دخلات حشمانة كتعرق بوحدها ومزيرة مقادراش تشوف فالضياف .. لابسة قميص جوهرة مذهب وبليغة وطالقة شعرها على راحتو ومعاها سلوى حداها بابتسامة كتنخزها تسلم .. سلمات على الام الارملة وابتسمت فوجهها بملامحها الشاحبة من الحزن ورجعات جلسات بلاصتها في حين كملات اميرة السلام بخجل على الجميع ووصلات حتى لمحمد وهي تمد يدها شادة الضحكة وكتسمع سلوى كتهضر معاه وكيتناقشو على الخدمة والدراسة فحوار جماعي بعيدا على موضوع الخطبة . اش دارت فين قرات اشش خدات وفين وصلات وهوا كيهضر على المانيا .. البرد والتلج والشمش كتبان كي الكسوف مرة فشحال حتى تدخل عبد الاله بسلاسة وقال
- هي ولفتي دابا تما
حرك راسو وقال : شوية وصافي
عبد الاله: ايوا عشر سنين راه عمر ... ميمكنش متولفش
محمد : ضاروري كتولف ... ولاكن مكاينش بحال البلاد والعائلة .. الخدمة هي اللي شاداني تما
عبد الاله : اشمن نوع ديال الخدمة عندك؟
رد بهدوء: عندي ديبلوم هندسة ..قريت الدكتورة تما وخدمت مع الدولة
تصدمات اميرة وشافت فيه بنضرات غريبة وحتى هوا شاف فيها عادي كأنه مكاين حتى حاجة وشاف فباها وقال
- دابا الدولة ماشي بحال الخاص ... الدولة كتسهل ليك العيش ... كترجع بحالك بحال اي مواطن .. يمكن ليك تشري دار .. تاخد كريدي ... كترجع مواطن
سميرة: مزياان مزيان .. الدولة حسن ... خديتي الجنسية يمكن؟
حرك راسو بالايجاب : خديتها هادي ربع سنين تقريبا
عبد الاله: بابتسامة ) ايوا ودرتي دارك صافي ستقريتي تما
قالت الام ديالو بهدوء : دااار الدار .. ودار الوراق ديالو ... واخا دااازت علينا قبل ميدير هادشي .. حنى حاجة مكتجي بالساهل ( تنهدات ) ... بقا خاصو غير يدير وليداتو مع بنت الناس اللي بغا ... راه ماعندوش الوقت .. ومللي قال بغا يخطب قلنا مافيها باس
تدخلات عمتها بالنصائح دايرة راسها هي مولات العقل
- كن غير رتاحيتي بعدا راه فاش كيمشي عليك العزيز عليك مكتقدري كاع تفرحي ..
شاف فيها محمد من تحت لتحت وخزر فيها ورجع هبط عينيه .. لمحاتو سلوى وقالت بصوت خافت لأميرة
- ناريييي على شوفات دار فيها تاهيا مكتسكتش تفو
قالت الام: مااااشي مشكل ... البكا فالقلب واللي مشا مكيرجعش.. (تنهدات بأسى وحزن شديد كتنخصص حتى تغرغرو عينيها ) بغا يخطب مافيها باس ... ماعندوش الوقت .. حتى لموت ديال باه محضرش ليه و كان يقول ليه تجي نزوجك و..
قاطعاتها بكية وهزات طرف ديال زيف الابيض اللي دايرة وزيرات بيه عينيها كتبكي .. كلشي تأثر و ولادها بجوج حدرو الراس .. اما اميرة ماشعراتش براسها حتى ناضت عندها جلسات حداها كتبكي معاها وكدوز يديها على ضهرها وباست ليها راسها وقالت
- سمحي ليا اخالتي الى جبناك فهاد الوقت والله ماقصدنا .
تنهد عبد الاله وتقاد فالجلسة : ايوا شغانقول ليكم ... انا المهم يتهلا ليا فبنتي ... راه حتى هي دريييوشة ما فيها لاصدع لا مشاكيل ... متسمعوش حسها كاع . تربية يدي الله يرضي عليها عمرها حشماتني وديما رافعة راسي ... ايوا مللي هي بغااتو ... منقدرش نقول ليها انا لا ... الله يكمل بلخير ... انا عندي يتهلا فيها ومتشكيش ليا منو هادا ماكان .. راه عزيزة عليا بزز باش جبتها من فرنسا وغادي نعطيها ليك غير بزز مني
قالت الام : ماتحتاااااجش توصي اسي عبد الاله ... راه مغتلقاش حتى هي حسن من محمد ....
