هاجر طبعها قبيح و مسهلاش و في نفس الوقت ضريفة ولي على قلبها على فمها شخصية شفافة و لي عندها كتبينو معندهاش مع النفاق و الحسد ..ولكن فور ما كيتزاد معاها زايد كتبشي منها ديك طيارة و كيطيح عليها شي سر من عند سيدي ربي كتبان حشومية و سكوتية ...
لالة الياقوت بقات غير حاطة عليها العين شافتها كيفاش بقات مهبطة راسها و شادة كاس اتاي في يديها و كفاش مدخلاتش في الهضرة بينها و بين خالتها.....بقات متبعة ليها العين تا من ناضت و بشات لكوزينة رجعات عنيها لسلوى...
لالة الياقوت: عاودي ليا هاد البنت اتبقى معاك ديما و لا شنو ...
سلوى: لالا غير دوزات معايا شي يمات و غدا غادي تبشي بحالها حيت كتقرا و مبقا والو ترجع لقرايتها...
هاجر دخلات عليهم مبتاسمة باينة فرحانة بداكشي لي وجدات كتشوف في خالتها: نحط ليكم تغداو هنا و لا فطبلة ديال لماكلة....
سلوى: غير حطي فين ما بغيتي ا بنتي....بشات وجدات كلشي فوق طبلة مزوقاه و مقادها..خلاتهم يجلسو وهي كتقطع ليهم و دايرة لواجب مع لالة الياقوت بما انها ضيفة عند خالتها....
لالة الياقوت كتاكل و تبنن: اممممم شحال لديدة واش نتي لي موجداها...
سلوى مبتاسمة: اوا شتي شنو قلت ليك راه اتاكلي عليهم صباع يديك...
هاجر مع ابتسامة: بصحتكم...
بقاو مجمعين و كياكلو و لالة اليقوت كتحاول تجبد لسان ديال هاجر تا شافت ساعتها عاد عاقت راها تعطلات..تودعات معاها و وصلاتها سلوى تا لباب و عطاتها طاسة مربعة صغيرة فيها بسطيلة :عطي هادي لأسماء ضوق منها عارفها كتعجبها بزاف و سلمي عليها ...
لالة الياقوت جبداتها بواحد ضحكة: ههههه فكرتيني يا لحبيبة فزمان من كنت انا و جيراني كنتصرفو بالماكلة ...
سلوى: هههه اوا العادة ماتبدل....
هاجر جالسة كتلعب في تليفونها تا دخلات عليها خالتها كتنهد هزات فيها عنيها: شكون هاد لمرا اخالتي...
سلوى جلسات حداها: هادي تعرفت عليها فواحد العرس شحال هادي و بقات بيناتنا الاتصال و بنتها مزوجة بولد خو راجلي ...
هاجر: اووه بانت ليا ضريفة مسكينة...
سلوى تنهدات : هي شوي واعرة ولكن قلبها بيض بحالك....
في فيلة عائلة بن جلول ...جالسة في صالون لابسة قفطان خفيف و طالقة شعرها دايرة في رجلها بلغة بصم وحاطة رجل فوق رجل..في جنبها محطوط كاس عصير و بينات يديها مجلة كتقرا فيها...هزات عنيها في شخص لي جاي و هي توقف ...
لالة الياقوت جايا و كضحك: بلا متهضري ابنتي عارفة تعطلت عليك....
الياقوت جلسات حداها كتسوط : اففف صخفت امدرا جا عصام و لا مزال...
اسماء: شني اماما ايجي وهو مسكين مقابل غير ديك الخدمة و دوك المجوهرات لي وصلوه كلهم مزورين نعاس مبقاشي كينعسو ....شافت بواطة محطوطة فوق طبلة...شني داك شي...
حلاتها اسماء خدات منها شوي كتبنن فيها: اممم هادشي لديد و لكن لكريشة عامرة انحطها في تلاجة نخليها تا ليل نتعشا بيها... واش هي لي عملاتها بعدا ما نساتنيش عارفاني كنموت عليها من ايام الوحم...
الياقوت: اجي بعدا نعاود ليك شكون لقيت عندها واحد بنت ختها غزاالة كتحمق يا لحبيبة شهوة منها ...
اسماء بشات كتجري جلسات حداها مخرجة عنيها: يكما العروسة لي كتقلبي عليها لقيتيها...
الياقوت : اييه لقيتها عرفتي كون شفتيها تحماقي عليها و زيد سكوتية و كتحشم بزاف تا حنيكاتها كيحمارو بالحشمة و مكتردشي الهضرة قبيلة كنهضر انا وخالتها و رادة ليها البال و اش اتدخل بيناتنا ساعة تبارك الله مربية مكتهزش العين...
اسماء: يا ماما واش هاد البنت كاملة و تزوجيها لعصام لي مكيتفاهمش تا مع راسو و تزيديها نتي من لفوق ....
ياقوت خرجات فيها عنيها: علاه انا مالي شني كنعمل ...
اسماء: اوا نجيك صراحة اماما نتي واعرة بزاف و كتبغي لبنت تخدم عليك بحال لخدامة وخا كاين الفلوس كتقولي لا مندخلشي خدمات لداري و شغلي نديرو راسي و مرات خويا الأولى كانت قبيحة مكتسمعشي ليك و دابا اتجيبي هادي ضريفة اتعداي عليها...
ما حسات الا و خبطة جاتها من الياقوت خربقات ليها لكلام: اوا الله يمسخك يا بنتي هدا مضموني فيك تولي تشهدي فيا قدام عريساتي مزيان تبارك الله...و العروسة لي متهلاش في دارها و ناسها كتسمى عروسة علاه انا اش اندير بيها لكانت غير بحال داك سلك ضو لي نهار و مطال و هي مزوقة كيف طعريجة تهبط بلبسة و طلع بلبسة....
اسمأء كتحك في دقة لي عطاتها: عرفتي شنو انا بعدي مني من هادشي مابغيت ندي دنوب حد و خصوصا لكانت من عائلة سلوى منبغيشي نخسر معاها علاقتي.. ها نتي منك لولدك ديري معاه لي بغيتي...
طلعات اسماء الفوق لبيتها خلات مها كتنكر لتحت....اسماء صغر من خوها عصام مزوجة و عندها وليد.. انسانة راقية في طبعها و ضريفة بزاف... جات هاد الايام دوز لعطلة عند مامها و من سمعات كلامها على لبنت لي حطات عليها العين معجبهاش الحال عارفة ماماها قبيحة بزاف و لا جابت عروسة ضريفة راه ادوزها عليها نيت و زيد خوها عصام عندو مو مقطرة ليه من العين مكيبغيش لي يخسر ليها خاطرها مفششها بزاف و مسبق خاطرها على خاطرو وهادشي علاش وخا عاد طلق قبل يتزوج مرة تانية تحت طلبها هي....
وصل ليل جالسين كيتعشاو و لياقوت مزال منفخة من جيهة ديال بنتها مبغاتش كاع تهضر معاها تا ناضت اسماء كتحزر و تعاود عاد باش تفشات ليها...بقاو مجموعين غير بجوج تا تم داخل عليهم برجولة و نخوة كيف عادتو مخفف اللحية و لابس طاقم ازرق ملكي مخلي صدايف الاولين ديال القاميجة محلولين...تبسم لأم ديالو و قرب حداها باس ليها راسها و يديها...
عصام: الوليدة شتك ناشطة...
الياقوت: علاش منشطش و انا شفت ولدي حبيبي ..مالك من تحت عينك زورق...
عصام: غير لعيا الوليدة ماشي شي حاجة ..انطلع لبيتي نعس شوي...
قرب لختو لعب ليها فراسها و باسها في جبهتها..قلب دورة طالع تا عودات عيطات عليه الياقوت...دار عندها و يدو في جيبو هاز حاجب و مهبط لخر بمعنى "شكاين"..
الياقوت بغات تهضر و بنتها كتنغز فيها تسكت ساعة معامن الياقوت حالفة تا تزوح ليه هاجر فهاد شهر ضد فديك مراتو الاول : بغيت نقولك شي حاجة اولدي...حرك ليها راسها بي معنى قولي..
الياقوت: لقيت لك عروسة و هاد سيمنة خاصنا نبشيو نخطبوها...
عقد حجبانو لوسط و لاو ملامح ديالو مخنزرين بقا غير كيشوف في مو ..رجع دار طالع في دروج و قال ليها جوج كلمات كافين و وافين: ديري لي بغيتي....
طلع لبيتو لي كان كبير على شكل جناح فيه بيت لجلاس و حمام كبير و بيت نعاس و لتبدال و البيرو ديالو....جناح فقط مخصص ليه مكيدخل ليه تا حد من غير صحاب الميناج لي كيديروه جوج مرات في الاسبوع ...
دخل لبيت نعاس حيد تجاكيط رماها فوق ناموسية و ملامحو مغوبشين معصب غير مع راسو ..حل صدايف ديال قامجة ديالو كاملين خلا صدرو عريان و عضلاتو بارزة اكثر كيتحركو مع حركات الجسد ديالو..
خرج الباركو يضرب فيه البرد و الكارو في يدو كيكمي و تفكيرو داه البعيد و عينو غير كيضورو في بلاصتهم تا سالة الكارو عاد دخل نيشن لدوش تحت رشاشة طلق عليه لما بارد يخفف عليه الم ديال راسو بسباب شقيقة لي شاداه ....معاودش فكر في كلام مو و لا تا تسائل شكون العروسة عقلو ممساليش لهادشي كل تفكيرو غير على الخدمة بوحدها و مشاكلها.....
خرج من دوش لاوي عليه فوطة و شعرو هابط على جبهتو كيهبطو منو قطرات ماء كينزلو على صدرو بشوي تا كيغبرو في الفوطة لي ملوي على خسرو....دغيا لبس حوايج خفاف لي غير ديال دار من سروال كيطمة اسود مع تيشورط قطن لاصق على الجسد ديالو بي الابيض...
هز كينة ديال راس يشربها و هو يتفكر انه ما واكل والو هاد نهار..شاف في ساعة عرف مو اتكون نعسات مبغاش يعدبها طلع ليه لماكلة تال لبيتو ....
لبس كلاكيطة ديالو و هبط لكوزينة.....حل تلاجة كيشوف شنو كاين تا بنات ليه طاسة حلها بانت ليه بسطلية ..حطها على نيفو شمشمها مزيان عاد دارها في طبسل مع كاس عصير و هز فورشيط..... خرج من باب كوزينة نيشن بشا جلس فوق كرسي طويل متواجد قدام لبسين حط كلشي حداه في جنب و هز تليفون كيبقشش فيه و كياكل بشوي عليه ما حس تا لقا راسو خوا طبسيل كامل جاتو لديدة بزاف و عجباتو كان معول ياكل غير شوي تا صدق داز فيها كاملة ....هز كلشي رجعو لكوزينة حطو في لفابو و طلع لبيتو ينعس...
عندو كلشي بسكات و منضم مكيهضرش بزاف و ديما ملامحو مغوبشة...عصام هو الابن الاكبر و الرجل الوحيد في العائلة عمرو 38 سنة... انسان ناجح بي امتياز بخصوص العمل ديالو بدا من زيرو و كون راسو و داتو بلا ميعاونو تا حد كلشي لي عندو اليوم هو لي خدم و دمر عليه باش يديرهم...
مات باه و هو صغير و شاف مو شحال تعدبات عليهم و كيفاش كانت كتعجن و كتبيع الخبز لناس باش توكلهم و تقريهم..هادشي بقا ليه محفور في راس و كان عارف قرايتو هي لي اتنفعو ..دا الباك بي امتياز شي لي خلاه ياخد منحة لألمانيا تم كمل قرايتو و تخرج مهندس ميكانيكي خدم في شركة مرسديس و في سن صغيرة قدر يتحاوز جميع اقرانو و يولي مدير لواحد من الفروع الخارجية لشركة...
كان همو الوحيد هو يعيش مو احسن عيشة و ينسيها في لعداب لي عاشتو من كانت كتبيع لخبز وهو صغير...هادشي علاش عندو لالة الياقوت قريبة و عزيزة و مقطرة ليه من العين و مفششها بلا قياس اي حاجة حلاة عليها فمها كيجيبها ليها في الحين بدون نقاش ...و بعد كل هاد سنوات قدر يدير شركة خاصة بيه ديال المجوهرات في افريقيا الجنوبية و بسرعة تسلق سلم و اصبح واحد من ابرز رجال الاعمال في افريقيا ...
