قناع الذكريات الجزء الثاني

من بعد مالبست ملابسي .. وقفت قدام المراية .. يدي على راسي .. كنتأكد واش بصح لبست قطعة القماش لي على راسي .. كلام بلال لي قال لي هادي ثلاث ايام بقا كينخر فعظامي بقسوة ..

كنحفظ الكلام فبالي ونعاوده كثر من ستين مرة ..

رفعت كم قميصي .. كل ماطاحت عيني عليه هو الجرح لي حفرتو جنب يدي من كثرة الاعصاب داك اليوم .. كل ماتذكرت كلامه واتهامه الصريح .. حتى قلت عمري باقي نرجع نآذي نفسي ولا نقطع لحمي فحال شي شمكار.. ولكن ماقدرتش .. كمية الذل لي حسيت به داك النهار ماشي شيء عادي نقدر نتحمله ..

زدت تأملت داك الزيزوارة لي فيدي .. فجأة جات فبالي فكرة مجنونة .. انا بيدي هادو كنشق وجه بلال وضحكته المستفزة .. بلاصة لحمي .. كننتقم منه هو وكل واحد قرر يآذيني .. ملامحه الباردة كنشوهها بمره باش عمره يزيد يشوف صفحة وجهي ..

تمشيت بشوية .. جهة المكاتب د الاساتذة .. من حسن حظي كنت عارفة مكتب الاستاذ المكلف بالوحدة من قبل يعني من السهل عليا نلقاه هو فبلاصته .. باقي اهانته ماقدرتش نهضمها بسهولة .. كل مرة كتشوطني .. فحال شي موس كنخشيه فشي جرح باقي طري ..

طليت من الباب ماكان حد .. باب المكتب مردود بشوية

"شنو كاديري هنا "

خرجني من شرودي صوته .. لي وصلني بعض ثانيتين .. رجعت درت لعنده ولصقت فالحيط .. رسمت اللامبلاة على وجهي عاد هضرت ..

انا:~ بغيت نهضر معك ..

مسح على وجهه بدون اهتمام ..

بلال:~شنو كاين ؟

انا:~ (بلعت ريقي) بغيت نسولك على شي حاجة فالدرس ..

بدون مايشوف فيا .. حسيت به كل مرة كيزيد يكرهني على الايام لي قبل ..

بلال:~ شنو هي ؟

انا:~(بلعت ريقي ) ماشي هنا ..

بلال:~(اشار لي بيديه) دخلي ..

انا:~(شفت يمين ويسار ) واخا ..

بدون مانتحرك سبقني هو الاول .. بضخامة جسده .. دابا كايدير راسه ماكيعرفنيش .. فحال اذا ماشي هو لي قدم لي جميع هادوك الاهانات قبل ثلاث ايام .. ولكن على الاقل نعقد هدنة مفاجئة قبل مانرد له الصاع صاعين .. حلفت على انني نرد ليه كلام مسموم اكثر منه .. ويحس بداكشي لي دار لي اضعاف المرات ..

بلال:~ (هدر من تحت سنانه) غانبقى نستناااك ولا شنو ..

تنفست بعمق .. ودخلت وراه .. خليت الباب شوية مفتوحة ..

رجع جلس فمكتبه .. كيشوف فيا ببطئ فحال اذا كيعبرني بعينيه .. كيستناني نهدر .. لكن كنت مصرة نخرجه من برودة دمه ونحرق اعصابه ..

بلال:~( مسح على وجهه) الانسة .. يسحاب لك مسالي ليك ..

زدت حرقت اعصابه ملي شفت فجدران المكتب متجاهلة كلامه .. كنت عارفاع فداخله ماكرهش يشدني ويلوحني برا ..

بلال:~(رفع حاجب) ياكما حشمانة(زاد باستهزاء) ولا شي مؤامرة جديدة باش تلفتي الانتباه ؟

شديت على عيني بالجهد على كلامه .. قدر يخرجني من طوعي .. ابتسمت ببرود .. وحركت كتفي بدون اهتمام ..

انا:~ ماشي انا لي غانحاااول نلفت انتبااهك.. حيت اخررر اهتمامي هو نلفت انتباهك نتا بالضبط .. ولا يمكن نتا لي كتحاول باستفزازك تلفت الانتباه ..

اصبت الهدف الاول بنجاح .. ولكن باقي ماقدرتش نذوب كتلة الجليد لي على وجهه .. وخصوصا فمحيطه الاسود ..

بلال:~(رفع حاجبيه ) تحل لك اللسان مزيان ..

انا:~(حركت فكي) هذا غير جاوب على كلامك ا استاذ ..

بلال:~ دابا جاية تفهمي الدرس ولا جاااية تخبري عليا .؟

شديت فصاكي وزفرت بعمق .. وابتسامة عالقة بقات بين ثغري ..

انا:~ اذااا كنتي نتااا رخيص .. ماكيعنيش الامر ان جميع الناااس فحالك ..(زدت خفضت صوتي) وكيف قلتي الرخيص ماكيطيح غير على ماهو ارخص منه .. واذا كنت انا رخصية نتاااا كثر مني .. ( بعدت شوية من المكتب ) على الاقل انا ماشي منافقة مع راسي ..

اصبت الهدف.. اصبته بشدة .. ملي شفت بؤبؤ عينيه كيتحرك بعنف .. وواحد الغصة واحلة فحلقه طالعة نازلة فحال شي نار سائلة .. نفسها الغصة لي كانت فحلقي داك النهار .. كتحرقني كل ما طلعت النفس ولا هبطته ..

لي يشوفه ببروده يحلف عليه حتى انه ثلاجة باردة بدون مشاعر .. لكن قدرت نستفزه بدرجة كبيرى ..

غير بعدت بخطوات قليلة .. حسيت معصمي بين يديه غايتقلع من بلاصته .. الظلام اكستح داك السواد لي فعينيه حتى وليت ماعارفة ماندير ..

بلال:~(زفر تحت نيفه ) عاااودي نسمع مرة اخرى ..

انا:~ (حاولت نفك راسي) بعد مني ..

حلقي بدا كينشف والرعب كيمشي بين عروقي ..

انا:~كنضن سمعيتي شنو خصني نقوله ..

بلال:~ نتي مااااشي منافقة نتي ؟؟؟

يديه طلقو من معصمي وشد فكي بشدة حتى ضروني سناني .. تكلمت بصعوبة ..

انا:~ طلق مني ولا نغووووت ..

بلال:~ ( عاود تكلم بعصبية) نتي مااااااشي مناااققة نتي ؟؟؟ يااااكبيرااات المنافقين ..

حتى قلت غايطلق مني .. رجع دفعني لجهة الباب .. صافي قلت غايخرجني من هنا وغانكون حرقت قلبه بكلامي واخا نرد له غير جزء منه .. لكن شد الباب بعنف ..عاود زيرني مع الحيط ..

انفاسه الغاضبة كتضرب فوجهي فحال شي سوط د الجلد .. تكلم جنب اذني بفحيح ..

بلال:~ غووووتي نسمع .. حتى نهررررس ليك سنانك .. (بعد شوية وشتم ببذائة عاود رجعني دفعني ) شكوون المنااااافق ؟؟ شكوون كيمثل البراءة والاسلام وفالاخير غارق فالعرا وبلا حجاب ..(زاد حركني بعنف) شكووون كيرفض الزواج وفالصباح ومقنتة مع صااااااحبك برااااا .. وكتمثلي عليا انك ماااااشي منافقة .. شكووووون ؟؟؟

شهقت بعنف .. والصدمة لجمات لساني .. كنت كنسقط امامه وقناعي كيتلاشى .... كنتأكد واش هادشي بصح ولا غير كذوب ؟ واش هو عارف كلشي .. رجلي رجعو بحال العجينة .. ها الشخص الاول عرف حقيقتي .. بغيت نرد شوية من كرامتي المجروحة .. صدقت مضمساها قاع ..

انا:~(تمتمت) انا.. انا ماشي رخيصة ..

الدموع فحال الشوك لصقو فعيني .. ويديه كيزيدو يزيرو على كتفي كيهزني بلا عقل .. كيفضحني قدامه ..

بلال:~ بلاش ماتمثلي البراءة اجوووري بلاااش ماتزيدي تمثلي كثر ..

وعند هاد الكلام .. ضغط على معصم يدي لي عاود شدو .. وبالضبط فالمكان لي جرحت به راسي ب الزيزوارة ..

انا:~ (همس بصعوبة) طلق منيييي كضرني ..

زاد ضغط اكثر واكثر ..

بلال:~ كتألمي داباا يااك ؟ ( زاد ضحك فاذني بدون تعبير ) كضرك يديك دابا ياااك ابنت الخااال ..

انفاسي صافي مابقاوش مسمعوين قدام سدى انفاسه .. الم كبير كيقطع يدي .. هو بنفسه مافاق غير ملي شاف بضع قطرات حمراء كيلوثو يديه ..

بقع الدم ماوصلوش حتى ليديه .. غير خرجو فالشوميز البيضة لي لابسة عن طريق الجرحة ملي كان كيضغط عليها.. الشيء الوحيد لي خلاه يطلق من يدي بشوية .. نو الوقت لي لاحظها .. رفع حاجبيه بعدم فهم .. وتمتم بنبرة مامفهوماش .

بلال:~ آلمتك ؟ ..

تقطع فيا النفس .. قلبت وجهي كنحاول نخبي ضعفي .. والدموع لي كيبللو رموشي .. جمعت يدي عندي ..

انا:~ ماشي شغلك ..

بلال:~(تكلم بأمر) اري يديك ..

دفعته بشوية لكن ماتزحزحش من مكانه ..

انا:~ بعد مني.. ماتقررربش لي مرة وحدة اخرى ..

بلا مايبان على وجهه حتى تعبير د الندم .. زفر بغضب ..

بلال:~ قلت لك اري يديك ..

انا:~غانغووت وتمشي فيها نتاااا ..

عضيت على شفتاي .. وزدت غمضت عيني اكثر .. حتى حسيت بهم غايدخلو فلحمي ..

بلال:~(بضيق) ماتصعبيش عليك الامر اكثر ..

كيقرب اكثر مرة بعد مرة .. واخا خطوات بطيئين ولكن فحال شي ذئب مفترس.. فحال اذا كيزطمهم على قلبي وكيلمس شغف روحي فالمقابل .. حاولت ندخل فالحيط .. عيونه مركزين مع كل تعبير فوجهي ..

جبد يدي من ورا ظهري لعنده بالجهد .. حتى زاد وجعني اكثر ..

بلال:~ ماكنبغيش نعاود هضررررتي مرة اخرى ... ( هز فيا عينيه مغزف ) فهمتي ؟؟..

بعدت وجهي ما أمكن .. على كل حال تفضحت قدامه مابقا مايتقال اكثر .. اللهم يعرف شمن شخصية مريضة انا باش يبعد مني بمرة .. ويعرف مقدار الجرح لي سببه لي على الاقل قبل مايبان كنت عايشة مرتاحة ولو نسبيا ..

يديه باردين .. مثلجين فحال مشاعره تماما . بالخصوص نظراته الجليدية .. .. طلع بهم الشوميز بشوية حتى شاف الجرح .. كل ماكان كيشوف طوله ملامحه كيتغير لونهم من اسمر قاتم الى قاتم جدا ..

بلال:~(بتساؤول) شنو هذاا ؟

فتحت عيني بشوية .. كنركز مع كل حرف كيقوله .. بغيت نحيد يدي وعاود زير عليها ..

انا:~ والوووو ... مااااشي شغلك ..

بلال:~ (بدون مايهتم لشنو قلت)شكووون دار ليك هااادشي ؟؟ (زاد هزني بشوية) ضربك شي حد ؟؟ وااش تعرض ليك شي حد ؟؟ شكوون دار ليك هكااا..

الصمت باش قابلته .. حتى داك الدموت لي كانو غايطيحو رديتهم بزز .. حتى نمشي فحالي ونذرفهم على خاطري .. كنتلذذ بداك النظرة د الشماتة وقلبه محروق قدامي بفضول باغي يعرف شنو وقع .. اطبقت على فمي حتى عصبته ..

بلال:~ دووووي ا الزمرررر ..

انا:~ بما انك فاهم كلشي .. وعارف كلشي وشااايف كلشي من الطبيعي تكون عارف شكون دار ليا هادشي ولا لا ..

بلال:~ (طلق مني ودار يديه على شعره كيحاول يقلعه من جذوره) شكووون داااار ليييك هاااادشي .. (رجع عندي كيحركني فحال اذا كيفقني من داك البرود لي طبقته عليه) دووووووي ..

انا:~ اذا ساليتي بغيت نمشي .. حيد مني ..

فحال اذا عاد فكر من بعد ماطلق مني رجع قرب اكثر .. فكل المرات لي كان قريب هذه كانت اشد قسوة واشد عنف من لي قبل .. عنف انفاسه طافت على جسدي بأكمله حتى وليت كنرجف ..

بلال:~ نتي لي كتقطعي لحمك ؟؟ ( زاااد بغضب) نتي لي كاديري هادشي كله ياك ؟

بعد وعاود رجع فحال كل تصرف كيديره .. فحال اذا مامصدقش طول الجرح كاين فيدي .. كيشوف فيه ويقرا عيناي بمقلتيه النجلاوين ..

بلال:~ شي حد لي كايدير ليك هكاااااا ؟؟ بااك مك ولا نتي ؟

الريق هبط بصعوبة فحلقي من بعد مانشف ..

انا:~ .. نتا لي درتي ليا هادشي ... نتا السبب .. (عاودت شفت فيه بغضب) كنكررررهك فحال اذا عمري كرهت شي حد .. ماااكنحملكش .. وجميع هاد الكلام لي حرقتيني به غاتحرق به بوحدك شي نهار ..

حجر عينيه الاسود بقا ثابت نفس النظرة القاسية لي رمقني بها فالاول رجعات.. بدون مايهتز له جفن .. كان عارف مزيان كنلومو على هاد الحالة لي انا فيها .. حتى شافني شديت على قلبي كنحاول نتنفس اكثر .. قلبت وجهي للجهة الاخرى .. كنزفر كثر باش ذرات الاوكسجين يدخلو لدواخلي .. عاد ظهر عليه شوية د الرفق ..

بلال:~ مريضة ؟

انا:~ ماااااشي شغلك .. غيررررر بعد مني .. غير ماتعاااودش تبان فحياتي .. عطيني التيساااااع .. كتآلمني وبزااااااااف ... كتخنقني..

دار يديه فجيبه ورجع خطواتين للوراء ..

بلال:~ عاارف ماشي شغلي فيك... اش جابني ل ساااااحتك نيييت ..

رفعت يدي ب لا ، رجعت اللور .. بغيت نبعد .. لكن فحال ديما الحاجة لي كنحتاجها كتخذلني وهاد المرة الدور كان على رجلي لي ولاو مثل جدار من الاسمنت واقفين بدون حركة ..

ساقي نزلو فالارض لكن حاوبت نثبتهم قدر الامكان .. البكا لي بكيته والدموع لي خرجو قدامه .. خلاوني نكرهه مرة اخرى اكثر .. حتى مابقا لي فين نزيد .. واقيلة ماعنديش القلب لي نبغي به شي نهار معمراه غير بالكره ..

بلال:~جوري .. (همس قريب مني ) سيري فحالك ..

دار يديه على كتفي .. كيزير عليهم يديه فجأة ولا كيترعدو بالاعصاب من الحالة لي انا فيها يمكن .. من بعد ماقلت انه رجل بدون مشاعر طلع فقلبه بصيص من الاحاسيس .. ولو مجرد نقطة ف محيط ..

بلال:~ سيري من هنا .. اذا اذيتك لهاد الدرجة.. سيري فحالك ( دفعني برفق) واذا كان على امر الزواج اعتبريه ملغي من دابا .. وعمره غادي يكون ..

خرجت من مكتبه كنجر فرجلي بزز .. اخر جملة سمعتها منه ريحاتني .. النبرة باش كان كيقولها لصقات ف دماغي .. واخا مابغاش يبين .. وواجهني فقط ب البرود .. لكن كان فحال اذا ندمان .. وهادشي مايمكنش نخطأ فيه ..

كل مادرته هو مسحت دموعي .. وعاودت تنفست بعمق .. لكن غير خرجت من تما .. بانت لي نرجس جاية لنفس الجهة ؟؟ ..

جاية لمكتب بلال حتى هي.. صدفة غريبة .. يمكن هي بصح بغاته يشرح لها شي حاجة .. مازدتش عمرت راسي بالموضوع اكثر ..

ماحسيت براسي غير وقفتها ..

انا:~( وقفت قدامها) نرجس ..

فتحات عينيها .. موسعاهم .. فحال اذا مامصدقاش انني كاينة هنا .. ولا كنهدر معها ..

نرجس:~(نطقات بلا تعبير) جوري ..

عضيت على شفتاي .. بندم .. ندمانة على اشنو درت لها خصوصا فاش لاحظت داك الطبعة جنب خدها باقب زرقة شوية .. عاد عرفت مقدار خطأي .. بلا مقدمات مسحت على وجهي ..

انا:~(قربت شوية) سمحي ليا .. انا كنعتاذر منك على اخر مرة ..

فحال اذا كان خصها غير هاد الكلام باش تنفاجر فوجهي .. هادشي ذكرها فاليوم المشؤوم..

نرجس:~ شوفي الضربة (ميلات وجهها ) واش برات ؟

حركت راسي بنفي صريح ..

انا:~ لا ..

نرجس:~( ضحكات بدون نفس) شفتي غير فوجهي مازال مابرات الضربة .. اما الكلام لي قلتيه لي والاتهام ديالك اكثر من آلم هاد الضربة بأضعاف المرات .. وكنضن عمره غادي يقدر يبرا ..

حركت راسي يمين ويسار .. كنحاول نتكلم بخفوت .. ونشرح لها الموقف بالآتي هي الاحسن ..

انا:~ نتي استفزتيني بكلامك .. وأسئلتك ..

نرجس:~(ردات عليا مغددة) ونتي استفزيتيني ببرودك .. بتصرفاتك .. بداكشي لي كتخبي .. استفزتيني بكل شيء .. وباش زدتيها مديت عليا يديك .. شكون غالط انا ونتي دابا ؟

عندها الحق فكل كلمة قالتها .. هاد الهدوء الغريب لي تميزت به فهاد اللحظة والصبر الطويل مامولفاهش فاضطراب شخصيتي .. جاوبتها باحتجاج.. وعيني كيحدقو فعيونها ..

انا:~ماقصدتش ..

نرجس:~ قصدتي كلشي .. ياك صداقتنا مبنية فقط على المصلحة كيف قلتي (مسحات على عنقها) ولا كذبت ؟؟

وقبل مانظير اي ردة فعل عنيفة .. جاوبتها بكلمتين فقط ..

انا:~ عندك الحق .. نساي كلشي .. خصني نعتاذ لراسي حيت فكرت نعتذر لك شي دقيقة ..

زدت خطوتين وخليتها .. يمكن كان خصها مازال نعتاذر .. مازال نترجها باش تسامحني.. ونبين انني انا لي غالطة .. هي استفزتني المرة الاولى وانا رديت عليها .. واعترفت بأخطائي بالاخير .. ولكن كانت مصرة على رأيها ..

زدت فالممرات .. حتى رجعت للمقصف .. كنت متأكدة غانلقى تما مراد وفرقته مع بعض .. وربما تكون معه داك هدى..

لكن لقيته جالس بوحده .. ماحس بيا حتى وقفت امامه .. وهمست باسمه ..

انا:~ مراد ..

حرك عينيه باهتمام ..

مراد:~ ثلث ايام ؟؟ ..

انا:~(شفت فيه بعدم فهم) شنووو ..

