عشق الشيوخ الجزء 12

رجف قلبها وانتفضو حواسها بعنف ... لذكر وليد .. خصوصا ملي شاف فيها هشام بقوة ....

توقعات ان اسمه خرج فلحظة سهو من فمها بلا ماترد البال ..

الدم تدفق حار فعروقها .... واختنقو أنفاسها ...

حاولت تبين راسها مافاهمة والو ... عقدات حواجبها باستغراب ...

شمس:~ وليد .. مالو ؟

ماجاوبهاش ..

بلعات ريقها ملي ردات البال ل نظرات هشام كيركزو ورائها ..

التفت تلقائياً ...كأنه قلبها تنبأ بوجوده خلفها ...

وعينيها الفحميتين تلقاو مع اللون الداكن خلف رموشه .... ف لقاء عاصف ... زعزع كل حواسها ..

رجعات تقلبات بسرعة وتوتر

زيرات على الكاس لي فيديها ... الهوا قلال من حولها ... حلقها نشف ...

زاد قرب منهم وليد .. كل خطوة كانت كتحسها فوق قلبها ....

تسالمو هو وهشام بحرارة ... كيهضرو .....

ماقدرات تفرز والو من كلامهم .. كل ماكانت كتسمعو هو دقات قلبها لي كيتسارعو مع الوقت ...

حتى مد لها وليد يديه ... وابتسم ...

وليد:~ شمس الأصيل .. مزيانة ؟

أصابعها وصلو بين كفه بارتعاش ..

فالوقت لي تلقا جلدها مع جلده حسات بلسعة حارة كتوصل حتى لمنابت شعرها ...

همسات باختناق ....

شمس:~ الحمد الله ونتا ؟

طلق من يديها .. جر الكرسي وجلس ...

وليد:~ الحمد الله ...

كانت مقابلة مع هشام ووليد جالس فالجانب الاخر ..

شاف ف هشام ورجع شاف جيهتها موجه لها سؤاله ...

وليد:~ هديل مزيانة ؟

غمضات عينيها ... وهزات راسها دليل على جوابها .....

رجع وليد يتكلم مع هشام ... بينما هي بقات مراقباهم بصمت ... شفتيها مرتعشين .. ورموشها كيتحركو بثقل ....

لأول مرة حاسة براسها عندها الحق تتأمله بلا مايأنبها ضميرها .. !

باغيا تسمع لكلامه الرجولي ..يداعب اذنيها .... كتراقب كيف كيخرج حار من أعماقه مخلط مع ضحكته الخشنة ...

ريحته لي تميزها بين آلاف البشر ... حيت خاصة بيه .. بوليد قلبها وحده ...

كل شيء فيه كان مخليها ترجع لأكثر من عشرة سنوات للوراء ..

كل دقيقة كتمر كتمناها ماتدوزش ... حتى تحدق فيه على خاطرها ..

ماخرجها من شرودها غير رنين الهاتف د هشام .. شاف ف هاتفه ورد نظره ل شمس ..

هشام:~ غانرجع دابا ..

جمد دمها ملي بقاو هي ووليد بوحدهم بدون قصد ....

طرقات بأصابعها على الطاولة بتوتر ... وابتمست بارتعاش ملي التفت لها وتكلم ..

وليد:~ كيف بقا عصام ؟

بقات محافظة على نفس الابتسامة ...

شمس:~ علاش فخبارك ؟

عقد غير حواجبه وهز راسه بإيجاب ... حركات فمها ..

شمس:~ شوية .. الحمد الله ...

تفاحة ادم تحركات بعنف فحلقه ....

وليد:~ ونتي ؟

غمضات عينيها وهزات ذقنها ...

شمس:~ مزيانة ... كلشي مزيان ..

طول فيها الشوفة الشيء لي خلاها تصيغ كلامها بطريقة اخرى ...

شمس:~ ولا نقول كنحاول نخلي كلشي يكون مزيان دابا ...

ابتسم لها بدفئ .. وارتشف من كأسه د القهوة ..

وليد:~ كلشي كيفوت وكيتنسى مع الوقت ...

هزات وجهها بشرود ..

شمس:~ بصح ... عندك الحق ... ( مال فمها بحزن ) الوقت كينسي كلشي ...

تنفس بعنف ... وماجاوبهاش ...

احنت عينيها .. وهمسات بخفوت ...

شمس:~ كيف جاتك الخدمة فالمغرب ..

زير على قبضة يديه بلا مايبين ..

وليد:~ حسن من لهيه ....

ارتعشت شفتها السفلية .. مسكاتها بين اسنانها باش مايلاحظش توترها ...

شمس:~ ع .. علاش مشيتي ؟

زفر بحرارة ... ودور عينيه للجهة الأخرى ..

وليد:~ كنت محتاج داك الوقت نخوي من هنا ...

زيرات على صاكها ...

شمس:~ غاتبقى هنا ديما ؟

تحرك حلقه وهمس بحرارة ..

وليد:~ الا بغا الله ... واخا تبدل كلشي فهاد ست سنين ...

اختنقو مشاعرها ... كأن مشاعرها رجعو سنوات للوراء .. ملي كانت مازال طفلة قدام وليد كتلعب ... وهو كيهزها على كتافه ....

الوقت لي كانت كتخبى عنده ... وكتعاود ليه كلشي .....

خرجات من فمها زفرة عميقة ....

شمس:~ الوقت دغيا كيفوت ... كلنا كبرنا ... نتا وليتي طبيب كيف بغيتي ... ( زيرات بأظافرها على بتطن كفها ) هشام تزوج ... انا تزوجت ودابا غانطلق ... وهادشي كلو غير ف ست سنين ....

قلبه دق بسرعة جنونية كيسارع أنفاسه ... كانت حانية راسها وشعرها هابط على جبهتها وكتافها ....

ماكرهش بقبضة يديه يمسك خصلاتها المنفلتة ويرجعهم وراء اذنيها ببطئ ....

ماكرهش يمسك كفها البارد بين يديه ويديفه بالحرارة لي كتطلع بين أعماقه ..

ضيق عينيه ... ونطق بأنفاس لاهثة ...

وليد:~ غاتطلقي ؟

مافهماتش ردة فعله ... حتى سمعات سؤاله عاد فاقت .. بحالا ماكانتش باغيا هاد الكلام يخرج من فمها ...

عقدات حواجبها ..

شمس:~ كانت عندنا الجلسة اللولة اليوم ..

حلقه تحرك بعنف وعاود بلع ريقه بصبر ... قبل مايجاوب ولا يوجد الجواب ... كان الهاتف لي أمامه على الطاولة رن ... واسم "إسراء" تكتب على الشاشة ....

موجة مشاعر عنيفة اجتاحت قلبها ... ملي شافت اسمها ... كأنه داكشي كله لي تجاهلاتو فعقلها بين وليد وإسراء... رجع يقتاحم قلبها بكل قوة ..

زمت شفتيها بألم

شمس:~ تليفونك ... كيصوني ..

هز راسه .. ونتاظر حتى قطع تليفونه عاد شاف فيها ....

حاولت تبتسم وتبين ماواقع والو ...

شمس:~ ماتنساش تعرضنا للعرس ... (هزات كتافها) بنت الناس وضريفة ..

زفر بقوة .. كيتأمل ملامح شمس الباهتة ... وميل فمه كيضحك ...

وليد:~ ماكاين حتى عرس دابا ..

شحب وجهها .... يالاه جات تجاوب ....

كان رجع هشام ... حط يديه على كتاف شمس ...

هشام:~ نمشيو ؟

هزات راسها .. دارت عنده ..وناضت ..

شمس:~ ااه ...

ناض وليد حتى هو كيتكلمو هو هشام مرة اخرى .. دفعو الحساب وخرجو ...

كانت كاتحس برجليها كيرجعو اللور ... وهي جنب هشام ووليد من الجهة الأخرى .. كتسمع غير صوته ... ماقادراتش تميز شنو كيقول من غير صوته لي كيستطون اعماقها مرة بعد مرة ......

حتى وصلو ل باب السيارة ..

شاف هشام جهة وليد ....

هشام:~ جاي بلا طموبيل ... دوز نوصلك معانا ...

هز وليد راسه ... فحين انها توقعاته غايرفض .. رجعات اللور .. وجلسات فالخلف ....

ماقادراش تتنفس .. وجوده ماشي كيحبس غير الهوا ف صدرها .. كيخلي كل ذاتها ترتاعش بقوة .. يديها يتعرقو .. وذاتها تتنمل ......

طول الطريق ساكتة .... كانت كتشوف ف المرآة الجانبية ... وعينيها كيعاودو يدورو للجهة الأخرى خايفة يحصلها بالجرم المشهود ....

حتى كسر هشام الصمت و هو كيوجه كلامه ل وليد ..

هشام :~ تتحرك معنا غدا ؟ نتعشاو برة .. انقولها ل عصام منها نيت تشوفو ..

دور وليد عيونه بتفكير و ميل شفايفه ... عاد هز راسه بإيجاب ..

وليد :~ امم.. واخا .. مزيانة

شاف هشام ف شمس من المرآة

هشام :~ شمس !

شافت فيه بانتباه ..

شمس :~ نعم !

هشام :~ تمشي معنا حتى نتي ؟ غاتكون سيدرا و غالباً نجمة ..

ابتلعت ريقها .. و استرقت النظر ناحية وليد .. و عاودات تهربات بعيونها ..

شمس :~ كانظن .. بلاش .. غير خرجتو بصحتكم .. ماعندي فين نخلي هديل ..

غوبش هشام ... وسكت لثوانٍ ..

هشام :~ عادي .. جيبيها معك .. يالاه تبدلي الجو شوية ..

سكتات شوية و هزت كتفيها بقلة حيلة ..

شمس :~ واخا ... ولكن لا بكات نتا لي غاتسكتها ..

ضحك هشام و هو مركز مع الطريق...

حتى توقفات السيارة فواحد الشارع ... قبل ماينزل وليد شاف ف هشام وهز راسه ...

مسح على لحيته وفتح باب السيارة ....

وليد:~ يالاه .. بيناتنا التيليفون... ( شاف ف ساعته) المهم تهلا هاد الساعة ...

دق قلبها عند خروجه ... كأنه انتزع روحها من جسدها .....

دار عندها هشام وتكلم ....

هشام:~ ترجعي هنا ولا تبقاي تما ..

هزات كتافها .....

شمس:~ بحال بحال ....

ديمارا الطموبيل مجددا ... وكأخير التفاتة دارتها مسرعة ..

شافت وليد مازال ف الشارع كيشوف جيهتها ... يديه ف جيبه بوقفته الباردة .... ولكن عيونه الداكنة كانو شاعلين .... ميزاتهم عامرين بمشاعر كثيرة عمرها قدرات تفسرهم ......

اليوم الموالي ..

كانت سيدرا واقفة أمام المرآة .. كتأمل منظرها برضى ... كانت لابسة قميص خفيف ف اللون الابيض ... و سروال جينز تانياه من لتحت .. وبوط ذو كعب عالي فاللون الداكن ...

كانت كتحاول تبان أنيقة ... توحشات أجواء المدينة ... وعاد من نهار تزوجات ماخرحو هي وهشام مع بعض .. كل مشكل كان كيتبعه مشكل الآخر ... من حالها ... لوضع شمس .. ودابا نجمة حتى هي ...

تنهدات بكبت ... وشنو وقع ل نجمة كيخلي الدم يغلي فعروقها .. حتى لو ماتفارقاتش مع عصام ... كانت ماغاتقدرش تقولها ل باها ....

كان مجرد تهديد بسيط ... باش ترد لأختها عقلها .......

أضافت آخر اللمسات على مظهرها ...

وشافت ف هشام وهي مازال كاتقاد الشال ديالها ...

سيدرا :~ غايكون عصام ؟

هز هشام راسه بالايجاب وسد أزرار د قميصه ...

هشام :~ اه... عيطت قبيلة ل شمس قالت ليا راه جايين بزوج ...

عوجات فمها و دورات عينيها بتذمر ...

شافها هشام .. عقد حواجبه ورجع غمزها بتساؤل ...

هشام :~ مالك ؟

زفرات بعمق ... التفت ناحيته وميلات شفتيها ..

سيدرا :~ كون غير قلتيها ليا قبل .. انقولك مانقولوهاش لنجمة ... ( حولات نظرها للجهة المرآة ) مابغيتهاش تلاقا هي وياه ..

قطب جبينه ... وزفر بملل ...

هشام :~ سيدرا ! واش باغا تخنقي البنت ... حتى گاع لاكان عصام .. راها قدام عينيك .. (سد الزر الأخير من قميصه) ماغايقدروش يهضرو بزوج قدامنا ...

مطت شفايفها بحزن وهزت كتافها ...

سيدرا :~ وا.. ماشي باغا نخنقها .. انا غير مابغيتهمش يتلاقاو ... وانا بالسيف باش خليتها تبعد عليه ..

تنهدات وقربات لعنده ... غير ثانية وكانت فردات يديها على صدره .. وطلعاتها كتقاد له ياقة قميصه بحذر .... وكتكلم فنفس الوقت ...

سيدرا:~ نخاف تشوفو وتبدل رأيها و لا شي حاجة ... أنا عارفة نجمة قلبها كيتحكم فيها ... وعارفها كاتبغي عصام ويمكن كيعجبها ... ولكن عصام ..

قبل ماتكمل كلامها هشام كان هز حواجبه بزوج فيها كتحذير باش ماتقولش شي حاجة على خوه ...

واخا يدير لي دار كيبقى خوه .. واخا يدور فيه هو ويسمعه الهضرة .. مايبغيش شخص اخر يتكلم فيه بالخايب واخا يكون هاد الشخص سيدرا ...

فهمات تحذيره .. و رجعات كاتهز كتافها مرات متتالية بعدم اكتراث ...و كملات كلامها ..

سيدرا :~ عارفاه خوك ا هشام .. ولكن هو آذى ختي .. ختي الصغيرة... شنو بغيتي نقول !! أنا المرة اللولة قلتها ليك وقلتها ليها ..

بعدات عليه ورجعات قدام المراية .. مخليا عينيها ف عيونه ...

سيدرا:~ خوك تفلى عليها .. وانا ماغانخليهش ... الا بغاها للمعقول كيعرف دارنا ...

قرب ناحيتها بخطوات ثقال .. حتى قطعات كلامها .. وردات باقي الحروف من حلقها ...

وقف قدامها .. دار يديه موراها وهز هاتفه من فوق المنضدة .. وفنفس الوقت طبع قبلة مطولة على جبينها .. خلاتها تغمض عينيها وتبتسم بارتعاش ...

هشام :~ نسدو هاد الموضوع دابا .. ماشي وقته .. وانا غاننزل كانتسناكم لتحت ..

تنهدات بكبت ..و هزات راسها من الاسفل للاعلى ... كدليل على جوابها ...

راقبات هشام حتى غادر الغرفة ... عاد تحركات من مكانها .. هزات حقيبتها و لبسات معطفها كان طويل و فاللون الرمادي .. وخرجات من البيت ..

مشات كاتدق على نجمة ف غرفتها ... وحلات الباب بشوية كاطل عليها ..

سيدرا :~ نجمة .. !

كانت نجمة مازال ف سريرها مغطية وكاتتفرج ف التلفاز ... شافت فيها سيدرا بتعجب ..

سيدرا :~ مازال ماوجدتي ! راه هشام لتحت كيتسنا .. غانتعطلو ....

ردات عليها نجمة بدون ماتلتفت ناحيتها ..

نجمة:~ مابقيتش باغا نمشي .. غير سيرو ...

تجاهلها عصب سيدرا ..

طفات سيدرا التلفازة وقربات عندها ...

سيدرا:~ ماباغياش تمشي تبدلي الجو غير شوية ؟

عضات نجمة على شفتها السفلية وبقات قالبة وجهها ...

نجمة:~ لا ...

ربعات سيدرا يديها ... وتلاشات ابتسامتها ...

سيدرا:~ واش مقلقة مني ؟

ميلات نجمة شفايفها ..

نجمة:~ لا ..

سكتات شوية .. وصوتها خرج شبه مستهزئ ...

نجمة:~ علاش غانتقلق منك ؟ نتي كتعرفي مصلحتي كثر مني ...

تلاعبت سيدرا بلسانها داخل فمها ... وحسات بالراحة من قرار نجمة باش ماتمشيش ... كأن رغبتها تحققات .. لكن حاولات تحافظ على هدوء انفاسها ..

سيدرا :~ ودابا علاش ماغادياش !! ياك كنا غاديين.. شنو تبدل ؟

عوجات نجمة فمها ... ودارت شافت ف سيدرا و هي هازة حاجب واحد ... تكلمات بنفاذ صبر ..

نجمة :~ مابقيتش باغا .. ياه ! انا عيانة .. بغيت نرتاح .. (هزات راسها وخرجات عينيها) بغيت نراجع لي فاتني .. هادشي لي كاين ... واش ممنوع عليا يتبدل لي ف بالي ؟

تعصاب سيدرا مجدداً من طريقة نجمة ف الرد .. ونظراتها .. لكن مابغات تخلق حتى مشكل ف هاد اللحظة ...

هزات يديها باستسلام ...

سيدرا :~ صافي صافي .. غاضربينا .. ضبري راسك .. هانا مشيت ...

وصلات قدام الباب .. التفت لها .. لقاتها قالبة وجهها .. زفرات بصبر ...

سيدرا:~ الماكلة ف الكوزينة .. دابا غاتقدري تنوضي ليها ... والا خصاتك شي حاجة ولا قنطتي عيطي عليا نرجع ...

سدات عليها البيت وخرجات زعفانة .. هي مارفضاش فكرة عصام ونجمة مع بعضياتهم .. رافضة منحى علاقتهم .. والطيش لي كيعيشوه بزوج .. حتى علاقتها مع توفيق كانت جدية كثر من القياس ...

نزلات عند هشام لي كان كيتسناها ... شافها ركبات بوحدها .. وبدا كيشوف من النافذة ..

هشام :~ فين ختك ؟

عضات على فمها بارتعاش ..

سيدرا :~ ماغاداش ...

تغيرو ملامحه .. وشاف فيها كيقرا ملامح وجهها المغلفة بقناع بارد ...

رطب حلقه ... وعقد بين حواجبه ..

هشام :~ سيدرا !!! شنو قلتي للبنت !

دارت عنده وخرجات عينيها فيه ...

سيدرا :~ هاء ! شنو سيدرا ؟ ..ماقلت لها والو لقيتها ماباغاش حتى تخرج .. شنو بغيتيني ندير .. !

ضيق عينيه .. وزاد ثبت عيونه فتعابيرها ...

هشام:~ ماقلتي لها والو ؟

ميلات شفايفها بحزن ...

سيدرا:~ غير تهنا ماقلت لها والو ...

حرك راسها بقلة حيلة ... وديمارا ... واتجه ناحية المطعم لي اتفقوا يتعشاو فيه...

كل دقيقة كانت كتمر .. كتأمل الظلان الدامس برا من النافذة ... كيبانو لها المشاكل مابغاوش يساليو .. وكلشي معكس ... من غير علاقتها مع هشام هي لي ثابتة نسبياً ..

حسات بيديه الدافئة .. توضعات على ركبتها مفيقها من سهوتها ...

هشام:~ شنو واقع ؟

ابتسمت بشرود ..

سيدرا:~ والو ...

تنهدات بعمق .. وشردات مجدداً .

فنفس اللحظة كان رد يديه على كفها لي فوق قماش معطفها.. وأصابعه الطويلة .. كيداعبو الخاتم الرقيق لي على بنصرها ....

بلا ماتحس كانت الابتسامة ترسمات على شفايفها ..

فالوقت لي وصلو فيه ...

نزلات سيدرا هي الاولى .. عاد مشى هشام يركن السيارة ...

فنفس الوقت كانت شمس يالاه داخلة .. وهازة هديل ...

قربات منها سيدرا .. وسلمات عليها بحرارة ... وخدات من عندها هديل .. كتبوس خدودها باشتياق ...

