وقفات طوموبيل بماريا قدام باب الدار نزل جواد فتح ليها الباب نزلات وراسمة ضحيكة على وجها مع سدات الباب كتيمع صوت روايض ديال طوموبيل وقفات وراهم دورات وجها كيبان ليها أنور خارج من طوموبيلتو ماعرفات باش تبلات دارت عند جواد لي وجهو ولا بحال دنجالة وعاقد غوباشتو...تم قاصدها أنور أشر براسو وكال سلام..
ماريا : وعليكم السلام
أنور : كنت كنيوني ليك ولكن تيليفونك كان طافي مشيت لمجلة ومالقيتكش
ماريا : اه كنت خارجة علاش كاين شي مشكيل؟
أنور : لا مكاين والو غير كنت بغيت نسول فيك حيت مابقيناش هضرنا ماكلتيش ليا رأيك فشوكولا؟
ماريا(ضحكات بستهزاء) :
- ءاااه شوكولا لي بنكهة الشراب يااك لا الحمد لله ماكليتوش صراحة مكنتش عارفاك بحال هكا والله صدمتيني بزااف
أنور(تصدم) :
- شرااب أشمن شرااب انا براسي طالب شوكولا خالية من الكحول مايمكنش هادشي لي كتكولي شوفي ماريا انا قادر نفرق بين بنات الناس ولي لا اوك ماشي دري صغير وماشي من أخلاقي ندير هكا
ماريا : مدام انت ماشي هو مول الفعلة وشكون غادي يكون
أنور(هز راسو شاف فجواد وفهم اللعبة) :
- لا دابا فهمت مزيااان شكون مول الفعلة وشكون باغي يبيني قدامك خايب ويلقى الوقت ليه هو...نقز جواد لي كان على سبة
أنور : سمعني مزياان انا وانت عارفين علاياش كنهضر مزياان الى عند بالك الخطط لي كدير ورا ظهري انت والمساعد ديالك اترجعني لور غير بلاما تحلم..
جواد(تم جاي ليه باغي يشنق عليه) :
- أنت شنو كيحساب ليك راسك...دفعاتو ماريا من صدرو ودفعات أنور من صدرو
ماريا(بالغوات) :
- برااااكة معندي حلبة ديال المصارعة هنا اويلي راه بعقلكم زعمة طولة فد البوطو والعقل قد العدسة واش هترتو ولامالكم بزااف هادشي عرفتي شنو ديرو بجوج غادي تمشيو من هنا وحسن كاااع الى مابقيتوش تجيو لهنا هادوك الخطط ديال دراري صغاار راه كبرتو عليها والله وانا راه ماشي منيكة يلعب معايا كل واحد فيكم واحد عارض ليا لعشا وجايب شكلاط وفيه شراب وثاني مصبح عليا ودابا كنكتاشف بلي هو لي مخطط لي وقع لالا زوينة هادي بززاف والله حتى بزااف...بعدات من وسطهم هازة صاكها هزات سوارت فتحات باب الظار دخلات وخبطاتو...تبعها أنور وجواد بعينيهم حتى دخلات شافيها جواد بنظرة حادة شريرة ركب طوموبيلتو وزاد وحتى انور ركب طوموبيلتو وزاد..
****
دخلات ماريا لقات أروى كالسة بوحدها رمات ساك ديالها وتلاحت على الفوطوي طالقة رجل هنا ورجل لهيه..
أروى : مالك أختي لا سلام لا كلام هادي غير لي كانت فموعد غرامي
ماريا(شافت فيها) :
- موعد جهنامي ماشي غرامي علاش انا وجهي وجه شي موعد وشكون كاليك كنت فموعد بعدا؟
أروى : وسيم جا لهنا وكاليا اتعطلتي حيت جا جواد وخداك وتيليفونك طافي
ماريا : ياربي العفو مكايسكتش وفين مشا هو؟
أروى(كتحك فراسها) :
- شوية باش خرج هو وثورية عندو شي رونديفو مع شي كليانة ودا ثورية معاه مسكينة
كل وحدة كالسة فوطوي ماريا طلقة رجليها وكتشرب فكاس العصير لي فيديها..
أروى : زعمة ماعرفت منكول والله زعمة يكون جواد هو مول الفعلة ديال الشكلاط؟
ماريا(كتحرك فصباع رجليها) :
- أودي ماعرفت والله هو يديرها ويفوتها لهيه وحتى أنور فاش كان كيهضر هضرتو صادقة ماشي كذوب زعمة عرفتي الى كان هادشي بصح يعطيوني تيساع بجوج على أخر يامي نولي ضحكة بين جوج واحد يلعب معايا مع الثاني
أروى(ضحكات) :
- صراحة سعداتك مكرهتش جوج يدابزو عليا
ماريا : راه اختي منك ليهم أنا بغيت انعيش هانية ومرتاحة فبالي
ماريا : صراحة نكدب عليك الى قلت ليك لا ولكن تعدبت بزااف دوزها عليا تصرفات لي كان كيدير معايا وانا معاه فدار وحدة ويدخل عليا فالبنات كل مرة طلع ليا وحدة خاصو هو يتبدل وهو يبادر بكلمة كنبغيك ولكن العجرفة لي فيه عمرها تبدل وزاد كفسها بهاد القضية ديال شكلاط ونزيدك بغيتو يدوق من نفس الكاس لي كان كيشربني منو هو مابقيتش كيف كنت ماريا ديال شحال هادي
أروى : أه بصح كانعقل نهار جيتي لهنا كي كنتي الحمد لله رجع فيك الضو ونورتي او وليتي تباني وتخرجي وضحكي وتلعبي مزيان تعطي لراسك فرصة وتعطي لقلبك فرصة يرتاح ويختار مزيان...دار ساروت فالباب وتفتح دخل وسيم او ثورية مسكينة لي كتبان لاوية بنعاس مامالفاش سهير..جات طلات عليهم رمات سلام ديالها تقيلة وطلعات تجر فرجليها..
ماريا(كضحك) :
- حرام عليك هلكتي البنت مسكينة
وسيم(مغمض عين وحال عين) :
- اااح عليك انت اسليعفانة من صباح وانت غابرة اش قصتك اش كاين تما كاع هذا خروج هذا راه هرب بيك ولا داك لجزيرة لواقواق خاصني نديك غذا لطبيب نتأكد منك راه كاليك الرجل والمرأة وشيطان تالتهما وانا عارفك أحالة فمك بحال بابا عجينة
ماريا : وأنت من أهل الخير...دخلات كل وحدة لبيتها...حطات تيليفون فوق الكوافوز دهنات يظيها او وجها بكريم مرطب عاد تخشات ففراشها يلاه ادور طفي الفايوز كيبان ليها تيليفونها كيسني...طلات بان ليها أنور عوجات فمها وطفات عليه...شوية بدا يسوني تاني طلات على تيليفون كتبان ليها سميت جواد..
ماريا(بنفاد صبر) :
- لالا لالا انتوما متافقين عليا يمكن...قطعات على جواد حتى هو طفات الفايوز او نعسات....
على طبلة ديال الفطور كالسة ماريا او أروى حتى نزلات ثورية عينيها حمرين..كالت صباح الخير وجرات الكرسي كلسات..