هو انسان جدي بزاف في العمل ديالو و شخصيتو واعرة و صارم بلا قياس معندوش مع ضحك و البسالة و عدوه لي يرد عليه الهضرة و لا يكون راسو قاصح و ميسمعش لكلامو هاد نوع كيبغي يهرس ليه راس و ميحنش فيه..كيكره لي يدير عكس كلامو و من يقول لحاجة خاصك ديريها بلا متسوليه علاش... هدا هو عصام بن جلول لي صغير و الكبير عارفو بشخصيتو المتميزة و القوية ...
عند هاجر جالسة في بيتها متكية كتخربق في تليفون من نهار شرا ليها خوها تليفون و هي غير حاضياه مبقات كديها فحتا حد تا من لكتوبة محلاتهمش.. ما رجعات تا حاجة تقول معندهاش الباك....سمعات مها كتعيط ليها من لفوق عاد جمعات الوقفة كتسوط طلعات كتجر في رجليها...يومين باش رجعات لدارهم و خا مزال مقلقة منهم لكن مقطعاش معاهم لكلام...
طلات عليهم لقاتهم مجمعين في صالون كيتعشاو ...دار ليها باها بلاصة حداه تجلس...جلسات حداه كضحك لقاتهم موجدين طاجين بالخضرة داكشي لي كتبغي.....خلاوها تا كلات و شبعات و هزو طبلة و حطو كاس اتاي يهضمو بيه و هي ممصوقاش شادة تليفونها كتخربق فيه و هازة بنت ختها كضحك معاها تا سمعات كلام باها...
حميد بتوتر: بنتي هاجر بغينا نهضرو معاك في امر مهم...
هاجر كتشوف فيه: ايه اباب انا كنسمع شنو كاين...
حليمة هازة كاس اتاي هي و سومية ... شادين لقنت ساكتين خلاو حميد منو ليها....
حميد: بنتي ما كاين ما يتخبى اليوم هضرات معايا خالتك و شي ناس مهمين ايجيو غدا فليل يطلبو يديك لزواج....
هاجر تكونسات في بلاصتها حالة فمها فيه و تليفون زلق ليها من يديها ..
سومية كملات الهضرة: راه خالتي مقدراتش تقولها ليك و قالت نتشاورو معاك هو الاول و لا مبغتيش ما كاين لي يبزز عليك عرفين غلطنا من قبل و مبغيناش هاد زربة لكن على ماقالت خالتي راجل الله يعمر ليه دار و لد مزيان بزاف و ايعيشك ملكة في دارو و زيد بخيرو ما ما منقوص من والو لحمدلله....
هاجر حنات يدها هزات تليفون و رجعات كتشوف فيهم واحد بواحد : قلت ليكم اول واحد ايجي يخطبني انوافق عليه و ما حد هاد ولد ناس طلب يدي قولو ليه مرحبا بيه......
جمعات الوقفة مخنزرة هابطة لبيتها و ختها كتغوت من وراها ...
سومية: وا غيير بلاتي نقولك شكون بعدا و شنو سميتو....
هاجر من تحت سنانها معصبة: ما عندي ما ندير بيها غدا و نشوف كمارتو تصبحو على خير...
هبطات خلات شي كيشوف في شي ....
حميد: ها لي كنت خايف منو دابا اتقول بصح راها متقلة علينا من ما دازت تا جوج سيمانات جبدنا عليها الخطاب تاني....
سومية: ولكن ا با كون تشوف هاد راجل شحال لباس عليه راه ايعيشها احسن عيشة خاصها غير هي تعرف كيفاش تعامل و تنقص شوي من الوعرات ديالها و تسمع الهضرة راه ايحطها فوق راسو.....
ايوب كيطل عليهم من جنب ديال صالون : مبانش ليكم سيد كبير عليها بزاف راه كون تزوج من كانت عندو 20 عام كون راه والد قدها....
ايوب: وا نتوما غير لي قال كلمة الحق في هاد دار كتقمعوه سيد عاد طلق ما كاملة تا شهر و كلشي كيهضر عليه في كروبات ديال فيسبوك و بغيتو تلصقوه في ختي ....
غير شاف حليمة نايضة و هو يخوي ما بقاش كيبان ليها ..كلشي تال نوضة ديال هتلر كتحبس ليه لما في ركابي....
ضارت عند حميد: اوا شقلتي ا راجل ...
حميد هز يديه بجوج: ما نقول والو تا نشوف سيد و نعرفو مزيان عاد اتكون الهضرة ديك ساعة...
سومية: اوا خلاص عليكم ها هيا لي تخافو منها قالت كلمتها هي اصلا عزيز عليها العكس و اتشد العكس معانا و اتقبل بي سيد هادي ما فيهاش و زيد خالتي كون معجبهاش سيد كون كاع ما عيطات عليك و شكراتو ليك ...
حميد: اوا لي فيها خير يوفقها الله..دوزو بعدا نعسو غدا شلا ما كاين حمدلله بعدا ايجيو في وقت لعشا تلقاو فين توجدو بنهار....
الزواج هو علاقة مقدسة بين طرفين اثنين كيتأسس بالمودة و الرحمة و الاحترام لبعضهم لبعض و الحب المتبادل...
جالسة في لكوزينة كتفطر بشوي عليها لابسة كيطمة واسعة و عاكسة راسها بزيف ممصوقاش كاع لهدوك لي نايضين يخملو دار ....و تا هما عرفوها على نقشة اتنوض هادشي علاش مقربوش لجيهتها و خلاوها على خاطرها دير ما بغات....
كملات فطورها خلات كلشي فوق طبلة و خشات يديها في جيب لقبية و جرات رجليها لسطح ضربها شمس و تبعد من صداع حليمة هي و سومية لي تقبو ليها و دنيها...تكات على سارية كتشوف في ناس لي كيدوزو من شارع و ساهية فيهم .... سمعات شي حد كيعيط عليها من دار لي مقابلة معاهم...
هاجر حاطة يديها تحت من حنكها: شكاين افضيلة مالكي كتعيطي ليا تاني....
فضيلة كدور في عنيها: سمعت كان عندكم شي خطاب و جريتي عليهم و ليوم ايجيو خطاب جداد يكما شي حد كتعرفيه...
هاجر طالعة ليها لقردة لسما: لكنتي كتمعني انه صاحبي فراه صااحبي و من بعد سوقك .....
فضيلة:اوا اا غير سولتك و صافي ا صاحبتي تا نتي مطلعتيش ساهلة دايرة صاحب و ساكتة عليه لكن معندي ما نسالك جبتيه تا لداركم.....
هاجر: يا فضيلة عطيني تيقار هاد ساعة قبل ما نطليك و سيري ديها فدوك لبنات ليعندك باركة ما تبقاي دوري بيا و تجبدي ليا فلسان راني عارفاك اتوصليها لدرب كامل و مني انا غير وصليها اتريكة الحضاية....
خنزرات فيها وضربات دورة هبطات نيشن لبيتها طرقات عليها كلشي و تخشات في فراشها عودات ضرباتها بنعسة ممصوقاش كاع لدوك لخطاب لي جيين في وقت لعشا...
سومية جالسة كتخمل مع مها صالونات و كتبدل في طلامط لي جابتهم معاها دارها مزال عاد خيطاتهم جداد وجاو مع فصالة ديال دارهم بي زرق ملكي و داخل فيه لون صفر.
سومية: اففف يا ماما بذلي هاد زرابي راه تقالو بزاف..شوفي ديالي لي جبت هاد صباح شحال خفاف...
حليمة كتقاد في لمخاد: شفتهم هزيتهم بوحدي من لتحت تا لفوق بحالي هازة ريشة تا من لعود عندك خفيف منين صاوبتي هادشي...
سومية: هدا واحد صاحب راجلي كيبيع و يشري فهاد شي و فين ما دخل شي سلعة مزيانة كيخلي منها لراجلي و انا لعجباتني راني كناخد منها ..مرة خرا لجاب شي حاجة ناخد ليك معايا...
حليمة:ااالله يرضي عليك و فين اريج كاع ما بانت ليا من ديتيها معاك لدار مرجعتيهاش...
سومية: لصقتها فباباها مغديش نلقى ليها الوقت و زيد هو مخدامش هاد نهار راني قلت لبابا يدوز عليه يبشي يتسوق هو وياه....
حليمة: الله الله على كمال مسكين انصخصخوه معانا....
سومية؛ كمال ضريف اماما بزاف صراحة تقال انا لي ديما كنوض صداع اما هو عمرو جبدني و لا قال لي كلمة العيب و لا خسر ليا خاطري...
حليمة: اوا كتقوليها بوجهك حمر لمرا هي لي تعرف لراجليها و تحافض عليه و تهلا فيه و تخلي ديما فمها حلو و رطب و لبسمة في لوجه وخا تكون واصلة ليك لعضم ما تبيني ليه و خليه هو يعرف مالك و يقلب على راحتك....و من يجي يتشاور معاك ما تقولي اه ما تقولي لا ديما ديري رأيو من رأيك و قولي كيف بغيتي نتا اتاج راسي ....خليه هو لي يشد ساس و من يشوفك معوناه على زمان راه ايحط كلشي بين يديك ..راجل راه بحال دري صغير خاصك غير تعرفي تعاملي معاه على حساب عقليتو و اهم حاجة ما يكونش راسك قاصح و ديما سمعي لكلامو...
سومية: ايييه يا ماما و فاش فكرتيني غير قولي ليا هاجر نهار تزوج اش ايوقع ..فين ما كنتفكر داك نهار كتشدني رعدة من صبعي صغير...
حليمة:غير خليني ساكتة متزديش عليا راني كنفكر فيها من دابا ..هديك عودة و ما يعرف يركب فوقها غير لي مولف يروض....
سومية هزات راسها كتموت بضحك: ناااري ا ماما و فين بشا عقلي المسخ الله يسمح ليا...و بعدا فين هي هاجر من شتها خارجة من لكوزينة ما عودات بانت ليا...
حليمة: تلقايها في بيتها كتصاوب حالتها و تشوف شنو تلبس ..غير خليها ساكتة هكا حسن ما صداعها .....
سومية: نوصيك من دابا الله يرحم ليك الولدين.. بغات دير شي حاجة لوجها متحرميهاش عليها ...
حليمة: انا يا ربي غير نلقى معاها سلاك بقا لي غير نشد معاها العكس..دوزي بعدا نهبطو دوك لماعن من بلاكار نقادوهم في صواني و خلي داك جمل ناعس تا تجي ليها خالتها لي تعرف ليها ...
وصل و قت لمغرب كلشي مشغول و كيوجد... سي حميد هو و نسيبو كيتجراو من قنت لقنت يجيبو ما وصات عليه حليمة و ايوب مقابل المحل ديال باه و سومية هي و حليمة غرقو فشقا و طياب نساو كاع ديك البنت لي لتحت واش حية و لا ميتة...
بقوة شغل و غير هما بجوح تلفو و هاجر تمسحات ليهم من داكرة تا لغدا ما جلسوش باش يديروه و غير ديباناو راسهم و هما واقفين....سومية كتقاد تمر و تعمرو بي لكركاع و لوز و مها حداها كتصاوب طباسل ديال ديسير تا دخلات عليهم سومية مقادة لحالة و مصاوبة لوجه و طالقة شعورات و دايرة عباية فوق لقفطان لي لابسة..طلات عليهم من باب لكوزينة كضحك...
سلوى: هاي هاي على الحادكات شهاد شهاوي موجدين تاني....
سلوى: اوا راكي عارفة خالتك دراعها خاويين ما كنقد على تمارة و زيد كنت مع الام ديال راجل لي ايجي يخطب بنتي هاجر لغزالة...
حليمة كتمسح يديها بشيفون: وعلاش كنتي معاها...
