أنقذوني عبيقة كيبغيني الجزء الخامس

جالسين فالسدادر مشادين من لييدين كيشوف فيها نضرة إعجاب ..باين عجباتو بالكسوة والشعر...

عبيقة:فخبارك جيتي زوينة..

أيلول:ههه قلتيها ليا قبيلة...

عبيقة:ومقلتش ليك تنحمقيني...

أيلول :هههخ لا مقلتيهاش...حتى نتا جيتي زوين وجا معاك لكلاص...

عبيقة:انا لي جيت معاه..

أيلول:أيييه...

كان لابس قميجة بيضة مع سروال توب رمادي وداير گرافاط كحلة ..وداير هادوك لعيبات لي كيلصقو فالسروال فحال السلوبيط...مقاد لحيتو وريحة تتعطط مم بعيد...

طلق ليهم سيمو أغنية ديسباسيتو..جا رياض جر أيلول من يديها غادي بيها للوسط فين كيشطحو ..هي غير شافت الشطيح لاحت الطالون جنب وبدات هاك بالاك هي ورياض غير تينقزو الحاصول هبيلة وقالو ليها زغرتي...

وعبيقة حاضيها مبتاسم على عفويتها وتعاملها مع ولدو..شوية تبدلات لأغنية حسين لجاسمي 6 الصبح ..بدات كتعيوج هي ورياض ودوك الوليدات لي كيشطحو تيتناقزو عليها وهي فرحانة ودايرة ليهم لخاطر..ورياض شاداه لغيرة عليها كيبعدهم من حداها باغي يشطح غير هو وياها ..حتى عيات وخلاتهم كيشطحو راجعة لعند عبيقة...

عبييقة:أتبارك الله عليك وخلاص..

أيلول:اووووف عييت ولاهيلا علام هاد رياض

عبيقة:مايكونش فحالك مقطعة لوراق..انوض لكوزينة انا جاي..

أيلول:نعاونك...

عبيقة:(وقف..)يالاه...

شد ليها فيديها ومشاو لكوزينة كانو محطوطين الطباسل فوق من البوطاجي..

عبيقة:حبي ستفي الطباسل..انا نجبد لحلاوي الصغار..

ضارت كتقاد فيهم وهو جبد لبلاطو من التلاجة وجا حداها..حتال ودنها وباسها ..خلاها ضارت مخلوعة كتبرد فيها..

عبيقة:(غمزة)ديكااالم عمري..

بدات كتقاد فدوك الحلاوي فالطباسل وهو رجع متكي على الطبلة مقابلها كيف كتحرك بطريقة درامية وكيف ملي كتحرك كيتحرك حتى شعرها معاها..محس غير على راسو مقرب لجيهتها حاط يديه على البوطاجي محاصرها..حسات بأنفاسو على شعرها بغا الضور لقات راسها مزاحمة ..ضارت بصعوبة باش تصدم من القرب لي كانو فيه...

أيلول: (بشوية) أيغد ..

عبيقة:(كيزيد يقرب) أيلووووول...

بعد على وجهها الشعر وهبط يديه على طول وجهها حتى وصل لكتفها ..عاود طلعها حتال مور عنقها (قرفادتها)وهي طول هادشي فحالا مخضرة غايبة على العالم...قرب من وجهها حتى ولا كيتنفس من نفسها ..كتحس بنفسو كضرب فوجهها سخونة كتحرق..حتى حط فمو على فمها وبدا كيبوسها غير من لفوق بوسة ورا بوسة ..السيدة تحلات طروا بياس ملقاو ميجمعو فيها..

باقي كيبوس فيها مقدرش يبعد عليها كتجرو فحال المغناطيس ..وهذا هو طعم اول قبلة بيناتهم..حتى كتبعد هي ..هزات عينيها كتشوف فيه لقاتو سادهم منشوي..

أيلول:أيغد..

عبيقة:(حل عينيه حمرين) نعام أعويناني

أيلول:(صرطات الريق) أنا أنا..بغيت نقول ليك ...

عبيقة:اش بغيتي تقولي 

أيلول:كنبغيك..

قلبها كيضرب وكتسناه يجاوبها عكسو لي كان كيشوف فيها بحيرة وبصدمة..ولكن فرحان بإعترافها

عبيقة:أيلول أنا ...(سكت شنو)

أيلول:نتا شنو...

ماجاويهاش فقط جرها لعندو عنقها وكيبوس على راسها وهي لي فيها مامهانيها باغا تعرف واش كايبدلها نفس الأحاسيس..

أيلول:أيغد ماجاوبتينيش ...

عبيقة:انا كتعجبيني بزاااف وكتحمقيني...

بعدات راسها من على صدرو...

أيلول:اذا مكتبغينيش...

عبيقة:لا لا متقوليش هاكا...

أيلول:(عينين مدمعين)وشنو..

يالاه غادي يججاوبها وهو يسمع لباب كيصوني...

عبيقة:نشوف شكون ونجي..

ماجاوباتوش جلسات فالكورس وكتفكر يمكن تسرعات...يمكن ماكايبغيهاش ..يمكن مدوز بيها لوقت ..هادو كاملين افكار كانو كيضورو فبالها وكانو منغصين عليها جلستها...

مع الحلة ديال لباب مع تصدم وضهشر بقا غير كيشوف ومقدش يقول دخل..

اجييو نمشيو لواحد لبلاصة مابعيداش بزاف ..غير فدرب سلطان نيت..كان ناعس فبيتو حدا مراتو مابيه ماعليه..عيا ميتقلب قنت يلوحو لقنت..فالأخير ناض مستسلم لصوت لموسيقى لي ماخالاهش ينعس..

لابس فوقية ديال النعاس..ناض من الناموسية كيسب فخاطرو وكيلعن فالجيران لي محيحين فهاد ليل ..سد الشرجم لي كيطل على الزنقة عاد نقص شوية الصوت...جا راجع لبلاصتو زيراتو البولة ..وخرج توجه لطواليط..قضا جاجتو على خاطر خاطر...وتم راجع لبيتو..ومع بيت أيلول فطريقو..طار ليه نعاس طار فقرر يدخل يشوفها واش مغطية مزيان وبغا يسد عليها الشرجم باش متفيقش حتى هيا. الله وأكبر اش هاد لحنان اسي لعربي من أين لك ذلك ..حط يديه على لبواني بغا يحل لقا لباب مسدود..عاود جرب يحل لقاه مسدود...

فتيحة:مالك العربي..

العربي:هاا لا والو غير بغيت نسد الشرجم على أيلول ساعا لقيت لباب مسدود... علاش تتسد عليها لباب ؟؟

فتيحة:(كتفتف) ااه راه مولفاها قاعدة..الا ماسورتاتش لباب متنعسش...

العربي:العجب فالدار لقديمة ماكانتش كتسورت عليها..

فتيحة:اوا معرت ليها كوراها بغات تبقا ناعسة الصباح حيت ماقارياش غدا..

العربي:اوا الله وعلم...زيدي نعسو زيدي..طيرو علينا النعاس الله يطيرهم..

سير أعمو تنعس سير كون تعرف بنتك كتلوز فلعيد ميلاد كون قطعتي ليها طرمتها...وكون عرفتيها شبعات بوسان كون جاتك جلطة دماغية..

تمشا قدامها وتبعاتو كتولول فخاطرها وفطريقها شافت الساعة كانت قريبة 12 وهي مازال مارجعات...

دخلو لبيت النعاس ونعسو رغم الصوت لموسيقى لي كيوصلهم..

فدار ديال عبيقة مازال فالكوزينة كتفكر ومشطونة مع الفلاش لي طرا ليها معاه...وأحاسيسها مرونة مع أول قبلة ليها عكسو هو لي كان متمرس وعارف اش كيدير ..أكيد ماشي أول بوسة ليه هاديك..

بواقف فالباب مصدوم من هادي لي واقفة ليه قدام لباب..

عبيقة:هازال اش جابك هنا!!

هزال:(بالتركية) توحشتكم وتوحشت ولدي 

جاوبها بنفس اللغة..

عبيقة: شكونك نتي أصلا حنا مكنعرفوكش...

طلعات لعندو فوق لعتبة وحطات يديها على حنكو..

هزال: مديرش ليا هاكاحنا مقدر علينا نكونو أسرة صغيرة..أنا ونتا أولدنا ..رياض ياك..

