهزاء) الحمد لله ربي ما خذا مني حتا عوضني بما حسن ..
الخال:وعلاش جاية ؟!
سماح:جيت نعلمك بلي دار غترجع بسميتك وهاد شي يبقى بيني وبينك ..صلح علاقتك مع ولدك راه هو لي دايم ليك
نزهة:وغديري هاد شي لله في سبيل الله ..غير قولي اش باغية من تالي ؟!
سماح ابتاسمات:انا باغية حاجة وحدة ..تنعلو شيطان وتلمو شملكم وتحافظو على تريكتكم ..راه ولادك هما وتادك والا سمحو فيك نهار طيح صحتك ما تلقاي غير الأرض لي تهزك وناس لي مسخنة بيهم كتافك يزدخوك مع الارض وميعقلوش عليك ..متغركمش دنيا كتر ..فكرو فديك البنت لي باقية ليكم ..باغيين ترميو وحدة اخرى لزنقة ..الا ربي وقف معايا ولقاني بناس لي تقاو الله فيا فماشي كل مرة تسلم جرة (جمعت الوقفة( الحاصول لي جيت عليه ها انا قلتو والا بغيتو تصلحو لي ضاع مرحبا بيكم ..معاذ ونسرين راهم معانا فدار ..فوقما بغيتو اجيو وجلسو وصفيو الخواطر ..
خرجت خلاتهم شي يشوف فشي كيف دخلات صادماهم خرجات خلاتهم فصدمة كبر ..صونات لزكرياء لي كان غير فواحد الكافي قريبة لدار خالها جا عندها لقاها واقفة تحت واحد شجرة مظلة بيها طلعات معاه اول حاجة دارتها رخفات شال عليها صهدها شافت فيه
سماح:لميمة لما تفوبر عليا وديني لشي بلاصة حبيبتك انا
زكرياء شاف فيها كيعيب فيها:لميمة لما تفوبري عليا وعتقيني راني مقطوع حبيبك انا
سماح :وغير سير ونشوفو ديك ساعة واش تستاهل كادو ولا نخليوك تبرد لعوافي يا عبد الصافي
زكرياء بتردد:سماح ..نطلعو لدار
سماح باستغراب:اشمن دار ؟!
زكرياء ابتاسم ببراءة:تجزئة..كل فيما يرضي الله
سماح خزرات فيه:ها نتا بديتي تخسر اتريكت سنطرال رايب ...راه والله حتا نشكي بيك لحكومة وديك ساعة غتعاود ليك طهارة بلا بنج
زكرياء سخط:برب المعبود الا عيقتو ..ومراتي اعباد الله مراتي حلالي وتقطر ليا فحقي ..خربة مشقوقة انا ..وراه مات بقلة الاستعمال
سماح:سير خلعو بقطرات ديال لماء يرجع موطور نحلة ..صبر اوجه المحنة ..مبقاش بزاف ونديرو الحنة وديك ساعة ارى برع لفراجة مكان غير الحلويات المعسلات البقلاوة اعزيزي ..تشيز كيك احنيني ..فوهة البركان في ميريكان شادة الميزان وطريق الامستردام
زكرياء:غير صبري يا بنتي دبا تخلصي ..جاية جاية بين يدي وديك ساعة اش جاب ميلكك مني ..
وصلو لكافي فطريق الحدود"دار النسيم(اححح عشقي ليلا هذي 😍 تيتيز اشكال انواع كنسقي عويناتي 🤣( فيها بيسين وقاعة للافراح ومطعم وكارتينغ ..وسيرك وصال دجو وسيما3D ..مهم شاملة لجميع انواع الترفيه ..ديجي خدام جيهة البيسين والكافي فيها دقايقية وشيوخ(ركادة احح على لكتاف)واي حاجة متعلقة بالفولكلور جلسو فطبلة على الكازون فوق منهم باش على شكل خيمة من شمس فالاخضر طلبو لواوم الجلسة واكيد معدة سماح مكتكتافيش بالسوائل خاصها ما تطحن (ليه غير نبولة لي تتبرع لمصران لغليض معليهش الله (..خط ليهم سرباي اش طلبو وهي هبطت تاكل وتتبنن وهو هاز فنجال ديال القهوة يتكوس عليه
زكرياء:وشتا درتي ادويبتي شفتك جاية راشقة ليك
سماح:اييه يا عتيريسي خليني نفرح كريشتي ونعاود ليك خبيرتي
زكرياء:تاكلي بنادم ودايرة كيف قلم رصاص
سماح خزرت فيه:قلم رصاص هو لي غنخشيه ليك فعينيك يا الثور العاقر ..قالك قلم رصاص ...راه عندي شوية شوية من الحاجة ..وشفتي على هاد قلم رصاص ديباني بالقطاني اما لحماني غنخليه لتهامي
زكرياء:تهامي يا بنت لحرام راه غنوض ننجر جدك
سماح:تفووو بنادم كيف داير ..خليني نتهنى بلقمة يرحم باباك في قبرو (كملت وتكات على لكرسي فشلانة ) اييي جاتني دوخة بكثرت الماكلة ...سير كيف شبعتي كريشتي راه قليبي راضي عليك ا عتيريسي (قربت منو نتفاتو من لحيتو) ياختشي على تيتيز لمغوبش..تهامي دقلبي نتا..نتا هو رتيلة لي عشات فقلبي ..اجي نبوسك اجي
زكرياء بعد وجهو عليها وشاف فناس لقلال لي حداهم:صهري ينعل حسك ..ناس ابنت لحرام
سماح:وها نتا بديتي كتضسر وتعاير ...عقلي موسخ ونتا عقلك اسي لفقيه راه زريبة با صالح نقى منو
زكرياء:ودبا من تالي عاوديلي واشتا صرا
سماح كتقلد هدرت فاس :اييه يا لحبيب د ألبي ..
زكرياء بحدة:سماااح
سماح:ايوا اسيدي دخلت بعجاجتي وقلت لي عندي وخرجت تحت انظار قوم مذهول لطلتي البهية ووجهي الملائكي وقوامي الموشوق ..وصوتي العندليبي ولوني الحليبي
زكرياء:سكتي حسن منخليك تحسبي سنيك قدامك ...
سماح:غرتي ..يا بوشعيب ..غرتي كنتغزل ليك فمراتك يا زغبي ...(كتضربو لكتفو) تا شوفلك عتيريسي غار عليا ...اكليع لي ميتكلع نحبك اجدك
زكرياء فاقد الأمل فيها: يا ربي هاد سنين لي باقيلي معاها رزقني غير صبر ولعقل ..على الاقل واحد فينا يكون بعقلو ولادي ضاعو قبل ما يجيو
سماح: تا كون هاني اعشيري غيضيع حتا باهم عادي(تحاكات معاه جنب كدير بيديها لافتة فسما) ..غنديرو سلسلة تحت عنوان العائلة الضائعة
شاف فيها جنب: الضائعة !!..(ضربها لقفاها):تكعدي ينعل حسك حسن منضيع حبك فهاد لكازون نرجعك تجتريه من هنا لنهار العرس
وقفو مشا خلص وخارجين متناكرين
بين ليلة ونهار تغيرات حياتها ..كانت كتقول عمر الفرحة دق بابها ولا ضحكة تعرف ليها طريق ولبسمة تنور ذاتها ...قساة وعاناة وبيه تجازات ..كيقولك صدفة حسن من الف ميعاذ عليه شحال قلبات وعمرها لطريقو عرفات ..ونهار لي نساتو ولحياتها كملات وفشقاها غرقات ..ربي جابو لطريقها غريب رجع قريب ولرضاتو كانت من ساعيات ..وحبيبة قلبو رسمها و لقب مراتو كانت من الفايزات ..ملكة تربعت على عرش حياتو بدون نقاشات ....
