لعبة الشطرنج الجزء الرابع

بدات كاتغمض عينيها باش تنعس شوية و هي تسمع واحد الصوت حدا الباب ديال البالكون بحالا شي واحد كايحاول يحل الباب ... بقات فبلاصتها و على نفس الحال ماتحركاتش كاتتصنط للصوت باش تعرف واش صوت الريح الليلية ولا فعلا شي واحد باغي يدخل .. بقات على داك الحال ثواني حتى بدات كاتسمع صوت تخربيش فزاج شوية و هي تسمع صوت بوو .. ناضت من بلاصتها بالزربة مايمكنش ماتفرزش صوت بوو و ماتعرفهاش .. شعلات الضو و مشات لجهة البالكون حتى لقاتها فالباب باغا دخل غير حلات لها الباب و هي طير لكتفها تخشات فعنقها بحالا كاتعنقها و حتى جيكساو فاش شافتها فرحات بزاف حيت اصلا كانت بدات تندم علاش ماجابتهاش معاها .. حطاتها بين دراعها و عنقاتها

جيكساو : ( بصوت هادئ و فيه نبرة حنينة ) حتى نتي ماقدرتيش تتفارقي عليا ا بوو .. كنت مخلوعة عليك بزاااف فاش ماشفتكش فالدار 

بقات بوو كاطلق صوت الضبح و كاتشوف فجيكساو حتى واحد مايقدر يفهمها اش كاتقول من غير جيكساو و من غير لاكان معاشر بومة ولا قدر يتعلم هضرتهم باش عااد يقدر يفهمهم .. قربات منقارها الصغير لنيف جيكساو و عضاتو بحالا كاتعاتبها حيت بغات تمشي و تخليها بوحدها فالدار 

جيكساو : ( بإبتسامة ) ماغانعاودش نخليك بوحدك ا بوو ( بدات كاتحك لها راسها و كاتهضر و تبتاسم ) نمشيو نعسو باش غدا نفيقو بكري باش نسيفطوه للقبر حدا امثالو و نرجعو لدارنا 

بوو : ( صوت الضبح ) 

سدات الباب ديال البالكون و مشات للناموسية حطات بوو حداها و نعسات .

▪ كان كايضور وسط واحد لاكاب خاوي واسع و مغبررر و فيه ناموسيات قدااام و شي بلاكارات و شي حوايج خرين قداام .. الضلام و غير هو لي كايضور تما خاشي يد فجيبو و يد شاد بيها تيليفونو كايضوي بالفلاش و كايستكشف المكان حتى دخل عندو واحد الراجل من لي خدامين فداك لوطيل 

الموظف : ا سيدي اش كادير هنا؟ هاد البلاصة مامسموحش يوصلو لها النزلاء

بولترا : ( دوز صبعو على واحد البلاصة فيها الغبرة ) هاد لافام دو ميناج لي دايرينها ماكاديرش خدمتها ( وراه صبعو ) شوف الغبرة 

الموظف : سيدي واش تقدر تتفضل معايا لبرا 

بولترا : شوف عش رتيلة قداش و البخوش لي هنا 

الموظف : سيدي الله يخليك تفضل معايا لبرا قبل مايشوفك شي حد و يوصلها للمسؤولين و يخرج لي على خدمتي

بولترا : ( قرب منو و حط يديه على كتافو ) شحال كايخلصوك.؟

الموظف : ا سيدي راه..

بولترا : جاوب ماتخافش 

الموظف : 600$ 

بولترا : ( ضور راسو ل2 جوايه ) ت ت ت ت هادشي ماشي معقول .. 600 دولار و باقي صابر عليهم؟ 

الموظف : حيت كانخدم بدوام جزئي ا سيدي

بولترا : ( حط يديه على كتافو ) يعني دابا نتا بحالا واكل رزق راجل اخر عندو عائلة فيها مراتو و ولادو 

الموظف : حاشا واش ناكل رزق عباد الله .. كانخدم عليها بدراعي و ماكانسرقش

بولترا : شاد 2 خدامي بدوام جزئي 600 دولار للوحدة يعني شاد خدمتك و خدمة وحداخر لي دابا مالاقيش فين يخدم و كايموت بالجوع

الموظف : ولكن ا سيدي.. 

بولترا : تعطاتك فرصة تعيش ولكن نتا ماكاتستاهلهاش 

الموظف : كيفاش.. ... و كانت هادي اخر كلمة قالها قبل مايتيري فيه بولترا بفردي مزود بكاتم الصوت طاح جثة للارض و تحدر عندو بولترا

بولترا : شحال زوين دير الخير .. ها 2 خدامي تخواو و غايستفادو منهم 2 عائلات ( شاف فداك لي مات ) دخلتي لخاطري ولكن خسارة صدقات كرشك كبيرة تا تفركعات عليك ...

بانت ليه واحد البركاصة حاطينها تما .. خشاه فيها و غطاه بشي كراطن و نفض حوايجو و مشا للسويت ديالو باش ينعس 

صبح صباح جديد فجزيرة هاواي فاقت جيكساو و بوو مع 6 ديال الصباح طرفات و لبسات حوايجها و خرجات من لوطيل باش تشوف شي بلاصة تفطر فيها من غير ماكلة لوطيل و منها نيت تطلق رجليها و تخلي بوو تقلب على ماكلتها بعدات على لوطيل و بدات كاتستكشف الجزيرة لي غايوقع فيها هاد التحدي لي غايكون بينها و بين بولترا و تتوقع الحركة لي غايبغي يدير فهاد التحدي .. وصلات 8 و مشات للبلاصة فين ساكنين سكان الجزيرة كانت عااامرة بالبشر واخا يلاه صباح الحال .. فطرات غير تما و دازت شرات لبوو ماكلتها ، كانت باغا ترجع للوطيل ولكن علاش اصلا غاترجع و هي جاية للهنا باش تفوج مع رفيقة حياتها .. زادت تعمقات و دخلات لواحد السوق لي مع الدخلة لي دخلاتو جات وقفات واحد المرا قدامها كانو حوايجها بساط و معلقة فعنقها الورد .. حبسات على جيكساو الطريق و قربات لعندها و هي هازة فيديها تاج ديال الورد و على وجهها ابتسامة هضرات معاها و قالت لها شي حاجة باللغة الهاوائية ولكن مافهماتهاش و مافهماتش حتى علاش وقفاتها عاودات ديك المرا هضرات معاها و من الحاحها توقعات بلي باغا تبيع لها التاج ديال الورد .. شراتو من عندها يلاه بغات تمشي و عاودات وقفاتها المرا دارت لها اشارة بيديها باش تتسنا و مشات غبرات دقائق و رجعات و فيديها تاج صغير ديال الورد قد راس بوو حطاتو لها على راسها 

جيكساو : ( بإبتسامة ) Thanks

جبدات الفلوس باش تخلصها ولكن فاجئاتها البائعة حيت مابغاتش تشد من عندها الفلوس ما بززاتش عليها باش تشدهم ودعات المرا و شافت فإينا بلاصة كاتبيع المرا الورد حتى لقات عندها واحد الكشك صغير .. مشات ضربات دورة فالسوق و شرات شي حوايج ديال البحر و بقات كادور تما و تلف الوقت مع الناس لي تما واخا ماكاتفهمش اش كايقولو ولكن رتاحت لهم داكشي علاش منين مادازت ضروري تشري شي حاجة حتى شرات من كاع لي فالسوق و فاش كانت خارجة من تما بانت لها المرا ملهية مع سياح خرين .. مشات للكشك و حطات لها 100 دولار و رجعات لوطيل مع الدخلة تعرض لها واحد الموظف 

الموظف : صباح الخير أنسة كانعتاذر ايلا سببت لك شي ازعاج 

جيكساو : واقع شي مشكل.؟

الموظف : ماكاين غير الخير ا انسة .. بمناسبة الذكرى السنوية ديال الفندق ديالنا لي جات مع رأس السنة غاتقام حفلة مجانية غدا فالعشية لي غايحضرو فيها جميع النزلاء ديالنا كانتمناو تشرفينا بحضورك ( عطاها واحد البطاقة فيها صورة الفندق و شي معلومات على الحفلة بحال الوقت ديالها )

شداتها من عندو و يلاه بغات تتحرك و هو يتعرض لها واحد الشخص هزات راسها و شافت فيه لقاتو هو نيت .. بتاسمات ليه نفس الابتسامة ديال السخرية و الاستهزاء لي دارت ليه فاش كانو فالسفينة .. بغات تتحرك و عاود دار يديه منعها مشات للجهة لاخرا باش تتحرك و عاود تعرض لها .. قلبات الدورة باش تخرج من لوطيل و عاود وقف قدامها ماشي ماقادراش عليه قادرة تختصر ليه عمرو بحال لي كانت غادير ليه فروسيا ولكن مابغاتش تثير الشبهات و خاصة حيت دابا كاينا بملامحها الحقيقية بلا مكياج بلا والو 

هالك : ( بإبتسامة ساحرة ) واش عندك شي مشكل معايا ا انسة مارلين.؟! ( سميتها المزيفة ) 

مارلين : ( بصوت هادئ ) كاتعرفني؟! 

هالك : كانعرف عليك الحوايج لي ماكايعرفوهمش عليك واليديك لي سيفطوك فالاجازة 

مارلين : ( الصمت ) 

هالك : اخر مرة طلاقينا فيها فالسفينة كانظن كان وقع واحد سوء تفاهم و كاندين ليك بإعتذار ( دار يديه من مور راسو و دوزها ) نقدر نعوضو لك بقهوة 

شافت ليه وسط المومو ديال عينيه و بقات هكاك لثواني حتى حس براسو تكهرب بنظراتها .. هزات يديها و كحزاتو للجنب و دازت بلا ماتجاوبو ولا تعبرو و بصريح العبارة شدات العرض ديالو و زطمات عليه برجليها .. طلعات للشومبر ديالها و سدات الباب .. حطات لبوو ماكلتها و مشات هزات تيليفون كاطل على دارها حتى وصلها ميساج .. حلاتو كان مكتوب فيه 

بولترا [ باش تعرفي قلبي كبير غانعطيك 3 ايام دوزي فيها اخر ايام حياتك كاتبرونزاي فشاطئ هاواي ... ميعادنا نهار 4 ] .. كتبات ليه ميساج 

[ عندك الحق ] ... حطات تيليفونها و شافت فبوو 

جيكساو : عارفة ا بوو ماكايعجبكش تحضري للجنائز داكشي علاش نهار جنازتو غانفرقو الشامبانيا على الحضور باش تتحول لجنازة لحفلة

▪ من مور ماسيفط لها ميساج كان كايتسناها تجاوبو و عاود سيفط لها ميساج 

بولترا [ و حيت انا كريم قبل مايدفنوك غانعطيك قبلة الوداع ] ... بقا كايتسناها تجاوبو على الميساج ولكن ماجاوباتوش يلاه بغا يكتب لها ميساج اخر و هو يصوني عليه تيليفون 

ادلر : امدرا لقيتيها؟ 

بولترا : ماكايناش فالفنادق لاخرين

ادلر : يعني غاتكون فنفس الفندق لي نتا فيه

بولترا : عزيز عليها الما و كاتساند الفقراء .. احتمال تكون ساكنة مع سكان الجزيرة

ادلر : ماتنساش بلي كاتكون قريية من ضحاياها دابا منين معتابراك ضحيتها تقدر تغدرك و تقتلك قبل التحدي غلطتي حيت عطيتيها ديك الفرصة. 

