صافي ما بقاتش قادرة تزيد شي حاجة نطقات و فمها عامر بالماكلة
جنان : صافي براكة .. شبعت
يونس(كيشوف في طبقها ) : عاد بديتي تاكلي !!
جنان : لا براكة ، ما نقدرش نزيد مزال و الله ... واش نقدر نمشي ؟
يونس بعد كرسيه من حداها و جر أطباقو حداه و هضر : ما نتغداش ؟
التازمت الصمت و شرع في الأكل حتى هو في صمت و مراقبها و كيتفكر هضرة عائشة..
فلاش باك 🔙🔙🔙
يونس غير قالت ليه جنان إسمها خلاها تمشي و بقا تابعها حتى دخلات للمدرسة و رجع للدرب لقا عائشة مخرجة تسييقة من دارهم مشا حداها
يونس : بنت عزيزة ! ما قارياش ليوم ؟
عائشة (كتخرج في الماء و تهضر معاه ) : هانتا تشوف آخويا .. كون غير مشيت نقرا .. طانطو د راسي بغا ينعس ، و عزيزة قالت ليك سيقي و نعسي .. اللهم تمارة دالقراية ، بعدا بالفايدة ..
يونس : ما شفنا فيها فايدة في هاد البلاد ..خلينا من شكوى .. شكون ختنا لي خرجات من عندكم ؟
عائشة (لاحت الكراطة و خرجات عندو معصبة و كتهضر بجهد ) : ولد الشوافة ! فرق عليك البنت .. نخسرو أنا وياك.. الدرية ماشي ديال داكشي لي على بالك ..
يونس : نخسرو آ بنت عزيزة لما هبطتيش صوتك .. ريحي الأرض ! شطحت غا في سبوعك وليتي عارفة آش في بالي ؟
عائشة : راه ما تقدش عليك و على تنوعرك.. ولي فيها كافيها مسكينة ..
يونس : ما كتعرفنيش !! نأدي ليك أنا شي بنت المراة !!
عائشة : حيت عارفاك آولد الشوافة .. تنگول ليك فرقها .. راه يتيمة القهرة لي عايشة فيها كافياها ..
يونس : كترتي الهضرة ! من اللخر مالها ؟
عائشة عاودت ليه كاع داكشي لي عاودات ليها جنان و عاودات ليه على مها كيفاش ماتت و كيفاش عايشة و كل ما كتعرف من غير أن مرت باها كضربها ، ما دكرتهاش و هو مسايسها بالأسئلة و كل مرة تقول ليه بعد منها و هو عاد ما كيزيد يحطها في دماغه .. طوالت الهضرة بيناتهم
يونس : هي اليوم ما تخرجو تال 6 !
عائشة : لمن تنخبر أنا من صباح .. و فرق عليك البنت .. ماشي ستيلك .. رطبة عليك آ الحروش ..
يونس : ههه .. سلمي على عزيزة و طلعي لداركم وانت ساعتين باش تسيقي عتبة الباب (غادي و مخليها كتهضر من وراه بالحس)
عائشة : سرييي آ خويا سرييي .. جالسة نسرسر ليك في لي كاين .. كان عليا نصيفطك عند مك تشوف ليك و تحيي معاك الماضي ..
يونس غير وصلات 6 لقاتو قدام ليسي جنان ، راقبها حتى طلعات في طموبيل ، عرفها ديال باها و تبعهم حتى دخلو للدار
🔚🔚🔚🔚🔚🔚🔚
قاطع تفكيرو صوت جنان
جنان : نقدر نمشيو ندخل الساعة الثانية و نقوليهم غير تسد عليا الباب عفاك
يونس (حط إديه على جنان و هي خطفاتها و هضر ) : جنان .. غادي نديك حتى ليسي و لكن نبغي نصوني تجوبيني .. عارف بديناها مقودة نتعاونو و نقادوها (قاس وجهو بلاصة فين جرحاتو ) وخ المشيشة
جنان حركات ليه راسها بآه بغات غير إمتى تفك منو خايفة .. معمرها دارت هادشي ولا وقع ليها ما وقع ليها ليوم ..
وقف هز تجاكيطتو و نطق
يونس : يلاه زيدي
وصلها ديركت ليسي قرات ديك ساعة لي بقات ليها .. و خرجات .. حتى كتحس تاني بتيليفونها كيفيبري لقاتو يونس نيت لي كيصوني عليها ما جوباتوش و مسحات نمرتو و مشات كتجري لدارهم ما شافتش وراها .. دوزااات نهار صعيب بزاااف.. جبدات السوارت كتحل في الباب و هي تسمعها ابتسام و ناضت استقبلاتها في الدروج
ابتسام (حاطة يديها في خصرها ) : أهلااااااان بلااااالة مولاتي .. من البارح ونتي غابرة ، لا شقى لا نقى .. يكما راني خدامة عند باك !
جنان ما شافتش فيها و حاولات دوز من جنبها باش طلع لبيتها و هي تشدها ابتسام من مرفقها أوركات عليها
ابتسام : كتقلبي على قتلة آخرى؟ و الله حتى نعطيها لبنتي بكل فرح .. غادي دوزي بالتي هي أحسن تكرمي ديك الكوزينة و توجدي العشا و طلعي تغبري ما نشوفكش ليوم !
جنان (بملامح باردة ) : ما عندكش القلب!!.. ربي غادي يجازيك على كل أفعالك (طاحت ليها دمعة من عينيها و مسحاتها بسرعة ).. أنا غادي ندير هادشي لي قلتي ليا ، ماشي حيت خايفة منك غير حيت أنا ما بقيتش قادرة على الصداع و المشاكل .. بغيت نعيش طخونكيل و ما نزيدش على بابا
ابتسام (ضحكات بجهد ) : هاهاهاها. ما بغيتيش الصداع و لا العصا روداتك و رجعاتك الطريق المستقيم !! يلاه دوزي بلا قوة الهضورات و نتي تسرح ليك اللسان ..
طلعات جنان لبيتها و تيليفونها مزال تيصوني من يونس ، ما بغاتش تجاوب حطاتو يتشارجا و خلاتو يصوني .. غسلات و بدلات و هبطات للشقى كتشقى و الدموع هابطين بلا مجهود و خا كتعيا تحبسهوم كيهبطو وخا ما بغاهومش كيهبطو .. كلشي ضدها و حتى دموعها حسات بيهم ضدها .. هي رافضاهم و هما حالفين يسردو ليها وجها
في لحظة جا لبالها يونس و نهارها كيفاش دوزاتو معاه .. ما تفهمش ليها !! ما عرفاتوش شنو باغي منها! ..علاش خطفها ! و علاش كان غادي يغتصبها و حبس! واش حيت شاف ضرابي في رجليها و ما بغاهاش هكاك ما عجباتوش! علاش داها الطبيب مني ما باغيش يدير شكاية ! باش عرف دارهم ! علاش بقا يوكل فيها بمعلقة بمعلقة !... شنو باغي منها بالضبط ! هادو كاع أفكار زارو عقلها و حيروها ... شوية نطقات بهمس بينها وبين راسها *لا مانقدرش نقولها لبابا، شنو نقول ليه ! كان باغي يغتاصبني و ما اغتاصبنيش غير عنقني .. لا ما نقدرش *
دخلات عليها ابتسام قفزاتها
ابتسام : وجدتي العشاء !
جنان ما جوبتهاش مرفوعة كترد النفس من التقفيزة.. ابتسام حركتها بإديها حتى لسق مرفقها بالمقلة سخونة و غوتت ربي لي خلقها !
ابتسام : مرة آخرة فاش نهضر جاوبي .. ليوم لكعتك غدا نحرقك (خرجات و خلات جنان طالقة الما على مرفقها حسات بالجلدة طارت و كملات طيابها و طفات البوطات و طلعات كتبكي )
جنان : اهئ اهئ (شافت تيليفونها كيصوني و هزاتو لقاتو يونس و جوبات في عز بكاها ) ألو
يونس (غير سمع صوتها باكي و هو يوقف ) : جنان كتبكي؟
قطع عليها التيليفون عاد استوعبات راه جوبات و ما عرفاتش علاش جوباتو.. ربما كانت محتاجة تهضر و صافي .. محتاجة تسمع شي واحد كيقول ليها علاش كتبكي ! محتاجة تفضفض و تشكي و تخوي قلبها .. ولكن ما نفعاتها المكالمة بوالو..
غير قطع معاها ولا كلو كيغزل .. دور إديه شاف في ساعتو لقاها 9 و هو يدوز آبيل آخرة لصاحبه
عزير : حبيبيييي (شبعان تبويقة)
يونس : قلاوي ! دابا تبان عندي في القهوى ( عزير تخلع من نبر صوته ، زعزعو تا طارت التبويقة و قطع )
دازت عشرة الدقايق و جا عندو عزير
عزير (مرخي و كيهضر ) : اش كاين تما آولد الشوافة ؟
يونس (دار شاف فيه ) : واقف على نمرة بنت عزيزة ..
