تنهد بمشطون: متأ!... شوفي انا من بعد ونعيط ليك دابا مشغول
قالت باصرار: وا فهمني شرح ليا ياكما بدلو ليكم البنات اويلي ؟؟؟ عنداك راه كيسرقو الترابي !! (شدات حنكها) انااري
رد : ولااا اش غيسرقو راني كنت معاها ولدات بنت وكنا نتسناو تاتية تخرج صدق خارج ولد راه الطبيبة غلطات دابا الولد مالقا ميلبس كولشي داتو غوز بقا لابس غا داكشي التحتاني راه خليتها كترضعو .. والبنت قلبات الدنيا بلغوات مابغاتش تسكت ومابغاتش ترضع وخرجت نجيب ديك الرضاعة اللي تيحلبو بيها الحليب مابغاتش ترضع من جميلة
مينة : هانااااري ههه ... وعلى سلامتها بعدا مسكينة كي بقات ولدات عادية ولا بلعملية
مهدي: وراه كانت غتولد ليا فالطريق غا وصلات خطات البنت بالخف وسخفات لينا فالولد جوج مرات تا كان ايموت خرجوه بفونطوز انا غنقطع راه هاز لحوايج ماعنديش باش نشد تيليفون تا تجي
مينة : ااححح مسكينة .. ايوا على سلامتها ... المهم تفكات على خير انا هنا تا تجي نمشي معاك
والتوثر والغوات .. بكات بلوجع حتى شبعات وتقلبات علر جنابها حتى طابو .. تصببت بالعرق حتى نشفات وعروق عنقها وراسها بانو بالزحيم .. ماكرهش يهز عليها داك الوجع لاكن ماكان بيدو حيلة من غير يتوجع بطريقة اخرى وهوا كيشوف فيها كتعدب فالزيادة الولد اللي مابغاش يخرج .. اما البنت سهل الله وصلات كتوجع غير جلسات مع زحمة وحدة طويلة شداتها عصراتها بزز منها فدقة .
دخل كيجري هاز الاغراض كيسمع صوت بنتو فالكولوار بوحدها كتغوت اما جميع الاطفال اللي فالغرف مع وامهاتهم ساكتين الى بنتو .. بدا كيضحك ويجري شبها لراسو حثت عارف طبعو كي داير ودخل للغرفة بوجه بشوش فرحان لقاهم شادينها كيحاولو يولفو ليها البزولة وهي كتبكي وجميلة كتبكي معاها بقا فيها الحال من جهة بنتها اللي مابغاتش ترضع منها تسكت ومن جهة اخرى ماعرفات مادير ليها تسكتها وغواتها كيتقب ليها الكبدة .. اما الولد لبسوه لبسة دلبنت ونعسوه وياريت ماقاسوه .. شافو مهدي لابس الغوت ومشا ليه نيشان كيخاصم ويطلع الكسوة بعصبية مع الممرضة
غمضات عينيها وعنقاتها حد وجهها كأنها كتكمد بيها جروح قلبها ونفسها ورجعات حطاتها بشوية حدا خوها وبدات تشوف فيهم بجوج وتأمل .. هبطات راسها كتشم فحوايجها لقات فيها ريحة العرق وناضت بزز منها واخا مقادراش وماعندها خاطر لاكن على قبل ولادها اللي حاسة الشم عندهم قوية قررات تنوض تشوف حالتها اللي ههملات بزاااف .. وعلى قبل وليداتها تفكرات راسها وناضت كتمشى بشوية وكرشها مزالة منفوخة ودخلات لحمام صغير كان عندها تما بدات طرف من لفوق حالتها وتغسل صدرها مناش كيتغداو حماية ليهم من الميكروبات الجلدية مع الصهد والعرق .. غير شوية ديال الاهتمام لنفسها بان عليها .. مجرد ما جمعات شعرها المشعكك وبان وجهها اللي غسلاتو تا تحلو عينيها وبدلات ملابسها اللي كانو فازكين بلحليب فاش كانو كيجبدوه من صدرها ويسيل عليها ... لبسات بيجامة حد الركبة واسعة بتوب خفيف وعنقها واسع بالصدايف نص كم وريحتها زوينة ونقية ورجعات بشوية عليها كتمشا سمعات صوت البكا ماعرفاتش شكون فيهم كيغوت .. يالاه حلات الباب بسرعة والصوت كيجرها من رجليهم مابقات حسات بوجع ولا والو بدات تسمع غير الصوت نساها كلشي وباغا غير تلحق عليه
. لاكن لقات مهدي تما واقف وهاز البنية هي اللي كتبكي بلا سبة من ساعة اللي خلاقت فيها وقين ما يحطوها تبدا تبكي حتى تهز ... وفعلا سكتات فيدو وهوا غادي جاي كيضحك بوحدو
جميلة بلهفة : ماالها ؟ علاش كتغوت؟
رد : صافي سكتات ... صاافي
حطها بلاصتها مكاملاش 3 دقايق وهوا حداهم كيشوف فيهم فرحان وفالولد اللي مهدن ناعس الى تحرك ولا بجغط فالنعاس مقالها حد لحد .. حدو بدل وكلا رجع نعس عكس البنية اللي حمات السوق عاوتاني ورجعات جميلة هزاتها فيدها مخلوعة وكتسول
- ياكما كضرها شي حاجة ؟ علاش غير كنحطوها كتبدا تبكي
خرج بسرعة فرحان لاكن مكانش عارف راسو خارج يتلاقا قدره اللي كيتسناه فأجمل يوم فحياتو . وصل للفيرما يالاه بغا يدخل بطموبيل لقا البوليس بوجوه اخرى عكس اللي شاف الصباح وطموبيلتهم فالباب .. بعفوية خرج باغي يدخل ووقفوه وبكل ثقة فالنفس كونه مادار والو رد على اسئلتهم من بعد ناتطرح عليه السؤال
- مهدي الزاهي؟
رد باستغراب: ايه هوا هادا ؟!
الشرطة: تفصل معانا السي الزاهي
رد باستغراب: وعلاش كاين شي مشكل ؟ علاش غنمشي؟
الشرطة: نتا متهم فالاتجار فالمخدرات وتم القبض على الشركاء ديالك فالبار ودابا تفضل معانا بلا مشاكل وتما غتعرف كولشي
الباطل وما ادراك ما الباطل ... باطل نزل ماعرف منين نزل عليه خلاه مصدوم غير كيشوف ... مهدي السلاوي ولد سلا والمدينة القديمة اللي كبر فدروبها وزناقيها وعندو البوليس بحال صحابو مولفهم من الصغر وعمرو تخلع منهم ولا تخلع من الركبة فسيارة الشرطة ... عمر المينوط ما خلعو كان كيمشي وهوا ضاحك .. ولا كيسب .. عمر حس الخوف دق قلبو حتى لهاد المرة هادي خفق القلب خفقة قوية ماعرفش علاش وماعرفش علاش تخلع بديك الطريقة كأنها اول مرة توقف عليه الشرطة .. ولو يكون باطل ميخاف ميدهش
. لاكن هاد المرة غير بانت ليه الركبة فالسيارة ديال الشرطة بحال الركبة فالتابوت اللي عمرو جرب ... حتى صوت المينوط فيديه كيتقرقب خلعو وهوا طالع فالسيارة والارض مهزوزة بيه .. اش هاد الاحساس الغريب ؟ اش هاد الاحساس اللي عمرو داقو فحياتو كأنها نهاية حياتو .. كأنه كيودع الحرية من جديد .. الحرية اللي كانت زايدة ناقصة عندو عرف بقيمتها فديك اللحضة ... وكولشي سببه الصورة دولادو بجوج والصورة دمرتو وعائلتو وشملو اللي رجعو جزء مهم من حياتو ميقدرش يتخلا عليهم ولا يخسرهم ... اغلى من كنوز الدنيا كاملة .. هنا بان ليه الفرق بين انك تكون عايش وانك تكون كتعايش.. بالرغم من استقرار حالتو المادية من قبل مكانش عاطي اهمية للعواقب او ضارب للحبس حساب.. لاكن الآن كولشي تبدل ... مابن ليه لا فلوس .. لا املاك .. لا حتى حاجة .. حيت حاجة من هادو ماخلاوه يعيش ويحس بطعم الحياة وقيمتها .. حتى تكونات عندو اسرة خلات قلبو ينبض من جديد ويتحركو فيه المشاعر والاحاسيس الميتة خوفا من الضياع ... من الخسارة اللي ميقدرش يصبر لألمها ... شعور حاد من الالم حس بيه وهوا طالع فالسيارة ماعاقلش كاع واش فايت ليه حس بطعم الالم .. الم القلب والمشاعر .
