شريك القرن 21 الجزء 15

منصف حتى سالا الصلى ودخل لبيتوو معيط ليها مشاات عندو.. گاليها ترد الباب أول ما دخلات.. 

كان حااط حدااه بوكس كبير (صندوق كرطوني) مدموندي ليها عليه من قبل.. حلاتوو لقات فيه سنسلاات دالعنق لليون فالشكاال والألواان وشي تخربيق أخر دلمشااش.. ألعاب وبرودويااات.. مانساهش ومانساش أنها كتمووت على تاخد ليه فحال هاد التويشياات.. 

وهي ملاهية كتقلب فيه وكتستكشف فداك الشي.. ستغل انسغالها.. جبد بواطة خرى صغيرة فيها گورميطة ديال الدهب رقيقة وخفيفة مكتوبة فيه [all my love كُلُ مَا أُحِب] حلها.. دورها على معصمها سدوو هاز ليها يديها بااسها.. أما هي.. غير شافت شنو مكتوب فيها ماعرفاتش امتى غرغرو عينيها وامتى نزلو دوك الدمووع على شنو مكتوب.. 

ماشي ماموالفااش.. ولكن من مور زواجو گالت أكيد غيتبدل.. غيبغي مرتوو كثر.. توقعات أنو هاد كلمات الحب والغزل لي مولفها غيمشيو لزينب وماغيبقى ليها غير دكريات وصدى صوتو وأفعالو السابقة.. 

ماشي هي لي كتتحكم فهاد الافكاار ولا كتبغي تعيش الدراماا ولكن فكرة أنو مها مهااا لي ولداتها ماحناتش فيها.. لاحتها لوحة ليهود كتاكلها من لداخل الوقت لي ماواات خرين كيقطعوو فلحمهم ويخرجو دم جوفهم غير باش مايبعدوش على ولادهم.. عقدة أعواام نتجات ليها الخوف من أنها تفقد أغلى ما ليها.. وكرهها أنو تشوف راسها ضعيفة لي كيخليها تقسى وتتمرد لعلها تنتاقم لراسها وتشفي غليلها..

منصف (حط يدييه على وجهها كيمسح فيه): يهودي مات فالملاح.. ههه (بمعنا ماعرت شنو طرى وجرى بكيتي)

فيونا (بتاسمات بدجر كتعاونو وتمسح بضهر يديها): أصلا ماكتصبش.. غير سحابة دايزة ههه 

منصف: هكاك.. بنتي أنا گاعما كتبكي.. (مميل راسو كيشوف فيها وكمل) يااك أعشيري؟

فيونا (هزات راسها ب اه): هادييك اعشيري.. هه

منصف (جرها عندو عنقها): باقي كنعقل فحالا غير لبارح نهار تزاديتي وجابوك ليها مخشية فحويجاتك كتفركلي وتخرجي وتدخلي فلسانك وعويناتك مغيمضيين.. بشوية بشوية حتى وليتي كتحليهم فيا وتشدي فالرضااعة.. حتى وليتي تگلسي وتجري ليا فلحيتي وتهربي فاش نبوسك ندگگ بيها.. شوية بشوية كتكبري وكنزيد نتعلق بيك كل نهار كثر من قبل..

منصف: نتي أكثر حاجة فحياتي كنحمد الله حيت رزقني بيها.. الحاجة الوحيدة لي خلاتني نوقف على رجلي ونعيش على قبلها.. ماشي غير بنتي.. هاد تمنطاش لعام كاملة كنتي صاحبي وخويا وبشرى فاش كنحتااج.. يعني عبارت all my Love قليلة باش توصف شنو نتي بالنسبة ليا.. ومهمى عنات فغيكون ما فقلبي ديما كثر.. قلبي كلو نتي.. كبدتي وقطعة من روحي.. فديوتي الشريرة.. (باس راسها) نتمنى نكون قدرت ونوفر ليك ونحقق ليك ولو شوية من لي كتحلمي بيه.. كنتمنى نكون ربيتك أحسن تربية وماخليتك تحتاجي حتى حد غيري.. 

فيونا (حسات بيه تزير مع اخر كلمات نطق.. عارف راسو مهما دار ماغيقدش يغطي ولا يعوض بلاصة الام.. بعدات راسها عليه وشدات حنيكااتووو بحناان كتلعب ليه فوجهو): شووووت 🤫 نتا أحسن أب فالعااالم.. أنا ماعندي حتى حد غيرك.. نتا لي كنعرف ونتا لي حليت عليه عيني.. أصلا ولدتيني بوحدك.. كنتعجب يكونو البنات متقربين لمواتهم كثر من باواتهم حيت مستحيل يكون شي حد فحنانك يا أغلى ما فالكون.. 

باستو وعنقاتو بالجهد لي كان ضامها حتى هو لعندوو فحال طفولتها أصلا امتي كبراات باش ماتبقااش طفلتوو المدللة ولي من كثرت الفشووش ولات ضاااسرة وخا فحدود المعقوول.. المهم ماتحكرووش هههه

على شحاال وهوما على حالهم حتى عيطو ليهم تعشااو مجموعين قبل ما يدوز كل واحد لبيتوو يرتااح..

فنفس الوقت لي كان فيه الهدووء هنا بلاصة خرى كانت نايضة صباااط بين أنيير والأم ديالوو لي قصدها من مور مادااز لكلووب سوى أموورو ومشى باش يشوفها ويفاتحها بالخطوة لي مستعجل باش يخطيها.. 

سلم عليها بحراارة معنقها ومشبعها قبلات تفقد حالها وصحتها.. وگلس حدااها شااد يدييها عندوو.. 

كانت ديك الساعة فاتت وقيت لعشا.. سكت شحاال مثقل كيوزن كلاموو وكيقلب منين غيدخلها وغيبدا ليها قبل مايحس كفها لي بدا كيدوز على راسو.. 

عائشة (لاحظات شرودو وكتحاول تعرف شنو بيه): وشتا أحبيبي؟ شا مغيرك؟

أنير (دار شافيها بابتسامة خفيفة قبل ما ينطق)

أنير: واالو أمّا غير عيان شوية.. 

عائشة (بقلق): وشتا راه يّوجعك؟ (شنو كيضرك)

أنير (كيطمنها): مابيا والو.. ماتخميش الحنّانة.. (جر يدها لي كانت محطوطة على راسو باسها وسكت شوية قبل مايزيد بنبرة صوتو الرجولية المعتادة لي ماكتزيد تبرز غير شخصيتوو وكريزمتو الطاغية) الوليدة.. راكي تعّرفي شتا طرى مع شيما.. وتعّرفي من موراها سديت الموضوع فمرة.. 