▫جيكساو : بوو علاش غانتسنا حتى دوز 3 ايام عاد نرجعو للنمسا فصندوق؟

بوو : ( صوت الضبح )

جيكساو : ( ربعات رجليها و حطات يديها على حناكها ) ولكن انا ماكانغدرش ا بوو ( سكتات شوية و عاودات هضرات ) هادشي ماكايعنيش مانلعبوش معاه غدا .. ناضت من

▪ كان باقي كايهضر فتيلي مع ادلر

بولترا : غاتكون فلوطيل ولكن حاضية راسها

ادلر : رد بالك راها قاتلة شرسة 

بولترا : هههههههههههههههههههههههه كانعشق القطط الشرسة

ادلر : مزال ماعرفنا جنس ديك المتوحشة هههههههه انا كاتبان لي كي الحنش لي كايبقا جاي غير تحت التبن 

بولترا : فالحفلة غانعرف طينتها 

ادلر : غاتحضر للحفلة؟؟ 

بولترا : جاي ندوز الوقت ماشي جاي للعزو

ادلر : قلتي غدا كاينا ياك 

بولترا : غدا غانشوف وجهها

ادلر : و نتا باش عرفتيها غاتبان بوجهها.؟؟ 

بولترا : ( بنبرة حزن ) مع الاسف تقتل واحد فلوطيل البارح بالليل 

ادلر : ( بنبرة صدمة ) لا مايمكنش تسنا تسنا .. قتلتيه عن قصد باش البوليس ياخدو احتياطاتهم و يقلبو على القاتل يعني سواء كانت فالقرية ولا فلوطيل ماغاتغطيش وجهها باش ماتثيرش الشكوك و تلصق فيها التهمة يعني دابا ايلا جات للحفلة ماغاديش دير حتى شي تصرف لي يوجه الانظار ليها و خااصة ايلا كانت فنفس لوطيل غادي تحضر للحفلة 100% ( بقا كايحك راسو ) ولكن بلاتي ايلا ماكانتش هي دايرا الماسك نتا باش غاتعرفها بلي هي لي كانقلبو عليها.؟

بولترا : ( بإبتسامة جانبية ) بومتها 

ادلر : اينا بومة؟ 

بولترا : اخر مرة كانت فدولة المغرب كانت عندها بومة كاتهضر معاها 

ادلر : و بطبيعة الحال مايمكنش تفهم البومة ولا البومة تتبعها الا ايلا كانت مربياها .. ماتفاجئتش حيت عايشة مع بومة 

بولترا : بقاو ساعات معدودة 

ادلر : و تشوف وجهها 

بولترا : ( بنبرة تخمين ) كانتوقع يكون وجهها مشوه و هادشي خلا عندها عقدة 

ادلر : و احتمال يكون واحد من طبقتنا هو لي شوه لها وجهها 

بولترا : ( بنبرة حزن طفل صغير ) بدات كاتبقى فيا

ادلر : كنت باغي نقولك تسيفط لي تصويرتها قبل ماتقتلها ولكن فاش قلتي هاد الهضرة تراجعت .. نتا عارفني عزيز عليا النعاس مانقدرش نخسر نعاسي فاش نبقى نتفكر وجهها

بولترا : ولا ممكن تكون تعرضات للاغتصاب من طرف شي واحد

ادلر : لا لا كانظن قتلو لها واليديها و رجعات تنتاقم منهم 

بولترا : لا داكشي كاين غير فالافلام الهندية 

ادلر : غانغامر بنعاسي .. فاش تشوفها سيفط لي تصويرتها نشوفها ضروري باش نشبع فضولي 

بولترا : متأكد 

ادلر : دابا علاش كاتخلعني و باغي تخليني نتراجع 

بقا كايطنز عليه بولترا حتى قطعو الاتصال و صونا على داداه لي كانت موحشاه و كانت كاتهضر معاه باش تجي لعندو و تفوج على راسها ولكن ماخلاهاش حيت مابغاش يخاطر بيها اما عند هالك زادت قوات الغريزة ديالو فالدم من جهة جيكساو من لقائهم فالصباح و حطها فبالو بشكل كامل عمر جذباتو شي ضحية لهاد الدرجة كان كايخلي الشبكة ديالو فبلايص متعددة باش لي طاحت فشبكتو يتبعها للنساء لي قتل ولكن بالنسبة لجيكساو .. خلا تركيزو و نظرو كلو عليها داكشي علاش خطط باش يشدها بشبكتو فالحفل لي غا يكون غدا ...

كان الجو ديال لوطيل هادئ مظهريا فقط .. كاين فيه الناس لي جاو يدوزو شهر العسل و كاين لي جاو يفوجو فإجازة ولكن بين هادو كانو 3 ديال السفاحين كل واحد فيهم كايفكر فالطريقة لي غايقتل بيها الثاني .. واحد كايفكر فالاغتصاب و الطعن فكامل الجسد و واحد كايفكر يلوح ضحيتو للكلاب و يصور فيديو و الكلاب كاتنهش فلحم ضحيتو و واحد كايفكر يقنبل هاد لوطيل بلي فيه مدام جايين هنا اغلبية لي عندهم الفلوس و لاباس عليهم هادي فرصة ذهبية منها تتهنا من اعدائها منها تتهنا من شحال من بيغسوناج. 

▫وصل منتصف الليل و حسات بالجفاف فالجسد ديالها و افكارها مخربقة .. يومين مابقات تخشات تحت الما باش دير جلسات التأمل ديالها .. يومين مابقات خلات الما ديال البحيرة تروي عطش الجسم ديالها .. شافت شحال الساعة كانت 12 ديال الليل يعني البحر غايكون قرب يخوا خاص غير تتسنا شوية حتى يخوا باش تمشي حيت ماعندهاش مع الاختلاط بزاف و خاصة مع الطبقة البورجوازية .. بقات كاتسنا حتى ضربات 2 ديال الليل عاد خرجات من شومبر ديالها و مشات للشاطئ .. طلقات بوو باش حتى هي طير فغابة جزيرة هاواي حيت كايعجبها دور فالليل .. و حيدات حوايجها و طواتهم و حطاتهم مع سبرديلتها و بقات غير بميني شورط و سوتيانات شافت فالسما كانت القمرة كاملة مدة و هي كاتشوف فيها حتى تبدل لون عينيها للون الرمادي الفااتح .. حطات رجليها فالما كان باااارد عكس البحيرة لي فروسيا لما ديالها دافئ ولكن ماشي مشكل هي عارفة بلي فاش غاتزيد تهبط للتحت غاتلقا الما دافي .. بقات غادا و كادخل فالما حتى ولا واصل ليها لعنقها خدات نفس عميق و غاصت لتحت فأعماق البحر باغا توصل للارض لتحت ماعرفاتش الحد ديالو فين كاين حيت موالفة كاتبقا تحت الما لمدة نص ساعة فاش كاتاخد النفس لي تحتاج و هادي حاجة صعيبة بزاف من غير لاكنتي موالفة بالما من الصغر و هادشي هي لي كانت كادير .. من صغرها و هي كاتدخل للاعماق البحيرة باش كادير جلسات التأمل ديالها تحت الما .. وصلات للعمق ديال البحر و ستكشفات البلاصة لي هي فيها عاد ربعات رجليها و جلسات .. غمضات عينيها و خوات عقلها من كلشي عطات الراحة لعقلها و للجسد ديالها فالجهة الثانية ديال البحر كان بولترا كايدور فالشاطئ كان باغي البارح يجي ليه ولكن كان مشغول بالخطة لي حبك لجيكساو و مابغاش يجي فالصباح حيت هو انسان كايميل للعزلة و فيها كايرتاح .. وقف قدام البحر و خدا نفس عميق بقا واقف نص ساعة كايسترجع فيها اش دوز فالسنين الماضية ماندم على حتى حاجة من داكشي لي دار و ماندمش على الطريق لي شد واخا صحابو شدو طريق القانون بالعكس هاكا لاقي راحتو كتر كايحس براسو كاينتامي لهاد العالم .. العالم لي دخل فيه هو و صحابو نهار جراو عليهم عمامهم .. بائعين متجولين للمخدرات كايدورو فشوارع امريكا مايكل و جوزيف كايقراو و يكافحو بالنهار و بالليل كايتسخرو لتجار المخدرات .. بولترا و ادلر بقاو يد فيد حتى قدرو يديرو نوع من المخدرات خاص بيهم لي كتاسح سوق السوداء بحال شي فيروس و خلاه يتحول من بائع صغير لملك سوق السوداء .. داداه عمرها عاتباتو على هادشي لي كايدير حيت نهار كانت عاهرة فالملاهي الليلية هما لي حيدوها من تما و حتى هي ماقصراتش معاهم بالعكس كانت كاتعتابرهم ولادها و كاتعطيهم حنانها .. و غير تفكر عمامو لي قتلهم واحد بواحد خرج من تفكيرو واخا اذاوه و حمقوه ولكن مانساش بلي هما كانو اخر ريحة من ريحة الاب ديالو حس بشعلة خفيفة بدات كاتشعل فيه لداخل .. حيد صباطو بالزربة و مشا كايجري للبحر ماشافش حوايج جيكساو لي فوق الرملة .. غاص فالبحر و بقا غادي و كايبعد فهاد الاثناء كانت جيكساو يلاه طالعة من عمق البحر باش تخرج للبر من مور مارتبات افكارها حتى حسات بصوت غريب مختلط بصوت الامواج الخفيفة .. صوت شي حد كايعوم فالبحر خرجات راسها خدات لوكسيجين باش ترجع للشاطئ من تحت البحر ماباغاش دير شي حاجة لي تثير الشبهات و توجه النظر ليها فهاد الوقت مع خرجات راسها من الما لقاتو قدامها يلاه خدات النفس باش ترجع لتحت الما و هو يفاجئها بحركة ماتوقعاتهاش منو .. شدها من خصرها ماخلاهاش تعاود تدخل تقابلو عيونهم و فواحد اللحظة شرد فعينيها .. فايت شايفهم فشي بلاصة ولكن فين بالضبط هاد النظرة ماغريباش عليه و لون العينين حتى هو ماغريبش عليه

بولترا : ( بنظرة استغراب ) فايت شايفك..

