سيدها الجزء 24

فتح جواد الباب ودخل كيشوف فالحاج كيفاش ناعس دايرين ليه صويرو ومغمض عينيه وجهو صفر عمر ماشاف باه فهاد الحالة ولكن لي داز منو ماشي ساهل...فعقلو ألف سؤال شكون هاد السيدة عارف عليها حاجة وحدة هيا الأم ديال ذياب...ولكن الحاج كيعرفها مزيان كيفاش هضرات معاه وكيفاش تاهماتو ببزاف ديال الحوايج باين معرفة قديمة هادي...وبزااف ديال لحوايج مخبيين عمرو كان كيظن بلي باه يكون مخبي شيحاجة اي واحدة كيدوز بزااف فحياتو ولكن عند بالو بلي باه ماعندو أسرار مخبين حياتو كتاب مفتوح...جر الكرسي كلس عليه وشد لحاج فيديه...حس بيه الحاج وحل عينيه..

- الواليد شوية(سولو بواحد الحنان كبير)..

الحاج(العيا باين فصوتو) :

- الحمد لله اولدي....باس ليه إيديه والابتسامة على فمو :

- انخليك ترتاح حتى لمن بعد ونرجع عندك..

الحاج(زير ليه على يديه) :

- عفااك اولدي الما تعيط ليا على رشيدة...صغر عينيه لي بان فيهم الشك والحيرة فنفس الوقت :

- الواليد طبيب كيوصي باش ترتاح وماتهضرش بزااف حتى تبرا وهضر معامن ما بغيتي

الحاج : الله يرضي عليك انا راه بيخير وعلى خير غير عيط عليها الله يرضي عليك..تنهد جواد تنهيدة طويلة عارف واخا يكول لي كال باه راسو قاصح مغاديش يتسنط ليه ومابغاش يرجع يطلع ليه طونسيو..

- (بصرامة) واخا 5 دقايق الواليد بالحساب انرجع نخرجها من هنا الله يهديك راه خاصك الراحة..

للحاج(كيحرك راسو بستسلام مبسم وعينيه فيهم واحد اللمعان غريب) :

- واخا دابا انت لي وليتي والدني ماشي أنا

جواد : منين الوالدين كيمرضو كيوليو بحال دراري صغار او لولاد كيردو ليهم البال الله يهديك وصافي..

الحاج : وسيري سير براكة من الهضرة ضريتيني فراسي وانت يلاه كتوصي...حرك جواد راسو بستسلام خلى يديه وناض فتح الباب وخرج لكلوار...شافتو ماريا وقفات وجات عندو فعينيها تساؤل وخوف :

- كيبقى عمي؟

جواد(فمو عندها وعينو على رشيدة كيشوف فيها مغوبش) :

- شوية طلع ليه طونسيو خاصو غير يرتاح يولي بيخير

ماريا : مايكون عندو باس يلاه جا داك البوليسي لي كان معاك سول طبيب على ذياب..

جواد(شاف فماريا مغوبش داير يديه بجوج على جنابو كيشوف فماريا ويرجع يشوف فرشيدة عقلو مامعاهش) :

- بلاتي أنا جاي...غادي فالكولوار بواحد الهيبة او واحد الغطرسة وقف قدام رشيدة وجه لوجه...علات راسها فيه كتشوف فيه :

-(ببرودة) :

- الواليد بغا يشوفك...وقفات بلاما تهضر معاه...هزات ساكها ودارت عند فرح :

- خلي هدا عندك ابنتي أنا جايا...شد ليها يحيى فيديها شافت فيه حطات إيدها على إيدو ..

- دروك نجي..

طلعها جواد وهبطها كيخنزر فيها سبقها وهيا تابعاه من لور...وصل عند باب بيت الحاج او وقف دار عندها :

- (بصرامة)5 دقايق وبلا كترت الهضرة طبيب باغيه يرتاح ومانع عليه يهضر...مجاوباتوش حدها حركات ليه راسها بواخا ودخلات...ضارت شافت فيه وردات الباب...حس بيها عبد الرحمان...حل عينيه وشاف فيها...ضارت عندو ملامح ديالها باردة مامبيناش باش كتحس..

الحاج(بصوت تقيل) :

- 34 عام

رشيدة(قربات حداه عينيها كيبريو بحال زاج) :

- 34 عام و6شهور و10يام...هز الحاج عينيه فسقف كيتفكر اول نهار طاحت عينو على رشيدة البنت الصغيرة ازوينة بسالفها طويل لي بحال الحرير كان كيشبه بيه شعر العود ديالو...

رشيدة(حسات بيه وعرفاتو فاش سها) :

- قطعتو باش عمري نتفكرك مزال

الحاج(دار عندها) :

- قلبك قساح كاع لهاد الدرجة؟

تنهدات تنهيدة طويلة جرات الكرسي وكلسات.. :

- باك وانت قسحتو قلبي اعبد الرحمان منين مات ولدي وماشتوش الظلم خايب مايبغيه لا ربي لا عبدو

الحاج(ضيق عينيه ودوز لسانو على فمو) :

- انت لي ظلمتي راسك وظلمتيني معاك منين خليتي ولدك سمحتي فيه وبغيتي تمشي لمدينة تغني...شافت فيه وعلامات الصدمة مرسومة على وجها مامتيقاش شنو كايسمعو ودنيها :

- كضحك عليا ولا كتقلب علامن ضحك اشمن غنا واشمن مدينة واش انا وجهي وجه الغنا واش غير كنغني بين جنان نخلي ولدي ونمشي لمدينة اش كنبان ليك ديال راسي واشمن ولد ولدي او ولدك مات وباك هو سباب

الحاج : شكون ضحك عليك شكون لي عمر ليك راسك بهاد الهضرة لخاوية؟

رشيدة : باااك الله يسمح ليه ويغفر ليه واخا أداني انا مسامحة ليه نهار لي ولدت وجا با كاليا بلي ولدي مات جا عندنا لحاج لدار....

#فلاش_باك🔙

قدام باب دار صغيرة مصبوغة بالبيض بسيطة بحال اي دار فالبادية حبل ديال نشير معلقين فيه الحوايج...جاي موحا العساس ديال فيلا الإبراهيمي لابس سروال قندريسي واحد القميجة زرقة وجيلي ديال صوف وطكية داير يديه ورا ظهرو...وكيبركم غير بوحدو معاجبو حال كيتفكر هضرت الحاج عبد القادر ليه...ماعرف ميدير او هو فلايسي ويموت على الفلوس...قرب لدار كيسمع غواتها...لربي لي خلقها...خرجات نعيمة مراتو دايرة واحد طبيلة وكتلبس فجلابتها...

موحا(جاي قاصدها) :

- أفين غادية هاديك هاه..

نعيمة : فين انمشي نجيب القابلة البنت راه كاتموت بالوجع..

موحا(معصب) :

- تموت تفركع وتهنينا فضحاتني فوسط الدوار لي داز ينعت فيا ومعامن مع مول شي بنتك خرجات عليها تلفازة يحسابليها كد القب قد السطل هاهو ضحك عليها وخلاها واحلة فراسها بلا حشمة بلا حية

نعيمة(كتخنزر فيه) :

- انت اش كتكول اللحم الى خنز كيهزوه ماليه اموحا تاقة الله فبنتك راه هيا لي عندك وزايدون السيد جا حتى لهنا وغير يجي من لمدينة غادي يتزوج بيها حنا ماسوقناش فباه الدري باغي وهيا باغياااه ودابا براكة عليا من الهضرة جيب ليا قابلة ولا نخرج نجيبها لراسي...

موحا(بغا يضربها) :

- كفي لبرمة على فمها طلع لبنت لمها البلا منك ياوجه لبلا كاتليك ايرجع مكاين بو رجوع الدري وااا مشا لميريكان ولا ماعت فرانسا مشااا وخلاها واحلة فينة سمعي هاديك هاه لي كتليك ديريه ولا قسما بالله حتى نصفيها ليك انت وياها يلاه دخلي دخلي...خافت منو مسكينة كطلع فيه وتهبط ورجعات بحالها...مشا يجيب القابلة ومارجع حتى لورا المغرب الحال مغيم البرد وشتا بدات كتصب...ورشيدة كتغوت ربي لي خلقها فواحد البيت مفرشين حسيرة وزربية بالحمر وزرق دايرين بيها المخاد مفرشين ليها يزار بيض ومغطيينها بمانطة...بنت زوينة شعرها طويل مسرح عينيها قهويين ولونها خمري لي شافها كدخل ليه لخطار جبهتها كلها عرقانة وفمها يبس بالغوات غير مها لي شادة ليها فيديها وكتصبر فيها...حتى دخلات يامنة القابلة ديال دوار مكاينش شي مرة ماولداتهاش...

يامنة(كتحيد جلابتها والحايك باش مغطية.. :

- نعيمة جيبي ليا واحد البانية فيه ما سخون عنداك يكون سخون بزااف وردي عليا داك لباب...خرجات يامنة كتجري حنى خرجات فراجلها كيخنزر فيها...ضربات فيه ودخلات لكوزينة...وجدات البانيو ولما وداتو ليامنة وردات عليهم الباب..

يامنة : يا بسم الله...كايتسمع غير غوات رشيدة مسكينة راحها بغات تطلع...

يامنة : كنحس براسو نعيمة سيري وجدي لبنت متاكل انا انتكلف بيها راه اتسخف وتغيب سربي خلاص...نعيمة ترددات ولكن دارت لي كالت ليها القابلة وخرجات...تسمع صوت غوات البيبي...ولكن رشيدة ماحلاتش عينيها...هزاتو يامنة وسمات الله دارتو فيزار...حلات الباب وخرجات بيه عند موحا مداتو ليه..

- انا درت لي كلتي ليا ماتعرفني مانعرفك اموحا...جعات مسحات لرشيدة طرفاتها...تفتح عليهم الباب ودخلات نعيمة كتشوف فبنتها مغمضة عينيها...ولبيبي مكاينش...يامنة حادرة راسها وكتشوف فالأرض..

نعيمة : يامنة اتي فين الولد اختي ومال بنتي ياكما بيها شيحاجة ؟

يامنة(والحزن باين فصوتها) :

- تيلاد تزاد ميت أختي تخنق راه عطيتو لباها داه يدفنو طير من طيور الجنة اختي تلقاه فديك دار مزال كرشخا تولد دراري ولهراري مزال صغيرة الحمد لله امنين بقات هيا...بدات نعيمة ضرب فخاضها وتبكي وتنوح... :

- الله على بنتي وفين كان مخبي ليك هادشي كانت فرحانة بيه كيفاش اختي وانا بحال الى سمعت صوتو كيفاش وقع..