تدخلات حنان : والله ماتلقا حسن منو وباا متوصي عليها راك عطيتيها وعرفتي لمن عطيتها .. سي محمد معقووول .. ما جا يخطب تاني مرة حتى راه باغيها فعلا وغيدير جهدو وكتر من جهدو باش يسعدها ... حتى حاجة متخصها معاه ..غير تآمر وكلشي يحضر .. راه عطا من لقليل حسبلاك دابا اللي استقر راه تعيش اميرة نيت خههه
امااا واحد مرت الخياط كما ملقبو محمد ... كتسمع وباغا طرطق... اشكون هادي فملك الله اللي يديرو عليها هادشي كامل وكيطلبو ويرغبو كاملين .. اما اميرة غير جالسة ساكتة فرحانة وشادة لعكوزتها فيدها وتمررها برفق فكل مرة ، هزو يديهم اخيرا يقراو الفاتحة بلا زغاريت بلا حس احتراما لموت الاب ولمشاعر الام . ترخات حنان وخدات راحتها عندهم فالدار وتأقلمات معاهم ومع سلوى بسرعة وجرات معاها الطبلة الوسط بكل فرح وسرور ومشات شدات لاميرة فيديها وقالت بصوت خافت كضحك
- اجي الاللة لعروسة ... هابلاصتك هنا
جلساتها حدا محمد اللي معارفاش تعابير وجهه كاع كي دايرين ومكتشوفش كاع جيهتو .. كتلف بالهضرة مع اللي حداها وضحك مع كولشي .. لاكن عنقها مكيدورش لليسار ابدا . حطات حنان هي وسلوى وهما وسط الدار كيستفو البلاطو اللي يدخل .. الخواتم اللي خداو وقالت سلور بإعجاب وهي كتشوف الخاتم .. واحد ابيض وفيه الماسة مربعة كتشعل
سلوى: ومالكي ياختي ياك كتعرفيه ماشي جا على غفلة مافهمتش
اميرة : راه اخر مرة درت ليه واحد الشوهة فالقهوى ونزلت عليه بالصاك ودفعت الطبلة حتى تقلبات ... كولشي تفرج فينا .. ولاكن راه ف.ق.ص.نيييييي .... فقصني بمعنة الكلمة ... مشعرتش كاع بشنو درت ... وزايدون راه كنت كنعرفو فالصغر ... ودازت 10 سنين راه مشا اللي مشا وجا اللي جا ونسا اللي نسا ماشي شهر ولا شهراين ... راه عشر سنين ماشفتو فيها .... كنحس دابا بواحد الاحساس غريب بحال الى يالاه عرفتو او غنبغيه من جديد ... الصغر راه فشكل . ودابا فشكل
سلوى: جاني ترزن والله واعلم
دورات اميرة راسها : حتى مانكونش عارفاه ... يترزن حتى يعيا وفاش كيطلع ليه الدم مكتبقا لارزانة لا عقل .. شتي محمد ... انا عرفت طبعو مللي كنا براهش ... وحللت شخصيتو والطبع مكيتبدلش... شتي هوا مكيجبد حتى واحد ومكيبغيش العيب وكيبعد من المشاكل حيت عارف راسو الى تحط امام الامر الواقع مغيرضاش وتوقعي منو اي حاجة .. هادا علاش كيبعد على الصدع لملاحتو هوا بالدرجة الاولى .. يبعد منو غير بنادم ... يعطيوه غير تيساع يخليوه يعوم بحرو هادشي اللي باغي ومكيتدخل فحتى واحد واخا يكون شكون ما كان ... ماتسنايش منو نصيحة حيت ميعرفش ينصحك ولا حتى كفاش يوصلها ليك ومانصح تا راسو بعدا ... وماتسنايش منو يعاتبك ولا ينكر عليك ... عايش بحال الى مامعاه حتى واحد .. وكيغضب
ضحكات سلوى: كيغضب هههه
اميرة : اااه كان كيغضب عليا . كيتسناني انا نحزرو ... وكيغضااااااب ويطول حساب ليك كينسا هه! وبوحاطي شحال فيه ديال تبوووحيط ناااري
اميرة: وايه بوحاطي كان الى غير مرض برواح كيعيط ليا يقول ليا راني كنمووووووت .... كنمووووت احبيبة ... كيتبوحط باش نعطيه الاهتمام ... الى فاق غير داخ من النعاس كيجي يقول ليا طاح ليا سكر ... طاحت ليا سنيدة ... مريض ... فيا السخانة ... فيا الموت قيسيني كي طايب هههه ماعرفت واش باقيين فيه هاد الخصايل ولا تاب
سلوى: يتوب !! نتي تبتي ؟ تبتي نتي باش يتوب هوا ... كيدير فيك الويل ويجي يقول ليك جوج كلمات كترجي طيري .. مابغيتيش توبي .. ولاكن اللي فات مات صافي وتخطبتو ... اجي علاش كدب على بابا قال ليه عندو ديبلوم هندسة خدام بيها مع الدولة
اميرة: يمكن مافراس حتى واحد فاش خدام واصلا الخدمة ديالو فيها لو غيسيك مخاص يعرفو حتى واحد اش كيدير ... وهوا من النوع اللي كيسكت مكيعاودش اسرارو للعالم مللي كان باقي برهوش... دابا نسولو على هاد القضية
قاطعها: لااالا عادي سولاتني غير واش هضرتي معاها نتا قلت ليها اه هضرت معاها . وراها كتفهم ماشي باقا صغيرة عااارفاني مغنقولش ليها يالاه حتى تكونو نتوما قابلين .
اميرة : الله يخليها ليك
محمد : امين
اميرة: حتى لشي مرة وديني عندها نبقا نشوفها
محمد : مرحبا بيك فاي وقت حتى هي غيعجبهااا الحال تجي تشوفيها . المهم مارعفتش اش كنت باغي نقول ليك ونسيت ... اااه القضية ديال الخدمة فاش خدام ... خليها بيناتنا اك
اميرة : حتى انا كنت غنسولك على هاد القضية
محمد: مهم حتى الواليدة وخوتي راه معارفينش فاش خدام من غير حنان وراجلها ... راك عارفة القضية شوية مزيرة وانا مغريبي يقدرو يلفقو ليا تهمة تجسس ولا شي حاجة بحال هاكا الله يستر فهمتيني شنو بغيت نقول ليك .. راه حنا عندنا شي حاضي شي وخصوصا انا ..راه فاش كيعرفوني جاي للمغرب كيحضيو معايا فمي البلان
اميرة : اه اه فهمت ماشي مشكل صافي غير كون هاني من هاد الناحية
محمد: غندفعهم ليهم للخدمة باش يعرفوك .. غيقلبو غليك ويبحتو عاد يعطيوني لأوكي ... كيتعطل هاد المرض
اميرة: يعني العقد مزاال مغنديروه
محمد: غيتعطل شوية ومزال غتجي عندك وحدة من تما تلاقا بيك وغتبدا تسولك حيت هادي هي خدمتها . غتجمع عليك شوية ديال المعلومات وتمشي بحالها .. نتي ماتخافي ما والو غتجمع معاك شوية وصافي وجاوبيها عادي .