خرجات اثنائها مينة كتجري تشوف اش واقع وكما العادة وكما تعودات تشوف داك المنضر .. مخافتش ولا تخلعات حيت صافي تعودات .. لاكن تعصبات من تكرار المشهد من جديد ويدات كتغوت وطلات عليه قبل ميتسد الباب وهنا شافت ملامح وجهه مبدلة على المعتاد وسرات معاه جملة حسات بيها بحال الخنجر فالقلب .. ووصلها احساس ولدها اللي بدل مشاعرها فلحضة لخوف ودهشة .. ربما حدسو خلاه يقول ليها دوك الكلمات بديك الطريقة ودوك النضرات المليئة بالخيبة والحسرة والحزن " ولادي ومرتي قرقبتك حتى نخرج "
مكالمة هاتفية ..
الو الواليدة ...
جيبي ليا حوايجي انا راه ...
صافي..
غنمشي للحبس ..
تحكم عليا بخمس سنين...
دعي معايا الواليدة راني مرييض...
وتهلاي فولادي ..وفمرتي حتى نخرج .
من اصعب المكالمات اللي ممكن يتسجلو فشي هاتف ويبقاو فيه .. فكل مرة ترجع تسمع ليهم كتحس بنفس الاحساس كءنك لاول مرة تسمعها .. وهاد المكالمة بالخصوص تسجلات فهاتف مينة وبقات تما ... وفكل مرة تجلس بوحدها كترجع تسمعها ودموعها نازلين ... شكون كان يقول غادي يمشي للحبس بخمس سنين ... تهمة نزلات عليه مكانش متوقعها ... حتى باش يخرج ويفك راسو كان صعيب .. صعيب بزااف وماشي ساهل .. فاش كتنوض الحملة ضد المخدرات كتجمع الاخضر واليابس ... ولو يكون عند ك خيط رقيق او ريحة كتجمعك بالمصيبة الكحلة كتجر فيها ... والخيط اللي عند مهدي مع الشركاء ديالو جرو معاهم ... تصابو عندهم مخدرات فالبار فديبو معارفو تا واحد من غيرهم ... بالعلم ديال مهدي اللي بوحدو مكيحطش يديه فداكشي .. وكان يقول ماعندي علاقة بالمخدرات وتجارتهم يضبرو راسهم .. لاكن اسمو كشريك فداك البار داه معاهم بالادلة واخا شهدو ليه انه ماشي متورط كانت شهادتهم ناقصة... واش المتهم كيتقبل شهادته ؟ وهادشي اللي غرق مهدي معاهم فخمس سنين من عمرو ميجمعها غير الفم ... مكانش متوقعها ابدا ... عمر غيدوز بين القضبان فوقت محتاج فيه للحرية ومتشبت بيها ... كفاش غدوز هاد الخمس سنين؟ بصيفها وشتاها وربيعها واعيادها كلها فالحبس... والى خرج ؟ غيخرج يلقا ولادو كبرو ... متوعدين على الحياة بلا بيه ... سواء كان ولا مكانش مكاينش فرق ... ومرتو ؟ واش مرتو غادي تصبر ليه ؟ واش غادي تسناه حتى يخرج ؟ واش تقدر تصبر هاد المدة كلها وحيدة بين ولادها فغياب الاب ... اشمن دور رجع عندو ؟ اشمن فرق غيكون الى بقات معاه او تفرقات عليه ؟ خمس سنوات عمر وعمر الانسان قصير ... افكار وتخيلات كانت كدور ليه فراسو مرضات نفسيتو ... ازماتو حتى وصل للقاع مابقاش قادر يتحمل داك الاحساس الرهيب ونفس الافكار كتكرر فدماغو ... واشنو يدير ؟ هادي نتيجة رفقاء السوء... وسوء الاختيار ... فاش كضيع فالدنيا وتلقا راسك بوحدك كتعرف قيمة شنو خسرتي ... قيمة الاسرة .. دفئ العائلة ... قيمة الزوجة اللي كتكون صابرة ... قيمة الابناء وحلاوة الحياة فتربيتهم .. فمشاكلهم .. فلعبهم وضحكهم ... قيمة نفسك كشخص مسؤول تعول عليه الاسرة ديالو ... قيمة الام والنضر فوجهها وسماع دعائها مباشرة ... قيمة درهم لحلال اللي كيطلعك درجة بدرجة ونتا مرتاح وضميرك مرتاح .. فاش كتخسر كولشي كتخسر معاه نفسك ... كتخسر راحتك .. كتخسر الطمأنينة وكتزيد تعدب عذاب من نوع اخر ... بعيدا عن مشاكل الحبس .. هناك حبس اخر فصدر الانسان حابسو من طعم الحياة بين اغلى الناس عندو .. الناس اللي على قبلهم كيكافح وعلى قبلهم كيدمر وعلى قبلهم باغي يعيش وبيهم كيفرح وعليهم حزن اشد الحزن حتى مرضات نفسيتو ومزال مقادرش يتوعب هاد التغير اللي طرا بين ليلة ونهار
يوم الجمعة يوم الزيارة ... هزات الام القفة كما ديما هازة الدقة دولادها وقصدات الحبس .. دخلات بوجهه صفر عيان بين الصفوف .. تقلبات القفة وشنو فيها ودخلات تشوف ولدها ... فلحبس الى بغيتي تشوف حبابك وماعندك حتى ريال كتوقف بين الشبابيك .. وحتى باش تلمس يدو صعيب توصلها .. لاكن اللي كيخلص ويدفع كيشوفهم فوق طاولة ويجلس معاهم كأنه فمقهى .. واخا الحيوط دايرة بيهم والبوليس واقفين ... لاكن على الاقل كتحس بالقرب ديالهم اكثر .. وهادشي اللي من ديما كيدير مهدي ... خرج بخطوات بطيئة من واحد الباب فرجلو تقاشر بيضين وصندالة اديداس .. نفس ستيل سراولو القنطية لابس واحد كحل وتيشورط كحلة .. شافتو مينة مسكينة ووقفات عنقاتو بقوة كتبكي ودوح بيه وهوا مهبط راسو بأسى فعينيه حزن كبير وحسرة وكية صعيبة تبرد . باس راسها وجلسات قدامو كتنخصص وتسول على احواله وتشوف فيه كي داير وشنو تبدل فيه .. اما هوا غير كيتنهد ويضحك معاها كأنه مخاصو حتى خير ... لاكن احساس الام مكيكدبش .. وديما كتهز العداب وتقصمو مع ولادها وماتهنا وتفرح حتى يفرحو هما هما ويضحكو .. وحتى مهدي داق من نفس الكاس ورجع كيفهم مو اكثر من دي قبل ... الفرق بيناتهم هوا انها كتبين مكتقدرش تخبي وهوا كيكتم كيبين الوجه البشوش .