غمض عينيه شوية كايحاول يتفكر فين شافها حيت لون عينيها ماشي ديما كايصادفو .. صادفو مرة وحدة ولكن فين بالضبط؟ هنا خانتو ذاكرتو و السبب هو ماشافش ملامحها كاملين فالليلة لي تلاقاو فالمغرب .. قدر يشوف غير عينيها و غير لثواني داكشي علاش دابا ماعقلش فين شافها .. و فاللحظة لي كان كايحاول يتفكر فين شافها حطات يديها على كتافو بهدوء و دفعاتو لتحت الما بقوة كانت غاتغرقو غير طلق منها ماتعطلاتش دقيقة مشات راجعة للشاطئ قبل مايعرفها و يعرف وجهها و يعرفها شكون هي هزات حوايجها و مشات كاتجري للوطيل دخلات سدات الباب و حلات باب البالكون باش فاش تجي بوو تدخل .. دخلات للدوش باش تحيد الملحة من لحمها و عقلها كايفكر غير فواش عرفها؟ واش عقل عليها؟؟ 

▪ من مور ماغفلاتو و غرقاتو تدارك نفسو و خرج من الما قبل مايغرق .. خرج من البحر و فراسو شحال من سؤال ... و دابا عاد رجع تفكر ديك النظرة لي دارت فيه فاش كانو فالسفينة علاش شافت فيه دوك شوفات .. هي نفسها البنت لي دخلات فيه ولكن علاش شافت فيه هكاك؟ و علاش دابا حاولات تغرقو و اصلا اش كادير فهاد الوقت؟ كاين لي كايدخل يعوم فهاد الوقت.؟ و الاهم هو عينيها فين فايت شافهم؟ تكون زعما غير دايرة العدسات و تخالطات ليه مع شي وحدة؟ البارح كانو عينيها عسليين فاتحين و اليوم لونهم رمادي .. مايمكنش تكون تخالطات ليه مع شي وحدة هو كايحس راسو بلي كايعرفها ولكن فين كايعرفها .. نفض افكارو و رجع للسويت ديالو دوش و بقا جالس فالبالكون كايلعب بواحد المكعب و كايفكر فغدا اما عند هالك مافلتاتش جيكساو فاش دخلات حيت فاش دخلات من باب لوطيل شافها غادا و شعرها فازك حيت كان يلاه خرج من المقهى ديال لوطيل بقا مستغرب فيها كيفاش قدرات تمشي تعوم فهاد الوقت؟ ماخافتش على راسها زاد عرف حاجة جديدة عليها و هي زعايمية و ماكاتخافش يعني فنظرو يقدر يشدها فشي بلاصة خالية مافيها حد و يدير فيها مابغا .. رجع حتى هو للسويت ديالو و هو كايفكر اش يدير فيها غدا فاش غايشدها حيت لا محالة غدا ماغايزكلهاش. 

تسالا النهاو الثاني من المجية ديالهم لهنا و تفتاتح يوم جديد بفجر جديد و صباح جديد لي كلهم فاقو فيه بكري 

▫جيكساو غير فاقت بقات كاتقلب على بوو لقاتها ناعسة لها حدا عنقها و مخشية فيه .. بقات كاتتجبد فبلاصتها و كادير الرياضة الصباحية غير فبلاصتها عاد ناضت باش تفطر .. طرفات و بدلات حوايجها و حطات لبوو ماكلتها عاد هبطات للمقهى ديال لوطيل باش تفطر جلسات كاتفطر على خاطرها و كاتفكر فحفلة العشية خاصها ضروري تشري ماتلبس حيت ماكانتش ضاربة الحساب لهادشي داكشي علاش فكرات من مور الفطور دوز تشري شي حاجة خفيفة ليها باش تحضر ... سالات فطورها و دازت للشومبر باش تشوفها بوو و تبعها .. ماحتاجتش تخرج لبرا حيت داك لوطيل كان كبير بزاف و واحد البلاصة فيه دايرين فيها محل كايبيعو فيه الحوايج ديال العيالات و محل كايبيعو فيه الحوايج ديال رجال و محل كايتباعو فيه المجوهرات بقات كادور فيهم ماقيسات حتى حاجة فيهم حيت اصلا الحوايج لي كانو فيهم ماكاتلبسهمش و ماكايوالموهاش

البائعة : ( بإبتسامة ) انسة نقدر نعاونك فشي حاجة 

جيكساو : لا شكرا

البائعة : نقدر تعاونك ا لالة

حيدات لها جيكساو من الطريق و خلاتها كاتجبد فالحوايج و تختار لها الحاجة لي تجي مع اللوك ديالها بقات كاتجبد لها و لي جبداتها لها ماكاتبغيهاش حتى صافي ستسلمات معاها يلاه كانت غاتخليها تقلب بوحدها و تمشي تشوف شي زبونة خرا و هي تعيط لها جيكساو 

جيكساو : هاديك لي بغيت 

البائعة : واش متأكدة ا لالة؟ 

جيكساو : ايلا بغيتي

البائعة : واخا ا لالة 

بقات كاتشوف فيها بإستغراب مشات جمعات لها ديك اللبسة فساشية و عطاتها لها خلصاتها و رجعات للشومبر ديالها ماشرات لا مجوهرات لا هم يحزنون حطات اللبسة فوق الناموسية و مشات دوش .. دوشات و تجبدات فوق الناموسية بالبينوار و حداها بوو كاتعضها بمنقارها باش تنوض 

جيكساو : باغا تلعبي

بوو : ( صوت الضبح ) 

جيكساو : علامن كاتهضري؟؟ 

بوو : ( صوت الضبح ) 

طارت من حداها و مشات لجهة البالكون و بقات كاتغوت باش تمشي لعندها مشات لحداها و هو يبان لها هالك جالس فكرسي و مقابل مع البالكون غير شافها حيد النظاظر و بتاسم لها ابتسامة خبيثة .. دخلات و ماداتهاش فيه 

بوو : ( صوت الضبح ) 

جيكساو : فالحفلة غايعرف شكون الفريسة و شكون المفترس ا بوو ...

وصلات 6 عاد ناضت باش تلبس اش شرات .. لبسة ماشي بحال اللبسات لي كايحضرو بيهم اغلب الاناث لي من صغرهم تعلمو بلي فالحفلات المرا خاصها تلبس الفستان و الراجل السروال .. هاد النهار جيكساو كسرات هاد القاعدة و لبسات لبسة كلاس سروال كحل مع الفوقي ديالو حتى هو كحل و فيه نقاطي فضيين محلول من الصدر و صباط طالون كحل .. جمعات شعرها كوت شوفال و ماكات مكياج برز ملامحها القاسيين .. رشات البارفان ديالها و شافت فالمكانة لقات باقي الحال على الحفلة شوية .. حيدات طالون و لبسات سبرديلة خرجات و دات معاها جيكساو باش طلقها فالغابة حيت مانساتش بلي ديجا بولترا شافها معاها و غايكون عاقل عليها .. طلقاتها فالغابة من مور ماودعاتها و عوالة زعما باش من مور الحفلة ترجع لعندها و ترجعها لوطيل ، رجعات و حيدات سبرديلة و لبسات صباط طالون يلاه جات غاتهبط و هو يوصلها ميساج، فتيليفونها 

بولترا [ علاش نتي نكارة الخير .. بفضلي باقا عايشة و غاتحضري لحفلة و ماشكرتينيش.؟! ] ... جاوباتو على الميساج

جيكساو [ غانرد الجميل ديالك ] ... رجعات للفاليزا ديالها و هزات قريعة صغيرة فيها واحد السائل خشاتو فبوشيطة صغيرة كانت هازاها فيديها عاد خرجات فإتجاه الحفلة لي كانو دايرينها جنب لابيسين ديال لوطيل كانت الدنيا عاااامرة و مكتظة بالبشر ماكانش يسحابلها غايجيو بكري حيت المفروض يلاه وصل الوقت ولكن بنادم كان موحش الحفلات .. حاولات تشوف شي طبلة توقف فيها بعيدة على بنادم .. بانت لها وحدة فواحد مبعدة و فنفس الوقت تقدر منها تشوف كاع لي حاضرين .. و

هزات تيليفونها و عاودات طلات على دارها حتى عاود وصلها ميساج حطات تيليفون قدامها كاتشوف فيه بلا ماتبين بلي راها هازاه حيت توقعات يكون مراقبها دابا و كايسيفط الميساجات بلعاني باش يشوف شكون لي كاتهز التيليفون فاش كايسيفط الميساجات و داكشي لي توقعاتو هو لي كان حيت فعلا كان كايسيفط الميساجات و حاضي من الفوق شكون لي كايشوف فتيليفونو فالوقت لي كايسيفط الميساجات كانو بزاف لي هازين تيليفوناتهم شي كايتسيلفا و شي داير لايف و شي كايهضر فتيليفون .. هاد الطريقة مانفعاتوش هبط لتحت و بدا كايصوني عليها باش تجاوب دوزات المكالمة و خلاتها دايزا بلا ماتهز تيليفون ولا تشوف فيه قطع عليها و خشا تيليفون فجيبو بدا كايقلب بعينيه غير من بعيد على شي وحدة تكون معاها البومة ولكن مابانتش ليه شوية و هو يصوني ليه تيليفون 

ادلر : واش شفتيها؟؟ 

بولترا : لا

ادلر : واقيلا ماغاتكونش حضرات

بولترا : لا حاضرة 

ادلر : باش عرفتيها

بولترا : صونيت عليها و دوزات المكالمة كاين الصداع ديال الحفلة ولكن ماكاتجاوبش 

ادلر : قلب على البومة ديالها ايلا لقيتيها غاتلقا حتى مولاتها 

بولترا : مالقيتهاش ( بقا كايدور فعينيه حتى تركز نظهرو فواحد الجهة محددة .. بتاسم ابتسامة جانبية ) ولكن لقيت حاجة خرا 

ادلر : شنو لقيتي؟؟؟ 

قطع عليه و مشا لجهة واحد الطبلة متقصدها .. طبلة معزولة على طبالي و جات معزولة واقفة فيها انثى عشرينية مغطية راسها بالسواد مايمكنش مايعقلش عليها هي نفسها ديال البارح لي بغات تغرقو ... شافتو جاي و بتاسمات ابتسامة جانبية جا لعندها برجليه بلا ماتمشي لعندو ، وقف قدامها ماهضرش معاها حدو هز كاس ديال الما لي كان قدامها شربو قدام عينيها زعما باش يجبدها .. هزات البوشيط ديالها و بغات تمشي من تما و عاوتاني دار يديه حبس لها الطريق .. مشات باش دوز من الجهة الثانية و نفس الشي حبس لها الطريق بيديه وقف قدامها و شاف فيها كانت كاتوصل لكتفو ماشي حيت قصيرة ولكن هو لي طول منها حيت الطول المثالي عندها 1.70 .. بقا كايشوف فعينيها باش يعرف واش فعلا دايرا العدسات ولكن لي فاجئو هو مادايراش العدسات شنو التبرير ديال نهار يشوف عينيها عسليين و نهار يشوفهم رمادي و دابا ازرق مغلوق.؟ ... قرب لعندها باش يهضر حيداتو من طريقها و بغات دوز و شدها من دراعها حتى عاودات فاجئاتو بحركة ماتوقعهاش منها نفس اليد لي شدها بيها لواتها ليه من الكوع و عوجات ليه الصبعان ديالها فنفس اللحظة لي دارتها ماعرفاتش كيفاش حتى ولات يديها ملوية و صبعانها لي معوجين

بولترا : ( شاف فيها بحيرة ) كانعرفك و مزيان ... ماجاوباتوش بقات غير كاتبتاسم فوجهو خاصة ملي شافت العرق كايقطر منو .. ماجات فين تجاوبو حتى نضم ليهم هالك لي حتى هو وقف بلا ماياخد الاذن .. طلق بولترا من يديها و حس براسو بدات كاطلع معاه الصهدة و فوقما كايزيد يبين بلي جاه الصهد كاتتوسع ابتسامتها و واخا هادشي لي وقع ليه على غفلة ماحيدش عينيه من عينيها عيط لواحد السرباي باش يجيب ليه الما حيت كايحس بحلقو نشف اما هالك فكان كايقلب عليها فالحفلة كاملة حتى لقاها واقفة مع بولترا مشا بخطوات سريعة لعندها حيت مايمكنش يخلي فريستو لشي حد اخر ...