سلوى: اوا يا لالة كنت كنوجد صباح راسي باش نجي عندكم و هي تعيط عليا مو قالك والو ضروري تخرجي معايا ناخد شي حوايج لهاجر مبغاتش دخل بي يديها خاويين لحاصول نهار كامل و حنا من محل لمحل شمنك يا حوايج و شمنك يا صبابط و روايح تا من لمكياج و دوبياس خداتهم انا كنعطي غير طاي و شنو كيعجب هاجر و هي و بنتها كياخدو و قالك ولدهم لي وصاهم ياخدو هادشي...
سومية: الله يا ربي و شوفي ليك زهر لي طلع عند هادي باينة عجباتهم بزااف و بغاو يطيروها ليوم قبل غدا...
حليمة عاقدة حجبانها : ولكن ناس غادي يجيو غير يشوفو البنت و نهضرو و نتعارفو مع بعضنا و نشوفو راجل نعرفوه و يعرفنا اما الحوايج راه كيكونو تال ايام الخطبة اختي...
سلوى: مني انا سيد ما فيه ما يتعاب كلشي فيه زين و كيعرف يتعامل على حساب كل واحد و سخي بزاف مع عائلتو و ما حدو ناوي يخطب راه ميبغيش يدخل بيدو خاوية خصوصا لكانت هاجر معمرة ليه لعين ....
سومية: احياني على هديك راه تعمر ليه العين ويزسد يشيط الخير....
سلوى كدور في عنيها: وفين هيا بعدا فين مخشية...
حليمة: راها في بيتها سيري طلي عليها و شوفيها اش كدير و قوليها طلعي كولي شي حاجة قبل ما تسخف ليا راه نهار كامل و هي صايمة و زيد انا نسيتها كاع..
سلوى هزات جلايلها و هبطات لتحت لبيت هاجر...بغات تحل لباب لقاتو مسدود..كمشات حجبانها بي استغراب ....دقات في لباب ..بدون رد..بقات كتعيط في سميتها و والو تا حد ما كيرد عليها..سلوى شداتها لخلعة بدات كضرب في لباب و كتغوت بجهد بي اسم هاجر و تحط و دنها على لباب كتسمع صوت بعيييد كيرد عليها...حبس ليها لما في ركابي و خلعها بزاف....
هبطات سومية و حليمة كيجريو من سمعو سلوى كتغوت بي اسم "هاجر"...
حليمة وجها ولا صفر: شكاين مالكي كتغوتي...
سلوى: معرفتش جيت نحل لباب لقيتو مسورت من لداخل كندق تا حد ما كيرد عليا و من كنعيط هاجر كنسمع صوت بعيد كيرد عليا...
سومية جرات خالتها بعداتها و بقات كدق بجهد و تعيط على هاجر و تقول واش جاوبهم شي حد كلهم شداتهم الخلعة و وجهم و لا صفر....
حليمة: سومية طلعي لمجر لي في بيتي فيه سوارت هبطيهم ليا...سومية طلعات كتجري و سلوى كدور في بلاصتها...
سلوى: واش البنت من صباح و هي قاطعة حسها و تا حد ما سول فيكم عليها واش حماقيتو و لا مالكم...
هبطات سومية و يديها فيهم ساروت خداتهم منها حليمة بيد كترعد حلات لباب..بان ليهم لبيت مضلم و صوت انين خارج منو ..شعلو ضو بانت ليهم هاجر ناعسة و وجها حمر و كلها عرقانة قاسو ليها جبهتها لقاوها طايبة بسخانة و بقوة سخانة بقات غير كدخل و تخرج في الهضرة....
سلوى: يا ربي سلامة شهادشي لبنت كتموت بسخانة...كضرب ليها في وجها..هاجر بنتي هااجر...
بزز باش حلات عنيها و فمها ناشف مقداش تحرك... هزوها بشوي شربوها لما و كيمسحو ليها و جها بي فوطة فازكة بي لما بارد كلهم وجهم ولا صفر بالخلعة....
حليمة: بنتي شنو وقع ليك عاد كنتي صحة سلام نوضي احبيبة نوضي دخلي لدوش نعومك يبرد عليك لحمك شوي ....الله يا بنيتي الله عين بنادم هادي ضرباتك ليا ياك كنقولك سطح ما تبقايش طلعي ليه راه غير لحضاية فهاد الحومة...
هاجر مسكينة شادها صخفة و الارض كلها كدور بيها كتوقف بزز...تعاونو عليها ختها و خالتها في دوش عوموها بي لما بارد باش تهبط ليها سخانة و حليمة طلقات لقرأن فدار و دارت شوي ديال لبخوار حطاتو في بيتها..تفكرات لبوطة خلاتها شاعلة على دجاج طلعات كتجري..كلشي كان تالف و زاد تلف مع هاجر لي مراضات...
خرجوها من دوش ملوين عليها بينوار ديال لحمام..جلسوها فوق ناموسيتها و هي بزز باش كتشد راسها حنيكاتها ولاو حومر ايطرطقو و عنيها بزز باش كيتحلو...جابو ليها عاصير ديال ليمون و كثرو فيه سكر مخلط بي سبيجيك ديال سخانة شربوه ليها بزز...
هاجر بزز باش كتهضر: شوي اخالتي مبقاتش فيا سخانة بزاف...
سومية: ديك ساعة اصاحبتي من عارفة راسك مريضة متنعسيش و بقاي معانا باش ميغلبكش لمرض...
هاجر: محسيتش براسي من نعست ...كان راسي تقيل عليا بغيت غير نرتاح شوي....
سلوى شافت في ساعة: سومية سيري وجدي راسك و وقولي لحاليمة توجد راسها تا هيا ما بقا والو و يدخلو ناس خليني انا لي انلبس هاجر...
هاجر هزات فيها عنيها:اتلبس غير بيجامة من ديالولي و صافي...
سومية: راه كنقولك نتي واحد لمعكسة مكاينش بحالك تا نهار لي اتخليك حليمة تلبسي لي بغيتي عاد اتلسقي ليا في بيجامة تجلسي حدا راجل تباني معاه قد مو...
سلوى: تا نخليها انا بعدا تلبس دوك بيجامات ديال شارفات ...شافت في سومية..مدي ليا داك صاك راني جبت ليها واحد لعباية اطلعها غزالة من داك شي رفيع ... تقاد غير وجها بي المكياج ميبقاش صفر بحال هكا ...
هاجر بقات غير كتشوف فيهم و خلاتهم يديرو ما بغاو اصلا مبقاش عندها القوة باش تعاند معاهم و دير لي فراسها كانت معولة اتلبس بيجامة و تخرج بعكاستها ضد فيهم... ساعة الاعصاب لي تعصبات البارح و رجعات كلشي لراسها و بقات ساكتة تا طاحت مريضة ما بقا عندها قوة لتاشي حاجة تا جهد لي تشد بيه العكس سالة ليها ..ولات كتبان ضريفة تحطها في بلاصتها متململش....
طلعات ختها تقاد حالتها هي ومها و بقات معاها سلوى كتلبسها لحوايج لي جابت ليها و غادية معاها غير بشوي...لبساتها عباية بي الاسود و داخل فيها لموفي و مزوقة بلكريسطال جات عليها واعرة وبيناتها فصالتها كثر ... لبسة محترمة و راقية في نفس الوقت...جلسات قدام لمراية كتعمل ليها خالتها المكياج خفيف غير كيبرزو الملامح ديالها و دارت نفس شدة لي كدير كل نهار..شافت راسها في المرأة حالة فمها طلعات غزالة و لبسة زادت زيناتها...بقوة ما عجبها راسها نسات مرضها و بقات غير كضحك مع خالتها و تصور في راسها بعدا في تصاور مكتنساش راسها ...
سمعو صداع برا و صوت طونوبيلات قدام دارهم..شافت فيها خالتها لي حيدات لعباية و بقات غير بي قفطان بي الابيض...
سلوى: بقاي هنا انخرج نرحب بي ناس...
قدام دار و قفو تلات سيارات كلهم من نوع بي ام.دبيلو بلون الاسود كيلمعو...الاولى خرج منها سي فؤاد راجل ديال سلوى كان هو لي شاد طريق و هما وراه حيت كيعرف طريق لدار و سيارة تانية فيها اسماء هي و راجلها و ولدها و في سيارة الأخيرة كاين سيد سلطان بي جلالة وقدره نفسه خرج من سيارة و تخنزيرة ممفرقاش وجهو تقول جاي بزز لهاد لخطوبة ..داز لجهة الاخرى حل لباب للالة الياقوت خرجات لابسة قفطان موبرة بي الازرق و مخيطة بالصم مع بلغة و مخليا شعرها مطلوق..و عصام حداها لابس طاقم بي الاسود عصري مع قميجة بي الازرق مغلوق مرجع شعرو لور ..و كيف عادتو ساكت مكيهضرش غير من عنيه كيهضر مع مو لي كتحرك غير في راسها ....
هزات مو و ختو لي لابسة قفطان بي لغوز بارد هي وراجلها لكادويات و عاونهم تا سي فؤاد اما هو داير يدو في جيبو ما هز معاهم تا حاجة غير كيدور في عينه...
كاع جيران خرجو كيطلو شي من لباب و شي من شراجم اما من جبداتها لالة الياقوت بواحد تزغريتة زادو ناس تجمعو كيطلو شنو كاين..كلشي مخرج عينو في طنوبيلات لي واقفة قدام دار العسكري و ناس لي داخلة و حيت عصام باين هو صغير فيهم عرفوه هو العريس كلشي حل فمو فيه و زادو تصدمو من عرفو هادا جاي يخطب ديك زلزال المتنقل ديال هاجر....
دخلو ناس و سلوى واقفة كترحب بيهم هي و حليمة لي لابسة قفطان جوهرة بي الابيض و دايرة زيف بدهبي و سي حميد لابس جبادور بي الاخضر ..و معاهم كمال راجل سومية لابس سروال توب بي الاسود مع قاميجة بيضة مدخلها في سروال..كلشي واقف في لباب كيرحبو بي ناس....
عصام من عادتو من كان صغير فين ما شاف شي ناس كبار في سن مكيسلمش عليهم من اليد و كيبوسهم في راسهم...و صل لعند سلوى لي كيعرفها مزيان و هي غير شافتو ضحكات ليه و رحبات بيه باسها في راسها و بادلها تاحية بي ابتسامة و كذالك دار مع حليمة من غير سي حميد و كمال سلم عليهم من اليد ....
دخلو لصالون مع موسيقة الاندلسية لي مطلوقة في دار....حيد عصام صباطو و حل صدايف تجاكيط ديالو وهز سروال شوي من جيهة ديال فخدو قبل ما يجلس..دار رجل فوق رجل و حاط يدو على لمخدة و مو جالسة حداه و ختو في جنب الاخر هي وراجلها ....كلشي جلس كيتعارفو ببعض و هو كيحرك غير راسو و كيجاوب على قد سؤال...
الكادويات حطوهم فوق طبالي لي قدامهم مغلفين و مصاوبين فكرطينات مشبكين بلون دهبي....هز عينو بشوي من شاف سومية دخلات عليهم ..صغر عينه بشوي و رجع شاف في مو و رجع كيشوف في سومية و غير ساكت...تا قربات ليه سلمات عليه و رحبات بيه حرك راسو غير بشوي كرد لتحية ديالها....
بقى غير كيشوف وساكت عاض فمو من لداخل و عينو ممركزينش في بلاصة وحدة..اكيد هو من شاف سومية كيصحاب هي لمرا لي ختارت ليه ياقوت ....دار عند مو هاز حاجب و حاط لاخر من قالت...
لالة الياقوت كضحك من لودن تا لودن: اوا فين هي عروستنا ولا مبغياش ترحب بينا...
حليمة كضحك حيت عجبوها ناس بزاف و لقاتهم متواضعين و على كانتها: الله اودي ا لالة الياقوت نهار كبير هدا راكي عارفة البنت كتكون حشمانة فهاد نهار و ها هي ختها بشات تجيبها....
رجع كيشوف قدامو و حجبانو رجعو تربطو تاني...دور راسو لراجل ختو لي جالس في جنب الاخر كيهضر هو وياه و ختو شادها ضحكة بزز باش حبساتها عرفاتو بشا غالط في لعروسة و باين سومية معمراتش ليه العين... و تا هي نيت معرفاش وجها من غير ان سميتها هاجر و هادي لي دخلات سميتها سومية ادا راه ماشي هي.......