هز راسه فيا .. حتى حققت مزيان فعسل عينيه المحترق وخفضت عيني للاسفل ..اما هو مرر يديه على لحيته .. وتبسم بجاذبية خاصة غير به هو ..

مراد:~ثلث ايام وانا كنقلب عليك ..

دورت عيني كنقلب على شي عذر مقنع.. واخا مالقيت باش نكذب عليه .. خليت وجهي يبان عليه البرود باش مايفهم والو ..

انا:~ كنت كنحفظ .. هاد الايام ..

تكلمت من فوق خاطري .. باغيا فقط نهرب من هاد الجامعة بأكملها ..

مراد:~ مزيان .. كنا تافقنو نراجعو بزوج يمكن ..

تجاهلت رده عن عمد .. انا اصلا عمىي اتفقت معه على شي حاجة ..

انا:~ ها هما المطبوعات ديالك .. شكراا ..

عطيتهم ليه وجيت نايضة .. لكن كلامه وقفني وخلاني جامدة فبلاصتي ..

مراد:~ واش كنتي كتبكي ؟

اكيد لاحظ هادشي فارتجافة يدي وانا كنحط البوليكوبات.. تهربي واضح.. حتى من عيني كانو حمرين يمكن ..

انا:~(عضيت على فمي بقسوة .. وفنفس الوقت كنمنع ارتجافة كفي ) لا ..

مراد:~ جلسي .. (مد ليا القرعة د الما) .. جلسي وبكي على خاطرك .. دعوته صريحة .. وانا كنت فالمقابل كنستنى هاد الدعوة باش نستقبلها بأحضان من تعاسة ..

جلست بصمت كيف الاول .. فقط حنيت راسي .. حتى تكلم هو ..

مراد:~ واش شي مشكلة عاطيفية ..

مشكلة عاطيفية؟ ضحكت باستهزاء ولكن بدون ماتخرج الضحكة من فمي ..استرجعت انفاسي بصعوبة وجاوبته..

انا:~(حركت راسي بصمت) لا ..

مراد:~(بتشوش ) اذن شي مشاكيل مع الدار ..

انا:~(نطقت بلا مانغكر) ااه ..

مراد:~ اجي معايا ..

نضت بصمت .. تابعاه ومسلمة له فقراراته .. بدون اي ردة فعل .. كل مرة رجلي كيقودوني نحو شيء مجهول .. مانعرف شحال فات د الوقت وحنا غير كنتمشاو بلا هدرة بلا زوج .. خرجنا على الكلية .. وهو غادي بدون واجهة محددة ..

انا:~ فين غادي ..

مراد:~(وقف ودار يديه فجيوبه) ل حتى بلاصة .. بغيت ققط تخرجي تتنفسي .. وتشمي الهوا .. حيت حتما غاتكون هاديك البلاصة هي السبب .. فكراتك فشي حاجة يمكن ..

جلست مع مراد هاد المرة فسيارته .. كل مرة كنت كنتهرب من جميع الاعين .. خايفة لا بلال يشوفني مرة اخرى من داك النهار .. ماعاودت دخلت لحصته .. ولا عتبت جهة مكتبه .. حتى فالدار ماعاودوش جبدو موضوع الزواج بحضوري ..

من اخر مرة هادي اسبوع .. اليوم لي عاوني فيه بزاف مراد ماشي بالهدرة او حاول يخفف عليا فقط بداك السكات لي طبقه داك النهار وخلاني نفرغ قلبي بالسكات ..

خرجني من شرودي صوته لي دغدغ مسمعي ..

مراد:~ فين ساهية ؟

رديت راسي اللور .. كنحس بشي حاجة ماشي هي هاديك .. ماماتاحاش ابدا ..

انا:~ والو ..

ابتسمت بجاذبية .. داك الابتسامة لي كتخليني غير نشوف فيه .. حتى كيتبرزو صف اسنانه ..

مراد:~ شنو ماغادخليش تقراي ؟

حركت راسي بنفي ..

انا:~ لا مابغيتش .. مريضة ..

اعتدل فجلسته .. وبان على وجهه الاهتمام ..

مراد:~ نسولك ؟

عرفت انه غايسولني شي سؤال ماشي فمحله غايكون من خصوصياتي لي حاولت نخبيها عليه من قبل ..

انا:~ (تمتمت) سول ..

مراد:~ مالكي مع نرجس ؟؟

هزيت فيه عيني .. حتى شكيت انه قرا كلشي على وجهي .. الحروف تشابكو فحلقي ..

انا:~ غير سوء تفاهم بسيط ..

حرك فمه باهتمام .. باغي يزيد يسمع اكثر .. ويفهم نوع المشكل لي بيناتنا ..

مراد:~ شنو هو هاد سوء تفاهم لي يخليكم تتخاصمو لهاد الدرجة؟

هزيت فيه عيني .. وقلبت وجهي شوية .. كنحاول نلقا شي مسلك اخر .. ونتفادى الجواب على هاد السؤال بالضبط ..

انا:~ والو .. (تنفست بعنف ملي تذكرت كلامها كامل) ماواقع والو .. غير تخاصمنا .. فحال اي زوج صحابات ..

سكت شوية حتى عاودت هضرت ..

انا:~ نسولك حتى انا ؟

مراد:~(بلا مايفكر ) سولي ..

عضيت على شفتي .. خليت الحروف يتحاربو داخل حنجرتي كل حرف كيسبق الآخر وكل سؤال كيشد نوبته فحلقي .. وكنعاود نتراجع من جديد ..

انا:~ فين عرفتيني اول مرة ؟ وشكون قالك انا ديما كنحضر ونتا تمري شفتك؟ وعلاش حصلتي كتغش ؟

ثلاث اسئلة متتوالين كانو كيطلعو وينزلو فجوفي بغيتهم يتحررو نسألهم .. نروي فضولي .. طول الاسبوع وحنا كنتلقاو مرة نتكلمو على القراية .. مرة نجبدو المطبوعات نراجعو او نبقاو سكاتين ..

مراد:~الجواب على سؤالك اللول .. الناس لي مميزين مايحتاجوش اول مرة باش نعرفوهوم ..

هنا تحركو حواسي وقلبي خفق بشدة واخا كلامه كان عادي .. اعتبرته غزل واضح ..

مراد:~(كمل على كلامه) والسؤال الثاني كنحضر مرة مرة .. يمكن مالحظتيش وصافي .. (تنهد بعمق) والسؤال الثالث .. حيت كان خصني السوميستر العام باش ماكان .. ماشب عندي 23 عام وانا مازال ما طلعت والو ..

انا:~ وعلاش محتاج هاد الشهادة .. يمكن لك دير شي حاجة ونتا فعمرك 23 سنة ..

مراد:~ (مسح على وجهه)الاجازة دابا صروري ولو غير من باب البروتوكول ..

اتبعها بضحكة .. حاول يتجاهل حتى هو موضوع القراية ويطوي الصفحة ..

مراد:~هاد المرة الدور عليا .. (فكر شوية) شنو نوع المشاكل لي عندك مع عائلتك ؟؟ ..

فتحت عيني على وسعهم .. كنسمع سؤاله الصريح .. انا لي اخير مرة اعترفت له بذلك ولكن مابغيتش نصرح بشي حاجة اكثر .. قلبي دق بين ضلوعي .. وجوفي نشف ..

انا:~والو .. غير مشاكل عاديين ..

فهاد الأثناء تفكرت كلام بلال.. بسببه هو شافني مراد فداك الحالة .. قاع داكشي لي قاله وجملته الاخيرة لي مابغاتش تخرج من بالي.. كل مرة نتفكر نظرة عيونه الاخيرة ونبرة صوته .. الحرارة اجتاحتني من كل جنب .. قلبي هاد المرة حسيته كيضرب فكرشي... حاولت ما أمكن نتجاهل هاد الشعور ..

كل نهار كنستناه يرفض هاد الزواج .. لكن لا حس ولا خبر ..

مسح على لحيته باستنكار ..

مراد:~على راحتك ..

حاولت نغير الموضوع بسؤالي .. السؤال لي هاد المرة كان صريح ..

انا:~ واش بيناتكم شي علاقة نتا و ( حركت عيني) وهدى ..

بلا تفكير بلا والو .. حرك راسه بنفي ..

مراد:~ لا .. اكيد كاضحكي ..

هادشي اسعدني .. ملي سمعت جوابه الاول .. السعادة طلعات من اعماقي .. من رجلي حتى وصلت لفمي وخرجات على شكل ابتسامة..

كل ماتفكرتها .. نظرة شماتة كترسم على عيني .. وكل ماتذكرت ملامح وجهها المستفزة ..

انا:~(جاوبته بلا مانهتم ) ونرجس واش بيناتكم شي حاجة؟.. (زدت غمضت عيني ..عضيت على فمي وتكلمت بتردد ) ولا غير كتعجبك مثلا ؟

مراد:~(هز حاجبه وابتسم ) لا ..

يديه تحطات على يدي برفق.. هزها بشوية .. حاولت نبعدها لكن وقفني بصوته الاجش ..

مراد:~ ماقادرة تعجبني حتى وحدة .. (زاد تكلم بخفوت اكثر ) حيت كتعجبيني نتي ....

قال كلامه وزاد ضغط على يدي برفق .. المشاعر تخلطو ف فؤادي.. ماعرفتها صدمة ولا فرحة .. نوعا ما ماكنتش متوقعة جوابه .. حتى من قلبي تسارعو دقاته بطريقة عنيقة .. مابقيت كنسمع غير صوت انفاسي كتخرج ثقيلة من صدري ..

اما هو تأمل جنب وجهي وزاد تكلم بصوت اجش مرة اخرى ..

مراد:~ كتعجبيني نتي اجوري ..

فتحت عيني على وسعهم .. مالقيت ماندير من غير نتمتم باسمه ..

انا:~ م..مر... مراد ..

رد راسه للوراء .. وعاود رجع مقابل مع وجهي .. عاد سولني ..

مراد:~ تفاجأتي ؟؟ ..

عضيت على شفتاي بارتجاف .. حتى من يدي بردو .. حسيت بكفه كتضغط عليها برفق .. فحال اذا كيطرد توتري فهاد اللحظة ..

انا:~ (هزيت راسي) لا .. لا .. ماشي تفاجئت ..(سكت شوية) ولكن ..

مالقيت باش نجاوبه .. ماكانش عندي شي جواب مقنع .. يمكن فهاد الايام لي عرفته فيها شعوري اتجاه مراد فاق كل مراحل الاعجاب .. لكن ماكنت قادرة نبوح له بوالو .. غصة بداخلي كتمنعني ننجارف وراء مشاعري بهاد السهولة ..

مراد:~ ولكن كنحس بالموضوع فاجأك ؟ شنو لي غريب فهادشي ؟

ابتلعت ريقي بصمت .. علد فثت وكلامه بدا كيسري فدمي .. حيدت يدي من كفه ببطئ.. بغيت نفتح السيارة ..

انا:~ انا غانمشي تعطلت ..

لكنه وقفني بكلامه ويديه لي تحطات على كتفي فوق قماش القميص لي لابساه .. حسيتها كتحرقني .. وبشرة لحمي كتنتفض بعنف من قربه...

مراد:~حاس بك كتبادليني نفس الاعجاب (همس بشوية ) ومايمكنش نغلط فهاد الامر ..

الامر لي فيقني من هادشي هو تخايلاتي .. الامر لي كنت محتاجة ليه فهاد الوقت .. شحال من بنت لحد الآن يقدر يكون اعترف لها بإعجابه .. الشيء ايضا لي خلاني نحقق فسكر عينيه المحترق .. كيبان لي الصدق مرسوم عليهم ..

ولكن نرجس لي صاحبتي د سنين حتى هي كانت صحبة مصلحة وهاد السيد لي ماعرفته سوى ايام شنو لي يضمن لي انه حتى هو ماباغيش مصلحته فالقراية فقط ..

انا:~(حركت كتفي ورجعت جلست) شحال من وحدة تكون قلتي لها فحال هاد الكلام ؟..

الحيرة ترسمات على وجهه فحال اذا ماتوقعش سؤالي .. ابتسم بهدوء ..

مراد:~ نحس بها غيرة ولا سؤال فضول ؟ ..

انا:~(عضيت على لساني) لا سؤال حقيقي .. حتى هاديك هدى غاتكون سمعات من عندك نفس الكلام ؟؟

النظرة لي فعينيه كتشبع فضولي.. خلاتني فحال شي وحدة طايحة فشي بئر غارق ماعندها حتى سبيل للنجاة .. ولا شي وحدة حاصلة فالظلمة ..

مراد:~ انا اعترفت لك بشنو كنحس من جهتك .. ( زاد قرب راسه ) اي حاجة ماغانخليهاش مخبية فالداخل ديالي .. خصوصا ان الانسانة لي كتعجبني قريبة مني ..

شدد على كلامه الاخير .. الشيء لي خلاني نرفع عيني باهتمام .. لوزيتيه اكتساهم بريق فشكل .. وغطا على كل تعبير فيهم ..

ها انا كنعجبه ومن بعد ؟

ولكن هادشي كان مفرحيني.. واخيرا هرست كلام نرجس .. انا ومراد مابيناتنا حتى فرق !! .. غير هي لي كتشوفني اقل مستوى منه ..

انا:~ (دورت وجهي للجهة الاخرى .. صوتي غطات عليه حشرجة ..) شكراا ..

جاوبني بامتعضاض ..

مراد:~عارفة شناهيا .. انا كنعترف ليك كتعجبيني .. كتجاوبني ب شكرا ..

عضيت على لساني .. يديا وليت ماقادراش نتحكم فيهم... الدم رجع كيفور فعروقي .. وكيطلع مع خدودي ..

انا:~ مالقيت مانقول ..

مراد:~ (زاد قرب مني) غنتأكد بيدي من شعورك ..

وقبل ماندير اي ردة فعل .. كان كيقرب مني بشوية .. وابتسامته الجذابة على ثغره .. واصلة لوذنيه تقريبا .. الثواني رجعو كيمرو بسرعة ... حواسي تيقضو لتصرفه بشكل تلقائيا .. كنت كنشوف فقط فمه لي كيقتري من شفتاي ببطئ قاتل ..

حاولت ثم حاولت فقرارة نفسي نتمرد على راسي .. هي مجرد قبلة واحدة غانجربها ومن بعد ماغانعاودهاش .. شنو المشكل ؟ ياك كنعجبه وهو نفس الشيء ..

همست بتردد وعيني مغمضين ..

انا:~ مراد ..

فثط حسيت بلهيب انفاسه فوق بشرة وجهي .. غير حط شفتيه على ثغري .. باقي ناوي يقبلني.. بعدت تلقائيا .. وانتفضت بالجهد .. داك شوية د الضمير لي بداخلي عاد فاق .. حتى هو فحال اذا عاد فاق من غلطته ..

بقيت غير كنتفتف .. غلط على قد راسي كنت غانرتكبه بسهولة ؟

انا:~ ( تكلمت بالزربة وحاوبت نفتح باب السيارة) غانمشي فحالي ..

الندم ترسم على عينيه .. هادشي لي قدرت نميزه قبل مانوصل للباب .. انا السبب .. انا لي خليته يتمادى وفتحت ليه باب قلبي بصدر رحب .. يمكن ندير اي شيء ولكن حتى ل هنا .. لا .. هذه قوانين حمراء خاصة بي ..مستحيل نتجاوزها ..

مراد:~( همس بندم) جووري .. سمحي ليا ( زاد قرب مني فالشارع ..) .. عارف راسي تسرعت ..

طلقت رجلي واسرعت خطواتي بلا مانجاوبه .. يالاه تكافيت مع دقات قلبي .. شكيت انه وقف من كثرة ماضرب بالجهد .. تصرفي كان كيصفعني من كل جهة ..

حتى قربت لباب الجامعة .. عاد وقفت كنلتاقط انفاسي .. ونلوم فراسي .. كان لحق عليا مراد فهاد الاثناء .. ماسمعت غير انفاسه ..

مراد:~(باعتذار ) جوري ..كنتأسف ..

كل ماشفت فوجهه تذكرت تصرفه وقبلته لي كنت على وشك استقبالها ببرود !

بغيت نتحرك نمشي فحاله .. لكن عيني خرجو هاد المرة .. ماشي على قبل مراد .. لا على الشخص لي ورائه مباشرة ..

فجأة ذبذبات الرياح تحركو بشدة من حولي .. شيطان بالنسبة لي انبثق من الظلام .. عيونه السوداويتين اكتسحو المكان على غفلة .. نظراته لي ماكنحملهاش كتلتهامني بعنف .. كان نفسه بلال لي مراقب الوضع على راحته ..

نظرة عيونه كهرباتني .. بمثابة تيار ضرب فعمودي الفقري .. رجلي ولاو من العجين .. ماقادرة لا نوقف لا والو..

ركزت اكثر غير على تهجم وجهه .. ونظرة الافتراس لي باينة وضوح الشمس .. غير من الغضب لي كيفوح من جسده بأكمله ولو من بعد ..

قاطعني مراد لي كان كيحاول يتكلم معايا ويشرح لي الوضع .. الشكوى لله .. بغيته غير يبعد مني فهاد اللحظة ..

مراد:~ جوري .. ماقصدتش ..( بغا يزيد يقرب ) ماتفهميش غلط ..

بقيت غير كنرجف .. ولساني اكلو القط .. كنشتت روأيتي ورائه ..

انا:~ انا .. (مسحت على عنقي بتوتر) ماتحكرش عليا ..

مراد:~ ( شاف فيا بتأنيب) مالكي كترعدي ..

عضيت على فمي بارتجاف .. رجعت ركزت نظري عليه وتجاهلت بلال .. اما مراد بغا يحط يديه على كتفي يهدأني ..ماحس غير براسه .. مدفوع اللور .. وصوت بلال لي زلزل اذناي قبل اذنيه ..

بلال:~ غير جررب تحط عليها يديك .. مرة وحدة اخرررى جرب

لوهلة بان لي مراد مامصدقش وجود بلال .. الاستاذ بنفسه امامنا .. كيحدق فيه بواحد الغضب عارم .. كيحتل المكان بجسده الضخم .. وصفحة عيونه لي طالما قلت بدون مشاعر .. ولكن دابا بان لي فيها احتراق اسود.. بحر اسود عاصف .. امواجه كتلاطم بعنف .. كيغطي على كل جزء من بؤبؤ عينيه .. تشنج فكه ترسم على صفحة وجهه ..

انا :~(همست بدون صوت) بلال .. ( شفت فيه بترجي ) ماتعقدش الامور ..

بان لي ماسمعش جملتي الاخيرة .. فقط اسمه لي لفت لنتابهه .. رجع برد راسه .. شاف فيا ببرود .. جمد ليا الدم ف الركابي .. وحرك فكه بامتعضاض .

بلال:~ غانتفاهم معك نتي من بعد ..(هز يديه) داباا غاتهزي تمشي فحاااالك .. ومن بعد غانتفااهمووو ..

حسيت براسي فحال اذا كنخونه فهاد اللحظة وهو كيأنبني بكلامه .. بحضوره لي جا فهاد الوقت بالضبط ..

مراد:~ (جابهه) ونتا اشنو مشا ليك ؟

عيني دمعو من كثرة الخوف .. اكثر شيء كنت خايفة منه هو هادشي يوصل ل بابا .. شحال ماهربت من المشاكل كنطيح فيهم بلا مانحس ..

مافقت غير على حس امامي .. ولكمة عنيفة تلقاها مراد ففكه .. بلا هدرة بلا زوج .. كان بلال موجهها ليه .. الشيء لي خلاه يتراجع للواء بعنف

.. مامصدقش هاد المعمعة كلها لي كتوقع .. ماقادر يحرك يديه ولا يدير شي ردة فعل امام هاد الكيان الضخم ..

بلال:~(زمجر فيه بغضب غاااااتبعد من هاااااد السيدة .. ولاااااا الخبررر فراااسك .. ماااابااااقيش بغيت نشووووفك فساااحتها ..