حطت اخر لمسات كتشوف فلمرايا حداها نزهة ونسرين وحياة وعلياء كتقاد ليها تكشيطة من لكتاف كتسمي الله وتقرا عليها المعوذتين شافت فيهم وعينيها مدمعين
علياء:بليييز متبدايش ...الميك اب المسخوطة ..
سماح كتسوط على عينيها باش ميخسرش ليها الميك اب بغصة فحلقها:راه بحدهم كينزلو بحدهم ...
حياة:عرفتي لو كان كانت مزال عايشة مكانتش غتبغي تشوف دموعك سيغتو هاد نهار...الله يرحم يماك بلاش من دموع اصاحبتي
نزهة حطت يديها على كتافها:ايوا الله يرضي عليك ...فرحي وفرحيها فقبرها ..بلاش متحرقيها بدموعك ...دعي معاها برحمة ابنتي ..واليوم كوني كيل كانت تتمناك تكوني ..حتا وحدة متبغي تشوف دمعة بنتها وهي عروس
مسحت دموعها لي مرة مرة كتخونها دمعة وتنزل ..اما علياء فشعلات لفرفارة مقابلة معاها ورجعات كدير ليها رتوش خفيف لميك اب ..خرجات لابسة بلوزة هابطة من جيهت لكتاف فالازرق ملكي مطروزة بذهبي دايرة مشطة خفيفة مخلية شعرها مجموع من القدام ومطلوق من لور مع ميك اب خفيف بارز جمالها الهادئ مع حلي خفيف دبليج مذهب فيدها وحلقات مرصعين بالحجر الزرق وسنسلة طويلة مذهبة .. بمعنى عروس انيقة ميحتاش لتبهريج باش تبرز جمالها لبس على قدك يواتيك ..طلعوها لسطح فين كانو دايرين لقاعة المتنقلة و لبرزة نساء مجموعين ولاشين مطلوقة محيحين بالاغاني وصلاة وسلام على نبي غير شافوها داخلة وقفو هالي كتصفق هالي كتصلي على نبي وكاين لي كترش عليها ماء الورد والورد خذاوها لبرزة وجلسات فرحانة كتشوف فناس من عائلتها وناس من عاىلة زكرياء وشي جارات من صحابات الحاجة سكتو لاشين وهزو لبنادر واقفين زوج فرقات شي مقابل مع شي محميين طرح بأحيدوس وحدة تقول والاخرين يعاودو من موراها ويشطحو مساميين(واقفين جنب بعض) مع بعضهم كيمشيو ويجيو حتى كيوصو فنقطة وحدة ويرجعو للخلف وهكذا طول الاغنية..اما هي نقاشة كتحني ليها وسط غنايات من تراث عليها على لالة لعروسة ...الحاجة مرة مرة تجي تشوفها واش مرتاحة فجلستها ولا لا اهتمامها خلاها تحس بلي مها هي لي واقفة معاها ...كتنسى كاع لي داز عليها وكتعيش الفرحة لي ياما تحرمات منها ...واخيرا ربي جمع شملها وقدرها تصلح الامور بين عائلتها وفكات صداع على خير ...وهي كتتفرج فنسا ناشطين ونقاشة ملهية مع يديها ورجليها سهات فشنو وقع يومين قبل العرس
فلاش🔙
كانت ياله رجعات من عند لكوافيرة دايرة سوان فيزاج لوجها حمر كيبريي ومقادة دفارها دايرة لفرانش ..جالسين دايرين براد اتاي مجموعين عليه قولها وضحك عليها حتا كيسمعو صونيت فلباب ناضت نسرين فتحات لباب ورجعات طالعة كتجري صفراء ما فيهاش نقطة ديال دم وكتترعد مجاو فين يسولوها حتا كيلمحو من موراها عبد القادر ونزهة داخلين ..سلمو وتقدمو معاهم تجمعو على لبراد هدرو على كلشي الا الموضوع المهم حتى جا وقت لعشا دارتو علياء وتسناو حتا رجع معاذ وتعشاو جميع وبزز باش جلس ليهم مع باه ..داز لعشا ودارو براد اتاي طلعو جلسو فوق سطح منها يتبردو منها يتجمعو نسا ورجال ..بقاو كيهدرو حتا نطق عبد القادر
سماح:حشا اخالي ..نتا لي سمحلي ..اما انا سمحت ليكم زمان ..(شافت فمعاذ وموجهة لهدرة لخالها) دم عمرو ميرجع ماء اخالي ..ودم غالي وعزيز على مولاه الا خسرو وكان بوحدو يموت وما ينفعو حد ..شحال ما لواحد تغرب على اهلو كيعيش وحداني وخا يكون وسط مليون واحد
نسرين:مكذبتيش اختي الواحد ميدوملو غير لي ليه...ولحم الا خناز ميهزوه غير ماليه ..ولا لا اخويا
معاذ:الا كان لحمك مدود قطعيه و رميه خير ما يخنز ليك لي باقي
سماح:دود منك وفيك والا دود لحمك سترو وما تفضحو غيرجع ضحك غير ليك اولد خالي ...وساعة شيطان شلا ما يصرا وشلا ميتقال ..ورضا وليديك من رضاة الرحمان ...وخا يكونو كفار حقهم عليك وواجب تصونهم وتحافظ عليهم وخا يوقع لي يوقع
سكتو بقاو كيشوفو فبعضهم..طول ديك الاثناء زكرياء وعائلتو اكتفاو غير كيشوفو حتا حد منهم ما هدر خلاو الحديث يدور بين المعنيين بالأمر يكفي أنه اعتارف بالخطأ تجاه سماح هذا هو لي كيهمهم هما ...شاف معاذ حتا عيا وناض خرج
سماح شافت فخالها:خليه دبا يبرد ويرجع ..راه
قاطعها خالها:عارف ابنتي لي غلط ولابد يتعاقب وربي عاقبني بولدي
زكرياء:متقولش هكذا الحاج ..راه ولدك لو ما كان يعزك وباغي ليك الخير متكونش ردت فعلو هكذا ..باغيك تصفي رقبتك قبل ما يفوت لفوت ..وها نتا اليوم هنا وسطنا والخواطر صفات ..عطيه غير يومين وخو يجي برجلو عندك ..راه يعيى كيبقى ولدك وحتا واحد ميبغي سخط واليديه وخا يكونو من غير ملة ...
