أسيرة جبروته الجزء الثاني

الجارة مشات كتزطم فجلايلها...

كريم مشى تبع يامنة للكوزينة باش يهضر معاها...

نجية لتخت بنتها اول مادخلو للدار...ماخلاتش فيها شي عظم صحيح..عطاتها العصى تا سخفاتها ودخلت طاحت دودة فالنعاس مسكينة..

كريم:مي يامنة!!

يامنة:نعام ا وليدي...والله حتى عمرني عليا الدار...ومابقيتش نحس بالقنط..(كريم كان غيهضر سكتاتو)من نهار جيتي وانا لقى لي يونسني...ماشي بحال ولادي(دمعو عينيها)غي دارو دارهم سمحو فيا ورجعوني لدار ميمتي الله يرحمها باش يتهناو مني...

كريم بقات فيه:صااافي..ها انا معاك دبا..بلا ماتقلقي...ياك كتحسبيني تا انا ولدك؟؟

يامنة بحزن:ربي لي عالم..

كريم باس ليها راسها ونسى فلحظة شنو وقعلو معاها:اوا شنو كتوجديلي؟؟

يامنة:طاجين دالحوت تعشى بيه...عارفاه كيعجبك!!

كريم بابتسامة:اي حاجة من يديك زوينة ا ميمتي...

فرحت مسكينة ورجعات فيها الروح من جديد...اما هو سكت عرفها عاوتاني نسات الصداع..مابغاش يفكرها فيه...

أمين هبط ماكيشوف فحد..هاز الفاليز ديالو وغادي باتجاه لباب...

رؤيا تألمت من هاد الموقف وحنات راسها..اما رحمة شافت فيه وقالت..

رحمة:تهلا اولدي فراسك...وفاش تحس براسك بردتي من جيهتنا رجع...غتلقانا كنساينوك...والا مالقيتيناش الله يسامح علينا...

أمين تقصح من كلامها وزير علا يديه لي جارة لفاليز ولكن مادورش وجهو حيت باغي يحسسهم بغلطهم وبلي تا حميد مايستاهلش هاد التضحية كاملة...خرج وزدح لباب وحميد عاد تنهد ورجعت فيه الروح كيطلل ملفوق ويحمد الله لي مو وختو ختاروه هو...

رؤيا كتبكي:غيرجع خويا أمين ياااك؟اهئ اهئ..

رحمة مصبرة راسها:آه ...انشاءلله..

أصبحنا وأصبح الملك لله...

فاقت رؤيا بكري ولا نقدرو نقولو مانعساتش...ياله دخلت معاها فكرة الزواج...حسات بلي ماخداتش وقتها ولا حقها فالتفكير..

دخلت عندها سعدية كيف العادة:صباح لخير لالت البنات..

رؤيا:صباح لخير اختي..

سعدية جلست حداها فالجنب دالفراش:مالك ا حبيبتي؟حاسة بيك هازة جبال فوق ظهرك..

رؤيا ماقدرتش تصبر وانفاجرت بالبكى:توحشت بابااا اهئ اهئ...ماتخيلييش شحال محتاجاه دبا...حيت لوكان هنا ماغيطرا والو من هادشي..

سعدية عينيها دمعو:صاافي اختي باراكة عليك من البكى طيبتي عينيك..زايدون دعيلو بالمغفرة حسن ماتبكي عليه..

رؤيا بألم:الله يرحمو ويوسع عليه اهئ اهئ..

سعدية حطات يديها علا كتف رؤيا:ماتهزيهاش مين تقالت..نوضي عيطي لخوك أمين يجي موراك وسمحي فكلشي...ماتزوجيش بزز منك..مازال فيديك لوقت..

رؤيا:اينا وقت..خويا لي واقف فالطريق ديالي...خويا لي خايفة يكمل حياتو فالحبس...وانا مارضاهاش..عائلتي عندي اهم ناس ومانقدرش نفرط فتا واحد فيهم...من ديما كيعاملوني مزياان..وعمرهم رفضولي طلب..ودبا مين يحتاجوني نخليهم!!مايمكنش..

سعدية:دبا صاافي غتزوجي داك الموصيبة!!

رؤيا ناضت:ماعنديش حل آخووور...نووض نصلي وربي يسهل الامور..

سعدية:ونعم بالله...لمهم ها الفطور واجد صلي واجي...

رؤيا هزت راسها بالايجاب ودخلت للحمام...

فاق صلاح وهو كيشوف فالبلاصة حداه لي خاوية مألم ملداخل واخة ماكيبينش..بقى كيدوز يديه علا المخدة..ويتخيل مرتو لي تغصبت فشبابها ومشات فلحظة من بين يديه...تنهد وتفكر مرة كان معاها"حبيبي خصك دير خاتم الخطوبة باش تاوحدة ماتشوفيك........لاااا ماكنديروش عارفة ماعنديش مع الخواتم كيقنطوني...زايدون الا خايفة غي علا ود البنات تأكدي بلي ماكنشوف فتاوحدة من غيرك ونتي عارفة...شحال من راجل داير لخاتم وكيحيدو علا برا ولا مامحتارموش..اما انا دايرك فقلبي وعقلي وعمرني نبدلك ببنت المرا......هههههه صاافي صاافي قنعتيني "بسم للحظة ورجع عبس مين رجع للواقع...كفاش القدر يكون قاسي عليه تالهاد الدرجة ويحرمو من الانسانة الوحيدة لي خلات قلبو يدق..كفااااش!!!

فاقت مريم ضلوعها كيحرقوها:الله ياخد فيك الخق ا شارفة...اييي يا ممي ظهري ورجلي ويدي مدكدكين...

نجية بغوات:افينك اديك القردة...خرجي وجدي مانسرطو..

مريم بخوف:ءءء ها هانا جاية(الله ياربي الله)...

صلاح خرج من الدوش لبس شوميز بيضة دخلها فسروال الثوب كحل وفوقها جيلي زرق..وهبط يفطر معاهم(واخة كيكون مقصح كيبين للناس بلي راه قوي)..

العائلة كانو مجموعين لتحت متفاجئين بقرارو...

صلاح بصوت خشن رجولي:صباح لخير..

كلشي:صباح النور(كتردد من كل واحد فيهم)..

جلس حداهم ياكل حاني راسو..

لطيفة بتوتر:و ولدي...كيصبحتي؟؟

صلاح بهدوء:حمدلله..

حسناء كتشوف فماماها وتغمزها تسولو...

لطيفة:ولدي آش هادشي سمعنا!!

صلاح علا عينيه فيها:جش سمعتو؟؟

لطيفة شافت فطاهر وخالد لي ماباغيينهاش تجبد معاه الموضوع:ءء اممم علا زواجك ببنت الطراشن..

صلاح ببرود:امممم..

لطيفة:و واش بصااح غتزوجها؟؟

صلاح معلي حاجبو وكيهضر بجدية:علا فين عمري قلت لي شي كلمة وماقديتش بيها؟؟

لطيفة:لا لا ماشي هكاك و ولكن غي حيت(شافت فكلش وكملات) ء آلاء ياله ماتت اولدي..

صلاح حط الكاس من يديه وناض:أنا غنمشي للاسطبل تعطلت بزااف...

طاهر مخنزر فمرتو:واخة اولدي..الله يعاونك...

خرج صلاح كيعلي كمام الشوميز مع الصهد بدا يدخل...وجو الربيع مشمس وزوين..ركب طوموبيل لقاها فالكاراج ومشى باتجاه الاسطبل..

طاهر:كنقولكم خليوه علا خاطرو بلا ماتجرحوه بهضرتكم..

لطيفة:وا غير كنطمن علا ولدي..ماقلنا والو...

حسناء:بغيت غي نفهم كيغايدير يتزوج...ياله ماتت مرتو...والمشكل غيتزوج من اعدائنا..

خالد:دبر راسو هو لي ختار..

طاهر كيخمم:لااا هادشي تا انا ماعاجبنيش...مافهمتش شنو فراسو..غي الله يحظر السلامة...

لطيفة بخوف:علاش زعما مافهمتش!!

طاهر وقف:ماعرفت..لمهم دبا نوض اولدي نمشيو لخدمتنا..من الافضل نخليو كلشي علا الله..

خالد:ونعم بالله..ياله..

خرجو وحسناء كتفكر وتعاود تفكر:دبا زعما هو غيتقبل مرا خرا بعد مرتو لي كان كيبغي؟؟

لطيفة:واا صاافي نوضي نجمعو كلش ونتي لصقتي فالموضوع..

حسناء نفخت:هاهي نايضة..ماعرفت فوقاش غتعرفو بلي كبرت ومابقيتش برهوشة كيفما كتشوفوني ..

سمحت فيها لطيفة ومشات لكوزينة..

مريم كتوجد الفطور وفبالها حاجة وحدة هي تنتاقم من أم الأربعة والأربعين ههه كيفما سماتها هي..

نجية غي كتنكر فينما تشوفها:دبا تشوفي دينمك الاشاعات لي غيخرجو عليك...باش تبقاي طيري ودخلي للديور...

مريم:وااا صاافي ا ماما راه هضرنا..زايدون بناقص من التسياق كااع..هو لي وصلنا لهادشي..كون ماكنتي بززتي عليا كون راحنا هانيين...

نجية خنزرات فيها:يااك اوجه الهم..دبا وليت انا السبب...اوا والله لابقات فيك..

مريم دخلت لكوزينة كتندب حظها عارفة مها مامعاها لعب...

رؤيا كلات شوية بزز باش ماتفقصش ماماها..

رحمة بابتسامة مصطنعة:شبعتي احبيبة(رؤيا هزت راسها)اوا اجي معايا لبيتي نوريك شي حاجة..

رؤيا بسمت وناضت معاها..

دخلو لبيت ومشات رحمة لفاليز عندها فقلب البلاكار..جبداتها وحطاتها فوق الفراش...

رحمة حلتها وهي رؤيا تشوف داكشي فألوان زوينة بقات مستغربة...

رؤيا:شنو هادشي ء ماماااا؟؟

رحمة جلست حداها:هدا جهازك...(رؤيا حلت عينيها فيها).اه جهازك...كنت كلما نهبط للمدينة ولا السوق ونشوف شي حاجة تعجبني كنشريها ونخبعها ليك..وكنقول نهنيك شوية واخة عارفة غنزيد نتقضى ليك..مثلا شريتلك الطرز الرباطي..ومنادل وفوطات مطروزين بالازرق..(كتجبد وتوريها)بينوار دالحمام..تفصيلة ديال جلابة وتكشيطة خصها تخيط..وهادو جوج شوميز دونوي(رؤيا تزنكت)..شريتهم عاد الصيف لي داز زعما ماماتش لموديل ديالهم ههه..لمهم حاولت نشريلك باش فاش يجي عرسك نكون مهنياك من شحال من حاجة ابنتي...