ماريا : هكا وليدي على الحامي ديالنا سير سير لي سمعك يكول اتغيب شهر وانت العشية نلقاوك منشور حدانا...عطاهم بوسة فالهوى وخرج...فطرو البنات سلاو الفطور ديالهم كل وحدة فين ريحات هوات ماريا بيسي ديالها هضرات مع أحمد هو الأول :
- ماريا : لا أبابا حرام عليكم ماشي هاد الشهر اتكون عندي الخدمة بزااف
أحمد : وابنتي أدم صافي قاد أمورو بغا يجي يدير حفلة صغيرة يدي معاه مرتو دوزنا الخطبة وماكنتي وسكتنا وشوفي كيدير ولا ماماك مليكة اتقلق
- بابا مزال الحال وخدمتي هنا ولقيتي راحتي هنا صراحة نهار يكتاب نرجع غادي نرجع مكتجيش عندكم وردة؟
أحمد : لا بنتي مجاتش
ماريا(تنهدات) :
- من لبارح مابقيت هضرت معاها توحشتها وتوحشت ليليا
أحمد : إيوا الله يسهل عليك أبنتي ديري دارك او وليداتك من كرشك
ماريا(ضحكات) :
- إن شاء الله يلاه ابابا تهلا فراسك وسلم على ماما مليكة حتى ندير ونسوني عليها وسلمو على ادم ورابحة انشوف كيفاش ندير ان شاء الله ونكون معاكم فداك النهار
أحمد : إن شاء الله أبنتي الله يعاونك وسلمي على الجميع
ماريا(سيفطات ليه بوسات) :
- بلغ الله سلامك ابابا...قطعات معاه ومادكراتش ليه حس جواد مابغاتش تشطنو عليها...سدات البيسي..دارت رجل على رجل ورجعات براسها لور..حتى جات كلسات حداها أروى هازة تفاحة كتاكل فيها
أروى : فاش كتخمي؟
ماريا(شافت فيها) :
- مكنخمم فوالو هاد الساعة فين ثورية؟
أروى(أشرات لفوق) :
- راه بمكن طلعات لبيتها فخبارك والله حتى قنطت كون غير خرجنا ندورو شوية ونمشيو لمول نتقداو ونتغداو على برا شنو بان ليك؟
ماريا : ومالك انت زعمة الما كانت طوموبيل وتكليي فشي ريسطو وتقداي ماتخرجيش باز شحال فيك ديال الفشوش حيدي من روتين لي دافنا راسك فيه عيشي الحياة خرجي ضحكي لعبي صافي غير لي عندو لفلوس لي يخرج ولي معندو يدفن راسو فدار انا بعدا انوض نخرج بغيتي زيدي مابغيتي انمشي غير انا وثورية(كتعلي حجبانها باش تفقصها)...تمات طالعة ماريا لفوق..بقات أروى كتشوف وتبعاتها بجرية وحدة وتعيط :
عند جواد لي كان واقف كيلبس فتريكو ديالو عاد خارج من دوش لبس سروال كحل دجين مع كاط تريكو فالبيج ودجاكيط ديال الكوير فالكحل مشط شعرو بعشوائية حتى سمع الدقان فالباب..
جواد : دخل...طل جلال براسو وداير إبتسامة على وجهو
جلال : صباح نور شاف كيصبحتي كتبان ليا منور..
جواد(شاف فيه بنص عين) :
- لا يمكن خاصك دير نظاظر جاتك جلالة على عينك سير دوز حسن
جلال(بستغراب) :
- علاش شنو كلت زعمة من بعد البارح خاصك تكون فرحان ولالا كون تشوف أنور كي كان لبارح بحال شي ثور هايج خاصة غير معامن...جواد كيشوف فيه وسكات حتى قرب ليه بالخف لوى ليه يديه ورى ظهرو وقجو من عنقو
جواد(من تحت سنانو) :
- بغيت غير نعرف إيمتا ادير عقلك كيكول ليا واحد الراس نحيد ليك هاد الراس لمتقل بيه ونلوحك من سرجم ياكلوك الكلاب غير كوليا فين عقلك فين
أنور : حيد منك داك الوسواس خلي النهار يدوز مزيااان نهار بيض كيف كيكولو بلا حرب بلا أسلحة وزيد عليها من نهار جيت مخرجت نخرجو خرجة رجالية لمدينة وديك ساعة نتعشاو كلنا شنو بان ليكم؟
جلال : ممم فكرة مزيانة ولكن شوف مع الشاف
أنور : الشاف فالخدمة بلاش هاد الرسميات شنو بان ليك أبا جواد😉
خرج أنور وبقى جواد وجلال...خنزر جواد فجلال تخنزيرة خلاتو يهرب ويسد الباب من وراه...هز جواد تيليفون ديالو دور نمرة ماريا ولكن تيليفون طافي...بقى كيفكر شحال دار تيليفون فجيبو وهبط يفطر...
****
لبسات ماريا سروال دجين مفضفض شوية ومريح لبسات بودي فالقهوي بارد خشاتو فوسط السروال مع سميطة وسبرديلة فرجليها طلقات شعرها ودارت طربوش فنفس اللون...هزات 10 دراهم بالحساب وخلات تيليفونها فدار...رشات من ريحتها ودارت لمسة خفيفة من كلوس وخرجات سادة الباب وراها..هبطات لقات ثورية او أروى كيتسناوها حتى هوما لابسين نفس اللباس سبورتيف خفيف..
- اوووف واخا هاهو حطيناه...خلات تيليفون على طبلة..وتبعات ثورية وماريا لي خرجو
ماريا : واش جبتي ا10 دراهم راه كنعرفك
أروى : والله ماجبت حاجة زايدة
ثورية : انا لي كلتيه درتو واخا كنت بغيت انعس
ماريا : عطا الله ليام لي تنعسي وتشبعي فيهم النعاس خرجي يضربك البرد ويشوفوك الناس اجي فين جات بلاكة ديال طوبيس؟
أروى : واختي انت ماعرفتي فين جات وبغيتي تمشي فيه باز لوجهك
ماريا : لي عندو فمو مايتلفش ودابا زيدي قدامي بلا كترت الهضرة...تمو غاديين حتى خرجو من لبلاصة لي ساكنين فيها خداو واحد الكريق طويلة خرجاتهم لواحد الشارع وقفات ماريا واحد الدري
ماريا : خويا عفاك نسولك فين جات بلاكة ديال طوبيس؟
- اتمشي نيشان مع هاد الشارع حتى لراس راه تما فين كاينة
ماريا : شكرا اخويا..دارت بكلامو حتى وصلو لبلاكة ديال طوبيس رجعات تاني سولات واحد السيدة
ماريا : عفاك النمرة لي كتدير لجامع حسن الثاني؟
- بنتي كاين غير 38 لي كيدوز من هاد البلاصة ولكن راه ايقربك لبحر حتى انا غادية لتما نيت اغير خليكم حدايا نركلو مجموعين ونهبطو مجموعين ونوريك منين دوزي ليه
ماريا : لهلا يخطيك اخالتي شكرا..
جامع الحسن الثاني كان عامر تبارك الله خصوصا مع قادوه ولا عندك فين تكلسي وتقابلي مع البحر واحد الجو مابحالو جو الماج كيضربو حتى الما كيترش على الوجه الناس غاديين جايين هاليهاز الصوفة فيديه ولي هاز البطاطا مقلية لي هاز الكبال حتى هو كل واحد وهو اوزواج وعائلات ولي كوبل دنيا عامرة وقفات ماريا حدا الصور كتمنظر فالبحر والبرد كيلعب فشعرها زولات الطربوش وجمعات شعرها بمقبط وردات الطربوش..
ماريا(موجهة كلامها لأروى ولثورية) :
- شفتو على جو مايتباع مايتشرا كالسين عليا طوموبيل بوتيك مول بااز
ثورية : انا ماكلت والو اختي
ماريا : كانهضر مع ديك فتات الشطبة لي حداك وحتى انت باغية تنعسي شكون حسن دار ولا هاد الجو
أروى : عندك الحق صراحة والله نمشيو ندخلو لجامع
ماريا : يلاه ولكن مندخلوش لداخل خاصنا زيوف باش ندخلو مبقاو اعلى برا...مشاو لبنات لحدا جامع دارو مزيان وهبطو مع واحد الهبطة تما تاني دنيا عامرة ودراري كيطلعو من الفوق وكيتلاحو لتحت كيعومو واخا الما كان موسخ شوية ولكن مع ذلك كانو فرحانين بزاااف وهوما كيتسابقو شكون ايتعلى ويتلاح...ماريا كانت بغات تصور ولكن خلاو تيليفون فدار...رجعو منين جاو حتى بان لماريا مول سايكوك
ماريا(بحماس) :
- ناري البنات سيكوك نمشيو ناكلو؟
أروى : واش حماقيتي راه 30 درهم لي جبنا معانا خسرنا 15 وبقات 15 باش انرجعو؟
ماريا(جراتها) :
- صافي أصاحبتي شحال فيك حتى انت خاص يكون فيك حس المغامرة يلاه يلاه...جراتهم عند مول سيكوك خداو زلافة زلافة لوحدة كلاو وعمرو كرشهم ومع مداد اللبن البارد والبحر قدامهم الجو زوين بزاااف...شافو واحد الكرسي خاوي كلسو فيه مبانتش ليهم ماريا حتى كتبان ليهم واقفة عند مول بطاطا مقلية كيديرها فواحد العود وكيدورها كتجي بحال شي لولب عطاها 3 رشات عليهم الملحة او السودانية وعطات لكل وحدة وحدة...