اميرة : اويييلي واش هادا زواج ولا جريمة قتل ! هادشي فيه لونكيط وغيجيو عندي من تما كاع ! خلعتيني والله
ضحك وقال : الاااا راه عادي اي واحد فينا كيبغي يتزوج كيسيفطو موراه
تنهدات : وهادشي شحال كياخد ديال الوقت؟ بزاااف!
ساط وقال: كياااااخد الوقت ...حيت غنديرو عقد هنا وعقد لهيه ...ضاروري نديرو عقد تما سينو غيحسبوك صاحبتي ماشي مرتي
اميرة : شحال كاع كياخد هادشي ديال الوقت؟!
محمد : وا شغاادي نقول ليك ... كياخد الوقت .. كيوصل حتى لعام ... عاماين .. كاين كيتعطل بين الوراق و باش يردو عليه ... كتوصل حتى لثلات سنين ولا ربع سنين عاد كيتوزوج قانونيا
محمد : ايوا شغادي نديرو مكاينش شي حل اخر ... راه مكاينش غير انا راه بزاااف اللي دافعين الطلب وكيتسناو ... ماشي ساهل باش نجي ونتزوج وانا فهاد الخدمة راه ميقبلو ليك حتى تشرف وكاين اللي كيتعطلو عليه فالاخير كيرفضو ليه ...
قالت باحباط : هييه يرفضو !!!!
محمد: وماعندو مايدير مسكين ... الى شافو عليها غير نبشة راه ميقبلوش ليه خصوصا اللي من بلدان اخرى ....تشنشييط والى رفضو ليك ماعندك مادير مكيتعاودش الطلب يتقبل وممنوع تخرج من الخدمة حيت عندك اسرار الدولة مكتبقاش حر فختياراتك و مكيطلقوكش مكاينش تخرج الى الى كان عندك شي عذر قاطع بحال شي فيروس معدي خطير ولا تسطيتي .. شي حاجة اخرى لا
اميرة : وشداك نتا تدخل ليها من الاول كااع مللي نتا عارف فيها هاد تجرجير هادا كامل ؟ اويييلي على يرفضو الطلب ! (شدات حنكها)
محمد : دخلت حيت فيها بزاف ديال لحوايج اخرين زوينين ... مواطنين عندهم وكيحلمو يدخلو ليها بقا غير واحد اللي من قنت اخر .
اميرة : انا مابان ليا مزية فيها!
ضحك وقال: نتي مابانش ليك .. اما انا كيبان ليا ... واش عارفة شحال البوسط اللي شاد انا والصالير ديالو ولالا ؟ وميغطلقونيش اصلا حيت شاد ليهم بوسط مهم ماشي شي واحد عادي خدام تما وحتى السلطة كتعطا ليك ... قانونيا الى بغيتي شي حاجة كتوجد ... كتعطا ليك دار بلا دارك و كارط كتمشي وتجي فالطيارة فابور لأي بلاصة بغيتي واوتيل على حسابهم وكتقري ولادك فالمدارس الواعرة على حسبهم... كولشي على حسب الدولة نتا مكتحط تا ريال الصالير ديالك خليه يخناز ههه
اميرة: اااي هاااي هااي
محمد: ماشي كلشي ... غير اللي شادين بوسط مهم راه داكشي فيه وفيه ... وبيان سيغ انا من هادوك اللي مكيشدو حتى ريال من هادشي ههههه
اميرة : لا عندي مشكل ... انا هاد الزواج هادا جاني فشكل ماشي حتى لهيه
تنهد وقال: المهم خلي حتى لغدا ونهضرو فهادشي.. حيت بزاااف ديال الحوايج مزال خاصك تعرفيهم ومنهم الموت ديال الواليد الله يرحمموو ...ميصلاح ليا ندير حتى حاجة على الاقل حتى يدوزز واحد العام بعدا
تنهدات وقالت باحباط : انا ماعنديش مشكل ... اصلا انا يالاه فتحت العيادة ديالي فكازا وناوية نستقر تما ... كي هاد العام كي لعام الجاي مامزروباش
محمد: انا غدا نتلاقاك وديك الساعة نهضرو .. اوك ؟
اميرة : اوك
محمد : يالاه بون وي
اميرة: بون وي
قطعات معاجبهاش الحال وماعجباتهاش حتى الطريقة باش هضر معاها ... كان خاصو يكون طاير بالفرحة لانه اخيرا خطبها ويدير المستحيل باش يتزووج بيها فأقرب وقت ماشي مبرد ماعندوش مشكل واخا يتعطل ... تزيرات مارضاتش حسات براسها بحال الى شايطة و لاسقة فيه وعيطات لسلوى كتشكي عليها والاخيرة حتى هي دايرة يدها على خدها كتخمم
اميرة : ماحملتش راسي . انا اللي فقلبي على وجهي مكنافقش بيت ليه باللي باغا غير فوقاش نتزوج وزربانة فيا العافية ... وزاد كملها مابغاش يتجمع معايا كيما كان كيدير ... انا كنهضر معاه وهوا كيقول ليا حتى لغدا ونهضرو ... هاكا كان حتى فاش تلاقيتو فالقهوى ديك المرة ... مابين لياش باللي توحشني ... ومساخيش بيا .. حتى الفرحة ديال الخطوبة مابينهاش ... زعما راه تجرجر باش وصل ليا وخطبني خاصو يكون فرحان مساخيش يقطع ... هوا دغيا قال ليا بون وي وقطع قبل منحيد تيليفون من ودني
مالقات سلوى ماتقول ليها وبقات ساكتة حتى هي مافاهمة حتى حاجة .
