يامنة الجزء 97

امصلي عليييك ارسول الله ..."حذر فؤاد عينيو لقا الولد خرج كلو هبط كيجرييييي لكن كلو زرق والمصرانة ملوية ليه على عنقو فمو كيتحل ويتسد بشوي ....

شرع عينيه فداكشي الي قدامو اول مرة كيشوف داكشي ويحضر ليه ..وشكون حضر لولادة ولدو البكر الي تزاد بديك طريقة ...هي ربي حن عليها دغيا تفكات بلا عصير وخا مزال الباقي مخرجش كلو ...وخا تعذبات فالوجع يومين تقريبا ....

وباقي الايام الي قبل الي كان كيف كنقولو كيزاورها لكن ماشي اي تزاوير كيخرجها منها عاد كيمشي ...ربي فالزحمة سهل عليها حالها حال اي وحدة ممكن توقع فالي جرا ليها ...خاصة فاش تتكون الوالدة محلولة دغيا كيلقا فرصة الى تقبل وهي مع معارفاش كتعصر غير راسها ...كيف تعصرتت او دفعات لقا الفرصة وخرج كيجري وخا مخرجش تقريبا كلو ...

زينة : امصلي عليك ارسوله ..ذكري الله ابنتي ذكري الله ..."صغرات عينيها مع جا على ايديها لقات المصرانة او الحبل السري ملوي على عنقو وهو لونه ما هواش وفمو صغييور كيتحل ويتسد بشوي بلا مغوت ولا يدير اي رد فعل ..." ولدي نابي (عيط ) على الطبيبة...

فؤاد "باقي مخرج عينيه فالولد الي داير فحال هكاك جاه نوع من صدمة تاهو كيشوف فيه ويحل فمو ويسدو بشوية كيصرط ريق ...تصدم ودهشر وتخلع مسمعش شنو كتقوليه زينة الي كتشوف فالولد ..." ...

زينة شافتو مسمعهاش ومداهاش فيها وبقاي مدهشر بان ليها الولد كيتخنق ويامنة كتشوف فيه وتنخصص بالبكا ...

يامنة : اهى اهى م ماااالو ...فؤااااااد ..اهى اهى وااا فؤااااد "زيرات ليه على ايدو باش يتوگض يشوف فيها ." 

فؤاد "عاد فاق خرج عينيه ورجع شاف فيامنة " : هاا م مالك مالو...اشنو علاش داير هاكا ؟؟؟؟؟؟ يامنة ...

يلاه بغا يغوت وهي دخل يسرى وسارة كيجريو سارة بان ليها داكشي وهي تحط ايدها على فمها يسرى مشات كتجريييييي تاهي تا مشات وجات بصدمة ...

يسرى : وااااواو ..يامنة ؟؟ الولد "بان ليها كيف داير وهي تخرج عينيها غوتات بحر جهدها على لفرمليات الي معاها والي اصلا بنات حيث وصاها يكون طاقم نسوي ..." عيطييييي ليهم سارة داااابا ونتوما خرجو خرجي معاك مي زينة اسارة 

زينة : راهي ولادتها ساهلة ربي سلكها بزحمة ساهلة غوتة وحدة هبط ابنتي ...ربي معاك ربي معاك ...

نوضتها سارة خرجتها بزربة دخلو الفرمليات ويسرى طارت عالولد شدات الحبل سري هزاتو وضوراتو بشوييييي من على عنقو ...شادة ليه رويسو حتى فكاتو ليه ...

يامنة "بدات تجيها زحمة ثاني " : اممممممممممن اععععع ش شنووووو بااااقيييييي اهى اهى ...

يسرى : دفعي داكشي الي بقا دفعي احبيبة ....

دفعات ثاني كدفع وتكمشششش على ايد فؤاد حتى دفعاتو كلو وهزاتو ...جابو ليها داكشي هزات مقص واحد فحال المقبط دارتو على الحبل من جيهة البوط سداتو وقطعات الحبل السري وخلاتو ...