أروى : كيبان ليا أنرجعو على رجلينا لدار الله يحفظ...مداتهاش فيها ماريا كتاكول وتلعب برجليها بحال شي بنة صغيرة فرحانة منين خرجوها والديها لبحر...سلات وردات ظهرها لور ومدات وجها لشمس ولبرد ديال البحر كتحس براحة كبيرة وفرحة كبيرة...حتى كتبان ليها الكروسة ديال مول الرايب دايزة ماحسات براسها حتى وقفات كتقلب فجيابها جبدات 5دراهم لي بقات ليها بلا تفكير مشات عند مول الرايب خدات كاس او واحد مدلين...ورجعات كلسات كتاكول مستمتعة
اروى : داخلت عليك بوجه الله مدام فيك هاد جوع كامل علاش مخليانة خارجين ب10 دراهم فجيب اكولي ليا بلاناتك لاروب وحق الله ودابا نشوفو باش انرجعو
ماريا(حتى كلات وشبعات عاد تفكرات فلوس الرجعة بلعات ريقها ودارت راسها ممسوقاش واخا عرفات راسها راه قفروها) :
- شوفي فالبحر وشوفي ناس ولي غادي ولي جاي شوفي ثورية كي ساكتة انت دايرة بحال داك سيدي الخاسر الله يستر
أروى : واخا هاهيا ساكتة مغانكول والو
ماريا : واعدريني راه رايب ومادلين هذاك منقدش نقاوم
اروى : وصافي يلالة انا ماكلت والو بصحة وراحة...بقاو كالسين حدا البحر حتى بدات الشمس كتغرب...حيدو من تم وطلعو مع واحد الشارع كيبانو ليهم الناس واقفين كيتسناو طوبيس وقفات ماريا
اروى : لاش وقفتي راه صافي مابقات عندنا حتى 5درهم لاخرة باش تمشي وحدة فينا لدار اتهناي
ماريا : اش فيها الى سلتنا؟
أروى(شافت فتورية لي عيااات) :
- واش هادي كتهضر بصح ولا كضحك علينا اهاه والى طلعو الكونترولات ونزلونا نصدقو بايتين فالكوميسارية يااك اختي بغيتي انت تمشي سالتة شغلك هداك انا واخا نمشي على رجليا وزايدون تما تبقاي 8 هادي والله لا جا هاد طوبيس غير زيدي نكملوها على رجلينا...تبعات ماريا أروى وكملو على طريقهم حسو بالعيا والعطش واخا هكاك كملو طريق دايزين حدا القهاوي وسناكات حتى وصلو لوسط المدينة صافي عياو المدينة حتى هيا مبلوكية بناس خصوصا كان نهار السبت كولشي الاغلبية كيخدمو فصباح ونص النهار لا...كلسو حدا واحد الجردة ناشرين رجليهم ودايرين يديهم على حناكم بحال شي لاجئين مساكن...
ماريا : وغير يلاه نزيدو شوية مزال ماتعرفو شنو كاين...وقفات أروى جارا ثورية وتبعو ماريا دخلهم من زنقة وتخرجهم لشارع حتى بانو ليها ناس شادين الصف وطاكسيات بيضين
ماريا : هاطاكسيا😀
أروى : هادوك ماشي ديال فين غاديين حنا هالولة وبنوبة هاتانية وزيد عليها معندناش فلوس هاتالتة واشفتي دابا اميمتي 9 ونص هادي ديال الليل اليوم نباتو هنا اليوم أروى(كتندب وجها) :
- شفتي أختي بلاناتك زينين فين كيخرجونا كتليك أقل حاجة غير تيليفون نخرجوه معانا كالسة عليا لا بغينا نبقاو ليبر والمشكل اعباد الله حتى 10دراهم ديال طاكسي طبات فيها كاتليك شدها جوع وشحال ماكلات الرايب ومادلين ودابا فكيها فمن وحلتيها اويلي ليوم نباتو هنا..
ماريا(غادية جايا) :
- ربي لاما سكتينا فمك داير بحال صفارة ديال الكوكوت مكتسكتيش ياربي سلامة مالنا انتجلاو كاينين فنيويورك راه اكازا اصلا ناس ديال هنا مزيانين ياك اي واحد كلنا ليه يوصلنا يوصلنا؟😞
أروى : انت هيا الأميرة ديانا اه اغير تكولي ليهم وصلوني ايوصلوك حتى لباب دار ماشتيش الى تلاقيتي مع شي مسخوط داك لغابة يفدوشنا حنا وياك..
ماريا : اجي فين هيا ثورية؟
أروى : راها كالسة ضروها رجليها جايبانا من حدا جامع على رجلينا وفالأخر اعباد الله طبينا فافلوس طاكسي...ياربي صبر معرفت فين طاح عليك هاد البلان ديال نخرجو بلا طوموبيل بلا والو وادابا حليها...
كلسات ماريا شادة على راسها الدنيا عامرة فوسط المدينة وصوت الغنا وزديح جاي من واحد المطعم مغربي علات ماريا عينيها كيبان كولو شاعل فيه ضواو قرات سميتو لي كانت (ليالي المامون)... كيبان ليها الكارد واقف وشي درابكية واوركيسترا داخلين شوية واحد الشيخة فيهم كدابز مع لوخرا وصوتها واصل لفين وناس كتفرج..
- عندك الحق كان صوتك بحال شي قزديرة خاوية وانا لي علمتك الحرفة حتى وليتي تهازي معايا وكلمتك بكلمتي ودابا سمعيني اتحطي هاد تكشيطة وتخرجي عليا برا...نقزات لي معاها :
هاهاهاهايو عند بالك انمشي بوحدي الى مشيت انا حتى نجاة وحياة ايمشيو معايا
- الالة لباب وسع من كتافك وكتافهم يالاه برا عليا الباب...ماريا سمعات كاع الحوار لي داز بيناتهم...شافت فثورية ورجعات شافت فأروى لي كتشوف فيها
أروى : مالك كتشوفي فيا؟ لقيتي شي حل؟
ماريا(ضحكات بشر) :
- حل واااعر فاعل تارك..
أروى : أشمن حل ثاني؟
ماريا : هانتي دوري قبالتك شوفي داك ريسطو وشوفي ديك خيتي لي خارجة كدابز وتغوت هاديك شيخة وجرات على شيخات لي معاها اشنو بان ليك...قبل ماتكمل ماريا كلامها خرجات أروى عينيها وضربات فخاضها
أروى : اويلي قبل ماتخرجيها من فمك بلاما تكولي على أخر يامي ندخل لتم ونولي شيخة لي يسوى ولي مايسواش يشوف فيا واخا نعرف نبات هنا
ماريا : وغير سمعي أصاحبتي هانتي اول حاجة حتى واحد مغادي يعرفنا ولا يشوفنا نشدو فليسات ونشدو طاكسي كورصة من هنا لدار غير ساعة ديال المكانة مدات مجابت او وسيم اصلا ايتعطل فرباط واش نبقاو هنا توصل 12 شمامرية يدورو علينا يعجبك الحال
أروى(كتحرك فراسها بلا) :
- وأصلا انا عسرية مكنعرف لشطيح منين مجيه ومعندي حتى صوت ديال شيخات اويلي منتخيلهاش حتى فمنامي
ماريا : ياختي كتحمقيني وديك شطحة عندك ولي كلتبه اختي انا معاك فيه...طلعاتها شيخة فرح من راسها لرجليها دورات عينيها كتشزف فأروى وثورية لي تلحقو عليها
ماريا : والله متندمي مجاتش طلعي بوحدك بلا شيخات..
فرح(تنهدات) :
- واخا دخلو تبعوني..
تحطات طوموبيل أنور او وراها طوموبيلت جواد خرج هو وجلال بنفس اللبسة لي كان لابس وانور كذاك لبسة سبور انيقة ومعاه نزار دخلو لمطعم انور لقدام وتتبعو جواد طلعو لفوق دق أنور فواحد الباب ودخل...كان كالس واحد ورا واحد المكتب غير شاف أمور وقف فرحان..
