متكي طاير على عينيه النوم وفجنبو الهاتف كيصوني وحاطو على الوضع الهزاز ليل كامل بقا كيشوف فيه وهو حاسم امرو هزو بين يديه وقال بتردد
انس:الو
براءة:(بلهفة وصوت مخنوق بالبكا قالت)انس حبيبي مالك مكتجاوبنيش واش مقلق مني درت ليك شي حاجة (الصمت من طرفو وهو كيحس بقلبو كبتقطع وكيأنب فنفسو بكلام باها باش ما يضعفش)عفاك احبيبي جوبني واش مقلق مني
انس:(باقتضاب وجمود حاول يبينو ليها)لا مدرتي ليا والو..ولكن باك دار بزاف
براءة:(بحزن قاطعات كلامو كتشهق بالبكا)انس عارفا بابا غيكون قالك شي حاجة ماشي هي هديك فاش رجع بقا كيغوت علينا ومنع ماما تهضر مع ماماك معرفتش مالو كيدير هكا ولكن انا مغن
انس:(حس بالعافية شاعلة فيه وقال بغضب بصوت مسموع)علاش مال الواليدة ديالي شنو دارت ليه هم شنو حاسب هاد باك راسو فملك الله شنو عند بالو هم حنا عبيد منسواوش...(صدرو كيطلع وينزل ومقادرش يتحكم فراسو هداك الغضب كامل لي هازو وخازنو وكان كياكل فيه فجرو فيها هي وقال)لي بيني وبينك سالا ا بنت عبد الرحيم وباك بيني وبينو ليام....
قطع عليها مخليها مصدومة الفون مزال حاطاه فودنيها وعينيها خارجين حتى بدات كتستوعب كلامو بدون ما تحس غوتات كتبكي ودوزات ليه لابيل مرة وجوج وتلاتة....الخ بدون مجيب فحين هو خبط الفون مع ناموسية عينيه حمرين وقف مشا لساك كيتريني فيه بقا كيضرب فيه ويعاود حتى تجرحو يديه وداز دمهم ومع دلك موقفش عينيه حمرين وقلبو كيغلي مراضيش براسو ومراضيش بالحالة لي وصل ليها من ديك الليلة عفط على قلبو وحسم امرو طفا الفون ديالو وشغل راسو بالخدمة كيدخل يسد عليه ويبقا خدام وهكا توالت ايامو هو كيتعدب بطريقتو وهي كتعدب بطريقتها وكدوق عذاب القلب والروح بالرغم من انه طفا الفون الا انها مكانتش كتوقف من الرسائل والاتصالات حتى فقدات الامل وكنفت بالريائل كتحكي ليه دكشي لي كتحس بيه كلو ومن شنو كدوز.......
Back_to_the_present
بعد تردد شعل جوالو وبمجرد ما شعل بداو كيوصلو الرسائل ديال العلبة الصوتية وتسجيلاتها فاش كتشدها البواط فوكال طلق الكونيكسيون وبداو كيوصلوه مساجاتها فالواتس يلاه دخل لواتس شاف طوف لي ديرا فالبوفيل ولي كانت سوداء ومكتوب فيها بالابيض والاحمر وجنبها قلب مكسور " I am broken💔" قلبو ضرو وحس بالنفس تحبسات فيه بسرعة دخل لكونفيرساسيون "conversation" بغا يقرا دكشي لي مخليا ليه وهو يصوني الجوال فايدو بدون ما يشوف شكون جاوب بلهفة وضعف وقال
انس:براءة
شريفة:(تنهدات وحسات من صوتو بلي حتى هو لا يقل على بنتها وبلي شي حاجة كبيرة واقعة بيناتهم وقالت)انا شريفة اولدي ام براءة
انس:(حط ايدو على عينيه وقال بعياء وتعب شدييد)سمحيليا كيحساب ليا براءة
شريفة:(بتردد)نقدر نتلاقاك فشي بلاصة نهضرو فيها
.......انس:(بتوتر)خير ا خالتي واقعة شي حاجة لبراءة
شريفة:(ابتسمت وهي كتستشعر القلق فنبرتو وقالت)نشوفك ونهضرو
قبل طلبها وحددو مكان اللقاء واي كان بعيد على الحومة والناس لي كيعرفوهم... هي كانت في الموعد اما هو كان كيتسنا فيها على نار كيمشي ويجي ما رتاح حتى شافها قرب ليها بلهفة مقادرش يخبيها سلم عليها وبسرعة باشر فالسؤال على براءة وحالها لكن شريفة جوبات سؤالو بسؤال تاني
شريفة:شنو وقع بينك وبين وبنتي
انس:( قال حادر راسو)تفارقنا
شريفة(بعتاب امومي):علاش اولدي انا عطيتك طرف مني وامنتك عليها حيت عارفاك مغتضيعهاش ومغتبغيش شي حاجة تقلقها وفالاخير تخليها وراك تخليها كتموت غير بوحدها فبيتها
انس:(لون هرب ليه من وجهو والنفس تقطعات فيه قال بخوف)شنو وقع ليها
شريفة:(وهي كتشوف ردود افعالو وكتختابرو واش غيكون قد دكشي لي جاية على قبلو ولا لا)بنتي قهرتيها بنتي خليتيها كتبكي ليل ونهار هملات راسها وقرايتها وصحتها مبقاتش كتاكل ولا كتهضر معايا غير سادة على راسها وكتبكي كنخسر بنتي ا انس وهادشي كلو بسبابك نت بنتي كضيع ليا من ايدي وانا مقادرة ندير والو...علاش علقتيها فيك وسمحتي فيها علاش بنتي فحياتها وخليتيها وراك
انس:(قلبو كيخفق بسرعة شك انها قدرات تسمعو والخوف بان فوجهو بلهفة قال)خالتي الله يخليك ندير اي حاجة على قبلها غير ميوقع ليها والو مستعد نعطيها روحي غير تبقا بيخير
شريفة:(بجدية)بنتي غتزوج و..
انس:(بسرعة تقلب 180 درجة و تغيرو ملامحو لشراسة وقال بغضب كانه شخص اخر)فاش نموت زوجوها محدي عيش عمر شي واحد يديها ليا هديك مرتي... مرتي وبيني وبينها الله الله شاهد على زواجي منها(بتهديد صريح خلا شريفة تخاف وفنفس الوقت تفرح)كنقسم ليك بالله ونعرف بلي هادشي بصح غتشوفو انس عمركم شفتوه وهي معاها حساب اخر
شريفة:(كدور كلامو فراسها كلامو لي قالو بدون ما يحسب ليه حساب وقالت بصدمة بعدما ستوعباتو)كفاش مرتك ايمتا
انس:(قاطعها بوجهو الغاضب)مكيهمش ايمتا وكفاش ولكن قدام الله رها مرتي ومتحلل لحتى شي واحد من غيري
شريفة:(مقادراش تستوعب كلامو وقالت)تزوجتو بلا خبارنا
انس:(شاف وجها وحالتها لي ولات كترعد عطاها كاس د الما وقال)خالتي تهدني انا وهي زوجنا بعضياتنا غير شفويا وخا قانونيا مديزش وحتي شرعا ولكن ربي شاهد عليا من داك نهار وانا حاسبها مرتي وكنت صاينها حتى نشهرو بزواجنا
شريفة:(عاد رتاحت وقالت)ايمتا هادشي
انس:(حك على شعرو وقال)ليلة لي كنتو غتمشيو فيها لعرس
شريفة:(حركات راسها بالايجاب وقالت)ملي نت كتبغي بنتي وداير عليها هاد الحالة علاش سمحتي فيها بسهولة
انس:(زفر وقال بعدما حط ضهرو على الكرسي)مسمحتش فيها اه قطعت علاقتي معاها ولكن مسمحتش فيها وماشي لخاطري (شاف فيها)راجلك دلني للمرة التانية وهاد المرة كانت قدام الناس خديت اكبر ضربة وتحطيت فموقف عمرني تخايلتو حتى بيني وبين راسي.. فاش رجعتو من العرس بسيمانة عرفت بلي غنترسم قبل ما نكمل عمين(سنيتن) ديال الخدمة جيت فرحان ومقرر نهضر مع راجلك غير نقاد اموري نهز كريدي ندفع فشي ابارطمون كيف قال وهادشي لي كنت ناوي نقولو ليه ولكن راجلك معطانيش فرصة بل ستغل انه يدلني ويطيح بكرامتي لارض مخلا مقال حتى ولاو الناس كيتهامسو عليا صبرت كتمتها وسكت قلت من هنا لقدام يدير الله خير فاش جاوبت براءة قالت ليا بلي فاش رجع غوت عليكم وبلي منعك تهدري مع الواليدة ديالي كلشي تكب عليا وهداك الغضب كامل خويتو فبراءة وقطعت علاقتي معاها غير باش نرد شوية من كرامتي وماء وجهي..(شاف فيها بجدية لم تعهدها من قبل وقال بهيبة)انا راجل ومنسمحش لكرامتي طيح ولو يكون شكون ما بغا يكون ولكن على قبلها صبرت ولحت كلشي ورايا وعاودت للمرة التانية ولمرة تانية دليت على قبلها ومقدرتش نزيد مزال ن
شريفة:(قاطعاتو برصى وتفهم وقالت)تزوج بنتي