🔚
فيقتها من سهوتها صوت شيوخ(لعلاوي ..ركادة) فزنقة دليل على انه لعريس جاب دفوع لي كيكون عبارة على مصروف لليلة لحناء خضر وفواكه قوالب سكر زيت وعطرية و كاين لي يجيب عجل او زوج حوالة او اكثر كلها وحسب مقدورو..وسي لفقيه دار شان ولهمة لدويبة دفوعها ببقرة وكل ما لذ وطاب وطيافر محملين بتفاصل واثواب وبيجامات وكل ما كتحتاج الانثى..جايين داخلين علياء و وشي بنات من عائلتهم هازين طيافر مشاطينهم كيزغردو ويشطهو بيهم ولعرفة (مصطلح اخر لركادة 🤣) خباطين مكان غير لبرطيات تاكل ومكتسمعي غير تبراح هادي من فلان وهادي من فلتان وفخاطر فلان ولد فلان وعائلة فلان..الحاثول عركَوها غرامة ..فهاد الاثناء نقاشة كتجمع ليها يديها فوسط ليكَات خاصين بالحنة ونفس شي دارتو لرجليها باش حنتها متتشتتش ..جمعات حنة لعروسة وجمعاتها الحاجة.. حطو شفة و ولحليب ..ومن بعد حطو اتاي ولكَاتو ولكعك ...كلاو وجمعو وشبوخ مزالين محيحين فزنقة ولعريس ضرب زوج برطيات يبردو لقلب بحسابهم مقاد ومكان غير لكتاف والله يعطيك صحيحتك ..ورونات نقاشة حنة اخرى حنات بيها للعزبات لي كاينين ولصغار ها لي كدير ليها صبع ودراري صغار مجموعين عليها كلشي باغي لعقرب فذراعو ...مسالات جمعة حتا ل 12 ديال ليل وشيوخ محيحين خلا زكرياء دفوع سماح يهدرو عليه من هنا ل10 سنين لقدام ...
صبح الهراج فدار وكلها وفين مشبح(ناعس) مسطرين كيف ساردين هادو هما المناسبات دار كتعمر حتى كيرجع مانع غير طواليط لي مقدروش ينعسو فيه هههه... سماح صابحة كتزيت فحنتها باش تحيدها على خاطرها والحاجة واقفة ليها على راسها باش تشوف معاها وتجمعها من موراها وكتنكَر عليها هي علياء باش يردو لبال لحوايجها وهما غير كيتغامزو ويضحكو اللهم يسكتو ولا تقلبها معاهم سباط ...اما زكرياء فخذا معاذ معاه وجلسو فتجزئة ياخذو راحتهم ..فهاد الفترة ديال لعرس رجعو صحبة صادمين سماح فيهم ولكن عاجبها الحال دبا ارتاحت تقدر تاخذ راحتها مع معاذ بلا ميتحسس سي لفقيه ...فطرو مجموعين وكلها واش ناض يدير الحاجة ونزهة جالسين مع طيابة لي جات تسخر للعرس جالسبن فكَراج فاتحين بيبة ليه و مغطيين لباب بحجاب فاصل بينهم وبين ناس لي كتفوت فونقة متوسطهم ريشو فوقو طناجر ها ديال لحم ها ديال دجاج وديال لسان طير وكسرونة كيقليو فيها لوز وكَدرة كيعسلو فيها لبرقوق ..مهم كلشي خدام مكانش لي جالس بلاش الا لعروسة ولي لبنات لي دايرين بيها ..جالسين فصالة عالم اخر تما متوسطاهم سماح ببندير عايشة لحظة وضحكاتهم وغناهم كيتسمع لفين وفين
سماح:وهيا لبنات (لبنات يردو موراها )وهيا ...وشفتو لعريس..وهيا ..وجاي من شماال..وهيا ...وبايع عليا لجبال ..وهيا ...ولعريس من تطوان ..وهيا ..وعليه راني عطشان ..وهيا ...ولعريس من طنجة..وهيا ...وفين هو شفتو باقي ما جا ..وهيا ..ولعريس من ناضور..وهيا ...وعليه جالسة كندور.. وهيا....وعريسي من وجدة ...وهيا...ومنو منطلق حتا نشد لعدة...وهيا ..وعريسي من فاس..وهيا ..وغبر عليا يكما جاف ..وهيا ...وعريس من مكناس..وهيا ..وقلبولي عليه وسط ناس ..وهيا ..وعريسي من رباط..قالو ليا شرى سباط..وهيا ..وعريسي من جديدة..وقولو ليه يجي راني وحيدة...وهيا ..وعريسي من سطات..وقولو ليه يجي يقلب عليا فين نبات ...وهيا.. وعريسي من صويرة ..وفين هو يجي يضرب طليلة.وهيا..وعريسي من مراكش..وعليه حفيت لفراقش ..وهيا..وعريسي من اكادير ..وشلحي ايما قولولي معاه اش ندير ..وهيا..وعريسي من لعيون ..وتعالا ليا قلبي بيك مجنون...وهيا..وعريسي من داخلة ...وبشوفتو انا واحلة...وهيا ..وعريسي من لكَويرة وفوقو غنضرب دويرة . وهيا ..وعريسي من تمارة وعليه غنبات قتالة ...وعريسي من بوجدور وعليه غنبات ندور..وعلى سمر لون انا نعطي مليون وعلى كحل لعيون قلبي هايم مجنون ..ولي عزيز على ميمتو غمرو ماينخص ..وشوفليك لي عزيز على باه بايت فلحبس
على اخر مقالت تعالت ضحكات لبنات ونطقات حياة
حياة:وهيا لعروسة ..زينة محروسة....وليلة ليليتك يا سماح ..سيدهم زيكو غيطبع دلاح ..واجي تسمعي يا حنان بنت عمتك غتبع بنان...وهيا..شق الفشلوق ..وقام المصعوق ..واخذ ما له من حقوق.. وهيا...واااا حلااولاااو طالعة نازلة حلاااولاااو ..فركة تتمشى ..خارجة مفروشة ..
علياء:اححح ليلة خويا يتبرع ...غيفدي فيك ليالي طوااال ..دعيو معاها البنات تخرج بياسة وحدة ميفرتكهاش ...
نسرين:احححح لافاش كيري والعظمة
سماح:ياك ابنت خالي ..مبقاتش انا وابن عمي على الغريب ..وشفتو انا بعدا غندوق الحلوة كيتكم نتوما غتموتو تزعفوه من رتيلا ..انا ليلة نشبع غير دناب ونوتيلا ..
سمعو صوت رجال طالعين وهما لي متحجبة هزات شالها دارتو على راسها وقلبوها توشويش بيناتهم وضحك خافت ولي باقية بايرة عينيها على تيتيز لي طالع كانو صحاب زكرياء ومعاذ وشي دراري ورجال من العائلة طالعين لفوق يتغذاو ومع مقابلين مع لباب لي كتفصل مع درج شادين المنطقة الاستراتيجية طلعو وهبطو مزيان ها طويل ها لقصير ها لي باينة من فورمتو مثقل فلاصال وها لي عاطيها غير الخدمة وطايتو على قدو ..زين بلحية وزين بلا لحية لعلك ترضى ...
