وصلو للكلوب و أيات غير كاتشوف فهاد العجب وكتفكر فباها لي بحالا كتخون كلامو و الثقة لي داير فيها حيت ما قالتش ليه على المجية ديالها وهي أصلا ماباغاش تجي لهنا ..دخلو..كانت بواط أكثر من راقية..فيها جوج طوابق..الثاني VIP ماكيدخل ليه حتى واحد...أضواء خافتة..وموسيقى مرة صاخبة مرة هادئة..غادين ونظرات الإعجاب تابعاهم بالأخص أيات لي جات كتحمق واخا لباسها بسيط..
#شافتهم إيناس لي كانت واقفا مع شي مجموعة ديال الدراري لابسا كسوة سيكسي حمرة المعري فيها كثر من المغطي..تبسمات بخبث و توجهات عندهم..
إيناس:هاي..بنات(شافت فأيات و طلعاتها من ساسها حتى لراسها..دارت ضحكة صفرة كتحاول تغطي بيها الحقد لي كتحس بيه من جيهتها)الصراحة..ماكنتش متوقعة تجي..فاجئتيني!!
أيات:وحتى أنا داكشي لاش جيت..(و ردات ليها الابتسامة)
إيناس:هه زيدو يالاه نجلسو...
#وراتهم البلاصة ومشاو سبقوها وهي كتمشا وراهم..عينيها على أيات وابتسامة استهزاء مرسومة على وجهها...وصلو عندهم..كانو شي دراري كايعرفوهم من الجامعة..وشي وحدين أول مرة يشوفوهم..سلمو عليهم و أيات باغا غير امتا تفك...هي بعيدة على هاد الأجواء..فالجامعة هي اجتماعية بزاف و الضحكة ديما على وجهها..ولكن أول مرة ماتحيش براسها مرتاحة و ماتندامجش مع الناس...
ميساء(بشوية):مانكدبش عليك حتى أنا جاتني ماشي تا لهيه....
يالاه كنت باغا نجاوبها وأنا نسمع التيلي كايصوني..هزيتو لقيت بابا لي كيعيط..استأذنت منهم ومشيت كنقلب على بلاصة هادئة باش نجاوبو...شفت الباب اللوراني ديال الكلوب..ماكيدخل منو حتى واحد ومنو للزنقة...خدينا نفس عميق و جاوبتو..
أيات(تلبكات):لا غيير أنا وميساء طالقين شوية دالموسيقى..ههه
بابا:امم بغيتي تقولي دايرين الزردة حيت مشينا..
أيات:بالعمى...هيهي غير ناشطين شويا...
بابا:امم..اوا..صافي..ماتسهروش بزاف و نعسو بكري..غدا راه عندك الجامعة...المهم أنا غانقطع دابا أبنتي..تهلاي فراسك..تصبحي على خير!! و ما تخافيش غدا غانعيط ليك و نفيقك..هه عارفك معكازة!!
أيات:ههه..صافي ماتخافش..تصبح على خير أبابا!!
قطعات معاه عاد خرجات النفس..واخا ماعجبهاش الحال تكذب على باها...و لكن حتى هي باغا تخرج و ماتبقاش محصورة غير بين الجامعة و الدار...
#عند ميساء..
كانت كتهدر مع شي واحد من صحابها حتى جا عندها واحد دري زويين..ملامحو مغرية و كل حاجة عندو فبلاصتها..طلبها ترقص معاه..و الدرية غير شافتو تزعطات و مشات معاه يشطحو و الضحكة واصلا ليها حتى لوذنيها...
# تسمع صوت فران مجهد قدام الكلوب..الشي لي خلا كلشي يشوف جيهة لوطو لي صدر منها الصوت...خرج منها أوس بمشيتو المعتادة لي كلها غرور و ثقة..لاح السوارت لعامل الفاليvalley#باش يباركي ليه لوطو..خوا ليه الكارد لي فالباب الرئيسي الطريق و دخل..عاد تبعوه و كل واحد لوطو ديالو تنسيك فالأخرى...
#أيات
جايا كتلعب بتيليفونها و دورو فيديها بتوتر الشي لي واضح على وجهها...قربات للبلاصة فين كانو جالسين غير هزات راسها وهي تصدم.....
#طلع أوس مباشرة للطابق المخصص ليهVIP تحت نظرات الجميع....تبعو جهاد عاد ولاد عمو...كان طابق أكثر من راائع....بلاصة ملكية...فخمة بزااف و زوينة...كتطل على الطابق الأول كامل من الفوق...جلسو و تستفو حداهم السربايا كل واحد و أشنو هاز..الكل خدا لي بغا إلا أوس لي ماكيهضر ماكيتكلم و غير عاقد غوباشتو...ناض من حداهم.. كايحس بالضيق فصدرو و قلبو مزير عليه بزاف...وقف كايطل على الناس من الفوق...كاين لي كايشطح..و كاين لي كيضحك..الكل و فاش مشغول..ولكن هو ماعارفش علاش كيقلب عليها...مورك بيديه على الحديدة لي شاد فيها حتى بانو عروقو..
#أيات
شافت المنظر لي أصلا ما كانش بعيد تتوقعو من عند وحدة بحال إيناس..بنت ماكيهموها غير المناظر و حقودة ماكتقبلش شي واحد يفوتها فشي حاجة..خاصها ديما تكون فالمرتبة الأولى و تلفت الانتباه ديال كلشي....و أيات واقفا ليها فحلقها..شعبية وديما ضاحكة فالجامعة..ذكية بزاف و بالتأكيد حسن منها قالبا و مضمونا.. الواحد ملي كايوصل لواحد الدرجة من الحقد كايعماو ليه العينين.....خصو غير يتخلص من العقدة لي ولات عندو لي هي الشخص لي حاقد عليه..
#شافتها كاتكب شي حاجة فالكاس وعلى وجهها ابتسامة خبيثة كتعبر بيها على النصر لي كتحس بيه وهادشي حيت قريب تتخلص من عقدتها..ماشي صعيب على أيات تعرف بلي هي المعنية باش تشرب الكاس....خشات تيلي ديالها فساكها بملامح شبه ممحية..حيت كانت متوقعة منها بحال هاد التصرف ولكن كانت كتتمنى يكون شكها غالط و تكون غير كاتخايل...ولكن الواحد ملي ماتكونش مشاعرو صادقة اتجاهك..فهادشي كايكون واضح عليه واخا يعيا مايخبي...دارت كتقلب على ميساء بعينيها..ولكن مالقاتهاش..عرفات هادي غير خطة من إيناس باش تبعد ميساء و تدير لي فبالها...ابتسمات أيات باستهزاء و تسناتها حتى سالات على خاطرها...هه ماتستغربوش..آيات ضريفة..اه..ولكن لي يجبدها يلقاها.. شخصيتها قوية و متميزة..طبعها صعيب ..و ماتخاف غير من لي خلقها...تمشات بخطوات ثقيلة لجيهتها كتحاول ما أمكن تبتسم واخا هي فالداخل ديالها ماكرهاتش تبكي ولا تغوت حيت فعلا صعيب تشوف شي واحد حاقد عليك لدرجة يآذيك.....
#فالقصر
جالس سامويل فالمكتب ديالو...كايشوف فالورقة لي عطاه أوس بغضب...لاحها فالأرض وبدا كيهرس فلي جا قدامو...حتى دخلات مارثا(مراتو..لقاتو فديك الحالة تصدمات و مشات كتجري لعندو و وقفاتو):سام..سام..أشنو واقع..آش هاد الحالة؟
سام(دفعها بغضب):بعدي مني...نتي..نتي السباب..دابا هو غادي ياخد ليا كاع الأسهم لي من حقي...(مشا جيهتها وشدها من ذقنها و زير عليها) هادشي لي بغيتي..دووووي!!!
مارثا(نثرات من منو): طلق مني...مااتحطش عليا يدييك....نتا لي باغي غير الحل باش تفك من سلطتو و ماتبقاتش تحت إمرتو....أنا عطيتك خطة و لكن نتا ماعرفتيش تنفذها...إذن دابا خاصك تحمل العواقب...
سام(جلس فالكرسي شاد على راسو وقال باستسلام):
شناهوا الحل دابا..آش خاصني ندير؟؟..أملاكي كاملين ضاعو من بين يدي...
مارثا: نتا دابا بقا بعيد...أنا لي غانتصرف من دابا...(ابتسمات باستهزاء)...أي شخص كيفما بغا يكون ضروري ماتكون عندو نقطة ضعف...even the HEIR(حتى الوريث)..... والوريث عندو عدو واحد...هو لي يقدر يعاوننا...
وقفات عليها و على وجهها ابتسامة كاتحاول تخبي بيها خيبة الأمل لي كتحس بيها من جيهتها...
إيناس(بفضول مصطنع): أيات..فين مشيتي؟
أيات(شافت فيها):جاني اتصال و خرجت باش نجاوب(كادور راسها)ميساء فيناهيا؟؟
إيناس(كتضحك و نعتات ليها بيديها):هاديك ماتسوليش عليها دابا..هه
أيات(شافتها كتشطح مع شي واحد..دورات راسها و تنهدات)
إيناس(مدات ليها الكاس كتبتسم): أنا طلبت ليك عصير على ذوقي حيت ماكنتيش....
أيات(شافت فيها و خدات الكاس):اه..شكرا..خالي من الكحول..ياك؟
إيناس:of course..ما تخافيش!!..بحال ديالي.
أيات(ابتسمت بزز منها):شكرا..
#جات من موراهم واحد البنت من المجموعة ديال إناس..كتعوج و تضحك...
البنت(سمر):إيناااس..ماغاتصدقيش شكون كاين هنا..
إيناس(عينيها على أيات لي كتلعب بالكأس فيديها):سمر...مامسالياش دابا..من بعد ونهدرو..
سمر: ولكن أنا متأكدة إلا قلت لك شكون شفت دابا غاتبدلي رأيك..
إيناس(شافت فيها معصبة):شكون يالاه طلقيني!!..
سمر:the moreleye's..
إيناس(تبدلو ملامحها فأقل من ثانية):واش يوسف حتى هو معاهم؟؟
سمر: آه..حتى هو كاين!!
إيناس(ماكرهاتش تمشي عندهم و لكن هاكا غاتفشل الخطة ديالها):احم..من بعد و ندوز عندهم.
سمر(استغربات منها):متأكدة؟!
إيناس:اه..صافي..سيري دابا.
#مشات سمر و شافت أيات فإيناس و قالت ليها..
أيات: شكون هادو؟؟..علامن كنتو داويين؟
إيناس(كتشوف فيها): هه...واش ماعرفتيهمش؟!..لااا مايمكنش...عائلة موريلي من أغنى العائلات فالعالم..الثروة ديالهم ماعندش دول على قدها...
إيناس(باستهزاء):و شكون ماكيعرفهمش..ههه..هما أصلا الجامعة ديالنا من ممتلكاتهم....احم...أجي نشربو شي نخب..عييت بالهضرة.
أيات(ابتسمات بزز):أوك...(دورات راسها لجيهة ميساء لي كانت كتشطح و ما فراسها مايتعاود..)واخا تعيطي على ميساء...هه راك ماعارفاهاش تقدر تقلق علينا.
إيناس(و عينيها على الكاس):أوك.. تسناي.
مشات إيناس و خلات أيات حايرة فأفكارها..واش تديرها ولالا؟...هي لي بغات تآذيها...إذن الغلط منها..خدات الكاس ديالها وحطاتو فبلاصة كاس إيناس
و خدات كأس إيناس حطاتو قدامها....
#مستحيل تديرها...بصح إيناس لي غلطات ولكن أيات هادي ماشي طبيعتها...الشيطان حضر عند إيناس فلحضة غضب و هادشي عادي...يالاه مدات يديها للكأس باش تحيدو و هي تشوفهم جايين....ولى قلبها كيضرررب...جمعات يديها دغيا بخيبة أمل كبيرة..هي ماباغاش تآذيها و هي ماعارفاش آش كاين فداك الكاس..وقفو حداها بجوج..جات ميساء حداها كتدوي و تضحك وهي ماكايناش معاها..عقلها غايب..كتحاول تلقا شي طريقة باش تمنعها تشرب..
ميساء(شافت فأيات لي ماعجبهاش حالها و قربات ليها):أيات..آش واقع؟شفتك ماشي حتى لهيه..