وقفات سلوى كتزغرت من دخلات عليهم هاجر باهية بطلتها و ريحتها سابقاها و حنيكاتها مطبيزين و حومر ..طايح عليها سر من ربي جات فنيونة ..اسماء حلات فمها فيها و رجعات كتشوف في مها لي غير كضحك عجباتها هاجر بزاف....
قربات ليها لالة الياقوت سلمات عليها و جراتها معاها لبلاصةلي فيها عصام و حيت مو مغطياها مزال مشافش و جها ولكن من شاف سومية في جهة الاخرى عرفها ماشي لعروسة لي ختارت مو...
لالة الياقوت: هدا و لدي الكبير عصام و هو لي جينا ناخدوك ليه لكتاب...
هاحر مهبطة عنيها جاتها الخلعة و حاسة بمعدتها كتقلب عليها..مدات يديها لعصام و بصوت خرج حنين عن غير لمعتاد نطقات: سلام...
عصام طلعات معاه ريحتها : مد يدو و هو مزال كاع مشاف فوجها..كيف حط يدو في يديها شاف سنسلة لي مدورة على يديها..زاد عقد حجبانو وهز عينو فيها ..كيف تلاقات عنيهم تكونساو في بلاصتهم...
للعيون حوار خاص فإذا تلاقت...رباه كيف تكون؟؟؟...
كل شخص فينا ولو انه ممهتمش بزواج الا و ان ديك لحضة من كيجيوك الخطاب كتنزل عليك الحشمة من عند سيدي ربي و كتزيدي تخلعي خصوصا لكنتي مكتعرفيش شكون هدا لي ايجي يخطبك...
واقفة في بيتها حاسة بدوخة مرة تجلس مرة توقف ..قلبها زاد تزير عليها و زادتها سخونية كثر من سخانة لي فيها...غير سمعات زغاريت و هضرة ديال ناس برا حسات بركابيها فشلو عليها....
شافت راسها في لمراية كتسوط بجهد كتحاول تبعد هاد الخوف لي تملكها و غمق على احاسيسها..زادو حناكها حمارو و هما لي كيبانو في وجها....
دخلات عندها ختها مقادة لحالة ولابسة قفطان بلون رمادي و داخل فيه لبيض..غير شافتها بقات كتصلي على نبي و تقرا القرأن..
سومية: تبارك الله يا ختي كيف طلعتي فهاد لكسوة جيتي غزالة و صندالة زادتك في طول وليتي كتحمقيييي بزين...
هاجر كتحك يديها من لوسط: واش جا كلشي صافي...
سومية: اييه يا لحبيبة و تشوفي هاد زين لي جا يخطبك واااعر بكووووس بشيت سلمت عليه بقا غير كيخنزر و حرك ليا راسو و الله ما ردها عليها و لا تا ضحك ولكن زوين يا ختي كلشي يهون ههه..
هاجر جلسات: اوا مزيان...
سومية حالة فيها فمها: شمن مزيان نوضي معايا نطلعو ناس كيسولو فيك...
هاجر خرجات عنيها جاها لكلاخ لمبين: فيا انا و علاش..
سومية: علاه جاو يخطبو حليمة راه ناس جاو على ودك نوضي رحبي بيهم و شوفي راجل متحشميش...
هاجر شافت في ختها بعيون بحال جرو: صراحة شداني لخلعة في معدتي حاسة بصخفة معرفتش علاش اول مرة كيوقع ليا هادشي...
سومية: عادي احبيبة كلنا كندوزو من هاد لمرحلة نتي مكننيش كتحسي بالخلعة حيت كاع الخطاب لي جاوك كنتي كتعرفيهم مزيان غير هادا مكتعرفيهش و جاوك هاد الاحاسيس راه عادي غير طلعي تشوفيهم دغيا تبشي منك....
تنهدات بشوي و قدات زيفها قدام لمراية و طلعات مع ختها..غير قربات لصالة زادتها لخلعة و كمشات حجبانها من شافت لالة اليقوت كتسلم عليها و كضحك فرحانة..جراتها لعند راجل لي كان جالس حداها و مهبط راسو.....
لالة الياقوت: هدا و لدي الكبير عصام و هو لي جينا ناخدوك ليه لكتاب...
هاجر مهبطة عنيها جاتها الخلعة و حاسة بمعدتها كتقلب عليها..مدات يديها لعصام و بصوت خرج حنين عن غير لمعتاد نطقات: سلام...
فور ما هز عينو فيها و شافتو خرجات عنيها فيه مصدومة ..حسات بكلشي كيدور بيها ..ما قدرات تنطق تا حرف قدامو بقات غير مكوانسية في بلاصتها...حسات بي يديه زيرو بشوي على يديها و نطق بصوت غليظ...
عصام: سلام...
هاجر مزال يديها في يدو و تا هو ما فرقش يديها و عينو مقابلة مع عنيها.....قربات ليهم سلوى كضحك و كتهضر مع هاجر...
سلوى: جلسي ابنتي هنا حدا عصام...
قبل ما ترد على خالتها ..جمع هو الوقفة و خلاها دوز تجلس...و يديه مزال ملاصقة مع يديها جلسو بجوح و يديهم مشابكة..و هاجر ماشي فهاد لعالم صدمة جاتها قوية من شافت عصام بجلالة و قدره كامل قدامها و صدمة لكبيرا انها حضرات لعروسو و ليوم جاي يخطبها ....
جالسة حداه و حانية راسها ساكتة و باينة عليها الحشمة عن غير المعتاد تا من حليمة و سومية تصدمو فيها....
عصام عاض فمو من لداخل و مصغر عنيه كيفكر..دور عنيه ليها شاف فيها مزاين عاد دور عينو لقدم.....شاف كلشي كيشوف فيه و يضحكو وهو يعقد دوك الحجبان ديالو....هبط عينو لفين كيشوفو بانت ليه يدو لي مشابكة مع يديها..رجع كيشوف فيهم ممصوقش و زاد ورك على يديها تا ضارت عندو ....
كيف ورك على يدها هزات عنيها فيه و مع هزاتهم دور هو وجهو ليها تقابلو عنيهم لمرة تانية للحضة وجيزة و جها ولا حمر و هبطات عنيها حشمانة....بغات تحيد يدها من يدو و هو يزيد يورك عليها و شبك صباعو مع صباعها.....
سومية جالسة حدا خالتها دايرة يديها على فمها و كتهضر بشوي: شوفي ليك لبنت غير شافت سيد و هي ضربها بسكتة لي يشوفها يغلط فيها...
سلوى تا هيا حطات يديها على فمها بلا متعيق: شوفي بعدا هو كيفاش شاد ليها في يديها باين عجباتو المسخوطة....
سومية: نارييي شداتني ضحكة شوفي كفاش ممصوقش..هادي غير مزال مدار في طاجين ما يتحرق وااا تي شفتها ساكتة زعمة صافي قبلات بيه غير نزغرتو...
سلوى: يا ودي سكتي و متعيقيش خلي شوي و ايبداو يهضرو و نشوفو شنو كاين بعدا ..انا بعدا خايفة غير من هاجر اما تا سي عصام الله اعمر ليه دار...
ايوب جالس وسطهوم و هما مضرقين بيه كيهضرو ورا ضهرو كاع الهضرة دازت على ودنيه دار عندهم بشوي: واش متأكدين هاد سيد عمرو 38 عام مبيناش عليه كاع تا شيب ما فيهش و باين صغير بزااف...
سومية:غير لي مقودة عليهم بحالنا هو لي يبان فيه شرف اما لي عندو لفلوس راه مهلي فراسو و يبان كيف البرهوش ميبانش فيه عمرو الحقيقي كاع....
ايوب: دابا شنو لخوادرية صافي بشات لينا....
سومية: علاه بغيتها تبور حداك هنا... نوض من حدايا قبل ما نصمكك خلي وجهك حمر مع ضياف بلا منفرجهم فيك....
ناض من حداهم كينكر غير في نفسو دخل الكوزينة عند مو لي كتغوت عليه يتصخر ليها..وسومية شادة ضحك بزز هي و سلوى من شافو عصام دور يدو ورا هاجر من لور بحالي معنقها...
سومية: ناري ميمتي سيد باين عاجباه و بزااف يا ربي غير دوز هاد ليلة بخير و متنوضش تخسرها راه بانت ليا ساكتة على خزيت...
سلوى: معندك علاش تخافي بانت ليا سخانة شادة فيها معندها ما دير ....
عصام حس بيديها سخونة و بدات كتعرق وسط يديه....هز مشوار ديالو من جيبو و حجبانو معقودين ....هز ليها يديها و مسحها ليها مزيان امام نضرات الجميع و هو ممصوقش من غيرها هي لي قدامو كتلون بي الحشمة و غير ساكتة و مهبطة راسها كيبان ليه غير نص وجها و حنكها لي حمر...رجع لمشوار لجيبو ....هز يدو بشوي جر ليها زيف من لقدام غطا ليها شعر لي كان كيبان... و دور يدو ورا كتافها على المخدة و اليد لخرا حاطها فوق فخضو...هبط بشوي تا قرب حدا و دنيها و همس ليها بشوي ....
عصام: شنو سميتك...
كيف حسات بيه كيقرب ليها عضات فمها من لتحت مزيرة...حسات بجسدها كلو تنمل عليها من سمعات صوتو و انفاسو الساخنة كدغدغ في ودنها ...بقات منزلة راسها و شابكة يديها فوق حجرها و بصوت ضعيف قريب لهمس ردات عليه: هاجر...
حرك راسو بشوي من سمع سميتها..دور لسانو على الشفاه ديالو و ردد بشوي : هاجر بن جلول...
كان هاد الهمس لي ردد بينو و بين نفسو كافي باش يأكد انها ولات ديالو ليه بوحدو...شاف فمو لي حركات ليه راسها و حنحنات بشوي باش كلشي يشوف فيها....
لالة الياقوت : اوا ا سيادنا كلشي عارف اليوم علاش جينا ..حنا ليوم مجمعين طالبين و راغبين فبنتكم صغيرة لولدي لكبير ..اوا شقلتي ا سي حميد و لا مكنتيش كتعرفنا ها ختي سلوى و خويا فؤاد سولهم و هما يردو عليك راه معرفتنا بي بعضنا زمان هادا...
حليمة : حاشة الالة الياقوت حنا فتحنا ليكم بابنا و رحبنا بيكم و كلشي بان لينا قدام عنينا و البنت ها هي قدامكم حسبوها من دياولكم....
اسماء: الله يخلف عليك ا خالتي ...خويا مغديش نشكرو ليكم كلشي عارفو الحمدلله و هاجر راه اتولي وحدة منا و من عائلتنا راه دابا اتولي في متابت ختي صغيرة...
عصام عاقد حجبانو كيسمع ليهم و عقلو مركز غير على ديك "بنتكم صغيرة" ..و هاج حيت وافية وعامرة تبارك الله كتبان كبر من عمرها و هو بشا مع لي شافت عينو معارفش شحال في عمرها.....
فؤاد راجل سلوى: بنتي هاجر حمدلله بنت مربية و داخلة سوق راسها و حادكة تبارك الله و من ختاريتو راكم عرفتو شنو تختارو راه بنت العائلة لكبيرة و هي صغيرة ديال دار و المفشة ديال باها و خوها تبارك الله ....
سلوى: تا حنا منزيدوش نشكرو راه كلشي بينات عنيكم و خويا حميد تا نتا راك اتناسب مع ولد الاصل و خدام بدراعو و داير رزقو بالحلال و منلقاوش حسن من عصام لبنتانا هاجر....
لالة الياقوت: اوا نبداو بي الفاتحة هي الاولى....
يالله اتهضر حليمة تقول بسم الله و هو يوقفها راجلها كيشوف في بنتو لي حانية راس ما قالت والو و معترضات على تا حاجة....و كأي اب فهاد اللحضة كيجيه شعور مؤلم مكيتصورش من كيحس بي بنتو الصغيورة لي رباها و كبرها ايديها واحد اخر...
سي حميد: صراحة معرفت شنو انقول ليكم ا سيادنا انا منلاقش حسن منكم لبنتي و لكن سي عصام عمرو 38 عام و بنتي يالله عندها 18 و صغيرة بزااف على زواج....