تغذاو رجال ونزلو وحطو لنساء من بعد هكذا جرات العادة رجال فالاول ونساء من بعدهم ..كيف لعراضات لكبار كيف بين العائلة رجال ديما عندهم الاسبقية ...
غير تغذاو نساء مع جوايه5 جات لكوافيرة عند سماح بدات كتسرح ليها فشعر وتقاد ليها فالميك اب خفيف بارز معالم وجها من بعد دارت ليها مشطة خفيفة منسدلة على ظهرها كملات ليها مع ديك ل10 مقادة ..لبسات الأميرة تكشيطة فالبيج مرصعة بالاخضر مع شاش على وجها شفاف طلعوها لبنات بصلاة على نبي لنفس القاعة لي داروها لدفوع غيررالبرزة مختالفة كان فوتوي ابيض ملكي مذهب من جناب طويل وفوقو مزين بالورد فالاخضر بارد والابيض والغوز بيبي والاصفر بارد ..عاطيين جمالية للمنظر وقبالتها طاولة زجاجية بيضاء من جناب ومذهبة من الاطراف فوقها مبخرة ومرشة للعطور فذهبي وطوابل كلهم فالابيض وذهبي متوسط كل طاولة فاز ابيض منقوش بذهبي بيه مجموعة من الازهار مختلف الوانها عاطية جمالية للقاعة والحضور كلهم نساء معزولين على رجال لي القاعة ديالهم كانت عند باب دار باش كلها وياخذ راحتو والمحجبات ميلقاوش مشكل او حساسية من الجلسة ولي بغى ينشط ميلقاش حتا اعاقة ..تشرط شرط واحد على كل المعازيم ممنوع يتصور شي حد فوسط القاعة من غير لي بغى ياخذ صور شخصية ليه اما لعروصة او لبلاصة لمخصصة لرقص ممنوع منعا باتا اي تصويرة فيها من غير الكاميرا وومن لي كتصور فالعرس ككل ..هكذا ميلقاوش مشكل فالخصوصية ديال ناس ...من بعد كل لبسة كيطلع زكرياء ياخذ صور معاها فبيتها ويجلس معاها خمس دقائق كلمة من هنا وتهديد حلو من هنا ومرة جرأة مرة لمسة مرة غير يضحك معاها ويقشب ..غيرات ثلاث مرات فقط الأميرة وتكشيطة فالأحمر بوردو وتكشيطة فالغوز بيبي منبتة بالأسود ولبسات فالأخير بلوزة على شكل كاراكو فالأسود مطروزة بنحاسي مع حلي خفيف حلقات وسنسلة سامبل مع براصلي فاليد وخلخال فرجلها نفس شكل وخيط ريح مزينة بيه جبهتها وسباط مرصع باحجار صغيرة فنحاسي فيه بابيون صغيورة ...جالسة وسط احبابها ولي جاو يفرحو لفرحها وجا وقت لي تقطع فيه الحلوة اما حتى اش جاب ليها مبغاتوش يدير الاشهار بيه وسط البشار وديك حالة اللطف نتاع صورني وانا مش واخذ بالي ..ها هو لبسها ها هو وكلها ها هو دخلها وخرجها..نتوما دخلو صوروهم فقلة الأدب وتهناو ...جا الوقت لي غتمشي ودموعها انهامرات كيف اي بنت كتودع عائلتها ولي زاد على ما بيها انه مها مامعاهاش ومغتودعهاش كيف حلمو بزوج ...نزلوها بصلاة على نبي ولمرشة ديال ماء الورد وزغارد وسلهام مغطي نصف من وجها وشعرها ودمعة على خذها بكات كل لي معاها حرقة ليتيم فالفرحة كيف جمر ...وقفات عند الباب فين كيستناها وصحابو دايرين بيه كيف نساء ناشطين الفوق رجال نشطو بدوبل عليهم لتحت كلشي خذا راحتو كان واقف بلاك سود مطرطقة عليه بلا كرافاط ولا بابيون .سيك...وشعرو مرجعو لور كيف موالف ...وكان جنبو راجل كبير فلعمر لابس جلابة بيضاء وفوقية سوسدي بيج مع بلغة بيج وشيب مفرق على شعرو السود ولحيتو معرفاتوش سماح من شكلو وخا قرب منها وباس جبهتها ولكن منين نطق ورضى عليها سمعات صوتو مغريبش ابدا عليها..
طلعات عينيها كتشوف فيه وصورتو مواضحاش بسباب الدموع لي محجرين فعينيها رمشت نزلو زوج دمعات باردين على خذها تنهدات كتكبح شهقاتها وهي فعز صدمتها ممتيقاش لي واقف حداها ....فعلا زمان دوار لحظة تصمكات مبقاتش كتسمع لحيحة لي هي وسطها جات فذاكرتها جملة من انسانة عزيزة على قلبها ومساعفهاش الوقت تحضر لعرسها ولكن تيليفون مقربها منها ..انسانة كتعوض فقلبها مثابة الأم ..مرأة جميلها عمرو تنساه وخيرها مثقل كتافها حتى نهار يرجعو تراب على ذاتها ...
🍃يطو:..دبا يحن عليك ويا ليتيمة يجيبهم بين يديك...مذلولبن وحانيين راسخذيتي دعوة رضا من عند مك عمرو ربي ميخذلك ولا يحوزك لحد ولا طرفك ينداس...🍃
عمها هبط راسو مقادرش يشوف فيها ..اييه العم لي مجلي لمدينة اخرى لي مكلف راسو حتا يهز تيليفون ويسقسي (يسول )فيها ..اييه العم لي فعوض الأب لي تخلى عليها والعالم الله فإينا جايحة مجلي عمرو فكر فيها..اييه عمها خو باها شقيق لي دار مديرت الخال ولا كثر فيها..العم لي حتى عزاء مها ما هز تيليفون ونعى عليها ..اييه العم عمى و يحسابوه ليتيمة كيف لبكما..سبحان مبدل الاحوال لي كتون فشان ويرجع فشان ...
العم:مبروك ابنتي الله يتاوي بيناتكم..باك كان باغي يجي بصح صحتو مسمحاتش ليه
سماح:الخير والبركة فيك ..كفيتي وفيتي الله يجازيك بالخير ..
زكرياء حط يدو على خصرها وقف جنبها:غير دوز شي ايام ترتاح سماح تخوا دار شوية ونزوروه إن شاء الله
سماح طلعات عينيها فزكرياء لي كيشوف فيها:أكيد ..نزوروه ان شاء الله ..كيبقى دمي ولحمي ...