شد مراد على فكه بآلم .. حاول يرد له حتى هو الضربة .. لكن بلال عاود دفعه بشراسة ..

مراد:~( زاد باستغراب) شكوون نتاااا بالاصل ؟

بلال:~(شتم ببذائة) غانوووريك شكوون انا ..

عاود شتم ببذائة .. ورجعو يتعاركو بالايدي .. دقة فيا ودقة فيك .. واخا كانت باينة المعركة فصالح شكون .. غير من ضخامة جسده ..

الشيء الوحيد لي لقيته امامي هو الهروب .. الشيء لي كنتفنن فيه دائما..

خطوة ورا خطوة .. كنجري فالزنقة فحال شي حمقة .. ولكن هادشي مامنعش طيفه يلاحقني .. خلا المعركة بأكمالها .. حتى حسيته شدني فواحد الزنقة من يدي بعنف .. وهمس بأمر ..

بلال:~ ووووقفي ..

حركت وجهي برعب حقيقي .. المرات كلهم لي شفتهم فيه .. كان بارد .. جاف .. وماكيسواش .. ولكن هاد المرة .. جميع داك الشراسة بانت على ورقة وجهه .. من انعقاد حاجبيه .. لجبهته لي بانو فيها العرووق وبرزو .. خصوصا واحد العرق نافر جنب عنقه كيتحرك بتناوب مع انفاسه ..

انا:~(همس بترجي) بعد مني ..

بلال:~(زاد قرب مني .. حتى حسيت بأنفاسه فوق وجهي تقريبا) كل مرةةةة كنقوووول غانغيررر نظرتي فييك..( تشنج وجهه ملي قالت هاد الجملة) عاد ماكتزيدي تكفسيها .. وتبيني رااااسك اكثر ..

قربت من واحد الحيط .. كنحاول نهمس بشوية .. نفك الجرة بشوية وصافي ..باش مايسمعني حد ..

انا:~يااااك قلتي غااتبعد مني .. ماباقيش تقرب لجيهتي

بلال:~ ياااااكما يسحاااب لمك .. راني غانمووت باش نتزووووجك ؟

هسيس انفاسه .. بحال السم .. كل مادرته هو شفت فعروق يديه لي كيبانو واضحين بزاااف .. من الشوميز لي ثانيها حتى لمرفقيه .. زير على قبضة يديه ..

بلال:~ غاتهزي .. تحركي لداااااركم .. وباقي نلقااااك معه.. غير مرة وحدة.. ( غمض عينيه وعاود فتحهم بشراسة) جلدك نطيرووووو من على لحمك ..

رجعت اللور .. كنحاول ما امكن مانبانش ضعيفة .. يضرب راسه مع الحيط ومن بعد .. شنو مشا ليه .. ماشي شغله .. حياتي هادي .. شفت فيه بقوة مصطنعة ..

انا:~ حياتي هااادي .. انا مادرت والو ..

بلال:~(همس بفحيح) وااخا ماغنتزوجكش .. غانرررربيك من جديد حتى تعاااودي تردي عقلك لرااااسك ..

يالاه جيت نهضر حتى كان جارني بيديه للقدام بالجهد .. حتى اختل توازني ورجع وقفني

بلال:~تحررركي لدااااااركم .. قبل مانغلط فييك ..

فحال اذا كان خصني غير كلامه باش نطير من داك البلاصة .. ماعاودتش تلفت ورايا .. واخا حسيت بطيفه خلفي.. كيراقبني فكل خطوة .. حتى وصلت لدارنا وقبل مانخليه يعاود يلحق عليا ولا يفكر مجدادا يسممني بكلامه .. صفقت الباب بالجهد .. مع انه كان باقي ماوصل وقف بعيدا عن المنزل . ..

دخلت لغرفتي نيشان .. والحمى شاداني .. من جهة كنتفكر ردة فعل بلال .. وصفحة وجهه الغاضبة .. ومن جهة اخرى كنتفكر قبلة مراد لي كنت على وشك انني نتلقاها بدم بارد .. كنرجع نترعد فحال اذا غايعاود التجربة وهو امامي .. وباش نطرد طيفهم من بالي اغمضت عيني بتعب واخا كان الحال باقي مبكر ..

مرات يومين كنمشي للجامعة بلا مانتلقى بمراد .. تفاديت انني نتلقاه بعض اخير مرة .. حشمانة من اعترافه .. وعاد المطايفة دياله مع بلال اكثر شيء خفت يسولني عليه .. غايسول على سبب تدخله.. كلامه .. واللكمات لي تلقاها بلا ذنب .. اكيد غايكون فهم كلشي صحيح بالطريقة الخاطئة ..

اما بلال بنفسه كنت ماحملاش نشوفه او غير نفكر فيه.. وترعبت من ردة فعله لي قبل يومين واجهني بها .. عرفت ان كتلة البرود والجمود لي داخل قلبه .. ماكانت سوى قناع مزيف لكمية الغضب لي كيخبيه فداخله !

اليوم الرابع على التوالي .. ومراد ماعاودش ظهر .. حتى طيفه ماعاودتش لمحته .. اخر حل لقيته هو نسول عليه على شي حد كنعرفه .. واولهم كانت هدى ..

خليت حتى سالات الحصة .. تعمدت نتأخر باش نتلاقا معها .. عاد ناديت على اسمها .. دارت عندي وصفحة وجهها مامفوهومش ..

انا:~ سلام ..

هدى:~(نطقات بفتور) جوري ..

ضغطت على فمي بتردد .. الحرارة اجتاحتني واطبقت على انفاسي .. واش نهضر ولا نسكت .. لكن توكلت على الله ياربحة يا ذبحة ..

انا:~ لباس عليك ..

هدى:~ (بامتعضاض) الحمد الله ..ونتي ؟

انا:~(رديت عليها تلقائيا بجمود) الحمد الله ..

دام الصمت شوية .. وهي كتحدق فيا بخضرواتيها .. اما انا كنت مترددة .. هدى لي كنعتبرها من اعدائي .. لكن مجبرة نسولها عليه .. واخا غير نطمأن عليه من بعد مافتك بي الشوق .. وحتى من الشك كان كيخنقني .. غايكون فهم شنو بيني وبلال واخا مابيناتنا والو .. وشنو حاولت نخبيه تكشف ..

انا:~(مسحت على عنقي بتوتر) بغيت نسولك ؟ ..

هدى:~(بان على وجهها التردد) كنضن ماكاين فاش تسوليني ؟

هزيت عيني فيها ووقفتها قبل ماتمشي فحالها ..

انا:~ لا كاين فاش نسولك ..

حركات شفتيها بفضول .. اما انا ابتعلت ريقي بصمت .. وريقي كينشف .. مثل شي فراشة عاد كتخرج من جديد من شرنقتها والدنيا كلها كتبان لها زوينة .. دابا عاد قت طعم الحياة .. من بعد ماكنت دافنة راسي غير فالظلام .. بصيص النور كيخرجني من قعر داك السواد الدامس ..

راحة يدي زيرت عليها بأصابعي من شدة التوتر .. وفحال شي لكمة عنيقة ضرباتني لمعدتي .. وقفت عاجزة بين ثمانية وعشرين حرف انني نكون اربع حروف فقط .. هو مجرد اسم عادي ؟ والصعوبة كانت ماثلة فهظى لي قدامي .. عمرنا هدرنا ودابا كنسولها بهاد البساطة ..

انا:~ بغيت نسولك على .. (قلبت وجهي للجهة الاخرى) مراد ..

فتحات عينيها وزادت حدقات فيا بلونهم الاخضر .. باينة كان فيهم شي حاجة من الداخل .. كالعادة ماقدرتش نقراه .. ماعرفته واش حسد ولا غيرة ولا شفقة على مشاعري لي باينة للعيان .. تجاهلت شعوري بهاد الدونياوية .. لدرجة ندمت علاش سولتها ..

هدى:~ (حركت كتفيها ببرود) ماعرفتش .. (سكتات شوية حتى لاحظت داك الغصة لي تحركات فحلقها ) كنضن نتي عارفة هادشي كثر مني .. بما انك وليتي معه كثر من خياله ..

قالت جملتها الاخيرة فحال اذا مارضياش.. ولا ماحملاش هاد الوضع او ربما كتأنبني ..

حاجة وحدة كانت فبالي .. ان هدى كتحس بشي حاجة اتجاه مراد .. واخا هو اعترف بالعكس .. لكن علاش ماعاجبهاش الحال وماحاملانيش كيف ماحملاهاش ..

ماننكرش انه فداخلي كان كيتصاعد واحد الرضى على ذاتي .. بدون مانبين .. ابتسمت فوق نفسي ..

انا:~غير سولتك .. (حاولت نضبط اعصابي ) الامر مايحتاجش هاد العصبية كلها ..

قلبت شنايفها .. بعدم رضى لحد الآن ماعرفتش شنو لي مخليها مزال واقفة معايا .. عاد هي كتكرهني .. بغات يمكن تحسنني بالندم .. وانني فرقتها مع صديقها ولا شي حاجة كثر من مجرد صديق .. هادشي نخر فعظامي فحال الحديد .. كيهرس كل انش فيا بدون رحمة .

كملت على كلامي ..

انا:~ صافي ..

عاودت بردت اعصابي .. ماشي مشكل اكيد ماغاتكون عارفة والو .. ولا مابغاتش تقول ليه .. غاتكون على الاقل كتواصل معه .. حسيت به فهاد اللحظة متعمد يقرب خطوة ويرجع خطوات للوراء .. ويخليني فحال شي حمقة كنطارد سراب طيفه ..

هدى:~ (همسات ورايا) مراد مريض ..

طلقت ودني مزيان .. قلت مع بالي واقيلة انا لي ماسمعتش مزيان .. سرعان ما بان الذعر فمقلتاي.. الوجع لي زلزل جسدي من الداخل حسيته غايخرج على برا ..

نطقت بخوف ..

انا:~واش مريض بزاف ؟؟

هدى:~ (قاطعتني ) ماعرفتش .. هادشي لي عارفة انه مريض ..

نطقاتها بنبرة جافة ومشات فحالها .. شكيت انها من بعد ماقالتها ندمات .. خلات قلبي غايخرج من الخلعة .. الشيء لي خفت منه انه يكون بلال اذاه بشي طريقة .. الامر لي خلاني مانحملوش .. وحتى اذا اذاه غير بشعرة وحدة .. وانا عندي دخل فهاد الموضوع ..

فكرت مزيان ولقيت الحل الانسب هو نزوره فشقته لي وراها ليا قبل .. خلال هاد الاسبوع لي فات .. فقط غانوقف فالباب نطمأن عليه ونرجع نمشي فحالي .. غانتخطى كلشي خوفي .. كبريائي وغانرجع انا نسول عليه .. حيت لي غايكون وقع ليه بسببي .. بشكل او بآخر ..

الحاجة الوحيدة لي كنت خايفة منها فهاد الزيارة .. هي بلال وطيفه لي كيحصلني غير فالمواقف الغلط .. واخا ماكيهمنيش ولكن احتراما لنفسي على الاقل .. مابغيتهش يضبطني مرة اخرى مع مراد .. واخا غير من باب الصدفة ..

حتى تأكدت انه عنده حصة تدريس فالصباح .. عاد مشيت عند مراد .. كل خطوة طلعتها باش نوصل لشقته كيزيد قلبي يتخنق .. عارفة هادشي لي كانديره غلط ولكن ببساطة كنت مستهوية هاد الشيء .. فحال شي غمامة ضبابية كتجي على عيني وبلا مانشعر كنتبعها ..

دقيت وبقيت كنستنى شحال .. عاد فتح لي هو بنفسه الباب ..

مراد:~(شاف فيا بصدمة) لا ..

زاد توسع بؤبؤ عينيه .. والسكر المحترق فلوزيتيه .. بانت عليه الدهشة .. انا بنفسي كنت فحيرة من امري .. من هاد التسرع لي ديما كنتصرف به وماكنوازنش الامور بعقلي قبل قلبي ..

قبل مايسولني ولا شي حاجة كنت بادرت انا بالكلام ..

انا:~ بغييت غير نسول علييك ..

حققت فملامح وجهه .. بصح كانت باينة فيه مريض .. انفه لي ولا حمر .. عينيه حتى هما فنفس اللون .. عسل مدور باحمرار .. وعاد ملي تكلم صوته مدعدع ومبحبح ..

مراد:~ وجاية حتى ل هنا ..

فحال شي سيف ذو حدين كينخرني من جميع الجوانب .. اذا بقيت كنموت فبطئ واذا قربت من جهته كنموت اكثر ..

انا:~(هزيت كتافي بحرج) بغيت غير نطمأن عليك .. لباس عليك ؟

مراد:~(بتعب) الحمد الله شوية .. ماكان لاش تعذبي راسك ..

دورت عيني .. وهمست بشوية ..

انا:~ماشي مشكل ..

بعد ذلك اطبقت على فمي مالقيت مانقول .. من غير صوت انفاسي لي كانو كيفضحو تشنجي .. والريق لي هبط جاف مع حلقي ..

رفع حاجبيه بحرج حتى هو من هاد الموقف .. عاد رد البال لمظهره .. بملابس بيتية .. ووجه تعبان .. ابتسم ونطق بزز ..

مراد:~ بغيت نعرض عليك تدخلي .. ( طول الشوفة فعيني ) ولكن ماجاتش ..

عاد حسيت بالسخونية طالعة معايا .. وفطنت لتصرفي .. واقفين بزوج قدام الباب اكيد اي احد غاينويها فشكل .. واخا ماليها والو .. وعاد اذا دخلت لعنده اكثر .. اانكون تجاوزت كل الخطوط الحمراء ..

انا:~لا اصلا مانقدرش ندخل ..

ميل راسه خارج الباب .. وتفوه ..

مراد:~ ثلاثة الدقايق وانا راجع ..

زيرت على راحة يدي .. تنهظت بعمق وخليت داك الغصة لي واحلة فحلقي تتطلق ..

انا:~(قاطعته) اذا مريض بزاف .. بلاش .. غير جيت نسول وصافي ..

زاد ابتسم حتى تغمضو عينيه .. ودوز يديه على شعره ..

مراد:~لا غير تسنايني ..

غير قال كلامه غبر لداخل .. اما انا عاد تنفست براحة .. هبطت لتحت نستناه .. احسن مايبقى منظري مثير للشبوهات .. كنت خايفة من هاد الخطوة ولكن ها هي فاتت على خير .. حاولت ننسى كلشي .. يمكن داك الصداقة لي مالقيتهاش فنرجس نلقاها ف مراد .. واخا جميع مشاعيري كانت كتفوق الصداقة .. وكتكتم على قلبي بعنف ..

مافاتتش ثلاثة د الدقايق حتى كان لحق عليا .. مظهره متأنق ..

مراد:~ ماتعطلتش عليك بعدا ..

هزيت فيه راسي وهمست بابتسامة ..

انا:~ لا ..

عاد طولت فيه الشوفة ورديت البال لزوج دقات جنب فكه باينة بانو زرقين .. دابا فحال اذا لونهم بهت فهاد الاربع ايام .. عرفتهم من مخلفات بلال كتلة الثلج المتحركة ..

هادشي خلاني كنغلي من الداخل .. فحال اذا كبيتي الما سخون على احشائي وكيتحرقو على صفيحة نارية ببطئ .. كل جزء كيتمزق بوحده ..

حتى هو فحال اذا عرف فاش كنحقق .. مسح على وجهه بعدم اهتمام .. ووجه لي كلامه .. باعتذار ..

مراد:~ اول شيء كنعتاذر على داك النهار بعدا .. (ضغط على كتفي شوية بيديه) ماكنتش قاصد ..

جملته خلاتني كنترعد .. وكنتفكر هاداك النهار بلهلا يطيريه لي واخا كنقول غادي ننساه .. بكوارثه والاشخاص لي دازو فيه ولكن كيبقى محفور فخلايا عقلي .. وكل موقف بسيط كيفكرني فيه ..

انا:~ ( هزيت راسي بإحراج) صافي نسا .. مابغيتش نتفكر داكشي ..

مرر يديه على شعره .. وهز واحد الدفتر كان فيدي .. تسنيته مازال يسولني على بلال .. على الامر لي كيربطني به .. ولكن الجواب لي قال قبل حتى مانسوله خلاني نبلع حروفي وماننطقش بهم ..

مراد:~ والاعتذار الثاني .. بخصوص داك البروف المعقد ..

فتحت عيني شوية .. فقط تخيلت لو انه يضبطنا مرة اخرى فهاد الوضع جالسين ويسمع كلام مراد عليه اكيد غانخرجو فينا لا يحمد عقباه .. وحريرتنا مايفكها حد .. شحال هادي كنت كنخاف من واليديا لكن دابا بعيظة عليهم .. المشكل هو بلال عيونه فحال شي ذئب مفترس .. مترضد مترقب .. لكل ما هو حوله .. زفرت بضيق .. كنكرهه وكنكره راسي حيت دخل لحياتي بلا تخطيط ..

داكشي علاش قررت فالجامعة غانبعد من ساحة مراد وبرا غانتصرف على راحتي.. فالمكان لي بلال لا وجود له ..

سمعت الصوت لي خرج من جوف مراد كيكمل على كلامه ..

مراد:~ ماعرفتش نوع الحساب لي عنده معايا .. ولكن ديما كيخرجني من الحصة دياله .. بلا سبب .. ( مسح على وجهه بتحرتج) يمكن عنده الاخبار على الغش لي حصلت فيه .. ولكن نتي ماعرفتش شنو عنده معك ؟ ..

انا:~(همست بدون تفكير) يمكن بغا .. (عضيت على شفتاي وسكت شوية) يمكن ظن انك كتعدى عليا ولا شي حاجة ..

مراد:~(بان على وجهه التفكير) يمكن ..

جوابه نزل فحال الماء المثلج على راسي .. ماكنت مظطرة لا نشرح له ولا نبرر له .. فهمان الموضوع غلط .. بلال مشكلته الكبيرة معايا انا .. بقدر كرهه لي يمكن كيكره جميع الناس لي محيطين بيا .. كيفما انا نفسي الشيء ..

همست بتردد بنفس كلمته.. لكن اخفيتيه تحت قناع البرود ..

انا:~ يمكن ..

شاف فساعته ورجت شاف فيا ..

مراد:~ بما انه باقي الحال .. عارض عليك للفطور ..

انا:~(قاطعته) لا بلاش

ضحك بالجهد .. حتى ابتسمت تلقائيا ..

مراد:~(صوته تبحبح كثر)لا بما انك جيتي تطمأني عليا .. كتساليني فطور على حسابي .. ومنها نيت نتافقو على شي وقت للمراجعة ؟

هاد الفطور من احسن اللحظات لي دوزتها فحياتي .. من بين المرات القلال لي حسيت بهم بالسعادة الحقيقية ..

رسمت ابتسامة حالمة على فمي .. كنتفكر كيف داز يوم البارح مع مراد .. والاشياء لي عرفتهم عليه خلاوني نزيد نغرق فيه اكثر ..

سمعت الدقان فباب البيت.. تجاهلته مرة وزوج .. عرفت غاتكون غير ماما .. واخا هي غالبا كتدخل بلا اذن ..

رجعت غمضت عيني .. حتى حسيت بشي صوت مألووووف .. كينطق باسمي .. رفعت عيني كنتفاجئ بوجود جميلة معايا فالغرفة .. وابتسامة مرسومة على فمها ..

جميلة:~ ياكما فاجئتك .. ( زادت ابتسمت ) عيت ماندق عرفتك اتكوني ناعسة ..

رفعت عيني بذعر فيها .. سرعان ماتحول ل امتعضاض .. بقات لي غير عي باش تعكر مزاجي بلطافتها الزايدة ..