يامنة : غوت مرنة وحدة اختي زراك ليا فيدي وبرد هادشي ديال الله تحمد الله وتشكرو لي جات غير هكا ومامشات هيا شربيها شوية دالما راه فمها ناشف شوية وتفيق راه غير سخفانة...يلاه اختي الله يصبركم خاصني نمشي بنت فوزية حتى هيا اتولد خليت ليكم الىاحة والله يعوضها خير...هزات يامنة حوايجها ودوزان ديالها وخرجات...بقات نعيمة ماحيلتها لحفيدها لي مات ولا لبنتها مسكينة فاش تفيق وماتلقاه حداها...

****

قدام باب الفيلا ولا دار الكبيرة كيما مسميين عليها ناس دوار وصل موحا وفيديه الوليد صغير زايد بشعر كحل وجهو منور وزوين فيمو صغيور وعويناتو مغيمضين...دق فالباب فتحات ليه الخدامة لباب...دخل...وصل لصالون لقا الحاج عبد القادر ومعاه حتى عبد الرحمان لي يلاه وصل من سفر فرحان غير إيمتا يشوف رشيدة وكريشتها...

موحا(شاف فعبد الرحمان كيخنزر فيه جا لقدامو مابغاش يشوف ليه فعينيه وحط ليه الولد فيديه) :

- لي كان كيجمع انت وبتي هاهو ها ولدك...عبد الرحمان كيشوف فلبيبي ويرجع يشوف فموحا :

- فين رشيدة إيمتا ولدات وعلاش حتى واحد مكالها ليا الحاج ياك وصيتك زعمة وعطيتيني العهد ترد ليها البال..قاطعو موحا وهو كيشوف فجيهة لوخرا :

- الحاج الله يكتر خيرو رد لينا البال ولبتي لافوت فيها مابغاتش الدري بغات تمشي لمدينة وتولي تغني حتى هيا بغات تعيش بحالها بحال كرانتها..

عبد الرحمان(كيغوت) :

- واش كضحكو عليا ولا كتفلاو راه مايمكن رشيدة مايمكنش تفكر هاكدا كنعرفها مزيااان..

خنزر فيه موحا :

- وهيا اتعرف بنتي كتر مني البنت باقي صغيرة غلطات وريح لي جا يديها مقادتش على دري عطاتو ليك ربيه انت مابغات تعرف عليه والو السلامو عليكم...

عبد الرحمان : انجي معاك نسمع بودني عاد نتيق...دار شاف فيها موحا... :

- اتلقى غير يديك ولبرد ولداات صباااح ومشات لعشية فطاكسي لدار بايضة

عبد الرحمان(ودنيه مامتيقينش لي كيسمع مايمكنش) :

- يلاه ولدات وسافرات تسطية هادي

موحا : ولدات على خير ماعدها ماتسنا عييت نكوليها تكلس مابغاتش ولدكم عندكم ماتعرفونا مانعرفوكم...

خرج داير يديه وراه وسد الباب معاه...يلاه ايخطي عبد الرحمان خطوة لولة وقفو صوت الحاج عبد القادر :

- عبد الرحمان صافي حدك تما كلتها ليك نهار لول ولد الحاج الابراهيمي لي كولشي كيحتارمو ويحني ليه راس ويكوليه سيدي مع بنت العساس اش كتسنا من وحدة دور تجري فدوار كتليك عطيها تيساع وقفتي فوجهي وعصيتي كلمتي وضرتي فيا الولد ولدك ماكلنا عيب الحاج مكايفرطش فدمو وديك خيتي مشات الما وشطابة حتى لقاع لبحر الى خرجتي من هاد الباب انا ساخط عليك دنيا وأخرة انا علمتك...جمد عبد الرحمان قلبو تحيد من بلاصتو دموع وقفو عند حلقو فيقو صوت ولدو لي بين إيديه غواتو ويديه لي كيحركهم بشوية طلع بيه نيشان لبيتو فين كان حاط الكادويات لي جايب لرشيدة ولحوايج لي شاري مكانش عارفو ولد او بنت داكشي باش شرا كولشي صفر هو اول واحد مسح ليه ولبس ليه الكوش ولبس ليه حوايجو...كولشي جابو حتى من لحليب فرحة الابوة لي كان كايتسناها خلاتو طاير العاب حوايج حليب سكاتة رضاضع كولشي جمعاتو ليه الفوندوز وجا محمل...من بعدما لبس ليه حوايجو...دخلات مو الحاجة نجاة شافت فولدها وفحفيدها لي بين يديه...بلاما تهضر شداتو منو ودارتو بين يديها كتراري بيه باستو فجبهتو وشافت فولدها..

- أدن ليه أولدي وسميه...عبد الرحمان ماحس براسو حتى دموع غلباتو بكا بكا من حرق قلبو ومن شمتو والغدر وطعنة لي خدا...هز ولدو بين إيديه وأدن ليه بصوت حلو وحنين بزاااف خلاتو يرصى ويهدى..

نجاة : شنو أتسميه اولدي؟؟..سكت ع الرحمان كيفكر وشافيها عينيه كيبريو بدموع والكية والحزن باين على وجهو ...

- أنسميه جواد..

نجاة(تبسمات) :

- الله يجعلو من درية الصالحة أولدي الله يخليه ليك وتكبرو على طاعة الله سير رتاح اولدي انا انوجد ليه الحليب ونتكلف بيه غير رتاح مايكون الخير وديها فكلام باك اولدي راه بغا ليك غير الخير سير اولدي دوش عليك ورتاح الله يرضي عليك...حط ليها جواد بين يديها وخرج...

****

➡#الحاضر

دموعها هابطين بحال شي شلال صوتها مخنوق فمها مغطياه بيديها كاتمة صوتها كتبكي وتنخصص بلا حس كتحس بقلبها يقدر يطرطق فأي لحظة واش غير ناعسة وكتحلم راه هادشي صعيب يتقبلو العقل صدرها كيطلع وكيهبط...

الحاج(تنهد تنهيدة طويلة وتبسم) :

- الحاج الله يرحمو عرف يضحك عليا مزيااان من وراها زوجني السعدية بنت صاحبو هيا لي ربات جواد بحال الى ولدها واخا ربات فيه عوايد خايبة بزااف انا نصلح وهيا تخصر من جيه الله يرحمها فهاد نهار ويرحمهم كاملين واخا دارو فين العيب بزاااف الله ايجازي كل واحد على قدر نيتو..

رشيدة(كتشهق مقاداش تكول حتى كلمة مقادة) :

- حح حسيييت ب ب شيح حاجة م مني ن ش شفتو ح حسبي الله و ونعم الوكيل.. ر رزاوني ف فولدي ك كبدتي 34 عام ا اعباد الله علاش ابا علاش... داداني لمدينة ح حيت كنت مغيبة ف فاش فقت ك كاليا ولدي مااات ودفنو بيديه ب بقا معايا حتى بريت كرا ليا وخلا ليا شي فلوس ومشا وصاني عمري نرجع تحرمت من مي لي مسكينة تكون ليها لخايب بالفقصة وماتت وبقا هو تم لدابا مزال تم عمري شفتو ولا جا لعندي حتى كالو ليا مات كونماشي داك راجل لي ولد ناس سترني طون انا مرمية بين لحيوط...ح حرمني من منولدي أعباد الله ولدي ولادي كانو ا ايقتلو بعضياتهم الله اربي قلبي تشوا ياربي ولدي عزري وتربا بعيد عليا أاااااااااااااااااااااااااح أقلبي أااااااااااااااااااااااااااا أقلبي😭😭😭العافية شاعلة فيك العافية شاعلة فيك مايدي لي ولدي ناعس ماعرفتو عايش ماحيلتي لولدي لي رجع ليا اش اندير اعبد الرحمان اكول ليا اش درت ليهم حتى دارو فيا هكا😭😭😭😭😭

الحاج : كولشي مكتاب ومقدر ماعندنا مانديرو لي غادي نحاسبوهم ماتو الله يرحمهم...وعسى ان تحبو شيئا وهو شر لكم وعسى ان تكرهو شيئا وهو خير لكم شوفي الحاجة المزيانة فهادشي ارشيدة ويكون إيمانك قوي بالله..

رشيدة(تنهدات تنهيدة طويلة بحال الى شي جبل تحيد من على ظهرها) :

- ونعمة بالله الحمد لله وشكر لله(شوية بدات تبكي تاني) ولدي زين اعبد الرحمان تبارك الله على مزيناتو ولد كي اندي منبوسو مانعنقو كي اير نصبر اكوليا😭😭

عبد الرحمان : كيشبه ليك غير انت فصغرك أصبري عليا نخرج من هنا ونهضر معاه مساهلاش ارشيدة اشوية بشوية...غير نرجع نعاود ليه كو(قاطعهم الباب لي تفتح)...دخل جواد...غير شافتو رشيدة حدرات راسها كتمسح فدموعها ماها تمسح فيهم وهوما غير مجايين هابطين...جواد عينيه عليها وعلى باه..

- الوليد طبيب راه كاليك مطولش فالهضرة زعمة وصيناك...وقفات رشيدة :

- الله يشافيك ومايكون عندك باس..

الحاج : لهلا يوريك باس...رجعات لكرسي لور وتمات خارجة وقفات حدا جواد مغمضة عينيها كتشم فريحتو ماكرهاتش تعنقو وتبكي على صدرو تبوسو وتمس شعرو او وجهو تخشيه فوسط صدرها تخبعو هبطات راسها فالأرض وكلها كترعد...غلبوها دموعها وخرجات بجرا من البيت كتنخصص..

ستغرب جواد من ردة فعل هاد السيدة...بقى كيشوف فالباب جامع غوباشتو...ورجع شاف فباه...لقاه مغمض عينيه...مابغاش يسولو ماشي هذا هو الوقت...فتح الباب وردو غير بشوية وخرج...دار إيديه فجيابو وغادي فالكولوار جا عندو أمين :

- مكالش ليك الواليد فين كيعرف هاد سيدة واش ديك الهضرة كانت كتكول ليه؟

جواد(كيخمم) :

- ماقديتش نسولو وهو فهاد الحالة خليها غير يبرا بعدا

أمين : نكدب عليك مابقيت فاهم والو اخويا 

جواد(تنهد) :

- أنا كتااار منك

أمين : ماتبقاش واقف كلس حتى انت راه عيان..

جواد : انبقى مع لواليد هنا غير دي دار وسيرو ماكاين لاش تبقاو هنا مشا الحال..