رؤيا بسمت وباست لماماها يديها:لهلا يخطيك عليا اماما...ولكن هادشي ماعندي فين نحتاجو..

رحمة:علاش ابنتي ياك غتزوجي!!

رؤيا:هادا مشروع غيخلي الفيلاج يرجع لوضعو لول ماشي زواج...انا متأكدة بلي تا هاداك لي غنتزوجو باغي غي يفك المشكل...اذن ماتحاوليش تحمقي راسك معايا..عقد وغنديروه صااافي...

رحمة:و ولكن...(عينيها دمعو)انا كنت باغية نفرح بيك...

رؤيا بنبرة بكاء:ماكتابش اماما..اصلا مايمكنش لينا نديرو تا حاجة..بابا ياله توفى فهمتي..اذن بلا مانصعبوها علا راسنا..

رحمة تقهرت علا بنتها..عنقاتها وبداو يبكيو بجوج..قلبهم طايب شي كيهدن فشي ولكن الوقع ضروري غيتعاش..

نجية لبسات جلابتها:ها انا غادية للسويقة ابنت الحرام..تعتب رجلك برا الدار نغيزلك لحمك..

مريم:صاافي صافي ماتخافيش..

خرجت نجية وهي مريم مشات كتجري للحمام..كتعمر السطل بالما ودير فيه جافيل بزااف والصابون وهزاتو خارجة بيه لجيهة الدروج ديال يامنة فرحانة وحاسة بلي راها كدير فأحسن خطة فالعالم هههه...

وصلت تماك وبدات تكب الما بزايد حدا الدار باش لي داز فيها يطييح وعلامات الشر والفرحة علا وجهها😁😁..

كريم ليوم فايق بكري ناض دوش وفطر مع يامنة يتهاودو ويضحكو وغي تنسى يفكرها..شوية وناض لبس تيشورط كحل مع شورط خفيف جينز حيت ليوم صابح الصهد علا الجهد وكاسكيط كحل..بغى يكتاشف المدينة هاد المرة فضوء النهار..

كريم:انا خارج...خصك شي حاجة ا مي يامنة..

يامنة:لا اولدي غي ماتعطلش باش نتغداو بجوج..

كريم:واخة ماتخافيش وقت الغدا تلقايني معاك..

يامنة:واخة ولدي...

مريم عمرت الارض والسطل مازال فيه الما وكتزيد تكب تا سمعت صوت ماماها وهي تقفز..

نجية تاوصلت لراس الدرب وهي تفكر بلي ماهزاتش الفلوس رجعت ووقفات فلباب كتعيط..

نجية:مررررريييييييم...وا ديك المسخوطة...مررريمم...

مريم داخت بدات تطلع وتهبط فالدرجة لي حداها ماعارفة مادير طلعت كتشنول بداك السطل والما كيهبط منو بلا ماتحس بقوة الخوف والتوتر..

نجية:وااا مريم..بغيتلك الطروشة..

مريم وصلت حدا الباب ديالهم:ن نعام ا ماما...

نجية:هبطي ليا بزطامي راه نسيتو...

مريم بصدمة:ءءءء؟؟

نجية:تهبطيه ولا نطلع نشتف علا مك..

مريم:ل لاااا لاا ها انا غنهبطو...

دخلت كتجري هزاتو وخرجت ناسية كاع شنو كبت فالارض بقوة الخوف..شوية وهي تزطم فالدروج لي تكب فيهم لما وهي تسحت ليها رجليها وبدات هابطة علا عظيم الطيو كتزدح وتغوت..

كريم فنفس اللحظة خرج ومع لابس صندالة دالصبع غي حط رجليه علا العتبة سحتات ليه رجليه وطاح علا ظهرو معصب ويديه عمرو رغوة وريحة جافيل بغى يطرطق..شوية وهو يعلي عينيه لقى مريم هابطة كتكركب مع الارض وكتغوت..

مريم:ءءءءءءءءءءء(شافتو تصدمت وهي تغوت) ووووااا نوووض ...

كريم حل عينيه علا الجهد بغى ينوض رجع سحت🤣🤣🤣 وهي تزدح فوق منو نيشااان خخخخ...

صلاح وصل للاسطبل الخدامين كلهم كيشوفو فيه مأسفين..والاغلبية بداو يعزيوه وهو داير نظاظرو وكيهز فراسو تا دخل لداخل عند الخيل المفضل ديال...عود كبير وزوين مارو مغلوق وشعرو بحال الحرير هابط علا عينيه سميتو ألبير...

صلاح:عطيني السرج ديالو..

الخدام:غتخرجو ا سيدي؟؟

صلاح:اممم سربي راسك..

مشى الخدام كيجري قادو ليه وهو يجرو من الخيط لي فالقدام وتم خارج بيه تا وصلو للجردة وركب عليه وانطلق فطريقو كيتمشى بيه مفيكسي شوفتو لقدام ودماغو عااامر فوق القياس..

نجية سمعت الغوات طلعت كتجرؤ خافت علا بنتها...شوية وهي لثاني مرة علا التوالي تشوف بنتها فوق كريم ناري شعلات..

مريم تبلوكات فاش شافت مها كتقول هادي التالية ليها هههه..

نجية ياله غادي تغوت وتجرها من شعرها وهي تسحت ليها رجليها وتجي فوق منهم 😂😂..

كريم مسكين كون ماكان بقوتو وجهدو كون راهم بزطوه ههه..تعصب منهم فوق منو ولكن فنفس الوقت جاتو الضحكة علا الموقف بقى محبسها باش مايطلعوش علا كتافو..

نجية:اويلي شهادشي؟؟

مريم بدات تفتف وهو يهضر:اوا هانتي كتشوفي(مريم غتخرا هاد المرة فسروالها وكرشها بدات تغرغر هههه..كربم شافيها وكمل)واقيلا مي يامنة مسكينة كبت الما وجافيل باش تسيق الدروج ونساتو..

مريم عاد رجعت فيها الروح..

نجية:واش هادي مسطية..باغية تسطحنا؟؟زايدون بلاتي انا ياله خرجت ماكان والو...

مريم بدات دور فعينيها وهو عاوتاني كربم نقدها..

كريم:ممكن بعدا تنوضو فوق مني راكم ماشي خفاف تباركلله 🤨..

نجية كتشد فالصور وتحاول توقف ومريم تبغي تنوض وتزلق..غي كريم لي كيكاليها وكل مرة تجي عينيه فعينيها وهي كتعصب بحالا هو لي دارها ليها..

نجية جرت بنتها كتخنزر فيها:تكعدي ونتي عجباتك الطيحة ابنت الكلب...زايدون اش جابك هنا؟

مريم:هاااء ياك نتي لي عيطتي ليااا..

نجية تراجعت:اممم اهه...

كريم شد فلباب وكينوض:غتكون كباتو فاش جيت خارج وتلفتها وهي تنساه...

نجية بجدية:مالها؟واش حمقا ولا كفاش؟؟

كريم بجدية:فيها الزهايمر!!

مريم:شنو هو هاد الزمايهر..

كريم:واا زهايمر..مرض كيخلي الناس لكبار ينساو...انا وكتنساني بزاااف..

نجية فهمت:اممم مسكينة الله يشافيها..عليها طيحت لباطل علا بنتي لبارح..

مريم فرحت حست بلي مها كتحامي عليها:شتي ا مي شتي..

نجية خبطاتها للظهر:ماما ابنت الكلب..(تكمشت مريم وكريم حابس الضحكة)..

كريم مصغر عينيه فمريم:سمحولينا..

نجية:اوا المسامحة اولدي..والصبر..

كريم:ربي يخليك ا خالتي..

مريم كتشوفيه وهو متبت مع مها..

نجية:ياله زيدي قدامي..

مريم:م مابقيتيش غتسخري؟؟

نجية:وليت كلي جافيل وباغياني نسخر..المكلخة لوخرا..

مريم مارضاتش وكريم بسم وحل لباب يدخل يبدل حوايجو..

مريم:علاش اماما كتجرحيلي مشاعري حدا العادي والبادي علاش؟؟

نجية:طلعي وتعدي نهارك علا خير لاااا؟!!!

مريم سقرت وطالعة كتنثر فحوايجها بالفقصة وشادة فالحيط لا طيح..دخلت للدار كتعمر الما وتكب فالدروج باش يتصفاو من جافيل..

يامنة:ولدي دغيا رجعتي،؟

كريم:لل غي بغيت نبدل حوايجي الصهد..

يامنة:واخة بدل..

دخل كريم للبيت حيد تيشورط كحل لقاه بدا يبياض بجافيل بسم وحطو ولبس تيشورط خطر لاكوسط..وصبادري بيضة باش مايطيحش هاد المرة هههه..

تم خارج سمع صوت الما والتسياق والارض مابقاش فيها حافيل بزااف بسم وهبط لقى مريم فلباب كتدفع الما بالكراطة..بقى حاضيها وزاد قدامها...

كريم:درتيها لراسك شتييي...

مريم مغزفة:الا غتخرج خرج وهنينا..

كريم باستهزاء:اييه..هادي هي شكرا...اما كون راك كتاكلي العصى خخخخ..

مريم خنزرت فيه وهو يبسم:ها انا كنسالك تيشورط..حيت لاخور بياض بجافيل(دار نظاظرو وزاد مبتسم وهي عاقدة حجبانها فيه وكطلعو من راسو لرجليه)..

حميد مشى لأرض لي تحرقات..بقى واقف كيتحسر عليها وهو كيدور بين الزرع لي كان علاين يبس...دمعو عينيه كيتفكر داك الليلة...تمنى لو تحرقت 100 أرض ويبقى باه معاه...بقى غادي وكيشوف شوية وهو ينتابه لشي حاجة صغيرة فيها الحمر...حنى كيشوف تا لقى بونتا ديال السيجار مارو فيها بلاكة كحلا...مكتوب فيه انجلترا...استغرب وبدا يضورها فدماغو...هزها بطرف ديال الثوب حيت يقدر يكونو فيها بصمات..خبعها فجيبو وجات فبالو بلي هاد البونتا تكون سبب الحريق..يسم وحس بلي لقى دليل يقدر يحتاجو من بعد..