وقف قدامها و هو ساهي فهاد الكتلة ديال الشر لي قدامو .. مايكدبش على راسو و يقول ماجاتش زوينة موالف يشوف الزين و يشبع منهم ولكن جيكساو كانت عندها جاذبية خاصة نفس الجاذبية لي كاتجذبنا للاشرار لي كايكونو فالافلام جذباتو دابا لجيكساو بمكياجها القاسي لي كايبرز وجهها المظلم .. لباسها الكلاسيكي .. شد يديها بشكل راقي و باسها و عينيه فعينيها

هالك : ماكنتش متوقعك بهاد الجاذبية

جيكساو : ( ابتسامة خفيفة)

هالك : ( شاف فبولترا ) عندك شي مشكل لانضميت معاكم

بولترا : كون زدتي تعطلتي باش تستأذن 

هالك : كانظن فايت شايفك فشي بلاصة وجهك ماغريبش عليا 

بولترا : حاجة عادية غاتكون غير واحد من ليفانز ديالي

كرز هالك على يديه بالاعصاب و حاول يتجاهل هضرتو باش مايضيعش عليه هاد الفرصة ولكن ضروري غايتفاهم معاه من بعد على هاد الاستفزاز لي دار ليه قدام جيكساو .. عيط لواحد السرباي دار ليه بصباعو رقم 3 و غمز ليه .. جا بالزربة لعندو و هو هاز فيديه بلاطو فيه 3 ديال الكيسان ديال النبيذ هز الكيسان حطهم فوق الطبلة عاد هز 2 و فهاد اللحظة لي بولترا مشغول مع سرباي شاد فالعنق ديال قميجتو و كايهضر بصعوبة مع السرباي باش يجيب ليه شي حاجة ... مد هالك الكاس ديال النبيذ لجيكساو

هالك : ممكن تشاركيني فالمشروب

جيكساو : ( بنبرة هادئة ) ماكانشربش شي حاجة ماخويتهاش بيدي 

خلاتو معلق يديه و مارضاش و ماتسرطاتش ليه بقا كايشوف فيها بنظرات قاتلة ولكن سرعان ماقلب التغوبيشة لضحكة 

هالك : ماكنتش عارف بلي عندك الصوت ( مد الكاس لبولترا حتى هو باش مايخليهاش تشك فيه زعما ) كانظن مارلين ماعزيزش عليا تكتر من النبيذ .. نقدرو نشربو انا وياك حتى ترشق ليها

بولترا : ( كايشوف فجيكساو ) كانقدر ضيافتك ولكن كانفضل نشرب من البرميل ماشي من الكاس ... غير شاف السرباي جاي مشا لعندو كايجري شد من عندو اللوز و الما و خرج كايجري

هالك : ( بإستغراب ) مال هدا

جيكساو : ( شافت فساعتها ) كانستأذن .. بغات تمشي و منعها 

هالك : فين غاتمشي؟ السهرة عاد بدات ... شافت فيديه لي شادها بيها من دراعها و عاودات شافت فيه حطات يديها على اليد لي حاطها على دراعو بلطف و قربات لودنيه 

جيكساو : ( بصوت كفحيح الافعى ) الموت بحال المغناطيس كاتجر كاع الحديد لي حداها حاول تبدل معدنك و تبعد عليها 

حيدات ليه يديه من دراعها و خرجات من تما بنفس الهدوء لي دخلات بيه مخليا موراها هالك مسمر فبلاصتو كيفاش ماعرفهاش..؟؟؟ نبرتها عينيها طولتها فصالتها نفس المواصفات ديال جيكساو .. مدة و هو كايقلب عليها و مسيفط لي يقلبو عليها و مالقاوهاش حتى كايتفاجئ بلي هي نفسها لي بغا يرجعها فريستو .. هي نفسها لي طلاقا فالسفينة .. كاينين فجزيرة وحدة .. فأوطيل واحد و الاهم شومبرتها ملاصقة مع السويت ديالو .. بقا كايزير على الكاس لي فيديه حتى تهرس و تخشا زاج فيديه .. خرج كايجري من تما كايقلب عليها ولكن مالقاش اثرها. 

▪ من مور ماخرج من لوطيل مشا كايجري لجهة الشاطئ و فيديه قرعة ديال الما و اللوز .. كلا اللوز بالزربة علاين ربع كيلو لي كلا فدقة وحدة و حل القرعة ديال الما شربها فدقة وحدة كايحاول يعوض السوائل لي نشفات من الجسم ديالو .. ماخفاش عليه بلي شرب السم و ماشي اي سم بل نفس السم لي تقتلات بيه ديك المرا .. سم السيناييد داكشي علاش كلا اللوز باش يبطل المفعول ديالو قبل ماتنشف ليه الذات ديالو .. كون ماعاقش بالاعراض لي جاوه من مور ماشرب داك الكاس كان ممكن من مور ساعات قليلة فخبر كان ، دابا عاد عقل دوك العينين فين شافهم .. هي نفسها جيكساو نفسها لي خرطات ليه صدرو و نفسها لي كانت غاتقتلو فالمغرب و نفسها لي خشاتو فالحبس و نفسها لي خطفات ليه داداه غفلاتو او بالاحرى صدماتو صدمة كبيرة ، كان كايتوقعها شي وحدة مشوه لها وجهها ولكن ماشي هادشي لي كان بل وجهها كان كامل مكمول .. كانت عارفاه فين هو ولكن هو لي ماكانش عارفها .. رجع لبلاصة الحفلة بالزربة باش يلقاها ولكن لقاها مشات شك فهالك يكون هو لي داها حيت حتى هو ماكاينش و رياس عارف مزيان بلي هالك كايستهدف العيالات و كايقتلهم .. طلع كايجري للشومبر ديالها كانت مسدودة و الضو مطفي عاود خرج للشاطئ كايقلب عليها ولكن مالقاهاش فين غاتكون مشات.؟؟؟ بقات بلاصة وحدة هي الغابة ...

من مور ما خرجات من الحفلة مشات للغابة باش تجيب بوو .. بقات كادور فالغابة فداك الليل غير بوحدها و هازة تيليفون شاعلة الفلاش باش كاتشوف قدامها و كاتعيط لبوو ولكن ما من مجيب كانت كاتظن بلي بوو ماغاتتعمقش فالغابة داكشي علاش بقات كاتقلب ولكن ماكاتدخلش للداخل حتى سمعات صوت الخطوات و شي حد كايجري دخلات للغابة لداخل و زادت بعدات حتى لواحد الشوية سمعات صوت الضبح ديال بوو و داك الصوت غادي و كايقلال بحالا طايحة فمشكل .. حيدات الطالون من رجليها و مشات كاتجري لجهة الصوت و قلبها كايضرب ماداتهاش فالحجر و مادتهاش فلايعضها شي عقرب ولا شي حنش واخا من النادر يلقاهم بنادم هنا .. بدات كاتجري و كاتعيط لبوو

جيكساو : ( بصوت عالي ) بووووو ... بوووووو 

غادا و كاتقرب للصوت دخلات لوسط الغابة حتى لقات راسها حدا واحد الخيمة شاعلة العافية ديال المخيم حداها و واقفين 2 رجال واحد منهم شاد بوو من جناحها كايقربها للعافية و الثاني كايفيلمي بواحد الكاميرا باغيين يحرقوها حية غير باش يتشهرو فمواقع التواصل و خاصة حيت نوع بوو نوع نادر بزاااف .. شافت فيهم بواحد النظرة مشتعلة فيها شعلة الغضب .. مشات كاتجري ناحيتهم بأقصى سرعتها ماجاو فين يتداركو بلي معاهم الزايد حتى نقزات على داك لي شاد بوو فيديه و تعلقات ليه فضهرو ماهتماتش للحذر لي خاصها تاخد و ماهتاماتش بلي راه باين وجهها غير نقزات عليه ضورات ليه راسو بواحد الشراسة 2 دورات و الغضب عامي عينيها حتى خلاتو طريح الارض راسو بقا كايشوف فالسما و الكسدة كاتشوف فالارض هزات راسها كاتشوف فالثاني بنظرة قاتلة بحال نظرة شي مصاص دماء يلاه سالا من فريستو و ضار يشوف الشاهد .. لقاتو باقي مصدوم و مامتيقش اش واقع لصاحبو فمدة اقل ، من دقيقة .. لاح الكاميرا و بقا كايرجع باللور و هو مصدوم حتى بدا كايجري هارب منها و كايتلفت موراه واش تابعاه .. مالقاهاش 

▫حيدات سمطة السروال ديال لي قتلاتو و لواتها فيديها و مشات كاتجري من طريق معاكسة منين داز داك الشاب لي هارب بدون ماتنتابه للعيون لي كانت مراقبة كاع هادشي لي وقع اما بوو غير تحركات جيكساو و هي طير تبعاتها من فوق الشجر .. 

بقات غادا كاتجري بحالا حافضة الغابة مع العلم هي زارتها مرة وحدة و فهاد المرة قدرات تعرف التمويهات لي كادير هاد الغابة و من بينهم فاش كاتمشي بشكل مستقيم فيها ماكاتخرجكش لبرا حيت جميع الغابات لي كايكونو عميقين ماخاصكش تمشي فيهم بشكل مستقيم بل بشكل مائل واخا ماتكونش عندك البوصلة .. وقفات فواحد البلاصة و بدات كاتزير السمطة على يديها كاتشكل حبل بيها و طالقة ودنيها كاتسمع خطوات جرا غاديين و كايقربو منها و ما هي الا ثواني حتى خرج فيها بلا ماتمشي تبقا تابعاه و كاترهق راسها موراه رجليه جابوه لعندها غير شافها و هو يتصدم ماتيقش اش كايشوف كيفاش وصلات للهنا؟؟؟ ياك ماكانتش تابعاه ياك خلاها مع صاحبو لي مات فواحد اللحظة شك بلي هي جنية ماجا فين ينقذ راسو و يهرب حتى لقاها موراه و السمطة ضايرة على عنقو .. جراتو للارض بكل قوتها حتى جابتو ناعس و بقات كاترجع باللور و هي جاراه من عنقو بالسمطة .. واخا الجسم ديالو تقييل و واخا غواتو لي كسر الغابة بيه ولا كاينوح كي المرا فين مشات الهيبة لي كان كايطبقها على حيوان ضعيف؟؟؟؟ و فين مشات ديك الضحكة لي كان كايضحك على بوو .. واحد الشوية و هي تهبط بوو فوق الجسم ديالو كان باقي حال عينيه وقفات ليه حدا عنقو و بقات كاتشوف ليه فواحد العين حتى لواحد اللحظة نقباتها ليه حتى جبداتها من بلاصتها طلق صرخة تسمعات فكااع الغابة صرخة لي موراها تبعاتها ضحكات جيكساو الهستيرية و صوت الضبح ديال بوو ..