أيات:درت غلط كبيير أميساء...(استغلات الوقت فاش كانت إيناس كتهدر مع شي واحد و عاودات لميساء لي وقع....و ميساء كتشوف فيها مصدومة)
إيناس(دارت عندهم و هزات الكاس الفوق..باش يديرو النخب):هه البنات..نخب الصداقة لي كتجمعنا...
ميساء(شافت فإيناس و علامات القلق والتوتر بعينين عليها..إيناس باغا غير امتا تهز أيات الكاس و تشرب..
جات شي وحدة من وراهم و أيات عاطياها بالظهر..
آن ماري(آنا):إيناس..هادي نتي..كنت متوقعة نشوفك هنا..
إيناس دارت عندها و بداو كايدويو..استغلات أيات الوقت و خدات الكأس لي حطات لإيناس و جرات ميساء و مشاو.....
#فالممر ديال الكلوب
ميساء واقفا مربعة يديها و أيات كتمشي و تجي عليها....
#الممر...
أيات(غادا جايا على ميساء لي هزات الكاس فيديها كتشوف فيه)
ميساء: داويا من نيتك؟؟... و علاش ماتواجهيهاش ديك الساعة(جراتها معصبة)زيدي أنا غانوريها شغلها....
أيات(وقفاتها):وقفي و سمعيني(شدات الكاس من عندها)هادا غادي نلوحو و نتي ماتبقايش تجبدي هاد الموضوع..صافي نساي..
ميساء: لااا مستحييل..واش كتسمعي راسك اش كتقولي...البنت شويا و تقتلك و لا ما عرفت شنو..ونتي مبردة.
أيات(شافت فيها):ماتنسايش حتى أنا كنت غادي نرتكب غلاط.
ميساء:حيت هي لي جبدات..من عندي كون غير درتيها..
أيات(كتشوف فالكاس...شويا ردخاتو مع الأرض حتى تهرس):صافي سدينا الموضوع...و لكن إلا عاودات نفس الغلط ديك الساعة غاتكون هدرة اخرى..( كانت باغا تهدر و قاطعاتها و عطاتها السوارت ديال لوطو)هاكي..سيري جيبيها من الباركينغ أنا غانتسناك هنا...كنحس براسي عيانا وماقدراش نسوك.
ميساء(خدات السوارت معصبة و مشات)
بقات أيات ساهية كتفكر فهادشي لي وقع ليها و كتلعب برجليها فالأرض...حتى كتحس بشي نفس سخووونة فعنقها...و صوت التنفس مرة بالجهد مرة بالشوية..مرة كيبعد و شي شوية يقرب...هزات راسها بغات تدور و هي تحس بشي يد باااردة شدات ليها يديها بقوة و مزيرة علييها و عروق يديه خارجييين...دارت بالزربة عاقدة حجبانها و ناوية على خزيت..
أيات(كتشوف فيه عاقدة حجبانها):غادي تطلق مني ولا ما يعجبك حال....(ولات هي كتقرب منو وهو كيبعد)شكون نتااا؟؟طلق مني(كنتثر منو و توعتات فيديها و غرغرو عينيها حيت قصحها...كتحس بالقبضة لي مزيرا عليها غادا و كتخفاف....و يديه لي كترجف غادة و كتقرب لوجهها....مسح ليها الدمعة لي كانت غاطيح على خدها واخا بغات تبعد بقا حاكمها بيديه و هو براسو مامتيقش بلي مسها...حاس بإحساس ماكيتوصفش..يديه عرقو..متوتر بلاااا قياس..السلطة و الهيبة لي عندو كيتمحاو قدامها...أوس موريلي...لي كيتوق ولو للمسة حنينة منها...واقف قدامها و قلبو كيضرب بسرعة غير معتادة..عينيه مفيكسيين عليها...بعدات منو و هي مستغربة و خايفة فنفس الوقت...
أيات:ش...شكون انت؟؟شنو بغيتي؟!
أوس(بقا شحال كيشوف فيها بنظرات ماكيفهمهوم غير هو...هبط راسو بثثاقل و هو ماساخيش بعينيها...فلحظة..شاف اللباس لي لابسا.... عروق لي فعنقو باانو..عينيه ولاااو نقطة ديال الدم...ماكيخرج النفس غير بزز...وجهو ولا حمررر...أيات كانت خايفة ولكن دافعة الجبهة..و دابا ولات كتشوف وحش قدامها....كتشوف فيه مخلوعة و ماعارفاش هاد الوحش منين تسلط عليها..خافت غا لايكون شي مسطي حيت فعلا حركاتو و تصرفاتو حاليا ماشي عادية...
أيات(كترعد):و...واش نتا بيخير؟؟
أوس(الصمت... صدرو العريض كيطلع وينزل بالزربة مزير على القبضة ديالو...هو كيقرب ليها وهي كترجع باللور....
#فلاش باك
#قبل عامين
#الطريق العام مزاحم....الطونوبيلات واقفين..حادثة سير موقفة الطريق...ليموزين دايزا و البوليس قدامها كيخويو الطريق و لكن رغم ذلك وقفات حيت الطريق عامرة....
#أيات مرة متكية على الفولون ديال لوطو و مرة متكيا
على الكوسان..نص ساعة و هي واقفا فهاد الطريق حيت عامرة...وكل شوية تشوف فالساعة لي فيديها...
ساطت بغضب و يالاه كانت غادي تخرج من لوطو وهي تسمع التيلي ديالها كيصوني هزاتو و جاوبات..
بابا:أيات..فينك..واش مشيتي قبل منا و حنا وصلنا قبل منك..كي درتي ليها؟؟
أيات:راه الطريق لقيتها عامرة..آش نديير...أوووف...غادي يفوتني الحفل..يااك؟؟
بابا: لا ماتخافيش..حتى رئيس الجامعة باقي ماجاش و هو لي غايوزع الجوائز...و لكن سربي دغيا..راه الطلاب لي غاياخدو الجوائز كلهم وصلو بقيتي غير نتي..
أيات(معصبة):واخا..واخا..صافي أنا غانقطع دابا..شويا نكون تما..(قطعات مع باها و هي كتفور بالغضب...خرجات من لوطو و سدات الباب بالزعفة..خدات نفس عميق باش تهدن و مشات جيهة الحادثة..و هي غادة كتشوف الناس مجموعين على شي واحد..قربات ليهم كتباعدهم بيديها وهي تشوف واحد المرأة جالسا فالأرض و شادا على رجليها كتغوت من الآلام وتبكي...قطعات ليها فقلبها و بقات فيها بزاف..مشات عندها):واش نتي بيخير؟؟تقدري تنوضي؟؟
المرأة(شافت فيها و طلقات العنان لدموعها)
أيات(عدوها تشوف شي واحد كيبكي و ما تقدر تدير ليه والو باش تواسيه...حيت و بكل بساطة ماعارفاش السبب علاش كايبكي...نسات بلي عندها حفل التخرج ديال عامها الأول فالجامعة و بلي غادي تاخد جائزة ديال متفوقة فعامها الأول و ولى كل همها تعاون هاد المرأة واخا غريبة عليها): صافي..صافي..
ماتبكيش....واش كضرك رجلك حتى لهاد الدرجة؟؟ أنا غادي نشوف(أيات يالاه حطات ايديها على الضربة و هي تغوت)
المرأة(كتغوت و تبكي):أهئ...أهئ...لا عافاك..راه رجلي كتوعتني..
أيات(كتغوت على الناس لي مجموعة على المرأة):واش نتوما كتشوفو فالمرأة معذبة و حتى واحد ما عيط على الإسعاف..
شخص منهم:راه عيطنا قبايلا و لكن باقي ماوصلو!!
أيات(زفرات بالغضب و باغا تبخ الدم..و لكن تهدنات و وجهات كلامها للمرأة):أجي معايا أخالتي أنا غادي نوصلك..(هدرات مع واحد من الجماعة)عافاك أخويا عاونني نوصلها حتى للوطو(عاونها الدري و يالاه كانو غادين بيها وهو يوقف عليهم شي واحد..دري فالعشرينيات ديالو..زووين و باينا عليه لاباس عليه...أيات هزات راسها و شافت فيه..
الشخص(موجه كلامو للمرأة):غادي تنساي هاد الحادثة..و ماغاديش تقدمي شكاية..(لاح عليها شي فلوس و المرأة غير كتبكي..هنا غادي تبان لينا أيات أخرى..تعصبات و دمها كيغلي بالغضب..شافت فالمرأة وخدات من عندها الفلوس لي عطاها و شافت فيه و ضحكة استهزاء على وجهها و لاحت ليه الفلوس على وجهو)هادو سير زيدهم فراسك...إلا مارباوكش واليديك تحترم لي كبر منك أنا نربيك....
الشخص(واقف مصدوم من الجرأة ديال هاد البنت..و معصب حيت مارضاش قدام الناس لي كايتغامزو عليه...
#جالس فلوطو ديالو و فيدو و المدير كايملي عليه جدول أعمالو....
أوس:الغي الإجتماع مع الشركة الأجنبية و حتى الإتفاق لي دايرين معاهم..
المدير:واخا أسيدي...
أوس:(هبط الحاجز لي بينو و بين الشيوفور و قال):علاش و قفنا؟
الشيفور: سمحليا أسيدي..و لكن كاينا حادثة..الطريق واقفة...
الشيفور:واخا أسيدي..(دوا مع واحد من لي كارد من واحد لبوطونة فليموزين...من بعد ثواني جا الكارد حدا الباب اللور و حل ليه الباب و خرج منها بكل هبة غادي و الكارد وراه..شاف الجوقة مجموعة و مرأة طايحة للأرض...مااهتمش بهادشي..همو هو يعرف شكون تجرأ يوقف الطريق لي دايز منها هو...قلبو قاااصح من جيهة المسلمين و كايكره كل ما يجي منهم....والسبب راجع لعائلتو...حيت كبر و تربى على أنو يكرههم....عائلة طاغية من كل ناحية....عنصرية بامتياز....كاتظن ما كاينة حتى ديانة من غير ديالهم...لهذا أهم قانون عندهم فالعائلة...مستحيل شي فرد منهم بنت أو ولد يتزوج شي واحد من ديانة أخرى...#وريث العائلة عندو واجبات و أولهم ما يخالفش قوانين و أصول العائلة....
#خشا يديه فجيبو و شاف فالكارد..
أوس: نعطيك 2دقائق..خوي الطريق..
الكارد(ومأ براسو):واخا أسيدي(مشا)
#رجع كايشوف قدامو بضحكة استهزاء....كان يالاه غايدور باش يمشي...و هو يشوف بنت كتباعد الناس من طريقها باش تدوز و عاقدة غوباشتها و شعرها لي كايطرو ومن بعد يرجعو عندها مبرزطها...شاف ملامحها كيفاش دغيا تبدلو فاش شافت المرأة فديك الحالة و عكس الناس لي غير واقفين يشوفو فيها...هي مشات باش تعاونها...قلبو بدا كيدق بسرعة خيالية ماعارفش لاش...يديه كايرجفو غير بوحدهم...ملامحها و تقاسيمها ترسخو ليه فعقلو و قلبو فديك اللحظة....ساهي كايشوف فحركاتها و تعابير وجهها...لا مايمكنش...هو لي البنات كلهم ماكيناش لي ماتمناش ولو غير نظرة منو...وهو كياخد غير غرضو و مايعاودش يشوفهم و لا يعقل عليهم....تجي بنت و #مسلمة تخلي قلبو يدق لهاد الدرجة..هو أكيد ماغايتقبلش...كلشي داز قدام عينيه ملي جات حتى مشات....كايكذب قلبو لي أول مرة يسمع دقاتو العالية....و عينيه لي ماولاو يشوفو فحتى واحد من غيرها..غريب أمرو...وقع فالحب و نقدرو نقولو عشق و هوووس من أول نظرة...
#أيات
مشات و خلات وراها بركان غاينفاجر..ماراضيش قدام الناس...تبعها و وقف قدامها..
الشخص(معصب):نتي كاتباني ليا ماعارفانيش شكون أنا؟؟
أيات(سندات المرأة فكتف الدري و ربعات يديها معصبة):و شكون تكون انت فملك الله..سير فحالك..و الشكاية غاتوصلك حتى لعندك..هادا وعد مني..
الشخص(هز يديه غا يضربها..المرأة تخلعات عليها و بدات كتبكي..)
