شريك القرن 21 الجزء 21 والأخير

هزو عينهم ما إن سمعو صوت دقات قلب الجنين.. جنينهم وطفلهم.. قطعة من روحهم لي كتتشكل فرحمها باش تولي مستقبلا مخلوق صغيكر مازج بين دمهم بجوج.. ملامحهم وشكلهم وصفاتهم وطباعهم.. غرغرو عينين فيونا وهي كتشوف فصورتو لي باقا ماوضحاش وحجمو لي بزز باش كيبان وبسرعة دارت عندو كتتأكد من أنو حتى هو كيشوف داك المشهد لي اثر فيها بالزايد.. لقاتو كيشوف مرة فيها مرة فليكو بنظرات رضى وبتسامة فخر.. الفرحة ظاهرة على ملامحوو.. مدات يديها ليه حتى قرب شدها وحدر راسو كيبوسها فيها ويعاود ممتن لأقصى درجة لهاد الشعور لي خلاتو يحسو ولي كان بالنسبة ليه من المستحيلات السبع.. ممتن لوجودها واكتساحها أكبر مساحة فحياتو.. كيشوف فيها وهو فقرارة نفسو كيحس أنو لو يفديها بروحو روحو ماتكفيهش باش يوفيها حقها ويرد ليها ولو جزء صغير من جميلها عليه.. وزيادة على مشكلة حياتو لي فكاتها ليه وعيوبو كاملين لي زيناتهم فعينيه ها هي ليوم كتمنحو أغلى حاجة ممكن يحصل عليها أي راجل فالكون.. كلمة بابا 👶🏻💚

الطبيبة (كتشرح ليهم كثر): ها هو كيما راكو تشوفو.. بدّا يتحرك.. ها يديه ورجليه للى راهم يبانو لكم.. (شافت ففيونا) عندك تقريبا شهرين يعني معالم وجه الجنين بدات كتاخد بلاصتها وحتى حجم قلبو بدا كيتضاعف راكم تسّمعو صوتو (بابتسامة حيدات لاباراي وعطاتها كلينيكس باش تمسح وناضت للبيرو)

أنير (خداه من عندها ومسح ليها بنفسو الجيل عاد طلع ليها سروالها على كريشتها.. عاونها توقف بشوية وتاجهو للكراسة لي كانو فيهم من قبل) 

الطبيبة (شادة ورقة التحاليل كتعاود تطالع عليها ومع گلوسهم قدامها هزات ستيلو ولوغدونونص وبدات كتكتب وهي كتهضر معاهم): عندك نقص فالماغنيزيوم والحديد.. هاد الدوايات لي غنخرج ليك تبعيهم حتى تعاودي ترجعي عندي من بعد شهرين وخا يساليو عاودي خوديهم.. (مرة تشوف فيهم مرة تهبط عينيها فلي قدامها)

ما كترديش؟ 

فيونا: لا.. 

الطبيبة: يقدر يبانو هاد الأعراض بما فيهم الدوخة وافرازات ماتتخلعيش هادو حاجات طبيعية.. خاص غير تردي البال وماتجهديش على راسك حتى يتبت الحمل.. ماشي مشكيل تتحركي وتخرجي ولكن الثقل والحوايج لي فوق جهدك ماتقربيش ليهم.. أي حاجة فيها الكوفيين.. قهوة.. أتاي ممنوعة عليك.. الحليب تاخدي غير المبستر.. وبالنسبة للماكلة لي ماطايباش بعدي منها فحال الكاشير والحوايج لي فيهم البيض خضر.. أنواع الحوت لي ماكيتطهاش بزاف.. الكبدة وحتى الطون حيت فيه الزئبق خصوصا فهاد الشهور الاولى من بعد وتقدري تبقاي تاخدي هاد الجوج اللخرين مرة فالسيمانة.. المشروبات الغازية والسواىل لي فيهم لي برودوي شيميك بعدي منهم وحتى لي شيپس.. ومبروك عليكم مرة أخرى.. 

أنير (كان كيسمع ليها باهتمام كبير حتى سالات): بارك الله فيك.. عندنا قط فالدار ماراهش يأثر عليها؟ 

الطبيبة (هبطات عينيها للورقة وعاودات شافت فيه باش تجاوبو): للأسف عندو تأثير عليها.. كاين واحد الداء سميتو داء المقوسات والقطوط كيلعبو دور هام فنشر هاد المرض بشكل واسع ولي هوما براسهم كيتصابو بيه نتيجة تناولهم للقوارض والطيور والحيوانات الصغيرة لي كتحمل هاد الطفيل ومن ثم كيتنقل للانسان من خلال البراز ديالهم لي كان للحامل احتكاك مباشر معا ولا كانت هي لي كتنضف أماكن قضاء حاجتهم او لا يقدر يلصق فاقدام القطط وشعرهم حيت هو طفيل دقيق جدا فاش تجي تهزهم ولا تداعبهم ينتاقل ليها الميكروب وبالتالي ينتقل للجنين عبر المشيمة.. 

فيونا (بدات كتتلاشى ابتسامتها): ولكن راه نقي بزاف.. يعني 

الطبيبة (كملات مني حبسات فيونا الهضرة هاربين منها الكلمات): هاد المكروب الطفيلي موجود فغالبية القطط حتى لو كيتم تنظيفها والعناية بيها بشكل كبير.. وكتأثر القطط بشكل مباشر على الحامل لأن مناعتها كتكون ضعيفة مما كيهدد استمرارية الحمل وكيزيد مخاطر الاجهاض هادشي فالمرحلة الاولى أما فالمرحلة الثانية من الحمل فهو كيأدي لاصابة الجنين بتشوهات فالعين وفالكبد وكيدفع للولادة المبكرة مع الزيادة من احتمالية وفاة الجنين داخل الرحم.. (سكتات شوية وكملات) باش نقرب ليك الصورة كثر.. فاش كتتصاب الانسان العادي بهاد الميكروب الجسم ديالنا كينتج تلقائيا أجسام مضاضة ليه وبالتالي كيعطي المناعة ضد الاصابة بيه مرة اخرى يعني كيكمن الخطر فهاد المرض فالاصابة بيه لأول مرة.. وللأسف من خلال فحص الدم ديالك لي قدامي ماعندكش هاد المناعة..

الطبيبة: يعني عمرك تصابيتي بيه من قبل مما كيحتم عليك تتجنب طيلة فترة الحمل مداعبة القط ديالك ولا ملاعبتو والحفاظ على نظافتو قدر الامكان مع لبس ليگات فاش تهزيه ولا تنقيه وماتخليهش يخرج من الدار باش مادخلش ليك ميكروبات ولا خفتي ماتلتازميش بهاد الشي يستحسن ماتبقايش معاه فنفس الدار حتى يوصل الموعد ديال ولادتك ان شاء الله.. 

فيونا (حسات بالغصة فحلقها وشداتها البكية.. نطقات بزز): ماكاينش شي حل اخر؟ شي دوى ولا شي حاجة من غير هادشي لي گلتي؟

الطبيبة: للاسف ماكاينش..

فيونا (حدرات راسها كتشوف فصباع يديها المتشابكين وكتفكر فهاد الخبر لي نزل عليها كي الساعقة)

أنير (تنهد كيشوف فيها ودار جيهة الطبيبة واخد من عندها لوغدونونص): واخا.. شكرا.. 

الطبيبة: العفو.. نتمنى تردو البال حتى للنفسية ديالها.. ومن بعد شهرين كيما سبق ليا گلت تعاود ترجع عندي باش نديرو فحوصات اخرين ونعرفو جنس الجنين ان شاء الله.. 

أنير: ان شاء الله.. 

ناضت الطبيبة وقفات حتى خرجو من مكتبها مغادرين العيادة فاتجاه الطموبيل.. طلعو شدو بلاصتهم وتحرك فصمت.. فيونا حادرة راسها بحزن وخيبة أمل ظاهرة وأنير كيصوگ ويشوف فيها مرة مرة.. ماعرف مايگول ليها وباش يواسيها فديك الساعة بالدات خصوصا انو من أكثر الأشخاص لي شاهدين على مدى تعلقها بليون لدرجة غير باش يفصلهم ويستفرد بحضنها فالليل استغرق مدة مهمة وهكاك وباقي لحد الان الى ماتخشاش حدى رجليهم ماينعسش.. بلا ماندكروها هي لي مقبلاه كي البيبي من دوش.. لتقطاع الظفار.. ومسيح.. لفين كيدير ses toilettes.. لماكلتو.. خمس سنين من حياتها كان فيها ليون من أولوياتها وأساسيات نهارها.. والى مشات حتى اظطرات تتحرك ولا تسافر بلا بيه ماكتطولش وبالها كيبقى معاه.. تهز وتعنق وتبوس.. وهو براسو كيدور ويدوور ويجي يحك فروو عند رجليها إلى ميكات عليه باش تشدو عندها وتدوز عليه بيديها.. 

بقى غير ساكت كيدور وسط الشوارع والزناقي ماباغيش يرجها للدار وماحاملش يشوف الدموع لي كينزلو من عينيها ولي مابغاوش يحبسو وخا جرها عنقها عندوو.. دازت مدة طويلة حتى بدا كيسينيالي ليه ليسونس قرب يسالي عاد وقف فالسطاسيون باش يعمروو وبعدها تحرك باتجاه Palais Louxor.. سطاسيونا وهبط حل عليها.. حتى خرجات عندو رد الباب وورك على الكونطاكط بعد ما عنقها مرة خرى وتوجه مگودها هي لي خشات وجهها فيه مخبياه من الناس للطريق حتى دخلوو ودازو للطبالي لي فالجردة فالجيهة لخرى من لپالي.. 

كانت العشية بدات كتتعاشى والشمس بدات كتغيب شوية بشوية وتمشي فحالها.. جر ليها كرسي من الكراسة لي دايرين على طبلة تحت براصول ديال القصب وگلسها بشوية عاد خدى ليه واحد ثاني وگلس حداها شاد ليها فيديها وحاطها جيهة فمو.. كيهضر ويطبع عليها قبلات مفرقة.. 

أنير (بحنان رجولي): وشتا تاكلي أفديوتي؟

فيونا (هزات راسها باقا حادرة عينيها المنفوخين ببالبكا وحركاتو بالنفي ما باغية والو)

أنير: راك ما واكلة والوو من الصباح.. 

فيونا (بصووت ضعيف): مافياش.. 

أنير (قرب ليها كثر وهز ليها راسها شوية مزال باش تطلع عينيها فيه): والـ baby نقتلوه؟ (تنخصصات وهي كتشوف فيه وعاودو غرغرو عينيها مرة خرى.. قطعات ليه قلبوو.. حط كفوفوو على حناكها بجوج كيمسح ليها اثار الدموع وجر راسها لصدرو) شوووت.. براكا عليك من لبكى أعمري.. (هز راسو فالسيرڤور لي وقف عليهم رد عليه السلام وعاود شاف فيها) شتا تاخدي البغو؟ (ماقدراتش تهضر) فحال ديما؟

فيونا (حركات راسها بالايجاب)

أنير (عاود شاف فيه): 3 بينزا وطاگوس ميكس.. وماتنساش المايونيز دالتومة راك عارف.. 

السيرڤور: واه.. مرحبا.. (مشى فحالو)

أنير (رجع للهم لي هو فيه تقابل معاها.. تنهد وهضر وهو مميل راسو باش يشوف فوجهها لعاودات حدرات): دابا علاش هاد البكا كامل واش رانا راميينو للزنقا؟ 

فيونا (مسحات بطرف كمها نيفها بطفولية وشافت فيه): سبع شهور بزاااااف.. 

أنير: بزاف واه بصح راه راجع ولا لا؟ 

فيونا (قنوفتها التحتانية مجموعة تلقائيا): مممم

أنير (بطولة بال): ماراكيش ساخية بليون وتسخاي بولدنا تصرالو شي حاجة؟ 

فيونا: الله ينجيه ☹️

أنير: اوا هكا راكي تضريه.. راه يحس بيك ويتأثر فاش توجعك شي حاجة راها توجعو حتى هو.. 

فيونا (تنهدات كتنش على وجهها باش يبرد وتنقص منو التزنيگة)

أنير (عاود شد يدها باسها): صبري أعمري فيساع (دغيا) يفوت الوقت ماتحسيش گاع بيه.. 

خلات يدو فيديها وقبلات كفو من لداخل للخاطر لي شاد ليها شي لي خلاه يشدها ويخلط ليها حنيكاتها وشنايفها حتى حنحن السيرڤور لي رجع وقاطعهم.. حط داكشي من يدو ودار فحالو بالزربة حشمان بلاصتهم.. 

فيونا (كتطنز): هييييه شافنا كنديرو الرديلة 🤦🏻‍♀🙄

أنير (هبط ليها راسها بيديه): مك.. 

فيونا (حطات يديها على كرشها بتمثيل): أي كرشي 🤰🏻

أنير (بابتسامة جانبيى كيشوف فيها بنص عين): الوجع عندك حول 😒

فيونا: وا غادير راسك تيقتي يعع 🙄

أنير (قرب عندها لپلا): رواحي تاكلي المجنونة.. 

فيونا (ربعات يديها متصنعة التقليقة): نائح وكلني.. 

أنير (زاد جر كرسيها عندو بيد وحدة وبشوية وقربها باس ليها راسها): نوكلك عمري.. 

بدا كيقطع ويعطيها حتى كتعض ويتسناها حتى تسرطها بشوية عليها وهي كتبزز على راسها وتحاول تتقبل الوضع وخا مستصعباه.. كمل هو وياها داك لغدا لي ولى عشا.. زادو شوية ديال الوقت كيضرب فيهم البرد شوية عاد ناضو رجعو للطموبيل.. غير تأنسطالاو وتحركو هزات لونڤلووپ الكبير لي فيه وراق الطبيبة حلاتو خدات منو ليكوگرافي ورداتو فين كان حدى الزاجة.. هزات رجليها ربعاتهم فوق الكوسان وبقات كتشوف فلي باين منو تحت الضو دالبولات دالشاريع والابتسامة كتترسم بشوية بشوية على وجهها حتى طاحت فبالها شي حاجة وتكوانسات جامعاها وكدور فعينيها.. 

أنير (خطف الشوفة فيها): شتا؟

فيونا (بصدمة): أش غنگول لبابا؟ 😳

أنير (عاود شاف فيها وبدا كيضحك): كيفاش شتا تگولي ليه؟ حاملة.. عادي

فيونا: هاويلي على عادي.. والـ baby كيجي سبحان الله غير بوحدو

أنير: وراه معروف شتا فيها مني تزوجتي.. شتا زعما راهم يحسبونا نبّاتو نعاودو الزابور فالكتبة..