أمين : راه انت لي اتمشي لدار انا انبقى هنا وغدا اجيو سير رتاح اخويا...شاف فيه جواد وضرب ليه على كتافو...ومشاو عند لوخرين لي حتى هوما فراسهم ألف سؤال وسؤال...خرج طبيب من غرفة العمليات..غير شافتو رشيدة وفرح ويحيى وقفو وجاو عندو كيجريو :

- دكتور عفاك امضرا كيبقى ولدي؟(سولاتو رشيدة)

دكتور : قدرنا نوقفو نزيف دم ولكن ضاع منو بزااف أيخصنا ضروري شي واحد يتبرع ليه زمرة دم ديالو أ إيجابي وقليلة عندنا فلكلينيك...فرح واخا هوما خوت ولكن زمرة دم ديالها ب إيجابي كذلك يحيى...

رشيدة : انا نتبرع ليه..

دكتور : ماعندك حتى شي مرض واعر؟

رشيدة : لا ادكتور عندي غير طونسيو كيطلع عندي مرة مرة

دكتور : مانقدروش نغامرو يقدر يجيك هبوط فلاطونسيو خاص شي واحد بي سليم 100 فالمية...كاع هاد الكلام داز على جواد وماريا والعائلة مكتعرف هنا واش لعقل لي يتحكم فيك ولا القلب والانسانية لي كتحكم فيك...

- انا نتبرع ليه(صوت صارم جاهم من لور دارت رشيدة بزربة لقات جواد ولدها)..

جواد(بملامح باردة كيشوف فطبيب) :

- حتى انا عندي أ إيجابي

دكتور : مزيان اسي الابراهيمي عفاك تفضل مع الفرملية دير معاك الاجراءات اللازمة..خطى خطوة باش يمشي مع لفرملية وجع عندو مو شاف ليها فعينيها نيشان :

- عنداك يحسابليك هادشي كنديرو على قبل ولدك هاشي كنديرو على قبل راسي وقبل ماريا ولعذاب لي عيشها فيه مابغيتوش يموت بغيتو يتكعد خلاص ودوز حياتو فالحباسات بحال الكلب...عطاها بظهر وتبع الفلرملية...رجعات خطوة لور شدات فالحيط وطاحت على لكرسي مقداتش تحبس راسها دموعها هابطين بحال الشتا...كتنحط كلامو ليها بحال السم بحال شي موس كيغرزو فقلبها..

فرح : ماما نسولك عفااك

رشيدة : ماشي دابا ابنتي ماشي دابا..خليني عليك الله يرضي عليك لي فيا كافيني ماعندي فين نزيد مزال...

(فجهة لوخرا) :

- مليكة : كي كتحسي ابنتي شوية؟

ماريا(ساهية وساكتة) :

- شوية اماما شوية..

وردة : نكلس حتى نكلس عمري فهمت جواد كيفاش كيفكر السيد ماخلى مدار ليه وفالخر مبرع ليه بدم يخليه يموت تم...نباتها ماريا :

- واخا بنادم يدير فيك العار ترحعو ليه انت بالخير هادشي راه فيها الموت والحياة غير على قبل من وختو وباه شوفي حالتهم مساكن ماعندهم حتى يد هوما فهادشي وزايدون سيد راه عندو انفصام فشخصية...مرة مزيان مرا ابليس فصفة انسان..

جلال(داير يديه فجيابو) :

- جواد انا لي كنعرفو فبحال هاد الحوايج مكيترددش يديرهم الداخل ديالو كاينة واحد طيبوبة وحنان كبير بزاااف..

أمين : بصح واخا الانسان يكون داير فيه العار قدما كان الى كان بين الحياة والموت كيعاونو ويرجع لور ولكن تمشي حتى تعاودها معاه والله لا عقل عليك..المهم أنا انبات مع الوليد جلال انت وصلهم لدار براكة عليكم 

وردة(شافت فيه) :

- نبقى معاك

أمين : وليليا لي بقات فدار مع هنية نسيتيها غدا ايخرج لواليد وانجي لدار..

أحمد : بنتي يلاه خاصك ترتاحي

ماريا(هزات عينيها فيه كيبان العيا على وجها) :

- واخا أبابا بلاتي ايجي جواد...

وسيم : مارديتوش لبال لهاد السيدة كيفاش هضرات مع الحاج كبيلة!!نقزات إقبال :

- بصح كتعرفو سنين هادي ماشفتوهاش جبدات حتى جدي بابا كتعرفها أنت؟

عصام : لا أبنتي عمك هو لي كان مع با الله يرحمو انا كنت فرنسا ديك ساع الواليد سيفطني صغير عند واحد صاحبو مكنتش كنعرف شنو واقع رجعت لقيت عمك تزوج بسعدية الله يرحمها او ولد جواد او أمين هاجر مزال مكاينة ديك ساع...

إقبال(كتعوج فمها بستغراب) :

- لعجب...

زينب : كتعرفو ولا مكتعرفوش داكشي كايخصو هو الحاج مكيكولش ومكايعاودش بزااف حتى واحد مايسولو بغا يعاود راه ايعاود لراسو بلاما يكولها ليه حد...

عصام : ها هو جواد رجع يلاه نمشيو مكاين لاش نبقاو هنا الحاج راه ناعس دابا غدا ونرجعو لعندو...ناضت ماريا مشات لعند جواد :

- أنت بيخير؟

جواد(كيشوف فيها بحنان كبير وبحب) :

- مدام انت معايا وبيخير حتى انا بيخير يلاه احبيبي خاصك ترتاحي غدا فصباح انجي ندير باش نمشيو لكوميسارية

ماريا(تنهدات وشافت فالأرض ورجعات شافت فيه) :

- كنحس براسي بحال الى كنحلم والله دابا عاد بدا كيرجع معايا كولشي

جواد : متفكري فوالو كولشي سالة دابا اترتاحي وتنعسي مزيااان كنكولها ليك ونعاودها مدام ربي مطول ليا فالحياة عمر شيحاجة مغادي تأديك غير هو..

غير هو مزال غادي نتفاهمو على تمشي لعند جلال تعاودي ليه وانا كالسة طنزي عليا وزايداها بالكدوب من الفوق..

ماريا(حدرات راسها عرفاتها مقفراها معاه) :

- والله جتى عارفة دايراها قد راسي ولكن والله مكان عندي شي حل أخور

جواد : ماشي وقت الهضرة دابا سيري رتاحي حتى نساليو هادشي وونهضرو كنحس براسي مابقاش فيا العضم صحيح...عيط عليها أحمد من لور..

ماريا بنتي يلاه..

ماريا : واخا بابا أنا جايا

جواد : تهلاي فراسك وماتفكري فوالو نعسي ورتاحي صافي...بغيت نعنقك ولكن باباك واقف مقابلنا حرام واش بغا يدور زعمة ولا يحيد عينيه مامفاكش

ماريا(جتها ضحكة) :

- هههههه من بعد يلاه احبيبي حتى انت رتاح حنى لغدا تصبح على خير...مكرهاتش تعنقو ولكن ماشي الوقت المناسب وباباها مقابلهم عطاتو بظهر ومشات عند باها وقفات حدا فرح...كتشوف فيها ماعرفات ماتكول ليها حدرات راسها وكملات طريقها...ناضت مليكة عند أحمد وتمو خارجين ...تبعهم عصام زإقبال والبقية من لور...خلطو عليهم جلال وجواد بقى غير أمين لي غادي يبات مع الحاج...

****

فتح أحمد الباب ودخلات ماريا حسات بواحد الراحة فاش رجعات لدار لاحت سكادو ديالها وتلاحت على الفوتوي..

مليكة : نوجد ليك شيحاحة تاكليها ايكون فيك جوع

ماريا(كتحس بلعيا) :

- لا والله ومافيا لي ياكول..

مليكة : سومية بنتي دخلي مع ختك قادي ليها بلاصتها..

سومية : واخا خالتي احي معايا أختي..

ماريا(ناضت) :

- تصبحو على خير

أحمد : تلقاي الخير أبنتي...دخلات ماريا لبيتها هيا وسومية...جبدات ليها حوايجها ديال نعاس حيدات ليها الحوايج لي لابسة ولبساتها ديال دار تخشات ففراشها وغطاتها..

سومية : دابا مزيان ناري اختي شحال تخلعنا عليك

ماريا : داز عليا نهار كحل وحق الله عمري فحياتي كنت كنتخيل نهز السلاح داكشي كنشوفز فتلفازة حتى صدقت عايشاه

سومية(كدوز يديها فشعر ختها) :

- ماتفكري فوالو انت دافعتي غير على راسك وعلى جواد وزايدون راه مزال عايش كاعما مات ماعندك مناش تخافي غير نعسي ورتاحي دابا غمضي عينيك...دارت ماريا داكشي لي كالت ليها ختها كتجيها غير لقطة لي تتيرات فذياب وطاح...مابغاتش تحيد ليها من بالها..تكات سومية حتى هيا فبلاصتها وطفات ضو بقات ساكتة شحال وجاها واحد سؤال لبالها :

- ماريا نعستي أختي؟

ماريا : مزال

- ماعرفت عمي عبد الرحمان منين كيعرف مامات ذياب شفتي اش دارت ليه كبيلة كتكوليه ولدي مات ولدي مات وهو كاليها انت لي مشيتي وخليتي ولدك

ماريا : واش كاليها هكا كاعما رديت لبال؟

سومية : اه كاليها انت لي خليتي ولدك ومشيتي زعمة كان كيبغيها يكما كانو مزوجين وكان والد معاها

ماريا : الى كان والد معاها فين هو هاد الولد؟

سومية : ماتعرفي يكون شي واحد فولادو ولدها

ماريا : كتفرجي فلأفلام بزااف اختي نعسي

سومية : والله حنى كنهضر بصح ماتعرفي هو بفمو كاليها انت لي خليتي ولدك مالحضتيش كاع انت احد الحاجة ماشتيش شحال كتشبه لجواد

ماريا : أويلي أستغفر الله العظيم واش دختي ولا غلب عليك النعاس

سومية : انت عادراك كنتي دايخة ولكن انا مكنتش دايخة والله حتى كاتشبه ليه هو كاعما كايشبه لحاج هانتي غدا ولاحضيها وكولي سومية كالت

ماريا : نعسي نعسي وخليني نعس

سومية : واخا تصبحي على خير..

ماريا : تصبحي على خير...غمضات ماريا عينيها كتفكر فكلام سومية مايمكن خايبة حتى لتعاويدة مايمكن سومية اكدخل شي فشي علم الله كيفاش الحاح كيعرف رشيدة ولكن توصل بيهم هكا لا...