- اووووه أنور توحشناك أصاحبي غيبة طويلة هادي(عنقو)
أنور : غير العمل انت صافت امورك مزيان بصحة وراحة المحال جديد غير سولت وعرفتك فتحتي مطعم جديد كلت ضروري نجي لعندك
- الله اودي مرحبا وألف مرحبا..دار أنور شاف فجواد
أنور : مامون نقدم ليك جواد شريكي
مامون : الله اودي سي الابراهيمي ومن لايعرفه نورتينا
جواد : شكرا
انور : نزار المساعد ديالي وهذا جلال ليد ليمنة لجواد
مامون : شرفتوني أحسن طبلة لاحين ناس اجيو معايا..تبعو مامون من اللور هيكو من المكتب كيبان ليهم الضواو والموسيقى وريحت دخاخن لي كيشطح لي كالس ولي كيتعشى كل واحد عليش الهيت ديالو...ختار ليهم طبلة باينة ومقابلة مع كولشي..
مامون : اليوم العشا على حسابي أنا
أنور : لا مايمكنش
مامون : انا هصرت صافي عتابرو المحل محال ديالكم طلبو شنو بغيتو من مشروب من كولشي ولصدفة اليوم كاينة أحسن اوركسترا غادي تفوجو ديال بصح
- اودي ياودي على لخويويفة بقاي تسكتي شي نهار تجيبيها فضامك ايوا يلاه الى عندك شي شطيح جبديه باش نمشيو فحالنا
ثورية : وانا كاعما كنعرف نشطح
ماريا : انت لي درناه ديريه يلاه سيرو سربيو دابا تبدا تغوت...خرجات ماريا تجرجر فجلايلها ولبنات تابعينها وقفو فدام فرح الأوركسترا لي نصهم دخل يقاد بلايصو ونص ايدخلو مع فرح ورباعتها...
حبابي كنعودوكم كاكل ليلة بسهرة رائعة من الطراز الرفيع ولكن هاد الليلة غير هاد الليلة مغاديش تنسى ليكم اتبقى محفورة فداكرة ديالكم ﻻانو مشرفانا ومنورانا بحضورها الأسطورة النجمة الامعة في فن العيط " فرررررررررح"...تمات داخلة فرح يد شادة بيها تكشيطة ويد كتشير بيها لناس لي كيصفقو شعرها الصفر مطلعاه وخالة حدا فمها عكر حمر وفوندوتان فالبيض بحال جير...وقفات وبدات الكمانجة هيا لولة كتعزف...ضارت فرح كتشوف لبنات مزال مدخلو كيطلو..غمزاتهم بمعنى دخلو شنو مزال كتسناو...دخلات ماريا هيا لولة حادرة راي وتعكل فجلايلها ومع داك بونج لي هازة مقدات حتى المشية تبعاتها أروى لي شوبة متعكل فالكابلي ديال الميكرو عاد ثورية مسيكينة...وقفو صف واحد ماريا دفعات صدر ودخلات عنقها باش تبان عميقة بحال دوك شيخات المحترفات..همسات ليها أروى :
- انت مالك دايرة بحال ديك لي شدها بوعنيق😕
ماريا : سكتي وديري بحالي راه هكا كنت كنشوف شيخات كيديرو فسيديات...دارت أروى كيف دارت ماريا...وبدات الموسيقى..ديال النخوة..غمزات فرح لبنات يبداو جرات ماريا أروى وثورية وبداو دافعين صدر ويشايلو بيديهم العرجة على ختها وطرطيق المسكة بحال شياخ ديال سواقات لي كيديرو شواية...وهيا تبدا فرح تغني وتشالي بيديها ..
- لحبيب الحبيب ياك فراج الله قريب واهيا
- لحبيب الحبيب كيا جديدة وبضض صعيب وهيا
اهاو هاو على لخلاطة واش كيسواو اهيا كيسواو الريح يالي كالو كلام العار واهيا كولو لحبيبي لا يحافيني بلي فات اهيا وكولو لحبيبي صحت بضاض لي درتي واهيا جدب جدب البركي يا عريس الخيل اهيا وجدب جدب شلا هادا ماجدبتي شاي اهيا درناك وريدة فوق الميدة جرحتي لكبيدة اهيا ودرناك عنيبة نفراس العام ندوقوك صدقتي مسمومة اهيا سمع اسيدي سمع لهلا يورينا فيك باس انا وانت وسامعين وجميع الناس الحاضرين اليوم جمعة اليوم تنين صليو على النبي كاملين اليوم جمعة اليوم تلات خرجو لبنات الحاجبات اليوم جمعة اليوم تنين مطحنو مدارو عوين انطلبو من الله ونبي سلطان الله ينصرو ويدوم علينا سلامتو ولمير كلمتو مسموعة كل رجليه فيما كيهيدن يالي فرما...
- ناض الكولشي كيشطح فرحان وناشط دراري وبنات الشعبي مكايشاور...ماريا كتجي حتى لحدا أروى وتغمزها وتكول :
- البوط البوط
أروى : أشمن بوط فالبوطات انا لابسة اصندالتي
ماريا : واهزي البوط أصاحبتي
أروى : راه كتليك انا ع...مجات فين تكملها حتى تلوى كابلي دلميكرو على رجليها وطاحت...نوضاتها ماريا بستة وستين كشيفة المص كيضحك ونص كاعما مسوق اما فرح بغات تاكول جنابها مسكينة..
ماريا : والله حتى اتخرجي علينا انت وهاد ثورية لي كدير شطيح ديال ديك المونيكة لي كتشطح فبلاصتها
أروى(سادة ضهرها) :
- واش انا فثورية ولا فظهري لي تهرس
ماريا : لوي اصاحبتي لوي
أروى : معندي مانلوي انا اصلا بحال الفراكة لا فصالة لا زين افوتيني ياااخ على ليلة...شوية حتى كيبتن ليهم خيال واقف عليهم دارو كيبانو ليهم جوج دراري باقين جون كيعلقو ليهم فزرقات ويضربو ليهم الرش..نطق واحد فيهم :
- تباارك الله على زين لي منور هاد الليلة وكتعرفي تشطحي...أروى قلبات وجها حيت فمو كتعطي منو ريحة شراب...ماريا حاولات تسايرو وتبعد ولكن للاغلبية ناض كيعلق وفرح عاجبها الحال الفلوس نساوها المصايب لي دارو ليها هادا شوية..
- فجنب لاخور وعلى طبلة كالسين 4 درجال انور جلال نزار جواد كيتعشاو ويدندنو بريوسهم ويضحكو واحد فيهم لي مصغر عينيه ومفيكسيهم على شيخات بثلاتة ولا نكولو شيخة وحدة وجها مخافيش عليه برغم من المكياج وداك الغلظ ولكن وجها يقدر يميزو من بين ألالاف الوجوه..نباه أنور
أنور : افين سهيتي تعشى اصاحبي وانت غير عاقدهم..
جواد(سكتو بيديه) :
- شششش واحد الدقيقة...كمل التدقيق ديالو ولكن مكيبانوش ليه مزيان مع كترت الناس لي تجمعو عليهم وكيشطحو معاهم صحة..شاف جواد فجلال
جواد : هاز معاك شيحاجة نسيت بزطام فطوموبيل؟
جلال(بستغراب) :
- لا ماشي ديالك
جواد(كيخنزر فيه) :
- دابا واش عندك ولالا بلاما تعاطا معايا؟😡
جلال : اه اه واخا...جبد من جيبو شي فلوس مدهم لجواد لي دفع لكرسي برجليه او وقف
أنور(بتساؤل) :
- لفين؟
جواد(غمزو) :
- انا جاي..