أيات(شافت فيه باستهزاء و رجعات شافت فالمرأة):واش هادا لي غا تخافي منو..(شافت فيه)و نتا كان عليك على الأقل تعتاذر منها...و نزيدك الكلب لي كينبح ماكيعضش...(هزات صبعها بتحدي)و اليد لي تحط عليا نهرسها...و كنظن دابا نتا لي ماكتعرفنيش...(سندات عليها المرأة و شافت فيه باستهزاء و مشات)
#أوس
تبعها ملي مشات و شاف شي واحد وقف عليها..زرب فخطواتو و وقف قريب ليها...
#واقف بيديه فجيبو...و لكن شاف المنظر لي عصبو..زير على القبضة ديالو...و كيزفر بعصبية...جا الكارد علمو بلي خوا الطريق...ماسمعوش و تخطاه و تمشا بخطوات عند الشخص لي كان كيدوي مع أيات و وجهو ما كايبشرش بالخير...الدري كان واقف بوحدو باقي كايشوف فالبلاصة لي كانت واقفا فيها أيات...دار و هو يلقا وحش بصفة إنسان وراه و نظراتو كلهم غضب..قرب ليه و الشخص غادي و كايبعد عليه....
أوس(عينيه حمرين):قريتي ليييها(ضربو بقوة حتى رعف)هزيتي علييها يديييك(هزو خبطو مع الأرض و هو مرفوع...ماعارفش آش كايدير..كيضرب و يعاود وقف حداه المدير و عيط على الكارد و داو الدري...قاد الكوستار و توجه للوطو...
#حل ليه المدير الباب و دخل و دخل المدير القدام..
#فالطريق
أوس(عينيه على الطريق و موجه كلامو للمدير):اليوم يكونوا عندي جميع المعلومات عليها...
المدير(لي كان وراه و شاف كلشي..حنا راسو و قال):واخا أمسيو...
#أيات
وصلات المرأة للمستشفى....و دابا ها هي غادة جايا فالكولوار مربعة يديها كاتسنا الطبيب يخرج..
الطبيب(خرج من عندها و مشات عندو)
أيات:واش هي بيخير؟؟
الطبيب(كايحيد فالطابلية): السيدة عندها كسر خايب فرجليها(شاف فيها)واش نتي بنتها؟؟!
أيات:لا..أنا..أنا الصراحة ماكانعرفهاش...هي دارت حادثة و أنا جبتها لهنا..
الطبيب:واخا..ماشي مشكيل..راه عطيناها مهدئات باش ترتاح...واش تقدري تعمري استمارة الدخول حتى تفيق و تقولها لشي واحد من عائلتها؟!
أيات(بدون تردد):اه..صافي واخا.
الطبيب(كيضحك):فالصراحة..الناس فحالك قلالو أبنتي...جبتي المرأة واخا ماكتعرفيهاش و ماترددتيش تعمري الإستمارة و تحملي مسؤوليتها..
أيات(ابتاسمات):أنا مادرت غير الواجب...سمحليا أنا غانمشي للإستقبال نعمر الورقة...
الطبيب:واخا..تفضلي!
مشات للإستقبال..عطاتها وحدة من الممرضات الإستمارة و عمراتها يالاه غاترجع الورقة وهو يصوني ليها التيلي...شافت شكون ولقات ميساء عاد تفكرات حفل الجوائز ضربات على جبهتها و وجهها دازو عليه كاع اللوان...جاوباتها كتاكل فظفارها..
ميساء(كتغوت):أياااات...فييينك الكلبة؟؟واليديك من قبيلا وأنا نهدن فيهم و نقول ليهم راه دويت معاها و..
أيات(قاطعاتها وهي خارجة من السبيطار كتجري):صافي ملي نوصل نعاود ليك..راه القصة طويلة(دخلات للوطو و كاتسمع فميساء كتغوت من التيلي)وااا صافي أميساء..ماتزيديش عليا حتى نتي..سيري دابا..أنا شويا ونوصل(قطعات معاها و كسيرات ما وقفات حتى لقدام الجامعة الفخمة لي كتقرا فيها...كانت مزينة على قبل الحفل بديكور الكلاسيكي و فخم..لدرجة هي استغربات..ماموالفاش للجامعة يزينوها هاكا واخا غير فالحفلات....تفكرات كلام باها و عاد فهمات بلي رئيس الجامعة هو لي غايعطي الجوائز شخصيا و هادشي علاش دايرين هاد الحالة...غادا بلوطو فالممر الخارجي ديال الجامعة منباهرة بهاد التزيين لي دايرين و لكن ماعجبهاش الحال حيت شافتهم دايرين نجمة خماسية✡كتدل على الدين ديالهم و الجامعة مختلطة يعني كاينين ديانات مختلفة و لكن هادشي كيدل على العنصرية الكبيرة لي فهاد العائلة....وصلات للباركينغ..حطات لوطو و خرجات كتجري.. ووقفات فنص الطريق...خربقات شعرها بعصبية..ورجعات للوطو و جبدات ساك خدات منو كسوة ديال التخرج(الجامعة كتمشا على برنامج دولي..كل عام كاتنظم حفل للمتخرجين لكاع الطلبة و ماشي غير لي فالسنة الأخيرة...كل سنة كايعطيو الجوائز للمتفوقين...و أيات خداتها فعامها الأول و دابا غاتاخدها فعامها الثاني فالجامعة...)لبسات الكسوة و مشات كتجري مضاربا مع الطربوش ديالها مابغاش يتلبس ليها...
#أوس
داخلة الليموزين من الباب الرئيسي للجامعة...الصحافة كايصورو من خارج البوابة الكبيرة....حيت ممنوع عليهم يدخلو..
#ساهي كايرجع أجمل لحظة دازت فحياتو..أول مرة يشوفها..مبتسم بوحدو الطريق كاملة...(M.U)^Morreley University من ممتلكات #موريلي ومترأسها سامويل ولكن أوس هو الرئيس التنفيذي ديالها و هو لي متحكم فالثروة كاملة....و هاد العام هو لي غايوزع الجوائز على المتفوقين.
#داخل مع القاعة لي أقل ما يقال عليها راااقية و راائعة....تعرض ليه المدير كايرحب بيه وهو كايكتفي بإيمائة براسو..كلشي كايشوف فيه..و معجبين بشخصيتو...عندو كاريزما كتجذب بحال المغناطيس..مستحيل تشوف فيه و ماتحققش فعينيه لي مايلين للصفر الغامق و شخصيتو الغامضة لي كتخليك تبغي تعرف عليه كثر...وقفو حداه رجال أعمال من الطبقة البرجوازية ولادهم كايقراو بالجامعة..ولكن جاو خصوصا باش يتملقوه و يدخلو معاه شركاء فالأسهم...هاز بيد كأس ديال الشامباين..و اليد الأخرى فجيبو... جسمو واقف معاهم و لكن قلبو و روحو فبلااصة أخرى..كايهدرو معاه وهو مكتفي بابتسامة استهزاء ومرة مرة كيرشف من الكاس لي فيديه...جا عندو المدير و علمو بلي الوقت جا باش يوزع الجوائز...استأذن منهم و مشا القدام و المدير تابعو..طلع للمنصة ووقف قدامهم و الأعين كاملا حاضياه....
#مدير الجامعة كايقول سمية الطالب و السنة لي كايقرا فيها..و هو كاينوض يستلم جائزتو..
المدير:و أخيرا...أيات العمراني..طالبة في السنة الثانية..تفضلي للمنصة رجاءا..
أوس(هز راسو بفضول كبير باش يعرف صاحبة هاد الإسم...ولكن حتى واحد ما ناض من بلاصتو و لا طلع للمنصة..
#كلشي كايدور راسو و يتوشوش...ميساء لي جالسا مع واليديها و واليدين أيات باركا كتولول و تدور فراسها....باها و مها تقلقو منها و فنفس الوقت خايفين عليها..لالة راضية كاتشوف فراجلها بقلق واضح على وجهها و هو ما كانتش حالتو حسن منها...كيفاش حتى تعطلات وهي من شحال وهي كاتسنا النهار لي تاخد فيه هاد الجائزة لي غادي تحل ليها بزاف دالبيبان فحياتها...أنها تقرا فهاد الجامعة كان حلم و حققاتو و أنها تاخد هاد الجائزة كان طموحها على طول العام و حتى هو حققاتو..
أوس(شاف جيهة المدير و دار فيه شوفة ديال القتيلة..عدوه لي مايحتارمش الوقت ويجي معطل...تحرك باش يمشي و المدير بلع ريقو و كان غادي يعلن على انتهاء الحفل...حتى دخلات هي بشعرها لي مخربق مع الجري كتنهج وكتصايب فالطربوش لي مبرزطها مامسوقاش لنظراتهم لي كايختارقوها و بالأخص نظراتو هو لي بحالا شاف حلمو كيتحقق لي هو يشوفها مرة أخرى...غادا فطريقها للمنصة كلشي كايشوف فيها وهي كتشوف فمها و باها لي صغرو عينيهم و كايتحلفو عليها..بلعات ريقها حيت عارفا بلي تابعها استنطاق...
#طالعا للمنصة بخطوات مسرعة و كلشي متبعها بعينيه....وقفات فوق المنصة و شافت فواليديها لي باقين مقلقين منها و لكن الفخر لي حاسين بيه من جيهتها كبيير...حققات طموحاتها و أحلام واليديها لي ما عندهمش من غيرها....واقفا كتلعب بيديها و تعض على شفايفها بتوتر كبيير...و المدير كيهدر على إنجازاتها الكبيرة و معدلاتها العالية ديال هاد العام كأي طالب متفوق..
#أوس...فيييناهوا..رجليه مابقاوش هازينو...هاد البنت باغا تكمل على داك شوية دالعقل لي خلات ليه فالصباح...البنت لي استنزفات كل قطرة من دمو هاهيا واقفا قدامو و كايحفظ ملامحها لي مافارقوش تفكيرو من الصباح... #لكن راافض الفكرة لأقصى حد....هو لأول مرة يكون فصراع مابين قلبو و عقلو و واجبو اتجاه عائلتو....هبط عينو بتثاقل من عليها بزز واخا ماباغيش عينو تشوف شي واحد آخر من غيرها...
دور راسو و بقا واقف كايشوف قدامو...جا عندو المدير و عطاه الجائزة لي غايقدم ليها...و هي هنا عاد انتابهات ليه...ماحققاتش فملامحو مزيان و دغيا هبطات عينيها...
#مد يديه و قدم ليها الجائزة و عينيه عليها...مدات يدها باش تاخد الجائزة و طلعات عينيها شافت فيه و التقاو أعينهم و لأول مرة أوس يتوتر من نظرات بنت ليه... و يديه قاست يديها.. يدو بدات كترجف لدرجة هي حسات بيها..شافت فيه باستغرات و خدات الجائزة..دورات راسها و شافت فواليديها لي كانو جالسين فالصف الأول...شافت فعينيهم الفخر لي حاسين بيه من جيهتها...دارت ليهم ابتسامة ساحرة و هبطات تحت تصفيقات الناس....أوس أول مرة يشوف ابتسامتها...فينما كايبغي يتراجع و يكذب قلبو كتجذبو ليها بدون قصد...زير على يدو و هبط حتى هو و تجمعو عليه الناس كايهدرو معاه...تلفات ليه.... مالقاهاش وسط هاد الناس كلهم...كايدور راسو و لكن والو..اختافات...
#أيات
هبطات مباشرة عند واليديها كاضحك..وقفات عليهم....يالاه كان باها غايدوي وهي تجمعهم بجوج عنقاتهم باش مايعطيوهاش محاضرة و يديرو ليها محضر ديال الأسئلة فالجامعة....ميساء جات وقفات وراها مربعة يديها...(دارت أيات عندها و رجعات كتشوف جيهة واليديها)
أيات(مع واليديها):صافي غير سيرو نتوما...أنا غانوصل معايا ميساء و نجي.
سي مهدي:واخا ولكن مايسحابليكش غادي تسلمي من الأسئلة....(عنقها من كتفها)مبروك عليك أبنتي...
لالة راضية(عنقاتها و الدموع فطرف عينيها):حبيبتي..مبروك عليك...أنا فخورة بيك و بزاف..
أيات(بادلاتها العناق):شكرا يا أحسن أم..كانموت عليك..
#قاطعوهم والدين ميساء لي جاو باش يباركو ليها.. مشاو و خلاو أيات و ميساء لي طابخا ليها راسها بالأسئلة...
#فالطريق للباركينغ..أيات مضاربا كاتحيد فالكسوة و الطربوش و ميساء داويا..