عائشة (باصغاء): واااه أولدي.. 

أنير (كمل وهو شاد ليها فيديها وكيشووف فتعبيرها): مأخرا سراو لي (وقعو ليا) حاجاات خلاوني نبدل رأيي وهادي مدة راني نفكر فاش عرفت راسي شتا باغي ووشتا راني ندير جيت لعندك.. (فصل هضرتو بحركة يدو لي دوز على لحيتو بنوع من الحياء) المهم كاينة واحد بنت الناس وماكرهتهاش تكون حلالي.. 

عائشة (باستغراب مامتوقعاهاش منو هو لي نافر الموضوع ونافر الناس فمرة.. استغربات حتى من اهتمامو لي خلاه يجي برجليه ويفتح معاها لموضوع.. لمسات جدية الامر حيت حتى من زميرة لي كان غياخد قبل ماكانش مسوق ليها كانو ماواخدش الامر بجدية عكس داباا): وشكون هادي؟ نعرفها بعدا؟

أنير: وااه.. بنت منصف.. 

عائشة (لمعات عينيها قبل ماتجمع حجبانها وتعقدهم بلل ماتگول حتى كلمة)

أنير (كيحاول يقرى ردت فعلها): وشتا بانلك ؟ 

عائشة (دارت قدامها مقادة گلستها وهازا راسها لفووق): مانيش موافقة..

أنير (كأنو ماسمعش مزيان): وشتا؟ (كيستوعب) وعلااااش؟ 

عائشة (على نفس الوضع): مابغيتش 😠

أنير (صدماتو): مافهمتش! وشتا مابغيتيش؟ فدوى؟ 

عائشة: واه مابغيتهاش؟ شتا مافهمتيش؟ (سكتات تحت نظرات لمستفسرة وزادت) ماصالحالكش ليك وماصلحش ليها.. 

أنير (صعر وكون ما مو لي كتهضر گدامو وكون ماداك الاحترام والبر لي كيبرها كون ماعرت شداار): ووشتا صالح ليا؟ وشتااا الوليدة وشتا؟ نگعد وحدي هكا حتى نشرف؟ واش راكي تشوفي هادشي لي راني فيه حالة؟ 

(قاطع هضرتوو ونبرت صوتو لي كانت غادة وكتطلع بلا ما يحس يدوو لي كيحرك قدامو وبانت ليه خضارت وتضخمات)

دوز بيها بفقصة على وجهوو كأنها غاهي لي بقات خاصااه فهاد لوقيتة هادي.. 

بقى گالس تمى على أعصابو كيتناقش هو وياها.. كيبانو من بعيد غير حركااتهم وحركة فمهم وهوما كيهضروو يتنااقشو بلاصووت.. ساعة.. ساعتاين.. عاد نااض حااقد على الوضعية يمشي فحالوو.. طالع لييه لخز فراسوو مافااهمش لاش دارت لييه لعصى فالرويدة.. 

طلع لطموبيلتوو ديمارا.. مساااافة ووقف وسط الشاانطي لي كيخرجو من لمدينة وكيوصل ديرييكت طوالة لجيهة دار والدييه وخرج مكالي بالكاپوو شحاال حتى برد شوية وكمل طريقوو.. 

كاانت يالله شي لحدااش قل شي حاجة..

فاالدخلة دالحومة ومن موور ماقطع معاها لاپيل عالمها بوصولوو باش تهبط عندوو يشوفها ترجل من لحديدة وهبط بثقالة وبعيااء ظااهر عليه من بعيد.. لايح خطواتوو لي داوه عندها بزز.. ورغم دالك ما ان لمحها خارجة عندوو مكمشة فكبيتشوها وقبها لي لايحة على شعرها بتاسم ليها ضامها بنظراتو حتى وصل عندهاا..

تحدر باسها من حنكها مستنشق كمية كبيرة من الأكسيجين المخلط بعبيرها عاد استقاام فوقفتو ماكارهش يضمها ديال بصح.. 

أنير : لعمَر.. 

فيونا (خاشية يديها فجيبها ومع قصيورة كتبان بعلوكة): ca va؟

أنير (بتعب): الحمد لله.. رتاحيتي؟ 

فيونا: سي.. (هزات راسا كامل فيه) 

أنير (قاطعها مني تفكر خرجتهم من عندو بشرى): وااه شتا دارت فيكم حناك مزال (جداك)؟ ههه 

فيونا: ههه والو غير جينا فطرنا.. يالله رجعتي من الصباح يمكن؟

أنير (لاح تقلوو على الكادر دباب دار دفيونا لي مخلينو محلوول وواقفين وسطو): واه.. دزت لكلوب وشفت لوليدة عاد وليت (رجعت)

فيونا (بقى فيها أصلا من شكلو باين مهدوود): طلع ترتااح.. باين فيك لعيا..

أنير (هبط يديه حتى وصل لصبيعاتها جارهم من وسط الكم حتى باس كفها): راني مرتاح هاكا أعمري.. ريضي.. (خلاها وحل الطموبيل خدا منها بواط مربعة ورجع عندها)

فيونا (لاحظات أنو مني تحرك من حداها لا مني جا نيت وهو خاشي يدو لخرى فجيب الكابيتشو لي زاد فوگو حتى هو على ندى لي كان كيطيح.. قربات ليها وهي كتهضر مامسوقاش لشنو جاب كثر مااهتمامها بشنو يقد يكون بيه): ماالك فيدك؟

أنير (مدها ليها باستسلام حتى قلباتها وهزات عينيها فيه مافاهمة والوو)

أنير (ماحتاجتش تسولو باش يجاوبها وهو كيحرك راسو): مانيش عارف.. 

فيونا (شافت فيها بتأسف مزيرة على فمها قبل ماتعاود ترجع عينيها لوجهوو وهي كتدوز كفها على يديه نيت لي باقة خضرة على حالها.. كتطبطب عليه ببتسامة باش مايتحسسش ولا يظن انها شافقة): خاطييك ههه كلشي غيولي مزيان..

أنير: ان شاء الله.. (مد ليها لبواطة فيدها) هادي ديالك.. 

فيونا (خداتها من عندو بخجل ظاهر): علاش عدبتي راسك.. يكفي لي درتي.. 

أنير (كيبعد بصباعوو الزغبات النازلين من تحت قبها على وجهها): تستاهلي كثر.. 

فيونا (كتشوف فيها بعوينا دايبة كثر ماهي كتدوب): thank u 💚

أنير: Nothing for u babe.. طلعي فحالك نمشي حتى أنا نرتااح.. 