صلاح بقى كيتمشى ويدور علا خاطرو فغابة قريبة..شوية جهد فالسبيد وبقى يجري يجري وينهج تا هو مع الخيل ديالو...وقف فبلاصة قريبة لحافة وهبط كيغمض عينيه مزير عليهم وفلحظة بلا تفكير غوت علا أحر جهدووو..

صلاح:آااااااااااااااااههههههههههههه ...

تلاح علا ركابيه حادر راسو وقلبو كيتحرق...صعيب عليه يفقد حبيبتو ويزوج بعد منها ولكن هكا فرضات عليه الظروف..بقى شحال هكاك كيرتاح نفسيا...عاد ناض عاقد حجبانو كأن شي واحد شافو قداش كان ضعيف وبغى يستدرك الموقف..ركب علا الخيل ديالو ورجع لاسطبل..

كريم خدا تيلي ونمرة جداد وصونا علا خوه خالد..

كريم:ألو خالد..

خالد هضر بالحس:هادا كريم..اممم كريم خويا لاباس؟؟

طاهر كيتصنت وساكت...

كريم:حمدلله..حمدلله..كيبقاو مالين الدار؟.

خالد:كلشي لاباس..توحشوك بزااف..

كريم:تا انا توحشتهم..(بقلة صبر)بغيت نرجع قنطت بزااف..

خالد:لاااا غي صبر شوية..

كريم:قدااش زعما؟؟

خالد:مازاال لمهم هاحنا علا اتصال وفاش تهدن الاوضاع ترجع راحنا كنحاولو نحلو المشكل...

كريم كيحك راسو حدا الرقبة:اوك لمهم ديروني فبالكم...وسلملي عليهم كاملين...

خالد:مبلغ ..بسلامة...(قطع)

طاهر:علاش ماقلتيلوش ؟؟

خالد:من الافضل مايعرفش حيت ماكنظمنش تصرفاتو...

طاهر:يمكن عندك الحق...لمهم صافطلو لي كيحتاجو وخليه بعيد دبا...

خالد:واخة كون هاني..

رؤيا طلعت لبيتها مالقات مادير فكرت تبدا تجمع حوايجها المهمين..جبدت كااع عباياتها مع فولاراتهم وبدات تطوي وتخبع فالفاليز..

دخلت عندها سعدية..

سعدية:نعاونك احبيبتي؟؟

رؤيا بهدوء:لي عجبك...

سعدية شافت الحوايج:اويلي شهادشي!!غي العبايات...فين هما حوايجك الزوينين؟؟ولش غتزوجي ولا غادية تحجي؟؟؟هههه..

رؤيا ابتاسمت:من نيتك ..هادا راه ماشي زواح..هادا راه حل لمشكل وصافي...

سعدية:اوا واخة هكاك...خصك تهلاي فراسك..نتي ماعارفاش شكون غتزوجي!!

رؤيا حطت يد علا يد:شكون بالسلامة؟؟

سعدية:ابكص واحد فالفيلاج...وااعر من درجة ممتاز ههه..

رؤيا باستهزاء:ومن بعد؟!!

سعدية:غدوووخي ههه داكشي علاش خصك تهلاي فراسك..

رؤيا:لااا ماتخافيش..ماعندي فمن ندوخ...واش واحد من عائلة الحسناوي انا غنبغيه؟؟غنكون مانسواش الا فكرت فيه..

جا الليل وهي مريم تعيط لخولة صاحبتها تجي عندها..دخلو جلسو فالصالون ونجية دايرة نظاظر الشوف كتخدم الطرز وحاضياهم..

خولة بالحس:اشنو درتي ا لمسخوطة..خبارك وصلت لراس الدرب..

مريم بصدمة:اويلي...

خولة:اقسم بالله...قالك لقاوك مع شي راجل فوضع مخل بالآداب..

مريم:ولاد الكلب..خصهم غي مايطلقو..

خولة باغية تعرف:اوا عاوديلي..شنو وقعلك ومعامن؟؟

مريم:اممم غي سكتي...واحد الكارثة تسلطت عليا من السما..

خولة:اووف واعاوديلي..

مريم عاودات ليها باختصار ونجية حاضياهم...

خولة حلت عينيها علا الجهد:واااو هادشي بحال الافلام ههه..

مريم:اشمن افلااام..الزنر هادا...

خولة:خصني نشوفو..

مريم قادات راسها فيها:علاش؟؟

خولة:اوا اختي الا كان شي تيتيز ندبرو علا راسنا هههه..

مريم خيبات كمارتها:ونتي مسالية شغلك خصك غي معامن..

خولة:اووو الغيرة خدمت هههه هي عاجبك ءء لكدابة!!

مريم:لااا ماعاجبنيش غي م مابغيتكش تكبريلو الشان..

خولة باستهزاء:اييه اييه ثيقتك هههه..

مشات خولة بحالها ومريم بقات دورها فدماغها حيت فري كريم متيتز وبززاااف..

اصبحنا واصبح الملك لله..

الحسناوي جالسين كيفطرو تا نطق صلاح..

صلاح:وجدولي لبيت لي حدا بيتي..

لطيفة:علاش اولدي؟؟

صلاح:لمهم وجدوه وصاافي..

لطيفة باستغراب بعدنا فهماتو:ماغاديش تبقى فبيتك؟؟

صلاح:لا بالعكس غنبقى فيه..هي لي مابغيتهاش تكون فيه..

لطيفة شافت فكلشي:اه واخة اولدي..

صلاح:شكرا..

ناض خرج كيف العادة باش مايبقاش غي فالدار..

كريم فاق كيدير السبور بشورط ثوب غري وفوقو سوفيطما نفس اللون جاياه لاصقة وكاسكيط بيض وصبادري فلونها..فاش رجع للدرب شافتو خولة كانت مسخرة وجاية..شداتها الدوخة وعجبها بقات حاضياه اما هو مانتابهش ليها ودخل للعمارة..

خولة:ايييه يابنتي..هادا كلو وكتفشي عليه...مصاب كون تهرست وجيت فوق منو ماشي غي نطيح..اححح اقلبي..

رؤيا بقالها غي يوم فدارهم بقات دور وتجلس ماقاداها تا دنيا..حسات بقلبها غيطرطق ماكرهاتش تراجع..ولكن مايمكنش..جات عندها ماماها كتجمعلها حوايجها والدموع فعينيها...

جا الليل...رؤيا نعست فحضن ماماها ساكتة ومخشية فيها..

اما صلاح تكى فبلاصتو كيفكر فغدا وشنو غيوقع فيه..

صباح جديد غي شرقت الشمس ديالو حلت رؤيا عينيها...كتشوف فماماها بابتسامة مقهورة..باستها بوسة خفيفة وناضت..مشات لبيتها دوشات وصلات كتدعي الله يوقف معاها واخة قلبها مقبوط بزاافف..

اما صلاح فاق معلي حاجبو فالسما..غي مخنزر وشكلو كيخلع تا واحد ماقدر يهضر معاه..

كريم خرج جاب لباكيط باش يفطرو وغي جا راجع تلاقا مريم فالدخلة دالباب..

كريم شافها جاتو الضحكة..اما هي خنزرت فيه وبغات دوز..

كريم وقفها:صباح لخير..

مريم مخنزرة:صباحاتو لله..

كريم ضحك:مالك؟؟ههه..

مريم:خليني ندوز عافاك كافيا لي تجيني شي موصيبة..

كريم:هههه وتاكلي العصى من عند ماماك ياااك هههه..

مريم طلعات فيها وهبطات دفعاتو ودازت باش تخرج تسخر وهو بقى يموت بالضحك مشتغرب من هضرتو معاها هكا..بحالا كيستمتع وهو كيفقصها...

العمدة عيط لحميد وأكد عليه يحيو فالربعة دالعشية يديرو العقد عند العدول..ورجع عيط لطاهر لي اكدلو بلي غيجيو فالوقت...

سعدية مسكينة جاتها قاصحة تخوي تا رؤيا الدار...بقات حابسة البكية بزز باش ماتبينش حداها وتزيد مابيها..

حميد دخل عندهم:وجدي راسك مع الربعة غنمشيو..

رؤيا قلبها تخطف وهزت راسها اما رحمة عينيها دمعو وبقات صاقرة..

صلاح مشى كيتلف نهارو بالخدمة تا عيط ليه باه ووصاه يجي باش يمشيو لعند العدول..وداكشي لي وقع..

هز حميد حوايج ختو حطهم فالطوموبيل..اما هي غي كتبكي وتسلم علا الناس لي معاهم..تفارقت بزز مع سعدية ودخلت لطوموبيل هي وماماها كتمسح ليها عينيها وتصبرها..كانت لابسة عباية صومو بارد مع فولارتها ووجهها طبيعي مزنك بالبكى والحكرة..

وصلو عائلة الحسناوي لي كانو فيها غي طاهر ومرتو وصلاح..دخلو وبقاو يساينو فحظور العمدة..

شوية تسمع صوت الطوموبيل ودخل حميد موراه رحمة شادة بنتها لي حانية الراس..

صلاح ماكلفش راسو تا يشوفيها..ماحاملهمش كاملين..قرب حدا العدول باش يبداو العقد..

بدا الغدول فخدمتو وحميد كبعطيه لاكارط ديال رؤيا..عيط عليهم يسنيو وصلاح مد يديه وسنى اما رؤيا غايبة علا العالم وقلبها كيضرب فالمية..تا فيقها خوها..

حميد:ختيييي..اجي سني..

رؤيا عينيها مدمعين ناضت ومدات يديها كترجف..كتبغي تسني وتولي ترخي يديها تا هبطت دمعة من خدها وسنات..

طاهر حاضيها وللحظة تخيل بنتو فداك الموقف وتألم...اه بلا شعور واخة بنت عدوو بقات فيه..حالتها كانت تشفي العدى..اما صلاح غي حاضي وساكت..

العدول:مبروك ليكم..الله يجعلو عليكم بالرفاه والبنين..

طاهر:شكرا..(شاف جيهت العمدة)دبا خصنا حوايج لبنت باش تمشي معانا..

هنا رؤيا حسات بالخطر شافت فماماها لي تاهي كتبكي كترغبها بعينيها باش ماتخليهاش..ولكن ما باليد حيلة...

العمدة:واخة ياله نخرجو من هنا..