انس:(الصدمة الجمت لسانه وقال بدون ما يستوعب)كفاش
شريفة:(ببتسامة)تزوج براءة انا غنوقف معاكم
انس:(بتقة ويقين)غنتزوجها ولكن ماشي دبا فاش غيجي لوقت غنديها وباها هو لي غيجي عندي
شريفة:(حلات فمها من كلامو وقالت)وكفاش غدير ليها
انس:الوقت غيوريك كفاش
شريفة:(بتوتر)غتبقا مخلي بنتي هكاك
انس:(بحيرة)غنهضر معاها ولكن علاقتنا غتبقا واقفة فدك نهار مغتزيدش لقدام
شريفة:(شدات فايده)انس انا كنت جاية عندك باش نتافق انا وياك ونلقاو حل وسط انا مغنقدرش نشوف بنتي فهديك الحالة مزال
انس:(بعد لحظات من التفكير)وشنو الحل....قادر ندير اي حاجة تخليها مرتاحة ونشوفها فرحانة
شريفة:(بلعات ريقها وسكتات شوية وقالت)زواج الفاتحة
انس:(بدون اقتناع)واش باقي شي واحد كيتزوج بالفاتحة ا خالتي الله يهديك
شريفة:(شدات ليه فايديه وقالت بحماس واصرار)باقي وانا كنتيق فيك عارفاك غتصونها حتى تشهرو زواج وعارفاك غتكون قد كلمتك انا غنعطيها ليك بالشهود وبحضوري بصفتي الولي ديالها وبحضور امام مسجد غيكون زواج مقبول شرعا وحلالك اولدي قدام الله والعبد (سكتات للحظات وكملات كلامها بتوجس خايفاه يرفض)ولكن غتخليها فدار باها هادشي غيبقا غير بيني وبينك وبين الناس لي غيحضرو لزواجك كشهود حتى تقاد امورك وهديك الساعة دير لي يناسبك باش تجيبها لعندك
انس:(رافض الفكرة تماما)نتزوجها ونخليها فالدار عندكم ا خالتي واش فكرتي مزيان بان ليك غير هاد الحل
شريفة:(تنهدات وقالت)ياك نت كنتي مزوجها زواج شفوي وخا مديزش فالشرع ولكن حسبتيها مرتك وصبرتي عليها ولكن انك تزوجها زواج شرعي اولدي هكا نتا ضامن حقك عليها وهي ضامنة حقها عليك غتكون على ذمتك وبزوجكم غترتاحو..وغتهناو (زيرات على ايدو وقالت كأنها كتهضر مع ولدها)وفاش اولدي تحس براسك قادر تواجه عبد الرحيم انا فجنبك غنكون فكتافك انا ومرتك ولكن نوصيك وصية خدم وهز راسك ودير ديالك كون بدارك وكون برزقك ومتخلي لعبد الرحيم فين يهضر وهديك الساعة غيكون غير لي فبالك انا متأكدة اولدي
انس:(بعد تفكير عميييق فكلامها وحللها من جميع الجوانب قبل يديها وتبسم ليها وقال بمرح ولهفة)شبان ليك نمشيو عند الامام ليوم ونتمم زواجي منها
شريفة:(ضحكات على لهفتو)مكرهتش ولكن عندي خطة احسن من ديالك😈
انس:(حط ايدو على فمو كيضحك على شريفة وتفكر براءة فاش كتبدا تخطط وتبخ لشي مصيبة وقال)شنو هي
بدون ما تجاوبو دارت ليه اشارة بايدها بمعنى صبر وشوف هزات الفون دوزات لبراءة ابيل وفتحات السبيكر وقالت بصوت كانها متعبة
شريفة:الو بنتي
براءة:(وصوتها على حالو جوبات وخلات قلب انس يضخ الدم بقوة ونبضاتو يتزادو)الو ماما..مالكي
براءة:(ناضت بسرعة من فراشها خايفة على مها)وخا وخا انا جاية عندك دبا
ناضت جرات اول ما جا قدامها ولي كانت عباية سوداء وفولارها لاحتو على راسها هزات بزطامها وتيليفونها وخرجات كتجري شدات اول طاكسي وقف ليها عطاتو العنوان مسافة الطريق وكان تما خلصاتو ونزلات كتقلب بعينيها على مها وجها صفر وبين فيه الخوف هزات الفون ديالها دوزات لابيل بغات تحطو على ودنها وهي تسمع صوت حيا قلبها من جديد وخلا روحها توهج غمضات عينيها ونزلو دموعها بلا مدور عندو بقا واقف وهو متردد حتى سمع صوت شهقاتها قرب ليها بدون ما يهضر جرها لصدرو عنقها وكيقبل فروة رأسها وكل ما كيخرج من شفايفو هو اعتداراتو ليها
انس:(معنقها ومزير عليها كيلعن فراسو وفالحال لي وصلهم لهادشي )سمحيليا روحي سمحيليا...سمحيليا...سمحيليا....
براءة:(بقات كتشوف فيه وكتسبل فعينيها حتى شاف فيها وهوا مضارب مع شعرها وقالت بعدما ترسمات ابتسامة طفولية على وجها)توحشتك بزاااف
انس:(تفكو حجبانو لا اراديا وقال دافعها قدامو باش متشوفش ضحكتو)زيدي شوفي مك
براءة:(عضات على شفايفها وقالت)شنو وقع ليها
انس:والو دارت هكاك باش تجيبك هنا
براءة:(عقداتهم وقالت)لعبتوها عليا
انس:(شد فايديها ودوزها قدامو وقال)زيدي قدامي وسكتي مناسيش لك هاد الحالة لي جاية بيها
سكتات وضربات طم معاوداتهاش معاه ....
وصلو عند شريفة لي شافتهم بدات كضحك هدنات بنتها بعينيها وسلمات عليها وبراءة كدور عينيها بيناتهم بزوج وقالت
براءة:(كتشوف فيهم مصغرة عينيها بحال شي واحد حصل شي حاجة على شي شخص)باغين تقولو ليا شي حاجة
انس:(بسرعة)خالتي تقولك
شريفة:(ضحكات وقالت كتشوف فبنتها برضى)بنتي هضرت انا وانس بزاااف وعاود ليا شنو وقع ليه مع باك وشنو وقع بيناتكم ودكشي لي داز عليك داز عليه ويمكن داز عليه كتر منك والهضرة لي قلنا وتناقشنا فيها خرجنا بنتيجة وحل لي غيريحكم ويريحني حتى انا ونطمن عليكم
براءة:(حالة ودنيها وعقلها)وشنو هو هاد الحل
شريفة:غدا غتممو زواجكم قدامي وغيكون مقبول شرعا
براءة:(بصدمة)بابا وافق
شريفة:(حركات راسها بالنفي)غتزوجو زواج الفاتحة
براءة:(كدور عينيها بيناتهم وقالت)ما لقيتو غير هاد الحل!
شريفة:(شافت فيها وقالت)بان ليك شي حل اخر؟؟؟؟(هزات حاجب ونزلات لاخر وقالت)راني عارفا بزواجكم.
براءة:(بلعات ريقها وشافت فانس لي حرك راسو كيأكد كلامها وقالت)وبابا شنو غنديرو معاه !!! الى ساق لخبار هداك هو نهاري لخر غير ترحمو عليا
انس:(شد فايدها وقال بثبات ونبرة خشنة)محدي فالحياة كنتنفس معمر شي حاجة تمسك
شرحو ليها وفهموها وووافقات بدون تردد فالاخير اهم شيء هو غتكون مرتو وبموافقة امها..دوزو العشية جميع وبراءة كلات من يد انس لي مطلقها حتى بدات كتبكي وطلب فيه عاد خلاها على راحتها فاش قرب العشا شد ليهم طاكسي وخلصو وحتى هو شد طاكسي وصلو تقريبا للحي فنفس الوقت بيناتهم دقائق معدوة هما طلعو لدار وهو توجه نيشان لعند الامام برك معاه وحكا ليه شنو كين وشنو وقع ليه
الامام:(ربت على كتفو وقال)عارفك ولد الناس وبما ان مها غتكون حاضرة فمعندي حتى مشكيل نزوجكم جيب شي واحد صاحبك والشاهد التاني غتكون مرتي ونت اولدي جمع راسك وقاد امورك وشهر الزواج متخليهش مخبي معرفنا غدا شنو مكتب لينا الله
انس:(ببتسامة)انشاء الله ا الحاج ميكون غير الخير
بهكا خرج من المسجد وتاصل بصاحبو ورفيقو من ايام الدراسة وخبرو بشنو كين فالاول موافقوش الراي ولكن من بعد قتانع صلى ورجع لدارهم لقاها كطل من الشرجم وفولارها على راسها دارت ليه اشارة بايديها فرحانة بتاسم ليها وجبد الفون تاصل بيها دوزات لابييل وبقاو كيهضرو وطلب منها تحاول تخرج غدا وخا هي ومها يمشي ياخد ليها خاتم وخا زواج الفاتحة باغي يكبر بيها ويدير معاها الاصول وافقات على الفكرة ورحبات بيها..بقاو كيهضرو من هادي لهادي وفرحتهم عالم بيها غير لي خلقهم جاء الليل وبزوجهم نعسو على صوت بعضهم وهما كيتمناو يدوز غدا بخير وعلى خير .........