صبح الحال وناضت لبسات سروال واسع بارد وكيمونو ديالو طويل محلول تحت منو ديباردور ابيض وصندالة مريحة وطلقات شعرها مع بارفان ومكياج خفيف وهزات صاكها وتاصلات بيه ... كتصوني وتعاود وتصوني وتعاود حتى عصبها عاد جاوب وفتح الخط ورد بصوت تقيل
- الو
اميرة: الو ...سي محمد
محمد : وي حبيبة
اميرة: باقي ناعس؟!!! انا رراه غنمشي لكازا واش مغتمشيش؟
قطعات وجلسات معصبة كتسوط فالطموبيل وتسنا وكل شوية تعيط ليه
اميرة: الو واش باقي معطل ؟
محمد: لا انا فطريق عندك قريب ليك
اميرة : وااخا يالاه بسلامة
قطعات حتى وصل عندها كلاكصونا عليها من سيارة كحل كاط كاط ونزلات عندو بابتسامة واخل مقلقة من تصرافتو.. حلات الباب بانوثة وهوا جالس مد وجهه سلم عليها كيضحك معاها داير نضارات ولابس تيشورط كحلة وسرووال وريحة نعام اس
اميرة : نمشيو فطموبيلتي ؟
محمد: صافي بحال بحال يالاه المهم غادين بجوج
ديمارا السيارة وهي ساكتة كتشوف قدامها وهوا كيهضر فتيليفون مع شي صاحبو مابغاش يقطع ... نص الطريق وهوا كيهضر وهي كتسوط وتشوف فالجنب وتنهد حتى قطع وشافت فيه بابتسامة وقالت
- صاحبك ؟
رد عليها وهوا كيقلب فتيلي : وي ... بغا نسيفط ليه شي حاجة ...
شد تيليفون مابغاش يطلقو وهي كتفرك صبعانها مع بعضياتهم ... فين هوا محمد اللي كتعرف ؟ الضحك والتقشاب مكيخليهاش تجلس فخاطرها وكيسمح فكلشي ويعطيها كتر من وقتها ... حسات براسها مامرتاحاش كأنها مكتعرفوش وماهضراتش حتى وصلو لكازا وتلفت عندها قال كيشوف فملامح وجهها بابتسامة واعجاب
- فطرتي ولا مزال؟
زفرات وهي كتشوف قدامها وكضحك بزز منها وقالت
- باقي
قلب المقود ورجع بسرعة اللور كيشوف افالمراية اللي حداه وقال
- يالاه نمشيو نفطرو عاد نشوفو شنو نديرو
وقف حدا مقهى كبير راقي ونزلات معبسة . . . شاف فيها بابتسامة وشد ليها فيدها ودخلو جلسو فقهوى راقية فيها عائلات كييفطرو واصدقاء مجمعين ، جلسات ساكتة وحشمانة كأنها مكتعرفوش .. مل مرة كيفاجئها بردة فعل جديد .. جلسات كدور فعينيها متوثرة نقطة ديال الراحة مالقاتهاش .. مرة تفتف على شعرها مرة تقاد حوايجها ... ماعرفاتش مضهرها واش مقاد قدامو ولالا ... التقة فالفنفس القوية اللي عندها فقداتها قدامو .. بدات غير كتشوف فجنابها وتسول راسها ... واش مابقيتش كنعجبو ؟ واش خيابيت ؟ كان كيتصورني يمكن نكون حسن من هاكا ... واش ماتارت انتباهو حتى حاجة فيا ؟؟.. يمكن هملات راسها .. واللي لقاتها كتلبسها ..قالت السيد صافي كيبغيني واخا نخرج معاها بخنشة ماشي مشكل .. ماحسابش ليها غتلقا هاد التغيير ... التغيير اللي بان ليها من اول مرة تلاقات بيه فمقهى .. نقولو ديك المرة كان السبب هوا المششاكل ومالقا كفاش يدير يفسر ليها داكشي علاش تصرف بديك الطريقة حتى تفقصات ... ايوا هاد المرة مالو ؟ مالو مابقاش كما كان ! راه اميرة اللي جالسة معاه زعما حب حياتو ماشي شي وحدة برانية !