زكرياء ابتاسم ليه وطلعات سماح فطوموبيل وهو مشا خذا بلاصتو جبنها باش يسوق ..وقفاتو علياء لي خذات اذن سماح
علياء:رخفي راسك يا صكعة وعنداك تخافي ولا تتوتري ..راه ساهل ماهل ..حلااوة يا ختي نشيز كيك... متنسايش اش علمتك (سماح غير كتسمع وتتزنك) اييه ولي وصيتيني عليه راه فتروستك منسيتش هههه
زكرياء:ياله معانا نتي وتهناي
علياء كتلعب بحواجبها تجنن فيه:سير على الله اعبد الله ..ومتنساش الجهاد في سبيل الله
كسيرا كيشوف فطريق ومرة مرة يشوف فسماح لي هاد الاخيرة بلعات ريقها وكتمات صوتها وجمعات يديها ورجليها مكرهاتش فهاد ساعة يطويوها وتتهنى وصلو لتجزئة ..نزل هو ومشا جيهتها عاونها تنزل شاد فيدها دنيا خاوية وسكات كلشي ناعس قريب لفجر يأذن وقفاتو كتشوف فالموبل لمقابلة لفين ساكن شافها فين كتشوف وعنقها بيد وضرب راسها براسو ضربة خفيفة وبلا مينطق تحنى هزها باستو فخذو وعنقاتو عاجبها الحال طلع بيها لشقة ديالهم فتحات هي لباب بلا مينزلها ودخلو حطها عند لباب حيدو صبابطهم وطلب منها تجلس فصالون واحد زوج دقايق حيدت سلهام حطاتو جنب وهو دخل شعل شموع لي كان مقاد فالبيت ونصف الاخر من الكولوار وتأكد من انه كلشي مقاد الورد ملون مشكل فوق ناموسية ومرشوش فالارض بأشكال هندسية متنوعة عاطي جمالية وشموع معطرة الاجواء باحتراقها خرج عندها هاز كرافاط فيدو وقف عليها فيقها من سهوتها ملحقات تسولو كان مسكتها بقبلة فشفاها ويديه كيعقدو لكرافاط لي على عينيها شدها من ذرعانها مسبقها قدامو كيهمس عند وذنها بكلمات مرة تضحك بالفرحة مرة تتزنك حتى وصلها بخطوات بطيئة لبيت بدات كتشم ريحة كتأسر مخلطة بين الفاني ولفريز ناتجة على احتراق شموع فتح ليها على عينيها وطبع قبلة على عنقها..
زكرياء:مرحبا بيك فدارك ...
سماح دارت شافت فيه:تت..مرحبا بيا فقلبك
زكرياء حط جبهتو على جبهتها كيهدر بالهمس:من زمان اسرتيه
سماح:جمع عينيك احنيني ودخل حيد عليك لعيا ..ليلتنا طويلة
زكرياء ضحك:نطولوها ابب حنا نشركوها نهار وليل كاع
سماح خلاتو واقف ودخلات لبسات شميز دونوي طويل فالاسود مشبك من لفوق ونازل ساطان فيه فتحة جنب مبينة رجها على طولها ..ومن ضمن توصيات لجنرال علياء ..معندها علاش تحشم تلبس حداه بالعكس الحرأة تلعب دور والحشمة عندها اوقاتها ولمرأة هي لي تعرف فوقاش تكون جريئة وفوقاش الحشمة تطغى عليها تخلي آدم ميعرف طينتها منين ...جلسات كتدهن فلحمها وترش فريحتها خلات وجها صافي مفيهش نقطة من الميك اب ..لبسات اسدالها وسرحات صلايات دخل لابس عباءة قرب جيهتها باس جبهتها وشاف فصلايات مسرحين ..
زكرياء:زعمة داك شي واجد
سماح غمزات ليه:نعجبوك اسي لفقيه
قام صلاة وصلاو زوج ركعات قال دعاء وسمعو اذان لفجر ..صلاوه لزوج وقراو ما تيسر من القرآن ..كملو جمعات سماح وحيدات الاسدال وهو حيد العباءة بقى غير بشورط ..هي تصدمت فيه وهو تصدم فيها كتر اول مرة يشوفها مكشوفة بديك طريقة عيات تكابر وحشمها بشوفاتو قرب منها باس خذها بحنية
زكرياء:اححح كلك زبدة ومنين نبدا
سماح طلعات فيه عينيها:احح يا لكرعة سلاوية ديالي
زكرياء حط راسو على كتفها كيموت بضحك حطت يديها على خصرو وتخشات فيه معنقاه عنقها بدورو كيشم فريحتها
حتى نطقات:نتا هو فرحت حياتي ..نتا هو انتمائي لذاتي ...نتا كل نبضة كتحيي قلبي وكل انفاسي ..بيك عرفت حلاوة دنيا وبيك ومعاك عنعيش ياماتي...نتا رضاة ميمتي وكل بركاتي ...نتا مصيبتي وكا ابتلآتي.الله لا يحرمني منك ويخليك مصدر سعادتي وابتساماتي ...
زكرياء ابتاسم وباس جبهتها ويدها:نتي هي كل دعوة خير تقالت فوجهي ولا فغيبتي ..نتي آمانة دنيا وميمتي ..كنواعد غنكون راجل معاك وعمري نكون راجل عليك..والا تآذيتي مني ولا من اي حاجة عرفي بلي قبل منآذيك غنكون اذيت نفسي
سماح شافت فيه مبتاسمة:بغيت نطلب منك طلب صغيييور
زكرياءشاف فيها بشك:لي هو ؟!
سماح:جلس الارض وربع رجليك
زكرياء طلع حاجبو:وقت لجلاس هذا ...من نيتك
سماح بترجي واا غير جلس ودير نية تربح
زكرياء جلس وهي كارت لاتروس ديالها جبدات منها كرطون صغيرة مربعة كدورها فيدها وتتمشى بغنج وتلعب فشعرها وتلعب بحواجبها ..اما هو غير شاف لي بين يديها ضرب جبهتو بيأس
زكرياء:حراما حتا لعذاب هذا ...صبر ضبرني ابنت العبد
سماح:يا عيني على لمعذبني..احياني على لمحني...بب نتا يا دجاجتي لمزغبة ..احح على الديك منفوخ صدر..شفتي نتا بربي حتا رجولة ...
زكرياء تكا على يدو كيشوف فيها مطلع حاجب:فرق اسميح فرق ..مبقاتش ليلة دخلة هادي رجعات ليلة خرجة مع لخوادري ...برجولة !!! ناقصاك غير لحية اما حتا لمسطاش لاسيير دايرة فديلملتكم خير كبير
سماح:باش تعرف راسك تزوجتي راجل تعول عليه ...راه رجلة فرجال قلالت رومبلاسيناهم باش منبقاوش ناقصيين 🤣
زكرياء:غنوض نفض مك ...خلي ليلتك دوز على خير
سماح:احح على الأسمراني لمعصب ..(كتفرق الكارطة تشوف واش كاملة ولا ناقصة ) احممم سوطة ولا ماكلة ولا بونجوغ مدام بونجوغ ميسيو ...
زكرياء:المسخوطة هي لي تصلاح مع جدك ..واراي انا نضمس
سماح دارت عطاتو بظهر وجلست كدور فزوج ورقات لي بين يديها خايفة يهز لورقة لي محتاج ويحكم عليها ..وللأسف داك شي لي وقع ضحك على تهرنين وتغبان لي بدات دير ليه
سماح:غشاااااش راك معلمها ..بلعوط
زكرياء:ايوا صافي خطينا من شي لعب واجي نخبرك (جبدها عندو بدات كتتجبد بين يديه وتتعافر)
سماح شداتو من يدو جلساتو وجلست على حجرو محاوطة خصرو :صافي صافي والله حتا غنسكت ..نكملو لعبة
زكرياء بخفة قلبها تكاها على الارض وبلمسات حنان دوخها وقبلات بنجها غير حست بصح غيبدا فافت من غيبوبتها كدفع فيه
سماح:لميمة لااا ..شوف ...غير نساليو لعبة بلييز
زكرياء خدام ممسوقش لهدرتها كيهدر وكلماتو كلهم بالهمس:هذا هو لعب ابب...داك لي قبل باسل ..هذا بحلاوتو ...