عزير (غير سمع حسها و هو يتوگض بدا يتمتم ) : منين نجيبها ليك ؟ آش بغيتيها !
يونس (غرام الصبر ما عندوش ، مشا شنق عليه و كيهضر ) : شوف العزي ، طلع من حفرتك و حط نمرتها ..
عزير : (تقج و نفسو صعابت عليه يطلعها ) ما ع ما ع ما عنديش
يونس (زاد زير عليه حتى زراق ) : من جيري الصغير ولد الدرب عارفك كتشطط عليها .. طلع بنمرة .. واقف عليها في بلان
عزير (بدا يضرب ليه في إديه زعمى طلق و هو يرخف عليه يونس حتى بدا يكحب ) : كح كح كح راه أنا لي تنموت ماشي هي .. أصلا مبلوكياني و زايدون كح كح ما كتجوبش في نماري لي ما تتعرفش
يونس طلق منو و بقا غادي جاي في الكولوار معصب غير بحدو حتى وقف ليه تاني عند راسو
يونس : (مد ليه سوارت ) شد .. حل القهوة.. و رد ليها البال .. الصداع ما يضورش هاد الليلة.. ما نلقاكش مدخل ليا شي مينور يوقفو عليا صحاب الحال! .. و دخل أكتيفي ليا الكاميرات .. غانمشي عند بنت عزيزة هي اللولة تقدي معايا واحد البلان و غادي نطلع نعس واحد ثلاثة السوايع من البارح ما نعست (حتا بغا يمشي و رجع عندو ) إلا لقيتك مخلط ليا مع الكليان بالرب المعبود نهارك ما طلع فيه الشمس
عزير (ما كينش في هاد العالم كيشوف ليه في وجهو ) : شكون خربش ليك وجهك ؟
يونس (حط إديه على وجهو ) : واش سمعتي آش گلت! ما تسعرنيش آ عزير!
عزير : كون هاني آ خويا يونس .. (ضرب على عنقو حتى هو مقموش ) آ ساط شي مشيشة هادي كاع كلاتك ههه
يونس (غادي في الطريق و كيهضر ) : على قبل هاد المشيشة باغي جمتك في هاد البلان..
يونس وصل للدرب ومشا لدار عائشة كيغوت عليها حتى طلت عليه من الشرجم
يونس : بغيتك تخرجي ليا ديك القحبة ديال مرت باها ، ياك فايتة قارية معاكم كيف گلتي ليا ، هضري معاها واتساب ، فيس، المهم تجيبيها ليا القبة الخضرا غدا .. و خرجي نتي السوق .. عمرها دور بالدرية مزال
عائشة (بقات فيها بزاااف جنان ) : و الله آخويا تانجيبها ليك فينما بغيتي .. غير ربي والديها حگارة .. يعطيها الضر
تافقو و تبادلو النماري و مشا طلع للدار ينعس ..طاح كاااو غيب ..
عائشة ليل كامل و هي شادة الستون مع ابتسام في الفيس .. بداتها بالكلام الحلو ..
_الحب توحشناك -غبورات هادو -مبروك الزواج-بقات بلاصتك كبيرة في المدرسة (كلام من هذا القبيل حتى عطاتها نمرة الواتساب و بقاو يهضرو )
عائشة : حبيبة نطلبك واحد الطليبة !
ابتسام : كنت عارفة هاد التسويلة ماشي لله ! طاح عليك الحب عليا غير هكاك .. راني عايقة
عائشة: ههه دبا قصدتك ، غادي ترديني ؟
ابتسام : غير دوي القحبة مسولة فيا على حاجتك ..
عائشة : شوفي غدا غادي يجي يخطبني واحد الزماكري و بغيت من عندك شي حاجة ديال الحضور ، نتي عروسة جديدة و ضروري ما يكون عندك شي حاجة تعتقيني بيها ..
ابتسام ما رضياش تقول ليها آشمن عروسة !!
ابتسام :عندي واحد جوهرة هي لي تجي قدك ، أما قفاطني ديال عرسي ما يدخلوش ليك ، راكي هازة عليا ..
عائشة(ما كرهاتش تعيرها و تشبع فيها معيور ) : لي كان غير عتقيني .. شوفي نتي غير دعي معايا يصدق ليا الراجل .. غير نهاجر نصوفيك بالكادوات
ابتسام : إيوا عنداك تنساينا ..
سلاو الهضرة و تافقو غدا مع الحداش يتلاقاو حدا القبة الخضرا يقسمو الطريق
عائشة قطعات مع ابتسام صيفطات ليونس ميساج _(البلان غدا مع 11 حدا .. القبة فين بغيتي .. ) مع ديك 3 لي هو نيت علاش فاق غير قراه ومشا يشوف خدمتو..
فاقت ابتسام ما لقاتش سعد حداها عرفاتو مشى الخدمة، طلات على جنان بانت ليها ناعسة ما كتقراش ليوم في الصباح وخ ما كتقراش كانت باغة تمشي ولكن ما قدراتش تنوض حيت ما نعساتش بكري الحرقة عطاتها الصداع بزاف حتى الفجر عاد قدرات تغمض عينيها ..
ابتسام مشات الدوش عمرات واحد السطلة صغيرة ديال الما بارد وخواتها عليها وهي غارقة في النعاس ... جنان ما عرفات باش تبلات ناضت قافزة و قلبها كيضرب
ابتسام : نوضي تگعدي و نتي ضغطتي الناموسية بالنعاس ، قدي الشغال وطيبي الغداء هانا خارجة نتقدا و نرجع
هبطات ابتسام و خلات جنان على وقفتها،، كرهتها في حياتها و طفجاتها .. الموت ولا كيجيها أرحم من هاد العيشة ...
وصلات 10:30 يونس كيتسنى في عائشة تهبط باش يمشيو و هو يوقف عليه عزيز
عزير : با يونس شكون ناشرك على الصباح ؟ هههه
يونس : عزي قلب على مي (بانت ليه عائشة جاية عندو ) ها بنت عزيزة جاية تقدي معاية واحد الغراض
عزير(شنق على يونس ) : بربي تا نمشي معاكم .. جمتي ما تركبش مع شي ولد المراة بلا بيا ..
يونس (تفك منو ) : لقيتني مبرد .. كون فطرتك هاد الصباح ..
عائشة (وصلات ما سلمات ما والو ) : ولد الشوافة ما نشدش معاك الطريق و معاك هاد خونا ..
عزير ما شافش فيها و مشا ركب في طموبيل يونس
يونس : ركبي بلا فريع الراس ..
ركب وخلاها ، شافت حتى عيات و ركبات اللور و مشاو
ما هي إلا دقائق حتى وصلو وبقاو بعاد حاضين ابتسام حتى جات و جاية راكبة مع خوها في المطور تلاقاته في طريق و قال ليها طلعي نوصلك .. وصلو وقفو كيتسناو
يونس (مصغر عينيه كيشوف في ابتسام ) : القحبة عرفتها هي والزلال ديال خوها
يونس : هبطي نتي خودي داكشي علاش جيتي و سيري لداركم ما تعرفيني ما نعرفك بقاي بعيدة.. أنا نتكلف حتى حاجة ما مشات ..
فعلا مشات عائشة وقفات عليهم ، شكراتها و خدات من عندها الأمانة وهضرو شوية ... خو ابتسام غير كيطلع و يهبط في عائشة ، بغا ياكلها بعينيه ..
عُزَيْرْ حاضي مع عائشة و كيهضر مع يونس : ديني على قد عقلي آ ولد الشوافة و فهمني !! هديك ختنا شيشنا معاها حتى عينا في القهوى طبنا معاها !!! ابنت الحرام كانت تقاد لينا جلسات مقااااودين .. شنو بلانها ؟
يونس (شاف فيه ) : عُزَيْرْ حل معايا دماغك ، غير تخوي الطريق بنت عزيزة ، غادي تهبط تحكم ليا هداك نص ميترو لي معاها .. نعطيها جوج كلمات على خاطري بلا تبرزيط و نتحركو ..
عزير (كيشوف في خو ابتسام ، أصلا ما حملوش مني وقفات عائشة و هو كيقشر فيها بعينيه): هاححح نحكم الزلال لي ولدو حتى نقطع نفسو..
يونس : هبط العزي .. هايا مشات
هبط عزير بسرعة كيوقف في خو ابتسام لي غير سمع صوتو و دار عندو
بدا كينعت ليه حتى دار بانت ليه ختو طالعة للطموبيل ، يلاه بغا يتبعها و هو يشدو عُزير من قرفادتو مورك عليه
عزير : ريح ليا مع راسك .. نتحاسبو و سير تقود..