#صبح_صباح وطلع ضو نهار فاقو ابطالنا وبزوجهم ماليهم الحماس والفرحة دوش وبدل حويجو ونزل عند مو قبل راسها فطر معاها وضحك معاها كيف كان شحال هادي فرحات لفرحة ولدها دوزو الوقت مع بعضهم شوية حتى وصلات 10 د صباح وقال ليها تجي معاه لبيتو يهضرو ودكشي ليكان خبرها بقرارو وبموعد زواجو وخا تقلقات قدر يهدنها ويخليها تفرح مهما كان براءة كانت باغاها ليه من الاول وخا ماشي بهاد الطريقة الا ان سعادة ولدها اهم من اي حاجة تانية طلب منها توجد راسها باش تمشي لابارطومون كراها وتما فين غيدوز كلشي منها يتهنا بلي حتى واحد ميعرف ومنها يدوزو وقت زوين مع بعضهم ودكشي لي كان خرجات بعدما باركات ليه وهو هز الفون تاصل ببراءة لقاها فيقة صبح عليها وفرض عليها تفطر وكمل كلامو معاها
انس:براءة الوالدة ديالي حتى هي غتكون من الشهود
براءة:(ببتسامة)مرحبا بيها كان كيحساب ليا مبقاتش باغاني
انس:متقوليش هكاك راك مقطرة ليها من عينيها عندها عزيزة بزاف
انس:(ضحك هاد المرة بصوت مسموع وقال)روح انس شنو لي خلاص
براءة:(بخجل)منعرف شوف نت
انس:(قرر يرحمها ويبردها)متخافيش ا روحي غندوزو نهار مجموعين تما غتكون الوالدة ديالي توجد دكشي لي خاصو يوجد والى بغات ماماك تمشي معاها
براءة:(ببتسامة)وخا
طلب منها انس توجد راسها ويتلاقاها فالشارع لفوق باش يمشيو يقضيو غراضهم بزوج..دقائق معدودة وكانو شادين طاكسي بزوج لبلاصة لي ياخدو منها خواتم زواج ختارو لبعضهم شنو بغاو ومشا معاها خدا ليها دكشي لي غيخصها حتى وصلات 2 عاد سالات شدو طاكسي نيشان لابارطومون لي كراها خصيصا لهاد اليوم دقو فالباب وحلات ليهم حسنية بالزغاريد والصلاة على النبي وجات حتى شريفة كتزغرت وتصلي على نبي ستقبلوهم بالحليب والتمر والدار مطلوق فيها الطرب الاندلسي ورائحة البخور"العود" ضاربة فين وفين دخلو بزوج فرحانين ومقاداهمش الدنيا براءة تبعات ماماها باش توجد راسها وانس مشا لبيت اخر حتى هو يوجد راسو جا صاحبو وبقا جالس معاه حتى جا الامام والزوجة ديالو و معاهم شخصين اخرين تحت مباركاتهم تحطات صينية د اتاي مجموعين عليها رجال .....
حسنية:(داخلة بقفيطين بالراندة وفولارها على راسها جلسات معاهم)الامام عندو الحق العقبة لعندك اولدي ايوسف
يوسف:(كيضحك)انشاء الله ا خالتي
انس:(عينيه على الباب وقال بدون ما يبين)فين خالتي
زوجة الامام:(ضحكات وقالت عيقة بيه)صبر اوليدي على رزقك صبر
حسنية:(كضحك وقالت)مع براءة كتعاونها توجد راسها
انس:(عيط لمو قربات ليه وهضر فودنها وقال بجدية)دك زواق فوجها لا الواليدة قوليها ليها
حسنية:(بصوت خافت)وخا اولدي...ولكن شكون هدوك لي مع الامام
انس:العدولات....
حركات راسها وهي مستغربة من وجودهم وبدون ما تعلق خرجات مخلياهم كيهضرو ويتبادلو اطراف الحديث والامام مناسيش يقري انس ويوسف ويعطيهم بعض النصائح من السنة وديننا الحنيف....فحين حسنية دخلات لبيت لي فيه براءة وباعجاب وااضح قالت
حسنية:تبارك الله مشاء الله الله يحفضك من العين ابنيتي ويحفضك من شر الخلق ياربي
شريفة:(بعد ما كملات قراءة المعودتين)امييييين ياربي
حسنية:(كضحك)قالك انس(شافت فيها براءة بسرعة ونزلات راسها بخجل)مديريش المكياج حيديه
براءة:(بخجل وصوت خفيف)مديراهش ا خالتي
حسنية:يا بنيتي كتباني بحالا راك ديراه الله يحجبك
شريفة:طيح عليها سر العريسات😂
قلبوها ضحك وجموع فرحتهم بوليداتهم نساتهم كل ما فات وخلات قلبهم يصفا وترجع العلاقة بينهم كيفما كانت واشد من الاول حتى وجدات براءة وخرجات شريفة وحسنية عند الناس وعلموهم بلي العروسة جهزات وغيبداو مراسم الزواج...
تهزو صواني وتحط فبلاصتهم دهازها دكشي لي كانت كتوجد ليها مها من شحال هادي وتحطو الخواتم وطقم لي خدا ليها وكدلك دكشي لي تقداو ناض انس من تما ومشا لغرفتها دق ودخل كانت جالسة وكتفرك فايديها بتوتر
براءة:(كتشوف فالمراية)ماما خيفة بزاف
انس:(ببتسامة)شنو مخوف مرتي حلالي هم
براءة:(دارت عندو بسرعة وقالت)ويلي شنو كدير هنا خرج خرج خرج(مشات كدفع فيه باش يخرج وجها غيطرطق بقوة الخجل) غيحساب ليهم شي حاجة
انس:(شد ايديها كيضحك وقال)يا بنتي غير صبري جاي باش نهضر معاك ونعطيك شي حاجة كتخصك وغنخرج حتى يمشيو وديك الساعة ندخل هنا براحتي هه
براءة:(بركات على سرير فاشلة بالحشمة وشافت فيه ايديها كيترعدو وقالت)كنحس بشي حاجة فشكل
انس:(جرها عندو عنقها وقال)غير الفرحة هديك اروحي
براءة:(تخشات فيه وقالت)كنبغيك يا اغلى معندي
انس:حتى انا اروحي كنموت فيك...(بعدها عليه كيضحك شوية وهو يجمعها وقال)اش هادشي ديرا فوجهك
براءة:(باستغراب)شنو !!
انس:الوالدة مقالت ليك والو
براءة:(تفكرات توصياتو وقالت)مديرا والو والله هانت شوف (دوزات صبعها على شفايفها وخدودها)
انس:(زفر بضيق وقال)سبحان من صورك معرفت كفاش ندير حتى نخليك تخرجي برا
انس:(جبد اونفولوب وقال)اول حاجة ا بنت الناس هدا صداقك حقك لي عطاه ليك الله(حطو ليها فايدها ومخلاهاش تعتارض وكمل كلامو)من دبا ل 10 دقايق غتولي مرتي حلالي شرعا الى عندك شي شرط قوليه ليا والى كانت شي حاجة بغيتي تقوليها ليا قوليها
براءة:(ببتسامة ورضى حطات ايدها على خدو وقالت)واعدني معمرك تخليني وخا يوقع لي بغا يوقع..(جرات فولارها كتلعب بيه فايديها وقال)وعدني تعزني وتعطيني قيمتي قدام اي واحد توقف معايا ولو يكون الغلط مني تجي فصفي وفاش نكونو بزوج دير لي بغيتي المهم قدام الناس متبينيش غالطة
انس:(جر ايدها وقبل كف ايدها وقال ببتسامة صغيرة)كنواعدك عمرني نخليك وكنواعدك نكون سندك فالحياة وكون ونعم الزوج وكنواعدك نعطيك الحقوق ديالك كلها ونوفر ليك راحة العيش..نكون الاب والاخ والصديق والى قتضى الحال نزل ونرد عقلي قد عقلك نديرك بنتي قبل ما نحسبك مرتي
براءة:(كتشوف ليه فعينيه)يكفي اني نكون حداك وانا مرتك هادي هي دنيا ومافيها..(وحط ايدو على خدها وقال)هادشي متحتاجيش توصيني عليه راك بنتي قبل ما تكوني مرتي قيمتك فقيمتي ومنخليش شي واحد يطيح منك ولو بكلمة بسيطة ولا يرفع صبعو فوجهك كنواعدك
ابتسمت وهي على استحياء وقلبها كيضرب متل زخات الرعد المتكررة نبضة ورا نبضة وبسرعة قبل جبينها ووقف فاش تسمع دقان فباب البيت علمهم بلي غيخرجو دبا ودكشي لي كان قبل جبينها ويديها وهو فرحان وهي ماشي اقل منو خرجو بالزغاريد والصلاة على النبي لصالون ولي كانو فيه الحضور كاملين و الامام لي كان وفرحان كأنه غيزوج ولدو الكبير دخلو وقبلات ايدو باحترام لانها كتعرفو وعارفة علاقتو بانس رضا عليها وعلى انس وبداو فالمراسم بركات فجنب ماماها وقالت حسنية ببتسامة
حسنية:لالة شريفة ليوم طالبين راغبين فبنتك تكون مرت ولدي انس
شريفة:(ضحكات وقالت)على انا نلقا حسن من انس لبنتي..منزيدكم غير الله يكمل بالخير
تقرات الفاتحة وناضت شريفة جلسات بنتها حدا راجلها هزات صينية فيها الخواتم وقرباتها ليهم هز انس هو الاول خاتم زواجهم وشد فايديها لي كانت كترتاجف بتوتر ووجها غيطرطق بحمرة الخجل ببتسامة ركب ليها الخاتم وهو كيهضر معاها باش ترتاح ومتبقاش خيفة ومتوترة وهي نفس الشيء هزات الخاتم شدات فايدو وشافت فيه ببتسامة بريييئة كتعبر على نقاء روحها وصفائها وركبات ليه الخاتم وتعالت الزغاريد والمباركات ليهم بزوج والتمنيات بالخير مطولوش بزاف وعم الهدوء فالصالون ونطق....