عبيقة:الحمد الله لي مفكرة سميتو..

هازال:معمرني نسيتها أصلا كان ديما فبالي..ونتا كتر مفارقتيش بالي ولو مرة..

عبيقة:لا واش تضحكي على راسك..

هازال:أيغد حبيبي معمرني نسيتك ..خلينا نبداو صفحة جديدة..

عبيقة:الدفتر تقطع وتوسخ لحتو شحال هادي..نتي دابة بنت خالي فقط ..

سكتات كتشوف فيه بعينيها الزرقين مازال حاطا يديها على حنكو..كتشوف فيه باشتياق عكس نضراتو لي كانو حقد وكيطلقو الشرار..

شافتو تعطل ..وهي توقف هبطات لكسوة مع تتجلس تطلع ليها ..وتوجهات ناحية للباب..وهي تتقرب وهي تتسممع فشي لغة فشكل قدرات تميزها بالتركية..ستاغربات وسرعات مشيتها باش تصدم من ذاك لمنضر لي شافت هو واقف وهي مقربة ليه بزاف وكتلمس فحنكو ..مع عاطيها بالضهر ماشافتش نضراتو ليها اما كون عارفاتو ماحاملهاش..كان مشغول ومنغامس..بالتفكير فردة فعل ولدو ملي يشوفها لدرجة نسا يدها لي كتسارا فوجهو..

أيلول أصلا كانت مشوشة بالتفكير من عدم تجاوبو معاها من كلمة نبغيك وزادت كملات ملي شافتهم هاكاك محساتش براسها حتى مشات ليها وبحركة بسيطة دفعاتها حتى نزلات من العتبة وعلى شوية كانت أطيح خصوصا انها لابسة طالون أوڤر بزيادة ..ضارت لعند عبيقة غير مكترتة لي كانت غادي تكركب..

أيلول:أيغد شكون هادي..

عبيقة:أيلول غادي نشرح ليك كولشي ولكن حتى نفاريها مع هاد لق**وي

أيلول:أش غادي دير أنا لي غادي نمشي نقود..

خرجات من الدار ممصوقاش لأنها خارجة بلا ليزار ولا يقدر يشوفها شي واحد..يالاه تخطات هازال ..حسات بدراعها مشا وجا..كان عبيقة لي جرها مرجعها بزز للداخل ..بغات تعاود تخرج ضار عندها مخنزر قايل

*تحركي من ورايا نبربقها مع الزامل بوك* 

ماعاوداتش معاه لهضرة ..وضربات الطم حيت بصح شكلو خلعها .. لايحة ودنها لعندهم حالفة تتعرف اش كاين..عكس هازال لي كانت زي الأطرش فالزفة..

عبيقة:(بالتركية)من اللخر اش جاية ديري هنا..

هازال:شكون هادي..

عبيقة:ماشي صوقك..هضري شنو باغا..

هازال :باغا نلم شملنا..من جديد..

عبيقة:لا معرفتكش والله..واش نتي هي هازال بنت خالي لي غير ولدات هربات مخلية ولدها مازال حتا محل عينيه..

هازال:ندمت تيقني ندمت عطيني فرصة..

عبيقة:(بالدارجة)القلاوي على عينيك ..قالت ليك ولدي..تقحبنات حتى عيات عاد جاية باغا ولدها 

هنا أيلول فهمات بلي هادي مامات رياض شدات على فمها مصدومة وهضرات بصوت شبه مسموع..

أيلول:مستحيل....لا مستحيل

وهنا جا رياض كيجري لي كان كيقلب عليهم باش يقطعو لگاطو حيت قربات 12 ديال ليل..

رياض:(كيهضر من بعيد) الواليد فينك عيقتي بالرب..فين هي ديك صحيبتك تاهي غبرات

حتى كيشوفها واقفة كتشوف فيه علاين تبكي دوك الدموع ديال بزز دموع التماسيح ..

مع عينيها زرقين وشعرها زعر وبلقة مابايناش تركية باينة فحالا جايا من السويد ..

رياض: الزعورية والتيتيز عندنا فالدار..الواليد شكون هاد لخير..

عبيقة:رياض دخل .

رياض:خلينا نتعرفو مالك اصاحبي..

عبيقة:(بجهد)رياااااض دخل فحالك..

معاودش معاه لهضرة ودخل فحالو ..هازال بقات كتشوف فيه حتى دخل..

عبيقة:رجعي منين جيتي..

هازال:عفاك خليني نشوفو ونتعرف عليه..

عبيقة:(غوت بحهد)مستحيلل ..هادي لي مستحيل تكون..

هازال:(كتبكي بزز كتعصر)أنا معمرني نسيتك..صدقني كنت صغيرة وطايشة ..عفاك سمح ليا..

عبيقة:واش كتفهمي ولا لا مستحيل مستحيل ولدي يتعرف على انسانة قذرة فحالك..

أيلول غير كتشوف حسات براسها فمسلسل واذي الدئاب عيات متصنت وماقفلات والو..

حطات يديها على كتفو ..حتى ضار عندها بشوية

أيلول:تعطلنا على رياض..غادي يتقلق

عبيقة:(شاف فالساعة) قربات تضرب 12..واخا تسناي نجري على هاد لكارتة..

ورجع ضار عند هازال...وهضر معاها بلغتها

عبيقة:سالينا لهضرة وماغادي نزيد حتى كلمة 

هازال:غير نشوفو بليز أيغد بليز..

عبيقة:لا هي لا...

أيلول:مالها اش بغات..

عبيقة:بغات تشوف رياض..

أيلول:(تنهدات)خليها تشوفو من حق رياض يشوف ماماه واخا تكون هي مامزياناش..خليه هو يقرر

عبيقة:هادا هو رأيك...

أيلول:اه خليها..

عبيقة:ففف واخا..(ضار عند هازال) دخلي ولكن متقربيش ليه حتى نبغي انا 

شد أيلول من يديها وباسها تحت نضرات هازال..دخلو وخلاوها مدابزة مع الشانطة ديالها..حيت نيشان من المطار جات لعندهم...

داز هو وأيلول لكوزينة ..هزات هيا الطباسل والفورشيطات ..اما هو هز الكاطو وخرجو لصالا لقاو هازال واقفة كتشوف فالمعروضين ..الدراري الصغار غير شافو الگاطو بداو كيتناقزو ..ومنهم حتى رياض..

حطو الكااطو فوق من الطابلة الطويلة ..ورجعو اللور كيتسناو يبدا لعد لعكسي ل 12 ديال ليل ..جاار معاه أيلول فينما مشا ..داها معاه لجيهت الديدجي لي جاب طلب منو يبدل لأغنية..بدلها لأغنية "سلمى رشيد سمعني نبضك "..جر أيلول من يديها حتى وصلها لخوية لي كاينة لوسط حط يديه على خصرها وجرها لعندو مقربها منو ..حطات يديها فوق كتفو وراسها على صدرو متفادية نضراتو حيت مازال متوترة من داكشي لي طرا فالكوزينة..مادام ماقالش ليها كنبغيك فقررات تصنت لدقات قلبو لعلة وعسا تلقى فيهم الجواب..كيراقصها بخفة وكيحركها على لحن الأغنية..نضم ليهم سيمو ومراتو والدراري وصحاباتهم.. 

هزات فيه أيلول عينيها مدمعين شوية كيبريو..

عبيقة:أيلول مالكي..

أيلول:والو..عييت..

عبيقة:واخا اجي نجلسو..

مشاو جلسو فسداري ..ايلول كتفرج فليكوبل كيشطحو وعبيقة كيلعب ليها فشعرها ..حتى وقفات عليهم هزال...

هازال:أيغد واش ليوم عيد ميلاد رياض..

قلب عينيه وجاوبها بالدرجة...

عبيقة:لا مختنينو...الق**وي عصبتني هاد خيتي..

أيلول غير ساهية لدرجة ماداتهاش فيهم..وهازال كتشوف فيه مافاهما والو..

هازال:شنو..

عبيقة:اه عيد ميلادو..دوزي شدي،شي قنت متبانيش قدامي..

دارت داكشي لي قالت ليها وقلبتها تبرگيگ حتى هي كتشوف غير فأيغد ومرة مرة فرياض وأيلول لي باغا تفهم شكون هي...