فؤاد "كيشوف فيه باقي زرق شوي ..نطق بحروف متقطعة حلقو نشف " : ع علاااش مكيغوتش ؟؟

يسرى "معارفات باش تجاوبو وسكتات هزات الولد وهبطات ليه رويسو لتحت ورجليه الفوق ...خبطات ليه المؤخرة ديالو خبطات متتاليات بشوي ...

يامنة : علاش كضربيه اهى مالو ؟؟ فؤااااد مااالو مكيبكيش اهى اهى ...وااااااااااااا مااالو ...

يسرى : حبيبة تهدني متخافيش عادي هادشي ( ربي الي عالم بيها ) ....

خبطات والو مغوتش … الفرمليات جايبين كاع الي غاتحتاج ...جابو واحد السرير فين كيبدلو لزيادة ...هزاتو وحطاتو فوق منو وجهها ولا بيض هههه وناااري لوالديك ومغوت ولد فؤاد تيخليك تغوتي فليالي هههه ...

فؤاد "طلق من يامنة ومشا لعندها وقف عليها ..." : مالو ؟؟؟

يسرى : هاا هاني كنشوف متخافش ...

عاودات هزاتو تا هزاتو قلباتو تاني تخبط ...

يامنة : اهى اهى وماااالو اشنو وقع ليه "صوتها عيااان وكتكابر وطل عليه والفرمليات عند رجليها كيعاونو فيها باش تجيها زحمة وتلوح تاني الخواتات (ما تبقى من المشيمة ...) ...

فؤاد "مصبرش كيشوف فالولد مكيغوتش وقلبه بغا يسكت بالخلعة ملاحضش كاع كيف داير الوليد كيشوف غير كتلة صغييييرة قد حجم ايدو لون بشرتها متغير ماهواش عادي ومكيغوتش تلفو ليه اعصابو حتى خبط الحايط قفزو الفرمليات و يسرى الي تلفت مسكينة تاهي خرج فيها شيب ...": ماااااااااااااالو. ؟؟؟؟

يسرى "طارت ونزلت ولات ترعد ولكن ولات نحكمات فراسها " : هاهو هاهو يلاه اولدي يلاه الله يرضي عليك ...ثورية جيبي ليا...

محتال تكملها حتى سمعات احء اخء اخء اخء ...

ضورات وجهها لجيهة الولد بان ليها وجهو تكمش وفمو بدا يترعد من ذقن ديالو ...حتى طلقها بغوتة زوكات الوذنين ووصلات لمسامع نجود ودراري الي كانو جايين والحاج الي كان جالس برا ...

الحاج : الله اكبر الله اكبر ...

يوسف : وااااااااا ولداااات

صهيب : الله ...

نجود : الله ياربي على بنيتي هههه 

عاد يسرى ابتاسمات وتنفساااات ...والولد غير دخلت ليه نفس سيدي ربي ولونو بدا يتبدل شوي بشوي ...

يسرى : ههههه على سلاامتو ...ياك احبيبي خرجتيها منا ...

فؤاد "دار ايدو على وجهو دوز عليه يحك ويطلع ويهبط عاد تنفس بغا يخرج ليه العقل وقلبه بغا يسكت بالخلعة على ولدو ويامنة تلاقاو عليه ما عرف باش تبلى ...خلعة ومن خيبها انك تشوف كبدتك لا هي نفس دخلات ليها ولاهي تحرك ...وخاصة عاد زايد راه غير لا منطح راسو ولا فشل ..." : الله ..."هز راسو تنفس بجهد وخرج تنهيدة حتى ضور راسو جيهة يامنة لقاها كلمو ليها داكشي الي خرج ...كتبكي وصحك مسكينة وفاشلة بالمزيااان ...

فؤاد "مشا لعندها مخلي الولد تقلبو يسرى وتفحصو وتكمل ليه شنو خاصو وتاهو من طلق الغوتة لا هو بغا يسكت ههه ...قرب لعندها هازا رجليها كينضفو ليها تحتها ...كانو كيعصرو ليها كرشها مزيااان تا كيخرج ما تبقى ...من بعد ما لاحت داكشي الي بقا من المشيمة ونضفو ليها ...قرب باس ليها ايدها وراسها وطووووول فالبوسة " : على سلامتنا ...

