شريك القرن 21 الجزء الثاني

أنير: فدوى بلاكي من گدامي 😡

فيونا: كالما كالما.. أويلي على شوهة.. بعقلك زعما..

جا السكيريطي دغيا.. لقى ديك الحالة هكاك.. مشا كيجري عند داك الزمر لي فالأرض.. لقاه شاد بلاصة الضربة.. ودايز ليه وجهو بالدم.. گلسو..

دار شاف لاخر لي باقي مابرد غدايدوو.. صاااعر 😠 دموو كيغلي..

عرفو شكون هو يدور قدامو خايف على عضامو ليصدق مخلطو حتى هو معاه.. المشكل عارف راسو ماغيدي منو لا حق لا باطل وماعندوو مايصور منو.. ماكاين غا عُمار 💶 وباك صاحبي.. وأصلا عارفو بطل المغرب فلفري فايت.. اللهم يخلي عظيماتو صحاح

ناض جاب كلينكس وقرعة دلما.. وبلاستيك كونجلي(مثلجة) حطها ليه هي اللولة على الضربة باش ماتزراقش..

دورات فدوى أنير وجراتو معاها.. نعل الشيطان ودفع الشاريوو.. فين گالس لليوون ملاهي مع بواطة دالسردين باش يسكتوو ويخليه يقضي غراضو.. كان خواها ليه فحك صغير باش مايجرجش لسانو مع الحاشية..

وقفاتوو ورجعات هزات داكشي لي عزلات.. زادتهم فالشاريو مع تقديتوو.. وجراتو من دراعووو لجيهة لاكيس.. وهي كتدور تتلفت لا يتبعهم السكيريطي على شنو داار..

لاحظ ارتباكها..

أنير : ماتخافيش ماعندهم مايديرو..

هزات راسها فيه لقاتو كيشوف قدامو مخنزر..

عاقد حجبانوو..

وصلوو.. بدا كيخوي هو وياها داكشي لي فالشاريو فوق الكنطوار.. دوزاتهم ليهم لبنت فلاباراي حتى وصلات لداكشي دلمشاش..

فيونا (نقزات): لا هادو بوحدهم..

أنير (مع البنت): جمعي كلشي 😠

فيونا: 🤐

ماعاوداتش معاه الهضرة.. خافت تدوي وهو حالتو ماشي ديال الهضرة والنقاش.. يصدق داير فيها وهي ماكترضاش..

هز دوك لبلاصتيكات كاملين ودار عندها..

أنير: هزي ليون وزيدي گدامي..

نفدات هضرتو ضاربة الطم..

حط داكشي فالكوفر ودخل حداها.. وزادو..

بقات هي كتدور فعينيها.. وكتشوف غير بالريط فيدو لي من حر الضربة تجرحات ليه..

مشااو مسااافة..

فيونا: تقدر توقف عفاك؟

أنير (دار عندها): خاصك شي حاجة؟

فيونا (حطات ليون لور): نرجع دابا..

حلات لباب.. قصدات ديريكت الفرمسيان لوقفوو قراب ليه.. تبع ليها العين.. حتى بانت ليه راجعة هازة بلاصتيكة صغيرة فيديها..

طلعات بلاصتها وسدات لباب.. شعلات لبولة💡 لي كتكون تما لقدام..

مدات يديها بتردد ليديه لي حاط فوق بواط أڤيطيس.. هزاتها حطاتها فوق فخضها حدى ركبتها ماتفهموش غلط ههههه

باقة شادة بيدها لخرى البلاستيكة.. جبدات منها لالكول.. كبات شوية فالقطن.. قربات يديه عندها وبدات كتمسح ليه فيها بشوية.. خايفة تحرگو.. ومخصرة وجهها..

تحت نظراتو هو لخالية من التعبير.. كأنو ماكيحس بحتى حاجة..

كيشوف فيها وفملاميحها لي باقين باينين ولي ماغطاهمش شعرها لي هبط لقدام مني حدرات راسها..

أما هي.. فابقات مركزة مع شنو كتدير.. ويديها كيبانو صغيورين مقارنة مع يدوو لي شادة..

هزات راسها تشوفو واش كيتوعت.. ضارها خاطرها.. عاقدة حجبانها ومغوبسة.. تگول هي لي مضروبة ماشي هو..

غاهزات راسها.. دار راسوو توعت..

أنيير (كيتبوحط): اوووو 😖

فيونا: ايي ضريتك؟😰 (بدات كتصوط ليه عليها) اووف اوووف 😿

حبس الضحكة بزز.. ودغيا دور وجهو ساعة حصلاتو..

فيوونا (ضرباتو بالبكية دالقطن): كتتفلى عليا 😾

أنير: هههههههه غي نتأكد بلي ماشي شريرة..

دارت قدامها مربعة يديها 😾

أنير: صافي.. ماتزعفيش.. وكملي خيرك..

شدات يدوو مطلعة نيفها لسما.. جبدات لباندة لي بقات.. دهنات ليه واحد لبوماد.. ودورات عليه ديك اللعيبة وزيرتها.. حتى سلات جات توحل الطرف لي بقى فالجنب وهي تورك عليه بلعاني..

أنير : اححح وجعتيني 😳

فيونا: مزيان باش المرة الجاية ماتلعبش معايا داك اللعب الباسل 😈

أنيير (ضحك حتى بانو سنيناتوو): هههه 😆

بقات كتحقق فملامحوو الحرشة.. لي زايداها تصرفاتو رجولة على رجولة.. لحيتو لمطراسية.. فموو لغووز.. حجبانوو لغلاض.. وشعرووو لمخربق.. لقات راسها حلات فيه فمها.. دغيا تجمعات.. تقادات فالگلسة وطفات داك الضو..

فيونا: مشينا؟

ديمارا تاني وتحرك من تم..

كلاه الفضوول وضرو فراسو الموضووع..

أنير: شحال عندك من عاام؟

فيونا : بقالي شهرين ونكمل تمنطاش.. (دورات وجهها عندو) علاش؟

أنير: والو.. غير على حد علمي منصف ماوالدش..

فيونا: ماكنشبهش ليه..

دار عندها مركز الشوفة فعويناتها.. حتى تحرجات وهبطات راسها..

انير: فالعنين اه.. (بغا يبدل الموضوع) بااقا قاصر..

فيونا: 😒

زادت فصوت الموسيقى وعفط هو عفطة وحدة.. ماحبس حتال قدام باب داروو..

هبط حل الكوفر..

هزات هي ليوون وتبعاتوو.. هز من تم غير بلاصتيكاتها للور دالطموبيل.. وصلهم لها حدا الباب ورجع..

فيونا: شكرا.. على كلشي..

انير: هانيا.. تصبحي على خير..

فيونا: وانت من أهلو..

طلعات قداموو.. ودخل فحالو حتى هو من مور ما طل عليه منصف وشكرو بدوروو..

شاف فساعتوو.. لقاها طناش لارووب(قل ربع) .. بدا كيحيد فحواجو من الصالون.. حتى حيد القطعة اللخرة فباب الدوش.. دخل تحت الرشاشة.. مخلي لما هابط عليه وكيلامس الجسم ديالو العريض.. ولي غادي وكيتضخم بشوية بشوية..

⏮ يا كنت تسوي عندي الدنيا..

رضاو عليك حتى والديا

كنت سيريو معاك انت كنا فووووووووووووور

حبست السهرة و الطريق العوجة

معاك غير انت حبست الخرجة

وليت عاقل و معاك انت كنت معااك ايزول

🎶🎵🎶🎶🎵🎶

ديرولها لعقل بلي راني نبغيها

و مزال هي عمري

راني معاها انا فيدال

وجامي نشوجيه

راني راني راني نقولها للناس جينيرال

هي عمري نخمم فيها

ليل و نهار ماشي غرضي..

سررررررررررررررررررر 🔔

سرررررررررررررررررررررر🔔🔔🔔

خلات دوك الحوايج لي گلسة وسطهم كتطوي.. لاهما بغاو يتقادااو وهي كتجمع فيهم ولا هي كتلقى ماتلبس فاش كتبغي تخرج..

نزلات كتتخبط.. وتنگر..

فيوووونا: اللينعل أصل بوووووك.. معاودلين ليك علينا كنظلو نتسناو سيادة جدك عند الباب تصوني 😾😾😾

سرررررررررر🔔

فيوونا (حلات الباب): أمااااالنا شكاااا🙀.. سييييييييدوووو 😻

(تلاحت عليه عنقاتوو)

سيدو: هابطة تعربطي يا

دينك ههههه حسابك ما سمعتكش.. (دخل وسدو لبااب)

فيونا: هااء ولاش ندوي لماكنتش باغاه يتسمع..

سيدوو: يالجنية.. حرام واش توبي..

فيونا: كنبات نضرب فالڤودكا الله يمسخك..