عصام فور ما سمع عمرها ورك على يدو بجهد و عاقد حجبانو لكن ما كيبين تا ردت فعل...لقا راسو كبر منها بي عشرين عام...هبط عينو لهاجر لي مزال حادرة راسها و ساكتة...بقا كيشوف فيها مدة طويلة ..جبد يدو من ورا ضهرها و حطها على يديها ..شبك يدو مع يديها و زير عليها بجهد تا قصحها عاد هزات فيه راسها.....
عصام بصوت غليض رجولي عينو مقابلة مع عنيها تا نطق نيشن لموضوع بدون مقدمات : قابلة تولي هاجر بن جلول....
شافت فيه مبهوضة ما عرفات ما تقول لسانها تسرط فهاد لحضة ..كلشي بقا غير حالين فمهم فيه كيبقى ساكت تا كينطق و من كيهضر كيخلي كلشي مصدوم ما كيعرفو ما يقولو....
نضراتو ليها حسوها بي العجز و سلبوها كل قوتها و زادت سخانة قضات عليها و الموقف لي هي فيه خلاتها بحال صمكة..بلا متجاوبو هبطات راسها لتحت ساكتة.....
عصام بقات يدو مشابكة مع يديها و كيشوف فسي حميد: سي حميد انا من دخلت من باب داركم جيت طالب يد بنتكم هاجر..لكنتي خايف عليها حيت انا كبير منها فمن هاد القضية معندك علاش ضرب حسبة لتا شي حاجة..هاجر انحطها فوق راسي و راحتها من راحتي و كما عاشت في دار باها اتعيش فدارها معززة مكرمة... شاف في هاجر مزيان عاد نطق...هاجر انحطها بينات عيني اسي حميد...
اسماء بقات غير كدور في راسها و تشوف في مها و تا مها كتشوف فيها ما عرفو عصام منين خرج هاد الهضرة و هو مكانش مصوق كاع لهاد الخطبة ولا تسوق كاع لبنت لي ايجي يخطبها و دابا شوف كيفاش كيهضر ..صدم عيشتهم بجوج....
سي حميد كيضحك: صراحة ما عرفت ما نقول كلامك اولدي على حق لكن الاختيار كيبقى ليها....
لالة الياقوت: اوا سكات من علامة رضا الالة حليمة او لا...
حليمة: داكشي لي كاين لكانت بغا راها ديالكم من ليوم....
سي فؤاد: اوا شي فاتحة يسر بيها الامور و يفتح ليهم باب رزق يا ربي....
هزو كفوفهم كيقراو الفاتحة تا سلاو عاد دورو طباسل الحلوى و تمر و اتاي...
عصام حيد عليه تجاكيط لي كان لابس وحل جوج صدايف لفوق ديال قامجة...هز تليفون ديالو كيبقشش فيه تا حطو ليها بينات يديها كيف شافت تليفون خرجات عنيها و راسها مزال محدور....هبط راسو تا لحدا و دنيها..
عصام: هدا لفيس ديالك....
حركات ليه راسها بي "اه"....عض فمو من لداخل و هز تليفونو كيشوف الفيس ديالها لي عامر غير بتصاور دياولها و مع شي اولاد لي باينين كيقراو معاها بقا كيبقشش فيه شوي عاد رجعو لجيبو وهو ساكت كيف عادتو معاودش هضر معاها ....
بقات لالة الياقوت هي و سلوى كيدويو على امور الخطبة و نهاراش يعملوها و سي حميد جلس حدا عصام كيتعرف عليه و معاهم فؤاد دغيا داز الوقت.....ناضت سومية لكوزينة تحط العشا ..و هاجر في بلاصتها ساكتة تا قشعات سنسلة في يديها و هي تخرج عنيها عرفاتو شافها و يقدر يبشي غالط....بزربة بغات تحيدها و هي تشوف يدو تحطات على يديها لي بغات تحل سنسلة....همس ليها حدا ودنيها....
عصام: غير خليها عندك....
رجعات يدها عندها ضرباتها بصقلة تا ناضت مها خارجة و هي تعيط ليها...
حليمة: بنتي هاجر تبعيني بغيتك...
وقفات هاجر بزز جاتها واحد الحشمة و الدوخة ما عمرها حسات بيهم باغية غير وقتاش تهرب من قدامهم و قدامو هو بضبط.....خرجات من صالون و عين عصام عليها تا غبرات من قدام عنيه...
هاجر كتهضر بزز و ملامحها مخصرين: كنحس بعضامي فيهم لبرد و كلشي مرخي عليا بحالي واكة قتلة ديال لعصا و شي حاجة واقفة ليا فوق قلبي خالعاني و معدتي كنحس بيها كتلعب في لخوا...
حليمة: الله يا ربي على بنتي راه غير خلعة هديك و تخالطات ليك مع سخانة كولي شوي ها هي سومية تحط ليك لعشا و هبطي ترتامي بلا متعاودي دخلي عندهم صافي راه شافوك الله يجعل لباركة....
هاجر: غير خليني نبشي لا كليت شي حاجة انردها بهادشي لي شادني في معدتي... انهبط نعس في بيتي هاد ساعة ....
سومية شداتها من يديها من شافتها كتبشي و تجي في بلاصتها جاتها دوخة ..خرجات من لكوزينة تحت انضار عصام لي حاط جوج صباع تحت من راسو و عنيه غير كيدورو تا شافها خارجة و شادة راسها مخصرة ملامحها بحالي كيضرها...عقد حجبانو و كيعض فمو من لتحت كيقشرو و غير كيفكر مع راسو تا حد ما عارف اش تحت من راسو....
دخلات لبيتها عاوناتها ختها تبدل حوايجها و عطاتها كينة ديال سخانة تشربها..خلاتها و طلعات تعاون مها في لعشا....دخلات هاجر في فراشها و نعاس طار منها..بقات تا هي غير كتفكر فهادشي لي وقع مازال ما بغا يدخل ليها فراس....هزات تليفونها دخل لفيس ديالها تا لقاتو طار مكاينش ، قلبها فهاد لحضة بشا و جا قرب يسكت ليها و شداتها البكية من متقبلش ليها الكود ... شي حد طير ليها الفيس نهائياً....
خيوط الشمس الدهبية تسلسلات في اركان الفيلا ..كتبرهن على يوم جديد غير عن الايام لي مولف يدوزهم بروتين لخدمة ..
اليوم كان العكس منعسش ليل كامل من جا من دار هاجر وهو مخشي في البيرو ديالو تا حد ما قدر يهضر معاه و تا هو مكيبينش المشاعر ديالو على ملامح وجهو ما عرفوه واش عاجبو الحال و لا مقلق..شخص جامد متعرف اش تحت راسو
....
في الجناح ديالو لي مخصص ليه بوحدو مكيقرب ليه تا حد عندو غرفة خاصة غير كيتريني فيها..داير سمعات الادن و كيجري فوق الة المشي..كلو عرقات و صدرو كيطلع و يهبط بحدة تنفسو و عضلاتو كلهم زادو برزو اكثر و العرق هابط على انحاء جسدو المنحوث ..و شعرو هابط على جبهتو لابس سوفيطمة لاصقة مع سروال ديال كيطمة ...حبس الالة و هبط منها خدا طاس لي كيدير فيه عصير مخلط مع بروتين لي كياخد شربو كامل ....هز تليفونو كيبقشش فيه وخرج من لصال نيشن دخل لدوش حيد حوايجو و دخل في لبانيو لي لقاه واجد و حداه كافي مسوسة كيف كيبغي..حط راسو على طرف البانيو مغمض عينو مرخي مع لما سخون لي تغلغ مع انحاء جسدو تا دازت صورتها قدام عنيه و هو يعقد دوك الحجبان عندو لوسط ....
دور عينو لجهة ديال تليفون لي حاطو فوق لفابو وهو يتنهد بجهد و نطق اسمها بحالي كيأكد شي حاجة ...
عصام: هاجر..هاجر..تبسم بجنب فمو و همس بشوي..هاحر ولا اميرة نفسي شكون فيهم نتي....عاود سد عنيه و مزال راسم ابتسامة على محيا وجهو محاسش كاع راه مبتاسم و عقلو داه لبعيد لي اشهر قبل....
#فلاش باك
جالسة هاجر في قسمها و دايرين بيها بنات كلشي كيتغاوت في القسم....
وحدة من لبنات: ومتكونيش خوافة عاود...
هاكر مخنزرة:راه انضرب ختي تال لسما و نرضخها مع الارض و نوريك لخوف منين جا....
نفس البنت: وصافي تا نتي و طلقينا لفراجة خلاص...
هاجر: دابا واش خاصني نسيفط ميساج لواحد عمري هضرت معاه و لا عرفني كاااع....
بنت وحدة خرا جالسة حداها: اييه هدا هو تشالنج جديد لي حطيناه في لكروب و زيد نتي عندك لفيس فيه كثر من 5000 متابع ضروري متلقاي شي حد عمرك هضرتي معاه...
كيف سلات لبنت هضرتها وصل لهاجر مساج من لفيس طلات عليه و هي تلقى ان شخص لي رسلات ليه طلب صداقة قبلها عندو...شافو فيها لبنات و هما يتحماو عليها: وااالو اهاجر هضري مع هدا نيت لي قبلك دابا...
هاجر دخلات كتبقشش في بروفيل ديالو ما بانو ليها لا تصاور ديالو لا والو ما حاط تا حاجة تا من سمية ماشي ديالو.. دخلات عندو لمسنجر و هي تزعم.. شافت في لبنات : شنو خاصني نكتب ليه....
وحدة من لبنات: اتسيفطي ليه مساج قولي فيه انا كنعرفك من شحال هادي و قلبت على لفيس ديالك تا لقيتو و دابا جيت نعتارف ليك راني كنبغييك بزاااف و بغيتك تكون حلالي لا كنتي قابل عليا اجي لدارنا اما لكنتي باغي غير تفلا انا راه ماشي ديال تفلية و ديال تصاحيب و دوران في زناقي..انا بغيتك لحلال و جيت قصدااك نيشن نتمنى تقبل حبي لكبير ليك و قلبي لي كيتعدب كل نهار و نتا بعيد عليه.....
هاجر حلات فيهم فمها مصدومة وحيت فيها زعامة كتبات ليه لمساج و رسلاتو ليه غالباها ضحكة.....
عصام جالس في لبيرو ديالو كيف ديما غير مغوبش شاد ميلفات كيراجعهم تا جاها ميساج في تليفونو..هزو يشوف شكون... بان ليها مساج في مسنجر دخل ليه كيقرا و هو يعقد حجبانو لوسط...عاود قرا لمساج حرف بي حرف..قرا سمية ديالها لقاها كاتبة "اميرة نفسي"..غير من سمية عرفها شي برهوشة....حط تليفون متصوقش ليها كاع و لا رد تا على لمساج لي رسلات ليه.....
هاجر في لقسم شادة تليفون بين يديها و كتعض شلقومتها لفوقانية و رجليها كيفيبيرو..شافتو طلع ليها "VU" و خرج مرضش عليها و هي طلع ليها لقردة راس...خنزرات في لبنات لي كانو كيضحكو عليها و هما يجمعو ضحكة عارفينها واعرة و ممعاهاش ضحك..بديك القمعة ديال vu شداتها الفقصة...و حيت مكتعرفوش مبغاتش تخسر معاه لهضرة من لول و هي دير اوديو ...
هاجر: شوف اخويا راه مكنبغيك ما والو غير تشالنج دايرينه مع لبنات و جات فيك نتا لقورعة و رسلت ليك داك المساج راه مكاين لا حب لا والو بلا متيق ليا راسك و تصحاب راسك شي حاجة راه اصلا عمري شفت كمارتك و زيد يحسن ليك شرااف راك كتهضر مع لالة لبنات لمفخباركش....
رسلاتو ليه مخنزرة معولة لا طلع ليها عاود vu ليوم تسبطو من راسو تا لساسو....
عند عصام مكسونطري مع شغلو تا جاها ميساح تاني هز تليفون مغدد بانت ليه نفس البنت راسلة ليه اوديو ..غمض عينو بجهد معصب بغا يطفي تليفون كاع و هو يقيس جهة ديال الاوديو خدمات و تطلق صوتها....صغر عينو كيسمع ليها و هو يهز حاجب و هبط لخر من سمعها قالت "راك كتهضر مع لالة لبنات"...