فيونا: وا اه.. ولكن.. مهم.. بففف🤦🏻‍♀ (زادت بعد دقايق من نيتها كأنها لاقسة الحل الانسب) عرفتي شغندير!! غنخلي حتى تبان كرشي ويعرف.. 

أنير (تهز حداها بالضحك شحال عاد قدر يجاوبها): أنا نگولها ليه..

فيونا: وا لا وا لا والا.. حشومة

أنير: مالك جايباتو من الزنقة 😒

فيونا (تنفسات وساطت بقلة حيلة): عرفتي شنو.. غنعطيه ليكو وهو يفهم.. أصلا أصلا شرح الواضحات من المفضحات.. 

أنير (حرك راسو بلا حول): هههه هبيلة.. 

فيونا (بغروور): وكتبغيني 😌

أنير: نهبل على جدك.. 

⌛⏳ من بعد 4 شهور من داك النهار.. وسط تيران كبير.. وفمقابلة شرسة كتجمع بين أشهر أندية كرة القدم ففرنسا كانت گالسة فكرسي فواحد من المدرجات الخاصة بالفرقة لي كيلعب فيها.. كتطل مرة مرة على الساعة وكتحسب بالدقايق والثواني شحال باقي باش يساليو.. لايحة فنفس الوقت عينيها عليه وما ان تسمعات صافرة الحكم معلنة على انتهاء المباراة محدد الوقت البدل الضائع ناضت جمعات الوقفة وهبطات فالدروج باش توصل لأقرب بلاصة كتطل على التيران.. ماجات فين توصل حتى عاود صفر لاربيط موقفهم معلن على النتيجة.. التعادل السلبي للطرفين.. تجمعو اللعابة كيتسالمو بروح رياضية وعاودو تشتتو.. ترددات للحظة على الشي لي كانت جاية على قبلو متخوفة قبل ماتغمض عينيها وتعيط بسميتو كثر من مرة بالجهد.. ولكن بلا جدوى وحتى كانت غتتراجع وتدير بناقص تلفت جيهتها بعد ما لفت انتباهو ليها واحد فصحابو لي ديجا شايفها معاه من قبل فوحدة من المرات لي تلاقاو غير صدفة.. شاف فيها وتحرك فاتجاهها كيشوف فيها باستغراب وفضول كبير باش يعرف اش جايبها.. حتى وقف قدامها وحيث الجمهور كيغوت وبزااف دالناس قربو باش يهضرو معاه ومن الادب يسلم عليهم ويضحك معاهم دغيا هضر معاها بالعربية وشار ليها بيديه باش تهبط تتسناه لتحت ومشى فحالو عند لخرين وخواو التيران..

تسلتات من بين الجمهور حتى خرجات من بلاصة المدرجات ونزلات لفين گال ليها كتتسنى فيه.. 

خمسة الدقايق خرى وحل الباب خارج عندها مدوش ولابس السورڤيط ديالوو ديال ليكيپ سلم عليها وتمشى هو وياها جيهة بلاصة خاوية يقدرو يهضرو فيها براحة بعيد على الناس والصداع.. 

سيدو (كيحاول يكسر الصمت): ça va ؟

صونيا: ça va.. et toi ؟

سيدو (وقف فاش وصل للجيهة الخلفية لي لداخل ديال التيران): وشا فيها؟ جيتي تتفرجي الماتش؟

صونيا (كتجاوبو بثقة فالنفس محاولة تتحكم فارتباكها): جيت نشوفك.. 

سيدو (طلع حاجب وهبط لاخر كيحك مؤخرة راسو): متأكدة؟

صونيا: شنو بان ليك؟

سيدو (بتشكيك): وحدك؟

صونيا (عقدات حجبانها بتساءل): وavec qui dois-je venir؟ (ومعامن خاصني نجي)

سيدو (بابتسامة جانبية وبنبرة استهزاء): فار الدگيگ ديالك 😏

صونيا (باستفهام): quii ؟؟ (كدورها فراسها وهو يطيح فبالها) Jean؟ 

سيدو: هممم.. 

صونيا: مادياليش.. 

سيدو (كيطنز): تقتك.. (تيقتك)

صونيا (بقات كتشوف فيه وكتفكر عاد هضرات): داكشي علاش قالب وجهك.. 

سيدو: علاش نگلبو.. عادي شتا خاصني فبنادم..

صونيا: ce n'est qu'un simple ami (راه غير مجرد صديق عادي) (دورات وجهها جنب بفقصة وعاودات شافت فيه) حتى pour les 3 ans غدير السبة بشي حد اخور؟ (حتى على الثلث سنين.. )

سيدو (سكت شوية حك لحيتو وجاوب ببرود): ماراناش نفرضو روحنا بالسيف على غيرنا.. 

صونيا (بقاات كتشووف فيه): Oui t'as raison.. (اه عندك الحق) حتى أنا بلا ما نفرض عليك راسي غير la prochaine fois ne t'aproche pas لبنات الناس (المرة الجاية ماتقربش لبنات الناس) و garde tes lèvres pour ta soie (وخلي فمك عندك)

كملات هضرتها بحدة جان جنونها من تعاملو المگلاصي معاها.. استفزها لأقصى درجة وندمات گاع حتى علاش فكرات توصل لهاد لقرينة الكحلة.. لعنات راسها الف مرة حيت تبعات ري صاحبتها لي زعماتها تهضر معاه فاش عرفو بلي ما بينو وبين أسما غير الخير والاحسان وعرفو كيفاش حتى نهار لانيڤ فاش تبعاتهم طلعو بجوج لنفس الموبل بعد ما مشى بالها بعيد وسحاب ليها... 

شافت فيه لاخر مرة بخيبة أمل ودارت تمشي فحالها حاقدة على الوضعية.. مع زادت جوج خطوات لقدام ماخلاهاش حتى كملات الثالثة جرها دغيا من يديها لعندوو.. ومع الجرة مع دورها حط شفايفو على شفايفها مفيكسي راسها بيدو لي حط على عنقها.. 

تصدمات من ردة فعلو لغير متوقعة.. بقات واقفة مصلبة لثواني قبل ما تقاومو وتحاول تتفك من قبضة يدو وترجع لوور ولكن عاد مالقات الاصرار منو وزاد تشبث بيها حاكمها بين يديه وملصقها مع صدرو.. حتى بدا كيحس بيها بدات كتستسلم ليه ولقبلاتو القاسية حابسة حركة يديها تدريجيا وكتبادلو بمثل بوساتو لي كانو على شكل عتاب على گاع هاد التعطيلة لي تعطلو على بعضياتهم وهاد السنين كاملة لي دازت كاتمين فيها هاد المشاعر لي غفلاتهم وتزرعات فقلوبهم لبعضيلتهم.. عاد رخف عليها شوية وخلاها تشد فيه براحة جاراه لعندها باش تقلص فرق الطول لي بيناتهم.. ما لرتاحو حتى نقاطعات انفاسهم عاد عطاو لبعضياتهم سنتيمات كمساحة يتنفسو فيها.. 

مميل سيدو راسو وباقي وجهوو فوجهها كيتنفس من الاوكسجين لي كتدخل وتخرج من داتها.. مدور يديه على أسفل ظهرها.. بتاسم نصف ابتسامة ما ان هزات عينيها فيه.. وغير فاقت لراسها الطريقة لي كانت كتجرو بيها لعندها و.. فحالا سرفقتيها دغيا بدات كتتنتر منو ساعا كان قوى منها حاصرها بالزربة وقرب ليها كي كان كايهمس على مقربة من شفايفها بحرارة..

سيدو (بشر): مزال عندهم نفس المداق.. 

صونيا (تحركات محاولة تتفك): طلقني..

سيدو (مسيطر على الوضع وباقي كيهضر حدى فمها): باش تهّربي ثلث سنين خرى؟

صونيا (بنوع من العصبية المصطنعة): Arrête 😠 (حبس)

سيدو (كيهضر وكيزيد يقرب بثغرو عند ثغرها): et si jamais je refuse..؟ (والى ما بغيتش) 

زاد قرب كثر كيعاود يقبلها ببطء.. 

خلاتو حتى باسها مرة وجووج واستحلاها وعضات حسو فقنوفتو لتحتانية حتى حس بيها غطير من بلاصتها.. 

سيدو (بعد وجهو مغمض عينيه): ينعلـ***

صونيا (باقي حاكمها.. كتضحك بشر عليه): بصحتك 😂

سيدو (هبط راسو كيخنزر فيها وشد وجهها بيدو حتى عصرو وعاود باسها بزز): يارهطك هههه (فحال يادينك)

صونيا (ضرباتو لصدرو حابسة الضحكة وعاد بانت على وجهها الراحة نسبيا): connard 😏 (مغفل)

سيدو (ضحك.. باقي مامستوعبش سرعة تطور الأحداث حتى وصلو للي هوما فيه.. هبط رسو تاني غادي لشنايفها بلا ماينطق)

صونيا (غير بدا كيقرب عرفاتو شنو باغي يدير دغيا حطات يديها على فمها وكتدوي من موراها): arrête.. (زگـا)

سيدو (مني دارت هكااك حط وجهو على حنكها وزاد عنقها كثر)

صونيا: tu n'as pas encore terminé ؟ (مزال ماساليتي)

سيدو (على وضعو): لا كملنا.. 

صونيا: غتبقى هنا؟ 

سيدو: bien sur que non.. (أكيد لا)

صونيا: alors ؟ (ايوا؟)

سيدو (هز راسو كانت حيدان يدها كتهضر معاه غفلها عاود باسها وعنقها جرها معاه): on quitte.. (غنمشيو) باش نتفاهمو بعدا على شحال من صوالح 😒

صونيا (عقدات حجبانها): أشمن صوالح؟ 

سيدو (هبط عينيها للتيشورط لي لابسة فيه فتحة جيهة صدرها سامحة لجزء صغير منو يبان): نبدّيو من هاد اللباس.. 

صونيا (غاديين راجعين من الطريق لي جاو منها باش يهز صاكو ويمشيو.. كيتمشاو وصوتهم كيبعد): ناري بدا تاني.. 

فوجدة.. بالتحديد فالكلووب ديال أنير ومن بعد ما علمهم يخويو ليه البيسين وبقى غير عدد قليل من الناس لي تأخرو باش يخرجوو.. كانت گالسة بمايوها والكاش ديالو طويل ساتر گاع مفاتينها فوق واحد البايااص بكريشتها الصغيورة لي وبدات كتبان بشكل واضح خصوصا انها دخلات بأيام قليلة فشهرها السادس.. يد لايحاها عليها ويد شادا بيها الطيل.. الحطة لي غتحطو ودور عند أنير بان ليها ملفت عفويا جيهة واحد خايتي دايزة بمايوها كتتعوج وتتبعكك داك التبعكيك الزايد على حدو الواصل للمياعة.. شاف عادي ودار لشنو كان كايدير مع تلفيتتها قدامها مخنزرة ما عاجبهاش الحال.. ناضت وقفات هازة نيفها للسمى.. حيدات اللعيية لي لابسة الفوق بقات غير بالمايو حتى هي بعد ما دورات عينيها قبل وبان ليها انو مابقى حتى راجل مزال معاهم تما.. لاحتو فين كانت گالسة.. طلقات شعرها لي كانت جامعة فحال ديما جمعة عادية لاوياه ومخربق بشكل عشوائي وتمشات قاصدة الپيسين بكل انوثة وبشوية عليها بلعاني قدامو هو لي متبعها من اللحظة لي تزعزعات من حداه.. 

وصلات حتى ليه وتلاحت كتعوم متوجهة للضفة لخرى عاد حبسات حاطة مرافقها على جنبو.. 

من حركاتها ومني ماعبراتوش فاش ناضت عرف القضية حماضت وفهم البلان وشبغات توصل ليه من حركاتها وخا هو أصلا غا عينيه لي مشاو وكان ساهي أصلا ماشي حاجة اخرى.. بتاسم بتسامة جانبية وناض حيد تيشورطو وتبعها.. حتى كتحس بيه حاصرها بيديه ودارت عندو مغوبشة.. 

فيونا (حركات ليه راسها بمعنى شكاين)

أنير (حز حاجب وهب لاخر): مانعومش معاك؟ 

فيونا (باينة فيها كاعيا من وجهها): راه التيساع 😒 (قلبات وجهها)

أنير: كيعجبلي الزحام أنا (كيهضر ويزيد يقرب عندها بشر حتى حبساتو كرشها وهبط راسو كيشوف فيها) من دابا وهو يبعدني ههه كبرات الكريشة.. 

فيونا (باقا مدورة وجهها جنب ومخنزرة): ممم داكشي علاش مابقيتش معمرة ليك العين 😒

أنير (هبط يد وحدة لخصرها وحدر راسو كيقرب لعنقها وكيهضر مامسوقش لحتى حد): وديني ما كاين هادشي.. 

فيونا (يالله غتحيد بانت ليها ديك الزمرة لي باقي كتجمع فقشها كتشوف فيهم وضد فيها دارت عندو كتتحرك وتبعد عنقها حتى هز راسو تقابل معاها وهضرات بتبوحيط): وليت دبدوبة ياك؟ 

أنير (مهبط راسو عندها وكيهمس محاول يراضيها): زدتي شوية بالحق ماشي دبدوبة كل حاجة فبلاصتها 😍 

فيونا (كتسمع وحادرة راسها باش تقدر تشوف بنص عين واش مزال خايتي بلاصتها.. خلاتو حتى قرب وهزات فيه عينيها بلعاني): بصح؟

أنير: واه أگليع گلبي.. 

بتاسمات بتسامة خفيفة وزادت هزات راسها فيه بشفارها الفازگين ووجها لي كلو كيقطر ما سامحة ليه يبوسها ويعاود قدام عينين الزمرة باش تفقصها وتبيين ليها بلي راه ديالها هو لي جاري معاها البلان ومسايرها على الاخر باش تتأكد أنها غارت على والو وأنه بصح ديالها قدام كلشي وترتاح.. 

حطات يديها على لحيتو وللحظة ترخات واستسلمات لقلبها لي تسارعو دقاتو ولنسبة أدرينالينها لي رتافعات.. من بعد مدة ديال الحب والغرام عاد تفكرات البلان.. فصلات القبلة حتى شافت وفاس لقاتها غبرات كمارتها.. دفعاتو بالشوية بيديها حتى حيداتو من قدامها راجعة لتعابير وجهها اللولة وعامت حتى لمنين تلاحت باش تطلع فحالها.. عرفها شدارت حدر راسو كيحك لحيتو وكيضحك بصمت على فعايلها الشيطانية لي ماكايتقاداوش عاد تبعها..