سيدو: راك قربتي ضربي الناس بلحجر.. فين ابنت العم صاڤا؟

فيونا: اوا باز عاد بنت ليك جوج سيمانات وأنا هنا.. 😒

سيدو: ماگالكش منصف كُنت فالسعيدية مع الحاج؟

فيونا: اممم تسعود تسوايع من هنا لتما سبحان الله داشي علاش يالله وصلتي مسكين..

سيدو: نخلي تيتيز ونجي نقرد (نگلس) مع عوجة هههه هبيلة نتيا..

فيونا: العوجة هي ختك..

وصلو لدوزيام.. دخلو لبيتها.. خلاها ربعات وسط دوك لعرارم.. وتلاح هو فوق الناموسية..

فيونا: نتا لي جات معاك اولد الهم.. ماعرت لاش ولدوني بنت أنا يخخ 😾

سيدوو: اوا باز ماكتقدايش.. 😒

هاد الأيام لي دازو.. ماجابو فطياتهم حتى جديد من غير السلام من بعيد لي ولا بين فيونا وأنير ..

ومنصف لي من مور ماخرجو يتسخرو لسوبرمارشي عيط لمحمد رضا دوا معاه على قبل زينب وتافق معاه باش يمشي يخطبها ويضربو لكحل فلبيض.. استقبل محمد رضا الموضوع بصدر رحب مادام دخل الدار من بابها.. تافق معاه وقت ما قاد وقتو غيقوم بالواجب..

ومن داك الوقت لدابا الاشكال الوحيد لي بقى عندو هو كيديير يگولها لفيوونا ويقنعهاا... خصوصا أن هاد خمسطاش العام كاملة.. ولا نگولو تمنطاش نييت.. حتى ديك تلت سنين لي دوز هو وياها فطاليان نحسبوها.. حيت مها ماشافت منها حتى حاجة غير أنها بلزاتها وسماتها السمية لي عقداتها فاش دخلوو لمغرب.. خصووصا فاش بداات لقراياا وبدات كتتحاك مع لي فسنها..

ولات كل نهار راجعة كتبكي حيت كيبقاو يضحكو عليها وعلى سميتها الغير مؤلوفة.. شي لي خلا منصف يعربط على الشعب وولى فينما يقيدها فشي مدرسة ولا كل بداية السنة كيمشي يفرض عليهم أنوو حتى واحد منهم مايعيط ليها بشي سمية من غير فدوى..

هادشي من مور ما حاول يبدل سميتها حتى فالحالة المدني عدة مرات وستعصى عليه الأمر.. مادام هي تزادت فايطاليا ومن أم ايطالية..

تمنطاش لعام كاملة وهو وياها الراس فالراس.. يعني عارف انها صعيب تتقبل فكرة أنو غيتجوج.. غير بضحك وشكدير عاد الا دواو فالامر بجدي..

ولى كيبات ويصبح يحاول يلقى طريقة لي تنقص من حدة رد فعلها اتجاه الموضووع..

تعاشااات لعشية.. مع أخر صف دلحوايج خشات فالدريسينگ ديالها(البلاكار لي بلا بيبان)..

فيوونا: يالله.. نوض جمع عليا كرااوعك من هناا..

سيدوو: گاعدين فالگرنة.. يخليها ماركة..

منصف: سيدي محمد.. زارتنا البركة.. ماسختيش بداكشي لي تم؟

سيدو (ناض عندو سيدوو عنقوو): بارك الله فيك.. اواه راك عارف وشتا تما ههههه

منصف: هههه سمعت الهضرة كثيرة عرفتك غتكون وصلتي

سيدو: مني جيت جيت رواح نهودو.. من صباح وأنا گاعد مع البز گلبلي راسي..

شيرات عليه فيونا بنونووس بلا ماودوي..

سيدو (شدوو من مور ماجا فيه): الله ينعل مك.. شُفت گولتلك بزة هههه..

هبط هو وياه.. عاد تبعاتهم هي.. صايبوو باش تعشاو وگلسوو قصارين على واحد الفيلم.. شي ساعتاين وهوما عاسييين عليه..

كل واحد فيهم فين مليووح..

ماسالا حتى بدا يشخر منصف..

تگعدو بجوج.. وبداو كيدورو فعينيهم وكيقلبو على ما يديروو..

ناض سيدو هو لول جمع الوقفة حاط صبعو على فمو باش ماتدويش 🤫

وزاد قدامها.. تبعاتو ديريكت لبيت باها.. دخلوو بجووج كيتسلتو وردو موراهم الباب باش مايتسمع والو.. وماتفيقووش حركتهم..

تفرقوو كل واحد فيهم مشا لواحد من ليطابل دونو.. قلب مجورتهم..

فلااااومهم.. بقشوهم مزياااااان.. قنت بقنت ههه

دازو لكوافووز.. مجووورة دلبلاكااار ووااالو..

تحت التستيفات دلحوااايج..

تحت الناموسية.. تحت لمخااد.. وسط ابواطاات..

صباااابطو وما قالوهمش هههه

ماقااو واااالو..

دارووو حتى عيااو.. وحتى صافي بداو كيستسلموو ويرضاو بالأمر الواقع.. بانت لفيونا الجاكيط لي كان لابس كيبان منها غيير طريف..

كان خاشيها فواحد من لمجورا ومحيدها من بلاصة لحوايج حيت عارف الشياطيين غيمشيو ليها..

جراتو غي بريط من حوايجو حتى دار عندها.. شارت ليه بيديها لبلاصتها.. طار ليها دغيا كيقلب فجيوبها..

خشا سيدوو يدو فالجيب هو اللول.. جبد سوارت.. لقاهم ديال الدار.. دغيا ردهم قبل مايديرو الصوت.. وعاود جبد لخرين ديال الطموبيل.. حدااه فيونا كتنقز بالفرحة.. صورة بلا صوت.. جابتليه الضحكة.. خرجو من تما كيما دخلو.. دردبو ديريكت مع ضروج.. ردو الباب بشوية..

مشاو لطموووبيل تحت نظرات سفيان لي كان بايت ديك ليلة فدار أنير.. كان ديك الوقيتة واقف حدا الشرجم كيضرب فيه البرد..

ومن الزهر والميمون خلاوها ماليها.. سيدو دار كاسكيطتوو.. ماباينش.. ماعرفوش شكوون..

سفيان: اييييه.. داكشي لي كان باقي..

واقف كيقطع فالخضرة ياكلوها هي والكوطليط لي شوااو.. دار عندو مني سمعو دوا وهرس الصمت..

أنير (دار جيهتو): وشتا؟

سفيان: رواح ترگب يا خويا.. ولاو يدخلو لعزارا لدار فالحومة..

جا طل.. بانت ليه غير هي دخلات هي اللخرة وزادت الطموبيل غا بالشوية..

شاف فساعتوو لقاها طناش لارووب (23h45)

أنير (مامتيقش): لوطوو دمنصف نيت هادي.. ماتكونش ماشُفتش مزيان.. يكون منصف نيت لي خرج..

سفيان: مالي ماكانعرفش منصف.. باقي صغير هداك لي معاهاا.. شفتهم مني خرجو من الباب..

طلع لأنير الدم وماعجبووش الحال وخا مابغاش يبين قدام سفيان باش مايطلعهاش عليه..

سفيان: ياخوياا ومابقيتش تقيق.. يبانو مالايكة وداخلهم شياطين.. ماحسبنيش تصدق هكدا 😠

أنير: خاطييك.. 😒 كلا ويتعلق من كرعوو..

سفيان: من رأى منكرا فليُغيره..

أنير: بلا ماديرلي فيها فقيه.. رواح تاكل.. حتى تولدهم وربيهم..

سفيان: بقات فيا الحرگة.. وجهها ماشي ديال داكشي..

أنير (حكليه على الضبرة مابقاش قاد يصبرليه): ونتا شخصك بيها؟ خرا بغات تكون هكاك تعوم فبحرها 😒

دا الطباسل.. خلاه مسمر تما.. حتى هز لي بقى تبعوو..

اما قشبال وزروال غا خرجو لشاريع وطلقو الموسيقى على جهدها.. محيحييين وكيخيطوو فشوارع وجدة.. ماعلى بالهمش.. زاطمين فالدنياا كيغوتوو ويغنيييو..

فيونا (كتغوت باش يسمعها): نمشيو لسعيدية؟

سيدو: هبلتي؟ بغيتي منصف يدفنا بزوج؟

فيونا: معامن أنا بفوو 😾

سيدوو: باغا تبيعيني لعجل.. هههههه

فيونا: خواااف.. 😏

سيدو: روحي تبردي.. (سيري تخراي🙊)

قاطوو التليفووون.. 📲

شاف شكون ووقف حدا الطروطواار..