بقا كيشوف في لمساج الاول مزيااان و هو يدخل عندها لبروفيل....لقاه عامر غير بي تصاورها بقا كيطلع و يهبط بقشش فيه و حفظ كمارتها مزيان...تبسم بسخرية كيبقشش في تليفونو يالله ايبلوكي ليها لفيس يطيرو ليها و هو يغمض عينو و نعل شيطان و رجع لمساجات بلوكاها من مسنجر عندو و طفا تليفون و دارو في جيبو .....
عند هاجر شافتو طلع ليها vu معبرهاش و هما يطلعو ليها عيساوة فوق راسها بغات دردك عليه و زاد كمل عليها من بلوكاها بغات تقتل راسها ..مرضاااتش قدام لبنات..طفات تليفون و هي كتعاير سبطاتو نيت ما خلات فيه غير لي نسات وخا مكتعرفش سميتو مهم مخلاتش في قلبها.....
دازو الايام تال واحد نهار ديازة هاجر هي و حليمة لي بغات تاخد سنسلة ديال دهب ..بقات هاجر كتسناها برا و مع كانت دايرو زيف رطب كل مرة كيطيح ليها من فوق راسها عصبها.....كتعاود تصاوب عكاستها و يبقا شوي و يطيح تاني..دورات عنيها كتقلب على شي جاج و لا مراية تصاوبو مزيان و هي تبان ليها طونوبيل جاجها كحل مكيبينش لي لداخل ...تحنات على جاج حيدات زيف و طلقات شعرها لي طويل و كحل كيف سواد ليل جمعاتو على شكل شفنجة عاد حطات زيف فوق راسها و دوراتو على وجها على شكل حجاب باش يتشد ليها....جا معاها بزاف و عجبها راسها هزات تليفون خدات سيلفي مع طونوبيل لي كانت من نوع رياضي واعرة ...رجعات كتشوف في جاج تا قدات راسها مزيان و هي تبوس راسها في جاج كضحك غير وحدها و كل مرة تعيب راسها خالقة سعادة غير مع راسها..كان جاج مضلم مكيبينش شنو لداخل ..ولكن لي لداخل كيشوف كلشي على برا......
كان دخل طونوبيل يهز شيكات لي خلا فيها يالله ايحل لباب يخرج و هو يشوفها هي نيت نفس البنت لي شافها في تصاور..عقد حجبانو كيشوف اش كدير من شافها بغات تقاد زيف جلس كيكتب في شيك ديالو كيتسناها تكمل تا حس بحركاتها و صوت ضحكة ديالها دور راسو كيشوفها شكادير .... حاط صبعو على فمو .. هاز حاجب و مهبط لخر ..سااكت و وحاضي جميع حركاتها طفولية ...خلاها دير ما بغات ....بقات كتخربق في جاج تسوط فيه و دير قلب و وسطو سهم و كتبقى تشوف فيه مدلية شفاه ديال تحتانية بشكل طفولي..شافت مامها خارجة و هي تحط فمها على جاج كتبوسو و معنقة طونبيل بحالي مسخياش تبعد من حداها....تا قربات ليها حليمة عاد بعدات و بشات معاها....خلات عصام وسط طونوبيل كيشوف في لبلاصة لي باستها و القلب لي رسمات..حرك راسو بشوي و ردد بهمس"اميرة نفسي"....
خرج من دوش ملوي عليه الفوطة و حاط فوطة على شعرو كينشفو..دخل لبيت تبدال يلبس حوايج ديال لخدمة..واقف قدام لمراية عاقد حجبانو كيصاوب لكرافط ديالو و ساكت....
كن اول حاجة تفكرها هاد صباح هي هاجر لي جات بين عينو و تفكر اول نهار عرفها بداك لمساج لي رسلات ليه..تا من شافها في المول عرفها هي .. و مكانش متوقع ابدا انها هي لعروسة لي ختارت ليه لالة ياقوت كان معول ايدير خاطر لمو فقط لكن القدر خبا ليه اشياء اخرى و نفس البنت ضهرات مرة تانية قدامو ...
اول نهار طلق رسلات ليه داك لمساج و مع توالي الايام كيتلاقاها بشكل اخر غير متوقع مرة تانية و هو وسط طونوبيل و مرة اخرى في لمول و دابا اتولي مراتو لأنه ربط سميتها مع سميتو و مكاين لي يقول العكس....
هبط لتحت لابس كلشي كحل طل على مو لي كتفطر باس ليها راسها و تم خارج تا عيطات عليه...
لالة الياقوت: عصام ولدي صبر بعدا ما قلتي والو على البارح...
دار عندها هاز حجبانو بمعنى شنو...
اسماء: زعمة ماما بغات تقول نهاراش يكون مناسب ليك نديرو فيه الخطبة...
عصام كيشوف في تليفونو: شوفو معاها هي نهاراش بغاتها تكون....
اسماء حلات فمها في مها و لالة الياقوت كتشوف في ولدها: زعمة بغيتي تقول الوقت لي بغات هي نتا ما عندك تا شي مشكل...
عصام مكيشوفش فيها عينو في تليفون كيبقشش فيه ...حرك ليها راسو بي اه و ضرب دورة خارج و هو يعاود يدور عندهم كيشوف في فمو....
عصام: لبغات شي حاجة خودوها ليها على حسابي متخلي باها يخلص والو و لكانو بغاو يجيو يشوفو بنتهم فين اتعيش دخليها لبيتها تشوف شنو ايخصها تم و شنو اتبدل فيه....
لالة الياقوت مخرجة فيه عنيها مصدومة هي و بنتها: بغيتي تقول ندخلها لبيتك لجناح ديال ياك...
حرك ليها راسو و خرج خلاهم مكوانسيات في بلاصتهم صدمهم صدمة العمر...
لياقوت: يا وييري شوفي الولد لي عمرو سمح لشي حد يحط رجلو في جناح ديالو و شنو كيقول دابا....
اسماء: اوا راه اتولي مراتو اماما باين عجباتو بزااف ...اححح اماما و حياني عليك منين ضبرتي على هاد لعروسة شحال غزالة يا ربي كتحمق بزين و حشومية بزاف شتي راسها مقدراتش تهزو فينا اما حنيكاتها بحال مطيشة حووومر فنيونة تبارك الله...
الياقوت كضحك: اوا شنو نجيب انا لولدي لخايب تا انا عجبانتي و جاتني مع كانتي اهم حاجة هي انها ضريفة و داخلة سوق راسها و مكتهزش لعين لا بقات هاكا راه انكون انا وياها سمن على العسل بعدا هي حسن من ديك عضم طيو ديال نيار مراتو الاولى كانت حاضية غير دخول و الخريج دار مكتجلسش فيها و ديما جايبة صحابتها مجمعة معاهم تقول معندهاش راجل لي ديها فيه...
اسماء: تا نتي اماما تا هو سكت ليها بزاف و عمرو جبد معاها العيب خلاها على خاطرها و حيت كانت عايشة برا مبغاش يبزز عليها شي حوايج هي ممقتانعاش بيهم بشا معاها دقة دقة و لكن ست سنين ديال زواح و مبغات تعلم غير ما كتزيد فيه تا لولاد مبغات تولدهم وخا حصل عندها كينة ديال لولادة سكت و مقال والو حترمها و عطاها كثر من لقدر ديالها و هي من شافتو هكاك حساب ليها راسها ميقدرش يعيش بلا بيها معرفاش ان الكرامة شيء و الحب شيء اخر و باش كملاتها بشات تا لأمريكا مصورة بي لبيكيني بلا حشمة بلا حية و صورها تنشرو على كل المجلات..حمدلله من مقتلهاش و صفاها ليها بي مرة و من رفعات طلاق كتسحاب راه ايبشي يحزرها ساعة دارها ليها قد فمها و سكتها ..اففف اودي لقاتو راجل و نص مكيحطش يدو على لعيالات اما كون كان شي شماتة كون سلخ مها عصا بالحمارة لخرا....
لالة الياقوت: خلينا من هادشي ما فيا ما نتفكر و نزيد نتعصب...
جالسة وسط صالة مفرقا رجلها و المشاور مليوحين حداها جالسة كتغبن و تنخصص غير وحدها ..حاطة تليفون قدامها كتبكي... دموع و الخناين كلشي تخلط ليها...
حليمة واقفة عليها بحال ملك الموت دايرة يد فوق يد: دابا شنو غدي تبقاي تنوحي عليا هنا نهار كامل كيف لكلبة...
هاجر كتركل في بلاصتها:وااع نتي معرفاش شنو بشا ليا راه لفيس كلو طار كاع تصاوري ديال خمس سنين بشاو ليا و شحال من واحد كان متباعني كلشي بشا اهئ اهئ....
حليمة:يقطع فيسك نشاء الله قولي امين ..واش هداك ابنت كرشي يبكيو عليه ناس..اتنوضي تجمعي حالتك و تمسحي خناينك و دوزي لبقى ديك طبخة لي دارت ليك ختك لوجهك و لعنقك باركة من لفشوش لخاوي راك قريبة تولي مرات راجل....
حليمة معصبة هزات شربيلها شيراتو عليها جابتو ليها في الوجه: الله يعطيك موصيبة الكلبة ..عاد بان لمك متزوجيش و البارح من كنتي كتشادي نتي وياه عاجبك الحال الحمارة ...من نتي مبغياش تزوجي متبقايش ساكتة و هو كيسولك و عاجبك لحال....
هاجر شادة وجها بضربة لي عطاتها حليمة: افففف وراه كنت مريضة ديك ساعة متهضروش معايا كان القلم مرفوع عليا غير حالة فمي كيف بهلول معارفة شنو كيوقع و هو لي كان شاد لي في يدي حلف ما يتلقها....
حليمة هزات طراف بيجامتها و لواتها على خسرها: سمعي شغادي نقولك لبكا ورا لميت خسارة الكلمة خرجات و عطينا ناس الكلمة دابا راكي محسوبة على راجل..و غير قولي ليا يا بنت العوجة شكون يرفض ديك نعمة لي جات برجليها تا لعندك....
هاجر كتمرغ في بلاصتها: وااا مبغيتش نتزوج....
حليمة هزات لمدلك: لعن مك يا لكلبة بقا ليا غير نبوس ليك رجلك اما تحزار و الهضرة ممعاكش نتي...
هاجر غير شافت المدلك و لات كتشطح شرقي في بلاصتها : لعااار ا حليمة ما نعاود غير رحميني ما قادة على شي صلخة تاني.. ..هزات صبعها.....والله ما نضيع نعمة او تجي نعمة تا لعندي ورجعها مالي بنت لحرام ...
حليمة مخنزرة وهازة ديك زرواطة بحال شي سراح ضربة وحدة منها ترسلك نيشن عند عزرئيل: اوا هي لا جمعتي الوقفة و سيري لكوزينة عند ختك و لبسي شي حاجة قديمة قبل ما ديري داكشي في وجهك...
هاجر غادة كتجر في رجليها و تنكر غير بوحدها دخلات لبيت حليمة و بالعكس لي فيها لبسات احسن قميص عند مها و دخلات عند ختها لكوزنية لقاتها مصاوبة ليها طاسة و داكشي كيبان ليها خضر...
هاجر بتساؤل: شداكشي تم خضر اديري لحنا لشعرك و لا شنو...
سومية: اشمن شعري هادي حنة لوجهك واحد الوصفة كتصفي لوجه كتحمق كتاخدي معيلقة كبيرة من لحنة مطحونة على ليد و حمص مدقوق و لوبية مدقوقة و عدس مدقوق كلشي كتخلطيه مزيان و كل نهر خلطي شوي مع ياغورت طبيعي و شوي عسل حر و دهني بيه و جهك و عنقك عرفتي كيصفي لوجه و كيرجعو واعر ....
هاجر: يا ربي هدي ولات حريرة مبقاتش طبخة غير لي سمعتوها تجيو تجربوه فيا انا تا شي نهار يخرك فيا شي عجب ...