اخ ابتسام ( كيغوت ) : طلق مني آ ولد القحبة
عزير ( غير سمع ديك الكلمة و هو يتبورش ما عقلش على روحو ) أنا ولد من ؟ أنا نوريك تقابح على سيادك (نزل عليه بضربة حتى رعفو ) عينيك لي طالق نتقبهم لمك ليوم .....وا ريح تهبط ختك و سير تحوا (اخ ابتسام كيمسح نيفو من الدم ما عودهاش ، ضربة منو صمطاتو )
عند يونس و ابتسام
يونس وقف على ابتسام : هادي نتي آبنت القحبة !
و هي غير شافتو و سمعات صوتو تحركت روحها ، ولد الشوافة بلحمو بشحمو ، واقف عليها .. التبوگيسة و الطولة و القلدة و الحروشية طاغية.. كانت تتمشي للقهوته تشيش غير باش تشوفو و تريح معاه..
ابتسام (نطقات راخية لسانها ) : نهار كبييييير هذا شفناك
يونس (غادي جهت الطموبيل و كيهضر معاها ) : طلعي للطموبيل
يونس(كيهضر تحت سنانو ) : بربي أوما تمري و تقلبي عليها حتى نشرب دمك و نتي حية.. راك شيفاني بعينيك ..
ابتسام : نتا راك ما حاضر لوالو ، آش كدوز عليا هديك ابنت الفشوش .. راه باغا تخرجني من الدار و تهربو ليا ، نسكت تركب عليا و طلقني من الراجل و
يونس(قاطعها ) : حبسي عليا المرقة البيتة و فريع الكر .. حيت كنعرفك دويت بفمي و جيتك فاص (جبدليها وراقي جنان لي فيهم تصاور العنف ) أما كون صيفطت لباها هاد تصاور .. أخرتها حبس و طلاق بلا ريال بلا جوج
ابتسام (هزاتهم كضحك و عاودات رداتهم ) : واللهيلا هاد جنان كتعني ليك ! جامع ليها ضواساها.. شتي أنا ما نتهددش ليك ولكن فاش جيتيني فاص ما تبقا ليا غير على خاطرك ،، باش تعرف معزتك.. هاهاها اعتابرني مها
يونس : مها ولا قلوة هزي يديك عليها .. بالرب العالي و باقي ضوري بساحة ديك البنت و لا تعيريها و لا نشوف عينيها كيبكيو و لا تمسيها غير بظفرك حتى نفرع مك ما يلقاو ما يجمعو فيك ..
ابتسام (كضحك ) : هاهاها حياني الله حتى شفت الزعرة مطيحة ولد الشوافة .. إيوا آ سيدي رتاح ليا مع راسك .. ما كاينش لييقلقها ليك
يونس : ما تخسرنيش راه نكحلو الضواسة بيناتنا .. هبطي تقودي (هي مزال كضحك ما متيقاش ديك البعلوكة مطيحة هادا كامل ، بغات تسلم عليه في حنكو و هو يهرب وجهو عليها و هضر ) فعايل القحاب زلعيهم على راجلك وااا هبطي تقودي ما ترعدنيش
ابتسام (كتقحبن) : هاهاها هايا هابطة وا تهلا
عُزَيْر غير شافها هبطات و هو بدفع خوها حتى جابو على راسو و مشا ركب و كسيرات الطموبيل من حداهم منيرة ...
غادين في طريق و عزير كيحرك في إديه ضراته
يونس : مالك ؟
عزير : سنانه ماضيين آ صاحبي .. تخشاو ليا في إدي .. ولكن مني دوزت لمو الدم هانية .. بردت
يونس : (ابتاسم ليه و إيد صايگ بيها و إيد كيمس بيها الجريحات لي في عنقو ) : راجع للدرب و لا نحطك فشي قنت ؟
عزير : بلاما دوخ عليا ، شنو بلانك مع ختنا ؟
يونس : ابنت القحبة ضرباتها بتزويجة بواحد بنتو قدها ، و جالسة تكرفس عليها .. وانا زبي كيضرني لا شفت الحكرة و سكت .. و دبا زم عليا من تزنزين .. مزال ما ناعس راسي كيزدح ..
عزير : هههه مشرملاك و مصيفطاك حمية عليها ههه ..
العزبات لي عايشين في النهار و ناعسين بالليل بالرب تيشروطوك آ ولد الشوافة .. نعاس ما تبقاش تشوفو..(تنهد ) آيييي على صحابات الليل.. النشاط و الزهو ..و تصبح مكسل معاهم .. أنا نگول ليك شنو كاين
و تبعو يونس حتى هو ما زادوش الهضرة و طلع للدارهم كيصوني على جنان مرارا و تكرارا و لا من مجيب .. تعصب و صيفط ميساج لعائشة
يونس : 📩معاش خارجين من ليسي ليوم ؟
عائشة (غير قراتو و جوبات من فورها ): 📩مع 4 و الله يرحم ليك الولدين ما بلوكيني ..
غير قرا مع 4 ماكملش القراية و تلاح ينعس ..
عند ابتسام و خوها
غير كسيرات الطموبيل و هو يشدها خوها بالأسئلة و السبان و هي تجبد بزطامها عطاته 100 dh و سكت و زاد و خلاها ، هي رجعات للدار .. لقات جنان في بيتها ما هضراتش معاها و مامشاتش للعندها نهائيا ..
نصبات الغدا، سيقات من الفوق للتحت .. ليوم غادي يتغدا معاهم سعد ما كيخدمش في العشية ..
جنان سمعاتها جات ، و كتسيق و كدير في الشغال ، جاها عجب ما جاتش دخلات عندها .. ما سممتها ما عيراتها .. شافت في تيليفونها كيصوني من نفس نمرة ثاني ، بلوكاتها و طفات نمرتها ..
سعد دخل للدار لقا ابتسام في الدروج كتسيق فيهم لقا التحية و سول على جنان ..
ابتسام : مسح رجليك هنا عاد طلع .. راها في بيتها ناعسة ..
سعد : تسالي طلعي فيقيها ليا .. هادشي كاع نعاس !
فعلا داكشي لي دارت كملات جفاف و طفات على الغدا و طلعات دقات عليها من ورا الباب ما حلاتوش كاع ..
جنان (من ورا الباب ) : شكون ؟
ابتسام : تكلمي لباباك (و هبطات )
جنان (مع راسها ) : من إمتى كانت هدي كدق الباب ! العجب ..
جنان هبطات سلمات على باباها و جلسات حداه .. ابتسام في الكوزينة كتوجد تحط الغداء ..
سعد (كيشوف في جنان) : واش هادشي گاع نعاس ! مخلطة الليل و النهار ؟
جنان : لا بابا مرة نكون نحفظ مرة نقرا شي رواية مرة نعس .. ماشي ديما ناعسة ..
سعد : الله يرضي عليك آ بنتي ركزي في قرايتك و ما تبقايش غير سادة عليك
ابتسام كتحط ليهم الماكلة فوق الطبلة و كتهضر
ابتسام : سعد خاصني شحال من حاجة .. خاصنا نخرجو أنا وياك نشريوها هاد العشية مني ما خدامش نربحو الوقت ..
سعد: شنو خاصك ؟ (خرجات الكوزينة كملات داكشي لي خاص ورجعات )
ابتسام : خاصني بزاااف .. خاصني بيجامات ما بقاش عندي باش نبدل ، تليفوني ما بقاش تيشد الريزو نبدلو ولا نصاوبو نشوفو آش نديرو فيه .. و هداك الصالون ما نفرشوهش .. داك نهار عرضت على دارنا ما لقيت فين نجلسهم .. و (سعد قاطعها )
سعد : أنا حاليا تنفكر نقري جنان بالفلوس على ود المدرسة بعيدة عليها و طرونسبور ما كاينش.. نصبرو غير هاد العام علاما تاخد الباك ديالها
جنان (قاطعت ابتسام لي يلاه بغات تهضر ) : لا بابا ما تحولنيش ، أنا مولفة مدرستي و ألأساتذة ديالي و عندي فيها صحاباتي ، بالنسبة للطريق و ليت كنبقا فاش كاتكون عندي ساعتين .. ما عنديش أنا مشكل .. ما تشطنش من جيهتي ..
ابتسام : إيوا صافي .. جنان ما باغاش تحول .. نقديو أغراضنا .. عام دايز باشما عطى الله
سعد (تنهد و نطق ) : إن شاء الله
بداو ماكلتهم و سعد كيسول في جنان على دراستها واش عندها شي مشكل واش محتاجة لدروس الدعم و التقوية يشوف مع أصدقائه وكل مرة يسولها و هي مبادلة معاه الحديث و ابتسام ملتازمة الصمت ..
سلاو ماكلتهم طلعات جنان لبيتها باش توجد راسها تمشي للمدرسة مع 2 .. تفكرات يونس ربما يقدر يجي ليها المدرسة مرة آخرة .. مشات لبلاكارها جبدات قبية سوداء عريضة و كاسكيط و بدلات صاكادو هزات كاغطابل صغيرة دارت فيها كتوبتها وسروال دجين أزرق و سبرديلة .. و صلات وقت المدرسة مشات متخفية في داك الحوايج و رجعات مع 4 كذلك متخفية
عائشة: آ ربي واش جاب ما فرقها معاااااااك ... جات آخويا جاااات .. و فرقها عليك ..