****

فطريق جواد ساكت وحاضي العربي من زاجة ديال طوموبيل مامالفاش ليه يبقى ساكت ماهضر ماتكلم مكال والو على قضية باه رجع لور وسقل زعمة يكون كيعرف مات ذياب وعارف علاقتها بباه ومباغيش يكول...خاصو يكوليه على ولدو باي حتى هو شدوه..

جواد : عمي...هز العربي فيه راسو ساهي :

- اممم نعام أولدي

جواد : عندي ليك شي خبار مكتفرحش ربيع كان هنا وحتى هو كان مع ذياب...تنهد العربي تنهيدة طويلة ورحع براسو لور :

- كنت حاس اولدي متوقاااعها منو هذاك ولدي وانا عارفو

جواد : مغاديش دير ليه شي محامي؟

العربي : دبر راسو انا خارج سوقو عييت نصح فيه ماتسنطش ليا ختار الطريق الخايبة يتحمل مسؤوليتو خليه يتزير شوبة مرابانا يتوب..ولدي انا نزلوني غير هنا صافي..

جلال : نوصلوك قدام الباب بعدا

العربي : بلاما تعدب راسك اولدي براكة مابقى والو...وقف جلال بطوموبيل نزل العربي حط إيدو على دراع جواد وتبسم ليه :

- على سلامتك اولدي حتى لغدا وندوز تهلا فراسك بزااف...جواد مافاهم والو كيفاش كيشوف فيه ويهضر معاه بحال شي واحد خايف عليك ولا بقيتي فيه...ديمارا جلال وكمل طريقو للقصر...

جواد(غمض عينيه ودوز يديه على شعرو حتى تقسح فضلوعو)... :

- ااااحححح..

جلال : شخشخوك..

جواد(رجع براسو لور وغمض عينيه) :

- كانو كتاار أصاحبي بغيت غير إيمتا نوصل ونتلاح كانحس براسي اينفاجر..

جلال : بسيف أخويا راه ليلة واشمن ليلة صحابنا ليلة يباتو يتكردو فكوميسارية

جواد : مطاحوش فيديا قبل دوماج سلتو منها..

جلال : بعد من المشاكل أصاحبي براكة اليداز عليك انت وماريا...شاف فيه جلال سكت مجاوبوش...وصلو لدار كل واحد فيهم طلع يرتاح فبيتو...دخل جواد لدوش غسل عليه من بعدما جيد الباندا لي دارو ليه حتى خرج عاد رجعها...تكا فبلاصتو كيحس بضلوعو كيضروه سرح رجليه ودار يدو على جبهتو كيفكر فمانات ذياب والهضرة لي كانت متكول لباه وفالعربي وتصرف لي دار شيحاجة كدور وراه معارفهاش شنو هيا خاص غير الحاج يخرج ويشرح ليه شنو واقع هكا كال مع راسو...

****

عنـدما كـنا صغـاراً . .

•كان مـن السـهل ان تركـض

الـى مـن تحـبه وتحضـنه وتقـول لـه احبـك. .

... •أن تخـبر صديقـاً كم ان وجـوده

فـي حياتـك يعنـي لـك الكـثير . .

بكـل عفـويه . . بكـل بـراءه . .

-ولكــن . .

عنــدما كبرنا . .