سومية: اودي ديري و سكتي فين عمر وقعات ليك شي حاجة شوفي غير شعرك كيف خلف و طوال بديك زريعة ديال لكيف و زيت لبلدية لي صاوبت ليك و كتشقي بيها شعرك ...
هاجر: اممم غير بشيت لمدرسة و شمو فيا ريحت لكيف كنت انبشي نبات في عكاشة كون ما وريتهم طبخة لي درتيها لشعري صدقت مشوهة و البوليسي كيسولني منين جبتي زريعة كيصحابني جالسة نزرع فيه ....
سومية جراتها جلساتها قدامها كتحط ليها الوصفة في وجها: اجي هاد لقميص لي لابسة بان لي مزال جديد راه اتطبع فيه الحنة و يتخسر ليك..
هاجر: غير طبعي و مسحي فيه تا يديك ....موت وحدة لي كاينة
شخصية عنيدة و قوية و قاصحة ضاربة كلشي بركلة و مهنيا راسها مكتسوق لحد و ما كتسمع لحد و لي فراسها هو لي ديرو و مكاين ولد لمرا لي يبزز عليها لحاجة ببساطة هي كتموت على العكس و شدان ضد ...راسها و كتشد معاه العكس بقا غير بنادم..عندها جبهة قاصحة و ديما دفعاها ..معروفة في حومتها بزلزال المتنقل و فين مكانت شي موصيبة كحلة عارفين وراها هاجر بنت العسكري و هي ديرها قد راسها و تجلس ضحك تا تشبع و خا كتاكلها في عضامها من عند حليمة تجلس تبردها و تنوض بحالي ما وقع والو....ولد المدير و مخلاتوش في تيقار فين ما جبدها و لا قرب لجيهتها كتعطيه علاش يدور و من ما لقا ليها جهد و لا كيدور بخوها صغير ايوب ساعة معامن نهار حصلاتو دمغاتو و خلاتو مجبد في بلاصتو يطلب لموت تجيه اما هي عطات رجليها لريح و على قولها موت وحدة لي كاينة......
مزال جالسة حدا ختها مربعة رجليها و طالية داكشي لوجها خضر كتبان بحال شي زومبي كيخلع و ختها في جنبها كتمشط ليها شعرها و كدهنو ليها.....تا دخل عليهم ايوب لكوزينة غير شافها نقز تا لسما و ترضخ مع الارض شاد قلبو و مخرج فيها عنيه...
ايوب صدرو كيطلع و يهبط : بسم الله رحمان رحيم اش بغيتي عند ديلمي كنصحاب خرج ليا شي جن تفووو شهاد لحالة دايرها لوجهك....
هاجر هزات صندالة شيرات عليه كارزة على سنانها: جنون هما لي يخرجو فيك نشالله اتبعد من حدايا لا...
ايوب جمع لوقفة كيحك لبلاصة لي طاح منها ..دخل هز كاس ديال لما كيشوف فيها: فراسك ليوم تلاقيت مع كونان فلبيار دار لينا شوهة من عرفك اتزوجي....
هاجر : اواااه شكون قالها ليه ..افف دابا منين اندبر على راسي....
ايوب: قالها ليه د ولد لمدير عمر ليه راسو لا شافك ايجري على مك بالحجر.....
هاجر: هههه هدا واحد دري حمق ديما كيكون قدام ليسي هاز واحد زرواطة من نهار شافني و هو لاصق فيا ديما كيقولي اتولي مراتي هههه في لول كنت تا انا كنشد فيه ساعة لقيتو قراي نيت كلشي كيعرف ليه كيقولو و الله و علم لقراية لي حمقاتو اوا عطيتو نمرتي و وليت نصور ليه متيحانات في القسم و هو يخرجهم ليا و يرسلهم لي في لوتساب و كان ديما شاري ليا لفطور ههه كنلقاه قدام ليسي كيتسناني مع صباح كيقولي والو فطري قدامي عاد دخلي تقراي كل نهار يجيب ليا رايبي و حرشة بشكلاط....
سومية: ناري عليك يا بنت لحرام و محشمتيش جالسة ضحكي على دري و هو حمق مسكين بحال دري صغير و حاسبك مراتو كاع ...ناري يا ختي نتي قلبك قاصح....
هاجر: بالعكس عزييز عليا بزاف و كنعجبو حيت كنعيط ليه بسميتو سمير ماشي كونان بحال دراري و كنعطيه لخاطر من كيدوي معايا في لوتساب مكنقمعوش و مخلياه يشكي عليا همو و خا حمق مسكين كيعقل شنو كيديرو ليه و خا كيبقى فيا الحال من جيهتو لكن معندي ما ندير....
هاجر: الله الله على سمير ديالي مسكين تا من لفيسبوك نتجمع معاه فيه داوه ليا لعديان ولاد لحرام ....
سومية : اهاديك جمعي فمك عندك راكي وليتي ديال راجل دابا راه ما كين لا بحال خويا لا بحال با ما تعرفي غير راجلك و صلاة على النبي.....
هاجر جمعات الوقفة: شتيه ضرب بيا العقد ناااري مالكم سابقين البردعة قبل لحمار او سيد ما كمل تا شهر طلق و جاي ليا انا بشارف لخر 20 عام اصاحبتي وخا نكون مطلقة ما ديرو ليا هاد رمية...
سومية: الله يعطيك لعما لكنتي كتشوفي بدوك العنين شوفي سيد كيف داير لجا قدامك يحسبوك مو ماشي مراتو اودي خليني ساكتة ربي كيعطي لفول غير لي معندو دراس....
هاجر هزات حجبانها: هاي هاي على بنتي سومية يكما بغيتي نوصلها لخويا كمال ينفضك شوي و يسد ليك دوك العنين لي خرجو من طريق....
سومية خرجات هازة يديها حاطهم فوق راسها لي طبخاتو تقول واش كتقادة هاد هاجر....دخلات لصالون كضحك على ختها و كتقلب على تليفونها ما حسات الا و يد شداتها من لكول ديال لقميص من لور و جراتها هزاتها بحال شي خروف مكتنفنفش...
حليمة مخرجة عنيها كيخلعو: ياك ابنت لحرام احسن ما عندي صبغتيه ليا بالحنا دابا شنو ندير لمك واش نصلخ مك و لا نبيتك في سطح حدا البومة و لا نهز لمدلك و نبقى غير نشير بيه تا نرسلك لقبر....
هاحر جاها شلل فرجلين: وو والله مم ما كككنصحااابو ديييالك غغغير باان لي و هزززيتو لمييمة ما ضربنيش....
حليمة معصبة كديها و تجي بيها خلخداتها مزيات تا تلفاتها على لقبلة فين جات: و الله و متسكدي معايا في طريق و ديري عقلك يا تانحرك زعمتي نحرك نحير جمل و هاد راس لي كيدير ما بغا انهرسو ليك شي نهار بشاقور و نحطو ليماك قدام عنيك و نرجعو لبلاصتو نشوف هاد لعقل لي ما بغيتيش ديريه....
هاجر دايخة معرفاتش اش كتقول: الله يلعنها تراابي فيكم...حمرات فيها حليمة ..لا لا علينا غير شيطان كيزورني مرة مرة الله يلعن ترابينا ....
حليمة مقصحة شوفة و مخرجة عنيها : دوزي هزي دوك سطولة سيري مع ختك لحمام ...
هاجر.: يا دوك سطولة بداو يطلبو مني شرع كل سيمنة غدا بيهم لحمام قاعهم طاب ليهم بالما سخون واش انا ما عندي ما يدار نقابل غير كل نهار لحمام و ديك طيابة كرشها مدلية هزاة طون ديال شحمة فيهم لفيرجات تحنا عليا تفلعص ديلمي كاملة ...اختي ها دوش فدار راه لحمي درني بكترة الحكان و الحمام او.....
حليمة مبقاتش كتهضر بفمها نيشن هزات لمدلك هو لي يدوي في بلاصتها رجعات ليها لقاتها هزات سطولة و تكركبات مع دروج كطير لحمام....
حليمة: ايوا يا بنتي لا معودت ليك ترابي من لول راني ماشي حليمة مرات العسكري..طلات عليها من شرجم عيطات عليها تا هزات فيها راس... متعطليش دغيا خرجي بغيتك تبشي معايا لدهايبي....
حركات ليها راسها هزاة سطولاتها كتجر في رجليها و وجها مزال مزوق كتخلع و ممصوقاش هزة جلابة كيبانو ليها سيقانها بلقين بالبيوضة لي فيها و من لتحت حمرين بحال لبيبي لي يشوف رجلين يقول هنا نبات غير كيشوفو وجها لي مزوق كيطيح ليهم لما فركابي و يدربو دورة مخلوعين....
وصلات لعشية ناعسة فوق صداري في صالون كتلهت و كلها حمرة ملوية فوطة على شعرها و ختها دخلات هازة بنتها و حليمة من وراها جايبة كاس اتاي و حرشة لكاسكرروط...
سومية كتشوف هاجر لي مجبدة: بااز لوجهك يا ختي عاد جاتك سخفة دابا.....
حليمة كتكب اتاي:علاه مالها.....
سومية: انقولها ليك من اليوم حسن ليك بدلي لحمام هاد المسخوطة ليوم نوضاتها مع طيابة ديال لحمام بقا ليهم غير يترايشو....
حليمة حطات يديها على راسها و ساكتة ما عرفات ما تقول ليها رجعات شافت في سومية: ياك كنقولك حضي معاها و متخليهاش تنوض من حداك راها عافية كحلة فين ما بشات تشعلها....
سومية: من صباح و انا حاضية معاها غير دخلت لسخون تا كنسمع صداع خرجت لقيتها مشادة معاها بزز باش فكوهم لعيالات....
هاجر جمعات لوقفة كتسوط و تنش على وجها حناكها تنفخو و تزيرو قربو يطرطقو: هديك راه واحد لحكارة كتصحابني غادي نسكت ليها و الله لكانت ليها بلفقمة لخرا باين فيها غير كرشها لا فصالة لا زين....حطيت سطل يعمر و قدامي بلا حشمة بلا حية دفعاتو و دارت سطلها ما طلباتني ما والو و علاش غير حيت هديك لي كتعمر ليها و كتكسلها مخلصاها و نوبتها هي لولة زعمة حنا داخلين لحمام فابور نضت انا هزيت ليها سطل بعدتو و رجعت سطلي و هي ترجع كتعفر عليا كتصحاب اتخلعني بديك فورمة الفوقمة لي عندها عودات رجعات سطلها اوا انا ماشي من العاكزين هزيت رجلي تا لفوق و نا نعطيها لسطل هرست مو تم نيت و قلت ليها وا عمري دابا لا لقيتي فين و هي تبغي تشدني و نا زلق ليها و بقيت انا وياها كلمة منها و عشرة مني نوريها هاجر العسكري شكاتسوا.....
سومية و حليمة بقاو غير كيشوفو فيها ما عرفو ما يقولو...حليمة هزات كاس اتاي و كلمة وحدة لي خرجات من فمها: لا حول و لا قوة الا بالله فلي جاي...
واقفة قدام لمراية كتنشف شعرها و مها كتعيط ليها..
حليمة:هاااجر زربي خلاص قرب لعشا يودن و دهايبية ايسدو....
هاجر طفات شيشوار كتجمع شعرها: راه المحلات ديال دهب مكيسدوش مع لعشا غير صبري انلبس غير جلابة ديال سومية و نهبط عندك....
بزربة طلات على صاك ختها لي فيه لمكياج هزات منو كريم دهنات بيه وجها و دارت كلوز غوز خفيف مكيبانش لفمها...عكسات راسها بزيف كحل و لبسات جلابة ديال ختها بشيبي مخيطة بالعقيق و داخل فيها دهبي و دارت معاهم سندالة عالية بي الاسود كلشي ديال ختها لبساتو و قدات حالتها عاد خرجات كتعوج عاجبها راسها و غير كضحك و سومية غير كتشوف فيها...
سومية: دوزي ابنتي دوزي ديك جلابة يالله خيطتها انا و مزال ملبستها عاد صباح جتها من الخياط ....
هاجر طارت عليها بي بوسة كبيرة لحنك: اوا بصحتي و راحتي احبيبتي نتي تخيطي و انا نلبس اصلا جات معايا انقول لجواد يدور معايا نبشي نخيط شي وحدة بحالها....
