قصة طريق الجنة

فين غاديا بينا يا دنيا وعلامن عوالة ..كلها وعندو حكايات وقصص بدالة ...كل انسان عندو سر مخبيه فشوالة ..كل واحد فينا عندو حلم كيتمنى يوصل ليه وحتى عقبة متعرقلو وتخليه ذلالة ..ولكن هيهات مع كل درجة كطيح وتنوض وتشوف حل للمسألة ..راجل ومرا عليهم زمان عوال بلا حزارا..كاين لي غراتو دنيا ومشى فطريق غرارة..وكاين لي عض فصبر حتى جاتو لبشارة..وطريق جنة نال وكسب رضاة رحمان المنان ...ولكل قصة مثل من القرآن ..لناس كانو فزمن مر والازمان ..

هما جنة ..هما قلب وهمة ..هما جزء منا ..هما دفئ ونعمة..هما صدق وكلمة ..هما رزق في دنيا..وجزاء في الاخرة ..باب مفتوح على مصرعيه للفوز بالجنة ..وطريق واسع سريع للنار والذلة..برهما امر الرحمان ..وعقرهما لا ينجيك من عذابه لا شيطان ولا جان ..هي الجنة تحت اقدامها وهو ملاذك في دنيا وسندك فالاخرة ..قال تعالى:

وَقَضَى رَبُّكَ أَلاَ تَعْبُدُوا إِلاِّ إِيَّاهُ وَ بِالْوَالِدَيْنِ إِحْسِانَا○ إَمَّا يَبْلُغَنِّ عِنْدَكَ الْكِبَرَ أَحَدُهُمَا أَوْ كِلَاهُمَا فَلاَ تَقُلْ لَهُمَا أُفٍ وَلاَ تَنْهَرْهُمَا وَ قُلْ لَهُمَا قَوْلاً كَرِيماً

كيف كيقولو ناس زمان ..الخير مرا وشر مرا ..وسيد الرجال هو الكلمة ومول الهمة ..وفهاد دنيا كيف كتلقى صالح تلقى طالح ..ونطلبو من ربي يخلينا فصوابنا ومايبان عيب نحاسنا لا لغاشي ولا لحباب ...فكل دار كاين مية حكاية ورواية شي فنفوس دامراه نوايا وشي عاين باين وما يحتاج روايا..بين ناس كثر لغى ولكلام و نقشو نحاس بذهب ونقرة وطين بلا علام ..فدار بحال اي دار عزري لعزارا نوا وبغى يكمل دينو وتقاضا ليه صبر وما بقى قادر ...تاكل وتوكل وقصد مولات دار لكبيرة لي بلا بيها ميقدم ولا يأخر ..شادة و لفادة فدار وبلا بيها ميتحرك لا طير ولا فار ..مرا كبيرة فسن دات وجابت مع زمان وفراسها شلا وشلالي من شوفة فيك تفهم اش باغي بلا متكتر معاك لكلام يا توفيلك مرادك يا ترجعك خالي .. من بعد ما خذا رضاها وباس يدها وجبينها وتهنا بلجلسة حداها..بقى يبلع فريقو ومعرف واش يبدا لكلام ولا يسكت ومايزمم حروف يجمع لوقفة ويغير لمكان ..شافت فيه وكملات تسبيحها ..

الحاجة يامنة :كثرت تخمام تهد صحة وتجيب لبلا لعظام ..بلا مطول وقصر لكلام ..تهني راسك وتخبرني اش جاك يا ولدي فهاد زمان ..

زكرياء بتوتر وحشمان:الله يا الحاجة ما كان لا كلام ولا والو غير جيت نشوف الا خصاك شي حاجة 

الحاجة يامنة :خاصني غير راحتك ورضى رحمان مايخطاني وما يخطاك.. بإذن الأحد المنان...

زكرياء جمع الوقفة حشمان: الحمد لله ..الحاجة نطلع نتكا شوية بيلما جا وقت لغذا ..

الحاجة يامنة:مناويش اليوم تنوض تقلب على رزقك 

زكرياء ابتاسم:ورزقي غيقلب عليا الحاجة ..ياكما شدك زهايمر .. هادي ماشي ديالك الحنانة 

الحاجة :سبحان لي ما يسهى ولا ينام ..اما انا غير عبد ضعيف عقلي مرة يدي ومرة يجيب..لا تحكرش اولد كرشي على لي غفل عليه راسي 

زكرياء باس راسها:الله يحفظك لينا ويطول عمرك ..راه خدام ليل هاد سيمانة ان شاء الله 

الحاجة:الله يعينك ويفتح عليك بيبان الخير ..ويبعد عليك ولاد لحرام شر الغير...ويرزقك لحلال و ينعم عليك بحور العين 

زكرياء :اميين اميمتي ..والله لا يخطي علينا رضاك ودعاويك 

خرج قاصد درج باغي يطلع لبيتو وهي يشوف ختو جارة ولدها فعمر سنتين كيتمشى وهازة صاك كبير فيدها غير شافتو سلمات عليها اما لقرد صغير تعلق فخالو لعزيز ومد يدو 

احمد:دولو ..طيني دولو 

عليا:وها نتا شوفلك طبيعة لخاسرة لي علمتيه ..حتا رجع محشمني مع كلشي 

زكرياء:ديها فراسك ..نعطي لحبيب خالو لي بغى (شاف فاحمد )قوليها حمارة نعطيك دورو 

احمد شاف فمو :مالا ..ماما مالا 

عليا غالباها ضحكة:اويلي كملتي زين لي بقى ..والله حتا حرام عليك ازاكي ..راه غيبقى يقولها لعيباد الله 

زكرياء:خليه يقول بعدا يفاجيها عليك من جيهت شي وحدين ..(شاف فساك) اش مصدرا تما ؟

عليا:مصدرا لماريجوانا ..نعتق خويا ولا نخليك مقطوع 

زكرياء تسيف عليها:شفتك ضسرتي لاا ..راه غنقطع لجدك الاحبال تنفسية 

عليا:اويلي مالك تقلبتي بحال الجو ..راه جبت معايا لغذا ..عصام عيطو ليه للخدمة وبقيت غير انا وهاد جن قلت نجي ونتغذاو جميع ..وعارفاك عزيز عليك طيابي 

زكرياء:تواضع زعمة عندك خذا ديبلوم ...سيري سلمي على الحاجة قبل متسخط عليك ..وانا واحد ساعة وفيقيني غنطلع نتكى شوية ..(طلع وغوت بجهد)عليا سااعة اختي ساااااعة سمعتي سااااعة 

عليا كتضحك:صافي اعزيزي 10 دقايق منفوتهاش ليك هههه

زكرياء:هي بغيتي ترجي لراجلك يلسقلك عظامك بسكوتش ..وغير على الله نشوفك درتي بساحتي قبل ساعة ونفرج ختي (كيغوت) وهااا ااناا علمتتتك....

طلع لبيتو اول حاجة دارها خذا دوش خفيف سمع ظهر كيأذن صلاه وقرا ما تيسر من القرآن ومشى يرتاح شوية يعوض نعاس ليل..بحكم هو بدا خدمتو فمستشفى كطبيب تخذيري ياله هادي سبع اشهر ملي بدا فيها ..زكرياء نجيب عمره 28 سنة شاب طويل وسمر من عائلة ميسورة والحمد لله يتيم الاب ملي كان فسن 14 سنة اخ لاخت واحدة عليا بنت فسن 23 سنة متزوجة وام لأحمد طفل ذو سنتين جمالها عادي عندها حقها من زين بنت بيضاء وعيونها كوحل متحجبة ..الحاجة يامنة مرا ونص ربات ولادها بعرق كتافها ممدات يدها لا غادي ولا لبادي وكيف كيقولك الله يرحم لقبر وما خلا المرحوم الحاج الحسين كان خذام فوقت الاستعمار مع نصارى تاجر مشى لفرنسا كيف بزاف من لمغاربة فداك الوقت خدم وردم وجمع علاش يرجع هو وولادو ومن بعد وفاتو بخلصت التقاعد ديالو وبالحصيصة لي كان جامع الحاجة يامنة شرات طاكسي كبير وخدمت فيها ولد ختها منها تستافد هي ومنها يسترزق بيها هو وزادت بنصيب لي بقى قادت دارها وكبرتها وخلات تحتاني خاوي غير محلات كرات واحد لنجار والاخر لميكانيك ديال طوموبيلات ودارت تاخذ نص بنص معاهم وهكذا ضمنات رزقها ورزق ولادها ..متحتاج تمد يدها ولا تخصص ولادها ..وهكذا رباتهم وزوجات لبنت ودبا بقالها زكرياء لي كان كل همو هو يقرا ويوصل يحقق الحلم ديالو وربي مخيبوش ...

عليا جالسة كتشكي وتبكي على الحاجة 

عليا:و ماما دبا انا اش درتلو لي يخاصم عليا ..قولت ليه غير شفت ختو شرات خاتم وبغيت حتا انا ...علاه ختو باش حسن بيا ..شوفلك راجلها كيف مصيغها من راسها حتى لرجليها ..جات عليا انا مالها باش حسن بيا 

الحاجة تنهدات وشافت فيها ميؤوسة من حالة بنتها:علاه اش خاصك نتي مع هاد الراجل مجوعك ..معريك..حاكر ومكرفص عليك ..خارج معاير وداخل مغنزر وميشوف فيك ..قاطع معاك لغى ولكلام ومايتبسم ما يخاشيه ليك 

عليا:ولا اا ما الحمد لله هو راه مخاصني معاه خير ..بصح اميمتي رجع زقرام لي نقولها ليه يقولي صبري ..واش شهر لي فات شريت غير كسوة وجلابة وبدلت بيت نعاس وقاديت غير بلاكار لكوزينة وجبت ليقامة نحاسية لصالة ..منين قلتلو نشري معاها ثرية وساعة نحاسية قالي صبري واحد شوية ..علاش غنصبر ياك كيضل خذام وشي مرات ليل ونهار فين كيمشيو دوك لفلوس ولا قوليلي كيخلي نصهم لمو 

حاجة يامنة حطت سبحتها وخزرات فيها:شفتي ابنت كرشي خفت الله فيك اما نسخط عليك ليوم دين وانا بيدي نطلقك من داك ولد الخير نستأجر فيه نهني بالو من شرك ..واش نتي هبلتي ولا خاصك لعقل ..هذا علاش ربيتك اااه (ليعاتها بقرسة بين لفخاض ) 

عليا كترغب وتزاوك:لاا اما عار الله ..اما لا ..طلقيني اما ..احح اما طلقي 

الحاجة يامنة طلقاتها كتستغفر: استغفر الله ..ولا حول ولا قوة الا بالله ...هذا علاش كنت نضل نوصي ونبات نحاجي ...تجي دبا تشرطي لراجلك فمو ..سمعي نقولك يعطي لمو يشريلها حقها وواجب عليه ونتي يا قليلة الاصل الا سهى تفكريه وتنجيه ..واش بغيتي ربي يغضب عليك وعليه ..وتاخذو سخطها من بعد ما عاشت تربيه وتكبر فيه حتى جيتي نتي ولقيتيه ..واجد وموجد مسخرلك خيرو بيه بلي فيه ..دبا معاجبك حال فلي كانت حيلة وسباب حتى لقيتيه ...وهو خيرو مدفق عليك ..موكلك مشربك كاسيك ومسارييك وممخليك تمدي يدك لا تحتاجي لعبد يجي يشريك ..حمدي الله على نعمة لي نتي فيها وتقاي الله فراجلك هو لي ليك ..بلاصت ما نتي تبكي حرو وتشوفي اش كيدير باش يعيشك نتي وولدو ..جالسة تنتفي فيه ومخليتيه يتوسد سنتيم لدواير زمان ..يجيك مرض ..ولا يصبك قدر الله باش غتكوني نتي وياه ..شكون يعقل عليك ديك ساعة ..واش نحاس وشراوط غينفعوك ..فكري يا بنت كرشي ونعلي شيطان يهديك الله ..وها ودني منك نسمعك مرة اخرى تقولي كلمة فحق عجوجتك ..هي ديريها مك لو ما كانت هي ميكون كاين راجلك ..لا تطغاي على مولاك وتقطعي الارحام ..راه ربي يقطع رحمتو عليك وما يشفع ليك 

دراسة واحلام ..واقع مر وآلام 

بين ثنايا الوطن وانظار بشر كالسقم 

احارب خالية الوفاض في العدم 

هتك اعراض وتنعيت باسوء الالفاظ..والذنب على من؟

نهب وطمع في الاملاك وتقليل بركة الارزاق ..والذنب على من ؟

علي ..وعليهم ..وعلينا ..باختصار ..عليك يا بني ادم ..

اين غير على الوطن ؟

اين صون الشرف والرحم؟

اين العفة والوقار والحشم ؟

اين صلة الارحام ..اين الخوف من الرحمان؟

اين ..واين..واين..اين نحن ؟

قطاع طرق ..وبنات الهوى ..حفلات وزينات..بلا خجل

ارى الدنيا منقلبات وارى الزمان يهوى بلا امل 

عصيان وتمرد ..ارتداد وشذوذ..وصار المحرم مباح بعجل

واقفة مع صحاباتها كيستناو يسمعو سمياتهم من الحراسة باش يشدو الكارطونة لي قرات 12 سنة باش تشدها ..كارطونة الباك....عيط الحراسة بسميتها وهي لخلعة مع لفرحة مشطحاها ...واخيرا ها هي بين يديها شهادة الباكالوريا سلك اداب علوم انسانية ..خذاتها بمقبول ..ولكن ميهمش مهم خذاتها وسكتات لفام عليها وعلى مها ..لي ملي يشوفوها وهما شفنا بنتك ..درنا لبنتك ..بنت دارت ..بنتك فعلت .. بنتك ..بنتك..هذا حال اغلبية لبنات لي فمجتمعنا ..تكون داخلة سوق راسها بهدرتهم يخليوها تحط فشلوقها فطبسيل وتعرضو على لغادي والجاي باش تتهنى من لباطل لي كيحطوه عليها ...شي حاضي شي عليها حتا واحد فينا مطفرو.. خذات شهادتها فرحانة بيها و دازت للمقاطعة باش تكَاليزي اخر ورقة فلابورص رجعاتها ليسي باش يدفعوها ليها ..هذا حال لمكحطين ديال شعب املهم فالجامعة كبير ولابورص بنسبة ليهم جنة

سماح:دبا غنقراو فالجامعة ..حنا نحجنا يا حليلي ..شفتي قلت ليك ديري نية وربي عمرو يخيبك

لبنت:يا ختي مزال متيقت واش فايقة ولا كنحلم ..والله الا نجحنا ..احح على لفاك وتيتيز ..نحن قادمون 

سماح:الله يمسخك ناس فرحانة تهنات من ورقة دخول ونتي فرحانة لتيتيز 

البنت:اش عرفك نتي اش..انا اي تيتيز كنشوفو كنخلي عندو طرف من قلبي ..خايفة غير تسلا ليا قبل منشد الجائزة الكبرى لي هي جوجي قرة عيني ومقلش فشلوقي سفالة حلال ديالي ..(تنهدات)..شفتي تيتيز نعمة حرام نضيعو نعمة ربي ..نمشيو لجهنم ..ولا قوليلي انا اش عرفني اما نتي جالسة كتهدري مع داك تيتيز ..احح اقلبي شنو كان سميتو ...

سماح تنهدات: على انا بزهري لمكوز عرفت سميتو بعدا..مسمياه غير شاب المجهول ...ناري كاع ما بغا يتنازل ويقولي سميتو ..

البنت:شكون بحال درناها ضحك صدقات زعاقة مقشبين على نماري فنص ليل حتى طحنا فتيتيز ..

سماح:ههه ناري باش فكرتيني ديك ليلة مننساهاش ..مسكين غنكونو نجحنا غير بدعوتو 

البنت:وا سيد كان فايق يصلي لفجر وحنا درنا فيه خير فيقناه قبل يدير ركعات قيام ليل 🤣

سماح:لفجر صليتيه نتي بعدا ..تاخذي الاجر معاه هو 

البنت:الالة صلي غير نتي لي مؤمنة ..انا مستشارة فرعون مني للبرمة ..غنشد ليك بلاصة حدايا نتوانسو متأكدة لباراج غيشدك فباب جنة

سماح شافت ساعة:الله يمسخك يا فتيلة جهنم ...(شافت ساعة) ويلي ويلي خليت جدة بوحدها ..تعطلت 

البنت:وقوليلي بعدا مزال كتهدري معاه 

سماح:راه مرة مرة كيسيفطلي فالواتس ...فخبارك كيقرا فكلية طب ..

البنت:هكوا على عيساوا ..سيد دماغ ..اححح دكتور مالي العين قالي خبر مو زين ..ستيك ستيك..باسي ليه ومعني ليه تتلاقاو

سماح: ينعل اصل طواسل فواصل جد ابو عم اخ شيطان لي لوز ترمتو هنا ..قالك نتلاقاو فين كنعرفو اويلي نتي تسطيتي مافيهاش الا بقيت متبعاك اخيرتي نرجع فركة لميمتي 

البنت:اللهم فركنا في الحلال ...ومالها لفركة سعداتها شابعة حلوة

سماح:سعداتها اختي محسدتهاش ... مهم انا مشيت حمار شركة (كتشير بيدها)هاهواك فين كيتزعزع علينا...

..خذات طوبيس وصلات لدارهم حطات شهادتها تحت كسوتها..هذاك مآلها لي معندو والي ومعندوش باك صاحبي ... لقات جداها فين خلاتها فكروستها بحكم عندها هشاشة العظام ..فرحاتها معاها وبفرحتها مسكينة عنقاتها كتبوس فيها وتزغرت ولا نقولو كتغوت .وبدات توجد لغذا قطعات بطاطا فريت ودارت سلاطة بصلة وماطيشة ..كلات هي وجداها وخلات لمها فطبسيل غطاتو بسربيتة(زيف)...

شوية وهي تسمع دق لقات لي ما يتسمى خالها مكيتسرطش ليها ..جا باش ياخذ جداها وما عاجبو حال نفخة على والو ..منين جا مخرجها وقف عند لباب كيشوف فدار باشمئزاز..