سيدرا:~ وشحال توحشتها .. (شافت ف شمس وابتسمت ) لاباس عليك ؟

هزات شمس راسها بامتنان ...

شمس:~ الحمد الله ونتي ..

سيدرا:~ الحمد الله ...

مررات شمس لسانها على شفتيها بخفة ... ونطقات بإحراج ..

شمس:~ كيف بقات نجمة ؟ بغيت نجي نشوفها ولكن . ( هزات كتفها الايسر ) راكي عارفة الوقت ماكاينش يالاه جيت ....

حركات سيدرا وجهها بتفهم ....

سيدرا:~ عارفة لي كاين ... وان شاء الله كلشي غايكون بخير ... ( دغدغت هديل بأنفها حتى ضحكات ورجعات شافت ف شمس ) نجمة شوية الحمد الله .. ماتقصحاتش بزاف ...

يالاه بغات تجاوبها شمس ... كان قرب منهم عصام .. ووقف خلف شمس ... وعيونه جاو نيشان فعيينين سيدرا ...

رمقات عصام بنظرات مشتعلة .. ونيشان عقلها مشا للطبايع لي لقاتهم ف عنق نجمة .. زاد الدم حار يغلي ف أوردتها ... وعقلها ولا كيفكر بسرعة ...

حاولت تهدأ راسها بلا ماتبين قدام شمس .. زيرات على هديل فحضنها .. ودارت تشوف واش هشام جاي بان لها باقي غابر .....

حتى عصام كان كيبادلها نفس النظرات النارية ..

شافتها شمس فين كاتشوف ... والتفت .. كان عصام واقف موراها ... حسات بيهم بزوج باغيين يهضرو مع بعضهم .. كأنهم وصلو لنقطة النهاية ... وغير ثوانٍ وغايبين كل طرف انفعاله ..

اعتذرت بلباقة ....

شمس :~ امم .. انا جاية .. غانرجع دابا ...

بغات تهز هديل من عند سيدرا.. وحركات سيدرا راسها بنفي ... وتكلمات بخفوت ..

سيدرا:~ غير خليها ....

بعدات شمس ... وسيدرا قربات بزوج خطوات ناحية عصام .. هزات راسها فيه ... وتكلمات بتهكم..

سيدرا:~ لاباس عليك ؟

حرك حواجبه بلامبالاة بلا مايجاوبها كيستناها تقول شنو بغات ...

بروده ماساعدهاش باش تبدا .. ضغطات على راسها كثر ...

سيدرا:~ كيف بقيتي ؟

مالت زواية فمه بقسوة ..

عصام:~ مزيان ... (دار يديه ف جيبه ) ونجمة مزيانة ؟

مع ذكره لإسم نجمة عقدات حواجبها ... بلا ماتفكر زوج مرات .. ودخلات نيشان ف صلب الموضوع ..

سيدرا :~ نجمة ؟ ( ميلات فمها ) الا بغيتي نجمة مادورش بيها برا ... عارف دارهم ... وعارف واليديها وقبيلتهم.. (زمت شفتيها بامتعاض ) أما باش تبقى تخرجها ف نصاصات الليل .. ماعندها معنى ... نجمة جات تقرا وتسطاجي عندك فاللول ماشي على ود شي حاجة أخرى ا عصام (سكتات شوية .. كترد أنفاسها اللاهثة .. ) .. الا ساق بابا الخبار غايوقعو لها مشاكل كبار ... نتا غايكون كلشي عندك عادي .... حنا لا .... ( كررات كلامها بتأكيد كتشدد على كل حرف بقوة ) الا باغيها كتعرف دارهم .....

مع كل كلمة كانت كتقولها .. مفاصله كينقابضو ...

ماقدراتش تفسر صمته .. الشيء لي خلاها تحرك حلقها بقسوة ...

سيدرا:~ ودير نجمة بلاصة ختك ... واش تبغي لها هادشي ؟ ...

هزات حواجبها كاتتسناه يجاوب على سؤالها ... لكن كان ساكت ..

واخا هو جوابه على طرف لسانه لكن كلامه غايجرح سيدرا ... و غادي يخسر علاقته هو وهشام ...

ابتسمت بدون نفس ملي ماجاوبش .. وكملات كلامها بإصرار

سيدرا :~ ماغاتبغيش لها هادشي ... ياك ؟ حتا أنا هاديك ختي ... ومانبغيش لها شي حاجة بحال هادي .... (عنقات هديل كثر ل عندها وضيقات عينيها بتساؤل ) نفكرك شنو درتي ل ياسين حيت آذى شمس ختك ؟

غمض عينيه بقلة صبر ... ومابقاش قادر يصبر..

عصام :~ سيدرا ... ماتخلطيش الأمور .. حتى حاجة ماكتشبه للأخرى ...

هزات راسها .. ووسعات عينيها لي شاعلين بمشاعر عنيفة .....

سيدرا :~ لا نخلط الامور .. ولا حيت نجمة ماعندهاش خوها لي يوقف معها ؟ ( ابتسمت بألم وضغطات على الحروف لي كيخرجو من جوفها ) ماتخافش .. موراها ختها بحال الجبل .. ولي غايآذي شعرة منها .. غانآذيه حتى انا .. ونهشو بسناني ..

حسات بالهوا البارد كيجرح حلقها ... وكل كلمة كتخرج من بين انفاسها حارة .. صادقة .. وكتساوي الحرقة لي حسات بها ملي شافت نجمة فهاد الحالة .... وملي ساقت الخبار بالكسيدة .... الكذبات المتتالين لي كيخرجو من فم نجمة فكل مرة .....

غمضات عينيها وعاودت فتحاتهم ... عاد تكلمات ...

سيدرا:~ حمد الله اعصام .. نتا لوسي .. وباقي تايقة فيك .. ومابغيتش نوض الصداع .. ( رفعات حاجبها الأيسر .. وتنفسات بعنف ) ولكن كون كان شي حد اخر..غانوض الصداع بين زوج قبايل بيدي هاد المرة .. كون فكرتي تلعب بها ....

تنفس بعنف ... وبغى يدافع على نفسه .. كيحس بكلشي تراكم عليه دقة واحدة ... والشيء لي عصبو انه ماوضحش علاقته الجدية مع نجمة من الاول ...

قبل مايهضر ... سيدرا كانت اسرع منه .. وماعطاتوش الفرصة فين يبرر ويشرح...

خلاها تكلم على راحتها ... حتى يقدر من بعد يوضح الأمور ويفاتحها فموضوع الزواج بنجمة ....

مررات لسانها على شفتيها ....

سيدرا :~ بعد من ختي ا عصام .. بعد منها ... الا ناوي تفلى .. ومازال مطول فهادشي .... نجمة ماشي ديالك ... ( دورات عينيها ) مانبغي لا نشوف و لا حتى نسمعك كادور بيها ..

سكتات شوية كترد أنفاسها ... وهي كاتشوف هشام جاي ناحيتهم .. عرفاته غايعيق بيها هضرات مع عصام على نجمة ....

مسكات شفتها السفلية بين أسنانها ....

سيدرا:~ هشام جاي بلا مانكبرو الموضوع كثر من هكا ... (حاولت تبتسم بصعوبة قبل مايوصل هشام ) وأنا قلت لك لي عندي ..

حاولات تبتاسم واخا الضحكة كانت كتزلق من فمها .. وتتلاشى فنفس الثانية ...

هادشي لي قالته تطلب منها جهد نفسي طويل ولكن كانت باغيا توضع النقط على الحروف وتحط ل عصام حدوده مع نجمة ...

وكانت كتنتاظر غير الفرصة باش تلاقا ب عصام بوحدها ....

قلبات كلامها مع وقوف هشام ..

ابتسمت باصطناع ولكن كلامها كان صادق وخارج من قلبها ...

سيدرا :~ مايكون عندك باس .. عطي ل راسك الراحة شوية ...

هشام شاف ف سيدرا و ف عصام .. و قدر يلمح الغضب ف عيون شقيقه ..حط يديه على كتف عصام و حرك عيونه بتساؤل ..

هشام :~عصام !!

دور عينيه كيشوف ف هشام ... و فهم من تواجدهم بزوج وغير بوحدهم .. أن نجمة ماجاتش معاهم ...

زاد الغضب شعل فالداخل دياله .. ومجيئه لهنا صدق على والو ... كون ماقالتش ليه شمس ان نجمة غاتكون .. ماكانش غايجي ... لكن كان مكلخ مني تيق انهم ايخليهم يتلاقاو ..

خصوصا بعد النص الطويل لي عرضات عليه سيدرا ....

عصام :~ انا غادي .. ( ربت على كتف هشام ) تهلا ..

عقد هشام كواجبه باستفهام ..

هشام :~ فين غادي ؟؟

حرك عصام المفاتيح فيديه ...

عصام :~ انا جيت غير نوصل شمس .. عندي واحد البلان ... ضروري خصني نمشي ...

بعد عليهم ديك الساع واكتفى انه يهز راسه ل هشام باش يطمأن ...

هشام شاف ف سيدرا بتشكيك .. وملامحه تغيرو ...

هشام :~ شنو قلتي ليه ؟؟

بلعات ريقها بتوتر ... سكتات شوية ورجعات هزات حواجبها بقوة ..

سيدرا :~ امم .. والو... سولت فيه و صافي ..

قرب منها كثر وضيق عينيه ..

هشام:~ سيدرا ...

زفرات بصبر ...

سيدرا:~ نتا براسك سمعتيني كنسولو ... وهو سولني كيف بقات نجمة هذا ماكان .... ( ميلات فمها ورطبات حلقها ) وأصلا شمس كانت هنا ...

بغا يهضر .. مدات ليه هديل باش تلفو ...

سيدرا:~ شد شد هديل خصنا نشوفو شمس فين مشات ...

تزير حلقه .. ومابغاش يحكر عليها هنا ... وكيف كيبغي ديما مشاكلهم يتحلو فالمنزل ...

باس هديل ... وشاف ف سيدرا ...

هشام:~ فين مشات ؟

هزات كتافها بعدم إدراك ....

سيدرا:~ عاد كانت هنا ...

سيجارة وراء الأخرى ... وكانو كيشكلو أمامه سحابة كثيفة من الدخان ... طعم النيكوتين اللاذع كيهبط مع حلقه ... مخلط مع ذرات الكربون ..

واقف وحده .. يديه اليسرى ف جيبه والاخرى كيوصلها لفمه وكينفث الدخان مع أنفاسن ....

كانو الدقائق ماباغينش يمرو ... كيستنى بشوق .. بلهفة .. وبقلب مرتجف .. كأنه رجع لإثنى عشر سنة اللور ولا أكثر ....

انتظاره الطويل هنا .... فكره فالأيام لي كان كيستنى بصبر .. تشرق عليه شمس ....

وتخليه يتمنى الدقائق لي غايشوفها فيهم يطولو ... يروي عطش نظراته .... ويشبع جوع قلبه المتعب ....

سحب يديه اليسرى من جيبه ... وفردها تحت ضو القمر .. كيتأمل الخاتم الرقيق لي بقا ليه من ذكرياتها .. وذاته كترجف أكثر ... بمشاعر عنيفة ... كان حاول يقيديها داخله ودابا رجعات تنهش ضلوعه ....

واش شي نهار غايقدر يلبسو لها بيديه ... ! ويقبل أصابعها كيفما تمنى ... يمسكهم بدفئ وعمرو يفلتهم .... !

مابقاش عارف ب اشنو خصو يحس .. !

واش بشمعة الأمل كتشعل فقلبه حيت شمس غاتطلق ... ولا بالإنتظار كيزيد يطول... لونه قاتم بحال الدم وطعمه مر كيف السم ...

:~ مازال كتكمي ....

صوتها كان خلفه .... عقد حواجبه .... وعينيه تلقائيا بحثو عنها ...

كانت واقفات وراءه .. خطواتها مترددة وثقيلة ... كأنها مازاعماش تقرب ومترددة ...

لقا راسه كيبتاسم ... وكيرد عليها بدون شعور ...

وليد:~ شي مرات ..

كانت باقي السيجارة فيديه .... والاحتراق كيشعل فذاته بالكامل هاد المرة ... اللون الرمادي ناسبها بشكل مؤلم لحواسه ....

قربات حتى وقفات جنبه ... وزمت شفتيها

شمس:~ واخا وليتي طبيب ... وعارف الأضرار د هادشي ...

استنشقت الريحة ورجعات قلبات أنفها باشمئزاز ...

ضحك بدون شعور من ردة فعلها ...

وليد:~ ونتي مازال ماكتحمليش ريحة الدخان ... ( عض على فمه وزفر بحرارة) نفس شمس د شحال هادي ...

تنهدات بعمق ... واحنت راسها بلا ماتشوف لجيهته ...

شمس:~ هادشي قديم ومازال عاقل عليه ...

زير على جفونه ... وبقا كيشوف فنقطة محددة ...

وليد:~ مازال مانسيت والو .. (سحق السيجارة برجليه تقلب وشاف فنصف وجهها ) الوقت ماكيقدرش ينسي كلشي ...

تقلبات حتى هي لعنده وعيونه القاتمة تواصلو مع مقلتيها .....

دق قلبها ... مررات لسانها على شفتيها ...

شمس:~ كيقدر يداوي على الأقل ....

تنهد .. وتحركات عضلة فكه بتشنج ..

وليد:~ مانظنش ...

ضحكات بألم ...

شمس:~ حتى أنا مانظنش .. (ردات شعرها ورا وذنيها ودمعو عينيها بلا ماتبين) كنت غير كنحاول نقول شي حاجة عندها الفايدة ..

تحركات غصة واضحة فحلقه ...

وليد:~ كلشي مزيان ؟

شبكات أصابعها مع بعضياتهم ....

شمس:~ حسن من شحال هادي ..

فهم جوابها .. هز راسه بإيماءة صغيرة ...

حاول يبتسم ... ومايخليش الصمت يطغى على هاد الموقف لي كان كيتمناه من شحال هادي ... يوقفو غير بزوج واخا مايهضروش ... يتأملها غير على خاطره .. ويحس براسه عنده الحق ...

شدد ف تفاصيلها الصغيرة .... ذيل حصانها الأسود المرتب خلف عنقها بعناية ... رقتها ... وهشاشتها ....

الا زير على يديها .. غاتهرس بين كفه ..

صورتها مازال ماتبدلاتش قدامه .... باقي كتبان ليه كتجري لعنده .. صغيرة ... والابتسامة ماكتفرقهاش ..

قدر يميز حلقها لي كيتحرك مرارا وتكرارا وماقدرش يستوعب شنو كتقول ... كان غير كيحدق فيها .....

حتى عاودت حركات فمها عاد .. هز راسه ببطئ .. باش تعاود كلامها ....

شمس:~ قلت لك واش غاتبقى واقف هنا ؟

مرر لسانه على شفتيه ...

وليد:~ غاندخل دابا ...

مسحات على عنقها بتوتر ... وزيرات يديها لعندها ... كتضم راسها ...

وليد:~ فيك البرد ؟ ..

حركات عينيها بإحراج .. وفمها تحرك ب ااه .. غير مسموعه ... فقط حركة من شفتيها ...

بغا يعطيها سترته .... تدفى بها ... وتلصق فيها ريحتها .. تبقى عنده ذكرى اخرى ديالها ...

ولكن لقا لا المكان ولا الوقت مناسب لهادشي ...

ابتسم .. وهز راسه بقلة حيلة

وليد:~ اذاً خلينا ندخلو الجو دافي لداخل ...

من بعد ما غادر المطعم كانت حاجة وحدة شاغلة تفكيره ..

نجمة ... ! نجمة فقط يقدر يستغل هاد الفرصة و يمشي يشوفها ...

ماعرفش كيفاش حتى كان اتخذ قراه باش يهضر معها .....

وصل قدام العمارة فين ساكنة ... هز هاتفه وكيقرا اسمها ... حتى كيقرب يضغط على رقمها لي أمامه على الشاشة .. وكيتراجع ...

ماعرفش علاش .. لكن ولا كيحس بسبب وجود سيدرا وهشام بقربها ... ولات نجمة بعيدة عليه ..

لدرجة انها كاتتجاهل رسائله و اتصالاته .. كأنه ماكيعني ليها والو ...

طول الساعات الماضية ... مابقى ماقادر يدير والو .. عاجز ويديه مكبلين ... ماباغيش يحطها فالمشاكل كثر من هكا ....

ماقدرش يقاوم اشتياقه ليها ... توحشها .. توحش صوتها ... توحش ريحتها .... توحشها كلها .... كل خلية فيه كأنها كاتهتف باسمها ..

ضغط على زر الاتصال هاد المرة بدون تردد ... و دار الهاتف ف ودنيه ... كيتسنى يسمع غير كلمة من عندها .... تبرد العافية لي شاعلة بين ضلوعه ....

كانت هي مازال ممددة على الفراش كيفما خلاتها سيدرا كاتتفرج بملل ... حتى سمعات صوت هاتفها ... هزاتو ...

كان اسم عصام ظاهر على الشاشة بوضوح ... دقات قلبها تسارعت .. ويديها بداو كيرجفو بقوة كيف كل مرة ...

هاهي عندها دابا الفرصة تهضر معه بحرية ... ماكايناش سيدرا .... ماكاينش هشام ... ماكاين حتى واحد ... لي يقدر يمنعها .....

رغبتها حتى هي باش تسمع صوته قوية ....

لكن العهد لي عطاتو ل سيدرا كايتردد ف مسامعها .... ضغطات على جفونها ورفضات المكالمة ....

عصام شاف ف الشاشة ... و تنفس بعنف .. كتب لها رسالة ف الحين و هو معصب ...

عصام :~ " يا غاتجاوبي يا غانطلع عندك "

قرات رسالته و قلبها انتفض بعنف ... ناضت من فراشها ... و مشات ناحية النافذة .. طلات غير من الشق... ولمحات سيارته أمام البناية ...

حركات راسها من اليمين لليسار .. و عضات على شفايفها ...

يدها حطاتها على قلبها بقوة الخلعة .. بان ليها خرج من سيارته ... وسد الباب بعنف ... كيشوف يمين ويسار ... ومتجه نحو العمارة ...

عيونها دمعو بقوة الخلعة .. وبدات كاتخاطب راسها ..

نجمة :~ تت ... قفرتها .. ايجيو .. ايجيو دابا ... ايشوفوه ...

خرجات من بيتها .. ووقفات حدا الباب و دايرة اذنيها عليه .. كاتسمع صوت الخطوات ..

الصوت غير غادي و كيقرب ... حتى تدق الباب فوق وذنيها ... حسات بقلبها ضرب مع كل دقة ...

عصام :~ نجمة ... حلي ..

ابتلعت ريقها ... دارت يديها على فمها .. وتكلمات بهمس ..

نجمة :~ شنو اندير ... شنو !!! اوففف ..

عصام حط يديه على الباب وزاد تكلم بالجهد ..

عصام :~ نجمة .. حلي غير نهضر معك ..

غمضات عينيها مترددة ... حتى لقات راسها كاتجاوبو ...

نجمة :~ عصام .. سير .. سير فحالك ...

سماع صوتها من بعد هاد المدة خلاه يغمض عيونه... ويخرج نفس طويل من بين ضلوعه ....

عصام :~ غير انهضرو ... نجمة i promise ...

حركات راسها بنفي ...

نجمة :~ مانقدرش ... مانقدرش غير سير فحالك ... لا جاو غادي تجبد لي الصداع ... انا ...

سكتات. ... وردات يديها على قلبها ...

عصام :~ حتى زوج دقايق لا ؟ ( ضيق عينيه) ماغايقدر يجي حد دابا ...

صمتها كان هو الجواب ... عقد حواجبه ...

عصام:~ اوكاي .. اوكاي .. هانتي .. لابغيتي نمشي ... غادي ننزل ونعيط لك وغاتجاوبيني.... (زاد قرب من الباب) وغاطلي عليا من الشرجم باش نشوفك ...

بللات حلقها .. وهمسات بألم ...

نجمة :~ عصاااام ...

رد عليها بصبر ...