انا:~(حيدت الغطا) لا لا .. ماشي مشكل ..

من بعظ مانضت عنقاتني فحال ديما بحرارة .. وعينيها زادو وسعاو وبرقو .. من كثرة الابتسام ..

جميلة:~ المهم جيت لعندك باش نخرجو .. داباا ضروري ..

ضغطت على فمي واجبرت نفسي انني نتنفس بطلاقة .. ونتصرف بعفوية فحالها تماما ..

انا:~(همست باعتذار) انا .. قارية .. نقدرو نأجلوها لمرة اخرى ؟

فالحقيقة كنت كاذبة عليها .. ماعندي لا حصة لا والو .. بغيت غير نمشي نتلاقى مراد .. ونراجعو بزوج .. احسن من انني نبقى معهم كنرسم ابتسامات منمقة ..

هادشي لي كان فبالي من البارح .. ملي فطرنا ودوزنا تقريبا نصف النهار بأكمله مع بعض واخا كان مريض .. حكر على راسه وبقى معايا وهادشي شكل عندي الكثير ..

جميلة:~(تمتمات بمرح) عارفاك ماقارياش.. قالها لنا بلال .. غير بلا ماتحشمي ..

الذعر اكتسحني وانا كنتفكر اذا كانو عارفين ماقارياش .. واذا كان كيزيد يفضحهم على كل مايخصني .. حسيت بشي سكين كيقطعني جزء بجزء .. ابتلعت ريقي بخجل .. وجيت ننطق ولكن كانت عاودت قاطعتني ..

جميلة:~ عارفاك حشمانة .. ولكن نتي عارفة شحال وحنا كنستناو النهار لي غاتمشيو تشريو فيه الخواتم ..

تكلمت بعدم فهم .. فحال اذا مامصدقاش شنو كتخربق عليا ..

انا:~ الخواتم ؟؟ ..

دفعاتني للحمام برفق .. ونبرة صوتها عادية .. عرفتها مافهماش التقلبات لي كتحصل لي .. وماعارفاش انني مافهماهاش اصلا علاش كتكلم ..

جميلة:~ااه الخواتم .. من بعد ماوفقتي .. اكيد خصكم الخواتم .. ماعارفاش واش اتفقتو نتي وبلال على هادشي .. (زادت وقفات وبعدات شوية) ودابا .. بلال وهند كيستناونا .. يالاه سربي .. ماغاديش نقول لك اكثر ..

جملتها الطويلة .. اخرستني .. انا امتى وافقت من اساسع ؟؟ رجلي ارتعشو .. ونصفي لي لتحت رجع من عجين .. "الزواج " .. "الخواتم".."بلال" ؟

ثلاث امور خلاوني نترعد .. واش من الاولى ولا الثانية حتما الاسم الثالث كان هو السبب .. من بعد هاد الجفاء فهاد الخمس ايام غانعاودو نتلقاو .. ونتصنع ابتسامة بلهاء فحال اذا عمرنا عرفتا بعضياتنا ولا فحال شي زوج بصح راضيين على قرار الزواج ..

قضيت روتيني الصباحي .. ووقفت قدام المراية كتنفس بعنف .. كنحاول نطرد ما امكن هادشي .. عارفاه قال غايرفض هاد الزواج .. ولكن دابا شنو لي تغيير .. غمضت عيني بآلم .. اكيد غايكون غير شي سوء فهم ..

من بعد اخذ ورد .. بين جميلة وهند .. حتى مالقيت باش نجاوب. .. ملي حاولو يقنعوني باش نركب القدام .. وهادشي لي درته باش مانبينش اضطرابي امامه .. اما هو يالاه اكتفيت نقول ليه السلام ماعرفت واش ردها ولا غير وذني لي سمعوه غلط ..

كل متر كان كيمشيه بسيارته .. التنفس بين صدري كيضياق فحال اذا كنغرق فشي بحر .. مالاقيا كيف ننفذ منه .. بين الفينة والاخرى كنت كنشوف فيه كنلقا وجهه بدون تعبير ..

هند:~صافي نزلنا غير هنا .. (سكتات شوية) صافي غير مشيو بوحدكم ..

صوتها خرجني من شرودي .. وهادشي لي كان ملي شفتهم كيفكو حزام السلامة ..

جميلة:~(نزلات وسلمات عليا) نتلقاو من بعد .. حنا غير وصلنا معكم ..

بينما بقينا حنا غير بزوج .. زدت اكتمت شهقاتي وتنفسي لي ولا مضطرب اكثر من الاول .. ويدي لي كانو كيتحركو فضحو تشنجي ..

بلال:~ ( زفر تحت سنانه) ماغاديش ناكلك .. تقدري طلقي راسك ..

رفعت راسي لجيهته .. كل مابان ليا هاد المرة هو ساعديه القويين فاللون الاسمر .. مكتسين بالشعر شوية.. كالعادة .. مشاو نيشان لداك العروق لي بارزين .. واش من اثر الاعصاب وعدم الراحة ولا هكاك طبيعين .. فطنت براسي ..رديت راسي لعندي بعصبية عاد نطقت بصوت خافت ..

انا:~مرتاحة هكا ..

بلال:~ ماشي هادشي لي ظهر لي .. (صوته زاد اكتساه البرود) حتى انفاسك كيفضحوك ..

جملته كانت بمثابة العافية لي شعلات داك النار بداخلي .. كايدير راسه ماعارف والو .. ماقال والو .. فحال اذا ماكاين والو غير كنتوهم .. لساني لي فضح خيبة املي بسرعة ..

انا:~ ياااك قلتي ااااترفض هادشي .. (تنفست بعنف) ودابا ماشي هادشي لي ظهر لي ..

سكت ماجاوبنيش .. خلاني كنعض ففمي وريقي كنهبطه بصعوبة.. هو ماكيشوفش جهتي حتى .. الامر لي حيرني كيفاش قدر يلاحظ هادشي .. كتلة الثلج الباردة .. زفرت عاودت زفرت ..غانهدي راسي وغنبين فحال اذا ماوقع والو ..

حتى حسيت بأصابع الطويلة توضعو فوق كفي .. زير على أصابعي بقسوة حتى نأوهت بآلم ..

بلال:~(نطق من تحت سنانه) ماشي مضطر باااش نشرح لك .. وهاد المهزلة كلها غاتسالي .. (ضغط على كلامه) ملي قلت غاتسالي يعني غاتسالي..

غير قال هاد الجملة خلاني مصعوقة .. بعد ذلك طلق من يدي بهدوء ..فكه لي كان متشنج رجع عادي .. الشيء لي كنت كنشوفه هو عرق نافر جنب عنقه كيتحرك بعنف مع انفاسه ..

تمتمت بصدمة .. بلا مانهتم ل الجو لي مكرهب بيناتنا ..

انا:~ يعني غاتسالي هادشي ..

يديه زادو زيرو على مقود السيارة .. حتى من مفاصيل يديه كنت كنشوف فيهم كيف كيتحركو لعل وعسى نفهم شي حاجة من تصرفاته ..

سكت شحال وفالاخير اكتفى يحرك راسو بإيجاب بلا مايشوف جيهتي .. اما انا عاد تنفست براحة .. انه غيسالي مهزلة هاد الزواج كله .. الامر لي خلاني نرتاح ونرجع نغمض عيني ونفتحهم وابتسامة اطمئنان مرسومة على ثغري..

انا:~(همست بشرود) وعلاش الخواتم ؟

بلا مايشرح ولا يفسر لي نطق بجملته ..

بلال:~ نتي مظطرة تلبسيه دابا ..

قال جملته باقتضاب .. الشيؤ لي خلاني نستغرب .. كلما سولته كيزيد يدخلني فمغارات الغموض .. ماكنعرف لا نحلل كلامه ولا نقرا محيط عينيه الاسود ..

كنشوف فيه مجرد نسخة مستصغرة من بابا .. نفس الجلاد كيجلدني بسوط الزواج ويصفعني بغموضه ..

انا:~(جاوبته باقتصاب اكثر منه) كنظن ماكاين حتى سبب لي يخلينا نشريواه وحنا غانساليو كلشي ..

شهقت بخوف .. فاش وقف سيارته بعنف .. فحال اذا ماعجبوش كلامي وزعجو .. اصلا هادشي لي كيفهم يدير .. ردود افعاله ديما على غفلة ..

شاف فيا بجليد عينيه المكفهر.. فحال السما بالليل فليلة عاصفة ..هو الغضب ولا القسوة ؟؟ .. لوم ولا عتاب ؟

بلال:~ قلت كلام واحد هو لي غايكون ..

زاد قرب مني بجسده الضخم.. وصدره كيبان شوية من الشوميز لي لابس .. بما انه فاتح الصدايف الامامين..

لدرجة انني حسيت بداك الشحنات السلبية كيهربو من جسده ويقتحمو جسدي بقسوة .. مثل اسهم كتخترق قاتلها بكل براعة بدون ماتخطى الهدف.. الشيء لي خلاني نرجع تلقائيا للوراء ..

انا:~ (زفرت بالجهد) ماكنفهمكش ..

زاد شاف فيا بجرأة اكبر .. ماحيديش عيونه من مقلتاي .. ماحركهمش .. ولا رمشهم .. داك النظرة لي انا عاجزة نفسرها ..

جفلت لمرأى وجهه قريب مني لهاد الدرجة .. انفاسه كنحس بهم كيحرقو انفاسي وذرات صبري .. لسانه تحرك بين فمه .. ورجع شوية للوراء من بعد ما شافني خايفة من هاد القرب .

بلال:~ من الاحسن ماتفهمينيش .. ياعميقة العينين ...

تلاعب بحاجبيه .. بينما انا قلبي تلاعب بين ضلوعي على مسمع كلمتيه الاخيرتين .. كتمت انفاسي وغمضت عيني باضطراب .. يمكن غير اتا لي ماسمعتش مزيان ..

"عميقة العنين" ولا ربما كيعايرني بها ..

بعد ذلك اخذ كفي بين يديه .. كل ماداره هو جبد واحد الخاتم عنده فالسيارة .. ذهبي رقيق .. بلا مايستنى ردة فعلي .. ركبه فصبعي الايسر .. وعاود لبس هو واحد الخاتم فنفس الاصبه فالنقري ..

كنت محتاجة نهدئ انفاسي .. الشيء لي خلاني ننطق بتوتر ..

انا:~ غادي نرجع فطاكسي .. صافي شكرا ..

بلال:~(نطق بدون تعبير) جيتي معايا يعني .. انا لي غانرجعك ..زاد ابتسم بتلاعب) المفروض انك خطيبتي دابا ..

انا:~( همسن بين انفاسي) ممكن تحيد داك اللفظ الاخير ..(قلبت وجهي لزجاج السيارة) حيت شي حاجة لي حنا مجبرين عليها لا انا ولا نتا .. ماقادرينش نتحملوها ..

الجو تكهرب وعرفت انني اصبت الهدف .. شفت وجهه تغير وعروقه كييزيدو يخرجو وكيتحكم فنفسه بصعوبة ..

بلال:~ ديري فبالك انه حتى حد مايقدر يجبرني ولا يعرض عليا امر انا ماباغيهش من اساسه .. وحتى لو تطوني نتي بنفسك ..

انا:~(بعدم فهم) كيفاش ..

ديمارا الطموبيل .. مخليني كنحلل فكلامه .. من الاول وانا كنشك انه دار هادشي غير انتقام مني .. شافني قبل بلا حجاب وبغا يحطم كل ذرة كبرياء بقات لي .. ويزيد يزطم على روحي ويفزرها كثر ما هي ممزقة ..

اخذني الوقت كنزيد نغرق فالجمل لي القاهم على مسمعي .. مرة تفكيري ياخد منحي ايجابي .. مرة سلبي .. حتى لقيت راسي قريبة للدار وهو عاود وقف بسيارته .. يالاه جيت نفتح الباب حتى كان سدها علينا بزوج ..

همست بصبر .. وخا حسيت براسي غانطرطق من ردود افعاله المريضة ..

انا:~كتلاعب بيا ..

بلال :~(ببرود)لا ..

زدت فتحت الباب لكن كان مصر انه يخليني عالقة .. انفاسي خرجو بصعوبة من فمي ..

انا:~ وشنو كتسمي هادشي ؟؟

رد راسه اللور .. ويديه تحركو داخل شعره .. حتى مسح على لحيته فالاخير عاد نطق ..

بلال:~ خصنا نوضحو سوء فهم لي وقع بيناتنا في الايام لي تلاقينا فيهم ..

عيني نيشان مشاو لعروق يديه لي باقي بارزين .. انفاسه كيطلعو يهبطو بتناغم مع فؤادي .. لا صافي غانحماق وانا كنشوف غير ردود افعاله ونركز فيهم قبل مانسمع لكلامه خصوصا يديه .. داير فحال شي كتاب عامر شيفرات حتى كنقول فهمت شي حاجة ونرجع من البداية ..

بلال:~ ( تحرك حتى طرطقو عظلات جسده ورجع تكلم بهدوء) كنعتاذر لك على المرات لي اهانتك فيهم .. ( غصة فحلقه طلعات وهبطات ) كنعاود نعتذر لك على المرات لي جرحتك فيهم بدون قصد ..

انا:~(تخنقت وتكلمت بارتجاف ) بلا ماتحتاج تعتذر لي من نيفك الفوق ونتا فقرارة نفسك كظن العكس ..

بلال:~(زفر بضيق ) عارف راسي غلطت فحقك .. جوري(ضغط على اسمي بين ثغره) كنعتذر لك ..

مانعرف كيفاش حتى لقيت عيني عمرو بالدموع.. بدون مايهبطو .. وجرح كلامه باقي كينزف بغزارة واما ماقال غير شنو شاف ولكن كلامه بمثابة شي موقد من النار توضع عليه جسدي ..

عضيت على فمي بارتجاف.. بلا مانجاوبه .. عارفة راسي غانضعاف ونبكي قدامه من جديد .. فحال اذا كيعرف يجبد اسوء مافيا ويورك على الوتر الحساس .. هادشي لي ماقدر حتى حد مازال يوصل ليه .. اعتذاره كان صفعة ثنائية الابعاد تلقاتها روحي .. . فتحت باب السيارة لي فتحها من قبل .. وخرجت فحالي ..

وصلت للدار .. بعد جهد جهيد .. واخا المسافة كانت قصيرة .. حسيتها دهر بأكمله .. كل كلامه كان فحال شي منشار كينخر فذاتي من الداخل ويخرج اسوء مافيها .. وعاد اعتذاره .. ماكانش على البال ..

خليته فسيارته مازال.. ربما كيتنادم معه الحال حيت اعتذر لي ..

غير دخلت مع الباب .. تلاقاوني بعينيهم الفضولين .. لقيت ماما وعمتي جالسين .. مجمعين ..

زفرت بتعب واقيلة عمري نتفك مع هاد العائلة .. انا كنهرب منهم والقدر كيحطهم فطريقي باستمرار ..

ابتسمت عن غصب والقيت السلام ..

انا:~ السلام وعليكم ..

نطقتها بفتور كيقابل داك الفتور لي فقلبي .. عيني لي كانو مدمعين كلما تفكرت اعتذاره .. وعاد دابا كنشوف فوجه عمتي نفس تقاسيم الوجه تقريبا .. كنتفكر غير وجهه .. واسفه الاخير ..

عمتي:~(ردات عليا) وعليكم السلام .. على سلامتكم ..

اما ماما تكلفات ترد علا حتى هي غير من باب الصواب .. حتى هي كانت باينة فوجهها ماعاجبهاش الحال على هاد الزيجة بأكملها ..

زادت شافت فيا عمتي بيعينها مغرغين .. ماكنتش قادرة نتحمل هاد الكم الهائل من المشاعر وهاد العاطفة كلها .. بمثابة جمرة كتكوي قلبي ..

عمتي:~ ماجاش معك بلال ..

بلغت ريقي بجفاف .. اكيد ماغايتجرأش يدخل معايا .. بانة فعينيه انه كبريائه اكبر من انه يعاود يتلاقاني ويهدر معايا ..

انا:~(حركت راسي بنفي) لا .. يمكن مشغول ..

عمتي:~(همسات) اجي جلسي جنبي ..

داكشي لي درت جلست قدامها فوق الشوك .. لكمات عينفة كيضربو فكرشي .. بدون رحمة !

ماما:~ غانطلع ننشر الحوايج ونرجع عندكم ..

عمتي:~( حركات راسها بايجاب) واخا .. حتى انا بغيت نهضر مع عروستي ..

زدت ضغطت على نفسي باش ماننفاجرش فوجهها .. سيدة بشوشة كتعاملني بلطف .. لا فكلامها ولا فكلشي .. المشكل كان فيا انا من الداخل ولأول مرة كنعتارف به لنفسي ..

مسحات عينيها .. متأثرة يمكن .. كأي ام ولدها غايتزوج وغايختار شريكة حياته .. يمكن بهاد البرود كنبانو لها اننا راضيين على اي قرار اتخذوه فحقنا ..

عمتي:~ (مسحات على وجهي ولمحات الخاتم) مبروك عليكم .. ان شاء الله ربي يكمل عليكم بالخير ويرزقكم الذرية الصالحة ..

انا:~(همست بنفور ) اميين ..

عمتي:~ زربنا عليك فالصباح ..

انا:~(ابتسمت هاد المرة) لا ماشي مشكل ..

طولات الشوفة فيا .. وبلا دخول وخروج فالهدرة القت عليا سؤالها ..

عمتي:~ نتي موافقة على هادشي ابنتي ؟(تمتمات بمرح) واش كتشوفي راسك تقدري تكملي مع بلال ..

مابغيتش نكسر قلبها ولو على خاطري .. ابتسمت باش مانبين والو حركت راسي بالايجاب .. حيت عارفة واخا نوافق هو غايسالي كلشي .. يعني ماعندي مناش نخاف .. وهادي ماهي سوى مجرد كذبة بيضا

انا:~ اااه ..

عمتي:~(زادت مسحات على راسي) متأكدة .. ماجبرك حد على هادشي ..

انا:~لا .. متأكدة ..

طعم المرورة تصاعد لحلقي .. اما هي .ابتسمات باطمئنان وخلات الحروف يتناثرو من جوفها ..

عمتي:~ حتى بلال مايلقاش احسن منك .. حتى انه هو بنفسه لي اختارك .. باغينك بيناتنا احسن من شي وحدة برانية ..

الحرارة طلعات معايا .. هو بنفسه لي اخترني؟ .. شهاد التخربيق .. هو بنفسه كيقول وكيشهد انه مامسوقش لي .. وماهاموش هاد الزواج .. وغايسالي هاد المهزلة بأكملها .. غمضت عيني فجأة .. واحد فيهم كيكذب وكيزين الامور ؟ غايكونو حتى هما فحال واليديا كيزينو لي طريق الجحيم باش ندخل لجهنم وعيني مفتوحين ..

زادت ضغطات على كتفي حتى فيقاتني ..

عمتي:~ خصوصا كتعرفو بعضياتكم فالصغر ..

انا:~(حركت راسي) ااه بصح ..

عمتي:~( بسكون )هو اخترك قبل سنوات .. كنا كنستناو فقط الوقت المناسب حتى نقولوها لكم .. معه ( تمتمات بحرج ) واخا كنت كنقول يقدر قراره يتغير ملي تكبرو بزوجكم .. ولكن نهار تكلمنا على الزواج .. اختارك مرة اخرى ..

زادت صفعاتني بكلامها .. كتسرسب لي حقائق انا ف غنى عنها .. كيزيد قلبي يغلي بين ضلوعي .. والعاطفة كتجرفني نحو القاع .. وتطبق على انفاسي ..

انا:~( همست بصعوبة من هاد الكلام لي كتقوله لي) انا .. انا ماعرفتش ..