فيوونا (باستغراب): شكوون؟

سيدوو: عزاااك ههههه

فيونا: وااااهيانااري 🙀 اش فيقوو..

سيدوو: وتگوليلي السعيدية.. والله الى مايبيتنا فالكوميسارية..

فيوونا: لوااه فالبنيقة.. طلق طلق..

(حيدات ليه طيل من يدوو.. جاوبات وكتدوي بزربة كلمة موور لخرى )

ألوو بابا حبيبيي.. راحنا فالفارماسيان ماتخافش راني فيا لپيريوود (جاوها لي غيگل زعما) وماكنتش دايرة بحسابي مابغيتش نفيقك مني وقفت على هداكشي مهم انتسخرو دغيا وغنجيو.. لا ماتخااافش واخاا دغيا 😽

(سربكاتهم ليه دغيا وقطعات)

وصااااااااااافي اووووف (تنهدات براحة) ونتا كترعد عليا تما.. 😈

سيدوو: قبرك غيجي فشوكة ابنتي لي فات يبول عليه.. ستناي حتى توصلي عندو ونتفرج..

فيونا: سير سير ناخدو لعجب ههههه هادشي كبير عليك..

سيدوو: يااادينك هههههه

قضااو الغرض دغيااا ورجعوو فحالهم.. لقااو منصف فالصالة كيتسنا فيهم..

ضحك ضحكة صفرة.. وتمات طالعة سالتة فحالها..

منصف: اجي احبيبة اجي..

وقفات وتمات دايرة بالعرض البطيء عندو..

مشى تلاح حداه سيدوو كيضحك عليها..

جات وقفات حداه.. مد ليها يديه باش تعطيه السواارت..

فيوونا (ببرائة): راهم عند سيدوو.. والله ماصگت أنا 😇

منصف: راه فين غنعلق مك الى ما درتيش عقلك 😠

تلاحت حدااه عنقاتو وباستوو..

فيوونا: لااا لا ماديرهااش الحب نتا 😽

منصف: هاحنا غنشوفو واش غنبقا الحب ولا لا ههههه

قلبوها ضحك وتلفوه دغيا.. من بعد كل واحد ناض تخشى بلاصتوو.. وطلعاات هي لبيتها..

دازت ديك الليلة على خيير..

وصبح صباااح اليووم التالي..

حلا عنيها بتتاقل.. على يدين ليوون لي كيحطهم على وجهها ويحيدهم باش يفيقها..

جراتوو عندها كتبووسو وتدوز يديها علييه..

حتى توگضات شوية.. هزاتو ودخلاتو دوشات هي ويااه..

غير خرجات لبسات عليها دغيا دغيا وهبطات كطل على سيدوو واش فااق.. لقاتو باااقي منشوور فين خلاتو بليل.. طااارت لكوزينة.. جابت رالوونج طوييل(دوبل بريز لي خيطو طوييل) ومولينيكس (ماكينة دالعاصير)..

رجعات كتجري برونشاتو وجراتو معاااها.. حطاتو قريب وعاودات برونشات المولينيكس معااه..

ناعس سيدوو (سيدي محمد هكا محطوطة فالحالة المدنية ديالوو هي مكتحملش تگوليه سيدي وتعيطليه هكااك وهو ولد عمها للي ماردش ليها البال قبل💚)

ناااعس ماعليه مابييه فوق الفوطووي.. لفوطوووي لي فجنب ولي مالاسقش فالحيط ماعندوش الظهر جاي فوطووي ولكن غير علاش كيتگلس فحالا سداري وكيزيد يتحل الى بغا الواحد ينعس عليه.. المهم.. مليوح على كرشو.. حطات داه ديك لمولينييكس.. مع شعلاتها.. السيد تهز وتلاح من الجيهة لخرى دلفطوووي وخلاها منشورة عليه هي هي فالأرض بزز باش قدات تسكت..

ناض صاعر غادي لهاا.. ناضت هرباات ومع هو حجمو كبر منها دغيا وصل عليها.. مع شدها يفدي فيها دقتوو تلاح عليه ليوون مهبط ليه ظهرو كامل هو والتيشورط لي لابس فوقووو ههههههههه

ماعرفات تضحك ولا تشوف حالتوو ولا تسكت مشها المجعوور لي عطاها لتجعويق معبر على عدم رضاه على الوضع هههه

هربااتو لبيتها لايصدق قاتلوو.. وجابت ليه بيطاديين ولقطن باش يمسح بلاصة القمشة.. حطاتليه لفطوور باش تتصالح معاه ورجعات عند ليون هبطاتو معاها لتحت لريسطوو دمنصف..

جلسات حداه كتعاونوو وتقاد معاه لي menu لي يالله جاب ودوك اللعيبات لي فيهم زيت العوود والخل والملحة وداك التخربيق.. حتى دخل أنير..

كانت واقفة كتقاد طبلة مقابة مع الباب..

دخل.. دار لباب الصوت.. شمات الريحتو الرجولية لي سبقاتوو.. داير the secret ديال antonio bandera خطيييرة 😻

علات راسها.. جا وجهها فوجهوو.. يالله غتبدا تترسم الابتسامة على وجهها.. دور وكمارتو وخلاها بلاكة شادة فالبولة تسعين ههههه

ماحملاتش رااااسها.. كون لقاات كون دوزات عليه بموووس حافي..

ستدركات الموقف وعگدات غوباشتها تاني وكملات شكدير.. مامسوقاش لوجودوو گاع..

أما هو فتخطاها ودخل عند منصف.. عطاه نماري ديال واحد لاجونس دصاحبوو كيدير داكشي دلپيپليسيطي (الاشهار) باش يصايب ليه لبلاكة لي غيدير الفووق دالباب فيها السمية وحتى لي غيحط فالدخلة..

عطاه الأمانة سلم عليه وتم غادي.. ساعا منصف حلف مايطلقوو حتى يتغدا معاهم..

دور واحد الكرسي حدا الكونطوار وگلس عليه وهو قالبوو.. بقى مجمع معااه..

مرة مرة عينييه كيديوه ليها.. وهي گاعما مسوقة ماعاوداتش صدات جيهتوو..

وفوسط هضرتهم تم هابط سيدوو.. بكاسكيطتوو مقلوبة فووق راسوو..

بانلوو أنير گالس..

سيدوو: أفين خووو كيف رااك؟

أنيير (تلفت عندوو): عشيري هههه (ناض عندو) طولت الغيبة..

سيدو (سلم عليه بلوجه سلام رجوولي): راني غي هنا لاهي راك عارف.. مع الخدمة.. وبا سيدي لي كان يجيبني هنا كنطلع عندو لسعيدية..

أنير: حنا ماعمرنالكش العين ماتجيش تشوفنا.. 😒

سيدو: الله يسامح..

جر كرسي گلس حدااه..

خرج منصف البيتزاات لي كان لايح فالفران حطهم بالعواد لي طابو عليهم فوق داك الكونطوار قدامهم..

فيونا: ماغنحطوش فطبلة أبابا؟

منصف: حتى هنا مزيان غير أجي..

هز سيدو جوج من لكراسة لي باقين حداهم على طول الونطوار وحطهم من الجنب لاخر الدخلاني.. جابت هي التخربيق لي كيتحط فالطبلة.. الزيتوون وغيروو.. لاصوص.. لحار.. صلاد.. فريت وشي لاخر.. معاونها سمحمد 🤭.. حتى تقاد كلشي..

لاخر گالس معفر.. غروري سر رجولتي 🤣

صونا تليفوون منصف.. هزو بعد عليهم وجاوب.. دقايق قليلة ورجع عندهم..

منصف : فين سوارت الطموبيل؟

سيدو: هاهوما عندي من البارح فاش تسخرنا بليل..

خشا يدو فجيبو جبدهم ومدهم ليه.. تحت صدمت لاخر.. لي دغيا دور وجهو قدامو..

جات فيونا جلسات قدام سيمحمد(سيدو) حتى وقف عليها ليون.. جابت ليه فاش ياكل.. لقات منصف سالا لابيل ورجع گلس ليها بلاصتها..

ضطرات تگلس مقابلة مع خونا.. حاطة ليون حداها..

طلع هو فيها عينيه وولا كيشوف فيها عيني عينك..

ورغم أن فاش كيكون لواحد جنبك ولاقدامك كيشوفيك وخا ماتشوفش فيه حتى نتا راه كيبانلك.. ماتسوقاتش ليه.. هازة نيفها لسما وكتتفادا يتلاقا وجهها مع كمارتوو..

گالس برتياح.. مكالي على واحد الجيه ويديه لخرى لايحها على جنب كرسيه.. ورغم انو كيدوي ومجمع ماحشم مارمش.. يدور يدوور ويحط عليها عينوو.. حتى هزات قرعة دالمونادا كتكب ليها.. بتاسم ابتسامة جانبية خفيفة ونطق.. باغي غير يجبدها..