كـم مـن المـرات عقـد الصمـت لساننـا

خجـلاً . . أو كـبرياءً . . أو خوفـاً...

~~~

#سبيطار

دكتور : الحمد لله على سلامتو تخطينا مرحلة الخطر الحمد لله الاعضاء ديالو داخلية متضرراتش كنتسناوه غير يفيق دابا غادي نديوه لبيت ديالو ولكن من الاحسن بلاما دخلو عندو الزيارة اليوم ممنوعة

رشيدة(كترجاه بعينيها) :

- عفاك ادكتور غير جوج دقايق نشوفو ونخرج والله ما نهضر ولا نقيسو...الدكتور بقات فيه شاف حتى عيا وخلاها دخل عندو مطولش بزااف...خرجو ذياب من الانعاش داوه لبيتو...عطات لفرملية لبسة فزرق لرشيدة لبساتها او واحد طقية ديالها وداتها وراتها شومبر ديالو...دخلات عندو بلا حس كيبان ليها فوق نموسية ناعس عريان من الفوق مغمض عينيه شعرو لكحل فوق جبهتو مخربق...كاعما حاس بيها...نزلو دموعها وهيا كتشوف ولدها فهاد الحالة ماحيلتها ليه ولا لولدها لي عرفاتو حي ولا لهاد المصايب لي كالو ليه دار ولدها الى ناض واش ايدخلوه لحبس ولا شنو ايديرو من بعدما كانت حياتها هانية وبيخير تقلبات سفاها على علاها...قربات منو غير بشوية حطات إيدها على شعرو ونزلات بشفايفها باست ليه راسو..

- الله يحفظك ليا احبيبي وينجيك ويكوليا فعمرك ياربي(كتهضر غير بالهمس)...تنهدت تنهيدة طويلة ورجعات بلور خرجات ورضات الباب غير بشوية...

يحيى(مشطون) :

- كي بقى شافك هضر معاك؟

رشيدة(كتحيد فديك اللبسة) :

- ناااعس كاعما جايب لدنيا خبار وليدي مسيكين

يحيى : انا دخت والله الى دخت ذياب مايمكنش يكون كيف كيكولو راه مايمكن مايتقبلهاش لعقل..

رشيدة(كلسات) :

- حتى انا بحالك ولكن خفت غير يكون رجع كيف كان نهار تفارق مع ديك خيتي الى رجع كيف كان توقع اي حاجة أيحيى البنت مايمكن ضربو برصاص أهكاك فين كتعرفو ولا ميعرفها وسمعتي البوليس كالو ليك شحال هادي كيقلبو عليه..

فرح : انا ماقديتش نتيق وحق الله خويا حنين عمرو ادى شي واحد يدير عصابة ويتاجر فالممنوع راه الحماق بعينيه..

رشيدة : نهار تفارق مع ديك اميمة كان كيكوليا تبعات لفلوس كاليا حتى انا غادي ندير لفلوس ويولي عندي لي يتحرك مايتم كنكوليه حنا بخيرنا كيكوليا لا الوالدة بغيت كتار وكتاار وانا كيحسابلي غير صدمة خلات يكول هكا ولدي كالس يخطك وينفد ورا ظهري هاد دري مختصوش الحبس خاصو يتعالج والله مامنو جوج انا ولدي وعارفاه😢😢

يحيى(كيتحصر) :

- القانون ماكيعرفش خاصو يتعالج كايعرف الحبس خاصني نهضر مع شي محامي مزيان واخا نعرف نبيع لي ورايا ولي قدامي غير يخرج منها ولدي هو لي عندي..

فرح(كتشوف فمها) :

- ماما حتى لدابا ماكلتي لينا والو واش هداك السيد هو لي كنتي كتعرفي واش هو لي كنتي مزوجة بيه ومات ليك ولدك وطلقتي منو؟...شافت رشيدة فيحيى مابغاتش تكول لبنتها بلي حملات منو بلا زواج كدبات عليها وكاتليها كنت مزوجة وطلقت ماخبات والو على ولادها بجوج بيهم عاوداتهم ليهم كاع لي وقع ليها من غير انو حملات بلا زواج خباتها...حركات راسها بأه وسكتات..

فرح : هو كان كيكول ليك بلي انت لي خليتي ولدك مافهمت والو فشكل هادشي وصدفة غريبة...

رشيدة : فرح حتى لدار ابنتي الله يرضي عليك راه مانعست ماشفتو وانت مكتقدايش من الاسئلة..

يحيى : فرح براكة واش وقت هاد الهضرة هادي..

فرح : صافي واخا..جات عندهم الفرملية :

- سلام انتوما هوما والدين ذياب الزيتوني؟

رشيدة : اه ابنتي 

- خاصو شي حوايج مايلبس تريكوات يكونو واسعين شوية على قبل الجرح او سروال وحواايج داخلية..

رشيدة : فرح سيري انت وباباك جيبوهم ليه انا انبقى هنا سليباتو فالكوافوز اللول وسوفيطمات ظيالو فطاج اللول الباب الثاني وتريكوات فطاج الرابع الباب اللول وسراول راه تحتهم..

يحيى : نجيب ليك معانا شيحاجة تاكليها؟

رشيدة : ماعندو منين يدوز

فرح(جرات باها) :

- بلاما تسولها ابابا راه اتكوليك لا يلاه نكونو جاين ناخدو ليها شيحاجة ...مشت يحيى وفرح لدار وهيا بقات كالسة موسدة يديها وساهية كتفكر..

#ولاية_الأمن

عز الدين : ربيع المنصوري ونزار خشخاش كالو بلي كيعرفو الثعلب على اساس الثعلب ماشي على أساس ذياب الزيتوني

جواد(شاف فماريا لي شافت فيها بدورها ورجع شاف فعز الدين) :

- ومن بعد انتوما جيتو ولقيتوه متلبس كولشي شهد ضدو 

عز الدين : هادشي حنا عارفينو ولكن المشكل لكبير هو ماعندنا حتى دليل بلي هو الثعلب قلبنا الاوراق ديالو تبوتية كتكول بلي هو ذياب مالقينا حتى ورقة ولا مستند ولا شيحاجة تبت بلي هو ثعلب وتعطينى راس الخيط لريوس لكبار ومنين زدنا قلبنا الملف ديالو لقيناه بلي ديجا كان كايتعالج عند طبيب نفساني بسبب شي صدمة فحياتو يمكن..

ماريا(وتفقاتو فهضرتو) :

- أه بصح داكشي باش كان كيهددني باش تتفرق على جواد كان خايف عليه مني مابغانيش نتفلى عليه كاليا انتوما بحال بحال انا انعاون جواد ونبعدو عليك باش ماتأديهش أخرتها اتبعي واحد لاباس عليه..جواد ضحك بستهزاء :

- زوينة هادي ويكون مريض ولا يتفركع كاع المهم السيد مخلوض مجرم حياتنا بجوج كانت فخطر خاصو يغرق فالحباسات..

عز الدين (شاف لجواد فعينيه) :

- خاصك تعرف بلي الثعلب كان كايتاجر فالممنوع ولكن عمرو ماقتل ولا سرق وعمرو ادى شي واحد فعلا هو كان خطير ولكن خطير فتجارة ديال الممنوعات وخطير حيت مايعرف الريوس لكبار داكشي باش كنا كنقلبو عليه حيت الى شديناه انشدو ليد لكبيرة الى مشا طبيب ديالو الخاص وتبت لمحكمة بلي مريض وبلي مزال كايتعالج ايحولوه لمصحة نفسية 

جواد : واخا يحولوه لمصحة نفسية يدوز الفترة ديالو ويتحاكم ولالا؟

عز الدين : على حساب يقدر فترة العقوبة يدوزها فالمصحة ويقدر يخرج منها بحال زغبة من العجين...جواد تعصب ناض وقف عند سرجم وخبط يديه مع الحيط ضار شتف فعز الدين مغوبش :

- وهيا اش تمركيل هدا اعز الدين اش هاد تخربيق وداك تهديد وداك الخطيف ووزيد شنو مشات على عينينا ضبابة ولا ناخدو حقنا بيدينا حنا ماع ونفضيو هاد جقلة

عز الدين : جواد ماشي وقت العصبية هادي أصاحبي ماريا ماعندها حتى إتبات صوت وصورة كايتبت بلي كان كيهددها القانون راه كايمشي بدلائل ماشي بالهضرة..

جواد(عاقد غوباشتو) :

- ورجالو؟

عز الدين(رجع بالكرسي لور كيلعب بستيلو) :

- حتى هوما حريرتهم حريرة نكرو كاملين بلي هو الثعلب حيت بحال هادو كايكونو مع ريوس لكبار الى طاح الصغير تقتلهم ومايكولو كلمة وحدة

جواد(كيمشي ويجي فالبيرو العافية شاعلة فيه) :

- وراه تسطية هادي لحماق واش واش باغيين تخرجو ليا عقلي واش جابو مليوح تم يلاه أش جابو حنا لي جبناه؟

عز الدين : كلمة وحدة عاودها كاملين ماعرفناش ونكرو بلي كيعرفوه ونكرو بلي هو لي جاب ماريا نكرو أي حاجة كتعلق بيه حنا عارفين بلي هادشي كدوب فكدوب وستعملنا جميع أساليب الاستجواب معاهم ولكن بحال الى كانخويو الما فرملة

جواد : اها ودابا شنو؟

عز الدين(وقف) :

- هادشي مخاصش ذياب يعرفو نهائيا عند بالو بلي صافي عرفنا شكون هو وبلي رجالو عتارفو عليه فهمتيني

جواد : وعلاش زعمة؟

عز الدين : الى عرف بلي معتارفوش عليه وبلي ماعندناش شي دليل بلي هو الثعلب مغايبغيش يعاونا ويعطينا سمية الريوس لكبار لي كيعرف وضروري الطبيب يشوفو هو لي ايعطينا تقرير واش صحتو نفسية مزيانة ولالا لانو الا كانت مزال صحتو نفسية متأزمة هادشي كاع لي دار ممسؤولش عليه...ويلى جينا لجانب الانساني شخص بحالو ايضيع الى تحاكم..

جواد(كيضحك) :

- لالا زوينة هادي دابا ولينا كنعطيوه أعذار عمري شفت هادي واش سيد مريض خاطف مراتي ومهددها وكتكول ليا غادي يضيع

عز الدين : جواد انا طالعت على الملف ديالو هادي 5 سنين قبل السيرة الداتية ديالو نقية بزااف ومن عائلة نقية ماعندهاش سوابق الانسان بعد المرات كتحكم عليه الظروف يتصرف تصرفات خارج الارادة ديالو خاصك تفهم..

جواد(بصرامة مخرج عينيه) :

- انا مكانفهمش لي اداني وادى ليا عائلتي منرحموش...الى انت اتحن فيه اسعادة الضابط دير فبالك انا مغاديش نحن فيه وحقي اناخدو بيدي(جر ماريا من يديها فتح الباب وخرج تجاهل عز الدين لي كيعيط ليه مداهاش فيه ماتلفتش وراه خارج بحال شي رعدة نازلة من سما مكايشوفش قدامو الأعصاب عماو ليه عينيه)... 

#فطوموبيل

ماريا كنشوف فجواد بنص عين كارز على الفولون المفاصل ديال يديه بياضو عاقد غوباشتو سايك وساكت ماعرفات شنو تكول واش تهضر ولا تبقى ساكتة..شافت حتى عيات ودورات راسها لجيهت السرجم..

جواد(بلاما يشوف فيها) :

- شنو كاين غير كولي لي عندك😑...دورات راسها لجيهتو وتقادات فالكلسة كترمش بعينيها وتحاول تهضر غير بالعقل :

- حبيبي هانتا غير سمعني وماتعصبش خليني غير حتى نستلي هضرتي وحكم صافي...شاف فيها بنص عين :

- دوي

ماريا : انا عارفة بلي هادشي لي دار ذياب مايتلبسوش عليه لحوايج خطفني بصح ولكن مأدانيش مامسنيش السيد راه مريض عرفتي هو راه كان كيعرف واحد البنت كيموت عليها كيحيد من راسو ويشري ليها وخطبها بقات ليهم سيمانة لعرس تزوجات بواحد سعودي لاباس عليه قدام عينيه تأزم ومرض وشحال وهو كيتعالج عند بالو بلي كاع لبنات كيف كيف انا شبهت ليه لخطيبتو داكشي باش دار معايا ه...مجات فين تسالي هضرتها حتى وقف طوموبيل بجهد...ضار عندها كيحرك العضلات ديال الفك ديالو من شوفاتو باين فيه معصب ولكن هادشي ماخلاهاش تراجع على هضرتها :