عصام :~ مابقى عندي مانخسر .. لا مادرتيش هادشي و الله حتى نبقى هنا حتى يجيو ...

تكات على الباب ... كأنها غاتسمع أنفاسه قراب لها ... باغيا تخرج لعنده ... ولكن كلام سيدرا كيضرب ف بالها وكتشوف أن جزء كبير منه اقتنعت بيه .....

مررات لسانها على شفتيها ... ونطقات بصعوبة ...

نجمة:~ واخا .... هبط دابا .... عفاك ....

غير ثانيتين وكان اتصل بها ... زيرات على الهاتف بين أصابعها ...

ومشات جهة النافذة لي فغرفتها .... كتطل على برا .... وقفات خلف الستائر الشفافة ... والهاتف مازال بين يديها ... ورقم عصام كيطلع على الشاشة .....

رن المرة اللولة ... والثانية عاد جاوبات ..

ملي فتحات الخط .. انفاسه المتحشرجة هما لي وصلوها اللولين ....

غمضات عينيها وتنهدات بآلم واشتياق ..

بقات ساكتة وحتى هو كذلك .. حتى ردات البال ل جسده الضخم خرج من العمارة وواقف برا ....

عاد حيدات الستائر وفتحات النافذة ونيشان عينيها جاو فعينيه ...

فنفس اللحظة همس بأنفاس حارة ..

عصام:~ توحشتك ..

تنفسات بارتعاش .. بلا ماتفكر مرتين كانت ردات عليه ....

نجمة:~ حتى انا ....

البوح باشتياقها ليه حتى هي اثلج صدره ... وخلا كل ذاته تشعل ...

بقا ساكت .. كيزفر بحرارة وكيشوف جيهتها .... ونبرته كانت جدية ...

عصام:~ بغيت نهضر معك ...

قوسات فمها .. وشتات نظراتها

نجمة:~ كنسمعك ..

دار يديه ف جيوبه .. وهز راسه ...

عصام:~ وجه لوجه ..

ميلات فمها ... وبغات تخرج .... لكن رجليها تجمدو فالأرض ... ماقدرات دير حتى ردة فعل ...

نجمة:~ مانقدرش نخرج دابا ... مشا الحال ... ( زيرات على جفونها ) ونتا عارف حتى حد ما فالدار ...

تفاحة ادم تحركات فحلقه ..طالعة نازلة ... وعاود شاف فيها ...

عصام:~ علاش ماجيتيش ؟

حسات بنظراته قراب منها وكيحرقو ذاتها ... واخا كانو بعاد وماتقدرش تميز حتى تفاصل وجهه المظلمة ..

قوسات فمها بوجع ...

نجمة:~ مابغيتش ينوضو شي مشاكل ليا وليك ... (دمعو عينيها وتخنق صوتها ) سيدرا ماغاتفهمش الوضع ... وانا مابغيت حتى حد يعرف بهادشي ...

دارت راسها على النافذة .. واطبقت على أنفاسها ....

نجمة:~ كنتي تقدر تبقى ....

ابتسم بسخرية .. وزير على قبضة يديه ...

عصام:~ ماكان عندي ماندير تما بلا ماتكوني ...

حركات فمها بشبه ابتسامة صغيرة .. وغطات شفتيها بأصابعها ....

عصام:~ غدا باغي نهضر معاك ... مزيان ؟

ميلات حواجبها بانزعاج ...

نجمة:~ تت..

عصام :~ شنو تت ؟؟

زفرات بصوت مسموع...

نجمة:~ ماغانقدرش ... وو ..

قاطعها بصوته المغلف بالجدية مجدداً ...

عصام:~ خمسة دقايق لي محتاج ...

هزات راسها بصمت كأنه غايشوفها ... تنهد بحرارة ... ونطق ..

عصام:~ كنبغيك ا نجمة ...

قطع الاتصال .. فنفس اللحظة ...

شافت ف شاشة الهاتف ... وحركات فمها بهمس ثقيل ....

نجمة:~ حتى انا كنبغيك ....

ابتسمت بشرود ..... ورجعو عينيها يبحثو عنده لتحت .... بقات مدة طويلة واقفة كتأمله تحت سواد الليل ...

وهو واقف قدام سيارته عينيه عليها ... كأنهم كيتواصلو غير بالنظرات .... بلا كلام ... وبلا مايكونو قراب

شمس وسيدرا تلقاو ف باب الريسطو ...

مسكات سيدرا شفتها السفلية بين أسنانها ملي شافت شمس قريبة ... وكتقرب ناحيتها ...

عقدات حواجبها .. وابتسمت بقلق ...

سيدرا:~ فين مشيتي ؟

التفت شمس وراها ... وشافت وليد واقف .. كان بعيد عليهم نسبياً ..

ارتعش قلبها وتحرجات من الموقف ...

كيبان لها باقي مركز معها .... وتفاصيله الرجولية كيبانو لها اكثر تأثير تحت الضوء .... وكيزيدو يتغلغلو تحت جلدها ...

هزات راسها ..

شمس:~ فين هديل ؟

دارت سيدرا يديها على مرفق شمس ...

سيدرا:~ ماتخافيش عند هشام ..

ابتسمت شمس بإمتنان .. ورجعات التفت عند وليد ....

التفت سيدرا حتى هي مع ردة فعل شمس ... ابتسمت ل وليد بود .. وهو كذلك ...ورجعات شافت ف شمس ..

سيدرا:~ عيت مانقلب عليك ..

حركات شمس حلقها ... وغامو عينيها بمشاعر عنيفة ...

شمس:~ تلاقيت وليد برا ... ومارديتش البال .. ( تنهدات بحرارة) كيفكرني ف شحال هادي ... وعاش قريب منا ....

قلبات سيدرا عينيها كتقلب على هشام ... لي قال لها تسبقه .. وهو غايقلب على شمس ...

ورجعات شافت ف وليد ...

سيدرا:~ اااه عارفة .... قالها ليا هشام ... ( دارت لعندها وغمزاتها ) جا بوحدو ؟

حركات شمس حواجبها باستغراب ..

شمس:~ ااه .. علاش ؟

ضحكات سيدرا بمكر .. وقربات عندها كتهمس بشوية ...

سيدرا:~ قلت غايجيب معاه الطبيبة اسراء لي ديما معاه .... خطيبتو يمكن ... ( هزات كتافها ) ولي غاتولي مراتو يمكن ... مانضنش واش كانت تفلت شي فرصة باش تجي معه

شعور مرير خنق قلبها .. وغصة حامية استوطنت حلقها ... عارفة سيدرا ماعارفاش بعشقها المستحيل ل وليد ...

نطقات بفتور ...

شمس:~ باقي ماشي مراتو ... وحتى هو مادايرش الخاتم ... ( ابتسمت بشحوب وتنهدات باختناق ) وكون كانت شي حاجة كنا غانعرفوها حنا اللولين ... ( ميلات فمها ) خصوصا هشام ...

هزات سيدرا كتافها ...

سيدرا:~ وا هادشي لي كان قال ليا هشام شحال هادي .. والله اعلم .. يمكن حتى هو تقلب على هاد إسراء عاوتاني .؟

ارتعشت شفاه شمس السفلية بتوتر ..وشعور غريب بالراحة كيتسلل لقلبها ..

هزات كتافها بعدم إدراك ..

شمس:~ مانعرف ...

بلعات سيدرا ريقها .. وضحكات ...

سيدرا:~ هاد الرجال مافيهم ثقة حتى كيوصل الصح الصحيح عاد كيبان لهم انهم تسرعو فالزواج .. ( سكتات شوية وأضافت بعدم اهتمام ) عاد كيحلاو لهم البنات والقصاير ... وكيبان لهم المستقبل ديالهم لي من ألفين مافكرو فيه يقادوه .... ومانعرف شنو ...

ضحكات شمس رغماً عنها .... وغير ثوانٍ .. حتى كان هشام اقترب منهم مازال هديل معلقة فيه وكتلعب بوجهه .. معه وليد ..

شافت فيه سيدرا مطولاً .. ملي وصل حداهم ...

حرك حواجبه ...

هشام:~ اش واقع ؟

همسات بخفوت ...

سيدرا:~ والو ...

دخلو للداخل ... الطاولة د العشاء كانت بعيدة .. فمكان هادئ ... كيطل على الجردة لي كاينة ف الخلف ....

جلسات سيدرا .. ومقابل لها هشام ... وجنب هشام كان جالس وليد ... ومقابلة معه شمس .... وبينهم جالسة هديل ف كرسي خاص بالاطفال.....

حسات شمس بالإحراج كيزحف على ضلوعها من وجودهم هي وليد على نفس الطاولة بعد هاد السنوات كلها ...

كلما شاف فيها .. كلما قلبها دق اكثر .. ومشاعرها تدفقو بشدة .. نظرة واحدة من عنده كتدغدغ حواسها بوحشية ...

بغات تشتت نظرها .. شافت ف هشام وهمسات بتساؤل ...

شمس:~ عصام فين هو ؟

مرر هشام لسانه على شفتيه وشاف جهة سيدرا ..

هشام:~ مابغاش يبقى ... قال عندو شي شغل ...

ردات باستفسار ... وعينيها باقي على هشام ...

شمس:~ ماقال ليا والو من قبل ....

تنهد هشام ... وعيونه مباشرة مشاو لعند سيدرا .. لي هزات كتافها بحركة تقريبا غير مرئية انها ماعندها حتى دخل ف غياب عصام ...

نطق وليد بغا يخفف من الجو المشحون بيناتهم...

وليد :~ عصام من ديما ماعندوش مع هاد الأجواء ..

ضحك هشام .. وابتسمت شمس حتى هي ...

شمس:~ عصام تفكيرو فشكل ... ماعمرنا قدرنا نفهموه ...( شافت ف سيدرا وضحكات ) لا أنا ولا هشام ...

التوت شفاه سيدرا بابتسامة طويلة .. صامتة ... وهي كتسمع لذكرياتهم الكثيرة ولي ماكاتساليش ... مرة كان كيهضر وليد على الماضي .. مرة هشام .... ومرة اخرى كتكلم شمس ... وكل ماعاود شي حد فيه ... ملامحه كيتبدلو كأنه كيرجع سنين للوراء ...

طلبو العشا ... ومع بداو يتعشاو .... مالت شمس شوية على وذن سيدرا ... وتكلمات بهمس ...

شمس:~ شوفي للبلاصة لي مقابلة معاك من جيهتك و بلا ماتعيقي .....

مع كلام شمس ... نيشان دارت سيدرا للجهة الأخرى ... ومع أول نظرة للطاولة المقابلة عقدات حواجبها ...

ومع أول نظرة للطاولة المقابلة عقدات حواجبها ... بقلق .. والنار لسعات أطرافها ....

كانت جالسة شابة .. تكون قدها ولا أصغر منها يمكن فعمر نجمة .... كتشوف جهة هشام بنظرات مطولة ... وغير كتحيد عينيها شوية وكتردهم ... كأنها ماقادراش تحيدهم ...

الغيرة شعلات فقلبها من مجرد التفاتة وحدة ... والدم ولا كيجري حار ف أوردتها

مابغاتش تعيق وتبين لهم .. كثر من ثلاثة د المرات وهي كتشوفها كتكرر نفس ردة الفعل ... وهشام مامانتبهش ...

ضغطات على الشوكة لي فيديها .. وبعدها شفتيها ...

مالت على أذن شمس وهمسات بعصبية ...

سيدرا:~ مالها هادي ؟

قلبات شمس فمها .. وحركات شفتيها باستنكار ..

شمس:~ ماعرفتش ...

ردات سيدرا راسها شوية اللور ... بان لها كل واحد منشغل ف طبقه .. خفصات صوتها كثر ...

سيدرا:~ زعما ماكاتشوفش الخاتم لي فيديه ؟ ولا حنا لي جالسين هنا ؟ ...

أومأت لها شمس بمعنى مانعرف ....

بعدات سيدرا شوية ورجعات تتناول من طبقها بدون شهية ...

والهضرة لي كيقول وليد ل هشام مابقاتش كاع مركزة معها ...

قربات عندها شمس شوية ...

شمس:~ ملي جلسنا .. وهي كادير نفس البلان ...

حركات سيدرا الشوكة فيديها وقلباتها على الراس ..

سيدرا:~ علاش اختي تقوليها ليا دابا ؟ .. ( شافت بنص عين فالبنت .. ولقاتها مازال عينيها على هشام ) كون ماخفت من الشوهة .... كون نضت تفاهمت معها ..

مع نهاية كلامها ... ضحكات شمس بالجهد .. حتى شاف فيها وليد باستغراب ... كيشبع حواسه بضحكتها لي خارجة من أعماقها ..

كان كيظن غابت على شفتيها .... كلما تلقاو كتنزلق من فمها فقط ضحكة استهزاء ومرارة ... أما هادي كانت نابعة من أعماقها ..

مدات يديها باش تمسح فم هديل وفنفس الوقت حتى هو كان سبقها ...

أصابعها الرقيقة وبشرتها ... خلاوه يتنهد باشتياق بلا مايبين ... سحبات كفها .. كتراقبه غير تحت جفونها ...

حتى انتبهت على سيدرا كتهزها من قماش فستانها بشوية ... عاد كيدات عينيها ..

سيدرا:~ مالكي ؟

بلعات شمس ريقها .. وبنص عين رمقات وليد ...

شمس:~ والو ...

وشوشات لها سيدرا بشوية ..

سيدرا :~ شوفي شوفي .. والله مابغات تحشم .. مازال مابغات تحيد عينيها ..

حركات شمس راسها بقلة حيلة ...

شمس:~ تت... ماتديهاش فيها ...

كل كلامهم كان تقريبا غير مسموع .. وحدة كتحرك الشفاه والاخرى كتفهمها .. حتى شاف فيهم هشام وعقد حواجبه ...

هشام:~ مالكم ؟

تحرجات شمس ... وبغات تهضر .. لكن سيدرا سبقاتها .. كانت لقات المبرر هي اللولة ...

سيدرا :~ غير بغيت نعيط لنجمة من عندك تليفوني طافي ...

مد لها هاتفه ... تعمدات تلمس يديه .. وتخليها مطولاً فوق كفوفه ..

شعور بالغيرة بحال السكاكين كان كيقطع أوصلها .. ماحملاتش هاد الموقف .. عارفة هشام ماغاينتبهش للبنت الاخرى .. ولكن داخلها كان كيغلي بدون شعور ....

اكتفت انها ترسل رسالة نصية ل نجمة باش تطمأن عليها ...

شربات الما ووالو .. غير ماكايزيد قلبها يضرها .... حتى هشام عرفاته غايتقلق حيت هضرات مع عصام .. وهو كان قال براسه غايحل الموضوع ... تجاهله اللحظي لها عصبها ... وعاد نظرات البنت زادو الزيت على العافية ...

التفت جنبها للمرة العشرين يمكن ... وبان لها نفس المشهد ... كانت باغيا تبرد هاد الشعور المرير لي كيتكون فحلقها .. طعمه صدأ .. ولنه قاتم ..

بلا ماتحس تلاعبات بعينيها .... وحركات السكين بطرف أصبعها حتى طاح ف الأرض ...

كحزات شوية بالكرسي ...حنات كاتظاهر انها غاتهزو ...

بخفة حركات أصابعها وحلات السنسلة د البوط ديالها .. وخرجات رجليها ...

هزات ديك الساع السكين من الارض و حطاتو على الطبلة ..

مسكات الشوكة بين يديها كاتاكل براحة مؤقتة ... وكاتهز عيونها كاتشوف ف هشام ...

حس بشي حاجة تحطات على رجليه .. عرفهم أصابعه رجليها من الدقة اللولة ...

هز عينيه بانتباه كيشوف فيها ... وعاقد حواجبه ... وهي كانت كاتشوف فيه وكاتبتسم بتلاعب عند عمد ..

نبهها غير بنظراته... و حنحن ...

زادت كاتحرك هي رجليها بمكر واستمتاع .. كتحس بالغيرة لي فقلبها بدات كتهدا وهو منتبه لها وتالف معها ..

ضحكات باستفزاز .. وقلبات شفتيها ...

حاول مايعيقش ... وشاف ف طبقه مكمل على الماكلة دياله بثقل ..

حتى كانت غاتيأس وتحيد رجليها حيت واخا بان التأثر على ملامح وجهه .. ولكن ردود أفعاله بقاو تابتين ...

وحلات ليه اللقمة ..... و شرگ.... بدا كايكح ... شمس و وليد شافو فيه باستغراب .... حاله كان فشكل ... هزات كاس د الما كان قدامها و مداتو ليه . .

سيدرا :~ بشوية عليك ا هشام ...

خدا من عندها الكاس .. وكيتوعدها غير بنظراته .. الشعور به مرتبك ... ومتأثر بتصرفها انعشها بشدة .. وخلا جميع التوتر لي عاشتو هاد الايام يطير

فهاد اللحظات القليلة ...

ردات راسها شوية اللور ... هو كيحدق فعيونها بحرارة وهي بمكر ...

هزات هاتفها من صاكها وشافت ف الساعة عن عمد ...

سيدرا:~ كيبان ليا شعل ...

فنفس اللحظة .. عاودت كررات تصرفها ... وأصابع رجليها مرو على قدمه ببطئ من جديد ..

هاد المرة قدر يتحكم فانفعالاته ... غير وجهه لي كانت قادرة تفهمو ... وتقرا كل تفصيلة صغيرة من تعابيره ...

هشام:~ " غانتفاهم معاك "

طلع لها الميساج دياله على شاشة الهاتف ... هزات كتافها .. وكتبات بسرعة ...

سيدرا:~ "واخا تفاهم معايا ... ملي نخرجو من هنا "

قرا ميساجها .. ومابغاش يجاوبها مازال .. اكتفى أنه يشوف فيها بنظرات تحذيرية ... أما هي خدات راحتها كثر ... وجلسات كتميل على وذن شمس كتهمس لها بالكلام الخاوي وتحاول تضحكها ...

الدقائق لي بقاو بعد ذلك مرو طوال ... واخا كتحاول تبين العكس .. ردات البال ل هشام مافارقوش عينيه ملامحها ... وحركاتها .. وكانت كتعمد حتى هي تشوف فيه بطول وبحراراة ....

كل مرة كيبان لها كيزفر بعنف .. ومابقاش مركز مع وليد شنو كيقول ...

كيستنى غير الوقت يدوز ..

حتى عيا صابر .... شاف ف ساعته بصبر .. ونطق بثبات ...

هشام:~ نجمة بقات بوحدها فالدار ... ضروري خصنا نرجعو ....

ميلات سيدرا فمها بعناد ..

سيدرا:~ غاتكون نعسات دابا ...

تشنج فكه من رفضها المزيف ...

ووليد حتى هو ناض ... هشام هز هديل ... ودفعو الحساب ...

ملي كانو خارجين شافت سيدرا ف هشام جنبها .. ونطقات بكلام مسموع متعمد وجهاتو ل شمس ...

سيدرا:~ كون غير بقينا مازال شوية .. ماسخيتش الصراحة ..

رفعات شمس حاجبها ... كتقارن بين حالتها د قبيلة ومزاجها الهادئ د دابا ...

شافت فيها باستغراب ...

شمس:~ هشام خدام فالصباح ... ووليد يمكن حتى هو خصه يرجع للقبيلة ...

تنهدات سيدرا بملل ... وسبقو هشام شوية ...

سيدرا:~ حتى حنا خدامين ...

ضحكات شمس .. ودارت يديها عند صدرها ...

شمس:~ وشنو هي الخدمة ديالك ؟

عضات سيدرا على فمها وقلبات عينيها

سيدرا:~ الحمد الله خدمتي هي نقلق خوك ..

ضحكات شمس بالجهد مرة اخرى الشيء لي اثار فضول وليد .. حتى التفت لها ...

شافو بزوج ف بعضياتهم بطول ... وسيدرا بقات واقفة قدام الطموبيل بملل .....

سلم عليهم وليد ومشا بحاله ... وقبل مايمشي بحال البارح .. رسل إشارات من عينيه مبهمة لشمس .. قدر قلبها يلتقطهم ويضرب بعنف ....