مينة: كي داير اولدي شخبارك خاصك شي حاجة ؟ كي داير وسط هاد الحبس
رد بصوت مبحوح : الحبس مداير ليا والو انا اللي جالس فيه بلا عراضة... كي بقا صفوان هبطات ليه السخانة؟
تنهدات مينة بعمق وقالت: اااودي دازت علينا ... داك الوليد مسكين مكيتحركش من بلاصتو .. فين ما حطاتو كيبقا جالس والى نعس وفاق كيبقا فايق ويلعب بلاصتو متسمع كاع حسو ... برا الحمد وراه كيلعب ويضحك ...(تنهدات بتعب) صوفيا اولدي اللي مدوزاها علينا صعيييبة صعيييبة صعيييبة تربيتها صعيبة بزااااف ... ماتبغي تمشي عند حد .. ماتبغي يقيسها حد ماتبغي تجلس ماتبغي تشوف الناس ... النهار ومطال وهي كتبكي .. الماكلة كتلوحها والى وكلناها بزز كترضها ... من يدي ليد جميلة ولفات اليد وولفات بوحدها
عقد حجبانو: واديوها شوفو مالها علاش كتبكي علاش كدير هاكا .. من نهار تزادت وهي هاكا تديها مها دوز ليها
تنهدات : اودي راه ديناها ماعندها وااالو .. هي تربيتها صعيبة داكشي اللي عطا الله ... الى فرقتيها على خوها تحمي السوق بالبكا .. مكنتهناو حتى كتنعس عاد كيبردو ودنينا ... ايوا دابا راه كتوجد دير ليهم عيد الميلاد والبنت الى تزاد عليها غير واحد ولا جوج كتبدا تبكي وتغضب
مهدي: زعما هي ماهداهاش الله تجي شي مرة لهنا طل عليا ؟ هاا؟ عام هادا عمرها قالت نمشي نشوفو ولا نطل عليه ... شكادير دابا ؟ عااايشة حياتها؟
مينة: اشمن حياتها اللي عايشة واش اللي عندو الدراري كيعيش... نهار وهي وسط منهم حتى راسها مكتحكو كن ما انا اللي هازة معاها كن تسطات ... شي مرات كتجلس وسط منهم هم كيبكيو وهي كتبكي قهروها وخصوصا البنت ... انا نهار الاول قلت ليها ماتهزيهاش خليها بلاصتها .. خليها تاكل وتشرب بلاصتها تولف الارض وهي مكتسمعش غير كتسمع صوتها كتجري تهزها حتى ولفات ليها اليد .. الولد كيوقف وهي مزال كطيح وتنوض ونهار نهار وهي معلقة فاليدين حتى الدوش كدخلها معاها بقا ليها غير تخرج وتعيش حياتها
رد : وعلاش مكتجاوبش فتيليفون ؟ عمرها جاوباتني وعمرها عيطات
مشات بسرعة قبل مايفضحها وجهها خرجات من ديك لاصال وتلفت بعفوية راجع بحالو وطاحت عينو على بنت كتسرق الشوفة فيه بخجل جالسة هي ومها فطاولة اخرى كيهضرو مع شاب فلعشرينات حتى هوا محبوس ... بقا كيشوف فيها باستغراب لهاد الصدف اللي من نهار دخل للحبس كل جمعة كتجي وتسرق نفس الشوفات .. بنت بالحجاب والجلابة بحال ديما عندها حقها من الزين وديما كيلاحظ دوك النضرات وهاد المرة ابتسم فوجهها وردات ليه الابتسامة بخجل وقلبات وجهها بسرعة ... دخل فحالو وخرجات مينة طلعات فسيارتها مشات لمرجان مباشرة تقدا معيشتهم من الكارط اللي عاطيها مهدي تصرف منو ... جرات الشاريو كدور وبالصدفة لقات بناصر ومرتو الجديدة كيشريو الكفتة .. وقفات حداهم كتشوف فاللحم وتشوف فيهم بنص عين عاقدة حجبانها نسات اللحم والوقفة تما وبدات ترجع السينتة اللور بدون وعي
[2/7 17:06] 🌸حسبي الله عليه توكلت ...: اخر واحد كانت توقع يتزوج عليها هوا بناصر ... عارفاه زير نساء ... عزيز عليه الشيخات .. عزيز عليه ينوع ويبدل ... كانت كتشوف الخيانة بعينيها وكتسكت وتقول مانخربش العش فهاد السن وكما صبرت سنين نزيد نصبر .. واخا كانت محرمة عليه العلاقة الحميمة معاها خوفا من شي مرض وكانت عايشة معاه بحال ختو من زمااان طويل ... لاكن عمرها فكرات تخرب حياتها وعشها كأمراة مغربية صبارة .. واخا حياتها مكانش فيها طعم واحساس من غير طعم السعادة مع اولادها، تبدل كلشي بين ليلة ونهار .. بسبب مكالمة هاتفية جاتها من جارتها وهي فلكلينيك جالسة حدا جميلة وكتبكي على مهدي اللي تشد داك النهار ... كانت كتشوف فيها جميلة وتسول مالها لاكن خبات عليها القضية وكتماتها حتى تجي وقتها وديك الساعة تعرف بأمر المهدي اللي من حقها تعرف . لاكن المكالمة الهاتف من الجارة اللي جاتها ديك اللحضة مع دموع وحرقتها على ولدها هزاتها من بلاصتها مصدومة والارض كتمشي بيها وتجي وبدون تفكير خرجات كتجري من لكلينيك خلات جميلة غير كتشوف مافهمة والو
تنهدات وسدات عينيها من بعد ما عاشت الماضي للحضات وحلات عينيها فالكزار قائلة
- واحد جوج كيلو لحم وكيلو كبدة ... وكيلو كفتة
[2/7 19:33] 🌸حسبي الله عليه توكلت ...: سمع صوتها حداه وتلفت بسرعة شافها واقفة حداه كطلب اللحم .. تفاجأ وبقات المرى الثانية حاضياه بنص عين معاجبهاش الحال يشوف فيها وجرات الكروسة فيدها ولدهم الصغير وقالت بغيض
- يالااااه غتبقا واقف ليااا هنا ؟؟؟
زادت دافعة الكروسة لابسة جلابة كحلة مزيرة والشعر كحل قصير .. وجهها سمر منقط بالكلف وحواجبها مرققاهم ودايرة عكار ربعة وعشرين ساعة زرق ليها الفم .. الصباغة مقشرة فيديها كحلة وكتشوف راسها مكاينش بحالها وماحسن منها حد وباينة حاكمة بناصر .. اما مينة تنهدات بقات غير كتشوف فيهم وتردد
" لا حولة ولا قوة الا بالله" .. كن غير بدلني بماحسن مني والله مايبقا فيا الحال ... اودي كتخليو النقا فالدار والمرى بلارة وكتمشيو للزنقة تجيبوها زرقا(تندهات) ارا الشريف ارا الله يرحم الواليدين
هزات لحمها وكملات سلعتها كتقدا ساهية ودازت جهة المكياج كتشوف وتامل .. تشهات صباغة فالدفار وشي عكار لراسها وخدات ليها واحد ولجميل واحد وماخلات لحفايدها حتى حاجة ... فين ما تعجبها شي لبسة تهزها اما الالعاب عمرها دخلات عليهم بلا مدخل لعبة .. كيبقاو فيها وكتمنى يعيشو بحال جميع لوليدات بين واليديهم ومتشوفهمش ناقصين من شي جهة .
خرجات ركبات فطموبيلتها ورجعات للدار حلات الباب مدخلة التقدية سخفانة ... مع الحلة تعرض ليها صفوان كيجري دافع وجهه كأنه غيطيح فرحان فيدو لعبة وعريان لابس ليكوشة فقط وحال يديه كان وسط الدار اللي رجعات مرونة بالاعلعاب والمخاد دالصالة فالارض .. الديكورات تهزو والطبلة ديال الزاج تهزات حتى هي و اي حاجة محطوطة ديكور او قابلة للكسر او من زجاج تحيدات بقا غير الفراش والتصاور فالحيط . هزاتو عندها كضحك فرحانة فالباب وتردد
ناضت خوات الطريق وعلى سعدها ووعدها حيدات مينة الجلابة لاحتها فوق الباب وهزاتها عندها برغوتها فوق رجليها كتمسح ليها عينيها لاكن صوفيا طلقات بكية اخرى جارحة يسبب ردة فعل جميلة عليها .. عزات فيها الطريقة باش ناضت معصبة وخلاتها فالماء كتبكي وبدات تعنق فمينة وهي كلها رغوة ولحمة رطبة وتردد
- ممااا... مماااا...