عرفها جات تعصب حيت ما شافهاش و عرفها هربات منو تعصب أكثر .. هز طموبيلتو وزاد ماوقف حتى للدربهم سطاسيونا و بقا حاضي دارها باغي غير يشوفها و يسمع صوتها .. تخلطات ليه مع الدم سكناتو....
دخلات جنان للدار لقات سعد كيتفرج و ابتسام الفوق ، سلمات على باباها .. جلسو كيهضرو حتى هبطات ابتسام .. القات التحية و جوباتها جنان و دخلات الكوزينة تصاوب الكوتي و حطاتو ليهم ..
ابتسام (موجهة كلامها لجنان ) : حليب بوحدو و لا ندير ليك فيه نيسكافي ؟
جنان (غير معجبة فيها هاد النهار ) : لا غير بوحدو
ابتسام حطاتو ليها مع مورصو ديال الكيك صوباته مور الغدا و صوبات نيسكافي لسعد عارفاه تيبغيها وحطاتها ليه و نطقات ..
ابتسام : ناكلو دغيا باش نمشيو ناخدو داكشي لي تافقنا عليه
مني خرجات جنان لمدراستها. وهي كضغط على سعد بخاصني و خاصني .. حتى استسلم لأقوالها أو وافقها
جنان : لا بابا .. ما فياش .. عارف ما عزيزش عليا ندور بزاف .. غير خليني نطلع نراجع شوية و نتفرج .. ما خصاني حتى حاجة
سعد (شاف ابتسام ) : وخ .. وجدي راسك نخرجو ..
سلاو ماكلة ديالهم و خرجو خلاو جنان بوحدها .. طلعات غسلات ولبسات بجامتها زرقاء وجمعات شعرها من القدام و بدات كتجمع في طبلة الكوتي ..
يونس شاف سعد و ابتسام خارجين .. وبقى كيقلب بعينيه على جنان واش معاهم .. ما بانتش ليه.. تسنى شوية حتى بانو ليه مخرجين الطموبيل ومشاو .. عرفهم يقدرو يتعطلو مني هزو الطموبيل وجنان بوحدها في الدار .. ما فكرش جوج مرات هبط عادي بكل جرأة ، دق عادي فحال شي زائر أو شخص من العائلة
جنان سمعات الدقان ، ظنات أن باباها ولا ابتسام نساو شي حاجة .. حطات داكشي لي في إديها و هبطات حلات الباب حتى تصدمات بلي واقف قدامها .. بغات تنطق و هو يدفعها دخلها بسرعة و سد الباب .. بغات تغوت وهو يسد ليها فمها بإديه و لسق جسدو مع جسدها و هو مراقب عينيها في الصمت .. فيهم واحد اللون كيخليوه يفقد قوته .. لونهم ممزوج بزاف دالألوان فاش كترمش كتسحرو كيولي قلبه يخفق من جمالهم .. حس براسه تقاد ليه المزاج فاش شافها ..
يونس : علاش ما كتجوبيش في التيليفون ؟
جنان : اممممم (يونس حابس ليها فمها و في نفس الوقت كيرجع ليها خصلات من شعرها في عنقها للضهرها ووزاد قرب وجه لوجها حتى تخالطت ريحتو بريحتها و نطق )
يونس : علاش هربتي مني اليوم ؟
جنان (غرغرو عينيها من خوفها و من هاد القرب أو وسط دارهم) : امممم
يونس (كيشم في ريحة شعرها و كيهضر ) : المشيشة ديالي كتهرب مني .. شنو ندير معاها !؟.
(هبط فمو للمستوى عنقها و حطو عليها حتى حسات بيه باااارد و كيهضر فوقو و هي جامدة بالخلعة ): نشوف شنو ندير!! (هبط إديه مع بيجامتها ساتان و خشا إديه في ضهرها العاري كيتلمس نعومته ) مخبية عليا !!
يونس كيشوف فيها كترعد بالخوف بين إديه رخف عليها
يونس : خايفة مني ؟ (جنان حركات ليه راسها بآه ) أنا لي خايف منك على راسي، شوفي شنو درتي فيا ! (حيد إديه على فمها)
جنان (هضرات ببرائة و خوف ) : أنا ما درت ليك والو ، ما عمرني عرفتك باش ندير ليك شي حاجة !
جنان: لا ما نخرجش معاك .. شكون نتا .. غادي نغوت و نجمع عليك الجيران
يونس (غادي طالع مع الدروج و كيهضر) ؛: هي بغيتي نهضرو وسط الدار .. عندي فحال فحال .. بالعكس هنا يكون احسن ..
جنان(طلعات حبسات عليه الطريق حتى تقادو في القامة ) : نتا ماشي نوغمال .. واش(قاطعها مني زير إيديه مع خصرها حتى تشللات من الحركة)
يونس : طلعي بدلي حوايجك ! لبسي شي تجاكيطة على البرد .. و هبطي نمشيو نهضرو و نعاود نرجعك.. لاحظي راني عاودتها ليك جوج مرات .. شاد روحي عليك بزز ونتي بهاد البيجامة .. الثالثة منضمنكش، ما بغيش نتعرا عليك (جنان حركات ليه غييير راسها بلا ..ما قادراش تهضر و هما في هاد الوضعية ) إذن نلبسهم ليك أنا !!
جنان(خافت لايديرها بصح ): لا لا صافي نلبسهم أنا (طلقها يونس و هي طلع كتجري )
يونس (كيهضر من وراها) : عندك خمسة دقايق ما هبطتيش نطلع موراك
جنان لا رد طلعات كتجري و كترعد و كتمتم بوحدها
جنان: يا ربي شنو ندير مع هذا !! حمق بالوراق هذا .. داخل حتى للدار ما خايفش !!! صافي نلبس دغيا قبل ما يطلع ليا .. ناري و يشوفو بابا !! صافي نمشي نهضر معاه نشوفو شنو بغا و نرجع !! كون بغا يدير شي حاجة خايبة كون دارها داك النهار!! باغي غير يهضر .. ما نعاودش الخطأ ما نسمعش ليه يدير اكليا شي فضيحة .. آويلي على نمشي معاه !! كرشي كضرني بالخلعة ..
حلات بلاكارها و كتهضر مع راسها كدخل وتخرج في الهدرة الخوف لاعب لعبتو عليها
لبسات دجين أسود مع تريكو سخيخن في الگري و خشاتو وسط السروال و لبسات ساعتها رمادية و هزات كويرتها و لبسات في رجليها كاط و حيدات المقبط من شعرها خلاتو على راحتو و هزات ساك نواغ دارت فيه تيليفونها و سوارت و بزطامها .. و هبطات كتجري عندو ما كاملاش زوج دقايق
جنان (وقفات كتنهج ) : يلاه نخرجو قبل ما يجي بابا نهضرو دغيا و نرجع
يونس هبطها و طلعها.. و هبط تحنى على ركبتو كيحزم ليها سيورتها لي نساتهم مع السرعة و الخوف .. بورشاتها هاد تويشية لي دار و بعدات رجليها من بعد و هو وقف و نطق
يونس : أنا نمشي نخرج الطموبيل للشارع .. جوج دقايق و تبعيني .. يسخن عليك راسك ما تبعينيش راه نعاود نرجع و ما كاينش لي يفكك مني(غمزها و عطاها بالظهر )
خرج و خلى قلبها كيضرب .. دازت جوج دقايق بالحساب .. مشات تجري للشارع بانت ليها طموبيلتو .. زعمات و مشات ركبات فيها قبل ما يشوفها شي حد كيعرفها.. غير سدات الباب كسيرا يونس
غادي في الطريق.. حس بيها غادي تهضر من تنهيدتها و هو يحبسها ..
يونس : نوصلو و نهضرو ... طلقي ليا روحك دبا و ارتاحي
جنان (يلاه بغات تجاوبو و هو يشعل راديو طاح نيشان في أغنية نجيبك نجيبك يلاه بغا يبدل و هما يجيوه هاد الكلمات لي فيها على گانتو و رشقات ليه و خلاها و زاد في الصوت ..
نجيبك نجيبك🎶🎶
تهرب تبعد لبعيد... طير ولاتنزل قريب نصيبك
نجيبك نجيبك🎶🎶
نجيبك انا حالف انا عارف اش ندير حبي ليك نتيا كبير
نجيبك نجيبك🎶🎶
نجيبك نجيبك وخ تطلعي للسماء
ندير جناح ونجيك تلقايني تما
نجيبك نجيبك راك مزال معرفانيش 🎶
كلمة نستسلم فالقاموس معنديش 🎶🎶🎶
🎶🎶🎶
سلات الأغنية و نقص الصوت و دار شاف فيها يونس و نطق : نجيبك نجيبك ههه (عض على شنيفته لتحتانية فاش دورات وجها لجيهة المعاكسة ليه و ضرب في صدرو ضربة الوعد و نطق) حالف نصيبك ههه
ضحك و رجع ركز مع السياقة ما قداه فرحة و هي جالسة حداه و غادة معاه و كتشوف فيه بهدوك العوينات لأسروووه و خرجوه من أرضو .. ناسي روحو و حريق الراس .. ناسي الدنيا و ما فيها.. ما عارفش إمتى غرق فيها هاد الغرقة .. كأنو عمرو سبح .. ماشي من عوايدو يدير مع شي وحدة هادشي و لكن هي خلاتو يديرهم بلا هواه بلاما يفكر .. لي عارف هو كلشي فيها كيجذبو .. صوتها كيعذبو ..غير حسها كيتغلغل ليه في دمو .. المشيشة ديالو .. من نهار قمشاتو و هو مفكرها غير بالقطيطة ..