وقف قدامها مدرگها وتحنا عندها كيشووف فعويناتها حتى خطف بوسة من قنينفاتها الدافيين بطريقة خلاتها تحط يدها على لحيتوو.. غير باسها بوسة وحدة وبعد قبل ماياخد وحدة خرى ويدوور فحالوو ضاغط على راسوو باش يبعد وغادي جيهة لداار.. ديك لبوسة كانت تهدي الناار لي خدامة كتااكل فروحوو وكفيلة تشعل لعافية فقلبها بالمقابل مسارعة فدقاتوو كثر ماهما كيضربوو على جهدهم.. 

حتى دور الساروت وتلفت عندها تسناها حتى دخلات عااد سد.. 

طلعاات ببواطتها كتتسلت لا تسمعها بشرى وتصدق فما هي وما لونها حتى وصلات لبيتها عاد رتاحت.. ردات لبااب وگلسات جنب الناموسية حدى ليوون لي كان متكي ناعس.. 

حطات اللعيبة على فخاضها وحلاتها.. لقات فيها بواطة خرى صغيورة حطاتها جنب وخشاات يديها كتكتاشف وكتجبد لعجب لي فيها.. خرجات واحد الكورة زجاجية شفافة محطوطة على واحد طرف ديال الالومنيوم گري.. ديك الپول الشفاافة ولي فحال دوك اللعيبات لي كيكون فيهم ديكور لداخل وما ان كنحركوه ولا كنقلبوه ونعاودو نحطووه كيبان لينا فحال الثلج بدا كيهبط علييه.. كان فيها لدااخل راجل ضخم فحال hulk كأنوو تصغير دأنير وهو متحول فكامل اخضراارو.. 

عضات على فنوفتها لتحتانية كتقلب فيها وتدور فيها باعجاب حتى شعلاتها وحطاتها فووق لكوافووز حدى لفيوزة 😻

رجعاات خدات لولة وبتسامتها غا ما زادت وساعت ما ان حلاتهاا.. 

فيونا (كتحاول تهزها من بواطتها): وييينو 😻

كان الكادو التاني عبرة على وردة كتشبة للوردة لي فالجميلة والوحش مشدودة من جوج جوايه على شكل كروميطة حتى هي.. 

حتى خداتها فيديها وردات لباال لكتبة مرافقاها فبواطتها شارحة لاش ديك الوردة وأش كتعني:

[ Happy birthday beauty.. 

Ur beast 💚 ]

(سنة سعيدة أيتها الجميلة.. وحشُكِ💚)

لفراشاااات تناقزوو.. الصخفة دگبيلة تضاعفاات أغوتي وهي كتقرى فشنوو كاتب ليها وتعااود.. خصوصاا الكلمة اللخرة والملكية لي فيها.. 

ورغم اعترافو بأنو وحش.. هو ليها وملكها بما فيه من عيووب.. تكات راجعة بظهرها لوور حدى ليوون.. كتسد كتقادها فيديها حدى ختها.. بكثرت ما ماعندهاش مع الذهب.. سطاوها بجووج بيهم وحمقووها.. لدرجة بقات مادة يديها لفووق وكتشوف فيهم.. 

أهم جوج رجال فحياتها جايبين ليها نفس الحاجة.. كأنهم مستقصدينها ولا متافقيين ههه اللول باباها روحها والتاني حبيب قلبها.. 

هكااك بقاات فرحانة بگورميطاتها كثر من أي حاجة قبل ماتديها عينيها وهي ناعسة هكااك جنب مخلية واحد السيد كيتسنى لي يجاوبو على ميسجاتوو..

فصباااح على غير گااع صبااحات الحد لمعگزيين.. طالعة زينب لطااج التاني ببلاطوو فيه الخبز مبريصي فيه الفرومااج والكاشير وكااس دالحليب بالشوكولا.. 

دوراات لبوانية دياال البااب ودخلات بشوية.. حطاات داكشي من يظيها فووق واحد الكرسي قبل ما تجمع داكشي لي كان داير بفيونا محلوول وطرفااتو وتقرب لبلاطو لطابل دونوي.. 

ضحكات على نعستها لي شادة عرض الناموسية ومعنقة ليوون.. قربات عندها بشوية.. 

زينب (كتحرك فيها بحناان وكدوز يديها عليها): فدوى.. فديوة.. 

فيونا (برزطاتها): همممم.. 

زينب (كتحااول تفيقها): نووضي.. گالت ليك لميمة فطري قبل ماتطلع عندك.. (ماجاوباتهاش وهي تشدها الضحكة) فيقي ههه..

زينب: نوضي راها تتحلف.. 

فيونا (كتحل فعينيها وتسدهم بتتاقل مخصرة وجهها): شنوووو؟ 

زينب: الحاجة راها تزگي وتزعف (كتغوت وكتخاصم) گالت لك نوضي.. هالبلاطو راني طلعتو.. فطري وهبطي ولا ستنايها حتى تطلع ولا.. (حركات راسها بماعرت)

فيونا (كتحاول تفهم): شنو واقع؟

زينب: مانيش عارفة.. دايرة انقيلاب ههه رانا نخملوو (كنشقاو) من الصبااح.. 

فيونا (كرزاات على عينيها مدگدگة): علاش شحال الساعة داباا؟

زينب: زوج ونص.. 

فيونا (كتبووس بيديين ليوون لي كيتكسل ويجبد لجيلاتو حتى كيقيسها فوجهها): واخاا هانا نايضة.. 😪

نزلات زينب فحالها وبالفعل تگعدات من بلاصتها وقاداتهاا.. خرجاات غسلات وجهها.. قضاات تخربيقها ورجعات فطراات هو اللول عاد دوشاات.. 

ماجات فين ترجع وتلبس حوايجها دالداخل والسوفيطما حتى وقفات عليها بشرى.. قرات عليها الزابوور والانجييل على التبراح لي برحات باش تفيقها وبلا فايدة.. عاد دازت لشنو جابها.. علمااتها بلي غيجيو عندها شي نااس صحاابها هي والحاج.. توصي وتعااود وتتحلف عليها باش تستر مسعودتها لي ديما كارزاها بسراول السورڤيط والزمر لي كتلبس فالداار على أسااس حشوومة وعيب قداام النااس.. حلات بلاكاارها تجبد ليها شي لعيبة طويلة.. قلباات حتى عياات ووالو فلخر جبدات ليها قفيطين سااامپل وخفييف بخياطة عادية وحطاتو ليها.. 

بشرى (عاگدتهم تعصباات): عرفتْ وشتا ديري.. لبسي هدا..