الخال:قولي لمك مرة اخرى منين توحش مها تجي تشوفها فجردة حدا دار ..متجيبهاش لهنا شي نهار تردم عليها دار 

سماح تقرصات ومن فمها سم خرجات:دار داركم ..تربيتو وكبرتو فيها ..والحيطان لو كان كانو غيطيحو لو كان طاحو زمان منين كنتي عايش فيها ..ولا كاع لي بنا وعلا رجع يشوف دار خربة وخلا...الحمد لله ساترانا والله يرحم لقبر وما خلا ....

خنزر فيها وخرج كينكَر ويسب سدات لباب وبقات كتشوف فدار ودور عينيها حيوط وجدران مهترأة.. وشقوق فيها من سقف حتى لنص لحيط وسريفة ديال سقف باين فيها لحديد ونصف من سقف طايح وباينة فيهم بقع لميديتي كوحل اما الارض نص لموزايكَ فيها مشقوق ومكَلع

جلسات مع راسها كتتغبن كاع عائلتهم ناكرينهم حيتاش معندهمش كيحشمو بيهم ولا يعيطو ليها لمها غير منين يبغيو يخملو ديورهم يمشيو يشقاو عليهم يعطيوهم شياطة عليهم ويعرضوهم سلامة ولكن حامدة الله ..جالسة حاطة يدها هلى وسادة وهي ترجع بذاكرتها لقصة من القصص لي كتستهواهم ..قصص من وحي القرآن ..كان وقع فزمن من الازمان الماضية بطريقة اخرى :

▶️كان يا ما كان في عهد الرسل والانبياء خير الأنام ..وقصتنا ضربها الله عز وجل عبرة لآل قريش وكفرهم به و بخير الخلق الرسول الكريم محمد عليه صلاة وسلام ...مع ان الله تعالى انعم عليهم بشتى النعم واغذقهم بخيراته من مأكل وملبس ومشرب يكفي ان ماء زمزم منفرج لديهم وهم القاطنين بالارض المباركة ..مكة .. امنهم من خوف عز وجل واطعمهم من جوع ..ومع ذلك لم يشكرو نعم الله ولم يصرفو العبادة له ولهذا يقول عز وجل "إِنَّ بَلَوْنَاهُمْ" بلونا ال قريش كما بلونا أصحاب الجنة..اصحاب الجنة هم اصحاب ارض مباركة جعلها الله جنة على الارض بانعامها ولم يخلق من قبلها من خيرات كما خلق فيها ..كانت تجمع كل فاكهة وخضر وجل ما يشتهيه المرء ويمر منها نهر عذب يسقي الاراضي ومشرب لاهلها وكان صاحبها كهلا صالحا حامدا الله على نعمته جعلها في متناول كل فقير لم يمنع عنها احد .. كان يأخذ قوته السنوي منها ويترك الباقي في تصرف اهل القرية ..بمعنى اخر كانت جنته الفانية على الارض التي يشتري بيها جنة الخلود في سماء ..وللكهل ابناء كانو يحاولون ان يمنعوه من التصدق ويعكسو صدقة لتجارة ولكن لم يطاوعهم يوما الا ان مات ..وصارة الجنة لهم وجاء يوم الحصاد وكالعادة في كل موسم حصاد يتوافد اهل القرية ليأخذو نصيبهم من خيراتها وفي ليلة قبلها تجمعو الاخوة واتفقو على ان يحصدو قبل مجيئهم 

قال اولهم:والدنا كان احمق كيف يسمح بكل هذه الخيرات ان تذهب للفقراء هكذا ..

نبههم اوسطهم:ما بالكم تجحذون بنعمة الله ..انكم قد جئتم شيئا نكرا

فتفقو اخوتهم عليه حتا اضلوه معهم ..فاقسمو على ان يصرمنها مصبحين..ولا يستثنون ولا يصبحون.. لا يستثنون بمعنى لا يتركو اي مسكين ياخذ ولو بذرة واحدة ..ولا يصبحون اي عند اخر خيط ليل يذهبو ليجنو ثمرها 

..قال تعالى"}لا يَدْخُلَنَّهَا الْيَوْمَ عَلَيْكُمْ مِسْكِينٌ{

فمكرو ومكر الله لهم ان ارسل عليهم عذابا وهم في غفلة من امرهم نائمون يحلمون بزهد الغد فارسل عليهم طائف من عنده سبحانه وتعالى..قيل موجة صقيع وقيل نار حارقة احرقة الجنة فجعلتها صعيدا زلقا ..فاصبحت خالية ..كالصريم تلف كل شيء صارة خرابا ..استيقضو فرحين على امل ان يحصدو كل ثمرة ويجنون المال الوفير وعندما يأتي الفقراء يردوهم خالي الوفاض ويمنعونهم من دخولها ولكن لم يرجع احد خائب غيرهم صدمو بما ترى اعينهم الى درجة ان احدهم قال :

-لقد ضللنا طريقنا ..ماهذه جنتنا ..

فالتفتو ببصرهم على اعقابهم فإذا هم يجدوها هي

قال اوسطهم الذي كان يمنعهم:بلا تالله انها هي ..آلم انبهكم ..آلم امنعكم ...فتكبرتم وطغيتم ..ها نحن ذا نبكي على اطلالها ..خبث نوايانا اخذ زادها وصرنا نحوم حول بلائها ..البارحة تكبرنا بثمرها على الفقراء واليوم قد اذلنا الرازق الاحد وصرنا نحن الفقراء ..

فعلمو ان الله قد ارسل عليهم عذابه وحرمهم من كرمه كما ادمرو في نياتهم على حرمان الفقراء والمساكين منها ..

فقال احدهم:ان لضالون...

الحاصول العبرة من هاد القصة انو شحال ما كان عندك متتكبرش على لي قل منك يقدر ربي بين ليلة ونهار يرجعك لا ربح ولا راس المال ..وشحال ما قدرت يا فاعل الخير تنفق على عباد الرحمان متبخلش عليهم وربي عمرو يخليك تنخص ولا تمد يديك لحد ..وديما خلي فبالك بلي رزاق هو الله واي حد من غيرو مينفعك بوالو 

⏯

وهي ساهية فافكارها دخلات مها تغذات و خبراتها اش قال خوها بقا فيها الحال بصح كتماتها فسرها ...دازو ايام وايام فات صيف وجا اول عام فلافاك ..دارت ادب انجليزي بحكم كانت عندها مع لغة ولكن يا حسرتاه فلوسها قلال الا شرات بوليكوب واحد كيخصها تجلس بلا غذا سيمانة ويعذيو بالخبز واتاي من بعدها فدار .. شافت حتا عيات ومن لقرايا جلسات وفشقى غرقات ..تصبين وتخمال وتسياق ولكوزينة شمرات على ذرعانها ودخلات .. جالسة شادة صريف فيدها وكتخمم ..

سماح: 2 دراهم نجيب بيها الخبز و3 دراهم نجيبها بوكاسي(جلبانة يابسة) ويبقالي درهم نجيب كنورة ..ونخلي 4 دراهم لغذا ...(غلباتها لبكية) رحمتك يا ربي ..الحمد لله على كل حال ..(صونالها تيليفون كانت مها) وي ماما 

فاطمة:كيف صبحتي ابنتي؟

سماح:الحمد لله ونتي مزيانة ..علاش مفيقتينيش قبل ما تمشي للخدمة 

فاطمة:الحمد لله ابنتي ..خليتك تنعسي شوية واش غير انا نزض بكري نهجرو ليك معايا ..راه خليت ليك 10دراهم باش تقضي اليوم 

سماح:لقيتها اماما الله يخلف عليك ويرزقك من حلالو ان شاء الله ويفتح فوجهنا بإذن الله 

فاطمة:هي لي كانت عندي ..انقول لمول شيء يعطيني واحد 50 درهم ويقطعها ليا فراس شهر نشدو بيها يدينا هاد الايام 

سماح:كيف بغيتي العزيزة ...انا راه خملت دار وسيقت بقالي غير لغذا قلت ندير لبيصارة زوينة فهاد البرد ..ومن بعد لغذا غنمشي عند واحد صاحبتي قاتلي بلي شي مدرسة بريفي باغيين معلمة لدراري صغار

فاطمة بفرحة:الله يحن عليك امرضيت مك ويقيد ليك خبيزتك وميرجعكش خايبة وهاد لخديمة تكون ليك ان شاء الله

سماح:امين اماما امين ..

فاطمة:انا نمشي نكمل راه دخلولي لماعن نغسلهم ..ليوم لقهوة عامرة ..بصح غنجي مع 2 

سماح :صافي غنستانك حتا نتغذا انا وياك ..الله يعينك وتهلاي فراسك 

قطعات مع مها وخرجات لحانوت جابت تقضيتها ودارتها طيب وجلسات كتقرا قصص بدارجة ...

.. هادي سماح العامري 21 سنة بنت بيضاء عندها حقها مزين عينيها قهويين كبار متحجبة عايشة غير هي ومها اما واحد باها معرفت طريق ليه من نهار طلق هو مها هادي 10 سنين ..هذا هو حالها شقى فدار وتقلاب على خدمة منهار خذات لباك وقرات عام واحد فلافاك مقدرتش على مصاريفها ولابورس لي كانت تشدها كتعطيها لمها يعاونو بيها فالماء وضوء والمصروف حبسات لقرايا فداك العام وجلسات تشقى فدار وتقلب على رزقها..ربي هناهم من لكريا سكنو فدار الورثة لجدها باين مها ..وخا سكنة فحي خايب ودار حالتها ولكن حسن من زنقة ولا هم لكريا كل شهر ..مقاتلين مع زمان كل نهار ونهارو مها فاطمة مرة فالخمسينيات خدامة فقهوة كتغسل لماعن الحمد لله خدمة شريفة ومتمد يدها لحد ومايمن عليها حد لقاو ياكلو ملقاوش ينعسو ويسدو بابهم ..كيقولك جوعي فكرشي وعنايتي فوق راسي متنذل لحد وربي عمرو يفرط فعبادو رزقك يجيك يجيك .."ولا تقنطو من رحمة الله"..وخا فزمانا لمرأة لمطلقة عيون لبشار عليها وكيشوفو فيها رمز للفساد بلا موجب شرع ..مخلاو منعتو فيهم ولكن هما موكلين الواحد الاحد وحسبيا الله فاي واحد نعت فعرض وحدة شريفة ..وحتا لي كتخرج تفسد راه ماشي كلشي خارج ليها زهو ونشاط كاين لي عيات وملقات غير ديك الطريق الله يهدي كل واحد ..ذياب لبلاد كتار الله يسمح ليهم ميخليوكش تتهنى فحياتك وميتهناو حتى يغرقوك وسط لحرام وديك ساعة يبعدو يتفرجو فيك وينهشو فيك وفلحمك بلا رحمة ولا شفقة..ويقولك حقا ما حقا بنت زنقة وموسخة لو كان كانت بنت الاصل متنحارفش ..على اساس الاخوان مخليين لي تشد طريق الله وهما حتا لمحجبات ولمنقبات يتززلو عليهم فدروبة ..وخا تكوني خشبة مسطحة كيشوفوك غير ديك ثقبة لي بين رجليك الباقي ميهمش 😒..جلسات سماح عاصرة على قصة ضحكو كتضح بكاو كتلقاها سبة وقلبها طايب تبكي حتى تشبع وتسكت ..جات مها وتغذاو وناضت لبسات عليها عبائة فالاسود ودارت شال بيج وخرجات كتتمشى قصدات لبلاصة فين دايرة مع البنت لي كتعرف ..لقاتها ياله وصلات سلمات عليها ودخلو عرفاتها على المسؤولة وشرحات ليها وضع الخدمة وسيستام لي غاديين عليه تما و علماتها بصالير لقاتو مناسب ليها وحتى اوقات العمل زوينة وهي عاد تتشرط حمدت الله لي تقبل دعاها ودعاء ميمتها وجاب ليها هاد الخذمة بعدا تعاوين هي ومها زوج يدين حسن من يد وحدة ..تافقت معاها وعلمتها تبدا من الغد ليه ..ملي خرجت وهي تبوس فصاحبتها وتشكر فيها صونات لمها وعلماتها بالفرحة بكات..مشات مع صاحبتها لواحد جردة قريبة من حومتهم جالسين فيها غير هما وشي عشاق مفرتكين تما كلا وشاد وحدة فقنت تقولي غير روميو زمانو وهو تمشي تنفضيه تلقاي تحتو 5 دراهم شقفة جايبها معاه يخلص على موناليزا لي معاه 2 دراهم زريعة 

وفاء:شوفيلك يا ختي الحب طاير مكان غير الفحص تقني لقنانف ودير سكانير شامل لمناطق التغذية

سماح ضحكات لتشبيه:وختي راهم خريجي المعهد العالي لطب تقح** وتز** بامتياز ..قلبي دورة ياختي ما فيا لي يتشاد مع حد 

وفاء:وا ختي لي ما بغا يكون فراجة لعيباد الله يستر روحو ولا يكري برتوش يتبرتش فيه زي ما هو عايز ..وعلى قولت المثل يا حبيبتشي...لي ما شرا يتنزه وانا ناقصة حنان وبنان وكيوي ..خليني نتعلم ونستافد ياخذو فيا اجر 

سماح:الله يمسخك ..اويلي على تتعلمي على نتي لقيتي معامن طبقي 

وفاء تنهدات وحطات يدها على خذها جبدات تيليفونها كتقلب فتصاور :احححح اقلبي نهار ومطال وانا نشفر تصاور بين الانستا و ابطال القصص ومن الفايس ها لسمر ها لشقر ها لحكل ها رومنسي ها العصبي ها لي ميلونج ..وانا قلبي شاد لفيدونج ها دلالي ...كله من فضل ربي 

سماح شافت فيها بنص عين:الله ياختي كتقطعي فالقلب ..بقاي متبعاهم هما ودوك ابطال القصص بربي حتا تجلسي حدا مك ضفري شيب سبولة سبولة ..وديك ساعة قضي بحريق نبولة 

وفاء:ينعل اصل جد خال ولد عم الحاج ترامب ...نتي لي يسمعك يقول الاخت معتاكفة عند باب مكة ونتي ناقصة حنان قريب منلقاك مفرقة رجليك فوق عمود شطابة ..تاخذي منها العلم والفائدة...

سماح:تفووو الله يقلل حياك اويلي مقولتي خيار ما قولتي خيزو ..اضعف الإيمان قولي دلاك ..ماشي عمود فيه ميط ..مالي عندي كاف عين صفا 

وفاء:ايوا الله ينعل اصل حس شيطان لي حطك عندي هنا وعلاش من صباح ونتي كتقراي عليا زابور وتورات ودايرالي فيها حجابي عفتي وخرقتي سرو حشمتي 

سماح:وخليني من هاد شي وسيريلي للموفيد 

وفاء:موفيد راه فالحانوت ..عندي غير كوليمو الا بغيتي 

سماح:يا خفت دم شيطانك يا اختي ..وقوليلي عرفتي شكون داك الولد ..راه كنحس براسي تخنقت وانا قاطعة معاه لكلام مبقاش كيجاوبني يمكن بلوكاني رجعو ميساجاتي كاع مكيوصلوه ..كتبقالي غير ديط شرطة كتشطح لعلوة تما.. 

وفاء كتندب:اويلي على غدايدي واش بغيتيني ننتف لي تحتي بفقصتك ...مزال كتفكري فيه ..غير متقوليليش راني نبغيه وقلبي دق وريتي تفرقعات ومرارتي فيبرات وترمتي صونات 

سماح مطات شفايفها:اش ندير راه عقليتو زوينة وانا كنرتاح منين نهدر معاه ..وعمري هدرت مع شي ولد هو اول واحد...(شافت فيها معفرة) وزايدون نتي لي حصلتيني هاد الحصلة ياك نتي لي قولتيلي نجربو نماري على ربي حتا طحنا فيه ..ودبا قلبيلي عليه ما سوقيش ..اهاا

وفاء ضربت جبهتها بيأس:ينعل نهار لي فكرة نهدر فتيليفونك...اويلي على نقلبلك عليه ..قالولك راه عندي عفريت غير نقولو احضره الآن غادي يحضر ..كتعرفي سميتو ..لا...كنيتو ..لا ..حومتو ..لاا...فين يقرا 

سماح بكل افتخار جاوبتها:ااه كنعرف ..كلية طب عامو الاخر غياخذ ذكتوراه 

وفاء كطنز:اووه يا إلاهي ..تعال يا غلام...اعطيها مليار ...عطيها مليار هاز لعلام ..عطيها مليار عقل على الله ينفعوها ..واش عارفة كلية طب ولا هابطة من جبل عقل افرفر ..فين غنلقاوه فوسط داك حشد اليهود ..نتي حتا تصويرتو ما عندك ..حتا وجهو شايفة فيه غير نص وبالبخاسات (نظارات) عاد ..فين لحقتي تبغيه ولا يبغيك ..بغيت يبغيك عفريت ونتهنا..

سماح:علاش كتزيدي عليا ..واش نتي صاحبتي ولا عدوتي ..نتي وزمان كتخورو فيا بالمعقول 

وفاء:اللهم طولك يا روح..دبا على ما كتعاودي ليا هو عمرو قالك حتا نتلاقاو ..وعمرو قالك حتا شي كلمة خارج نطاق الاحترام ولا تبسل عليك وهدرتو عادية مافيها حتا حاجة لي تخليك تبغيه 

سماح وقفات:عرفتي شنو غنمشي نقوي عظلاتي من هنا ..انا في همو ندادي وهو يقلع فوتادي جيت نخفف عندك صدقت راجعة مثقلة كتر 

جبداتها وفاء جلساتها:حطي ترمتك تتبرد مع لكص..قالك ثقلت عليك ..واش حماقيتي كتبغي واحد مكتعرفي منو غير صوتو ونمرتو لي بلوكاك منها 

سماح:اش ندير هذا ما طحنتلي رحا 

وفاء:وسيري لديك رحا طحني قلبك معاها وهنيني يا ختي..ولا نقولك خلي قلبك لي جاي من بعدو ..وديها فعقلك حطيه فخدمتك دبا ودوك جبال ديال لمصايب لي مزوجين بيك ..يا ختي ما عندك نفس بااز ..كاع دوك المشاكل لي عندك وزايدة لروحك وجع القلب ..