بغات تركب شمس اللور ولكن سيدرا قاطعاتها ...

سيدرا:~ غير ركبي نتي القدام .. خليني مع هديل ... (شافت ف هشام) توحشتها...

اكتفى هشام انه يزفر .. فتح الباب لشمس .. ركبات ... وسيدرا بقات متكية على الطموبيل ...

شاف فيها باستفهام ..

هشام:~ ماغاتطلعيش ...

حركات كتافها ... وعضات على شفتيها ببطئ ..

تعلات شوية مع الطالون ... مالت عليه وهمسات بأنفاس حارة ...

سيدرا:~ ماتصورش شحال توحشتك ...

ماحسباتش شحال من مرة وهو كيتنفس بنفاذ صبر ... ولكن هاد المرة أكثر ...

بان لها صبره علاين يسالي وهي كتزيد تشعل العافية عن عمد ..

كانت عارفة كيفاش تخليه مأثر بها .. وكتستغل كل نقطة لصالحها ...

مد يديها حتى غطا لها بشرة عنقها بالشال ... وزاد قرب من خدها ..

غمضات عينيها من اقترابه ... وأنفاسه الخشنة كيجيو نيشان على صفحة وجهها ..

هشام:~ غير زيدي عليك فالحساب ...

ابتسمت من كلامه ... فتحات مقلتيها ... وشافت مباشرة ف باب المطعم بانت لها ديك البنت خارجة ..

قلبات عينيها متجاهلة الأمر ... وبقات واقفة على نفس الوضعية ... قريبة ليه ....

وردات ببساطة ..

سيدرا:~ واخا .. كنستنى ..

جرها بشوية ... حتى قالت غايدير شي تصرف ماشي هو هاداك .. لكن كان متحكم ف مشاعره بالطريقة الصحيحة ..

فتح لها الباب بلا مايزيد يتكلم ... اكتفى انه يقطب جبينه .. والباب زدحو بالجهد ...

بقات كتراقب مقلتيه من المرآة .. وهو كذلك ماغفل على حتى تفصيلة فيها ...

حسات بمشاعرها كيتدغدغو بنظراته بوحشية ... وقلبها حتى هو كيدق بالجهد ..

بغات تبرد الحرارة لي شعلات فدمها ....

بلا كاتفكر نطقات بعفوية ...

سيدرا:~ يالاه اشمس تباتي معانا ..

ردات له البال رفع حاجبه .. وصدره طلع ونزل بقوة ..

شمس لي عاد انتبهت .. حركات راسها بآسف ...

شمس:~ خصني ضروري نبقى مع عصام ..

شافت سيدرا جهة هشام .. وداعبت وجنة هديل بأصابعها ...

سيدرا:~ فالصباح ويردك هشام بكري .. (تنفسات بهدوء وأضافت بتأكيد) ياك ا هشام ؟

بانت لها تفاحة آدم تحركات بعنف فحلقه ...

قبل مايرد .. كانت شمس سبقات وهزات راسها بالنفي ..

شمس:~ حتى نسالي ان شاء الله ... ونجي نشوف نجمة ..

ابتسمت سيدرا بارتعاش ... وعضات على شفتيها ...

سيدرا:~ خسارة .. وان شاء الله مرحبا بيك وقتاش ماجيتي .. حتى نجمة توحشاتك ....

ابتمست شمس بامتنان .. وتمتمات بشكر خافت ... ورجعات مرة اخرى تشرد فالماضي ....

غير دقائق وكانت نزلات شمس وصلها ل هشام حتى للباب ... ورجع ..

تأملاته سيدرا من النافذة ... بان لها ب بنطاله اسود اللون وقميجة فنفس اللون .. زادو مشاعرها تأثرو كثر ... بوسامته المتوحشة ... ومنظره الرجولي ... تحت سواد الليل الحالك ....

ركب ... بقا جالس ف مكانه ف السيارة بلا مايديماري .. وهي حاضياه ... وحاضية ردود أفعاله بتركيز .. وتوتر ..

مافهماتش علاش بقا ...

مررات لسانها على شفتيها .. ونطقات بتساؤل ..

سيدرا:~ ماغانمشيوش ؟ غاتبقى هنا ...

التوت شفته العليا بمكر ... وغمزها ببرود ...

هشام:~ ها حنا دابا بقينا غير بوحدنا ...

بقات كتشوف فيه من المراية د الطموبيل .. وملي كيحصلها كتبهط نظراتها لظهره...

ردات بنبرة خافتة ..

سيدرا:~ وانا كنستناك تفاهم معايا ...

طرق بأصابعه على المقود .. ورد عليها بنفاذ صبر ...

هشام:~ رجعي هنا القدام ...

ردات راسها اللور .. وتلاعبت بنظراتها بجرأة ...

سيدرا:~ تت .. هنا مرتاحة كثر .. وعاجبني الحال ....

جبدات كلينيكس .. كتمسح احمر الشفاه الباهت لي بقا عالق على شفتيها .. كتمرر الورق الأبيض على فمها بإغراء ... وكتعمد تعطل ... باش تستفزو كثر ..

حتى تقلب عندها ... وهضر تحت سنانه ...

هشام:~ سيدرااا ...

قربات شوية ... وحطات يديها على قلبها ...

سيدرا:~ نعام ... ياشيخ قلبي ...

عينيه برقو ... بغا يجرها .. عاودت تهربات منه دغيا ... كتضحك ...

عض على فمه معصب ...

هشام:~ ماباغياش ترجعي ل هنا ؟

قلبات عينيها وشافت من النافذة ..

سيدرا:~ لا ..

هز راسه من الاسفل للأعلى و شاف فيها بتوعد... ديمارا الطموبيل ... وكل مرة كتحس بيه كيرسل لها ألف رسالة غير بنظراته الوقحة ....

الطريق بان لها طويل .. والصمت كيطبق عليهم بزوج .. كتسمع غير تنهيداته العنيفة ..

ما وصل حتى سالا عمرها .. فتح لها الباب ... مسك فيديها وجرها ...

غير قربو من باب المصعد .... بدات كتبوحط عليه وكتحاول تعطلو ...

سيدرا:~ هيييه بشوية .. رجلي ضارني ..

زاد قربها ناحيته بلا مايهضر ... ذرات التَّفهم لي كانو بقاو ليه سالاو ...

مع فتح الباب ... بان لها الظلام ... بقات غافلة حتى عثرات مع الباب ..

لكن يديه الصلبة كانت سابقة ..رجع وقفها وزير عليها ...

نطق بصوت أجش ...

هشام:~ بشوية عليك ..

تأفات بالجهد ...

سيدرا:~ اوا نتا جارني بالزربة .. (عقدات حواجبها) ومال الضو طافي ؟

قبل ماتكمل جملتها ... كان دفع الباب بيديه .. وردها جهة الحيط .. تكا عليها ... حتى لصقات مع صدره .. والجدار البارد وراها ...

حطات يديها أعلى صدره ...

عاود كلامها ببرود ...

هشام:~ الضو طافي ؟

تلاعبت بعيونها ... و تكلمات بصوت منخفض

سيدرا:~ ااه غاتكون نجمة ناعسة ...

اقتربو انفاسه ... وريحته المألوفة عندها .. كانت كتداعب حاسة الشم عندها ...

ببطئ قاتل .. يديه تحطو على خصرها ... وفمه كيكتم أنفاسها بقبلته الطويلة ..

بدون شعور .. لقات راسها كتحيط عنقه بيديها .. وكتعلى كثر مع الطالون .. باش توصل ليه .. وباش تستقبل أشواقه الحارة .. لي كيدمغها بها مرة بعد مرة ... حتى كتولي له روحاً وجسداً ...

بعد شوية وشفتيه كيتحطو على وجهها المحموم .... مابقات عارفة راسها واش تغمض عيينيها .. ولا تشد فيديه ...

بدا يحيد لها الفولار ..وأصابعه الطويلة كيمرو على جلدها ... قدرات تهمس بصعوبة ..

سيدرا:~ ماشي هنا .. (غمضات عينيها كتهضر بكلام متقطع) ديني للبيت ...

رجعو اصابعه يمرو على ظهرها ... حتى ولات قريبة ليه كثر ....

هشام:~ توحشتك ...

شفتيها تحركو بابتسامة مابايناش تقريباً ... وبدات كتحل ليه زر قميصه الأول ..

سيدرا:~ حتى انا ..

ابتسم حتى هو ... وحط شفتيها على ارنبة أنفها ... بدات كتضحك .. وكتحس بأنفاسه كيدغدوها .....

وقبل مايهزها ... كان الضو شعل .. ونجمة خرجات من البيت ...

فاللحظة لي شعل فيها الضو وقفات سيدرا مبلوكية .. يديها كانو باقين على صدره .. كتفك ليه ازرار قميصه الأسود ..

حررها هشام ...

تقلبات شوية ....

وسعات عينيها ..واحمر وجهها ملي شافت نجمة حتى هي محرجة .. كتحاول تشتت نظرها .. كأنها متوقعاتش تلقاهم فهاد الوضع ...

الإحراج زاد زحف على ضلوع سيدرا .... وأزرار القاميجة ديالها من الفوق كانو محلولين ... شعرها مشعتت .. وشفتيها متورمين ....

حنات للأرض هزات الشال ودارتو على عنقها .. ماقادراتش تلتافت ل هشام وماقادراش تشوف ف وجه نجمة ..

بلعات ريقها .. والحروف خرجو من حلقها مغلفين بالتردد ...

سيدرا:~ ااه ... نجمة .. ( حنحنات .. وردات شعرها اللور) مازال مانعستي ...

قلبات نجمة وجهها .. ورجليها كتحس بيهم تثبتو فالأرض ..

تلعثمات وبدات كتدخل وتخرج فالهضرة ...

نجمة:~ كنت ... ك ... كنت .. كنت كنقلب على واحد الكتاب ديالي ... ودابا ..

ماقدراتش تكمل كلامها .. حتى كانت انسحبت دغيا ... للداخل وسدات الباب ...

عاد تقلبات سيدرا جهة هشام حاطة يديها على وجهها ... كتبردد خدودها ... وتغبن بصوت منخفض ...

سيدرا:~ ناري .. ناري ... حصلاتنا .. كيفاش غانشوف فوجهها ...

شدها من مرفقها .. وزفر بصبر ..

هشام:~ حصلاتنا ؟ مالي مصاحب معاك ؟

هزات راسها بالنفي .. والكلام خرج ثقيل من جوفها ...

سيدرا:~ لا ... لا ..

بلا ماتفكر وبلا ماتستنى رد هشام ... كانت اندفعت لغرفة نجمة ...

حلات الباب بصوت مسموع .. وقربات بتردد ...

سيدرا:~ نجمة ؟

شافت فيها نجمة وحطات تليفونها ...

نجمة:~ امم ... شنو ؟

شبكات سيدرا أصابعها .. وشافت جهة الباب بقلق ...

سيدرا:~ تعشيتي ؟

نجمة:~ ااه ..

بقات ساكتة سيدرا .. الشيء لي خلا نجمة تحاول تكبح ابتسامة محرجة قبل ماتزلق من فمها ... وهي كتشوف ختها علاين تنفاجر من هاد الموقف ...

نجمة:~ المهم تصبحي على خير .. فيا النعاس ...

خرجات سيدرا .. وخدودها كايزيدو يتوردو .. والدم كيتسرب حار ف عروقها ...

دخلات لبيتها بتردد ... لقات هشام واقف قدام الباب كيستناها ..

مع أول خطوة كان جرها لعنده وعقد بين حواجبه ...

هشام:~ مالنا ؟

حيدات الشال نافخة شفايفها .. جرها من يديها حتى شافت فيه ...

هزات راسها بنفي ..

سيدرا:~ والو ...

ميل شفايفو بابتسامة عابثة .. توجه للباب ودور الساروت .....

هشام:~ ها الباب لي غايصدعك سديناه ...

عارفها تحرجات ... زاد قرب منها وشدها من خصرها ...

لاح الشال فوق الأريكة .. وبدون تردد كان باسها من عنقها ..

حسات بشفتيه .. كيسرقو نبضها .. ويخليوه يتوقف ... الا كان شي شعور باغيا تحسو حتى لنهاية عمرها ... هو هاد الدوامة الجارفة لي كتعشيها بين يديه ..

غمضات عينيها وضحكات بخفوت ...

سيدرا:~ شوف نجمة كاينة هنا ..

مرر شفتيه على عنقها حتى وصل لآذنها وهمس بتوعد ...

هشام:~ كان خصك تفكري فهادشي قبل ... (تنفس بعنف .. وقربها جهة الفراش ) هاد الليلة ... هاد الليلة ... هاد الليلة .....

بان لها عاجز يلقى شي كلمة مناسبة كتليق بفعلها ..

رفعات حواجبها ... وسولات بمكر ...

سيدرا:~ مالها هاد الليلة ؟

مرر انفاسه على خدودها المحمرة ... حتى اقشعر بدنها ....

هشام:~ طيرتي ليا العقل هاد الليلة .. هذا ماكان ...

دورات يديها على عنقه ... وحركات شفتيها بإغراء ... قالبة وجهها شوية وكتشوف فوجهه مباشرة ...

سيدرا:~ بصح ... اوا علاش ماتقولش ليا كنعجبك ؟

صغر عينيه ورد عليها ...

هشام:~ كتعجبيني ؟

لمسات السخرية فسؤاله ... زاد قرب منها حتى لمس شفتيها بشفتيه ...

هشام:~ أجي نوريك شحال كتعجبيني ...

مع نهاية كلامها .. كان حطها على السرير بالعرض ... وجا هو فوقها .. متكي بجسده بلا مايحط ثقله عليها ...

حطات يديها ورا ظهره ملي باسها من خدها بقوة .. وببطئ .. مخليها متلهفة لمساته المحترفة لي كيعزفو على أوتار روحها وانوثتها ...

أصابعه الطويلة كانو كيحيدو الشعر لي هابط على عنقها فنفس الوقت .... وكيهمس بخفوت ...

هشام:~ باغيك ..!

بغات تهضر ... لكن كان قاطعها بشفتيه مخليها تبلع باقي حروفها .. وتحس بدقات قلبه لي قراب لها .. كيصمو اذنيها ..

خلاها بدون شعور حتى هي تحرك كفوفها وتنزع ليه قميصه بلهفة ...

" هبطي لتحت دابا " ...

قرات نجمة الرسالة وعينيها الزرقاوين كيدمعو .. عارفة عصام لتحت ..

وماعندها كيف دير تخرج لعنده ... هو البارح طلب منها غير خمسة دقايق فقط .. كتحس براسها افتقداتو .. والكلام فالهاتف ماكيروي حتى نقطة ف بحر من اشتياقها ليه ..

تنهدات بحرارة ...وكتحس بالحلوف لي حلفات ل سيدرا على وشك أنها تنكثو .. مابقاتش صابرة ... ماباغياش تضر قلبها ... واخا جزء كبير من المنطق كيقول لها أن كلام سيدرا صحيح ...

طلات من النافذة .. كتبان لها سيارته لتحت وهو متكي عليها ...

بدون شعور حركات أصابعها على شاشة الهاتف كتجاوبه ..

نجمة:~ "خصني نلقى كيف ندير .. سيدرا فالدار "

عضات على شفتيها ملي عاود شاف فيها من لتحت عرفاته غايكون قرا رسالتها ..

رجع رسل لها فتحات الميساج دياله ..

عصام:~ "غانستناك "

ابتسمت بتردد وبلا ماتفكر .. كانت توجهات للمطبخ ...

بانت لها سيدرا .... كتصاوب العشا وكتدندن مع ألحان الأغنية المنبعثة من هاتفها .. ومرة مرة تحرك خصرها ...

قربات منها نجمة ... حتى حطات يديها على كتافها ...

نجمة:~ سيدرا !

دارت عندها سيدرا وغوبشات ..

سيدرا:~ شنو ؟

بلعات نجمة ريقها بتوتر .. شافت فيها سيدرا باستغراب ...

سيدرا:~ واقعة شي حاجة ؟

حركات نجمة راسها بنفي بالزربة ...

نجمة:~ لا لا ماواقع والو .. (نفخات شفايفها) واش مابقاش الحليب ؟

كملات سيدرا على شغلها .. وقلبات وجهها للجهة الأخرى باقي محرجة من الحصلة لي حصلاتهم نجمة البارح ..

نطقات بخفوت ...

سيدرا:~ لا ..

ردات عليها نجمة بتذمر ...

نجمة:~ ودابا انا بغيتو !

حركات سيدرا كتفيها باهتمام بلا مادور لعندها ...

سيدرا:~ اوكي نعيط ل هشام دابا ... يجيبو لك ملي يكون جاي ...

ضربات نجمة رجليها فالأرض ونطقات برفض ..

نجمة:~ لا انا بغيت دابا ... وهشام كيتعطل على باش يدخل ...

احمر وجهها عند ذكر هشام ... دارت لعندها وحاولت تنفس بانتظام ...

سيدرا:~ مانقدرش دابا .. ( اشارت لها قدامها ) كتشوفي يدي فالعشا .. صبري ربع ساعة هكاك نسالي ونهبط مزيان ؟

عضات نجمة على شفتيها .. وردات بخفوت ...

نجمة:~ نهبط انا ..

هزات سيدرا راسها بتعجب ..

سيدرا:~ نتي ؟ وتقدري ؟

ارتعشت شفتها السفلية ...

نجمة:~ قادرة نمشي ... ( عضات على باطن خذها ) عاد البارح كنتي باغياني نخرج معكم ولا لا ؟ ... ( عقدات يديها تحت صدرها) ولا عرفتي شنو صافي مابقيتش باغيا ...

تأفأفات سيدرا بصبر ...

سيدرا:~ صافي ... صافي غير سولتك ... ( رجعات تكمل شغلها ) واخا هبطي .. غير ماتعطليش ... (غسلات يديها) الا ماقدرتيش نهبط انا ..

اخفت نجمة حماسها ... وحركات راسها بنفي ..

نجمة:~ لا غير خليك .. انا غانهبط .. حتى أنا بغيت نشم الهوا د برا ..

ابتسمت سيدرا ..

سيدرا:~ واخا .. ماتعطليش وصافي

ردات نجمة شعرها وراء اذنيها ...

نجمة:~ نجيب ليك شي حاجة فيدي ؟

سيدرا:~ لا ... ماخصني والو ....

خرجات نجمة كتخرج أنفاس لاهثة من صدرها ....

حتى وصلات لباب المطبخ عاد وقفات .. رجليها تحركو بتردد .. ولكن إحساسها بعصام قريب لها كان طاغي على وعدها وعلى عقلها وعلى كل مشاعرها ..

لبسات سترة سوداء ثقيلة على بيجامتها .. وشعرها جمعاتو الفوق بمساعدة سيدرا ... حيت ماقادراش تحرك يديها .....

هزات هاتفها .. بلا ماتشوف فيه ... كان قلبها كيدق بين الخوف والتردد كأنها أول مرة غاتشوف عصام ... وأول مرة غاتلاقاه ...

حتى وصلات للمصعد عاد تنفسات براحة ... غير تحل ... كان خطى لبرا ... جذبوها يديه بقسوة ... حتى جات على صدره الصلب ...

هزات عيونها فيه بدهشة ... كان هو ضغط على واحد الزر خلا باب المصعد يتغلق و يتبلوكا فنفس الوقت ..

صوته الحار همس لها بقوة قبل مايضمها .. ....

عصام:~ تووحشتك ...

تكات على صدره .. وكبتات شهقتها قبل ماتغادر فمها ....

غمضات عينيها براحة ... وراسه كيستريح جهة قلبه .....

زاد عنقها كثر ... خاشيها بين ضلوعه ... كانت هشة ورقيقة ... وقواها خارت ... بغا يبقى حاضنها هكاك طول عمرو ...

ترخات وشدات فيه ...

نجمة:~ عصام ... حتى أنا ....

مرر أصابعه على عنقها ... صوته كيتحط على تجويف عنقها .... كيكرر كلامه مجددا ....

عصام:~ توحشتك ...