عم الصمت في الغرفة جلسات براءة فاليمين وهي على حياء حادرة وجها وايديها كتفركهم مع بعض بتوتر وجنبها مها وانس جلس مقابل معاها فجنبو الام ديالو وصاحبو من الجهة التانية وهو متوسطهم اما زوجة الامام فهي في جانبه
الامام:(ببتسامة وهو كيشوف فيهم قال)هادو العدلين لي غيقومو بمراسم الزواج كيف طلب انس
انس:(شاف فشريفة لي كتشوف فيه باستفسار وقال)بغيت زواجي يكون موتق مبغيتش نتزوجها بالفاتحة احتياط لاي حاجة وقعات يكون عندنا العقد ديالنا
العادل:(موجه كلامو لبراءة:بنتي واش خديتي صداقك الذي قدره 10000 درهم
براءة:(هزات راسها فأنس بسرعة وقالت كتشوف فيه بلوم)اه خديتو
العادل:(عطاها كتاب التوتيق)مضي ليا ا بنتي هنا ...مضي اولدي هنا....نتي الالة مضي ليا هنا...وحتى نتي...الشهود مضيو ليا هنا (بعد الاهضاءات ابتسم وقال)بارك لالله لكما وعليكما باليمن والررضا وبالدرية الصالحة انشاء الله
الكل قال أمين..... ناضو لعيالات هزو دكشي داوه لبيت لي كانت فيه برائة وبداو كيحطو الغدا لضياف الرجال بوحدهم والنسا بوحدهم كيف طلب انس.......تغداو وتجمعو الطوابل وتحط الديسير وتجمعو الطوابل من تاني تخلصو العدلين ومشاو فحال سبيلهم فحين بقاو غير الاحباب والاصحاب بقاو مجمعين حتى قربات صلاة المغرب وخرج الامام باش يقوم بالواجب ديالو....هكدا دازت العشية بيناتهم حتى مشا يوسف وبقاو غير هما ناضو الامهات يجمعو دنيا ويقادو كلشي بالرغم من ان انس منعهم وقال بلي غيجيب مرا تقاد كلشي الا انهم اصرو او بغاو يخليوهم بزوج شويا خرجو وعم الصمت بيناتهم للحظات حتى كسرته براءة قالت
انس:(سكتها وجرها معاه لبيت لي كانت فيه كتبدل سد وراه لباب وجرها لاحضانو معنقها)شششش حقك وخديتيه وتستاهلي كتر
براءة:(بلوم)ولكن انا مباغاش دكشي كامل بغيت غير شي حاجة رمزية وصافي
انس:(شاف فيها وقال)عتابريه تعويض جزئي على العرس لي مدرتيهش وجهازك لي مخديتيش
براءة:ولكن ا انس الله يجعل لبراكة غير هادشي لي درتي على قبلي كافي وموفي..خاصك تجمع شوية الفلوس باش دفع فشي ابارطومون ولا شي حاجة (بغا يهضر وقالت)حقي المادي راك عاطيه ليا من شحال هادي مناقصني والو معاك ولهلا يخطيك عليا
انس:(تكا على سريرو وجرها معاه معنقها قبل فروة راسها وقال)الله يرضي عليك ورزقي هو رزقك اي حاجة عندي عندك فيها الحق..(شاف فيها ببتسامة وقال)كنت باغي نقولك بلي ترسمت وترقيت فخدمتي وليت مساعد المدير وحالتي لمادية تحسناات بزاف ومبقا عندي حتى عائق... انشاء الله قريب ندفع فأبارطومون ونستقرو بزوج
براءة:(نقزات من بين يديه وتقابلت معاه فرحانة وقالت)ترقيتي وترسمتييييي(قالتها بدهشة وفرحة وبصوت مسموع)
انس:(حرك راسو كيضحك على الهبيلة لي عطاه الله) اه
براءة:(تلاحت عليه معنقاه قالت بصوت مسموع)مبروووووووك مبروووك عليييييك
انس:(دور ايدو على ضهرها كيضحك وقال)علينا احبيبة هه
براءة:(بعدات على صدرو كتشوف فيه بعيون لامعة وقالت)الحمد لله ربي دار لينا تاويل د الخير..عرفتي باقا لدابا ممتيقاش هادشي ههه واش بصح انا وليت مرتك
انس:(وقف وقال بعدما حيد جلابة لي لابس وبقا غير بطوب وسروال بلعات براءة ريقها وهي منوية منو ولكن مهضراتش فحين هو شافها وابتاسم ضرب على راسها بشوية وقال)خويه ورتاحي ماشي وقت دكشي لي كيدور ف راسك
(سكتات وخدودها توردو حدرات راسها عاضة على شفايفها بخجل اما هو هز ليها وجها وقال بجدية )فضلت نديرو العقد باش نضمنك كتر وحتى باك الى فكر يدير شي حاجة نوقف فوجهو وعندي دليل لي يخول ليا نهدر بيه ونواجه اي واحد..ودرتو حيت الوقت والزمان هدا
براءة:(باستفسار)كفاش الوقت والزمان
انس:(حك مؤخرة راسو بخجل ولكن فالاخير شاف فيها مبتسم وقال)الزواج ا براءة ماشي هو نكونو فعلاقة شفوية كين فرق كبير يقدر يغرني الشيطان و نقيسك يقدر يوقع بيني وبينك اي حاجة حيت نتي مرتي حلالي ماشي وحدة غريبة عليا...من الاحسن نأمنك بالعقد تحسبا لاي طارئ وباش ضمني حقوقك كاملة ومنها ندخلك فلاميتييل (سكت وقال بعد لحظات قلال)..متفكري فوالو اهم حاجة دبا هي راك مزوجة وبالعقد ديالك ماشي مزوجة بالفاتحة ما معتارفش بيك القانون
براءة:(حطات ايدها على خدو وقالت كتشوف ليه فعينيه بخجل)انس(شاف فيها)كنواعدك نصونك ونكون ونعم الزوجة كنواعدك نكون ماماك وختك قبل ما نكون مرتك..كنواعدك نكون سندك وضهرك فالدنيا ولي درتيه نكون معاك فيه..(سكتات للحظات شفايفها كيرجفو)كنبغيك بزاف ا انس
براءة:(نزلو دموعها وهي مزيرا عليه)واعدني عمرك تخليني كيف درتي اخر مرة واعدني
انس:(كسح دموعها بلطف وقال)كنواعدك متفرق بيني وبينك غير الموت وغنعوضك على دكشي كامل لي وقع فهاد شهر لي داز..ودبا براكا من دموع وحيدي هاد الفولار رتاحي شوية انا غنخرج نشوف واش خاصاهم شي حاجة مغنمشيو من هنا حتى نتعشاو جميع عاد غنمشيو
حرك راسو ولبس عليه شوميز زرقا لي جا بيها بيضا قبل راسها وخرج مخليها على راحتها اما هي بمجرد ما خرج بدات كتشطح وتنفز وتغني بالفرحة عاود دخل انس لقاها فهداك الوضع حط ايدو على فمو كيضحك وقال
انس:خاصك شي حاجة نجيبها ليك معايا
براءة(حبسات شطيح فاش سمعات صوتو وعلى غفلة حتى كانت غطيح ولكن لحسن للحظ انس كان سباق لوا ايدو على خصرها وزيرها على صدرو وقال)ردي بالك
براءة:(بخجل مكرهاتش الارض تشق وتبلعها على هدوك شطيحات لي شطحاتهم قالت بصوت منخفض )وخا ..احم نقدر نوقف
براءة:(دارت عندو وجها ولا احمر وقالت بخجل)مزال راك هنا سير شوف خالتي اش بغاتك كتعيط عليك سير
انس:(ببتسامة) ها هو غادي
مشا مخليها على راحتها اما هي خدات نفس عميق ومشات لفاليز لي كانت محطوطة فيها حويجها لي متحطوش مع دهاز لي كانت موجدة ليها مها ومنها لي خدات هي وانس فاش كانو بزوج صغرات عينيها فواحد البيجامة بالساتان فالبوردو بسروال والفوق ديالو كيتسد بالصداف وابتسمت باعجاب هزاتها وهزات معاها طوب خفيف تلبسو لتحت وملابس داخلية بسرعة خوات عليها ماء دافي بدون ما تقيس شعرها وخرجات لاوية عليها فوطة توجهات نيشان لباب سداتو بالساروت تفديا لاي احراج وهزات كريمات دارتهم للحمها ولبسات حويجها خلات شعرها على راحتو وجمعات لحويج لي كانت لابسة وقادات الدنيا عاد خرجات من البيت لكوزينة لي شافتها فاش يلاه دخلو لقاتهم ب 3 جالسين كيهضرو ويضحكو
براءة:(ببتسامة)مجمعين بلا بيا....