بقات تخمم وادي وتجيب .. تنهدات وهزات عينها فيه لقاتو مربع يديه على الطبلة وكيشوووف فيها بابتسامة ... تصمرات وزاد ارتباكها وقالت
- مالك ؟
قال بهدوء: فاش كتفكري؟
اميرة : انا هه! لا مكنفكر فحتى حاجة
قال بنفس الهدوء: وفاش ساهية؟
تنهدات عير سهيت شوية وصافي
دورات راسها كتشوف فجهة اخرى حتى حسات بيه شد ليها فيدها وكيتلمها برفق
بدات كتقلب الصفحات وتشوف فيهم وخلات ليه يدها شاد فيها ... عجباتها ديك الحركة منو وبدات كترتاح ليه شوية ... هزات عينيها فرحانة وطلبات الفطور اللي بغات وهوا كذلك .. عم الصمت مرة اخرى كل واحد فين كيشوف وحيد يدو على يدها حركها فاتجاه اخر بعفوية .. جمعات يدها عندها وكتقلب على شي موضوع تجبدو وقالت بلطافة وهي كتشير بيدها جيهت حاجبو اللي فيه شرطة وعلامات الغراز صغار ضاربة ليه الحاجب من الطرف وقالت
- بقات فيك ديك العلامة ؟؟ ماحيدتيهاش
حط يدو على فوق حاجبو وقال: ااه هادي هه
اميرة : بقا ليك لاطراس فيها ... مافكرتيش تحيدها
هز حاجبو بابتسامة كيشوف فيها ويتأمل وقال
- علاش خيباتني؟
حركات راسها: لا بلعكس .. غير سولتك
محمد : صافي خليها واش انا مرا نبقا نحيد و نمسح ... ولفتها دابا
قال بابتسامة: سولاتي الواليدة واحد الخطرة قالت ليا واش باقي دري صغير كضرب حاجبك كي لبراهش باش تبان زوين هه... قلت ليها راه ضربة هاديك مابقاش كينوض فيها الشعر
اميرة: اصلا دابا ولفتك بديك الضريبة ... ميمكنش تكون نتا بلا ديك الضريبة ههه
ابتسام وقال : وشكون سبابها ؟
ضحكات وقالت: مااااانعرف
حرك راسو : مانعرف !!
قاطع حوراهم الفطور اللي تحط وشافت فيه بابتسامة وبدات تفطر بأدب وهما كيتناقشو على موضوع العيادة حتى سالات وناضو بجوج ... هي ركبات فالسيارة وهوا بقا برا كيهضر فتيليفون وكيكمي ومطلع عليها الزاج ... شكات فيه علاش مطلع الزاج واش مابغاهاش تسمع وهي تهبطوو .. تلفت عندها حاط تيلي فودنو وكيشير ليها جيهة النيف زعما غدخل عليها الريحة وفنفس الوقت كيهضر .. صدق كيهضر مع شي طبيب على راديو ديال مو وتحاليل هاد بردات وطلعات الزاج حتى سالا الهضرة ولاح الكارو زطم عليه وطلع حداها قال
- طلعت عليك الزاج باش مدخلش عليك ريحة الكارو
اميرة: ماشي مشكل
جبد ريحة زوينة رشها هنا ولهيه وعليه بعفوية وردها بلاصتها ومشا هو وياها كيهضرو على الرخصة . قضات غرض الرخصة وطلعات فالسيارة معاه وقالت
- صافي تهنيت ... غنمشي دابا للدار
قال بهدوء: غنرجعو لمكناس ياك
قالت بابتسامة : لا مغنمشي غنبقا هنا .. باش غدا نمشي للعيادة نشوف شنو مزال خاص
تلفت باسغراب وقال: كفاش! ... غتبقاي هنا مغنرجعيش معايا؟
اميرة : عندي داري هنا علاش غنمشي ونجي
حرك راسو وقال بهدوء : اوك... ماشي مشكل ... غنشد شي اوتيل هنا حتى نرجع انا وياك ... ولاكن مزال الحال علاش بغيتي تمشي دابا؟
اميرة : عندي شي شغل نقضيه ضاروري
تلفت شاف فيها ولاح يدو على لكوسان ديالها وكل مرة يتأملها وقال
- بحالاش هاد الشغل؟
اميرة : شي شغل فدار وصافي
ابتاسم كيتأمل ملامح وجهها و وهوا كيلعب فشعرها وقال
- نتعشاو اونسومبل ؟
اميرة: واخا ... الى ساليت بكري
ابتاسم وشاف قدامو كيحرك السيارة وقال
- فنفس لغيزيدونص اللي تشاوفنا فييها ديك المرة ياك
حركات راسها : امم
داها مباشرة للدار وهزات صاكها وسلمات عليه بوجهها وبغات تنزل
محمد: يالاه ... نشوفك بالليل
ردت بابتسامة : نشاء الله
نزلات بسرعة ودخلات للعمارة نيشان للاسانسور ويدها على صدرها كتنفس ... لقات راسها قدام المراية وبدات تحدق فوجهها وشعرها ... الصباغة بدات تهبط ليها حيت كانت زعرات شعرها كتر من اشقر غامق لاشقر فاتح . شافت مكياجها وحوايجها وشمأزات منهم .. بسيف ما يعطيني النخال .. من حقو .. وانا حالتي بحال هاكا مالي عليها
مشات نيشان للدار حيدات حوايجها ولبسات واحد القندورة خفيفة وكلاكيطة وهزات حوايجها ومشات دور بالحالة باش تير الانتباه وتجدبو
شدات طاكسي نيشان لواحد الصالون كبير زبونة عندهم هي وسلوى ودخلات نيشان هازة موزيطها للحمام بلا مينعتوه ليها ولا تسول شي واحد .. لاخت السلام ومشات مباشرة كطرطق فكلاكيطتها ودخلات دوشات وكتوصي يحكو ليها مزيان حتى تغبر هي كاع ماعندهاش مشكل المهم تبان بأي طريقة . تبعات ليه واحد سوان للوجه وكل شوية تشوف واش بان الضوء ولالا ولقاتهم كيديرو توريد الشفايف تقنية جديدة دخلوها... قتارحو عليها تجرب وتاهي ماعطلاتهمش .. غير ششافت التصاور عطاتهم شنايفها وردوهم ليها وتنفخو ليها فديك اللحضة بانت كأنها نافخاهم لان الاآلة اللي كتورد كتنفخ ... عجبوها وبردات .. اخيرا بان التغيير ... شنايف يحلف عليهم الواحد حتى دايرة ليهم كلوز وردي .. رجعات دور دور وتشوف راسها فرحانة .. البشرة نقية وشنايف تبدلو رجعو اكثر اثارة وبدات تسول حتى على توريد الخدود .. وحتى هما شكروه ليها وعطاتهم حناكها وردوهم ليها بطريقة كيبانو طبيعين .. داكشي اللي كانت كتقلب عليه لقاتو .. عشقات راسها وفرحات ... بعدا بعدا حتى الى مسحات المكياج قدامو تبان كيوت وداكشي طبيعي من عند الله .