سماح:الحمد لله على كل حال ..دبا قوليلي الخلاصة اش ندير 

وفاء:شدي قلبك شويه ودردري عليه مليحة وكويمينة وخشي لمعدتك فرحيها بريحة تشنشيط لي مكنشموها غير من لعيد لكبير لخوه ..ولا عند جلطي مول لكيوسك بديك شحمة لي داير بيها لبوز فسونطر 

سماح:ههههه بعدا هو دار لفايدة كيتنا حنا ملقيناش ديك شحمة ندوزوها حتى على نيوفنا غير بركة ..نوض نمشي راني تعطلت

وفاء وقفات عنقاتها:مبروك عليك لخدمة يا مصيبتي

سماح زيرات عليها:عمري ننسا خيرك نتي ختي ماشي صاحبتي .....وهي فطريقها راحعة لدارهم كتشوف لبنات مع دراري شي معنق شي عادي والولد يقدر يتمادى مع لبنت وهي كتضحك ليه كأنه مرحبة بداك القرب ..جات فبالها قصة من اروع ما سمعت واستافدات منها بزااف ..كتبين خطوات شيطان وكيفاش كيزين للانسان الفاحشة ويفتنو وهو كاع محاسش ولكن فالاخير كيغرقو فالرذيلة ويستبرأ منو...

▶️اليوم قصتنا غنهدرو فيها على احد العابدين ..عابد اسمه "برصيصا"..

يحكى ان ..في زمن من الازمان قبل الان ..بمليارات السنين والاعوام ..في بلاد اسرائيل ..وكما نعلم ان اغلب الانبياء والرسل كانو من قبيلة يعقوب عليه سلام "اسرائيل" ..كان هناك عابدا تقيا عبد الله لمدة سبعين سنة كان اسمه برصيصا ..كان قد اعتزل الدنيا ..راهب لا يتزوج النساء.. حياته كرسها لصلاة وعبادة الله معتكف طوال الوقت وحيدا في صومعته.. في يوم ارادو اخوة ان يذهبو للحرب هناك من يقولو ان والدهم كان ملكا وقد تولى عمهم الملك من بعده والله اعلم..كانت لهم اخت واحتارو من يأمنوه عليها ويتكفل بها اثناء غيابهم..فتشاورو ولم يجدو غير العابد تقي الذي..ذهبو اليه وتقدمو بطلبهم فرفض بحجة انه ليس برجل فارغ فهو جل وقته معتكف في صومعته يصلي ويعبد ربه كيف له ان يتكفل بتلك الآمة...حاولو معه الى ان اقنعوه انهم يريدون عبادة الله والجهاد في سبيل الله عبادة .. اقنعوه ايضا انهم سيبنون لها ملحق صغير لصومعته ويتركون مؤونة وزادا لها عنده وما عليه الا ان يتفقدها وقت الاكل بدون حتى ان يتكلم معها او يراها كل ما عليه هو ان يضع لها الاكل ويطرق الباب ويذهب لحال سبيله ..وافق وجهزو الاخوة رحالهم وتركو اختهم بين ايدي العابد الامينة ..

كانت شياطين منذ زمن تحاول ان تبلغ ببطشها هذا العابد وترده عن عبادته وصلاته وتجعله من الظالمين ولكن لم يقدرو عليه اعوان الشيطان من المردة والعفاريت على اغوائه طيلة السبعين عاما ..حتا ان ابليس طفح منه الكيل كيف لم يقدرو عليه ..وكما اخبرنا نبينا الكريم محمد صلى الله عليه وسلم ان عرش ابليس على الماء ..لا احد يعلم بأي بحر او نهر او واد هو ..كما جرت العادة ابليس يجمع جنوده ويرسلهم لبني ادم فيحاولون اغوائه فلان يصلي يحاولون منعه عن صلاته ..فلان يصوم يحاولون ان يصدوه عن صيامه ..فلان مسلم يحاولون إلحاده ..واعظم ما يفرح له ابليس هو عندما يطلق شياطينه المرء عن زوجه ..لانه يعلم ان في الترابط الاسري قوة ..وبالتربية الحسنة يبنى صرح منيع للمسلم....

جمع ابليس اعوانه : وسألهم من يستطيع منكم على هذا العابد ؟

قالو: حاولنا طيلة السبعين عاما ولم نقدر عليه 

فجاءه شيطانا وكان يسمى بالشيطان الابيض معروف عليه انه كان يتصدى للانبياء والمرسلين 

قال شيطان الابيض:انا لي به قدرة..

قال ابليس:لك هذا ..اذهب اليه 

فأتاه شيطان وبدأ بخطواته وكل خطوة تأتي بزمن بعيد من اخرى ..صبر الشيطان طويل ونفسه اطول ويتأنى في خططه الى ان يبلغها ....كان العابد يفعل كما اوصاه الإخوة يذهب بالاكل ويطرق الباب ثم يرجع ادراجه لصومعته ..الى ان جاءه شيطان الابيض قائلا :

-يا برصيصا يا ايها العابد ...الإخوة استأمنوك آمتهم وانت لا تعلم حتا اذ هي حية او مريضة او بها شيء ..تكلم معها من وراء الحجاب فقط لتطمإن عليها..وادعها الى الله ولك اجر

حاول برصيصا ان يتغلب على وسوسة الشيطان لكنه لم يدري الى ان وجد نفسه يحادثها من وراء الحجاب ويطمئن..وعتاد على محادثتها كل يوم ..وهذا حالنا نحن البشر اذ تعودنا على محادثة شخص صار ادمانا لنا نجهل عواقبه

ثم مضى وقت وجاء وقت الخطوة الموالية ولا يزال الشيطان في تأن بخطواته ورجع اليه شيطانه قائلا:

-يا برصيصا ..يا ايها العابد ..ما ادراك انها بخير وانت لم ترها ..كيف تطمإن لصوتها فقط ..اطلب منها ان تفتح الباب وانظر اليها وتأكد انها بخير ..انها امانة اخوتها على رقبتك...

بعد ان كان يحضر الطعام ويذهب صار يتحدث من خلف الحجاب والآن زال الحجاب ورآها ..اعتاد على محادثتها ورأيتها ...

كما في واقعنا نتحدث على مواقع التواصل الاجتماعي ونضن ان لا بأس مجرد حديث صداقة عفوية تصرفات بريئة لكن كله من مكر الشيطان..ثم اذ استطعنا نلتقي ولا بأس مجرد فنجان قهوة وحديث عابر شيق .مجرد فضفضات وضحكات اما جمع جماهير ..امر عاد نحن لسنا وحدنا ليس هناك خلوة اذا ليس هناك محضور ...وكله من تزيين شيطان لنا....

حتى جاءه شيطان من جديد..وجاء بخطوته الموالية ..صبرا يا بني ادم فشيطان ابدا لن يقول لك اكفر بالله وقع في المعصية بل يجذبك على مهل حتى تجد نفسك غارقا في ما لا يحمد عقباه...

-يا أيها العابد ..لو رآك الناس واقفا عند بابها سيبدأون بالحديث وانت رجل ثقي تخاف الله لن تفعل بها سوء..ادخل عندها وتحدثا لن يراك احد ...

طاوع برصيصا ما زين له شيطان ودخل اليها وبعد مدة صار ما لم يكن في الحسبان بدأ يتقرب اليها وبعدها يلمسها وزنى اليدين اللمس..ثم يقبلها وزنى الفم القبل ...الى ان اخذتهما الفاحشة و زنى بها ..تركها في مقامها ورجع الى صومعته حزينا يبكي ويناجي ربه ان يغفر له ..لم يعد يراها بعد ذلك فقط يحضر لها طعاما ويطرق ثم يرجع طريقه..مرّ وقت وخاف ان يكون بها سوء فرأها حتى صدمته بأنها حامل ..مضت شهور ووضعت حملها وبرصيصا خائف من ان يعلم الناس وإخوتها ويفضح ..فوسوس له الشيطان:

-ان خذ ابنها واقتله وهكذا لن يعلم احد ولن يصدقها احد اذ فتنة بك ..

طاوع برصيصا شيطانه وسلبها ابنها اخذه الى الصحراء فقتله وذفنه ..ثم رجع الى صومعته واذ هم به شيطان مرة اخرى 

-يا احمق او تضن ان امه ستكتم الامر ..سوف تفضحك وتقول على ما اصابها ..اقتلها ولن يدري احد ..واذ رجع اخوتها قل لهم مرضت وماتت ..

وكذلك فعل ذبحها في بيتها وذفنها مع ابنها في صحراء ..وما جزاء من قتل نفسا بغير حق سوى نار جهنم الحارقة ..ضن انه نجا..بعد ان عصى ربه واذنب ذنبين عظيمين..الزنى والقتل مرتين..بعد حين رجع اخوتها ولم يجدو اختهم في بيتها فقصدو العابد ..فقال لهم :

-لقد مرضت وماتت حاول تطبيبها ولكن اجلها قد وفى وتوفتها المنية

حزنو حزنا شديدا شكروه واكرموه ثم قصد كل واحد بيته غارق في همه ويشعرون بذب اختهم على رقابهم ..جاء ليلهم واخذهم نومهم واتاهم الشيطان في منامهم وصور لهم كل ما حدث مع كليلتهم وبرصيصا العابد 

_اختكم ما ماتت ..بل زنى بها وقتلها هي وجنينها وذفنهنا في صحراء

..في صباحهم اجتمع الاخوة حتى نطق اصغرهم:

_لقد رأيت حلما حز في نفسي ..رأيت اختي في منامي ...

وقال الاوسط والاكبر:وانا بالمثل ..فقص كل منهم ما رأى ودخلهم شك رهيب ..فاتفقو ان يذهبو الى المكان بصحراء ..حملو رحالهم وقصدوه ..نبشوه وحفروه فإذا بهم يجدون جثة اختهم والجنين ..انقلبو الى العابد واسرعو اليه جروه من قلب صومعته وهدموها سمع ناس وسارعو اليهم سمعو ما حدث فانقلبو عليهم ضربوه وصلبوه وعلى اعدامه عزمو وحضروه ..اتاه شيطان وهو مصلوب خائف من الموت ..

-يا برصيصا انا صاحبك وانا من حرضتك على فعلتك ..فإن اردتك انقذك مما اغرقتك فيه 

استغل شيطان خوف برصيصا من الموت وكأي غريق يحاول ان ينقذ نفسه بقشة 

-برصيصا:ونا انت بفاعل ؟

الشيطان الابيض:انقذك يا عابد ولكن بشرط واحد 

برصيصا:ما هو ؟

الشيطان الابيض:اسجد لي 

برصيصا:لا اقدر ..لا اسجد لغير الله 

الشيطان الابيض:سجدة واحدة لا غير انقذك وترجع لتتعبد ربك 

برصيصا بعد ان تردد وهم به ناس ان يردوه قتيلا سجد برصيصا لشيطان وقتله الناس وغذر به شيطان ..ومات العابد كافرا ...بعد ان كان عابدا مخلصا لربه زلة واحدة اخذته لزلات كثيرة واعظمها ان اتبع الشيطان وشك في رحمة الله لو انه استعان بخالقه واستغفره لكان ارحم به ونجاه ..

عبرتنا ان لا نتوكل على غير الله..وان نبتعد عن المحرمات وشبهات..فالحرام بين والحلال بين الا من اراد ان يعصي ربه فيجد اعذارا واهنة يزين بها طريق معصيته ... فمن استغفر وثاب فالله الواحد الاحد هو المستعان ورحمته بنا لن نجدها في غيره ابدا واما من طغى واستكبر فالله متوعده بنار الحريق...⏯...

كيقولو قلت شي كترشي ومكذبوش فبلادنا شحال ما عندك شحال ما كتسوى وناس يعطيوك قيمة...الله لا يحوج اي مسلم ..رجعات لدارهم غير كتضحك ودور دور وتبوس فمها ومها حاضنة عليها وتدعي معاها ... دازت اربع اشهر ديال تدريب خذات فيهم غير نص لخلصة فشهر وغير دارت معاها المديرة المزيانة تحسن وضعهم شويتت بقات كتقدر مرة مرة منين تكون شتا كتصب تشد طوبيس وترجع ومرة مرة دوز لباتيسري تاخذ ميلفوي ليها ولماماها يديرو بيه الكوتي ..دازت 3 سنين بطولهم وهي خذامة تيسر امرها فالخدمة والمديرة عاجبها حالها واسلوبها مع الاطفال واولياء الامور جلهم راضيين عليها حيتاش اعتامدات اسلوب خاص فتربيتهم وتكوينهم ..قدرات تحفضهم بعض من اجزاء القرآن ومنهم سور لي طوال ونوعت ليهم فالاحاديث نبوية من الاربعين نووية..وخصصات حصة فالاسبوع كتحكي ليهم على صحابة الكرام وصحابيات رضوان الله عليهم ..كانت باغية تحببهم فدين ومنها تعلمهم هي اش استافدات من البرامج لي كتسمع وتكسر ليهم روتين الممل ديال دراسة وتخليهم يطول عليهم الوقت غير فوقاش تجي حصتها ويستانسو معاها..

..كانت كتشوف فدوك لولاد ولادها عزازين عليها واكثر فترة كانت كتكرها هي العطلة حيتاش كتتوحشهم بلاقياس وهما بالمثل ..اليوم صبحات طالع ليها دم وغير معصبة حيتاش العطلة البينية الاولى وضروري متسد المدرسة واحد الفترة ...قصدات خدمتها وبدات فروتينها صباحي ..حتى كتشوف زوج من لوليدات واحد فيهم ضرب الاخر بقلم كانغادي يعميه جرات ناحيتهم وبدات كتقلب فالولد حمدات الله لي خرجت سالامات شافت فالاخر مطولا وبهدوء نطقات ..أحمد حشومة هاد شي لي درتيه ..اعتاذر من صاحبك وبوسليه راسو 

أحمد:لااا..هو خذالي قلمي ..هو لي غلط

سماح بحدة:الاخذاليك القلم كنتي تجي تقولها ليا ولكن نتا غلطتي ..احمد عتاذر 

احمد:اعوذ بالله من شيطان الرجيم ..باسم الله الرحمان الرحيم○وَكَتَبْنَا عَلَيْهِمْ فِيهَا أَنَّ النَّفْسَ بِالنَّفْسِ وَاْلعَيْنَ بِاْلعَيْنِ َوالْأَنْفَ بِالْأَنْفَ وَالْأُذُنَ بِالْأُذُنٍ وَالسِّنَّ بِالسِّنِّ وُ الْجُرُوحَ قِصَاصْ فَمَنْ تَصَدَّقَ بٍهِ فَهُوَ كَفاَّرَةٌ لَهُ وَمَنْ لَمْ يَحْكُمْ بِمَا أَنْزَلَ الله َفأُولَئِكً هُمْ الظَّالِمُونْ○صدق الله العظيم ..نتي لي علمتينا منسمحوش فحاجتنا وربي شرع لينا حكمه ..وطبقت غير اش علمتي ليا 

سماح سكتها معرفت اش دير فرقاتهم وجلسات كلها وفقنت وكول لحصة وهي تشوف فأحمد ..معرفاتش علاش حسات بالفخر فواحد لحظة ..يمكن كتشوف بلي ثمار اعمالها مع لوليدات كتكبر ومقصودها كيوصل ..داز نهار وبدات العطلة ومرحلة شقى فدار اليومين الاولى دوزتها فنفيض وخا كتنفض من جيه ولحيطان يتحتو ليها من جيه ..دار واكلاها رطوبة ولميديتي دايرة حالة بصح الحمد لله عندهم سقف يأويهم ..كملات ودارت براد اتاي مع بيض ومطيشة كتتغذى بيهم هي ومها ..حتا صونا تيليفون مها ...

فاطمة:سلام عليكم ...اييه هي هادي ..مرحبا ..اييه وخا ..نجي الله يا ودي ..الله يرحم الوليدين ..اييه غنشوف مع ربيعة ..ولااا كلمة وحدة منزدخش بيك ..الله يعاونك 

سماح :خبار الخير اماما ..شكون ؟

فاطمة :هاكي ابنتي دوريلي نمرة ربيعة فيسع (سماح دارت كيف قالت ليها وصونات ليها) واحد سلام عليكم ..اش خبارك ؟

ربيعة :الحمد الله اختي ونتي ولبنية كيف عاملين؟..كيف غادية مع تمارة ؟

فاطمة:هاد ساعة نحمدو الله على كل حال..وشقى هو علاش صونيت عليك ..راه ياله قطعات عليا رابحة طيابة قاتلك راه شي صدقة فدار الحاجة لي خدمنا عندها داك شهر غذا ان شاء الله وبغاتنا نمشيو نغسلو لماعن معاها ونعاونوها فتسخار 3 ايام 

ربيعة:والله منصيب اختي فاطمة راه دايرة مع واحد سيدة نمشي نصبن ليها شي زرابي وكاشات ونتي عارفة الحالة لي نرجعو بيها ..غير خليها على الله 

فاطمة:الله يعينك ..ويفرجها علينا ان شاء الله ..غنقوليها ونشوف لي تمشي معانا ..انا فكرت فيك نتي الاولى بصح منين دايرة لملمة لا ترجعيش فيها 

قطعات معاها وجلسات تفكر معرفت لمن تقولها خافت تاخذ شي وحدة من جرات وتصدق فشي مونتيف 

سماح شافت مها كتحاجي وتفك :انا نمشي معاك ولخلصة زايدة فينا ..راه نيت معندي ميدار 

فاطمة برفض قاطع:متقوليهاش حتى بضحك ..نموت ولا ندفعك تشقاي لي يسوى ولي مايسوى ..انا باغية نشوفك لالة لبنات ماشي ترجعي تكرصني ليهم ...

سماح:اما لخدمة ماشي عيب ..رزق جابو لينا الله وانا غادي نعاونك ودوك لفلوس زايدين فينا نخلصو بيهم غير لماء وضوء ..