ميساء: فين كنتي؟و معامن كنتي؟عارفاك ديما معطلة ولكن ماشي حتى لهاد الدرجة....أويلي جايا حتى للدقيقة التسعين...شويا ما كان غادي يمشي التيتييز و تحرميني منو...(حطات يدها على قلبها)يا ختي سعداااتك...خديتي الجائزة من عندو...أنا بعدا عمرني شفت بحالو....كلشي خايف منو و ضارب ليه الحساب....بلاما ينطق كلامو يتنفذ...حرام بحال داك التيتيز يكون يهودي...ماشفتيش إيناس شويا و تسخف ليا..و..
أيات(قاطعاتها):أصاحبتي واش ماكاتقادايش....من موضوع دزتي لموضوع...ياك كنا فالتعطال..آش وصلنا لشي تيتيز ولا يهود؟؟
أيات:هي الصراحة ماشفتوش..(ميساء مشات من حداها)تي فين غادة؟؟
ميساء(وقفات):ضيعتي النص فحياتك...سيري على سلامتك.
أيات(تبعاتها كاضحك...وصلو للوطو...حطات الجائزة فلوطو و جبدات عصير و عطات لميساء كانيط...وجلسو فوق من لوطو و عاودات لميساء كلشي و قررو باش يمشيو يشوفو المرأة فالمستشفى..هبطو من فوق لوطو و يالاه أيات غاتحل الباب باش تدخل وهي تسمع سميتها...
الشخص:أياات..
أيات (دارت عندو مستغربة): أهلا حسام!!
حسام...كايبغي ميساء و كايعتبر أيات صديقتو المفضلة...و كايعاود ليها كلشي...و اعترف ليها بلي كايبغي ميساء وهي لي كاتعاونو باش يتقرب منها):احم..أيات..واخا نهدر معاك واحد الدقيقة؟
أيات:اه..واخا(دارت عند ميساء)أنا جاية دابا..تسنايني فلوطو...
ميساء(ومأت ليها براسها مستغربة و دخلات للوطو)
#كايتمشاو و حسام كايتشكا ليها من ميساء و بلي فشل فكل محاولاتو معاها وهي كضحك عليه...
أيات(ضربات ليه فكتفو كاضحك):ههه و الله حتى كاتبقى فيا...راه عييت مانشكر فيك قدامها و واالو..الدرية راسها قاصح هه
حسام:عام كامل وأنا تانلمح ليها و تقولي لا بغات تفهم...(دخلو لحديقة الجامعة...و خداو مقعد جلسو فيه)
أيات(ضربات ليها طرن فراسها💡):أجي.. واش نتا غادي للرحلة لي منظمة الجامعة؟!
حسام:واش أنا فين ونتي فين؟؟...كانقولك باغي الحل مع ديك صاحبتك العنيدة و نتي داويا ليا على الرحلة؟!
أيات:يا ربي تصبرني عليك و شكون من غيرنا أنا و ميساء!!
حسام(ناض):راسي واجد...وجدو غا نتوما!!
)مشا وخلاها واقفا مصدومة مخرجة فيه عينيها...ياك كان رافض..العجب...خرجات من الحديقى و مشات للوطو لقات ميساء كاتسناها...ديمارات و مشات ديريكت للمستشفى عند المرأة باش تطمن عليها...
#أوس خارج من القاعة..مخنوق و معصب حيت ماقدرش يلقاها و مشا باش يشم الهوا فالحديقة...شافتو إيناس لي كانت واقفا مع شي بنات...و مشات عندو..
أوس(ماشافش فيها و مشا و خلاها واقفا بلاكة...يديها باقا فين خلاتها..شعل سيكار و كيتمشى فالطبيعة و ساااهي و شكون من غيرها شاغل تفكيرو...من اللحضة لي شافها فيها وهو غير ساهي...دور عينيه و لمح بنت واقفا وسط الشجر...هادي هي...مستحيل مايتعرفش عليها....واخا يشوفها على بعد أميال يعرفها...قرب للبلاصة فين كانت واقفا ولكن مالقا حتى واحد....#فعلا شافها و كانت تما ولكن خرجات من الباب الخلفي ديال الحديقة حيت قريب للباركينغ.....لاح السيكار و عفط عليه...قاد الكوستار و مشا...
#أيات
مشاو للمستشفى و دخلو للغرفة فين كانت ناعسة المرأة...شافت أيات ابتسمات وبغات تنوض من بلاصتها..
أيات(زيرات ليها على يديها):بلا ماتشكريني أخالتي...أنا مادرت والو(جلسات حداها ميساء) هه ميساء صاحبتي و لكن هي راه هي ختي لي ماعنديش..
حفيظة(مرأة فالخمسينيات...ملامحها زوينة واخا كاتبان كبر من سنها من كثرة الهم و المشاكل لي أثرهم واضح على وجهها...):ماشاء الله...الله يخليكم لبعضياتكم...
أيات:خالتي...واش نقدرو نعيطو لشي واحد من عائلتك..
حفيظة(هبطات راسها بأسى و بملامح حزينة قالت):أنا...أنا ماعندي حتى واحد..
أيات(شافت فميساء لي بدورها كتشوف فيها..و أيات كتحس بقلبها كيتقطع من جيهة هاد المرأة الغريبة عليها..)
أيات(شدات ليها فيديها):وشكون قال ليك ماعندك حتى واحد!! (تبسمات ليها)من اليوم اعتبريني بحال بنتك!!
حفيظة(كرزات ليها على يديها):أنا..أنا كنشكرك بزاف...الصراحة أنا اعتبرتك بنتي من اللحظة لي شفتك فيها والله شاهد..
أيات:إذن دابا حنا مفاهمين..(شافت فيها)شنو تبغيني ندير مع داك البرهوش لي ضربك؟!
ميساء:بطبيعة الحال..غانقدمو شكاية!!
حفيظة:لا عافاك...أنا ماباغاش ليكم المشاكل... يكون من الأحسن ننساو هاد الموضوع..
أيات(تعصبات):مستحيل...هو ضربك هادي اللولة و فعوض ما يعتاذر منك زايدها بالتنفاخ و المعيور..أنا دابا غانبلغ بيه و المخير فطاسيلتو يحطو قدامي..
حفيظة:فكرتيتي فبنتي...(هبطات راسها)حتى هي دمها حامي و نفسها حارة..
حفيظة(عينيها مغرغرين):أنا الصراحة كنت متزوجة وعندي معاه جوج بنيات...نهاد هي الكبيرة عندها دابا 17عام و ست شهور و الصغيرة آسية عندها13عام يالاه كملاتها...أنا عمرني بغيتو و كنا ديما مخاصمين...زوج قبيح و أب وحشي...ديما كايشرب و يقمر و ملي يخسر فلوسو كايجي يضرب و يسب فيا...كل نهار كان بمثابة جحيم معاه...كنت صابرة و ساكتة غير على قبل بناتي لي مابغيتهومش يكبرو بلا أب و لكن كنت غالطة حتى بناتو ماكيحنش فيهم....صبرت بزااف...و لكن الصبر عندو حدود...واحد الليلة مشؤومة...خسر فلوسو كاملة فالقمار و دخل علينا للدار (حابسة البكية بزز)ضربني أنا والبنات ضرب وحشي بحالا تقولي حنا ماشي عائلتو..نهاد و آسية كانو باقين صغار...
أنا #أم نقد نصبر على كلشي و لكن مانقدرش نخلي بناتي يعيشو مع أب وحشي بحال هاداك...خليتو حتى غفا و هزيت بناتي و أنا ماعندي فجيبي والو من غير شي فلوس قلال كنت مخبياهم....خرجت من ديك الدار و فداك الليل....غادا و ماعارفاش ديك الطريق فين غاتوصلني حيت بكل بساطة ما كان عندي حتى واحد علامن نتكا...(كاتبكي)واليدي عمري شفتهم..أهئ...كبرت وتربيت فخيرية...و لكن ملي تولدو بناتي حلفت مانعيشهم كيف عشت أنا...ولكن ماكنتش عارفا بلي غادي يعيشو أكفس ما كنت عايشا أنا...وصلت للمحطة و أنا كلي أمل أني نهرب من هاد الواقع....طلعت للقطار...حطيت البنات و يالاه درت لجيهة الزاج و هو يبان ليا جاي جيهتنا...وليت كانطلب غير امتا يتحرك...ولكن دخل ليه و قدام الناس كلهم كايضربني ويقول خاطفة ليا بناتي و أنا كانغوت لربي لي خلقني...أهئ خدا ليا بناتي وهما كايبكيو قدام عيني...كلشي كايشوف فينا و حتى واحد ما حرك ساكن..كلهم واقفين كايشوفو أم كاتعذب وأب طاغي كاياخد ليها ولادها و ماكاينش لي وقفو...تسد الباب و تسد معاه قلبي...كانضرب فالباب و نغوت و نبكي وهو مامسوقش...تحرك الطران..وأنا على نفس الوضعية..وصل للمحطة الأولى...هبطت بالجري..خديت واحد آخر باش نرجع...الطريق كاملة و أنا نبكي و ندعي عليه...وصلت للدار لقيتها مسدودة..كانسول الجيران و نبكي حتى قالو ليا مشا خوا الدار و دا معاه البنات...رجلي فشلوا عليا ملي سمعت هاد الهدرة...وليت كانقلب و ندور بحال شي مسطية...دازو أيام و أنا كندور من قنت لقنت نقلب عليهم..قدمت شكاية و قالو ليا الخبار لي غا تصدمني...دا معاه بناتي و مشا سافر لفرنسا و ما يقدرو يديرو والو حيت خارج البلاد...أهئ...خمس سنين ماشفتهم ولا هدرت معاهم...ماعرفتهم واش بيخير ولا لا؟...قلبي كايتقطع على بناتي..أهئ(عنقاتها أيات و جلسات كتبكي فصمت معاها....جات حداهم ميساء كاتنخصص و عنقاتهم...و بقاو على نفس الوضعية)
#القصر
داخل أوس من ممر القصر....و توجه مباشرة للمكتب ديال باه...دخل و كارل لي كان كايحقق فشي وراق هز راسو وشاف فيه...
أوس(جلس و دار رجل فوق رجل):طلبتي مني نسمح ليه و سمحت و تغاضيت على أخطائو شحال من مرة تحت الطلب ديالك...(شاف فيه)القوانين عندنا ماكيتخالفوش...ولكن نتا مخبي عليا شي حاجة بخصوص دافيد..علاش ديما كاتغاضا على أخطائو؟!(لاح ليه شي وراق فوق المكتب)اختلاس أموال..تزوير وثائق رسمية....و الأهم تواطأ مع العدو...
كارل(وقف):كيفاش كتهدر معايا هاكا؟؟أنا هو لي نتحكم هنا!!
أوس(وقف وسد الكوستار):كنتي كاتتحكم هنا..أنا الوريث..كلامي هو لي يمشي دابا....هو غايتعاقب إلا ماعرفتش السبب لي يخليك ديما تتغاظى عليه (كايشوف فكارل باش يجاوبو و لكن ما قال والو..)إذن ما غايبقا عندي حتى خيار!!(غادي جيهة الباب و يديه فجيبو..حتى وقفو صوت الأب ديالو)
كارل(بضحكة جانبية):عقاب الخائن فالعائلة هو الموت(شاف فيه)تقدر تقتلو؟!
أوس(دار عندو و قال باستهزاء):فنظرك..واش مانقدرش نديرها..(يالاه غايحل الباب و يخرج و هو ينطق كارل)
كارل:أنا كنت السبب فموت باه...(دار عندو أوس و وقف باش يسمع ليه..
(جلس كارل فالكرسي و شد فيه )أنا و يعقوب(أب دافيد)كنا بجوج فالسيارة لي دارت بيه الحادثة و لكن قلنا بلي كان بوحدو...كنت عرفت بلي كان كايزور وثائق أصلية و يعقد صفقات مع شركات منافسة و دار نفس تصرف دافيد دابا و لكن لي ماكنتش عارف(شاف فأوس) هو كان باغي يتخلص مني...