مشات بالات بالشعر حيدو ليها ديك الروينة بدلو ليها الستيل وقادو ليها الشعر وتوحد ليها اللون الاشقر .. فالضو كيبان مرة زهري كيتموج او رمادي كل مرة يعطي ضوء فشكل ولون نضيف جامعاها .. خرجات من تما كشتعل الرجلين حومر ومصبوغين واليدين ويديها حومر بلاسيغ والحمام .. وقفات حدا باب الصالون كتسنا الطاكسي تبان واللي داز حداها بشي طموبيل كيشوهها مكيبغيش يتقلع ويبدا يصوني ويكلاكصونيو ولا ينزلو حتى كتهرب لداخل الصالون . اخيرا ركبات فطاكسي داخا للدار دارت تقاشر وبالغينة ولاحت عليها جلابة ومشات نيشان كتقلب فالمحلات لكبار على شي لبسة تليق بيها ... عيات دور حتى عيات ومشات للمول تما لقات اختياراتها وداكشي اللي بغات وشرات كلشي جديد من الراس للرجلين باش تخرج مرتاحة وفأبهى حلة يعجبها راسها وحتى الى تكبرات عليه تا هي جات معاها .
رجعات للدار بسرعة ودارت تيليفون يتشارجا وشعلاتو ... يالاه شعل جاها اتصال منو وردات بسرعة
اميرة : الو
محمد : مال تيليفونك طافي؟؟؟!!!
اميرة : ديشارجا ليا
محمد : من قبيييلا زعما وهوا مديشارجي ؟!
اميرة : كنت كندوش
محمد : اممم.
اميرة : جاي ؟
محمد : شوية وغنجي ... ديك ل 11 بحال هاكاك
اميرة : اوك .
قطع ومشات وقفات قدام المراية باغا دير تحدي المكياج معاه وشافت فعينيها بنضرة خبيثة وات تقاد شعرها
رن الهاتف وهزات جاوبات بصوت هادىء وابتسامة
- الو وي
رد عليها بهدوء : انا لتحت احبيبة هبطي
اميرة : واخا انا جايا
قطعات وشافت راسها فالمراية .. لابسة كومبينيزو اسود انيق سروالو كلاص وكتافو هابطين من جناب بالدونتيل معرس لكتيفات واحمر شفاه حمر مع عيون مكحلة ومكياج خفيف .. رشات بارفان هادئة وهزات محفضة صغيرة وحداء حمر كيبين دفارها من لقدام ونزلات كتقاد فشعرها . خرجات كتقرقب لقاتو واقف برا كيكمي ... تلفت شافها جايا بابتسامة وبقا ساهي كيشوف من راسها لرجليها ... فين هي ديك البريهيشة اللي كانت كتسلت معاه بصباط طالون وغادية وطيح بوحدها وتعكل وهوا كيضحك عليها ويقشب معاها حتى كدفعو وتهز خنافرها فالسماء .. فين هي ديك الرقيوقة كا كيشدها كيقلب ليها الراس لتحت حتى كتبغي تقسم ... ديما سبرديلة والسروال وتابعاه كتجري ولا راكبة موراه فوق الموطور وكتهرو وهوا كيدفعها معصب خايف يقلب الموطور ... فين هي ديك البنيتة اللي كتموت على لكلوز ومها محرمة عليها المكياج ومشا هوا شراه ليها باش تبقا على خاطرها ... وتجلس حداه فالربيع ولا تحت شي عمارة وتبدا تعكر وتبوسو بلعاني وتعاود تعكر وتشدو تبوسو حتى كيجيرو عليهم صحاب العمارة . كان بالنسبة ليها الحبيب اللي كتكا على كتفو وتصنط لعضامها مرتاحة .. والصديق اللي كتلعب معاه ودوز مراهقتها بجميع انواع التبرهيش ... تخرج من الراجعة تلقاه كييتسناها وتصوني على ديور وتمشي كتجري تخلعو باش يهرب بيها ... افعال شيطانية كانت كديرهم غير بااش تضحك ... واليوم اللي مشات معاه لمعرض ديال المكياج داروه فواحد الموسم وبقات كدور هي وياه وسرقات ساعة بلا ميشوفها حتى واحد حتى خرجات وقالتها ليه وهوا ينوض ليها وبدات كضحك ومشات رداتها قدامو وهوا كيشوف افعالها المجرمة وكفاش كتصرف باش تردها ... كتفرنس وتلف من هنا لهنا حتى حطتها ورجعات كتلوى حتى قربات ليه وهي تهرب وتبعها شدها جرها من رقبتها كضحك وترغب باللي غير كتلعب وفنيتها تردها .. ذكرايات كثيرة دازت قدام عينيه شافهم فجسمها المتكامل المتمايل وهي كتمشى بتبات ... وابتسامة ساحرة ونضرات مزالة فيهم البرائة اللي كان كيشوف ... تغيرات واصبحت جميلة اكثر من صغرها بألف مرة .. تحولات من فتاة مراهقة كانت كتبان فعينيه طفلة ماعندهاش كرام دالعقل ومكتقولش ليه لا فاي زبلة نوا يديرها لأمرة كاملة جدابة فكامل انوثتها . وقفات قدامو بابتسامة وهوا شارد وقالت
- تعطلت ؟
ابتاسم وقال: لا بلعكس
قرب منها بلطف باسها فحنكها وفتح ليها الباب ركبتا حداه .. جلسات فرحانة بالاستقبال اللي دار ليها ... اخيرا رداتو للطريق ونجحات .. تلفتات بنص عين كتشوف فيه باعحاب .. حتى هوا تبدل .. وتبدل بزاف لاكن بقا فوسامتو واخا مكيعطيش اهمية للمضهر كتر من لقياس .. حدو لابس جينز وقميجة بيضاء فاتح ليها الصدايف من العنق صدرو كيبان وسنسلة رقيقة فلعنق وساعة يديوية .. متحرر من الضدايف وديق الاكسسوارات و صدايف لكمام .. فاتحهم ومطلعهم شوية .. فيديه ساعة يدوية فضية وخاتم الخطوبة فقط وسمطة للسروال ... ومع ذلك ثار انتباها بعدم اهتمامو للشكليات وعفوي فتصرفاتو اللي كتجدبها بلا ميتصنع .