يامنة "ابتاسمات بتعب مبقاتش قدرات تهضر عينيها كيتلصقو " : ش شفتيييه همممم ...

فؤاد "باسها فراسها ...كانو كملو ليها .." / مزال غير غوت كسرنا وجيت عند غزالي "عنقها عندو كيحك ليها فدراعها " ...

يسرى : ههه على سلامتكم صحتو مزيانة ...ثورية ( الفرملية ) قولي ليهم راه تزاد مزيان وجيبي من عند خالتي الصاك فيه حوايجو وحوايج يامنة باش تبدل ..."حدرت راسها الفرملية وخرجات دارت شنو قالت ليها ...وجابت ليها صاك هزات منو حوايج البيبي وعطات ليامنة حوايجها منهم .." لبسيها هذا صايبيه ( كيلوط فيه الويز خاصة بالنافسات ) ...

شداتو من عندها وناض فؤاد لعند يسرى كيشوف فيها كتنقي فيه بنفسها وتلبسو فليكوش كيبان وسطها نملة ودايرين ليها ليكوش ( تعبير لضحك ههه ) ...جمع ايدو على شكل 🙏🏻 دارها على فمو عينيه لمعو وهو كيشوف فكبدتو الي مغمض عينيه وفمو كيترعد من ذقنو مرة يخسر سيفتو ومرة يگبع شنيفاتو باغي يبكي كيتسمع غير اااءءءء اااءءء اننن ..."مد ايدو لايد الوليد "شدو من ايدو حط صبعو وسطها حتى كمش ليه على صبعو مزيير عليه ...جمع الوليد فموو كمدو ويرجع يدخلو فحال باغي يمص ..." 

فؤاد : ولله في خلقه شؤون ...سبحان الله والحمد لله ..."هز راسو لسما طلق تنهيدة من قلبو ورجع...شاف فيه بقا حتى لبساتو ضوني بيض لبيسة فالازرق والابيض فوقي بصدافي وسروال ديال قطن وسبيبيط بيض قطن فيه باپيون فالازرق ...هزاتو بشوي ...ومداتو ليه ..

يسرى : تهزو توذن ليه محدك معاه قبل ميسمع هضرة بنادم وذن ليه هو لول ؟ بينما عطيت ليامنة تلبس ونعاونها ...

فؤاذ "شاف فديك الكميشة كتنغش ايدياتو كيكمشو ويرجعو يتسرحو وفمو كيخرج لسانو ويركع يدخلو ..عينيه مزال مسدودين وسبحان الله من صورو بديك الخلقة شعر كحللللللل مسبسب على وجهو واصل تال عينيه ...وحجبانو كحلييييين ...لحد الساعة هادشي الي باين لا هو حل عينيه باش يبان حجمهم لا هو مزال تفرز ومزال ميبانش لمن غادي فشبه ...

حطاتو ليه بين ايديه وعاوناتو تا شدو بين دراعو قلبه قفز من بلاصتو كيضرب بجهددد خايف ..اااه فؤاد خايف حيث الكبدة صعييييبة ..عض على شفايفه وقرب ليه اكثر باس ليه رويسو واستنشق ريحته هبط لوذنو " : الله اكبر الله اكبر ..."بدا ياذن ليه فوذنه بصوته ..حتى كمل ..." ...ياسييين ياااسييين ..."حط عليه راسو "ولدييييي ..."حتى ابتاسم من قلبه عض شفايفو حابسها حابسها لكن خانتو ونزلات دمعة كتجرييييي من عينو "...

بقا شحال هازو والولد كيتسمع غير صوت انفاسه ...لبسات يسرى ليامنة الي كانت فاااشلة بغات غير تنعس ...لبستها بيجامة وخا محتاجينها مرضى اخرين قررات حتى تكمل ليها عاد تمشي تشوف برا ...حتى لبساتها بيجامة قطن فالغوز بيبي والبيض وتقاشر بيضين من بعد مالبسوها الكيلوط الي صاوبو ليها ...طبعا هادي هي خدمات الكلينيك لكن يامنة معرفة من جهة يسرى ومن عائلتها وعزيزة عندها كان اهتمام زايد اكثر ...