- هادشي لي كيخلعني فيك الاعصاب ديالك على هاد القيبال الى تزوجنا اقل حاجة اتردخ راسي مع اقرب حيط حتى يتشتت مخي..

جواد : دابا علاش كتقلبي راه على خلا دار عشتك نيت أصلا مزال ماتفاهمنا على قضية جلال لي مشيتي عاودتي ليه وانا لا

ماريا : هاديك قصة هادشي حتيت كون انت تحطيتي فنفس الموقف مغاديش تعاود ليا واخا نعواج اتخاف عليا وحتى انا هكاك السيد كيكول ليا الما بعدتي عليه انقتلو وانت كتكوليا درت كسيدة واش انت لاباس بغيتيني نجي نكولها ليك تهجم عليه حيت عارفاك يدير فيك شيحاجة انا ماندمتش حيت خبيت عليك وزايدون جلال صاحبك وفبلاصة خوك وهو لي عرف شنو كيوصل لخبار راه عاوني مسكين ودابا ماشي موضوعنا هذا الله يهديك...جواد طلعات ليه جنية كيغوت :

- انت يلاه دابا كتكولي هددك بيا شوية كتحني فيه واش بغيتي تجهلي ملتي ولا علاش كتقلبي

ماريا : انت ماينفعش معاك الحوار قسما بالله كندم حتى كنهضر...فاش كدوز حدا حمق ويضربك كتكول الله يعفو مانديوش عليه راه غير حمق السيد راه مأزم بسباب الحب تأزم شوف اغير فيلم البرتقالة المرة بسباب الحب تسطات

جواد(شاف فسقف طوموبيل كيسوط) :

- هاهيا اتجبد ليا الأفلام ولمسلسلات عاوتاني ياربي على بلان واش باغيين تسطيوني ولا تسيفطوني لبويا عومار

ماريا : كون كنتي كتفاهم اتفهمني انا كنخوي الما فرملة

جواد(خنزر فيها) :

- فهميني الالة انا كنسمعك يالاه هاني هضري هضري

ماريا : اوووف ياربي صبر من عندك السيد يقدر يكون عندو إنفصام فشخصية وهادشي كيوقع فاش الانسان كيتصاب بشي صدمة فحياتو ولي داز عليه ماشي قليل فاش خلاتو هاديك وبدلاتو بواحد بفلوسو مرض لقا طريقة وحدة باش يولي خانز فلوس هيا قضية الممنوع ومع ذلك عمرو قتل ولا سرق يعني واحد الجانب إنساني مزال محكم فيه.. انت معارفش شحال كيسوا عند ختو ومو وباه كيحماقو عليه تخايل انت غير فالمثال فالمثال يكون خوك هو لي واقع ليه هادشي...ضار شاف فيها 

ماريا : كتليك اتخايل مغاديش تعاونو وتوقف معاه وتبت لبوليس بلي مريض وتعاونو باش يتعالج ويرجع كيفما كان اه دازت علينا خصوصا انا هددني وخلاني كنفكر فشي حوايج خايبة وخلاني هزيت سلاح ولكن هادشي ماشي بإرادتو تقدر تكول حنينة نية غشيمة ولكن انا كنفكر يمكن بقلبي كثر شفت مو كيدارت عليه وختو هادشي كيتبت بلي هو مزيان معاهم ماشي خايب بعض المرات اجواد الضروف كتحتم علينا نديرو حوايج ماوعيينش بيهم شحال من واحد مسكين ولا يلوح حوايجو فزنقة وشحال من واحد نتاحر كاع ابسباب صدمة فحياتو الحب صدمتو خايبة بزااف ونزيدك خاصنا نشوفو الجانب الايجابي فهادشي...قربنا من بعضياتنا وعرفتي شحال انت غالي عليا وعرفت بلي انا غالية عليك وعرفتي عدوك من صديقك الانسان يفكر بعقلو ويتحكم فأعصابو ذياب ماشي خايب ولكن الضروف حكمات عليه يولي خايب والى عاوناه أيرجع إنسان مزيان كيف كان...ضور وجهو كيشوف فطريق ويحك فجبهتو..تنهد تنهيدة طويلة ورجع شاف فيها :

- خلينا من هادشي دابا أنحطك فالقهوة وندوز عند الواليد

ماريا : لا غير ديني معاك بغيت نشوفو كيف بقى يااك اتفكر فهادشي احبيبي؟

جواد(حط يدو على وجها بحنان) :

- عارفاني مكنقدش نخسر ليك الخاطر هضرتك صحيحة واخا انا مكرهتش نخصر ليه وجهو مغادي نواعدك بوالو بلاما تحلمي ولكن انفكر فهضرتك غير نرتاح مع الواليد وديك ساع نشوفو..شدات إيديه باستها من الوسط وحطاتها على قلبها..

ماريا(بحنان عينيها كيبريو بحال نجوم) :

- كنبغيك بزااف..

جواد : حتى أنا احبيبي..كنبغيك بزااف كتر من راسي دابا واخا نمشيو؟

ماريا(ضحكات حركات ليه غير راسها...خدا ايدو منها ديمارا طوموبيل شد الطريق ورجع شد ليها فيديها معنقها جيهت صدرو)...

#السبيطار

فبيت الحاج :

- سير اولدي كول شيحاجة ايكون فيك الجوع

أمين : لا الواليد خديت قهوة كبيلة شربتها كتحس برايك مزيان بعدا؟

الحاج : لا اولدي الحمد لله حتى طبيب كبيلة سمعتيه أش كال

أمين : الحمد لله تهلا فراسك وعطي لخاطر لراسك...قاطعهم دقان فالباب..يلاه اينوض امين يفتح وهو يتفتح الباب دخل العربي...

- صباح الخير اووه لالا كي كنا وكيف ولينا على سلامتك أشريف شرفتي وكبرتي كتليك راه مابقا فيك مايدار خاصنا نزوجوك باش ترجع شباب😂

الحاج(ضحك) :

- حتى شاب عاد دارو ليه حجاب وليت بحفيدتي وانت باغي تزوجني وبااز اسيدي

العربي(شاف فأمين كيضحك) :

- أمين واش كلت شي عيب؟

أمين : لالا ماكلتي غير صح نخليوك انت تزوجو أش بان ليك أعمي؟

العربي : باك مزال زين ويجيبها كي لبلارة

الحاج : غير شتوني ماعندي صحة وانتوما دورو بيا

أمين(وقف) :

- انا نخلي معاك عمي انهبط لتحت ونجي..

العربي(جر الكرسي وكلس) :

- اسير اولدي انا معاه...خلاهم أمين وخرج..

الحاج : شفتي على مصيبة العربي طاحت على راسي

العربي(تنهد) :

- شفت أخويا شفت رشيدة هيا رشيدة ماتبدلاتش مانكدبش عليك لبارح تصدمت شي حوايج مايتقبلهمش لعقل

الحاج : عاودت ليها كولشي وعرفات بلي جواد ولدها

العربي : شوف أ عبد الرحمان طوال زمان ولا قصار غادي تعرف غادي تعرف الحقيقة عمرها مكتخبا وانت ماعندك يد فوالو وحتى هيا ضحكو عليكم بجوج والخير فيما ختاره الله كولشي بالمكاتيب وماتدي غير لي مقسم ليك إيمتا ناوي تكولها لدراري؟

الحاج : نرجع لدار انعاود ليهم كولشي جواد خاصو يعرف بلي مو لي ولداتو هيا رشيدة ماشي سعدية وديك ساع هو يقرر واخا انا عارفو صعيب شوف وشوف واش يتقبلها ولالا

العربي : ايوا الام هيا لي كتربي واخا سعدية رباتو على الحقد والبغض انت لي كنتي تسهر حداه الى مرض وتهزو تراري بيه كنت كدير بدور الام والاب أما هيا عمرها قربات ليه كانت مقابلة غير ولادها لي ولدات من كرشها وغير كبرو حتى هوما بغات تزرع فيهم شرها أستغفر الله العظيم هيا فدار الحق وحنا فدار الباطل مخاصناش كاع نجبدوها وأذكرو أمواتكم بالخير...

الحاج : كل واحد كيجبدوه فعالو وعمالو الله يخلي سيرتنا زينة فوق كل لسان

العربي : أمين...تفتح الباب ضار العربي لقا جواد داخل هو وماريا..

ماريا (باست العربي) :

- عمي صباح الخير

العربي : صباح الخير ابنتي كيبقيتي من البارح شوية؟

ماريا : لالا الحمد لله...ضارت من جهة لوخرا عند الحاج باس ليه راسو..

- عمي شوية دابا كي كتحس؟

الحاج : الحمد لله ابنتي انت لي كيبقيتي؟

ماريا : الحمد لله أعمي...

جواد(بهتمام) :

- الواليد شوية دابا تلاقيت مع امين كاليا بلي طبيب كاليك الامور مزيانة واش بصح؟

الحاج : اه اولدي الحمد لله كنتو فالكوميسارية؟

جواد(تبدلو الملامح ديالو) :

- اه كنا تما

العربي : أمضرا؟

جواد : اودي مكاين الي يطلع ليك دم كاليك ماعندهم حتى دليل بلي هو الثعلب وزيدك هادي وسيدة وسيد تعاطفو معاه حكا والواد مريض خاصو يتعالج خرجان لعقل هذا

الحاج : عندهم الصح أولدي الله غفور رحيم...شتف فيه جواد بستغراب مامتيقش ودنيه..

جواد : لالا هذا هو طنز ياكما هاد السيد خويا وانا مافخباريش😡...العربي حدر راسو تقرس والحاج شاف فجهة لوخرا...

- وهيا هادي كولشي كيدافع عليه بحال انا لي خاطفو اش هاد تمركيل الوليد انت عارفني مزيان مكنسمحش فحقي فلي اداني وهاد خونا انغزو بسناني اكنسمع سيرتو كنفور..

الحاج(بصرامة) :

- اتعطيه تيساع وياااك تحط عليه يديك ولا تعرض ليه تمشي توقع ليه شيحاجة انا ساخط عليك...

جواد تصدم فباه مابقى فاهم والو كيدورها فدماغو مالقا حتى تفسير من غير واحد ضحك بستهزاء دوز يديه فشعرو وشاف فباه :

- دابا فهمت لبلان مزياان خلاتنا حتى مشينا وجات كتبكي عليك نزلات عليك دموع تماسيخ باش نسمحو لولدها ومايدوزش حياتو فالحباسات

العربي(بصرامة) :

- جوااااااد...شاف فالعربي كلها كيترعد تعصب ديال بصح..

- بلاتي أعمي راه خاصنا نهضرو نيت ونحطو نقط على الحروف حيت هادشي بيزاغ والله الواليد انا ماشي شغلي الى كنت كتعرف ديك سيدة ولا كتعرفك شغلكم هداك باش تجي تبلحس عليك ودير فيها مظلومة مكايهمنيش...

الحاج(خرج عينيه فولدو) :

- جواااد حدك تما عرف علامن كتدوي

جواد : علامن بسلامة الأميرة ديانا بنادم فهاد الوقت غير صاحب حاجتو البارح خرجات فيك طول وعرض وهيا سبابك حتى وصلتي لهنا ودابا كتكوليا حدك تما اهاه الواليد اتبارك الله عليك شوف نكوليك داك لبكا ديال الافلام مكايكلش معايا بغات تبكي وتبلحس تمشي لتيساع او ولدها غير حتى يفيق وحسابو معايا هو الأخر..

الحاج(بصرامة) :

- قسما بالله وتقيسو مانت ولدي مانا باك

جواد(عينيه ولاو حمرين كيغزز فسنانو) :

- كلات ليك عقلك لحسات ليك مخك وحريمية مع راسها مطورة

الحاج : جواااااااااد حدك تمك زدتي فيه وسكت ليك بزاااف ديك لي كتهضر عليها وخارج فيها طول وعرض راها مك مك لي هزاتك 9شهور فكرشها فهمتيها ولا مافهمتيهاش ودخلها لراسك...

- كتحس براسك بحال الى كتحلم بحال الى كيضحكو عليك بحال الى دايرينك فواحد البيت مظلم كتقلب وتحاول تقلب على شي بلاصة يبان ليك فيها الشعا ومكتلقاهاش غير ظلام كتحس براسك مخنوق الاكسجين مواصلش ليك نهائيا من غير دنيا كدور بيك وتقدر طيح فأي لحظة...هكاك جواد كيحس فهاد اللحظة طلعات معاه واحد سخونية رجعات برودة ولا كلو عرقان قلبو كيضرب فمو نشف مابقاش قاد يتنفس...