جمعات يديها عندها بخجل وسكتات .. بقات ساكتة وهوا سايق لحضة مد يدو بلا ميتلفت ليها فيدها فصمت وحطها على فخدو . عجبها الحال يشد فيها واخا ماقال حتى كلمة زوينة لاكن المهم دار حركة زوينة . وقف حدا اوتيل راقي ونزل حل ليها الباب ونزلات برقة فرحانة ..شد ليها فيدها ودخلو جلسو فطبلة كيتعشاو ومرة مرة يهضرو ... ماكرهاتش ضحك كما كانت كاضحك لاكن بان ليها داير عقلو وماشي مكان ديال الضحك .. المكان هادىء ... حافضات على هدوئها وبينات ليه حتى هي انها تبدلات ودارت عقلها وترزنات ... شافت اعحابو بيها وهي كتهضر وضحك ... جبدات ليه موضوع العقد وقال بابتسامة كيشوف فيها
- انا غادي ندير مجهود باش ميتعطلوش .. غير كوني هانيا
مارضاتش مرة اخرى وبدات تمتم وضحك بينات ليه باللي ماعندها صبر ... سكتات وناضو بدلو البلاصة من طاولة العشاء لفطويات مريحين حطو ليه قهوة وليها مشروب غازي ودارت رجل على رجل .. جلس حداها ولاح يدو وراها وقال
- مرتاحة ؟
حركات راسها بابتسامة وهي طايرة فالسماء ... احساس ماحساتوش حتى فاش كانت كتعنقو وهما صغار ... بمجرد ما جلس قريب منها وبدا يداعب كتفها بيدو حسات براسها بدات تسيح وتبورش وكتزيد تكحز عندو بسلاسة باا ميعيق حتى تكات على صدرو بنص ضهرها عاد تهنات .. بدات كتفرج فواحد كيغني وهوا حداها متكي على ضهرو فجلسة مريحة .. بدات كتحس بيه كيزيد يقربها عندو وهي على سبة .. يدو كتهبط مع خصرها ومرة طلع مع كتافها وضهرها معري .. ردات شعرها للجنب كتوريه ضهرها بلا متعيق .. شاف الوشمة وقال حدا ودنها حتى تبورشات
حلات الانستا فرحانة توريه وبدات دوز وهوا كيشوف معاها ويسولها .. ماخلات حتى قنت ... ها افريقيا ها اسيا .. اندونيسيا ، اوروبا ، البرد فلندن والصيف فطايلاند .. مرة شرم الشيخ مرة الاردن ... والحوايج واللباس لعلك ترضا مكاين عا الله يعطيك صحيحتك كل مرة بشكل جديد . اللي شافها يقول باها وزير . شاف معاها التصاور والاماكن مكان ينسيك فمكان والاوتيلات والطموبيلات.. هاهيا فسيارة . هاهيا فيخت ... ها شعرها مسرح هاهوا فازك هاهوا مصايب ... هاهيا سمراء هاهيا بيضاء ...وفكل مرة تلبس دو بياس كتصور جالسة وعاطية بضهرها . ابتاسم وقال
- ابن بطوطة صافي
ضحكات وقالت: هههه كنحماق على السفر
محمد : الريال اللي شديتي واقيلا كتحطيه فداك الشهر
اميرة: والله ماجمعت شي سنتيم ... ديك الدار والعيادة ...راه بزز باش درتهم .. حتى قجني بابا ... غرقني كريدي باش ندير شي حاجة تنفعني زعما ... ولاكن الحمد لله ساليتهم ... واللي كان مشجعني باش نسافر بزاف .. ليكول اللي كنت كنقرا فيها كتخلص علينا 50% فالطيارة .. يعني مكنخلصوش بزاف .. وفنفس الوقت كنت خدامة فكلينينك وكنقرا على التقنيات الجديدة ... كل مرة كتخرج حاجة جديدة ... وصافي هادشي اللي كاين
شاف صورة جالسة فالبحر ملوية بالفوطة وحداها شاب اشقر كياخد سلفي ليهم بجوج وقال
رد بهدوء: مكتبغيش ..ومزال الناس كيجيو عندها يعزيوها
اميرة: وخوتك واش مجالسينش معاها؟
تنهد وقال: دابا هي معولة عليا انا ..ن لخرين حداها العام كامل وانا مكتشوفنيش من فين لفين وفاش كتبغي شي حاجة كطلبها مني مكطلبهاش منهم هما فهمتي
بقات ساكتة كتفكر شوية قالت : بابا مغاديش يبغي نمشي معاك لتما بلا عقد
رد ببرودة: وكفاش خلاك تسافري لهاد الدول كاملة بوحدك !