رمات فرح ليهم بحزام فيه الموزون باش يحيدو داك لي محزمين بيه داكشي لي دارو اروى تحزمات وشادة ظهرها وماريا حتى عيا اما ثورية ولا بحال حي وميت ومع ريحة دخان دوخاتها كملات كاع لي خاص...قربات أروى لعند ماريا وهمسات ليها :
- عتقي شورط كيطيح
ماريا : وانا البونج لي فصدري كيطيح
اروى : اش المعمول دابا
ماريا : هزيه
اروى : راه قرب ينزل مع رجليا اسكتي وبغيت نمشي لطواليط انطرطق
ماريا : ديريها فداك البونج راه كيصم البلل اخودي راحتك حتى واحد مايشمك اصلا كولشي دايخ...أروى جسمها لفوق وقف ولتحت كيتحرك وعينيها تفيكساو ورا ماريا
اروى : ماعرفتش واش كنشوف ولالا ولا دخان قلبني ولا جاتني جلالة
ماريا : مالك أشنو واقع؟...مجات فين تهضر اروى حتى حسات ماريا بالفلوس كيطيحو عليها دارت حتى كيبان ليها جواد حلقها نشف ماعرفات تسرط ولا شنو ندير حسات بدنيا دارت بيها ماعرفات تضحك ولا تبكي ولا شنو غادي دير حدها كاتبسم وترجع تجمع فمها...عطاتو بظهر وكتشوف فأروى وأروى كدير ليها بيديها يالاهوي حصلتي
ماريا(كتهز فحجبانها) :
- أش كان كيكول فيصل فالفيلم؟
أروى : نسيت
ماريا : عتق عتق عتق هانتا ماريا كتغرق هانتا كولشي تورق هانتا شافني صعصع هانتا محزمة وكنشطح اوهاوياه وايااه واياااه..حسات بيديه دوراتها لعندو كيلوح عليها الفلوس وكيديرو راسو كيشطح وهيا غير حالة فمها فيه ومبسمة...بدا واحد يدفع فيه وتاني يدفع فيه حتى حيات بشورط ديالها طاح ومشاو المعالم الانثوية كلها أروى حتى هيا طاح شورط ديالها ومع ذلك بقات تشطح حتى تعكلات فيه وطاحت تاني...بعد جواد بيديه السيد لي قدامو وتقرب منها وهمس فودنيها..
جواد(تحت سنانو) :
- هادي انت ولا وكنتخيل...ماريا حدها كترمش فعينيها ماقداتش تهضر كارزة على سنانها ومبسمة
جواد : لالا موهبة جديدة هادي تاشياخت عين باين ماعندي مانسالك هكا كدوزي ليلة ياااك
ماريا(ماقداتش تسكت) :
- جمع راسك وعرف كيفاش كتهضر دغية رجعتي كيف كنتي
جواد(تبسم حيت وصل لي بغا وخلاها تهضر) :
- هاااااا هادو فعايلك شيخة لي بقات ليك غير هيا...عقد حجبانو وجهو ولا حمر...شدها من دراعها وجرها...تنطرات منو دافعة جبها..
- هادي باش عمرك تفكري دخلي لبحال هاد البلاصة وديري هاد الحالة ودابا مانسمعش حسك اتزيدي قدامي ولا ديني وما أعبد انهرس لملتك كمارتك...ماريا بقات شادة فوجها الاوركسترا وقفات وجاتو فرح
فرح : اسي ياك لاباس مانخافوش ولا
جواد(طلعها وهبطها مخنزر فيها) :
- اتمشي تجمعي غرامتك قبل مانجمع ليك عظامك
فرح (غوتات على الكارد) :
- هادوك انتوما هيه اجيو لهاد قليل ترابي علموه اشنو كنسوى...تمو داخلين الكارد يلاه ايضربو واحد حتى نظل عليه جواد بضرب ضربة فيه وضربة فلاخور...انور ناض ونزار وجلال...منين شافو داك المنظر المطعم ولا سفاه على علاه كولشي تشخشخ دخل فيها انور وجلال ونزار مع جواد هوما 4 ولوخرين 6 كيبان من ورا سراجم صواو فالحمر والخضر حتى كيدخل البوليس مهاجم المطعم وجمع كولشي جلال جواد أنور ماريا أروى ثورية فرح وجماعتها والكارد كولشي جمعهم نيشان ركبوهم فسطافيط...أروى كالسة وضرب فخاضها
أروى : عليا باليمين والله لا مزال ضربت معاك ضربة لشي قنة على أخر يامي وليت مجرجرة فكوميساريات...سكتها واحد البوليسي :
- هاديك هاه مانسمعش حسك مزال😡...دارت يديها على فمها وسكتات كتبكي اما ثورية داها نعاس وسط سطافيط...جواد يديه حمرين دم جنب فمو لا هو لا جلال اما انور مافيه وللو ونزار لي مضروب حدا عينيه...على حواد راسو فماريا كيخنزر فيها مكرهش يقجها أما هيا مابغاتس تشوف فيه حنكها سخون من طرشة لي كلات من عندو ومزال مابردش مكرهش كون يشدها يقتلها عصى...علات فيه عينيها لقاتو كيخنزر فيها وهبطات راسها اما أنور ماقد يشوف فيها مافهم والو كيفاش شنو وصلها لهنا وشيخة مابغاتش تفهم ليه كاع
فرح : ياااخ على ليلة كيدايرة الله ينعل طريق لي لقاتني معاكم
ماريا : على أساس حنا فرحانين تلاقينا بيك انت هيا زينة داودية
فرح : شفتك كضربي المعاني انا راه ابليزير من عندي خدمتكم معايا هاد الليلة حيت طلبتيني اما راه مندخلكم من الشتا
ماريا : لي مقروص مقروص بلا شنيولة بلا نموس وكونماشي وقفنا اونبان وبقينا باا فلوس طرونسبور كاعما نحاشيوها لشي وحدة بخالك راسك مشعكك بحال ديك البصلة الخضارية
فرح(بغات تنوض ليها) :
- ايوا ي...سكتها جواد نقز على فكها شدو بسن يديه
جواد(تحت سنانو) :
- اتزيدي كلمة وحدة انلوح مك من سرجم سكتينا ومتزيدي كلمة وحدة..
- لا ايغبرونا ايديونا لكوانتانامو ولا صومال اربي لاما سكاي حسن كاع
البوليسي : سكاااات...وقفهم فواحد الكولوار ودخل عند شاف ديالو..
- سيدي شي عيالات باين فيهم شيخات كانو منوضينها فمطعم ليالي مامون ومعاهم حتى شي رجال..
الشاف : تبارك الله يلاه فتح مطعم ونوض هاد روبالة سير انت حتى نخرج...خرج لبوليسي هز شاق تيليفون دور لمامون مول مطعم شحال وهو كيسوني عاد جاوب
مامون(متوتر) :
- أهلا شاف خالد صافا؟
خالد : اتبارك الله على سي مامون سكوندار نايض عندك فالمطعم وانت مجايب لدنيا خبار
مامون(وقف) :
- كيفاش إيمتا انا انا ماسمعت والو
خالد(ضحك) :
- أااه ولا كنتي مع المدام جديدة هاد المرة رد بالك مزيااان لبس وجي لعندنا كنساينك...قطع عليها الشاف خلاه غير كيشوف ويبلع ريقو وقف كيلبس فحوايجو ولي معاه مافهمات والو غير كتشوف...قبل مايخرج حط ليها شي فلوس وسد الباب من وراه..
- خرج شاف خالد لعندهم على فيهم عينيهم وأشر ليهم بيديه يدخلو واحد تابع واحد تمو داخلين كلس طارق ورا البيرو وطلب منهم لي كارط ناسيونال...
حط جواد كارط فوق طبلة وانور ونزار ولبقية من غير ماريا وثورية وأروى لي كيبقلو فعينيهم حيت ماهزوعاش معاهم...هز خالد كارط ديال جواد قراها شاف فيه بستغراب..
خالد : واش جواد الإبراهيمي نيت؟
جواد(طالعة ليه القردة لفوق السطح) :
- وي
خالد : تفضل اسيدي كلس...كلس جواد داير رجل على الرجل
خالد : العجب شنو كيدير رجل أعمال فديك البلاصة وشنو خلاه يدخل فبحال هاد الصداع واش هاد رجال معاك؟
خااد : ممكن الله بخليك تعاود لينا سبب ديال الخصام؟
جواد : كابغيتش ندخل فتفاصيل بزااف انا مستعد نتحمل جميع الخسائر المادية للكطعم معنديش إشكال خير تفاصيل الشخصية مكاين لاش...نقزات فرح :
- تاعداك اسيدي كنا كنغنيو حتى صرفق الشيخة لي معايا وجرها بزز يديها معاه
خالد(ضرب البيرو) :
- واش شي واحد سولك ولا هضرك😡
فرح : كتهضرو مزيان امع صحاب الفلوس وحنى لينا الله
خالد : كتعرفي انت الله لي عندك لي يتحرك مايتم ومزال دوري فالكباريات على لغنا ولالة ومالي وتقرقيب سطالي خبارك جابوها اللولين غير سدي عليا داك الفم لانهرس والديه..نقزات ماريا
ماريا : شوف اسيدي انا والبنات والله ماشيخات معاها حنا غير مابقاش لينا فلوس طرونسبور وخفنا نبقاو فزنقة حيت ماخرجنا معانا لا تيليفونات لا فلوس وخفنا لا الى بقينا فزنقة يتهجمو علينا شمكارة او داكشي علاش(حدرات راسها)
خالد(ضحك) :
- داكشي باش كلتو ندخلو نغنيو ونشطحو لرجال باش تجمعو فلوس طرونسبور لا تبارك الله كتعرفي تخايلي وتخطي مزيان
جواد : موسيو خالد الى كان ممكن نمشيو من هنا مكاين لاش وكيف كلت قبل انتحمل جميع المصاريف ولبنات بتلاتة انا ضامنهم لي كيكولوه صحيح
خالد : اوك مدام كلتيها انت اوك...أنور بغا غير ايمتا يخرج من تم عمرو دخل لشي بلاصة هكا عاطيها السكات..