فيونا (يديها فشعرها كتنشف فيه): هاويلي الشعيبة مالي غادة لحضوور 😒

بشرى: هدا باش راهم يّحضرو ناس؟ 🙄 راكي غير تدّبزي (كتخربقي) أصلا لي راها جاية دروك تشوفي باش راها تجي ماراهمش يلّبسو جلالب راهم يخيطو غير هادو بيهم يخرجو.. 

فيونا: بفف حطيه أصلا غنسلم مانفوتش خمسة دقايق ونطلع فحالي.. 

بشرى (غادة خارجة): اودي دخلي ديري غي الصواب وغبري وشفتيهم غير ميتين عليك حتى هوما ولا راهم جايين عندك يخليها سلعة 😠

بشرى (حتى وصلات لباب وعاودات دارت عندها): وااه ووركي (نعسي) عاود هنا.. 

فيونا: ننشف شعري ونزل 😒

مشاات وخلاتهاا قاداات شعرهاا ووجهها مطلعة شفيراتها بريسيل وايلاينر خفيف.. لاحت فوقها قفيطينها لبااج فاااتح وهبطات.. 

لقاتهم حتى هوما لابسين البلدي.. غير شي حاجة خفيفة فحالها لي يقدرو يستقبلوو بيها الضيوف.. حاطين مبيخراات صغاار ديال العوود ودووك اللعيبات لي كيطلقوو الريحة زوينة وهكااك عاطية ريحة سانيكروى ولي برودوي لي صبحو يجففو ويمسحوو بيهم من صباحية ربي.. حطاات لبلاطوو فوق لپوطاجي وگلسات كدور فعينيها.. يالله غتمد يديها تنقب من داكشي لي موجدة وحاطة فافخم الطبيسلات والميعنات لي عندها.. الماعن لي كيبانو من عراضة لعرااضة ولي ماكيتجبدوو غا فالمناسباات.. قفزااتها بصوتها ناهضة فيها باش ترصى.. دورات راسها كتسول فزينب بعينيها على شكون جاي.. فهماتها وردات عليها غير بريط حتى بلي ماعارفاش.. 

مني مادات منهم لا حق لا باطل ميكات وخلات ليهم الكوزينة بما فيها أصلا ماشي شي حاجة جديدة على بشرى مولفة دير فحال هاد لعراضاات وتضايف الناس بأحسن وجه مبينة على كرمها وجوودها..

خرجاات لصالة هي وليون لي كيتساابق معاهاا مخشي وسط رجلييها مشاات گلساات مع صطوف مجمعة هي ويااه.. 

ماداازش بزااف ديال الوقت حتى تسمع الصونييط ديال البااب لتحت.. 

ناضت بشوية عليها وهبطاات باش تحل.. 

مع جبداات لبااب تحلوو عينيها.. ماشي من شكون لقاات عادي مولف يدق ماشي اول مرة.. توسعوو عينيها من الشوميزة لي لابس وخاشي فسرواال دالتووب كلاص.. ووالديه لي كانو معااه.. ماتوقعاتهمش هوما لي غيجيو.. خصوصا مني بشرى ماسماتش وخا عارفاهم كيعرفوهم من لمشية لي مشاو عندهم فالعييد..

نعلات الشيطان وتداركات الأمر دغيا قبل ما يهزو راسهم فيها موسعة البااب وسامحة ليهم بالطلوع بعد ما دخلو مع الباب وسلمات ورحبات بيهم..

بقى هو لخر بخطواتو الثقال كيحاول يتعطل ما امكن وهو كيشوف فيها من لتحت لتحت ويشم لي كيوصلوو من ريحة بارڤانها لمخلط بلبرودويات لي دايرة من بعييد.. 

خرج منصف من الباب لي كيجيب من الريسطوو لابس حتى هو لكلاص فحالوو وفحال علي كيرحب بقدوومهم وطالع معاهم لداار لفووق..

هز أنير عينيه فيها غمزها وتبعهم مخليها هي اللخرة تسد البااب مبتاسمة ليه بعفوية..

نرجعو لنهاار لي قبل ههه.. بالضبط لگلستو مع ميمتوو وهو جابد معاهاا موضوع زواجوو لي رفضاتوو رفض قطعي بلا ماتگوليه حتى السبب لي خلاها ماتبغيش.. وكي غتديير حتى تگولييه بلي خايفة على لبنيوتة لي كتشوفها مزال صغيورة منوو ومن لعنتو لي تابعاه فحياتو وممرضااه.. هداا اول ماجا فباالها من بعد مافاتحها فموضووع أخر حاجة كانت متخيلاه يجبدو معاها ولا ناوي عليه.. ماكرهاتش لييه.. أكييد ماغتكرهش ليه.. ولدها لوحيد وكبدتها ولا غتلقى حسن منها ليه أخلاقها باينين وباينة تربيتها غير من معرفتها وصحبتها مع دووك الناس لي جامعاها بيهم شي حاجة كثر من جوورة.. عشرة سنين مايجمعها غير الفم.. ولكن مابغات ليه لا هو لا هي التكرفيص.. 

هي لي موو وولاداه كيعز عليها تشوفو هكاك متحول ومزمر وكيبقى فيها.. وهي نيت اكثر وحدة عارفة بلي من النوع لي مايستحملش يشفق عليه شي حد وها حنا مزاالين فيه.. كي غدير حتى تشرحليه السبب لي خلاها تدير ليه لعصى فالرويضة.. مالقات قداامها غير انها تتشبت بدووك جووج كلمات دالرفض بعنف شي لي خلاه يفوور ويغلي.. ومن موور ما يعيا مايحاول يستفسر منها يسد نقاشوو معاهاا ب [وديني ماتكون لغيري مرا ] قبل مايتگعد فعالوو يبعد ساعة بخرى.. 

لا هي شارحة ليه خوفها ولا هو گايل ليها بلي فدوى عند علم بحالتو كون فحال هاد لحويجات كيبقاو من خصوصياتو وكونو راجل تبارك الله كبير وبعقلو وقادر يميز ويعرف فين كيحط رجليه..

هاديك هي مشيتوو فاش شااف الحريگة.. وصبااح على النبوري رجع عند ميمتوو.. لقاها كتفطر فالجردة قداام الداار باس ليها راسها واتادر منها على انفعالوو ليلة لي فاتت كيما تأسفات حتى هي على تحكارها عليه.. فوضات أمرو لله ومالقات غير أنها تساندوو وتخبروو أنها مستعدة تخطبها ليه وقتما بغاا.. 

باس ليهاا يديها بامتناان تفاهم معاهاا على شنو فبالوو وناض قاصد منصف قبل ماتعيط هي لبشرى..

كانت الشمس بداات كتبرز.. جواايه لحدااش هكااك.. نزل منصف كيتسنااه فريسطوو بعد ما تاصل بيه وعلموو بقدوموو باش يناقشو فموضووع مهم.. نزل من طموبيلتوو وتااجه عندوو..