حسات بيه بحال الى حشا ليها الهضرة وقالت ببرودة
- حيت ماكنتش مخطوبة ولا حتى حاجة وعارفني غادية سياحة ... اما دابا غيعرفني غادية معاك
دورات وجهها عاقدة حجبانها فصمت وحتى هوا سكت .. بقات كتفرج وفقدات الراحة من جديد وتلفتات هزات صاكها وقالت
- يالاه نمشيو
رد : صافي بغيتي تمشي ؟
اميرة : عيت بغت نمشي
[22/7 21:08] 🌸حسبي الله عليه توكلت ...: هزات صاكها بصرامة وناضت وفقات .. وقف حتى هوا هز سوارتو وخرج تابعها حتى وصل ليها وجرها من خصرها وقال بهدوء
-مالكي ؟
ااميرة : والو
ابتاسم وقال : مالكي شفتك تبدل عليك الجو ؟
حركات راسها بالنفي وقالت : لا والو
طلعات فالسيارة وطلع حداها وكل مرة يدور يشوف فيها بابتسامة وهي كتنفخ .. تنهد وشبد صبعانو مع صبعانها وهز يدها باسها وطبطب عليها بيدو .. مافهماتش شنو عنا بيها ؟ واش متقلقييش زعما ولا ماديريش فخاطرك ولا شنو ؟ ولاكن واخا هاكاك عجبها الحال فاش شد فها بديك الطريقة وباسها ..حسات بقلبها تقلص وسخن ووتكمشات فبلاصتها كتفرفر بالفرحة ... غريب امرها وحتى هي كتعجب فراسها ... ابسط الحوايج منو كيفرحوها ويخليوها تنسى كلشي واخا يدير ليها اللي دار .. بمجرد مكيعطيها اهتمام ولو غير شوية كتنسا العالم .
طول الطريق وهما ساكتين حتى لباب العمارة عاد قال
- غنرجع غدا لمكناس ... ونتي ترجعي معايا ؟
اميرة: لا راه قلت ليك غنمشي للعيادة
محمد : غنمشي معاك فالصباح ... يالاه تمشي معايا فلعشية اوك ... ماعندك ماديري هنا بوحدك
اميرة : لا خاصني نرتب امور العيادة ضاروري
ابتاسم وقال : اوك اللي بان ليك ... ولاكن ..... راك عارفة دابا الستون تبدل مابقاش كي كان ...نتي مخطوبة ماشي ديال راسك
حركات راسها: لا راني عارفة ! وعلاش انا شنو كنت كندير من قبل منتخطب !!!! على العموم .. سلم على ماماك بزاف وتهلا فيا .. بون وي
نزلات بلا ماتسلم ودخلات للعمارة
طلعات نيشان للدار وسدات عليها جلسات ... ماشي هادشي اللي هادشي اللي كانت متوقعة ... ماشي هادا هوا سي محمد اللي بغات ... جاها راجل اخر غريب عليها مكتعرفوش وماقادراتش ترتاح معاه واخا كتبورش ليها اللحم فكل مرة لمس يدها او عنقها وكيحكر فيها مشاعر جياشة الا وانها مامرتاحاش . جلسات كتفكر وتخمم .. ميمكنش يبقا هاكا ... لا ماشي هادا اللي بغات هي ... ماشي هادا محمد اللى حزنات عليه هاد السنين كاملة . لو كان واحد اخر بلاصتة بنفس التصرفات مكانتش غادي تعطلو حتى ثانية وتبعد عليه . لاكن محمد شكل اخر واخا عمرها فكرات يكون تبدل لهاد الدرجة اللي تخليها متاخدش راحتها معاه
وهي كتخمم وتمسح وجهها من االمكياج تفكرات الاضافات اللي زادت لوجهها وابتاسمات نسات كلشي وجلسات مقابلة وجهها فرحانة بيه وكتجرب جميع لوكات المكياج حتى ملات ومشات غسلات وجهها وطاحت نعسات .
الصباح لبسات ملابس جدابة لانها عارفة راسها غتلقا بفارس احلامها ... مضهر انيق وجميل بقا ليه غير يعيط ليها . تفكرات تسليفون اللي طفات عليه الليلة الماضية ومشات شعلاتو وصونات ليه المرة الاولى مردش وماعجبهاش الحال ومع ذلك صونات المرة الثانية عاد رد
اميرة : الوو محمد
رد : الو وي؟ .. نيسيتي تيلي طافي عاوتاني ولا شنو؟
اميرة : اممم ديشارجا ليا لبارح
محمد : لعجب هاد تيليفون كيدشارجة ليك غي نتي بوحدك!
قاطعها: دابا حتى تخطبناااا ورجعنا من بعد هاد السنين كلها وجايب الواليدة مريييضة بالابيض باش تخطبك والوليد يالاه 40 يوم هاديي باش مات .. جايا بكل بساااااطة كتقولي ليا لا مصالحينش!!!! كنلعبو حنا هنا ولا شنو ؟
قاطعها بنرفزة : صافي صافي ..عرفتي شنو .... انا خاصني عقل اللي داير فيك راسي نتي سوق خاااوي وانا تابعك وغتصلاحيش ليا نيييت ولا انا غنصلاح ليك ونكمل معاك حياتي ... صافي ابنت الناس الله يعاون حتى تلقاي اللي يصلاح ليك
دار الخاتم فجيبو ومشا خلاها واقفة مصدومة عمر شي واحد عاملها بديك الطريقة ... بقات كارمة والدموع محجرين فعينيها صدمها كانت متوقعة هي تصدمو لاكن مع الاسف تصدمات هي
المكتوب فرزقي الجزء الرابع
محتوى القصة
التنقل بين الأجزاء