هزات راسها .. ثبتات عينيها فعينيه .. وفردات يديها السالمة على ظهره ...

نجمة:~ حتى أنا توحشتك ... بزاف بزاف ...

هز راسه .. وتنفس براحة ملي شاف فوجهها .. واخا الضرابي كانو باقي كاينين ...

لمسهم بأصابعه وضيق عينيه ...

عصام:~ كيف بقيتي ؟ مازال ضارك يديك ...

ابتسمت وعينيها مغرغرين بالدموع ..

نجمة:~ شوية مزيانة ... ونتا ؟

لمس فكها برقة ..وماجاوبهاش ...

حتى هي مدات يديها وبدات كتلمس الجروح لي على جبينه .. وكل مرة كتعقد حواجبها ...

نجمة:~ تضررتي من عنقك ياك ؟

زادو عينيها برقو .... ابتسم .. وشد وجهها بين يديه .. كيمسح بهدوء تحت رموشها ...

عصام:~ شوية ..

ضربها بخفة بجبينه لجبينها كأنه مامصدقش وجودها معه ..

عصام:~ توحشتك ..

غمضات عينيها ... وتنفسات قريبة ليه ...

نجمة:~ حتى انا ....

حيد شوية د الشعر كان طايح على خدودها ...

عصام:~ كنبغيك ..

بغات تقول ليه حتى أنا .. وعاودت ردات الكلام من جوفها ..... حسات بضميرها كيأنبها ...

تكات على صدره ... منتشية بريحته لي قريبة لها ... وقلبات الهضرة ...

نجمة:~ خصني نطلع دابا ... هبطت غير نتسخر ... (طلعات عينيها كتشوف فيه) وسيدرا كاينة ...

تعصب عصام من ذكر سيدرا ... عقد حواجبه ...

عصام:~ مالها هاد ختك ؟ شنو مشكلتها .. ماغاتبعدش منا ؟

ردات بتأنيب ماخلاتوش يزيد يتكلم...

نجمة:~ عصام ..

دار يديه ف جيبه ... ومرر لسانه على شفتيه ...

عصام:~ صافي صافي .. باغي نهضر معاك ..

هزات راسها بنفي ...

نجمة:~ ماشي دابا ... خصني نمشي ... خرجت غير باش نشوفك .... (أسبلت أهدابها) يقدر يجي هشام .. وانا مابغيتش نزيدو نعيقو كثر من هكا ...

زفر بضيق ... وبغا يجبد معها الموضوع ... لكن إصرارها على أنها تمشي خلاها يبلع كلامه قبل مايقولو ....

نجمة:~ عفاك .. ! انا شفت كيف بقيتي ...

هز لها ذقنها وهمس بتأكيد ...

عصام:~ مازال غانتلقاو ...

ابتسمت ومدات يديها حتى حطاتها على خده ..

نجمة:~ وقتاش مابغيتي غانتلقاو ... (لوات شفتيها) غير خليني نمشي دابا ...

عصام:~ are we okay ؟ ياك ؟

[ حنا مزيانين ، ياك ؟ ]

ابتسمت و هزات راسها بالايجاب..

حس بالامور ولاو كيرجعو لمجراهم الصحيح .. ضحك بدون شعور ... وجرها من خصرها ...

يديه دخلو تحت سترتها الثقيلة حتى تحطو على قماش البيجامة الثقيلة ... ونطق بعبث ..

عصام:~ بلاتي بلاتي .. شنو تحت هادشي ؟

خرجات عينيها واحمرر وجهها .. ملي حسات بأصابعه على ظهرها ..

نجمة:~ تحت هادشي جهنم الحمرة ..

رفع حاجبه بمكر ...

عصام:~ ها واحد الكافر بالله لوحيه تما ....

خرجات فيه عيونها و هي كابحة ضحكتها بزز ...

ردات بإسمه ومطولة فحروفه ...

نجمة :~ عصــام ...

ضرباتو بمرفق يديها السليمة ل جنبه ... و هو دار يديه كيصطنع الالم ...

زادت دفعاتو بشوية ...

نجمة :~ يالاه ... حل هادشي .. ماعرفت اش درتي ليه .. خصني نمشي ...

دار يديه على فكها ... وتكلم بجدية ...

عصام :~ المهم .. منين تلقاي كيفاش .. عيطي ليا باش نجي نهضر معاك ف شي حاجة مهمة ... ( سكت .. وزير على جفونه) وخصها شوية د الوقت ... ماجاتش نهضرو فيها بزربة ...

هزات راسها بالايجاب .. ودورات عينيها ...

نجمة :~ اهم ... صافي .. وا يالاه حل ليا ...

شاف فيها بنص عين .. و هو كيحل المصعد ..

عصام ~ اه .. اه .. مزروبة ..

حركات كتافها ... وميلات حواجبها ...

نجمة:~ وا صافي ..

غير ثانيتين وكان تحل باب المصعد ... بغات تخرج ... لكن قلبها ماطاوعهاش ..

قربات بشوية لعنده ...

تعلات وطبعات شفتيها ضد بشرة خده ... فقبلة سريعة .. خجولة ومترددة ....

مشات كاتجري ... خلاته واقف كيشوف فيها وابتسامة عريضة مرسومة على وجهه .. ومية فالمية ولا متأكد من شنو غايكون جواب نجمة ...

وصلات نجمة قدام باب الشقة ووقفات شوية .. كتبرد خدودها وكاتحاول تتنفس بشكل طبيعي .. حاولت تطرد التوتر لي سيطر عليها برفقته .. وباش حتى تبين أن حتى حاجة ماواقعة ...

حلات الباب ... ودخلات على اصابع رجليها .. بدون ماتلتفت .. كانت متجهة ل بيتها ...

حتى وقفها صوت سيدرا ..

سيدرا :~ نجمة ! ..

حبسات فمكانها ... ثوانٍ معدودة .. ودورات راسها ببطئ كاتشوف ف سيدرا لي كانت واقفة ف باب المطبخ ..

نجمة :~ نعم !

شافت فيها بتساؤل ..

سيدرا :~ فين الحليب .. ؟

هزات نجمة حواجبها حتى هي بتساؤل..

نجمة:~ الحليب ... ؟

سكتات شوية ... وعاد تفكرات كذبتها ... بدات كاتتكلم بتلعثم ...

نجمة :~ اه .. اه الح..ليب .. ما..مالقيتوش .. اه مالقيتوش .. قال ليا حتى للصباح وصافي ...

هزات سيدرا فيها حاجب واحد بتشكيك .. والتزمت الصمت .. حركات راسها من الاعلى للأسفل ..

سيدرا:~ صافي نعيط ل هشام يجيبو ...

حركات نجمة راسها بالزربة .. وكتحاول تبتاسم ..

نجمة:~ لا لا مابقيتش باغيا ...

عيون سيدرا ضاقو كثر بشك .. هضرات نجمة مرة اخرى بالزربة باغيا تنسيها وتلفها على الموضوع ..

نجمة :~ انا .. اندخل نغسل دابا .. باش نجي مع العشا نيشان .. (شيرات بأصابعها ناحية غرفتها) اجي عاونيني ...

هزات سيدرا راسها بالايجاب ... ورجعات للمطبخ و هي مازال كاتكلم ..

سيدرا :~ وجدي حوايجك .. هانا جاية ...

تنفسات نجمة براحة منين ماحكراتش عليها كثر ...

واتجهت ناحية غرفتها ...

كانت كتحس بريحة عصام عالقة بين انفاسها وفحوايجها .. وفعقلها بالدرجة الأولى ... وممكن ختها تعيق فأي لحظة ... حيدات السترة الثقيلة بيد وحدة ...

وجدات حوايجها... ورجعات طلات على سيدرا ..

نجمة :~ سيدرا ... مالقيتش الفوطة ...

حلات سيدرا البالكون و جبداتها ....

سيدرا :~ منين غسلتي ديك المرة .. خليتها كاتنشف .. نسيت ماجبدتها ..

خداتها من عندها نجمة و دخلات للدوش لي كاين ف غرفتها ... وخلطات عليها سيدرا ...

عاوناتها باش تحيد حوايجها ... غطات ليها الگبص بواحد البلاستيكة خاصة ...وبدات كاتعاونها ...

فالوقت لي كانت كاتمشط لها شعرها ... كانت سيدرا ساكتة .. كيبان تفكيرها مشتت ... وماعارفاش شنو تقول ...

بدون شعور كانت كاتهبط لها شعرها بجهد حتى تقصحات نجمة....

دارت يدها على شعرها و تأوهات بألم ...

نجمة :~ آآي ... قصحتيني ..

ابتلعت سيدرا ريقها .. ورجعات كاتمشط لها بشوية ...

سيدرا :~ سمحيلي .. سهيت ...

سكتات شوية نجمة ... وعاد هضرات ..

نجمة :~ مالك ساكتة ؟

عضات سيدرا على طرف شفتها السفلية ..

سيدرا :~ مابقيتيش مقلقلة زعما ؟

غمضات نجمة عينيها .. ملي حسات بالما على شعرها ....

نجمة:~ علاش غانتقلق ؟

حركات سيدرا حواجبها بدون جواب ... وخدات مدة طويلة باش ترد عليها ..

سيدرا :~ نجمة !

نجمة :~ (فتحات عينيها) امم !

هضرات بنبرة تشكيك ..

سيدرا :~ واش .. مخبية عليا شي حاجة ؟ .. زعما وخايفة تقوليها ؟

دقات قلب نجمة تسارعو ... وحسات بالدم تدفق لوجهها ...

حمدات الله لي سيدرا ماقدراتش تشوف وجهها .. حيت اتعرف شنو تحت راسها غير من نظرة واحدة ...

حاولات تهدأ من روعها وتجاوب بطريقة عادية وبنبرة هادئة ..

نجمة:~ شنو غانخبي عليك مثلا .. ؟

حركات سيدرا حلقها بهدوء ...

سيدرا :~ انا سولتك ...

سكتات نجمة شوية .. كاتستجمع كلماتها عاد ردات عليها .. كتأفأف بصوت مسموع ..

نجمة :~ الا كنتي كاتقصدي عصام ... راه كانقيل قدامك .. قلتي ليا تفارقو .. وبعدت منه .. شنو بغيتي كثر باش تيقي ؟ ...

جواب نجمة كان جد مقنع بالنسبة لسيدرا لدرجة بدات كاتلعن نفسها حيت رجعات تشك فيها ... طردات شكوكها ..والتزمت الصمت ...

سالات نجمة الدوش ديالها وعطاتها سيدرا الفوطة ... لواتها عليها ... ودارت باش تهز حوايجها ..

سيدرا :~ فين حوايجك ؟

ضربات أعلى جبهتها بقوة ..

نجمة :~ يخ .. نسيتهم على برة ... هانتي اتلقايهم فوق الفراش ... تلهيت قبيلة مع الفوطة ..

هزات سيدرا راسها بإيجاب ... ومشات تجيب لها ملابسها ...

غير خرجات لقاتهم نيت فوق الفراش ..

حطات يديها باش تهزهم ...لكن الهاتف لي شعل لفت انتباهها ... كان كايرن ويعاود ..

تأفأفات وعيطات لنجمة بالجهد ...

سيدرا:~ تليفونك كيصوني ... واش نجيبو ليك ؟

جاها جواب نجمة من الحمام ...

نجمة:~ غير خليه حتى نخرج .. غاتكون غير عفاف .... ( سكتات ل ثوانٍ وعاود تكلمات ) وسربي دغيا جاني البرد ....

عضات سيدرا على شفتيها .. شافت فالهاتف لي كان منزل حد الحوايج ...

غير هزاتهم ... عاود الرنين يقطع هدوء الغرفة ...

رجعات بدافع الفضول باش تحيد ليه الصوت ... حتى تخرج نجمة وتجاوب ... مابغاتش تدخل ف خصوصياتها .. باش ماتزيديش شي مشكل على لي بيناتهم ..

لكن اسم عصام لي مكتوب على الشاشة خلاها تعقد حواجبها وتنهد بكبت ..

شافت يمين ويسار وهزات الهاتف معصبة .. كتحسب من واحد حتى ل ثلاثة باش تجاوب ....

وقبل ماتسالي حسابها كان قطع ....

هزات تليفون فيديها .... مع الحوايج ...

غير وصلات لباب الدوش ... كانو رسالتين متتاليين وصلو من عنده ل نجمة ...

بلا ماتفكر زوج مرات بركات على الاولى ... وفنفس اللحظة تحلو عيونها بصدمة....

عيونها نيشان مشاو للرسالة والجملة لي طلعلت لها الفوق ...

عصام :~ "مشيتي قبل مانشبع منك "

قبل ماتستوعب شنو داكشي .. و وقتاش مشات نجمة تشوفو ... ... الأمور بداو كيتسارعو فعقلها ... والغرفة كتلون بلون الدم ....

فنفس اللحظة نزلات عينيها كاتقرا الرسالة الثانية..

‏" i miss the taste of your lips"

{ توحشت مذاق شفايفك }

فغرات سيدرا فمها من وقاحته ... والغضب كيتصاعد داخلها ...

كاتقرا الحروف وتعاود ... كأنها كتأكد من داكشي لي كتشوفه ....

بدون شعور صباعها انزلقو على الشاشة وبدات كاطلع محادثتهم كتزيد تقرا الرسائل القدام ... ومع كل كلمة كتزيد تصدم كثر .. وتوسع عينيها ....

" ياكما لبستي ثاني الحمر بحال السوتيان "

" توحشتك .. وقتاش نشوفك و ندير فيك مابغيت "

" غير زيدي قيدي عندك.. الصرف كله انردو مثني و مثلث "

كل مرة كانت كتقرا كلمة وحدة .. يديها كيزيدو يترعدو ... وقلبها كيخفق بعنف ...

اغلبية الرسائل كانو عاديين .. ولكن هاد الميساجات .. خلاو رجليها يجمدو ف بلاصتهم .. ماقدرات دير حتى ردة فعل ...

صوت نجمة كتغوت عليها من الحمام هو لي خرجها من صدمتها ...

هزات ملابسها ومشات لعندها ...

عاونتها تلبس ببرود وعينيها شاعلة فيهم العافية من الداخل .. كل ماشافت فوجه نجمة كيزيد الغضب بين قلبها .. بداخلها وياكل اطرافها ...

ضحكات نجمة ... وتكلمات بخفوت ....

نجمة:~ خليتيني غانجمد بالبرد .. ومانعرف فاش تلهيتي ... واش وجد العشا بعدا ؟ ...

مارداتش سيدرا عليها ...خرجات هي اللولة وتبعاتها نجمة باقي كاتهضر وتسولها ...

حتى ماقدراتش تصبر عاد رفعات حاجبها .. كتكلم بهدوء ...

سيدرا:~ ماغاديش تشوفي شكون عيط ليك ؟

نطقات جملتها بتهكم .. الشيء لي خلا نجمة توتر ... ولكن حاولت تمالك نفسها ...

نجمة:~ ماغاتكونش شي حاجة مهمة ... حيت ماعاودوش عيطو ... حتى نسالي ونشوف ...

رفعات سيدرا حاجبها باستهزاء ..

سيدرا:~ مثلا يقدر يكون عصام ؟

نجمة زادت توترات .. وجنتيها توردو .. وردات باستنكار ...

نجمة:~ عصام !! شنو دخل عصام دابا ؟ ( غوتات بالجهد باش تشتت انتباه سيدرا ) علاش ماكتثيقيش را قلت لك تفارقت معاه .. ( وقفات كتنفس بسرعة ) باغيا غير تجبدي المشاكل من والو ...

ماعرفاتش نجمة بلي ختها كتقدر تفمها وتقراها بحال شي كتاب محلول ..

كانت كتحاول تخلي عقلها يتغابى ... واحتمال ان سيدرا شافتها مع عصام بغات تطردو من راسها ....

قلبات فوق المنضدة ... كتمشي وتجي بعصبية ...

نجمة:~ فين هو تليفوني بعدا ؟ باش نوريك العكس دهادشي لي نتي كتشكي فيه ؟ ...

سيدرا راقبها بلاما تكلم ...

حتى هزات راسها كتشوف فيها عاد جبدات الهاتف من جيبها ...

شافت كيفاش تغير لونها... وانسحب الدم من بشرتها ...

سيدرا:~ شفت مايحتاجش توريني ....

بلعات نجمة ريقها ...

نجمة:~ شنو ؟

سيدرا:~ ( ابتسمت بألم ) بلاتي نقرا ليك ... I miss the taste of your lips .... ( رفعات حاجبها باستهزاء ) مسكين توحش المذاق د شفايفك ..

شحب وجه نجمة .. والكلام مات عند فمها ...

شافت فيها سيدرا كتستناها تبرر ...

سيدرا:~ شنو غاتجاوبيه ؟ حتى نتي موحشاه ياك ؟ ( خفضات صوتها ... وتكلمات بسخرية لاذعة ) وغاتلقاي شي كذبة تكذبيها باش تخرجي عندو عاوتاني ...

مررات نجمة لسانها على شفايفها بخفة ... والإرتباك كان باين فوجهها .. ماقدراتش حتى تهضر ..

حطات يديها على قلبها ...

نجمة:~س.. سيدرا ... شوفي .. أنا ...

قربات منها باش تاخذ تليفون ... لكن يد سيدرا كانت اسرع .... بعداتو للجهة الأخرى...

سيدرا:~ بلاتي نكمل ليك ... مالكي مزروبة .... سوتيان حمر ؟البوسان ؟ ... شنو كاديرو مازال ملي كتلقاو .... ( ضغطات على الكلام لي كيخرج من جوفها ) هادشي غير لي لقيت ... وحصلت عليك ؟

تحرجات نجمة كثر ... ولات كتبلع ريقها .. وسيدرا كتقرا لها بعض الرسائل واحدة تلو الاخرى .... ومع كل كلمة كتقولها .. كتبعها بنبرة ساخرة ... مجروحة ... وعامرة بخيبة الأمل ..

قربات عندها وزيرات لها على يديها ...

سيدرا:~ حتى ل وقتاش كنتي اتبقاي تكذبي عليا ؟

رمشات نجمة عيونها بثقل .. وحركات راسها بتساؤل ..

نجمة :~ فاش ... فاش كذبت ؟ .. (مدات يديها تاخذ هاتفها) عطيني تليييفوني ..

بعداتو سيدرا للجهة الأخرى ... وردات بعصبية ...

سيدرا:~ جااااوبي ...

بلعات غصة واحلة فحلقها .. وأضافت بقسوة ....

سيدرا :~ انسولك لاخر مرة ا نجمة و جاوبيني .. واش... درتي نتي وياه شي حاجة ؟

دمعو عيون نجمة وحركات راسها ...

نجمة:~ شنو ؟

تكلمات سيدرا بأنفاس لاهثة ...

سيدرا:~ واش هادشي علاش مابغيتيش تتفارقي معاه ؟ ... درتو شي حاجة ؟

حسات نجمة بصدرها ضياق.. تنفسها انخطف... حسات بسكين اخترق قلبها ...

ثوانٍ معدودة ... حتى هزات يدها السليمة ودفنات وجهها فيها .... كاتبكي بصوت مرتفع و بحرقة... اتهامات سيدرا مابغاوش يساليو .. و هي كل مرة كتاهمها بشي حاجة أكفس من الاخرى..

ردة فعلها بالنسبة لسيدرا كانت بمثابة تأكيد لشكوكها .... نزلات يدها على قلبها ... و بدات كاتحرك راسها من اليمين لليسار ..

سيدرا :~ لا لا .. نجمة ... ( هزات لها راسها ) جاوبيني ا نجمة .. عافاك ... انا ثايقة فيك ... (اضافت بصوت لاهث) قولي ليا الحقيقة ...

رمشات عيونها بزربة .... وتكلمات وسط دموعها ...

نجمة :~ علاش مابغيتش تيقيني ؟ .... علاش كل مرة كتزيدي تجرحيني وكتهميني بشي حاجة ماكايناش ... ( غوتات بالجهد ) وهــادشـي مابغــاش يسـالي ....