يسرى "غطاتها وقادت ليها المخدة تحت راسها كان وجهها شاحب وفمها بيض " : ارتاحي دابا شوي وغايدخلو عندك ...هههه محننا هاد الولد عندك خرجها مني خلعة ...

يامنة "بصوت عيااااان بحرا قادرة تنطق من بعد ما جمعت شوية السوفل غا باش تهضر ونطقات بصوت باااح اصلا مشا ليها صوت مع الغوات " : بغييت نشوفو ...فؤاااااد ..."مسمعهاش حيث كان واقف بعيد عليها شاد الوليد فحضنو كيبوس فيه ويشمشم ..." ...فؤااااد 

يسرى "ناضت " : انا غانرسلو لعندك ونخرج عندهم باش يذخلو عندك راك شغلتيهم عليك ههه على سلامتك والله يكبرو فعزك ويخليه ليك ...

مشات عند فؤاد قالت ليه يديه ليها وخرجات عندهم ...اما هو ضار عندها ومشا مجبد عينيه كيشوف في ولدو وفيها عاض على شفايفو بغا ياكلهم بزوج ...هي منضرها كيوت ام صغيرة عاد كابرت وصبرات على هاديك الكتلة اللحمية تا عاش ليها وصبر فكرشها وزادت صبرات تا ولداتو ومنصر البريهيش الي كيحل في فمو ولا يكمشو ....حتى جلس جنبها ...

فؤاد : الغزال ديالي انا ...شوية ؟؟ 

يامنة "مغمضة عينيها " : هننن ش شوية فين هو ..

فؤاد : توگضي معايا وحلي عينيك بعدا يامنة ...ياامنة ...

يامنة "حلات عينيها شوي وضارت شافت فيه لقاتو هازو وهي تبتاسم وسط عياها والبحة ممفارقاش صوتها " : هو ههههه 

فؤاد "غمض عينيه تا باسها فراسها " : هوو اغزالي شبل ديالنا ...تهزيه ؟ 

يامنة : اااه عطيه ليا ..."هزو شوي وحطو ليها على صدرها حطات ايدها عليه كتشوف فيه وخا عيانة كتقلب على نعاس ولكن تحكمات فراسها حتى شداتو وحازتو لعندها مقرباه ليها ...ضورات ايديها حاوطاتو وهبطات باست رويسو وشعرو ..." ...زويييين هههه ...

فؤاد : حيث ولد يامنة اغزالي ولد عمارة داري ...يكبر غايناديك ماما ...ويترجل يناديك الوليدة ...

يامنة : هههه ماما الوليدة هههه ...

فؤاد : اريه نحطو حداك ورتاحي راكي عيانة ...

يامنة "كمشات حجبانها " : خلييه عفاك ..

فؤاد : هاهو حداك معندو فين غادي وانا حداك ..رتاحي نعسي غادي يدخلو دابا وميخليوكش مرتاحة ...

جاوباتو براسها باست الولد بشوية فراسو وإيديتو من كفها وهزو من عندها حطو حداها فالكونة كانت تما اصلا شومبر ديال جناح الولادة فيها كونة ...فرش ليه مانطة شيبية وحطو فيها مغطيه باسو تاهو من ايدو وراسو وحط ليه مصيحيف صغير تحت راسو كان فصويك الي موجدة خاص بهاد نهار ...

حتى دق الباب وحنحن عاد دخلو واحد تابع لاخور ...الحاج نجود سارة وصهيب والياس الي شاد زينة ويوسف الي كيهضر مع راوية وبلغها بالي تفكات ....

نجود : على سلااامتها ولدي "طلات عليها لقاتها صافي سرحات عجول لاخرا " الله ياربي بنيتي ...

زينة : نعسات فجيلتي ...

يوسف "سلم على خوه هو وصهيب والياس " : على سلاك خويا مبارك متزاد عندك ...