أنير (دفع كاسو شوية لقدام): خويلي معاك عفاك..

شافت فيه شوفت لقتيلة..

وقفات على لحديدة دالكرسي الطويل لي گلسة عليه باش تقرب.. ميلات القرعة.. فاللول كبات عادي حتى قرب يوصل النص ودارت فيها مفعفعة وبدات ترعد فيديها على أساس فقدات توازنها.. نص دالموناضا ترش عليه عمر ليه التيشورط كامل..

فيونا (بطنز): أي 🙀 سمحلي الكاس بعيد..

حطات القرعة ودفعات ليه رولو دكلينيكس بالطريقة لي دفع ليها الكاس..

منصف: بسم الله عليك اهياتا.. ديك ساعة جريه حداك 😠

أنير: ماعليش ماطرى والو.. أنا غنطلع نبدلو دابا..

منصف: بلا ماتمشي تال تم غداك غيبرد (دار عند بنتو) نوضي معاه عطيه شي حاجة من عندي..

صغرات فيه عنيها كتنگر فخاطرها على المواقف لي كيحطها فيهم..

سبقاتو محاملاش راسها.. وهو تابعها بخطوات تقال خاشي يديه فجيبوو..

وصلات لطاج لي فيه بيت باها.. وقف فصالون لوقت لي دخلات هي خدات من الدريسينگ تيشورط.. ورجعات عندو..

خارجة من البيت حادرة راسها.. مع هزاتو تصدماات من منظر ضهروو العاري وتضاريسو والهضاااب والسهوول هههه

ماعرفات راسها باش تبلات.. الله ياااربي الله اش هاد العداب.. مقدراتش تبعد عنيها عليه وعلى كتافو لعراض وعضلاتوو المطراسيين.. بحوايجو وكيثير عااد بلاش..

دور وجهوو جنب يشوف واش جات ولا مزال.. تداركات الامر وجمعات راسها مشتتة نظرها عليه..

داار كلوو عندها.. مكانش بعيد بزاف عليها.. مدات ليه التيشورط بلا ماتنطق بحتى كلمة..

شاف فيها هو بشوفة شر.. بدا كيقرب عندها بكل رجولة حتى بقات كتفصلهم غير خطوة.. هزات فيه راسها مخنزرة..

فيونا (رجعات لور): شوية لباس؟ شد التيشورط خليني نزل فحالي..

مجاوبهاش.. حدوو زاد قرب عندها.. ومع كانت قريبة لحيط مالقات فين تزيد.. حبسها..

بتاسم ابتسامة جانبية وهو مزال كيقرب حتى ولى صدرو العاري ملاصق معاها..

وهي مزال عاقدة حجبانها باش مايبنو على ملامحها حتى تعابير خرى..

شد الطريكو من عندها شاد معاه حتى صبيعاتها لي قابطينوو..

حطات يدها على ليزابدو ديالو محاولة تبعدوو.. حيت مابقاتش مستحملة قربو كتر..

فيوونا: أنيير 😾 بلا بسالة..

ماحيدش عنيه على عنيها.. هبط راسو لمسواها كيقرب لعندها.. حدرات عنيها هي گاع متفادياه حيت واخا متحكمة فراسها.. شكلو ورجولتو لاتقاوم.. لحيتوو ونظراتوو والنويف ولفيم.. ووو استغفر الله.. من بعيد وخالق ليها مشكيل فمابالك داباا.. خافت لاتصدق هي بايساه وتضرب گاع نفختها عليه فالزيروو..

اما هو مابقاش قادر يحبس.. شي حاجة كتجروو كتر.. شفيراتها.. ملامحها الطفولية.. ريحتها.. حنيكاتها لي حمارو.. وحدة طبعها دوخووه..

قرب.. تخالطو انفاسهم.. وجهوو عند وجهها.. مطول فيها الشوفه وهي باقة حادرة عينيها.. حركات وجهها جنب شوية وهو عاد ماكيقرب.. صدرها كيطلع وكينزل.. وثرها كثر..

غمض عنيه مسمتع بهاد التواني لي خطف.. حتى كان غيفقد سيطرتوو وغيقبل شفايفها وتراجع فاخر لحظة..

هز يدو لي كان مهبط.. وصلها لبلاصة لي حاطة فيها يدها عليه.. وحطلها لبيل لي كان لابس فيها وهو على نفس الوضعية..

أنير (بهمس): صبني هدا لي عمرتي..

بعد ببطء وصعوبة.. عطاها بظهرو وهبط لتحت وهو كيلبس.. مخليها محشوشين ليها الركااابي.. كتلعن وتسب فيه.. شداتها السخفة والسخانة وگاع الأمراض العضلية.. غسلات وجهها ونشفات وهي كتتحلف عليه وتبعاتوو..

لقاتهم فبلايصهم.. حس بيها جاية.. تلفت شافيها راسم على شفايفوو بتسامت انتصار..

خنزرات فيه وقلبات عنيها.. دفعات كرسيها باش تگلس وهو ينطق منصف..

منصف: صخني بيتزاتكم الله يرضي عليك راهم بردوو..

فيونا: واخاا 😇

تعلات هزاتها من قدامو تحت نظراتوو.. وهزات ديالتها حتى هي.. خشاتهم فالفران بجووج وقفات حداه كدور فعينيها.. ما جاو غير على قراعي ديال العطرية لمستفين حداها..

يالله غتهز لبزاار وهي تبان ليها قرعة لهريسة مطحونة كتضحك ليها ههه.. هزاتها غا بريط وبقات صابرة حتى صخن الزمر وخرجاتوو..

حطات اللولة دايرى راسها حرگها حر الصهد لي خارج من الفران وهي راها كتدردر ديك لهريسة غا بريط.. سدات القرعة ودفعاتها بلاصتها.. عاودات هزات السربيتة ودات ليه بيها بيتزتوو بكل غروور وتقة فنفس.. عاد رجعات لديالتها جابتها..

بدا هو ياكل.. مع الدغمة اللولة فهم لبلان وعاق بيها شباغا ديير.. ورغم ان داكشي حاار شوية كمل عضتو عادي وسرطها.. شاد ضحكتوو وكيدوي معاهم مامسوقش..

وهي مرة مرة كتهز فيه عينيها.. كتتسنى ردة فعلوو..

أنير (بضحكة جانبية): عفاك أفدوى ديك الهوط صوص لي حداك.. (لاصووص الحارة)

كان كيسحابها كيليميني غير غتجي ففمو غيبدا يكحب ويقلب على شنو يشرب باش يبردها ساعا صدمها.. ماحملاتوش.. فقصها ههه.. مداتها ليه بنفخة.. شدها من عندها زاد شوية مستمتع وهو كيشوفها كتتغدد..

مرة مرة كيوكل معاه ليون لي فجنبهم فوق الطبلة..

داز داك لغدا هكاك فشوف فيا نخنزر فيك هههه

سالااو وناضو تفرقوو..

أنير خرج هو وسيدو يتقهواو ومنصف طلع يرتاح شوية..

بقات غي فدوى كتجمع تم وكترد ليه عقلوو.. كملات غسيل لماعن.. مسحات يديها باش تطلع فحالها حتى كيبانولها شي وراق محطوطين.. جاها الفضول تعرف اش فيهم وخاماكتسوقش لوراقيه لي تم حيت أغلبيتهم ديال الرخض.. مي هادوو راسها گالها قراايهم..

هزاتهم تشوف ديالاش حتى كتسعق من شنو فيهم..

بقات كتقرا فيهم وتعاود مامتيقاش اش كتشوووف.. كتدعي فخاطرها وتعاود تكون غير كتحلم وكون هادشي لي قدامها غيير كدوب..

طلعات وهوما فيدها..

وقفلت حدا الطبلة لي وسط الفوطويات فين متكي وحطاتهم قداموو..

ضربات منصف الفيقة من صوت حركتها.. دار عندها كيشوف مالها..

فيونا (بملامح ممحية): مبروك.. امتى كنتي باغي تگولهالي.. حتال نهار العرس؟

ماعرف راسو باش تبلى.. مابقى عارف مايقدم ولا يوخر.. ناض گلس مبلووكي.. وهو لي كيفكر ويعاود كيفاش يجبد معاها الموضووع وشي طريقة يقنعها بيها.. تضرب ليه كلشي فالزيروو.. ووقع مالم يكن في الحسبان.. فغفلة منو لوقيتة لي عيط ليه رضا فاش كانو غيتغداو.. مشا هز لوراق لي كيوجدوو لتكاتيب من الطموبيل صورهم سيفطهم ليه فواتساب وحطهم.. گال حتى نسالي ونحيدهم حشم يبقى ملهي ويخليهم بوحدهم ساعا نساهم وماطاحوو غا فيديها..

منصف: گلسي نفهمك..

فيونا: ماتحتاجش.. فهمت كلشي..