مينة بصوت مرتفع : وااااجي اجي عند البنت
رجعات جميلة كتسوط طالع ليها الدم من هادشي اللي كتعيش يوميا ودخلات للحمام كتنفخ ويدها على جنبها
شنو دابا ؟ هااا ؟ غنبقاو نلعبو هنااا
مدات صوفيا يديها كتبكي وهزاتها جميلة كتسوط وتسكتها والخاطر مكاينش .. فزكات كاملة والبنت مابغاتش تسكت حتى خفضات من حدة صوتها وبدات تراري وتبسو عاد سكتات وقلبات عليها مشات عند مينة اللي حطات صفوان فالماء حتى هوا وحطات حداه صوفيا كتلعب ودير ليهم الخاطر وتغسل ليهم بلاما يعيقو وبالضحك والبط والغنا وشللات ليها هي اللولة قبل ميتبدل ليها الخاطر وتبدا تبكي بلا سبة .. لواتها فالفوطة ومداتها لجميلة بسرعة كتحل عينيها بزز والفم حمر .. كانت جميلة وجدات الرضاعة تزرب عليها تنعسها وشداتها عنقاتها فالبيت وضلمات عليها كولشي وعطاتها الرضاعة شداتها كترضع وتجبد فشعر جميلة وتلعب فسنسلتها وتهز فرجليها والاخيرة كتسنا وصابرة ودايرة الهاطر باش تنعس حتى نعسات وحطاتها لبساتها ليكوشة وخي ناعسة وبيجامة واسعة خفيفة وخلاتها وخرجات لقات صفوان باقي فالماء كيلعب ومينة حداه كتسناه حتى يشبع
جميلة: شدات راسها) راسي غيتفركع ... بغيييت غيير نخوي عليا سطل دالماء مانعسات حتى تنفخ ليا راسي ...علاش جبتي التقدية ياك قلت ليك ماخصني حتى حاجة من فلوسو
جميلة بنرفزة: ماخصنييش بفلوسو قاادة بولادي ... الى غير فلوس لحرام ديالو ماعندي ماندير بيهم وهاد التقدية ماعندي مندير بيها
مشات كتنكر وتغوت للكوزينة ومينة مطنشاها وكتردد
- عا بقاي دوي تما تا لغدا الصباح
مشات كتمعس بطاطة و خيزو لولدها فلكوزينة وحالتها حالة... فين هي جميلة اللي كانت من قبل ... الكرش بقات بلاصتها مابطراتش بيها و شعرها تشوك رجعات كتمشطو من وقت لوقت .. دفار تقطعو مابقاتش كاع كما كانت .. حياتها تبدلات وكل مرة توقف حدا المرايا وتبكي كارهة راسها .. دخلان عليها مينة لقاتها كتبكي بوحدها فلكوزينة وترفس البطاطة وقالت
تنهدات : اشنو اللي مبكيني ... شوفي حالتي ... شوفي كي وليت ... شوفي حياتي وشوفي كي كنت ... كلشي بسبب ولدك ... كووولشي ... خرج عليا .. كن غير بعدا تلات بيا فشي حاجة زوينة معاه ميبقاش فيا الحال ... فاللخر طلع يبيع ويشري فالحشيش والغبرة وزايدها بالحبس
ردات مينة بحدة ويدها على جنبها : ماباااع ماشراااا ... شفتيه ؟ شفتيه بعينيك؟؟ ... باغا تلسقي ليه شي حاجة مادارش فيها يدو كاااع؟ اااش دار ليك هاد الراجل اااش كتاب عليه يدخل لحبس هادشي اللي عطا الله
ردت جميلة بحدة وصوتهم علا فالدار قائلة
- مدااارش؟؟؟ وشنو كيدير فداك البار؟ ومع دوك البزناسة ؟؟؟ تسع شهووووور مافكرهش فيها وقال جايين ولاد اش دارو فهاد الدنيا ... اش دارو حتى يكون باهم بحال هاداك ... يبدل ويدير شي حاجة على قبل ولادو ... هوا لااااا عزيييز عليه الحبس كل مرة يجبدو حتى مشا ليه ... شكون دفعو ؟ انا ؟؟؟ شكون قاليه خشي راسك تما ؟ انا؟ ... فأخر ايامي تزوجت بحباس وراه دابا فلحبس ... اللي سولني فعائلتي كنقزل ليه مشا لخاريج .... ولادو يرضاو بيه ؟ يرضاو ؟ يدير غير بحسابهم اما انا راه عارفاه اش كيسوا وتهنيت منو ... كتقولي ليا ماداير والو ؟؟ اااودي خلينا ساكتين واخا تحلفو ليا ماعرفت فين راه يديرها وكان كيبيع ويشري فالغبرة .... بقا لاسقني وتابعني حتى خرج ليا على حياتي
ردت مينة بغضب: حتى كنتي كنتي باغاها وكنتي عاجبك الحال ودار عليك اللي ميدار دابا مابقيتيش راضية بيه ... صافي قلبتي وجههك عليه باااز !!!
جميلة: فييين عمرني كنت باغاها ؟ هوا اللي بزز عليا كوولشي وكنقول ربمااااااا يدير عقلووو .. مادام داير عليا هادشي كاامل مانحكمش عليه يقدر يكون ولد الناس ... انا غير بنت تقت فيه ... ايوا؟؟؟ فاللخر قجني خلاني كنشم الرابوز حياتي كااااملة... المجر مطرق غير بيه الى خطاني مشيت ... وزايدها بلكدوب غادي يتاجر فالمخدرات عندو زايد ناقص ... وكل مرة تجي من عندو معمرة وتقولي ليا مدارش... اه حقا مجابو؟؟؟ اااش غنجاوب يعطيني تيساااع خرج عليا شوفي حالتي كي كنت وكي رجعت واش هادي انا قبل منعرف ولدك ؟؟؟ خرج عليا الله ياخد فيه الحق تفو
بغضب وحدة ردات عليها مينة : نتي اللي باغا هادشي رااااسك كاع العيالات كيدخلو رجالهم لاحبس ... بلاصة ماتحمدي الله عندك جوج ولاد شهوة منهم كيقلبو عليهم للدوا جالسة تهضري ... بااااز ليك ! ...ومسحتي فيه كووولشي ماقدرتي حتى طلي عليه مرة وحدة تقولي نشوفو وزايداها بسبان والمعيور سرررك نيييت الصالحة هي اللي تعرف ليك مخرجاك من عين البرا
جلساتو على رجلها كتوكلو ومخلياه يلعب ويرون فالطبسيل على خاطرو وسكتات ساهية كتنهد كفاش دير تديهم ليه يشوفهم ؟ كفاش وجميلة نهار ومطال وهي وسط منهم وغادي تشعل الى قالت ليها نديهم للحبس يشوفو باهم وهي على سبة غير كتشمع حسو وسيرة الحبس كتبدا تغوت ، والمشكلة عارفاها كتمشي للزيارة نعار الجمعة عندو وتجي وماعندها حتى عذر تخرجهم وبنهار الجمعة من لفوق . فديك الاثناء وهي ساهية كتخمم وصلها مسج هزاتو لقاتو من مهدي
- اجي الخميس بلا متشاوري معاها كاع انا ريكلت الشغل هنا وجيبي معاكم صفوان وصوفيا غنتسناكم نهار لخميس "
ردت على المسج ب "نشاء الله " وناضت هازة صفوان طلات على البيت تشوف جميلة اش كدير لقاتها ناعسة حدا بنتها وبدات تنهد رجعات جلسات بلاصتها فالصالون كتلعب مع صفوان حتى نعس .
غضبات من جديد جميلة من مينة بحال كل مرة على اخر كلمة قالت ليها لا كن هادا مكيعنيش انها كرهاتها .. او حقدات عليها ... بل هي العوين وعليها كتعول وحتى الى غفلات كتكون مينة رادة البال .. حمل كبير هازة عليها ومربية كبدة على ولاد ولدها اللي كبرات على يديها اكثر من ولد ياسين اللي قليل فين كتشوفو حيت كابر مع مو وجداتو . ضربات التيليفون لمرتو سمعات الصدع والبشار كأنها فسوق وقالت
داك الولد زعما ماهداكش الله تجيبيه نشوفوه ؟
ردت عليها بميوعة: بغيتيه اجي عندو ماعندوش الرجلين باش يجي عندك
قطعات عليها خلاتها واقفة فواحد الشارع مطرطق بالناس والفراشات فالارض هي ومها ... لابسة دجين كامل مشرط ومقطع وصندالة كتجرها فرجليها وبودي مزير تقول ماوالداش ... ضعيفة وخفيفة خف من رزقها ومها واقفة بجلابة وصابو جامعة شعرها ويدها على جنبها
- اش قالت ليك ؟؟؟ علاش معيطة؟
ردت: قالت بغات تشوف وسيم
الام : تشوف وسيم ... قولها سيري تنعسي وسيم عا نساوه .. الله يخليها تريكة ... لا راجل مقاد لا مو مقادة ... ولاكن كولشي منك نتي ماديريش بحال لالياتك تحضي راسك وتجمعي رجليك ... هاهوا ضحك ومخليك جالسة حدايا .. بقيتي عليه نبقا مع ماما منسكنش مع الجيران حتى دارها ليك على قد فمك ... بلاصة ما تجريه بالخاطر والسياسة حتى يتقاد شادة الضد... ولاكن زواج البراهش هوا هادا
تحنات على واحد الفراشة ديال لماعن ملهية كتقلب فالطناجر وبنتها حداها كدور فعينيها وتنفخ وتسناها تنوض فالاخير قالت
- انا غندخل لهاد لحانوت تا تسالي مع الماعن
جرات ولدها حداها كيتمشا بشوية لابس حسن منها تقول ماشي ولدها وكولشي من رزق باه اللي كيجيب ليه ويحط ليه ويصرف عليه والريال ميخليه ليها تشدو واخا عيات دير فالسبة .. يمرض يهزو يداويه .. كل مرة شاري ليه مايلبس .. الالعاب مامقصرش معاه .. البلايص المخيرين كيديهم ليه غير فاش كيكونو بوحدهم اما فاش كتكون معاهم هي كيبقا واقف فراس الدرب مجمع . الغصة ديال ديك التزويجة مابغاتش تسرط ليه وفين ما كينوي ينعل الشيطان ويقول سترتها كيتفكر دورانها مع ولاد الدرب كاملين واللي جا تصاحب معاه وتمشي معاه كيرجع يكرهها ويعيفها ويخليها ميبانش ليها غير الى بغا يشوف ولدو .