سلم عليه من مور مادخل ومن بعد ماا جاب منصف كيسان دالقهوة كحلة ليهم بجووج وهوما كيسولوو بعضياتهم على كي دااز سفرهم گلس هو وياه فالطبلة باش يبداااو هضرتهم.. 

منصف (كيشرب فقهوتو مخليه على راحتو حتى جبد الموضوع لي جاي على قبلو)

أنير (بكل رجولة حنحن وبدا): المهم.. عارفك داير فيا الثقة.. وأنا الحمد لله كنت وباقي گدها.. أخر حاجة نفكر فيها هي لغدر ولا تكون حاجة من مور ظهرك..

مانيش نسرق ولا نتفلى باش نخبي ولا نحشم.. قصدي شريف وناوي لمعقول.. نهار حطيت عيني عليها هاني گدامك بلا خبارها گااع.. جيت من لباب وباغي بنتك على سنة الله ورسولو.. الحمد لله الوضع مستقر والحال ميسور.. راني نديرها فعيني وفوگ راسي والى ماكانش شي مانع وكنتي موافق نجي نخطبها ليوم قبل غدا.. 

منصف (كان كيسمع ليه باهتماام حتى كمل.. حط يديه فوق الطبلة وبعد دقائق من التفكير جاوبو): شوف أولدي.. نقدر نكون مابقيتش شفتك من نهار خرجت من وجدة ولكن الحاج فاش كنا كنتجمعو كان ديما كيذكرك.. من جيهة خرى هاد الشيبات لي كتشوف ماجاوش وناضو غير هكاك وليت بعمر قادر فيه نحلل شخصية لي قدامي.. كون عرفتك غتضرها ماغنأمنش ليها عندك شحال من مرة ولا نخليها تشد معاكم الطريق.. وخير دليل على أني ماغلطتش وجودك قدامي دابا.. مرحبا بيك أولدي حاشا واش نردك الدار داركم ولكن مانواعدك بوالو.. كيبقى الاختيار فيديها هي.. حيت حياتها وهي لي غتتحمل نتيجة اختياراتها ماغنقدرش نفرض عليها شي حاجة..

أنير (بجدية): وااه.. هو هداك.. يجيو مالين الدار ونتفاهمو إن شاء الله..

منصف: مرحبا بيكم.. يكون خير.. 

أنير (ناض وقف): إن شاء الله.. شكرا ونخليك.. حتال لعشية.. 

منصف (حرك ليه راسو بواخاا)

نسااحب أنيير مع وصوول الدراري لي كيخدموو فالريسطوو دمنصف.. لي بعد ما مشا ضيفوو طلع لفووق علم وليديه بشنو كاين وحتى كان غيطلع عند بنتو وحبساتو بشرى بحجة أنو ماشي ضروري.. ومادام الدري جا بشكل تقليدي يخلي داكشي يكمل على ماهو عليه بلا مايحتاجو يگولوها ليها حتى يجيو الناس يطلبووها منهم..

داكشي لي طرى نيت حتى لقااتهم قدامها طاالعين حشمانين من مجيتهم على غفلة حتى وصلولو لپروميير ودخلوو.. 

ستقبلاتهم بشرى على انغاام الطرب الأندلسي لي طالقين بشكل هادي وناقص وفنفس الوقت مسمووع.. مد ليها علي لي كان شاد فعائشة وحاكمها بوكي ديال الورد حمر (Rose) طويل مجموع بسينتة غليضة بشكل سامبل بلا زواق ولا مبالغة.. 

من بعد ما سلماات عليهم دخلات معاهم لعند مصطفى لي وقف كيتسناهم وسط الصالوون.. الوقت لي أنير حط لفيونا فيديها بواطة ديال الشوكولا كبيرة فووقها بواطة ديال طااغط مدوز صباعو على ضهر كفها من تحتهم محافض على رزانتوو وجدية ملامحو عكسها هي لي حماروو خدودها من حركتوو وهربات مرتابكة بخطوات محسوبة لكوزينة.. 

تبعها بعينيه ساحروو لبسها وكيف جاهاا لقفيطين وجا على فصاالتها.. حتى مابقاتش كتبان ليه عاد دخل تبعهم.. سلم بدوروو وگلسوو دقة وحدة..

كاانت ديك الساعة الخمسة هكااك.. باقي الضو ديال النهاار داخل من الشرااجم.. لكن هادشي مامنعش بشرى تشعل شميعات د ديكوراسيو فوق الطبلة مرافقين طبيسلات فااخرين بيضين بغطاهم على شكل طويجنات صغاار حاطة فيهم الپيسطاش.. التمر.. وشي مقبلات مرافقين الحلوة والسينية ديال أتاي بكيسان بويض حتى هوما منقوشين بالنقرة هوما وبرادهم دالزااج.. على ناپااات مطرزيين ومتماشيين مع الطلامط لمحفريين والمجبديين ولي الى دلوو على شي حاجة ماغتكون غير على دوقها الرفيع ورقيها.. 

رحباات بيهم وعاوداات ماسايعاهاش الأرض من فرحتها بمجيتهم.. وبعد ماتطرقوو لشحال من موضووع ودااو وجابو فالهضرة وضايفااتهم تولى علي زماام الكلام وفتح الموضووع..

علي (كيهضر ومفتاخر بولدو فنفس الوقت): بلاشك راكو عارفين السبب الرئيسي لي راحنا جايين على مسبتو.. 

مصطفى (حرك ليه راسو باه بنخوة وثقالة و هو كيتسنط ليه)

علي (وجه نضرو حتى لمنصف): الحمد لله راحنا جيران وعائلة ماشي غراب.. وولدنا كبر وسطكم راكم تعّرفوه كثر منا مانحتاجش نشّكرو ولا نهضر عليه.. ويشرفني الى كتاب نتناسبو مانلگاش حسن منكم أكيد.. المهم منطولش عليكم (بتاسم برجولة وبفرحة باينة) رانا طالبين وراغبين فبنتكم فدوى لولدنا أنير لزواج وعلى سنة الله ورسولو..

من بعد ما كانت گالسة بكل أنووثة بعييدة عليهم شوية.. فبداية الطرف لاخر من الصالة لكبيييرة لي مجموعين فيها.. حيت جاتها حشومة ومن قلة الاداب تنوض وتخليهم..