تجمعو كاملين على الطبلة مزيدين رياض لقدام وبجنبو ايلول وعبيقة..طلق ليهم الديدجي اغنية العيد ميلاد "سنة حلوة يا جميل" وبداو كيغنيو معاها..طاففين الضواو مخليين غير شمع لگاطو مضوي عليهم..حتى كملات لأغنية ونفخ على الشمع بعد ما تمنى أمنية ..تحت تصفيقات الكل عاون عبيقة ولدو حتى قطع جوج طروفة من لگاطو ..هز طرف صفير بطبيعت لحااال وكلو لباباه ..والطرف التاني وكلو لأيلول..لي هزات حتى هي شوية اوكلاتو ليه...هنا هازال تقرصات كانت شادة القنت كيف وصاها عبيقة ..منبوذة على لكل فحالا فيها الجدام..غير كتشوف وتخنزر ودماغها كيفصل ويخيط..

قطعات أيلول لگاطو وحطات فطباسل صغار وفرقات على المعروضين ..بانت ليها هزال جالسة بوحدها هزات ليها طبسيل ومشات لعندها ..

أيلول:(مدات ليها الطبسيل) شدي حنجري..تاكلي فيه السم..انا بغيتو يبرد ليك فالركابي..اختي غير قولي ليا هاداك وجهك ولا طرمتك...اختفووو على بشار ولينا نوحلو مع التواركة

هازال:(مافاهما والو) مفهمتكش شنو قلتي..

أيلول:شناااوا والله تنريب لختي فمها..وبقاي تعوجي ليا دوك الشلاقم تم..

ومشات تتفرق المشروبات معاونة عبيقة مخلياها مفاهمة وااالو ..

جمع الدراري الصغار وكيفوح عليهم خصوصا بعد ما هداه باباه سكوتر اخر مخرج ولكن ميسوقو حتى يكبر...شافها تتنقب من داك الطبسيل لي عطاتها ايلول ..خلا البراهش جالسين ومشا لعندها وجلس حداها هي شافتو بتاسمات..

رياض:كلك زبدة ومنين نبدا...

هازال:نتا رياض صح..

رياض:(مفهمهاش فهم غير رياض)الزين كيعرف سميتي..اح اقلبي..

هازال:نتا زوين كتشبه ليا ولباباك..

رياض:عمتي طرجمي..

هازال:غادي نتجمعو اكيد...ونعوضكم على كولشي

رياض:الاخت من السويد ياك!! التيتيز اعمو ..ضبري على خوك بشي درهم لايحاافضاك..

هزال:(لايحافضك قالها بواحد الطريقة ضحكاتها)ههه شنو..

رياض:احح ميمتي قلبي غادي يسكت يخلي لي الإبتسامة...

حتى وقف عليه عبيقة هزو من قرفادتو..

عبيقة:اش تدير هنا..

رياض:جيت غير سلمت على التيتيزة..ياك أخالتي

عبيقة:سير تلعب مع لولاد ..

طلقو ومشا كيجري كيلعب وكيشطح ناشط وفرحان مع راسو ..

تعشاااو الناس من البوفي المفتوح لي كان مقابل مع الصالا كان فيه انواع واشكال المملحات عاد لميني بيتزا والبسطيلة ..وحداه المشروبات ..لعبو وضحكو مع الكلون وشطحو وفرحو من قلبهم ..نيت هاد لعيد ميلاد جا فوقتو شحال من واحد كان طايح عليهم الضيم ..وبوصل الساعة ل 2 ديال الصباح بدات الدنيا كتخوى بشوية بشوية حتى بقا غير ايلول وعبيقة ورياض وهازال ..شي كيشوف فشي 

رياض:الواليد شكون هاد الخير..

عبيقة:احم رياض نتا كبرتي ياك وليتي راجل...

رياض:اه ابابا راجل ونص..

عبيقة:هاديك ابابا ماماك...ماماك هازال..

رياض:(مصدوم)شنااوا..ماما

عبيقة:اه ياك كنتي باغي تشوفها اوا هاهي جاات..

رياض:دابة عاد طفات عليها الشمعة..صباحتولاه 

عبيقة:ريااااض عيب 

رياض:انطلع نعس ابابا عييت..

عبيقة:ماباغيش تعرف عليها ..

رياض:لا تعرفو عليها غير نتوما...

عبيقة:حشومة اولدي..

رياض:بابا والله تا عيان..انطلع نعس طلعو ليا كادوااتي..

ومشا فحالو داز من حداها قال ليها هاد جوج كلمات وطلع فالدروح..."كوليني بعينيك"..ملي. شافتو طالع مخنزر وحاقد على الوضعية ناضت عند عبيقة تستفسر منو...

هازال:أيغد ماال ولدي..

عبيقة:ولدك توتوتو ولدي انا ولدي بوحدي..

هازال:أيغد بليز..

عبيقة:الالة ولدك مابغاش يشوفك 

هازال:لا مايمكنش علااااش

عبيقة:من نيتك ملي تزاد ماشافك بغتيه يستقبلك بالحليب وبالتمر فين اللوجيك 

هازال:انطلع نهضر معاه...

جات طالعة وقفها صوتو لي تسمع الصدى ديالو فالدار..

عبيقة:طلعي نهرس ليك رجليك...دابة غادي تمشي تنعسي..وخير مني انعطيك بيت وماغاديش نلوحك فالزنقة...

هازال:علاش تتعامل معايا هاكا..ياك كتبغيني..

عبيق:هههه لا مسكينة تاترت (وقف)

تبعيني..

تبعاتو وداها لواحد لبيت كاين فالسفلي نقي ومسيق فيه ناموسية ديال جوج الناس وزربية وماريو ..

عبيقة:الغطاوات فالماريو..

وخرج فحالو مخليها غادي تبخ الدم..ورجع عند ايلول لي لقاها كتر من هازال طالعة ليها القردة لسطح..كتهز فالماعن وكتنقل لكوزينة..عرفها مقلقة غير من ححبانها لي عاقدة وطريقة باش كتهز لماعن..ضحك فصمت ومشا يعاونها وكيتحاااك معاها وهي تتنفخ وتتبعد حتى عصبها ونفاجرات عليه.

أيلول:شنو انا بالنسبة ليك

عبيقة:(تفاجئ)مفهمتش.

أيلول:(ضحكة استهزاء)ههه مفهمتيش بصح

هزات الكيسان وداتهم لكوزينة ..تبعها مفاهم والو ..لقاها كتستف فالكيسان فوق البوطاجي باش تغسلهم غدا لفام دلميناح...شدها من كتفها باغي يضورها لعندو.تعكسات ليه..حتى تعصب وضورها لعندو ...

عبيقة:أيلول مااالك فهميني..

أيلول:واااالو ماماليش 

عبيقة:هضري مالك (هضر مغزف)

أيلول:هاديك اتبات هنا..

عبيقة(بتاسم)الحب غيران..

أيلول:الحب زمران...حيد من الطريق...

عبيقة:(قرب كيحك نيفو مع نيفها)بغيتي نبيتها فالزنقة وهي مع زعرة وبلقة يصدق مغتاصبها شي حد...ترضايها لمامات رياض..

أيلول:(دفعاتو) لا منرضاهاش ليها ومنرضاهاش حتى لراسي..

دفعاتو وخرجات لصالا وهو تبعها كيضحك..لقاها كتلبس فطالونها

عبيقة:صافي غادا 😑

أيلول:اه غادا نخليكم تاخدو راحتكم..باش ترجعو عائلة كيوت

عبيقة:واخا نيت نمشي نطل عليها واش مغطية ولا لا لبرد عليها...

أيلول:أيييييغد ولا الزمر متعصبنيش..

عبيقة:(تمشا جيهتها)وينو الحب تعصبات..

أيلول:تصبح على خير

جرها لعندو معنقها وعاصرها بين دراعو

عبيقة:(بجدية)واش نتي هبيلة..هاديك اخر وحدة نشوف فيها على شنو دارت فيا وفولدي 

أيلول:بصح..

عبيقة:بصح(سكت)...واخا زيانت العفريتة..

ضرباتو لصدرو..

أيلول:طلق مني تعطلت..