فؤاد "حدر راسو وهزو طبطب عليه"

الحاج تاهو مشا عندو وناض فؤاد باس لباه راسو وايدو " مبارك متزاد اولدي على سلامتكم الي تفكات على خير ...فين هو حفيدي ...

شير ليه فواد فين كاين ومشاو لعندو كلهم كيشوفو فيه باسو الحاج من راسو ...سما الله وكبر فرحان مقاداه فرحة بحفيدو ودراري كيطالو عليه ويصورو فيه ...اما نجود بقات حدا يامنة وزينة وسازة ...

نجود : ولدي مد ليا صاك نجبد ليها زيف نحزم ليها راسها لا يضربها البرد ..."مد ليها صاك وناض عندهم حدا الولد ...وجبدات ليها زيف حزماتو ليها وخا ناعسة مجابت خبار ورجعات تكاتها وغطاتها من جناب ..."...تتفيق ونعطيه ليها ترضعو ...

زينة : متنسايش داك اللبا ( اول حليب ) تدهن منو شوي لوجهها يحيد ليها داك الشوية الكلف الي فعنقها ووجهها ...

نجود : مبايشن بزاف دابا يحيد خلي البا ينفع الدري الحاجة ...ماعليش ...

الحاجة : الي بغات ديرو ...

نجود / خاصني نگمطو باش نجمع ليه شوية عضامو بالحق تيجي فؤاد لا يعود ميبغيش ...

زينة "كتشوف فيامنة ": فرحتي منعطيها لحد "مسحات عينيها بمشوار من دموع " الله ياربي على فجيلتي وتمحنت ليا ...الكبيدة الغالية بنت الغالية ...عمرني نسا نهار الي تولدات هي على ايدي من جيه ومها ودعت من جيه ...داك نهار كحل عليا تا نساتني فيه يامنة وهي على ايدي كبرات وبلغات وهاهي دارت دارها وتزوجات وهاهي ولدات بكرها وعلى ايدي وخا ما وجعتها ما زحمتها ...

نجود : الحمد لله على سلامتها سكتي الحاجة من البكا هاد نهار نهار فرح تزاد الولد الي داز عليه ودوز عليها المحاين وصبرات تا ولداتو كامل تبارك الله عليه ...ها ربي عوضك بيها وبحفيد ولا بغا الله يجيو خرين ...

جا فؤاد لعندهم باس راس زينة وقال ...

فؤاد : مكتب ليك ينزل على ايدك اميمتي ...تمنيتي وصبرتي وهانتي نلتي الله يجيبنا غير فالصواب اميمتي ...

بقا الحاج ودراري واقفين حدا راسها حتى خرج باش يصلي العصر ويشكر الله على النعمة الي عطاه الله وكمل عليه تا وصل لداكشي الي بغا زوجها ليه بلا خبارو تا دار دارو وهاهي جابت البكر ديالو في حفايدو ...عيطو لباها الي كيف سمع الخبار مشا طاير جاب ما يخصو من حوايج ومستلزمات وقطع فالكار باش يكون عند بنتو الي جابت ليه اول حفيد ليه ...

فؤاد "لباه قبل ميخرج " : الوليد وصي على شي بهايم دبحهم وصدقهم ...ووصي على جوج على ود السمية ...

الحاج : بقا غير مع ولدك ومرتك وداكشي الي بغيتي نوجدوه عارفك باغي العقيقة وسبوع وكلشي على حقو وطريقو ...

فؤاد : مزيان ...باش مكان علمني بشنو خاص والجديد ..

الحاج : وعليه نخرج من جامع ونتوالى لكلشي .."عيط لالياس " الياس فاش تخرج من هنا لحق عليا بغيتك تمشي معايا ...

الياس : وراه شيفور الوليد خليني مع الفجل ..

فؤاد "خرج فيه عينيه " : شنوو ؟؟

الياس : اااا ا..

يوسف : شريييه 

الياس / الفجل بغاتو الوليدة على حساب شلاضة الي غاتجيب لختي يامنة فالعشا ياك اميمتي ...