فاطمة:لا هي لا بلا متكثري فلكلام 

سماح:بغلاتي عندك خليني نمشي معاك ..(كطنز) ايه ولا قوليلي بغيتي ضربي زرود بحدك يا جنية ههه

فاطمة:الله لا يا بنتي مبغيتكش تهدي صحتك ونتي مزال صغيرة 

سماح:نهز عليك اميمتي غير شوية ..

بقات مع مها حتى اقتانعات ومعاها تمشي وافقات..ولشقى وغسيل لماعن تقدمات .. فهاد الايام حسات بمها كتر شحال عانات ..باش عيشاتها وكبرات..وفعينيها زادت غلات ..وعلى زمان لي قالب وجهو عليهم تحسرات..وعلى باها لي سمح فيهم زادت حقدات ..سالاو ماعن لفطور لي صبحات..وجلسات تشوف فدار وتحلم شي نهار فوحدة بحالها تكون من لعايشات..تنهدات وتمنات يجي نهار يضحك ليها زمان وتحس بطعم الحياة ..وجا الظهر لنسا لغذا عاونات وحطات .. من بعد طلبات من مولات دار مكان لصلاة..والواحد من لبيوتهم خذاتها وتسوخرات... وسماح للقبلة تقبلات ..ولصلاتها اقامة ولمولاها تضرعات وتخشعات ..غافلة على لي دخل عليها وعينيه فيها سهات ..مستغرب من شكون زعمات على بيتو دخلات..سلات صلاتها وسلمات ..وقبل دعاءها لربها ليه لمحات ..وقفات كتفتف وبيه تصدمات ..معرفاتو لا من الانس ولا من الجن ولا عليه منين تسلطات ..وخرجات توطا فجلالها وليه اعتاذرات ..والحشمة طاغية عليها ولعينيها حذرات ..رجعات عند مها ومتلاتش خرجات ..وفشقاها غرقات ..حتا تناص ليل ولدارهم هي ومها قاصدات..محملين برزقهم ولحقهم من زردة جايبات وفرحانات ..وخا فصحتهم مهدودات..وثلاثة ايام على دار غابرات ..و فبلايص نعاسهم طاحو كيف دودات ...

عاليا من بعد مسمعاتها مها لمنقي خيارو ناضت سخنات لغذا لي جابت مع لي كانت موجداه مها وحطات عاد طلعات فيقات زكرياء ..تغذاو فسكات الحاجة قالبة وجها على بنتها وعليا داكة راسها فداك طبسيل وزكرياء كياكل ويشوف فيهم ..مبغاش يسول ويدخل فخصوصياتهم كمل وناض خذا معاه احمد وضرب بيه دورة فالحومة وجلس مع صاحبو عندو محل ديال الاثاث اغلب حديثهم على الكورة "مخلاو جابو جيفانتوس..اتلاتيكو مدريد ..ريال مدريد .." مهم جل المواضيع ... رجع فحالو واحمد مسكتش باغي نونة ..نونة .هههه..خذاه لحانوت شرا ليه دانون ورجعو لدار ...دازت ايام وشهور فرتابة عليا من نهار لي خذات درس فدعم وتقويم خافت من سخط وراجعت نفسها وكتحاول تنقص من الهوس لي فيها ديال شري شري ..اما الحاجة فكل مرة وحالها مرة صحيحة مرة شادة لفراش وكلما تجي عندها عالية تنقي ليها وذنيها ....هذا هو حالة لبركة ديال دار ..شحال ما كبرو كيفكرو عير فولادهم وينساو راسهم وصحتهم ..وواحد سيدهم زكرياء من الحامدين شاكرين غادي مزيان فالخدمة ومرتاح ..كيف كل عام كيديرو صدقة لمرحوم يتصدقو فيها من المال لي خلا ..دار كترجع بحال زاوية لمدة ثلاث ايام ..مرحبين بضيف الله والمحتاج ولي مقطوع بيه لحبل ياكل ويشرب وياخذ معاه الا بغا ..والحاجة كتجيب نسا لي موالفة معاهم من زمان يطيبو ليها وينقيو دار وتعطيهم حقهم وزيادة وفوق منها طلب سماحة..الحاصول دار الخير عمرها تخلا ولد الخير عمرو ينخص ولا ينضام ...زكرياء هاد الايام كيجلسهم فالابرطومون لي شرا ..مخلي صداع وقلت لهنا لي كتكون فدارهم وهذا هو حال لوليمة متشبع نعاس ومتهنى من صداع راس ..ثلاثة ايام وهو كيسول غير فتيليفون والا ناقصة شي حاجة كيخذها ليهم ويرجع لخدمتو ولا لدارو ..حتا لاخر نهار رجع فوقت لغذا كان خاصو واحد لملف ضروري لواحد لمريض ونساه فدار ..طلع بلا ميبان لحد كلشي ملهي مع فتسخار ولماكلة ..دخل لبيتو وهو يتصدم من بنت كتصلي فبيتو ..وهو لي ممنوع شي حد يدخل ليها من غير مو ولا ختو ..شاف غير ظهرها وهي ساجدة وعبائتها كحلا بدا كيقلب على لملف ملقاهش بقات ليه غير جخة لي كتصلي فيها جلس مربع يديه كيطلع ويهبط فيها مستنيها تسالي باش يقلب على لملف ديالو ..غير سالات طلعات فيه عينيها مخلوعة وحنوكها حمارو جمعات سجادة بالخف وخرجات كتتعثر فعبائتها ..ضحك على الخطف لي دارت ليه خلعاتو كيف ما هو خلعها مقدرش حتى يحقق فوجها ويعرف شكون هي ..كمل تقلاب ولقاه تحت كرسي ديال بيروه طايح ..خرج كيجري راجع لخدمتو ..وهكذا توالت الايام ... لا فحياة زكرياء ولا حتى سماح ...حتا لنهار لي غتلعب دنيا لعبتها ...مع وجه شقا ولي زادت دنيا فغبنتها ...كانت بين ليام كتتلاوح وراس مالها قيمتها ..محملات تمد يدها لا لخالها ولا لعمتها ..وهي وزمان معاهم ميمتها ..لي بلا بيها ما يهنى ليها بال ولا تتهنى فماكلتها...جالسة كتعلم ولاد فلان وفلان برغبتها ..والفرحة مالية قلبها وبسمتها..حتى صونا ليها تيليفون ولخبار لي سمعات مكانت لافبالها ولا مقدرتها ..علموها بلي ميميتها طاحت من وقفتها ..ولسبيطار خذاو جثتها ..وهي لخبار مستفسرات واش حية ولا ميتة من خلعتها ..فزات قفزات ولبرا خرجات ولخدها متوسدة دمعتها ..وبلا عقل مشات بجرا تشوف منبع حنانتها ..كتدعي الخالق الجبار غير مايفرقها على جنتها ..ولدمعتها يشوف ويحن لحالتها ...

وصلات لسبيطار دخلت معارفة متقدم ولا تاخر لي بان ليها كتسول ..طبيب فرملي ولا غير زائر ..همها هو تعرف مكان مها ...وقفها سيكيريتي كيهدن فيها ويحاول يستفسر ..بمشقة الانفس كتهدر وتعبر ..حتى قفل زوج كلمات وخذاها لريسيبشن خذات معلومات ..مها بجلطة نصفية وقعات..حلقها نشف وللكلام مخرجات..ومن زهرها وحدة من صحاباتها لقات ..كدور بلبسة لفرمليات ..شافتها وليها قصدات ..كتسول فيها وتسقسي وهي ما جاوبات ..حدها لزوج دمعات حارين نزلات ..خذاتها صاحبتها وليها نصحات ..

ابتسام:شوفي اختي سماح ..راه على ما قالتلينا لبنت مك غطول شوية فسبيطار ..وهنا سوغتو فالمستعجالات راه كاين واحد لفيروس كيعدي عياو معاه ومقضاوش عليه ..حنا لي كندورو قبل مكندخلو كيدقو لينا شوكة ..اما لمرضى راه ماكيسوقوش ليهم حدهم يعالجوهم من اش فيهم 

سماح بصدمة:اويلي على فيروس يعدي ...

ابتسام:لي نقول ليك هزي مك وسيري خوذيها لشي كلينيك يهزوها على كفوف راحة ..لهم غالي وتتعالج مزيان ولا هنا ينسلوك بجيبي جيبي وتاخذيها معلولة وديك ساعة ما يفكها فكاك..

سماح:ناخذها اختي ناخذها ..ونصيب نبيع كسوتي لي فوقي غير تبرالي ميمتي ...راه هي لي عندي والا مشات خلات عشتي ..

مشات لادارة وكيف قالتليها صاحبتها عملات ولاقرب كلينيك خذاتها ..اول حاجة وقفوها فالاستقبال بداو فيها بتسوال عاد مشاو لتنسال ..وما كان غير الله يعطيك صحيحتك ..وهي كيف كيقولو العين بصيرة واليد قصيرة ...طلبات منهم غير يبداو يعالجو فيها وغتجيب لفلوس ..وبدات رحلتها فتخمام وعلامن غتسلف وشكون يسخى يعتقها بالمال ..فزمان لخو يبخل على خوه بجوج دريال ..عساك يسلفوها هي لي ولية ...صونات لمديرة وطلبات منها تسبق ليها خلصتها ..ولكن للاسف قدرات تأمن ليها غير نص الخلصة وعطاتها حجج فارغة واعذار باينة لعمى بلي واهنة ..قبلات بيهم اللهم لعمش ولالعمى ...بعدا غير تسكت بيهم سبيطار شوية وزادت عليهم فلوس دارت وخذات على جارتهم سلفية ..قصدات خالها خو مها شقيق ويا ريتها مامشات ولا ليه يدها مدات ..خسر عليها زوج كلما بشفاء ان شاء الله ..رجعات كتبكي من كل عين بدل دمع دم ..وفرات نص ثمن ومنين غتجيب نص ثاني ..الحال معدوم وما كان ذهب ما كان ارض لي تبيعها وتجيب منها ..جلسات حدا باب لكلينيك تبكي وتعطي لمن يبكي .. دخلات لقاتهم خرجو مها من العمليات ولطبيب سولات .وللاسف لعملية ما نجحات ..وخافو يغامرو يلقاو روح لعند مولاها زهقات ... ولا هذا لي قالو ليها وهي بيهم ثيقات ...ودبا وخا مها كيف جات بقات ..ولكن للمصاريف ولا بد تكون خلصات ...مها مزال فلبلوك حتى تفيق من لبنج ويشوفو تأشيرات ديالها عاد يقدرو يخليوها تدخل عندها ..جلسات على كرسي عقل يخمم وراس ثقال ..نهار بلا ماكلة ولا نعاس وزيد سير واجي بلا قياس ..غير نهار ولبنت كيف الوردة صفارة وذبلات ..وهمها زاد ثقال ولازمها ليه تكون من صابرات ..وهذا ماهو غير امتحان من عند الله وخاص ليه تكون من القادرات ...نعسات جالسة على كرسي عند باب لكلينيك ..فاقت غير على رجفة شداتها من صبعها صغير بالبرد كان بدا صباح يصبح .. بغات تدخل تشوف مها ومنعوها حتى يدوز عليها طبيب ويسمحو ليها ..مقدراتش تصبر وقلبها محروق عليها ..بدات ترغب وتزاوك ..ولي داز عليها من الخدامة يبقى يتفرج فيها ويزيد فطريقو حاقد ..شي بقات فيه وشي بصداعها زادت على ما بيه ..حتى جا شاب فمقتبل العمر سمع بكاها وقف كيستفسر اش واقع وهي تقوليه وحدة من لفرمليات على لي وصلها لهاد لحالة ..قرب منها وبهدوء تكلم وبلعقل قدر ليها يهدن ..ومعاه خذاها وهو يصبر فيها ويعقل ..دار ليها لخاطر وخذاها تشوف بعينيها من بعيد مها ولبالها يهني ..من مور زاج بلا شعور بدات تبكي وتشكي للواحد الاحد ناسية لي حداها كيسمع لنداها ...وهو واقف موراها خذاتو ذاكرتو بلا شعور لبنت لي لقاها فبيتو تصلي وهو كان شاف غير قفاها ..تنهد ورجع بذاكرتو كيتنغم برجاها ..مشى وخلاها ..طلع كيكمل خذمتو وبالو غير معاها ..بقات فيه ولية لا حنين ولا رحيم ولا والي تمشي وتناجيه ..وهو ولد دار لكبيرة وربي يمكن حطها فطريقو باش يعاونها ويدير خير يستأجر فيه ...مشى لمحاسبة وخلص اش بقى ليها وخبرهم باش اسمو ما يبوحو بيه ..وخلاها تبقى طول عمرها تدعي معاه وباسم فاعل خير تناديه ...ولخير يدور يدور ويرجع بنفع لماليه ..سعداتك يا فاعل لخير عند مولاك تتجازى بيه ..

▶️للقرآن آيات وعبر من الأزمان..حكمة ونصيحة للإنس والجان ..وتذكير لعظمة الرحمان ..ونهي عن المنكر والعصيان واتباع طريق الجنة والأمان ...كلنا تلونا آيات سورة الكهف نور بين الجمعتين ..في هذه صورة عبر شتى وحكم لا تحصى...ومن بين قصصها حكاية ذو القرنين ...في عهد الرسول الكريم سئله اليهود عن رجل طواف في الارض ..فإذا الله يرسل لهم اجابته ويوحي اليه ..كما جاء في سورة الكهف قال تعالى: "ويسألونك عن ذي القرنين" هذا الرجل الذي جاب الارض من مشرقها الى مغربها ..اختلف العلماء في تحديد ماهيته ..هل هو نبي ام عبد صالح ..ولكن الذي اتفقو فيه انه كان ملك صالح وليس بنبي ..هذا الرجل اكرمه الله بحكم عظيم وقدرات مبهرة وقوة تبارك الرحمان يرزق من يشاء ..كان يطوف الارض كلها ويدعو ناس الى توحيد وعبادة الله عز وجل ..لم يعلم احد اسمه ..سوى انه ذي القرنين هل هو اسمه حقا ام هو مجرد لقب ..ام سمي هكذا لميزة فيه من الممكن ان يكون قد كان له قرنين في رأسه او خوذة يلبسها او اي شيء من هذا القبيل ...لا يهمنا لما سمي بهذا الاسم ..المهم ما استطاع فعله هذا الرجل صالح ...

ذو القرنين ذكر لنا الله من رحلاته ثلاثا ..رحلة في المغرب ..ورحلة في المشرق ..ورحلة الى قوم لا يفقهون قولا..فما احداث رحلاته وما محتواها ..؟؟

قال تعالى:ويسألونك عن ذي القرنين..قل سأتلو عليكم منه ذكرا ..انا مكنا له في الارض..واتيناه من كل شيء سببا"..منَّ عليه سبحانه بقدرات ملك لديه جيش رهيب ملك عظيم وقوة لا مثيل لها ..واتاه الله من كل شيء سبب..اعطاه الله اسباب النلك ..واسباب القوة ..واسباب السيطرة والتحكم ..لكنه ابدا لم يطغى بل سخرها لعبداته عز وجل ..هذا هو الانسان المؤمن التقي الذي يهاب الله ..لا يغره لا ماله ولا جاهه ولا يتعى في الارض فسادا ...بل يسخر ما سُخر له لوجه الله ..يحكم عدلا وينطق حكما ودررا..ويجاهد في سبيل مرضاة رضى الرحمان ..لم يجلس كما نعهد الامراء والملوك والرأساء..لم يكلف نائبا ولا وزيرا ولا خادما يقوم بمهاهم بل قاد جيشه وترأسه لم يحم نفسه ويذل شعبه ويتعلا عرشه بل كان مع الحاشية مع بيادق القوم ..كان رئيسهم ..ملكهم.. محاربهم ..حاميهم ولا يتحامى عليهم ..سندهم ولا يستند عليهم ...كان داعية ايضا لم ينظر فقط ويدعو لهم سرا لم يتركهم ويقول ما لي بهم لا ابالي يكفي انا اعبد الله واخلص له ..لم يتمنى الجنة والعمل صالح له ..ابدا لم يكن انانيا ...بل حارب الفساد ودعى الى هجر المنكر والكفر والبغي..بل حرمهم عليهم ..وخلق شعبا تقيا مخلصا له ..لم يكتفي بهذا القدر .لم يدعو شعبه او قبيلته او اهله فقط ..بل سعى ان يدعو الجمع كله ..ترك دياره وخرج بغية الدعوة وتوحيد عبادة الله جاب الارض من مشرقها لمغربها كله في سبيل الله.. يا لا هذا الرجل عبرة لكثير من من لم يعتبر ...درس من الدروس التي يجب ان تحفظ وتستظهر..نولج الى الدرس الاول ..رحلة ذي القرنين الاولى :

🌿قال تعالى:"حتى اذا بلغ مغرب الشمس"..بدأ مشواره من المغرب ..اي المغرب بنسبة لموطنه...والله اعلم اين كان مغربه في ذلك الزمن او اي موطن كان به او حتى اي ارض هم بها ...المهم عبرة الرحلة..وجد بذاك المكان قوم ..تغرب شمسهم في عين حمئة ..والعين الحمئة هي عين تخرج من الارض ..حمئة اي انها صارت الارض طينا وبسبب الحرارة بدأت تجف الى ان تحولت لطين وصار التراب املس وصار اللون ذاكن ..ذالك القوم كانو لا يفقهون قولا اي لغتهم غريبة ..ماذا سيفعل بهذا القوم ..هل يقتلهم ..يستعبذهم ام يهلكهم ..كما نعلم ان الملوك اذا دخلو قرية اهلكوها وجعلو اعزتها اذلة ..لكن صالحين منهم لا يفعلون ...فياترى هل ذو القرنين يسعف شيطانه ام ان ايمانه طاغ على نفسه ...قال تعالى: "قلنا يا ذا القرنين اما ان تعذب و اما ان تتخذ فيهم حسنا " ملك بيده قوة وجبروت وجيش رهيب تحت امرته وامامه نِدٌ ضعيف قوم جهلة من الممكن ات يجعلهم عبيد يخدمونه ويقاتلون في سبيله ..لكن لاا ما يفعلها من خاف الله..اراد بهم حسنا ويأخذ فيهم اجر وله الأجرة عند ربه .. قال تعالى:"اما من ظلم فسوف نعذبه ثم يرد الى ربه فيعذبه عذابا نكرا " اي ان من علمناه وارشدناه الى عبادة الله وكفر فله عذاب الذنيا منا وعذاب الاخرة من الله الصمد... قال تعالى:"ولعذاب الاخرة اكبر لو كانو يعلمون"..لكن من امن فهنا يختلف الوضع ..قال تعالى :"واما من امن وعمل صالحا فله جزاءا الحسنى وسنقول له من امرنا يسرى" اي المؤمن نكرمه ونعامله احسن معاملة ونرفعه دراجات في تقوى ..كان ذو القرنين رمزا للعدل والامر بالمعروف..رجل صالح يجوب الارض فقط للدعوة..يريد صلاح لناس لا غير ..واناله الله ما ابتغى و أفقه للقوم قولا ودعاهم لعبادة الرحمان جل وعلا