هبطات من الطموبيل شعرها باقي فازگ مطلوق على الكسيوة الطويلة لي لابسة عكسو هو لي دغيا نشف.. وجهها مبرونزي من التبحار لي تبحرو على طول الصيف.. وقفات حتى حلات الباب ودخلات سابقاه للدوش سادة عليها باش مايدخلش عندها.. كوش خفيفة لشعرها وجيل دوش وخرجات بالشوية كتطل وتتسلت ساعا ما لقاتوش.. كان هبط بعد مادق حتى عيا وعطاتو مشي.. لبسات دغيا وهبطات موراه لقاتو فالكوزينة سخن شي لعيبات فالتلاجة ديجا مصايباهم من قبل وكيحطهم فالطبلة دخلات بالشورط دالتوب خفيف بالفوق ديالو طالع على كرشها مخليها تبان.. هزات الفراشط والكيسان مع شنو غيشربو فبلاطو صغير يالله غدور وقف حداها كيهز فالطباسل.. 

أنير (تحنى شوية باش يبوسها فحنكها وهو كيهضر): راكي تتجبدي عليا المشة..

فيونا (قبل ما يوصل عندها بعدات راسها ودارت خرجات جيهة الفوطويات متجاهلاه)

عقد حجبانو طالع ليه الزعف.. من داكشي دالبيسين وهو موسع خاطرو معاها.. وخا الطريق كاملة وهو كيحاول يحزرها ويراضيها ماباغيهاش تتقلق وهي غا مازايدة كتنفخ ريشها عليه.. قلب وجهوو باينة فيه كاعي.. خرج گلس حداهاا حتى تعشاو فصمت.. ناضت تجمع الطبلة كتشوف فيه بنص عين عرفات راسها عيقات ساعة حيدهم ليها من يديها ساكت ومشا حطهم فلاڤابو حتى غسلهم عاد رجع حداها متراجع على أنو يطلع ويخليها بوحدها تم.. گلس مبعد عليها وهز الطيليكوموند كيقلب ويبقشش فالتلفازة داير بيها السبة.. بقات مسمرة فبلاصتها كتتسنى منو يجي عندها ولا غير يعاود يحزرها ووالو.. فاللخر تلفتات جيهتو بالعلالي وهو كيتفرج وبقات كتشوف فيه حابسة عينيها بزز باش مايغرغروش.. حسات بشنو دارت وبلي فعلا زادت فيه وزادت من الجرعة المعتادة.. ترددات وشحال من مرة هزات راسها وحدراتو قبل ماتقطع المسافة لي بينها وبينو على الفطوي على يديها وركابيها وهي كتهضر بطفولة.. 

فيونا: واصافي ماتكعاش..

أنير (لا جواب.. كيشوف قدامو مخنزر)

فيونا: وما تتقلقش مني حتى نتا راه أنا لي بقى فيا الحال..

أنير (لا حياة لمن تنادي)

فيونا (سكتات شحال كتتسنى ووالو): يالله أجي نلعبو فالبلاي.. 

أنير (كأنو ماكيسمعهاش)

فيونا (زادت بنوع من الترجي) وا عافااك صافي.. 

أنير (ماتحركش نهائيا ومابدى حتى ردة فعل)

فيونا (شافت حتى عيات وتمعات ليها البكي بالرغم منها ورغم محاولاتها الفاشلة فأنها تكبحها.. مارضاتش ودغيا جمعات الوقفة ماراضياش على شدار ليها)

أنير (شاف حتى عيا وناض جرها مرغم عنقها وباس ليها راسها): ماتعاوديلهاش 😒 (بعد وجهها حتى مسح ليها عويناتها وهو مميل راسو عندها) 

فيونا (بطفولة وتبوحيط): نتا خايب 😓

أنير: نتي لي زوينة..

فيونا (هزات فيه عينيها مغوبشة زعما): عارفة 😾

أنير وباسها فشفايفها وردها فين كانو): اوا رواحي نلّعبوو.. 

فيونا: وا لاا راه صافي ياك تحزرتي 🤦🏻‍♀

أنير: رواحي لهنا گلاك..

گلسها ومشى كيجر فالخيووط دالمانيكاات حتى وصلهم لعندها وقاد كلشي عاد جر مخدة حطها فالأرض قدتمها ووسط رجليها وگلس.. 

شعلوو المشقووف.. جرات فيونا مخدة اخرى من حداهاا قاداات بيها گلستها باش ماتتعدبش.. ختاروو باش غيلعيو وباشرو فيه.. لاعبين ومعنقااه من اللور مرة تحط ثقلها على كثافوو.. مرة يديها على راسوو.. مرة تغطي ليه بمانيطتها وهي خدامة على عينييه ومرة كتلعب ليه فعنقوو باش تشتت ليه افكاروو.. والى حفاات ليها گااع كتهز ليه راسو وتبوسوو بالمقلووب بينما غلباتوو ولا عاودات عادلات الوضع بيناتهم.. تضحك تضحك تضحك عليه ويكملو شوية كتحس بالحركة فكرشها.. فاللول سحاب ليها غير مغص عادي حتى تعاود وهي تقفز.. 

فيونا (حيدات يديها من على كتافو وحدرات عينيها كتشوف فكرشها بلا ما تقيسها): تحرك 😯

أنير (مكمل اللعب): شوفي غيرها 😒

فيونا: والله حتى بصح..(بقات شادة بيد المانيطة واليد لخرى حطاتها كتتحسس بيها البلاصة) وااع..

أنير (دار پوز ودار بالجنب كيشوف فكريشتها لي عند وجهوو): فين؟

فيونا (خدات يديه وحطاتها عليها): هنا!! 

أنير: ما تما والوو 🤨

فيونا: والله حتى تحرك.. تسنى.. 

أنير (بقى تابت شوية وهو يحس بحركتو خفيفة فأحشائها تكوانسا شحال بدهشة قدام هاد الشعور والتواصل الجديد ولي طرا لأول مرة بينو وبين طفلوو) 

فيونا (حاطة يديها فوق يديه ومركزة مع ردة فعلو بفرحة): ها هو هههه شفتي؟؟

أنير (هز راسو فيها مبتاسم بفرحة): شفت العمر.. (رجع أنظارو لبطنها كيهضر معاه بصوتو الرجولي) حبيب بابا 😍 راك دير لقباحا لماما؟ راك دير لبسالات!! (حس بحركة كثر كأنو كيتجاوب معاه هز عينيه فيها مرة خرى وزاد بطنز) الحاجة لي ماراها تشبه لمولاها حرام..

فيونا (حتى كانت غتضحك وسرات معاها وهي تجمعها): يــاك!! باسلة أنا دابا؟ 

أنير (بغات تنوض وهو يشدها تبتها): هههه لا قبيحة (باس كريشتها وحط راسو عليها مدور يديه بجووج على خصرها)

فيونا (حطات يديها على شعرو وراسو ضامااه بدورها على مدة تاني عاد تسمع ضوتها): أنيـر.. 

أنير (على حالو مغمض عينيه): عَمروو..

فيونا (بنبرة حزن): توحشت ليون 💔

أنير (تنهد): حتى هو يكون توحشك رواحي نشوفووه.. 

ناض وشدها حتى وقفاات.. قاد لمخاد بلاصتهم وطلعوو للبيت لفوق فين كانت كتلعب مع قصي اخر مرة.. حلوو الـ pc ودزو l'appelle وماتعطلش بزااف باش جوبهم مصطفى لي غير هز المشقوف جا ليون كيجري حدااه عارفها سبحان الله كتعيط تطمن عليه وتهضر معااه ولى فينما تسمع الصونيط كيجي يجري سواء كانت هي ولا لا.. 

من بعد تعليمات الطبيبة وتوصياتها ليهم فاش خبراتهم بحملها ماعرفو مايديروو.. دارهم لي غيتخليه فيها فيها قصي ومستحيل يخليه فخاطروو هادشي إلى ماصفاهاش لحسوو وريم عندهم قطة زيادة على البنيتة بزاف مابغاتش تتقل عليهم إوا ودارهم دأنير كبيرة بزاف وعائشة ماكتقدش تتحرك بزاف لي غتبقى كل شوية تطل عليه فينو فابقى أخر الحلوول هو السعيدية وخا بشرى نگرات حتى عيات وجن جنونها خلاتها منها لصطوف وولات فينما تبغي تبدا عليها بالنگير دير موتة حماار وتشد ليها كرشها.. وفالأخير مامشاو فحالهم بعد رجوعهم من العمرة إلا وهوما دايين فيديهم ليوون مضطرين على ماتولد حفيدتهم شادين ليها خاطرها..

⌛⏳ 3 أشهر أخرى..

واقفة حدى الپيرو ديال زينب كتشوف من ادلـAccuei عندها شنو شادة الكاميرة دلـAccueil.. لابسة صالوپيط وتحت منو طريگو بيض.. كرشها واصلة لفمها ومنفوخة حتى ما بقات قداات شاداها غير بيديها باش ماتعرقلش تحركها.. تقلات بزااف وهكااك لي فيها مامهنيها وحتى أنير كان ديما كيشجعها ماتبقاش كالسة وشادة الركنة.. فششها وماخلى ما دار عليها الشهوور كاملة لي بقاو ليها ولكن ماخلاهاش تتعگز لمصلاحتها.. عاقدة نايڤية حمرة فمقدمة راسها فحال البانضة.. 

فيونا (كطل فالشاشة وتشووف فيها): لعار باقي تم.. 

زينب (كتعقم الماطيريال لي كتخدم بيه): راكي تشوفي.. گدامك گالت ليه مارانيش هنا..

فيونا: هههه حشومة عليك شوفي ليه الكلب ديالو اش ضارو.. 

زينب (خنزرات فيها): بغيتله خلا داره شرف وهرف الكيدار ما ضرني غير راه يدور ويجي يگعد ليا هنا 😠

فيونا (شدات كرشها بيديها بجوج): لا والله حتى خاصو منصف بالله ههههه 

زينب (حطات گاع لي فيديها وحطات يدها على صدرها): هيه راكي باغياتلو شي قتلة.. 

فيونا: عارفة شواخدة ههههه كلشي يتفهم فيه حتال ليك نتي والرجالة فجملة وحدة 😹

زينب (رجعات لشنو كانت كدير): هانتي گولتيها.. 

فيونا: هههه (قاطعها صوت تيليفونها هزاتو وجاوبات) أحَبيبي؟ واخا هاني هابطة.. 

زينب (كتهمس ليها): ماتگوليليش تخليني وحدي مع هاد الـ âne ؟ 

فيونا (قطعات وخشات تيليفونها فصاكادوها): ههه زيدي قدامي ولي دوا يرعف.. 

زينب: ريضي ريضي.. 

دغيا مشات جمعات تخربيقها فصاگها ولبساات جاكيطتهاا وتبعات فيونا لي حلات الباب وتمات خارجة.. وقفوو حتى هضرات زينب مع البنت وفيونا كتخنزر فلاخر لي وقف فاش تحل الباب ولكن مازعمش يهضر مني شافها معاهاا ضربو فيه وهبطوو مخلينو كفتة مصهضة.. ماتت عليها ضحك قدام أنير لي كان غير كيبتاسم من المواقف المحرجة لي كتتحط فيهم ولي كتعاودهم ليه فيونا ديما.. دازو لاحوها فالدار وطلعو لأنگاد الدولي.. تقابلو مع اللافتة الكبيرة لي مسجل عليها مواعيد دخول وخروج الطيارات ووقفو.. تأكدو من ساعة وصولوو شافو فساعتهم ودخلوو للبلاصة لي من المفترض يخرج منها.. دازت نص ساعة بالخف رغم النغزات لي كانت كتحس بيهم فيونا فأسفل بطنها ومشاات وجات باش تخففهم لتعودات عليهم وببان ليهم خارج دافع الشاريوو ديال صيكانو.. بتاسم ما إن شافهم وسارع فخطواتو حتى قرب وزاحوو من قدامو باش يعنقهاا.. 

سيدوو (مزير عليها): البزة.. كبرتي لمك وجبتيلي الكرش.. 

أنير (هبط عليه بيديه على قرفادتو): يضهرني توحشْتْني.. راهي تبانلك مع صاحبها؟

سيدو (حيد عليه يديه): شتا خاصك فولاد العم خليني نگلع الغبنة راني كنت منفي.. 

أنير: ضري وقيس لا تولي مكفن 😏

فيونا (كتضحك يد على كرشها لي كتتقطع ولخرى مبادلة بيها سيدو العناق): راس الحماار هههه مابغيتيش دير عقلك.. 

سيدو: نهار ديريه نتي.. وشتا عندك بنت ولا ولد؟ 

فيونا (كتهضر بزز): وليد..

أنير (بابتسامة جانبية): عندها بنت وخا مابغاتناش نشوفوو.. 

سيدو (يالله جا يدوي تزاد على فيونا الحال كثر وجاتها وجعة خايبة حتى غوتات لا إراديا)

أنير (دغيا شدها وجهو تخطف منو اللون): مالك؟ شتا فيك؟! شتا راه يوّجعك؟

فيونا (حابسة البكية من الحر): كرشي كرشي كرشي.. (مع هبطو عينيهم يتفحصوها بان ليهم شوية دالما بدا كيهبط وكيفزگ سروالها) 

أنير: لا ماشي وقتك 🤦🏻‍♂ (دغيا زرب عليها جمعها بين يديه وزاد وهو كيهضر مع سيدو) جر شانطتك ورواح راهي تولد.. 

فيونا (شداتها الخلعة زيرات قبضتها حدى عنقوو): أنــير 😰

أنير (حدر عينيه فيها كيطمنها وهو كيوالي خطاويه بالزربة): ماتما والو أعمري.. ماتخافيش.. 

حل الطموبيل بالخف وطاار حطها.. حل الكوفر لسيد لاح شانطتوو وركبو دغيا طايرين بيها للكلينيك.. كيصووگ ولايح يدها شاد فيها بيها.. وصلو وهزها تاني مخلي الطموبيل بكونطاكها وكلشي حتى سديدو وتبعوو.. سول على بلاصة ولادة الحوامل حتى نعتو ليه وكمل طريقو.. سول على الطبيبة لي متبعة معاها ومسؤولة على حالتها ومع ما موعد ولادتها باقي عليه الحال ماكانتش تما.. عيطو ليها فالكابيني لقاو عندها مريضة حالتها شوية حرجة وماقدراتش تتحرك حتى تسالي معاها شي لي خلاهم داو فيونا حتى حيدو ليها حوايجها ووجدوها.. قلبوها لقاو الوالدة ديالها مزال ماتحلات بالقدر الكافي باش تسمح للبيبي يخرج رغم أن السقية طرطقات.. وقفوهاا رغم وجعها.. وصاوها تبقى غادية جاية فانتظار توصل الطبيبة باش تتحل كثر.. شد أنير فيديها وهي كتتحرك.. تمشاات حتى بغى يخرج عقلها وهي كتحس بلي الماس كيتغرسو فيها.. طالت المدة وزااد الوجع.. تزاد على سيدو لي كيتسنى برى القسم منصف ومصطفى لي شد الطريق هو وبشرى أول ما وصلهم لخبار.. على أحر من الجمرة كيتشوااو قاتلاهم الخلعة عليها.. بالحق كثر من خلعتها هي لي غير ماكيزيد عليها الحاال حتى طلقاات من أنيير ووقفات عند البااب شادة فالحيط وكتغوت ماقادراش مزال تسد رجليها.. 