منصف: وشنو هاد كلشي لي فهمتي؟

فيونا: المهم الله يكمل ليك بلخير.. حيت أصلا ماغينفع النقاش فوالو دابا فاات الفووت.. وكون كنت نيت بنتك وكنت كنهمك.. كنتي غتاخد رأيي على الأقل.. ووخا عندك خمسين عام وكبيرتي تبارك الله على فحال هاد لحوايج مامنحقيش نمنعك منهم ولا نفرض عليك رأيي حيت نتا لي بابا ماشي أنا لكن كان بامكانك تاخدني على قد عقلي وتسايرني..

على العموم ماشي نتا أول واحد يخليني.. راه هزاتني فكرشها تسع شهور وعمرها سولات فيا.. يعني عادي ولفت.. (خانوها دمووعها وهبطوو) المهم.. الله يجعلو مبارك ومسعود مرة خرى.. وصبر عليا غير شي أيام وغنمشي عند با سيدي باش تقدر تاخد راحتك مع عروستك..

(يالله غيدوي.. عطاتو بظهرها) عفاك ✋ محتاجة نبقى بوحدي..

طلعات لبيتها.. سدات عليها وبداو كيهبطو من عنيها شلال..

تلاحت على ناموسيتها.. تبعها ليون لي كييصر أصوات بتتاقل فحالا كيتألم لمنظرها.. سبحان الله فحالا كيحس بيها وماكيحملهاش تبكي.. بقى كيتحكك فيها حتى جراتو عندها كتتنخصص حتى داتها عينيها..

بقا منصف لتحت.. قطعاتليه فقلبوو.. مابغاهاش تعرف بهاد الطريقة.. ومانواش يخبي عليها.. كان كيقلب غير على الوقت المناسب باش يصارحها ويمشي هو وياها يخطبو..

وفانتظار هادشي گال يربح الوقت ويطلع لوراق باش يدير كلشي متابع ومايطولوش ويدير داكشي دالمراهقين.. ساعاا وقع مالم يكن في الحسباان.. وتقلبات ليه الموازيين..

ندم ولام راسو لاش ماگالهاش من لول وتهنا.. اللهم تحيح ولا تكون ردة فعلها هكا.. حس بلي هرسها.. عمرها دوات معاه بهاد النضج ولا هاد الطريقة.. حس بلي گاع داكشي لي بنا هاد السنين لي دوز هو وياها.. وگاع داك الرابط لقوي وعلاقتو بيها لي كتتعدا علاقة بين أب وبنتوو.. كانو عشران وخووت وماليهم حتى حد غير بعضهم.. تهرس كلشي فرمشة عين..

بقا على داك الحال.. كيما خلاتو گالس كياكل فراسو من لداخل.. ساعاات دازوو وظلام الحال..

حلات عنيها لي تنفخو بكترت لبكا بتتاقل.. ناضت غسلات كمارتها بلا ما تحرك ليون باش مايفيقش.. لبسات سروال وكبيتشو كبير بالقب.. وطاگية وخرجاات.. هبطات ديريكت التحت.. شافها وحتى كان غيتبعها وتراجع خلاها على خاطرها باش مايزيدش يعقد الموضووع وتصدق هازة راسها وطالعة لسعيدية على الأقل يخليها حتى يشوف كي يفكها..

كانت ديك الساعة العشرة ونص.. خرجات مع الباب دايرة يديها فجيووبها.. وكتتمشى بلا عقل..

باقة التنخصيصة كتطلع فيها.. شداتها حتال راس الدرب.. تلفتات ليمن وليسر وزادت مخليا رجليها تديها فينما وصلاتها هي هديك..

شافها أنير مني خرجات.. كان فطموبيلتوو كتسنى فسفيان باش يمشي يشودها فشي قنت هو ويااه..

ماعجبوش حالها.. باينة بيها شي حاجة.. ماهناهش خاطرو.. هز تليفونو صونا على سفيان..

أنير: رجولة غير روح نتا.. خرجلي شي شغل نقضيه.. لا لا ماتخافش حتى نولي (نرجع) ونعاودلك..

قطع وتبعها بشوية..

ساعة وهي غادية مرفووعة.. تقطع بيها لحبل وماعرفات فين تصد.. لا حنين لا رحيم..

شاريع يلوحها لشاريع حتى بدات كتحس بلعيا..

زادت شوية ولقات راسها حدى واحد الجردة..

وقفات قدام بابها لكبير.. باقا خاشيا يدها فجيابها.. علات راسها كتشوف فيه ساهية.. ودخلات معاه..

وقف هو طموبيلتوو وهبط تبعها.. مافاهم فيها والو البنت بحالا تشيرات.. يالله كانت صحة سلام..

تمشات فدووك الممرات دلحجر لي كيكونو وسط الشجر ولخضورة لي وخا الحال مظلم باقا بارزة.. وريحتها عاااطية كتريح النفسية.. وصلات بلاصة لكراسة دلحجر حتى هوما عليهم خشبات وگلسات.. كتشوف فسما الصافية لعامرة نجووم.. والقمرة لمكتاملة لمضوية عتمة الليل.. تنهداات تنهيدة خارجة من أعماقها..

بقا واقف حاضيها من بعيد.. مرة مرة كيطل على ساعتوو.. حتى نتاصف الليل.. وكمل التحول ديالوو..

طريكو لي كان لابس گاع تقطع وسروالو تزير عليه شوية.. تكا على الشجرة لي كان واقف حداها وربع يديه.. كيشوف فيها كل مرة كتهز يديها تمسح وجهها..

شوية كيبانو ليه شي وحدين جايين كيتمايلو ويدويو بصووت تقيل مع الطوالة لي هوما فيها.. وقبل ما يقربو شاف حتى عيا مالقا قدامو حتى حل اخر باش يتفادا الصدااع.. وماعندو فين يهزها يدها وهو بديك الحالة مزال لبلاصة لي هوما فيها مضرگة ومظلمة ورجل مقطوعة فيها من غير الشمكارة لي كيجيو يسكرو فيها ويباتو فليل..

تمشا بتتاقل حتى وصل لكرسي لي هي عليه وگلس حداها وبقا كيشوف قداموو..

تلفتات جيهتو.. كيبان ليها داك لجب خضر.. ماعرفاتو من الجن ولا من الانس.. فعز بكاها شداتها الضحكة..

فيونا : بسم الله الرحمان الرحيم ههههه

أنير (شاف فيها): ماتخافيش ماشي جن ههه

بقات كطلع وتنزل فيه وكتحقق فيديه وعضلاتوو لخضرين.. حيدات القب من على راسها وجاوباتوو..

فيونا: كون كنخاف ماتلقانيش هنا فهاد الساعة.. شداك لعجب داير فراسك مالقيتي جرية.. هههه

أنير: ههه ماكنبغيش يعرفني بنادم وكنتدس فيه.. (كنتخبا فيه)

فيوونا: هههه من نيتك أولد العبد 🤣 هههههه غدير ليا فيها الأمير المتخفي..

أنير: ههههه الى گولتلك ماغاديش تيقني..

قربوو دوك السكايرية جيهتهم.. واحد معول على لاخر يكاليه.. قراعيهم فيديهم.. بان ليهم الغاشي وهوما يحبسو فبلاصتهم حتى يفرزو شكوون تماا..

1 (لسانو تقييل): واش داكشي گاعد تما اصاحبي..

2 (شاد توازنو بزز): اواه ياربك راه يبانلك.. مانيش نشوف.. تعميت بلخضورة..

1 : حتا انا كيبالي تقلت.. (هز قرعتو شاف شحال باقي فيها.. عاود هبطها وهز صبعو كيحركو بلا) لااا ماتقلتش..

2 (كيحل عنيه فأنير ويسدهم): وشناهو هدا؟

1 : ماااغتگوليش الضفضاعة لي كدير طرولات ففايس (كيدوي على kermit)

2 : أواااه 😯 ويالله فحالنا گبل ما يحط علينا حتى حنا..

1 : زرب زرب..

دازو كيتسلتو من قدامهم.. مخلينهم مفرشخين عليهم بالضحك.. مع الحمير السكرة شادة فيهم عند بالهم كيدويو بشوية.. وماشافوهمش فاش سلتوو..

فيونا: ههههههه واااااهياناري ماعرفو باش التبلاو ههههه

گالك كيرميت 🤣🤣🤣

بقى كيشوف فيها وهي مشتتة حداه.. شادة كرشها بيد وليد لخرى حطاها على دراعوو بعفوية..

حتى سلات الضحك على خاطرها ونطقات وهي كتدوز يدها على دراعوو باستكشاف..

فيونا: لا بصح كيفاش قضيتك؟ أش هادشي؟

أنير: موضوع طويل.. غيضرك غير فراسك..

فيونا: شكيت عليك 😒 كنسمعك..