..وانتهت رحلته من المغرب ثم شد رحاله وسعى ؛..بدأت رحلة المشرق ؛ قال تعالى:"حتى اذا بلغ مطلع الشمس وجدها تطلع على قوم ..قوم لم نجعل لهم من دونها سترا" وجد قوم شأنهم عجيب ..قوم من طلوع الشمس حتى مغربهة ليس لهم ستر ..اي بيوتهم لا تسترهم من حرها هناك من يقول انهم لم يكن لهم ستر على اجسادهم اي كانو عراة نساءا ورجال ..ماذا صنع معهم ذو القرنين ؟؟؟؟ هل فعل كما فعل مع القوم في المغرب ..القرآن لم يذكر شيئا عنهم كما فعل مع سابقتهم . بل ذكر ..قال تعالى:"كذلك"اي انه فعل كما فعل مع القوم الأولين...ثم انتقل ..لم نعلم اي جهة كما حدث مع سابقتها..قال تعالى:"حتى اذا بلغ بين سدين " هذا الملك الصالح له عدة رحلات لا تحصى لكن الله عز وجل عززنا بنماذج منها ..بلغ بين سدين اي انه بلغ بين جبلين شامخين عظيمين ..و بهما فتحة اي طريق ..دخل بها الملك وجيشه العظيم وجد بها قوم ..امة تعيش بين الجبلين لغتهم غريبة ..لما رأوه بهيبته وملك استغاثو به ..قوم لا يفقهون قولا ..لغتهم غير لغته كيف استطاع ان يتواصل معه ..كذلك قال الله مكنا له في الارض واتيناه من كل شيء سببا ..ولحكمة من الله استطاع ان يفهم قولهم ..." حتى اذا بلغ بين سدين وجد بهما قوما يكادون لا يفقهون قولا ..قالو يا ذا القرنين 

كان ذا القرنين يصته عال كل من في الارض يعرفه ..قالو انقذنا من قوم مفسدين ..قوم طاغين اسمهم يأجوج ومأجوج..من أجة النار لهيبها انتشارهم كانتشار النار يفسدون كل ما حطو به ...قالو إن يأجوج ومأجوج مفسدين في الارض كلها قوم آذونا قتلونا وعذبونا ..قالو اعنا ولك اجرك مالا ذهبا وفضة وكل ما ابتغيت..يا ترى هل ذو القرنين طامع في ملذات الذنيا وزهدها ؟؟!ام يبتغي فقط رضى الرحمان......رفض طلبهم

قال تعال :"قال ما مكَّني فيه ربي خير "اي لا اريد ما تزعمون اعطائي إياه لا ذهب ولا فضة دعوها لكم ..وكذا فعل الانبياء ..لم يكن قصدهم التجارة بالدين ..لم يبتغو الغنى والملك العظيم بل ارادو فقط ان يعم التوحيد لبر العرش الكريم ....قال تعالى:"قال لا اسئلكم عليه اجرا" وقال النبي سليمان لما اتته بلقيس بالذهب والفضة غاضبا ..قال:" اتمدونني بمال ..فما اتانيَّ الله خير مما اتاكم بل انتم بهديتكم تفرحون " الداعية لا يقيل مالا مقابلة دعوته لا يتاجر يالدين بل اجره عند رب العالمين ...ولأن ذو القرنين رجل صالح لم يقبل ..بل طلب منهم رجالا منهم يعينوه بقوتهم ..لديه جيشه ولكنه اراد من ذاك القوم ان يُبْدُو شيئا ..ان يشتغلو في خلاصهم ..ان يسعفو بلدهم ..وقومهم ..ان يكونو هم حراس انفسهم لا يتوكلون على غريب ينقذهم بل يواجهون كل المخاطر في سبيل وطنهم ..لان الامة المتوكلة على غيرها هذه امة متخلية عن بلادها امة ليس لها كرامة ولا فضل على الارض التي تربة عليها ..امة جاحضة بالجميل امة رجالها ونسائها عار على العالمين ...حب الوطن مهما كانت البلد القاسية 

فهي ارضك عرضك وشرفك هي كرامتك وأنفتك ..عزتك امام الغريب ..ملجأك الوحيد..هي انت هي نحن ..هي ارض تستحق ان تسفك عليها دماء ولا تهب للاعداء بدون قتال ..فذاك الوقت اعزتها يرجعون اذلاء ..عبيد لذا احقر القوم أولئك الجبناء... استعان ذو القرنين بهم ..استغربو لما يريد قوتهم ..فاجابهم ليجعل بينهم وبين المفسدين قوم يأجوج ومأجوج سد منيع عظيم يفصلهن عنهم وسرتاحون من طغياهم ..بدأ العمل والاجتهاد ..طلي منهم جلب الحديد..فبدأو التنقيب كسرو الصخر وجلبو كل ما تمكنو منه ..ما هذا الرجل يريد جعل سد من حديد خالص ..كله حديد ..يا سبحان الله ..نحن نرى سدود تخلط حديد بطين واسمنت ..وهو اراد سدا من معادن صلب ..اخذو بوضع الحديد بين الجبيلين وبين كل قطعة حديد يضعون خشبة ..خشب لن يبقى بل سيحرق ليذيب الحديد...وضعوه حتى قمة الجبلين واشعلو فيه نارا وترك ليحرق والحديد ينصهر ويتجمع بين الجبلين ..اخذ بعدها النحاس واذابه مع الحديد ..فصار سدا عظيما من اقوى المعاذن... قال تعالى:"حتى اذا ساوى بين الصدفين قال انفخو ..حتى اذا جعله نارا قال اتوني افرغ علي قطرا"(نحاس)..اكتمل الجسر وهنأ ذو القرنين القوم ان جعل الله بينهم وبين يأجوج ومأجوج سدا لن يستطيعو تجاوزه ابدا الا ما شاء الله ..

ومتى يشاء الله ..وما قصة يأجوج ومأجوج..ومن هم هؤلاء القوم كل هذا واكثر لنا له لقاء ان شاء الله ..

عبرتنا من هذه القصة انه لي بغا يدير الخير مميستناش يتجازى عليه ولا يمن عليه ويقول انا درت وانا فعلت حقا حقا انا تصدقت كذا وكذا وانا راه عاونت هذا وهذا ..لاا لخير سر بينك بين لي خلقك واجرك عند مولاك .. يا عبد المنان لا يغرك ملكك ..يجي نهار وباش من عليك الله يمنعك..وديك ساعة بقيتي لا دنيا ولا اخرة وشكون يشفعلك ..يا فاعل الخير سعداتك الا ثبتي عليه وتسترتي وشيطان ما غرك.. ⏯

واقف مع احد الاطباء كيناقشو حالة مرة مسنة فيها سكر وضغط هاد نوع صعيب يخدروه كليا ..كيخذروه موضعي فقط غير مكان لي فيه الضر ..حتى كتوقف عليهم بنت فمقتبل العمر زوينة ومسرارة ولكن فيها خصايل هو بذات مكيبلعهمش..شخص هادئ بحالو ومحتارم خاطيه الاختلاط بناس ميرتاحش لفليفلة بحالها ..جلسات كتضحك وتضرب فكتف داك طبيب الاخر وتشوف فزكرياء لي حرك راسو بلا حول لله خذا ضوسي من بين يدين طبيب الاخر واستأذن خلاهم مستغربين ..وبتصرفاتو خلا الاطباء والممرضين لي تما يسميوه .."سي لفقيه"..

دخل لبيروه كيشوف اش عندو حتى اذن العصر صلاه وفهاد الوقت دخلات فليفلة عليه بلااستأذان والاخت المصون واخذة راحتها على الاخر دخلات وجلسات كمل صلاة على خاطرو وختمها بدعاء استغفر وطلع عينو شاعلين نار طلعها وهبط

زكرياء محاول يكتم غضبو بزز:بغيتي شي حاجة الاخت ؟

سعاد:صراحة غير جيت نشوفك مالك قبيلات خليتينا كنت واقفين ضاحكين عادي 

زكرياء طلع حاجب ونزل الاخر بلا كلمة ولا زوج شير ليها ناحية الباب 

سعاد:معرفتش مالك هكذا ..معقد ..فكها شوية شفتك شاد تيقارك بزاف .ههه حنا زملاء مافيها باس نرجعو اصدقاء ولا شي حاحة كتر علاش لا 

زكريا بحدة:حنا الانسة فمكان خدمة ..ماشي فقهوة باش نديرو جمايع ..وزايدون نتي مرا وانا راجل من غير كلام فمجال العمل مكان حتى موضوع لي نتشاركوه ..ودوك طيرات ديريهم مع شي حد اخر وفوتي ساحتي ..ودبا الا سمحتي ممكن تخرجي عندي خدمة تابعاني 

خلاها بهدرتو تحمار وتخضار فبلاصتها تمنات الارض تنشق وتبلعها ولا ديك لغسلة لي دار ليها..

زكرياء معصب غير بوحدو مكيحملش بحال هاد المواقف :دبا حتا لا بغيت تعمر دارك تخاف طيح فجلاخة بحال هادي ..عاطية لكلشي لبِاس لي جا مرحبا ولي مجاش عندو برومو نهار يطيح فرحبة ...استغفر الله ..يخليو الواحد يخرج على طوعو 

دازت ايامو فخدمتو ومعاودتش دارت بيه من داك ساع ..ورجع عندو مشكل واحد الحاجة لي كتزن عليه باش يتزوج وكل مرة جابدالو سيرت بنت فلان لفلاني وكتجبد ليه طاسيلة وريحة شحمة فشاقور ..وهو باغي لي يرتاح ليها ..يفتح ليها قلبو ويغمدها فغرامو ..وتحلى ليها وبيها يامو ..ويشوف فيها مو وختو وحبيبتو فأحزانو ..ويعول عليها فغيابو ومنين طيح صحتو وسنانو ..و الا ختاروها ليه هما غادي يعيش معاها عينو ميزانو واش توالمو ولا تفقص ليه يامو وتنغص ليه منامو وماتسمع لا لحكيو ولا لكلامو ..وتجيه وتخليه داخل بسين وخارج بجيم كثرة لغى وقلة لكلام ..متنفع لا فوجيبة ولا وقت ضيم ولسقام ..خايف من نهار لي يرجع فيه لومة لي ختار ولحكم لحكام ..وماباغي يلوم مو لي كانت سبابو فديك بنت لحرام ..باغي من الاول يختارها هو ويفضي الكلام ...وديك ساع لي جاه فرزقو يرضى بيه ومايلوم حد مايقول غذرني زمان ...

مشات ايام وجات ايام وسماح هلكها زمان وفوجه مها ورضات رحمان حامدة الله ولي جات من عندو فيها الامان ..خير او شر الا و فيها خير وما يحتاج عليها عصيان ..صبحات كيف كل صباح مبكرة صلاة الفجر وناضت خملات وحطات لغذا على لبوطة صغيرة ..ورجعات عند مها بدلات ليها وخرقاتها فطراتها وعطاتها دواها وقلبتاها على جنبها باش ترتاح وخلات ليها راديو تتونس بيه ..من بعد ما كان عندهم قشيوش مستورين بيه ..فعز ازمتها باعتو وقضات لي يتقضى بيه ..وربي يعوضهم بما حسن بيه ..رجع فراس مالهم جوج لحوف يتوسدوهم وجوج كاشات يتغطاو بيهم وباسينة كبيرة جامعة فيها كسوتهم وبوطة صغيرة علامن طيب وتطفي جوعهم وراديو صغير كتخليه لمها باش متقنطش منين تغيب عليها ..لا ثلاجة يتبردو بيها ولا ماريو يجمع ليهم كسوتهم ..الحاصول قلة شي كترشي ومنين ميكون عندك لا حنين ولا رحيم متنساش عندك رب كبير وكريم ... خلات مها صحة سلام مشات لخدمتها وقضات روتينها ورجعات قوتاتها ودازت لشقاها لي ما يفنا ولا يبلا ..رجعات فليلتها مهدودة ..تعشات وعشات ميمتها ..شافت الجو سخون ناضت حمات لماء ودوشات ليها ..جلسات تتهاود هي وياها وضاحكين 

سماح:وكيف زيانيتي وبياضيتي ..نتي غير قوليلي فين مخبيا هاد سر كولو هاا(كتبوس فحنكها)

فاطمة:كضحكي عليا يا طير ابكر ..(طولات فسماح شوفة )تشهيت حنينية لرجليا 

سماح بلا عكز عليها نااضت روناتها وجلسات عند رجلين مها باستهم وبدات كتحني ليها:منخليهاش فخاطرك ...(كطنز عليها ) دوش ودوشنا ..لحنا وها حنا نقادو فيها ..يا ويا لالة وناخذك لكوافيرة وندير ليك ليميش ولا بتيت ميش ..اييا وبابيشا تحلا لمعيشا اييه ماميا ..ويبقى يالالة طايح كتر من نايض ..ونايض ديجا مور ..مياموري..بورفافوري ..انا حبك واقع في زوري ...

فاطمة كتضحك:اييه يا مرضيتي وجيبي شي عريس يكون فالخمسين وشيباتو عاصيين ...

سماح:اويلي يا يما على خمسين ..نجيب ليك زوج عشرين عشرين تكبري فيهم...اححح اي عريس يجي باسم الله ..ها رجلين محنيين يا لالة..حنينية وحناني ايما والقلب الهاني ..ويتك ويتك على لبيوضية حليب يا خواتشي قشطة ياعالم ..تي الوليد كيف كان يدير حدا هاد الفرماج ..باينة كان يسيح..يتطوط كيف لموتزاريلا 

فاطمة:اويلي على مخليت كرشي كوني تحشمي ...هههه كان يتلف ويتفافا ويبدا يتبحلس حتى يغفى ...

سماح: هادي اهانة فحق جندي قديم ..كنتي مقضياها شمع ولا بريكات الوليدة 

فاطمة:كنت مديبانيا بمدلك..كان مجاهد كبير ..جاهد جهاد ميجاهدوش لمخير فولاد اليوم ..كان موتور صحيح (سماح ميت بضحك)...نوضي نوضي يا مرضيتي سخني بلاصتك ...راه تمارة هدات ليك صحتك ..صغيرة وتمحنتي وعلى جالي تمرمدتي ..وشفتي لويل وما شكيتي..وبرضايا عليك عمرك ما طيحي الا ولرحمة ربي جنيتي ..

سماح:حق مولانة مايسعى لعقل لي سامح فهاد الياقوت وغادي عند لجالوق ..احح بصح لفول ميتعطى غير لي معندو ضراس ...وانا اش بغيت االحب غير رضاتك نتوسد بيها راس 

فاطمة(بدات كتدعي معاها):روحي يا مرضيتي بغيت سماك تصفى وقلبك مايشوف غيام وما يجفى...الله ينور طريقك ويبعد عليك ولاد لحرام ..ويقرب ليك خير لنعام لحلال لي ما تنقص ولا تبليها ليام ....روحي يا بنتي ياسماح بغيت ليك تتستري فين تاكلي وتوكلي ..الله يرزقك بولد لحلال لي يهزك من قهرتك ويفاجي غمتك..روحي يا بنت كرشي بغيت ربي يرضا عليك دنيا واخرة ..انا مفرشاك ومغطياك برضايا 

سماح باست لمها راسها ورجعات تنعس قلبها فرحان وهي كتسمع لدعاوي مها لي كينسيوها فعذاب نهارها ويعطيوها طاقة اجابية باش تبدا الغد ليه..سعداتك يا عبد الله لي رضا عليك وسخر ليك واليديك يكونو جنتك ويخفو ذنب عليك ..يكونو سبابك فرحمة ربي تنزل عليك ..يا البار بواليديه عمر ربي يسخط عليه ..وبنعايمو ربي يمطر عليه ..عمرو ما ينخص ولا ينضام لحد ولا حد يمن عليه ..رضات واليديه غانياتو وكافياتو فدنيتو واخرتو كتعمل عليه ..

صبح صبح فاقت كيف عادتها دارت روتينها وجلسات حدا مها كتفرتت ليها فحنة رجليها خرجات ليها حمرة ضحكات 

سماح:الالة على لحناني ..اااه يا يما والقلب هاني ..وا هيا لمعذبني فيق يا لمحني ..

فيقات مها مسهسهة هزاتها بمشقة الانفس حطاتها فوق واحد الكرسي وبدات كتقاد ليها امورها ..مبغاتش تخليها هكذاك عيانة وتمشي للخدمة ولكن مها حلفات عليها تمشي ومخلاتش ليها فرصة فين تناقشها مشات وبالها مشطون عليها ..كانت عندها حصة من وحي القرآن هاد الحصة لي كانت المفضلة عند تلاميذها وقدرات تقربهم ولو شوية لدين ولاحظت بلي عدة من تلاميذ سلوكهم تغير لاحسن...حكاية اليوم كانت حكاية خليل الله النبي ابراهيم عليه السلام...