شافو فيها كيضحكو وحسنية قربات ليها عنقاتها وقالت
حسنية:(باعجاب)ولدي دا زين هه
فهاد الاثناء انس لي كان كيشوف فيها باعجاب كبيييير حدر راسو بخجل وعاود هزهم فيها مقادرش يبعد عينيه وقال ببتسامة
بانس:قولي تبارك الله
حسنية:(كضحك)عيني باردة عليها غير تهنا
ضحكو جميع وتعشاو جميع براءة فجنب انس مهتم بيها وبماكلتها لدرجة نسا راسو وبقا كيوكلها مها فرحانة وراضية كل الرضى على اختيارها واختيار بنتها ومرتاحة حيت عارفة فين حاطة بنتها...تجمعات الدار وبقاو باركين كيهدرو ناسيين راسهم حتى صونا تيليفون شريفة لي خرجات عينيها وقالت
شريفة:عبد الرحيم كيصوني
انس:(ببرود وهو حاط ايدو على كتف سجى لي دخلها الخوف كيطمئنها)جوبيه
شريفة:(حركات راسها بالايجاب بلعات ريقها وبعدات عليهم وجاوبات)الو...اه اه انا باقا عند المرا يلاه سالاو...صافي نعاونها ونجي...براءة ديتها معايا حسن متبقا فالدار تفوج شوية...وصافي ا عبد الرحيم راني غير مع العيالات ديرين ليلة لبنتهم عاد رجعات من برا..وصافي صافي نسالي وغنجي انا وبراءة وحسنية....(خصرات ملامح وجها فاش سمعاتو كيغوت وقالت بغضب مكتوم)عبد الرحيم الهدرة ماشي فالتيليفون نجي ونهدرو
قطعات عليه ورجعات عندهم كضحك كملو فحديثهم حتى جا الوقت لي غيمشيو فيه كانت الساعة ل 10:30 لبسو النسا جلابهم وبقاو فالصالون ومعاهم انس لي خلا براءة على راحتها حتى بدلات ولبسات عليها وقادات فولارها وخرجات ببتسامة مزينة وجها تلقات انس عند الباب رجعها لبيت وقال
انس:(قبل جبينها)مساخيش بيك تمشي
براءة:(عنقاتو بحب وقالت)حتى انا مساخياش بيك
انس:كون غير خلاتك معايا ليوم حتل غدا ونديك
براءة:(بمزح)بغيتي عبد الرحيم يعلقني من رجليا😂
انس:(ضحك على كلامها وقال)مبقيتيش تحت جناحو احبيبة متخافيش
براءة:(بحزن)ولكن هو معارفش
انس:(تنهد)مع الوقت كلشي غيتصلح
براءة:(ببتسامة حاولات تخبي حزنها)انشاء الله
عنقها عندو وقبل خدها هز ليفاليز ديالها وهي هزات الساك صغير لي فيه لحويج لي لبسهم وسبقها خارج تبعاتو ووقفات حدا مها وخرجو جميع بعدما تاكدو من كلشي وسدو الدار شد ليهم انس ب 3 طاكسي وعطاهم لفلوس باش يخلصوه وهو شد طاكسي بوحدو وصلو هما قبل ب 5 دقايق عاد وصل هو صونا ليها سول على باها واش مقال ليها والو طمأناتو عاد طلع لدار....حياة جديدة مسؤولية وحب كيتزاد تقربو من بعضهم بزاف ولات براءة هي النفس لي كيتنفسها انس بلا بيها ميدوزش نهارو مراقبها ومراقب كل حاجة فيها لبسها وتصرفاتها حتى ضحكتها الرنانة الى ضحكاتها فالزنقة يقلب الدنيا فوق راسها..كيخاف عليها من الهوا وكيحميها بكل ما اوتي من قوة ودير فوق جهدو معاها مخنتها فوق لقياس حتى مها ولات كتشكا منها اما حسنية فرحانة بمرت ولدها ومقاداها دنيا...حميد شد تيقارو وانس مسكتو بمبلغ مالي كياخدو كل شهر مبقاش مديها فيه ولا كيهدر معاه اما انس يا انس كيخدم بالليل ونهار باش يحافض على المنصب ديالو لي وصل ليه ويبقا مرتاح ماديا ومعنويا ويخلي براءة مناقصها والو ....مر من الوقت سنة عادية قدرات براءة تنجح بامتياز فقرايتها وانس يدفع فابارطومون علاقتهم توطدات اكثر وانس مبقاش ليه صبر باغي غير ايمتا يشد ساروت الدار ويجيبها عندو ولكن واش هادشي غيكون كيف مخطط ليه ولا غتخرج شي حاجة تقلب الموازين هادشي لي غنشوفو من بعد
#عيد_الاضحى
كيف كل الناس وجدو وخداو بيجامات وكنادر وكل ما كيخص عيد الاضحى من فاخر وشواية...الخ ومنساوش الخروووف فالفون كيهدرو بزوج وبراءة فرحانة بالعيد كيف عادتها قالت
براءة:غتجي تعاون بابا غدا
انس:(ببتسامة)اه هدر مع الوليد وقال بلي غدوزوه معانا المهم غنتجمعو فالعيد
براءة:(حلات عينيها بفرحة)حلف واش بابا لي قال هكاك اواه
انس:هو الصراحة غير عبد المأمور كلشي من ماماك ههه..تلاقيتو صباح سلمت عليه ردها عليا غير بزز
براءة:(بحزن)كلشي غيتقاد احبيبي كون هاني انشاء الله غتولي نت وبابا سمن على عسل هه
انس:(دوز ليها ابيل كام واكسيبطاتها شافها وقال كيشوف فيها لابسة خفيف)كي غادا مرتي مع هاد الصهد
براءة:(ببتسامة خجولة)هنت كتشوف هه قهرني الصهد مخرجتش من الما ليوم
انس:(وهو لابس شورط قصير ولفوق ملابس والو)ليوم الحال سخون بزاف الله يرحمنا
براءة:(كتحقق فيه بدون ما ينتابه ليها وقالت)اميين...(صغرات عينيها فجهة عنقو وقالت)قرب قرب
انس:(قاطعها بهدوء)عادي احبيبة ماشي شي حاجة كون ما شداتش فيا كانت غطيح والله يستر طيح على راسها شي طيحة خيبة لاهما قمشة ولا تخسر روح ولا لا احبيبة
براءة:(مخسرة ملامح وجها وقالت)ام مزيان غير نت لي كين مكين حد من غيرك
انس:(شاد الخاطر وببتسامة قال)انا لي كنت قريب ليها
براءة:(ميقات فيه وقالت)مزيان...صبر نبدل حويجي خنقني هاد سروال
حطات الفون فوق الكوافوز شاد البيت كامل فين ما مشات كتبان ليه طلقات شعرها وناضت كتمختر فالبيت ترد ليه الصرف وبدات كتبدل قدامو وكتهدر عادي ولفات تلبس قدامو ولكن هاد المرة ملبساتش عادي بل خدمات اسلوب الاغراء ولعبات ليه على الاعصاب كيف بغات...اما هو بقا كيشوف فيه وساكت حاضي الخير لي عطاه سيدي ربي وكيعبر فيه حركات رجولتو بحركاتها وهي لابسة غير دوبياس وكتجبد بيجامة خفيفة من الماريو قربات عندو هزات حليب د الجسم بدات كتدهن فيه على لحمها بشويه وهي كتماصيه باش يتغلغل فلحمها مدارياش بالبركان لي كيشوف فيها والنار لي شعلات فيه
انس:(بلع ريقو وقال بصوت خفيف حنييين)لبسي حويجك ا براءة
براءة:(بدلع وهي حابسة الضحكة كتشوفو كيعراق وكيتنفس بصعوبة)صبر نكمل غير صدري وكرشي ونلبس احبيبي بالزربة
انس:(مقادرش يصبر)لبسي ا براءة حتى نقطع وكملي
براءة:(بغباء مصطنع وهي كتغنج عليه)علاش مالك اول مرة تشوفني هكا عادي احبيبي نكمل ونلبس
انس:(بصوت منخفض وهو كيشوف فيها وقلبو كيزدح)ديما كنشوفك ولكن معمرك كنتي كديري هاد الحركات
انس:(هز كاس د الما كيشرب فيه وكل قطرة من الما كتهبط بزز فحلقو وقال)ياربي تشوف من حالي
ضحكات براءة وهي عاطياه بالضهر حتى شبعات وهي كدير راسها كتلبس وشافت فيه بعدما قربات لكوافوز ولجهة الكام بصدرها لي عليهم غير سوتيان هزات بلعاني طالك وقالت)قلتي شي حاجة حبيبي
انس:(خرج عينيه فيها وقال بسرعة مقادرش يزيد يشوف فيها)شوية ونهدرو
بغات تهدر وهو يقطع خلاها كضحك بانتصار وقالت
براءة:يلاه شد دبا لهيلا قالك كنت قريب ليها مظيان تبارك الله
وتنهد براااحة اما هو بقا فبلاصتو كيتخايل صورتها بين عينيه حتى حس براسو مصهود بزاف ورغبتو فيها طغات عليه ناض دخل لدوش بقا مخشي تحت الما دافي باش يترخا وحاول ما امكن يمسح صورتها هكاك بعد دقائق عاد رتاح وحس بعضلات جسمو كامل ترخاو لوا عليه فوطة وخرج كيتنهد وكيلعن الشيطان قرب لسرير سمع الفون كيفيبري طل عليه لقاها ديرا ابيل فيديو قرب ليه وهزو دوز لابيل غير شافتو هكاك وهي تقول ببراءة
براءة:دوشتي فهاد الليل ا حبيبي
انس:(هز حاجب ونزل لاخر وقال)كتسمعي بهداك المتل لي كيقول الشوف ما يبرد جوف!!(حركات راسها بالايجاب ساكتة وحابسة الضحكة وكمل على كلامو)نهار غنشدك ا براءة غنخرج منك هاد سنين كاملين
براءة:(تقلبات على كرشها وصدرها كيبان من طوب لي لابسة وكتلعب برجليها لي مزينهم خلخال واخدو ليها هو وقالت بغنج)وعلاش شنو درت ليك احبيبي
انس:(تنهد وهو كيدور عينيه على تفاصيلها)درتي بزاااف
براءة:(عضات على شفايفها وقالت)سير احبيبي لبس باش متمرضش دغيا كيشد فيك البرد
انس:(حرك راسو وهو كيتنهد)وخا
حط لفون فوق الكوافوز ةمشا لماريو جبد شورط قصير بعدما نشف لحمو ولبسو وخلا شعرو نازل على وجهو وهو مزال فازغ هز الفون لقاها على وضعيتها وكتلعب برجليها حتى نتابهت ليه وقالت
براءة:نشف شعرك ا روحي
انس:(بعد ثواني من الصمت وهو كيشوف فيها وكيتمعن تضاريسها)نزلي عندي..بغيتك تباتي معايا ليوم
فصلو الخط وانس تكا فبلاصتو كيفكر بلي غتكون قريبة ليه وغتبات فأحضانو بعد طول انتضار بعد سنة من زواجهم كان حاس بالفرحة وقرر فور ما تجاوبو براءة غيعلم مو بلي مرتو غتبات معاه باش يتفادا اي احراج مع خوتو وباه.....