ارتفع صوت سيدرا بلا ماتحس ... وشداتها من يديها بقوة اكبر ..

سيدرا:~ كنجرحك ؟؟ هااااه ... كنجرحك الحمارة حيت باغيا مصلحتك ... و نتي شنو ؟؟ نتي راه جرحتيني و جرحتي ماما و بابا بهاد الفعايل ... و اهم حاجة جرحتي راسك قبل كلشي ..

كلماتها نزلو عليها كيف الصفعة ... مابقاتش قادرة تقول شي حاجة مازال ... زادت فالبكا و بزز باش قدرات تخرج سؤال من فمها ...

نجمة:~ اش .. اشنو درت عاوتاني ؟

انساب صوت سيدرا لاذنيها .. و هو لي فيقها من صدمها

سيدرا :~ تت ... لا لا .. غانديك للطبيب ا نجمة .. مايمكنش هادشي ..تت مايمكنش نبقى جالسة .. خاصني نتأكد عاد نرتاح..

حاولات نجمة تسمح دموعها .. و هي باقة مرفوعة ... كتحاول تطرد شكوكها ....

نجمة :~ علاش اتديني للطبيب ... انا بيخير ... يدي مابقاتش كاتحر...

قبل ماتكمل كلمتها الاخيرة .. سكتات ...

وهزات عيونها كاتشوف فسيدرا .. بعدم تصديق .. كانت جاوباتها على نيتها .. و دابا عاد عرفات سؤال سيدرا فين كيرمي ..

نجمة:~ واش ... كانبان لك بحال بنات الليل ؟

غوتات سيدرا وقربات لها رسالة عصام الأخيرة لوجهها

سيدرا :~هادشي .. داك الزمر لي كان فعنقك كيكون غير عند بنات الليل .. و لي كاتخرج دور بالليل و ترجع مع راجل حتى 12 د الليل .. ااااه .. بنت الليل ...و لي فتيليفونها هاد الهضرة وهاد الكلام ... وصلتو حتى لون السوتيان !! .. ايوا ا لالة .. هادشي كايديروه بنات الناس فنظرك ؟ ...

جسد نجمة كله بدا كيترعد.... حنات راسها و بدات كاتهضر بصوت مرتفع و كاتشير ل سيدرا ناحية الباب ..

نجمة:~ خرجي ... خرجي عليا... خرجـــــي ....

قربات لها سيدرا و وجهها قريب بزاف ل وجه نجمة. .

سيدرا :~ ماغانخرجش ... حتى تجاوبيني ... ماخارجاش .. كتحسبي هادو التصرفات د بنات الناس ؟ ..

دفعاتها نجمة بيد وحدة بقوة ... وردات كتلهث ....

نجمة:~ عطيني تليفوووني .. (مدات يدها لكن سيدرا عاودت بعدات وشدات على قلبها ) ماشي شغلك ودخلي سوووق راسك ... عرفتي شنو ( هزات يديها الفوق ... كتنفس بعنف ) انا كنبغي عصام ومانقدرش نتفارق معه حيت كنبغيه ... وكذبت عليك ودرت لك خاطرك ... وتلاقيتو وبقيت كنهضر معه ... ( زيرات على جفونها ) ونهار كنت خارجة معه كان غادي يتسابق بالموطور ديالو .... وديما كنخرج معه ماشي أول مرة .. ( قربات كثر من سيدرا وشافت فعيونها مباشرة ) دابا رتاحيتي ... ياك .... ؟ يالاه سيري.. سيري قوليها ل بابا ولا قوليها لمن مابغيتي ... عصام ماغانتفارقش معه .... هي ماغانتفارقش معه ....

وسعات سيدرا عينيها ... والنفس كيخرج مرتجف وبطيء من صدرها ...

اما هي سكتات شوية كتلهث ..... وملي تفكرات اتهام سيدرا غير مازادت العافية شبات فضلوعها ...

قربات منها حتى دفعاتها مرة اخرى ....

نجمة: ونتي حمقة ... نتي مريضة ... ( ابتسمت بتهكم ) عبر عليك توفيق منين سمح فيه .... دابا عاد عرفت علاش خلاك ... حيت نتي ماكتقدريش تفهمي الناس .. وكتشوفي غير راسك لي عندك الصح .... ( سكتات شوية واضافت بسخرية لاذعة ) وماعرفتش كيفاش هشام عايش معاك وصابر على وحدة بحالك لحد الآن ....

زيرات سيدرا على اصابعها حتى بقى اثار اظافرها مرسوم على كفوفها بشكل واضح ..

ثانية .. زوج ثوانٍ .... حتى كفها تهز بنفاذ صبر .. ونزل على خد نجمة بكل قوتها ...

نزلات نجمة راسها كاتلهث ... ثوانٍ قليلة وهزات راسها ف سيدرا .. كأن الصفعة ماحركات فيها والو ... وغير زادت شعلات غضبها ...

بدات كاتقرب ل سيدرا بخطوات ثقيلة .. وصدرها كيطلع وينزل بقوة ...

نجمة :~ نتي لي كاتعايريني ... و كاتقولي عليا بنت الليل ... نفكرك براسك هاه ... ( زيرات على جفونها باش مايسقطوش دموعها) ولا نسيتي ؟

غمضات سيدرا عيونها ...كاتتنفس بعنف ..والكلام خرج من تحت سنانها ..

سيدرا :~ ســكــتـي ..

زاد ارتفع صوت نجمة ..

نجمة:~ لا ماساكتاش ... ماغانسكتش هاد المرة ... ( مدات يديها ودفعات سيدرا بالجهد) نفكرك منين كنتي كاتجريني معاك باش تشوفي حبيب القلب ..؟ عقلتي منين ديتيني معاك ل قبيلة الشيخ بالليل ؟ (صفقات بيديها بالجهد)ولا عقلتي منين ديتيني للسباق د الخيل ؟ وكنتي عارفة نقدرو نحصلو .....

زادت قربات وجهها أكثر لسيدرا ... و كملات كلامها

نجمة :~ ايوا... راك بحالي تمــاماً .. (ضحكات بسخرية وهزات يديها حطاتها على خدها المتورم ) حتى بنات الناس ماكيديروش هادشي ... هادو فعايل غير بنات الليل ...

بقات سيدرا ضاغطة على رموشها ... باغة تكبح دموعها ... عارفة الا تصرفات دابا وخلات الغضب يتحكم فيها غاتكون نهاية اخوتهم...

عمرها تخيلات نجمة تجرحها بهاد الشكل .. وهي لي كتحاول توقف معها وتحميها ....

تراجعات نجمة للخلف ... و كملات على هضرتها ..

نبرة صوتها تغيرات.. ونظرات اللوم والعتاب غشاو عيونها ...

نجمة :~ كون ما داك السباق .. ( دارت يديها على فمها ) كون ماتلاقيتش بعصام ..داك النهار .. ( رجعات قربات لها و دفعاتها من كتفها ) نتي نسيتي اي حاجة درتها على ودك أ سيدرا ... نسيتي شحال غطيت عليك و عاونتك ... وعمري قلت لك غانفضحك قدام بابا ... ( هزات أصبعها وأشارت لها) ونتي اشنو ؟ ها! علاش انا ماجيتش قلت لك نتي بنت الليل و علاش ماقلتش لك واش درتي شي حاجة مع توفيق ....

فتحات سيدرا عينيها و ابتلعت غصة تكونات فحلقها .. نجمة نزلات دمعة من عينيها ... حركات راسها ... وهزات كتافها ..

نجمة :~ حيت انا كانعرف ختي .. وحتى كون دارت انقول ماديرش ..

زادو الدموع تحجرو ف مقلتاي سيدرا .. زيرات على قبضة يديها ... وصدرها طلع ونزل بعنف ....

لقات راسها باغيا تهضر .. تغوت على نجمة .. ولكن الكلام لي قالته لها كان كينزل على قلبها ويدمي الجرح بقوة ... تعثر فجوفها وخلاها عاجزة تلقى شي جواب مناسب .....

هزات ذقنها بكبرياء ..

سيدرا:~ واخا مزيان ...

قلبات نجمة وجهها ...وسكتات شوية .. كتجمع حروفها ...

لكن غير ثوانٍ حتى رجعات فتحات فمها باش تهضر ... لكن الصوت لي انساب من الخلف قاطعهم ... وخلاها تبلع باقي كلماتها ...

:~ نجمة !

دقات قلبها تسارعو ... قبل ماتشوف شكون ... جاها صوت عصام من موراها ..

لكن منين شافت ... كان هشام .. نبرة صوته كاتشبه ل نبرة صوت عصام بشكل كبير ..

التفت سيدرا حتى هي كاتشوف ف هشام لي كان هاز حاجبه ف نجمة بتحذير ...

ابتلعت نجمة ريقها ... وسرطات كلماتها ..

عيون سيدرا كانو مغشين بطبقة من الدموع ... وفور ماشافت هشام ... ماقدراتش تزيد تكبح دموعها ... شهقات بصوت مرتفع ... وخرجات كاتجري لغرفتها .. بلا ماتقول حتى حاجة ...

راقبها هشام حتى دخلات وزدحات الباب بجهد ...

دور عينيه كيشوف فنجمة ... حرك راسه ببطئ من اليمين لليسار .. ونظراته ليها عبارة عن نظرات خيبة أمل ...

سمع شوية من كلامهم فاللحظة الاخيرة ... وماظنش ان نجمة تقول هاكاك لختها ...

غمضات نجمة عينيها ... والشعور بالندم بدا كيزحف على ذاتها .. قضمات شفتها السفلية و شافت ف هشام مرة اخرى ...

نجمة :~ انا .. انا ماقصدتش اش قلت لها ... والله ... ( ميلات فمها بإحراج وتلعثمات فالهضرة ) غير .. غير كنت معصبة ...

قطب جبينه ... وزفر بعنف ...

هشام :~ تت .. حشومة ختك كبر منك ..

بلعات ريقها مرات متتالية .. وشافت فملامح هشام ما بان لها حتى تعبير ..

استنتجت ان من خفة لسانها غاتكون دارت لهم مشكل كبير ...

حطات يديها على قلبها ...

نجمة :~ .. والله ماقصدت شنو قلت ... ماعرفتش .. (شهقات بالجهد) والله ماقصدت ...

دار يديه ف جيبه .. وهز راسه ....

هشام :~ انا ماسمعتش بزاف من هضرتكم و لكن ... ( سكت شوية ودار يديه على لحيته ) منين بكات سيدرا..اذن راك درتي لها شي حاجة خايبة ...

خطات نجمة ناحية الباب و هشام عرفها اتهضر مع سيدرا .. وغاتحاول تسحب كلامها...

هز يديه وحبسها ..

هشام :~ ماشي دابا ... خليها حتى تهدى .. (تشنج فكه ... ومابغاش يبين ردة فعله) و حتى نتي حتى تتهدني شوية .. و ديك ساع هضرو ...

بقات واقفة مكانها .. حتى هزات راسها بالايجاب .. ورجعات دخلات لداخل الغرفة ....

غير خرج هشام من عتبة الباب ... بقا واقف شوية عاد توجه لغرفتهم ....

فتح الباب بثقل ... كيحاول يلقى الحل المناسب لهادشي كله لي طول بدون فائدة .....

كانت سيدرا دايرة وجهها فيديها ... وكاتبكي بحرقة ...

شافها بكات من قبل ... ولكن الطريقة لي كانت كاتبكي بيها اليوم ... كانت مختلفة .... كأنها طفلة صغيرة..

لأول مرة كيشوفها شحال هشة ... وسهلة للكسر .. واخا كتحاول تبين راسها قوية ...

قرب حتى جلس جنبها ... غير حسات بيه بعدات وجهها على يديها ... وبدات كاتمسح دموعها ... وكتقلب فمها بانزعاج ...

هز يديه و بعد يديها على وجهها و بدا كيمسح دموعها بشوية ..

هشام :~ ششش ... صافي ..

ابتلعت ريقها .. شافت فيه وتنخصصات فنفس الوقت ...

هشام ~: علاش وصلتي نتي وختك حتى لهادشي ؟

كان الصمت هو جوابها ... استمر هو فمسح دموعها ... حتى تكلمات و صوتها خرج مبحوح ومجروح من حلقها ..

سيدرا :~ انا ماشي بحال داكشي لي قالت... انا بصح كنت كن..

قبل ماتكمل كلامها نزل سبابته على شفايفها.. مقاطعها ...و مخليها تسكت ..

هشام :~ لي فات فات أ سيدرا ..مامحتاجاش تببرري ليا هاد المرة .. ( تفاحة ادم تحركات بعنف فحلقه ) ديك الساع ماكنتيش على ذمتي .. وماكان بيناتنا والو ... (تصلبو مفاصله وملامحه تغيرو) يعني ماغاديش نحكم عليك او نتقلق على شي حاجة فاتت.. وماكنتش انا فيها .. ( يديه بزوج دارهم على فكها وكيدوز بإبهامه ببطء على بشرتها ) لي كيهمني هو دابا ... ( رفع حاجبه ) وكانظن موضوع توفيق سديناه شحال هادي .. ياك ؟

مطت شفتيها و هزات راسها .. ب "نعم".. كتبتسم بدون نفس ....

صغر عينيه بتساؤل ..

هشام :~ ولكن ! شنو وقع لي خلا نجمة تعايرك بداكشي ؟

بدون شعور كأنها هاد المرة كانت كاتتسناه غير ينغزها .. باش تهضر ..

سيدرا :~ رجعات تلاقات بعصام ..و قريت شي هضرة بيناتهم .. و ..و

قطعات كلامها ... وعضات على شفتيها ..

حط يديه على ظهرها مقربها ليه ...

هشام:~ وشنو اخر وقع ؟

خفضات صوتها و هزات كتفها الايسر...

سيدرا:~ وشكيت فيها .. قلت لها واش وقعات بيناتكم شي حاجة .. (مررات لسانها على شفتيها) زعما ... حيت أي واحد كان غايشوف داكشي غايمشي عقله بعيد .. وغايفكر ف بزاف د الحاجات .....

هزات عينيها تشوف ردة فعله .. لأنها حاسة براسها مخربقة ...

كتهضر ولكن خاصها تعرف شنو تقول بما أن الطرف الاخر كيبقى خوه ...

هشام فهمها غير من النظرة لي درات فيه ... زير على قبضة يديه .. وحاول يلطف الجو معاها ... المرة الاولى فاش هضرات معاه على الموضوع لامها و لكن فالاخير طلعات على حق ...ومابغاش يعاود نفس الغلط مرة اخرى ...

عض على فمه بغضب ...

هشام:~ عصام مايوصلش معاها لديك درجة ..

دمعة اخرى نزلات خدها ومسحاتها بخفة ... ماحملاتش راسها كتهضر هي وياه فموضوع خاص بنجمة بحال هاكا وكأنه امر عادي .. ولكن خاصه يعرف كلشي و فين وصلو ...

الغصة لي فحلقها بزز باش خلاتها تهضر ...

سيدرا:~ كون قريتي اش كيقولو .. ديك ساعة اتعرف ... واش عصام يوصل معها لهادشي ولا لا .....

قطع كلامها بصبر ...

هشام:~ وشنو مازال قلتي لها ؟

سكتت .. وبللات حلقها ... تنفسات بارتجاف ...

سيدرا:~ فاش قلت ليها انديك لطبيب... قالت ليا ديك الهضرة ...

دوز يديه على خدها ... والثانية كان كيحيد بها خصلة طاحت على وجهها ... هز راسه بقلة حيلة ....

هشام:~ ماكتعرفيش تعاملي مع ختك ..

بسرعة جاوبته و كانها كتبرر موقفها

سيدرا:~ انا خايفة عليها ا هشام ... خايفة عليها من خوك .. و اي وحدة كانت فبلاصتي غادير نفس تصرفي ... (حركات ذقنها) واش كيبان لك هادشي لي درت غلط ؟.. عييت معها من اللول تعاود ليا وهي كتخبي ... (رفعات وجهها وشافت فيه) شنو بغيتيني نفهم من هادشي ؟

عض على فمه بغضب ....

تنهدات بالجهد .. واسبلت أهدابها بألم ...

سيدرا:~ هي راه غير نية ودغيا كثيق .. كتأثر دغيا .... عرفتي الا قال ليها يالاه نهربو .. وعرف كيف يقولها .... (زيرات على باطن كفها بأظافرها) ديرها بلاما يعاودها زوج المرات ... حيت هي ماكتفكرش بعقلها .. كتفكر بقلبها كثر .....

هاد الفكرة بحد ذاتها خلاته يبتسم فوق خاطره ...

عصام يقول لنجمة نهربو ... فهاد النقطة متافق معاها .. حيت عقلية عصام فشكل ... خلا افكاره عندو لا يزيد يخلعها ...

هشام:~ يهديك الله ا سيدرا ... (سكت شوية وأضاف بهدوء) ماشي لديك الدرجة ...

عقدات يديها تحت صدرها .. ورفعات صوتها ....

سيدرا:~ لديك الدرجة ... كتهضر حيت ماكاتعرفهاش نتا .. راها ختي و انا لي عارفاها ...

يالاه ايجاوبها ولكن قاطعاته ...

سيدرا:~ هضر معاه نتا .. يفوتها عليه .. والا بغاها يمشي يخطبها .. ياك كيعرفها مزيان دابا ؟

تشنج فك هشام ... وملامحه ولاو بدون تعبير ...

هشام:~ يخطبها ؟ لا لا ...

رفضه خلاها تسكت وتراقبه ... عقدات حاجبيها ...

سيدرا:~ كيفاش لا ؟

سكت لثوانٍ وعاد هضر بجدية ..

هشام:~ عصام انا لي كنعرفو ... واخا يكون باغي نجمة ديال بصح ماغاديش يخطبها .. ولا يفكر فالزواج ..

رغم ان سيدرا كانت مقتنعة بهاد الرأي وعارفاه .. ولكن باش تجي من عند هشام ..

تزير فؤادها ... ومفاصلها تنملو ...

حطات يديها على قلبها ... كتنفس بصعوبة

سيدرا:~ وشنو الحل يبقى يلعب بيها هكا ؟

هز راسه بنفي بلا مايتكلم .... جذب سيدرا لعنده كثر ... ورجع يسهى ف حاجة أخرى ...

فنفس اللحظة وبزوجهم كانو غافلين على نجمة لي كانت واقفة فباب ... وكلام هشام الأخير كيتغلغل لداخلها ... حرف بحرف ..

بقات منزوية فغرفتها وحابسة راسها لخمس أيام تقريباً ....

من بعد حوارها مع سيدرا طفات تيليفونها وعلمات دارهم بلي خاسر ليها ... ونهاية الامر أنها انعزلت فسريرها ...

هشام رجع للقبيلة باش مايتفضحش أمر الكسيدة ويبقى بيناتهم فقط ومسؤلياته كشيخ خصو يزاولهم ...

أما سيدرا ماعاودتش هضرات معاها ... اكتفت انها كتعاونها فاش كتحتاجها وكطيب ليها فقط ...

والهضرة حتى وحدة ماكتكلم الأخرى ....

هاد الخمس ايام ... كانو كافين باش نجمة تاخد قرارها .. وتفكر بلاما يكون طرف آخر لي يأثر فيها .. لا كلام سيدرا .. ولا وجود عصام ...

ناضت من فراشها .. و قررات تطبق أول قرار اتخذته بعد تفكير طويل ...

طرقت الباب بخفة .. الأمر لي ولفاته ملي كان هشام معهم فالدار ... كتخاف يطيحو فشي موقف ماشي هو هاداك ...

حتى قالت محال واش تكون سمعاتها .. يالاه اتعاود تدق عاد فتحات سيدرا الباب ...

خلاتو هكاك ورجعات للبيت .. تنشف شعرها ...

دخلات لعندها نجمة يديها السليمة كانت كتزيرها على جنب السروال باش تسيطر على توترها ...

نطقات سيدرا بدون تعبير ....

سيدرا:~ خصك شي حاجة ؟

هزات راسها بنفي ...

ثانية .. زوج ثواني .. دقيقة .. حتى جمعات قوتها عاد نطقات ..