نجود : وانا دويت قلت ليك شي حاجة ؟ 

صهيب "ضور وجهو حابس ضحكة حتى ولا مزنگ" : حخخخخ اميييي غانموووووت وحصلة متبغييييها لعدوووك اخويا ...

يوسف "دار ايدو على فمو حابس ضحكة " : وااا شواتو ورقاتو الصابون البلدي ميزلقوووش 

الياس "مشا كيجري سبق باه " : اضحكت اضحكت سمح ليا خويا الوليد اجي نمشي معاك نصليو جماعة ..."خرج الحاج تبعو كيضحك عليه ههه ودراري بقاو يصورو ويشوفو ف ياسين الصغير ...خرج فواد باش يكمي ويهضر فتيليفون مخليهم على خاطرهم يلعبو مع ولد خوهم ويضحكو " 

يوسف "ضار تيشوف فيامنة ناعسة لهيييه ويوشف فياسين " : وبليمين واش يدي الفجلة ...

صهيب : هذا جاني غا فؤاد ...شوووف شوف كيفاش لحيتو كترعد ؟ الوليدة علاش لحيتو تترعد 

نقزات زينة ونطقات : هههه هذاك غايكون قبييح ..

يوسف : ويلاااي كتر من هاد القبح الي خرج فينا فين غادي اصحيبي فين ...

صهيب : ياختي شحال كيوت ...شوف تيكمش عينيه خخخخ "مد ليه صبعو خشاه فوسط كفو وكمش عليه كيبان صبع صهيب كبيييير " 

يوسف : هههه تتبان ديناصور حنون ابا صهيب هههع 

صهيب : ديناصور بعور لا ؟

يوسف : عنديلمك ...

شوي حتى تحل الباب ودخلات زينة دكتورات ببشاشتها مبتاسمة وجهها عليه فرحة كبيرة من بعد ما شافت شنو عندها وجات تطمئن عليها لقاتها ناعسة وجات حدا يوسف كتشوف ف ياسين ...

يسرى : وييينو حبيب خالتو 😻

يوسف : يا حبيب من ؟ خالتو ؟ نتي ؟ واش "شد راسو " اويلي واش تا مرتي تاهي اولد العبد ولات تقوليك حبيبي ...

صهيب : ههههه جا غا من وراك جمع حب وتبن ولكن نتا زايد نغزة خرج ليك فعودك ...

يوسف "شاف فياسين رافع حاجبو " : اشووووف اذاك ربعة غرام ديال لحم راه لوالديك نعلقك فالترية وطلعتي ليا القردة وخا يكون بوك هو شاوينا الكاوينا ..."تيقلب بنص عين لا يكون داخل "

صهيب : زااااااگييييي عينيك وكمل هضرتك الثعلب ...

يسرى "تكات على كتفو كضحك " : هههه الله يستر ...

هذيك سويعة بقاوها معاها بضحك ولفرحة خارجة من عينيهم ...بقاو معاها شوي حتى استاذنو باش يرجعو لدار يرتاحو ويخليوها ترتاح داو معاهم زينة حتى هي وبقات غير نجود تا يجي فؤاد باش تعاون يامنة ملي تفيق تعطيها ترضعو وتوريها عاد تمشي ...وصات الياس باش يرجع ليها يديها ....اطمنات عليها يسرى وعاودت فحصات البيبي ...وممشات زينة تا وصاتها باش ملي تفيق تبغي تبدل توضى بالعشوب الي قالت ليها...لكن يسرى عطاتها مطهر ومعقم وما ديال الوضوء واجلات حتى تجي لدار عاد تبدا سلسلة نفاس على حقو وطريقو ...من بعد شحااال بدات تحل عينيها ...شوي بشوي حتى شافت لقاتو عند راسها شاد الفون كيبقشش فيه وهي تكحب شوي تا ضار عندها ....

فؤاد : يامنة !! ...

يامنة "بصوت باح " : فؤااد ..كحكح بغيت نشرب ..

نجود : خليك انا نجيب ليها تشرب ...