سومية: نيت هما لي اتولي تلبسي زيدي بعدا نهبطو خلينا حليمة لتحت بوحدها.....
هبطات عند مها كضحك دورات يدها على دراع ختها و حيت لابسة العالي خافت تكربع هادشي علاش شدات فيها شدات لعمى في ضلمة ....
وصلو لقيصاريات كبار دخلو في وحدة كيدورو عنيهم ..شافت في هاجر: عجباتك شي حاجة هنا...
هاجر: صراحة لا ديكور ديالهم معجبنيش لكن علاش كتسولي ..ضحكات من لودن تا لودن...اتاخدي ليا شي سنسلة ا حليمتي ياك الحب ديالي....
حليمة جابت ليها ضحك: اييه ليك غير ختاري ليا مع راسك باك من البارح و هو كيحلف عليا منبزز عليك تا حاجة قالك بنتي تختار لي بغات اوا دوزي شوفي لي عجبك.....
هاجر: اوا يالله نخرجو من هنا و نبشيو لدوك لمحلات لخرين فيهم ديكورات غزالين و من نفس الماركة كتجيب ليا خالتي....
خرجو غادين في طريق تا بانت لسومية سمية عاد عرفات مولاهم...
سومية: اييه كتهضري على دياول عصام....
حليمة: فكرتوني بعدا داك الولد فاش خدام انا غير سمعتو من عائلة كبيرة و بتلفة و الله ما قدرنا نسولوه و خالتك قالت خدام بدراعو واش دهايبي ....
سومية جاتها ضحكة: شمن دهايبي يا ماما هداك راه شااابع فلوس يا لالة و عرفتي دوك القيصاريات دياول دهب لي قدامنا كاملين دياولو و شوفي غير لمحلات و ديكور ديالهم من برا اما من لدخلي اتلفي داك شي بناسو و كل واحد كيوقف معاك و يعاونك في الاختيار و كيعطيو ثمن مناسب مكيسروقش بنادم و زيد عندهم داكشي غالي....
حليمة حالة فمها كتشوف في هاجر: الله الله يا ربي و بمن تزوجات البقرة و قالك مبغاتوش ...لله يعطيك لعما راه نيت فيك من مكتشوفيش هاد زين كامل و زيد بخيرو العوجة...
هاجر: دابا واش انبقاو نتعايرو في زنقة هبالنا نخليوه فدارنا تا نبشيو ليها و نوليو ثيران حنا كاع واحد ينطح لخر و زيد راني قلت ليكم اول واحد ايجي انتزوجو و خا كون جا شمكار بنفسو انقبل بيه...
سومية: اوا زهرك احبيبة جاك سي عصام بن جلول شخصياً ....
دخلو القيصارية رحب بيهم واحد واقف في لباب كيبقا معاهم تا كيدخلو لداخل عاد كيرجع لبلاصتو....
بشاو جيهة دياول لبراسليات لقاو غير من 10000 درهم لفوق....
هاجر: بشاااخ يا مي هادا كيضرب ضربة صحية...
حليمة : هادشي مجهد و غالي ماشي منا... يا بنتي و فين جايباني انا راه هازة غير مليون في جيبي و لكان غير براسلي عادي و يدير هاد تمن راه بزااف...
هاجر شافت فداكشي و دارت راسها معجبها والو مبغاتش تحرج مها و تلصق على حاجة غالية عليهم بزاف: امممم اصلا مزوينش هادشي صراحة غير لغلا بلا ربح يالله نرجعو لداك راجل لي دخلنا عندو لول عندو داكشي زوين حسن من هنا....
سومية: ولكن قلتي عندو داكشي ديال شارفات معجبكش...
هاجر:و الله و ما شرفات و لا هاد زدحة و زيد معجبني والو غير خلينا نخرجو ....
لصقات في مها خارجين و مها كتشوف فيها بطرف عين عرفاتها عجبوها و مبغاتش تلسق..يالله ايخرجو و هما يسمعو صوت من وراهم......
-هاجر....
دورات راسها بشوي تشوف شكون و هي تصدم و قالت اسمو لمرة تانية بلا ما تحس كأن اسمو مغلل ليها مع دم : عصااام....
واقف لفوق مع شي كليان مهم في شركة ديالو و جايب معاها تصاميم لمجوهرات جديدة عاد ايخرجو في سوق...
جلس في لكرسي داير رجل فوق رجل و مشبك يديه كيشوف في تصاميم و عاقد حجبانو ..تحقق منهم مزيان و تأكد عاد و قع على العقد لي اتربطو بشركة هندية لي اتزودو بالذهب لكافي ...حرك راسو لمساعد ديالو يهبط مع ناس تال لتحت و هو بقا لفوق كيعاود يبحث في تصاميم ...
حس براسو تزير عليه بزاف و خاصو د
ضروري الكافين و يكمي ..جمع لوقفة خلا تجاكيط ديالو فوق لكرسي و هبط لتحت داير يدو في جيبو لابس سروال توب بي ازرق مغلوق و قاميجة هاز ليها كمايمها و حال صدايف تلاتة الفوقانين....هابط كيف ديما مخنزر ما كيهضر ما كيتكلم غادي لجهة ديال طونوبيلتو لي خلا فيها باكية لكارو كيف هبط و هو يسمع صوتها جا ليه نيشن في ودنو هز راسو كيشوف و هي تباني ليت قدامو بجلابة بلا ميتردد ولو لحضة عيط عليها....
عصام : هاجر....
دارت عندو حالة فمها:عصاااام...
هبط عينو فيها و طلعها دار ليها سكانير مزيان هي زوينة و زادها سر لحمام اما البلدي جاب ليها تمام و رجعاها واعرة و بعقلها....قرب ليها...
عصام عاقد حجبانو: شنو كديري هنا...
هاجر جاتها الحشمة هي اصلا مع لغريب كطيح عليها الحشمة من عند الله: غير جيت مع ماما و صافي....
دور عينو لجهة حليمة لي كانت بعيدة واقفة في لباب حرك ليها راسو و شد في يد هاجر و جرها معاه تال عند حليمة باسها في راسها و حرك راسو لسومية ...
حليمة: الله يرضي عليك اولدي و سمح لينا عطلناك على خدمتك اصلا كنا خارجين...
عصام يدو مشابكة مع يد هاجر ما فلتهاش : نتوما سبق ليا من خدمتي..حط يدو على ضهرها بلا كلمة جرها تا هي دخلها لداخل وجار تا هاجر بقات غير سومية حالة فمها تابعاهم من لور..طلعهم عندو لفوق جلسو فوق الفوطوي ..و هو جلس حداه هاحر لي جاها صمك و تزيزنات ...
حليمة كضحك ليه : ما عندك علاش تعدب راسك ا ولدي...
عصام لي زوين و خايب فيه في نفس الو قت هو انه كيدخل نيشن في لموضوع معندوش مع زواق: حنا دابا و لينا عائلة وحدة الالة حليمة و هاجر اتولي مراتي و من مسؤوليتي و هي اولا من كلشي ....
حليمة: هادا لمضمون فيك اولد لحلال كنا غير جينا نختارو ليها شي براسليات و لكن دارت مناقص و قلنا نعاودو نرجعو مرة خرا...
حيد يدو من يديها و دورها ورا ضهرها حنحن بشوي حدا ودنها عاد هزات فيه عنيها و غالباها لحشمة... دخلو شي بنات كل وحدة هازة بواطة حمرة فيها كوليي ديال دهب بكلشي ليه بي براسلي و لحلقات و سنسلة و كل بواطة فيها تصميم خاص..حطوهم كلهم قدامها سبعة دياول لكولي
عصام كيهضر بشوي و عينو في عنيها: هادو دياولك ختاريتهم بنفسي و لكن معارفش دوق ديالك لمعجبوكش وصفي دوقك لهاد لبنات و هما ايتصرفو...
بقات كتشوف فيه و كترمش بزربة ما فهمات والو هضرتو دازت من ودن و خرجات من لخرا....
دورات عنيها في مها لي تا هي غير كتشوف في لبواطات لي قدامها اما سومية بقات غير كدور في عنيها....
حليمة : وبشحال هادشي اولدي...
عصام حط يدو على كثف هاجر و هبط بشوي مع دراعها تا وصل ليديها و شبك صباعو مع صباعها وزاد جرها ليه كثر: لالة حليمة هاجر ولات ديالي و اي حاجة كتخصها على حسابي مضربي حسبة لتاشي حاجة و ختارو على خاطركم....
خرج و خلاهم غير كيشوفو فيها و هي غير حالة فمها كيف ضبعة....
سومية : نااااري يا ختي هادشي مجهد بزاااف غير كي درتي ليها تا طيحتيه المسخوطة....
حليمة: سومية حشمي شوي راه ماشي فدارنا...
هاجر كتشوف في كوليي عجبوها بزااف: ايما ما كرهت ناخدهم كاملين غير حشمت ..انختار غير واحد..هزات بواطة...شوفو هادا لي فيه لحجر بي زرق شحال زوين و ستيل ديالو رقيق و كيتلبس مع اي حاجة.....
حليمة و سومية: صافي نختارو هادا....
حليمة: صراحة الله و الله تا حشمت منو
...
سومية:خلاص عليك اماما سيد حسبها ديالو و اتولي مراتو من لفوق راه عادي هادشي...
هاجر بقات غير كتشوف و ضحك عاجبها الحال غير وحدها مكرهاتش تجبد تليفون و تبقى تصور غير حشمات...دخل عصام حاط تليفون على ودنو قرب لعند حليمة و عطاها تليفون: هادي لوليدة بغات تهضر معاك...
خدات منو حليمة تليفون كتهضر مع لالة باقوت لي بززات عليها يجيو يتعشاو عندها ضروري و يعلمو نهار لخطبة ..حليمة ما لقات ما دير و هي توافق...
عصام جلس حد هاجر كيشوف فيها:ختاريتي...
هاجر كضحك و حنيكاتها مطبزين كيتهزو من كضحك:ختاريت هدا زوين بزاف ..شافت فيه ...و شكرا بزاف...
حرك راسو بشوي و باسها في راسها مع كلمات:كلشي ديالك....
جمع لوقفة لبس تجاكيط ديالو و شد ليها في يدبها و قفها معاه و حليمة عطاتو تليفون ..خلاهم يدوزو هما لولين قدامو عاد هو وراهم و هاجر ملاصقة معاها يدو في يديها مكيحيدهاش ..شاف في لخدام عندو....
عصام:جمعهم كاملين و رسلهم عندي لفيلا.....
ركب هاجر حداه و حليمة هي و سومية لور....نيشن شد طريق لفيلا ديالو ....عصام مرة مرة كيدور عينو لهاجر ..وهي مهبطة راسها و مشبكة يديها لوسط....هو تصرفاتو واضحين مكيخبيش و لكنتي عاجباه راه ايبين اعجابو ليك ولكن بطريقتو الخاصة و هو انه كيملكك كلك كتولي ديالو و تحت اسمو و في المقابل ايعطيك كل ما حلمتي بيه و كثر...
وصلو لفيلا لقاو لالة ياقوت كتسنا فيهم هي و اسماء لابسين قفطان و مستقبلبن خطيبت ولدهم بي حليب و تمر لحق يتقال الفرحة باينة في عنيهم و عاجباهم هاجر بزاف و وهي من كتحشم كتبقى غير ضحك بلا فرانات...جلسو في صالون لكبير لي مفرش فراش بلدي ....بقاو كيهضرو و يتعارفو مع بعض كثر و عصام كان طلع لفوق خلاهم يهضرو على خاطرهم ...هاجر جالسة وسط اسماء و الياقوت كيتعارفو على بعضهم ..تا هبط عندهم.. وقف في باب صالة....
عصام:هاجر اجي معايا بغيتك...
هاجر شافت فيه و شارت بي صبعها ليها:واش انا....
الياقوت:غير سيري معاه و شوفي فين اتسكني ابنتي ....
هاجر شافت في مها لكن عصام معطهاش فرصة حط يدو على يديها و جرها بشوي تا وقفات حداه دور يدو على خسرها و طلعها معاه لجناح ديالو.....
إنها زوجتي الجزء الثاني
محتوى القصة
التنقل بين الأجزاء