#نهار الحادث كنا غادين للشركة و لكن هو هبط الشيفور و صاك فبلاصتو...استغربت منو هو طبعو متكبر و هادي ماشي عادتو...كانت هاديك أول مرة يطلب مني نمشي معاه...فالطريق بدا كايقول شي كلام غريب و مامفهومش..كايلومني على أبسط الحوايج لي دازو فطفولتنا و أنا ماعاقلش..(باستهزاء)تصور لامني أنا حيت ولدي هو الوريث و ماشي دافيد....انحارفات السيارة حدا الجرف و لكن هاديك كانت خطة منو...وقف و خرج...تبعتو و وقفت وراه..دار و وجه لي السلاح فراسي...نقدر نقولك ماتصدمتش منو...خويا بغا يقتلني بكل برودة دم...إذن حتى أنا ماغانفكرش بلي هو خويا الصغير و بلي مشاركين دم واحد...هادشي باش فكرت فاش خديت منو السلاح بالقوة و وجهتو ليه و لكن لقلبو باش يتعلم يخون الدم لي مشاركينو..ولكن ماعرفتش بلي غانكون ارتكبت أكبر ذنب فحياتي حيت طلقت عليه الرصاصة....هو خان...آه...ولكن داك الولد الصغير شنو ذنبو لي حرمتو من الأب ديالو....فينما كانشوف فراسي...كانتفكر خويا لي لطخت يدي بدمو...عمرني نسامح راسي(حط يديه بجوج على كتف أوس) و أنا مستحيل نخليك ترتكب نفس الغلط..هادشي علاش دافيد حسبو ماكاينش...هو باقي طايش.
أوس(كايشوف فيه بنظرة حادة):غادي نتغاظى على هادشي على قبلك...ولكن تيق بيا غادي يجي النهار لي غادي ندمو فيه...(خرج أوس من المكتب و خلا باه غارق فالتفكير...متجه للخارج تلقا ليه المدير فالممر..
المدير:موسيو موريلي...هادو المعلومات لي طلبتي..(مد ليه ملف)
أوس(عينيه على الملف....خداه و دار ليه إشارة باش يمشي...حل الملف و كايقرى بتأني و على وجهو ابتسامة المعلومات ديالها..و شكون من غيرها..البنت لي خلات قلبو القاسي يدق لأول مرة...سد الملف..شاف قدامو و على وجهو ابتسامة حزينة حيت صافي قرر ينهي عشقو ليها قبل ما يكبر كثر...قبل ما يفوت الحدود...هادا غير نهار و مادارت فيه...شاف فالمدير لي كان واقف بعيد عليه و هو يجي عندو...
المدير(حنا راسو بأسى):واخا أموسيو...(دار ليه إشارة باش يمشي و عينيه فبلاصة وحدة ماكيتحركوش..هو صافي قرر يتخلى على حبو ليها قبل مايزيد يكبر...مايمكنش يتخلى على واجبو اتجاه عائلتو و مايقدرش يبغي بنت من غير وحدة من ديانتو و قريبة من طبقتو الإجتماعية...
#أيات
خارجة من المستشفى بملامح حزينة و ميساء ماكانتش قل منها...على غير عادتهم.. حتى وحدة فيهم ماكتهضر مع الآخرة...غادين فصمت حتى صونا لأيات التيلي...هزاتو و جاوبت و من صوتها باينة فيها باكيا و معصبة...
أيات:ألو..
حسام:أيااات...غا بلاتي عليك..علاش تكذبي و تقولي الرحلة كاينة!! هي منظمة غير للطلاب فالسنة الأخيرة ماشي دابا!!
أيات(كتغوت):إيواا صافي هنينا...على مالك آش مشا لك..سير قلب عليا هاد الساعة...مافيا لايبرد فيك جنوني...
حسام(عرفها مقلقة):أيات..نتي بيخير؟واقعا شي حاجة؟
أيات(لاحت التيلي لميساء لي كانت واقفا حداها):هاكي...تكلمي..
شدات ميساء التيلي و قطعات عليه..وتبعاتها...
وصلات ميساء للدار و مشات هي لدارهم و أول حاجة جمعات واليديها..جلسات فالصالون و عاودات ليهم كلشي...بقاو غير كايشوفو فيها و فبعضياتهم..ماعارفينش هاد الدرية لمن خارجة...ديما مداخلة فمشاكل الناس..ابتسم باها و قال:كنحمد الله حيت جازانا ببنت فحالك...أنا غاندير مافجهدي باش نعاونها..(فرحات وناضت عنقاتهم)الله يرضي عليك...خلي ديما قلبك طيب و نيتك صافية و عمرك تخيبي...تغداو و أيات ماقاداها فرحة...هادي طبيعتها...سالاو و مشات لبسات باش تمشي للتدريب..خرجات من الدار و مشات لاصال..تلاقات بجلال و مع الفرحة كتعنق و تعاود وهو غير كيضحك على هاد الهبيلة لي قدامو...عاودات ليه كلشي...و حتى هو بغا يعاونهم و يعاون حفيظة باش ترجع بناتها...قررو باش يمشيو يزوروها فالعشية و منها تتعرف على واليدين أيات و جلال....كلمات التدريب و خرجات دازت على واليديها و مشاو للمستشفى وقبل مايدخلو سولها باها
سي مهدي:أيات...فيناهوا جلال كنتي قلتي بلي حتى هو جاي...
أيات:غايلحق علينا غير يالاه ندخلو...
دخلو عند حفيظة لي فرحات ملي شافتهم..جلسو معاها و هي ماقاداها فرحة حيت عرفات بلي غا يعاونوها ترجع بناتها...وهما كايدويو حتى دخل عليهم جلال...
أيات و واليديها غير كايشوفو فيهم مافاهمين والو....
أيات:عمي جلال...واش كاتعرفو بعضياتكم؟!
جلال(عينيه على حفيظة):.آه..من شحال هادي...
حفيظة(هبطات راسها...)
جلال:واش هادي المرأة لي قلتي لي عليها؟؟
أيات:آه..هادي هي خالتي حفيظة..
جلال(عينيه عليها..دور راسو و شاف فأيات و واليديها):واخا تخليونا بوحدنا واحد الدقيقة...
سي مهدي(جر بنتو و مرتو):اه..صافي..حنا غانتسناوك برا..
#خرجو.... و جلال غادي و كايقرب للسرير ديالها وهي مهبطة راسها..
جلال(باستهزاء):تزوجتي و ولدتي و أنا باقا كيفما مخلياني...كانقلب على السبب لي خلاك تسمحي فيا (شاف فيها بغضب)ولكن أنا كنت حمار و مكلخ حيت تسنيتك هاد الوقت كامل...و لكن كلكم بحال بحال كتشوفو الفلوس كاتغرو..
حفيظة(حدرات راسها):أنا ماتزوجتش بيه على قبل فلوسو(كان باغي يمشي و شداتو من يديه)سمعني أجلال حتى اللخر...أنا..أنا بغيتك كثر ماكتصور...و لكن أنا مانقدش نخليك تتحمل غلط واحد آخر..
جلال(مصدوم):ك..كيفاش؟!!
حفيظة(كتبكي):أه.. اهئ..هو تعدى عليا..اغتاصبني..
و خدا مني أغلى ما كنملك...شرفي ضيعو ليا ..(شافت فيه)آش كان خاصني ندير؟؟قول ليا..ماقدرتش نقولها ليك..داكشي علاش تفارقت معاك!!..أهئ.. عذبني وخدا ليا بناتي...و و صلاتني ورقة الطلاق لي تحررت بيها منو و لكن بناتي..أهئ.. هما لي دفعو الثمن..بقاو مع أب ما كيرحمش..آش ذنبهم..اهئ..
جلال(معصب كيهرس فالكراسى لي كانو محطوطين وهي كتبكي)
سمعوهم برا و بات أيات بغا يدخل و هي ماخلاتوش...هي عرفاتها المرأة لي ديما كايعاود ليها عليها...و بغات تخليهم يحلو خلافاتهم بوحدهم...
#الداخل
جلال:واش كان يسحاب ليك غادي نتخلى عليك إلا قلتيها ليا...
حفيظة(حدرات راسها كتبكي)
جلال(مابغاش يزيد على همها...أصلا لي فيها كافيها..مشا جلس حداها و عنقها):سمحيليا..أنا غانعوضك على كلشي..و بناتك غايرجعو ليك...أنا كانواعدك...(بادلاتو العناق وهي كتبكي..)
طلات عليهم أيات من الزاجة لقاتو معنقها...تبسمات و رجعات حدا واليديها حتى خرج عندهم و قال ليهم الكلام لي غايصدمهم...
جلال:حنا غانديرو العقد اليوما..
هما مصدومين و أيات حابسة الضحكة غير بزز...خلات واليديها حتى دخلو عندها و جات حداه..
أيات(كتضحك):عميمو جلال...شتك زربان على رزقك..خليها غير حتى تاتبرى(قاطعها كيغوت حيت ديما منوضا ليه الشيب هاد الدرية):أياااات(مشات
بالجري دخلات للغرفة فرحانة حيت قدرات تعاونها ولو غير بشوية..بقاو معاها شوية و مشاو خلاوها مع جلال...هما مشاو و أيات رجعات غمزاتو و هو مسكين حشم فبلاصتها..و مشات كضحك...
#عقد القران داز فنفس اليوم..حضرات ليه أيات و عائلاها وهي لي قدمات حفيظة لجلال كشاهدة حيت ما عندها حد من غيرهم دابا..و جات ميساء و واليديها لي ماقصروش من جهدهم معاها...
#قدمو بلاغ ضد راجلها و دابا حيت مزوجة و حالتها ميسورة...قبلوه...و أيات ديما واقفة معاها و بجنبها...المحكمة دارت تحقيقات و عرفو بلي كان كايعنف البنات و حارمهم حتى من المدرسة....تحكم عليه بعشر سنين سجن نافذة حيت تجمعو عليه الدعاوي لا من جيهة حفيظة لي ماخلاتهاش أيات تتخلى على حقوقها و تقول لي كاين و ماتغطيش عليه..لا من جيهة الديون لي عندو...
رجعو البنات لحضن أمهم من بعد سنين ماكانتش قصيرة و ساهلة لا عليها لا عليهم....جلال دايرهم كثر من بناتو و داير مافجهدو باش يعوضها على العذاب لي عاشتو و هي بعيدة عليه....
#أوس
سافر لأمريكا و ماشافش وراه...باغي غير يدفن هاد الحب لي عذبو واخا لمدة قليلة إلا أنو كايحس بحالا دازو عليه سنين...ولكن ماعارفش بلي هاد العشق هو لي غايرجعو لهنا مرة أخرى...
#END OF #FLASH BACK
#انتهاء الفلاش يااك
#الرجوع إلى الحاضر
#واقف فبلاصتو مغمض عينيه و كاينستنشق من عبير ريحتها لي خلات وراها...حل عينيه بثتاقل فالبلاصة لي كان محاصرها فيها...لقاها طارت...تكا على الحيط و دار يديه على قلبو كيهدن دقاتو لي كايتسمعو على الجهد....هي شافتو و جات عينيها على عينو..و هاد المرة ماكانش حلم...
#أيات
كتشوف فوحش جاي جيهتها و حاصرها مع الحيط و حبسها بجسمو الضخم مامخليش فيها فين نتحرك..جاي و معصب...غير وصل حداها و هو يوقف...كايضعاف غير و هو حداها...الوحش لي كان غادي و كايختافي...سد عينيه و هو قريب منها...استغلات الفرصة و تسلتات منو و هي قلبها غادي يسكت بالخلعة...موقف عمرها تحطات فيه...كتمشا بخطوات مسرعة و تدور تشوف واش جاي وراها...وقفات ملي شافت ميساء جايا سايكا..طلعات وهي كتنهج...
أيات(ساهية ماسمعاتهاش....ميساء شافتها مادواتش عرفاتها من ملامحها خايفة....مابغاتش تزيد عليها..أصلا لي شافت اليوما صعيب الواحد يتحملو...وصلو للدار و أيات غير ساهية....طلعو و دخلات لبيتها...هي متأكدة فايتا شايفاه ولكن فين؟؟...
توضات و صلات صلاتها...و مشات للبالكون ديالها...البلاصة الوحيدة لي كترتاح فيها...كاتشوف فالوريدات لي حداها...و تفكر و شعرها كايديه الريح و يجيبو...جات عينيها فالغرفة لي مقابلا معاها..كان الضو طافي و الضلام ماكيبان ليها والو....دخلات لبيتها و هي تجي عينيها على الجائزة...مشات هازاها كتشوف فيها...جلسات على طرف الناموسية كاترجع فبالها أحداث النهار لي خداتها فيه....تفكرات حفيظة و كيفاش حتى تعرفات عليها...و فخر واليديها بيها ملي خداتها و لكن تمحا من ذاكرتها الشخص لي قدمها ليها...رجعاتها بلاصتها و مشات لفراشها كتفكر حتى استسلمات للنعاس...
☀️طلع الصباح و خرجات الشمس كتعلن على بداية نهار جديد...