خرجو مجموعين ورؤيا مسكينة رجليها فاشلين وقفت حدا طوموبيلتهم وخوها جبد حوايجها حطهم حداهم هزهم صلاح ودارهم فالكوفر..وهي معنقة ماماها وكتبكي..

رحمة:سيري ابنتي..الله ينور طريقك ويسعدك ويجعل حياتك حسن منك..

رؤيا:اهئ تهلاي فراسك..

صلاح قنط دخل لطوموبيل وباع تبعو اما ماماه شافت فيها باش تحرك وهي رحمة طلقها..

رؤيا بقات غادية بزز دور تشوفيهم وترجع بحال شي وحدة غادية للحبس..حلات باب الطوموبيل وشيرات بيديها ودخلت قد قد مع حماتها...جلسو لور وصلاح دور الطوموبيل وسااق بسرعة...بقات غادية كدور وجهها لور وتمسح عينيها غي صوت البكى بهدوء لي مسموع...

لطيفة بقات شحال تشوفيها ولكن خافت لاتقرب منها..اما رحمة شداتها السخفة شدها غي ولدها كيهدنها ودخلها للطوموبيل..

بقات رؤيا حاضية الطريق وساكتة..كلما تهبط من عينيهة دمعة تمسحها بكلينيكس...تا وصلو للفيرما..

حبس صلاح الطوموبيل وعيط للخدام يجي يهز الحوايج من الكوفر..

طاهر:ماغطلعش؟؟

صلاح:لااا عندي خدمتي بلاتي ونجي..

خرجت لطيفة وموراها رؤيا لي سمعت هضرتو وجاتها عادية...

دخلت للدار موراهم وهو كسيرا ومشى..

حسناء كانت كتساين علا نار غي سمعتهم جاو مشاو تلاقاتهم وهي تشوف رؤيا..ماعرفت مادير..

رؤيا بهدوء:سلام..

حسناء:سلام..

لطيفة:حسناء طلعيها لبيتها ابنتي..

حسناء:واخة اماما..(شافت فيها)ياله معايا..

تبعتها رؤيا بلا هضرة حانية الراس..

طاهر مشى جلس ولطيفة حداه:لاحول ولا قوة الا بالله..

لطيفة:بقات فيك ياااك؟؟

طاهر عبس وجهو:واييه..مالي قلبي كافر..

لطيفة:تا انا ولكن مابغيتش نطول معاها خايفة تكون شي شيطانة وباغية تخرجها منا..

طاهر:لااا موحال..لي سمعتو عليها انها ضريفة وداخلة سوق راسها..وكتعرف بينها وبين الله..

لطيفة:اوا نتمناو...ولكن ولدي مسكين مقهور...

طاهر:ربي يصبرو وصاافي..

لطيفة:آميين..

دخلت رؤيا لبيت بعد حسناء:هادا بيتك..

تمات خارجة وهي رؤيا تقولها:شكرا..

حسناء هزت راسها زعمت عادي وخرجت..بدات تفكر وتقول مع راسها"كتبان ظريفة..ولكن لااا عائلتها قتالين مانقربش منها حسن ليا لاتكون راسمة الطيبوبة علينا"..

بقات رؤيا دور راسها وتشوف فالبيت ومشات جلست علا طرف الفراش وطلقت العنان لدموعها..كيغادير تعيش هنا..وفوقاش غتولف وكيغايكون هاد صلاك معاها..الله وأعلم..لمهم بقات تمنى ربي يسر امورها وخلاص..

صلاح مشى للمكتب لي فالاسطبل كيشوف السلعة لي ناقصة وهو دماغو تالف مع هاد الحريرة لي عايش فيها..عيى يحاول يركز فخدمتو ماقدرش..لاح ستيلو ورخى راسو علا الكرسي كيشوف فالسقف مغلغل..

أمين جالس فدارو بعدما خرج من الخدمة علا نااار...حس بلي قلبو كيضرو..ختو دبا تكون تزوجت داك الحسناوي..تا هز تيلي يصوني وتراجع ودخل ينعس كماعلله يرتاح..

رجعت رحمة للدار حست بلي خاوية بزااف..فينما تشوف تفكر بنتها...اييه بنتها خوات الدار ولكن ماشي حيت تزوجت وفرحانة..بالعكس حاسة وعارفة بلي رمات راسها فالعافية بسباب عائلتها ..وبلي ظروفها وشنو غتواجه ماعالم بيه الا الله..

حميد تا شاف مو دو وتبكي وسعدية وحادة كيهدنوها ويصبروها عاد طلع معاه القالب وخس بالغلط الكبير لي دار...شنو فيها لو أنو هناهم من داك العائلة..وفبلاصة مايجني علا ختو..يقتلهم كاملين ويدخل بعزو للحبس..تعصب بزاااف هز راسو وخرج من الدار كاره كلشي واكثر شي كارهو هو نفسو...

ناضت رؤيا كتستف فحوايجها وتقادهم فبلايصهم..تا أذنت المغرب ودخلات لحمام توضات وجبدت السجادة من عندها وبدات تصلي ..

لطيفة:بنتي طلعي عندها شوفي واش تهبط تاكل معانا!!

حسناء:وعلاش كتصافطوني غي انا..صافطيلها شي حد. 

لطيفة مخنزرة:طلعي وبلا ماتكثري هضرة..

حسناء طلعت منفخة دقات فلباب ماجاوباتهاش بدات تؤول من دماغها..

حسناء:اوا ياله...هاهي منخلاني..شتي الدسارة..

رجعت دقات بالجهد وفتحت لباب حيت تعصبت وهي تلقاها كتصلي فوق السجادة..بقات مربعة يديها كتشوفيها..

رؤيا:السلام عليكم..السلام عليكم..اللهم تقبل(جمعت الصلاية وشافت حسناء).سلام..

حسناء:جيت نقولك الا بغيتي ديري لكوطي؟

رؤيا بهدوء:واخة انا لبس صباطي ونهبطو..

حسناء باستغراب:نساينك!!

رؤيا:الا بغيتي!!

حسناء بقات واقفة بزز ورؤيا لبست دغيا وهبطت بحوايجها لي هما حوايج الصلاة..

حسناء كتشوفيها مستفربة..هبطو لتحت وهي تلقاهم مجموعين ناقص غي صلاح..

كلشي كيشوفيها جاية مور حسناء حشمانة وحانية الراس..

قربت حداهم:سلام عليكم..

طاهر ولطيفة:وعليكم السلام..

خالد غي مراقب جاتو بحالا كتمثل عليهم باش توصل لشي حاجة..جلست حسناء حدا خوها ورؤيا حدا لطيفة وطاهر فالراس ..بداو ياكلو فصمت...

صلاح كان قريب للدار..كلاكصونا وحلو ليه لباب..سطالا الطوموبيل وبغى يجبد ساعتو يديرها فيدو وهو يلقى عكار ديال آلاء فالطابلو حاطاه تما...عينيه حمارو وتفكر فاش ركبت معاه وكانت كتقاد راسها وهو كيضحك عليها. تزير وشعلت فيه العافية..ناض خرج وهو عاقد حجبانو...ودخل للدار...غي شاف رؤيا معاهم فالطبلة خرج عينيه ووقف بحال الرعاد...

طاهر:علا سلامتك اولدي..

رؤيا حانية راسها بحالا ماوقع والو..

صلاح مخنزر وقال بلا تفكير:نتييي....شكاديري هنا وشكون سمح ليك تهبطي لهنا؟؟

رؤيا سمعاتو ضربها الضو طلعت راسها فيه وكلشي كيشوفو فيه وفيها...حست بالحكرة والاحراج تعمرو عبنيها بالدموع..وحطت الماكلة من يديها بلا نقاش وناضت تطلع لبيت..جات دايزة شدها من ذراعها مزير بلا مايشوفيها...

صلاح:هاد المرة تبقاي تما...والا أناااا ما آذنتش ليك ديري شي حاجة..عمرك ديريها فهمتيييي!!!!

رؤيا بقات حانية راسها وكتسمع لهضرتو واخة تجرحت بزاااف وتقصحت فيديها حيت حافر فيها بصبعانو...هبطو دموعها وهي مويرة على عينيها..تا طلق منها ومشات بلا تا كلمة ..

طاهر ومراتو تصدمو فيه ..عمرو ماكان صلاح هكا..يمكن الظروف لي تحط فيها بدلاتو ولكن بقات فيهم لبنت..

خالد وحسناء ماقدوش يتدخلو حناو راسهم وكملو ماكلتهم..

صلاح بعصبية وغوات:آخر مرة نلقاها جالسة معاكم فالطبلة فهمتوووو...عمرهم يتقادو لكتاف والا بغات تاكل الكوزينة كاينة....

تاواحد ماحاولو يناقشوه وهو طلع لبيتو..

رؤيا دخلت لبيت مشات جلست فوق الفوطوي تبكي علا هاد الحال لي وصلتلها...حسات بكرامتها طاحت..خشات وجهها فيديها كتبكي وتشهق مسكينة...اما هو طلع لبيتو زدح لباب تا كان غيتفرع..ودخل دوش باش يبرد جنونو..

حميد وصل لبار كيحاول ينسى همو..مشى جلس فالكونطوار وطلب شي حاجة ثقيلة تنسيه..بقى يشرب ويتنهد تا جات حداه بنت بوكوصة لابسة كسيوة حمرا لاصقة..

لبنت:مالك مضيقها براسك ا بب؟؟

حميد دار شافيها:بب؟؟

لبنت شداتلو يديه لي فيها لكاس:اممم بب مالها جاتك عجب؟.

حميد حيت ماموالفش بهاد الاماكن ومازال عندو عقلية رجعية جاتو فشكل:كتعرفيني اختي؟؟

لبنت طلقت ضحكة سمعها كلشي:ههههههههههه ختي؟؟؟

حميد عجباتو ضحكتها بقى متبعها بعينيه:شكون نتي؟؟

لبنت:انا سميتي يارا...ونتا؟؟

حميد:يارا؟؟سمية فشكل عندك...اممم انا سميتي حميد..

يارا:اووو حميد سميتك قديممممممة ا بب هههه..

حميد عكرش فيها وهي تلعبلو فشعرو وضحكت معاه:كنضحكو ا لحب هههه..

حميد كتجيه صدمة مور صدمة بكلامها لي ماموالفش عليه..

يارا:شنو ماتعرضش عليا؟

حميد بسم:كلشي ديالك هههه..

يارا عجبها الحال:اممم ميغسي بب ههه..