دخلت لحانوت ديال لحوايج كتقلب وتلوى فالمشية مطولة الدفار وضحك مع مول لحانوت وتفرنس وتسول بشحال هادي وبشحال هاديك حتى ضارت لقات الولد طار مابقاش حداها ولاحت السروال من يدها مخلوعة كتشوف فجنابها وتغوت
- اويلي ... ولدي ... فين ولدي؟؟؟
خرجات كتجري من لحانوت وتقلب وتغوت والناس تجمعو ومها جان كتجري ضربات فخادها وقالت
طارت عليها بنتفة قدام الناس كتغوت وتمرغات فالارض كضرب فخادها والناس مخلوعين كيسولو على هاد الولد كي داير وهي كي لحمق كتغوت وتوصفو ودور بلاصتها
هادي اخرت المرى اللي تحل فمها فالماعن والشراوط وتخرج ولادها وتنساهم .. او تقول ليهم شدو فيها مطلقوش باش تشوف وتقلب على خاطرها ... هادي اخرت المرى العديمة المسؤولية ومكضربش حساب للعاوقب او تخيل راسها تلف ليها الولد وسط الزحام .. هادي اخرت كل وحدة ماتستاحقش تكون ام ابدا بسبب استهتارها .. اهمالها ...عدم تحمل المسؤولية ... الاف الاطفال كيتلفو يوميا ... كيتسرقو يوميا ... واغلبهم من الاسواق .. من الاماكن العامة فين كيتلهاو الواليدين ... ملايين الامهات منهم مرت ياسين اللي ماحاسينش بخطورة الوضع او ماكيفروش فيه حتى كيوقع الفاس فالراس ... العديد من النساء كيسناو ولادهم ... سواء فجمع مع النساء فشي جردة ... او فالدار حتى كيتحرق ليها ولدها ... او تخلي الباب محلول حتى كيخرج للزنقة .. او تخرج وتنسا راسها واش معاها طفل حتى كيتسرق ... او كيتلف ... والعواقب كتكون وخيمة وغالبا ما كيتشتت فيها الشمل وكتدمر فيها الحياة والنفسية ديال العاىلة كاملة ... ممكن يلقاوه وممكن لا ... وهنا كيبدا الموت البطيىء حتى كيفنا العمر ... فين يكون هاد الدري .. واش عايش ؟ واش ميت ؟ ياكما رجع لعبة فيدين مرضى النفسيين من واحد لواحد حتى كيموت .. او فيد مجرمة باعتو لشي عاىلة .. او ساعية كتسعا بيه ومكرفسة عليه ... او و او و او ... هاد الاحتمالات كاملة كتبان حتى كيوقع اللي وقع عند هاد النساء المهملات اللي يستحقو القصاص بسبب اهمالهم . فاش ينفع الغوات ؟ فاش ينفع البكا ؟ فاش تنفعك الشرطة الى منفعتيش راسك قبل فوات الاوان وكنتي حريصة اشد الحرص على طفلك ... ماشي لمصلاحتك ولكبدتك .. انما لمصلاحتو كطفل محتاج الرعاية الكاملة والحرص الشديد لانه ليس لعبة بل طفل دو قيمة كبيرة وحسابو عسير امام الله لانه نعمة ومسؤولية وامانة يجب الحفاض عليها .
البكا والغوات غير زاد الطين بلة ... الناس تخلعو وكلشي كيقلب والطفل مالقاوش ليه الاثار ... مو غتسخف وجداتو غتحماق لاكن ماشي وقتهم يوقفو الناس فجنبهم او يواسيوهم كما قال راجل كبير كان دايز من تما وشار بصبعو بغضب ليهم وقال
- بكييي تما وغوتي باش تبقاي فالناس زعمااا ... تستاهلي تستاهلو بجوج اللي ماحاضيينش ولادكم كدخلو للسوق وتنساااااو راسكم وتحلو فمكم .. ها الولد تلف .. كل نهار تالف واحد فهاد السوق ... مقادرييينش تولدو ماتولدووش ولا سدو عليكم فيدوركم على مخرين ولادهم ... تخافو على بورطتبلاتكم من السرقة وماتخافو على ولادكم دمكم ولحكم وتنوضو تغوتو وتبكيو ... حسبي الله ونعم الوكيل فيكم
الخبار وصلات لياسين ولحق عليهم فالكوميسارية كيجري مع الدخلة نقز عليها قدام البوليس بضربة للعين كن مافكوهم كن قجها تما هي ومها وقال كيغوت
جميلة: ماعندي مندير بيها عطيني ديالك نمشي فيها ولا غنشد طاكسي
مدات ليها مينة السوارت: لا حولة ولا قوة الا بالله
شدات جميلة السوارت خرجات ولقات فاطمة كتجفف باب دارها .. دازت مالاحت ليها حتى السلام وهبطات فحالها ، اما مينة ولات خف من الريشة .. مشات طير لقاتهافرصة على الاقل تدي ليه واحد فيهم للزيارة .. لبسات جلابتها كااعادة وصندالتها ريشبوند الحمرا باقا جديدة كتفشفش حتى هي وجمعات شعرها اللي رداتو بني فاتح احسن من الصفورية اللي كانت مشوكة ليها الشعر وجاها مع بيوضية وجهها .. دارت من العكار اللي شرات اما الصباغة دفار دشناتها نهار شارتها واخا كانت مدابزة مع جميلة . هزات صوفيا وهي مقلوبة بالنعاس لبساتها حوايجها ونزلات كتجري هزات طموبيل مهدي اللي خلا ليهم وطلعاتها اللور فالكرسي ديالها من بعد ما هبطاتو حتى هوا ركباتو وطلعات كتجري سايقة ومخلوعة كأنها كترتاكب جريمة
[3/7 00:19] 🌸حسبي الله عليه توكلت ...: وصلات اخيرا وبدات تسنى يدخلوهم ..دخلوها من باب فيه ممر بوحدها هازة صوفيا فيدها وكتزرب حتى كتولي تجري .. دخلات للقاعة لقاتو جالس فنفس الطاولة بتيشورط بيضاء وسروال رمادي والتقاشر وصندالة اديداس فرجلو ... هز راسو شافها جايا جيهتو والبنية عاطياه بالضهر ووقف دار ابتسامة عريضة حنى برقو عنينيه وبدا ينهج حل يديه بلهفة خداها وهي كدور فعينيها .. تلفتات شافت فيه ماعرفاتوش وحلات فمها والسكاتة بين اللثات كتبكي .. شعرها كحل وجامعة ليها شوية منو بحال الوردة الوسط بفراشة حمرا كبيرة ولابسة كسيوة حمار مخططة بمربعات فالاسود قصيرة وتحتها شبكة كطل فالاخضر ملكي منفوجة .. تقيشرات فرجليها مشبكين فوق الركبة فيهم عقدلت على شكل فراشة وصبيبيط اكحل كيبريو بحال الى معيدة .. وفعلا كان عيد عند مهدي اللي شدها فرحان كيشوف فيها وجلس فشلان بلاصتو معنقها وخشاي وجهه وسط ديك الكسوة ومينة كضحك وتشد ليها فيدها تسكت ..شافتو ماهزش الراس فجاة سمعتن صوتو كيبكي ويزيد يعنق فصوفيا .. تأثرات مينة وميلات راسها كترمش والدموع هابطين ماتوقعاتش يبكي .. فلحضة ندمات اللي مجابتهاش ليه من قبل يشوفها واخا دير المستحيل
[3/7 00:30] 🌸حسبي الله عليه توكلت ...: شدات فيدية دصوفية كتهضر معاهت باش تسكت من البكا وضحك بزز .. العينين كيبكيو والفم كيضحك وتردد