جنان مني عرفات وخا تحاول تهضر غادي يمنعها و غادي يدير لي قال راسو .. استسلمات و التازمات الصمت و كدور عينيها في الطرقان و مزال خايفة .. كاع داك التصرفات لي دار معاها خلاوها خايفة منو و خايفة يأديها .. عاد هاد النظرات الجريئة لي كيدير فيها كيوترها .. جالسة و مقلقة .. عمرها عاشت هادشي ولا تخيالات تعيشو ..
بعد 30 دقيقة و صلو للمول لي جنب البحر .. خدا ورقة الباركينك و دخلو ليه ... السقيل و غير الطموبيلات ..
يونس : هبطي آ المشيشة ...
جنان : علاش نهبط ! ياك قلتي نهضرو و نرجع للدارنا .. قول شنو بغيتي و خليني نمشي
يونس ما جوبهاش و هبط و مشا حل عليها الباب و شد ليها في ذراعها بزز منها و هبطها و سد الطومبيل و هي كترطا ليه و هو لسقها معا طموبيلته ونطق حدا فمها حتى تخالطات أنفاسهم...
يونس : شدي معايا الخط و لانديك شي بلاصة خاوية .. (غوت) جنان خليني بخاطري ( جنان حركات ليه راسها بآه ، نفسو دارت ليها القشعريرة وكمل عليها مني جبد بلاصة خاوية) مزياااان (عطاها إديه و دار ليها إشارة بعينيه زعمى شدي فيها ، دغيا شدات فيه و هو زير عليها و تحركو طلعو في الأسانسور ديركت الإطاج الثالث )
جنان غير كدور في عينيها ، غادة معاه كأي كوبل عادي مشادين و هو مترأسها .. لي شافهم ما يقولش بزز منها..
وصلو للطابق الثالث .. الوقت في وسط الأسبوع ما عمراش بزاااف .. بقا غادي بيها و هي كتشوف قاعة الألعاب .. قهاوي مفرقيين .. حتى وقفو قدام سينيما 9D ..
يونس(شاف فيها و نطق ) : مجربة شي فيلم 9D?
جنان :9D ! لا جامي.. 3D آه
يونس (ابتاسم ليها و هضر ) : هادي هي الفرصة فين تجربيه ..
يلاه بغات تجوبو و هما يخرجو واحد الكوبل كيضحكو و عاجبهم الحال و خرج معاهم الشخص لي شاد طلبات الفيلم غير شاف يونس و هو يجي عندو ..
الشخص : أهلااااااان خويا يونس .. عاش من شافك .. غبورات .. أياااام الجاهلية و الهاك ..
يونس (طلق من جنان و سلم عليه سلام رجولي ): عفى الله أخويا .. هاني ؟ بغيت نشوفو شي فيلم ..
الشخص (كيطل على جنان و شاف في يونس و همس ليه في وذنيه) : داك الفيلم لي صوبنااااااه ههههههه
يونس(فكرو أيام كانو سطاج في واحد الشركة .. صاوبو فيلم فيه غير الخليع و الدم و الأكشن و مونطاوه .. و بروگراماو القاعة كلها عليه ... قلبك إلا شفتيه يسكت ليك) : ههه لا آ صاحبي .. شوف لينا غير لافونتيغ .. جبال ووديان .. بحر .. ثلج .. بدع من عندك و دير لينا جوج .. 15 دقيقة في 15 دقيقة الله يتوب عليك .. و ما يدخل معانا حد
الشخص : مرحبا آخويا .. دوز خود ربعة تيكي من لاباري أنا ندخل نوجدهم ليك .. أصلا وسط سيمانة ما كاينش كليان ...
خلص و دخلو .. جنان هزات عينيها بان ليها أربعة الماقعد حمراء ما تكلمات ما تحركات .. جرها جلسها فوق المقعد الأمامي .. دار ليها حزام ... لبسها الكاسك باش تسمع.. و نظارات سوداء .. حتى هو جلس حداها و عمل نفس الشيء ..
دخل عندهم نفس الشخص و إعطاهم إشارة باش يبداو طفا الضو و هي تخلع جنان و شدات ليه في إديه...
المقاعد بداو كيتحرو كأنها فعلا وسط الصورة لي ضهرات في عينيها.. عبارة عن جبل .. كتحس فعلا راها طالعة في جبل و الصوت خدام في وذنيها ديال داك الجو و الريح قوية و حاسة بالبرد لي طالقة القاعة.. كترعد من شدته ... و صلو لحافة الجبل و كتبان ليها الحافة و الهاوية.. جاتها دوخها من العلو ..زادت زيرااااات ليه على إديه حتى تغرسو ظفارها هو حيد نظاراتو كيشوف فيها ... هي ترفعت من الواقع و تحطات في العالم الإفتراضي ...المقعد بدا كيلعب بيها.. فحالا غادي يطيحها .. كتحس بروحها فعلا غادي طيح لا بقا يتحرك.. امتلكها الخوف أنها طيح في الهاوية ..
يونس مركز معاها و كيضحك على حركاتها و عاجبو منظرها .. شحال عفوية نسات راه جايبها بزز و دغيا ركزت مع الأفونتيغ ..
واحد اللحظة بداااااات تغوووووووت على جهدها (نووووووووووووووووووووو) يونس هز راسو بان ليه هابطين من الجبل بسرعة حتى طاحو وسط الواد و القاعة رشاتهم بالماء حسات فعلا طاحت في الماء و تحبسات نفسها ... قلبها تخطف .. ركبو في زودياكا صغيرة و غادين .. المقعد كيلعب بيهم .. و كتشوف في المناظر الطبيعية و فرحانة ... دازت من حدا الشجر خارجين أغصانها حدراااات راسها ... عايشة لحظة بلحظة في مغامرتها
المهم بقاو تما نصف الساعة .. يونس غير حظيها و هي مرة جاها البرد .. مرة طاح عليهم الثلج .. الشتاء .. دخلت وسط الماغارات ... رحلة كاملة عاشتها .. ما حساتش ولو ثانية أن هاد الأماكن غير خيالية .. و أن هاد التقنية مجرد خدعة ...
سالا الفيلم و شعل الضو و هي ترجع جنان لعالمها من بعد ما حيد ليها يونس النظارات ...
جنان (موسعة فيه عينيها و كتهضر معاه): واااااو حسيت براسي درت هدشي كامل ... عجبني بزااااف ..
يونس (غير ابتاسم ليه تغرها .. قلبه فقد الوعي و نطق) : حتى نتي كلك عجبتيني ..
جنان (هضرتو فيقاتها و هزات إديها لي شادة فيه و حمحمات ) : احم احم .. (وقفات ) نمشيو ؟
جنان: (يونس مد ليها إديه و هي تشوفها مجروحة ): ناااري .. دايز ليك الدم ! (بأسف ) قمشتك بلاما نحس ..
يونس (شدها من إيديها و غادي بيها ) : ولفت آ المشيشة الزغنونة ..
جنان(برائة) : شنو هي زغنونة ؟
يونس : (ضحك على برائتها ): مية في المية شي حاجة زوينة ههه
جنان(دلات شنفتها و هضرت ) : شي حاجة خايبة .. باينة غير من هديك الضحكة لي درتي ليا
يونس (على هاد التجاوب لي دارت معاه هاد الساعة ما كرهش يشدها ياكلها ،مكرهش يحل راسو و يخشيها وسطو ويخيط الفتحة بلا بنج.. تنهد و نطق ) : مشاغبة ..
هز عينيه في القهوى و بانت ليه مكتوب على الواجهة ( black Insomnia) ..
يونس (تنهد و نطق ): محتاج غير نبلل ريقي بيها و نتي معايا ..
جرها و دخلو المقهى و جلسو ..
كتشوف في القهوى كلها سوداء .. كراسي ، الطبالي ، ديكورات ، الحائط ، لباس لي سيغفوغ .. كلشي أسود ..
تعجبات ..
جنان (هضرات مع راسها ولكن هضرات بالجهد حتى سمعها ) : يا ربي السلامة كلشي كحل .. حس الألوان ما فيهاش ..