حركات راسها شريفة بالايجاب وهي كتشوف بنتها حشمانة ومتوترة فحين براءة طلعات لبيتها كتجري هزات الفون بخوف ونزلات عند مها دوزات ليه لابيل جاوبها سيربلاص وقالت بسرعة بدون ما تخليه يتكلم
براءة:(بتوتر وخوف منو)هاك ماما بغات تهدر معاك
عطات الفون لمها وهو غير سمعها قالت هكاك عرفها مقالت والو ودفعاتو لفم المدفع حك راسو بتوتر وهضر معاها وبعد جهد جهيد قنعها غير بالخاطر وبالهداوة قطعو الخط وشريفة شافت فبنتها وقالت بطنز
شريفة:احياني عليك المشة(بدون متجاوبها خطفات الفون من ايديها حشمانة هربات من قدامها وقالت شريفة بصوت عالي باش تسمعها)وجدي راسك غنباتو عند دار ناسك(جبدات الفون كضحك ودوزات الاتصال لعبد الرحيم لي كان فالفيرمة عند خوه لي فنواحي الدار البيضاء هو وحميد وقالت بهدوء)الو
عبد الرحيم:الو شريفة لباس عليك
شريفة:الحمد لله ونت لباس عليك وسيمحمد لباس
عبد الرحيم:لباس الحمد لله...
شريفة:(برقة)واش غتشدو طريق فالليل ولا حتل لفجر
عبد الرحيم:حتل لفجر نصليو ونشدو طريق انا وسي حميد
شريفة:طريق السلامة رد بالك فالطريق وسوق غير بشوية
عبد الرحيم:وخا ا عويناتي كوني هانية..
شريفة:(بتردد وهي كضحك كيف عادتها بغنج)ليوم احبيبي غنباتو عند حسنية انا وبراءة باش غدا تلقاونا موجدين كلشي
شريفة:(بلعات ريقها وقالت بصوت مغري)هانت حبيبي غير بالعقل غنمشي انا وبراءة نوجدو دكشي لي خاص وغنباتو مجموعين فالصالون ولا فالبيت لي كنا كنباتو فيه انا وياك فاش كنتجمعو والى كان على انس بنتي مغتفرقنيش غير رتاح ا تاج راسي..(شافتو غيعتارض وقالت بغنج)توحشتك ا زماني غبرتي عليا نهار واحد حسيت بدار خاوية عليا وبغا غير ايمتا نبات بين يديك..(بعتاب مصطنع)هملتيني هاد الايام كاملة (وكملات بصوت انثوي)ولكن فاش غترجع غناخد حقي منك
عبد الرحيم:(داااب وخلاتو غير حال فمو وقال بحب ولهفة)فاش نرجع خودي حقك وحقي ولي بغيتي ا قلب عبد الرحيم اخخ شحال توحشتك هكا
شريفة:(وهي كتلوا عليه بكلامها)اممم والى بغيتي نسمح ليك بعدا على دكشي لي كنتي كدير معايا ديرلي خاطري وخليني نمشي نبات عند حسنية
شريفة:(بضحكة رنانة)وخا يا حبيب قلبي وتاج راسي...(بنفس الطريقة)يلاه احبيبي نخليك دبا انا نمشي نوجد دكشي لي قاديت باش نديوه معانا
فصلات الخط وتنفسات الصعداء وهي مرتاحة قادات السلطات لي وجدات فسوبرات وطلعات لبيتها وجدات راسها وهزات كاندورة ديال العيد فايدها ومشات لعند براءة لي كانت ليحا عليها عباية وديرا شالها وكتسنا فمها بتوتر
شريفة:(عطاتها غاندورتها)ديري معاك هادي عندك
براءة:(خداتها من عندها وسولات بخجل)بابا خلاك
شريفة:(ببتسامة شريرة)هادي را ماماك ابنتي هه
ضحكات براءة وتبعاتها نزلو من الدار وهزو دكشي لي موجدين وخرجو فاتجاه منزل انس لي علم مو بلي غيباتو معاهم حلات عليهم سلوى وهي كطلع وتنزل فبراءة ممسروطاش ليها وقالت ببتسامة صفراء
سلوى:مرحبا بيكم
شريفة:(سلمات عليها)ترحب بيك الجنة مك كينا
سلوى:كتسناكم فالصالون
براءة:(سلمات عليها ببتسامة)مبروك العيد
سلوى:(قلبات عينيها وهي كتسلم عليها وقالت ببتسامة صفراء)الله يبارك فيك
سدات سلوى لباب وتبعاتهم لقاتهم جالسين مجموعين على صينية اتاي ومعاهم انس لي شافت فيه باستغراب من وجودو
هز فيها عينيه بتحدير لي فهماتو بوضوح ابتاسمة فوجهو التسامة صفراء وجلسات بعيدة عليهم هازة كاس د اتاي وشادة لفون كانهم مكينينش حتى دخلو خوتو لخرين رضى وصلاح الدين ونسرين (معقلتش على سميتهم ديرو عين ميكة😂)لي سلمو عليهم فرحانين وخصوصا نسرين لي جلسات حدا براءة كتهدر معاها وضحك معاها داز الوقت وناضو البنات والنسا يكملو توجاد فالسطح وطلع معاهم انس ورضى
براءة:(وقفات)عفاكم بغيت نبدل عاد نطلع
انس:(شاف فيها وقال)دخلي لبيتي الى بغيتي وبدلي
سلوى:(نقزات شظاتها من ايدها وقالت كتشوف فأنس باستهزاء زعما راني عيقة بيك)اجي اختي نديك تبدلي على خاطرك
براءة:(بلعات ريقها وشافت فانس لي حسات بيه تعصب من تصرف ختو ولكن معلق بوالو وقالت)اه وخا يلاه نمشيو
شافت فيه ببتسامة قدرات تبردو وتبعاتها كتهدر معاها حتى فاتت لبيتها خرجات سلوى وسدات وراها الباب اما براءة حطات ساكها وجبدات منو بيجامة د نعاس ومعاها بينوار خفيف ولكن مستور لبساتهم ورجعات فولارها على شعرها وكدلك ملابسها لبلاستهم سدات ساكها وهزات لفون ديالها وخرجات لقات حسنية كتسناها ببتسامة
انس:(شاف فيها عاقد حجبانو وقال)باغا بحالها يلاه ناخد ليك وحدة ولكن تكون عريضة على هادي ويكونو كم طويل
براءة:(بحزن)مفيهمش كم طويل كلهم كيكونو هكاك وطاي واحد فيهم
انس(بجدية وشوفات قاصحين):ادن مغتلبسيهاش
براءة:(بعصبية)وعلاش راه مكين حتى واحد غريب ا انس حشومة عليك وموالفة كنلبس كل عام هكاك وكنحيد الفولار حتى هو وعادي را خوتي هدوك وبابا وعمي هدوك ماشي برانيين
انس:(بغضب قال بحدة)فهديك الوقت مكنتيش على ذمتي دبا الوضع تبدل كلامي منعاودوش ا براءة..