▶️ كان يا مكان ..بين ثنايا الازمان ..في عصر الرسل والانبياء الكرام..قصص وعبر لنا بإمتعان ...ومن بين القصص خير خلق الرحمان ..قصة خليل الله النبي ابراهيم عليه سلام ...في بابل بعد ان اهلك الله اهل نبيه الكريم صالح بصاعقة بالصيحة اهلكهم الله ولم يترك سوى عباده صالحين عم دين توحيد الله عز وجل مدة طويلة ...حتى ان جاء عهد ظهرت فيه الاصنام والاوثان وكثرة عبدتها ومبجليها ودأبت شياطين تغوي الانسان..بعث الله نبيا صادقا وهذا النبي..نبي احبه الله عز وجل واتخذه خليلا..من؟!.. انه ابراهيم الخليل..ذاك الفتى الذي ولد في بابل وعاش مع اناس يعبدون الاصنام ووالده منهم لكنه هو لم يرضى على وضعهم ولا على عبادتهم قال تعالى:" ولقد اتاينا ابراهيم رشده من قبل وكنا به عالمين"..الهم الله ابراهيم توحيد واسكن قلبه الايمان واذا به يستنكر عبادة الاصنام وعاهد نفسه على ان يقف في وجه عشيرته ليوحدو الله عز وجل وبدأ بأبيه..يدعوه الى الله جل وعلا..ابوه كان يملأ بيته بالاصنام وعابدا متزهدا لها ..كان غارقا في كفره ..جاء ابراهيم الخليل ينادي اباه المشرك الذي يدعوه ان يسجد للاصنام ولكن ابراهيم ابى ان يشرك بالله وقال" يا ابتي لم تعبد ما لا يسمع ولا يبصر ولا يغني عنك شيئا"..كان كلما اتاه يدعوه للتوحيد يصده ولكنه ابدا لم يكل ولم يستسلم بل كان يأتيه كل يوم ولكن اباه مان كلما جاءه يأمره بعبادت الاصنام معه ....بينما ابراهيم كان يجيبه .."صحيح انني صغير ..فأنت ابي وانا ابنك .لكنني اتيت علما اكثر منك .."يا ابتي اني قد جاءني من العلم ما لم يأتك ..فاتبعني اهدك صراطا سويا" مع كل حوار كان اوله يا ابتي ..مع ان اباه كان مشركا لم يحاوره بغلضة ولا بتعصب بل كان يلين معه في الحديث ويصبر على ردت فعله بل ويدعو له ربه ان يغفر له..قال لأبيه "يا ابتي لا تعبد الشيطان إن الشيطان كان لرحمان عصيا يا ابتي إني اخاف ان يمسك عذاب من الرحمان فتكون لشيطان وليا " رد عله ابوه بكل قسوة وغضب:

_يا ابراهيم لأن لم تنتهي من هذه دعوة لأرجمنك ...وارديك قتيلا ..وطرده قائلا "اهجرني مليا"..طرده واجحظ في وجهه وشتمه لكن ابراهيم لم يكن عاقا به مع انه مشرك فهو لا يزال ابوه ...اجابه قائلا :"سلام عليك سأستغفر لك ربي انه كان بي حفيا "...ومعناه انه سيظل يستغفر له الله حتى ان ينهاه عز وجل عن ذلك ..هذه كانت دعوة ابراهيم واسلوبه لأبيه وان كان مشركا لم يكن له من العاقين بل كان تقيا محسنا اليه..وبارا له..

.. هنا غنساليو اليوم حنا الحصة جايا ونشوف اش وقع لسيدنا ابراهيم مع قومه ..وما قصة حرقه وكيف ان نار صارت له بردا وسلاما ..

سوسن:كملي لينا عفاك باقي الوقت مزال ما رن الجرس 

سماح شداتها من حنكها كتضحك معاها:امم غنساليوها الحصة جايا ان شاء الله من بعد منشوف واش حفظتو الحديث لي عطيتكم ولا لا..⏯

رجعات فلغذا لقات جارتهم يطو مع مها هاد لمرا لي وقفات معاها لقاتها جنبها وملقاتش لي ليها ..رجعات فلعشية لخدمتها ودازت ديريكت لمحل لي كتنقيه فليل صونا ليها مولاه عندهم الخدمة مزيرة ملقات كيف دير معاه ومشات مرجعات حتى لنص ليل مهدودة..مشات كتصاوب متاكل هي ومها لي هاد الاخيرة شافتها ناعسة مبغاتش تقلق نعاسها حتى توجد شدق يسدو جوعهم بيه..حطات لعشا وفيقات مها بستين كشيف بزز باش فاقت ليها عيانة حاولات معاها عشاتها ونقاتها من بعد ما عاوناتها جارتهم يطو ..داز اسبوع وصحة فاطمة غير مكتزيد وتتراجع وسماح مبقات عارفة ما دير كتحاول ما امكن ترجع بكري وتبقى معاها خايفة تغفلها ويوقع ليها شي حاجة ...اليوم صبحات عليها لغيجل عيانة وغير كترد ولوجع قاتلها وهاد نهار خاصها دير ليهم الحصة لي كيستناوها تلاميذ ونهاية القصة وخا معندها خاطر وجدات ليها مزيان من بعد مطمنات على مها وخرجات لخدمتها دوزات حصتها ودروسها ليهم وخلات وقت مستقطع من الحصة دير تتمة لحكايتها ...

تتمة .. قصة سيدنا ابراهيم

سماح:اممم شكون عاقل فين خلينا قصتنا؟

احمد:فسيدنا ابراهيم مع قومه الكفرة ؟

سماح:احمم احمم ..بعد صلاة وصلام على نبي الامين والرسل الكرام ..كان في زمن كان قوم كافر ونبي مؤمن موحد للاحد الواحد 

كان الخليل وهو صغير يخرج على قومه فيناظرهم وهم معتكفين يبجلون ما صنعت أيمانهم من اصنام وتماثيل كان دائما يستنكر عبادتهم ويرفضها جاهرا بها وفي احد الايام قال لهم بكل بسالة وجرأة.."ما هذه التماثيل التي انتم لها عاكفون"..كان قومه يجلسون امام تلك تماثيل يعبدونها ويسجدون لها ..يأتون يطلبون ويتمنون منها وهم صانعوها كأنها هي من خلقتهم وليس هم من خلقوها..ويأتون لها بقرابين واشهى واطيب المأكولات واغلى الحلي والمجوهرات ويلبسونها اغلى الاثواب واحلى التفصيلات ..كان هو عاقلا فاطنا بالحكمة ..كلما رآهم يحاول دعوتهم لتوحيد وترك شياطين التي تستحوذ عليهم وعلى افكارهم ..لان الكفر من الشيطان لكنهم كانو بكل جهل وسفاهة يجيبونه رافضين :قالو وجدنا اباءنا لها عابدين"..قال انتم وآباءكم في ظلال مبين ..استغربو كيف شاب صغير يتجرأ ويتحدث مع كبار قومه بتلك الفضاضة فردو عليه قائلين:"اجئتنا بالحق ام انت من اللاعبين"..ضنوه انه جاءهم بكلام فارغ سفيه مستهزأ بدينهم ودين اسلافهم ..حذروه وهددوه ان يخوض في مثل ذلك وانه يجب عليه ان يتوقف عن الاستهزاء بدينهم ..اعتقدو انهم له موقفون لكنه اجابهم بكل ثقة:"بل ربكم رب السماوات والارض وانا على ذلكم من شاهدين " اين عقلاء القوم وكباره شاب صغير ..غلام يقول لكم ذالك الكلام بل هدد اصنامهم:"وتالله لاكيد اصنامكم بعد ان تولو مدبرين "اقسم على ان يحطمها ويتركها اجزاءا مجزئة..بل وفعلها في يوم من الايام وترك كبيرهم فقط ..اي اكبر صنم واقدمهم هناك ..شاب صغير يتمرد على قومه ويقف في وجههم بدون خوف ..لما؟!..اوليس خائفا من ان يقتلوه وهم الغلبة ...كلا بل هو متيقن ان لن يصيبه مكروه وهو متوكل على الرحمان ...اقسم ولكن قومه لم يأخذو كلاهم على محمل الجد بعد ان خرجو تاركين اصنامهم قائمة..اتا يوم زينة عيد من اعيادهم ..جاء ابراهيم الى ساحة الاصنام وجدها مكتضت بهم وامامهم الاطعمة والقرابين والهدايا الثمينة ..سئلهم وهو على يقين تام انها لن تجيبه:"مالكم لا تأكلون" سألهم لما كل تلك نعم امامهم ولا يمدون يديهم ويتمتعون بها..هو يعلم انهم لن يستطيعون ان يمدو ايديهم ولو بعد مئة عام ..ضل يسأل ويسأل وهو حانق من تلك الاصنام والمعبودات التي يلجأ اليها قومه بدب لجوئهم لله عز وجل اخذ "بقدوم"اداة كالفأس..وهرول نحوها كسرها تكسيرا بل حطم جزيئاتها تاركا صنم واحد وهو اقدمها ..نعم ذاك الغلام صغير شجاع قومه كسر الهتهم بدون خوف او هلع ..قال تعالى:.."فجعلهم جذاذا الا كبيرا لهم لعلهم اليه يرجعون" ..وضع الفاأس عند الصنم الكبير ..وكل هذا بحكمت منه ..اتو القوم فرحين مستبشرين يناظرون الهتهم مصدومين من ما آلت اليه وما اعظمه من فعل شنيع ما وجدوه طامتهم الكبرى مصيبة قومهم ...لم يجدو سوى بقايا فتاتها ....آلهتهم محطمة ..من تجرأ عليها ؟!..اخذو يصاحيون ويبكون مينادين في القوم:"من فعل هذا بآلهتنا انه لمن ظالمين"..سفاهتهم صورة لهم ان الإلاه يهدم ويحطم ..كيف يعقل ذلك ..جهلهم فاق كل المستويات...ان الله لا يعلو فوقه شيء ولا يقدر عليه شيء هو الواحد الاحد الصمد المتجبر خالق كل شيء ...اذ ان آلهتهم حطمت فالذي حطمها اقوى منها كيف يعبدون شيئا ضعيف ..كيف يكون وليا لهم وهو لم يكن وليا على نفسه ...لم يكن لهم مسحة من عقل بل ولا ذرة متجزئة منه يعبدون ما هو فان ويتركون الله عز وجل فهو حي لا يموت ...فتكلم من سمع ابراهيم وهو يهدد في آلهتهم ويتوعدها "سمعنا فتى يذكرهم يقال له ابراهيم" فذهبو انا ذاك لابراهيم الخليل وهو فتى فمسكوه وربطوه امام جماهير من القوم ..الكل يريد الانتقام منه على ما فعل ..قالو :"فأتو به على أعين الناس لعلهم يشهدون" عقدو محكمة عظمى يحاكمون فيها صبيا ..كل يريد ان يأخذ ثأر الهتهم ويدافعون على كفرهم..تجمعو ناس جميع منهم ابوه واقرباءه..لكنه كان لا يبالي صامدا ..فسألوه:"آ أنت فعلت هذا بآلهتنا يا ابراهيم قال بل فعله كبيرهم هذا" قال ما انا بفاعل بل صنمكم هذا كبيرهم ...قال الا تناظرون بيده المعول اسألوه ان مان ينطق يجبكم ..لما لا تسألوه يجبكم ...فهو الاهكم ..التفتو يناظرون بعضهم بعضا ...قال بل انتم الظالمون تعلمون انهم ما هم بآلهة وتكفرون وتعبدون اوثان واهية ما هي بنافعة لكم في شيء ..فلما كشفو وانفظخو قال قاىل منهم احرقوه وانصرو الهتكم ان كنت فاعلين ..قررو حرقه لانه اشد انواع تعذيبا ...فأخذو يجمعون الحطب ليحرقو ابراهيم الصغير ..يحرق لانه ذكرهم باللله ووحدانيته..قالو:"حرقوه وانصرو الهتكم ان كنتم فاعلين" سبحان الله الآلهة تَنصر لا تُنصر ..

..كانت مثلا المرأة ان ارادت الرأية في وجه الآلهة قالت ..لإن نجا آلهتي ابني من هذا المرض لاجمعنا حطبا لحرق ابراهيم ..كانو ينذرون لحرق ابراهيم جمعو حطبا هائلا كانت محرقة ضخمة شاسعة كانت نار عالية لدرجة انه ان مرة طاىر فوقها سقط قتيلا من شدة حرها ..كانت جحيما ..قالو :"ابنو له بنيانا فالقوه في الجحيم" كان وسط الحشد اهله منهم امه وابيه ..اراد الجمع ان يدخلو ابراهيم وسطها فلم يستطيعو ربطوه في منجنيق €وهي الة حربية قديمة كانو يربطون بها الاحجار او القذائف ويرموها لوسط الحلبة€..ربطوه بالمنجنيق انها اللحظات الاخيرة نزل جبريل لابراهيم..جبريل الذي بطرف جناح قلب قرية ..جبريل الذي بصيحة دمر امة ..جبريل سيد الملاىكة قال : يا ابراهيم ألك اليا حاجة ؟..تريد مني مساعدة..فنظر اليه ابراهيم وقلبه متعلق بالله قال:يا جبريل اما اليك فلا ..اما الى الله فنعم ..حسبيا الله ونعم الوكيل.. بدأ ابراهيم يستعين بالله عز وجل ويدعوه جلا وعلا والقوم يشهدون حرق ابراهيم الذي ربط بحبال ويستمتعون بحرقه وقتله ..ارسلوه وسط نار فنزل امره تعالى قاىلا:" قلنا يا نار كوني بردا وسلاما على ابراهيم "لو ان الله قال كوني بردا فقط لمات ابراهيم من شدة البرد ولو قال كوني برظا وسلاما لصارة كل نار في دنيا بردا وسلاما ولكنه عز وجل خصها على ابراهيم فقط ..صار القوم كله ينظرون اليه يحترق فاذا به يحترق منه شيئ فقط هو الحبل الملفوف عليه فقام ابراهيم وكبر وسجد لله شاكرا وناس متعجبون ..قال والد المشكر من ربه :نعمة الرب ربك يا ابراهيم ....اما امه فنادته وهو في نار يصلي و يسجد :يا بني سل ربك ان ادخل اليك ..فدعى الله ودخلت عليه نار ..وناس يشهدون ..."فأرادو به كيدا فجعلناهم الاخسرين" خرج ابراهيم من نار والناس خائفة هناك من يقول انه جلس وسط النار عدة ايام وهناك من يقولو ساعات الله اعلم كم لبث وسط نيران ..لكنه بعد ان خرج لم يقتربو منهم ..وحتا بعد ان شهدو اية الله لم يعبدوه الا ابن اخيه واسمه لوط وزوجته سارة ..

وهنا نوقفو قصتنا وان شاء لله الحصة جايا نحكيو على سيدنا ابراهيم مع الملك طاغية النمرود..

عبرتنا من هاد القصة انه واليديك كيف ما بغاو يكونو خاصك تكون بار بيهم وطيعهم الا فشرك الله او الوقوع فالمعصية والاثم ..نعاملو واليدينا بالحسنى ..ماشي منين الام تطلب من بنتها ولا ولدها شي حاجة يتأفف وينوض بزز منو يديرها ..ولا يرفض ويسبق عليها اشياء تافهة ..مهما كانت الاشياء مهمة متكونش اهم من واليديك ..كلنا غالطين فحقهم لي مغالكش لكثير غالط بلقليل ..الله يسمح لينا من الوليدين ..وما يعرف بحقهم غير لي غابو عليه او فقد واحد منهم ..الام هي الحنانة والقلب لكبير والاب هو سند ديالك والحامي عليك نهار لي يغيب عليك خاصك تكشري على نيابك الا بغيتي زمان وولاد لحرام مايديروها بيك..ولا الحثالة دالعائلة يرجعو ينعتو فيك ... ⏯..

رجعات لدار تغذات ومشات لواحد صدقة مع صاحبة فاطمة تعاونها فتسخار وغسيل لماعن مبقاتش كتوفر حتى فرصة باش تقدر تجمع فلوس لكريديات لي متراكمة عليها بسباب دوايات وفحوصات ماماها..لدارهم رجعات..ولعشا لي جابت معاها سخنات ...وجدات وحطات وباش تفيق مها مشات عيات تعيط باسمها وحركات ..وفاطمة مغمضة عينيها وحلفات ليهم لافتحات ..دخلاتها الخلعة وبدات كتحرك فيها بجهد وما من موجيب توشات راسها ويديها ورجليها سخونة ولكن علاش مفاقتش ..بدعقتها ناضت كدق على جارتهم لمقربة كتترعد حلات عليها لمرا مخلوعة فايقة من عز نعاسها شافت حالتها هكذاك كتدخل وتخرج فالهدرة 

سماح :خ..خخ.خالتي يطو ..م.مم..ما..ماما ..سخونة ..م..م.ما..ما اخالتي ما ....

دفعاتها يطو ودخلات تجري لدار قلباتها وهي طلع ليها لغطا على وجها وكتردد جملة وحدة"إن لله وإن اليه راجعون"..سماح لي لحقات عليها غير سمعاتها فشلو عليها ركابيها مشات ناحيت مها وطاحت هلى صدرها كتفيق فيها وتزعزع فيها وحماتها لغوات ولبكا ونحيب 

سماح:ما فيقي ..ماما اهييء اهيءء ..حلي عينيك شوفي فيا ..ماما ها انا جيت اهيييء..نوضي تعشاي سخنت لعشا ا ما ....ما ..آ ما..ما .اهييييييء اهييء اهييء..ما مديريش فيا هكذا..ما ..اما ..ها خالتي يطو جات نوضي شوفيها ..مااا ..مااا ...لمن غتخليني ..حلي عينيك جبت ليك وجه الله ونبي رسول الله ..حلي عويناتك اميمتي..(حطات وجها على صدر مها ومزيرة بيديها على لباسها وكتغوت على حر جهدها) ..اهيييء اهييء....مااااااااا ....مااااااااا.اهييييييء اهيييييييء ....متخلينيش ...اماااااا ...انا بنتك ..سمااااح امااااا...يمااااا ...وااا ماااامااااااا ...لااااا لاااااا ...متخلينيش ..نمووووت من بعدك ...اهيييء اهيءءء ماااااااا

..سمعو جيران لغوات وتمو قاصدينهم يشوفو اش واقع ...