حميد عرض عليها وماخلا ماجاب ليها..وهي جالسة ومفشة عاجبها الحال...

خرج صلاح من الدوش لبس سروال كحل وتيشورط فنفس اللون جاه واعر..خرج من بيتو ودار شاف جيهة بيتها ورجع مشى عندها وحل لباب بلا سابق انذار...

كريم شداتو القنطة مالقى مايدار..ناض ووقف فالبالكون بقى متكي علا الصور وكيفكر تا سمع صوت نجية كتغوت..

نجية طالسة فلبالكون لفوق:اداااك القردة..جيبي ليا طبسيل صغير فين نقي الجلجلان..

مريم كتغسل الماعن:واخة ا ماما هانا جاية..

كريم بقى واقف كيساين شنو يوقع..

مريم جات بزربة كتمسح يديها فبيجامتها وعطاتو لمها..

نجية:شو شووو البوهالية..مالك كتمسحي فحوايجك..واش مازالة مومو صغيرة نبقى نعلمك؟؟الشحطة لوخرا...

كريم بدا يضحك..

مريم:وا غي الزربة ا ماما..

نجية:نتي ديما مزروبة ابنت الحرام...تقول تابعينك الاشغال ونتي بيطالية من ديما...

يامنة دخلت علا غفلة:كريم اش كدير هنا..قلبت عليك تا عييت...

مريم سمعاتو كاين سرطت المصران بزبلو وخرجت معصبة ديما كتبزدا حداه..

نجية:اجي لهنا فين مدرما اوجه اللفت...

مريم دخلت دارت راسها ماسمعاتهاش..

وكريم عرفها دخلت حيت مارضاتش جاتو الضحكة ودخل مع يامنة لداخل..

فتح صلاح لباب بالجهالة وهو يلقاها كتقرا القرآن فالقنت..زدح لباب ودخل كيتمنظر فلبيت ومشى وقف عند راسها...

رؤيا شافتو دخل خافت بدات تكمل الصفحة باش توقف وتشوفو شنو باغي...

رؤيا شدت القرآن وبقات حانية راسها..

صلاح باستهزاء:لااا كتعرفو بينكم وبين الله...

رؤيا خنزرت فيه ووقفت قبالتو ولأول مرة غتهضر:شنو بغيتي؟؟

صلاح بسم ودار شاف للجنب وكيهز يديه تالسما ونزل عليها بتصرفيقة تا طاحت لأرض...حست بالحكرة والظلم وهي شادة فحنكها لي تبنج بالضربة حانية راسها ماراضياش تبكي حداه...وهو ينزل عندها جرها من فولارتها وشعرها مطلعها لعندو..

صلاح:اممم تحليك اللسان...اصلا ماغتقديش تبقاي دفعي ديما الصورة ديال البراءة..ضروري ماتبان حقيقتك ابنت الطراشن..

رؤيا مصبرة راسها حداه واخة الدموع فعينيها:هادا جهدك؟؟

خنزر فيها حيت كتحداه واصلا هو خصو غي السبة...رجع زير علا شعرها بيديه وبدا يصرفق فيها وماحبسش..بقى يضربها بيدو لوجهها وعاوتاني بظهر يديه وكلما كتكون غطيح كيشدها ويرجع يضرب بلا رحمة كيشوف بين عينيه بلي هما سبابو فموت مراتو ومامنتابهش لحالتها وهي كتألم تا طاحت لأرض هو كيدخل ليها العصى وساكتة.واخة الألم لي كتحس بيه تجاوز أي ألم..وهو غي مازايد فيه وكملها برجليه هزها مع كرشها تا بدات تحس بالدوخة وهو كيزويها.. مكمشة وكتصبر راسها ماباغية تطلع تا صوت ووجهها زراق والدمايات خارجين من فمها ونيفها...شوية وهو يحبس كينهج وصدرو كيطلع ويهبط من الاعصاب والعيى سيغطو انها ماحاولاتش توقفو ولا ترغبو ولا يحس بلي فري كتألم...تنهد ورجع خنزر فيها وحنى عندها جرها من الفك ديالها باغي يستافزها ثاني وهو كيهضر تحت سنانو

صلاح:شتي اناااا..الا شديتي معايا العكس ماغتلومي غي راسك..فهمتييييي...(لتخها لأرض)..

رؤيا تقصحت بزااف ولات تشوف غي الضبابة والدموع فعينيها.. حاسة بلي جسمها كلو مدكدك...

صلاح وقف كيمسح علا لحيتو بابتسامة شر:هادي غي البداية...(صغر عينيه)شتي .بمعزت هاديك لي ماتت لا شفتي معايا النهار لبيض...غنخليك تندمي ألف مرة علا قبولك الزواج...وعلا مجيك لهنا...عقلييي مزيان واخة!!(دار يمشي وخرج من البيت...زدح لباب تا كان غيطير من بلاصتو)..

رؤيا متبعاه بعينين مدمعين..وماكرهتش تنفاجر بالبكى وتسبو ولكن من الافضل تبقى ساكتة..حسات بلي صاافي تسالات حياتها..مابقى عندها لا مستقبل ولا أمل..

..نفسيتها وجسمها كلاو الدق مزياااااان...بقات سخفانة كتكح وشادة فكرشها لي كتحرقها بالضرب لي كلات ووجهها ماقاداش تقيسو بيديها...استسلمات للألم وبقات فبلاصتها ما محاولاش تحرك..

صلاح هبط شاعل داز من حداهم يديه فيهم الدم وعينيه حومر مخنزر...

طاهر جاه تخوف غريب بدا يعيطلو:صلاااح صلاااح...

صلاح خرج من الدار وزدح لباب متاجه لطوموبيلتو ديمارا وطااار ماشي كسيرا...

الكارد حلو ليه لباب كيجريو باش مايجي يكمل بيهم عرفوه مقلق...

طاهر وقف:لاااا حالتو ماعجباتنيش...نوضو شوفو لبنت لفوق..

لطيفة:علاش زعما!شنو غيكون دار؟؟

طاهر:ماعرفت..طلعي نتي وبنتك شوفوها وطمنو عليها...

لطيفة ناضت:واخة...ياله ا حسناء...

حسناء نفخت:واااخة...

طلعو كيدقو..ماحلاتش ليهم ولا بمعنى اصح ماقداتش تنوض كانت ماكتقدرش تحل عينيها ولا تحرك..ختارت تغيب علا العالم الخارجي وتبقى فبلاصتها بلا حركة..

لطيفة دخلات معاها:فين هادي؟؟

حسناء:لاتكون كتصلي بحال قبيلة..

لطيفة:اوا نحلو نشوفو...

حلو لباب ودخلو مابانتش ليهم..

لطيفة:هاااء فين مشات؟؟تا الحمام خاوي...

حسناء دورت وجهها تا كتشوفها مليوحة لهيه حدا الفوطوي لي من جيهة الحيط..

حسناء تشوكات فاش شافت وجه رؤيا مضروب وسخفانة مشات كتجري عندها:اويلي..شنو وقعلك؟؟

لطيفة دارت يديها علا فمها مصدومة...

طاهر وخالد طلعو كيجريو بعدما عيطت عليهم حسناء وهي كتغوت...

طاهر وصل حدا لباب كيلهث:مالكم؟؟

خالد واقف موراه حشمان يدخل..

لطيفة:عتقونا هزو معانا لبنت..

طاهر قرب وهو يتصدم:لاحول ولا قوة الا بالله..

زاد حداهم خالد وهو يشوفها فداك الحالة تصدم:نارييي حيدو حيدووو نحطها ففراشها..

كحزت حسناء خايفة وماماها كتعاونو...

حطوها فالفراش وهي ماكتهضر ماكتحرك عينيها كيشدو بلا ارادتها..

طاهر:عيطو لطبيب يجي يشوفها..

خالد:لا ماكاينش لاش..نمسحولها وجهها ودبا تبرا..

طاهر خنزر فيه:واش نتا مسلم ولا يهودي...تخيل معايا ختك كون كانت هكا شنو غدير(خالد حنى راسو)ياله سير عيط لطبيب بزربة وبلا كثرة هضرة..

لطيفة:الله ياربي ولدي صلاح ماعرفن فين مشى...

طاهر تعصب:عاد كتسولي عليه...داير موصيبة قد راسو وخايفة عليه..هاداك ولا الخوف منو..

حسناء:صاافي دبا الله يخليكم..خليوها ترتاح تا يجي الطبيب(غمرت ماماها يسكتو باش رؤيا ماتسمعهمش)..

يارا جالسة حاطة راسها علا حميد وهو عجبو لحال اول مرة توقعلو..

يارا علات راسها وشافت فيه كتحلون:شنو نمشيو عندك ولا عندي؟؟

حميد باستغراب:عندي فين؟؟

يارا:دارك!!.

حميد تخلع:ء لاااااا...لواليدة تماك..

يارا:اوا شنو غنديرو؟؟

حميد:علا ماعندك فين تباتي!!

يارا ضحكت:هههههههه نتا علاااام..غي قولي واش مازال شي حد بحالك كاين فالدنيا!!

حميد شرب وبقى يشوف بعيد:يمكن هدا هو المشكل!!

يارا بجدية:كفاش؟؟

حميد:نساااي...لمهم شنو بغيتي قولي نيشان..

يارا حطت يديها علا كتفو ملهيه خاشية راسها حدا عنقو:بغيتك نتا..

حميد شعلت فيه العافية..مولاي السلطان قلز راسو..وهي حست بيه تزنك..بسمت وباستو فخدو..

يارا:ياله معايا...

ناضت وجراتو وهو حبسها تا خلص عاد تبعها بحال شي ضبع..

خرجو ركبو الطوموبيل وهي لي كتكيديه باش يوصلها فين بغات..

صلاح وصل حدا الحافة لي كان فيها داك النهار والظلام بزاااف...خرج شاعل ضو ديال الطوموبيل كيتمنظر فالسما وساكت..ماعارفش واش دار شي حاجة مزيانة ولا لا...لمهم ماعارف والو...

الطبيب جا وطلعو خالد لفوق...

طاهر:دخل اولدي مرحبا...

دخل الطبيب وهو يتصدم بمنظر لبنت لي فوق الفراش..

طاهر:ياله ابنتي..خلي ماماك معاها وحنا ياله نخرجو..

الطبيب:شنو وقع؟واش تعدى عليها شي حد؟؟

طاهر كان ياله خارج:لمهم تعاونها تولي لاباس..