- كضحك عليا(كيشوف فباه عينيه مكايرمشوش مفيكسين على وجه باه كيقلب فعينيه واش كيكدب ولا كيهضر بصح) بغيتي تكول زعمة فمقام مي ياك...ماريا مصدومة عينيها على جواد وعلى الحاج كدور كلام سومية فدماغها هيا سومية عندها الصح ولكن كيفاش كيفاش هادشي راه تخربيق...

الحاج : مكنضحكش عليك ومكنتفلاش رشيدة مك وداك لي ناعس تما خوك وهاديك ختك...

جواد ماشعرش براسو بدا كيغوت وكشاكشو خارجين :

الواليد واش كضحك عليا واش كتفلا كتخربق عليا واش باغي تجهلني باغي تحمقني كيفاش مك كيفاش مك البهلان وخرجان لعقل هدا صباح الخير مك هاديك وديك لي دفنا شكون جدا هاديك...

ماريا(بغات تشد ليه فيديه) :

جواد..(حيد ليها يديها دفعها) :

- أشمن جواد ولا زفت كيدرتي بيها وانت كيدرتي ليها واش جاي عندي من ورا 34 عام كتكوليا مك اشمن مس اشمن مي مي دفنتها وعضامها رشاو كتكوليا مك واش كنبان ليك مومو كنرضع صبعي ولا

العربي(وقف) :

- ولدي غير بالعقل ناس كيهضرو بالعقل

جواد(ولا وجهو حمر وعينيه كيبريو وحمرين العروق دعنقو ايطرطقو بالأعصاب) :

- أشمن عقل ولا حريرة خلا فيها شي عقل كالس عليا مك مات مك وهداك خوك الحاج فاش عينك جيني نيشان..

الحاج(راسو سخن عليه) :

- حتى لدار ونهضرو اولدي ماشي هنا...دخل امين على وجهو علامات إستفهام..

- غواتكم كايتسمع من دروج ياك لاباس أش واقع...؟

جواد(عطاهم بظهر وتم خارج شدو أمين من دراعو) :

- حيد عليا الله يرحم جدك(دفعو وخرج)..بغات تبعو ماريا وقفها عمها :

- غير خليه خليه يبقى بوحدو

أمين (كيشوف فيهم كاملين) :

- أمالكم حاميين زازة ياك لاباس

العربي : حتى لدار اولدي امضرا ايمتى اتخرجوه؟

أمين : جاي على داكشي انخرجوه دابا

العربي : صافي سير قاد الاجراءات انوجدوه انا وماريا ونخلطو عليك...سيري ابنتي عيطي على لفرملية تحيد ليه هاد السيروم...

ماريا(مزال مصدومة) :

- واخا أعمي...خرجات هيا وأمين دقة وحدة

امين : مال جواد عاوتاني ؟

ماريا : أخاليها على الله وصافي حتى لدار ونهضرو سير دابا...شاف أمين حتى عيا ومشا يسالي الاجراءات ديال خروج باه...ماريا مشات جابت الفرملية...فاش كانت راجعة شافت رشيدة واقفة...كتشوف فيها...وقفات كتردد تمشي عندها لالا تجرأت ومشات عندها...

ماريا(حشمانة منها واخا ولدها فيه لافوت) :

- سلام خالتي كيبقى ذياب؟

رشيدة : الحمد لله ابنتي راه خرجوه هاهو فبيتو مزال مفاقش بنتي واخا نسولك الله يعطيك الستر يريهاش مني قلت الصواب

ماريا : لالا سولي

رشيدة : سمعت شي صداع وشفت داك دري خارج مكايشوفش قدامو ياك لاباس؟

ماريا(شافت ليها فعينيها) :

- عرف بلي انت ماماه...مع كالتها ليها رشيدة شهقات وشدات على فمها غير الكرسي لي كلاها وكلسات دارت بيها دنيا...بدات كتبكي وتضرب فخضها :

- علاش كالها ليه انا عارفاه مغايتقبلهاش مغايتقبلش بلي خوه هو هذا لي كان اقتلو ويقتل خطيبتو أش داه اش غادي ندير لمكتوبي صكع دابا...لسات حداها ماريا :

- خالتي انا مافراسي والو وماعارفة والو ولدابا مزال مامتيقاش هادشي ولكن جواد راه واخا قاصح من برا داخل ديالو حنين راه صعيب عليه بزاااف سوليني انا..

حتى انا دازت عليا بحال هادشي عطيه غير لوقت...سمحيليا خاصني نمشي انخرجو عمي...

رشيدة : واخا أبنتي سيري(كتمسح فدموعها)...رجعات ماريا لشوبر لقات الفرملية حيدات لحاج سيروم وخرجات..

العربي : مكانش عليك تكولها ليه كان عليك حتى تكلسو وتفاهمو..

الحاج : ماحسيتش راك سمعتي المعيور لي كايعاير فيها نخليه يعاير مو ونبقى ساكت الى هو عصبي حتى حنا راه معصبين اغير لي انا فيه كافيني...

العربي : الله يهديكم بجوج...ماريا غير ساكتة وكتسنط ماهضراتش...لبسو لحاج حوايجو...جا أمين شدو ليه فيديه وخرجوه...تلاقات عينيه مع رشيدة حركات ليه راسها وحتى هو هكاك وخرجو...سبقهم امين فتح لباه لباب ديال طوموبيل ركبات حداه ماريا والعربي ركب لقدام...ديمارا أمين وشد الطريق..

****

‏"تمُر بك ظروف تتمنى لو أنَّ لك : 

‏جناحًا تطير به منْ شدة يأسك و قلة حيلتك ، و لكنّ الله يرسل لك شيئًا ليُخبرك إن ماحدث كان خيرًا .. وأن الله لايُكلف نفسًا إلا وِسعها🌿.."

واقف مسند على طوموبيلتو كتبان ليه لمدينة كلها من التحت باغي يغوت باغي يخرج داكشي لي كيحس بيه فالداخل ديالو 34 سنة وهو عايش فكدبة 34 سنة وهو كيكول لوحدة مافقلبها لا رحمة لا شفقة مي شحال من مرا كيتعماو ليه عينيه وكيبغي يدور فيها ولكن واخا تكون قصوحية رايو حتى تعيا ويقصاح قلبو حتى يعيا كيكول مي هاديك كيما بغات تكون مي مخاصش نغوت عليها ولا نهرها ولا نكوليها شي كلمة لي تجرحها زرعات فيه الغل الحقد ويلطة كان كيشوف رايو هو كولشي كونماشي ماريا لي لاقاتو بيها الظروف علماتو بزااف ديال الحوايج وخرجات فيه بزااف ديال الحوايج كانو مخبيين فيه حتى لدابا أ هادي ماشي مك جواد كانو غير ضاحكين عليك معيشينك فكدبة كدهاش كداش حتى ادابا...ضحك كيحس براسو كيحلم بين ليلة ونهار الخوت لي كان كيكول من مو وباه صدقو غير من باه وتزادوه جوج فوق لحساب واحد فيهم خطف خطيبتو وروحو وخطفو هو وكان باغي يقتلو مايتقبلهاش لعقل عدوه شي واحد يستغفلو ويضحك عليه لكدوب اخيب حاجة هوما لكدوب...غمض عينيه الغضب والاعصاب غاديين وكيطلعو فداتو وكيحس بيهم أينفاجرو طريقة وحدة لي اتخليه يرتاح وتخليه يتفش...غوووووووت بأعلى صوتو وعلى حر جهدو غوتة لي خلات الطير ينقز من على شجرة ويعلي فسما غوتة لي خلات الورقة طيح من شجرة غوتة خلات الغيوم تجمع وتولي حجرة غوتة خلات السما تبكي دموع بحال الثلج مجمدة...واخا تكون كدك كد الصخر وقلبك قاسح بحال جبل الانسان لداخل ديالو ضعيف فكل إنسان لداخل ديالو طفل صغير انت وانت وانت وانا كلنا إنسان من لحم ودم وحاجة بحال هادي تأتر علينا وتخلي إنسان قد النخل يطيح لداخل ديالو يضعف...تنهد تنهيدة طويلة كيحس براسو بدا يرتاح شوية بشوية...شاف فساعتو كتبان ليه 4 ديال لعشية ماحسش شحال وهو كالس هنا...هز سوارت من جيبو فتح طوموبيل طلع ملامح وجهو باردة مامعروفش فاش كيفكر بحال شي جسد بلا روح...ديمارا طوموبيل وشد طريق لقصر...

***

#القصر ...

كولشي مجموع فصالون من بعدما وصل الحاج طمنو على صحتو جمعهم كاملين خوه ومراتو وبنتهم ماريا العربي او وردة او ولادو بجوج حتى من وييم وثورية واروى كانو حاضرين عيط حتى على جلال لي جا كيجري تخلع عند بالو شي حاجة واقعة...شي كيشوف فشي كيتسناو الحاج شنو غادي يكول..

أمين : الوليد شوشتينا ياك لاباس؟

الحاج(شاف فيه) :

- بلاتي يجي خوك شوية ديال صبر...ماريا كل شوية تشوف فساعتها تشوشات على جواد بلا قياس...تسمح حس طوموبيل وهيا توقف مشات كتجري لباب فتحاتو...كيبان ليها نزل من طوموبيل عاقد غوباشتو وجاي...مشات لعندو تلاحت عنقاتو..حتى هو بدورو عنقها بجهد مزير عليها باسها فراسها شد وجها بين إيديه كيشوف فيها :

- ماريا تشوشت عليك فين كنتي(كتهضر وهيا مخلوعة)

جواد(تنهد تنهيدة طويلة كيشوف ليها نيشان فعينيها عينيه كلهم حب كايبان فيهم كداش هو كيبغيها) :

- أنت احسن حاجة وقعات ليا فحياتي

ماريا : حتى أنت أحبيبي كولشي غادي يتحل اغير صبر انا معاك عمري فحياتي مغادي نخليك اجي ندخلو كولشي كايتسناك

جواد(دغية رجع وجهو جامد) :

- علاش؟

ماريا : عفااك اجواد على وجهي الى كتبغيني عمي باغي يهضر معاك معاكم كامليندخل راه كولشي مجموع

جواد : مافيا لي يهضر

ماريا(كتشوف فيه وطلب فيه بعينيها) :

- عفااك ماتقصحش راسك تسنط ليه ودير لي بغيتي...دور رايو لجهة لوخرا كيفكر...جرها من إيديها ودخلو لدار...وقف عليهم لا سلام لا كلام...

جواد(بصرامة) :

- ياك لاباس؟

الحاج : كلس اولدي بغيت نهضر معاك

جواد : هضر معاهم هوما اما انا براكة عليا غير داكشي لي سمعت

ماريا(نغزاتو)..دور وجهو لجهة لوخرا ومشا كلس فكرسي مقابل مع عمو فرق رجليه كيلعب بيهم ويشوف فسقف مابغاش يشوف فباه داير فيها مامسوقش..

عصام : هضر اخويا ياكما كاين باس؟..الحاج سكت هز كاس ديالو ديال لما شرب منو وحطو حداه...شاف فيهم كولشي فيه والفضول يعرف اش واقع.. :

- ولدي جواد ولدتو من مرا خرا ماشي من سعدية الله يرحمها..

أمين وقف مخرج عينيه مامتيقش شنو كايسمع :

- الواليد واش كتفلى هادشي راه مافيهش لمزاح

الحاج(هز عينيه فولدو) :

- فين عمري تمازحت معاكم كنبان ليك قد لمزاح أنا؟

أمين(مزال مامستوعبش) :

- وراه ضحك هذا طنز هذا لا والله حتى طنز..نقز العربي :

- ولدي غير كلس بعدا وخلي باك يكمل هضرتو..ضار عندو امين عينيه خارجين :

- اعمي اش غادي يفهمنا هادشي راه مايتقبلوش لعقل..

عصام : خويا واش هادشي لي كتكول بصح والى كان بصح معامن ولدتيه الماكانش مع السعدية الله يرحمها؟

الحاج : مع رشيدة السيدة لي شفتو لبارح فسبيطار..

عصام : واش أم ذياب السيد لي خطف ماريا وجواد؟

الحاج : اه هيا...أمين هنا صافي ماقدرش يتحكم بأعصابو :