بين ليلة ونهار تقلب الحال..وسبحان لي ما يسهى وما ينام ..رب الكون وخالق الارض وسما فسبع ايام ...كانت مونساها واليوم صبحات بين يدين الخالق المنان ..مشات من نعاس لنعاس غفات وماصبحات وخلاتها بين الانس والجان ..وحيدة وعيون ناس عليها غريبة شي عزات عليه وشي ينهش فيها بحال جيعان..ها لي نار كوياهم عليها وعلى ربيع عمرها شفقان ..وها لي مغندف وبكره غازر فيها وقلبو مالي كره ونكران ..وها لي طامع وطمع على مولاه سلطان وشيطان ..وهي ببكاها وحرقتها بقات فلحجر والحيطان ..يتيمة يا ناس ورجاها فيكم وفرحمان ..

🌿ودعت إمي ومعرفت.. كيف شفت هيك عيون ..هيدا الوداع لي خفت..اخر وداع يكون..وحضنتها وحامل معي ..روحي على كفي ..حملتا وإلت يا مدمعي..هلئد بيكفي..🌿

دار عمرات وكتر داخل والخارج عيطو لفقيه ديال لحومة جا وأكد ليهم لخبر ..سدو على فاطمة لباب وحلفات سماح متزحزح من حدا عتبتها ليل كولو وهي جالسة تبكي وتعدد ويطو وشي جيران معاها ..بقات فيهم ولكلام لي كتخرجو من فمها قطع قلبهم

سماح:الله يا لحنينة لمن خليتيني ..الله يا ميمتي وشكون يبكي حري من بعدك ..الله يا ميمتي ولمن نشكي ونبكي...الله يا لميمة وشكون يرضى عليا ..مشات لي ربات وعليا قاصات وعانات..مشات لي تحن وعليا تبكي وتأن ..مشات لي تفرح لفرحي وتشقى لجرحي ..مشات وخلاتني لا حنين لا رحيم ..شكون عندي من بعدك ...الله ياربي علامن نحط راس ..يتيمة يا ناس وما ليا والي ورجايا فيك يا لغالي ...يتيمة يا لحباب وفكبدتي تشويت وعلى ميميتي وفراقها ما قديت ..يتيمة يا زمان الغذار ولهاد ضربة ما كنت موجدة ولا ليا قداار...يتيمة يا الوالي وعزايا ليك ورجايا فيك تحن وتشوف من حالي ...لميمة مشات ولبنتها خلات ...

يطوعنقاتها عندها كطبطب عليها:رجوع لله يا بنتي ..مديريش هكذا غير مكتحرقيها ..دعيلها برحمة ..وثبات عند سؤال ..

سماح:..الله يا خالتي يطو ماتت وحيدة ...معرفتها توجعات ولا كانت محتاجة ...الله يا خواتاتي وخليتها مريضة...ما عرفت واش شهدات ولا سكرة الموت ليها تلفات ..ما عرفت واش ثبتات ولا لموت ليها غفلات ..

...بكات حتى بح صوتها ونار لي شاعلة فقلبها مبغات تطفى غير ما جمرتها كتزيد تريج ..حطات راسها على صدر يطو ودمعتها على خذها وكتافها كيتهزو بشهقات خانقاها ..

... خرجو جيران وتافقو رجال باش يصبح الحال يقصدو باب جامع ويجمعو من المحسينين باش يديرو ليها لعزو ويشريو ليها لكفن وكاين لي من جيران عاون بنصيب لي قدر عليه ..فهاد الوقت كتلقى الخير غير فداك لي قلة شي حكاتو وحاس بلي بحالو ...سماح ومها كانو على عينين جيران داخلين سوق راسهم وشادين تيقارهم تلقاهم فالحوزة ووقت شدة ..والا كان باش يعاونو ميبخلوش عليك ويقولو لا ..صبح صباح وجاو شي جرات ها لي جايبة سكر وها لي جايبة كسكسو ولي محملة معاها كدرة وكسكاس وها لي فيدها ريشو (بوطة ديال الارض علامن كيسخرو فالمناسبات ) وكاين لي جابت لحوفة ووسايد داروهم فالحوش (وسط دار) وجارتهم يطو حلات دارها ولي جا من لعزايا كيدخلوه تما ..هذا باش يعجبوك ناس لحومات شعبية الا شافو واحد محتاج يعاونو ويوقفو معاه ..جا خال سماح لي وصلهم لخبر من جيران جايب معاه لحم وشي سخرة زعمة شوفوني راني داير بالواجب ..وهو نهار قصداتو يعاونهم رجعها توطا فدمعها ..سماح غير شادة عتبة لبيت وجالسة حلفات متزحزح ليهم ومرة مرة تفتح لباب وطل على مها تشوف واش فتحات عينيها وترجع تسدو.. جات لغسالة لي كتغسل الموتى باش تغسلها وتوضيها فتحو عليها لباب وطلبو من سماح تتوضا باش تدخل تعاونها بقات معاها يطو حتى قنعاتها خلات الغسالة تدخل لبيت توضات سماح ودخلات معاها كتشوف فجنتها مجبدة تقول ناعسة ماشي ميتة 

سماح بغصة فحلقها ودمعتها على خدها:راه غير ناعسة شوفي ..شوفي .كاع ما زرقة ..راه عاد سخونة ..شوفي رجليها سخونين ..خلينا نديوها لطبيب يشوف مالها ..راه كاع ما ميتة 

لغسالة طبطبات على كتفها:نعلي شيطان ابنتي ودعيلها برحمة والمغفرة ..

بدات لغسالة كتغسل فيها وسدو تحت لباب بفوطة باش لماء ميخرجش وبداو كيوضيو فيها وسماح مقدراتش تحط يدها غير كتبكي فصمت وتشوف فيطو ولمرا لي جات كيقلبو فماماها حتى كملو ليها ولمدوها فخرقة بيضاء..جمعت يطو لما ودارتو فسطل نشفات لبيت مزيان ودخل لخال وواحد راجل من جيران دخلو لكفن هزاتها يطو ولمرا حطوها فيه وخلاو رجال يخرجوها لجامع وفهاد لحظة سماح غابت على دنيا حماتها بلغوات ورجال مخرجين مها بذكر الله ..ولا إلاه الا الله محمد رسول الله ..بحرارة لفراق ولوجع لي ساكنها مقدروش عليها بقات تتنطر باغية توصل للمحمل ..وروحها معاه خارجة كتترحم ..ها لي شاد ليها اليد وها لي مدرعها خايفها طج وتهمل ..وكاين لي كيدعي معاها بصبر وربي يحفظ ليها عقلها من لهبل...خرجو حنانتها ودار خلات ومعمرها ترجع تعمر وتكون ليها من لمونسات...وهي دمعتها نشفات وحرقتها ابدا ما خمدات ونار فيها زهرات وشعلات ..وبصدمتها تركنات وجفنونها حلفت لغفات ..تصدمات وتبكمات ودار خلاتها بين يدين لعزايات ..عاذرينها وحاسين بيها وللحالة لي عليها تلات..على امها مشات وصلاة ومن بين يديها دوزوها لمقبرة وفيها تدفنات ..ولدار فاقدة طعم الحياة رجعات..ولمفهوم اليتيمة دبا عاد تسمات ..يتيم يتيم الام اما لي مات باه مزال رحمت ربي عليه نزلات ..

بعد 3 ايام وسط فتنة لعزاء جاب خالها ورقة وعطاها وقعات...ولمحتواها كاع ما فكرة تكون من القاريات ..واشمن عقل تفكر بيه وهي مزال من صدمتها ماصبحت من الفايقات ...جات سبع ايام ودار خوات ..وسماح للغربة عاد معاها سرات ..ولبلاصت مها لمحات ..خالية ولحافها مطوي وجمعو لمخدات ...جلسات كتشم فريحة ماماها وتتحسر على لي فات ..شافت خالها دخل ومعاه راجل ولدار ولبيوت هاز يدو كيشاير..مرة دخل لبيت مع لكوزينة وهو غير يعبر ويتخاير تبعات ليه العين فشلانة معرفت تنطق ولا غير تساير..حتى جات مرت خالها واقفة ويديها على خصرها حطات وفوقتها تعوجات ..وفسماح ميقات ونطقات :

-دار شاري ليها جا ..وخالك فيها باع وشرا ..ومن غذا قلبي على راسك فين تمشي ولا عيشي فلخلا ....

سماح تسرط ليها لسان وما عادت تخرج لكلام وبين مرت خالها وخالها كدور فعينيها وتسناهم يفهموها اش صاير فلمكان ..

كمل خالها مع شاري وتوادع معاه وليها جا مبتاسم وعاجبو الحال فرحان شاف فمرتو 

_شفت هاد خيتي مزال مسرحالي رجليها هنا ..(شاف فسماح مخنزر) افيقي الالة معنديش الخيرية هنا ..جمعي راسك وزيدي لباب الحباب ..

سماح وقفات كتستوعب اش كيقول:مفهمتش ..كيفاش لباب ..ناسي بلي رزق المرحومة هنا ..وكيف عندك الحق عندي حتا انا ..ولا يمكن تقول صغيرة نغلب عليها ..راه نلعبك نتا وطير ابكر لي حداك على صبعي ومنحيرش فيكم 

ضحكات مرت الخال كتتشفى:وهادي هي في عشنا وينشنا ..اشمن حق اماما لي كتهدري عليه ..قالك تلعبنا ..(جراتها من يدها مخرجاها لبرا) سيري قلبي على حقك فجيها اخرى اما هنا عندك غير لخرقات لي فوقك..

تنطرات منها سماح وبدات فلغوات:راااه هادي دار الورثة الالة وكيف نتوما عندكم الحق عندي فيها نصيب ..عووك عوووك اعيباد الله ..جاو هجمو عليا وسط دار وبغاو يخرجوني منها ..محشمتو ما استحييتو (شافت فخالها ) ختك حتا ترابها مزال ما جف وجاي باغي ترمي بنتها لزنقة ..اسيد رجال يا راضي راه انا شرفك ..بلاصت ما تحضن عليا وتصوني باغي ترميني لكلاب وذياب ينهشو فيا ..

م.خ:وخرجي وسيري قلبي على راسك مالنا ولدناك ونسيناك ..سيري عند باك وعائلتو هما يهزوك 

خرجو جيران كيتفرجو ها لي كطل من سرجم ها لي من سطح وغواتهم واصل لفين سماح طارت على مرت خالها كتشتف عليها وتعاير مخلات غير لي نسات حتا جا خالها بعدها عليها وضربها ..حكرو عليها دخلو جيران فكوهم وولاد يطو كانو غيقتلوه تحماو عليه يجيبو ليها حقها ..اما يطو خذات سماح عندها لدار كتهدن فيها وخالها برا مجلخ فمو ولكن صدمتها منين قال 

الخال:معندها حق ولي بغيتو تقولوه قولو ما يسالني حد رزقي هذا ..وهي لي تنازلت على نصيبها بيع وشرا ..وعندي دليل ...وقولو ليها بغات توصلها فين توصل مغادي تاخذ مني لا حق ولا باطل ..

ضربت سماح ففخاضها :اويلي على تنازلت ..اويلي فوقاش انا باعلي ولا شريت منو ..(تفكرات الورقة لي وقعات )اويييليييي الكافر بالله دارها بيا ..عفت رجال غذرني وخذالي رزقي .. فين نمشي ..فين نحط راس وانا لي بقيت لا ام ولا بو كيف ناس 

يطو عنقاتها :غتجلسي معايا ابنتي حتا يحن الله ..الله ياخذ فيه الحق ..ديوتي عفت الرجال ..بلاصت ما هو ياخذك عندو جلاك لزنقة..يجليه ربي لجايحة لي تخليه وتذريه ..وما يكول زمان عليه حتا يرحع يطلب وماد يديه

مشا الخال ورمى لسماح كسوتها فزنقة سد لباب وخلاها تتلاوح فزناقي مهماتوش حالتها ..لو ما جارتهم دخلاتها وطبطبات عليها كاع ميتسوق ولا يصفر عليها ..فليل جالسة فبيت ناعسة على سداري وجامعة رجليها عندها كتبكي وتعطي لمن يبكي دخلات عندها يطو عزات عليها وهي فديك الحالة جلسات جنبها وطبطبات على كتفها بحنو كتواسيها

يطو:متفكعيش روحك ابنتي ربي كبير ما يسد باب حتى يفتح بيبان وها نتي معانا حتا يفرجها ربي

سماح:خذاليا حقي اخالتي ...حكر عليا ..حرام عليه ..حرام عليهم منين نلقاها ولا منين ..لا اب يفكر فيا ولا عائلة تسول فيا ..ويزيد خالي خو ماما شقيق يديرلي هكذا ويتخلا عليا ..ياك لفلوس غير خنز دنيا علاش رجع بنادم عابدهم لهاد درجة ..ربي وصى على ليتيم وهما عقروه وحكروه وذلوه وزمان ليهم غرار مكيفكروش فيوم القرار 

يطو:الحمد لله ..دبا ربي يحن عليك ويا ليتيمة يجيبهم بين يديك ..مذلولين وحانيين راس..خذيتي دعوة رضا من مك عمر ربي ميخذلك ولا يحوزك لحد ولا طرفك ينداس ..ودبا تشوفي ذنوبك تخرج فيه وفولادو ما يبقى فيهم حد قلبو على حد وما يلقى علامن يحط راس...ليتيم ذنبو كبير وربي يجيب حق عبادو كبير وصغير ..قال تعالى .."فأما اليتيم فلا تقهر وأما سائل فلا تنهر ".. 

سماح:حسبيا الله ونعم الوكيل فيهم 

يطو:غتشدي فراسك ابنتي ..المرحومة الله يرحمها ..بقيتي نتي تقاتلي مع زمان ..زمان غذار متخليهش يبهدلك ويرجعك عكونة وسط قراناتك وترجعي حلالة ودلالة بين لالياتك ..كوني لالهم وجيبيها من فم سبع ..ها نتي خالك وما رحمك ما تسناي من لغريب والو الا كان لقريب بهدلك وما دار لا بدم ولا بشرع ...

سماح بغصة:اش ندير اخالتي ..حرقة ميمتي نارها قوية ما بغات تهمد 

يطو:عضي فصبر وخا صبر جمر والحرقة غير ما كتزيد وتخمر ..ودنيا عمرها تعطيك الى نعستي وتوكلتي على غيرك ..سعاي ليها وقاتلي معاها وحاربيها وغذري بيها قبل ما ديرها بيك وطيحي بين ناس تفرس فيك ..خدمتك لا تسهايش عليها وربي الا شافك ناوية و عازمة عليها ..غيدلك لطريقها حتى توصلي عليها ...والله يجيب ليك شي خبزة فين تاكلي وتوكلي ..ولي داس عليك برجليه يجي داك نهار عند رجليك يسلم عليها ...نعسي دبا وغذا ليها رب رحيم يفرجها ان شاء الله ويفتح علينا بيبان الخير ..

سماح غفات ويطو عليها ناضت وخلات ...وماعرفنا ليام ليهم اش ضامرة وعلاش نوات ....

زكرياء شاد تيليفون وكيهدر بصوت منخفض:الله يحفظك خويا عصام ..مهم نعول عليك ..نتا وعليا تبقاو مع الوليدة 

عصام:الله يا ودي غير سير وكون هاني من ناحيتها راه الحاجة فوق راسنا ..

زكرياء:والله اخويا الا حشمان منك وهاد الخير عمر ننساه ليك لا نتا ولا ديك سليعفانة 

علياء من مور عصام كتغوت:هاد سليعفانة راها غير ختك معرفتك خويا ولا عدوي وا غير زين ضوسي مع راحلي بعدا راه كحل كحل خلي نقطة بيضاء

ضحك زكرياء على هبال ختو:مهم عصام راه علياء والوليدة امانة فرقبتك 

عصام:راه غنتقلق منك اصاحبي .. نتا غير ديها فخدمتك متشطنش راسك ..وجيب لينا شي مجبدت لعينين من تما 

زكرياء:الله يمسخك ..مكانش فحلاوة بنت لبلاد ...مهم منطولش عليك ..رد لبال لراسك وليهم 

عصام كيضحك:شفت نتا خاصني نقطع عليك باش نرتاح ..الله يوصلك على خير اخاي ..سلام عليكم ..

واقف شاد صف فالمطار يستنى مع البعثة ديالو غير امتى يساليو تحقيق فوراقيهم ويشدو طريق لصين فين عندهم بعثة طبية لمدة 10 ايام ..متوتر بزااف ومعارف حتا علاش ختاراتو ادارة الجامعة باش يمشي مع اطباء كبار وعندهم وزنهم فالمجال وهو اصغر واحد فيهم وعاد ياله بادي رحلتو والمشوار ...معرفها دعوة خير خدمة عليه وزادتو فصبر ...ولا صدقة قدمها لمحتاج جاتو اجرتها فهاد نهار ..لي عارف فرحتو ما ليها قداار ..وحلمو كيتحقق قدام عينيه وفرحتوو بوسع الكون تتعبر ..جاهم الموضف مبتاسم واعتاذر منهم على تأخير تمنى ليهم رحلة موفقة وتاجهو للممر ..شخصيتو كتبان من الهيأة ديالو ..وخا صغير فسن الا وكتبان عليه..انسان عاقل ..مرزن ..ماشي خفيف ..غامض مكتعرفيش واش معصب ولا فرحان جدي فالملامح ديالو ..هدرتو قليلة ولكن الا هدر يسكت قبيلة ..جليد فالمشاعر ...عملي ومنطقي ..عندو خدمتو وانه يحقق مسعى سنين هو اولى اولوياتو ...فطيارة جنب نافذة كان ظلام تقريبا منتصف ليل جالس وحداه طبيب كبير فلعمر من الاساتذة لي قراوه ومن الاضدقاء لي كسب فمجالو بحكم انو عقلو من ديما سابق عمرو ..شاد كتاب بالانجليزية dn't tell Mummy .. للكاتبة توني مغواير ...غادي معاه حتى جات فبالو همسة من الماضي ..ابتاسم لا اراديا ...كيفاش حتا جات فبالو دبا ..اش فكرو فيها ...دور وجهو لنافذة كيشوف فظلمة سماء ومشى بذاكرتو لداك نهار ...