نجمة:~ سمحي ليا على الهضرة لي قلت ... ( دعكات جبينها ) انا ماقصدتش و غير كنت معصبة ... أنا عرفت راسي غلطت .. ولكن .. نتي لي بديتي اللولة .....

ضغطات سيدرا على شفتيها .. ومنعات الكلام يغادر فمها ..

حتى زادت تشجعات نجمة وكملات على هضرتها ..

نجمة:~ انا غادي نتفارق معاه ..

و قبل ماتكمل جملتها .. طلقت سيدرا ضحكة طويلة بلاما تحس ...

شوية بشوية وبدات كتجمعها ... وكتقطب حواجبها

سيدرا:~ عرفتي شنو ؟ انا مابقا عندي سوق فيك .. ديري لي بغيتي ... ( التفت لها وثبات عينيها ف عيون نجمة ) تفارقي معه ولا گلسي ... ( أشارت لها ل راسها ) ياك كندخل ف شي حاجة ماشي ديالي .. وماشي شغلي فيها ؟ ... ياك أنا براسي كنت مع توفيق ؟ ( تنهدات بطول .. وقلبات وجهها ) حتى دابا ديري لي عجبك .. سيري فين ماعجبك .... أنا مابقاش شغلي .... (مسكات شفتها السفلية بين اسنانها) ودابا باقيا هنا غير حيت باقيا مريضة .. اما نهار تولي يديك شوية لاباس .. منك ليه ... وتفارقي معه .. ولا تزوجو ولا ديرو لي عجبكم ...

هزات نجمة عينيها على هاد الكلام ... مابغاتش ترد عليها ...

ارتجف قلبها .. وانتفضو حواسها .. وحتى هي قلبات وجهها بنرفزة ...

نجمة:~ غانتفارق معاه ماشي حيت نتي بغيتي ... ( سكتات شوية و مررات لسانها على شفتيها ).. حيت أنا لي بغيت ...

نظرة استفهام وفضول كانت على ملامح سيدرا ... واخا جوابها كان معاكس ...

الشيء لي خلا نجمة تضيف بحرقة ...

نجمة:~ عصام يقدر يكون كيبغيني .... ولكن انا عارفة الطريق لي غانخرجو بيها أنا وياه ...

اخذت نفس عميق ....سكتات هاد المرة ... وبقات مقابلة سيدرا ..كتسنى جوابها ...

قصحات سيدرا جوابها ... باش متأثرش ...

سيدرا:~ ديري لي بغيتي ... قلت لك انا مابقاش كيهمني الأمر ... حياتك هاديك وتصرفي فيها كيف بغيتي وكيف رشقات ليك ...

قربات ليها نجمة خطوة اخرى .. وهضرات بنبرة أليمة ...

نجمة:~ صافي ! .. دغيا تخليتي على ختك؟

ملامح سيدرا تغيرو فجأة ... تقوسو حواجبها... وزيرات على جفونها ...

سيدرا:~ نتي لي خسرتي ختك ..

مشات سيدرا جلسات على طرف الفراش ...

زادت نجمة قربات حتى جلسات حداها ..

كل وحدة فيهم قالبة وجهها ل جهة ....

لكن نجمة لي تكلمات اللولة ...

نجمة :~ انا ماكانفكرش بعقلي شي مرات ... ولكن واخا كلشي ... نتي كاتبقاي ختي ... حتى نتي غلطتي ف حقي .. كان بإمكانك تسوليني بشوية ... وماتقوليش ليا ديك الهضرة هاكاك ... أنا ماشي بنت الزنقة ...

ضغطات سيدرا على شفتيها وتنفسات بارتجاف ...

سيدرا:~ كنت كنسولك الأيام لي فاتو كلهم وكتنكري .. وكتكذبي شحال من مرة .. ( تنهدات .. سكتات شوية ورجعات كملات بتساؤل ) شنو بغتيني نفهم من دوك الميساجات ؟ شنو بغتيني نفهم من كل مرة كتنكري فيها ؟ فين ماسولتك كاتكذبي ... وترديني كنزيد فيه ونتي عارفة تتصرفي ....

زفرات نجمة باختناق ... وبلعات الغصة لي واحلة فحلقها ..

نجمة:~ ونقولها واخا غلطتي فيا ... ماغاديش نقول ختي خسراتني ... حيت نتي كاتبقاي ختي الكبيرة ...

رق قلب سيدرا ... ولكن نجمة كانت جرحاتها ... وحتى هي دارت نفس الشيء ...

بقاو جالسين مدة طويلة وكل وحدة عاطيا بالظهر للأخرى ....

حتى فات الوقت .. عاد ناضت نجمة بثقل ....

نجمة:~ انا جيت نطلب منك السماحة ..

توجهت للباب و قبل ماتخرج دارت لعندها ..

نجمة:~ بغيت نمشي لافاك ... تقدري تجي تعاونيني نلبس ؟

هزات سيدرا راسها بإيجاب وغمضات عينيها ....

سيدرا:~ اه واخا .. سيري أنا جاية ...

خرجات من لافاك .. ووقفات بعيد على الباب .. كتسنى يبان ليها شي طاكسي .. مافيها لي يشوفها شي حد ثاني ... وهي بزز باش قدرات تفك من الكم الهائل د الناس لي جاو كيسولوها مالها ..

توقعات أنها غاتخرج من الدار وماغاتبقاش مخنوقة ... لكن الاختناق زاد ... كلما تفكرات عصام ... ولا غير جا اسمه ل بالها ...

بان ليها طاكسي جاي .. يالاه هزات يديها السليمة باش تشير عليه حتى حسات بيديها كتجر ...

مع دارت مع جرها ماخلاش ليها الفرصة حتى فين تستوعب اش واقع .. ثوانٍ و عقلها بدا كيستوعب الأمر ....

بلعات ريقها .. وشافت فيه باستغراب ...

نجمة:~ عصام .. حبس فين غادي !؟

وقبل مايجاوب تأوهات بألم منين تقصحات من يديها ... الشيء لي خلاه يطلقها و يوقف يشوفها ...

عصام:~ تقصحتي !!؟

تجاهلت سؤاله .. وجمعات يديها ..

نجمة:~ شنو بغيتي ا عصام ؟

عقد حاجبيه ..

عصام:~ كيفاش شنو بغيت ؟( وقف وقرب منها ) مالنا عاوتاني ؟ ....

بعدات عليه شوية .. وقصحات قلبها ....

نجمة :~ ماكاين والو ...

ميل فمه باستغراب ... وشدها من مرفقها برفق ..

عصام:~ ياك قلت لك خاصنا نهضرو ... تيليفونك كان طافي و ماكان عندي كيف ندير نهضر معاك ...

حرك عنقه دغيا الأمر لي خلا مفاصله يتشنجو ...

عصام:~ شنو وقع لك بعدا ؟ علاش طافية تليفون ؟

حيدات كفه من مرفقها .. ونطقات بقوة ...

نجمة:~ مابقى عندنا مانهضرو فيه ...

ضحك ... وقرب يديه مرة اخرى ..

عصام:~ شناهو ؟

بعدات .. وقلبات وجهها ...

نجمة:~ انا و ياك سالينا ..

اخر حاجة توقعتها هي انه يضحك ... بصوته الخشن لي كان كيذغدع حواسها بوحشية ...

ولكن هي خدات قرار و حتى حد ماغادي يأثر عليها فيه واخا يكون عصام نفسه ....

خلاته على راحته حتى سكت من الضحك .. وحط يديه على فمه ....

عصام:~ كيفاش ثاني هاد سالينا ؟

عينيها تغررغو على اثر هاد الكلمة ... لكن تشجعات وكملت بهدوء ....

نجمة:~ كيفما كتسمع ...سالينا هي سالينا . مابقيتش باغة نبقى معاك ... هذا ماكان ...

رفع حاجبه ... ورد كفه لجيبه ....

عصام:~ واش سيدرا قالت ليك شي حاجة ؟

ردات عليه بسرعة ... مامخلياهش يزيد يسول ....

نجمة:~ لا هاد المرة انا بغيت ..

ضحكة خشنة أخرى انزلقت من فمه ...

عصام:~ نجمة انا عزيز عليا الضحك ..و لكن ماشي هاد النوع... Seriously ! { من نيتك } it ain’t funny ..

مابغاتش تبكي أمامه ... زيرات على سترتها ... وهزات راسها ..

نجمة:~ لا ماكانضحكش ... انا ماكانبغيكش ...!

حواجبه تقطبو ... وقبل مايرد عليها .. كملات بنبرة جدية ...كتأكد على كلامها ...

نجمة:~ اه بصح كاتعجبني ... كاتأثر عليا ... ولكن منين خممت لقيت راسي ماكانبغيكش ... ( بللات حلقها وتنهدات بآسف) واصلا نتا غير كادوز بيا الوقت .. ها حنا بقيناا گاااع مع بعضنا .. ( رفعات حاجبها ) ومن بعد ؟ ... اتمل و اتمشي عند اخرى ... و هي غادة ... حيت هادشي لي معروف بيه عصام الشيخ ...

فاش تأكد من انها كتهضر بصح .. بقى غير ساكت ومركز مع كل كلمة كتقولها ..

سكتات شوية و رجعات كملات كلامها لي كان كيصيب قلبه بشكل قاتل ...

ميلات شفايفها ... وابتسمت بدون نفس ..

نجمة:~ طريقي معك مسدودة .. على شنو زعما غادي تبغي تزوج بيا ؟( ضحكات بإستهزاء ) مايمكنش ... كنا كاندوزو غير وقت زوين ... (هزات كتافها متصنعة عدم الاهتمام ) حيت لا انا لا كلشي عارف عصام ابو البنات مستحيل يفكر ف الزواج ..

حمارو عينيه .. وجبهته برزو فيها العروق ....

مررات لسانها على شفتيها بخفة ملي شافت حالته وبعدات شوية للخلف ...

نجمة:~ هادشي كنقولو ليك بخاطري ماشي سيدرا لي قالت ليا نتفارق معاك ... ولكن كان عندها الحق فكل كلمة قالتها ليا من اللول ..

تسناها حتى كملات هضرتها كلها ...

حس بفمه نشف .. بلل حلقه ... ورد عليها بسخرية ....

عصام:~ واش كنبان ليك ولد الحرام ؟ لهاد الدرجة ماكنسواش ؟

لقى غير الصمت من طرفها... الشيء لي خلاه يجن كانها كتأكد على كلامه ...

عصام:~ واش عمرك جبدتي معايا الموضوع ؟ ... عمرك قلتي ليا نتي انك باغة نتزوجو و قلت ليك لا ؟... انا كون جيتي عليا من نهار لول نخطبك بلا هاد صداع كامل ...

قاطعت كلامه ... وهزات راسها ...

نجمة:~ واش من نيتك ؟ واش عمرك شفتي شي وحدة كتقول لشي حد تزوجني ؟

قرب منها .. وزادت رجعات اللور ..

عصام:~ عمرك لمحتي ليا ؟ .. عمرك قلتي ليا الا تزوجنا و لا شي حاجة بخصوص الزواج ...؟

قرب مجددا .. الشي لي خلاها تهز يديها فوجهه باش مايقربش كثر ...

اما هو رد بانفعال ...

عصام:~ شفتك مركزة مع قرايتك .. قلت خليك حتى تاخدي الماستر ديالك و تعرفي راسك من رجليك .. مابغتيش ندخل عليك بالزواج حيت هذاك قرار صعيب ... وصعيب على اي وحدة تاخدو...

سكت لثواني كيلتقط انفاسه .. نبرته كتخرج مبحوحة ... ومغلفة بالغضب ..

عصام:~ ولكن .. ( ميل شفايفه بعدم اهتمام و هو كيهز راسه ) عندك الحق ... انا مافياش الخير ..و انا غير ولد الحرام مقطر ..

هزات راسها كتشوف فيه ...شافت نظرة اللوم فعينيه ..

عرفات راسها جرحاته هو الآخر ولكن كان خاصها بزز منها دير هادشي .. و الا هي لي غادي تكون خاسرة فالاخير ..

سمعت صوته مرة أخرى ينساب لأذنيها

عصام:~ منين انا خايب لهاد الدرجة ... مزيان خليني انا لي خايب ...

قابل عينيه مع عينيها وهز حواجبه ...

عصام:~ نتفارقو أحسن ؟

غمضات عينيها ... وهو مازال كيشوف فيها ... وكآخر ردة فعل دارتها ... هزات راسها بإيجاب وقلبات وجهها للجهة الاخرى .. باش ماتغوتش فوسط الشارع .....

ورا ردة فعلها مباشرة ... حسات بيه انسحب ومشا بحاله ..... ماشي انسحب غير من قدامها .. خرج من حياتها بأكملها هاد المرة ....

مشى و خلاها واقفة ... عاجزة تزيد خطوة اخرى للأمام ......

بعد مرور أربعة أشهر ...

واقفة قدام النافذة والريح كيداعب خصلات شعرها الفحمية... عيونها الداكنتين كيتفتحو ويتغمضو بلهفة ...

بقات مدة طويلة كتدندن بصوت منخفض .. كتحرك حلقها .. صوتها المنخفض كيستمع وكيعاود يختفي ف أنحاء المطبخ ...

وباقي تركيزها كان مع قالب الحلوى لي كتقاد فيه قدامها ...

شكون يصدق ان هاد الأيام مرو بسرعة وطلاقها تم .. بلا حتى صعوبة ....العدة سالات ... ومابقا حتى رباط مكبلها من الحياة الزوجية المريرة لي عاشتها ...

دابا عاد كتحس براسها حرة بالشكل الصحيح ... حرة من ياسين .. من بروده .. ومن الواجب لي كان كيجمعهم .. وحتى الرباط العائلي لي بينتتهم تلاشى بمرة ...

ماحسات بحتى حد ... وحتى سيدرا لي دخلات و شاركت معاها المطبخ ...

قربت لها وسمعات صوتها عاد خرجات من سهوتها ...

سيدرا :~ فين وصلتي؟

كردة فعل لا إرادية ... حطات يديها على صدرها وقفزت

سيدرا:~ خلعيتيني كاع محسيت بيك فاش دخلتي ... ( ابتسمت وشافت ف الحلوى ) هكا مزيان ؟ فين نكتب تلت سنين .. فالوسط ولا فالجناب ...

قربت ليها سيدرا ... وابتسمت حتى هي ..

سيدرا:~ مزيانة ... صدقات لك نيشان .... ( هزات كتافها ) باقي خصنا غير نزيدو لها شوية د الزواق ...

حركات شمس راسها بالإيجاب ... وبعدات شوية ..

شمس:~ صافي نتي كمليها ... وانا غانقاد لي بقا ناقص

أومأت لها سيدرا بالإيجاب .. ورجعات تكمل شغل شمس ...

وقفات كل وحدة ف بلاصة .. ملهين مع التزين .. حتى سالات سيدرا ... وربعات يديها ... بقات مدة طويلة ... كتشوف ف قالب الحلوى ... وتبتسم بشرود ....

حتى وقفات وراها شمس وحطات يديها على كتافها ..

شمس:~ سيدرا ..

بلعات سيدرا ريقها ...

سيدرا:~ امم ...

ردات عليها شمس بهمس ....

شمس:~ فاش ساهية ؟

دارت عندها سيدرا .. وضحكات..

سيدرا:~ كنت كنفكر غير فهديل ....

هزات شمس حاجبها وخدات من عندها الصحن .. حطاتو ف الجانب ...

شمس:~ علاش ؟

هزات سيدرا كتافها ...

سيدرا:~ هديل كتكبر دغيا تبارك الله والوقت ولا دغيا كايدوز ...

ابتسمت شمس بشرود .. ورجعات كتقاد فالكيك ....

شمس:~ الوقت دغيا كيدوز شي مرات ... (وقفات شوية وتنهدات فوق خاطرها) ولكن أنا هاد ثلث شهور مادازت عليا حتى هلاكتني ... ( بللات حلقها ) وماكرهتش دابا كون دازت شي عام ولا كثر باش ننسى هادشي كلو لي وقع هاد ست سنين كلها ....

بقات سيدرا واقفة ... مربعة يديها ... ومراقبة شمس ... وابتسامة عريضة على فمها ..

كانت مركزة مع كل حاجة كايديرها .. كتبغي كلشي يكون هو هاداك ...

فرق كبير بين شمس لي شافتها أول مرة وهادي ... كانت ذابلة ... أما دابا ولات باينة رجعات فيها الروح شوية ... وكتحاول تتجاوز كلشي .... خيانة ياسين .. طلاقها ... وصبرها لي ما جا بحتى نتيجة معه .....

من نهار طلقات حتى نهار كملات العدة ...

حسات بها انها ولات وحدة اخرى .. ولات كثيرة الابتسام والهضرة .. مابقاتش منزوية و لا حزينة ... تبدلات لدرجة كلشي حس قداش كانت تعيسة فزواجها .. ونهار على نهار كانت كتنكاسر من الداخل ....

التفت لها شمس .... وهضرات مجدداً

شمس:~ الوقت اصلا كيولي يجري .. عرفتي ملي كتزوجي ... وخصوصًا ملي كتولدي ماكاتباقايش تحسي بالوقت ولا والاعوام كيف كايدوزو .. وكتقولي كيفاش كنت عايشة بلا ولادي ... ( عضات على شفتيها ) كاتولي تقولي ماكنتش عايشة من قبل .... وهديل هي الحاجة الوحيدة لي ربحت من داك الزواج

أسبلت سيدرا أهدابها ...

سيدرا:~ بصح .. كلشي كيقول هكا ...

هزات شمس راسها ب موافقة للرأي ...

شمس:~ الأمومة زوينة ... واخا تدوزي شنو مادوزي ف حياتك .. كتنسيك ف كلشي فالأخير ...

بدون شعور حطات سيدرا يديها على كرشها ... كلمات شمس دغدغو حواسها ...

بغات حتى هي تحس بهادشي لي كتقول شمس ... وتعيشو شعور بشعور ...

دوزات يديها على كرشها .... كتفكر أنها حبسات موانع الحمل قبل ربع شهور ... ولحد الان باقي ماكاينة نتيجة ..

سهات مجدداً ... وغير ثوان .. كانت رجعات تتكلم بقلق ..

سيدرا:~ ياسين ماتفكرتش عيد ميلاد هديل .. (شافت جهة الباب) ولا سيفط ليها شي حاجة ؟

ضحكة ساخرة انزلقت من شفتي شمس ...

شمس:~ فين عمرو اصلا تفكرها ... كان حداها وعمرو تفكرها ... ( قلبات فمها وابتسمت ) ماعندك علاش يجيك هادشي غريب ... ولفت أنه ماكان كيتفكر حتى مناسبة خاصة بها .... ( غسلات يديها ودارت لعندها ) وشكون عرف يقدر يكون ماعارفش حتى واش تزادت اليوم ولا شي نهار اخر ...

قربات سيدرا حتى لعندها وحطات يديها على مرفقها بتردد ...

سيدرا:~ مايستهلش ...

ابتسمت شمس ... وغمضات عينيها بتأكيد ...

شمس:~ عندك الحق مايستهلش ... ياسين كان غير صفحة من حياتي وطويتها دابا ....

ارتبكت سيدرا وماعرفاتش باش ترد... اكتفت انها تهز راسها بالإيجاب ... حتى تكلمات شمس ...

شمس:~ حتى نجمة ختك تفكرتها وهو لي باها ناسيها ....

بلعات سيدرا ريقها ... والتوت شفتها العليا بابتسامة شاردة ....

سيدرا:~ نجمة كتفكر أي حد عزيز عليها .. ماكتنساش هادشي .. يمكن أنا ننسى هي ولا ....

ردات شمس شعرها خلف آذنيها .. وغمضات جفونها ...

شمس:~ بصح .. رديت البال ل هادشي ... (سكتات شوية .. عاد سولات ) واش بعدا برات شوية من بعد ماحيدات الجبس من يديها ؟

سيدرا:~ شوية قالت كتقدر تحركها .. (لوات شفتها السفلية بآسف ) بغيت نرجع فهاد الأيام ... ولكن عارفة دابا ايام الامتحانات .. مخلياها على راحتها ..