مد خالد شي وراق لجواد سناهم وعطاه رقم ايليفون ديالو بنسبة لتعويضات وأمر ليهم بالخروج...بقات شيخة فرح كتشوف فيهم وتغلي بسم والحقد طلعات فيها ماريا شوفة خنزرات فيها وخرجات تابعينها لبنات من لور...خرج أنور والبقية حتى بانو ليهم طوموبيلاتهم قدام الكومييارية ومامون واقف
أنور : مامون سمح لينا بزااف على لي وقع انتكلفو بكاع الخسائر
مامون : لا بالعكس انت لي سمح ليا من بعد غياب هذا شحال وقع لي وقع على العموم الهضرة من بعد هادو طوموبيلاتكم وسمحوليا خديت سوارت من عند العساس حيت اكيد كنتو محتاجينهم نخليك خاصني نشوف شاف خالد
أنور : واخا شكرا نتلاقاو من بعد دخل مامون لكوميسارية وعطا أمور لجواد سوارت طوموبيلتو كاليه جواد :
- أنور خود معاك جلال ونزار وسبقوني
أنور : وانت؟
جواد(بجدية) :
- أنور لي فيا كافيني دير لي كلت ليك وسير..شاف أنور حتى عيا حدر راسو ركب فطوموبيلتو طلع جلال ونزار ديمارا انور ومشا..جواد بخطوات تقيلة مشا جيهت طوموبيلتو فتح الباب لوراني شاف فثورية وأروى لي كيشوفو فيه بحال ليتيمات أشر ليهم يطلعو بالفرحة عليهم مشاو يجريو طلعو سد الباب وطلع لبلاصتو كيتسنا فماريا لي ماعبرهاش..حتى تمات جايا كتجر فرجليها طلعات حداه دارت سمطة ودايرة فيها مظلومة..
ديما جواد مكسيري بلا هضرة بلا جوج خدا طرييق نيشااان حتى وصلهم لباب دار نزل فتح الباب لبنات هبطهم بالخف رجع وديما وماريا غير كتشوف..
ماريا(بخوف).:
- ف فين غ غادي بيا هانتا انا راه نشرح ليك انا راه كنعتارف والله انا راه غير...مجات فين تهضر حتى وقف طوموبيل فبلاصة خاوية شوية قريبة لدار...نزل فتح ليها الباب...او وقف حلات السمجة ولكن ماهبطاتش النظرات لي فعينيه وجهو البارد لي مباين واش فرحان ولا طالع ليه الدم...هبط رايو شاغها مانزلات جرها من الحزام ديال التكشيطة وهبطها جرها
شدها من دراعها كارز عليها وكيخنزر فيها بشوفات ديال القتيلة...
جواد(واصل ادرجة الغليان) :
- واش عند ملتك شي دماغ كتفكري بيه ولا غير متقلة بيه
ماريا : هانتا اسمع...قبل ماتكمل هضرتها جمعها بنص قبل لا توصل الأرض هزها بالخف
جواد : منين نكون كنهضر سدي فمك خرجة بلا تيليفون بلا فلوس عند بالك خارجة لحومتك تشري زريعة وترجعي خارجة لمدينة ودنيا عامرة أشكال أنواع وبلا حشمة داخلة لبلاصة ديال زبل ورادة راسك بهاد شكل باش ضبري فالفلوس باش ترجعي بغيت انفهم كيفاش كتفهمي انت
ماريا(مخرجة فيه عينيها) :
- راه كتليك خليني أنش...قبل لا تكمل هضرتها عطاها لرجلين بنص تاني يلاه اتكلس فلارض رجعها بالخف
جواد : خلي ديك الهضرة لمخك انت مكتعرفيش لخاطر كتعرفي التخراج العينين على أخر يامي نتجرجر فالكوميساريات مع شيخة ديال الكوابن وعلى مسبتك انت كتفكري ولا مكتفكريش وكون تعدا عليكم شي واحد واش عارفة شكون كيدخل لتما ولالا(غوت) واش عارفة
ماريا(تخلعات) :
- اااه عارفة...رجع جمعها بشمال وطلعها تاني حتى ولات كتحس برجليها صافي ايتهرسو بالكاط لي لابس
جواد : ومنين انت عارفة لاش كديري لي فراسك ااا غير كولي ليا هاد الرجلين لي فينما ولاهم كيمشيو خاص جد بوهم الهرس والكرض..رجع هزها بشمال حتى طاحت الارض هزها ورجع هزها بشمال تاني
ماريا(كتغوت) :
- وبراكة براكة واش انت جهلتي وانت شغلك مزوج بيا وانت مالك وكضرب مزال من الفوق
جواد(هزها بشكال كثر من لوخرين) :
- هادي باش عمرك تكولي ليا شغلك ولوخرين باش تفكريهم وعمرك تفكري دخلي لشي فنت بحال هذاك زيدي كدامي...جرها ولاحها فطوموبيل ورجليها كيعطيوها الصداع بضرب لي ضربها العيا ولي دازت فيه هاد الليلة ماخلاتهاش تقاشح معاه وتشد معاه كتحاول غير تبرد العافية لي شاعلة فرجليها من ضرب ديالو...رجعها لباب دار مانزلش ومشافش جيهتها نهائيا...شافت فيه ومغوبشة...جرات رجليها وهبطات مع سدات الباب ديمارا وزاد بقات كتسزف فيه حتى غبر على عينيها...تمات غادية وكتعرج برجليها لي مابقاوش هازينها سونات فتحات ليها اروى ملامحها ممحيين هبطاتها وطلعاتها وماقداتش تهضر حدها رجعات وخلاتها جايا بوحدها غير وصلات لصالون يلاه اتكلس حتى وقف عليها وسيم بحال قباط الرواح
وسيم(داير إيديه على جنابو) :
- اتبارك الله على خديجة البيضاوية والمجموعة الله اختي اكولبها لينا بعدا كون ديتك لواحد الختانة فاتت اسيمانة لي فات تاعت الله وجهك هداك ولا مسلفاه لا لا انا ماقدش نستوعب مقادش نفكر فيها حتى تفكير واش واش انت سايط ليك البرد فمخك ولكن لقيتو سيبة انتوما بتلاتة مالقيتوش الحكام
ماريا(عيااات) :
- هالعار راه لي كليت اليوم دالعصا ماكلاه حد ودوزنا ليلة كحلة زحلة هالعار غدا وشتف عليا برجليك ادابا خليني اندوش ونبدل ونرتاح
وسيم : غزاااا فيك برد فيك غدايدي عبر عليك على فعايلك أزينة طلعي لبيتك دابا ولهضرة معاكم انتوما حتى لصباح يلاه ضركو عليا خناششكم يلاه...طلعات ماريا شادة فيها أروى وتابعاه ثورية كتجر فرجليها وحادرة راسها من كثرت العيا وسهير.....
كانت فبيتها متكية وكتدلك رجليها لي كيضروها من حر الضرب لي ضربها كلما كتفكر كتعصب دارت كريم لوجها كتنسي شنو وقع ليها فهاد النهار ليلة دازت مابحالها ليلة هبطات شوية وحطات راسها على المخدة تكات كتحاول ما أمكن تنعس ومع العيا لي دوزات دغيا سدات عينيها ونعسات...