عبيقة:(شد ليها وجها بين يديه) كنت حالف منفتح قلبي لشي وحدة حتى جيتي نتي وقلبتي ليا المارا ديال عقلي..غير نتي لي عندي ونتي لي كاينة هنا❤(اشار لقلبو)

سحبات وجهها من بين يديه بهدوء هضرتو مأتراتش فيها لأنها ماشي هادشي لي كانت باغا تسمع..واخا قاليها بلي غير هي لي عندو ولكن ماقالش الكلمة السحرية لي شحال تسناتو يقولها وهو ولا على بالو فحالا مابغاش يفهم والواضح انه كيتهرب منها..ضارت عندو بهدوء قاتل عكس العافية لي شاعلة فقلبها من جيهتو..

أيلول:أيغد بغيت نمشي تعطلت 

عبيقة:واخا حبي ..

تمشاو جيهت لباب دارت ليزارها وكيفما دخلات خرجات ...بقا عبيقة حاضيها حتى حلات الباب بالساروت ودخلات بدون متلتافت ليه..الشيء لي خلاه يفكر فشنو دار ليها فشنو قلقها وفأشنو قصر من جيهتها خاصة بعد ما شاف الحزن فعينيها..

ردات لباب بشوية ولكن تسمعات زيييييط هاداك الصوت العجيب لي كيدير لباب..غمضات عينيها فحالا كتسكت هاداك الصوت باش ميسمعوهاش..بقات جامدة فبلاصتها حتى تسد لباب..حيدات الطالون وطلعات بشوية درجة بدرجة ..حتى وصلات لباب بيتها خشات يديها فصدرها جبدات الساروت وكتقلب على التقبة غير بيديها مع الضلمة..ملقاتها حتى غفر ليها الله الدنوب ..حلات الباب بنفس الطريقة لي حلات بيها الباب الكبيرة وغير دخلات وعودات سورتات عليها الباب تنفسات براحة وكأن هم كبير ونزاح عليها .. شعلات الضو من لانگاسا لي حداها..

لاحت الطالون فالأرض بعشوائية تبعات ليه ليزار بقات غير بديك لكسوة مبينة فورمتها...تمشات لجيهت لمرايا لي فالماريو...مرايا طويلة كتشوف فيها راسها عل طولتو..وبدات كطلع فراسها من رجليها لزغب راسها وكضور تتعطي للمرايا بطرمتها باش تشوفها ..

عاودات ضارت وبدات كتلعب بشعرها مرة تهزو تعليه لفوق ومرة تقلبو كامل جنب...حتى نطقات بصوت عاامر حزن..

أيلول:حيت هي بيضة وأنا سمرا..باش حسن مني هي..باينة للعما بلي مكيبغينيش غير انا لي كنضحك على راسي..

تنهدات بألم ملي سمعات تلفونها كيفيبري من صدرها...

حتى شافها دخلات عاد دخل حتى هو..داز على الصالا طل عليها فحالا دايز عليها إعصار...عارف غدا غادي تجي للمرا ديال الميناج... تمشا غادي فحالو حتى وصل لبيت هزال تنهد بحيرة ماعارف ما يديرر مع هاد لكارتة لي تسلطات عليه كيف قال هو..من واحد الناحية عجباتو ردة فعل رياض من جيهتها..باغيها غير امتا تمشي فحالها حيت بصح خربقات ليه حياتو فهاد 3 سوايع لي شافها فيهم ..

طلع فالدروج كيحك فشعرو من اللور...داز على رياض ...طل عليه لقاه مبدل حوايجو ومعلقهم فالعلاقة لي حدا الماريو.. مكرشخ فالنعسة قادو وغطاه ..باسو وخرج لبيتو...حيد ديك لگرافاط تبعها القميجة..عاد السروال بقا بالبوكسر...جبد من الماريو شورط كيطمة كحل ..لبسو وبقا عريان من الفوق.. جبد كاشميرا طلقها على الناموسية وتلاح بعياااه..

تماطا لتلفون لي كان فوق الكوافوز حتى خداه...دار لكود ودخل لتصاور ..جبد تصويرة كان صورها هو فلعيد ميلاد لأيلول ورياض ..أيلول واقفة وهازا رياض وهو معنقها وكيشوفو بجوج فلكاميرا مبتاسمين..بتاسم وهو كيزومي عليها وعلى ضحكتها لي باينة من لقلب وماشي مصطنعة ومشا كيفكر فعلاقتو بيها واش فعلا باغيها ..واش فعلا ناويها حلالو ونصو التاني..واش بصح باغي يكمل معاها حياتو ويربيو رياض بجوج ويتشاركو الحلوة والمرة..حتى يشرفو بجوج ويدي مول الأمانة أمانتو...رجع للواقع بعد ما خدا قرار وقرار لا رجعة فيه...دار ديك التصويرة فالشاشة ديال التلفون وخرج دوز نمرة أيلول..وكيوجد الهضرة باش يراضيها...

طييييط طييييط..

أيلول:الو..

عبيقةالو حبي..قلت غادي تكوني نعستي..

أيلول:(ببرودة)لا مازال مبدلت حتى حوايجي..

عبيقة:عيتي معايا ليوم ياك حبي سمحي ليا 

أيلول:لا مدرت والو ..عادي والله..

عبيقة:أيلول

أيلول:نعاااام...

عبيقة:سمحي لي...

أيلول:علاش درتي ليا شي حاجة ومفخباريش

عبيقة:اه درت ليك...

أيلول:نو مدرتي والو غير رتاح...

عبيقة:والله حتى عزيزة عندي وبلاصتك كبيرة وغالية

أيلول:(عصبها)عارفة ربي يخليك...عييت وبغيت نعس

عبيقة:غدا معاش خارجة..

أيلول:قاريةحتال لعشية وخارجة مع 3..

عبيقة:مزيان...يلاه تصبحي على خير اكبيدة..

مجاوباتوش وقطعات عليه...عاد مازال عصبها بديك عزيزة عندي...لاحت التلفون تحت لمخدة بعد ما دارتو صيلونص...حيدات ديك لكسوة ..خشاتها مع خوتها بلا متمحن راسها وطويها...جبدات بيجامة بياسة وحدة بلا كمام...مشات حلات لباب خلاتو غير مردود ..باش الا جات ماماها بلا متبقا دق..وتلاحت ففراشها جامعة ركابيها لعند صدرها وسهات كتفكر فلبوسة كانت هادي اول بوسة ليها ومع الشخص لي كتبغي..حسات بالفراشات كيطيرو ليها فكرشها ملي تفكرات ديك اللحضة وبزربة نعسات من شدة التعب...

اما عبوقتنا.بعد ما قطعات عليه..بقا مدة ليست بقصيرة فغدا وشنو موجد ليها ..بعد ما تأكد من مشاعرو وأحاسيسو تجاهها فقرر يصارحها وعلاش لي يخبي ..

مافاقت ست الحسن والجمال حتال 11 خصوصا بعد سهرتها الطويلة لي ماسالات حتى قرب يطلع لفجر..مافاقت الا وعلى صوت مول الحوت داخل من شرجم بيتها..حلات عينيها بتعب مازال فيها النعاس ولكن شكون خلاااك...بقات مايقارب 10 الدقايق فالفراش حالا عينيها ..كتسترجع ذاكرتها ..حتى دازو عليها جميع احدات لبارح وحللات وناقشات مزيان عاد ناضت ..نيشان لطواليط..وغير شافت وجهها فالمرايا قفزات تتحقق فوجها..جنية ولا اش بغات تكون..خصوصا انها نعسات بالماكياج والعكر كرونة ماااط طلع ليها لجيهت لحاجب...غسلات كمارتها بصعوبة بالصابون ..قضات حاجتها وخرجات..دازت على ماماها فالبيت صبحات عليها عاد هبطات تفطر..دارت فطور خفيف وطلعات لبيتها تاني ..هزات التلفون تتفكر وتصوني ليه ولا ..باغا تعرف اش دار مع هازال ..بقات مترددة شحال فالأخير رجعاتو لتحت المخدة..بحجة انها مازال مقلقة منو... 

شافت فالساعة لي فالحيط لقاتها باقي لحال على 2 جبدات الكتوبة وقالت تراجع شوية ولكن شكون لي خلاك...الجسد هنا والعقل فدار حبيبها كيف سماتو هبا حمار أحلامها...