قلبها كلمات حب وهمسات عشق وغرام ..وغابت سماح ما فاقت غير على الآلام ...اييه نعم تحولت من آنسة الى مدام ...وصكها بملكيته الى اخر يوم من الأيام ...وسيدوم عشقهم على سائر سنين والأعوام ....
ساترة راسها بيزار متوسدة صدرو ويدو كيدوزها على طول شعرها مرورا على سلسول ظهرها .. معرفتش كيفاش ولا فوقاش من بعد ما كانو على الارض لقات راسها فوق بساط العمليات الخاصة..انه سرير يا سادة...هي مزنكة وهو ضرس لعقل كتقوليه راه ضربني لبرد سد فمك شوية هههه..مرة مرة كيبوس ليها راسها ولا يهز يدها يبوسها وهي مخشية فيه بالحشمة
زكرياء:شكون قال يجي نهار ..وديك لي صدعاتني فليلة تكون ونيستي وترجع مراتي ويتكتب ليا معاها القدر...حمقة ولبيبة ولسانها سليط وفطينة دويبة ..
سماح:من بعد كاع لي داز عليا مبغيتش نحقد على حتا حد ...سامحتهم وخليتهم منهم لله الا سمح ليهم ...(عنقاتو وغمضات عينيها كتهدر بتثاقل)غير رضاة الغالية خذيتها ..وربي حطك فطريقي بادالها مكيهمني حد اخر ...غفات على اخر كلمة خلاتو كيتمعن فملامحها وهي فاتحة فمها شوية وغارقة فنعاس ..على صورتها غفى من بعدها ....
فاقت على صوت كلاكصون منباعث من زنقة تململت فبلاصتها تقول تران داز عليها صابحة مدكدكة عضامها يوجعوها مقدرتش تنوض مسحت وجها ويعينيها من نعاس وبقات كتشوف فسرجم لي مدخل ضوء خفيف من شق فريدو شوية وهي تتفكر ليلة البارح اش داز فيها دارت بالعد البطيء كتشوف فداك الجسم ضخم جنبها الغارق فنعاسو ومغطي وجهو بوسادة رجعت انظارها لجسمها لي مغطي بازار علاتو شوية وهي تلقى راسها كما بجغتها امها ههههه تزنكات وشهقات ولعينيها طرطقات دورت وجها عليه بزربة مقدرتش تشوف فيه كتر وهو نصفو لفوقاني معري وكتشوف فجسمو متناسق بحكم الاونترينمو لي مكيخطاهش بغات تنوض ضربها ضوء تحتها جلست كترد نفس وهي مجموعة فداك الإيزار تقول مكمطينها حتا كتحس بيدين حاوطو خصرها وقبلة نطبعت فعنقها غمضت عينيها باغية تبكي بالحشمة مقدرتش طلع صوت كسر صمت المكان بهمسة
زكرياء:تيتيز بلادي...اميرة قلبي صباح نور..(شافها منطقتش قرب وجهو كتر كيشوف فيها جنب)اواااه مكانش صباح الخير اراجلي لعزيز
زكرياء كيطنز عليها:لااا متقوليليش سموحة لحلوحة حشمانة ..(رجعها تكاها على رجليه كيلعب ليها فشعرها وهي مقدراش تتحرك ولا تتنهد ولا تحل عينيها تشوف فيه مزيرة يديها على داك الإيزار خايفاتو لا يطيح ليها اما هو فمتع عينيه بشوفتها و حمقاتو وهي هكذاك )..حلي عينيك شوفي فيا ...(حركت راسها بنفي جابتلو ضحكة) عادي احبيبتي معندك علاش تحشمي )نزل كيحك نيفو مع نيفها) راك مراتي وداك شي جاري بيه العمل الحب ..
زكرياء ضرب ليها جبهتها بصبعو ضربة خفيفة:نوضي قبل ماتموتيلي هنا..نوضي
سماح كانت مقلقة غير فوقاش يعطيها المساحة فين تتحرك ناضت زربانة وخا تحتها كيحرقها معطاتوش اهمية باغية غير تغبر من حداه ..دخلت لدوش حطت داك الايزار جنب وقفت عريانة كتشوف نصفها الفوقاني فلمرايا وغير مكتزيد تغرق بالحشمة منين كتسترجع احداث ليلة الفايتة معاه وكيف كان معاها الفرحة والحشمة خربقوها ...دوشات وتوضات لبسات بينوار وخرجت كتتختل فارشة رجليها كيف البطة وبعينيها تقلب عليه لقاتو واقف كروازي على قنت لباب مربع يديه لابس شورط وكيضحك عليها
زكرياء:لفركة صباحية مباركة
سماح دكت راسها الارض وزادت دخلات وسدت لباب فوجهو خلاتو مشتت بضحك دخل دوش وخرج لقاها لابسة اسدالها وكتصلي الاوقات لي دازوها لبس هو عليه سروال وتريكو ديال دار وصلى الاوقات لي دازوه فهاد الاثناء هي دخلات لكوزينة تصايب ما ياكلو وهي كتوجد دخل عندها باس راسها ووقف جنبها موترها بشوفاتو وغير كتشم ريحتو كتتفكر اش دارت معاه
زكرياء:لا واش من نيتك كاع هاد الحشمة (حيد من بين يديها شبكة ديال نعناع باس يدها وحط يد على خذها) راه اي زوج مزوجين الا وكيوقع بيناتهم داك شي وكثر ..فبلاش من الحشمة دبا راه مزال غير البسملة هادي ...(عنكش شعرها) مزال الخير لقدام امدام فغير نساي الحشمة عليك
سماح شافت فيه حابسة ضحكة:وغير خليني نوجد مناكلو راه غنسخف بجوع اعتيريسي
جلسة كيعوضو سعرات الحرارية ودهون لي خسروهم فحرب الحب الثنائية..مرة كلمة من ومرة لمسة من حتى رجعات لطبيعتها معاه وكتهدر بلا فرانات كيف متعودة معاه هههه
بعد يومين فدار لعرس كلشي صابح على قدم وساق باش يوجدو ليل كيف جرات العادة ..وبما انه سماح منهم وفيهم وماكانش مها لي توجد ليها" لكصعة " وتاخذها لدار لعريس ...الكصعة كتكون عبارة على عراضة كياخذو اهل لعروس الأكل واي حاجة ليها علاقة بالبطن هههه من مقبلات واطباق رئيسية وديسير وتحلية لدار لعريس ومنها يشوفو بنتهم ويستفسرو منها وكيديرو "لحزام" لي كتدخل لعروسة وسط اهلها واهل لعريس لابسة لبلدي بلا حزام ومن بعد نشاط وتغني بيها كيدخل عزري من العائلة خوها ولا خالها ولا ولد عمها ..مهم يكون اعزب ويحزمها بمضمة ولا حزام ديال تكشيطة كيحزمها وسط نساء وتحت تهليلهم وصلاة على نبي ومن واجد لعروسة تعطيه ملح يديه اي غدور معاه بلفلوس ..وفحالة سماح كاين استثناء ..الحاجة وجدات كلشي ... ودازت لعشية من داك شي ...من بعد ما تفرقو ناس وكلها رجع لدارو جالسة سماح وعلياء فسطح كيتشوشوشو بيناتهن علياء باغية تاخذ منها المفيد وسماح كدير ليها عامرة فخاوية هههه
سماح:حلفي حتا معاذ تصالح مع خالي
علياء:اقسم بالله الا قبيلات شفتهم متعانقين وزكرياء واقف معاهم هو وعصام ..وسولت نسرين قالتلي راه تصالحو
سماح:الله يا ربي الحمد لله ...دبا عاد نقول ارتاحيت ..كنت هازة اللهم ليهم والله
علياء:ايوا راه ساعة شيطان ابب ..راه ربي يدير يدير تأويل ديال الخير
سماح:ونعمة بالله ..