يونس (ابتاسم ليها و نطق ) : black insomnia اسم على مسمى "الأرق الأسود" أقوى كافي في العالم ... (جنان كتسمع ليه باهتمام) شفتي هاديك الكافيين لي كيشربو الناس في نهار واحد هادي مضوبلة في سبعة المرات ... قطرة في حلقك كتخليك كلك كترجف و كترعد و كيجيك الأرق .. بالرب لا نعستي و لا شفتي النعاس ، و قلبك كتحسي بيه غادي يسكت.. نبضاتو ما كيبقاوش منظمين .. شحال من واحد شربها و جسمو ما قدرش عليها .. السعرات الحرارية لي فيها كيسرحو ليك العروق ..
جنان(أول مرة تعرف هاد المعلومة و نطقات ) : نتا غادي تشربها ! ما خفتيش جسمك ما يقدرش عليها و توقع ليك شي حاجة ؟
يونس : علاش خفتي عليا ! (حركات ليه راسها بلا حتى ضحكاته ) هاد الجسد لي جالس حداك مولف شي حاجة كتر من هادي ..
جا سيرفو طلب قهوتو و طلب ليها كابوتشينو من نفس النوع .. غير هو خفيف بزاف..
جنان للحظة سهات في عينيه الكحلين فحال هاد القهوى لي جالسين فيها.. أول مرة تركز فيه و في شكله .. واخدة عليه صورة خلفية فقط .. هاد اللحضة قشراتو بالشوفان و نسات راسها.. طلعات عينيها لحواجبو الكثيفة و لكن مرتبة و الدقن دياله متناسق مع ملامح وجهه و شفايفو الكاملة في دم الغزال .. جماله كايعكس جاذبية الرجال....
نزلات عينيها لإديه المحطوطة فوق الطبلة .. بان ليها زوج براسليات ذكوريين .. و العروق و الأوردة بارزين فيها .. باينة إديه قوية ..
يونس مخليها على راحتها تكتاشفه .. حتى تحطات ليهم الطلبية ...
جنان غير شمات ريحة الكافي لي تحطات .. طلعات نفس حارة .. عجباتها ريحتها مجهدة و قوية ..
جنان : ريحتها مميزة ..(هزات شعرها و طلات عليها ) ولونها داكن و غامق .. لونها تميز على الكاس لي كحل..
يونس غير متبعها بي عينيه .. هز كاسه و بلل ريقه و تنشوى عليها و غمض عينيه و رخى عنقو مع الكرسي حتى هبطات مع حلقو ... مرة و قاصحة.. جنان شافته مرخي تخلعات ..
جنان (بلا شعور ): يونس ..
غير سمع سميته من فمها، حس براسه ملك الدنيا ..
حل عينيه فيها .. نشوة الكافي و نشوة صوتها لي كيقطر بالعسل .. رفعوه ..
جنان: كتحس بشي حاجة؟ فيك السخفة ؟
يونس : هههه فيا (بغا يخسر الهضرة و امتانع ) أنا كنحس ماشي غير بحاجة .. بحاجات.. نتي ما كتحسيش ؟
جنان توترات بنظراته الجريئة و أسئلته لي بقدر ما هي واضحة بقدر ما هي عاجزة عن الإجابة عنها .. كدور في عينيها كتشتت في نظرها و مرة مرة كتشرب من كاسها و ما كرهاتش تزيد تسولو على هاد الكافي لي هو في الحين مستمتع بيها .. جاها الفضول .. ولكن هو كيعوج أسئلتها و كيحرجها .. لهذا انساحبت و كبحت فضولها و التازمت الصمت حتى يسالي كأسه و طلب منه يرجعها ..
سلاو قهوتهم .. جا سيغفوغ خدا لا فاكتيغ و سولهم على أسمائهم و طلب منهم ينتاظروه 2 دقايق .. رجع و معاه جوج براسليات كحلين مكتوبة فيهم black insomnia و في ظهر البراسلي فيه (Y&J) .. هذية صغيرة من كافي الأرق الأسود .. عطى لجنان واحد ركباتو قدامه و شكراته و عطى ليونس واحد حتى هو شكرو .. و شد ليها في إيديه و غادين خارجين ..
جنان (وقفاته ) : خاصني نرجع للدار.. بابا ما قلتهاش ليه يقدر يرجع و يتخلع عليا ..
يونس (كل طاقة و حيوية و عاد بدا عندو نهار ) : نهضرو و نرجعك (يلاه بغات تهضر قاطعها) باش تعلمي ما تبلوكينيش و تجاوبيني فاش نصوني ..
جنان (بعبوس ): يلاه هضر قول شنو بغيتي ..
يونس (جارها من إيديها و كيهضر ) : حيدي ديك التغوبيشة و نهضر
جنان عاد ما زادت في عبوسها هبطو لإطاج الأول و خرجو من المول على رجليهم ..
يونس (شاف فيها ) : لبسي تجكيطتك البرد (زدحات ليه صاكها مع صدرو حتى شدو و بدات تلبس فيها ) ههه زغنونة ..
جنان (مخنزة فيه و معوجة ملامحها ) : زغنوووووون
يونس ضحك حتى بانو نيابو المقمقمين و زير ليها على نيفها حتى وجعها..
لاكوط عاد مزيان مع غروب الشمس .. ومع ريحة البحر .. وهما غادين مشادين... جنان مستمتعة بهاد الهواء .. شعرها كيلعب بيه الريح ونيفها حمار من البرودة و يونس مستمتع بيها ..
جنان(وقفاته) : عيييت ..
شاف فيها بحركة بسيطة منه هزها من خصرها و حطها فوق الحديدات لي فارقين البحر و الرصيف .. و لاحظ أنفها لي حمر و سط بياضها ..
يونس : جاك البرد ؟ (جنان مع الهزة لي دار ليها باقي مصدومة حركات ليه غير راسها بآه وجمع ليها إديها بزوج كيحكهم مع إيديه بدفئ باش يسخنو وحط نيفو كيلعب بي نيفها )
جنان فقدات الاحساس ، ريحتو و ريحت القهوة لي فيه و قربه منها بنجوها .. حنيكاتها حمارو و حسات بروحها غادي تزهق .. بغات دفعو ولكن إديها فاشلين .. عاجزة عن الحركة ..
جنان : (حركات فمها و حمدات الله حيت باقي خدام و نطقات بصوت خافت شبه مسموع هديك هي قدرتها في هاد الوضع ) : يونس فاش بغيتينا نهضرو ؟
يونس دفئ صوتها جاب ليه رعشة حلوة.. قلبه تفتن بيها .. بقا كيشوف ليها في عينيها .. متوترة على الآخر حتى حساات بشفايفه على شفايفها ..حالة عينيها كتشوف فيه بصدمة .. طبع قبلة خفيفة حنينة سخونة فوق شفايفها واتراجع ، ما قدرش يصبر عليها و على تغرها .. هبطها من الحديدات و شد ليها في إديها وجارها .. غرام الصبر عليها ما بقاش وفضل يرجعها قبل ما يسرحها قدام العامة..
جنان تابعاه وممصدقاش أنه سرق قبلتها الأولى ..قلبها غادي يوقف.. صافي ما بقا ليه والو ويخرج من بلاصته .. حطات إديها على فمها وتذكرات طعمها لي ما حساتش بيه ديك الساعة حتى دازت دقيقة عاد وصل لميساج للدماغ و سرى معاها النمل في داتها.. صافي تزيزنات ...
رجعو المول وهبطو للباركينغ .. طلع الطموبيل وكيتسناها طلع ، و هي تهرب ليه.. كيشوف فيها كتجري ما فهم والو ...
و هبط كيجري تبعها هي تلفات وسط الطموبيلا معقلاتش على المخرج ..
و هو دغيا شدها من كرشها و عاطياه بالظهر و كتبكي .. تخلع عليها .. ما عرفش مالها ..
يونس ضحكاته ببرائتها .. دورها عندو حتى زدحات راسها مع صدرو .. وبقات حاطة جبينها عليه.. وبدات كضرب بإديها الصغيورين في صدرو بشوية ..
جنان : حشومة عليك .. ما كنتيش تاخدها بلا إذن .. ما عندكش الحق .. بوستي آزمر ما تقربش ليها.. خليها في بلاصتها .. أنا مخبياها .. ماشي دبا .. اعععععع
يونس بعدها عليه .. و جرها من إديها و كيهضر منرفز ..
يونس (طلعات ليه الدم بهضرة عوجة) : زيدي قدامي .. و حبسي عليا من الفشوش ديال القلاوي ! .. ناخد إذنك ؟.. ماشي من حقي ؟؟؟ (ضحكة الأعصاب)هه هادشي لي بقا ! .. (زير عليها بإديه ) فين كنتي باغة تهربي ! ها ؟ كون شدك شي حد في هاد الباركينك ! (ماتسرطاتش ليه هديك ما عندكش الحق وقفها حتى لصقها مع الحيط ) إيوا من النهار لي شفتك ولا عندي الحق عليك .. دخليها لدماغك..