منشاغلة عليهم بليوون كتدوز يدها علييه وكتغلغل صبيعاتها فاافرو ديالوو مبتاسمة لاستمتاعوو بشنو كديير.. وفنفس الوقت لايحة معاهم ودنيها كتتسنط بلا قصد على فااش مجمعيين تحبسات حركتها وتكوانسات على وضعها راسها باقي محني مصدوومة مع أخر جملة سمعاات مامتيقاااش شنوو تگاال 😳

منصف (شاف فباه باحترام سامح ليه هو يتولى زمام الأمور ماجاات يهضر فحضرتوو)

مصطفى (بادلو الابتسامة بلطف مستقبل كلماتو ببشاشة شااف فأنير لي كان گالس بكل هبة ورغم ضخامة حجمو ورجولتو بادي عليه الاحترام ومكتفي بأنو يسمع لهضرة لكبار بلا مايتدخل ولاينطق): مانلگاوش حسن من أنير لبنتنا.. من ديما كُنت مفتاخر بيه وحاسبو واحد من ولادي.. (شاف فمنصف) و حتى باها مانظنش أنو يكون رافض يعني يبقى علينا نسولوها هي واش قابلة.. والى تافقوو مانزيدوهم غير الخير.. 

علي (بتاسم ليه برضا): واه خير ان شاء الله..

فيونا (واهياناااري واهيا هيا با وهيا المليك وها بوعبيد الشرقي وهيا سبعة رجاال.. ههههه كتعدد فخاطرها وتدعي تكون كتحلم.. دارت راسها ماسمعات واالوو ومارداتش لباال وهي كتتسنى يعيط ليها شي حد فيهم من بعد ما حسات بيهم دارو جيهتها)

منصف (شاف جيهتها): فدوى.. 

فيونا (غمضات عينيها شادة لبكية قبل ماتهز راسها جيهتهم): نعاام.. 

مصطفى (ربت بيده فلبلاصة الخاوية لي حداه): رواحي أبنتي.. 

فيونا (حطات ليوون على اللحاف وناضت لعندو)

مصطفى (حس بدعقتها وحاول يخففها من احراجها وهو كيتكلم معاها ويدوز يدو على شعرها بحنان): ونتي وشنو تگولي؟

فيونا (بتستعبط): فااش؟

مصطفى (جامع ضحكتو عايق بيها): راهم يخطبوك لأنير.. ههه 

فيونا (كانت كتتسنى شي جواب أخر أقل حدة من هدا.. زادو توردوو خدودها وحنات راسها كتعض فشنافتها): ... 

مصطفى: ههه وشا بان ليك؟ 

فيونا (متلبكة.. كتحس بنظرات الكل موجهة ليها كيتسناوها تجاوب): لي بان ليكم (بصوت بزز باش مسموع) نتوما أدرى بمصلاحتي.. 

منصف (عاق بلي بغات وقبالة.. حبس ضحكتو ونطق عاتقها وعاتق الموقف): اوا الله يكمل بالخير..

علي (زادت فرحتو مني ماردوهش وماحشموهش): أمين.. نقراو الفاتحة؟

مصطفى: بسم الله الرحمان الرحيم.. (هز يديه هو اللول وتبعوه كل واحد كيقراها فخاطرو).. 

بشرى (من بعد ماسالاو): الله يتمم كل شي على خير..

عائشة (بغصة باقي قلبها مامهنيهاش.. كتشوف ففيونا بأسف): الله يجعل كلشي مبارك ومسعود.. 

علي: أمين.. (رجع نظرو لمصطفى) راه أنير شوية مزروب.. ماباغيش يدير خطبة ولا الملاك (ضريب الصداق).. راه باغي يتكاتب ديريكت ويدير العرس بلا دخول وخروج.. 

مصطفى (بفخر.. غا ماكيزيد يكبر فعينيه): واه ما گال عيب.. 

علي: بقالنا نحددو النهار والصداق وشتا طالبين.. 

مصطفى: يهمنا غير يتهلالنا فبنتنا ويحافظ عليها والصوالح لخرين راهم تانوين..

علي: الله ياودي.. راها فالحفظ والصون.. 

أنير (نطق أخيرا بعد ماكان يسمع حوارهم باهتمام وبملامح جدية): غنديرها فعيني ان شاء الله.. والى تسّمحتو لي بغيت نهضر معاها على انفراد.. 

مصطفى: وااه.. (طلق من يدها لي كانت شادة فيديه ودوزها على ظهرها بحنان) رووحو لصالة لخرى أقطيطتي.. 

حركات ليه فيونا براسها وناضت سابقة أنير حتى دخلوو ليها وبعدو من الباب عاد دارت عندو ماعارفة كيفاش تتصرف ولا شنو تگول.. دعقووعا.. لحد الان باقا مامتيقاش شنو طاري وشنو دااير بيها.. جابليها الله فحالا غير كتحلم.. حتى ردة فعلها ما.. ماا.. ماعرفاتش كي خاصها تكون.. وبين أنها تتقلق ولا تفرح تقدم بخطواتو الثابثة حتى بقاو غير سنتيمات كيفصوه عليها.. حط يدوو على ضهرها مروراا بخصرها وقربها ليه حتى تلاصق صدرها مع صدروو.. معليها عندو شوية.. 

فيونا (حطات يديها على صدروو كتشوف فيه بحيرة): ماگلتي ليا والو.. 

أنير (بابتسامة جانبية دايب فيها وفعدم مبالغتها بداكشي لي دايرة فوجهها): علاش كون علمتك كُنتي تطلعي حسن من هكا؟

فيونا (بتاسماات حشمانة من تغزلوو فيها وجاوباتو وهي باقا كتشوف فيه): ناء ولكن غفلتيني وزرب..

أنير (قاطعها ببحت صوتوو مخلي يدو من مور ظهرها حاكمها بيها): ماناويش نفوت بيك الوقت وَلا ناوي نكمل حياتي بلا بيك.. هكا غيبقى ضميري مرتاح ويكون عندي الحق فيك گدام الله قبل من كلشي.. 

فعدااد الموتى ههه شداتها السخفة وسط يديه.. فشلاتها هضرتو ورجولتو الطاغية.. ماعرفاتش منااش مصنوع هاد السيد ومنين سلطو ربي عليها.. غيسطيها وغيسكت ليها قلبها.. تسرط ليها لسانها وما لقات باش تجاوبوو.. كتفت غير بأنها ترمش عويناتها فيه.. كتحقق فملامحوو الحرشة والحاادة.. كتروي شوقها من شوفتوو وشوفت وجهو بعشق وهيام لا يقل على هياموو بسحر عينيها ونويفها وفيمها وكلها.. تنهد من ثقل الحب لي فقلبو ليها وحدر راسو شوية مقرب وجهو لوجهها.. وغمضو عينيهم كيتنفسو من أنفاس بعضياتهم.. ناعمين بلحظات السكينة والأمان لي كيحسوها حدى بعضياتهم تحت أنغام صوت دقات قلوبهم لي كتتراقص..