فاقت على صوت تيليفونها كايصوني..هزات يديها و جاوبت...عرفاتو باها لي ديما مفيقها قبل الوقت..هو داوي معاها و هي ناعسا..قطع معاها..و رجعات نعسات...حتى دخلات عليها ميساء كتفيق فيها...ناضت خاسرة و غير مغوبشة...مشات للحمام غسلات وجهها باش تفيق..و خرجات لبسات تجين مقطع من الركبة و كونفيرس بيضة بخطوط كحلة و تي شيرت بيض سامبل و دارت سنيسلة خفيفة فعنقها...خرجات عند ميساء و هي باقا كتكمع...لقاتها موجدة الفطور و كاتسنا فيها...جلسات مستغربة...عارفاها غاتدير ليها استنطاق على البارح...داكشي باش سبقات الهدرة
و عاودات ليها كلشي على لي وقع ليها البارح و كيفاش حتى هربات منو...و ميساء غير كتسمع و ساكتة...
أيات(ناضت و خرجات من الكوزينة):نوضي تقعدي..أنا لي مسطية كانعاود ليك.
ميساء(ناضت معاها):ولكن أصاحبتي..هادشي غريب...كيفاش حتى وقف عليك؟...غاتكوني تشابهتي ليه ولا شارب ماعاقلش على راسو!!
أيات(دارت عندها):ماعرفتش و ماباغاش نعرف غير نساي الموضوع...زيدي يالاه راه تعطلنا على الجامعة..
#خرجو من العمارة...ميساء دخلات للوطو...و أيات هزات راسها و شافت فالعمارة لي مقابلا معاهم باستغرات...هبطات عينيها و ركبات و مشات...الاتجاه الجامعة ديالها....
وصلو للجامعة و دخلو للمحاضرة لي عندهم و أيات باقي تفكيرها كامل مشوش...ضرها راسها خاصها تعرف فين شافتو....ساهية و مامركزاش مع الحصة..شافتها ميساء و نغزاتها عاد فاقت...
#خرجو من الحصة...و مشاو باش يحضرو للاجتماع لي دايرين على قبل الرحلة لي كاينا من هنا لسيمانة ..دخلو للقاعة...كان كلشي كاين...و بزاف ديال المؤطرين حاضرين باش يشرحو ليهم كثر على الرحلة لي غادين جوج السيمانات و لي غايمشيو فيها لبزاف ديال المناطق و الساحلية...واحد المنطقة فالأطلس هي الوحيدة فالعالم لي كتنمو فيها واحد الوردة نااادرة كتفتح مرة فعشر سنين فقط لمدة ماكتجاوزش 4سوايع....الألوان كلهم مجموعين فيها...أيات حلمها هو تشوف التفتح ديال هاد الزهرة لي الناس كايجيو من العالم باش يشوفوها...
المؤطر(ختم كلامو و قال):و لكن هاد العام متميز بزاف..حيت غايشرفنا فيه ضيف غير متوقع...
رئيس جامعتنا و وريث إمبراطورية موريلي...
#دخل هو و كيف العادة مايمكنش يكون دايز بلاما يلفت الانتباه ديال كلشي....على غير عادتو..لباسو دابا غير رسمي..عينيه كايلقبو على شخص واحد...و شكون من غيرها....و لكن مالقاهاش...كان كيتوقع أنها تحضر....ملامحو باين عليهم السهر...الليل كامل و هو فايق ماغمضش عينيه كايسترجع اللحظة لي شافتو فيها...
وقف قدام القاعة كلها وكلشي ساكت...
أوس(شاف كلشي متفاجئ بهاد المجية و خصوصا أنو
قرر يرافقهم فهاد الرحلة...ابتسم باستهزاء و قال):موريلي نسب خضعت ليه من النهار لي تزاديت..نسب عندو حمل ثقيل...و لكن لقب الوريث تقل...لقب بقواعدو...و بالواجبات لي عندي اتجاهو نقدر نقول نسيت الواجبات لي عندي اتجاه نفسي....و لكن فهاد الرحلة مابغيتش نشوف الفوارق لي عندنا لا من ناحية الطبقة الاجتماعية(كايشوف فيهم)لا من ناحية الدين...
شي كايشوف فشي متفاجئين بهاد التغيير...موالفين عليه الغرور و التكبر...نسب #موريلي كايعني الثروة و السمعة بالنسبة ليهم...هو لي ما عمرو دوى مع شي واحد من غير لي من الطبقة ديالو...دابا غايمشي معاهم و لرحلة استكشافية خاصة بالطلاب...
كلشي كايظن بلي وقع شي حاجة فأمريكا حتى تبدل...ماعارفينش بلي هي سبب تغيرو المفاجئ..كان طاغي و متعصب من جيهة الديانات من غير اليهودية....ماكيتقبل حتى ديانة من غير لي متبع..
#أيات
المؤطر كان كيهدر و هي متبعا معاه كل كلمة كايقولها و الفرحة باينا ليها فعينيها....هبطات راسها و شافت السيور ديال السبرديلة محلولين و تحنات باش تسدهم...فهاد اللحظة دخل أوس و قال كلامو لي سمعاتو كلو...طلعات راسها على غفلة باش تشوفو....
ولكن ماقدراتش...هو واقف القدام وهي جالسا فآخر القاعة...فجأة تفكرات الزهرة لي باغا تشوف و بغات تسولو عليها...
أيات(ناضت من المقعد..وعينيها كايبريو بالفرحة):عافاك...واش غادين نبقاو فالأطلس حتى نشوفو زهرة *الجثمان!!!...
#أوس
دار باش يمشي...حتى سمع الصوت لي باقي محفور فذهنو و مابغاش يتمحا ليه...كان صوتها...دار لقاها واقفا كاتشوف فالمؤطر و عينيها فيهم بريق خاص بالفرحة...
المؤطر: مانظنش...هي زهرة نادرة و صعيب نلقاوها..
أوس(حيد عينيه عليها بغضب و قاطعو بشوفاتو لي كايجمدو الما فالركابي....)
أيات(تصدمات و خاب أملها...هي غادة للرحلة غير على قبل باش تشوفها...يالاه كانت غاتجلس و هي تسمع نفس الصوت...
أيات(تعلات على طراف صباعها باش تشوف شكون لي كايدوي...ولكن شافتو خارج و بان ليها غير ظهرو....
خرجات تبعاتو باش تشكرو....و لكن مالقات حتى واحد قدام القاعة...بقات كتقلب عليه بعينيها حتى جات عندها ميساء...
ميساء:مالك؟!!..علاش خرجتي هاكا؟
أيات:والو...صافي...يالاه نرجعو فحالنا!!
دارو باش يمشيو و هما يسمعو صوت ديال محرك مجهد....كان سكوتر كبير و آخر ماكاين داخل من ممر الجامعة..
أيات شافت فميساء لي كانت مصدومة...ضحكات عليها...و شافت فصاحب السكوتر....لابس كويرة كحلة ديال الجلد و داير كاسك كحل...وقف و هبط منو و حيد الكاسك و بان ليهم شكون...كان حسام...لي جاي جيهتهم....وقف حداهم و ميساء مطلعة حاجب ومنزلة الآخر...(حسام خرج من الجامعة حيت اعترف ليها و هي رفضاتو بطريقة خايبة....سباتو و جرحاتو فقلبو و أيات تخاصمات معاها لمدة على قبل هادشي حتى طلبات منو السماحة...سمح ليها و لكن ماقدرش يبقى فالجامعة.... سافر للخارج و قرا فالجامعة تما و لكن دابا رجع و رجع مختلف....)
ميساء:انت ياك سافرتي...آش رجعك؟؟
حسام(ماكيشوفش جيهتها):ونتي مالك!!رجعت للجامعة مرة أخرى...عندك شي مشكل!!
ميساء(حلات فمها و عينيها بالصدمة...هذا هو حسام لي ديما قامعاه و ماكتعطيهش حتى فرصة فين يدوي معاها...دابا كايرجع ليها الصرف غير بالفن...شافها مصدومة...ابتسم باستهزاء و هو كيشوف فيها...
أيات غادة و كتسلت حتى مشات من حداهم...و توجهات للحديقة....كتشوف فالورد لي مزينها مربعة يديها و كضحك غير بوحدها....
#شافت شي واحد واقف عاطيها بظهرو و خاشي يديه فجيبو...عرفاتو غير من لباسو و ظهرو العريض...فرحات حيت بغات تشكرو...مشات جيهتو...و وقفات وراه...
أيات:سمحيليا....نتا هو رئيس الجامعة ياك؟...الصراحة أنا بغيت نشكرك حيت قبلتي نبقاو حتى نشوفو الزهرة...شكرا بزاف...
#واقف مصدوم...عينيه مابقاوش كايرمشو...قلبو تسارعت دقاتو...يديه عرقو...بغا يدور و ماقدش...
#استغربات ليه..علاش مادارش و ماجاوبهاش؟؟...خدات عليه فكرة أنو مغرور و متكبر..و ديك الهدرة لي قال على إزالة الفوارق بيناتهم..ما منها والو...دارت باش تمشي و هو يوقفها صوتو...
أوس:.آنسة...
أيات(دارت عندو و ملامحها بانت عليهم الصدمة):نتا!!!..(سكتات شوية عاد دوات)واش نتا هو لي كنتي فالحفلة البارح!!!!
أوس(ساهي كايشوف فيها و ملامحو مامفهوماش....ماجاوبهاش)
أيات(ظنات غير تشابه ليها.):ا..ا سمحليا غير تشابهتي ليا...
أوس(الصمت...باقي على نفس الوضعية)
أيات(خلعوها شوفاتو ليها..):المهم(مدات يديها باش تسلم عليه)كانشكرك بزاف و من قلبي...كان حلمي أني نشوف ديك الزهرة..
أوس(حول نظراتو ليديها لي مادا ليه...يديه زادو عرقو
كثر...و رجع شاف فيها)
أيات(زادت تأكدت من غرورو و التكبر لي فيه حيت ماسلمش عليها...كانت غاتهبط يديها حتى مد يديه لي كترجف و سلم عليها...زير ليها على يديها و عينيه ما كيشوفو فوالو من غير عينيها)
أوس: العفو...
أيات(وترها بالشوفات لي داير فيها و ما جرات يديها غير بزز):سمحليا..خاصني نمشي...و شكرا مرة أخرى!!
(مشات وبقا متبعها بعينيه حتى اختافات...قلبو رجعات دقاتو طبيعية...عمرو توقع أنو شي نهار يوقع ليه بحال هادشي....بنت دخلات ليه لقلبو و لعبات فيه كيفما بغات...هي ماعارفاش تأثيرها القوي عليه...من إنسان طاغي،صهيوني متعصب و مغرور لإنسان عاشق و مهووس...
#دافيد
داخلا بورش كحلة ديال السباق من ممر الفيلا و وقفات قدام الباب الرئيسي..تحل الباب و خرج منها شاب بنيتو ضخمة و هيبتو و رجولتو باينين من ملامحو الكحلة....دخل للداخل بمشيتو الرجولية و وقف قدام دافيد لي بحالا شاف ملاك الموت قدامو...و فعلا #مالك هو ملاك الموت...
مالك(كايشوف فيه و يحيد فلي كون ديال الجلد لي لابس فيديه):نتمنى ماتكونش خبارك بحالك..
دافيد(مصدوم و خايف):موسيو مالك...الصراحة أنا ماكنتش متوقع تجي شخصيا!!
مالك(قرب ليه):أي حاجة متعلقة بالوريث...غانهتم بيها شخصيا...دوي دابا شناهوا الجديد؟
دافيد(بمكر): يوسف...غادي نشدوه من اليد لي كاتوجعو..
مالك:وضح كلامك
دافيد: الوريث عندو نقطة ضعف...
مالك:لي هي؟!
دافيد: بنت...
مالك(تصدم و دار الجيهة الأخرى):واش أوس كايبغي شي بنت!!
دافيد(اومأ ليه راسو بالموافقة):هو جا فالثانية لي بديت كنحقق عليها و هانتا كتشوف وجهي كي داير!!
مالك(ضحك باستهزاء): الوريث...ههه..آخر واحد
العالم يتوقع منو بحال هاد المشاعر...(شاف فدافيد)عرفتو شكون هي؟
دافيد(حنا راسو):لا...أوس مستحيل يخلي شي واحد يوصل ليها...واش عايشا فأمريكا ولا هنا و لا بلاد أخرى؟ماعرفناش...اللحظة لي بديت كنحقق عليها لقيتو فطريقي...