****
طالما أستطيع أن أحب شخصًا من أعماق قلبي ، وحتى لو كان موجودًا فقط بالنسبة لي كفكرة ، فإن محبته تساعدني علي ان أحيا ، على الرغم من أنني لا أستطيع أن أكون معه... 💙
- صوت الما لي خارج من دوش وريحة القهوة لي كتعطي فوق من الطبلة كتسناه يخرج...مكاملة 5 دقايق حتى كان خارج لاوي عليه فوطة قطرات ديال الما نازلين من شعرو على صدرو وعضلاتو لي بارزين كيتزادو نهار على نهار من تمارين رياضية لي كيمارسها بالاضافة للبوكس وحمل الأتقال...مشا نيشان لجيهة القهوة هزها دوزها على نيفو هو الأول هاد شرب جغمة منها ورجع حطها مشا لدريسينغ ديالو جبد من تيشورت فالبلو مارين معاه دجاكيط فنفس اللون وسروال دجين زرق لبس حوايجو ودار ساعتو الرياضية رش من البارفان ديالو ورجع لقهوتو كملها على خاطرو ملامح وجهو ممحية هز تيليفونو شاف فيه يلاه مشا لبلاصت نوامر ورجع سد تيليفون دارو فجيب دجاكيت ديالو هز سوارت طوموبيلتو ونزل لتحت على غير العادة ديالو لي مالف عليها كل صباح خاصو ما بالحامض وتفاح عليه قطرات الحامض كولشي فيه الحامض..ولكن من نهار كالت ليه ماريا :
- واش فخبارك انت لي كل صباح حامض فحامض راه كيضعف القلب
جواد : هههه وليتي طبيبة غدائية مافخباريش
ماريا : انا غير كلت ليك وضبر راسك واحد جارتنا كانت كل نهار تاكل فيه ومرضات بالقلب انا غير نصحتك..
جواد(وقف من على طبلة ديال الفطور) :
- شكرا للإهتمام ديالك أدكتورة نفكر وندير بيه...
#الحاضر
هبط كيلقى نزار او جلال على على طبلة ديال الفطور كيفطرو جلال شافو تبسم وصبح عليه
جلال : صباح النور شاف كيصبحتي؟
جواد(اشر براسو) :
- مزيان مزيان..فين أنور مابانش ليا باقي ناعس؟
نزار : لا فاق دوش او سمعتو كيهضر يمكن مع شي مول الورد ماسمعتش مزيان ودابا يلاه ناض كيهضر فجردة مع شي واحد😕
جواد عوج فمو مهموش هادشي فحتى حاجة بدا كيفطر شوية تفكر كلمة هضر مع مول الورد تبسم بستهزاء وكمل فطورو...تم جاي أنور كيهضر فتيليفون ..
ماضت من بلاصتها كتشبح فيقها تيليفون ديال أنور من نعاسها كتحس براسها كلها مسخسخة ودقات لي كلات من جواد كملو عليها زادت جعرات والقرار لي تاخداتو ضد فيه زادت تيقنات انها على صواب دخلات لدوش غسلات سنانها او وجها خرجات صايبات شعرها نشفاتو ومشطاتو دارت جوج فيليلات بذهبي ولبسات كسوة بالكحل والبيض هابطة حتى لحد الركبة مع صندالة كحلة دومي طالون رسمة من المكياج الخفيف ورشة من ريحتها وهاهيا واجدة هزات ساك ديالها دارت فيها تيليفونها وهبطات لتحت...أروى او وسيم وثورية على طبلة ديال الفطور
ماريا(مبسمة) :
- صباح النور كيصبحتو
أروى : صبحت بحال الى كنت بايتة فعرس العظم الصحيح مافياش
وسيم(جاوبها) :
- علاش مكنتوش فعرس اه كنتو فالحضرة نسيت والله يقلل حياكم وحدة على ختها جاييني بتكاشط ديال نمر تكولو كنتو فالغابة مع ليزانديان وداك المكياج ديال سواق ولكن والله لادوزتها ليكم(شاف فختو)انت بعدا اتخرمي من مصروفك واحد شهر ممنوع الخروج ودروج انا بعدا علمتك ومانسمعش حسك
وسيم : ويلي على تجيك البال علاه انت هبيلة لا انت كيجيوك غير الافكار العوجة لبالك بان ليك اتجمعي الغرامة باش تشدي طاكيي اويلي على غدايدي معامن كنهصر أنا معامن(شاف فثورية)اتبارك الله على مولات العقل المونيكة ديال الحلاقي وحتى انت بخبيزتك
ثورية(كترمش مسكينة) :
- خويا وسيم انا راه لي كالوه ليا كنديرو اصلا كاعما كنت بغيت نخرج
ماريا : براكة علينا لي وقع وقع دابا صافي تبهديلة ديال البارح راه كافيانا لهيه تزيدنا حتى انت وبراكة او
وسيم : ومزال ياختي كتحلي عليا فدرقوشك لقيتيني زربان اما يابنتي ياماريا انت وهاد جوجات مانخلي فيكم غير لي نسيت...لبنات حدرو الراس وسكتو
ماريا : انا مغاديش نتغدا هنا
وسيم : فين تاني غادية واش طوالو دوك رجلين عندك😡
ماريا : راه عارض عليا غير أنور لغدا صافي وانا قبلت من هنا لواحد الساعتين غادي يكون هنا نسيت ماكلت ليك بلي حتى هو كان فالمعماعة لبارح
وسيم(ضحك) :
- علاش غير هو لي كان كان هو او جواد ولي معاهم
ماريا : وصلاتها ليك أروى انا عنظ بالي مافخباركش
وسيم(وقف) :
- انا عندي مايدار انت سيري ورجعي دغية وانتوما اهاد جوج والله وتخطوي شي وحدة خجوة برات دار حتى ليلة ليلتها وانا علمتكم...دفع وسيم بالكرسي هز سوارتو وتيليفونو وخرج..
أروى : العجب أنور لبارح مدار والو عليك بحال الى عمرو شافك ودابا عارض عليك
ثورية : اخاي كونما شي داك دري لاخور طويل كاعما نرجعو فحالنا هداك كاعما تحرك ولا تململ كون جات عليه تما بقينا
ماريا : أحيانة على هذاك انا لي كنعرفو...كملو فطور ديالها ناضت ماريا لصالون وثورية طلعات لبيتها أما أروى تكات على الفطوي هازة تيليفون ديالها جات الخدامة هزات الطبلة وردات كلشي كيف كان قبل...
ماريا : شكون جاب هادي وإيمتا؟
أروى : غير صباح لقيتها جابها وسيم كاليك تقابل دار وتقابلنا
ماريا : دير علاش قدات مايحرت عليها حتى واحد راه مايستاهلوش مساكن
أروى : كلتها حتى لوسيم حتى هو...فاتت ساعتين ديال المكانة سونا الباب جات الخدامة كاتجري حتى وقفاتها ماريا
ماريا : هاد المرة الى سونا أي واحد بشوية عليك عاد فتحي يتسناو ماشي تمي كتجري حتى تصدقي طايحة واخا شنو سميتك؟
- نورا
ماريا : مشرفين نورا دابا سيري فتحي الباب...فتحات نورا الباب بان ليه نزار...
نزار : أنسة ماريا كاينة كوليها نزار كيتسناك
نورا : واخا أسيدي واحد الدقيقة...دخلات نورا خبرات ماريا على نزار ومشات لكوزينة بأمر من ماريا
ماريا(هزات ساكها وشافت فأروى) :
- يلاه هاني مشيت
أروى : ماتعطليش لا يجي خويا مايلقاكش
ماريا : كوني هانية يلاه بسلامة...
حاط طوموبيلتو قدام البحر او واقف داير يديه فجيابو وساهي كيفكر الدم كيغلي فغروقو ولكن الغلطة لي دارت ماريا لبارح ماقدرش ينساها كيفاش فكرات دير بحال هكاك تدخل لبلاصة بحال هاديك وتلبس داك لباس وتشطح لي يسوا ولي مايسواش اه ضربها واخا معندوش حق ولكن ضربها لا علاش ماعندوش حق عندو هو كيبغيها وكيموت عليها ومايتحملش شي واحد يشوف فيها نظرة خايبة هو عارف أنور لاش كيخطط مدام شافها لبارح بداك تصرف لي دارت إلا وفكر بلي راهيا ساهلة وممكن دير أي حاجة...دار جواد كيتنفس بصعوبة هز يديه بقبضة وشرب طوموبيلتو عينيه حمرين ونار شاعلة فقلبو مابغاتش طفا رحع ركب فطوموبيلتو ديمارا بزربة ومشا...