ماوصلاتو لحدا صاحبو حتى كان مات .. حيدات ليه السمطة من عنقو و جمعات شعرها مشات كاتقرب الخيم ديالهم حتى حطاتهم حدا العافية نييشان و موراها مشات لعند داك لي شنقاتو بالسمطة و بدات كاتجرو من يديه حتى وصلاتو للخيمة نعساتو فيها عاودات مشات للاخر حتى هو بقات كاتجرو حتى خشاتو فالخيمة و نعساتو فبلاصتو .. مشات هزات الكاميرا حيدات منها كارط ميموار عاد خشاتها لهم تا هي فالخيمة .. هزات خشبة كانت شاعلة فيها العافية و قرباتها للخيمات حتى شدات فيهم العافية بجوج .. هزات تيليفونها من الارض و البوشيطة و بعدات من الحريق باش ماتلصقش فيها الريحة و بقات غاديا كاتتمشا باللور و بوو فوق كتفها بقات عينيهم كايشوفو فالعافية لي كاتاكل فهادوك لي حاولو يحرقو بوو و هي حية حتى بعدات من تما و بقات كاتتمشى عادي و خرجات من الغابة فحين بولترا كان باقي حاضيها من بعيد و متبعها بنظرات غريبة حتى غابت على نظرو عاد تحرك حتى هو من تما 

▫خرجات من الغابة و عاودات دخلات ليها من البلاصة لي دخلات ليها فاللول .. هزات طالونها لبساتو و تحركات من تما رجعات للوطيل و بوو باقا فوق كتفها .. طلعات فالاسانسور و بقات غادا فالكولوار حتى وصلات للشومبر ديالها .. حلاتها و دخلات تحدرات باش تحيد صباطها شوية و هي تلاحظ واحد الحاجة .. الزربية الصغيرة لي حدا الناموسية مايلة و ماشي كيفما خلاتها .. وقفات فبلاصتها و بدات كاتشم ريحة البيت .. فيه ريحة زايدة من غير ريحة المعطر و من غير ريحة البارفان ديالها كاينا ريحة خرا .. ريحة بارفان رجالي .. دارت للباب سداتها بالساقطة و بقات كاتتمشا فالغرفة بلا ماتشعل الضوو كان واحد الصمت زائد عن حدو كايكسروه غير صوت طقطقات الطالون ديالها و صوت انفاسها و حاجة خرا .. صوت انفاس شي حد اخر فالغرفة .. قادرة تسمعهم مزياااان حيت فالظلام كاع الحواس كايخدمو مزيااان

بوو : ( صوت الضبح ) 

ماجات فين تهضر مع بوو حتى تحطات يد على فمها و جنوي على عنقها ... ريحة البارفان و صوت التنفس ديال داك الشخص ولات كاتحس بيهم مزيان 

•°• قرب من ودنيها و زاد قربها ليه 

هالك : ( بصوت رجولي خافت ) طحتي بين يدي 

جيكساو : الصمت 

هالك : ( بنفس النبرة ) عرفتي بلي الموت عندها مغناطيس ولكن ماعرفتيش شكون لي كايمثل الموت 

جيكساو : الصمت ... قرب وجهو لعنقها و بدا كايدوز نيفو على عنقها و كايجر ريحتها لنيفو بحالا كايستنشق الكوكايين

هالك : ( مغمض عينيه ) نفس البارفان ديال روسيا .. عقلتي على اول مرة شفتك فيها؟ ماكنتش عارفك بهاد الجاذبية كاملة ماننكرش بلي عجبتيني ولكن الاعجاب عندو 3 شهور و كايسالي .. قبل ماطيحي بين يدي كنت كانفكر ندوز معاك سويعة و نحيد لك الوالدة ديالك بيدي و نخليك كاتنزفي حتى للموت ( سكت واحد الشوية و بدا كايحرك جنوي ناحية الوجه ديالها ) ولكن مابقاش مقنعني هادشي ماغانسخاش بيك ا مارلين ديالي ( بصوت يملئه الغضب و العصبية ) غاتبقا فيا الحرقة ايلا ماذليتكش و غتاصبتك كل ساعة و كل نهار فحياتك حتى تولي كاطلبي الموت 

بقات ساكتة و واقفة مادارت حتى شي ردة فعل غير كاتتسنط لهضرتو و عينيها فجهة خرا بالضبط فوق الترية فين كانت واقفة بوو كاتتسنا الوقت المناسب لي تنقض عليه .. غمضات عينيها و هزات راسها شوية و عاودات هبطاتو .. مع دارت هاد الحركة طارت بوو نيشاان لوجهو و بدات كاتخبشو بالمخالب ديالها حتى حيد جنوي من وجه جيكساو و بقا ملاهي مع بوو .. فهاد الاثناء هزات جيكساو رجليها و ضرباتو بطالون لوجهو ديريكت هرسات ليه نيفو مشا كايجري لعندها و شدها من شعرها بغا يدبحها ولكن مع الشدة لي شدها ضربات رجليها مع الحيط و بقات كاتتمشا فيه حتى تقلبات و رجعات مور هالك .. شدات شعرها و ضوراتو على عنقو باش تخنقو بيه بقات كاتزير عليه حتى ولا كايرجع باللور و زدحها مع الحيط و عاود بعد و عاود زدحها معاه حتى تعكلات بطالون و جات فالارض يلاه جات تنوض و هو يحكم لها يديها فالارض 

هالك : ( كايلهت بالاعصاب ) نتي مايصلاحش معاك الرحمة .. غانشرشمك و غانشرشم لك الكرامة ديالك .. من هنا للفوق مابقاتش شي حاجة سميتها جيكساو .. كاينا مارليييين العاهرة ديال هالك 

بدا كايقطر الدم ديال نيفو على جيكساو يلاه هز يديه باش يمسح الدم و هي تفلت يديها و ضرباتو بالرحا ديال اليد للنيف زادت كملات عليه .. خلاتو ملهي معاها و ناضت بالجرية من للبلاكار تجبد منو واحد السم يلاه هزاتو و هو يشدها من شعرها ضارت لعندو و بقات دافعاه دافعاه بكل قوتها حتى وصلات للبالكون و بدون قصد لاحتو منو .. هي كانت باغا تسممو باش تتهنا منو فمرة ولكن وقع ما لم يكن في الحسبان تلاح من البالكون و تجمعو عليه عباد الله ...

تجمعو عليه عباد الله كايشوفو مالو حيت من زهرو طاح فالكازو و غير من الطبقة اللولة .. حدو تقصح ، ناض جمع الوقفة و بقا كايشوف فالبالكون لقاها كاطل عليه و كاتبتاسم بجانبية .. وقف واخا مقصح و بدا كايسب فهادوك لي مجمعين عليه مشا من تما للسويت ديالو و هو كاااارهها و زاد كرهو ليها لواحد الحد ماكايتصورش مارضاهاش و مابغاتش تسرط ليه و لا عقلو لا كرامتو لا كبريائو تقبلو باش يتهزم 2 مرات من نفس الشخص و نفس الانثى اما عند جيكساو .. سدات البالكون و مشات جلسات فالناموسية حدا بوو هزاتها و عنقاتها و زيرااات عليها

جيكساو : ( بنبرة هادئة ) كنت خايفة توقع لك شي حاجة ا بوو .. كون وقعات لك شي حاجة شكون غايبقى معايا 

بوو : ( صوت الضبح ضعيف ) ... حطاتها فوق الناموسية و جابت لها الماكلة ديالها مارتاحتش نهائيا .. دخلات دوشات دغيا و بدلات حوايجها و جمعات الفاليزا ديالها خلات بوو تنعس و هي بقات فايقة جالسة فوق الكرسي مقابلة مع الباب و حاضية الوقت كاتفكر بلي بقا نهار واحد للتحدي ديالها مع بولترا و باقي خاصها ترتاح باش تكون اون فورم زيد عليها خاصها تبعد من هنا لابغات تنعس و خاصها تبعد قبل مايشكو بلي دوك 2 رجال لي ماتو فغابة الجزيرة ماتو قتلا ماشي بسبب العافية واخا راها ماخلات حتى شي دليل حتى من الخطاوي ديالها بقات كاتجر رجليها فاش كانت راجعة باش مايلاحظوهمش .. وصلات 6 ديال الصباح و ناضت من الكرسي .. هزات غاز الامونيا كانت دايراه فقرعة ديال الما باش مايعيقوش بيها فالمطار .. هزات زيف و بدات كاتمسح بالغاز كاع البلايص لي حطات فيهم يديها باش تمسح البصمات و هزات شي زغبات من شعرها كانو فالارض .. نقات شومبر من اي اثر يقدر يقودهم ليها رشات البارفان ديالها باش تغطي على ريحة غاز الامونيا .. هزات فاليزتها و خشات بوو فواحد الجيب كبير عندها فالقبية و خرجات .. مشات للمقهى جلسات فيه على ماتبدا الحركة فلوطيل .. بقات تما حتى ل8 ديال الصباح عاد مشات لغات الحجز ديالها و خرجات من لوطيل توجهات للبلاصة لي فيها سكان الجزيرة و بقات كاتقلب على شي حد كايكري الغرف ولا اي حاجة دوز فيها هاد الليلة حتى طاحت فنفس المرا لي كانت عطاتها التاج ديال الورد غير شافتها و هي تعقل عليها فرحات بزاف منين شافت جيكساو و بوو غير شافت المرا و هي تخرج من الجيب و وقفات فكتفها و منين دارت هاد الحركة عرفاتها جيكساو بلي رتاحت لهاد المرا ... بقات المرا كاتهضر مع جيكساو ولكن كالعادة مافهمات منها والو داكشي علاش حاولات هي تهضر معاها بالاشارة لعل و عسى تفهمها عيات معاها و والو مافهماتش حتى كانت غاتمشي تقلب فجهة خرا عاد المرا لاحظات الفاليزا و فهمات بلي راها كاتقلب على فين تجلس .. هضرات مع واحد باش يحضي الكشك و بقات كادير اشارة لجيكساو باش تتبعها ، بقاو غاديين وسط السوق حتى خرجو منو و مشاو لجهة واحد الشاطئ فيه اكواخ صغار كانو قلال و المنظر ديالهم زوين بزاف ... وصلات لواحد الكوخ و وراتو لجيكساو كان فيه فراش قليل من صلب الطبيعة جبدات الفلوس عطاتها 100 دولار و مشات ديك الساعة عاد خدات راحتها حطات فاليزتها و ضرباتها بنعسة كانت عيانة بزااف فنهار واحد قتلات 2 يدويا و كانت غاتتبع ليهم الثالث ولكن فلت منها زيد عليها جرات الجثث ديالها و نتوما عارفين الجثث ديال الرجال تقال من ديال الاناث و خاصة الموتى .. و مانعساتش نهائيا يعني غير طاحت نعسات. 

▪ مانعسش الليل كامل داك المنظر ديال شراستها و كيفاش نقزات على لاخر حتى كانت غاتحيد ليه الراس من الكسدة واخا جسدها جسد انثى ديك القوة كاملة و ديك السرعة و الخفة كلها مجموعة فيها؟ اول مرة شافها كاتقتل مباشرة و هادشي علاياش؟ غير على ود بومة .. انثى وحدة قتلات 2 رجال وسط الغابة بلا ماتخاف ولا تتردد و الاهم هو الطريقة باش خفات اثر القتل و خلاتها تبان بلي ماتو موتة طبيعية بسبب الحريق الذكاء و القوة و الشر تجسد فجسد انثى و هادشي لي خلاها تعشش ليه فالدماغ ، الليل كامل و المشهد كايتعاود قدام عينيه حتى عاود صونا ليه تيليفون 

ادلر : واش لقيتيها؟؟ 

بولترا : بعدات 

ادلر : و ماعرفتيهاش فين مشات؟؟ 

بولترا : مشات لعند سكان الجزيرة كانظن هاديك احسن بلاصة ليها ... بقا كايهضر معاه حتى لواحد الشوية و هو يسمع الصداااع على برا و كلشي كايغوت 

ادلر : اش واقع عندك ا صاحبي ؟؟؟؟ كانسمع صوت الغوات

بولترا : ( بملل ) عاد شمو ريحة الجيفة 

ماعقلاتش على راسها حتى فاقت على شي حد كايدق فالكوخ شافت فساعتها لقات 3 ديال العشية .. تصدمات فاش شافت راسها نعسات هاد الوقت كامل ، هزات راسها لقات المرا لي كرات لها الكوخ جات لعندها و التبسيمة على وجهها و هازة فيديها واحد البلاطو و فيه الماكلة ديالهم شداتو من عندها بشك ولكن مابيناتش ليها ، مشات المرا و خلاتها كاتشوف فداك البلاطو .. قربات بوو منو و بدات كاتشم فيه عاد بدات كاتنقب منو حتى هي ديك الساعة فاش شافتها كاتنقب منو عاد زعمات تاكل منو .. كلات و خرجات من تما من مور سدات الباب و ناوية ضرب دورة فالانحاء ، خرجات و بقات غادا مع واحد الطريق حتى خرجات فديور فين ساكنين سكان الجزيرة عجبها المنظر ديالهم و بقات كاتصورهم .. خرجات للسوق ...