مالك(مصدوم و مامبينش):أوس موريلي #وريث الإمبراطورية..نقطة ضعفو بنت...(كيشوف فدافيد)
كرهك لعائلتك غاينفعك و غاينفعني...و لكن إلا سمعت بلي هاد المعلومات مشات عند واحد آخر..(جبد المسدس )أنا مانظمنش ليك راسي و النتيجة هي موتك...فهمتي أموسيو موريلي..
دافيد(خايف):فهمت..كون هاني.
مالك(باستهزاء):فلوسك دابا فحسابك ديال سويسرا...
و خدمتك معايا سالات...
دافيد:اك..لي بغيتي..
#خارج مالك من الفيلا و راسم على وجهو ابتسامة استهزاء...ركب فلوطو و خرج من البوابة..تبعوه الكارد من اللور....غادي فالطريق و فبالو كايدورو بزاف ديال الأسئلة...أولهم...شكون هاد البنت و علاش أوس مخبيها....جا فبالو أنها ممكن تكون من طبقة اجتماعية مختلفة و فقيرة ولكن لي ماطاحش ليه على بالو...أنها ممكن تكون من ديانة مختلفة...و ماشي أي ديانة...الإسلام لي للأسف اليهود كايعتبروه عدوهم الأول....
#مالك الجابري....من أغنياء العالم....من أم لبنانية مسيحية و أب مغربي مسلم....حياتو كاملا عاشها فأمريكا...و من بعد موت الأب ديالو..استلم أعمالو و وسعهم أكثر على نطاق العالم...
من بعد أوس..مالك من أصغر و أغنى رجال الأعمال فالعالم....ولكن لي حتى واحد ما عارفو هو زعيم أكبر عصابة ديال المافيا فأمريكا...
تعرف على أوس فأمريكا و فالوقت لي كان فالصادرة..جا أوس و هبطو للمركز الثاني فالأشهر الأولى...كان ليه منافس كبير فالأعمال و بالطبع ماقدرش يتغلب عليه...
#أوس موريلي بغرورو و نجاحو كسب عدو قوي لي كايتسنا غير الوقت المناسب باش يطيحو للأرض...
#أيات
مشات عند ميساء لي لقاتها باقا واقفا فبلاصتها كاتشوف فنقطة وحدة...و و قفات حداها..
أيات:مالكي؟شفتك صاقلا..ماموالفاش ليك..
ميساء(شافت فيها):أنا الصراحة باقا مصدومة...
أيات(كتضحك):نتي لي درتيها لراسك(دوراتها لعندها)هو بغاك بزاف و أنا شاهدو و لكن نتي...آش درتي؟ رفضتيه بطريقة خايبة و هنتيه و نقصتي منو و من كرامتو...ومع ذلك
هو ما دار والو...بالعكس سمح ليك...هادشي كايدل على
أنو شخص مزيان و ما كيحقدش...و أنا الصراحة بان
ليا باقي كايبغيك غير باقي متأثر من داكشي لي درتي
فيه و ماتنسايش بلي راك نتي لي غلطتي معاه..(طلقات منها)المهم يالاه دابا للدار من بعد و ندويو فهادشي..
مشاو ركبو و توجهو للدار...أيات كل شوية كايجيها فبالها أوس أو كيفما كتعرفو هي دابا #الوريث كاتمحيه دغيا و ماكتخليش لعقلها الوقت باش يفكر فيه و لا يعقل على ملامحو....كانت ساهية كتفكر حتى
فرانات لوطو لي قدامها...و هي مع الغفلة ماوقفاتش دغيا...فرانات حتى هي ولكن قاست لي قدامها...
تقسحات فجبهتها مع الفولون...شدات جبهتها بيديها
و دارت عند ميساء...
أيات:ميساء...نتي بيخير؟
ميساء:اه..ماوقع ليا والو...(شافتها شادة على جبهتها)نتي بيخير؟مالك فجبهتك؟!
أيات:مابيخير والو...انعل الحمار لي علمو يسوق...(حلات الباب و خرجات ووقفات ليه على الزاجة...
ماشافتش لوطو ديال لي الكارد لي فجنبو...الزاج فيمي ماكايبين والو من برا و لكن هو كايشوف كلشي...دقات فالزاجة المرة الأولى...ماحلش...المرة الثانية...مامن مجيب....تعصبات و دقات بالجهد...حل الباب بالجهد و خرج ليها شاعل و مغوبش و غوت
-أشنو...شنو بغيتي...لاش هاد الصداع؟؟
#مالك
ماشافش الضو الحمر لي قدامو حتى تعطل... فرانا بالجهد باش يوقف لوطو...
جالس ساهي كايفكر حتى كايسمع الدقان فلوطو..ماهتمش...و لكن استمرار الصوت عصبو...هو ماحسش بالدقة اللور حيت لوطو ديال السباق و ما كتتأثرش....
تعصب خرج ناوي على خزيت..هو طبعو إنسان هادئ و كايبغي السكون و لكن فاش كايتعصب كتشعل و يولي إنسان آخر...كانت واقفة قدامو مغوبشة و عاقدة حجبانها و كاتشوف فيه و حتى هي لا تقل عصبية عليه...
#أيات
واقفا مربعة يديها و كضرب بقدمها الأرض و هو واقف قدامها بملامح عصبية...
أيات(يالاه غاتدوي وهو يقاطعها....)
مالك(بيديه فجيبو...شاف فلوطو ديالها و رجع شاف فيها):شنو؟؟
أيات(تعصبات):شنو؟؟و مازال كاتسول(نعتات ليه على جبهتها)راه راسي أنا لي كان غايتقسم(شافت فلوطو ديالها ولقاتها مضروبة من القدام(مشات كاتجري كاتقيس و تقلب فيها و جاتها الغبينة...الكارد كانو غايخرجو و حبسهم مالك بحركة من يديه...دارت عندو أيات وذنيها خارج منهم الدخان و شاعلة....
أيات:الغلط منك...شوف طونوبيلتي كي ولات...نتا لي غاتصلحها!!
مالك(كايشوف فلوطو باستهزاء وقال بصوت رجولي قاصح):ماعنديش الوقت لهاد المهزلة ديالك(وجه كلامو للكارد لي خرج عندو)جورج..تكلف نتا!! (ركب فلوطو...شاف فيها من الزاجة....حالة عينيها و فمها من كثرة الصدمة....عمر شي واحد قدر يقمعها...ديما فارضا راسها و شخصيتها قوية...دار ضحكة استهزاء و مشا مكسيري
جا عندها الكارد دوى معاها و هي ماكايناش فهاد العالم...
كاتسوط و معصبة ما عجبهاش الحال....تخطات الكارد
كاتبركم و تعاير فيه و دخلات للوطو....ميساء ضاربة الطم و ساكتة كاتدور عينيها و تحك عنقها بتوتر حيت سمعات و شافت كلشي و عارفاها نفسها عزيزة و ماكتحملش تخلي دقتها و ضروري تفديها....
مادوات ماتكلمات...كسيراات و ما وقفات حتى لقدام
الدار...طلعو بجوج و دخلو للدار و أيات كل شوية تبغي تدوي و كتسكت...
22:00 ديال الليل....جالس أوس بوحدو فنفس الكلوب...قدامو أفخم المشروبات...و أجمل البنات لي كاينين كايتوقو ولو لنظرة منو و لكن حتى وحدة ماتجرأت تجلس حداه.....
البنت1(كتشوف فيه): ناري...اليوما غانبات نحلم به ماكرهتش غير شي ليلة وحدة معاه و ديك الساعة عير يلوحني إلا بغا..
البنت2(باستهزاء):طلبتيها كبيرة أحبيبة...إلا ماعرفتيش شكون هو...أنا نقولك..
(سمعاتهم وحدة و بقات وراهم كاتصنط عليهم)
البنت1:قولي شكون!!
البنت2(قربات ليها حدا وذنيها):يوسف موريلي!!
(سمعاتها البنت لي كانت كتصنط و دارت ضحكة جانبية و مشات كاتوعج و تقرقيب طالونها كايتسمع
وقفات قدامو و هو ساهي و هاز كأس كايدورو فيديه..
البنت:هاي...ممكن نجلس حداك؟!
أوس(الصمت...ماسمعهاش)
البنت(جلسات و دارت رجل فوق رجل):أنا يارا و نتا؟؟
أوس(عاد انتابه ليها...دور راسو شافها و عاود شاف قدامو):نوضي تهزي من هنا...
يارا(تصدمات...بالطبع ماهي أجمل بنت كاينا فالبواط و الرجال كلهم كايتمناو تعطيهم من وقتها):اشنو؟؟
أوس(شاف فيها ببرودة):ماكيعجبنيش نعاود الهضرة...
يارا(ناضت من حداه معصبة هزات جاكيط دالفورير ديالها و خرجات من البواط.....
#حط الكاس و ناض من بلاصتو خارج حتى وقفو صوت ماغريبش عليه.....
الشخص(كايشوف فالكاس لي هاز فيديه):موسيو موريلي....مفاجئة زوينة هادي.
أوس(بلاما يحتاج يلتفت ليه عرفو و دار ضحكة استهزاء و قال و هو عاطيه بالظهر): مالك الجابري
(دار عندو) شرفتي المغرب.
مالك(ناض من بلاصتو و وقف):اوا نتا لي مشيتي بلا وداع...جلس و شرب معايا شويا..
أوس(شاف البنات لي مدورهم عليه فالكانابي و رجع شاف فيه وقال باستهزاء):كانظن نتا مشغول دابا...أولا؟
مالك(دار عند البنات و دار ليهم إشارة باش يمشيو..
مشات وحدة تابعة الأخرى و غاياكلوه بعينيهم):دابا
ما بقا عندك حتى عذر...تفضل جلس معايا...
أوس(جلس ودار رجل فوق رجل...جا جلس مالك قدامو و بيناتهم نظرات تحدي...لي شافهم جالسين مع
بعضياتهم يقول صحاب و لكن كلمة أعداء قليلة فحقهم
أوس عارفو على حقيقتو و مايخفاش عليه حقد مالك الكبير ليه...
مالك(بابتسامة استهزاء): سمعت بلي الوريث كيبغي شي بنت..أنا الصراحة تصدمت..آخر واحد نتوقعها منو هو أنت.
أوس(هز عينيه و شاف فيه...مالك كان متوقع يكون مصدوم ولكن العكس هو لي وقع...ملامحو ممحية و باردة عكس النار لي شاعلة فقلبو...):الصراحة أنا مصدوم(شاف ملامح مالك لي بحالا دار إنجاز كبير)
و لكن ماشي من الخبر لي سمعتي...من السرعة لي وصلك فيها....كنت متوقع من دافيد يقولها ليك و
لكن ماشي بهاد السرعة....(تكا على ظهر الكرسي...كايحقق فملامح مالك لي واضحة عليهم الصدمة و الغضب فنفس الوقت و قال باستهزاء)
كنت معتابرك أذكى من أنك تصدق إشاعة بحال هادي (ناض و سد الكوستار)و لكن ديما كايزيد ظني بيك يخيب...غانتلاقاو مرة أخرى...شولام(إلى اللقاء..بالعبرية)...
خرج أوس من الكلوب و على وجهو ابتسامة نصر...
الأعداء و الأصدقاء و الموت و الحب أشياء كايجيو فجأة و كايجيبهم القدر حتى لعندنا... و القدر ماتقدرش تهرب منو... أوس موريلي قدر يختار صديق حقيقي ماباغيهش على قبل مصلحتو...عدو يستحق يقول عليه منافس...ولكن ما قدرش يتحكم فقلبو فاش اختار أيات ملكة ليه...مستحيل الضحكة تخرج ليه إلا ماكانتش هي سبابها...ما عمر شي بنت تقدر تدخل لقلبو من غيرها هي القفل و المفتاح فنفس الوقت....حب و عشق كلمات صغار بزااف باش يعبرو على لي كايحس بيه من جيهتها....
#أيات
غادية جاية على ميساء لي حابسة الضحكة بزز...
أيات:قمعني ولد اللدينا..ولكن والله لا بقات فيه...غا بلاتي لا مارديتش دقتي مادرت والو...
ميساء(حبسات الضحكة حتى عيات ولكن تطرطقات):
هههههههه...جا النهار لي نشوف فيه صحايبتي مقموعة..