أما سي عبيقة فاق مع 10 ..حتى هو ناض ماساخيش كون ما تصاب رياض قاري كون جبد عليها حتال 12 ...غسل وجهو لبس كيطمة من الفوق ساتر راسو من عينين هازال..طل على رياض هو اللول لقاه ناعس عاد هبط ..داز من حدا لبيت لي نعسات فيه لقاه باقي مسدود ادا مازال ناعسة...لعن زهرو فنفسو وتحرك للكوزينة...عصر لراسو قهوة كحلة بلا سكر ...شربها على الريق مع گارو باغي يرد مجاجو هو اللول..حتا تنشوة على خاطرو عاد دار لما يطيب فمقراج باش يعمر اتاي...

وجلس فصالا مونجي حاط يديه على حنكو كيرتاشف داكشي لي بقا من القهوة ..وكيفكر فحريرتو ..عارف رياض واخا دار ديك ردة لفعل ولكن راه باقي طفل اكيد غادي يبغي ماماه وغادي يطمع فحنانها وحبها...لا ولا فكرات تديه ..والأسوأ إلى قنعاتو يمشي معاها...سد عينيه بخوف من المستقبل ومسح على وجهو ملي شافها داخلة كتمشى بالحفى على صباع رجليها صابغة ضفرانها بالكحل..لابسة شورط بيجامة وضوني ديالو..فخادها عريانين بيضين وعامرين...نعل الشيطان فسرو وقلب عليها وجهو ولكن شكون خلاك...

هازال:صباح النور أيغد..

عبيقة:(بالمغربية)صبحنا على الله...

تمشات حتى وصلات حدا الطابلة جرات لكورسي لي مقابل معاه وجلسات دافعة صدرها عرربون...

هازال:مفهمتش ..هضر معايا بلغتي..

عبيقة: ماغاديش تمشي فحالك خلاص

هازال:عيب عليك..راني بنت خالك زعما..

عبيقة:بنت ز**بي(كمل بالتركية) خاصك تمشي..

هزال:نشوف ولدي وكنواعدك نمشي..(رمشات عينيها كتحلون)واخا كنت باغا نرجعك ليا ولكن للأسف

عبيقة:ترجعيني ليك مونيكة انا ...

هازال:تمام تمااام ..نشوف ولدي ويعرفني ماماه ونمشي

ماحاوبهاش وناض يعمر أتاي ..وهي مقابلاه كي النمر ملي كيراقب فريستو..

هازال:رياض مافاقش !!

عبيقة:بان ليك هنا ؟؟ لا ادن مازال مافاق 

هازال:اه اوكي..

عبيقة:ياك كنتي تزوجتي ولا لا..

هازال :اه تزوجت ولكن طلقت...

وقفات وتمشات لجيهتو وبسرعة عنقاتو من ضهرو كتلمس فصدرو ..وقف على الحركة كيتسناها اش باغا دير..

هازال:طلقتو حيت مقدرتش نساك...كنبغيك أيغد 

ضحك باستهزاء ..حط من يديه البواطة لي فيها اتاي ..وضار لعندها مخلاها فين تحرك..شدها من عنقها وهزها حتى رجليها تهزو معاها ولات واقفة غير على الصباع...

عبيقة:هادوك الخزعبلات كوليهم...شبعتي ز**ب و ق**وة عاد جاية تزوملي عليا ...انا دابة إنسان خاطب وقريب نتزوح(خرجت عينيها ) اه اه متصدميش وهاديك لي شفتيها لبارح هي خاطيبتي لالاك ..حياتي وروحي ومامات ولدي..

هازال:(مخنوقة ) انا هي ماماه (زير عليها)لا عفاك مديرش ليا هاكة ياك كتبغيني تفكر ايامنا الزوينة...لا نتا ماخاطبش غير كضحك عليا...

عبيقة:واش مكتفهميش كنكرهك..وغير غادي نشوق قرار رياض غادي نرميك للزنقة ..

يالاه جات تجاوبو وهو يسمع صوت رياض كان كيقلب عليه

رياض:واااا عبيقة فين غاطس اصاحبي..

..رماها من يدو مخليها كترد فالنفس..ومشا تلقا لولدو ..رجع بيه لكوزينة هازو ..كان كيضحك غير شافها جالسة كتشرب فالما قلب وجهو وعقد حجبانو الصغيورين..خربق ليه على شعرو وحطو حداه فوق للبوطاجي ممصوقينش ليها وماعطينهاش اي اهتمام..

عمر أتاي ..وقادو فالصينية مع لكيسان ..حط الزيتون فطبسيل هو والفرماج والكاشير و العسل والزيت لعود .. هزهم هو ورياض حطو داكشي فالطابلة وغير يحط شي واحد فيه شي طبسيل فوق الطابلة تنقب منو هزال حت كيضربها ليها بأحسن تخنزيرا وتجمع يديها عندها..جلسات فحال الأميرة وهوما كيتسخرو عليها..كون ما حشم كون شدها من قرفادتها ولاحها برا لباب..حط لخبز والحليب ..وجلسو كيفطرو بتلاتة...

هز عبيقة لكونفليكس وقادو لرياض وعطاه ليه..بقا غير كيلعب بيه بالمعلقة باين ماعاجبو حال..شافو عبيقة وعارفو فاش كيفكر ..مسح ليه على راسو وسولو بقلق..

عبيقة:مالك ابابا...

رياض:شكون هاد ختنا فالله!!

عبيقة:ماماك...

رياض:ومالها معرية علينا معندها متلبس ..

عبيقة:متعمرش راسك بهاد شي ...فطر ابابا..ياك انا عزيز عليك وكول عفا ولدي...

رياض:فففف واخا...

بدا كيفطر كيف قاليه باباه ..اما لالة هازال دارت شرع يديها..عجبها اتاي فينما يخوا ليها لكاس تمدو لعبيقة يعمرو ليها وهو غير مصبر راسو قدام ولدو اما كون ناض خواه ليها على طرمتها...

رياض:جاية سياحة...كولي تاكلي فيه السم...

عبيقة:رياض حشومة...

هازال:اش قال..

عبيقة:ونتي شغلك..دخلي صوق راسك...ههههه والله تا علااام فيلم واشمن فيلم هدا

كملات فطورها ونساحبات بهدوء لبيتها...حتتى هوما كملو وخلاو داكشي حتى تجي ليه لمرا ..مادازت 10 دقايق وسمع الدقان كانت هي حل ليها الباب أ وراها منين تبدا...خلاها تجمع وجر رياض مطلعو لبيتو يعومو...تعراو بجوج وتخشاو فالبااانيو دار ليه خاطرو وعمرو ليه بالرغوة مخليه كيلعب فالما محد باقي ليه لوقت على لمدرسة...تبرهش معاه عبيقة وبقااا كيلعب معاه...خرجو بجوج للرشاش تشلو بالخف وخرجو لابسين بينوارات بيضين..

لبس لرياض هو اللول باش ميضربوش لبرد..لبس ليه بوكسر كحل وإيكسا مع تيشورطة حمرة وسروال تجينز كحل ..لبسو تقاشر ..وعطاه شكارتو يحفض بين ما وصل عليه لحال لمدرسة ...

خلاه كيحفض ومشا لبيتو ..لاح البينوار فالأرض وتمشا عريان حتال لماريو ..لبس بوكسر زرق ..إيكسا بيضة ..سروال جينز زرق باهت مقطع شوية من جيهت لفخاض..وتيشورطة بيضة سامبل...مشط شعرو ورش ريحتو... لبس سبرديلة كحلة فيها جوج خطوطة بيضين هز فيديه كويرة كحلة ..طل على رياض وشافو فين غادي مع حفاضتو ..عاد هبط لقا المرا قربات تسالي..عطاها 200 درهم ومشا لبيت هازال..دق عليها وتسناها حتى خرجات عندو بشورط تجين كحل وقميجة صفرة حازماها جيهت لخصر...غير شافها كحل بالعما..

عبيقة:تستري قدام ولدك...راه عيب هادا لمغرب ماشي تركيااا.

هازال:علاش مالهم حوايجي....

عبيقة:لبسي..واجي عندي لصالا خاصنا نهضرو

هازال:اوكي...

مشا وخلاها واقفة حدا لباب..جلس فالصالا كيخربق فتلفونو ..بعد 5 دقايق جات هزال لابسة سروال كحل واسع وقميجة بيضة بالكماام خاشياها فالسروال...جلسات قريبة ليه شوية...خنزر فيها وهي تبعد..سد التلفون وخشاه فالجيب ديال لكويرة.