وبكل ثبااث وخا قلبو غيخرج من بلاصتو حاول يصوني على الفرملياات وما جا فين يوصلوو عاود شدها فيها وجا يخرجها من الشومبر لي هيا فيها لفين خاصها تكون باش يربح الوقت ولكن ما حالفوش الحظ.. 

غير خرجو بشوية ماستحملاتش كثر وماقدراتش تزيد مزال أصلا فحالا كانت واقفة على عينيها ولا هو قدر يهزها ولا يجمع ليها رجليها لاتكون الحركة خاطئة وتشكل خطر عليها وعلى البيبي.. ضطرو يبقاو تم.. حطها وحيد دغيا طريكوه مفرشو ليها وتكاها عليه عاد حل ليها دغيا رجليها.. وفعلا توقعوو كان فمحلوو والراس ديال المولود كان كيخرج.. بداا كيهضر معاها بشوية باش يهدنها ويخليها تدفعو باش يخرج حيت عرف بلي صافي مايمكنش تتسنى مزال وماقدامو حتى حل اخر من غير انو يتولى زمام الأمور.. عافرات وكابرات وبدات كتزحم امتثالا لأوامرو وهضرتو لي نصها كتسمعها ونصها لا.. كتنيين وتعض فحوايجها وتزير على يديها حتى تقريبا بقى ليها غير شوية من الراس عاد جاو جوج ممرضات عندهم كيجريو خنزر فيهم تخنزيرة الموت وكمل الهضرة مع فيونا لي عينيها غير عليه كتستمد طاقتها منو.. جات وحدة حداه ولخرى بقات عند راسها.. كيتفقدوها ويعيطو لخرين وكيتجارااو والروينة.. هادشي كامل وقع فالكولوار دالبلووك لداخل أما برى كان واصلهم غير الصدااع..

غربات الشمس وحل بلاصتها ظلام الليل الدامس لي كاسرو ضو القمرة البارزة فالسما.. فكلينيك بنو سينا نيت فغرفة حيوطها كلهم مكسيين بالباج بريدوات فنفس اللون.. كانت مستلقية فوق البياص بهدوء كأنها ماشي هي لي ظلات كتغوت النهار كامل.. شعرها مطلووق على راحتو.. مبدلين ليها وملبسينها حوايجها بعد ما نضفو وطرفو ليها حالتها.. فجنبها ليمن وعلى مقربة منها بياص أخر صغيور ديال الطربية ملفوف بنفس ليزار الأخضر الطبي لي مغطينها بيه.. دايرين ليه على راسو طاگية صغيورة مع الحويجات ديالو ولي جابوهم فصاك كانت موجداه من قبل تحسبا لأي حالة فحال هادي.. 

حل الباب بعد ما قطع الاتصال وطفا التيليفون فمرة ديرونجاه مابغاش يسكت.. apel من مور لخرى وهي ناعسة.. قرب راجع للكرسي لي كان گالس فيه بينهم بجووج.. طل على الصغيورة هي اللولة بقى كيشوف فيها شحال بنفس النضرة لي كان كيتفحصها بيها أول ماخرجات من الكريشة كلها عامرة دم وما.. بنفس الشعور اللول دالخوف والفرح والارتباك لي تغلب عليه وقلبها بالزربة نفضها وهو كيطبطب عليها بيديه حتى غوتات كيما طلبات منو الممرضة الفرق الوحيد لي كاين أن ارتباكو الحالي ناتج على الأبوة لي زادت تعززات وهو كيشوف طريف منو وقطعة من روحو لي شهور وهو كيتسناها خرجات للدنيا وكتتحرك قداموو.. كلمة فرحة ماتقدرش تعبر على شعورو واحساسوو فهاد اللحظات.. كأنو فحلم زوين ماباغيش يفيق منوو.. تحدر عندها حتى باسها وهو كيداعب خدها بالصبعو عاد گلس راد يد فيونا وسط يديه ومقربها لفمو كيبوس فيها ويحمد الله ويشكروو على سلامتها.. ديما ولديه كانو بالنسبة ليه عزاز وفمكانة كبيرة بالخصوصا الوليدة ديالو ولكن اليوم وداكشي لي شهد عليه وشافو بعينيه زاد فهم علاش كيگولو الله يسمح لينا من الولدين وعلاش الجنة تحت أقدامهم.. حس بحر المعانات لي كيعيشها المرأة فالولادة من غير ثقل الشهور الحمل وعدابهم.. كانت كل غوتة كتغوت كيحس بقلبو كيبغي يخرج من بلاصتو وكيتمنى كون يقدر يهز عليها داك الضرر والحريق لي كتحس بيهم ولا كون يقدر غير يخفف عليها.. شمأز من كون حيوان كيدعي الرجولة ويستهزأ من دورها ولا يعيب التشوهات والاثار لي كيخلي هادشي فجسمها.. 

تحركات ضاغطة على عينيها بألم عاد بداك كتحاول تحركهم بشوية بشوية.. دورات عينيها فالبيت لي كانت اضائتو خفيفة عاد شافت فيه معنكشة مع البرة ديال السيروم لي كتحس بيها مغروسة فظهر يديها والألم لي كيعطيها أسفل بطنها.. شافت فيه وهو يقبل كفها من لداخل.. 

أنير: على سلامتك أكليع الگلب.. 

فيونا (كتنين وفنفس الوقت كتحاول تهضر): يـ..سلمـ..ك.. 

أنير (وقف حتى عمر كاس دالما وقرب كيشربها منو): ماتجّهديش روحك.. (ورك على واحد اللعيبة باش يجيو الفرمليات)

فيونا (غير جغيمات قلال بزز ودفعات يديه بسوية باش يحبس): شنو ولـ..دت؟

أنير (بابتسامة انتصار): بنوتة.. 

فيونا (ببحة وكلمات ثقال): وفرحـان..

أنير (رجع گلس كتأمل وجهها لي باين فيه التعب وملامحها الرارزين رغم شحوب لونها.. حط يديه على بشرتها الناعمة وجاوبها بحب): بـــــــزاف.. 

فيونا (بادلاتو بابتسامة خفيفة بزز): داكشي لـي بغـيت.. 

أنير (قرب ببطء مميت حتى تخالطو أنفاسهم.. تنهد براحة وخدى وقتو قبل ما يحط شفافوو على شفايفها وبعد بوسات متقاطعين خاطفين للنفس كاملة بعد بشويكيكة ونطق): گولتي لسك شي مرة بلي راني نبغيك؟ 

فيونا (بتاسمات بألم وحركات راسها بالنفي)

أنير: كذابة (بتاسم وعاود باسها ضاغط على بنينفاتها بقوة هاد المرة مابعد حتى تسمع صوت الپوانية لي دارت بعد الدقان)

دخلات الفرملية وراها الطبيبة دايرين راسهم ما شافو والوو.. قربات حتى عاودات قلباتها وتأكدات على ان الوضع عادي وصحتها مزيانة.. طمناتهم وأكدات ليهم أن حركتها ساعداتها لا هي لا لما لي كانت كتشرب بكثرة.. وفالأخير خبراتهم أنهم يقدرو يخرجو بجووج بيهم فالنهار الموالي ومايحتاجوش يبقاو كثر.. وقبل ما يخرجو علات ليها الظهر دالبياص.. هزاات لافيش ديالها زادت فيها ملاحظاتها وطلبات من أنير يهز البنيوتة يعطيها ليها تشوفها ومنها نيت توريها الطريقة الصحيحة لي ترضعها بيها.. 

خرجات وخبراتهم برى بامكانية دخولهم عندها بعد ماتشبع الپيپي حيت ماخلاتهمش يشوفوهاا قبل ماتفيق.. 

خلاوهم بجووج.. رجع أنير گلس.. هاد المرة حداهاا عينو غياكلوها بحويجاتها من منضرها وهي مكابرة وشادة بنتها لأول مرة بين يديها كترضع فيها.. وترد ليها الراس ففمها كل ما زلق ليها.. مد يديه لشعرها كيردو ليها اللور وكيلمس فيه وهي ملهية مميلة راسها كتشوف فملامح البنيتة الصغيورة لي مزال ما باينة.. تعبها كامل هان اللحظة لي شداتها فيها وعنقاتهاا وشمات ريحتها.. سهات كتفكر فاللاشيء وفكلشي فنفس الوقت حتى حسات بيه باسها فعنقها.. هزات وجهها فيه وهو يبوسها فنيفها.. 

أنير: وأنا؟ 

فيونا (فهماتو): كون تحشم.. 

أنير: راكي تتوجعي أعمري؟

فيونا: شوية.. (حركات يدها بضجر) ماغيحيدوش ليا هاد الزمر؟ 

أنير: ريضي.. (طول يديه حتى عاود صونا وهو يتحل الباب)

فيونا (جمعات صدرها وحوايجها وهزات راسها بان ليها منصف داخل)

أنير (ناض وقف باغي يخليهم بوحدهم): نمشي نلغالهم حسن.. منها يجيبو ليك شتا تاكلي.. 

منصف: راه مشات بشرى للدار تطيب ليها حسن..

أنير: وخا شوية ونولي..

فيونا (شافت فيه وحركات ليه راسها بواخا ومشى)

منصف (تقدم عندها مخلطين عليه المشاعر مبتاسم ومهم.. مفشكل من الموضووع.. باس ليها راسها وخدا من عندها لبنيتة وهو واقف): تبارك الله ماشاء الله.. (حط يدو تحت دقن فيونا وهو كيشوف فيها) على سلامتك أبابا.. 

فيونا: الله يسلمك.. 

منصف: خلعتينا عليك..

فيونا: ماعندكم علاش تخافو.. 

منصف: أذنتو ليها؟ 

فيونا: نو مزال.. 

منصف: خلي حتى يجي الوليد.. مزيانة أبنتي ماضارك والو؟ 

فيونا: شوية الوجع.. 

تدق البااب ودخل سيدو وسفيان وريم وزينب معاهم أنير لي كان برى.. 

جاو البنات قربو عنقاتها ريم وحدات وگلسات حداها زينب لي بقات معنقاهاا وحاطة ليها راسها عليها وكتسول فيها وتعاود لي شافهم من بعيد يگول مها ماشي مرت باها وخا مابيناتهم غير تسع سنين ونص ديال الفرق.. أما الدراري فكتفاو بالهضرة من بعيد مخلينو فخاطرو ومقدرين التعب النفسي والجسدي لي عاش وماباغيينش يزيدوه الفقصة حتى هي.. 

سيدو: شتو راني گُلت ليكم كانت تتسناني غير أنا باش تولد.. 

فيونا: يخ طريقك كحلة زحلة.. كنت هانيا صحة سلام غا شفتك.. 

سفيان (قاطعها): والله الى راه جاي بعجاجتو ههههه 

زينب (شافت فيها): قُصي خليتو كاسر دنيا.. راه داير حالة فالدار نونا نونا.. 

فيونا: ههه الخايب.. 

سفيان (ربت على كتف أنير): شتا أصاحبي وليتي بابا.. 

أنير: اواه راك ترد الصرف..

سفيان: ضروري.. 

سيدو: كداش ولات العزية؟ مدة ماشتها.. 

ريم: راها ولات تتمشى.. 

الفرملية (دقات ودخلات حتى حيدات ليها السيروم وخرجاات) 

منصف: أش درتو فالسمية؟ 

فيونا: راهو منو لبشرى.. ماسوقيش أنا 😈

فواحد من البيووت دالطاج اللول لي قادو فراشو مغشين ناموسيتوو بجنبها فوطووي كبير وبوڤي مزين بوريدات بيضين والنونوسات وشميعات ومراية.. ديكوراسيو طفولية.. فيه التمر بالگرگاع والشكولا واكعب غزال والسفووف.. منوع ومزوق شكلا ومضمونا.. كيجددوه كل نهار.. وجدو البيت وهبطوها تنفس فيه على قبل الناس لي كيجيو يشوفوها باش مايترونوش..

كانت گالسة فوق الناموسية بقفيطينها كتبدل لـ غزل الكوشة ديالها حتى دخل قُصي كيجري عندها دافع الباب.. وقف ما إن وصل للداخل كيشوف فيها شنو كدير.. 

فيونا (هزات راسها فيه): أجي أحبيبوو أجي.. 

قصي (تقدم مثقل حتى وصل حداها ووقف كيشوف بحجبانو معقودين فشنو كدير ساكت وضارب الطم)

فيونا (تحنات حتى باستو وكملات): توحشتينيش؟

قصي (حرك راسوو وعينو على غزال): هممم.. 

فيونا (كملات سدات ليها الگرونوييغ وهزاتو عندها كتهضر معاه): شفتي پيپي.. شفتي بنت ختيتو؟ زوينة پيپي ياك جابت لقصي نونّو (فاش يالله شافها أول مرة حطو ليه كادو حداها على أساس هي لي عطاتو ليه) بوسها (قرباتو حتى باسها بزز وحيداتو) 

بشرى (دخلات كي لقدر المستعجل كتنگر): شتا باقا ديري هنا.. رواحي تشوفي راجلك يدبح نوضي.. 

فيونا (حطات قصي ولاوات الطربية فمانطة مزيان على البرد.. لاحت الشال فوق راسها عاد هزاتها وجرات قصي من يديه): هاني أهياناري.. 

غير خرجو ناض ليون من فووق الفوطووي.. تكسل مع راسو وتبعهم كيتمختر حتى طلعو فالدرووج للطابق لي لفووق للطيراس بالتحديد.. كان أنير مطيح الحولي وكيتسنا فيها.. حداه سيدو كيعاونو وعلي ومنصف وعائشة ومصطفى گالسين.. جرات زينب ولدها عليها باش مايزيدش يتقلها ساعا بقى كيتنتر باغي يرجع عندها حتى طلقاتو.. 

بشرى (ماعاجباهاش السمية لي ختارو): وشتا دابا؟ شتا درنا فالسمية؟

فيونا (كتهمس بالشوية بلا شوها قدام شيخها وعگوزتها): وا بشرى خليه منو لبنتوو يهديك الله.. 

بشرى (كتهضر بالجهد): دروك غزل سمية؟ سميو غير مريم ولا مروى.. 