الطبيب حتارم الهضرة ديال طاهر وسكت..طلب منهم يجيبولو أدوية يمسح بيها ويضمدلها الجروح..

لطيفة جالسة مع جنبها حاضياها أما رؤيا كانت بين النعاس والفياق تا بدا يداويها وهي تبدا تقصح وتقفز بالحريق...

لطيفة تأسفت عليها..شافت دموعها هابطين مع جبهتها فصمت..كأنها خايفة تغوت ولا تبكي بالجهد وهدا دليل بلي مقهورة بزاااف وخايفة..

الطبيب كيعالجها وعارف راسو كيقصحها تألم من جيهتها..شافها كتهز فالسما وماكتهضرش غي شوية ديال الدموع كيعبرو على كلشي...

الطبيب:لا حول ولا قوة الا بالله...

لطيفة شافت فيه ورجعت شافت فيها عاذراه علا كلامو..حيت واخة طتبغي ولدها وخايفة عليه ولكن شايفاه كيظلم بسبب مشكل وظروف كيعاني منها..واصلا كتبقى انسانيتو هي لي كانت مزيناه والا فقدها غيضيع هو قبل من أي واحد..

خالد هز تيلي كيصوني عليه والو ماكيجاوبش...وفري صلاح كيشوف تيليفونو كيصوني وكيخبعو فجيبو..محتاج يبقى بوحدو بلا تأنيب ولا كثرة هضرة..من الافضل يبقى بعيد علا كلشي هاد الساعة ويرتب اوراقو...

الطبيب جبد مهدئ من الكاغطابل وضربو ليها ابرة فذراعها..بغاها تنعس وترتاح حسن ماتبقى كتألم..

لطيفة كتشوف وساكتة حداهم...تا ناض يخرج وانتابهت لرؤيا عينيها تغمضو وترخات عاد خرجت معاه باش يطمنها عليها...

فهاد الاثناء كان طاهر وخالد وحسناء جالسين علا برا فصالون صغير حدا بيوت النعاس فين كاين الدروج منين كيطلعو..غي شافو الطبيب وقفو..

طاهر:امدرا دكتور؟داويتيها!!

الطبيب:وي دبا عطيتها مهدئ غدا انشاءلله تصبح شوية..ولكن لي فوجهها خصو مدة باش يزول..(جبد كايي لوغدونونص وبدا يكتب)هادو أدية تدهنهم ومن الأفضل مين تكون دايراهم ماتشوفش الشمس باش يصفى وجهها دغيا..

خالد خدا الورقة:واخة ا دكتور؟؟ولكن ماعندهاش شي ردود لداخل؟؟

الطبيب بهدوء:الردود لي عندها ماشي لداخل فجسمها...عندها لداخل فالنفسية ديالها..لمهم انا عطيتها ابرة مهدئ ماغتفيق تالصبح كماعلله ماتحسش بالحريق بعدا...

طاهر حنى راسو:شكرا اولدي وسمحلينا عذبناك فهاد الوقت..

الطبيب:عادي ا لحاج..مرحبا فأي وقت هادي خدمتي...تصبحو علا خير ..

طاهر:تا نتا اولدي...

خالد هبط مع الطبيب وصلو وعيط لواحد من لكارد يجيبلو الدوا لي كتب الطبيب..

لطيفة:مازال ماجا صلاح؟.

طاهر دور وجهو معصب:يديرها ويهرب حشمنا مع الراجل تفوووو...

حسناء:ودبا شنو غنديرو؟؟

طاهر:وحدة فيكم تبات معاها لا تمشي تفيق وتحتاج شي حاجة..

لطيفة:نبات انا يمكن...

حسناء:لااا اماما غي خليك..انا نبات حداها..الا حتاجت شي حاجة نديرهالها..

طاهر:الله يكملك بعقلك ابنتي...

حسناء:انا نمشي عندها..

لطيفة:تا تعشاي..

حسناء:لا غي كولو مافياش واصلا ماكنتعشاش..

طاهر:واخة سيري..

مشات حسناء لعندها وبقات تشوف شحال فالزروقية لي فوجهها فكرت لو انها هي لي تزوجت واحد فولاد الطراشن يقدر كون وقعليها هادشي..حست بلي رؤيا مظلومة ولكن مابغاتش تطلق معاها الطبيعة خافت منها ومن المعدن الحقيقي ديالها..

طاهر جلس كيرتاح وحداه مرتو..

طاهر:عجبك شنو دار؟؟

لطيفة:لااا ولكن ماعرفنا شنو طرا بيناتهم..القاضي كيسمع من جوج ا طاهر..

طاهر:تا حاجة ماتعطيه لحق يديرلها هكاك..واخة دير لي دارتو...وبيني وبينك انا شايفو وحاس بيه جابها يبرد جنونو وينتاقم لموت آلاء ولكن هادا ماشي عدل..

لطيفة:ولدنا محكور ومقصح..واخة تعيى ماتنصحو ماغاديهاش فيك ..نتا عارف راسو قاصح بزاف والا بغى يدير شي حاجة كيديرها..

حميد وصل يارا لأوطيل مرون شي داخل وشي خارج..

حميد باستغراب:غتباتي هنا؟؟

يارا عنقاتو:غنباتو هنا...

جراتو معاها ودخلاتو لبيت وشدات لباب...

سعدية:خالتي رحمة...كولي من الصبح ماكليتي والو..

رحمة كتشوف فالماكلة:ماقديتش ابنتي خوااات عليا الدار اهئ اهئ..سبحان لي كيعمرها ويخويها فدقيقة..

سعدية بحزن:باراكة عليك اخالتي من البكى...ربي كبير ودبا تفاجا..

رحمة بألم:لااا ابنتي..قلبي مقبوط عليا..حاسة بلي رميت بنتي فالعافية..ندمت اهئ اهئ ماكانش خصني نزوجهالهم..محمد كون بقى عايش عمرو يحط يديه فيديهم..

سعدية:دبا كتاب المكتاب...زايدون ماعرفتي ربي يسخر ليهم..بلا ماتحمقي راسك ويجيبهابك الشيطان عوجة..دعيلها وانشاءلله مايكون غي الخير..

رحمة:ونعم بالله...ياله جلسي كولي معايا شوية..مابغيتش نبقى بوحدي تا حميد مابان. 

سعدية:واخة اخالتي ناكل معاك غي كولي ههه..

صلاح ركب طوموبيلتو بعدما تكالما شوية..بقى سايق بهدوء كأنو خرج شي حاجة من داك الاعصاب لي عندو لداخل ولكن واخة هكاك مازال مارتاح...مازال كلما كيتفكر آلاء وموتها البشعة كيولي بحال شي وحش وتا واحد مايقدر يحبسو...

يارا جرت حميد لفوق لفراش وفدقيقة نصلت حوايجها حداه وبقات بدوبياس وهو غي جالس مشلوط فيها..وهي تقرب وفرقت رجليها جلستلو علا حجرو وهزات يديه حطتها علا المؤخرة ديالها ولوات يديها علا عنقو وطيحاتو علا الفراش عينيه مضبعين وحالتو حالة...

وصل صلاح لحدا الفيلا..حيد الكونطاكط وحبس الطوموبيل ساكت وكيشوف جيهة لباب...الكارد كيشوفو فيه مفهموش مالو..ولكن هو خرج كأنو عمرو دار شي حاجة..زدح لباب ولاح السوارت لواحد فيهم باش يقادوها فالكاراج..

فتح لباب بهدوء ودخل كيشدها بالشوية عليه...

طاهر غي سمع صوت السوارت خرج من الصالون ولطيفة معاه..

صلاح تم طالع لبيتو..حبسو طاهر بكلامو..

طاهر:اييييه نتا...هبط عندي هنا...

صلاح دار وهبط كيهضر ببرود:مافيا لي يهضر ء بواليد..خلي للصبح حسن..

طاهر بعصبية:اينا صبح...واش نتا خليتي ل ليلنا شي صبح!!..(صلاح كيشوف مع جنابو)..واش ماشي حشومة لي درتي(صلاح كيقاد ساعتو ويشوفيها وطاهر تعصب)..شووف فيا هنا....واش هاديك ماشي بنادم لي درتي فيها داك الحالة؟؟مين هكا ماتزوجش..بناقص كاااع تقتلها ونوحلو فيها ثاني...

صلاح حك صلعتو:دبا شنو بغيتي؟؟

طاهر غوت ولطسفة كتبردو:ةاش مازال كتسول!!..شوووف اخر مرة تقيس فيها لبنت غتمشي فيها فهمتي؟؟

صلاح شافيه بجدية:هاديك مرتي اناااا...وانا حر ندير فيها لي بغيت....تصبحو علا خير..(سمح فيهم وطلع)

طاهر تغلغل وهي تشدو لطيفة:لحاااج صاافي تهدن...كتشوفو كفاش داير راه ماصالحش تهضر معاه دبا..ياله نعسو يصبح ويفتح..

طاهر سمع الهضرة ودخل مع مراتو بحرا يبرد اعصابو لي تحرقو هاد اليوم..

طلع صلاح وداز لبيت رؤيا..حل لباب وهو يشوفها ناعسة وحداها حسناء..علا حاجبو ..

حسناء كانت كتشوف فتيلي غي شافتو تقادات فالجلسة:خويااا..

صلاح ببرود:غتباتي هنا؟؟

حسناء تلفت:ءء لا الا بفيتي اجي وانا نهبط غي كنت م...

قاطعها:لا غي خليك..(تم خارج ورجع شافيها)ولكن اخر مرة تنعسي هنا...فهمتي؟؟

حسناء هزت راسها بالايجاب وهو شاف فرؤيا كانت ناعسة ووجهها مزوق بالعصى لي كلات من عندو..

صلاح:من فوقاش وهي ناعسة هادي؟؟

حسناء بالحس:مين جا الطبيب وعطاها مهدئ باش ترتاح تالصبح..

صلاح باستهزاء:اممم جبتولها الطبيب..ما جبتوش تا لبوليس!!

حسناء كتشوفيه مالقات ماتقول وهو دار وخرج زدح لباب تا قفزت حسناء وجاب الله رؤيا واخدة مهدئ قوي اما كون تاهي فاقت..

حميد تلاح علا الفراش عريان كينهج ويارا جرت ليزار عليها كتعض شنايفها وتلحسهم..

يارا:اممم ماشي ساهل ههههه..

حميد حط ذراعو علا جبهتو ومغمض عينيه.بسم حيت عجبو الهضرة لي قالت رجع شافيها..