وشاف فيها بنضرة حااادة...

عبيقة:دابة غادي نعيط على رياض..غادي نسولو واش باغيك...وكيف ما كان قرارو غادي نحتارمو ..

هازال:اوكي...

عبيقة:يعني بغاااك مرحبا..مابغااكش غادي تهزي حوايجك ومنعاودش نشوف كمارتك..

هازال:(بلعات ريقها)واخا ...

تمشا حتال جيهت الدروج وعيط بالجهد...

عبيقة:ريااااااض رياااااض

من القوق...

رياض:نعام أعبيقة..

عبيقة:هبط أبابا واحد الدقيقة...

رياض:واخا انا جاي..

وغير رجع لصالا وجلس كان رياض جا ..وما ان شاف هازال خنزر ..

رياض:هانا الواليد شنو...

عبيقة:اجي جلس حدايا بعدا...

قرب وجلس فحجر باباه...بلع ريقو وكيقلب على منين يبدا..خايف بزاف رياض يختار ماماه.يقدر يموت فيها..حيت متعلق برياض لواحد الدرجة كبيرة...

عبيقة:شوف ارياض نتا وليتي راجل دابة..

رياض:اه وليت رااجل نوريك...(عرا على كتافو كيوريه لعضلات)هانتا شوف .

حط يديه على كتافو كيتلمس ليه العضلات

عبيقة:هاااي هاااي امتا ربيتي هادشي...

رياض:شوية ديال السبور والقس..راك عارف صعيب تهلا فالفورمة

عبيقة:(شدو من وجهو بحنان مقربو ليه وباسو بجهد )احححح شي نهار الناكلك. على هاد لهضور...

رياض:(بصوت منخفض)ولا الواليد ماشي قدامها.

عبيقة:هههه واخا..احم نرجعو لموضوعنا...

رياض:كنسمعك..

عبيقة:كيف كتعرف هادي ماماك سميتها هازال من تركيا ...ماكانتش فجنبك لشي ضروف بلا مندكروها حسن..ودابة جات تشوفك وبغات تعرف عليك..

رياض:(بدون مبالاة)ومن بعد..

عبيقة:ياك كنتي ديما كتسولني عليها.اوا هاهي قدامك تعرف عليها

رياض:وا تعراااافت عليها صافي

عبيقة:لا ماشي هاااكا..المهم نتا وليتي كبير تبارك الله وخاصك تختار...

رياض:اشنو نختار...

(سرط ريقو..لي هبط مع حنجرتو فحال السم..حس بمراارة فحلقو مقدرش ينطق..هضر بصعوبة وبحة فصوتو)

عبيقة:خاااصك تختار..(سكت وشاف فعينيه) تختار بيني وبين ماماك...واش بغيتي تبقا معاها ولا معايا!.

رياض:ياااه لهاد الدرجة متقل عليك اصاحبي..

عبيقة:(عينيه دمعو وجرو من يديه لحضنو)من نيتك اصاااحبي...معمرك تقول متقل عليا واخا دير 40 عام غادي نبقا معاااك ومعمرنا نتفرقو...

هازال:(مافاهما والو)اش واقع...

خنزر فيها بمعنى تسكت وكمل هضرتو مع رياض...

عبيقة:ولكن من حقك تختار معامن بغيتي تبقا وقرااارك غادي نتقبلو كيف ما كان...

بعد من حضن عبيقة وباسو فحنكو بجهد ومشا لجيهت هازال لي فرحت ملي شافتو جاي لجيهتها ..ومدات دراعها ليه على شكل عناق...نزلات دمعا من عين عبيقة وتبعاتها لاخرة كيتسابقو..مسح عينيه قبل ما يشوفوه وبقا حاضيهم والحرقة كطلع وتهبط فيه...إحساس بالإختناق لا بالموت ..فحالا الهوااااء ماكاينش ..هادشي كاامل حس بيه وهو كيشوف فرياض غادي لجيهت هازال ...

😭😭😭😭😭😭😭😭😭😭😭😭

بسيف باش حااابس الدموع باش مينزلوش..كيفما كان الحال كايبقا راجل وماخاصوش يبكي..

وسبق ليه أواعد رياض بلي غادي يحتارم قرااارو كيف ما بغا يكون مراقبهم وإحساس الإختناق مرافقو...تمشا لجيهت هازال لي دايرة بتسامة نصر..فحالا ربحات فشي معركة دامية..لكن طرا مالم يكن في الحسبان...

مابقا كيفصل بينو وبينها غير سنتيميتراات قلال..وقلب الضورة لجيهت الدروج قبل مايوصل ليها مخليها مصدومة فيه...

رياض:عبيقة وريها المطار فين جا...ومتعطلش تابعاني لمدرسة...

من قوة الفرحة وقف ولا كيحرك راسو ب أه بزربة..عاد رجعات فيه الروح ..وعاد ولا كيدخل لهوااا لرئتيه فحالا رجع من الموت.لأن فعلا رياض هو حياتو وإن صح القول روحو..عكس هازال لي ركزات الشوفة فيه مصدومة وهو طالع فالدروج كيتعنگر عاجبو راسو والصرف لي رجع ليه وهادشي لي قال ليه عقلو الصغير انه ملي دار ليها هاكا فحالا رجع ليها شوية من داكشي لي دارت ليه ..بقات مراقباه حتى غبر وضارت عند عبيقة باغا تستفسر منو شنو قال...

هازال:ايغد...شنو قال رياض..شكون ختار!!

عبيقة:(ضحك من الفرحة)ومزال كتسولي...راه من اللول باين شكون غادي يختار غير بغيتك تشوفي على عينيك...

هازال:بمعنى !!

عبيقة:بمعنى ان ولدك قال ليك الا مكنتيش كتعرفي المطار فين جا..باباه لي هو انا يوريه ليك..

هازال:لااا مايمكنش...

عبيقة:غادي نمشي نوصلو لمدراستو نرجع منلقاااكش..فهمتي منلقااش حسك...

خلاها تستوعب شنو طرا ..وطلع فالدروج فرحان كيصفر...مشا نيشان لبيت رياض لقاه كيلععب بوحدة من الألعاب لي جاتو كادو لبارح. ممسوقش هو لي بغا يموت يمووووت...ماحس براسو حتى لقااا عبيقة هازو وجاامعو بين يديه كيضور بيه وفنفس لوقت كيبوسو فجميع مناطق وجهو..

رياض:هههه باراكا ابابا.هههه جاتني الدوخة ههه

عبيقة:ربي يخليك ليا احسن ولد فالعاالم واحسن رياض فالعاالم

نزلو وحطو فوق الناموسية وتكا حداااه يرد النفس..مشادين من اليدين..علاقتهم فاتت علاقة الأبوة ..علاقتهم علاقة لي صعيب يفهمها لواحد...رياض جا كهدية من الله لأيغد فواحد الوقت لي كان فاقد فيه الأمل من الحياة ..فالوقت لي ماماه ماتت وحتا باباه والبنت لي بغا مابقاتش باغاه والأكتر خانتو...رياض هو الحاااجة لي خلاتو يتشبت بالحياااة ويعاود يبغيها من الأول...

رياض هو الحاااجة لي خلاتو يتشبت بالحياااة ويعاود يبغيها من الأول...

رياض:بابا..

عبيقة:نعاااام..

رياض:كنبغيك

عبيقة:وانا كنتشرشم عليك...كنتوفا ...كنمووت عليك..نتا احسن حاجة طرات لي فحياااتي

رياض:وتاني حاجة هي ايلول..

عبيقة:الحب هاديك

رياض:عبيقة عنيبا اووووه عبيقة عنيبة اووووخ

قلبوها ضحك..شاف فالساعة لقاها 40:11...ناض 

جمع ليه كتووبتو ولبسو سبرديلة بيضة أديداس ..هز ليه شكارتو سبايدر مان ونزلو فالدروج ..داز لصالا هز كويرتو..لاحض عدم وجود هازال عرفها غادي تكون كتجمع حوايجها..داز لكوزينة وصا لمرا ديال لميناج ماتمشي حتا تمشي هازال.فحالها ..جر ولدو وخرج...وغير خرج هز عينيه جيهت شرجم أيلول ..ركب وركب ولدو قدااامو وديمارا فاتجاه المدرسة ...