عمتي :~ نتي وحدة منا قبل ماتكوني عروستي .. نتي بنتي بالاول ..

انا:~ (عضيت على لساني وهمست بصوت مكتوم) ان شاء الله .. غايكون غير الخير ..

عمتي:~ ان شاء الله .. ربي يكمل عليكم بخيير ويفرحنا بكم وبولادكم ..

قطعت كلامنا فهاد الحد.. ماباغياش مازال نسمع عليه .. ماحاسينش انهم كيضغطو عليا .. صافي يكفي هادشي لي عرفته هاد النهار .. ذاكرة عقلي مابقاتش قادرة تتحمل مازال .. والشيء لي متأكدة منه .. واخا يكون بلال قال كلامه منذ سنوات .. هادشي كله لي شافه غايخليه يغير نظرته عليا .. ورفضي غايجرح كبريائه .. ويخليه يسالي هادشي بسرعة .. وينهي حياة زوجية قبل ماتبدا اصلا ..

حركت الخاتم فيدي بشرود .. رديت راسي اللور على الأريكة فشقة مراد .. عشر ايام وانا كنعيشها كلها تلخبط .. مابين مطرقة الزواج وسندان الحرية !

مازال لحد الساعة .. سجينة لداك الاحاسيس كلها لي انتابتني داك النهار .. مثل شي شخص فشي زنزانة لا مفر له منها .. اذا اقتربت من النار غاتحرقني واذا بعدت غايلحقني لهيبها ..

حسيت بيدي مراد توضعات فوق كفي .. ووجه لي كلامه ..

مراد:~ علاش مازال دايراه فيديك ؟ ..

حركت عيوني بعدم اطمئنان .. ديما كنحيده فاش كنخرج من الدار .. كنخليه غير امام عائلتي .. باش نتفادى سين وجيم معهم ..

زفرت بضيق .. وكذبت عليه بكل بساطة .. كيف ولفت حتى حاجة مابقات كتصعاب عليا .. خصوصا الكذوب .. كننجارف فهاويتهم بدم بارد .. لا احساس لا ضمير ..

انا:~ قلت لك غير د ماما .. نسيته فيدي ..

مراد:~(غير الموضوع ) شنو نكملو المراجعة ..

قبل مانجاوبه .. شفت فالساعة كان مازال الحال .. يعني ماشي ضروري نرجع دابا للدار .. فالاول كنا كنراجعو فالمكتبة د لافاك .. لكن هاد الخمس ايام رجعت كنجي معه للدار .. فقط للمراجعة لا غير .. وكل النهار كنزيد نتعلق به اكثر ..

انا:~ واخا ..

انهمكنا بعد ذلك .. مرة نتكلمو بطول .. مرة نراجعو .. حتى انتهينا تقريبا.. تكلم هو بنفسه ..

مراد:~(ابتسم) لي يشوفك يقول مخطوبة ..

عضيت على فمي بحرج .. كنتصنع الكذوب.. باش مايعرف والو .. ومايحس ب حتى حاجة.. ماشي فصالحي يعرف بأمر بلال .. ملي الامر كله غيسالي فالنهاية وقبل مايبدا اصلا علاش غانصرح عليه من البداية ؟ ونبين ان هاد الزواج بشي اهمية ..

انا:~ اكييد لا .. الزواج امر صعيب ..

مراد:~ (شاف فيا بعمق) بصح .. خصوصا الزواج محتاج زوج د الناس يكونو مفاهمين .. وكيبغيو بعضهم .. (ورك على جملته الاخيرة)

قلبت وجهي للجهة الاخرى .. هادشي لي عمره غادي يكون بيني وبين بلال.. الزواج خصه زوج د الاشخاص يكونو مرتاحين لبعض قبل اي شيء اخر .. هاد الامر يمكن نلقاه ف مراد بوحدن صافي ..

انا:~ عندك الصح ..

زفر بارتياح .. وابتسم براحة .. يديه طلعو لوجهي .. ول خدي تقريبا حط كفه لي حرقاتني بحرارتها .. الشيء لي خلاني مباشرة نشوف فعينيه .. لونهم بلون اللوز كيميلو للسكر المحترق .. كيجذبوتي بشكل غريب .. حتى ملامحه لحد الساعة اذا شفت فيهم كنشعر بارتياح عجيب ..

مراد:~ شحال من مرة اعترفت لك كتعجببني بزاف وكنبغيك ولكن لا رد من عندك ..

حلقي لي جف بللته ببضع قطرات من الماء ..

انا:~ شنو بغيتبني نرد عليك ؟

مراد:~ حاس انك كتبادليني نفس المشاعر ومابغيتيش تعتارفي .. علاش هادشي ؟

هسيس انفاسي المتشنجة تسمع حتى لعنده ..

انا:~ومن بعد ..

مراد:~(جاوبني بصوت اجش) ماكتشوفيش اننا فعلاقة حنا دابا .. ماشي مجرد اصدقاء .. ( زاد شاف فيا بجرأة اكبر) غير نتي لي كتنكري هادشي ..

انا:~(حركت راسي بنفي) ماعندي علاش ننكر ..

مراد:~ اذن ماتكنكريش هادشي لي بيناتنا ..

حرارة كفه زادت حرقاتني .. وهو مصر يعذبني ويضغط على وجنتي .. حتى احنى احدى اصابعه ل جنب فمي .. بعد ذلك طحت فداومة نظراته .. وغرقت فمشاعري حتى ماقدرتش نتحرك .. قبل مانرد على جملته .. ثغره انحنى عند شفتاي وقبلني بلطف ..

مادرت حتى ردة فعل فالمقابل .. مابادلته قبلته .. ماوقفته على فعلته ..

من غير انني حاسة براسي غانسخف وانا كنتحمل هاد الكم الهائل من المشاعر .. بعدت عليه وهمست بين اختناقي ..

انا:~غانمشي فحالي .. (شفت فالساعة وعيني مامركزينش حتى قلبي كنحس به غايخرج بين ضلوعي ) مابغيتش هادشي امراد مابغيتش ..

مانعرف ولكن بطريقة او بأخرى حتى كلامي البارد بان ليه استسلام .. مسح على وجهه بهدوء.. دار يديه على كتفي ..

مراد:~ ماتفهمينيش غلط ..

وقفت باش نمشي فحالي .. لكن وقفني امام الباب بجسده .. ومنع عليا الامر ..

مراد:~علاش كتنكري هادشي ..

زاد خاصرني بجسده وهمس جنب اذني بصوت اجش ..

مراد:~ثيقي فيا كنبغيك وعمري نخليك ..

كأي وحدة ماعندهاش القدرة توقف قدام شخص كتعتبره كلشي فحياتها .. لون اسود ضبابي داز قدام عيني .. نساني ف بلال .. ف الزواج .. ف النصائح كلهم لي اتخذتهم فحياتي باش نحافظ على راسي .. فقط ركزت نظري على ثغره لي عاود سقط على فمي هاد المرة قبلني بعمق اكثر وحتى انا مامانعتش ..

مراد:~(همس بين انفاسه ) بغيت شي حاجة لي تبقى معانا حتى ل ديما .. عمرهها تفرقنا .. ثيقي فيا كنبغيك ..

الثقة هاد الشيء لي كنت عاطياه غير ليه .. رجلي ولاو من عجين تحت من جسدي .. وانفاسي كلهم كيتسمعو لعنده تحركت بانفعال ..

انا:~ ماااابغيتش هاااااادشي .. اناااااا ماااشي هكاااا ..

غمض عينيه وعنقني لعنده ..كيحاول يهدأني ..

مراد:~ ثيقي فياا .. ماعمري غانخليك .. غانصلحو كلشي .. (زاد اقترب مني) كنبغيك .. (همس بشوية) واش هادشي ماشي كافي ..

ماشي كافي .. لكن شفته كل شيء.. وعد قطعه لي .. وانا صدقته .. يمكن هذه عي الطريقة المثلى .. باش يحصل معايا مراد ونتهنى من بلال بمرة من حياتي ...

انا:~ (حركت رسي بنفي ) مانقدرش .. انااا مانقدرش ..

باغيا نخرج .. نهرب .. ولكن لا مفر .. .

مراد:~ ماتخافيش .. نتي ماشي رخيصة عندي ..

فجأة كلمة وحدة لي طنطنات فأذني .. " رخيصة" هاد الكلمة بدل ماتبعدني منه زادت خلاتني ثابتة .. بدون حركة .. كنشوف غير يديه لي تحطات على كتفي وانفاسه هاد المرة لي تجرأو حتى لعنقي .. وانا مستسلمة لا حول لي ولا قوة .. كنسقط ف خطيئتي بعيني مفتوحين .. فحال اذا كنسقط فبحر الاغلاط وامواجه كيجرفوني نحو الاسفل .. لا انا قادرة ننقذ راسي ونهرب او نغرق راسي ونوصل لنقطة النهاية ..

ما حافظت عليه ل تسعة عشر سنة .. ماكنتش عارفة انخسره بهاد السهولة .. ف تسعة عشر ثانية فقط ؟؟.. لحظة طيش ورعنونة .. وقت كان كافي يمزقني .. يقطعني .. يدخل مع شرايني ويمتص منهم الدم قطرة بقطرة.. يخليني نندم اشد الندم على ماأقدمت عليه.. فحال اذا كنت فشي كابوس مزعج ..

الامر لي دار فبالي واش هاد نفس الجوري الوردة لي بداخلي .. نفسها لي قالت عمرها تخسر راسها فمعركة مشاعر من الاول باينة انا الخاسرة فيها ..

لا بالفعل كنت وحدة اخرى ؟؟ بلا اخلاق .. بلا كرامة .. ودابا بلا شرف ..

الشرف ؟ شحال قاسية هاد الكلمة .. فحال اذا شي حد كيضربني بلكمات عنيفة ف سائر جسدي .. وكيقتل روحي من الداخل ..

العرق البارد زحف على مستوى عمودي الفقري ..

سترت راسي بملابسي .. شنو غانستر اذا كنت انا بنفسي قضيت على اخر رمق بقا ليا فهاد الحياة ..

تمتمت والدموع كيطيحو من عيني فحال الدم .. كيتعصر من الداخل ..

انا:~مم .. م .. مراد ..

قلت اسمه .. بندم .. خذلان .. بإحساس يذنب عظيم ..

مراد:~جووري .. تهدني ..

كل المشاعر كانو مجموعين فهاد اللحظة .. كيف ضيعت راسي .. ضيعت كلشي من بين يدي ..

هو بنفسه كان مذهول من الشيء لي ولدصلنا له بتهورنا

مراد:~ جورري ( دار يديه على راسه حاول يهديني ) اانصلحو كلشي .. تهدني ..

نطقت بخوف والدموع كتغشي عليا الرؤية ..

انا :~ شنوو غانصلحوو شنو ..

مراد:~(دار يديه على راسه بينما ملابسه لبسهم غير مرتبين) كلشي .. ماتخافيش .. غلطنا بزوج ..

انا:~(زدت فوتيرة الندم) كيفاش حتى وصلنا لهادشي .. كيفاش حتى درت فراسي هاادشي؟

عاد حسيت بكمية الندم لي طل من عينين ولكن ماكانش بمقدار نقطة واحدة من بحر ندمي .. هادي انا؟ يستحيل نكون بهاد الرخص .. بلا قيمة ؟؟؟

مراد:~( همس باعتذار) كنحلف لك ماكنتش ناوي نوصل لهادشي كله ..(جلس بتخاذل) ماكنتش ناوي

انا:~ (رفعت وجهي فيه وتكلمت بتمتمة) كيفاااش .. ماكتتيش ناااوي تووصل لهادشي .. (قربت حتى لعنده ) نتاا لي تقريبتي مني فالاول ..

درت يدي على وجهي كنحاول نكبح داك الدموع لي كيتقافزو من عيني واحدة تلوا الاخرى .. بينما طعم الصدأ كيتصاعد لحلقي .. ويزير على جوفي ..

مراد:~ ماتخافيش .. كنقسم لك بالله انصلحو كلشي .. والله غايشهد ماغانتخلاش عليك ..

وقفت .. كنحاول غير تنتفس والو .. حنجرتي فحال اذا شديتييني ودرتيني فشي قرعة وشديتي عليا .. الرعدة زحفات على نخاعي الشوكي .. حتى ماقدرتش نتحرك ..

انا:~ اناا ثقت فيك .. سلمتك اخر مايمكنش نملكه .. (تكلمت بترجي) ماتخذلنيش فالمقابل ..

مراد:~( حاول يهدأني اكثر) امني بالله .. غانصلحو كلشي .. كلشي غايتصلح .. وكنقسم لك بالله ماكنت ناوي نوصلو لهادشي ..

مجدادا القسم والحلوف .. داك شمعة الامل لي بقات مضيئة فداخلي هي لي حركاتني .. مرة نبكي بهسترية .. مرة نسكت .. ماقادراش نتخيل راسي فهاد الموقف .. تمنيت لو انني غير فشي حلم ولا هاد الامر مرجد كابوس مزعج ..

الدنيا تلونات حولي بلون الدم .. وغصة استحكمت حلقي .. صافي كلشي سالا .. عيني ماجاو غير فالخاتم لي فيدي .. اذا احتقرت نفسي قبل .. فانا احتقرته دابا اكثر .. كل ماظهر لي هاد المرة وجه بلال كيقول انني رخيصة !! ..

رديت راسي اللور على الكانابي وصوتي تشجنج .. كان مخلط بين الترجي والرعب .. كل ماقدرت ننطق به .. هو جملة واحدة خلات مراد مصعوق فبلاصته ..

انا:~ خصنااا نحلو هادشي بالزربة .. دارنا ناويين يزوجوني ..

شاف فيا بذهول .. وتمتم بين انفاسه الثائرة ..

مراد:~ اش كاتخربقي ..

هزيت فيه راسي بريبة .. عارفة مقدار الخطأ لي خطيناه .. اذنبنا بزوج لكن اذا ماتصرفش هو .. انا الوحيدة لي غانتحمل الذنب كله حياتي كلها ..

انا:~(تكلمت بهسترية) داااارنااا باغييين يزووجوني .. ونتااا خصك تتصرف تعتقني من هاد الموووقف لي طحنا فيه ..

شاف فيا بعدم تصديق وعينيه مشاو لداك الخاتم لي بين يدي .. همس برعب ..

مراد:~ واش نتي مخطوووبة ؟؟وااش كتكذبي اجووري ؟ كنتي باغيا غير تنقذي راسك داكشي علاش سلمتي لي راسك ..

وسعت عيني برعب .. وسؤاله بمثابة صفعات قاسيين كيطيحو على وجهي ويلكموني فداخلي ..

انا:~( هدرت بالجهد وزاد صوتي تخنق) لاااا .. لااا اناااا مامخطوووباش مامزوججاش .. نتاا خصك تتصرف تعتقني من هااادشي لي طحناااا فيه ..

رفع راسه الفوق وزفر بضيق .. صدق الامر د انني مامخطوباش ..

مراد:~ كلشي اايرجع كيف كان .. ماتخافيش ..

شد يدي بيني يده ورتب عليه لكن سرعان ماحيديتها .. كرهت لمساته .. وكرهت راسي على هاد قلة الشرف .. حسيت بالشفقة على راسي لهادشي لدرته لراسي .. سقطت من الاعلى دون هوادة بلا مايتلقفني حد ..

سقطة فيقاتني لكن كان فات الفوت .. وفات بزاف ..

غمضت عيني بآلم .. وكل ما قلت ماغانبكيش عاد ماكنزيد اكثر ..

انا:~(درت وجهي بين يدي) ماتخذلنيش امراد .. غلطنا بزوج .. ونتا خصك تصلح نصف ذنبك ..

ذرات الاوكسجين دخلو ثقال لصدري .. تمنيت نموت .. احسن من هاد عذاب الضمير لي كنحس به .. ساعة واحدة كانت كافية باش ترد كلشي معايا فحال شي تصرفيقة فيقاتني من كلشي ..

دخلت للدار بصعوبة بالغة .. الموت شداتني .. والحمى كتطبق على انفاسي .. صافي ضيعت راسي .. قتلت نفسي بخنجر التهور ..

خرجات ماما من االكوزينة كتحدق فطيفي باستغراب .. اليوم كان الفارق .. دائما كانت كتشوف على وجهي علامات البرود .. ولكن دابا فحال اذا كنشوف وجهي بنفسه كيفضحني ويقول فعلتي ..

ماما:~ جوري .. مالكي ؟

قالتها بخوف .. الخوف لي جا معطل .. ماكانش ابدا هذا محله .. احتجيته قبل من دابا ...

لمن غانعطي راسي .. شكون غايفكني من هادشي .. هذا كل مافكرت فيه .. واش نقتل راسي باش ننسى هادشي ..

برهنت على انني وحدة رخيصة واكفس من هادشي انني ساهلة ..

ماما:~واش مريضة ؟

هزيت راسي بصمت كنحاول مانتفاجرش من جديد ..

انا:~ ااه ..

شافت فيا بخوف .. هاد العاطفة لي ماكنتش محتجاها ..دابا لا فائدة منها .. البكا ورا الميت خسارة ..

زدت تكلمت باتجاف..

انا:~كرشي ضاراني ..

دخلت للبيت بلا مانبدل حوايجي .. تمديت فبلاصتي والدموع كل مرة كيهبطو بدون توقف .. واخا هكاك نحاول نكبج صوتي باش مايتسمعش زفيري المؤلم ..

ماعرفتش ان الآلم النفسي اكبر من الآلم الجسدي واكثر منه حدة .. فحال شي سكين كينخر روحي من الداخل ..

بعد وقت طويل .. حسيت بماما عاودت دخلات .. قلبت وجهي للجهة الاخرة كنحاول نوقف صوتي .. فحال اذا ماواقع والو .. شنو انقول لها ؟ انه صافي ضيعت راسي ..

دارت يديها على كتفي .. واخا البرود كان طاغي على صوتها

ماما:~ شربي هاد اللويزة .. غاتهدن لك الحريق ..

انا:~ (ارتجف صووي) مابغيتش .. مابقاش فيا الحريق ..

بغيتها غير تخرج.. نبقى على راحتي .. نفرغ خيباتي بين جدران هاد الغرفة المظلمة ..

رجعات دوراتني لجهتها ومداتلي الكاس ..

انا:~مابغيتش..

شديت الكاس بارتجاف .. وحاولت مانبينش .. اما هي شافت فيا مطولا .. وتكلمات ..

ماما:~ باك سافر .. ماغايجي من هنا واحد خمس ايام ..

تنفست بعمق .. وعضيت على فمي بارتجاف .. على الاقل مانظهرش قدامه بهاد الحالة .. الشيء لي بغيته دابا هو نستر فضيحتي حتى نلقا لها شي حل ..

بقيت ساكتة اما هي شافت فيا وتكلمات بنبرة ماعرفتش شمن خانة نصنفها ..

ماما:~ عيطات عليا عمتك البارح ..

باينة غاتجي لعندنا هادشي فاش فكرت باش عاوتاني باش تمطرني بهادوك الاحاسيس .. وتعاود تشوفني داك العروسة المثالية ..

ماما:~(زادت ضغطات على صوتها) رفضو الخطوبة .. الزواج مابقاش غايكون ..

رفعت راسي .. فيها اما قلبي حسيته غايخرج من بلاصته .. جوابها طاح فحال الما البارد على سلسلول ظهري ..

انا:~ فوقاش هادشي .. وعلاش

الشفقة اطلت من عينيها .. النظرة لي كانت بمثابة سياط د الجلد كتجلد كل جزء فيا ببطئ ..

ماما:~ اليوم فالصباح قالت هادشي .. ماعرفت كيف انقولوها ل باك ..

(صوتها زاد تبحبح) ماغايبغيش هادشي اجوري .. كان باغييك لولد عمتك ..