حميد:عجبك لحال؟؟

يارا دارت عندو كتلمس فوجهو:اااح عليك..كيبان ليا كنتشاوفو بزااف...

حميد جرها عندو:وشكون قالك انا غنخليك؟؟

يارا طلعت رجليها مع فخدو وهو يتزنك حس بالحرارة من جديد..بدات تلعبلو فشعرو ولحيتو لخفيفة..

يارا:كيعجبوني الدراري بحالك...كيكونو جداد وصحاح ولذاااذ بزااف.(حميد جا يبوسها هربت منو)..نوض تمشي..

حميد جرها عندو:دفيا سخيتي بيا؟؟

يارا:لااا غي مابغيتش الثمن يضوبل عليك..

حميد خشاها تحت منو كيشوفيها بشهوة:جيبي واجد غي برعيني..(باسها بشغف)انل كلي ديالك..

يارا طلقت ضحكة مشوهة:ههههه الا كان هكا واخة..(طلعت ليزار عليهم وجراتو لعندها)..

رحمة جالسة كتساين ولدها يجي..وسعدية بقات فيها..

سعدية:خااالتي..نوضي ترتاحي..باراكة عليك من السهير..

رحمة:حميد ابنتي تعطل بزااف..عمرو دارها..

سعدية:تلقايه مع صحابو وصافي...نوضي حطي راسك راك من الصبح ونتي فالمشاكيل..

رحمة حدرت راسها:واخة ابنتي يمكن عندك الحق..اصلا حميد تبدل بزااف مين مات باه..الله يهديه وصاافي..

سعدية شدتها من يديها كتوصلها:آميييم اخالتي...

أصبحنا وأصبح الملك لله...

فاق حميد بالشوية كيلبس وقدامو يارا ناعسة علا كرشها وعريان ظهرها..بسم وجبد بزطامو هز الفلوس بزايد وحطها ليها مع لاكارط فيسيت ديالو..خرج من تما ماهضر معاه حد حيت اصلا مازال بكري..حرك طوموبيلتو ومشى ناشط ناسي كااع همومو كأنو كان محتاج يفرح القريد باش يرتاح نفسيا من الضغط لي كان عليه...

ناض صلاح من بلاصتو كيحك حدا شنايفو ولابس غي شورط قصير..دخل للدوش طلق الرشاشة وتخشى تحت منها كيفكر فطريقة تعذيب جديدة..مازال مابرد خاطرو..خصوصا فاش شاف عائلتو حنو عليها...بغى يزيد يعذبها باش ماتحلش علا جناب الوصالي..

فاق كريم شابع نعاس...دوش وخرج يجيب باش يفطرو هو ويامنة لي ولفها بحالتها وبنسيانها...زدح لباب وهبط تا كيشوف فالدرب مريم واقفة مع شي بنت..داز راسم ابتسامة خفيفة...وهي خولة تنقز..

خولة بالجهد:هادا جاركم الجديد ياك ا مريم؟؟

مريم شافت لقاتو جاي رجعت دورت وجهها لعندها:اييه ومن بعد...

كريم داير نظاظر الشمس:صباح لخير..

خولة داخت فيه:صباح نور..(بدات تعرف براسها)انا خولة..جارتكم مقابلاكم هنا فالدار الثانية قبالت الدار ديالكم ياك تا نتا ساكن فالثانية؟؟

كريم شاف فيد مريم:هاد الباكيط زوين منين شريتيه؟؟

خولة نزل عليها الزيت بحالا ماسمعها ماشافها..

مريم خنزرت فيه:راه فالمخبازة...(سمحت فيهم ومشات تطلع)

كريم عرفها محشمة حداه جاتو الضحكة عليها..بغى يمشي حبساتو خولة..

خولة:الا ماعارفش المخبازة نقدر نوريهالك!!

كريم شافيها:صاحبتك مشات!!..(خولة مترقبة بابتسامة)..اوااا تبعيها...(سمح فيها وزاد خلاها بحالا خرات وجلست عليه حاشاكم خخخخ)..

اما مريم كانت كطلل عليهم بهدوء..ماحسوش بيها تا مشى كريم عاد طلعت كتصغر عينيها..

خرج صلاح من الدوش لبس وتعطر علا خاطرو وضرب كاسكيط واعر مع تيشورط كحل وسروال جينز..

رؤيا بدات تحل عينيها بزز..حاسة براسها ثقيلللل..وواخة هكاك كتحاول تحرك واخة ذاتها مدكدكا..للحظة داز سيناريو لبارح بين عينيها..تركنت فبلاصتها كتشوف فالسقف ورجعت تنهدت وناضت واخة كتوجع شوية من البلايص لي كلات فيهم العصى..

حسناء حست بالحركة ناضت وشافتها وهي كتحاول تنوض..

حسناء:صباح لخير...

رؤيا:صباح لخير..(جلست بالشوية كتلبس صندالتها باش تنوض)..

حسناء كتحك راسها:كيصبحتي؟؟دبا شوية!!

رؤيا:حمدلله..شكرااا..

حسناء:خليك مرتاحة انا نقولهم يطلعولك ماتاكلي واخة؟؟

رؤيا:لي بغيتي..لمهم نوض نطرف حالتي دبا..

حسناء:واخة..

ناضت رؤيا دخلت طرفات وتوضات وخرجت تصلي اما حسناء كانت مشات لبيتها تغسل وجهها وتوصيهم علا الفطور لرؤيا..

صلات رؤيا كدعي الله يخفف عليها خصوصا فاش شافت كمارتها تبهدلت فالمرايا..وطلبت يكون العذاب مهون عليها...جمعت صلايتها ورجعت جلست فبلاصتها جامعة رجليها وساكتة كتخمم..تا سمعت لباب تحل وهو يدخل عندها..بلا ارادتها قلبها بدا يضرب فالميا وهي كتشوفو كيقرب وداير شوفات فشكل..

صلاح باستهزاء:حمدلله مازالة عايشة..مامتيش ياااك!!

رؤيا الصمت وماحدو كيقرب وهي كتزيد تكمش..تا حس بيها خصوصا فاش زاد لوجهها حاني عندها ومخنزر..بعدت بلا ماتحس..

صلاح بضحكة شريرة:ماتخافيششش..ماغاديش نضربك دبا(شاف فساعتو)حيت ماعنديش لوقت الكافي الصراحة..وباغي نخلي الاستمتاع لليل حسن ياااك!!

رؤيا عينيها دمعو وكتجمع البكية..تا صونا ليها تيلي بغات تهزو حيدو من قدامها..

صلاح:اوووووو ماماااك..عندها احساس قوي مسكينة...لاحول الله...خدا تيلي ورؤيا مصدومة ماعارفاه شنو غيدير قرب حدا لبالكون ولاحو علا الجهد..هنا رؤيا تحلو عينيها وحست بالطعنة فقلبها..باغي يحرمها تا من أقرب الناس ليها..حست بالجبروت ديالو طغى كثر..حنات راسها ودموعها بداو يهبطو..

صلاح:مشااات ماماك..بقالك غي انا..ودبا تصنتي علا عظامك وبراي دغيا..حيت شهوتي نزرقهملك مرا خرا...

علا حاجبو وخرج ..شد لباب ومشى..هنا رؤيا حنات علا ركابيها كتبكي وتشهق بحال شي حمقة صاافي وصلات بيها للعظم..كرهت النهار لي جات لهنا حيت ماكانتش كتوقع هادشي كلو كيساينها مع هاد الوحش...

هبط صلاح كيصفر مع راسو كأنو متلذذ بتعذيبها وكيرتاح فاش كيشوف دموعها..جلس فالطبلة يفطر بكل هدوء..والعائلة جالسين مستغربين من المنظر ديالو...

خالد:ليوم خصنا نمشيو نشوفو الارض..حيت بدا يبان ليا بلي الما ديال العين بدا يقلال..خصنا نشوفو واش غيكفينا تا تصب الشتا ولا لا..

صلاح:اوك تا انا نمشي معاكم..بغيت نشوف الأرض..وشنو ناقصها..

طاهر:واخة سيرو وعلموني بالجديد نفكرو فشي حل..

خالد:وااخة..كون هاني ا باااا...

حسناءهازة لبلاطو وطالعة بيه..

صلاح خنزر ودار عندها:ايييي نتي فين غادية؟؟

حسناء كتفتف:غ غادي نطلع الفطور ل لرؤيا ..

صلاح وقف مربع يديه:وشكون قالهالك؟؟

حسناء كتشوف فيه مترددة تطلع ولا تهضر..

طاهر وقف وهضر بحزم:طلعي لفطور ابنتي وعطيها دواها..

صلاح شافيه ورجع حدر راسو احتراما لكلام باه..وخرج حيت ماراضيش يخليهم يعاملوها مزيان ..

خرج خالد تبعو دغيا ومشاو يشوفو الارض..اما حسناء دخلت عند رؤيا لقاتها كتبكي حانية راسها..حطت الصينية بزربة ومشات عندها..

حسناء:مالك ياك لاباس؟؟

رؤيا:اهئ اهئ...

حسناء شدتها من راسها:مالك واش كتحرقك شي حاجة؟؟

رؤيا طلعت راسها عينيها حومر بالبكى وعنقتها..اه عنقتها حيت حست بلي هي بوحدها..ومحتاجة لشي حد تخبى فيه وتحس بيه جنبها..

حسناء بقات دوز يديهت عليها مخلياها كتبكي وتنخصص مسكينة تا سكتات..وحيدت راسها حشمانة..

رؤيا كتمسح عينيها:سمحيلي!!

حسناء:علاياش...لمهم تكوني بيخير!!.رؤيا كتشوف فالسما وتمسح نيفها وعينيها بظهر يديها:الحمدلله...

حسناء:شنو وقع؟واش ضراتك شي حاجة؟؟

رؤيا:لا غ غي توحشت ماما...بغيت نهضر معاها..ممكن؟؟

حسناء:اه هضري معاها علاش عاد كتسولي؟؟

رؤيا:تيلي مشالي الا عندكم فيكس جيبيه ليا نطمنها عليا غتكون خايفة..

حسناء بابتسامة:واخة انا نمشي نجيبولك ونجي...

رؤيا بابتسامة:شكرا..

حسناء بسمت ومشات بزربة طلبات اذن باباها وهو عطاه ليها طلعاتو..غي شافتو رؤيا رتاحت..خداتو وضربت النمرة..وفاش بغات حسناء تخرج بينت ليها غي تبقى حداها عادي...