قرب عندها كيطبطب ليها على دراعها حتى جابت ليها تشرب …حتى سمعو الغوتة ديالو حاارة ...

فؤاذ "ناض وقف كيطل عليه " : مالو ؟؟

نجود : نجيبو ليك ؟ خاصو يرضع اولدي هاهي فاقت ترضعو شربناه غير لويزة بينما فاقت ...

يامنة : اه جيبوه ليا ...

مشات نجود هزاتو تاهي تبوس فيه وهو يزگي وفمو يترعد وجهو ولا حمر ...وقالت ...: ههه اناري من قبحو ههه ..."حطاتو ليها فحضنها هز ليه فؤاد راسو عاد وعات واشفتو مزياااان ...بدات تبتاسم وضحك حتى تغمضو ليها العينين ....

يامنة : ههههه ...نرضعو دابا. 

نجود : رضعيه ابنتي سمي الله ...

عاونتها حتى حلات صدافي البيجامة وخرجات بزولتها حشمانة من فؤاد تزنگات وهو ممسوقش كيشوف فيها داير صباعو كيحك فذقنو وحاضيها حتى قادت ليه راسو وخشات ليه راس بزولتها في فمو شوي بشوي حتى بدا يجر فالخوا وهي تقرب ليه نجود وتقاد حتى جر ليها وبدا يرضع ...كان صدرها منفووخ غير بدا يرضع وجر مزيان ...

نجود : ههه ردي بالك لا يتحنق شدي بجوج صباعك هنا على شكل مقص باش ميتكبش عليه لحليب بزاف يخنقو ...."شافت في فؤاد "

ولدي خاصنا نگمطوه يتجمعو ليه عضيماتو "دارت ليا طويقية لقطن بيضة " ...قلت نسولكم ...

فؤاد "شاف فيامنة الي كيضحك وحاضية ولدها كيرضع وعينيها كيلمعو بجهد مرة تعض شفايفها وتغوبش معاه " ...ماعليش الي فمصلحتو ديريه ...."ناضت نجود مخلياهم حدا بعضياتهم وولدهم وسطهم ...بقا يشوف فيها يتلمس فايد ولدو ...

فؤاد"باس ليها حنكها وطلع يبوس حتى باس ليها ناضرها ورجع يبوس حنكها بغا ياكلها على هاد الكياتة الي فيها طفلة كترضع طفل ههه " : شفتي عويناتو دابا غزالي ...

يامنة "هزت فيه راسها شافت فيه خطف بوسة من فمها قبل مضور نجود تشوفهم ..." : ههههه متولد حتى خرجها مني "مزال عيانة " ...

جات تكمل ليه حتى نسات وطلقات ايدها وهي تشرگ ليه حتى تخنق ثاني كيتسمع غير كخق كخق ...هبط عينو ليه لقا وجهو تجيف وناض وقف بالخلعة هبطات راسها وهي تخرج عينيها ...مالو مم مالو ...ضارت نجود مشات لعندهم لقاتو شرگت ليه ولون وجهو تغير شداتو من عندها بزربة ...

فؤاد"صعر" : اااااشنو تاني مالو ؟. ماااالو؟؟؟

نجود "شداتو من عندهم عارفاهم معارفين تا لعبة فؤاد يعربط ويامنة تعطيها البكا ايوى شي ميقضيوه ...شداتو بالهداوة وخذات ليه ايدو نفخت ليه فيها ونفخت ليه فوجهو ومتكياه على كتفها واقف دوزت ليه على ضهرو تا تنفس وهو يطلقها بغوتة كسرت ليهم شومبر تا غمضات يامنة عينيها هههه ": بسم اله عليك بسم الله عليك اناري كي قبيح هههه 

فؤاد "كان كيمشي ويجي تيدوز على راسو بعصبية غا هو غوت وهو يضور تكا راسو عالحايط ضربو ببونية ...فشل ليه ركابي بالخلعة " : بغا يقتلني بغااا يقتلني اميمتي هاد فحم العينين ( كحل العينين ههه ) ...

يتبع...