فيونا (بهمس وفقصة): على زين خروى وخريو لخرى لي عندنا فالتريكة😾 

زينب (حابسة الضحكة): راك غتهربيلها لحليب 🤭

فيونا (بصوت مسموع): باها لي غيسميها الميمة خليه على خاطرو.. 

أنير (كان كيشول فيهم وكيضحك بنص ضحيكة سامح لسنيناتو يبانوو ومع أخر جملة كأنها كانت الضو لخضر.. سمى الله وكبر وضحى) 

جمعو الروينة لي تم للكوزينة.. فرتكو ديك السقيطة وهبطو للكوزينة يكملو تاقنتا لي كانو كيصايبو هي وبركوكش والكعك ساعا الحريگة حلفات بحلوفها ما يدوز داك السبووع الى مادارو ليها الرفيسة.. وماكانت فاللخر غير هضرتها شادين بخاطرها.. تجمعو ودوزو النهير بيناتهم بالغنى والشطيح والنشاط فرحانين بالزيادة.. 

فيونا (گالسة فالصالون لتحت حدى عائشة وتضحك مع زينب لي كتحرك غير كتافها شوية بعد ما تصفات الدنيا وخوا گاع البراني فحالو بقااو غير القراب بيناتهم دارت عندها): أريها عليك أماما.. 

عائشة: كون غير طلعتيها براكة عليها من الزگا والصداع منها نيت ترضعيها..

فيونا: واخا أنا غنديها.. 

شداتها من عندها وطلعات.. غير دخلات بشوية حل أنير الباب.. لقاها يالله حيدات القفطاان وبقات بالكلوون وسوفيطما كم مطرعة من القداام.. النص الكبير فصدرها كيبان.. دور السروت فالباب قبل ما يقرب عندها ومع سرحات شكانت لابسة فوق الفوطووي عنقها من اللور جامعها وسط يدو قبل ما يدورها عندوو ويقابل وجهها معاه.. هزات فيه عينيها كترمش بشفيراتها لي مطلعة بالريسل.. باقا بماكياجها.. شحال كيشوفوو فعينين بعضياتهم حتى حشمات وحطات جبهتها على صدرو.. باس راسها وهز ليها كيبوس فعويناتها ونيفها وحنيكاتها حاط يد على خصرها ولخرى على عنقها وهو كيمشي ويجي بصباعو عليه.. رجع حدر راسو وحط جبهتو على جبهتها كتنفس براحة وعمق من الزفير لي كتزفر وهي مستسلمة ليه كليا مأخودة بحركاتو لي كتموتها.. شدات بيدها فتريكووه وزيرات عليه ويالله ميل راسو كيبوس عنقها نزولا لـ.. بدات غزل كتبكي وتفركل بلاصتها.. غمض عينيه وحبس مبعد وجهوو وماحاملش راسوو وهو ماصدق ستفرد بيها عشرة الدقايق.. بعد شوية كيتلمس فكرشها وجر الصمطة الرياضية لي جامعاها بيها.. 

أنير: رخفي على روحك.. بشوية بشوية غترجع بلاصتها ولا بناقص ماترجع عاجباتني هكاك 😒

فيونا (شدات ليه وجهو بجوج يدين): علاش نتا داير فحال هكا علاش؟ (بتاسم وشافت فيه مطولا قبل ماتبوسو بالجهد فشفافو) خلى دار شرك هههه كنبغيك أعباد الله.. 

أنير (جرها خشاها فحضنو): نبغيك كثر المجنونة (جرها) رواحي قبل ماتهبل هاد الفرخة بالزگا..

گلسها وگلس موراهاا هزات بنتها كترضعها وبقى جامعهم عندوو من اللور.. حتى جا طلع حداهم ليون تسرح كيشوف فيهم بعينين ناعسة.. شافت فيه فيونا وضارت بوجهها جنب شافت فأنير بابتسامة راحة وفرحة كاملة هو يبوسها.. 

مشات يام وجات بلاصتها يام.. توالاو الأشهور وتبدلو الفصوول.. وبلاصة الشتا ولا ربيع.. گالسة فيونا فاليسجور فالبرومير فين متعودين يگلسو.. طالقة موسيقى هادئة.. جنبها غزل حطاها فالكرسي ديالها كتفركل بيديها ورجليها سكاتتها ففمها وقدامها pc ديالها وكتوبة ووراق كتحفظ فيهم.. ليون هربان ناعس على الموبل لي فوق الپلازما وقُصي كيلعب بطموبيلاتو فوق الزربية فالأرض..

ردها من داكشي لي غارقة فيه صوت لانطيرفون.. حطات الستيلو وناضت عينيها باقين على وراقيها.. هزات لابراي وهضرات.. 

فيونا: شكون.. 

سيدو (جاوبها من لتحت): حلي... 

فيونا: صبر نلوح ليك الساروت.. (غاكخوشات وهزات البورتكلي بسوارتو من حدى TV.. طلات من الشرجم باش تلوحو ليه وهي تحل فمها) هييييه 😯 واااع.. (سدات الشرجم وهبطات كتجري فالدروج غا حلات الباب تلاحت عليها) الزمر يخ.. علاش ماگلتيهاش ليا.. 

فاتي (كتضحك): ماكُنتش معولة هههه كيراكي البگيرة (بعداتها عليها) فين راها الكرش؟ هههه

فيونا: صرفتها حزاق 😒 فين غتكون راه النهار ومطال وأنا ندهن ونقز باش تغبر.. دخلي دخلي..

سيدو (وقف الشانطة وتحنى كيحيد صباطو): فين بنتي؟ 

فيونا: لفووق (ببرود حتى تفكرات بلي خلاتها بوحدها مع قصي) يخ يخ يخ (طلعات كتجري وداكشي لي جا فبالها هو لي كان.. لقاتو واقف حداها مغوبش كيشوف فجيهة خرى وساد ليها نيفها بجوج صباع ماحسات براسها حتى طارت عليه وحيداتو) ينعل حسك البعلوك.. راه غنضرب والديك 😾 

فاتي (طلعات من وراها تابعها سيدو): مالو شتا دار؟

فيونا: غيخرج ليا عقلي.. غفل طارت عينك.. 

فاتي (شافت فيه وهبطات عندو): عميتو.. كي راهو حبيبي؟ 

قصي (مغوبش كيشوف فختو وماكيتحركش كأن فاتي ماكتهضرش معاه رغم أنو كيسمعها.. على شحال عاد حدر راسو قالب قنوفتو) 

فيونا (تنهدات وجراتو): ماشي حتى ديال لعصى.. حشوما أماما ختيتو هادي زويونة (بقى واقف جامع البكية شافت حتى عيات وعنقاتو وباستو) ماتعاودش دير بسالة ولا نتخاسمو.. (بعدانو عليها شوية وهضرات وهي كتشوف فعينيه) بغيتي نتخاسمو؟

قصي (حرك راسة بالنفي) 

فيونا: وماديرش قباحات وسير بوس عميتو.. 

سيدو (متبعهم وحابس الضحكة حتى حدر قصي راسو ومشى عند فاتي وقف كيتسنى): لي يشوفو هاكا يگول ماراهش يحرك الدجاجة فوق بيضها.. 

فاتي (باست غزل وعاودات وحطاتها باش تتحدر عند ولد خوها): زينة مشاء الله.. مايتشبعش منها.. وكبرت على التصاور لي صيفطتيلي.. 

فيونا (كتجمع فالكتوبة وداكشي لي فوق الطبلة): واييه راه كملات ثلث شهور داباا.. الوقت كيطير.. 

فاتي: عمرنا لي راه يجري.. (مع قصي) لعمر ماتوحشْتْنيش؟ 

قصي (حرك راسو دغيا بلا وهوما يتهزو بالضحك): ههههه ينعل بوك

فيونا: الشر ههههه

فاتي (هبطاتو): حيد عليا.. خليولي أنا غير هاد التوتة (جرات الكرسي دغزل عندها وباستها) ياحوجي ومشحال حلوة 😍 علاش كُنتي توحمي أحقى؟ 

فيونا (سدات الـ pc وهزاتو مع شي لاخر وتمات غادية بيهم للبيت): لعار مافخباركش ههههه 

سيدوو: خلى دارها ماتفكرينيش 🤦🏻‍♀

فاتي: وشتا تما ياكما شي فضيحة؟

سيدو: الناس تتوحم عالغابرة وهي باغياتلي البنان ددورو (ريال) 

فاتي (بعدم تصديق): كـــــدوب! 

فيونا (رجعات): ههههه ياريت.. 

سيدو: جننات أنير.. مشا جابلها شاسيات دالحلوى فحالها ووالو مابغاتهالوش دارتو حالة على داك البنان.. ههه

فيونا (گلسات وشدات عندها قصي): الشوهة يخ هههه كل مرة يجبدها ليا منصف الموت ديال الضحك..

فيونا: هههه كل مرة كيجبدها ليا منصف الموت ديال الضحك.. وكون غا العادية لا ديال جدريال 😹

فاتي: هبيلة ههه كُنت باغيا نحضر لك وخا غي لسبوع ساعا شفتي شتا دارولي فالخدمة.. 

فيونا: ولاد الكلاب مالقاو امتى.. 

فاتي: سيمحمد لي صدقات له جا معاها نيشان.. 

فيونا: واييه (تسمت الصونيط تاني.. شافت فسيدو) الله يحفضك أخويا الى ما حل.. 

هبط حل البااب ورجع هو وزينب لي غير شافت فاتي تفاجئات.. ناضت فاتي حتى تعانقوو وگلسو على الجمايع والهضرة.. على غير العادة جات حالة طارئة لزينب.. شي كليانة مرضات ليها المشة وداها منصف لي ولى أصلا ماكيخليهاش تمشي لكاپيني بوحدها من نهار جا الشارف حتال عندو لدار باغي يخطبها وناوي معاها لخير گالك مامتيقش أنها مزوجة ووالدة سحابليه غير كدبات عليه باش تدريبليه وصدق منصف خالي دار بووه من تما هو لي كيوصلها ويردها فاش تسالي النص نهار ديالها دالخدمة.. 

ماطولوش بزاف فالگلسة غير شوية وجا منصف شاف ختو ودا مرتو وولدو وخلاهم هوما.. طلع سيدو الشانطة دفاتي لي غتبقى تما لواحد من لبيوت لفووق ورجع للكوزينة عند فدوى بيدما بدلات حوايجها وتبعاتو.. 

وقفو معاها حتى صايبات العشا بشلايضو وديسيروو حداهم الكرسي دالپيپي فوق البوطاجي.. على ما رجع أنير من الخدمة لي ترونات عندو فهاد اليامات اللخرة فغياب يوسف لي كيوجد للعرس وتحتم عليه يحظر باش يقادها كانو حطو الطبلة.. تعشاو.. تفرجو شوية.. سيدو مشا لدارهم وفاتي وياهم طلعو كلا دخل لبيتو.. شدات فيونا غزل حتى حيدات ليها حويجاتها باش تاخد دوشها اليومي الوقت لي حل أنير بلاكارها لي زادو مع الرسينگ لداخل ولي دايرين ليها فيه السطوگ دليكوش ولي برودوي والحوايج.. لي شافو يگول خايفين يسالي داكشي من لي فارماسي والأسواق وهوما مادايرينها غير باش يتفاداو كل مرة تخصهم شي حاجة فشي وقت معطلة ويهبطو يقلبو عليها.. شدها ليها أنير فواحد البانيو داير فحال الشاريو عالي واصل حتال مستوى يديهم وهوما واقفين.. دارت ليها الشامبوو وصويبينة وجابت ليه لفوطة لواوها فيها.. دغيا نشفاتها ولبساتها ليكوش وحويجاتها وخا كاين الكليمة وخلاتها معاه على ما تخوي داك الما وتجمع كل حاجة بلاصتها.. بقى يبوس فيديها ورجليها وعنقها ويشمشم فريحتها لي كتنعش القليب ديال الواحد.. عطاها رضاعتها حتى كملاتها وخشها فالكونة ديالها لي واحد فجنابها كان فحال راس الناموسيات دالأميرات.. خشى ليها سكاتتها وبقى يطبطب عليها على ما رجعات فيونا مبدلة حتى هي حوايجها عيانة.. گعد مرافقوو على الجنب دالكونة ودار عندها بعد ماتلفت وشافها جاية.. ستقبلها بين يديه وعنقها جامع ضلوعها وسط دراعو وعضلاتو.. زير عليها وباس راسها من الفووق من بعد جر القلم لي موحلة فشعرها وجامعاه بيه محررو على ضهرها.. 

فيونا (بهمس ماقادراش تعلي صوتها): عيت.. 

أنير (حط كفو على حنكها وراسها باقي على صدرو): كون مازدتيش عليك حتى لعشى خليتيني جبتو معايا من برى.. 

فيونا: ماعليش.. (جرات يدو حتى باستها من لداخل) 

أنير (رفعها شوية على الأرض على وقفتها وتمشى للنموسية حتى حطها على ظهرها وتكى جنب حداهاا مكالي بمرفقو): وقتاش les exam أعمري؟ 

فيونا (كتحل فيه عينيها وتسدهم بثثاقل): باقي شهر ونص.. فيناهو ليون حگا؟ 

أنير (شار ليها براسو لبلاصتو): راهو فينو.. 

فيونا (گعدات راسها شوية حتى شافو وعاودات رجعات كي كانت كتتكسل وتتفوه): كنمووت بالنعاس.. 😴

أنير (قرب لعنقها باسها وهرها بلحيتو وعاود هز راسوو): وأنا نموت بلا بيك.. 

فيونا (حطات يدها على حنكو كدوزها على شعيرات وجهوو كترمش فيه عويناتها): الله ينجيك ويخليك لينا ويدومك فوق راسنا.. 

أنير: ويخليكم لباباكم البغو دأنير.. (بقى كيشوف فيها شحاال وهي مزال كتحل فيه عينيها وتسده بثثاقل كي سكرانة عاد قرب لشفايفها بشوية وهو كيلعب بصباع فشعرها.. يالله باشر فتدوق طعم ثغرها تسمع صوت بكائكا الرقيق لي صدرات من مور ما لاحت السكاتة.. غمض عينيه بفقصة وحلهم فاسح ليها المجال باش تنوض تجيبها) 

فيونا (ضحكات نطقات وهي نايضة): ليك الله ههه (جابتها ورجعات كي كانت هاد المرة كترضعها رضاعة طبيعية.. خاشياها فيها وكتشوف فيه حابسة لكمالة دالضحكة) 

أنير: راكي تتشفاي.. 

فيونا: بنتك ماعندي ماندير ليك..

أنير: بنتي واه (لاح عليها يديه كيعنكشها كل ما شدات باش ترضع يعاود يجرها ويبوس فيها ماخلاها ترضع على خاطرها حتى بدات تزوي تاني).. 