حسنية:(دخلات وقالت كتهدن الوضع)استهدو بالله اوليداتي لعواشر هادو(وجهات كلامها لانس)الله يهديك اولدي هدوك را خوتك لحمك ودمك وباك كبير شكون غيشوف فيها شي شوفة ناقصة
انس:(بحدة)الواليدة كلامي قلتو ومنعاودوش مرتي ميشوف لحمها وشعرها حد من غيري ولو يكون با...وغنكونو فالسطح كاع سطوحة عامرين وشي كيطل على شي شنو انا ماشي راجل نخليهم يشوفو ليا فمرتي وقوم ربي العالمين حاط عليها العين وكيتسنا غير الفرصة فين يشوف فيها وانا نعطيها ليهم....من غير الى كنتي باغا نصفيها لشي واحد
براءة:(بتوتر)اه مزيان حتى انا خاص نزل حشومة نخليهم وماما غتكون مشوشة عليا من قبيلة وانا غابرة عليها خاص نزل عندها
انس:(خشاها فيه وقال)شششش ماماك عارفاك معايا هدرات معاها الواليدة
براءة:(بتفاجؤ)مخطط لكلشي ومقاد كلشي
انس:(بصوت رجولي قريب لودنيها)لا ممقاد والو هما عارفين هادشي غيوقع مهما طال الزمان راك مرتي ماشي صحبتي ولا خطيبتي باش يخافو عليك مني..والقدر واقف فصفي هاد نههار كلشي غادي كيف تمنيت وحسن
براءة:(حركات راسها وقالت كتحاول تنوض من حداه وهي كتحس بقلبها كينبض بسرعة ووجها حمر وهي كتحس بايديه دخلات تحت البيجامة وحطها على كرشها جارها عندو)اه وخا انا نمشي ندوش حاسة براسي عرقت وهادشي صهدني
انس:(بتفهم طلقها وقال)دوش قدامك ورتاحي لبسي لي عجبك مكين لي غيهدر معاك كين غير انا
براءة:(ببتسامة)وخا..ونزل عندهم غيحساب ليهم كنديرو شي حاجة
انس:سيري الى بغا دوشي ولا نديرو بناقص اش بان ليك
بدون ما تجاوبو ناضت كطير لدوش دخلات وسدات عليها لباب من لداخل ووقفات كتفكر تقربو منها حسات بالفراشات كيلعبو فمعدتها حيدات حويجها وتخشات تحت الرشاش مستمتعة بالماء الدافي لي كان تقريبا بارد فحين انس ناض لبس كلاكيطتو ونزل عندهم مخليها على راحتها دقائق بعد نصف ساعة خرجات بزز من تحت الما مساخياش بيه بقوة ما الحال سخون والدار حتى هي هزات فوطتو لواتها عليها ودارت فوطة صغيرة على شعرها بغات تخرج تفكرات بلي مكيناش فدارهم ومدخلاتش معاها حويجها ضربات على جبهتها
براءة:(بتوتر)انس...انس....اناااس
مجاها حتى رد حلات وخرجات راسها كطل على بيتو واش كين فيه مبانش ليها تنهدات براحة وخرجات نيشان لساكها هزات لبيجامة لي كانت لابسة فدارهم لبساتها بعدما نشفات لحمها ودارت كريم مرطب برائحة خفيفة متناسبة مع هدوؤها ولبسات فوقهم الغاندورة لي جابت ليها حسنية خلات شعرها على راحتو بعدما نشفاتو بالفوطة وجمعات دنيا والدوش وحيدات ساكها من على سرير وعاودات قاداتو عاد نزلات عندهم لقاتهم كلهم مجموعين فالسطح بحكم انس فالطابق لفوق قريب لسطح وصلها صوت ضحكاتهم وطلعات عندهم ببتسامة كانو مجموعين ونسرين فحضن حسنية مضاربة مع انس لي كيعنكشها بالضحك ويستفزها كيف عادتو ما هي ختو الصغيرة والقريبة ليه
نسرين:(تخشات فمها بعدما جرها من شعرها بدلع وقالت)مامااا هدري معاااه يبعد منييي
حسنية:(دورات ايديها على كتافها وقالت كضحك)بعد ليا من الحنينة الغالية
انس:(باستفزاز)هادي حنينة!! لعجب وهي سمها يتقطر
نسرين:(ضرباتو برجليها لفخدو وقالت)السم هو لي فيك الحقير
شافت فمها وفحسنية لي حركو ليها راسهم باش تمشي معاه ودكشي لي كان ناضت تبعاتو ونزلو لبيتهم انس غير عاقدهم ومعصب وغيرتو عليها فاتت الحد الطبيعي فحين نسرين شافت فمها وشريفة مصغرة عينيها وقالت
نسرين:شواقع هنا مال هاد جوج
حسنية:(مهربة عينيها عليها)دخلي سوق جواك
نسرين:(متجاهلة كلام مها)شنو ضامصين بيناتكم(بغات تهضر مها وهي تقول)راني كنعرفك ا حوس حوس فاش تخدمي شيطانك شواقع (شافت فشريفة لي غير ساكتة)اش كين اخالتي
شريفة:(بتردد)ها ماماك سوليها
حسنية:(شافت فيها وقالت)حتى يجي خوك ويقولك
نسرين:(كتشوف فيهم بزوج وقالت وهي متأكدة بلي كينا شي حاجة كبيييرة مخبينها)درتوني كورة بيناتكم ولا كفاش قولو ليا اش كين
شي كيشوف فشي معارفين يهدرو ولا يسكتو والتوتر طاغي على الجو عندهم فحين انس واقف قدامها حاس براسو كيغلي
انس:(بغضب مسيطر عليه)كلامي مكيسوا عندك والو ياك
براءة:(كتشوف فيه معاجبها حال وحاولات ما امكن تهدن الوضع)انس راه مشافني حد كان كيحساب ليا راكم فالكوزينة فاش كنت نازلة سمعت ضحك جاي من سطح طلعت عندكم
انس:(قرب ليها بعصبية وشد ايديها بعنف)علاش مدرتيش فولارك كون كان شي واحد براني يشوفك هكاك ها ولا نتي باغا بنادم يشوف فيك غيعجبك الحال ياك...
شافت فيه براءة بصدمة من كلامو مرداتش عليه حيدات ايدها من ايدو مشات لكوافوز هزات مقبط جمعات شعرها بيه وتوجهات لساكها هزات بينوار وفولار دارتهم وقالت بدون ما تشوف فيه باغا تبكي
انس:(كيشوف فيها وهو مزال كيغلي بالرغم من الندم الذي ا ختلج صدرو من الكلام لي قال ببرود عكس دكشي لي كيدور فصدرو)غنطلعو وغتبقاي فجنبي
مجاوباتوش خرج وتبعاتو بدون ما يهدرو مع بعض بمجرد ما طلعو لقاهم كلهم ساكتين شريفة حاطة ايدها على خدها وحسنية ساهية قدامها حنحن والكل نتابه ليهم جلس انس حدا نسرين وبراءة مشات حدا مها خلاتو كيتحلف عليها بعينيه فحين هي الحزن كان طاغي على ملامحها كلامو صدمها وتقبلاتو بحساسية زيدا على اللزوم مما كبر المشكيل بينهم حتى قاطع تواصلهم البصري صوت شريفة
شريفة:(شافت فبنتها وقالت بحنان)مالك ابنتي
براءة:(شافت فيها ببتسامة)والو ا ماما...غدا شكون غيدبح عمي
انس:(ببتسامة)انا قلت ليك دبا ولكن هادشي يبقا هنا غير حنا لي عارفينو وصاحبي يوسف
نسرين:(ببتسامة وتخشات فيه بفرح)كنواعدك منقولها لحتى واحد ولكن كنتسالك تعويض
انس:(كيضحك لهبال ختو)جاك غير يفوت العيد
نسرين قبلات خدو بفرح وناضت جرات براءة لي وجها عليه بتسامة صغيرة مدرقة بيها حزنها وتقليقتها وجلساتها فجنبو وقالت بعدما عنقاتها
نسرين:(بفرح)مبرووووك عليك خويا ما يلقاش حسن منك ونتي متلقايش حسن منو مواتيين تبارك الله مشاء الله(شدات ايدو وشبكاتها مع ايدها وقالت)هادي هي بلاصتك معمرك تخويها كين لي كيتسنا غير الفرصة
غمزاتها وحسنية فهماتها شكون قصدات فحين براءة مفهماتش قصدها اكتفت بتحريك راسها بالايجاب وهي ساكتة الا ان انس كيشوف فيها بحيرة وندم زير على ايدها بحنان حتى شافت فيه ابتسم فوجها كتعبير على اعتذارو لكن سرعان مدورات وجها عليه تنهد ورجعو فالحديث بيناتهم كاملين حتى داز الوقت وتناص الليل
ابتسم فوجها كتعبير على اعتذارو لكن سرعان مدورات وجها عليه تنهد ورجعو فالحديث بيناتهم كاملين حتى داز الوقت وتناص الليل وهي بعيدة عليه تعشاو وكل واحد دخل لبيتو ينعس الا براءة لي جرها انس معاه بدون ما يتسنى اعتراض منها ولا اي كلمة بعدما بقاو غير هنا بزوج دخلو لبيت وسد انس لبيت وقال بهدوء
انس:مزال مصلينا العشا
براءة:(حركات راسها بالايجاب وقالت بصوت خافت)اه
جرها معاه لدوش توضاو ولبسات عبايتها وفولارها وتوجهو للقبلة بزوج اول صلاة ليهم بزوج مع بعض تضرعو الله عز وجل ينور طريقهم ويعلنو زواجهم ما يبقاوش مخبيين ويسهل عليهم طريقهم وزادو 2 ركعات تحت طلب انس لي كانت كشكر لله على براءة وتحقيق امنيتو ولو انها مجرد نصف الامنية الا انها احسن من انو يبقا معاها غير هكاك غادين بزوج بدون اي رابط شرعي سلمو وختمو صلاتهم دار عندها وحط ايدو على راسها وقال دعاء اللهم إني أسألك خيرها وخير ما جبلتها عليه، وأعوذ بك من شرها وشر ما جبلتها عليه..جمعو صلايات وناضو بزوج هو حيد الفوقية لي لابس وهي حيدات العباية والفولار وبقات واقفة معارفة مدير فحين انس قرب ليها وعنقها بحب وندم وحنان وقال بصوت اجش
انس:سمحيليا مكنتش قاصد هديك الهدرة