بدات توريها فلعبة جابتها معاها باش تسكت لاكن والو عاد مكتزيد تبكي وتجبد يدها عندها ... اما مهدي فحالتو كانت صعيبة ... كانت اكثر من وصف وكلمات و تعابير يقدروها يكتبوها حروف او يبوح بيها لسان ... هز وجهه وحل فمو كيتنخصص ويتنفس وعينيه حومر ووبحب ولطف عاود عنقها من الجهة الاخرى وسد عينيها مطولا ورجع شاف فيها وقال بحزن وأسى وحب وشوق وجميع التعابير
بدا يراري بيها برجلو ووقف ويشطح بيها على الله تسكت من البكا وكيبوس فيها من هنا ومن هنا وهي كتبكي وتنخصص وتجبد .. وقف بيها شوية كيضحك ويهزها فالسما كأنه كيرميها عاد بدات ضحك وحلات فمها وتسدو عويناتها كتغوت وتجاوب معاه شدها عنقها بقوة باسها باوسة حارة فدونها .. كانت غترجع للبكا فجاة جرات بيدها السنسلة اللي فعنقو وهي تسكت وبدات تشوف فيها وتلهات معاها كدوز صبعها وتكتاشف عاد خلات ليه فرصة فين يهضر ويجلس ويتأمل تفاصيلها
بقا ساكت مهبط راسو كيشوف فصوفيا وهي كتلعب بالسنسلة .. هزاتها كضحك كتوريها لمينة زعما شوفي لاكن الاخيرة بالهضرة والتنهد مارضاتش ليها البال وبدات غير كضحك معاه .. اما مهدي ماكرهش يخشيها وسط صدرو ويسد عليها ... عمرو تخيل يكون اب وعمرو تخيل احساس الابوة وعمرو عرف بقينتو وحلاوتو حتى ولد ولادو عاد عرف بقيمة قول الله تعالى " المال والبنون زينة الحياة الدينا " هنا عرف السعادة الحقيقية فين كاينة ... واخا يتبع الشهوات والزينات كاملين كيبقاو الابناء زينة الحياة والمال كذلك اللي كيسهل الحياة .. شاف الرضاعة فيد مينة وهزها بعفوية حطها لصوفيا فمها ومينة كتردد بسرعة بغات تخطفها قاىلة
- لالالالا غاتبزقها عليك لا ...
كانت ديك الساعة صوفيا جرات الجرة الاولى وهي جالسة مقابلة مع مهدي وبزقاتها ليه على وجهه ورجعات تلعب بالسنسلة بقات شاد عين وحال عين ومينة كتفتف على كلينيكس وتردد
- ها اللي قلت ليك ..راني عرفتها غتبزقها ليك على وجهك حيت عاد رضعات وشبعات
مسحات ليه مينة وجهه وهوا كيضحك وقالت بجدية
- اييه راه كتبزق ... تسالي من الرضاعة وترميها فين ماجات فالارض... والى عطيتيها ترضع وهي شابعة ترضها ليك وعلى وجهك نيشان زعما مابغيتش .. وفوجهك .. الدراري الصغار راه مطورين عنداك يحسابك غير صغار راه مكيعرفوش
هز صوفيا كيضحك فالسما فرحان بيها وهبطها على وجهه باسها وبدا يشد ليها فدونها وفحلاقاتها ويشد ليها رجليها بجوج يلعب بيهم .. سكتات قطعات الحس وتلهات مع السنسلة .. تلفت شاف فمينة بعيون مبتسمة وقال
ردت جميلة بغضب: وعلااااش تديهاااا؟؟؟ ماتخرجيهاش من الدار بقاااي فالدار ماتديهاش للحبس
شافت فيها مينة هازة حاجبها: راه باها ومن حقهم يعرفوه ... وغنبقا نديهم ليه بغيتي ولا كرهتي حيت باااااهم ... باااهم وهما ولادو
ردت بغيض: كن بعا يشوفهم يدير بحسابهم ... هوا بغا الحبس يمشي ليه بوحدو ميوصلش ولادي ليه .. من الاول يدير حساب لولادو ... عاااجبو الحبس ... ايوا خليه يدوز الحبس على حقو وطريقو باش يعرف الحبس كي داير ... خليه يتحبس من ولادو باش ميبقاش يشنت بيه ... خليه ... اااااخر مرة تدي ليا شي واحد فيهم لتماااا
مينة بغضب : اااش دنبهم هماااا ؟ اش دارو ؟؟؟؟ ااااش فيها الى مشاو يشوفوه ويشوفهم ... راه خمس سنين هادي بغيتي يتسطا
جميلة: الى بقا فيك ولدك حتى انا بقاو فيا ولادي ... ميستاهلوش اب بحالووو ... ولادي يستاهلو اب نقي ماشي حباس ... ولاكن هادشي اللي عطا الله زهرهم طيحهم فداك الاب الحباااس
مينة : هاااانتي بديتي طلعي ليا النقشة ... راه كن ماهوا مازولديهمش وماضربك حتى واحد على يديك وقالك تزوجي بيه .... مللي اختي عرفتيه حباس قلبي الدورة وسيري شوفي ليك شي استاد يهضر معاهم اللغة العربية ... اما دابا هادوك راه ولااااااد ولدي ومن حقو يشوفهم وداخل لداك الحبس باطل وجالس يدوز فيه ...
جميلة بغضب: هواااا خرج علىرااااسو خرج على رااااسو وخرج عليناااا ... هوا بغا يمشي للهاوية ميديناش معاه يمشي بووحدو ... ولادي ماشي ديال داك الحبس ... وانا اللي حماااارة وكلبة تبعتو اما انا عارفة اش كيسوا
زيرات جميلة على سنانها كتشوف فيها بغيض وغضب شديد وقالت
- عندك الحق ... ضيع ليا حياتي .. خرج عليا ... وساهل يجيبها من غدا ... انا خليتو ليك ماعندي مندير بيه
خرجات من لكوزينة كتبكي عاوتاني زادت مينة كملات ليها الباقي .. هي كتشوف راسها ضايعة وزادت مينة وضحات ليها الصورة وماوعات بكلامها حتى خرجات كتبكي عاد عضلت شنايفها وحطات يدها على فمها كتردد
- اويلي عنداك تمشي المسخوطة ديرها ليا على قد فمي وتبغي طلق
خرجات كتجري تصلح الوضع ويالاه جات تحل عليها الباب سمعاتها كتبكي وتنخصص وتهضر فتيليفوم ومن كلامها تاضح انها كتهضر مع المحامي
- بغيت طلاقي فأقرب وقت مابغيتش نتسنا ... لالالا دير ليا اي حاجة نطلق مابغيت والو انا بغيت نطلق مابغيت لا حقوق ولا والو بغيت غير طلاق ... هاداك اه هاداك اللي قلتي دابا الخلع ... ندير الخلع .. شحال ديال الوقت كاع ؟ صافي طلقني فهاد الشهر ماطلب ليا لا حق لا زمر
دفعات عليها مينة الباب مخلوعة كتشوف فيها وقالت حاطة يدها على فمها
- جميلة !!!!
جميلة: صافي بسلامة حتى دير داكشي
قطعات ومينة واقفة موراها مصدومة .. مشات جلسات حداها بسرعة فدهشة متوقعاتش توصل المسألة لهاد الدرجة وقالت بأسف كتأسف
حطات مينة يدها على صدرها حتى بغات تبكي وقالت : انااا اللي غالطة انااا اللي مكانش خاصني نديهم وعمرها تعاود صافي؟ ... انا ابنتي راه الكبدة اللي خلاتني نديهم راه ماحاساش بيا ... ويلي !! وصلنا للطلاق ؟؟ ... عفاك ابنتي ماتخلينيش نكون انا السبب راه غادي نمرض (بدات تبكي) راه والله مانرتاح
بقات جميلة ساكنة كتشوف قدامها وتبكي بحرقة وقالت
- ماشي نتي السبب ... هوا السبب ... نتي مادرتي ليا والو ... مشافت منك غير لخير ... ولاكن راه انا ضعت معاه ... راه حياتي ضاعت ...