انا:~ وانا شنو ذنبي فهادشي ؟ .. (زدا صوتي ترفع عليها فحال اذا بغات تشدني شي هسترية وكل مرة كنهدأ نفسي بصعوبة) هووو مااابقاااش باغيني .. انااا شنووو ذنبي فهاااادشي .. (زادو الدموع كيسقطو من عيني ) واااش نمشي نرغبووو يتزوج بياا .. ونقول ليه ماتساليش هادشي ..

شافت فيا برعب .. حالتي لأول مرة توصل لهاد الدرجة .. ماعرفت شنو كنقول واحد العقل كان كيحثني نفضح نفسي .. صافي لي بغا يوقع يوقع ..

ماما:~ باك ماغايبغيش هادشي .. كان باغيه يتزوجك ..

عصرت الهوا فحلقي .. حاولت نزفر اكثر .. نخبي تشنجي.. حياتي وصلات لنقطة النهاية قبل ماتبدا من اصله .. غمضت عيني وعاودت زيرت على كفي .. وتكلمت باشمئزاز من راسي ..

انا:~ هووو مابااغينيش .. ماعندي ماندير ليه .. ماابااااغينيييش

تنفسات بضيق .. دارت يديها على كتفي ..رجعات حيداته .. وجاوبتني بخوف..

ماما:~ الله يخرج هادشي على خير .. طلبي على الله بتك مايدير لك والو ..

فحال اذا انا لي مسؤلة على هادشي .. اللوم كله غايرجع عليا ..

خرجات فحالها .. اما انا بقيت فبلاصتي كنعض فيدي بندم .. تمينت يرجع الزمان غير ثلاث ساعات اللور .. كنت ماغانديرش هاد المصيبة كلها .. تمنيت شي يد تنتاشلني من القاع قبل مانطيح فالمحضور ونتخطى حدودي ..

تعصرت فداك الليزار لي مغطية .. صافي تلوث بالقذارة .. زدت بكيت الشوك من عيني .. دموع المرارة .. الخاتم لحته من يدي .. طعم الصدأ كيتصاعد مع جوفي .. حل واحد لي بقا هو مراد .. اذا مراد خلف وعده وضيعه غاتضيع حياتي معه للأبد .. حاولت نصبر راسي كيف غلطت .. غلطه كان بنفس الحجم .. ماشي بوحدي لي نتحمله ..

هكذا دازت يوماين .. حبسية جدارن الغرفة .. حتى نقوي نفسي .. ونقدر نواجهه ..

كل الاحتمالات طاحو فبالي .. يوماين مت فيها بتأنيب الضمير .. وعاودت عشت غير بداك الما لي كنهبطه فحلقي بلا ماكلة بلا والو ..

خرجت من الدار بصمت فحال شي شبح .. علقت صاكي وتوجهت لشقة مراد .. متأكدة هاد المرة غانخرجو لحل نهائي .. سواء غانتحملو مسؤولية الخطأ بزوج .. ولا اايتحمل مسؤولية موتي بوحده ..

خبيت عندي واحد الساشية د السم صغيرة .. اذا ماحاول يرد الغلط كله عندي .. غانقتل راسي عنده .. انا وهو فنفس الكفة اما نسقطو بزوج ولا ننجاو بزوج ...

غير دقيت فالباب .. فحال اذا كان كيستناني .. ماكملاش عشر ثواني .. فتح الباب .. دائما كنت مأخوذة بنظرة عيونه .. بطريقة كلامه .. هاد المرة الضباب لي ظهر قدامي .. ماتسوقت لوالو ..

شاف فيا ونطق بصوت مبحبح ..

مراد:~ دخلي ..

التنفس ضياق فصدري.. كندخل مرة اخرى لجهنم بيدي .. قبل مايسبقوني خطواتي .. سبقوني داك الدموع لي فعيني ..

انا:~ مابغيتش نهدرو هنا ..

مسح على لحيته .. ووجه الابيض اكتساه تعبير مختلف ..

مراد:~ ماتخافيش ماغادي يوقع والو ..

نبرته كان فيها الاسف .. عدم الخوف هو لي خلاني نوصل لهاد النقطة وعيني مغمضين .. مافكرتش فالعواقب ..

مراد:~(زاد زفر ملي شافني مازال ماتحركتش )جوري .. ياك باغا نحلو الامر ؟

قادوني رجلي بتخاذل .. شفت فالصالة لي وقعات فيها الواقعة باشمئزاز .. علاين نرد مصارني .. وسكاكين الالم فكرشي بدون رحمة ..

جمعت راسي بصعوبة .. ماشي هذا هو الوقت لي غانضعف .. الهواء خرج من صدري فحال الدخان .. وكملت كلامي ..

انا:~شنو غانديرو ..

رد راسه اللور .. وجاوبني ..

مراد:~جوري (نطق اسمي بندم وسكت شوية) ماكنتش ناوي نوصل لما نحن فيه ..

عضيت على فمي بآلم سماعا لجوابه .. عارفة هاد الهدوء ما هو سوى مجرد سكون ماقبل العاصفة ..

انا:~ ومن بعد ..

مراد:~ ولكن غانصلح خطأي ..

انا:~ غتصالحو ياك ..

مراد:~(ابتسم باطمئنان) ااه ..

زفرت بارتياح .. ملي شفته ماحاولش يتهرب من مسؤليته .. على الاقل غانغرقو بزوج ..

لكن الكلام لي قال من بعد بمثابة شي يدي جبداتني من شي جبل بقسوة حتى تلقفاتني الارض بقسوتها ..

مراد:~ حاولت نفاتح واليدي فموضوع الزواج .. ولكن مابغاوش ..

شفت فيه وعيني مدمعين .. ها هو كيرد كلشي عليا .. الذنب اذنبناه بزوج وانا الوحيدة لي غايطيح عليا ثقله ..

انا:~ شنو دابا .. صافي غانديرو فحال اذا ماوقع والو ؟

مراد:~انا ماغانخايكش ضيعي .. ماغانسمحش فيك .. مستعد نصلح غلطي من دابا ..

رد عليا بآسف .. كلامه الملغم .. صافي خلاني نرجف .. عمري توقعت نطيح فهاد الموقف المظلم .. ثبت راسي بصعوبة واخا الهدرة لي كانت كتخرج من جوفي كتحرقني فحلقي فحال النار ..

انا:~ دابااا غاتزوجني ولااا لااااااااا .. (كملت كننهج) غاتحمل مسؤوليتك ولا انا لي غانحصل فهاد شي كله ؟

شد فيدي ولكن حيديت يدي من كفه باشمئزاز ماحملاش مازال يقيس فيا ..

انا:~ماااتقيسنيش ..

مراد:~(حاول يهدأني) نتي كتعجبني و كنبغيك .. وكنحلف لك ماكنت ناوي نوصل لهاد الشيء .. ثيقي بيا .. غانصلح حياتك .. غانتزوجو فنفس النهار ونطلقك بلا خبار حد ..

رفعت فيه عيني بصدمة .. وبكلامه الموالي حاول يبرر افعاله ..

مراد:~ حنا باقي صغار مانقدروش نتحملو مسؤلية هاد الزواج وباقي ماعندنا حتى مستقبل ..

الخوف زحف على خلايا دماغي .. صافي هادشي لي كنت خايفة منه طحت في ..

انا:~غاااتحمل ذنبك امرااااد غاتحمله ماااشي بوووحدي ..

دار يديه على راسه ..

مراد:~ولا كاين حل اخررر .. غانمشي معك حتى ديري اعادة ترقيع البكرة .. ونحسبو هادشي مجرد غلطة .

انا:~ اخر كلامك ..

بلا مانزيد نناقش معه الموضوع اكبر .. صافي كان واضح خذا شنو بغا .. فاش غايتفعوني دموع الندم ولا كلام الترجي ..

انا:~ بغيت نشرب ..

نوعا ما مازال بقيت مسيطرة على هدوئي .. كنحاول نزفر ونشهق اكثر .. ناخذ كمية كافية من الهواء .

مراد :~(مد لي قرعة د الما ) هاكي ..( حط يديه على كتفي) ماااتبكيييش اجوووري .. عاااارف غاالطين .. غانصلحو هاد الغلط .. الفلوووس كيصلحو كلشي .

شديت القرعة فيدي كيصلحوكلشي .. انا:~(تكلمت باستهزاء) قووولي شنووو كيصلحو بالضبط شنووووو ؟ عفتي لي سلمتها ليك ولا الثقة ولا الخذلان لي جازيتيني فيه بالاخير .. ماقادارش تتحمل مسؤولية الزواج .. واناااا ؟

دار راسه بين يديه .. وتكلم بندم ..

مراد:~ اخر حل عندنا اذا بغيتي انتزوج بالسر وغانطلقو فنفس النهار .. او انك عااااارفة غاديري ترقيع البكارة وغاتنساي كلشي .. انا فالاول ماكنتش باغي نطيحو فهاد المعمعة كلها .. حنا مازالين صغاااار ..

عاودلي نفس الكلام كيحاول يقنعني .. مسحت على وجهي ببرود..

انا :~(جاوبته بهدوء وبرود) واخا .. غانصلحو كلشي .. ولكن بغيت نشرب ..

مراد:~(اشار لي للقنينة لي فيدي) ها الما فيديك ..

انا:~(عاودت زيرت عليها). مابغتيش نادي الماء بارد بغيت الكاس سخون هذا كيمرضني ..

مراد:~( باسف) واخا .. جوري تهدني .. غانلقاو حل ..

باينة خايف نغوت ليه ولا ندير شي فضيحة .. داك شي علاش كان كيحاول يسايس معايا .. اما انا حالتي فحال شي حمقة .. العافية كتلسعني فحال السياط .. داير مصيبة وماقادرش يكون قد كلمته ..

انا:~(غمضت عيني بآلم ). انا مهدنة .. غير جيب ليا نشرب راسي ضارني ..

شاف فيا بطمأنان

مراد:~ متأكد غانوصلو احل يرضينا في نهاية المطاف بزوج ..

حاولت نبرر له على الاقل .. داك الاهانات كلهم تحولو لبرود مخيف داخلي .. وكلماته كيطبقو على انفاسي بعنف .. احساس عارم بالخيبة .. ضيعت راسي فلحظة ضعف بلا مانحس .. ضعيت سنيني كلها .. ومستقبلي كنشووفه كيضيع من امامي فحال معدن الزئبق .. نظرات بلال .. خاتمه لي كان فيدي .. الغاء زواجه ..كلشي تجمع عليا فدقة وحدة ..

نظرات مراد الحائرة ونظرات بلال المستهزئة لي طاحو فبالي .. اكثر عيون عذبوني ووصلوني لهاد الحالة .. رماد عينيه ذبحني بالذنب ..

ياك انا غارقة غارقة .. ميتة .. اذا تعرف شنو درت .. اللهم نقضي على حياتي بمرة .. ونخلي حتى مراد يغرق فيها معايا ..

بما اننا غلطنا بزوج وانا لي تحملت كامل المسؤولية هاد المرة غانغلط بوحدي وغانخليه يتكمل هو كامل المسؤولية فموتي ..

خليته حتى غبر .. فتحت قنينة الميا.. وكبيت فيها جرعة صغيرة من السم .. زادو شهقاتي كيمزقوني من لداخل قبل مايخرجو على فمي .. ودموع عيني كيتقافزو واحدة تلوا الاخرى .. عضيت على شفتاي بتردد .. وبعض ذلك مالقيت فمي غير تحط على القنينة باستسلام ..

حاولت نخلي الما يهبط مع جوفي .. يحرق كل خلية .. كل انش من حنجرتي .. لكن ماقدرتش ماقدرتش .. روحي عزيزة عليا .. سمعت صوت مراد لي عاود خرج من الكوزينة ..

غمضت عيني ويدي مازال كيترعدو ..

مراد:~ جوري .. شربي حتى هاد المهدئ غايخليك ترتاحي ..

شديت من عنده المهدئ ..القنينة باقي فيدي .. حطيتها بترقب كنت كنستناه هاد المرة هو لي يشرب منها ..

ويقيس المرار من نفس الكاس لي شربت منه ..جميع مخططتي تقلبات .. يمكن انا كنتحمل اكبر مسؤلية .. اما لي مشيت عنده برجلي .. انا لي سلمته راسي .. ولكن هو بنفسه باغي يخوي بيا الطريق .. واش ترقيع البكرة غايرد لي عفتي لي ضاعت .. ولا الحرام لي طحت فيه.. زاد خيط من الدموع كيهبط سخون من بؤبؤ عيني ..

انا:~ علاااش .. علااش واعديتيني بشي حاااااجة نتا ماقادرش عليهااااا .. علاااااش ضيعيتي حياااااتي معك ..

فحال اذا بغات تشدني هسترية .. الصراخ كيخرج مبحبج من حنجرتي .. مرة نلومه مرة نضرب وجهي ..

مراد:~( حاااول يهديني ) جووووووري .. شششششت بلا غوااااااات .. ( دار يديه على جبينه) عااااارف .. عاارف غلطنا ولكن ماشي غلطي بوحدي نتي لي مامنعتينيش فالاول ؟

انا:~(جلست على الاريكة بخواء ) .. انا لي مامنعتكش .. شكون ظهر فحياة الاخر وخربها .. شكون عطا الامل للاخر .. شكون واعد ..وشكون خلف .. ياك قلتي نثيق فيك ؟ ولا كلشي غير كذوووب ..

تلاحقو انفاسي بعد هاد الكلام .. الندم غطى على لون اللوز فمقلتيه.. لكن الكلام لي قال من بعد خلاني نتأكد ان واحد فحاله ماكيعرف والو من غير يذبح الناس بدون رحمة بكلامه ..

مراد:~ علاش كتعقدي الامور ..

انا:~(قلبت وجهي باختناق ) صافي حيت خديتي لي بغيتي ياك ؟

مراد:~(بتوتر) حتى لو ماكنتش انا كان غايكون واحد اخر .. نتي كنتي محتاجة هاد العاطفة .. انا قلت لك الحلول لي عندنا .. حياتنا عمرها غاتكون مع بعض ..

تحرك بتوتر .. وهز قنينة الما لي كان عندي فيها السم .. وبدون مانوقفه خليته ..

خليته يرتاشف منها لعله يحس بالنار لي كواتني من الداخل واخا الالم غايكون على الاغلب مافايتش ساعة من الوقت وتنتهي حياته بمرة ..

فقط كنشوف هدوئه كيزيد يشعل برودي ويخليني بلا كلمة بلا زوج بلاصة مانقتل راسي نقتله هو هاد المرة .. وهادشي لي كان شرب منها هو بدون مايعرف انني حطيت فيها لمستي سابقا .. وانه كيجني شنو زرع ليا من وجع ..

واش قتلتو ؟ صافي نهيت حياتو بيدي بهاد السهولة ؟؟ شفت فطيف جسده كيتلوا امامي برعب .. وانتفاض عينف من اعضائه ..

اربع دقائق وستة عشر ثانية بالضبط .. بدا السم كيعطي مفعوله وعروقو كينشفو من الدم عرق بعرق .. عاد رجع معايا داكشي لي درت بالبارد .. عاد حسيت بمقدار غلطي .. الذنب الثاني لي اقترفته بقصد .. فحال اذا زيرتي يدي مع رجلي .. مالقيت حتى وسيلة من غير نتمتم باسمه ..

انا:~مراد .. انا .. مراااد ...

جلست على ركبتي كنترعد .. كنغووووت لكن الحروووف كيوحلو فحلقي ..

انا:~ مرااااااد .. (مسحت على عنقي بعنف وجسدي كل مرة كيتهز معه ).. مادرتش هاااادشي بلعاااني .. والله مادرتها بلعاني .. غير فيق ..

همس اسمي بصعوبة بين انفاسه .. شوية بشوية الدم بدا كيتسلل من نيفه .. فحال شي خيوط رفاق ..شاف فيا كيلهث .. والكلمات كيخرجو من جوفه متقطعين ..

مراد:~(زير على كرشه بيديه) جوووو ري .. عيطيي لشي ح .. حد .. عيطي لشي حد .. ان.. انن انااا .. كنموووت ..

انا:~ مااقصدتش .. والله ماقصدت ..

مراد:~(همس بين انفاسه) ع عيطي ... لشي .. حد .. دابااااا ..

زاد صوت تشنجي .. هو كيتلوا بالآلم وانا مافيدي حلة .. صافي غايموت وانا غانمشي فيها .. غايتفضح كلشي .. هاد الثقة وقلة العقل هي لي خرجات عليا .. داك شوية د النور لي كان باقي فقلبي هو لي خلاني جريته بزز حتى قدام الباب .. دقيت فالباب المقابلة لشقته .. وخليت الباب مفتوحة ..

تخبيت جنب الدروج .. كنستنى شي حد يخرجيعتقه .. واخر حاجة خليتيها هي الغوات والصداع لي ناض الفوق .. بسبب حالته ..

تمشيت مع الطريق فحال شي حمقة .. كنجري ورجلي كيرجعو بيا اللور .. كنشهق .. كلشي كيشوف فيا .. يمكن من حالتي الغريبة .. مرة نبكي مرة نسكت.. صافي هذه كانت نهاية حياتي .. واش باقي غانطلع من بئر الظلام لي طحت فيه .. بإرادتي مشيت ..

حتى باش نرجع للدار فهاد الحالة .. يستحيل .. انا قتلته بيدي .. قتلت راسي الاولى وغانكمل حياتي مسجونة بعذاب الضمير .. بتهوري ..

لقيت راسي واقفة قدام باب نرجس ... دقيت الباب بالجهد .. غير فتحات لي الباب .. يمكن فالاول حسبات مشيت نعتاذر منها .. رفعات حاجبها منفخة .. لكن انا همس بترجي ..

انا:~ عتقيني .. انا قتلتووو .. قتلتو انرجس .

الشحوب اكتسى وجهها .. فحال اذا مامصدقاش شنو قلت لها .. ولا مافهماش من اساسه ..

نرجس:~ شكوون قتلتي ؟شنووكتخربقي ؟

زادت حدقات فيا برعب .. شدات فيدي لي كانو كيترعدو .. حسيت براسي غانطيح .. غير داك شوية د النفس لي شادني بزز مني ..

نرجس:~ ووووقفي .. ثبتي رااسك .. شنووو درتي ؟؟

انا:~(تكلمت بتشنج) قتلتو .. صافي مااااات .. خرجت عليه وعلياااااا

نرجس:~(بخوف)اجي اجي معايا ..

دخلاتني معاها لبيتها .. والذهول كيغطي وجهها فكل ثانية كتمر .. زيرات على كتفي وهدرات ..

نرجس:~ماااوقع والوووو .. تنفسي مزياااان .. طلعي النفس وغاتعاودي لياااا كلشي .. شنوووو درتي ؟؟؟

زفرت .. وعاودت زفرت ..كنمتاثل لأوامرها غير كنحرحك راسي فحال شي دمية ماعارفة مادير .. كنحاول نمسح دموعي ونعاود لها ولكن الحروف كيتخنقو فجوفي ..

انا:~ مراد ..

عضات على شفتيها بآسف ..

نرجس:~ تعدى عليك .. ولا دار ليك شي حاجة .؟

حركت راسي بنفي .. ماغانفضحش راسي فهاد النقطة .. هادشي اايبقى عندي واخا نموت ومانفضحش شرفي لي ضعيته ..

همست برعب ..

انا:~لا لا .. مادار ليااا والو .. انا لي قتلتو ..

نرجس:~(هزاتني بعنف)علاااش قتلتيه .. ملي ماداااار لك والو .. ؟ حاااول يتعدى عليك يااااك .. وصلتي لهدرتي .. مايصلاحش لك ..

زادت على مابيا بكلامها .. فحال اذا كان خصها غير تفكرني .. باش نعرف شحال انا رخيصة .. وحمارة .. ومافاهمة والو ..