ملاحظة : بقاو تردو البال لهاد العلامات باش تفهمو شكون كايهضر .. بلاصة مانبقا نقولكم نمشيو لعند بولترا نمشيو لعند هالك نمشيو لعند جيكساو كاندير لكم علامات 

▫ هادي ديال جيكساو

▪ هادي ديال بولترا

•°• هادي ديال هالك .

▪ بقا كايهضر بولترا مع هالك حتى سمع الدقان بالجهد فالباب

بولترا : ها هما جاو 

ادلر : وا أمن زين عندهم هدا ههههههههههههههههههههه على هاد الحساب القتل تما حالو ساهل و كايتعرف غير من ريحة الجيفة حنا نبقاو نقتلو و نحنطوهم باش مايطلقوش الريحة 

مشا بولترا يحل الباب و هو باقي كايهضر مع ادلر 

الشرطي : تقدر تهبط معانا للتحت ا سيدي

بولترا : و علاش.! 

الشرطي : هبط لتحت و غاتعرف 

بولترا : ( خرج من سويت ) ماترونوش ليا الجناح ماعزيزش عليا الروينة ... خرج قبل مايجاوبو البوليسي 

البوليسي 1 : ( بغضب ) هاد الناس لي لاباس عليهم كايسحابلهم حنا عبيد عندهم 

البوليسي 2 : هادشي لي عطا الله و تمشي تهضر معاهم تخرج على خدمتك الصبر و صافي 

▪ هبط لتحت كان لوطيل مقلووب بالبوليس و بنادم خاايف و كلشي مخلوع من هادشي لي اول مرة يوقع هنا .. وقف حدا الاستقبال كايكمل مكالمتو حتى سمع واحد الحوار كان حداه بين البنت لي فالاستقبال و البوليس 

البوليسي 1 : كيفاش مادايرينش الكاميرات فديك المنطقة؟؟؟؟؟ واخدين 5 نجوم غير هكااااااك

****** : ا سيدي جنا كانطبقو غير اوامر مول لوطيل و هو ماقالش لينا حطو الكاميرات فديك البلاصة 

البوليسي : عيطي لمول لوطيل يجي يشوف هاد التهاون ديالو اش سبب ليه 

***** : عيطنا ليه و راه جاي فالطريق

البوليسي : عطيني قائمة بسمية الاشخاص لي لغاو الحجز ديالهم بدون سبب ولا غادرو لوطيل بلا مايعلموكم 

بقات كاتخربق فلوغديناتوغ لي حداها و بريمات الورقة ديال القائمة لي فيها شكون لغا الحجز ديالو لقاو شخص واحد لي لغاه فهاد 3 ايام و سمية وحدة لي كاينا فالورقة .. مارلين البيرو 

البوليسي : ( كايحك ذقنو ) مارلين البيرو ... ( بصوت عالي ) اجييي نتا و نتا ( جاو عندو 2 بوليسيين ) سير نتالغرفة مراقبة الفندق و جيب لي تسجيل هاد الصباح باش تشوفو الانسة و تحدد لينا وجه مارلين البيرو لي لغات الحجز هاد الصباح بدون سبب و نتا سيفط لهم هاد السمية باش نعرفو واش عندها شي سوابق عدلية و عيطو على فريق البحث يجيو .. اليوم نجبدوها فينما كانت لحد الساعة كلشي متهم حتى نعرفو شكون المجرم الحقيقي ( غوت ) سربييييو اش كاتسناو مزال. 

▪ ادلر : اش وقع مزال

بولترا : لقاوها 

ادلر : واش صافي غاتتشد فالحبس؟؟؟؟؟ 

بولترا : ماغاتتشدش 

ادلر : ياك قلتي لقاوها 

قطع عليه و خرج من تما بلا مايشوفوه .. لقا واحد يلاه حط طوموبيلتو باش يخرج منها .. خرجو منها و ركب فيها كسيرا لجهة السوق باش يلقاها قبل مايلقاوها غير خلا مول الطوموبيل كايسب فيه و كايعيط للبوليس يجيو يشوفو هاد السيبة ... وصل للسوق و خرج كايقلب عليها من سوء حظو كان اليوم الاحد يعني السوق مطردق .. ربع ساعة و هو كايقلب عليها فداك الزحام و اثرها ماكاينش شوية سمع صوت طوموبيلات البوليس كايقربو للسوق .. زاد دخل فالسوق لعل و عسى يلقاها ولكن ماكاينش اثرها حس بواحد الاحساس فشكل تسلل لقلبو قلبو كايضرب بحالا خايف على شي حاجة يخسرها ايلا مشات حتى تشدات من المستحيل تفلت .. غادي يعرفو بلي هي مامسجلاش و غادي يعرفو بلي وراقها مزورين و هاكا غاتزيد تتثبت عليها الجريمة ديال القتل و غايزيد يكمل عليها مول لوطيل لي غايدعيها حيت شوهات ليه سمعة لوطيل ديالو و من المحتمل يخرجو دلائل خرين لي يقودوهم ليها ... وقف وسط السوق و حط يديه مور راسو ... صافي واش هادي هي النهاية؟ هنا فين غاتسالي القصة لي مزال حتى مابدات؟ البوليس عمرو السوق علاين شي 20 بوليسي لي كايقلبو عليها و هادشي يا حسرة غير مزال ماعرفوها بلي هي جيكساو اما كون عرفوها كون مانعرفت اش جابو ... حيد يديه من مور راسو و يلاه دور وجهو و هي تبان ليه واقفة عند واحد كايبيع الكوكو .. مشا لعندها كايجري كايسابق الريح باش يوصل ليها و يبعدها من عندها قبل مايشوفوها البوليس .. غير وصل لعندها خطفها من يديها حتى طاحت الحبة ديال الكوكو و مشا كايجري يلاه تحركو من تما و هما يسمعو صوت واحد البوليسي كايغوت بصوت عالي 

البوليسي : شدوووووووها راها هااااااربة ...

غير وصل لعندها خطفها من يديها حتى طاحت الحبة ديال الكوكو و مشا كايجري يلاه تحركو من تما و هما يسمعو صوت واحد البوليسي كايغوت بصوت عالي 

البوليسي : شدوووووووها راها هااااااربة 

دارت شافت فبولترا لي كايعاونها باش تهرب و عاودات شافت فالبوليس لي كايتزاحمو مع الناس باش يشدوها و عاودات هبطات عينيها للحبة ديال الكوكو لي فيها بصاماتها .. نطرات يدها من يد بولترا و مشات هزات الحبة ديال الكوكو قبل مايوصلو لها عاد مشات كاتجري ناحية بولترا .. شدها و بقات غاديين كايجريو وسط داك زحام و البوليس تابعينهم من كل قنت و كل شوية كايقربو يوصلو لهم .. فواحد اللحظة بانت لبولترا واحد الدورة دايرا بحال الدرب و فواحد الجهة خرا كاين واحد كايبيع القبعات الشمسية .. جر جيكساو هز القبعة الشمسية و تحنا و جرها حتى هي باش تتحنا بقاو كايتمشاو محنيين لديك الدورة غير وصلو و هو يحيد الفيستا ديالو قلبها و عطاها لجيكساو تلبسها حيت عندها 2 وجوه وجه بيض و وجه كحل بحال الوان لعبة الشطرنج ... بقات كاتشوف فيه علاش كايعاونها؟؟؟ علاش مابغاش البوليس يشدوها 

بولترا : ( كايشوف فيها ) لبسي دغيا 

جيكساو : ما من مجيب 

بولترا : جيكساو لبسي الفيستا ... صوت البوليس كايقرب و هي مزال مالبسات الفيستا بقات واقفة و كاتشوف فيه بنظرات استغراب حتى لواحد اللحظة ضربها برق الصدمة .. دفعها للحيط و غطاها حط يدو من مور عنقها و لاصق شفايفو مع شفايفها .. قبلة لي حتى واحد فيهم ماكان كايتسناها .. و حتى واحد ماكان كايتوقعها .. حط لها القبعة فوق راسها و زاد زيرها عندو 

البوليسي : زيدو تحركو ماشي هادو لي كانقلبو عليهم المرة الجاية مسح عينيك ا راس الحمار ماتبقاش ضيع لينا فالوقت ... مشاو البوليس من تما و جيكساو و بولترا باقيين ملاصقين ما فاق حتى دفعاتو شافت فيه بنظرات غير مفسرة 

بولترا : ( بإبتسامة عبث ) خاصك تشكريني حيت نقذت لك حياتك

جيكساو : ( بنفس النظرة ) مزال غادي تفديها 

بولترا : مابستكش حبا فيك .. مابغيتش يوصل لك شي حد قبل مانوصل لك 

جيكساو : الصمت ... ماجاوباتوش يلاه بغات تمشي و هو ينطق 

بولترا : البوليس كايقلبو عليك فالجزيرة ماكانظنش غاتبغي تلوحي راسك ليهم 

جيكساو : ( بنبرة باردة ) 20 عام و انا قادة براسي ماكنتش كانتسنا لي يخبعني 

مشات و خلاتو واقف و خاشي يديه فجيبو .. هبطات بوو و وقفات فوق كتافها تاجهات للكوخ و هي ماناوياش تهرب منهم ناوية تواجههم و تشوف التهمة لي باغيين يلصقو فيها فحين رياس هز الفيستا ديالو و رجع للوطيل لقا البوليس مشغولين 

مفتش الشرطة : كيفاش لقيتو دليل جديد فمسرح الجريمة؟ 

البوليسي 1 : مون شاف راه لقينا خطوة ديال صباط رجالي نمرتو 40 

مفتش الشرطة : غادي تقلبو لوطيل شبر بشبر حتى تعرفو لي داك الصباط ديالمن و اشمن نوع و شكون لي لبسو

بقا كايشوف فيهم رياس و متبعهم اش كايديرو هاد المرة جات نوبتو باش يحرك بياديق الشطرنج فواحد اللحظة وجه التهمة لجيكساو و موراها وجهها لشخص اخر .. ماكاينكرش بلي كان خايف لاماتمشيش الخطة كيما رسمها و تصدق فعلا جيكساو لي غاتتشد وكن من حسن الحظ مشات كيفما رسمها و التهمة توجهات لشخص اخر حيت الليلة لي قتل فيها داك الموظف كان قبل مايمشي لتما دخل للسويت ديال هالك لي كان مشغول مع جيكساو و هز صباطو لبسو و داك الصباط نيت هو باش خلا الزطمة ديال الدم عن قصد لاغد ليه عاد رجعو للسويت ديالو ...