بدات تبكي حتى تخنقات ومشات تجري جبدات الرابوز من المجر رشاتو فمها وضرباتو مع الحيط كتبكي وتردد
- خرج عليا ... خرج ليا على صحتي وعلى عقلي ... ضيع ليا حياتي
جراتها مينة كتعنق وتسكتها وتردد: الله يرضي عليك ديري بوجه ولادك ... ديري بوجه داكشي الزوين اللي كان كيدير .. نتي عمرك قلتي الطلاق حتى دابزنا دابا ... صافي سمحي ليا انا اللي غالطة عمرني نخرجهم بلا خبارك ... وراه والله مايلقا بحالك وحسن منك تكون طبيبة ولا منعرف اش تكون ... وعمرو يديرها انااا اناا عارفة ولدي ... عارفاه مزيان عمرو يبدلك غير صبري ... صبري راه كيدير لي فجهدو باش يخرج ويرجع ليك ولوليداتو
بقات جميلة ساكتة وكتبكي مارداتش عليها حتىفشلات بالبكا وتكات حدا بنتها كتنخصص وتنهد .. اما مينة خرجات من البيت ندمانة كتطلب الله مايوقعش داكشي اللي خايفة منو والاهم ماتكونش السبب والا عمر ضميرها يهنيها .
بقات جميلة متكية ويديها على ولادها بجوج وريحة مهدي عاطية .. كحزات عندهم كتبوس فيهم وهما ناعسين وهزات راسها كتشوف فيهم بحب وحنان حتى وصلها مسج فديك الاثناء فجاة ... غريبة ؟ ومن من ؟ من مهدي ؟ ... من زمان ماسيفط شي مسج ليها من نهار عيا يسيفط بلا رد دار بناقص... حلاتو قراتو وتفاجآت بشنو مكتوب فيه
" مزال العقل مانساكش ومزال القلب كيبغيك ... حاس براسي بحال الى شفتك ليوم وجلست معاك "
بقات ساكتة كتشوف فداك المسج وتقرا وتعاود ... كفاش تفسر احساسها وكفاش توصفو ؟ احاسيس لا يطرمها الكلام ولا يفهمها العقل ... هي براسها تلفات ماعرفاتش اشمن اتجاه تشد ... من جهة كارهاه ماحاملاهش وبسببه معدبة وعايشة حياة ماختارتهاش بنفسها وماشي ديالها .. ومن جهة فرح قلبها بدات المسج وكل شوية تقراه وترجع ليه ... كدور تكا وتلعب فديك السنسلة بصبعها وتعاود تهز تيليفون تقرا المسج كأنها كتبحث على كلام اخر تقراه ... باغا تسمع المزيد لاكن من بعد داك المسج ما بعت حتى واحد اخر .. تنهدات وكل مرة تعاود الجملة فدماغها وهي كتأمل ملامح وجهها وقربات صوفيا ليها بديك الكسوة المفرفرة عنقاتها وخشات وجهها بعيون مغمضة كتشم ديك الريحة .. ريحة اللي كتفكرها بذكريات كثيرة بزز منها .. حركات فيها مشاعر واحاسيس مرهفة مشتاقة لديك الايام وماكرهاتش ترجع .. ماكرهاتش تعاود تعيش دوك المغامرات ... تشد طريق معاه بالليل ومع الفجر معنقاه ... ريحة فايحة من صوفيا فكراتها فجميع الذكريات ... علاقاتها الحميمية و سفرها ومغامراتها وضحكها ولعبها ... ابتسمت لا اراديا كتفكر شي يامات وتنهدات كتردد مع راسها ... واش يكون باقي كما هوا ... باقي نفس الشخص اللي عزيز عليه ينشط .. عزيز عليه يسافر ويعيش ويضحك .. ولا حتى هوا يكون تبدل وختر ومابقاش عندو الخاطر .. المشاكيل اللي دازت عليهم بجوج كتزيد فعمر الانسان عشرين عام اخرى وتشرفو وتقتل فيه الحماس .. واش يكون وصل للدرجة اللي وصلات ليها هي . واخا تعدبات ومزالة معدبة متقدارتش ترتاح لاكن ربحات هدية جميلة فحياتها واللي هما وليداتها ... صعاب فالتربية وكلاو من صحتها ومن زينها ومن وقتها .. لاكن بدلو حياتها من منضور اخر خلاوها تفرح وتحس بالسعادة وهي كتشوفهم كيضحكو ... وهي خارجة تشري ليهم حوايج جداد .. وهي كتلعب معاهم .. عمرو ليها وقتها حتى مابقاتش قادرة تشوف راسها فالمراية ... تبدلات جميلة .. من امرأة طموحة كتحب الحياة وباغا تعيش وتستمتع لامراة كتشوف السعادة فقط فعيون وليداتها ومابقاتش كتبان ليها السعادة فداك الطموح .. فدوك الخرجات والسهرات ... فالفلوس او حتى فعائلتها اللي نساتهم مابقاتش كاع كتفكرهم ... هنا عرفات طعم الحياة حتى هي وباللي اعضم انجاز عند المرأة مهما وصلات وكانت مكانتها فالمجتمع كبيرة كيبقا ولادها انجاز كبير .. وعضيم بالنسبة ليها والسعادة الحقيقية اللي مكانتش عارفاها .. بعد تفكير عميق تعمقات فيه اكثر بدات كتفكر لحضات اللي كتكون لابسة فيها شي حاجة ملونة وكيجي صفوان يعنقها ومكيبغيش يطلق منها ويبدا يلعب فدوك الالوان ويحط راسو على صدرها .. او فاش كتمشط شعرها بالمشط وتعلق فيها صوفيا غير باش تشد فشعرها وتلعب فيه .. تفاصيل بسيطة كضيف على الاطفال سعادة كبيرة .. شكون قال الاطفال مكيفهموش ؟ مكيعرفوش؟ بل كيعرفو ويحسو واكثر شيء كيبيغوه هوا الجمال ... كيبغيو كل ما هوا جميل ... فتاة جميلة بشوشة يقدر يسكت عندها طفل عمرو شافها او عرفها .. او يبكي عليها ويلسق فيها .. ممكن يتغرم بيها لجمالها غرام الاطفال البريء وفين مايشوفها يفرح ... وهادشي اللي لاحضاتو جميلة فولادها بجوج وبدات تقارن وتلوم فراسها ... فعلا مقصرة من جيهتهم . .. من حقهم يشوفو جمالها .. من حقهم يشمو رائحتها الزكية ... علاش حارماهم من ابسط الاشياء ... اشياء بسيطة عندها تأثير كبير على الاطفال .. مجرد رائحة زكية كتخليهم يحبوك .. يرتاحو ليك ويستسلمو فيديك ... حتى هما عندهم حاسة شم اللي كتخليهم ينفرو ... علاش ام خانزة عرق وريحة ميقدرش انسان كبير يتحملها كتهز طفلها الصغير تعنقو وتخشيه فأحضانها وكأنه لعبة ماعندو حواس ... فقط لانه طفل صغير مكيعرفش !
جميلة استوعبات اخيرا وضعها ومكانتها كأم اللي كطلب منها التركيز فالكبيرة والصغيرة ... وفالحال ناضت استغلات فرصة نومهم وحلات واحد المجر بدات تقلب فيه لقات كولشي عندها خاصها غير تحرك يديها .. ربما الموراا يطلع راسو .