ومع 12 نيشان كان قدام الباااب حطو باسو ومد ليه مادلين وعاصير شراهم فالطريق ..دارهم فالشكااارة باسو وتسناه حتى دخل عاد مشا ..رجع للدار ..لقا الدنيا صاقلة من غير لمرا لي فالكوزينة علماتو بلي مشات فحالها زادها 50 درهم ومشات حتاهي ..تنهد حتى تسمع صوتو ..فرحان حيت ولدو ختارو وحيت تهنا من هاد لكارتة كيف صنفها..

دار ضورة خفيفة على الدااار لقاها كتشعل..هو من طبعو نقي ومكيحملش العفن والوسخ وخاصة الروينة ..سورت الدار وخرج متوجه لكاراج...سلم على الدراري شاف لاكيص وراقب لخدمة شوية حيت هملها هاد الأيام..قربات تضرب 3 عاد خرج من الكاراج...

عبيقة:الو ..وي...كولشي مزيان...كيف وصيتك...اه اه 3 ونص نكون تما..تهلا..

وركب فموطورو متوجه لمدرسة أيلول...وصل تما بالضبط مع 2 و 40 دقيقة ..بلاصا الموطور وتكا عليه مقابل مع الباب كيتسناها بحماااس تخرج..

سرررررررررر تسمع الصونيط معلن على نهاااية الحصة ..بانو ليه البنات والولاد خارجين وهو داير معاهم لبااال لا تزهق ليه من شي قنت ..مع عارفها كتسها تقدر تشوفو وتقلب الشوفة..البنات غادي ياكلوه بعينيهم وكل وحدة كتساؤل شكون هاد سعيدة الحض لي كيتسنا ..

دازت 2 دقايق بالتمام والكمال عاد بانت ليه لالة مولاتي جاية تتجر فرجليها..وفعلا داكشي لي توقعو طرا شافتو ومدات ماجابت..بغا يعيط ليها وماغاديش تسمعو مع الصداع ...جبد التلفون من الكويرة ودوز نمرتها..بانت ليه جبدات التلفون شافت نمرتو ورجعاتو لجيب...بقا كيشوف فيها مصدوم والعصاب تمكن منو..مشا ليها طاير ..وقبل ما تقطع الشانطي كان وصل ليها ..شادها من قرفادتها ومرجعها لجيهت لموطور ..شداتها لقفقافة معرفاتو منين بعت ليها...

حتى وصلو حدا الموطور ونفضها من يديه كيشوف فيها شوفة لقتيلة..

أيلول:عععععبيقة

عبيقة:وليت عبيقة مابقيتش أيغد..

أيلول:إمتا جيتي..

عبيقة:تجي لمك فراس..دايرا ليا فيها كاجول ماباغاش تجاوبي ...

أيلول:لا لا غير كنت عيانة..وبغيت غير امتا نمشي لدار

عبيقة:كون جاوبتي كنت غادي نهز عليك لحجر.. (هز عليها يديه)

وابااز وجهك غير ديال التمرميق..

أيلول:(جاتها البكية)يااااك.

عبيقة:اه

نيت قلبها طايب من جيهتو ومن جيهت باباها ومن خلعة الباك..قلباتها بكا وتنواح..السيد داخ معرف باش تبلا ولا غير كيسايس وكيسكت ..ولي داز كيبقا حاضيهم الحاصول دار ليه الشوهة وخلاص خصوصا مع طلقات الحلوق وعندها واحد الصوت يا سلام..

أيلول:وانا مالي تتحگرو عليا..وااااااع ولا حيت تا العربي كيضربني أهئ اهئ 

عبيقة:ششش سكتي شوهتينا سكتي بغيت ليك اللقوة

أيلول:مدعيش عليا...(تتبكي بزاف) وانا عييت عيييت 

بقات فيه بزاف ..مالقا راسو غير جارها لعندو معنقها بجهد وكيطبطب على شعرها بحنان.

عبيقة:ماكاين لي يحط عليك يديه من حدي حي احبيبة..

أيلول:ياك نتا كنتي باغي ضربني..

عبيقة:تنقطع يدي قبل ماتحط عليك...

أيلول:(تتبكي) براااا عليك

عبيقة:يخليك ليا احبي ..يالاه صافي سكتي..

بعدات عليه كتمسح فوجهها بكف يديها وكتحرك راسها باه زعما أتسكت من البكا..باس ليها راسها ويديها وهي غير كتفرنس وكضور فعينيها لايكون شافها شي حد..

مسح ليها آتار الدموع لي بقااو ليها فعينيها..حتى شاف التنخصيصة حيدات منها عاد هضر وهو مازال شابك يديها بيدو..

عبيقة:مشينا !!

أيلول:فين؟؟

عبيقة:مفااجئة أكبيدة

أيلول:مفاااجئة وليا أنا بصح...

عبيقة:بصح بصح ...وا يالاه زيدي

أيلول:ولكن غادي نتعطل

عبيقة:واش عمرني عطلتك(حركات راسها بلا)اوا زيدي قدامي لانصدقو معطلين بصح.. 

أيلول:ههه واخا.. 

طلع فوق الموطور وركبات حتى هي وراه..

عبيقة:شدي فيا مزيان وديري لكاسك

أيلول:واخا...

دارت لكاسك وعنقاتو من كرشو حاطا راسها على كتفو ..ونطالق كيتسباق مع الريح...مسافة الطريق كان قدام قهوة كلاص جات حدا لبحر ..نزل هو اللول ومد يديه بكل جنتلمانية حتى نزلات وحيد ليها لكاسك مخلي شعرها كيديه وككيجيبو الهوا ديال البحر لي كان شوية مجهد..

جرها من يديها تاني فحال الأمانة فين ما حركها كتمشي..دخلو للداخل كانت الدنيا خاوية كتصفر ..تمشاو جيهت الدروج وطلعو وعلى طول الطريق مسكتاتش من الأسئلة..

أيلول:فين حنا؟ وشنو كنديرو هنا ؟؟ علاش القوة خاوية !! أيغد جااوبني؟؟فين النااااس...!؟ وفين هي المفاجئة ؟؟

دارت ليه الطيااارة فراسو .دار عندها بالعرض البطيئ مخنزر فيها وحاط صبعو السبابة على فمو بمعنى سكتي ..ولا إراديا حطات يدها على فمها وحركات راسها بواخا...

كملو الطليع فالدروج..وقبل ما يدخلو من واحد لباب ..سد ليها عينيها بيديه بجوج وزيدها قدامو كيتمشاو بشوية..دفع لباب برجليه..ودخلو ..

وما إن حيد يديه وشافت شنو كااين حلات فمها على مصرعيها مصدومة وفرحاانة فنفس لوقت..خصوصا أن هادي أول مرة يدير عليها شي واحد شي حاجة هاكة..وأول شخص يعطيها قيمة ويكبر بيها..كانت قاعة كبيرة مصبوغة بللبيض كتوسطها طبلة دائرية كبيرة بيضة مع جوج كراسا حمرين عامرة مأكولات بحرية ومشروبات مطلوقة موسيقى هادئة وزوينة..فالوسط كاين گاااطو شوكولا مكتوبة فيه سي حاجة ..حتى نقربو ليها ونعرفو اش مكتوب فيها...مع فوطوي بيض جيهت الزاج لي كيطل على البحر..عامرة بوكيات لورد فالحمر والبيض والشكلاط ماكاين فين تجلس ..فالأرض منتور الورد لحمر وبالونات على شكل قلب مزينين للغرفة..تخلطو عليها المشاعر وسرعان مادمعو عينيها..تلفتات عندو حاطة يديها على فمها.. عكسو هو لي كان كيشوف فيها مبتاسم وبدون حتى كلمة تلاحت عليه معنقااه زاد زيرها عندو كتر كيداعب شعرها وعلى فمها كلمة وحدة..

أيلول:شكرا..شكرااا

عبيقة:(بعدها عليه )نو ماكاين لاش شكرا..تستاهلي كتر..نتي ماعغرفاش قيمتك عندي..

أيلول:ههه تفاجئت (نزلو دموعها)

عبيقة:تو تو تو نتي عندك إعاقة فالمشاعر .تقلقي تبكي وتفرحي تبكي ..سكتي من البكا..