صغرات شمس عينيها ... ونطقات بتردد ...

شمس:~ سيدرا ..

قبل ماتجاوب سيدرا كانت هي كملات بثقة ..

شمس:~ عارفة عصام كيبغي ختك ...

تنهدات سيدرا .. وحركات عينيها ...

سيدرا:~ الحب ماشي هو كلشي ... كاين واحد الحاجة سميتها المعقول ...

جات تهضر شمس .. ومالقات ماتقول .. حيت مابقاتش عارفة ف شنو كيفكر عصام ...

بلعات سيدرا ريقها ... وحاولت تبقى هادئة

سيدرا:~ نسولك اشمس خوك كون كان ناوي المعقول !! واش كان غايتسنى هاد المدة كلها ... ها ربع شهور فاتت ملي هضرت معه ومادار حتى حاجة ؟ .. واش قال ليا كيبغيها .. وشا قال ليا ناوي نتزوج بها ؟ (رفعات حواجبها) ولا هاد الموضوع د الزواج قالو لها هي (حطات يديها على قلبها ) كنت كنتمنى من قلبي نكون انا لي غالطة فيه .. ونجمة عندها الصح ... بالعكس ماكانش غايبقى فيا الحال ... ( تنفسات بعنف ) شنو نبغي كثر من ختي فرحانة ...ولكن ماشي بالطريقة لي كلها غلط فغلط ...

اكتفت شمس انها تهز راسها بالإيجاب والأسف كيترسم على وجهها ..

مررات لسانها بخفة على شفتيها .. باغيا تبرر ل عصام وماعرفاتش كيفاش ... لاول مرة كتلقى راسها عاجزة هي براسها تعرف علاش باقي مادار حتى خطوة ف علاقتهم .....

خرجاتها من شرودها سيدرا لي اضافت بجدية ..

سيدرا:~ ديري نتي هديل ملي تكبر بلاصة نجمة .. كيفاش كنتي غاتصرفي معها ؟

تجاهلت شمس سؤال سيدرا .. مالقات ليه حتى جواب ..

قلبات وجهها للجهة الاخرى .. وردات بهمس ....

شمس:~ ولكن انا متأكدة عصام كيبغيها .... و كان ناوي معاها المعقول و قالها ليا ... غير ماعرفتش اش طرا من وراها حتى بدل رأيه ..

غمضات سيدرا عينيها ... وعضات على شفتيها ببطئ ...

سيدرا:~ فاتت دابا كثر من ربع شهور ... هادشي داز ... (درات يديها تحت صدرها) وانا حلفت مانتدخل فهادشي .. بين خوك وبين نجمة .. الا بغات تبقى معه دابا هاداك رأيها .. حيت انا هضرت .. (هزات كتافها بعدم فهم ) وقلت فالأخير جرحتها بزاف وضغطت عليها .. اذن صافي دابا دير شنو بان لها مناسب ...

ابتسمت شمس بشحوب ... وحاولت تبدل الموضوع ... باش مايبقاش التوتر مسيطر عليهم ...

شمس:~ عندك الصح ... المهم غانمشي نبدل ل هديل ...

اومأت سيدرا براسها ..

سيدرا:~ صافي انا نشوف الا باقي خص شي حاجة ....

وقفات كتشوف أجواء عيد الميلاد .. والإبتسامة ماكتفارقش شفاهها ...

شكون يقول ان هديل كملات ثلاث سنوات كلها بهاد السرعة .... وكتكبر نهار على نهار قدامها وبجنبها ...

هي النتيجة لي مخلياها تنسى كلشي من زواجها ... !

أسرتها كلهم كانو واقفين قدام الطاولة ... وهديل وسطهم .. كتنفخ فمها وتطفي الشمع ... ومرة مرة كتعلق ف هشام باش يهزها ...

دمعو عينيها ... ملي شافتها كتبتسم حتى هي وفرحانة .. خصوصا ملي كتشوف ف قالب الحلوى والألعاب لي قدامها ... كتغمض عينيها وكتولي كتشبه لها .... نسخة طبق الأصل عليها ..

حتى حسات بكف سيدرا فوق كتافها وصوتها كيهمس ف آذنيها ...

سيدرا :~ مالكي ؟

درات لعندها وردات بهمس حتى هي ...

شمس:~ تت ... والو ...

هزات سيدرا راسها ومالت على اذنيها ..

سيدرا:~ غاتكوني عيتي يمكن ...

حركات حاجبيها ..

شمس:~ لا بالعكس .. شحال هادي ماتجمعنا هكا .....

اومأت سيدرا براسها .. بينما عينيها انزلقو لجهة وليد لي حتى هو حاضر معهم ..

لقاته فنفس اللحظة كيشوف جيهتها .. احمررو وجنتيها ...

وماعرفاتش واش تبتسم له .... ولا تزيد تخفي مشاعرها ف قلبها وتتحمل أكثر ..

شافت راسها غاتعيق بنظراتها ... قررات تنسحاب لثوانٍ ....

هضرات مع سيدرا بخفوت

شمس:~ غانرجع دابا ... ردي البال ل هديل معك ...

غمزاتها سيدرا ...

سيدرا:~ كوني هانية ..

حتى خرجات عاد تنفسات بحرارة ... توجهات للمطبخ لتحت ... وبقات مدة طويلة ... حاطة يديها على قلبها ...

ماعرفاتش علاش كتحس بنظرات وليد شاعلين .. وكيوصلو لها بحال الضو ... كيصعقو كل حواسها ...

يديها تحركو على قماش فستانها الطويل .. وشعرها المعقود خلف راسها ... حيدات له الرباط المطاطي لي شادو .... وخلاتو مفردو على كتفيها براحة ..

مع خروجها من المطبخ صادف خروج وليد ... وعينيهم تلقاو مجددا ف رحلة صاخبة .....

ابتسمت بشحوب .. وهمسات بخفوت ...

شمس:~ وليد ...

تنهد براحة .. وهز راسه ...

وليد:~ لباس ؟

احنت عينيها ...

شمس:~ الحمد الله ... ونتا كيف غادي مع الايام ....

بلع الغصة لي واقفة فحلقه ....

وليد:~ ها حنا كندوزو الوقت ...

شافت فيه .. مالقات ماتقول ... سبقات اول كلام جا ل بالها

شمس:~ صافي غادي ..

شاف ف ساعته ... وحرك راسه بأسف ..

وليد:~ الخدمة .. ضروري نمشي ....

ضمت يديها لعندها بارتجاف ...

شمس:~ ااه ... الله يعاونك..

حرك فكه .. ورد بثقل ...

وليد:~ امين ...

بقاو واقفين بدون كلام ... هي على نفس الوقفة ... وهو داير يديه ف جيبه .. حتى كيبغي يتكلم وكيرد الكلام من حلقه ... باغي يخلي هاد اللحظة بيناتهم تطول ... وعمرها تسالي ..

اللحظة لي حلم بها طول عمره ... يشوفها غير مرة وحدة وماتكونش على ذمة ياسين .. تكون حرة .... نفس شمس القديمة .. بروحها المشعة ... ذاتها المتوجهة والدافئة ... الشمس لي تشرق وعمرها تغرب مازال ..... !

بلع طعم الصدأ لي بدا يتكون فحلقه ... وعينيه استمرو ف التحديق ف تفاصيلها بلا مايحس بالذنب ..

نظراته هبطو ل بنصرها الخالي من خاتم الزواج .....

يمكن دابا اصابعها البيضاء غاينسابهم خاتمه لي خباه هاد السنوات كلها ... باش يزين يديها ..

غير جوفها لي تحرك هو لي خرجه من سهوته .... وصوتها الخافت كيدغدغ مسمعه ...

شمس:~ تقدر تعطل ...

اخذ نفس من صدره ... وأومأ بالإيجاب ..

شافته كيدير يديه ف جيوبه ... وكيمد لها شي حاجة ....

ابتسم ... وعطاها علبة صغيرة...

ماقدراتش تعرف شنو ف البواطة الصغيرة ... لكن لونها الوردي كان مميز .. وباينة د الأطفال ... عرفات لمن ..

تكلم صوت اجش ...

وليد:~ ل هديل ..

ابتسمت حتى هي ..

شمس :~ شكرا .. ماكانش ضروري تعذب راسك ..

وصلات يديها ل أصابعه ... كفوفها أرسلو انذرات قوية ل ذاتها ملي تلامس جلده مع جلدها ....

سحب يديه ... وتنهد بكبت

وليد :~ ماكاين حتى عذاب ...

زيرات على العلبة ف حضنها .. وبقات واقفة .. حانية راسها ..

وليد:~ شمس الأصيل ...

رفعات عينيها .. وثباتتهم .. ف اللون الداكن لي خلف رموشه ... قبل ماتكلم كان اضاف ..

وليد:~ شعرك ...

هزات حواجبها وقاست خصلات من شعرها ..

شمس:~ مالو ؟

بغا يمد يديه لجبينها وعاود زير على مفاصله .. كيتحكم ف انفعالته ...

اشار لها ل جبينها ...

وليد:~ طايح على عينيك .. يمكن ماغايخليكش تشوفي مزيان ...

ضحكات بدون شعور .. ورداتو خلف اذنيها ...

شمس:~ نصيحة طبية .. !

ضحك حتى هو من قلبه .. ودعك جبينه ...

وليد:~ يمكن ...

التوى فمها وضحكات مجدداً .. بلا مايتسمع صوت قهقهتها .. كيتحركو غير شفتيها ... عيونها برقو ...

حتى رصاو أنفاسها ... عاد قدرات تتكلم بإحراج ...

شمس:~شكرا ... (هزات الهدية فيديها واشارت بها بلا ماتفتحها) .. متأكدة غاتعجب هديل ... واخا ماغاتفهمهش ....

حرك راسه ورجع زوج خطوات اللور ...

وليد:~ العفو ... ( رد يديه لجيبه) نتشاوفو ف ساعة اخرى ان شاء الله ....

عضات على شفتيها بإحراج ....

شمس:~ ان شاء الله ....

انسحب وليد وهي بقات واقفة فنفس البلاصة ... كتشوف ف خطواته الثقيلة لي خرجو من على الباب .. حساته كينساحب من داخلها ...

واخا فات هاد الوقت كله باقي نظرة منه كتحيي مشاعر الحب فقلبها .. وكتجدد احاسيس الشوق ف ذاتها ..

كل مشاعرها لي حاولت تخفيهم ب ستارة البرود .. وتغلفهم بقناع اللامبالاة ... رجعو يفيقو بقوة من نهار رجع وليد ل حياتهم مجدداً ..

قلبات وجهها .. على صوت سيدرا لي بانت لها جاية وهازة هديل كتبكي وصوت تنخصيصها كيتسمع حتى لعندها ....

تزعزع قلبها من بلاصته ... وتحركات بهلع ناحيتها ...

شمس:~ مالها ؟

هزات سيدرا راسها كتهدنها ...

سيدرا:~ والو ... والو .. ( عنقات هديل لعندها) غير كبات عليها العصير وصافي .. وتوسخات لها الكسوة شوية ...

مدات شمس ل سيدرا الكادو د وليد ... وهزات هديل ... بدات كتبوسها ..

شمس:~ صافي ا ماما ... صافي ... ( مسحات لها دموعها ) كبيتي عليك العصير ؟

ميلات هديل شفايفها وهزات راسها بإيجاب .. وبدات كتهضر على كسوتها ...

دوزات لها سيدرا على شعرها .. وشافت فيها كتضحك معها ...

سيدرا:~ البكاية صافي ها حنا غانبدلو الكسوة بوحدة اخرى حسن منها .. وجديدة عليها ( شافت ف شمس) ياك ؟

ابتسمت شمس ... وهزات راسها بموافقة ...

شمس:~ ااه ... دابا غانبدلوها لها ...

مدات هديل يديها لوجنتيها كاتمسحهم بباطن كفها ...

سيدرا:~ ماماك كانت كتسول عليك ....

هزات شمس راسها ... وحطاتها على كتف سيدرا ..

شمس:~ غير غانبدل ل هديل وغانشوفها شنو بغات ..

ردات سيدرا ببساطة ...

سيدرا:~ يمكن غير تشغلات عليك ...

ابتسمت شمس بدفئ ....

شمس:~ ولا بالها مشغول معايا .. (سكتات شوية وميلات شفتيها ) كيسحاب لها ماكنردش البال ... يمكن كيسحاب لهم هما السبب حيت ماقدرتش نطلق من ياسين ....

هزات سيدرا كتافها ... وماعرفاتش واخا علاقتها مع زهرة ماشي مزيان ... الإهانات لي وجهات لها فأول زواجها ماشي قلال وحتى ل نجمة حتى هي.. ولكن شي حاجة داخلها مخلياها تحن لها ..

يمكن حيت كتشهد أغلب تصرفاتها مع شمس وهشام وعصام .. ولا يمكن حيت مابقاتش كتحگر عليها فحال اللول ... ماكتخسرش لها خاطرها وفنفس الوقت ماعزيزاش عليها ..

دورات العلبة لي فيديها بشرود ... وسيطرات على مشاعرها الودية اتجاه زهرة ... عاد سولات ....

سيدرا:~ شنو هادشي ؟

نزلات شمس هديل فالأرض وشدات لها فيديها ...

شمس :~ كادو ..

عاودت سيدرا الكلام وراها باستنكار ...

سيدرا:~كادو ؟

ابتسمت شمس .. واسبلت اهدابها بدون شعور ...

شمس:~ وليد عطاه ل هديل ...

ميلات سيدرا شفايفها بابتسامة بلا ماترد البال

سيدرا:~ امم واخا نفتحو ياك ؟

اومأت لها شمس .... وقبل ماتجاوب .. كان الفضول لي ف سيدرا سبق ...

فتحاتها ... بان لها براسلي صغير فاللون الفضي .. مزين ب حمامة فالوسط ...

رفعات حاجبها الايسر...

سيدرا:~ هاي هاي ... الحَمَام لي كلاه وشواه ... ذوقو حسن من ديالي ...

ضحكات شمس ... وشافت شمس ف البراسلي الصغير ... وقلبها تلهف .. وخفق بسرعة ...

يمكن هي براسها لو اختارت شي هدية ل هديل غاتكون بهاد الشكل ..

شي حاجة كتخص اسمها وتكون رمزية ... وحلوة ...

ابتسمت بتلعثم .. ملي شافت فيها سيدرا ...

شمس:~ امم زوين ...

دورات سيدرا العلبة فيديها ..

سيدرا:~ ديريه ليها فيديها ولا نردو للبواطة ؟

دروات شمس عينيها وردات بهمس ....

شمس:~ شنو بان لك ؟

عضات سيدرا على خدودها من الداخل ..

سيدرا :~ بدلي ليها بعدا حوايجها هو اللول ...

اومأت شمس .. والتفت عند سيدرا ...

شمس:~اجي معايا ... الا بغيتي ...

دخلات معها سيدرا لغرفتها .. بدات شمس كتوجد ملابس هديل ..

بينما هي كانت ساهية ف الجدار ...

حتى عقدات حواجبها ... وناضت من بلاصتها ... كتهضر بتركيز ...

سيدرا:~ عرفتي نقول ليك واحد الحاجة .. وماتقوليش ليا غير كنتخيل ...

كملات شمس على شغلها .. وردات باستغراب ...

شمس:~ شنو هي ؟

هزات سيدرا حواجبها باهتمام .. وقربات من شمس كثر ....

سيدرا:~ ماعرفتش هاد وليد .. كنشوفو مألم .. (سكتات شوية) وماعرفتش والله ... كيجيني فشكل ... بغيت نشرح ليك وماغانفهمش كيفاش ...

دارت شمس هاد المرة عندها ... وردات بعدم فهم ...

شمس:~ مألم ؟

قلبات سيدرا شفتها السفلية بتأكيد ...

سيدرا:~اااه ... زعما شي حاجة ضاراه فخاطرو .. مامخلياهش مرتاح ... وباينة على وجهو .. حيت ديما ساكت ... وحتى ملي كيكون كيهضر غاتكوني كتحسي بهادشي ؟

حطات شمس يديها على قلبها وردات بقلق ...

شمس:~ ماباين ليا والو ...

سكتات سيدرا شوية ... ودعكات جبينها ...

سيدرا:~ يمكن غير كنتخيل ولكن والله حاسة به .. شي حاجة فشكل فداك السيد .. ماقادراش نعرف شنو هي ... (قطبات جبينها) وزعما راه تربى معكم تقريبا ماغاياكونش دابا بعيد عليكم لهاد الدرجة ..

تنفسات شمس بعنف وردات فنفس اللحظة بامتعاض ..

شمس:~ لا لا ... غير الغربة كتبدل الواحد ... ست سنين ماشي ساهلة ...

ابتسمت سيدرا ل هديل ووجهات سؤالها ل شمس ...

سيدرا:~ واخا وعلاش مشا يخدم برا ؟

ارتجف قلب شمس .. وجاوبات بلا ماتفكر ..

شمس:~ يمكن لقا تما حسن ...

هزات سيدرا راسها بنفي ... وملامحها تبدلو ..

سيدرا:~ تت .. الا كان لقا تما حسن ماغايرجعش دابا للمغرب وغايبقى يخدم هنا .. (داعبت وجنة هديل بأصابعها ومازال كتهضر) كان غايبقى تما ... وغايبقى يرجع فهاد المدة يشوف عائلتو... ماشي غايغبر بمرة ...

انقبض قلب شمس .. ولقات راسها حتى هي كتطرح على راسها نفس الأسئلة لي كتقولهم سيدرا ولكن ماكتلقا لهم حتى جواب ... !

كل ثانية كادير احتمال فشكل ... ووالو كتلقى غير الفراغ ....

نبرتها خرجات فاترة وحزينة ...

شمس:~ تبدل . ااه تبدل ... فاللول كان كيعمر معانا بزاف ... دابا مابقاش .. (أضافت بتبرير) يمكن حتى الواحد ملي كيكبر كيتبدل ...

صفقات سيدرا بيديها بدون حماس .. وجمعات فمها بتأكيد ...

سيدرا:~ لا لا بنادم ماكيتبدلش بهاد الطريقة الا ماكانتش شي حاجة لي بدلاتو .. يعني كاين شي سبب ... نتي براسك حاساه ماشي هو كيف كان ..

صغرات شمس عينيها ... وعقلها كيخدم بسرعة .. كتحاول تلقى السبب علاش مشا .. وكتلقى راسها عاجزة تفكر فشي سبب منطقي لهادشي .. !

كلشي كيبان لها مضبب ... وليد اختار يمسي حيت بغا يخدم تما ويستقر تما .. ويمكن رجع حيت عيا بوحده .. وباغي يشكل حياته من جديد ......

هي حتى الا بعدات عليه غايكون بسبب أنها كتنفي قلبها وتضغط عليه ... ولكن هو ؟

بقا سؤالها مفتوح...

ووجهات كلامها ل سيدرا بشرود ..

شمس:~ بصح ... يمكن شي حاجة وقعات ليه فهاد ست سنين لي خلاتو يتبدل .. ومايبقاش قريب لينا كيف كان ..

سيدرا:~ داكشي لي بان ليا ..

هزات سيدرا هديل وخرجات مع الباب ...

سيدرا:~ غانسبقك دابا ... (هزات كتافها) هادشي ماشي مهم .. ولكن ماتعرفي تقدري تعرفي شي نهار علاش مشا ... غير فضول وصافي ....

بغات شمس تبتسم ولكن الابتسامة زلقات من على فمها واختفت بسرعة .. بحال ذرات الهوا لي كانو كيدخلو لرئتيها ....

عقدات حواجبها وقررات قرار واحد هاد المرة الا عاودت تلقات وليد غاتسولو ....

غاتعرف منه علاش مشا .. غبر بدون سبب ... وكان طول سنوات غيابه كيتحجج بالخدمة

يتبع...

عشق الشيوخ الجزء 12

محتوى القصة

التنقل بين الأجزاء