كان جالس فصالة وطبلة حداه عامرة وراقي وسداري لي جنبو وتحت من رجليه مرون ومعصب مع واحد الماتيير وخاصو ولا بد يزطط راسو فيها ويحصل المونسيون ديالو ...صعيبة ومخربقة نهار كولو وهو معاها ومزال لاقي فيها صعوبات والامتحان الاخير باقيلو يومين ..ونعاس ولعيا واخذين نصيبو فيه كانت ثانية بعد منتصف ليل ومباغيش يستسلم لنعاس حتى يكون مفضي معاها ويتجاوز اخطاءو..عيا بالقهوة ووالو عينيه كيتسدو ..استسلم لنعاس بين لوراق ناعس معذب وجهو على طبلة ورجليه مجبدهم تحت منها ويديه طايحين على سداري ..تقولي ميت ماشي ناعس ..جاتو نعسة حلوة وخا معذب حتى غرق فيها وهو ينتاشلو منها صوت تيليفون كيصوني هزو بلا ميشوف شكون جاوب بصوت ناعس 

زكرياء:سلام عليكم ...

ضحك ديال بنات:مسكين فيقناه هههههه

زكرياء رجع تيليفون يشوف نمرة لقاها بريفي ولمح ساعة قرب لفجر يأذن:مكتحشموش تصدعو لبشار فنص ليل ..باغيين تجمعو شوية دعاوي د شر 

وفاء:لا اخويا حنا خدمة قم وصلي و للنوم لا تولي 

زكرياء:خدمة جديدة هادي ...متمشيش تنعسي حسن ليك ولا شاط عليكم لفلوس ضيعوهم فلخوا لخاوي بلاصت متجمعو فدعاوي سيرو تصدقو بيهم تستأجرو بيهم

وفاء:والله اخويا مكنكذب عليك الا يغينا غير نوضوك لفجر 

زكرياء ضحك بصوت خافت:نيت ربي سيفطكم كيف رحمة 

وفاء:ايوا شفت ..متنساش دعي معانا انا وصاحبتي راه غندوزو لباك 

زكرياء:الله يوفقكم ..ولكن بلاصة متصدعو لبشار شدو كتاب وراجعوه ..إيا رووول للوطني....

قطع عليها ناض توضا وصلى ركعات قيام ليل وجلس كيدعي ويناجي ربه ومنساش لبنات لي فيقوه من دعوتو...اذن لفجر صلاه جمع وراقيه ستفهم فوق طبلة ومشا لبيتو ينعس ..فاق صباح كاعي راسو مشقوق غير فطر شرب كنينة وتاجه لمعتكفو صلا ظهر كان عاد كيف اذن .. دخل لصالة كيراجع حتى لعصر ..مانع كليا على اي واحد يديرونجيه منين يكون يحفظ ..ناض دار كيسكروط فرماج وكاشير فخبزة وجلس يعالج شوية ..حتا تفكر تيليفونو طلع جبدو لقى فيه مساج واتس ..

....:دعيتي معانا ولا نسيتينا اسي لفقيه 

جاوب:الا بغيتي دعوتي تستجاب سيري جبدي كتوبك وديها فحفاظتك وحطي داك المشقوف لي بسبابو غتجلسي تقراي مع ولادك 

....:متخافش عليا عارفة سواريا ..وقاريا اش ندير وانا ماشي نية ..نبات مع الحية وكاع مديرها بيا ..نخرج صحة سلام وليام ما تتجلا بيا ...

زكرياء:لسانك طويل ..على الله يكون عقلك بطولو تنجحي بلا امتحان نتي ..#ارمانة_دويبة

...:غننجح ونسكت شلا فام قياس لخير بحال فمك ..وغندير عرس بكارطونتي 

زكرياء شاف الميساج وحط تيليفون مشا يكمل حفاظتو دازت مدة زكرياء دوز امتحانو ردو عليهم وربي مخيبوش نجح بنقطة تحمر لوجه ..دوزو صحاب لباك سيفط ميساج ليها

زكرياء:اخر نهار فمعاناتك .. كيف دوزتيه 

...:الله لا يوريك خرجو مني زيت لبلدية حرة 

زكرياء:شفتي ذنوب ناس لي صدعتي ها دعاوي خرجو فيك 

...:ولااا راه ماشي انا لي هدرت صاحبتي ..انا كاع مصدعتهم كنت غير كنضحك 

زكرياء:اممم وعلاش تعطيها تيليفونك راكي مشاركة معاها ذنب وغيخرج فيكم بزوج

....:علاش يخرج فيا ..راه غيخرج فتيصالات هي لي كانت غتشفر لينا صولد ...اما حنا كاع منهدرو بيه ..وزايدون كنا باغيين نديرو الخير ..ونتا اصلا فيقناك لفجر 

زكرياء:اش سماك الله 

...:سموحة اللحلوحة ..ام عيون مذبوحة ..كيوت ونحنوحة ..انااا..بان ريسمان بان 

زكرياء:اواااه كاع هادي غير سميتك ..ما شاء الله مجلد 

سماح:ونتا شنو سميتك

زكرياء:ياك سميتيني سي لفقيه

سماح:لفقيه بو مرايا عندو ضربة مية راية 

زكرياء:مشفتيش ضربة المصحح منين يجبد الخط العريض بالاحمر من لقنت لقنت شحال قاسحة ..وديك ساعة غتكون لحية دارتها بمولات نية 

سماح:عندي امل ان شاء الله غننجح ..ونصورها ليك تشوف واش مولات نية لي غلبات ولا لحية لي سمها ليها لدغات ...نتا الفاهم اش كدير بعدا 

زكرياء:بناج الا كتاب 

سماح:كتشد لبوانتاج ...عساس وجالس تفهم ..انا قلت كاع غتكون منك لرئيس ديال لاناسا

زكرياء:مني لاتحاد العالم فنووي ...نشد ليك بلاصة نائب لعساس 

سماح:ومالو لعساس ماشي راجل..ياك خدمة حلال وما يمد يدو لحد ليك شرف تكون عساس ..كيقولك خادم القوم سيدهم 

زكرياء:عندك صح ..

هنا توقف حديثهم حتا جا نهار لي غيردو على صحاب الباك ..وفاء مسافرة لعروبية لدار جدها ..هربات تحسبا لاي امر طارئ مع باها حتا الا منجحاتش تكون بعيدة عليه ...اما سماح فالبيضة غتفقص تحتها ..جاها وجع لولادة بلا حمل ..لدرجة بالخلعة نزلت عليها لغيكل قبل وقتها وجاتها ردة ودوخة مرضات ومعرفتش علاش هاد الحالة كلها ملقات معامن تهدر من غير الفتى المجهول سيفطات ليه ميساج 

سماح:شوف اسي لفقيه سمحلي بزااف والله ماكنا قاصدين نديرونجيو شي حد ..غير ضحك وها هو هجرو ليا ..

بعد مدة جاوبها زكرياء:اش خبار الحية لدغات مولات نية 

سماح جاوباتو بأوديو يديها كسترعدو وصوتها مخنوق بلبكا:ما لدغاتها ما غلباتها غير الخلعة خنقتها ..ودوخة زعزعاتها وعلى دنيا قلباتها ..

زكرياء فأوديو:ناري رمانة كتبكي ..واش شفتي النتيجة 

سماح :لاا معنديش شكون يشوفلي ..وخفت نشوف انا 

زكرياء:سيفطيلي ديتاي ديالك ..انا نشوفلك ..ومنها نتأكد واش دويبة لبيبة ولا نعجة بليدة 

سماح :الله يسمح ليك . غير عنداك تكذب عليا ..راه قلبي غيسكت وحق الله 

زكرياء شاف نتيجة كانت ناجحة ب 11 مقبول :ونية غلبات لحية بصح غير بدعاوية ..مبروك الالة راك نجحتي 

سماح بفرحة:نجحت..حلف ..قول وحق سيدي بوبزازل الا نجحتي ..قول يعطيني لعما فترما لي منها للبرمة الا نجحتي يا سماح ..قول يعطيني زحف ونشد ركنة وما نقيم غير حتى نشحف الا نجحتي يا سماح ..حلف حلف 

زكرياء صدماتو ما عرف باش تبلى وديك الهدرة واش كيسمع فيها ولا كيتخايل ليه بجدية عصباتو مبغاش يزيد يهدر معاها ليصدق جارحها بالهدرة:نجحتي....مبروك عليك اختي ..

بلوكاها وخلاها كتهدر بحدها من بعد ما فاقت من غمرت فرحتها واستوعبات اش قالت فغفلتها ..تزنكات وحشمات وتمنات الارض تتشق وليها لو كان غير بلعات .. تأكدات بلي بلوكاها من بعد اش قالت بلا هواها ...

من اعمق بقاع ذكرياتي ..تُنتشلين من حين الا حين كأنك ذاتي..

غريبة انت وعسل عينيك يغزو شهواتي ..وانا العابد زاهد اعتزلت النساء ولكن انت هي مسعاتي ..اراك حلما بعيد و اتمناك لي في خلاتي..اااه من عشق غرامك يا سيدة النساء وااااه من لوعتي في جعلك مرآتي...انظر الى انعكاس صورتي في مقلتيك واتأكد انك صرت لي حتى مماتي ...وانا رجل شرقي اذا عهد وفى ولن اخلف العهد ابدا وسأجعل منك سباتي ...تالله لن اغذر ولن اخون بل سأكون لك حماية في الحياة من كل اتٍ....فهل تقبلي بطلبي لجعلك انت الوحيدة محل أربع من زوجاتي ...

رجع بتفكيرو لحاضر ...

زكرياء فحوار بينو وبين نفسو:تكون دارت عقلها زعمة (ابتاسم) #رمانة_دويبة( ضحكة خفيفة) سليلة حديدان ...فين ما كانت الله ييسر ليها امورها ...

بقى جالس كيفكر فهاد ندوة و كيفاش غتكون ؟..واش غيقدر يثبت حضورو ويخلي بصمة زوينة فين غيكون؟ ...واش هو قد المسؤولية لي حط بين يديه لقدوة ديالو لي هو استاذو وصاحبو فنفس الوقت وكيعتابرو بمثابة الاب ديالو ويصون؟ ..كيتمنى ميخذلش ثقة ديالو ويمثل تخصص ديالو احسن تمثيل فالمضمون ..غفى وهو كيفكر و يدعي الله يثبتو على اش كيدير ويكون ليه فالعون ...كيقول الله عز وجل سبب يا عبدي وانا نعينك وربي ليك عمرو يخون ..توكل عليه وخدم عملك متقون ..يجازيك بخير عمرك تخيلت انه ليك يكون ..

وصلو لصين وبضبط مدينة #تشينزين (بنزين ليصونص مازوط افريقيا كاز #مقاطعون ...جاكي شاااان ..اووواتاكاو... .زريعة كاوكاو.. سمحولي تحمست شي شوية استغفر الله..طلع البدر علينا.. نرجعو لعند زكرياء😂) ..تشينزين.وهي من اكبر المدن صينية ..هنا فين غيجلسو طول هاد المدة ويديرو دورة تكوينية قصيرة منها يبرزو قدراتهم طبية ومنها يستافدو كتر ..مشاو للملحق فين غيجلسو اول شي دارو اتاصل بدار طمأن الحاجة عليه وشد شوية فعلياء لي غير كدمع ..وخا مزوجة ولكن مكتسخاش تبعد عليه هو خوها وباها لي فتحت عليه عنيها وحتا هو مو وختو يقتل ولا يتقتل عليهم ...كمل معاهم الهدرة دخل خذا دوش ونعس ..حيتاش مزال تابعو ميدار وخاصو يرتاح مزيان ويوجد راسو لهاد الايام لي جاية ...دازت 10 ايام بين المستشفيات اكتاسب منها خبرة كتر وقدر يفيدهم شحال من مرة فشحال من حالة ونصيحة واستشارة طبية ..عقلو فطين دغيا يتعلم وسريع البديهة هذا مساعدو فمجالو بزاف وهذا علاش ختاره استاذو يكون معاه فالبعثة هو وصديقو الفلسطيني المختص فجراحة القلب والشرايين ...كان اسمو "عُرَيْبْ ثائر "قرا هو وياه فنفس الكلية ومن تما هما صحاب ..عُريب شاب فعمر 32 سنة متزوج من مغربية كانت حتا هي معاهم فالكلية تخصص اطفال سميتها فاطمة زهراء ..(ديديكاس جعواقة ديال فاتي لبرنسيسة.. ها حنا الالة زوجناك 🤣 قولي خبيز )جات مع راجلها منها خدمة ومنها يدوزو فترة لعسل كيتقطر ..وخا فترة قصيرة ولكن هذا هو حالهم الوقت كلو فالخدمة .. من بعد ماداز وقت المؤتمرات والاجتماعات والعمليات لي مرتاحوش منهم طول هاد الايام ..رجعو نصف البعثة لمغرب والنصف جلس يدير فترة راحة واحد الاسبوع ومنهم زكرياء وعريب وفاتي ..هاد ثلاثي من الجامعة وهما مع بعض ..وباقيين كيستغلو اوقات الفراغ مرة مرة ويحييو ايام دراسة والمغامرات ..فاتي كانت بمثابة صاحبهم ..بنت بنئة راجل ..هي كيوت وصغنونة ولكن افعالها تعول عليها مترجعش لور..كان كل واحد فيهم هاز ساك ديال تخييم فوق كتافو ..وجهتهم جبال"كونلون"الصينية اكبر سلسلة جبال فآسيا..واقفين مسطرين بثلاثة واحد حدا واحد 

زكرياء طلع راسو لسما كيشوف لابعد نقطة من مرآى عينيه مبتاسم:سبحان الله ..خلق فأبدع

عريب:لك دخيل اسم الله ادايش ها المكان بيأسرك 

فاتي هازة عصا سيلفي كتصور فلوغ:سيلفي العشران ...قولو تشيز(خذات ليهم صورة من وسط لفيديو) ...مكنتش متوقعة غيكون بهاد روعة فالحقيقة (خذات نفس ) ااااههه لهوا يرد روح ...

كان المكان عبارة عن جبل نابع منو شلال كبير واسفل ديالو كيصب فنهر طويل.. والمحيط ديالو كولو اشجار وخضورة منظر يخطف الانفاس جنة على الارض ..

بداو فترتيبات باش يتسلقو الجبل زكرياء وعريب محمقين راسهم بين المعدات وكيتفقدو واش كلشي موجود ولا ناقصة شي حاجة ..اما فاتي كتصور ومخليا عريب واحل فجلالو وجلايلها معاه ربط ليها لحبل ديالها مع لحبل ديالو وخلاها قريبة منو اما زكرياء فكيف عادتو مكيبغيش يتقيد مع حد قاد امورو وخلاهم يتبعوه ...من ديما كيبغي اي حاجة فيها ريسك ..مخاطرة ..الادرينالين كينعش القلب والرعب اللحظي يخليك تزيد فسرعة البديهة وتستعمل فن رد الفعل سريع ...تسلقو نصف ديالو وصلو لمساحة تقدرهم باش يدوزو ليلتهم ونصبو لخيمة ملي شافو شمس بدات تغيب يرتاحو ويتمتعو بهاد الجو سكوووون كيخليك ترتاح من سلبيات الحياة ..قادو الخيمة وشعلو نار خفيفة جلسو على قولها وضحك عليها وفاتي وعريب شادين فزكرياء على تصرفاتو فأيام درسة..ومخدمة فيديو فالكاميرا كتصور احداث رحلة كلها بلا انقطاع..

فاتي:لاا...ههه..لا صبر تعقل نهار الخرجة لي درناها مع الكلية وفنشاط طاح مع ديك شهبة وحلف ليهم ميشارك وضيع نقط عليه غير حيتاش مان خاصو يهزها تجبد شريط من شجرة 

زكرياء بسخرية:نهرزها نالها بب صغير..نتي انا هاز راسي غير بسيف نهزها هي 

عريب:غنشوفوك نهار تتزوج واش تبقى هاد الهدرة

زكرياء:ها نتا قلتها نهار نتزوج يعني حلالا طيبا ..ديك ساع نهزها ونهرب بيها ..انا بلا ديك الوثيقة متقربلي منقربلها ..شيطان ولد لحرام وانا مناقصني ذنوب ..يكفي غير لي داي معاكم 

فاتي:شايلاه امولاي دغيس ..نتا راه منك للبرمة ...وغير ذنوبي كنت تقلب عليا وجهك فالامتحانات ..متخليني ننقل ما تنقلني نتا 

زكرياء:وها نتي نجحتي بذراعك ..بغيتي طلعي دفعا دفعا وبدعوات وفتطبيقي تحفني دعاوي شر جملة ..

فاتي شافت فيه مبتاسمة:غير ضاحكة معاك ..راه عارفة كنت باغيلي غير مصلاحتي ..

بقاو فايقين حتا لاشمن وقت دخل عريب وفاتي لخيمة ينعسو وزكرياء بقى على برا شاف ما كان ميدار ونعاس جافاه ..ناض واستغل وقتو فصلاتو دار قيام ليل وحلس حتى صلى لفجر لي اذن فتطبيق صلاتك فتيليفون..وكسر لعين شوية حتى جاه عريب كيف القدر المستعجل يفيقو ..كملو رحلتهم وطلعو لقمة ديال جبل ويا لا روعة المنظر كأنها الجنة ..قمة مثلجة شوية واسفل الجبل كيبان واد طويل والارض كأنها بساط اخضر ..منظر يفتح نفس ويريح الاعصاب ويبعث سكينة فالاعماق..جلسو ودوزو ليلتهم ثانية فقمة الجبل ..عازمين على فصباح يكون نهاية لرحلتهم....يا ترى هاد رحلة غتسالي سلامة ولا ندامة؟!!

يتبع