****
سونا نزار فالباب فتح أنور وعلى وجهو إبتسامة عريضة منين شاف ماريا واقفة قدامو..
أنور : مرحبا زارتنا البركة نهار كبير هذا..(مد ليها وجهو ولكن ماريا مدات ليه غير يدها)..
ماريا : ربي يخليك...خلى ليها فين دوز وهو محرج واحد الشوية من تصرف ديالها
ماريا : شكرا(كاتشرب ودور راسها فدار وتمنضر فديكور زوين كولشي مرتب ومصمم هو هداك هادئ بحال داكشي لي كتبغي ماشي بحال الفيلات المبالغ فيهم بزااف بالعكس)
ماريا : تبارك الله دوقك زوين
أنور(ضحك) :
- صراحة ماشي داري انا غير ضيف هاد الفترة وصافي
ماريا : اااه فهمت
أنور : هادي دار ديال جواد...ماريا حبسات من شريب العصير وسكتات اما انور لي متبعها بعينيه كيختابر ردة الفعل ديالها
ماريا(تبسمات) :
- إيوا مزيان كنت بغيك نعتادر على البارح داكشي لي وقع
أنور(سكتها) :
- لا بالعكس انا كنحتارمك كيفاش غامرتي وخاكرتي دخلي بلاصة بحال هكاك وديري لي درتي على قبل فلوس المركوب ومتخليش صحاباتك فشارع عرضة لي يسوى ولي مايسواش واخا جاني جواد زاد فيه بزااف فتصرف لي دار مكانش عليه يدير هكاك وزايدون ماعندو حتى دخل فيك ولالا انا ماهضرتش حيت مابغيتش نأزم الأمور داكشي باش قررت نعرض عليك لغدا اليوم تعويض على لي وقع لبارح
ماريا(تبسمات ليه) :
- شكرا بززاف مزيان الواحد يكون عندو إنسان متفهم بحالك
أنور(كيضحك) :
- انا بحال هكا ديما سمحيليا واحد الدقيقة...خرج أنور عند نزار يوصيه على قبل الغدا وخلى ماريا كتشرب العصير ديالها وتفكر فكلامو على جواد وفضرب لي ضربها البارح مابغاتش تسرط ليها علاش مايكونش بحال أنور متفهم وكالم وهو غير شوية يولي بحال شي ثور هايج الله يستر...كملات لي بقا من العصير ديالها..حتى جا أنور يلاه كلس وهو يبدا تيليفون ديالو كيسوني
أنور : اتسمحيليا تاني ههه
ماريا : ماشي مشكيل...هز تيليفون ديالو كتبان ليه نمرة إيطاليا...فتح الخط وكان باه بقا كيهضر معاه مدة الحوار بالإيطاليا
بقات ماريا كالسة شوية ناضت كتمشى فدار حطات الساط ديالها كتكتاشف اللوحات المعلقة على الحيط تقلبهم وتقرا أسماء الرسامين...شوية تفتح الباب ودخل نزار هو او واحد من المطعم جايبين الماكلة حطوها فالكوزينة خرج السيد وتبعو نزار نباتو ماريا :
- أنور خرج مكاينش هنا
نزار : اه صافي انا انخرج باش تبقاي على راحتك مكاين اصلا حتى واحد فدار من غيرك انت...أبتسمات ليه ماريا وخرج...هكا خدات راحتها مزيان...دخلات المكتب قلبات بين الكتوب ورجعات خرجات شدها العطش...مشات كتقلب على الكوزينة حتى لقاتها جاتها ريحة الماكلة دغدغات كرشها مشات بلا هواها كتفتح فلي بواط وتنقب من الفريت ومن الماكلة لي جابها نزار خافت دخل طول وعرض رجعات خطوة لور بانت ليها الثلاجة كبيرة فرمادي فتحاتها هزات قرعة ديال الما كبات منها شربات ورجعاتها لبلاصتها..هازة كاس فيديها كتشرب ويد بغات تسد بيها الثلاجة حتى كيبان ليها ورق الأليمينيوم تار الفضول ديالها هزاتو قبل ماتقرب نيفها تشمو عطات منو ريحة الشوكولا القوية فرحات وعينيها بداو يبريو كتحماق على شكلاط بلاما تفكر سدات الثلاجة وكلسات على واحد الكرسي فتحات داك الورق كيبانو ليها جوج صبيعات ديال شوكولا ريحة الشكلاط وريخة اللوز كتعطي منهم ولكن خلاو صباعها مزيتين...ماهتماتش للأمر قسمات النص وفعلا مكانش بحال شكلاط قاسح كان بحال سلو معسل مداتهاش فيه مدات الطرف اللول لفمها كلاتو جاها بنين بزااف غمضات عينيها وهيا كتستمتع بالمداق ديالو اللذيذ كملات الطرف الأول وتبعاتو ثاني ماحساتش حتى دخلات فدوك جوج طروف كاملين واخا مرات كيجيها مر ولكن لذة ديالو مخلاتهاش تحكم فراسها...شدات داك الورق جمعاتو مزيان ولاحتو فطارو بحال الى مدارت والو مع راسها بلي شكلاط موجود الى تقلقو تشري ليهم بكية أخرى..خرجات من الكوزينة ومشات لبسين كدور فجردة وتمنضر شوية حسات بحال النمل طالع مع رجليها وسخونية طالعة معاها واحد الحالة غريبة بزاااف كالت يمكن غير جوع ولا طانسيو طاح ليها...مكتحس براسها حتى كتخشي رجليها فلبسين وطلعهم تخشيهم وطلعهم بلا هواها شوية بدات كضحك كضحك ضحك هستيري على أتفه الأسباب النص فحوايجها فزك رمات صباطها وخرجات من البيسين وكلعات لفوق كدور من بيت لبيت توقف قدام الباب تبوسو وتعنقو وتمشي لباب تاني وتكول :
(بصوت تقيل بزاااف) :
- أنت هو خويا أنا أنا راه ماخت حتى واحد انا راه خت الحيط ياك الحيط ياك...مابقات كتفرق بين الحيط والباب...دخلات لآخر بيت فتحاتو بابو ودخلات ليه ديكور ديالو كان رجولي بزاااف طاغي عليه اللون البلو مارين وفيه واحد الريحة رجولية خطيرة بزاااف...دخلات وسدات الباب برجليها ومشات فوق نموسية وطاحت مقلشة رجليها...
****
وقف قدام باب دارها نزل خطوة لور خطوة لقدام جواد حاير ماعرف يسوني ويهضر معاها ولالا الغرةر ديالو وكبريائو خلاوه يتراجع حتى تفتح الباب وخرجات ثورية شاف فيها وتبسمات ليه حيت عقلات عليه واخا كان مدوخها نعاس
ثورية(بهدوء) :
- سلام واش بغيتي ماريا؟
جواد(حرجاتو) :
- اه كنت بغيت انسول كيف بقات من لبارح
ثورية : لا راه مكايناش خرجات جا واحد السيد وداها...جواد زير على إيديه وبضحكة باردة رد عليها وركب فطوموبيلتو مكسيري غادي ويضرب فلفولون ويعاير ويزبل فأنور...ماوقف غير قدام باب دارو نزل وغادي وعينيه حمريين معميين بين عينيه كيفاش اتكون كالسة دابا وكيضحكو وأنور كيلعب عليها بهضرتو...فتح الباب ودخل عاقد غوباشتو كايسمع الحس مقكوع بحال الى مكاين حتى واحد مشا بخطوات هادئة لكوزينة كتبان ليه الماكلة محطوطة ستغرب...خرج من الكوزينة وشا لبيسين كذلك مكاين حد يلاه ايدور يخرج كيبان ليه صباطها مليوح وصاكها محطوط...جواد ألف عفريت ركبو جميع الأفكار الخايبة جاتو لبالو طلع كيجري بكل قوتو وكيغوت بسميت " أنوااااااار" وصل لطابق الفوق كيسمع الموسيقى مجهدة جايا من البيت ديالو بلاما يفكر دفع الباب برجليه او وقف مصدوم من المنظر لي قدامو...
سيدها الجزء 16
محتوى القصة
التنقل بين الأجزاء