بقاو كايقلبو لوطيل شومبر بشومبر حتى الغرف ديال الموظفين قلبوهم و داك الصباط مالقاوش ليه الاثر نهائيا 

المفتش : لقيتوه؟؟ 

البوليسي 1 : مالقيناهش ا مون شاف 

المفتش : و البنت لقيتوها؟؟ 

البوليسي 1 : حتى هي مالقيناهاش 

المفتش : و علاش جاي لعندي؟؟؟؟؟؟ سيرو قلبوووو عليهم 

بقاو مشغولين بهاد الجريمة شوية و هما يسمعو واحد الصرخة عاالية ديال مرا .. مشاو كايجريو لجهتها كانت جاية من جهة الغرف ديال الموظفين غير وصلو و هما يلقاو جثة ديال موظف اخر شانق راسو و الفام دو ميناج واقفة حدا الباب كاتغوت و تبكي 

المفتش : ( كايشوف فالجثة بشك ) خرجو المرا من هنا 

البوليسي 1 : حاضر مون شاف 

خرجوها لبرا فحين المفتش كان كايستكشف الجثة و كايضور عليها حتى قال لهم يديو الجثة للتشريح باش يعرفو واش فعلا نتاحر ولا تقتل و عيط لفريق البحث باش يقلبو على الصباط و يا للمفاجئة لقاو الصباط مخبع فبلاستيكة من تحت الناموسية .. داوه للمختبر حتى هو باش يشوفو البصمات لي فيه شوية و هو يصوني عليه تيليفون 

المفتش : لقيتوها؟؟؟

***** : لقيناها ا الشاف و دابا غاديين فطريقنا للكوميسارية

المفتش : غير جيبوها للهنا غادي ناخدو شهادة كاع النزلاء غير فلوطيل 

***** : واخا ا مون شاف .. قطع عليه.

▫كانت جالسة فوق الرملة حدا البحر كاتتسناهم يجيو حيت ضروري ماغايسولو عليها السكان و فعلا داكشي لي كان حتى لقاتهم واقفين عليها 

جيكساو : ( هزات راسها فيهم ) فاش نقدر نعاونك؟

البوليسي : ممكن تفضلي معانا للكوميساريا

جيكساو : علاش

البوليسي : حتى توصلي لتما و تعرفي .. حنات راسها و شافت فالارض و بتاسمات بجانبية 

>> كاينين 5 من البوليس حاليا هنا .. 1 قدامها و 2 فجنابها و 2 موراها 

ناضت وقفات بحالا فعلا غاتمشي معاهم حتى تاقو و هي تقلب لمور البوليسي لي كان قدامها حيدات ليه السلاح و خلاتو درع بشري ليها و تيرات فدوك 4 جابتهم جثث هامدة فالارض <<

البوليسي : انسة واش راك بيخير؟ 

رجعوها للواقع و فيقوها من تفكيرها كون كان عرفو فاش فكرات فهاد المدة القصيرة كاع مايسولوها واش راها لاباس .. كانت فكرات تصفيها لهم بديك الطريقة لي ماشي صعيبة عليها و تعيط بواحد من معارفها يسيفط لها طائرة خاصة لي ترجعها لبلادها و تتهنا من هاد الصداع ولكن لا فاش ضوراتها فراسها لقات من الاحسن ليها تمشي لعندهم كأن شيئ لم يكن هي يسحابلها راه عاقو بيها على 2 لي قتلاتهم فالغابة مافخبارهاش بلي راه ستدعاوها بسبب جريمة خرا ..ركبات معاهم فطوموبيل و حتى كانو غاديين للكوميسارية و هما يقلبو الطريق لوطيل بسبب اوامر المفتش 

°•° عند هالك 

كان فاق مقصح بسبب الطيحة و دوش و حاول مايقيسش نيفو بالما بسبب التهريسة لي تهرس .. يلاه جا يلبس صباط من صبابطو باقي جديد و هي تثير انتباه واحد الحاجة .. اثار الدم لي على الفردات بجوج بقا كايشوف فيه بشك هو عارف بلي الصباط عمرو لبسو كيفاش حتى تقاس بالدم.؟ يعني شي حد دخل للسويت بلا خبارو .. يلاه كان كايحاول يلقا تفسير لهادشي حتى بدا كايسمع صوت البوليس و بنادم كايغوت .. خرج للكولوار لقا بنادم كايهضر على شي جريمة قتل وقعات فلاكاب ديال لوطيل .. ماحتاجش يفكر فيها بزاف شي حد باغي يلصق فيه الجريمة و هاد الشخص ماغايكون غير جيكساو 

هز الصابون السائل ديال اليد و واحد المنديل و بدا كايمسح داك الصباط و يعاود باش يحيد البصمات ديال يديه منو مالقاش الكلور ولا غاز الامونيا باش يحيد بصماتو داكشي علاش كان خاصو يدير جهد باش يحيدهم غير بالصابون .. خشا الصباط فبلاستيكة و دارو فصاك رياضي بحالا غايمشي للنادي ديال لوطيل .. دابا خاصو يشوف شي بلاصة مافيهاش الكاميرات باش يقدر يلصق التهمة فواحد اخر فكر يلصقها فجيكساو ولكن هاد العقاب شافو ساهل بزاف عليها داكشي علاش اجل لها هادشي حتى يخرج راسو من هاد المعمعة لي كايظن بلي هي لي طيحاتو فيها .. خرج للجردة و بقا غادي مخبع بلا مايشوفو حتى واحد حتى وصل لواحد الباب ...

كانت باب كاتأدي لغرف الموظفين شاف واش فيها الكاميرات مالقاهمش .. دخل لداك الكولوار الصغير و دخل مع اول باب بانت ليه يلاه سدها باش يحط الصباط و يخرج و هو يحبسو واحد الصوت

الموظف : ( بإبتسامة ) سيدي واقيلا راك غالط فالغرف 

هالك : ( بإبتسامة عبث ) نتا لي كنتي خاصني 

لاح الصاك من يديه و بقا كايقرب لعند الموظف لي ماكان فاهم والو و علاش هو هنا .. لبس الليكات فيديه ديال الخدامات و هز مخدة فيديه بقا كايقلبها 

هالك : ماعندي مانتسالهم مهليين فيكم من ناحية الراحة .. المخدات من صنع امريكا و ديال الريش من الفوق 

بدا كايتسلل الرعب لقلب الموظف يلاه جا يهرب و هو يشدو هالك ضور ليه وجهو و دار ليه المخدة كايخنقو بيها مابغاش يطعنو و مابغاش يضربو حتى للموت باش مايبانش بلي راه مات .. خاص يبان بلي فعلا نتاحر ، فوقما داك الموظف كان كايبغي يخشي ضفرانو فلحم هالك كان كايبعد يديه باش مايلقاوش اثار الضرب فيه و مايلقاوش اثار الجلد فضفرانو .. بقا عليه حتى قتلو .. سد الباب باش مايدخل حد و بقا كايقلب باش يشنقو حتى لقا عندو الكرافاطات بقا كايعقدهم و يحكمهم و علقهم السقف حط كرسي و هز الموظف لي ماجاهش تقيل و وقف فوق الكرسي خشا ليه راسو فالمشنقة بصعوبة .. نزل لتحت و دفع الكرسي .. هز الصباط خشاه من تحت الناموسية و حيد اي دليل يقدر يأدي ليه من مسرح الجريمة عاد خرج من تما و هو مرتاااح الضمير و هاكا بعد عليه التهمة و خرج منها كي الزغبة من العجينة .. من مور مادار داكشي مشا جلس فواحد الجليسة كاينا فالوسط ديال لوطيل و بقا كايقلب بعينيه على جيكساو شوية عاد بانت ليه جاية مع البوليس و بوو معاها 

البوليسي : جلسي غير هنا مزال غانعيطو ليك باس نستجوبوك 

خلاتهم و مشات جلسات فين جالس هالك .. غيير كايشوف فيها ماكرهش يعدمها الاف المراااات اما هي ماشافتش كاع لجهتو ، قرب لحداها 

هالك : مزال غانندمك على النهار لي لعبتي فيه معايا ، وقتك كايتسالا 

هزات عينيها فيه كاتشوف فيه بنظرات فارغة .. قربات ليه و حطات وجهها حدا عنقو من الجهة الثانية و يد حطاتها فضهرو بحالا غاتعنقو ماكانش عارفها اش كادير حتى حس براسو كايتتخنق و النفس ماكاطلعش ليه بسبب صبعانها لي غرزاتها فكرجوطتو و شدات بيهم تفاحة ادم من فوق الجلدة كايحس براسو المووت طالعة معاه .. واحد الشدة شداتو مايتمناهاش لعدوه بغا غير يهضر معاها ولكن ماقدرش .. الصوت مابقاش كايخرج ليه و لي يشوفهم بديك البوزيسيون يقول غير عشاق معانقين .. قربات لودنيه و همسات بصوت هادئ

جيكساو : ماتعاودش تهددني

شدها من فخدها و غرز صبعانو فيه غير باش تطلق منو ولكن قد ما هو كايزير قد ما هي كاتزير حتى حس بديك البلاصة غاتتقلع من بلاصتها عاد طلقها و حتى هي طلقاتو .. غير تطلق و هو يبدا يكحب وجهو ولا حمررر 

هي فعلا انثى ولكن ماشي اي انثى .. انثى بقلب متحجر .. وردة سوداء كاتجذب كاع لي كايشوفها ولكن لي كايقرب باش يقطعها و هو حاكر الاشواك ديالها كايتفاجئ بالموت ديالو بسبب دوك الاشواك لي فيهم بذور قاتلة من نوع خاص 

بقا كايكحب حتى شاف بلي شي حد مد ليه كاس ديال الما 

بولترا : ( خاشي يد بجيبو و يد ماد ليه بيها الما ) فواحد اللحظة كنت غانمشي غالط فيكم ولكن فاش تفكرت طينتكم عرفت اش واقع ... شد من عندو الكاس ديال الما و هو ماكارهش يهرسو و يخشي زاجو فكرجوطتها 

بوو : ( صوت الضبح ) 

بولترا : كاتفهميها ولا غير شاداها عندك.! ... ناضت من تما و خلات لهم البلاصة شوية و هما يعيطو لها البوليس 

المفتش : مارلين البيرو اجي واحد الدقيقة .. مشات لعندو و مشاو لمكتب مول لوطيل باش تما فين يديرو التحقيق معاها .. جلسات و بقات كاتتسنا الاسئلة ديالهم 

جيكساو : كانسمعك 

المفتش : كانظن راك عارفة علاش هنا

جيكساو : ماعارفاش

المفتش : وقعات جريمة قتل فلوطيل هادي يومين .. فين كنتي هاد اليومين؟ 

جيكساو : ( بنبرة هادئة ) فالشومبر ديالي

المفتش : عندك شي شهود؟؟ 

جيكساو : الكاميرات لي فكولوار الطابق اللولاني

المفتش : ( بشك ) باش عرفتي بلي دايرين كاميرات؟ 

جيكساو : حاجة طبيعية مادام لوطيل اوطيل 5 نجوم غايحرص على امان النزلاء ديالو 

المفتش : عرفت بلي لغيتي الحجز ديالك اليوم علاش لغيتيه؟ 

جيكساو : جيت فإجازة و حاجة طبيعية نبغي نبدل البلاصة 

المفتش : هاد اليامات اللخرانيا فين كنتي 

جيكساو : فالشومبر 

المفتش : دوزتي هاد اليامات كاملة فالشومبر؟؟؟؟ 

جيكساو : ماسولتينيش واش خرجت .. كنت كانخرج للسوق و كانهبط للمقهى 

المفتش : و شكون كان معاك؟ 

جيكساو : جيت بوحدي

المفتش : عموما انسة مارلين ماتبعديش من هنا نقدرو نعاودو نعيطو لك ...