علياء شافت فيها جنب: عرفتي نتي والله ما رجولة انا مخليت ما علمتك ونصحتك ..راه بغيت نعرف غير نتاىج دروسي
سماح:كلشي فسليم..دروسك الامتحان خذيناه بامتياز ..اجي بغيت نسولك على واحد الحاجة
علياء:الا في قلة الأدب انا في الخدمة
سماح:الانحراف فجيناتكم الله يستر....اجي دبا خوك من بعد الواقعة يا ختي عطاني شيك بحلاوتو وسنسلة ديال ذهب وقالي هذا ديالك ...دبا واش انا خلصني على اش درت ولد لحرام ..حسسني بلي انا من صحاب ..لي داخل اح ولي خارج بح
علياء:يشويني فيك...وراه نيت فيها احح وبح ...راه خاصك تعرفي ديك لوقيتة هي لي فيها الحكمة ..ديك ساعة كتكون الاجونص ديال سفر مفتوحة ليك ..لمدينة ديالك ..ذهب معربن ...لبنك عندك فيها كونط ..اي حاجة بغيتيها ديك ساعة نطقيها والله لا سمعتي لا ...مكان غير ميكون غير خاطرك احبيبة ..ما كان لا سحور ولا مخ ضبع ولا زنطيط حمار ولا زغب الفارة لعزبة ..ما كان غير عطيني نعطيك والا كنتي مرة وقادة وعارفة كيف ديري معاه غتاكليه بحوايجو وتكوني غير نتي لي مرأة فعينيه ...خوذي لي يفيدك لمرات خويا ..راجل برعيه يبرعك ..وتكوني خانزة ومعفونة فدارك تجيه لبين رجليه تعرفي تقلشيه يغرق هو فدودو معندوش مشكل اهم شيء الاناكوندا تكون سعيدة ...
سماح:اويلي على يغرق فدودو ..لايا ختي حتى لنقى منتفاهموش ..انا غير يدخل بسباطو لوسط دار يشدني شلل نصفي
علياء:وراه كنقولك ديها فدارك ولكن غير يجي اهتمامك كولو ليه ...وبنسبة لآش دار معاك ..راه من عاداتنا فصبحية يكرم مراتو ابب ...وسعداتك الالة بيه غير شكون وشكون لي يتعطى ليها ذهب ...اححح على زكية طلعات رمنسية
سماح:تجمعي قالك زكية ..هذاك راه حبيب قلبي (شافت تيليفونها شعل ضوء دليل على وصول مساج قرات وضحكات)
علياء:نوضي نوضي ..راه تلقايو واقف عليه
سماح:الله يقلل حياك
علياء وقفات نازلة هي وياها كيهدرو:اححح علىىالايام الاولى ما كان غير الحلويات..غير دوز فترة ترجعي تاكلي الحلوة بنظام تخافي من سوسة ديال سنان ههههه
كل وحدة مشات لبيت سماح لقاتو متكي حاط بين ديه بيسي ونظارات طبية فعينيه
سماح باستو فخذو:هاي هاي على هاري بوتر
زكرياء:على سلامتك شفتي جيتي هنا ونسيتي راجلك
سماح كتهز باش تبدل :تنساك الموت اسحتوت ...شوية وانا راجعة
سماح باستو فخذو:حتا حد مكره يكون قاري بديبلوماتو وشواهد ديالو ماشي ضرورييخدم بيهم مهم يكون واعي ومثقف ولكن صافي توالفت دار وحتا فدار راه بنادم يقدر يقرا يوتوب دار خير فالعالم
سماح:لاااا والله بلاش ..مغنقدرش نوافق بين دار ولقرايا ومنقدرش نخلي الحاجة بحدها
زكرياء:كلمة وحدة قلناها غترجعي تقراي ..ونتي غتمشي فالوقت لي تكوني مسالية فيه واما من ناحية الحاجة نجيبو شي بنت تجلس معاها الوقت لي نتي متكونيش
سماح شافت فيه مخنزرة:بنت ... يا ولد لحرام...اييه بغيت تخوني وكتقلب على سبة ...مالي شكيت عليك ..قلت ليك منقدرش نوفق بيتاتهم ...فوقاش قلتها ليك ..اخويا كيف داير ..
زكرياءباسها فشفاها:نعسي الحب غذا ان شاء الله غنشدو طريق ..
سماح باستغراب:فين؟!
زكرياء غمزها:لفليبين اعمري
غمض عينيه خلاها كتسول وما من جواب حتى غفات فصباح صبح عليها كيعنكش وينغز فيها وهي سروالبيجامة طالع من جيه وشعرها شاد الرادارت حالا فمها وناعسة على كرشها رجل مسرحاها ورجل طاوياها
زكرياء:وديك بقرة هولاندا فيقي ..