دقاايق وردهم من عالمهم صوت التعيااط.. 

زينب (حشمانة): فدوى.. رواحي تكلمي لميمة.. 

فيونا (تنهداات حالة عينيها ومبعدة شوية): هاني جايا.. 

أنير (ميل راسوو جنب وهضر فودنيها): تهبلي بالقفطان 😍

فيونا (مع بورشها بصوتوو ولحيتوو مع باسهاا فحنكها بوسة مغددة خلاتها تضحك على جنونوو): هههه 🤭

طلقهاا ماساخيش بيها وبقربها وعطاها بظهرو سابقها لبرا مخليها شادة فحناكها من الصهدة لي طالعة معاهاا..

حتى رداات النفس عاد دازت عندهم لكوزينة لقاتها كتقاد داكشي لي وجدااات.. مابغاتها فوالوو غير حرماتها عليهم باش مايبقاوش الراس فالراس..

وجدو الطابلة وحطووها وهوما مزال كيتناقشو فمسائل العرس وتحضيراتوو.. 

تافقوو يكتبو كتابهم هو اللول وما يجي فين يخرج حتى يكونو وجدوو للعرس لي غيديروه غير بين المقرابيين وغيتداار غير فداار والديين أنير فالخرجة دوجدة.. 

سالات جمعتهم ونساحبو الضيااف بهدووء مخلينهم حتى هوما يردو لدارهم عقلها.. ومن بعد ما بدلوو حوايجهم وكملوو شقاهم دخلو يوجدو لعشاا.. تمات نازلة فيونا لابسة سروال دسرڤيط تااني وبودي جامعة شعرها باهماال.. هازة فيدها تيليفوونها وليوون معنقااه.. كانت دايزة عندهم الكوزينة حتى عيط ليها مصطفى لي كان گالس فالفطويات فلمرااح ومارداتش ليه الباال..

فيوونا (دارت بلاصة حداه بايسااه فحنكو وطالقة ليون لي بغا يمشي عندوو): جاادو حبيبي 😽

مصطفى: رواحي اعروستي.. رواحي الكبدة 😍

فيونا (ضحكاات ليه بطفولية كتتفشش عليه كيما موالفة)

مصطفى: حقا گوليلي.. 

فيونا: امم.. شنو نگولك؟.. 

مصطفى: كونتي ديريلي فيا گوبيلة ماسامعاش 🤨 ها؟ ههه

فيونا (حبسات الضحكة كتحاول تجر منو الهضر باش تعاود تسمعها مرة خرى): واااا نااء ماسمعتش.. شنو گالوو؟ واش عمو علي؟

مصطفى (مصغر فيها عينيه): وااه عمو علي..

فيونا (هزاات حجبانها ودوراات راسها بلا): مااااا سمااااعتووووش 🙊🤥مصطفى (داير راسو متيقها): گال راهم طالبين وراغبين فبنتنا فدوى لولدنهم أنير لزواج وعلى سنة الله ورسولو.. 

فيونا (بتاسمات): ماگالش طالبين يدها 🤔 يااك؟ بغاوني كولي؟ ههههه

مصطفى: هههههههههههههه يا واحد المشلگ (الشيطانة) و شكون يقدلك 😂🤣

فيونا (تكات راسها على دراعوو ليمعنقة كتضحك)

بشرى (كتغوت من الكوزينة): ماعرفتك بنتي ولا ضرتي 🙄😒

فيونا (زادت فوتيرة ضحكها وجاوباتها بنفس نبرة الصوت): ضرتك ابشرى ضرتك 😹😹😹

بشرى (طلات عليها من الباب وشيرات عليها بصندالتها): گدي گدك 😡

فيونا (تخبات من مور جدها): اهياناري ههههه صافي غاضحكنا.. 

بشرى (خنزرات فيها ورجعات لشغلها)

مصطفى (جمع ضحكتوو وتلفت عندها بجدية): الصراحة راني ماداير فيها مايصلاح.. (سكت شوية وزاد) مين ماراكيش رافضة فكرة الزواج كان خاصني نمدك (نزوجك) للي طلبك قبل هو أولى لينا ومن دمك و لحمك.. 

فيونا (جمعات الضحكة دغيا): 😳

مصطفى (كيهضر بتحصر): ريضي.. (دار راسو كيقلب على تيليفونو) دروك نولي نصونيلو.. 

فيونا (بنفااد صبر): شنااااااااااااااوااااا؟ (شناهواا بالكزاوية 🤣) الضحك فيه اللعب؟😾

مصطفى (ماقدرش يزيد كثر): ههههههههه 😂🤣 هي راكي باغياتو ماشي قبلتي باش ديري لنا الخاطر.. هههههه

فيونا (ربعاات يديها ودورات عليه وجهها بعزت نفس): أصلا وجادة يموتو ومايرجعوش فكلمتهم 😌

مصطفى: واه ياا مك هههه

فيونا (عاودات تخشاات فيه كتهضر بهمس باش مايسمعوهاش لخرين): ودابا بيني وبينك واش أنا غنصلاح لواحد عينو زايغة؟ 

مصطفى (كيوشوش حتى هو): داكشي لي گولت لمنصف..

فيونا (باست ليه كتفوو وحطات عليه راسها): اواا الله يجيب لي يگوول لحق 😹😏

خرجات زيينب كتوجد فالطبلة مع رجووع منصف.. تابعوو سيدوو شعروو فازگ يالله مدوش كاان عندو ماتش مع فرقتوو دالكورة.. مافراسوو والو على الخطبة برغم دالك ماتصدمش فاش گالوها ليه.. عارف أنير أش كيسوى.. عارفوو راجل ونص والا ماكانش غيشوفو مقرب لختوو حيت مامعتابرهاش غير بنت عموو ومايگوليه واالو.. 

أما قضية بوجنيبة.. النهاار لي نوضوها صباط وحيح عليه منصف.. فاش رجع لداارهم فحالوو كان التبرير على التصلگييك لي فيه أنو بغا غير يفاتحهاا وياخد موافقتها باش يمشيو يگوليهم يخطبووها ليه.. ونيت جاتو من الجنة والنااس وفكر أنو غيضرب عصااافير هوماا بحجرة وحدة.. منها يتملكها.. يحبسها فالداار ويحني ليها الراس ويكمل هو فتقزقييز لي مواالف ومنها يحرمها على أنير لي بان ليه عينوو فيها وبانت ليه مطلوقة معااه لوقت لي هو عياا يدور بيها وماصور منها حتى زفتة..