صافي دغيا تقلب مزاجه وتغيير .. محتاج گارو ماشي غير يكميه يسفو .. حتى حس بيها متجاوبة معاه وفرح حيت تقربو شوية من بعضهم .. و طلق ليها البشرة والخاطر و هي تهرب منو بهاد الطريقة .. رجعاته لنقطة الصفر.. فشلاتو .. طلعها للطموبيل وسد عليها .. وجبد كاروه بعيد عليها كما الأول والثاني عاد تقاد ليه راسه..
جنان ما ركزات مع حتى حاجة قالها .. كتفكر غير في هديك البوسة لي سرق منها .. بقا فيها الحال حيت أول بوسة في حياتها ماشي بخاطرها ، ما وجداتش نفسيتها ليها ، جات على غفلة و في سهوة منها.. و ماكنتش مستعدة ليها .. فيقها من تفكيرها غير الباب لي تردخ .. شافت فيه وميكات دورات وجهها.. ديمارة ورجعها للشارع لي انطالقو منه..
يونس (خدا ليها صاكها بنترة و هي كتشوف فيه من ديك النترة لي دار ليها جبد تيليفونها وديبلوكا نمرته وردو ليها ) : هاد المرة .. نجي وخا يكون باك ما نعقلش عليه (يلاه بغات تنزل و هو يقرصها من اللحيمة لي تحت دقنها .. بقا شادها وقربها ليه حتى باسها في خدها وطلق منها ) يلاه هبطي .. وما تجوبينيش من صونيط الأول .. نكحلها عليك ..
هبطات جنان وهبط الزاجة يشوفها حيت تقابلات معاه و هي تعيبو ..
يونس (كيلعب في لحيتو و ابتاسم وكيهمس مع راسه ): برهوشة .. داير فيك راسي .. سعرتي جدي .. ناخد إذنك .. وخ على ديلمك .. صبري عليا نشدك .. نرجعها ليك مضوبلة .. ههه (شاف في جرحة إديه ) مشيشتي ..
(بقا متبعها حتى دخلات للدار و كسيرا وخلا العجاج موراه)
جنان وصلات للدار حلات الباب ما لقات حتى واحد تنهدات .. طلعات لبيتها كتجري ونفضات أفكارها كاملين، ماشي وقت التفكير.. لاحت حوايجها وعاودت لبست بيجامتها .. وهبطات كتجري تكمل جميع الطبلة .. فرفرات الماعن بسرعة غسلاتهم وبدات كتوجد في العشاء ..
سعد و ابتسام مني خرجو باقي ما جاو ... ما خلات ابتسام فين داته .. ما خلات شنو شرات .. مشاو شراو الطلامط و دومنضاو العود والبونج .. و حطو الطلامط يتفصلو .. بدل ليها التيليفون ..
جنان سلات العشاء و سمعاتهم داخلين .. شافتهم هازين و متقلين .. حطو كلشي في المراح .. سعد مقلق ..ابتسام هرباته ليه خاطرو .. ملهوفة على كلشي ..
جنان(سلمات عليه ) : لا ماشي مشكل آبابا .. آجيو تعاشاو
سعد : وخا آ بنتي الله يرضي عليك .. نصلي ونجي .. (انساحب)
ابتسام ما دواتش معاها ، و ما شافتش فيها نهائيا ، هزات الصاشيات طلعاتهم لبيتها ..
حطات العشاء تناوله غير سعد و جنان ، كيتبادلو أطراف الحديث كيف ديما .. جنان كتحاول تركز معااه ما أمكنها وما تسهاش في أحداث اليوم.. أما ابتسام ما بغاتش ترجع لسعد حتى عشاها برا ..
سعد خرج الماعن لجنان وغسلاتهم .. هو مشا يتفرج حتى وقفات عليه جنان ..
جنان : أنا طلعت نعس
سعد(طفا التلفازة) : جلسي نهضر معاك ..
جنان جلسات حداه
سعد : علاش آبنتي فوقتما نجي نلقاك سادة عليك في بيتك ؟ أو ناعسة ؟ إلا ماعيطتش ليك ما كتهبطيش ! غير عازلة راسك !! واش كاين شي مشكل ؟؟؟ كتضرك شي حاجة !! ما نبغيك تخبي عليا واالو ..
جنان : لا بابا ما كين والو .. غير كنحفظ و كنعس بكري على قبل المدرسة .. هادشي لي كاين (ابتاسمت ليه )
سعد : (بادلها الإبتسامة ) الله يرضي عليك آ بنتي ..
جنان طلعات تجري لبيتها تشوف تيليفونها واش كيصوني ليها داك الحمق ، ساعة ما لقات والو .. دارت روتينها الليلي و تلاحت فوق نموسيتها معنقة مخدتها وكتفكر أحداث اليوم .. كل مرة كتظهر ابتسامة على وجهها .. شوية قرنات حواجبها و تمتمات بينها و بين نفسها ..
من موت مها ما خرجات ، ما غيرات الجو، كانت في دوامة الحزن والبكاء و القهرة .. جا يونس و كسر ليها الروتين.. خلعة ، خطف ، لي جيست الزوينين و الخايبين، .. وخ بزز منها ما تنكرش أنها عجبها الحال ولو للحظة .. فكرها بلي الحياة مزال فيها ما يتشاف.. تقدر ترجع للضحكة و تقدر تنسى غمتها
بقات كتقلب في بلاصتها .. والو نعاس ما بغاش يجيها .. جبدات مذكرتها لي شحال هادي ما كتبات فيها .. و طوات الصفحة و بدات صفحة جديدة و اعتابراتها أمها و بدات تعاود ليها في أسرارها حتى حسات براسها خوااااات قلبها و تغيرات مزاجيتها للأحسن عاد نعسات..
♥️♥️♥️♥️♥️♥️♥️♥️
مرت الأيام و الليالي ابتسام كترات على سعد بآرى و جيب و خاصني و خاصني ، متطلباتها ما كيساليوش ، من حاجة لحاجة ، معيات ما قنطات من النكير عليه صباح و عشية .. كتحلب فيه .. سعد ترهق وكلفاته أكتر من جهده .. حتى ولاو يوميا في نقشات حادة حتى كيترفع صوتهم ..
يونس يوميا كيشوف جنان ، مرة مفرحها مرة مبكيها .. مرة مساريها .. خالق معاها جو .. كل نهار كيشوفها كيزيد يتشبت بيها ، زيادة على جمالها لأسرو، لمس برائتها و صدقها .. تخلطات ليه مع الدم ...
جنان بدات تولفو شوية بشوية وفينما دخل للدار كتهرب من صداع باباها ومرت باها و كتلجأ ليه ، مونسها و خالق معاها السعادة .. أما ابتسام من داك نهار ميكات عليها و عمرها ما دوااات معاها و لا قربت ليها ..
جنان (في تيليفون دايرة لي كيت وكتخربق في الوراق ) : يونس ! أنا مرونة مع الحفاظة .. خليني نراجع ، سيري ديال الماط ما فهمت ليها والو .. وقيلة نهبطها لبابا !
يونس : ريحي الأرض .. أنا تنهضر معاك ونتي باغة تهبطي .. كتعبري ليا طونسيو!!!
يونس (جنون ركبوه ) : صيفطي هاد الخرا نشوفو .. من صباح فارعة ليا كري بيه .. (قطع عليها في وجها )
جنان بينها وبين راسها : فحالا غادي تعرف ليه اعععع سافل .. حادك غير في الهضرة الخايبة .. آش غادي تشوف .. علاش قطعتي إخ زمر اععععع (صوراتو ليه و صيفطاتو)
ما هي إلا دقائق حتى صيفط ليه الحل ديال التمرين مرفوق بأوديو كيشرح ليها التفاصيل .. ماجات فين تكمل الأوديو حتى صيفط ليها التاني والثالث والرابع بالشرح المفصل .. خلاها مصدومة كيفاش عرف هادشي كامل ! وسط صدمتها صونا هاتفها وجوباته ..
جنان (مصدومة) :! تبارك الله طلعتي عبقري وفي الماط من الفوق!!! ..
يونس : ماط الباك غير لعب وخضرة في الطعام .. غير لي ما بغاش ينجح بمونسيون
جنان (غير مصدومة من هضرتو عمرها ما تخيلاتو يكون شاد الباك ولا فايتو كاع ، عمرو بين ليها ) :يونس إنا عام حبستي القراية نتا ؟ ناري صدمتيني !!
يونس : من مور الباك تبعت بغونش génie informatique في EST و خديت ليسونص بخوفيسيونيل و دفعت لسلك المهندسين و تقبلت و خديت الماستر جيني آنفو .. بالرب بلا قراية كنت مهووس بذاك المجال كنت تنعطي فيه .. نهار سوتنيت لي بروف خربقتهم ..