- لا واش من نيتك من نيتك الواليد واش كضحك علينا ولاش مخلينا هاد المدة كاملة وساكت جايبنا حتى لدابا حكا ولواد جواد ولدي من مرا خرا شتي انا قسما بالله نزيد دقيقة وحدة انحماق لالا راه حماقيت نيت..

الحاج(بحزم) :

- أميييين كلس لرض خليني نكمل هضرتي ودير لي عجبك...شدات وردة فيد أمين كلساتو ولا كلو كيترعد الصدمة باينة على وجوه كولشي مماستوعبينش شنو كيكول الحاج...اما لي معني بالأمر مكيشوفش فيهم كيلعب برجليه ويشوف فسقف كل شوية ماريا كدور تشوف فيه كيبان ليها بحال الى مامعاهمش وبحال الى كاع مهامو هادشي لي كيوقع...

الحاج(شاف فجواد وبدا كيعاود ليهم ولكن لي هامو كثر هو ولدو يعرف شنو وقع ويعرف بلي لغلط ماشي ديالو ولا ديال مو) :

- هادشي وقع فاش كانت عندي 31 سنة الواليد الله يرحمو داك لعام بدل العساس وجاب موحا كان خدام مع الواليد فالفيرما كيتسخر ليه عجباتو الخدمة ديالو ودارو عساس...انا داك ساع أسست الخدمة ديالي وكانجي ونمشي...تعرفت بصدفة على رشيدة...أنتوما شباب وكاملين بغيتو وعارفين القلب ومايريد شفتها بغيتها بغيتها كار من راسي ضريفة وضحوكية عفوية لأقصى درجة تكوليك الكلمة وماتخاف من حتى حاجة(شاف فماريا) عقلتي نهار كلت ليك عزيتي عليا حيت فكرتيني فراسي كنت كنقصد رشيدة حيت كانت بحال راسي نهار جيتي لهنا سبحان الله نفس تصرفاتها...(تبسمات ليه ماريا وتفهماتو الحب مكايشاورش الى دخل لقلبك واخا طير وتنزل مايقدرش يخرج بحال شي مرض معدي)..

- هيا كانت عارفة ومتأكدة بلي الواليد نغاديش يتقبلها واخا يوقع لي يوقع وانا مكانش هامني عندي خدمتي انشري داري ونأتتها ونتزوج بيها ونعيشو هانيين بغا لي بغا ويكره لي يكره هادشي لي كنت مخطط ليه...صارحت الواليد وطلبت منو يخطبها ليا هنا الحاج ولا بحال شي ثور هايج شكون هوما وشكون حنا عائلة الابراهيمي تدي عروسة بنت عساس لولدهم والله لا كانت ماخلا مكاليا عليها باش يعمر ليا راسي بلي مامزياناش وخايبة ولكن بحال الى كايخوي الما فرملة...الحب لي كان بيناتنا كبير وقع لي وقع وحملات فرحت ماقداتني فرحة...قررنا نتزوجو...ولكن دوار صغير الناس ساقو لخبار...باها فتلها عصا واحد طماع كيهمو غير لفلوس صافي هيا هاديك مشيت لدارهم هضرت مع باها ومها بلي بغيتها وغادي نتزوج بيها درنا تولد باش تكون دار واجدات كنت ناوي ندير ليها احسن عرس لي يسد الفام كاملين...وليت كنمشي ونجي مابين البلاد والمدينة خديت الدار وبديت كنصلح فيها على دوقي انا وياها اي حاجة كنتشاور معاها فيها...من لفراش الكاس لاخر كنشاورها عليه...هيا هاديك داك الشهر كان شهرها...كانت عندي واحد الخدمة على برا سافرت قديت غراض ديالي...ماخليت ماجبت معايا على قبل ولدي ولا بنتي ومع ماكنتش عارف واش بنت او ولد كاع لحوايج جبتهم فصفر(تفكر هادشي وضحك)حتى من رضاضع ولحليب وليكوش كولشي كولشي جبتو الحوايج ليها ولي فكرشها جاي ديك ليلة فرحان مقاداني فرحة دار وجدات كولشي هو هداك...يلاه دخلت بنص ساعة كنهضر مع الواليد حتى كيدخل موحا بات رشيدو هاز طربية فيديه ملوية فيزار بيض...كاليا هاك ولدك مابقا كيجمعنا حتى حاجة ماتيقتش عقلي ماستوعبش...كاليا بالحرف بلي رشيدة مقاداش تحمل مسؤولية هاد الطربية ومقادا على زواج وبلي مشات لينة باش تحقق داتها وتولي تغني رشيدة فاش كنا كاكنكونو مجموعين كتغني صوتها زوين كانت كتكوليا كونما تلاقيت معاك انولي فنانة مشهورة فالغنا...دارت بيا دنيا حسيت بالغدر وبطعنة من أقرب الناس ليا...كاع داكشي لي كنت كانحلم بيه باااح طااار الانسانة لي كنبغي رت عليها شحال من حاجة طعني فظهري وتسمح فكبدتها...واخا هكاك كلت نتأكد براسي بغيت نسمعها منها من فمها...كاليا بلي مشات واتكون دابا شادة طريق كيفاش وحدة عاد ولدات شادة طريق كاليا بلي الولادة جاتها ساهلة ومشات...خرج ومن تما مابقيت شفتو بغيت نتبعو ولكن كلام الواليد وقفني انا ساخط عليك الى مشيتي وماخلى مكال عليها ماقديتش نسمع هزيت ولدي وطلعت لبيتي اول واحد ايبدل ليه ويلبس ليه هو أنا واخا ماعندي تجربة مع لولاد ولكن حلفت يكون فيا الأب والأم...ديك ليلة مانعستش مادخلاتش ليا راسي...أدن لفجر غير بدا الصباح يبان لبست حوايجي ومشيت لدارهم دقيت..

دقيت ماخرج ليا حتى واحد خرجات جارتهم كالت ليا بلي جات شي بيكوب لبارح دات موحا وبنتو لمدينة...وبلي مها مشات عند شي خالتها تما فدوار...هنا تأكدت من هضرت موحا فشلت صعيب تكون كتحلم شوية تلقى كولشي طار من يديك نكوليكم بكيت اه بكيت ماشي عيب الراجل يبكي الإنسانة لي بغيت غدراتني وخلاتني وخلات ولدها من لحمها ودمها ومشات...أنا لي سميت ولدي وانا لي كنت نبدل ليه ونعس حداه الى مرض كولشي كنت كنديرو انا هنا الواليد بغا يزوجني تزوجت درت بكلامو منين شفت بلي الحب ماعطاني والو وليت بحال شي واحد خدام بالحجر يسيروه كيفما بغاو تزوجت مرا مكانبغيهاش ومكنحس من جيهتها بوالو بغاها الواليد حيت كتشبه ليه واخا مخاصنيش نكول هاد الهضرة هوما فدار الحق وأنا فدار الباطل ولكن كانت كتشبه ليه نفس تصرفاتو وتفكير ديالو...(ماريا تأترات بكلامو هو كيعاود ودموعها هابطين دورات راسها جيهت جواد كيبان ليها الملامح ديالو تبدلو مغوبش وجهو زراك)..

ماريا(كتمسح فدموعها) :

- عمرك تلاقيتي بيها من ورا داكشي؟ وعلاش أعمي فاش شافتك كاتليك ولدي مات وماشفتوش؟

الحاج(هز عينيه فيها) :

- من ورا داكشي لي وقع أول مرة انشوفها هيا لبارح حتى انا تصدمت فاش كالت ليا هكاك فاش كلت لجواد يعيط ليا عليها نهضرو لقيت بلي انا كالو ليا حاجة وعيا كالو ليها حاجة...رشيدة من ورا ما ولدات جاتها لولادة صعيبة بزاااف ديك ساع الواليد خدمها بالمعقول تافق هو وموحا باش يجيب ليه الولد ويعطيه شحال ما بغا ديال لفلوس...وداكشي ليوقع ولدات رشيدة تافق مع القابلة عطاتو الطربية دارها فيزار وجابها ليا على اساس رشيدة لي سمحات فيه ورجع لدار...رشيدة كانت مغيبة مافاقتش خافت عليها مها طلباتو يديوها لمدينة جاب بيكوب سيفط مها لعند ختها مابغاهاش تجي معاهم واخا عيات ماطلب او والو ودا بنتو لمدينة لسبيطار فاش فافت كدب عليها كاليها بلي ولدها مات ودفنوه...(جواد ناض بعصبية وقف عطاهم بظهر كلو كيترعد كارز على يديه مامستوعبش هادشي لي كايكول فيه باه)...ماريا شدات على فمها من صدمة كيفاش كاينة ناس بهاد الشكل واش بنادم مابقاتش فقلبو لا رحمة لا شفقة...

الحاج : منين برات خلاها تما كرا ليها بيت وسمح فيها ومنع عليها توريه وجها داير لعدر بناس ديال لبلاد وبلي كحلات ليه عينيه وكدب عليها بلي انا مابقيتش بغيتها وبلي غادي نبقى على برا مكالش ليها راه جيت لا كاليها بلي مابقيتش راجع وانتزوج فاوروبا وتما انبقى ومايشرفنيش ناخود بنت العساس...تسدو لبيبان فوجها وبقات بوحدها جاب الله تعرفات على هاد السيد كان بخيرو بكلشي ليه بغاها واخا وقع ليها لي وقع وعاودات ليه بغاها...تزوج بيها ولدات معاه بنت او ولد...عند بالها بلي ولدها لول مات وتدفن هادشي لي كاين..

عصام(بقا غير كيشوف ومصدوم) :

- الواليد كان صعيب بزاااف ولكن ماكنتش متوقع توصل بيه لهاد الدرجة والواليدة مكان فراسها والو؟

الحاج : لا مكان فخبارها والو راك عارفها حنينة كون ساقت لخبار اتجي تكولها ليا داكشي باش هو تعمد مايسيقش ليها لخبار ويخليها حتى هيا بحالي فدار غفلون...أمين بقا ساهي ماعرف شنو غادي يكول من بعد هضرت الحاج حتى واحد ماهضر فهاد المواقف الواحد مكايعرف مايكول..

ماريا(شدات لحاج فيديه باستها ليه نازلين دموعها بحال الشتا تكول اميت ميت ليها بقا فيها الحاج وبقات فيها مامات جواد ولي بقا فيها كثر هو جواد هو الضحية فهادشي كولو) :

- عمي لا انت لا هيا ماعندكم حتى شي ذنب هاد لمرة لكبار لي داروها هوما لي غلطو الواليد ديالك الله يرحمو كان كاتهمو السلطة ولجاه ولمال وبات رشيدة فلايسي طماع باع بنتو على قبل لفلوس اللحم الى خناز كيهزوه ماليه وهو ماهزش بنتو لاحها وباعها وماتلفتش وراه ولا كال بنتي ايكلوها دياب خلاها منك الموت لمولاك..

الحاج(تنهد وحط يديها على يد ماريا) :

- الخير فيما ختاره الله أبنتي مكتاب الله كيتصرف شتي كون كنا مكتابين لبعضياتنا واخا وقع داكشي كنا غادي نتلاقاو ولكن هيا خدات راجل خور وانا خدبت مرا خرا هيا ولدات وانا ولدت وهادي هيا الدنيا حتى واحد مصابها كيف بغاها سيوا الله تبارك وتعالى...

أمين(ساهي) :

- دابا جواد خويا غير من الواليد..؟ 🙁...جاوبو العربي :

- أولدي خوك راه خوك خوكم كاملين وحتى انتوما خوتو ماتبدلات حتى حاجة العيب والعار كونماكانش خوكم نكولو واخا من حقكم تقلقو لكن راه خوكم واش انتوما حمقين انتوما لي عندو وهو لي عندكم ماغادي تبدل حتى حاجة مالو ايهز حوايجو ويرحل ولا ايمشي عند شي عائلة وحدة خرا انتوما هوما عائلتو لي تبدل هو مو اما راه خوكم هداك مغادي يكلعو ليكم حتى واحد...يوسف لي ماهضرش بلاما يشعر ناض بزربة تلاح على جواد عنقو من لور...كيبكي ويتنخصص...الاخوة حاجة كبيرة كنز كبييير بزاااف الخاوة حدها دنيا مكتباع مكتشرا...جواد لاول مرة بلا مايحس نزلو دموع من عينيه سخونين...ضار وعنق خوه..

يوسف(خاشي وجهو فكتف خوه وكيبكي) :

- كنبغيك اخويا كنبغيك بزاااف...

يتبع...