بؤبؤ عيني كان مازاكيش .. وجبال الالم كيتراكمو فوق صدري حتى مخلاونيش نتنفس مازال ..

انا:~ صافي قتلتو .. شنو مادار راه قتلت راسي وقتلتو .

دارت فالبيت كتحاول تستفهم .. كتسول .. .. كتغوت .. اما انا غير الصمت لي اطبق عليا .. حتى ماقدرتش نحرك غير فمي ..

مدارت لي واحد القرعة د الما ودارت يديها على راسها ..

نرجس:~شربي هاد الماااا وتهدني .. ( شداتيها من عنيد اما هي وزيرات على كتفي)نتي ماااقتلتيهش .. شنووو ماداار لك نتي ماقتلتيهش .. تيقي فراااسك..

انا:~ شربتو السم

قلتها ببساطة .. يديا كيترعدو فحال جسمي كامل .. خصوصا ثغري .. حتى شكيت واش كنتنفس ولا لا . فتحات فمها بذهول ..

نرجس:~فاشمن مصيبة طيحيتي رااااسك ف اشمن كااارثة واش نتي قده حتى تلعبي معه ..

انا:~ ماقصدتش .. والله ماقصدت .. ماعرفتش كيفاش حتى درتها .. ( رديت راسي اللور .. كنخنق دموعي باش مايخرجوش) ماعرفتش شنو وقع لي .. حتى درتها .. تصرفت بلا عقل ..

شديت على قلبي لي ضارني ..

انا:~غايكون مات صافي يااك .. غانمشي فيهااا ..

حركات فكها بعدم فهم .. وشدات على راسها بيديها ..

نرجس:~ شووفي داابا غاتمشي فحالك لدااااركم .. غاتبيني ماوقع والو ..(بعدات وعاودت رجعات زيرات على كتفي حتى تأوهت بآلم)نتي قووووية غاديري فحال اذا مااااوقع والو .. ماتبيني لحد .. غانحااول نفك معك هاد المصيبة لي طحتي فيهاا .. شنو ماوقع كتبقاي صاحبتي .. ماغانخليكش على الاقل دابا .. ومن بعد غاتعاودي ليا كلشي ..

ظلام الحال وطاح الليل .. لي ماتمنيتو مايوصلش .. حطيت راسي على وسادتي .. كنحاول غير نغمض عيني .. والو .. فحال اذا قلبي حطيته فوق العافية ..

اليوماين لي فاتو قلت عليهم عذاب .. هاد الليلة اسوء .. كانت جحيم اكبر .. تأنيب الضمير .. من خطئتي الاولى والذنب الثاني دابا .. المصائب طاحو عليا دقة وحدة .. عاد تفكرت كلام نرجس وتكذيرتها .. نصائحها دازو مع ظهري فحال شي موس بارد .. كيفيقوني من غقلتي لي فقت منها معطلة ..

عضيت على فمي بوجع .. والحرقة لي فصدري مابغات لا تطلع ولا تهبط ..

الليلة بأكملها ماغمضت عيني حتى دقيقة .. غير وجه مراد فالدقائق الاخيرة هو لي كايزورني .. ماخفتش يموت ونتسجن .. بقدر ماكنت نبقى سجينة ضميري لي فاق معطل ..

صبح الصباح .. وانا مازال غير كنتقلب ونخمم .. حتى سمعت الباب تفتح غير من صوت خطواتها عرفتها ماما .. قبل ماتكلمني بادرتها بسؤالي ..

انا:~ واش جات نرجس .. ماجاتش هنا ..

غمضت عيني برعب كنستنى جوابها .. نرجس الوحيدة لي غاتقدر تفكني .. نسات داك الكلام باش جرحتها .. نسات كلشي ودارت يديها بيدي واخا ماعاودت لها والو .. برهنات لي انني دوما كنت الخاطئة ..

ماما:~( حركات راسها بنفي وجاوبتني باستغراب ) علاش غاتجي لعندك ..

زفرت بضيق .. ورجعت تلاحيت ف بلاصتي.. واخا كنترعد .. كنحاول غير نثبت راسي قدر الامكان .. كنخفي الشحوب لي على وجهي ..

انا:~ غير بغات تجيب لي المطبوعات ديالي ..

سكتات .. وقربات مني .. حتى وصلات لجنب الفراش وجلسات ..

ماما:~ مازالا مريضة ؟

شهقت بخفوت واخفيت جوابي .. طول عمري وانا مريضة وسؤالها ماكيجي غير فالوقت لي كنكون فيه مجروحة من راسي .. جاوبتها بصوت مبحبح ..

انا:~ لا .. ماعندي والو ..

زيرات على يديها .. وزادت قربات مني حتى حسيت بأنفاسها قبل صوتها ..

ماما:~ وجهك صفر .. مابقيتيش كتاكلي .. ضعافيتي هاد الايام ..

لون وجهي حسيته ولا اسود .. خفت تكشفني .. تسارعو نبضات قلبي بين قفصي الصدري ..

انا:~ من ديما انا هكا .. غير نتي لي اول مرة تردي البال لهادشي ..

حنات راسها .. عارفة مقدار غلطها .. هاظشي لي كان مكرهني فهاد العيشة .. كتظلمني ماما بدم بارد .. تبيين الندم فثانية والدقائق اللخرى كتصنع البرود فحال اذا ماواقع والو..

ماما:~ نتي طرف من كبدتي مانبغيش لك المضرة ..

انا:~(جاوبتها بنفور) عليها وقفتي معايا فكل لحظة فحياتي .. نهار قلت لك مابغيتش نتزوج ماكلفتيش رااااسك حتى تهدري مع با .. ولا ولا ..

غمضات عينيها بآلم .. والاسف ترسم على وجهها ..

ماما:~ حتى انا .. مابغيتكش تتزوجي .. مابغياكش تتزوجي واحد ماباغاهش وتعيشي فحالي .. ولكن باك قرر .. (وقفات ومسحات على وجهها)من الاول قلت لك ما فيدي حلة ..

منظرها تقريبا محرك فيا والو .. حيت لي بغا شي حاجة كيوصل لها .. اذا كانت بغات توقف معايا تنقذني قبل مانطيح فالمحظور .. كانت غاتمنحني حنانها قبل ماتلقي عليا اللوم فمعركة زواج فاشل .. وانا فالاخير كنحصد شنو زرعو فيا ..

انا:~ ( حركت فمي باستهزاء) فحال ديما انا لي غانتحمل هادشي بوحدي ياك ؟ ولا بغيتيني نمشي نرغبو يرجع يتزوج بيااا ..

ماما:~(الدموع برقو فعيونها) بلال خصه يتزوجك اجوري .. حيت باك ماغاديش يعجبو الحال .. غايضربك على هادشي غاتحملي المسؤلية بوحدك .. خص بلال يرجع ..

باش مانغوتش عضيت فداك الوسادة لي كنت ناعسة عليها ..

انا:~ قلت لك قبل ماعندي ماندير ليه هو لي ماباغينيش ..

ماما:~ جوري .. فهمي الموضوع .. باك غايفهم نتي لي قلتي ليه شي حاجة .. بما انه معك فنفس الجامعة واخا عارفك ماتقدري تقولي والو ..

حسيت بيدي كيعرقو .. والعروق لي فعنقي كيتنفخو .. الحرارة طلعات معايا .. صبرت وصبرت فالاخير مايقدرتش ..

انا:~يمكن من ديما واناااا ساااكتة .. حتى خررررجت على رااااسي .. وهادااااك السيد والله مااااااااانتزوج به وااخا يوقع لي وقع والله مااااااانتزوج به .. ماااغااانتزوووجش به .. واذااا بغيتوووو قتلوووني الزواااااااااج ماااغانتزوووجش به وااخا يرجع هووو براسو ماغانتزوجش به..

كيفاش غانتزوج به .. ونتحمل نظرة الاستهزاء فعينيه .. كيفاش غانبني معه حياتي وهو نظرته عليا فالحضيض ودابا غايزيد يكمل ويزيدو شكوكه يكملو ..

بلال هو اكثر شخص خايفة يعرف حقيقتي .. كثر من واليديا .. سوداوتيه الغامضتين غايذبحني بهم بدون رحمة .. نظرة الاجرام ولا داك البرود المخيف .. شنو غانقدر نتكمل بالضبط .. كيفاش غانعيش كياتي والعار غايلاحقني .. وذنب خطئتي غايكون معايا فحال الطيف ..

كلشي ماحملاهش .. ودابا ملي ماظهراتش حقيقة مراد وشنو غايوقع ليه بعد داكشي لي درت ليه .. غانبقى محصورة بين ضميري .. واخا يصحى مراد اكيد غايبلغ بيا وعلى كل الاحوال غانتفضح ..

بعد جملتي الطويلة شفت فيها كنلهث .. وشعري طالع لسما .. شافت فيا ماما بنفسها برعب حقيقي هاد المرة ..

ماما:~ علاش ماباغاياش تتزوجي به ..

انا:~(تهاويت على الناموسية)ماااكنحملوووش .. ومااكنحملش رااااااسي .. والله وتزووجووووني به حتى نقتل رااااسي ..(زدت كنلهث ) والله حتى نديرها ..

ماما:~( زادت كتبكي) باك ماغافهمش هادشي واااش فهنتي .. غايعرفك نتي السبب ..

قالت كلامها وخرجات خلاتني فضعفي .. على كل حال انا ميتة ميتة .. الضمير لي كان عندي تبخر .. وداك شوية د النفس لي بقا كيطلع فصدري .. شنو الفائدة منه .. مراد اذا مات اانمشي للحبس .. واذا بقا عايش غايبلغ بيا ونموت فالحبس بوحدي .. ولا قبل غايكون وصل بابا ..

كل ماكنت محتاجة ليه هو مهدأ واحد يحرق خلايا عقلي لي كيفورو ..

شربت المهدأ الاول .. الحريق غير ماكايزيد والثاني .. حتى وصلت لشي خمسة .. بعد مدة ماشي طويلة .. لساني ثقال .. والضباب اكتسح الغرفة بأكملها ..

لساني ثقال .. حتى من اللون الابيض د البيت شفته مضبب .. حاولت نوض على الاقل.. ولكن والو انفاسي كيثقالو .. واذني كيصفرو .. اخر حاجة قدت نديرها هي نطيح واحد البارفان على الكوافوز بصعوبة.. باش يتسمع صداها مجهد .. وبعد ذلك مابقيت عرفت واش حية ولا ميتة ..

الوقت ثقيل .. نفس الشعور د ما قبل .. سقف ابيض .. وحيوط بيضين .. حتى داكشي لي مغطية به ابيض .. شكيت واش كفنوني ؟ وصافي مابقات كتربطني حتى علاقة بهاد الدنيا .. غير صوت قليل تسمع فوذني كيخرجني من شنو فيه ..

" على سلامتك.. علاش درتي هادشي فراسك .. واش حماقيتي "

مجددا .. الصوت تكلم بنبرة عتاب .. غير انا ماقادراش نحرك الحروف فحلقي .. جاوبت بصوت ثقيل .. والرؤية عاد بدات كتوضاح ..

انا:~ب.. بغيت .. بغيت الما ..

طلعت شهيق حار من دواخلي .. كيخرج السموم لي فذاتي .. عاد قدرت نفرز صوت نرجس لي جنبي .. والنظرة تثبتات على وجهها ..

مداتلي شوية د الما .. بللت حلقي ..

نرجس:~(شافت فيا بآسف) علاش درتي فراسك هادشي ؟؟ علاش نتاحرتي ؟؟ حرام عليييك ..

وسعت عيني مامستوعباش .. شنو هادشي لي كتخربق فيه انا فقط شربت مهدأت باش نبعد الصداع لي فراسي .. تلاحقو انفاسي ..

انا:~ انا .. انا ماقتلتش راسي .. انا غير بغيت نرتاح ..

نرجس:~(عضت على شفتيها) والموت غاتريحيك فنظرك ؟؟ ..

زفرت بتعب .. ماباغياش نسمع هادشي .. عاد تفكرت مصيبتي .. زادو الدموع طاحو من عيني .. وعضيت على فمي بوجع .. خصوصا فاش زدت حققت فنرجس .. وجهها بان ليا شاحب ومغير ..

انا:~(همست بصعوبة) مات يااك .. قتلتو ؟ ..

استدركت الموقف وحركات راسها بنفي ..

نرجس:~لا لا .. مراد ماوقع ليه والو .. (زادت مسحات على وجهها ) وصلوه فالوقت المناسب ..

ابتسمت فوق نفسي .. واخا هادشي كله لي وقع .. اخيرا شوية د النور .. دخل لشقة حياتي .. وتصرفي الطائش .. رفعت فيها حاجباي برعب ..

انا:~الحمد الله .. واش بلغ بيا ؟ .. قال لهم شنو وقع ؟

دارت يديها على كتفي .. وزادت زيرات على يدي كفها الاخرى ..

نرجس:~لا ما قال والو .. منع انهم يفتحو شي تحقيق .. علاش درتي فيه هكا ؟

انا:~ والو .. مانقدرش نعاود لك ..

حسيت بها شكات فالامر .. بغيت نتلفها .. ماشي حيت ماكنثيقش فيها .. هاد التصرف لي دارته معايا اثبت لي انها ماشي غير واقفة فجنبي شي حاجة اكثر .. هي الوحيدة لي لقيتها بلا مقابل ..

انا:~ شنو وقع لي هكا ؟

نرجس:~(قاطعتني ) نتي نتاحرتي اجوري .. انا لي خصني نسولك هادشي ..

تنفست بضيق .. والهوا خرج من فمي ثقيل .. تكلمت برعب .. كنقلب بعيني فالغرفة على واليديا مابان لي حتى حد ..

انا:~ماقتلتش راسي .. شكون جابني هنا ؟

قلتها بنبرة خوف .. صافي غايكونو عرفو كلشي .. اكيد اذا يسحاب لهم انتحار .. غايكونو فحصوني .. يمكن داكشي علاش خلاوني هنا بوحدي .. صافي سمحو فيا ؟ ولا نفاوني من عندهم .. ولا غير فخ و باغيين يقتلوني .. شرايين قلبي توقف فيهم الدم ..

نرجس:~(بنبرة اسف) اذا ماااكانش هذا انتحار .. شنو كتسميه .. سبعة د المهدأت فخطرة وحدة .. عرفتي حالة ماماك .. من الصباح وهي غير كتبكي ..

الرعب اكتسح كل خلية .. كل جزء من جسدي .. صافي حتى شللني من الحركة .. هدرت بصوت مبحبح والحروف مابغاوش يخرجو حصلو لداخل ..

انا:~ ف.. فين .. هي دابا .. بابا ؟؟

وجهي رجع شاحب .. فلون الاموت يمكن .. غير من شفتاي وريقي لي حسيتهم نشفو .. فحال الدم لي نشف من عروقي ..

نرجس:~تهدني .. باك خرج برا مع ماماك .. هما لي جابوك هنا .. البارح بالليل .. وغسلو ليك المعدة ... دابا عاد فقتي ..

زادو يديها كيترعدو بشكل غريب .. كتعض ففمها بتوتر .. فحال اذا مابغاتنيش نكتشف شي حاجة .. الادريلانين تدفق فدمي .. غمضت عيني برعب .. وتمتمت ..

انا:~ش.. شنو واقع ؟

نرجس:~(زيرات على جبهتها)الطبيبة قالت انا كلشي ..

بغيت نجاوبها .. نستفسر .. صافي تفضحت .. تعرف كلشي .. داك الاستقرار لي عشته ولو غير ظاهريا .. هرب فحال معدن الزئبق من يدي .. لكن الصوت تعصر فعنقي وخنقني .. خيوط من ماء عيني هبطو فحال النار على خدي .. كيحرقو بشرتي ..

عاودت تكلمات بصوتها لي كان هاد المرة بدون تعبير ..

نرجس:~ حتى البروف د "التنظيم القضائي" كاين هنا ..

رفعات راسي بصدمة .. شفت فيها .. ورديت نظري للباب .. شفته دخل بهيبته لي مستحيل تخفى عليا .. احتل المكان من حولي .. كل ماقدرت نميزه هو شرارة الغضب لي كتقطر من عينيه ..

بلعت ريقي بصمت .. كنشوف غير فيه.. كيف كيتحرك .. ويديه كيزير عليهم .. عيونه فحال شي نمر متحفز .. كيلتاهمني بشراسة ..

شاف ف نرجس وبلا مايدير اي ردة فعل .. نطق تحت سنانه ..

بلال:~ خرجي ..

قالها بنبرة امر .. الشيء لي خلاني نرجف .. عضيت على شفايفي برعب حقيقي .. كندوز لساني بين ثغري .. لعل وعسى نقدر نتنفس مزيان ..

نرجس:~( شافت غير فيه) غانرجع عندك من بعد ..

حركت راسي بنفي .. صافي قلبي غايوقف .. وهو بدون رحمة كيجلدني بصمت .. كيمشطني بنظراته المتفحصة ..

انا:~ (زيرت على يديها) لا بقاي معايا ..

رفع حاجبه ببرود .. كيقدر يوازن بين ردة فعله وببرود وجهه .. غير عيونه وتشنج فكه لي كيبينو قساوته .. واخا الثلج لي كيمشي فعروقه بلاصة الدم ..

بلال:~(نبهها) نرجس ..

بلا ماتزيد معه حتى حرف .. الاسف اطل من عيونها .. طلقات من يدي بهدوء .. حتى سمعت غير الباب لي سداته وراها ..

كل ما كيقرب كنت كنكحز على داك البايص لي ناعسة عليه .. كنحاول نرجع اللور .. نختفي بمرة ولا يختفي هو من قدامي ..

انا:~ماااتقررربش مني .. غاااانغووووت ..

غمض عينيه بنفاذ صبر .. ولكن هدأ راسه .. غير من وجهه لي رجع طبيعي .. ما عليه حتى تعبير ..

بلال:~ غانهضرو ..

انا:~ مااابغييييتش نهدررر معكك .. خرررج فحااالك ..

كل ردود افعالي .. كانت نتيجة اضطرابي .. باقي نفس النظرة فعيونه لي ماكنقدرش نفسرها .. ولكن اكيد غايعرف غير لحضتين وغايتبدلو .. الاستهزاء غايترسم فيهم .. غايذبحني بكلامه المسموم .. غايقتلني بعمق مقلتيه ..

بلال:~ غانهضرو هي غانهضرو ..

فقط زوج خطوات .. حتى حسيت بجسده .. كيكتم صراخي .. ملي طل عليا .. ويديا مكتفين الفوق .. بكف وحدة .. مرة يبتسم مرة يرجع يعقد حواجبو ..

بلال:~ غووتي .. (زاد من حدة صوته) غووتي ..

غمضت عيني .. وقلبت وجهي الجهة الاخرى .. ما امكن مانركزش مع تفاصيل وجهه .. كنحاول نفك يدي ولكن كيزير عليها اكثر ..

بلال:~ شنو كاين .. غووتي .. (زمجر فوجهي بعنف) ولا صافي ..

تلاحقو انفاسي .. فحال اذا لساني تبلع فحلقي .. تمتمت بعدم وعي ..

انا:~ شنو بغيتي مني ؟ علاش راجع ؟

زاد احكم قبضته على يدي .. وقلب وجهي لعنده .. كيشوف فوجهي بجرأة .. بصراحة.. بجنون ..

بلال:~ حالتك ماشي د وحدة تخلى عليها خاطيبها وبغات تنتاحر ..

انا:~ ( شهقت بخفوت).. انا .. انا مابغيتش نموت .. انا مانتحاااااارتش ..