بلاصة خرى وفنفس المدينة كان متكي فبيتو شاد التيليفون وكيكتب بانفعال ظاهر.. كانو فمعركة شد ورد.. كيهضر ويعاود حتى مابقاتش كتجاوبو.. صعر.. صونا عليها المرة اللولة ماجاوباتش.. التانية ووالو حتى هددها عاد أكسيبطات لاپيل ڤيديو وعلى عكس الشياط لي كان نايض بيناتهم كتبة تهدن حوارهم ولانت هضرتهم.. تناقشو بشوية.. عاتباتو على المدة لي بقى فيها فالمغرب التطويلة لي طول حتى عيق.. راضاها بالتيكي ديال الطيارة درجوعو لي وراها عاد دازو للأحاديث الجانية العامرة حب وهيام... 

فالسعيدية.. وفواحد من أيام الصيف المشمسة.. خرجات من البيت ديالها لي كتگلس فيه كالعادة كل ما جات لدار جدها.. العادة لي ماتبعدلاتش حتى بعد زواجها تحت إصرار منهم.. لابسة كسيوة صيفية سپورتيف طويلة وعريضة شوية ساتراها مع كاسكيطة فوق شعرها المطلووق.. كتتسلت هي وأنير لي لابس غير شورط وتيشورطة بيضة خفيفة.. هاز قدامو غزل بالكونگوروو.. هبطو فالدروج بلا مايديرو الحس وماوقفو حتى وصلو لطموبيل.. ركبو وديماراو دغيا قاصدين البلاج قبل ماتحصلهم بشرى وتبدى تبلاني ليهم وتسيرهم بشنو يديرو وتصدق مضيعة عليهم واحد من أيام دالكونجي ديالهم.. 

هبطو فاش وصلوو وخداو پراسول برولاكسات.. كان باقي الصباح بكري والدنيا باقا ماعامراش حيت كلشي كيسهر ويفيق معطل من غير لي شادين ديور مقابل مع البحر.. گلسوو وحطو صاكهم.. حلات فيونا أنير الصمطة باش يهبط بنتو لي كتتبجغط وتتحرك باغا تنزل تلعب.. وما ان نزلها وبدا كيحيد حوايجوو وفيونا قادات الفوطات دارو لقاوها گالسة كتهز فالرملة وتجيبها لفمها.. تحنات عندها فيونا كتخاصم عليها.. وقفاتها على رجيلاتها الصغيورين مكالياها حتى ساست ليها يديها ومسحات ليها فمها وهزاتها.. وغير وقفات بيها لخانزة مدات يديها لأنير باغا تمشي عندوو.. كتتنتر وتتحرك وتصدر أصواات.. مازگات حتى شدها من عند ماماها.. مشات عندو وبدات كتشد ليه فحناكو ولحيتوو وتبوس فيه بوساتها المشكودرين وتعضو بسنيناتها لي يالله كتنوض فرحانة وعاجبها لحال مني وصلات ليه.. 

شدها على ما حيدات حتى فيونا لي عليها مخليا غير باش تعوم.. شي حاجة مغطية أكيد وتمشاو جيهة البحر مخلين داكشي محطوط تما غيلوحوو عليه عينيهم من بعيد مادام التيليفونات والتخربيق المهم خلاوه فالطموبيل.. تمشاو جيهة البحر وفيونا كتحاول تجمع شعر البعلوكة لي هابط ليها على وجهها لحد كتافها وهي مزال فيدين أنير.. والو ما خلاتهاش كتهرب راسها حتى قرد هو بنفسو وقفها وجمعو ليها عاد رصات.. خلاتو كيضحك على التحربين لي ولى فيها والتشيطين لي ولات عاطياه قتلة.. رجع هزها هاد المرة جامعها على كتف واحد وجر عندوو فيونا عنقها دخلو للما.. بشوية بشوية حتى تعودو عليه وولى واصل ليهم لكثر من النص بمسافة عاد حبسو.. تخشات فيونا كتعوم حتى بعدات عليهم شوية ورجعات تاني الوقت لي أنير شاد غزل وكيعوم بيها بلاصتو حتى قربات عندو وهبط يدو لخصرها جارها عندو حتى لصقات معاه.. يد شاد بيها بنتو ويد عليها مزيرها عندو بدراعو وصباعو كيتحركو ملامسين جسدها وسط الما من غير رجليها لي تشابكو تلقائيا مع رجليه.. دوزات يدها فوق دراعو نيت وحطاتها من اللور على كتفو من نفس البلاصة لي قريبة ليها.. قطرات الما كتتساقط من وشعرها مرورا ببشرة وجهها وعنقها ووصولا لكتفها العاري.. هزات فيه عينيها وشفيراتها ففازگين على الاخر كترمشهم فيه بعفوية.. بقى كيشوف فيها وكيتأمل دوك الملامح الهادئين لي ماكيزدهم الوقت والأيام غير حلاوة ونعومة.. وحتى التغير لي طرى عليها بعد الولادة ونضجها جسديا حتى تحولات من ديك الطفلة الصغيورة لي كانت أول مرة شافها وعرفها.. من هادي ربع سنين تقريبا لمرأة دات قوام مكتمل رغم أن روحها بقات طفلة كيما هي بنفس الشقاوة والحماق.. تفحصها مزيان قبل ماتحرك ليه راسها متسائلة على شنو شاغل بالوو وكجواب بتاسم ابتسامة جانبية وحدر راسو كيطبع قبلات مفرقة بشفايفوو السخان على كتفها.. بتاسمات حتى برزو خدودها وحطات كفها على لحيتو كتغلغل صبيعاتها وسطها وتتحسسها وبشوية گعدات ليه راسو حتى باست ليه جبهتو بحب.. هز راسو بعدها برضى وبدا كيقرب مميل راسو جنب حتى وتخالطو أنفاسو مع أنفاسها وقربو عينيه يتسدوو من حميمية اللحظة وهو يحس بيديداتها الصغيورين على وجهو.. 

هز راسو شوية داير عندها لقاها دايرة بيديها نفس الشي لماماهاا كتبعد فيها باش ماتبوسووش.. 

فيونا (شافت فيها عاقدة حجبانها وعاضة على شفتها السفلية): ياكي البخوشة؟

غزل (شدات ليه وجهوو كتجرو عندها باش يحط فمو عليها وهي كتشوف ففيونا وتبعدو عليها): پـا.. پـاه.. 

أنير (هز راسو الفوق وبدا يضحك حتى بانت ضرستو دالعقل)

فيونا (لبنتها): بزعطة (تلفتات عندو مخنزرة) عاجبك الحال😾؟ 

أنير: هههه الصرف.. 

فيونا (تنترات حتى تفكات من يدو لي جاراها عندو): واخـا.. (كحزات ودارت غادية فحالها مبعدة عليهم باغا تخرج حتى شدها دغيا وردرها مزيرها عندو وهابط على قنينفاتها بقوة.. مع مع.. ضعط على شفايفها بجهد وشغف كيبوسها بجنون وماكان أمامها غير تجاوبو بالمثل رغم أنف المجنونة لي عيات تبعد ليهم بكل قواها الطفولية وجوههم.. كتدفع وتعاود باش ينفاصلو على بعضياتهم وفاش ماقدراتها طلقات عليهم حلوقهاا وزواكتها.. ماسكتات كتدمع حتى حبسو وعطاوها انتباههم.. بدات كتمسح بظهر يديها الدمعات لي نازليه من عويناتها مخلطين مع الما دالبحر قالبة قنوفتها وكتشوف بقهر فكل واحد فيهم على حدا عتابا على فعلتهم وعدم خضوعهم لرغباتها لي كتعتابرهم أوامر.. شي لي خلاهم ماتو بالضحك على منظرها خصوصا فيونا لي حسات بالانتصار.. 

فيونا: يالله المسعورة ههه 

غزل (بقات قالبة قنانفها وتكات براسها على كتف اليد لي شادها بيها): ☹️

أنير (مبتاسم وشوف ففيونا شوفات دابلين دايب): شريرة.. 

فيونا (بعدات شوية وكتشوف فيه بغطرسة): نتا وبنتك لي أشرار وخايبين (زادت بعدات كتعوم وهو يضرب بيدو على الما كيرشو عليها باش يبرزطها): يا جدك 

فيونا (تلفتات عندو وخرجات ليه لسانها)

عامو مزال شوية وخرجو فحالهم كيتقاطرو مع بداية قدوم الناس متباعدين كل وحدين فجيه.. هزات فيونا فوطتها نشفات وجهها ودوراتها عليها.. دغيا طلعات بدلات فواحد من لي ڤيستييغ لي كانو قراب منهم ورجعات دغيا ماشطة شعرها راداه اللور ولابسة حوايجها لي جات بيهم.. غاسلة وجهها من الملحة ودايرة ليه كريم صولاي باش مايتحرقش ليها بالشمس.. خدات غزل هي اللولة لبساتها على مايوها لي فيه جوج شبورة كسيوتها وبدلات ليها الكاسكيط لي كانت فازگة فوق راسها بكاسكيطتها بعد ما حدراتها حتى غسلات ليها وجهها حتى هي.. تكاتها ردات ليها الكوشة وغا سالات ليها مدات الخايبة يديها لأنير لي كان جمع داشي ديالهم طرفو وگلس فالرولاكس لي مقابل معاهم.. 

فيونا (خلاتها مشات باستسلام): الخدامة الفليپينية أنا البعلوكة.. حتى تبغي حاجتك غا بلاتي.. 

أنير (بدا كيضحك وحرك راسو يمين وشمال): دايرة راسك فيها..

فيونا (عقدات حجبانها ودورات عليه وجهها حاسة بشوية الغيرة من جيهة عليه ومن جيهة خرى منو) 

أنير (دازت مدة وهوما على الرولاكس كيستمتعو بالأجواء الصيفية وبديك الشمس لي عاد برزات والدنيا لي عاد عمرات بصمت.. شاد فوق كرشو بنتو وكل ما حاولات تهبط يلهيها.. شاف فساعتوو وتلفت عندها): فديوتي.. (هبطات شوية نظاظرها وشافت فيه) نتغداو؟ 

فيونا: يالله.. 

ناضت لبسات سبرديلتها.. هز ليها صاكادوها ومد ليها يديه حتى خشات صبيعاتها معاكسين مع دياولو عاد تحركو للواحد من لي ريسطو لي لفووق.. كلاو ورجعو للدار.. وبعد الموالا وسنفونية النگير المعتادة المقدمة من طرف بشرى طلعو للبيت.. دوش أنير وتلاح فوق الناموسية عاد تبعات ليه غزل.. خرجاتها وعطاتها ليه لبسها ودخلات هي.. على ماكملات ومع الخرجة بفوطتها لقاتو متكي على جنبو وحداه البجغوطة على كرشها كيطبطب ليها على ليكوش ديالها باش تنعس.. هزات حوايجها لي جبد ليها كتلبس فيهم قدامو وتضحك على حالو.. كل ما حبس ظنا منو انها قطعاات كتدور غزل يدها وهي مزال ناعسة ساجدة على وجهها وكتطبطب على راسها فنفس البلاصة لي كانت فيها يديه باش يكمل.. 

يالله سالات فيونا اللبس بدا كيتحرك الباب بحركة وضغط من برى.. مشات حلات ليه حتى دخل وعاودات سدات.. ضرب فيها ليوون وطلع للنموسية حدى غزل كيتحكك عليها وما إن حسات بيه گلبات وجهها على باها لي ساعة وهو داير معاها الخاطر.. عطاتو بالظهر وعنقات ليون كتوشوش ليه بكلمات غير مفهومة وتهضر معاه وهو مخشي فيا حتى نعسو بجووج... 

ضحكات فيونا على الفيلم وعلى البلان لي دارت لأنير حتى بردات.. خلات الجيهة لي خاوية ولي دايرين فيها مخدة باش تكاليها لاطيح وقربات للجيهة لي ناعس فيها.. استقبلها بأحضان مفتوحة رغم أنا المساحة بالكاد تسيعهم بجوج.. وعلى ما تكات متوسدة موضع قلبو وخاشية وجهها فعنقو كتنعش أحشائها بريحتو لي كتهز كيانها خشاها فيه كثر مزير عليها بيد واليد لخرى كيلعب بيها فشعرها حتى حس بيها غفات عاد باسها وباس بنتو وغمض عينيه يرتاحو حتى هو على ما برد الحال..

تعاشات العشية وقبل ماتبدا تغرب الشمس بشحال لاحت يديها كتتحسس الناموسية حداها.. ومني وعات على راسها واستوعبات ضغطات على عينيها وحلاتهم بشوية.. دورات عينيها ونيت ماكان حتى حد.. استجمعات راسها وناضت كتتعگز وتتكسل حتى غسلات وجهها ولبسات تجين وتيشورط واسع دأنير.. هزات تيليفونها طلات عليها وداتو فيديها وخرجـات.. دوها الدروج ديريكت للطيراس لفوق فين موالفين يگلسو كل نهار.. وفالطريق طلاقات مع مهدي هابط.. لقى السلام حادر راسو باحترام وكمل.. من نهار سمع بشدار أنير ليعقوب تردع ودخل سوق راسو ولى باغي غا التعادل وعاطيها فوق التيقار جووج.. ردات عليه السلام وكملات دريجاتها.. خشات يدها فشعرها حتى رداتو لور فاش وصلات ومشات ديريكت گلسات فالكرسي لي بين كرسي أنير والفطوي الكبير فين گالس مصطفى معنقة دراعو وكتبوس فيه متجاهلة غزل لي كانت واقفة على رجلاتها مع الحاشية دالفوطوي نيت من الجيهة لخرى لابسة غير تيشورطة وكوشة.. شعرها مطلووق كل مرة كيجي على وجهها تردو بكفها وببرائة لور.. 

مصطفى: راكي جبدتي عليه النعاسة..

فيونا (حطات يدها على فمها حتى تفوهات): وايـه ماحسيتش بيهم گاع فاش ناضو..

مصطفى: لعيا دلبحر.. (جات غزل مقاتلة كتكحز حتى وصلات عند مصطفى وهزات يديها باتجاهو باش يهزها وداكشي لي دار وقفها بين رجليه وهي تعنقوو كتحرك يدها عليه بحنان) لهبيلة ديالي 😍

فيونا (هزات يدها ترد ليها خصلات شعرها لورى ودنيها): ضرتي هههههه (كتعيط ليها) اديك لمشعككة (شافت فيها ودورات وجهها) هههه تگول عدوتها لبوالة لخرى

مصطفى: من شبه أمه فما ظلم هههه

بشرى (تمات داخلة مع الباب هازة الصينية دأتاي): زيد أولدي.. 