رؤيا:الو ماما...

رحمة بخوف:ب بنتي...حمدلله لي سمعت صوتك من قبايلل وانا نصوني..

رؤيا عينيها دمعو:غ غي تيلي طاح ليا ومابغاش يخدم...

رحمة:اممم اوا خودي واحد آخور..هادشي الا بصاح كان طاحلك!!(لغة تشكيك).

رؤيا:واخة ا ماما ظبا ناخدو..طمنيني دبا عليك..

رحمة مابغاتش تزيد تقلقها:حمدلله ابنتي لاباس..ونتي و وراجلك والجو تما كيداير؟؟

رؤيا:حمدلله ا ماما.(كتمنع الدموع يهبطو ليها وحسناء جالسة كتشوفيها)كلشي مزيان..غي توحشتك بزاااف(عيات صابرة وبدات تبكي)اهئ اهئ...

رحمة قلبها طايب:ماتيكيش ابنتي اهى اهئ..دبا تولفي فدارك انشاءلله..

رؤيا:انشاءلله ا ماما..ياله اماما نخليك دبا ودبا نبقى نصونيلك مرة مرة علاما نشري تيلي جديد..

رحمة:انشاءلله ماتغبريش ابنتي..وهاهي نمرة عندي الا طولتي عليا نصوني ونسول فيك..

رؤيا:بلاش..انا دبا نصونيلك..

رحمة:واخة ابنتي لي بغيتي...تهلاي ليا فراسك ومولي مزيان ونساي الهم..

رؤيا بألم:انشاءلله تا نتي...بسلامة..

قطعت معاها ومسحت عينيها لي من نهار مات باباها وهما طايبين بالبكى..عطات تيلي لحسناء..

رؤيا:شكرا بزااف عمر خيرك مانساه ا خيتي..

حسناء:مادرت غي الواجب..هاكي بعدا فطري..باش مايبرد..

رؤيا:لا بلاش ماقاداش!!

حسناء:لااا هصك تفطري باش تشربي دوا لي عطاك الطبيب..ياله بداي بابا وصاني عليك..

رؤيا بسمت وبدات تاكل بزز:واخة..

وصلو خالد وصلاح للأرض بلا هضرة..هبطو كيشوفو شنو كاين وفري لقاو الارض ناقصها ما والسيتيرنا لي كانت كتزودهم مابقاش فيها بزااف..

صلاح:بلاتي دبا هاد الارض مافيها لا عيون لا آبااار؟؟

خالد:لي عارف هو هاد الحيهة لي هنا كانت فيها شي عين ونشفت مع الوقت خصوصا فاش قلالت الشتا..

صلاح:اوا شنو المعمول..ارض فلاحية بلا ما شنو غتولي؟؟

خالظ بأسف:صحرا...الا ادا بقينا نجيبو الما ليها ونسقيوها بيدينا..

صلاح تأفف:مشكلة هادي...ونيت هاد العام كانت الشتا قليلة..

خالد:ولكن الاراضي كتخزن الما..ضروري مايكون شي بلاصة جامعة الما غي خصنا نكتاشفوها..

صلاح:اوا خصنا نعرفوها...اكيد غنحتاجو لخبير باش يقلب علا هاد البلاصة لي فيها الما..

خالد:تا هادي فكرة..لمهم هاد الموضوع عند نتا تكلف..

صلاح:اوك جاتك...

يارا فاقت كتلوى مع ليزار وتكسل تا كتحل عينيها كتلقى لي كان حداها ماكاينش..تصدمت حست بلي زرب عليها ومشى..حيت عمرها وقعت ليها..ناضت جارا ليزار علا صدرها مخلوعة تا كتشوف رزمة ديال الفلوس فوق كسوتها المحطوطة علا طابل دونوي..حلت عينيها وبدات تحسب لقات ألف وخمسميات درهم عجبها الحال هزاتهم كضحك سيغطو فاش لقات لكارط فيسيت عرفات راسها عجباتو وباغيها نهار آخور..خبعاتو فبزطامها وناضت تدوش وتلبس حوايجها..

حميد رجع للدار ومشى نيشان لبيتو..رحمة حسات بلي جا طلعت عندو..

دخل هو للدوش كيغني وفرحان"نتيا ماشي بحالهم.هضاضايضاي ماشي بحالهم..."..دخلت رحمة شافت الدوش خدام رجعت خرجات كتسناه تايسالي وتهضر معاه..

رؤيا رجعت تكات حيت فجميع الاحوال صلاح مانع عليها الخروج من لبيت..

اما حسناء هبطت تفطر وداك المنظر ماحيدش من بالها...

لطيفة انتابهت ليها:مالك ابنتي فاش كتفكري؟؟

حسناء:بقات فيا رؤيا بزااف اماما..خويا باينة حيد ليها تيليفون..وهي باغية تهضر مع ماماها.وفاش هضرو قطعت ليا قلبي...واخة يكونو اعدائنا ماخصناش نقساو عليها هكا..

لطيفة:اوا الموجود الله ابنتي..هادشي خوك سبابو..هو لي باغي يحط اللوم علا داك لبنت..بحالا هي لي شافها كتقتل مراتو..لمهم دبر راسهم..عاوديلي شنو قالت هي وماماها..

حسناء بسمت علا فضولها وعاودات ليها كلشي..

خرج حميد من الدوش لبس وتأنق وهيط لتحت لقى ماماه كتساينو فالصالون..

حميد بابتسامة:ميمتي..

رحمة:لا باينة فيا ميمتك..واش تبات برا وماتعلمنيش..بقيت سهرانة نساين ونتا ماشي هنا..فين كنتي؟؟

حميد عبس:دبا انا صغيور باش تخافي عليا..انا راجل ونقدر نحي فوقما بغيت..

رحمة:عارفينك راجل..انا ولدت ولية وحدة جات فيها وتزوجت باش تنقدكم كاملين..

حميد تفكر داكشي تأفف:وا صافي ا لواليدة..خلينا فايقين مزيانين.(مشى جلس حداها)راه لبارح بمسبتها مشيت عند واحد صاحبي..بت عندو حيت ماقديتش نحي للدار ومالقاهاش كاينة..

رحمة:وأنا خليتيني وحدي..مالقيت لي يواسيني ولا يصبرني..

حميد باسلها يديها:هانا معاك دبا..لبارح كنا خصنا نتفرقو حسن..

رحمة تكالمات:يمكن عندك الحق...شنو فطرتي ولا مازال؟؟

حميد بابتسامة:مازال..

رحمة:انا نمشي نشوف سعدية ونوجدولك..

حميد:الله يخليك لينا بركة..

رحمة بسمت ودخلت توجدلو..

جات العشية رجع صلاح بعدما تافق مع الخبير يجي يشوف الارض وعاود هادشي لباه باش يحطو فالصورة..

طاهر:مزيان...احسن مادرتي اولدي..بحرا نشوفز شنو كاين ونتصرفو علا بكري..

صلاح:داكشي لي كاين..انا نطلع نبدل ونجي..

طاهر:واخة ولكن عانداك!!

صلاح عرفو كيقصد رؤيا..دار وطلع لبيتو..

بدل عليه ولبس جيلي ديال الثوب فالغري واعر بالقب تحت منو تيشورط بيض مع سروال كحل ديال الكيطما وهبط لعندهم وفري مادازش عندها..

فاش تجمعو هضر طاهر برغبة يمحي الغضب وينقص من الكراهية لي فقلب ولدو..

طاهر:حسناء...طلعي ابنتي قولي لرؤيا تهبط تاكل معانا..

حسناء ترددت وهي كتشوف فصلاح لي زير علا سنانو وعلا عينيه..

صلاح:خليها فلبيت ماكاين لاش تهبط..

طاهر:خصنا نولفو بلي عايشة معانا..وهادشي ماغيوقع الا اذا تقاسمنا الحياة مجموعين..

صلاح حدر راسو معصب وحسناء طلعت كتجري..

حسناء دقت ودخلت لقات رؤيا متكية كاشوف فالسقف وساهية خلعها غي صوت لباب سحابلها صلاح..

حسناء:رؤيا..ياله تهبطي تاكلي معانا..

رؤيا ترددت:ل لا بلاش غي كولو..

حسناء جات حداها:نوضي راه بابا لي صافطني..

رؤيا:و ولكن خوك ءء...

حسناء:خويا معانا وماقال والو..

رؤيا بدات تفكر خايفة:ءء امم واخة..

حسناء:ياله نوضي معايا..

عاوناتها تنوض وهبطو بالشوية فالدروج..غي وصلت حداهم شافت صلاح كفاش مخرج عينيه فيها توترت وشداتها السخفة..

رؤيا:س سلام..

طاهر:جلسي ابنتي.

رؤيا تراجعت:ل لا بلاش(شافوها متوترة وخايفة من صلاح)ء أنا غ غي هبطت حيت نتا قولتيهالي ا عمي وهضرتك علا راسي...اما انا م مافيا لي ياكل..غنطلع لبيتي دبا..

طاهر وقف:بنتي جلسي..نتي من دبا لفوق غتجلسي معانا فالطبلة وهادشي عمرو غادي يتبدل..كيفما كنتي فداركم غتكوني هنا فهمتي؟؟

رؤيا تلفت ولكن الموقف ديال طاهر عجبها وماقداتش تعارض جلست بالشوية حداهم يديها كيرجفو..

اما صلاح لاح المعلقة لي فيديه وناض دفع الكرسي بجهالة وطلع لفوق...

رؤيا هنا صفارت فوجهها خافت يفدي فيها الاعصاب ولكن طاهر طمنها بعينيه..

طاهر:صلاح كيتعصب شوية ولكن دغيا كيبرد ماتخافيش ابنتي(آشمن دغيا كيبرد..هاداك غي مايتعصبش حسن ههه)..

بقاو ياكلو وهي ماهازاها تا دنيا حست بلي المشاكيل تابعاها وغيفدي فيها هاد الهبطة..دغيا ناضت..

حسناء:فين غادية كملي ماكلتك..

رؤيا بتوتر:صاافي باراكة الله يخلف..

طاهر:واخة ابنتي علا راحتك..

طلعت رؤيا لبيتها بالشوية ومع الدخلة شعلت الضو تا قفزت فالسما وهي كتشوف قبالتها..

صلاح جالس فوق الناموسية مقابلها كيهضر ببرود..

صلاح بدون ملامح:تعطلتي!!!

يتبع..