قنعهم.. نعلوو الشيطاان وبدلوو الساعة بخرى.. وقبل من لعيد عاود عيط شرف لمنصف هضر معااه مطولاا شرح ليه السوء فهم وبلغوو بنواياا ولدوو لي ماقنعوش هاد الأخير ومادخلووش ليه لراسوو.. شي لي خلاه يختار أنو يگوليه بلي غيفكر ويرد عليه قبل مايخطيو أي خطوة باش داكشي يبقى غير هضرة فحالة ماكملش الله وحتى حد مايهز فخاطرو من جيهة لاخر وماتتأثرش حتى على علاقتهم.. 

وفعلاا قبل مايجييو باش يعيدوو مجموعين استفرد بيها وفاتحها بالموضووع..

منصف (حاط مرافق يديه على ففخاو لي منزلهم على بعد جووج درجات بالدرجة لي گالس فوقها): مهم.. (حبس كلامو هاز كتافو محرك يدو ماعارفش اش يزيد وفنفس الوقت ماباغيش يعطي رأيو فالموضوع باش مايأثرش عليها)

فيونا (گالسة حداه جنب.. ظهرها على الحيط.. تانية رجل قدامها فلمساحة لي كتفصلها عليه ومسرحة لخرى.. كتعض فضفار صبعها لي حاطة ففمها وكتفكر.. خدات وقت عاد نطقات): قدي قدو؟ 

منصف (شاف فيها بنص عين): فات التلاتين..

فيونا: وسيدو ثقل منو.. بقات فالسن؟ 

منصف (تلفت عندها): بغيت نفهم غير سباب حسسيتكم من جيهتو.. لبلاصة لي يعمرها تخويها نتي وسيمحمد..

فيونا (عوجات فمها): ماعندناش مع لي فيهم الزيغة.. 😒

منصف: عادي راه راجل.. 

فيونا: ولو أمنصف.. ماتحاولش ترقعها.. كونو راجل ماكيعطيهش الحق يحط عينو على اي تاء تأنيت.. وهاء.. ها نتا راجل.. ها سيدوو مالكم مادايرين الشوهة..

منصف: ومال سيدو گالس بلاش؟ 

فيونا: اش جاب طز للحمد لله.. هداك ماكيتفلاش على بنات الناس وماكيطيحش الدل على راسو أصلا..

منصف (شاف قدامو كيحك فلحيتو)

فيونا (حركات راسها بضحكة استهزاء): هاي هاي على للمهاايد.. بقاليه غا الزوااج 😏 تااا هو قد حتى براسو بقات ليه غا مسؤوليتي هههههه

منصف (ناض وقف حابس الضحكة وكيهضر بجدية): مابغيتش نظلمو ولا نقمع رأيك وعلى وجه عمك شرف خليت ليك القرار وجوابك راه باين.. أما هادشي كامل لي گلتي عارفو.. 

فيونا (ببرائة): أصلا بغيتس نتزوج 😇 (وقفات وعنقاتو) نبقى مع پاپي أنا 😹

منصف: أحياني عليك هههه (بادلها العناق وباس راسها) تصبحي على خير اكبيدة..

فيونا: وانت من اهلوو 😻😽

هكا سالا موضوعهم وكمل نهارهم كيما كمل هاد النعاار نيت لي هوما فييه وخا دورووها وبقاو شادين فيها على قبل الخطبة وعلى فكرة زواجها لي كانو مستبعدينها فهااد السن خصوصا ان كراكطييرها بوحدوو وشخصيتها مختالفة يعني كانو متوقعينها ترفض لوقيتة لي قبلات فيها بلا ماتتردد.. 

صبح صبااح نهاار اخر.. حامل فطياتو أحداث جديدة لكل واحد على حسب أقدارو ومكاتيبو.. 

وبما أنو الثنين وگاع الادارات حالين.. ناض عريسنا الزربان يوقف على شغلوو ووراقيه باش يخرجو ليه دغياا.. وداكشي لي كاان تافق هو ومنصف.. قادو امورهم الصبااح وداز لعند عائشة باش بدااو يشريو فلي اساسي ومعروف على حساب الاصول والعادات اما لي خاصها تعزل فيه على دوقها فضلوو تكون حاضرة ليه وتختارو بيديها..

فحال صدمتها بالخطبة كانت صدمتها بضريب الصدااق لي تحدد موعدوو لغد ليه باش ياخد راحتوو فالدخول والخروج معاها بلا احراج.. وكيما هزوو وثائقهم من السلطات المعنية حطوها ديريكت عند لعدوول..

دخلوو الكبار هوما اللولين تابعينهم العرسان.. وسط الارتباك الباينة على فيونا و عينين أنير لي مترقبينها بفرحة ظاهرة سينات على عقدهم بعد ماسول لعدول كل واحد فيهم واش قابل يرتابط بالطرف لاخر من غير ضغوطاات.. ومن بعد ما تأكد بأنها توصلات بالصداق لي تافقو عليه ولي مابغاتش تحددو هي فمبلغ معين ماهامهاش قد ماهامها أنير لي عاد مازادت كبرات فعينيه.. زادت سخاوتو وكبر بيها بالمقابل..

جر من قدامها لكتااب.. سينا بدورو وعينيه مانزلووش عليها.. ماقادرش يوصف شعوروو ولاقاادر يخبيه..

ما ان تعاقدوو.. بارك ليهم باها وجدها وبشرى وولدين أنير لي كانو حاظرين حتى هوما سلمو عليهم بحراارة..

عاد وصل دورها اخيراا.. قرب ليها بضحكتو المعهوودة مستغل انشغال الكل بالضحك والمزحاات لي كيطلقوو بهاد المناسبة.. وقف قدامها غارق فشوفاتها وفاللمعة لي باينة فعينيها.. بتاسماات ليه بدفء قبل ما يحط يدوو على خصرها وحدر راسوو باش يقبل خدها لمزينگ من الحشمة والتوتر.. حط اللولة دااگها بشعر وجهوو ودار داايز لحنكها التااني.. مع غيعاودها حس ببوستها لي كانت غادية لحنكوو وباغ كونسيدوونس جاات فجنب فموو 🙈 بين طرف شفاافو ولبدية دلحيتوو.. المشكلة العظمة أن البووسة كانت من نيتها ماشي غير حطات فمها وحيدات.. تسعقاات فاش حساات بشنو طرى.. خرجو عينيها وتشنجاات حركتها.. 

وااااع الشوهة.. زااد لبكها ضحكتوو لي حسات بيها كردة فعل..

ماعتقها غا عائشة لي جراتها معنقاها وفرحانة بيها رغم مخاوفها لي مزال ماتحدوو.. 

يتبع.. 😹