منصف (تابعها بشوية): السلام عليكم.. 

(جاوبوه دقة وحدة): وعليكم السلام..

غزل (سمعات صوتو وهي دور كتطل عليع باغا تمشي عندو وماساخياش بمصطفى) 

مصطفى (كيشوف وراه): فين راه السبع ديالي؟ 

منصف (كيهضر وهو جاي يگلس): ماجبتوش.. بقى مع زينب كاين السبوع ديال شي وحدة فعائلتهم.. 

بشرى (حطات السينية وبدات كتكب فالكيسان): درك يگلب عليهم الحفلة.. 

منصف: اوا هي لي بغات تديه ماعندي ماندير لها.. 

فيونا: والله مايرجع قبل مايخلي داربو شي برهوش خويا وكنعرفو ههههه 

منصف: كيطير 😒

بشرى (قالبة عينيها): گال لفدوى ماتعّرفيش 🙄 هزو كيسانكم..

فيونا (هزات يديها وكتافها): شدرت انا تاني.. 

مصطفى: لي درتيها راه تجي معاك غير خليها تهضر براكة غير جبتي ليا هاد الحليوة.. (شد يد غزل لي حاطة عليه من غير لي معنقاه بيها وباسها وهي حاطة عليه راسها وباقا على حالها وخا كتثني رجليها بالتناوب من العيا) لعّمر.. 

فيونا: لا بلاتي نأكتيڤي مود عياقة 😹😈

منصف (شاف فأنير): باز لك

فدوى وحدة وشيباتني ماعرفت كي غدير نتا مع جووج.. 

أنير (حبس الضحكة): الصبر.. 

فيونا (دغيا تلفتات شافت فيه): ياك 😯

أنير (بنبرة صوت خفض من قبل مبدل الموضوع): صليتي العصر؟

فيونا (نساتو): مزال..

أنير (عقد حجبانو بصرامة): وشتا راك تتسناي؟

فيونا: هانا نازلة 🤦🏻‍♀ (ناضت دغيا من حداه بلا مادور موراها عارفاه غيحيح عليها خصوصا انو ولا كيحكر على صلاتها بزاف باش تواضب عليها وحتى هو نفس الشي)

بشرى: فيراكي غادية؟ رواحي لهنا راه كاسك غيبرد.. 

أنير: شوية وتولي.. 

منصف (من بلاصتوو): غزل.. أجي عندي أبابـا.. 

غزل (هزات راسها شافت فيه وعودات شافت فمصطفى خاشية جوج صبيعات ففمها)

غزل (كتشوف هنا ولهيه حايرة حتى نطق مصطفى فاهم مالها)

مصطفى: هههه روحي لعّندو..

غزال (حتى عطاها الضو الخضر عاد مدات ليه يديها وتگعد شوية حتى خداها من عند باه) 

منصف: النمسة هههه (خشا وجهو فعنقها كيبوسها ويدگها بلحيتو وهي كتضحك وتفركل فيديه) عجباتك السعيدية؟ 

غزل (سرحات يديها كتحطها على وجهو): بــا.. بــا.. بــاه

منصف: يا الزيزونة.. 

غزل (تلفتات فجأة وهو يبان ليها ليون جاي.. غا شافتو بدات تتجبد باغا تهبط وكتصدر أصوات ديال Lbabies): اعـــاء.. ااه.. اغغغغغغغ

منصف: مالك تاني شبان ليك؟ (شاف حتى عيا ووقفها فالأرض) هانتي.. 

هكاك وبقات كتجر يديها باش ما يشدها.. كتتبث راسها فالأرض وكتلوح بعد تفكير طويل رجليها باش تخطي القدام وتوصل عندو حتى عيات ومدات يدها اتجاهو مبسطاها وكتجمع صباعها وتعا تطلقهم بمعنى أجي.. بقاو حاضينها كيشوفو اش غيطرى.. وسبحان الله فهمها وبعد ماكان واقف كيشوف فيها تحرك ليون جيهتها غادي لعندها وغا وصل تعلى على أطرافو اللورانية باش يشوف شنو فيديها ظنا منو أنها باغا تعطيه شي حاجة ياكلها كيما مولفة.. وما إن وقف تلاحت عليه عنقاتو حتى خارت قواها وجات گالسة على مؤخرتها.. مامسوقاش للطيحة قد ما فرحانة فاش شداتو وعنقاتو.. تهزو بالضحك عليها حتى دارت كتشوف فوجوههم واحد واحد مستغربة مافاهماش علاش كيضحكو وشنو داير بيها.. فهاد الاثناء رجعات ماماها وگلسات بلاصتها.. تحولو نظراتها من لي گالسين وتوجهو لفيونا متبعينها حتى وصلات.. تأكدات من مكانها ورجعات شافت فليوون شحال عاد طلقاتو هو لي كان مستسلم ليها مولفها ومولف لعبها معاه على عكس قصي لي غير كيشوفو كيهرب عارفو ماكيمشي حتى كيخلي فيه شي دقة.. طلقاتو وسبقات يديها هوما اللولين على الأرض عاد تقاداات باش تبدا تحبو ناحيتها.. غير قرب لرجليها حبسات وگلسات على هازة فيها راسها ببرائة وتمسكين.. دورات عليها فيونا وجهها كأنها ماشافتهاش ولكن ماقدراتش وماعطاتهاش خاطرها وقلبها.. دغيا حنات فيها وتحدرات هزاتها عندها معنقاها.. 

فيونا: ياالقطة الخانزة.. مامي أنا.. 

باستها فراسها وغزل كتتمخشش وتخشي وجهها فيها عويناتها مغمضين.. باقية كتعنق فيها حتى كتحس بيها كتجر ليها فالتيشورط بالعلالي باغا ترضع.. تزنگات ودارت بيها الدنيا كتغفلها بنت الهم.. ديما مشوهاهاا.. دغيا حيدات ليها يديها بدات كتتحرك بيها بلاصتها وتراري بيها وتهضر معاها باش تدوخها.. ساعا والوو بقات كتتمسكن حتى ناضت هبطات عطاتها ليها.. تكات خاشياها فيها كتجر وتعاود حتى شبعات عاد حبسات وبعدات شوية.. دارت فيونة حتى هزات سكاتتها دارتها ليها فمها وهي تدفعها حيداتها وبقات كتلعب بيها فيديها الوقت لي فيونا كتدوز صبعها على حنكها الصغيور.. حطات غزل يديها على وجها كتتحسسو وباستها.. باستها فيونا حتى هي بدورها ويالله حيدات عليها فمها وبغات تدور وجها جراتو عندها باش تعاود تبوسها.. كتبوسها وتعاود وتبغي تحيد وترجع ليها وجهها عينيها معسلين كتحلهم غير بزز وهكاك مامفاكااش باغاها تبقى تبوس فيها بداك الحنان الأمومي المتدفق.. 

بعد مرور حوالي سنتين ونصف ⌛⏳

غاديين فالطموبيل.. شادين طريق لوطوروت.. كيضريو فاخر كيلومترات بقاو ليهم.. أنير صائگ مرتاح رغم طول المسافة لي گعط وفيونا معوجعة شوية الگلسة باش تشوف فيه براحة.. كتغني مع الأغنية لي طالقين وتتعيوج قدامو بعفوية كأن الزمن كيعيد نفسو وكيرجع اللور.. 

فيونا: شانو شانو.. عالي أُو تايق فراسو.. كلشي واقف جنبو.. غالي أو حد ماعجبو.. اااه كلًمني.. على راسي و عين.. آه فينالي.. هانا لقيتو حدايا.. 🎶

(...)

زين مالو مالو.. زاهي ولا على بالو.. ضربني بجمالو.. 

(دارت شافت فولدها لي فالكرسي دلي پيپي ولي كيكون فالطموبيل عندو قرابة السنة وكمشات نيفها وفمها ليه كتضحك معاه وهي باقا كتغني هاد المرة قاصداه هو بكلمات لي كيترددو)

آه أرو أرو.. شي دوا يِبَردني.. گلبي رَآه كيعاني.. حبيبي محًنٍي

(مادارت قدامها غير على شدة أنير ليديها وبوستو عليها كيسمع ويشوف فيها فحالا كيدويو عليه)

كيشوف فيها بنظرة كتفوق الحب بدرجااات.. حب زادت تبلاتو العشرة والاحترام والسنين لي مَرَتْ.. غرسو وتادو وتبتوهم المواقف والمشادات.. الخلافات لي ماكيخطاو حتى دار ولي ماكيخليوهمش يكبرو وكيگلسو يناقشوهم حتى كيوصلو لحل يرضي الطرفين من غير الحالات الاستثنائية لي كتصتعصي فكها.. كتخرج بين يديهم وكتخليهم يقلبو وجوههم على بعضياتهم بلا مايقطعو الهضرة .. كيشوفو حتى يعياو ويلقاو أنها مهما كبرات ماتستاهلش يشدوها فخاطرهم وأن لاقيمة ليها قدام قيمتهم عند بعضياتهم وكيراضي كل واحد فيهم لاخر.. الحب لي كبراتو الثقة وصدقهم مع بعضهم وتقديرهم للمجهود لي كيبدل اي واحد فيهم فالحاجة لي كيدير.. تعاونو على الزمان باش قدرو يغلبوه ويحافضو على على استقرارهم.. كانت ديما علاقتهم عبارة على تكامل ومساندة ماشي حرب كيشنوها على بعضياتهم ويتسناو شكون يغلب فيهم على لاخر ويسيطر عليه بالعكس بغاو عيوب بعضياتهم قبل محاسينها وتقبلوهم بلاصة مايفرضو تغيرها وداك الجهد لي كانو غيبدلوه فهادشي استعملوه فاقترابهم من الله.. وخا كيخطيو خطوة بخطوة وبداو بالباطن قبل من الخارج والمظهر..

وا ناري يا ناري.. إنسان ماهو عادي.. طيحني و صطاني.. حبيته ف تواني 🎶 

غزالي.. غزالي اااه 🎵 غزالي غزالي اه 🎶

مع أخر كلمات الأغنية هز عينيه فالمراية كيشوف فبنتو لي رابطينها بالسمطة.. حزام السلامة زعمة.. بتاسم بابتسامة جانبية بعيون لامعة مفتاخر بيها لأبعد حد.. حتى هضرات.. 

فيونا (نقصات شوية باش يتسمع شغتگول): عرفتي شنو تفكرت؟ 

أنير (باهتمام وعينو على الطريق): وشتا؟ 

فيونا (بحنين لديك الفترة لي مضات رغم قسوتها عليها وتأثيرها السلبي نفسيا عليها): عرس منصف.. 

أنير (عقد حجبانو بتفكير كيحاول يقرى شكيدور فراسها بالحق دغيا قاطعاتو وكملات)

فيونا (بابتسامة فيها نوع من الخجل وهي كتشوف فيه): نهار شطحنا عليها.. 

أنير (بتاسم وهو باقي عاقد حجبانو ورجع شاف فطريقوو): علاش ماگولتلكش بلي عليها كنت باغي سمية غزل.. 

فيونا (جمعات شفايفها مبتاسمة عاجبها الحال وردات عليه بعد ما حطات وجهها على كتفو): عارفة.. بقات شوية وباستو عاد دوراتو تكات عليه) كنسمعك ديما كتغنيها ليها.. 😻

باسها فراسها وعينو مركزين على الطرقان لي قدامو حيت بدا كيقرب للعنوان لي عطاه منصف.. ووخا مافايتش جاي للدار بالتحديد الا ومن كثرت ما كان كيسافر عارف البلايص فكازا.. مع دخل فالدروبة هزات فيونا راسها من عليه كتدور عينيها بواحد الاحساس فشكل ماعرفاتش باش توصفو وهي كتشوف بلايص وزناقي عاشت فيهم وكبرات فيهم.. داتزت منهم مرارا وتكرارا حتى شائت الأقدار تبعد عليهم وتستبدلهم بمحيط أخر.. لايحة نظرها وكتحس بغرابة وهي كتعاود تمر من وسطهم بعد تقريبا سبع سنين والصرف من نهار غادرو هاد المدينة قاصدين وجدة.. كأن الذكريات تكبو عليها فدقة وحدة والوجووه والأحداث.. بتاسمات وعينيها قربو يغرغرو ليها فاش توقفات الطموبيل قدام باب الداار.. استجمعات نفسها واحاسيسها لي كيخونوها مرة فشحال حتى كتولي أنتشى حساسة على قولتها.. هبطات وحلات على بنتها فاكاها ومساعداها تنزل شادة ليها فيديها أما زين فاهزو باباه من بلاصتو وداز للكوفر باش يهبط الشوانط بيدو الخاوية.. 

فهاد الأثناء دقات فيونا وسمعو صوت قصي لي كان كيتسنى وصولهم على أحر من الجمر هابط كيجري فالدرووج باش يحل عليهم تابعاه زينب كتغوت باش يرد البال لا يجي على وجهوو..

حل الباب وهو متحمس.. علامات الفرحة ظاهرة على ملامح وجهو وخا مادازش بزاف على أخر مرة شافهم حيت سبقوهم هوما ومنصف غير بشي ثلثيام باش يحضرو للعرس مرتاحين ولخرين تعطلو غا على حساب خدمة كل واحد فيهم لي ماقدروش يسمحو فيها ويهبطو قبل الجمعة لي هو النهار لي حنا فيه نيت.. 

قُصي (كيفرنس): فديوى 😍 (قرب عنقها)

فيونا (تحدرات حتى هي حتى باستو على وقفتها): فين أ Scar (السبع الشرير لي فسيمبا) (طلقات من كتسلم على زينب) صاڤا؟ 

زينب: الحمد لله.. كي راكم واصلين؟ 

فيونا (مع غتجاوبها سمعات صوت بنتها)

غزل (بصوت رقيق وكيوت): أااي 

فيونا (تلفتات لقاتها حاطة يديها بلاصة الخصلة لي جر ليها من شعرها الطويل لي كانت طالقاه كالعادة وواصل تقريبا لخصرها.. عرفاتو غيكون نتفها): بدينا بالله تاني 🤦🏻‍♀

زينب (بصرامة): رصى على ختك أداك المشرار 😠

فيونا (جرات بنتها قدامها): راه غنخسر معاك.. 

أنير (دخل حط الشانطة بعد ما سد الطموبيل)

فيونا (تلفتات وراها): سد معاك الباب الله يعطيك الستر.. 

زينب (بعد ما سلمات عليه بيدها من بعيد): رواحو نطّلعو.. 

خلى داكشي تما حتى يرجع ليه لعب فشعر قصي لي عارفو كينزاعج من هاد الحركة ووتبعهم هو وياه كيضحك مع زين لي حاني راسو كيشوف فصبيعاتو وكيلعب بيهم.. 