وصفي ليا إحساسك لي...(شافت فيها كتقلب على شي حاجة)ههه مالك!! علاش كتقلبي؟؟
أيات(هزات عصا ديال الهوكي و بدات كاضحك):أخيييرا...جا النهار لي نستعملها(شافت فميساء)جيتي فوقتك النييت...محتاجة نبرد غدايدي..
ميساء(ناضت من فوق الفراش..كاتمشا و تشوف جيهتها لاتنزل عليها):هه الزين ديال العالم..
خلينا نتفاهمو غا بالعقل...أنا راك عارفاني ما عنديش الفرانات و ماكانسكتش..
أيات(تابعاها بضحكة شر):نديرهم ليك هاد الفرانات...
ميساء(قربات للباب):العقل راه مانكسابوش..غا المسامحة..
أيات:حتى هو نديرو لييك..ماكاينش مشكيل...
ميساء(حلات الباب و هربات لبيتها...تبعاتها أيات ولكن كانت سدات الباب قبل ماتوصل ليها...)
أيات:غا بلاتي...راك خارجة خارجة و ديك الساعة شوفي شكون يفكك مني...زعما عارفاك صاحبتي نعاود ليك و نتي باركة ضحكي عليا..(سمعات ميساء كاضحك للداخل..ضربات الباب برجليها و مشات لبيتها كاتسب و تعاير غا بوحدها...لاحت العصا...هزات كتاب و حلات البالكون و دخلات ليه...جلسات فالكرسي و خدات الكتاب كاتقرا فيه....هادي عادتها تعصب تقرا كتاب..تفرح تقرا كتاب...جالسا و شعرها كايديه الريح و كايرجعو مركزة مع كل كلمة فالكتاب....و غافلة على الأعين لي مراقباها و كايعبر فكل حركة ليها...
#أوس
واقف فالشرفة ديالو مقابل معاها.....مراقب كيفاش الريح كيحرك كل خصلة من شعرها و وجهها
لي ضارب فيه ضوء القمر...عينيها لي كايتحركو مع الكلمات....التيلي ديالو كايصوني و كايتجاهلو..المرة
الأولى ماجاوبش...المرة الثانية...ماجاوبش...فاش صونا المرة الثالثة عصبو و جاوب..
أوس(معصب):جهاد...قول شنو بغيتي؟؟
جهاد:مالك معصب؟! قول غير السلام على الأقل!!
أوس(بنفاذ صبر):غاتدوي ولا نقطع؟
جهاد: غادي لرحلة الطلبة؟!!القضية فيها شي حاجة ماشي حتى لهيه...فين عمرك عتبتي حتى الجامعة!!
أوس:فين المشكل؟!
جهاد(باستهزاء): لا ماكاين حتى مشكل...(سكت شوية
و قال)حتى هي كاتقرا فالجامعة؟؟ واش داكشي علاش....
أوس(عصبو وقطع عليه قبل مايكمل كلامو....شاف فجيهتها لقاها دخلات...تنهد و مشا دخل حتى هو...
#أيات
جالسة كاتقرا...حتى سمعات شي حاجة...هزات راسها...بان ليها شي خيال كايتحرك فالبالكون لي قدامها....تحرجات من الجلسة لي كانت دايرة
و ناضت دخلات...
مشات للحمام غسلات سنانها و تلاحت فسريرها وما حسات براسها حتى كانت ناعسة....
☀️صبح الصباح و فاقت على أشعة الشمس لي كتضرب فوجهها...مشات للحمام و دوشات على خاطرها...خرجات شافت الساعة...لقات راسها معطلة..مشات للبلاكار بالزربة...كتجبد وتلوح حتى لقات علاش كتقلب...سالوبيت ديال تجين لونو مغلوق و مشرك شوية...تي-شرط بيض سامبل طالع شوية و خدات كونفيرسة بيضة و شعرها خلاتو مطلوق و كايبان حريري بحالا مصايباه...دارت ساعة كحلة و أنيقة...ساك فالأزرق الغامق مواتي مع اللبسة..دارت فيه الكتوبة و تيليفونها و مشات عند ميساء لقاتها واجدة لابسا كسيوة صيفية فالصفر و شعرها جامعاه كعكة الفوق و صباط بلا بيض بحال الساك....خرجو بلا فطور حيت معطلين...الطريق كاملة و هما يتناكرو حتى وصلو....مرة على حسام...مرة على لي ضرب ليها لوطو...
ميساء(كتضحك):اوا الساطة...هادوك غير ذنوب الفيراري لي خبطتي..ههه
أيات:النبك..و أنا مالي هو لي حاطها وسط الطريق...(وصلو)هبطي..هبطي..إلا زدت معاك الهصرة رانا بحالك!!
دخلو للجامعة و مشاو للمحاضرة...لقاو البروف باقي
ماجا..ميساء مشات سبقاتها و جلسات...و أيات شافت إيناس مجمعة و كضحك...تخطاتها بحالا ماشافتهاش و دازت...إيناس شافتها و هي تبعها...
إيناس(وقفاتها): أيات..صافا؟؟مالك مشيتي من الحفلة
بلاما تودعيني؟!!
أيات(باستهزاء): كان فات الحال...(شافت فيها) ونتي كنتي مشغولة..مابغيتش نبرزطك!
إيناس: ماتقوليش هاكاك أنا غير تشوشت عليك حيت مشيتي بلاما تقوليها...المهم دابا نتي غادة للرحلة ياك!!
أيات:علاش؟؟واش عندك ليا شي خطة جديدة؟؟
إيناس(كاع اللوان دازو عليها):ك..كيفاش زعما؟!!
أيات(باستهزاء):زعما واش دايرة لينا شي خطط على قبل الرحلة...راك عارفة خروج ولا بحر!!
إيناس(عاد تنفسات):اه..بزاف..غادي تكون رحلة ماكاتنساش!!
أيات(شافت البروف دخل):مزيان اوا نهدرو من بعد..أنا مشيت!
#إيناس
مشات أيات و خلاتها واقفا فبلاصتها كاتشوف فيها..بملامح ماكرة و بضحكة شيطانية قالت: شي نهار ماغايبقاش داك الحظ لي كل مرة معاك و معاونك و هاد النهار حاسة بيه غادي و كيقرب..(مشات خدات مقعد و جلسات و الضحكة باقا ماتمحاتش ليها...
الحقد لي فيها غادي و كايكبر من جيهة إنسانة ماعمرها أذاتها...
#أيات
مشات جلسات حدا ميساء و مادوزوا ديك المحاضرة غير بزز....كايتقطعو بالجوع حيت مافاطرينش...غير سالات الحصة...ضربوها بجرية للكافيتيريا..خداو لي
بغاو و جلسو كاياكلو...
ميساء:أياات.
أيات(هزات راسها):نعام
ميساء:زعما يكون هو ...زعما..راك عارفة..
أيات:ماعارفااش
ميساء(خنزرات فيها)
أيات(قشعات حسام داخل للكافيتيريا وقرب ليهم و دوات بالجهد شوية): ااااااه...نتي داوية على حسااام..
حسام(وصل عندهم و شاف فميساء):كنتو داويين عليا.
ميساء(كاتخنزر فأيات لي جالسة مفرنسة و عاجبها الحال حيت رجعات ليها الصرف ديال البارح...كملات ماكلتها و شافتهم منساجمين و مامسوقينش ليها...
كاتدوي معاهم و حتى واحد فيهم ماكايجاوبها..حسام كايشوف فميساء لي حادرة راسها و دايرة فيها حشمانة....تعصبات و ناضت ليهم..
أيات:لا زعما تبارك الله عليكم...دايرين ليا فيها فيلم هندي...(جرات ميساء)نوضي تهزي نتي..خاصني نمشي نحط لوطو عند الكاراج يصلحها...و انت(مع
حسام)سير دخل لا عندك شي حصة و باراكا من التسركيل..
#مشاو و ميساء غير كاتنكر حيت خسرات ليها اللحضة....وصلاتها لمعهد الرقص و بغاتها ميساء
تهبط معاها...خرجو من لوطو و توجهو للداخل...خلاتها ميساء فبلاصة المتفرجين و مشات باش تبدل حوايجها....
#جالسة و غاطسة راسها فالتيلي ماكايبانش وجهها حتى وقف عليها شي واحد...
الشخص:آنسة...عافاك...إلا ماكانتيش من المجموعة..
تفضلي سيري لقاعة أخرى..
هزات راسها و رجعات شعرها اللور بحركة من يديها و قالت:داوي معايا؟؟
أيات(تفكراتو):اه..نتا هو عمر...المدرب ياك...تشرفت بمعرفتك..
عمر(عينيه عليها):الشرف ليا حيت عرفتك
أيات(ابتاسمات ليه و ماجاوباتش...دخلو المجموعة ديال الرقص...و ماكاين غير البوكوص على خوه....بدات كتضحك حيت و أخيرا عرفات علاش ميساء تموت وماتفلت شي حصة هنا....
مشا عمر باش يدربهم و هي غير كاتشوف فحركاتهم
المتناسقة و مرة مرة كتضحك غير بوحدها ملي كتشوف ميساء كتشوف فشي دري حتى كايحشم هو فبلاصتها..عمر كل شوية يخطف منها الشوفة...
سالاو و أيات كانت غادة خارجة حتى سمعات عمر كيعيط عليها...عوجات فمها و زربات فالمشية باش مايلحقش عليها...
عمر:أيات...تسناي
أيات(دارت عندو):نعام!!
عمر(وقف حداها):بالصراحة..إلا ماكانش عندك مانع..
أنا عارضك للغداء اليوم...آش قلتي؟!
أيات(مصدومة من هاد الجرأة لي فيه):لا..سمحليا
مانقدرش!!
عمر(بأسف):واخا...ولكن على الأقل عطيني النمرة باش
نبقاو على تواصل!
أيات(تعصبات):سي عمر...سمحليا مانقدرش...بسلامة!
(مشات و خلاتو واقف كايشوف فيها...هبط راسو بخيبة أمل و رجع دخل للمعهد....مشات للوطو و دخلات...
تسنات شويا حتى هبطات عندها ميساء و مشاو تغداو
و دازو صلحو لوطو و دابا راجعين للدار...
ميساء: أيات..شحال قلتي باقي للرحلة؟
أيات:4 أيام..(شافت فيها) علاش؟
ميساء:اويييلي...على 4أيام...و أنا لي ماموجدة والو...
أيات(كتضحك عليها):آش باغا توجدي بالسلامة؟؟
ميساء:أيات..والله ماكنضحك..قلبي الدورة للمول...خاصني عرام ديال الحوايج..زيدي عليها جوج
سيمانات مادرت الشوبينغ...
أيات:هههههه..جوج سيمانات.. لا هادي بزاف..ههه
ميساء:دابا غاتديتني ولالا؟؟🙄
أيات(ضربات الدورة):ههه نديك..علاش لا!!
ميساء كاتفرنس و عاجبها الحال...هادي هي حال ميساء...المهنة:مراقبة التيتيز..الهواية:الشوبيغ....تفضل تموت وما تتخلاش على عادتها...
وصلو و هبطو للمول و ميساء كاتجرها من بلاصة لبلاصة...دوراتها على كاع المحلات...دخلو لjennifer و هنا ميساء غاتغرقهم حوايج...كاتهز الكساوي و تمشي تخلص بلاما تقيس...أيات غير كتشوف و ساكتة
عارفاها مضروبة على الحوايج...دخلاتها أيات لماكازان مختصة بالثوب ديال التجين....أيات كتوريها السراول و هي كاتمشي ليها للكساوي...عصباتها و جرات عليها
على ما تشري لي بغات....خدات لي عجبها و خرجات و لكن مالقاتش ميساء فين خلاتها...
غادة و كتقلب عليها بعينيها حتى فاتت
الماكازة لي فيها ميساء....رجعات جوج خطوات اللور
حيت قشعاتها....كان محل ديال المايك آب...دخلات عندها لقاتها كاتجرب فالروايح..
أيات:حرام تسناي جوج دقايق على مانسالي..ياك؟
ميساء:صافي...حتى نتي راه مانسيتكش...شوفي ليك
هاد الريحة كاتحمق...و هاد العكر غايجيك واااعر..
أيات(قاطعاتها):غاتزيدي فحالك لا...رجليا طابو و نتي
و تقولي واش تقاداي..
ميساء:أصلا صافي ساليت...زيدي زيدي حرام الخرجة معاك!!(مشات خرجات و خلات أيات مصدومة...واش هادي هي لي ماخلات ماشرات...خرجات تبعاتها و مشاو...
عندما يعشق الوريث الجزء الثاني
محتوى القصة
التنقل بين الأجزاء