مسحات وجهها بكف يديها كتحرك راسها بواخا ..جرها لوسط وحط يديه على خصرها ويدو فيدها وبدا كيحركها مع الموسيقة..هي دغيا ترخات ومشات معاه..

وعلى ألحان الموسيقى الهادئة لي دخلات لمسامع ديالهم ..كان عبيقة ولا نقولو أيغد حسن ياكو...كان أيغد كيرااقص أيلول بكل احتراافية..مع العلم أن هذه تاني مرة يرقص فيها بطبيعت الحال من غير نهار لعيد ميلاد ..حاطا ودنها بالضبط على قلبو كتسمع لدقاتو لي شبه منتضمة ..نسات راها كانت مخاصمة معااه ملي شافت شنو وجد ليها..لا هي أصلا نسات كولشي ملي جا عندها ليسي..بعدات راسها وهزات عينيها كتشوف نيشان فعينيه بنضرة كلها حب...

أيلول:أنا فرحااانة بزاااف..

عبيقة:تستااهلي كتر ..منبغيش نشوف دموعك مازال..

أيلول:(تشجعات واخا كتحشم) ربي يخليك ليا..

عبيقة:(باس ليها راسها) ويخليك ليا وميحرمنيش منك...

شافتو محيدش عينيه عليها ونضراااتو دارو ليها نوع من التوتر ..وباش تفادا هاد التوتر نزلات عينيها للتحت وهوما مازال كيشطحو متفاادية شوفاتو لي كانو نااار ياخواتي ناار..

عبيقة:أيلوووول..

أيلول:(هزات راسها فيه)نعام 

وما إن علات عينيها فيه قرب بوجهو كامل معوج عنقو شوية باش يعنكشوش نيفها..تلاقاو شفايفهم ومشاو منجارفين مع إحساس الشهوة ..بقاو هاكاك ملاصقين كيتباوسو حتى تقطعات فيها النفس وبعد مخليها كتنهج..وقبل ماتلتاقط أنفاسها ..قرب لودنها ونطق بصوت خافت..

عبيقة: ❤Seni seviyorum

نطق التركية وبواحد الصوت كيبورش واخا مفهماتوش اش قال ولكن دخلات معاها حتال لعضم ..

أيلول:(عوجات وجهها كتشوف فيه) مفهمتش..

عبيقة:(عاود قرب لودنها) كنبغيك الحمقة..

الفراشات ولاو كيلعبو فكرشها لا شي حاجة كتر كتحس بمعدتها كتقلص وكتطلق ..وجاتها الدوخة حسات بالطونسيو طاح ليها..وشكات فراسها واش سمعات مزيان..حسات بالسخفة..وتكات على كتفو مزيرة عليه بيديها حيت كانو قراب بزاف..حس بيها وداها لجيهت الكورسي ..جلسها ومد ليها كاس الما..شربها ..رجع لكاس لطابلة وجلس على ركابيه..حط يديها على ركابيها...

عبيقة:مال حبيبتي مالها...

أيلول:ودنيا كيصفرو عليا..وجاتني السخفة..

عبيقة:ههه هادشي غير قلت ليك كنبغيك...علم الله الا تزوجنا..اش غادي ديري السوفل والو ههه

أيلول:(وجهها حمار)أيييغد..

عبيقة:ههه واخا واخا...

أيلول:هي سمعتك مزيان...

عبيقة:اه سمعتي مزيان..كنبغيك وكنحماق عليك...وغير تشدي لباااك نتزوج بيك واخا نعرف نديك بالسيف..

عضات على فمها من شدة لفرحة ولحماااس..وبدات كتبني فأحلامها الوردية..السيدة حلمات براسها فوق للعمارية گااع..

سهات وهي كتبني فأحلامها معاه طوبة طوبة تخيلات راسها بارززة معاه نخيلات راسها هي وياه فدار وحدة وتخيلات حتى شوية السفالة ..تخيلات راسها هي وياه ورياض مكونين أسرة صغيرة..حتى رياض منسانوش ودخلاتو فحلمها..وهادا إن دل فغادي يدل على قلبها لكبير وسداجتها ..حيت كون كانت شي وحدة شالوطية كون ماحملاتش ولدو..شافها سهات وطولات فالسهوة ..بتاسم أ وقف كيزعزع فيها بشوية من كتافها..حتى قفزات متداركة لوضع..

عبيقة:فين سهيتي

أيلول:ماسهيت فين..

عبيقة:كبيدة ديالي...

أيلول:(شدات ليه فيديه)كنواعدك ندير رياض بحال خويا الصغير نكونو كتر من الصحاب ..ماغاديش نقوليك فحال ماماه حيت ميمكنش نعمر بلاصتها..غادي نتهلا فيه وماغادي تخصو حتى حاجة..

عبيقة:(وقفها كيشوف ليها نيشان فعينيها)هادي مافيهاش الشك..عارفك اش كتسواي وشفت كولشي بعينيا..

بتاسمات ليه وقربها باس ليها راسها ..شدها من يديها جلسها ومشا لبلاصتو جلس..

عبيقة:متجاكش الجوع...انا بعدا كرشي كطلب الشرع

أيلول:كون تشوف أنا...

هز معلقة وبدا كيحط ليها فطبسيلها أنواع الحوت مع شلايض ..كب ليها من العصير وبداو الماكلة ..مرة توكلو مرة يوكلها...وهي بالها كولو مع هادشي لي دار ليها..فرحانة فرحااانة بزاااف .وفرحتها ما تباع ما تشرى...كل مرة تحبس المااكلة وتبقا ضور فراسها تستكشف القاعة من جديد...وهو كل مرة مفيقها يفكرها تااكول..

عبيقة:أيلول ماكليتي واالو معحبكش الحوت!!

أيلول:لا بلعكس زوين...

عبيقة:بصحتك احبيبة..

كياكلو فجو خالي من الصمت كيهضرو فكولشي فأي حاجة طيح ليكم على لبااال ..لي جات على فمها تقولها...والموسيقى لي كل مرة تبدل دايرة جو زوين فالمكاان...بقات تاني كتشوف هنا ولهيه..حتى ستقرات عينيها على الگاطو لي كاين فالوسط..ومع الكتاابة جات فالجيهة لي جالس فيها عبيقة..مابانتش ليه..عيات تعواج وتعنكش معاها ..الساعة والو مقشبلات تا حرف..وهادشي كااامل وهو حاضيها وكيبتاسم خافي ضحكتو ...حتى نطق بصوت زعزع ليها الكيان💙

عبيقة: أيلول كنبغيك

أيلول:(قلبها كيضرب) هااا

عبيقة:كنبغيك...ههه أيلول كنبغيك هي لي. مكتوبة فالگااطو..

أيلول:اااه (بتاسمات بإحراج) ههه

عبيقة:نقطع ليك منو؟؟

أيلول:اه الا بغيتي..

عبيقة:نبغي علاش لي مانبغيش العمر..

قطع ليها من الگااطو لي عجبها وزادها المرة اللولة ووالتانية والتالتة ..قطع ليه حتى هو وكلاو...كملو ماكلتهم والأغاني مازال كيدوزو..راي..شبابي..غربي..وقفو كيطلو على البحر جالسين فديك لفوطوي بعد ما حيدو الورد وحطوه عى ركابيهم..لدرجة أيلول مابقاتش كتبان..جبد التلفون وصورها وتصور معاها..جاو تصاور زوينين..بانت فيهم الفرحة فعينيها..شوية ناضت وقفات كطل على البحر من البالكو الكبير وهو ورها معنقها من كرشها وشعرها معنكشو كيضربو ملي كيحركو لبرد..حتى طلقات أغنية ميدو بلحبيب :تيتيزة titiza مطلوقة بجهد مع البيفان..صداع الراس

بدات كتحرك معاها لا إراديا...وكتغني معاها. حتى جرها عبيقة لداخل وبدا كيشطح كيدير شي حركات طيرو ليها لعقل خلاها غير حالة فيه فمها ..وما هي إلا ثواني حتى لقات راسها كتشطح معاه بكل إحترافية وكتعوج وتلوا مع شعرها ..كيشطحو مشادين من اليدين...دازت ديك الأغنية وتبدلو أغاني وأغاني وهوما مازال كيشطحو الحاصول حيحو بالمعقول..

يتبع ...