دخلوو كانت ديك الساعة شي الوحدة دالنهار.. لقا زينب حاطة الطبلة موجداهاا فالصالون ومنصف گالس كيتفرج.. كانو كيتسناو وصولهم ومع عرفو أنهم قربو من اتصلاتهم المتكررة معاهم مني شدو الطريق مع الفجر من وجدة ناضت حطات.. طفا التلفازة فاش لمحها جاية عندو بمشيتها العجيبة حل ليها يديه مستقبل كمية الدلال والأنوثة.. عنقاتو كدور فعويناتها حشمانة زعما.. ماشي منو من البلاصة لي تبدلات عليها.. طبطب عليها وعلى شعوراتها ونطق.. 

منصف: Rapunzel ديالي جات لكازا (بعدات شوية وهو مزال شادها وكيبعد ليها شعوراتها وهي نيت كتعانو) شكون غندي لحسن الثاني؟ 

غزل (بفرحة وبنفس حركات فيونا): أنــا.. (شوية تقلبو ملامحها قبل ما يعاود يهضر وتكات راسها عليه كتشكي وكتشير لقصي لي عاد داخل كتهضر وترتاح وتوريه فشعرها) بابـا.. (كتگول ليه بابا معاندة مع فيونا) دالـيا.. أكـا (داليا هكا) 

منصف (متبع معاها حتى وصلو المساج وخنزر فقصي بعتاب): ياك كنگوليك الخانز بعد من ختك راه صغر منك 😠 

غزل (هزات راسها كتشوف فمنصف وتحرك براسها اه قالبة قنوفتها وتاد بدات كتبرد مني كياخد ليها حقها.. تسناتو بأدب حتى سالى هضرتو وباستو فحنكو)

منصف (باس ليها راسها): لحبيبة.. 

قُصي (غوبش وبقى ساكت ماكيقدرش يرد الهضرة.. كيشوف فيها ويتحلف عليها يفدي دقتوو) 

فيونا (دخلات هازة زين مخلية أنير يطلع شانطاتهم مورياه البيت لي غيحطهم فيه ولي هو بيتها.. باست يد باباها وگلسات): الله.. تكوانساو ليا رجلية بالگلسة يخ.. 

منصف (شاف فساعتو): ماتعطلتوش بزاف وخا هكاك..

فيونا: مهم.. 

منصف (شاف فيها وفزينب): فين أنير؟

فيونا: هاهو طالع.. (حبسات الضحكة بزز مسبقاها على شغتگول) واحد عمو عبد سلام؟ هههه 

منصف (بأسف): الله يرحمو مسكين.. 

فيونا (جمعاتها وتبدلو ملامحها متأثرة): الله أكبر.. الله يرحمو (تفكراتو شكان كيدير) ويسمح ليه.. 😒

منصف: ويسمح لينا كاملين.. 

أنير (دخل): السلام عليكم.. 

منصف: وعليكم السلام.. زيد دغيا غيبرد.. 

تجمعو على ديك الغديوة كلاوها وناضو.. زينب للكوزينة غسلات داكشي خلات منصف وقصي مقابلين ناسيونال جيوغرافيك وفيونا جمعات فليلساتها ومشات هي وراجلها يرتاحو شوية من لعيا دالسفر والفيقة دالفجر وهوما غيسهرو فالليل فالحنة.. 

دازو ساعات قلال وضرباتها الفيقة خاسرة تكات ترتاح صدقات بصداع فالراس.. ناضت مخسرة وجهها.. باست زين لي كان بينها وبين أنير.. عندو تقريبا ديك تسع شهوور.. ناعس مكرشخ حداه كل يد فجيه ورجليه قصة خرى وناضت من مور ماقادات لغزل لي من جيهة لخرى دأنير راسها.. لبسات كلاكيطتها مع التقاشر لي خارگة كالعادة ودفعات الباب وخرجات ديريكة للكوزينة كتقلب على فانيد دالراس.. لاحتو فكاس دالما وخرجات.. لقات زينب جاية عندها فاش سمعات صوت حركتها.. 

زينب (شافت فيديها): راه يوّجعك؟

فيونا (بألم): غيتفرگع.. 

زينب: راكي مولية تترگدي 

فيونا: لا براكة عليا.. 

زينب (ميلات ليها راسها الصالون لاخر): رواحي رواحي نشيخوو.. (أجي نتعاودو)

فيونا (بتاسمات بشر): شي دوصي هذا.. 

(دخلو گلسو دغيا وعطاوها لدودودو دودودو على شحال)

فيونا (هازة حجبانهاوحاطة يدسها على فمها باستغراب): اوا هانتي ليك على مريم.. حگلهم ما گالو والو على كحل العفطة..

زينب (حتى هي مركزة مع فاش كيتداكرو): أواه.. ماعرفتش أنا شتا هاد لعجب.. 

فيونا: وهي زعما رضات على راسها تاخد حولي (سعودي) وتكون ضرة من الفوق.. 

زينب: راكي تشوفي فيها..

فيونا: لا حول.. عمرها التوب.. التلفعين عندها فالدم الله يستر.. 

زينب: الله لا يبلينا.. 

فيونا (تفكرات): أجي.. سيدو مزال ماجا؟ ولا عيطات ليه بشرى مشى عندها لدار عمي.. 

زينب: لا راه صاكو فالبيت لي لداخل.. (حبسات الضحكة) كاليك غيتجي معـا.. 

فيونا (حبساتها مامتيقاش أول طاحت التوقع فبالها): ماتگوليهـاش !! فيناهو المصنگع؟ (جات تنوض)

زينب: ههه ريضي راهم خرجوو من قبل لغدا.. بغات تشري شي حاجة.. 

فيونا: هاي هاي هاي على السلگووك.. (حطات صباعها على فمها وحناكها شاداها الضحكة وهضرات بعدم تصديق) وحتى هي جاية معاه ههه 

زينب: أويااا ههه ماگدتهاش الضربة لي ضربات فعائلتها لي ماباغساتولهاش وبقات معاه.. 

فيونا: لا لا والله إلى مزيانين فحال هاد الحويجات.. باش يعرفها واش نيت ولا غير الزواق والحزاق.. 

زينب (شافت فالباب): سّكتي لا يسمعك شي واحد فيهم وشدها عاود.. 

فيونا: بعالكي ناعسين وراس الطارو راه حال فمو حدا بابا.. (قبل ماتكمل هضرتها وقفات حداها غزل كتحك فعينيها)

زينب: ها شتى گلت هههه

فيونا (جراتها عندها كدوز عليها يديها): أهياناري ههه (دارت عند بنتها كتجمع ليها فشعرها بلاستيك لي ولى ديما مخشي فيديها) مالك أماما؟ 

غزل (هزات يد وحدة بمنى ماكاينش): بقاس.. پافي.. (مابقاش.. صافي)

زينب: العّمر 😍

فيونا (باستها): كبيدة 😽

زينب: أواه فيراه ليون؟ علاش ماجبتوهش؟

فيونا: بقى (تلفتات عندها) بقى مع Salma (مشة دريم لي كانو حطوه هو وياها فبيت أنير نهار عرس منصف.. مسمياها على سمية صاحبتها الأنتيم لي فقداتها فكسيدة دارتها هي وياها)

زينب: ...

منصف (كان دايز للكوزينة وهو يطل عليهم): وشوش وشوش.. ماكتتقاداوش.. (لفيونا) ماعرفتش شكون مجوج بيها أنا ولا نتي.. 

فيونا (كتضحك): ميك الساط 😜 (كملاتها بغمزة قبل ما تحط يدها على فمها ساداه فاش تفكرات بنتها لي واقفة قدامها وسدات عينيها شوية قبل ماتتدارك الموقف نايضة جاراها للطواليط) أجي أماما نغسلو وجهنا وسنيناتنا أجي.. 

جراتها كتهضر معاها حتى دخلاتها للطواليط غير بسوفيطمة وشورط صغيورين باش ناعسة.. حطات ليها واحد اللعيبة وقفات عليها وخلاتها غسلات وجهها عاد مدات ليها الفوطة مسحات وعطاتها شيتتها دالسنان حكاتهم.. غزل كتتحرك قاضية حاجة وتشوف فيها وفيونا واقفة مكالية بالحيط لي وراها وكتشوف فيها بفخر.. كتبان ليها على شكل مارشيميلو.. فرحتها وقطعة منها مع عشق حياتها كتتحرك قدامها.. جربات معاها شعور أخر.. حب من شكل ثاني.. رابط قوى بأضعاف من لي قبلو.. قلبها كيمشي على رجليه.. شي حاجة بزاف على أنها تختاصر فكلمات.. لدرجة فشي مواقف كتسمح فراسها غير باش ترضيهم وتشوف ولو ضحيكة صغيورة على وجههم وخا تكون كتمووت بالعيا.. لا هي لا زين.. وفاش كتجي تشوف وتحكر وتطيل التفكير ماكتفهمش كيفاش يقدر الانسان يتخلى على كبدتو وولادو.. ماعرفاتش هاد اللوجيك ديال المخلوقات لي كيهون عليهم يبلزوو ويدورو ظهرهم ويزيدو بلا ما يرف ليهم جفن ولا يأنبهم ضمير.. بدم بارد كأنهم مخلين مشة وراهم وحاشا واش المشة ولا الحيوان يتخلى على وليداتو وخا يعرفو يموتوو.. كتزيد تحقد على مها كل ماجا فبالها هادشي وكيزيد يكبر اصرارها على أنها عمرها تسمح ليها لا دنيا لا أخرة على الرمية لي رماتها وهي باقية لحيمة وخا منصف كفى ووفى وولو أنها كانت ماكانت غدير ولو الربع فلي دار عليها منصف والقتال لي تقاتل على ودها باش وصلها للي هي فيه وللي هي عليه.. 

تسناتها حتى كملات شدات فيها هبطاتها وتحدرات باستها عاد جراتها خرجاتها من تما مع رجوع سيدو لي غا تساطح معاها بالمعنى المجازي عنقها هاد هيط لبنتها حي جاو لالطيارة ديريكت لكازا ماشافها قبل.. سلم وعاود واخد راحتو فغياب أنير عاد خلاها تسلم على صونيا لي على خلاف المرة لي جات مع يعقوب سلمات عليها بحرارة مؤتاحة من جيهتها غير من خلال هضرة سيدو عليها ومرات قلال لي هضرات معاها شخصيا فاپيل ڤيديو.. 

سولو على أحوال بعضياتهم وكل واحد تلاح لقنت يوجد راسو يالله يالله يكملو مع الوقيتة.. 

صونيا دخلات للبيت تلبس التكشيطة لي مشات كرات وسيدو داز للصالة يخرگ شوميزتو وسروالو بعد ما ينقص شوية من اللحية.. أما زينوبة.. لبسات و تقاداات ودازت دارت الرتوش لجوج رجال لي بلاها بيهم الله.. كلهم كملو وخرجو لوسط الدار حتى من أنير مادام ماغيلبسو الكوستيمات حتال الغد ليه فالعرس.. 

الا الصگعة دفيونا لي سبقات بنتها وماكياجها وبقى لي مزال تلبس زين.. والمشكيلة بشرى كتعيط وتعاود.. شافت حتى عيات وگالت ليهم يمشيو حتى يتبعوهم.. بغات تمشي معاهم غزل على قبل منصف وحتى سيدو لي بقوة ماكتشوفو وتهضر معاه وهو لهيه كتتحمس لمجياتو وكتتسنى الحوجات لي كيواعدها بيهم بفارغ الصبر ولكن قصي وغزل فبلاصة وحدة مستحيل حيت هوما جوج حوايج لا ثالث لهما.. يا غيفترسها ويدير فيها المنكر يا غيتافقوو وعلاش؟ أكيد على شي زبلة وشي كارثة عضمى.. اللهم تشدها حداها..

أنا أؤمن بالحكايات.. أؤمن أن الأمير الذي في القصة سيحبني دائما.. أؤمن أنه في الظلام سيحملني في قلبه.. لن يفضل أي أحد علي.. سيجدني مهما حصل 💚 

بقاو فالأخير غير هوما بربعة فالدار.. غزل سرح ليها أنير پوزل صغير ديالها تقادو فانتظارهم وهو مشا ينقص عليها ويرد كل حاجة لبلاصتها لطروستها حتى تكمل وتردهم.. 

جامعة شعرها بقريريصة صغيرة دغزل لابسة غير بودي x وكولون كعادتها حتى تكمل وتزيد عليها القفطان.. طلعات لزين سروالو دالتوب على كوشتو ودارت تگول لأنير لي كانت كتحس بيه غادي جاي وراها ولكن مع الشطنة ماشافتش.. بغات تعيط ليه باش يجي يشدو ليها حيث كتلبسو على وقفتها بالزربة ومتوترة مابغاتش تگلس لا تترخى حتى لقاتو كيجمع وراها طولات فيه الشوفة وتنهدات.. كتشوف فتعاونو لي ماكينقصش منو بالعكس غير كيزيدو رجولة فنضرها وكيحسسها انو سندها مهما طال الزمان وانها ديما غتلقاه فجنبها شي لي كيخليها تعيش عينيها مغمضين عارفة وراها أب ثاني ماشي غير مجرد زوج وهادشي ثبتوه ليها ليام ماشي غير هضرة فوق طعام.. ونهار گالتها عليه فعلا استحق التشبيه وكان قدو.. تشبيهها ليه بباباها.. 

فيونا: أنيـــر.. 

أنير (جاوبها تلقائها ولات عندو ردة فعل): أعمري..

فيونا (دارت قدامها مع هز راسو): أجي شد معايا زين عفاك..

أنير (يد الطروسة ولاحها من مسافة قريبة لـ على الناموسية ومشى عندها)

فيونا ( غير وقف تعلات شاداه جاراه من حنكو عها حتى باستو بجهد وبابتسامة): لبغوو 😻

أنير (عاودها ببوسو فشنيفاتها ومد يدو كالاه بيها من ورى ظهرو ولخرى حطها قدامو وهو هاز راسو فيه كيشوف فيه ويغرغر ههه): Papii.. غغغ

فيونا (كتلبسو فشوميزتو وتبتاسم من جماعتهم لي مامفهوم أولها من أخرها.. سدات ليه صديفاتو حتى كتبان ليها شي حاجة ماشي هي هاديك فيديه): اش هادشي؟ 

عقدات حجبانها بتركيز ومشات ليها ديريكت كتفك كمها وتطوي فيه حتى كيبانو ليها هي وأنير مناطق خضرين فيديدتو.. خرجو عينيهم فبلاصتهم قبل ما يهزو راسهم ويشوفو فبعضياتهم مصدومين.

النهــــــــــــــــــــــــــــاية 💚

تمت والحمد لله 😪