أنير: خطيك مني أنا واشا راه مگلسك هنا..

تفكرات.. قادات گلستها وتنهدات..

أنير: لهاد الدرجة؟

فيونا: وكتر..

أنير: كنسنى..

ضحكات ضحكة انكساار..

فيونا: عرفتي ههه داك الاحساس فاش كتلقى راسك وخا ماعرفت أشنو دير.. طير وتنزل.. ماليك قيمة عند حد.. حتى عند أقرب الناس ليك.. ولي كتظن أنك عمرك تهون عليهم.. وكيخيييب ظنك..

الشخص الوحيد لي فحياتك ولي كتشوف فيه الأرض وماعليها.. كتسبقو على راسك.. تتقاس فعنيك وماتتقاسش فيه..

أخر همو نتا وأش كتحس..

(دموعها مابقاوش بغاو يحبسو)

عارفا راسي غنكون أنانية بهاد الهضرة ولكن مانقدرش نتقاسمو مع وحدة خرى.. مانقدرش نستحمل نشوفها كتقرب ليه ولا تقيسو..

أنا نهار حليت عيني فهاد الدنيا ووعيت عرفتو غير هو.. كان فيه كلشي.. ماما وبابا وصحابي.. روحي كون طلبها نعطيها ليه..

هو عارفني مانقدش نعيش بلا بيه وعارفني عمرني قدرت نبعد عليه حتى تلتيام.. عارف لأي درجة متعلقة بيه وهكاك مافكرش حتى فواش غيجرحني الموضوع..

لا من فوق هادشي ماشي غير مقرر.. وجد لوراق وكلشي يعني كون ما كتاشفت الأمر كنت غنبقا فدار غفلوون وماغيكلف راسو حتى يگولها ليا.. حتال النهار بنهارو يمكن ولا حتى يجيب مرتو لداار..

يكفيني أصلا نقص لي كبرت معه وأنا كنشوف كلشي عندو ماماه حداه إلا أنا.. ما دافناها فالأرض كي الناس نمشي غير نزورها.. ماعارفاها فينها ولاش خلاتني.. لاش ولداتني أصلا مني ماباغانيش مني غتخليني وتمشي.. كون رحماتني وختاصرات علي هاد العداب وماتزاديتش..

ودابا جا نوبتو حتى هو غتجي لي تديه مني ومايبقى عندي حتى حق فيه.. علاش كنتعاقبو ديما بأعز ماعندنا.. علاش ديما أنا لي كيوقع ليا فحال هكااا..

فهم أن هضرتها كانت على منصف.. قطعاتليه قلبو بتنخصيصها.. ماهانتش عليه ماكرهش يعنقها.. يسكتها ويحسسها بلي معاها شي حد.. حتى كان غيقربها عندو.. وشاف فيديه كيدايرة تفكر شكلو واكتفى وأنو يدوزها على ظهرها بحنان..

ماعرفش علاش ماحملش يحس بضعفها وانكسارها.. شي حاجة ضراتو فخاطرو من جيهتها وما باليد حيلة.. بقى على النفس الوضع حتى خفاف بكاها.. وبقاو غا دموع سخان كيهبطو مع حنيكاتها.. ونيفها حماار..

حطات ضهرها على الكرسي.. وبع يديه هو كيشوف قداموو.. مابغا يگولها لحتى حاجة.. مامحتاجاش نصائح.. غير مني خرجات لي فقلبها وعاودات راه فحد داتها مسألة مزيانة.. بقى كيفكر ويمنطق الموضووع.. حتى حس براسها لي مال على كتفو.. حدر راسو لقاها داتها عنيها بكترة لبكا..

بقى كيشوف فيها.. باقا صغيورة.. بنت تمنطاش العام راه باقة فمراهقتها.. صعيب تمر فبحال هاد الظروف.. حط يدو لخرى من غير لي متكيا عليها فحنكها مكالي ليها راسها لايميل لجيهة لخرى..

بقاو على نفس الوضع حتى شرقات الشميسة ووصلوهم خطوطها الذهبية.. كان أنير رجع لهيئتو الطبيعية.. عريان من لفوق وعضلاتو بارزين بحجمهم ولونهم الطبيعي..

حرك صباع يدو لي على وجهها وهزو شوية لفوق كيحقق فيه.. حتى وهي مخننة فنيونة.. كتبان فيها البرائة تحلف أنها وحدة خرى غير لي كتكون وهي فايقة.. بتاسم.. حدر عندها راسو باس ليها نيفها لي باقية شادة فيه لحمورية..

بقى شحال كيشوف فيها.. شفيراتها وفمها الصغيور.. وهو باقي كيحرك صبعو على خدوودها.. عاود قرب عندها كيتنفس من أنفاسها.. وريحتها الدافية.. مالقا راسو غا وهو حاط شفايفو على شفايفها بلا هوااه..

باسها بشووييية وبقا شحال علي داك الوضع عاد بعد راسو ماساخيش بقربها.. وماعارفش أش هاد الزمر ولا كيوقع ليه معاها..

كالا راسها بيديه وناض بحركات بطيئة.. تكاها فالكرسي.. قرض باش وصل لمستواها.. قاد ليها طگيتها مبتاسم.. باسها فجبهتها وهي باقا كتتنخصص ومشى.. مبعد من حداها..

كانت الدنيا عمرات شوية بناس لي كيجريو ولا كيتمشاو على الصباح..

رجع لطموبيلتوو.. حل الباب اللوراني هز من تم تيشورط لبسوو.. وطلع گلس بلاصتوو حاط راسوو لي غيطرطق بقلة النعاس على الڤلوون..

برزطااتها الشمش لي ولات ضاربة فوجهها..

(ايه عاد شفتي الشمش فاش كنتي حاطة راسك على العضلات ماحسيتيش بيها 😾)

بدات تكمش فملاميحها وتزير على عينيها حتى حلاتهم كتدور فيهم وتستوعب فينها.. رجعات ليها السينتة وتفكرات أش طرى.. بدات كدور فراسها عاقدة حجبانها.. خااصرة بالنعاس.. مالقات حتى حد حداها.. فين داك لعجب وشكون هو زاد ضرها راسها.. أصلا ماعقلاتش ايمتى نعسات هي لي كانت ناوية تفتح ليه محضر باش يشبع فضوولها.. ناضت بتتاقل شادة راسها لحدا واحد السقالة ولا السقاية.. حلاتها.. غسلات يديها ووجهها.. حيدات طاگيتها دارتها فجيب الكابيتشو.. قدات شعرها نفخاتو من القدام وزادت متاجهة لخرجة الجردة وهي باقة مخنزرة وكتقلب على الشخص لي كان گالس معاها لعل وعسى يبان ليها ويكون مابعدش..

خرجات لشانطي ووقفات.. حاطة كفها مايل على فمها وحنكها واليد لخرى على جنبها كتفكر..

مقابل معاها أنير فطموبيلتوو باقي على نفس الوضعية غير مدور راسو جيهة الشرجم كيتسناها حتى بانت ليه..

رد معاها لبال حتى شدات طاكسي زادت عاد تبعها..

وقفها عند الباب.. خلصاتوو وطلعات فحالها..

لقات سيدو گالس فالفطويات لي فطاج اللول.. حاط مرافقوو على ركابيه.. غا شافها وناض..

سيدو: فين كنتي؟

فيونا (مادارتش عندو): بدل الساعة بخرى اسيمحمد..

(وكملات طريقها لبيتها)

نزل أنير.. من مور مادخلات.. مشى عند منصف لي كان واقف لداخل فالريسطو من مور الزاج.. باين عليه الارهاق..

دفع الباب وزاد لداخل..

منصف: سمحليا اولدي عدبتك معايا..

أنير (بأسف): لا ماكاين مشكل.. (مالقى مايگول ليه) مهم ها أمانتك إلى حتاجيتني صونيلي..

ربت منصف على كتفو بحزن ماقادش يدوي.. حدر راسوو أنير وخرج..

⏯ فليل.. فاش تبع أنير فيونا.. وقبل مايدخل موراها لجردة.. هز تليفونوو وعيط لمنصف سولوو عليها وواش كلشي هو هداك.. كالو منصف بلي وقع مشكل وخرجات وماقردش يتبعها حتى تبرد.. سولو منصف واش شافها.. مابغاش أنير يشرح ليه گالو غير بلي راها قدامو وطمنو بلي غيبقى معاها حتى ترجع وداكشي لي كااان..

تمشى خطواات تقال متاجه للداخل.. جر كرسي من كراسا الطبالي لي تما وگلس لايح تقلوو عليه.. هرسها وهرس راسو معاهاا..

سهوة منوو خلقات ليه مشكل قداشناهو.. هدمات تقة بناها سنييين..