عيونه زادو كيلتاهموني بعنف .. سياط كتجلدني بدون رحمة .. الهوا كيتعصر فحلقي .. كل زفير خرجته كيضرب فوجهه بحرارة .. ومع ذلك مستمر يجلدني بسياط مقلتيه .. ويغرقني بزز مني فمحيط اسود .. مظلم..و غاارق .. سواده سكونه من الليل .. لكن فأروقة مقلتيه نار شاعلة ..

تكلم بشوية ..

بلال:~ مابغيتيش تقتلي راسك ..

حركت راسي بنفي .. وكل ما بعدت وجهي كيردو بأصابعه .. ويسجنني بأنفاسه ..

انا:~ لا ..

ظهر على وجهه انه صدقني .. هسيس انفاسه لي تسمع لعندي بشوية .. خلاني نتجاوب معه فكلامه ..

بلال:~(زاد همس بشوية) علاش كتقطي لحمك ؟

انا:~ ( هتفت ب استنكار)ماكنقطعش لحمي .. مااكنقطعووش ..

بلال:~(زير على يدي حتى تأوهت بآلم) كتقطعي لحمك .. وتشرطييه.. ماتكذبيش .. (زاد رخف من الشدة واخفض صوته) غانثيق فيك.. شنو ماقلتي لي .. كتشرطي راسك ولا لا ..

انا:~ لا ..

بلال:~(اصر اكثر) كنثيق فجوابك ..

هاد المرة .. هزيت راسي بايجاب بلا مانفكر ..

بلال:~ شنو .. ماتخافيش ..

انا:~ ااه كنقطعو ..

بلال:~مزيان

واخا حاولت نهرب .. ماكان عنددي حتى لفين .. عرفته انه مازال ماعرفش بموضوع العذرية .. والا كان غاينحرني قبل مايدير بابا بنفسه .. الحرارة طلعات معايا ملي تفكرت وجههم .. والثقة لي نهشتها بثقتي ..

حتى اذا فلت من الذئب غانطيح فالوحش .. اذا ماتفكيت من مصيبة مصائب اخرين كيستناوني وكيرحبو بسا ..

بغيت يبعد عليا .. انفاسه كنحسهم فحال السم كيدخلو لذاتي .. خلاوني نرجف .. دمعة وحدة لي طاحت من عيني .. تنفست باش نوقفها .. لكن يديه كانت سابقة الامر .. مسحها بأصبعه بشوية ..

بلال:~(زفر بضيق) ماشي وقت الدموع ..

انا:~ فين ماما ..

سكت شوية .. تنهد تنهيدة طويلة ..

بلال:~ ( شاف فيا بواحد النظرة فشكل) مع الطبيبة النفسية ..

حركت حجبانب بذهول .. كنتركل باش يطلقني ولكن كان مازال محافظ على هدوئه .. همست بصعوبة ..

انا:~ انااا ماشي مررريضة ..

بلال:~( رفع حاجبيه بلامبالاة) نتي مريضة ..

حركت عيوني لي كيدمعو بوحدهم .. حتى شكيت واش هاد السيد كيدير ليا شي تعاويذ .. حتى كنبان فأسوء حالتي بالنسبة ليه .. حتى كنبان ليه بهاد الضعف ..

انا:~ انا مااااااااااشي مررررريضة .. ماااشي مريييضة ..

اقترب وعاود بعد .. فحال اذا مادار والو .. رجع طلق من يدي حتى قلت تفكيت منه .. لكن هاد المرة شدني من كتافي كاملة .. وتكلم بمكر..

بلال:~ الطبيبة النفسية ؟ ولا الزواج ؟

شفت فيه بعدم فهم .. عض على شفتيه واقترب .. واخا ماحملاش اقترابه ماقدرت ندير والو .. تكلم بحرارة ..

بلال:~ يعني تختااااري المصح النفسي يعالجك ولا تتزوجي بياا ؟؟

بلال:~( عاود سؤاله بإصرار) الزواج ولا المصحة ؟

الغرفة كثر ما هي فاللون الابيض زادت بياضت .. ملي سمعت عرضه .. غير عيني لي قدرت نحركهم برعب .. جفاف حلقي ماقدرش يخرج جوابي ..

كيزيد يحدق فيا فحال شي نمر متحفز يقبض على فريسته .. بركتين بلون الجمر قبل الاشتعال ..

انا:~( حاولت نتراجع اللور برعب) نتاااا كاتكذب .. انا ماااااشي حمقة ..

جاوبته بعدم صبر .. وانفاسي كيتلاحقو بين قفصي الصدري .. شكون يتقدم وشكون يتوخرر ..

بلال:~ نتي مريضة .. ماشي حمقة ..

انا:~ اناا مااشي مريضة .. وماغانتزوجش بك .. اناااا ماغانتعالجش ماعندي حتى مشكل ..

طلق مني بهدوء .. فحال داك التعبير لي على وجهه .. الثلج كيسري ليه فالعروق .. عظلات صدره تحركو امامي .. ورفع حاجبيه باهتمام .. كيستنى تبريري .. زدت بنبرة مصدومة ..

انا:~ انا .. اناااا مانتاحرتش .. ونتاا عارف هادشي ..

مسح على وجهه فحال اذا ماهتامش بهاد الجمل لي كيخرجو من جوفي .. وكيهمه غير يلقيني فالقفص ..

بلال:~ حتى حد ماغايتيق فهادشي لي قلتيه ..

وسعت عيني حتى مابقا لي فين .. حسيت براسي فشي سفينة كتسقطني للاسفل .. كلهم متآمرين عليا .. داك شوية د النفس لي بقا ليا بغاو يقضيو عليه .. ضايعة وتايهة مالقيت حتى طريق لي تسلكني .. غانهرب من جهنم .. غانلقا الجحيم فوجهي كيستناني بأحضان من سعادة ..

انا:~( درت يدي بين وجهي) نتاا عاارف هادشي .. انا مابغيتش ننتاحر ..

كل مرة كنزيد نبرر ليه ونعاود نفس الجملة حتى عاودتها كثر من ثلاثة د المرات.. لكن هو فالمقابل جامد فبلاصته .. جسده الضخم ماكيتحركش .. مخليني على راحتي .. عيني عاوتاني مشاو لتقاسيم وجهه المتشنجة .. ويديه .. داك الاسلاك ولا العروق لي مرسومين فوق ساعديه كيتحركو بشوية .. بتناغم مع عظلات وجهه ..

بلال:~(رفع حاجبه ودار يديه فجيبه) عارف ماحاولتيش تنتاحري .. ولكن حتى حد ماغايصدقك برا ..

زفر بالجهد .. وعاود ركز فيا عينيه .. بؤبؤهم كيتحرك بتلاعب .. مخفي تحت قناع المكر .. زاد بنبرة جليدية ..

بلال:~ وحتى انا مامضطرش نقول لهم انك ماكنتيش قاصدة ..

تحرك فالغرفة بخطواته المتربصة .. عرق فجبهته واضح .. فنفس اللحظة تحرك قلبي بين ضلوعي بخوف .. واخا هو ماكيحملنيش .. لكن كنت باغياه يبرر انني ماشي حمقة .. يعفيني من هاد الزواج .. ماشي يحكم عليا المصيدة .. مرة يرفض ويقول مابغاش .. ووراها يجي يطالب بحقه فيا ..

تمتمت بعدم تصديق ..

انا:~نتاااااا غاتقول لهم هادشي .. غاتقول لهم انا ماقصدتش ..

بلال:~ ( حرك راسه وابتسامة عابثة ظهرات على تقاسيم وجهه) نفهم من هادشي باقي ماباغيا تليني راسك القاصح .. اذا غاتختاري المصحة ..(اخفى تعابير وجهه ببراعة) الانتحار .. زائد تقطاع لحمك .. شنو غاتبرري فيهم بالضبط ؟

كيصفعني مجددا بكلامه .. كيصفع روحي من الداخل .. ويجلدها بدون رحمة .. كيبين ليا حقيقتي فورقة شفافة ..

المصحة اول حاجة جات فبالي .. هي مصطلح حمققة .. كلشي غايقوله عليا .. فحال اذا غانثبت لهم انني مجنونة وبأوراق رسمية .. انا ماشي مريضة .. انا ماشي حمقة .. محتاجة غير الراحة ..

ومن جهة ثانية مانقدرش نتزوج به .. غانقضي على داك شوية د الكبرياء لي بقا عندي .. غانتفضح قدامه .. غمضت عيني كنطلب العون .. كنطلب من الله القوة لي ماعنديش .. باش نواجهه هادشي كله ..

بلال:~(تسائل ببرود) شنو ؟ كتختاري المصحة ؟؟

صدره تحرك بعنف تحت قميصه كيستنى جوابي الحاسم .. ملامحه تيقضو لأي تصرف مني ..

انا:~ ماغانتزوجش بك ..

باينة فيه كان متوقع جوابي .. واخا حاصرني باختيارين بزوجهم بطعم العلقم .. مطرقة المرض النفسي كتضغط عليا من جهة .. وسندان الزواج كيضغط عليا من جهة اخرى ..

فرقع عظلات رقبته ولا ماعرفتش .. المهم واحد الصوت انبعث من جسده .. كيطرطرق فيه عظلاته ..

بلال:~ ما مسؤولش من بعد جوابك .. على تصرفاتك ولا تصرفات باك فحقك ..

تحرك خارج .. عاد فطنت وفقت.. فحال اذا عاد فكرني .. صافي نهيت كلشي بيدي .. بابا حتى هو .. هم اخر .. غايقتلني .. ماغايبغيش هاد الشوهة كلها .. الخطبة لي تفسخات .. والانتحار .. وعاد طال الزمان ولا قصار غايعرف بفعلتي مع مراد .. زدت كنترعد .. صافي مابقيتش متحكمة فنفسي وشهقاتي كيتعالو من جهة ..

دار لعندي باستغراب فنفس اللحظة لي دخل بابا بداك الغضب لي على صفحة وجهه وماما وراه عينيها حمرين .. كل ما ميزته هو الطبيبة كتحاول تهدأ بابا ..

الطبيبة:~ ( كتحاول توقفه) اسيدي غانعيط للأمن .. ممنووووع تدخل عن المريضة دابا .. حتى تتهدن .. عييت مانشرح ليك ..

شاف فيها بنظرة نارية مامسوقش لداكشي لي كتقول ليه .. شفت غير ف بلال وردة فعله .. تشجنجو ملامح وجهه ..ونطق بتحذير .. كيحاول يوقفه ..

بلال:~خااالي ..

بابا:~(رمقه بنظرة غضب) حتى حد مايتدخل بيناتنا .. بنتي وغاانعاود نربيها .. ونوريها تشراط اللحم والانتحااااااااار ..

داز فالممرضة بعنف .. الممرضة خرجات بالزربة تعيط للامن يمكن .. من بعد ماعيات باش توقفه ..

التصقت فالجدار .. كنحاول نحفر فيه .. نخرج فحالي .. خصوصا فاش شفت جبروته والطغيان على ورقة وجه بابا.. كيحاول ما امكن يوصل لي .. غايقتلني .. هادشي لي دار فبالي .. شعرت انني فشي حفرة كيردو عليا التراب ويخنقوني ..

عاود بلال كيجاول يوقفه .. كنشوف غير به باستنجاد ..

بلال:~خاااالي .. مااعندكش الحق ..

بابا:~(كان ما باقي ليه والو ويوصل لي) ماتدخلش ابلال ..

غمضت عيني كنطلب الاغاثة من الله .. غمضت عيني كنستنى شي صفعة ولا شي حاجة .. حتى حد ماغايتجرأ يفكني .. حتى من بلال بنفسه قال مامسؤولش على شنو غايوقع لي من بعد ..

خيال ضخم غطا عليا بظهره .. وحرارة جسده رداتني مع الحيط اكثر.. وصوته دوا فحال الصاعقة فآذني ..

بلال:~ ماعندكش الحق تقيس مراااااتي واناا حاااضر .. ولا حتى غاااايب .. (زااد بغضب) مااعندكش الحق ..

غير قال جملته .. عم السكون فارجاء الغرفة ..

كل من عيون بابا وماما كانت كتحدق فيه بفضول ..

بابا:~( فحال اذا مامصدقش شنو قال) كيفاش ..

زاد بلال غطا عليا بجسده .. كيحمني بكل نفس عنده .. يمكن الامر غير شفقة منه .. العرق تصبب بارد مع ظهري .. ولساني تلجم بين سناني .. من غير شهقاتي لي كانو كيتسمعو .. كنحاول نكبحهم بصعوبة ..

بلال:~(تكلم بثقة) كيف سمعتي اخالي .. انا غانتزوج بجوري وفهاد السيمانة ..

بابا:~( زاد كيتكلم بقسوة) اذا كنتي باغي غير تحميها مني راك غالط .. عارف نهيتي امر الخطووبة ..

تصاعدو انفاسي بين صدري بعنف .. والمطارق كيضربو فراسي من كل جهة .. شفت غير يدين بلال لي زير عليهم بشراسة .. لكن عرف كيف يعكس ردة فعله ويردها كله هدوء ..

بلال:~ بصح حيت مابقيتش بغيتها خطيبتي ..(سكت شوية وتمتم بجدية) هي غاتولي مراتي ..

قال جملته بصراحة وجرأة كبيرة .. فكل مرة كان كيطنطق شي حرف كان كيتعمد يقوله بتملك ..

تصادف الامر مع دخول نرجس والممرضة وزوج رجال الامن .. لقاو الحال مهدن ... لكن الجملة تسمعات عندهم كلهم ..

تكلم واحد من رجال الامن :~تفضل اسيدي معانا .. خرجو بابا لبرا .. حتى هو مشا بلا مايعاود يتلفت لجهتي .. وكلام بلال نزل فحال ما البارد على قلبه ..

شافت الممرضة عينيها ف ماما لي كانو باقي عينيها حمرين ..

ماما:~اانبقى معها ..

حركت الممرضة راسها بنفي .. وتكلمات ..

الممرضة:~خليوها ترتاح الالة .. من بعد وزوروها ..

ماما مجددا.. كتبكي .. ماقادرة دير والو .. ضعفها كتبينو.. فحال اذا انا ماشي بنتها .. هي غير عبد طائع .. نرجس ملامحها بانو لي فشكل .. مصدومة .. كتحاول يمكن تربط هادشي لي قاله بلال ببعضه .. هو الوحيد لي وقف معايا واخا كنكرهه .. عتقني فنهاية المطاف ..

خرجو بزوج .. اما هو حدق فالممرضة ووجها لها كلامه ..

بلال:~غانخرج دابا ..

دار لعندي .. بقا غير كيحدق فتفاصليي لمدة طويلة .. زفر بضيق .. من بعد لقيته غبر من قدامي .. فحال اذا عمره كان .. بقيت كنفكر فكلامه .. نحاول نحلله غير شوية واخا خلايا عقلي ماستوعبوش هادشي لي كيوقع لي مؤخرا ..

***

وصل الليل .. النهار كله دوزته غايبة على الواقع .. ما جاعندي حد .. مازارني حد حتى شكيت واش سمحو فيا هنا .. غرقت فبحر الوحدة مجددا .. وامواجه اجرفتني للاسفل ..

حسيت بشي حد دخل كانت واحد الممرضة جديدة.. ماشي نفسها د الصباح ... قربات مني وابتسمات ..

الممرضة:~ جبت لك الدوا ..

رديت لها الابتسامة بزز مني ..

انا:~ شكرا ..

الممرضة:~ دابا تبراي ان شاء الله ..

بغات يمكن تهدر معايا ولكن وقفت قدام واحد الشرجم .. كنطل للاسفل .. بما انه الامر كان غير غسل للمعدة .. كان خصهم يكونو خرجوني دابا .. ماشي نبقى سجينة هاد الغرفة ..

نفس الباب تفتحات حتى سمعته صوته البارد كيضرب فأرجاء الغرقة ..

بلال:~السلام وعليكم ..

ردات عليه الممرضة .. بينما انا ماكلفتش راسي ندور لعنده .. مابغيتهش يعاود يقرا الرعب فيعيني .. ونكون هاد المرة حقا ممتنة له ..

بلال:~ تقدري تمشي .. ماغانتعطلش عندها بزاف ..

عاد قدرت ندور لعندهم .. كان مركز نظره معيا ..

لمحت الممرضة .. حركات راسها بتفهم وشدات الباب .. اما انا بقيت لاصقة فداك الشرجم .. وكل لي وقع فالصباح رجع معايا ..

سمعته دوا بصوت اجش .. وجرني من يدي لقدام ..

بلال:~ ماعندك من اش تخافي .. باك ماكاينش دابا ..

انا:~ فين هما ..

بلال:~ عنده شي شغل مشا يقضيه وماماك مشات فحالها ترتاح ..

زدت خطوتين برعب .. عاد طلعات معايا الحرارة وكلامه لي قال فالصباح كيعاود يصفعني مجددا .. قلبت وجهي بعدم تصديق ..

انا:~ شنو قلتي لهم .. شنو هادشي درتي فالصباح ..

بلال:~(رجع اقترب مني) حيت هاد الزواج هو لي غادي يكون ..

انا:~(حركت راسي بنفي) مابغيتش ..

ماقادرش يفهم اصراري .. ربما فوقت اخر بنسبة ضئيلة كنت نقدر نتقبل شوية هاد الزواج .. ولكن دابا حتى داكشي لي غانعتز به ضيعتو بسهولة وفرطت فيه ..

بلال:~(مسح على جبينه كيحاول يتهدن ) عمرك غاتعيشي هاينة فداركم .. مانقدرش كل مرة نحميك من باك .. الا اذا كنتي معايا ..

انا:~(نطقت بتهكم) ياك انا غير مريضة ..

بلال:~(جاوبني بهدوء) ومن بعد ؟اذا كنتي مريضة غانعالجك ؟

نبرة صوته خرجات من ثغره هادئة .. داك الاستهزاء والمكر لي كان فصوته فالصباح دابا تحول كله للجدية ..

انا:~ خرج فحالك ..

بلال:~( مسح على وجهه) علاش كتخليني نكون قاسي معك .. ماباغيش نفرض عليك راسي .. نتي خصك تسمعيني

ماعرفتش كيفاش حتى لقيت راسي كنتسنط له .. ربما حيت الغوات ماشي فصالحي .. ولا فداخلي كنت باغيا هادشي ..

انا:~ علاش كتصر عليا وعارفني ماباغاش .. ياك انا غير مريضة .. ياك انا غير وحدة كتفكر فالانتحار وكتقتل راسها .؟

بلال:~ حيت انا ختاريتك باش نتزوج بك ..

فكه تشنج .. ويديه ولاو فشكل كيترعدو ملي حطهم على كتفي .. فحال اذا عمره وقع بيناتنا شي احتكاك .. ولا عمره هضر معايا .. ثبت راسه وشاف فيا بنظرة كتحمل الشغف .. هادشي قدرت نقراه بوضوح ..

بلال:~ حييت بغييت نتزووجك .. ( زير على كتفي بشوية ) علاش ماباغياش تفهمي ..

رفعت عيني فيه .. وبعدت شوية حتى طلق مني .. تصنعت القوة واخا لا امت لها بصلة ..

انا:~شنو بغيتيني نفهم ؟

نطق بلا تردد ..

بلال:~بغيتك تفهمي .. انني بغيتك تكوني فحياتي .. بغيت نشد فيديك حتى تولي نفس البنت د شحال هادي .. بغيت نروض هاديك جوري الصغيرة لي فوسطك .. الشخصية لي كتبين راسها قوة وراسها قاصح .. (زاد شاف فيا بجرأة وعينيه حمرين) بغيت نعالجك بيدي .. ونشفي جروحك .. ( طلع النفس من صدره بصعوبة) واش هادشي ماشي كافي باش نتزوجك ياعميقة العينين ؟

يتبع

غاندخلو شوية فالاحداث الرومانسية هههه مانبقاوش غير مع الدراما

قناع الذكريات الجزء الثاني

محتوى القصة

التنقل بين الأجزاء