جنان(مامتقياش ) : دبا نتا جيني .. و جيني آنفو .. لاااا هههه (ضحكت من صدمتها) و علاش عندك هادشي كامل و درتي قهوة ، علاش ما خدمتيش في الدومين .. سوق الشغل طالبة هادشي على جهد .. العالم كامل واقف على هادشي .. و ناس خدامة غير بيه .. يعني نتا مطلوب.. تمشي بعييد !!!
يونس : كرهنا .. بلاد النم .. تحفي عقلك و كرك معاااهم و يبروفيتيو .. بدلي عليا هاد الموضوع المزفت ..
يونس ما كيبغيش يهدر في هاد الموضوع ، من نهار مات باه ، كان داير في باله يقرا بجهدو و يخدم يهز روحو وأمه واخته .. حتى كيواجه الواقع و كيتفاجئ .. يدفع للشركات كيطالبوه بالإكسبيريونس .. كيقبلوه غير سطاج خصوصا يلاه متخرج، وخ سطاج كان يخدم خدمة ديال موظف ،كيستغلوه تحت إسم سطاج .. كاينة شركة لي ضرب فيها ستة شهر سطاج على أمل يخدموه أو والو .. كان خاصو المعرفة و التضويرة .. كاين غير الاستغلال و الوسيطة.. باك صاحبي دخل تخدم ما كنعرفكش دخل تسطاجي .. ضرب العام الأول في تمارة فابور و طالع في الثاني أو والو ..
فكر و عاود فكر وهو يحبس هاد الروينة ديال تمارة في الصباح والليل كي حمار الطاحونة.. صافي خاصه يهز روحو .. حقد على الوضع .. ما بقا كيفكر في والو .. لا هادي خايبة لا هادي زوينة .. الأهم هو البينكا دخل وتخرج و يحرك دمو لي جمدوه ليه .. يصوفي راسو و عائلتو .. و خصوصا هو الراجل دبا .. مصروف تقاعد الأب ما قادهم حتى في ماكلتهم غير مقاتلين مع الوقت.. عاد زيدها متطلباته كشاب هو كبرات..
تجمع هو أو شي كليكة من أيام دراسة ، نزلو على البيع و الشراء في الأنترنيت مخلطين الدوريجين مع الإيميطاسيون، البيراطاج ، يحلو آيكلودات مشفورين و يعاودو يبيعهم ، وصلات بيهم حتى ولاو يهاكيو الكونطات ديال عباد الله ..
واحد النهار حتى صبح واحد فيهم مشدود ، جرهم كاملين ، و باعهم ، ستة الشهر و هما في المحاكم و الجلسات و الطلوع و الهبوط حتى برأو روحهم بفلوس صحيحة من تما عفا الله .. وديك البركة لي بقات عندو حل بيها مشروع القهوة ديال الشيشة ، من تما بدات قصتو مع حياة الليل وقمع موهبتو وهوسو بهاد الدومين و حلف حلفة قطعية ما يرجع ليه و فقد الأمل في هاد الدوار كيف هو مسميه
🖤🖤🖤🖤🖤🖤🖤
يونس : كرهنا .. بلاد النم .. تحفي عقلك معاااهم و يبروفيتيو .. بدلي عليا هاد الموضوع ..
جنان : وخ .. فخبارك غدا عيد ميلادي ؟
يونس (ابتاسم) : فخباري و ماناسيش المشيشة ديالي ، غدا ما دخليش .. غادي تخوي ليا نهاري ..
جنان : ويلي لا .. نبطل نهار كامل ؟ يضيعو ليا الدروس .. صافا با نو !
يونس : بلا فشوش بلا زمر .. لي ضاعت ليك أنا نعوضها ليك ... غدا ما كاين دخول (بغات تهضر و قاطها ) دوييت .. خليني بخاطري ما تغيرينيش ..
جنان: نشوف ما نواعدك بوالو
يونس : تلاحي تقودي ... غير ترعديني فهاد الليل (قطع)
جنان (بينها و بين راسها ) : غير بغا يتقلق أووووف وليت نبطل بزاااف (حتى قاطعها دقان ابتسام )
جنان :دخل
دخلات ابتسام و سدات الباب و جلسات حداها
ابتسام : جنان أنا قبيلة ما بغيتش نهضر حيت كان باك ، فاش كونا جالسين أنا وياه في البالكو بنتي ليا حطك شي ولد بالطموبيل .. كون ما حفظ الله و لهيت باك بالهضرة كون شافك .. و ديك ساعة شوفي فين نوليو ..
جنان وقفات في بلاصتها حيت فعلا ليوم وصلها يونس ، بقات غادة جاية في بلاصتها حتى جابت لابتسام دوخة ..
ابتسام : وقفي درتي ليا دوخة ..
جنان (تخلعات و توترات ) :ناري عنداك يكون شافني بابا .. لا لا ما يمكنش .. أوووف زعما شافني .. آويلي لاشافني ما يسكتش ..
ابتسام : حبسي راه قلت ليك ما شافكش ، أنا لي شفتك و ما خليتوش يشوفك .. أنا غلطت معااااك بزاااف و ندمت و عطيتك التيقار و وقرتك .. ماشي خايبة حتى لديك الدرجة باش نفضحك قدام باك .. هرست علاقتكم مرة .. ما نزيدش نهرسها و نتوما عاد بديتو ترجعوها .. أنا جيت غير نقول ليك ما تخليهش يدخل حتى للدرب ، هاد المرة دازت طريفة والمرة جاية خودي الحذر ديالك ..
(ناضت ابتسام بغات تخرج و هي تشدها جنان)
جنان : نتي علاش كديري معايا دبا هاد الشي !! نسيتي أيام الضرب و الجرح و السبان ..
ابتسام : ما نسيت والو .. نهار وعيت على حالي و على أخطائي .. عطيتك الشبر ديال التيساع ، كنت معصبة منك ، درت في الأول المستحيل باش تسمحي ليا على غلطتي مع باك.. وما درتيش ليا اعتبار .. ماا رضيتش و دخلني الشيطان و بردت فيك جنوني .. حسيت براسي شنو درت .. و كفرت على روحي.. ما بقيت لا بغا نتقرب منك لا والو .. بسعت منك و هنيتك .. بغيت غير نشوفك مرتاحة و بيخير .. حلفت ما نزيدك بمشاكيل.. وخ ما تقبلينيش .. المهم ما نبقاش سباب في دموعك .. و حتى دبا أنا ما باغية منك والو جيت غير نبهك و أنا غادة ..
جنان مركزة معاها ، بصح هاد الأسابيع والأيام تغيرات معاها ، ما تهدر معاها ما تكلم معاها ، الشغال ديرهم راسها ، طيب و تخلي ليها في حضور باها و لا غيابو نفس المعاملة ، حتى كلمة لي تأديها ما قالتها .. و دبا كاع جات بين إيديها فرصة لي تقهرها فيها مع باباها و ما درتهاش جنان أصلا غير دخل باها في الموضوع تخربقات .
ابتسام : شوفي غادي نهضر بلا زواق بلا جوج .. الولد لي شفت ، نقي وعاطي العين ، غير طموبيلته كتهضر .. بيني و بينك ماشي أول مرة كنشوفكم .. مرة على رجليكم مرة على طموبيل .. و قلت خليها تعيش حياتها مسكينة و تفرح و تشوف مستقبلها .. إلا كان ولد الناس علاش لا ..و مرتاحين لبعضياتكم هديك هي الحياة .. و ما بغيتش نهضر حيت كنت نشوفكم بوحدي ، و لكن اليوم هضرت حيت كنت مع سعد حسيت بالخطر و جيت نبهك .. بالنسبة لشنو غادي ديري ! ما غادي ديري والو .. لاكنتي كتبغيه و كيبغيك عيشو حياتكم .. غير ردو البال ما كاين حتى مشكل ..
جنان(بلاما تشعر فحالا تحلات لهضرة ابتسام و عجباتها و بصح تقدر تكون ندمات) : المشكل هو طلب مني نغيب غدا على ود نحتافلو بعيد ميلادي .. و أنا قلت ليه غدا ما نغيبش و تقلق ..
ابتسام: نتمنى تنساي الماضي و تاخدي نصيحتي فحال اختك .. قرايتك ما تفرطيش فيها وما تغيبيش ، ما ضيعيش راسك .. (جنان حركات ليها راسها بآه عندك الحق ) و لكن (دارت ابتسام كتفكر ) هانتي حيت غدا عيد ميلادك أنا العشية كاملة نعاونك وندرق عليك مع باباك خرجي فرحي بي راسك وفرحي بنهارك .. وتهلاي في راسك .. نشوفك فرحانة نبرد غير حرقتي من جيهتك ..
جنان (موسعة فيها عينيها مركزة غير مع الخرجة مع يونس) : ناري شنو تقولي لبابا !!
ابتسام : هه خرجي نتي هاد السوق فكري غير شنو تلبسي ولكن أهم حاجة نوصيك هيا قرايتك (كتبتها بقرايتها كأنها إنسانة باغة ليها مصلحتها )
رجلان في حياتي الجزء الثالث
محتوى القصة
التنقل بين الأجزاء