من ديما كاتسمعو بلي لعبة الشطرنج فيها غير 2 لاعبين .. ولكن واش فخباركم بلي كاينا لعبة شطرنج ثلاثية فيها 3 لاعبين 2 كايتصارعو و واحد كايتفرج و داك لي كايتفرج ولكن كي غايدير حتى يربح و اللاعبين ب3 كايسعاو باش يكونو هم اللاعب النبيه.؟ ... هادشي ماكاينش غير فلعبة كاين حتى فالواقع واقع مع الولايات المتحدة و اوروبا اللعبة لي بيناتهم لي تحولات لحرب عالمية اولى و حرب عالمية ثانية تسببو فيها بين 2 دول فالخلاف الصيني السوفياتي و خلاوهم يتصارعو بدون مايلاحظو الدولتين بلي كاين لاعب ثالث مشاهد هو لي كايكسب و لي هي الولايات المتحدة ... نفس الشي واقع دابا مع جيكساو و بولترا و هالك غير الفرق لي كاين هو هاد الثلاثي عارفين بعضياتهم و مع مرور الوقت كايتكشفو الاوراق باش غايعرفو بلي كل واحد فيهم عندو 2 اعداء 

▫خرجات من المكتب و مشات جلسات قدام بولترا و هالك كاتتسنا فوقاش تتسالا هاد الحريرة لي وقعات .. مزال ماتهناو من المشكل اللول حتى وصل خبر اخر زلزل لوطيل .. 2 شباب ماتو فالغابة محروقين كلشي ركبو الرعب فقلبو 4 ديال الناس ماتو فاسبوع و كلشي كايتسأل واش هادشي كلشي صدفة .. من غير داك الثلاثي لي مازعزعهمش هاد الخبر و ماتخلعو. 

لاقات يديها حدا فمها و بقات كاتشوف فيهم بجوج او بالاحرى راه كان كل واحد فيهم كايشوف فلاخر .. هالك كايشك بلي جيكساو قتلات عن قصد باش يتشد هو و جيكساو كاتشك فبولترا بلي هو لي قتل باش تلصق لها التهمة و بولترا كايتسنا البوليس يجيو يجمعو هالك من مور ما خلا داك الدليل فالسويت ديالو 

هالك : ( بعيون مخنزرة ) ماعندك علاش تتسنايهم يجيو يديوني .. كنتي باغا تسيفطيني للحبس بلاصتك؟ خطوة ذكية ولكن ماشي معايا

جيكساو : ( بنظرات فارغة موجهة الهضرة لبولترا ) كانعرف حاجة وحدة يا الحرية يا الموت ماكايناش طريق خرا نمشي فيها 

بولترا : ( كايضحك ) هههههههههههههههههههههههه

بدا كايضحك بهسترية حتى كلشي دار كايشوف فيهم الغريب فالامر هو حتى جيكساو ماعارفاهش علاش كايضحك دابا .. هالك تأكد بلي عندو شي ناقصة فعقلو 

هالك : شفتي شي حاجة كاضحك

بولترا : ( جمع الضحكة و تكا على ركابيه و ميل راسو ) علاش كاتنكرو فعايلكم؟ ماراضيينش بيهم.! 

يلاه جا يجاوبو هالك و هو يعيط لو واحد البوليسي باش يستجوبوه .. مشا معاه و بقات غير جيكساو و بولترا 

بولترا : شفتك البارح 

جيكساو : حيت باقيين عينيك فبلاصتهم

بولترا : مابقاش بزاف ا.. مارلين.؟ ( زاد ميل راسو ) لا ماجاتش معاك سمية مارلين تسناي نفكر لك فشي سمية ( بإبتسامة جانبية ) " أثينا " .. من هنا للفوق غانبقا نعيط لك أثينا 

جيكساو : اله الحرب عند الاغريق 

بولترا : قتالة و شرسة و جذابة و من الفوق مثقفة .. مابيكش 

جيكساو : ( تحنات شوية و قربات ليه ) فالوقت لي كاتسترجع فيه دروس التاريخ فكر كيفاش تعتق روحك من المنجل ديالي غدا

بولترا : ( بدا كايدور راسو بعدم رضى ) اثينا اثينا اثينا مزيان تكوني متفائلة ولكن خلي الامل ديالك لغدا فاش تخسري قدامي صنعي بيه حبل و شنقي بيه راسك ( زاد قرب لها حتى هو ) كيما شنقتي دوك 2 رجال البارح ( رجع لبلاصتو ) ولكن عرفتي مزيان منين كنت حاضر باش مانستخفش بيك غدا .. ( قاد الكمام ديال قاميجتو ) فين بقينا؟ تفكرت كنا بقينا فأثينا .. كاتشبه لك فشي صفات ( اشار لها بصبعو ) جاذبيتها و جمالها .. الدفاع ديالها على دولتها بحال طريقتك فالدفاع على بومتك ولكن باش مانكونش ظالمك عندي اعتراف ليك 

جيكساو : الصمت 

بولترا : مابغيتيش تسمعيه.؟ ( بغات تنوض و شدها من يديها ) ماكملتش هضرتي 

جيكساو : فكرني غدا فاش تكون راكع قدامي نقطع لك يديك هما اللولين عاد ندوز للباقي .. جبدات يديها بقوة من يديه واخا كان مزير عليها .. خلاتو كايشوف فالخوا و مشات ...

ستجوبو كاع لي كاينين فلوطيل و من بينهم حتى بولترا و هالك .. نهار كامل و لوطيل مرون و البوليس مطوقينو و مانعين يخرج اي واحد منو .. نهار كامل و دوك 3 واحد كايشوف فلاخر حتى جائهم الفرج اخيرا فاش خرجو نتائج التشريح بلي فعلا دوك 2 ديال الغابة تحرقو و داك لي مات مقجوج تيقو بلي فعلا مات مشنوق و هادشي بسبب مسارح الجرائم لي كان مافيهم حتى شي دليل كايدل بلي تقتلو و الحاجة لي زادت اكدات بلي لي مات منتاحر هو القاتل هي فاش شهد رب العمل ديالو بلي فايت كان بين دوك 2 موظفين مشاكل فالخدمة و حتى الموظفين اكدو هادشي و بالتالي القضية ماستغرقاتش حتى 24 صحيحة و تسدات .. خرجات جيكساو و رجعات للكوخ يلاه وصلات و هو يوصلها ميساج 

بولترا [ غدا مع 00:00 فVolcanoes garden ( حديقة البراكين ) بركان مونا لوا

• اكبر جوهرة اليشمك ] 

فهمات التحدي كي غايكون يعني مع 12 ديال الليل ديال غدا غايكون تحدي بيناتهم شكون غايدخل لأكبر بركان على وجه الارض لي هو مونا لوا و يلقا اكبر جوهرة يشمك لي كايقولو بلي كاينا غير فشي بلاصة فالبركان ولكن ماواصلاش للعمق .. الجوهرة لي كاتتقدر بالملايير و كلشي فاقد الامل بلي غايجي شي نهار و تخرج من تما يعني هاد التحدي تحدي انتحاااري ، غايدخلو لفوهة بركان ماشي بزاف باش كان فيه اكبر ثوران حمم بركانية غير ف1948 و معروف بلي هو من اخطر البراكين .. غايخصها تتحدى الحرارة و العلو ديالو و الخطر حيت ايلا مشات حتى طاحت فالفوهة مصيرها الموت و ايلا طاحت من الخارج مصيرها الموت حيت كي قلت لكم هو اكبر بركان و اطول بركان .. هدا اكبر تحدي طاحت فيه فحياتها كاملة ولكن يا ربحة يا ربحة ماكايناش فقاموسها دبحة و حتى ايلا كان شي خلل و خسرات غاتلوح راسها فيه و تموت ذايبة والا تموت و هي مذلولة ليه .. ولكن هدا كايبقى احتمال بعييد .. خاصها غير توجد راسها و ماغاوقع والو دوزات النمرة ديال واحد كاتتعامل معاه بزاف ولكن غير من بعيد 

***** : كانسمعك

جيكساو : بغيت *********** .. ******** .. ********* .. ******** .. ******* و ماتنساش تسيفط لي ********

***** : سيفطي لي العنوان و من هنا 8 ديال السوايع يكونو عندك

جيكساو : الولايات المتحدة .. جزيرة هاواي 

****** : غدا مع 9 غايكونو عندك .. سمعيني دابا مزيان و تبعي الخطوات باس تعرفي فين غاتلقاي امانتك

▪ بولترا : سيفط لي ****** ... و ******** و ******** و طائرة خاصة 

ادلر : واش نسيفط لك معاها الكارد ولا نجي انا وياهم

بولترا : ( بإبتسامة جانبية ) نتا غير سيفط لي داكشي 

ادلر : شحفاتنا معاها و اخيرا غاتجي للاراضي النمساوية و هي مقيدة مذلولة ههههههههههههههههه

بولترا : تيك توك .. تيك توك 

ادلر : السوايع كايدوزو و ساعتها كاتزيد تقرب 

بولترا : عنداك تنسا شي حاجة 

ادلر : رتاح لي مع راسك هههههههههه واس انا نقدر نهمل المساهمة ديالي فالقبض على ديك القتالة 

بقاو كايدويو على جيكساو حتى سالاو الاتصال و كل واحد فيهم كايتسنا غدا بفارغ الصبر من غيرها هي لي مزال مانعسات كانت وسط البحر كالعادة كاتصفي الذهن ديالها على حسب غدا حيت بالنسبة ليها هادي هي الراحة الحقيقية ... دوزات ربع ساعة و هي تحت الما عاد طلعات و رجعات للكوخ و نعسات فراحة تاامة كاتتسنا الغد يوصل ... فاقت مع 7 لقات المرا كادق عليها و جايية ليها الفطور شداتو من عندها بإبتسامة .. فطرات و غسلات دوك الماعن غير فالبحر موراها لبسات سروال كايتجبد و إكس كانت الدنيا باقا خاوية بدات كاتنقز فوق الرملة و كاتتشقلب و كادير شي حركات بواحد الليونة بحالا ماعندهاش العضام و كاتعاود تتشقلب و ترجع تتشقلب كتر من 10 مرات دقة وحدة بلا ماتحس بالدوخة فهاد الاثناء كانو واحد العيون مراقبينها من بعييد .. من مور ساعة ديال التمارين رجعات للسوق لقات المرا كاينا تما .. عطاتها الماعن و بقات جالسة حداها حاضية الوقت و كاتشوف الغادي و الجاي حتى لحقات 9 و هدا هو الوقت لي غاتوصل فيه امانتها .. ودعات المرا و رجعات للكوخ هزات طربوش و نايفيا خطات شعرها بالطربوش و النايفية خشاتها فالسروال .. مشات للبحر تلاحت فيه و بقات كاتعوم و هي حاسة براسها مراقبة غير بعدات على اليابسة و هو يبان لها واحد الباطو .. الباطو لي غاتمشي بيه باش توصل لسخرتها طلعات فوقو و بقات كاتجذف شافت موراها لقات حتى حد ماتابعها يعني خلاتهم فالجزيرة .. وصلات لواحد السفينة مهجورة نفسها لي قال ليها داك الشخص كانت قديمة .. هزات النايفيا غطات بيها وجهها عاد طلعات فالسفينة كانت خاوية مافيها حتى واحد هبطات للتحت و هي تلقا سخرتها لي بغات و ماناقصها الا حاجة وحدة ولكن مزال ماجا وقتها ..