براءة:(الصمت وكتشوف قدامها)
انس:(بعد عليها وجلسها على سرير ونزل على ركابيه وقال بضعف شاد ايديها بزوج)مكنتش قاصد ا روحي سمحليا هادي اخر مرة نعاود بحال هديك الهدرة البايخة(قبل يديها وهز عينيه فيها وقال)كنحس بالعافية شاعلة فيا لداخل فاش كنشوفك هكا
براءة:(تنهدات وقالت)معليش موقع والو نسا
انس:(حرك راسو كانه طفل صغير وقال)سمحيليا ا روحي
براءة:(حطات ايدها على خدو بحنان وقالت)مسامحاك غير رتاح..نقدرو نعسو
انس:(شافها مزال مقلقة وفضل يخليها هاد الليلة ترتاح ولكن مغتبعدش على احضانو)اه ا عمري
حيدات المقبط من شعرها وخلاتو على راحتو ومشات لجهة الحائط وتكات عاطياه بالضهر اما هو تنهد بقلة حيلة وندم شديييد حيد تيشورط لي لابس وبقا غير بشورط وتخشا حداها جرها من خصرها لاحضانو وهي مدارت حتى ردة فعل طفا الضو وبقا داخل غير ضو القمر لي عاطي الجو هدوء خاااص كاسرو نبضاتهم وتنهيدات انس وهو كيحس ببراءة ممرتاحاش وقال بصوت خافت
انس:مالك اعمري
براءة:(بعدم راحة كتقلب من جهة لجيهة)والو غير كين الصهد هففف
براءة:(حركات راسها بالاجاب كتحرك يديها على وجها وخدات من عندو الكاس وقالت)شكرا
انس:(شاف فيها وهو كيتذكر كلام شريفة وقال)العفو اروحي...الى كنتي ممرتاحاش حيدي هادشي لي لابسة
براءة:(خرجات عينيها بخجل وقالت)لا لا غير خليني عادي
انس:(تنهد وهو كيقيس وجها وعنقها لي كانو سخان بزاف وقال كيحل ليها البينوار)حيدي هادشي راني راجلك مكين لاش تحشمي مني
تنهدات وكملات حويجها حتى بقات غير بالبيجامة الخفيفة ولي كانت عبارة على شورط قصير وديباردور ديالو بلع ريقو وناض حيد حويجها حطهم حدا ساكها وحل الشرجم كامل رد غير الخامية وطفا ضواو
انس:شوية غتبردي غير صبري اعمري (مرة مرة كيقلب حرارتها حتى بردات وحس بيها رتاحت جرها لاحضانو وقال بصوت خافت حدا ودنيها)بقا مقلقة مني
براءة:(بنوع من الحزن)سمحت ليك ولكن باقا مقلقة معمرني ضنيت غتقولي هكاك
انس:(قبل كتفها العاري حتى حس برجفتها وايدها لي زيرات على ايدو لي على بطنها بدون ما تحس وقال ببتسامة خفيفة)سمحيليا محسيتش براسي مكنبغيش شي واحد يشوفيك مكرهتش نخبيك وسط قلبي ونبقا نشوفك غير بوحدي..(عاود قبل كتفها وعنقها قبل متفرقة وخفيفة خلاها ترجف بين يديه ودور عندو وتخشا وسط صدرو العاري وتقول)
براءة:عينيا مكتشوف حتى واحد من غيرك ا انس قلبي بغاك غير بوحدك وروحي ليك براءة ملكتيها بكل ما فيها كنبغيك بزاف وسمحليا الى عصبتك مكنتش قاصدة(بدون ما تحس قبلات صدرو جهة قلبو لي كان دقاتو واصلين لمسامعها غمض عينيه وهو كيحس برغبتو واحاسيسو غيخونوه وعاود حلهم وقال
انس:(قبل فروة رأسها)حتى انا كنبغيك ومن لي كنتي صغيرة خطفتي قلبي وروحي مني
زاد خشاها فحضنو اكثر مكارهش يخشيها وسط قلبو وحتى هي ممختالفاش عليه باحساسها بدات كتمخشش فيه ببراءة بحال شي قطة وديييعة وكتلعب فكرشو بايديها معارفاش بلي حركاتها كيستنزفو اخر درجات صبرو وقال بصوت خافت ببحة غريبة
انس:مجاكش نعاس
براة:(وهي على وضعيتها)توء مفياش
انس:(بلع ريقو وقال)رصاي
براءة:(عاد فين بغات تزيد تلعب معاه وقالت بطفولة)نئح خليني
انس:(حرارتو ارتفعت وقلبو غيخرج من بلاصتو وقال)متلومنيش على شنو غيوقع من بعد الى خليتك
براءة:(بعدم فهم)شنو غيوقع
نزل راسو لوجها وانهال عليهم بقبل متفرقة حاولات تبعد عليه بخجل وتعتارض الا انه ابتلع كلماتها داخل شفتيه بنهم وامسك يديها بين يديه ورفعهم فوق رأسها متحكما بها لدقائق معدودة وقال وهو مقابل عينيه مع عينيها ببتسامة خفيفة وبحة مميزة اخترقت قلبها بعنف
انس:كنبغيك
براءة:(بلعات ريقها بضعف وهي كتحس براسها خاضعة ليه كليا وقالت برقة ونبرة لم يسمعها من قبل والتي نتجت عن رغبتها به)حتى انا كنبغيك بزاااف
نزل بشفايفو لعنقها ولصدرها بالضبط على قلبها وقبلو بشغف ورجع لشفايفها كيتلدد بيهم .........اول تجربة لهم بزوج ولي كانت بالحلال هما راضيين وربي راضي عليهم كانو بزوج متلهفين لبعض وحبهم سيطر عليهم وخلاهم ينساو الزمان والمكان وينساو انفسهم ويخليو احاسيسهم وارواحهم ترتابط ويتممو زواجهم بعد ساعات ارتبطت ارواحهم بعلاقة متكاملة وتمم زواجهم بارتباط اجسادهم...مسح دم عدريتها وخزنو عندو ورجع عندها كيقبل رأسها وايديها بخوف وهو كيشوفها وجها حمر ودموع كينزلو على خدها وقال
براءة:(بخوف ودموع كينزلو ليها)الى عرف بابا..غيقتلني ويسخط عليا
انس:(قبل عينيها ومسح دموعها)مغيعرفش نتي مرتي مدرناش شي حاجة حرام هادشي كان غيوقع سواء دبا ولا من بعد..حتى حاجة مغتقيسك لي يقيسك يفوتني انا لول عاد يقدر يحط ايدو عليك...
انس:(زيرها عندو وقال)بغيتي غدا نقول ليهم بلي مزوجين نقولها انا مخايف من حتى واحد نتي لي حابساني
براءة:(بعدات وقالت بسرعة)لا لا متقول والو كلشي غيتقاد يفوت العيد وهديك الساعة خلي ماما تكلف
انس:(مسح دموعها وقال شاد بخاطرها)راحتك كتهمني كتر من اي حاجة نتي مرتي وحنا مدرناش شي حاجة حرام ليوم تممنا زواجنا حقي الشرعي خديتو وحقك الشرعي خديتيه متبقايش تبكي انشاء الله ميكون غير الخير..وانا عمرني نخليك لي جامعنا كبير بزاف وبجهد الله حتى حاجة متقيسك
براءة:(تنهدات براحة وقالت)الحمد لله حيت نت لي فحياتي كنبغيك بزاااف
انس:(جرها عندو كيقبل رأسها وقال بهدوء)حتى انا كنبغيك
انس:(حرك راسو ببتسامة وقال)صبري نوجد ليك كلشي باش نعاونك
قاد دوش ووجدو وهزها بين يديه لدوش سندها على صدرو لانها مقادراش توقف وحاسة برجليها فاشلين غسل ليها شعرها واطرافها وخلاها توضا بشوية عليها حتى سالات لوا عليها فوطة وحطها على السرير قرب ليها ساكها بغا يعاونها وقالت
براءة:(ببتسامة وخدودها متوردين)غير سير دوش نت قادرة نلبس
طبق كلامها بعدما تأكد بلي راها بيخير ورجع بعد دقائق لاوي عليه فوطة شاف فيها وهي كتمشط فشعرها بهدوء قدام ماريو لي كان كوليس وفيه مراية و كانت لابسة نفس البيجامة لي كان خدات هي وياه من درب سلطان ولي جابتها احتياط نضرا لكلامو لي قال ليها فالفون ابتسم وهو كيشوف فيها من اخمص قدميها لاعلى رأسها باعجاب واضح وقال
انس:(قرب ليها ودور ايدو على بطنها حاط راسو على كتفها وقال)انا لي تزوجت فهاد الدنيا ههه(قبل خدها)
براءة:(ببتسامة كتشوف فيه من المراية)ماشي غير نت حتى انا ديت سيد رجال مخلا لخرين والو واخد منهم كلشي
ضحك انس على كلامها وبعدات عليه كتقلب فماريوه جبدات ليه ملابس داخلية وشورط قصير ولفوق والو كيف طلب منها ووجدات ليه حتى جلباب لي غيلبس صباح العيد باش يمشي لمصلى حطاتهم بغات تمشي تقاد دوش منعها وقال بلي تكلف وقاد كلشي بقاو غير الفوطات هزهم حطهم فالسلة شدها من ايديها معاونها تمشا لان الجرح مزال جديد وكان مزال كيحرقها تكات وهو جنبها خاشيها بين احضانو وسرعان مداهم نعاس بزوج.... تسمع صوت الهلال وناض انس بتعب وهو مزال فيه نعاس عينيه كيتلصقو شاف فبراءة لقاها غارقة فالنعاس وكل رجل فين مليوحة ابتسم على وضعيتها فنعاس وناض من حداها بشوية كيحاول ما يفيقهاش دخل لدوش توضا وصحصح بالما بارد وخرج لبس جلس فجنبها شاد القران كيقرا فيه بهمس حتى سمع دقان فالبيت ناض من بلاصتو وهو حل لباب لقا مو واقفة بخجل ابتسم وقبل راسها وقال بصوت خافت
انس:صباح الخير
حسنية:(كدلك بصوت خافت)صباح نور اولدي مبروك العيد
انس:(قبل يديها)الله يبارك فيك الوالدة والله يطول لينا فعمرك
حسنية:امين اولدي..باباك وعمك غيجيو مور الفجر مع هديك 7 باش نمشيو لمصلى مجموعين
براءة مهووس الجزء الرابع
محتوى القصة
التنقل بين الأجزاء