سماح بصوت ناعس:وبعدني المرض ..خنيني ننعس
زكرياء:شفتي غنحسب حد ثلاثة الا ملقيتكش فايقة وبربي حتا ندوش ليك فبلاصتك
سماح حطت وسادة على راسها وبصوت خافت:دوش لمك
بعد رقم ثلاثة لي داز على مسامعها بعيد حست بقطرات خفيفة كتتسلل من فوق لبيجامة للحمها استحلات فالاول لبرودة ولكن ما ان حست ب "بشاااخ"ديال لماء ناضت كتقفز وتغوت وهو مستت بضحك
زكرياء جمعها بنص جابها مسرحة فالارض:عاودي تفو وحدة اخرى نرعف مك ..قلنا ليك فيقي نتي لي بحال لحمارة تمشاي غير بالمنغاز
سماح وقفت مخنزرة فيه عصبها:حمارة..ايوا الله يجازيك بالخير اراجلها
دخلت لدوش وزدخات الباب من موراها خلاتو كيغلي ..خرجو فطرو وعديمة النفس والاحساس نسات لي داز ورجعات تضحك وتقشب معاه وهذا لي كيخليه يموت عليها مكتقلق مكتهز فخاطرها ... فطرو وجمعات مع علياء وشدو طريق لوجهة مدينة لعيون شرقية ...فين ساكن عمرها وفين كابن الاب ديالها ..غير وصلو حست بقلبها كيضرب فتسعين اعوام مشافتوش ومسمعتش صوتو وخا كانت كتقول كرهاتو حاسباه ميت الا وفقرارت نفسها متعلقة بيه كيبقى الاب ديالها ...دخلات ويا ريتها مدخلات كانو كلهم مجموعين فصالون كيحربو بيهم وهو جالس مدورين عليه وسايد باش ميميلش ويطيح ضعاف بزاااف لدرجة معالم وجهو تغيرو عليها شخص اخر تماما على داك ذكرى صغيرة لي فمخيلتها جلسات حداه باست ليه يدو وراسو ومحست بدمعتها حتى خانتها قاطعة صوت ولكن ما ان نطق الاب ديالها طالب سماح شهقاتها تعالات وعنقاتو حالتو مخلاتهاش تفكر فحقدها ولا داك الوقت لي داز وهي محتاجة ليه...لحظة خلات لي فصالون تأثرو من متظرهم ..اما هي حسات براحة فقرارت نفسها ...برودة وانتعاش حيا ذاتها ...جلسو يومين معاهم تحت اصرار عمها والاب ديالها وعيات مع الاب ديالها تاخذو معاها الا انه رفض .. ولكن اصرارها هي وزكرياء كان كبر خذاوه معاهم وكيف دارت مع مها خذات رضاة باها ومتخلاتش عليه كيف دار هو حتى لاخر نهار فحياتو دوزاتو معاه كتعوض سنين لي دازو مرضات بعد موتو وتأزمات ولي زاد عليها الحمل لي تفاجأة بيه ...دوزات تسع اشهر فالعذاب جاها لوحم على دار محملتش تبقى فيها ...كانت رحالة بين دار علياء ودار خالها وزكرياء داير ليها الخاطر...مولدات حتا فقصاتو ..واول الذرية كان ولد "المرتضى بالله" فرحت زكرياء بيه كانت كبيرة دار ليه سبوع وختانة ومخلا شكون عرض غير لي ملقاهش ومعرفش راه من عائلتو ...خلا الحاجة وسماح غير كيسخطو ....بعد مرور خمس اعوام ..هاد العام كان اكثر عام داز مكفس على سماح وزكرياء العام لي خسرو فيه البركة ديال دار ..وفاة الحاجة كانت بنسبة ليهم حاجة لي فوق طاقتهم بزوج خسرو انسانة متتعوضش ...سماح خسرات الام لثاني مرة ..اما زكرياء فخسر الام وصديقة ولحبيبة لي كانت الاقرب ليه ...مدة باش قدرو يتحملو غيابها من دار ...ولكن لي خفف عليهم نار لفراق شوية انها اخر كلمة قالتها قبل شهادة هي رضاة عليهم بزوج
سماح قدرات بعدة مدة تاخذ اجازتها وزكرياء ربي وفقو فخدمتو وفتح كلينيك خاص بيه ..ربي رزقهم بولد كان هو نور عينيهم ومكتبش ليهم ذرية من بعد...علياء سافرات مع عصام واحمد يعيشو فاسبانيا ..معاذ خذا نسرين كملات قرايتها ففرنسا وكل عطلة تنزل تشوف وليديها ومعاذ غير كيعطيوه كونجي يجي يزورهم هو وبنتو ومرتو...حياة ربي فتحها فوجها وتعرفات من خلال واحد الموقع على راجل ارمل مغربي مقيم بالمانيا ربي يسر ليها وتزوجاتو خذاها معاه ...
...رضاة الوليدين كتخدم على مولاها حياتو كلها ..وسعدات لي هز ليهم الخاطر وكان بار بيهم ...الأب مكانتو كبيرة ولكن الأم مكانتها اكبر ..كيقولك ليتيم يتيم الأم ..الأم هي صدر لحنين هي لقلب صافي ولكبير هي صبر ..الأم تحيدها من ذاتها وتعطيها لولادها وهي فرحانة .... الأم تشقى فزنقة وفدار غير باش توفر راحة لولادها ومتنقصهم حتا حاجة ..وكاين الآباء لي يخرجو يخدمو فشموسات ولبناء وتمارة لكحلة باش يعيلو اسرهم ...الوليدين هما اكبر نعمة الواحد يدعي الله ميحرموش منها...لي فقد وليديه فقد حياتو ...حيتاش فزمانا راه حتا حد مغيعقل عليك ..من غير وليديك لي ميدوزوكش ...سماح منها بزااف فواقعنا ...كاين لي ربي وقف معاها كيف وقع مع سماح ونجاها من شر الخلق..وكاين لي دنيا غراتها وهداتها وصبرها كان قليل وغرقات فلحرام ..وفي كل الاحوال ربي كبير واي حاجة مكتابة لينا الا فيها خير لينا ...اما بنسبة لزكرياء..فمنفقدوش الأمل مزال ولاد ناس موجودين...كيف كاين صالح كاين طالح والله يلاقينا غير مع لي حسن منا ..سماح قساة عليها دنيا وشوفتها الويل وربي جزاها على صبرها براجل منقولوش معيشها الحب ولعسل ..راه زواج ماشي غير حلاوة ..كاين لحلاوة لي كتشوبها مرورة بعض المرات ...هكذا زواج اوقات زوينين واوقات خايبين مرة ضاحكين ومرة الحافيظ سلامة ..والواحد خاصو غير يصبر ..هنا نكونو وصلنا لنهاية ...نهاية قصة استثنائية بنسبة ليا ..قصة امل..قصة صبر ..قصة إيمان ويقين بالله ...قصة سماح وزكرياء 😍
أيام النحس المترنح ..تتموج على ساعديْ حظي المتأرجح ..انا اليتيمة خلف قضبان الحياة أسيرة..ايام تمر يسيرة وايام عسيرة . .واملي في خالقي يوما ما سترحل الغمامة من فوق السفينة..وتحط رحال حظي على ضفاف الجزيرة ..يوما ما سيذوب الصقيع وينتعش الربيع واجد حبا وليدا كالرضيع ...يوما ما سأرى سواد الغمامة ذكرى عابرة تمر امامي كاليمامة ..يوما ما سأجد ملاذي واعبر جسر عذابي واجد في اخر النفق معادي...يوما ما سيتوج صبري واجد مخلص امري وافوز بحب عمري ..يوما ما سأرى ثمار رضاك يا أمي واجني محصول يمني...يوما ما ستنار ظلمة حياتي وتنتهي كل آهاتي ..يوما ما..وذلك ال"ما" قريب هذا جزاء ربي فقد قال تعالى صبرا يا عبدي ..وداعا يا حظي العاثر ومرحبا بأمل خط طريقه إلي وثابر ..وداعا يا دمعا جارف ومرحبا بضحكات ثغر عازف ..
طريق الجنة الجزء الخامس والأخير
محتوى القصة
التنقل بين الأجزاء