هو طبيعي يفكر يتزوج.. خصوصا أنو السبب لوحيد لي كان مستبعد الفكرة على قبلو هوصغر سنها وأنو مابغا يدخل عليها حتى مرا لداار..

دابا مني لقى لي قدر يلفت انتباهو ويعجبوو گال يعيش حتى هو حياتوو.. على الأقل نهار يشرف وما يبقاش قاد على شحال من حاجة يلقى لي يشرف حداه ويونسوو من تتزوج هي وتخوي عليه الداار.. حيت مهما بقات وطولات مصيرها فدار راجلها ودير حتى هي وليداتها..

كان واحل فالطريقة لي فاتحها الموضووع بيها.. صدق فما صعب..

فوسط حيرتوو وتانيبو لضميروو.. سمع الصوت الرنات لي كيتسمع فاش كيتحل لباب..

هز راسو بانلو باه وموو داخلين.. ناض سلم عليهم.. خرج هز صيكانهم من الطموبيل وطلع هو وياهم لفووق..

أما فدوى.. من مور ماطلعات لبيتها.. لاحت حوايجها ودخلات دوشات حيدات عليها لعياا دغيا ونزلات لكوزينا صايبات ماتاكل..

هزات الكاس ديال الكاكااو (الشكلاط مع لحليب) كتشرب فيها بيدما تپريصا الخبز يصخن.. وبقات كدور فالكوزينة تگول فيها صريصرة..

حتى وقفاات والكاس ففمها.. بان ليها طرف ديال التوب.. حيدات الكاس وداتو معاها فيدها.. تمشات حتال الجيهة لي خبطات فيها تيشورطوو بالعصاب.. تحدرات شادة الضحكة هزاتوو ورجعات للكوزينة كتشرب مرة مرة من كاسها..

بلحق ضرها راسها.. شي حاجة ماهياش.. نتابها داك الاحساس فاش كيطرالك شي فلاش وفحالا فايت واقع ليك وفايت شايف ولا فتي عشتيه من قبل..

فيقها من سهوتها غير صوت الطوسطووز(هي لبريصة دالخبز لي كيديرو بيها پانيني) دارت هزاتو زادت على حليبها.. كلات وطلعات هازة معاها داك الطريكوو فيدها.. حطاتو فوق الطابل دونوي لي حداهاا.. وتخشات نعسات ترتاااح..

طلعوو هوما لطاج اللول وجلسوو يرتاحوو.. عاودليهم المشكيل لي صدق طايح فيه والأموور لي تعقداات..

گالتلوو موو يخلي الموضووع عليها هي تحاول ترطبها شوية..

دازو الموضووع الخطبة ولتوجادها وخاصهم يديو ويشريو ويوجدوو.. وبما أن والديه جاو بكري غيمشيو يهضرو ليه فيها ويقراو الفاتحة باش يخليو البنت هي لي تختار شنو بغاات..

عيط لمحمد رضا.. تافق معاه يمشيو عندهم الغد ليه يزورهم وناض هبط فحالو لريسطو مخليهم يرتاحو حتى هوما..

رجع أنير فحالو لداار.. طلع ديريكت لبيتوو حتى هو دوش.. ظلم البيت وتلاح ديك الساعة ببنواروو لي لابس فوق الكالسوو ونتاقل للعالم الاحلام... 😴

ادن ادااان المغرب وظلام الحااال.. طلعات بشرى (مت منصف) بشوية عليها حتى وصلات لطاج لي فيه بيت فدوى وبيتها هي نيت هي وراجلها..

دفعات لباب بشوية تشوفها شنو كدير.. لقاتها باقة حالة فمها.. طايحة دووودة.. فوق ظهرها ليوون غادي جاااي..

ليوون: مييو 😾 ميييييييو..

باغيها تفييق.. عيا يجاري فيها فالنعااس على ماتنووض باش تلعب معااه وتديها فيه شوية.. هو مل وهي مابغات تتحرك..

دخلات وقربات لناموسية.. حركات يديها كتومي ليه باش يحيد..

بشرى: صصصب صب 😠 ماعرف شعاجبهم فهاد لحرام هدا.. مزغب عليا هكاااك..

خلعاتو.. حيد وگلسات هي حداهاا.. كدوز على شعرها وكتدوي..

بشرى: الله على بنتي لحبيبة الله.. تعدااو ليا عليها.. الله على الكاعية ديالي.. نوضي ابنتي نوووضي.. نوضي هاميمتك جات عندك..

عيات تحرك وتحززرها حتى هي باش تفييك.. والله ما تزعزعات ليها.. طلعات ليها لحزاق ومع هي صبرها قليل.. دورات عينيها.. ماقات مادير.. وهي تجر ليها شي زغيبات من شعرها حتى قفزات حاقدة.. يالله غتبدا تعاااير وتعرعر وهي تبان ليها من الشقات دعينيها لمعمشين من كترة النعاس..

فيونا: واااا الميمة والميمة الله يهديك 😾 جيتي بعجاااجتك 😒

بشرى: اوا واه خلاص من لغدا وانا نتسناك تگعدي.. كل شوية نگول هاهي غادي تهود.. فاش طلعت مانفع معاك حنان واشتابغيتي نديرلك؟

فيونا (عنقاتها): توحشتك 😋

بشرى (كتقاد ليها شعرها): ماتكونيش گدي يا لحبيبة..

فيونا (تفكرات ودغيا بعداتها عليها مخنزرة): شفتي شدار الكافر دولدك 😾

بشرى: شفتوو.. شفتوو بلحق سمعلي حتى أنا لي مو عاد يسمع ليك نتي بنتوو..

فيونا (هازة نيفها لسما): اوا خليه.. الله يطليه بيها..

بشرى (صغرات عينيها): بغيت غي نعرف هادي لي لوات عليه هاد لوية حتى ولى يجري ويجاري كي دايرة..

فيونا: تداار ليها اللفعة كدور فعينيها.. البراءة زعما 😼 تگول موكلاه مخ الضبع..

بشرى: لسان لحمار.. 😒

فيونا: زغب الفار ليتييم..

بشرى: مسارن النملة العاگرة..

فيونا: ختفوو ماعرت منين تصلطات عليا 😾

باقاو تم عادينها لنميمة والمعيوور فزينب حتى جمعات بشرى الوقفة..

بشرى: نهود نصايب لراجلي أتاااي هادي هي وقيتتو..

فيونا: هااي على راجلي مابغيتيش تكبري 😾 ياك كنگوليك گولي ليه الحاج حشومة..

بشرى: حشوومة!! مالو خاطبني الله يقل حياك.. ونوضي براكة عليك راه حماضت فيك البولة نوضي..

تلاحت على ضهرها فوق الناموسية من موور ماكانت گالسة..

فيوونا (كتتكسل): أهيا نايضة..

مشات وخلاتها.. بقات هكاك شوية عاد جمعات الوقفة.. غسلات وجهها وجمعات شعكاكتها..

رجعات بلاصتها كتقلب على تليفونها.. مالقاتوووش.. شحال وهي كتهيد فالمخاد ولملاية وتنقلهم من قنت لقنت باش تلقاه عاد تفكرات بلي خلاتو فجيب الكابيتشو لي كانت لابسة..

مشات جيهة العلاقة الطويلة لي حدا الباب فين معلقاه.. خشاات يدها فالجيب اللول لقات غا الطاگية.. عاد هزاتو من الجيب لاخر وهي كتشمشم مستغربة من الريحة لي كتشم فيه..

دغيا دورات وجهها لطابل دونوي.. جرات معاها الكاپيتشو ومشات هزات التريكوو.. كتشم هنا وهنا كي السلوگي.. نفس الريحة.. مافهمات حتى زمرة.. وعاد طلع معاها لبلان لي طرى ليها فاش لقات الطريكوو مني كانت كتفطر لتحت.. كان راسها كيسترجع فين شمات الريحة قبل بلحق مادات ما جابت حتال دابا..

بقات گالسة مسمرة.. شادة داكشي فيديها وكتدور فعينيها.. كتحاول تلقى شي تفسير ولاتتفكر شنو طرى النهار لي فات ولا شي حاجة تربط ليها الاحدات ساعة والو.. أصلا مني فاقت مالقاتوش جاب ليها الله بلي غا كانت كتحلم ولا كتتخايل.. ومادام ماعندها حتى دليل كيغدير تلقاه ولا حتى تسول.. شكون غيتيقها ولا غيتيق دوك المواصفات لي غتعطيهم.. داكشي لاش سكتات ورجعات فحالها وماتسوقاتش للموضووع..

ولكن نفس الريحة لي كتشم دابا دخلات ليها الشك.. تكون غااصدفة زعمة؟..

راس كيدي وراس كيجييب.. حتى شداتها الشقيقة.. جرات لمجر لي حداها ولاحتهم فيه بجووج ونتضت نزلات عندهم..

دخلات مع الصالة.. لقاتو شاد الطيلي كوموند وكيتفرج فناسيونال جيوگرافي..

فيووونا: جدووو 😻

مصطفى (دار راسو ماسمعهاش): ...

حيدات بالطووفتها على قبل الزربية ودخلات عندوو...

فيوووونا: حبيبي ديالي.. مخاصمين؟

شد الضحكة ودور وجهو..

قربات هي عندو باست ليه يديه وراسوو وشداتو من حناكوو كتجر فيهم..

فيونا: يخليلي موسطاشي الغضباااان 😻😹

غلباتو الضحكة وطلقها.. عنقها وباسها..

مصطفى: ههههههه يا المشة..

جات بشرى بالصينية ديال اتاي حطاتوو مكمشة فمها ماعاجبهاش الحال..

بشرى: شفت ها علات ماكنبغيش نجي 😒

فدوى (جلسات حداه معنقاه): مغيارة هههه

مصطفى: ههه بغيت غير شي واحد فيكم يكون بعقلو..

نطقوو دقة وحدو: مالنا كنلوحو حوايجنا؟

مصطفى: لاحول ولا قوة الا بالله.. نوض نصلي لعشا حسن ليا..

ناض صلى ورجع.. وبقاو گالسين على گولها وضحك عليها وليوون حداهم كيلعب.. حتى طلع منصف..

منصف (كيشوف فيها): السلام عليكم..

غير سمعات صوتو جمعات الضحكة بالزربة.. خلاتو حتى گلس وجمعات الوقفة تمات غادية فحالها..

مصطفى: رواحي.. فين راكي غادية؟

فيونا: يضرب فيا شوية البرد ابا سيدي ونطلع.. تخنقت هنا 😒

مصطفى: روحي ابنتي الله يرضي عليك..

ماحملش منصف راسو.. ولا الحال لي وصلو ليه.. مالقى مايگول.. گلس حداهم.. سرطها فحالا ماوقع والوو وبدل الموضووع..

رجعات هي للبيت هزات داك الكاپيتشو من لمجر هبطاتو معاها فيدها..

نزلات ديريك لتحت.. حلات لبااب ووقفات حداه كتخطط تاني..

ضرها راسهاا ودخلها الشك وخا عياات تنفيه وتحااول تحيدوو من بالهاا..

بقات على داك الحال.. مرة تتبع الغادي والجاي.. مرة يتفيكساو عنيها على بااب دار أنير..

بقات تم تدور فعينيها كي شفاار.. وبين راس كيزعم وراس كيوصها تتبت.. زادت خطوات لقداام باتجاهوو ناوية على خزييت..

وقفات قداموو ويديها لي غيدقو تقالوو عليها.. حتى زعمات وخبطات فالباب بادب

دقة اللولة.. التاااانية.. حتى حد ما حل.. هبطات راسها بتوتر.. ماحملاتش النشرة لي تنشراات.. ندمات گاع لاش وصلات تما..

حارت تزيد ولا تديير بناقص؟..

طلقاتها فيد الله.. هزات يدها وعاودات دقات لأخر مرة ووقفات كتتسنا.. تواني قلال دازو وهي مشابكة صباع يديها قدامها مغوبشة.. طلع ليها الدم.. يالله غترجع فحالها.. سمعات الحلة ديال البااب..

كان أنير لي جروو شوية يشوف شكون تم.. شاد فوطة فيديه.. وشعرو باقي كيقطر.. شافها وزاد حل الباب مطلع حاجب ومنزل لاخر.. متعجب من قدوومها.. خصوصا فهاد الوقت..

أنير: فدوى..

فيوونا (شافت فيه): سلام.. (بثقة) احم بغيت نسولك على شي حاجة..

أنير: وشتا؟ رواحي دخلي من الباب بعداا..

حلوو ورجع اللور مخلي ليها منين دووز..

بقات واقفة بلاصتها.. وخا ضاسرة.. زعامتها ما واصلاش لدرجة تدخل عندوو.. بقات مصمرة تما حتى عاود نطق..

أنير (بصرامة): ماتخافيش.. ماغاديش ناكلك..

فيونا: شنو يضمنني؟

بتاسم بتسامة جانبية ودارليها اشارة بيديه باش تدخل..

زادت خطوات لقداام داخلة مع الباب.. كان السفلي كامل عبارة على صالات بلديين.. بأتات تقليدي.. وحدة محلولة على لخرى ماكيفصل بيناتهم حتى حيط.. وفأقصى اليسار كاين الدروج لي كيطلعوك للفوق..

دخلات كتدور فعينيها وكتبرگك فلبلاصة..

سد الباب وتبعها كيمسح فشعرو بالفوطة لي كان شاد.. حتى وقف وحيدها من راسوو.. وبقى متبعها بعينيه.. كيشوف فيها نسات راسها وكتكتاشف فالدكورات لكبار لي مزينين بيهم..

قاطع سهوتها صوت تحنحينوو.. دارت دغيا متداكة الوضع.. مابغاش يحرجها حتى هو دار راسو كيحك فلحيتو ومانتابهش..

أنير: احم احم.. مرحبا بيك.. گلسي..

فيونا (بهمس): لواه نبات..

انير: نعام؟

فيونا: بارك الله فيك.. (بتردد) ماكاين حتى واحد؟

أنير (بمكر): ساكن بوحدي..

فيونا: بزعطة..

أنير (شد الضحكة): كنتي باغا تسوليني على شي حاجة لا؟

فيونا: اممم.. (قربات حداه ومدات ليه الطريكو حدا نيفوو)

ستغرب أنير وشموو..

أنير (عقد حجبانوو): مالوو؟

فيونا (كتقلقل فيه): هاد الريحة.. ما فكراتك فوالو؟

عاق بيها شكات وگلس يتبوهل عليها..

أنير: the secret ديال antonio banderas.. علاش؟ كتدوري على سميتها؟

فيونا: امم بغيتها لمنصف.. (سكتات شوية كتفكر عاد عاودات دوات)

راه داز عندك البارح فليل نيت ومالقاكش..

سكت شوية وجاوبها بكل ثقة فالنفس..

أنير: يمكن كونت ناعس..

فيوونا (بعدم تصديق): امم..

قاطعهم صوت الصونيط ديال البااب..

أشار ليها ليه.. زعما غيمشي يشوف شكوون.. وتمشى جيهتوو.. حلوو لقا سفياان لي جا.. دخل هو وياه.. سبقوو سفيان مدرم وداير كيشوف فيه..

سفيااان: أفيين أShreek.. وشتا داكشي لي خرجلك لبارح تا طرتي فاخر لحظة؟

مالقى كي يدير ينغزوو.. تبعو وعينيه عليها كيشوف ردة فعلها..

أنير (من تحت سنانو): لاغاتلي مّا على شي حاجة.. خاطيك..

دار سفيان قدامو وهو يشوفها واقفة.. صدموو تواجدها تم فهاد الليل.. ودار شاف فانير ما فاهم والوو..

نقزات هي..

فيوونا (باسغراب): Shreek ؟!

جاوبها سفيان متدارك الوضع..

سفيان: علاش مافخباركش؟

(شاف فأنير بارتياح) ماگولتلهاش راك بطل المغرب فالفريفايت؟

أنير: لا ماعارفاتهاش 😒

سفيان: .. ياكما جيت فشي وقت ماهواش..

فيونا: لاا.. أصلا كونت غادية.. تصبحو على خير.. 😊

زادت قداموو.. وصلها هو.. حتى خرجات حدا الباب حادرة راسها وغادية.. وقفها..

أنير: فدوى..

دارت عندو.. تكا على الباب قرب ليها..

فيونا: وي..

أنير (جر ليها حنكها): تصبحي على خير..

غوبشات ودارت منفخا ديريكت للداار معنقة التريكو لي فيديها.. خلاتو كيضحك موراهااا..

رجع لداخل..

أنير: فين أحمد الفرشة؟

سفيان: ولي تعلم أروميوو..

أنير: علاياش نعلم؟ جيت لگيتني ندير شي حاجة؟

سفيان: ووشتا كانت دير عندك اا؟ ههه

أنير: كونت تسولها.. 😒

تم طالع مع دروج.. وتبعوو..

سفيان: كنشم ريحت شي حاجة جاية فالطريگ..

أنير: مشطبا كحلة معاك هاد النهار.. جات سولاتني على شي حاجة ومابغيتش نوگفها فالباب..

سفيان: اممم شي حاجة..

أنير: خلا دار عشتك الى ما هنيتيناش..

( على داكشي لي كان شاف سفيان من الشرجم.. نهار تغدا انير معاهم وخرجوو القهوة كان معااهم سفيان وعرف بلي سيدوو لي كان معاهاا.. )

يتبع.. 🍀

شريك القرن 21 الجزء الثاني

محتوى القصة

التنقل بين الأجزاء