وباش تزيد تحمس اكثر حلات اليوتوب كتقلب بين القنوات حتى طاحت فوحدة عندها اربعة اطفال وجميلة ونضيفة كانها موالداش دارت فيها النفس بكلماتها وروتيناتها واثرات عليها بشكل قوي فلحضة كانت محتاجة اللي يخرجها من داك الجو الكئيب وخلاتها توقف وتراجع نفسها .. واخا ماشي على قبلها .. وانما على قبل اطفالها حيت يستاحقو ام بشوشة .. جميلة .. نضيفة ومفعمة بالحيوية والنشاط
وصات مينة عليهم وهما ناعسين ودخلت للحمام هازة اغراضها وتيليفون فيدها وسدات عليها باش تعطي وقت لراسها ... واخا وقتها محسوم سرقات دوك اللحضات وبدات دوب فلاسيغ اللي شحال وهي منسية مع الجهاز ديالها فالمجر وبدات تحيد الشعر راسها من رجليها وفنفس الوقت مونسة بروتينات اللي فيهم استفادة ووقدرو يردو ليها تقتها فالنفس بعيدا على التجفاف او تكراط او اي حاجة كتعلق بشغل الدار .. روتينات كتشجع على النضافة وكتزيد التقة فالنفس وكتحمس وتأثر بشكل ايجابي على النفسية ديال كل امراة .
من والو او من ابسط الاشياء بعيدا على اسراف المال او تبدير كي تكون تجميلة قدرات توصل لنفس النتيجة فقط بابسط الاشياء وبلا متخسر حتى ريال ... مجرد مكونات بسيطة من المطبخ جمعات بيناتهم كقناع مرطب ومغدي لشعرها ولوات عليه سولوفان وحيدات الشعر راسها فالحمام ودارت تبريمة لجسمها من ااحامض والداد و الحنة وصابزن بلدي .. ماكلفوها حتى عشرة دراهم كاملة ودخلات طلات راسها وبدات تحك وتعاود حتى بدلات الجلدة ودخلات موراها مينة حكات ليها ضهرها وانتبهت للوشمة اللي بين كتافها وبدات تنكر وتحك
- مكتلقاو ماديرو كتبداو تزوقو فلحمكم ...
جميلة: واشحاااال هادي ماكنتش كاع كنعرف اش كندير
مينة: حيدي عليك هادشي ولاهيلا خصكم عقل .
حكات ليها وحطات لكيس خرجات خلاتها كملت راسها وحكات رجليها تا طابو وهبطات شعرها غسلاتو وسالات ولبسات بينوارها ووقفات قدام المرايا كتشوف فراسها بابتسامة وتردد باستغراب... اش درت ؟ اش خسرت ؟ واش كان ضاروري خاصني لفلوس باش نتهلا فراسي ؟ ولا ضاروري خاصني نهار كامل؟ غير حمام بوحدو راه فيه اهتمام كبير ونضافة كبيرة بانت بسرعة وخفافت وحسات بعضامها خفاف عليها كأنها كانت هازة وسخ الدنيا كامل .. علاش بنادم كيتسنا حتى يدورو عندو الفلوس عاد يقول نتهلا فراسي ؟ التهلو خاصو يدين وكلشي ليه بديل ... كلشي ليه الحل والنضافة فقط اهتمام كبير ماتحتاج موراها حتى حاجة . حسات بنعومة بشرتها ... بملمس ورطوبة فشعرها .. رائحة زكية ... خرجات بداك البينوار والفوطة كدامها حومر وحناكها مزنكين بتقشير الفرماجة اللي دارت ليه .. لقات الاطفال ناضو وجالسين وسط الدار اللي ملوبة العاب بحال الحضانة .. شافوها دايزة بحال البطة فداك البينوار وناض صفوان فرحان كيجري دافع وجهه حتى كيبيغ يطيح .. اما صوفيا حريرتها حريرة مكتقدر تزيد حتى خطوة غير مادة يديها وتبكي محكورة كتشوف صفوان غادي وهي كتوقف وطيح باغا دير بحال .. مكتحبو مكتوقف مقادة وبغات تمشي عند جميلة وكلشي بسبب الهزان فاليد من يد اليد اللي ماخلاهاش توقف على بكري بحال صفوان وقفات مع السداري كتشوف فيهم وتبكي وتعيط مللي ماداها فيها حد خشات وجهها فالسداري كتشهق ومشات ليها جميلة كتجري وضحك عارفاها غضيضيبة وديما كتحس براسها محكورة من جميع النواعي .. وغضبها الكثير واللي كيعصبها كيخليها تبكي ديما هوا الوقيف والمشية .. باغا تمشي بزز وفاش مكتقدرش كطيح بالبكا .. ماتعلماتش تحبو وتلحق الحاجة وكانت تجلس شوية وتمد يدها يهزوها ونهار اجتهدات وقفات مع الطبلة وجلسات ومن تما ولات توقف فبلاصتها وتجلس وتعيط النجدة يجيو يهزوها .
بدات جميلة كضحك وهزاتها عندها وجلسات فوق السداري .. شدوها ماخلاوهاش توصل الكوزينة .. صفوان بدا يخشي يدو جبد البزولة من البينوار ولسق عليها مكمش كيرضع وصوفيا كتسنا يحلبو ليها فالرضاعة وجميلة شاداها وكتشوف فيها بابتسامة وقالت
حاولات جميلة تعطيها لاكن مابغاتش تشدها وعمرات ليها الرضاعة وبقات عاصرة معاهم كل واحد من كيجر .. كيرضعو فجميع الوضعيات .. جالسين واقفين عوجين دوخوها ... باغين يلعبو .. باغيين يرضعو باغين كولشي فدقة ... هبطو ليها الفوطة على راسها ولقاو الشعر فازك بارد وناضو كل واحد منين كيجر تا نتفوها وهي تنوض خلاتهم لمينة ومشات سلتات للبيت لبسات بيجامة فيها مربعات فالالوان مبهجة صيفية قصيرة ونشفات شعرها وبغات حتى هي تزوق شوية .. صبغات الدفار بالغوز وقالك بغات تلسق الشفار .. فعلا لسقاتهم ورشات ريحة وخرجات تجلس معاهم
مينة : ايوا هاااكا ديري مااالك اش خاااصك ؟؟؟ ويلي عاد بان فيك الضوء !!!
بدات ضحك على ضو اللي بان فيها حيت عارفة راسها كانت بحال الخربة ... يالاه جلسات شافو الالوان فيها وهجمو كيتعلقو ويلعبو .. مشا ليها صفوان لواحد لعين نيشان شد الرمش اللي ملسقاه جرو كامل طيرو وخشاه فمو وهي تقفز كتغوت
- ااويلي ويييلي طلق طلق طلق طلق ...
خرجاتو ليه من فمو ودارت بناقص من شي رمش .. اما صوفيا مشات ليها ليديها شافت اللون غوز وتحنات على صبعانها كتمص وجميلة كتهرب يديها وتموت بالضحك
الى بغيتي تعيش السعادة ماتسناهاش هي تجي عندك .. هي دق بابك .. قلب عليها ودير المستحيل باش تلقاها ... وغادي تلقاها وفأبسط الاشياء اللي متقدرش توقعهم ... السعادة قريبة منا .. هي وسط ومشاكلنا ووسط روتيناتنا المملة ووسط همومنا ... الى فكرنا غير شوية وخدينا الامور بباسطة غادي تحولو جميع الاوضاع السلبية الاجابية وغادي نحسو بالسعادة بلاصة الحزن .. بلاصة الكآبة... جميلة رجعات بالذكريات اللور ... تفكرات الفترة اللي كانت حاملة فيها وندمات عليها اشد الندم .. حيت هي اللي تشبتات بالكآبة وحولات جميع اللحضات لحزن وتدمر ومافكراتش تقلب الاوضاع لصالحها ... تعيشهم وتستغل فترة حملها .. مقالتش فترة غدوز مانقنطش .. منشكيش ... منتقلقش ... بلعكس فترة فيها بزاف ديال التغيرات وكل تغيير ليه بزاف ديال الاجابيات ... ندمات على اللحضات اللي معاشتش فديك الفترة ... واستوعبات انها فترة كتجي مرة فااحياة ولا تتكر وذكريات دوك الاطفال اللي كانو فكرشها لن يتكررو ولن يعودو من جديد لكرشها باش تعيش دوك اللحضات .. لحسن حضها كان مهدي كيصورها ... كان كيدير ليها فيديوهات لربما تفيق شي نهار ووتلقاهم كما قال ليها هوا .. اما بالنسبة ليها فمبقات ليها حتى ذكرا .. وماكانت غتكون ليها حتى ذكرى .. لو ما فكرش شوية وعرفها كتبغي تشارك صورها مع المتابعين وكتبغي دير فيدوهات و تاخد صور .. واخا كان ضد الفكرة لاكن فالاخير رجع يتمنا يشوفها كي كانت .. مايهمش واش راضي ولالا .. الاهم ترجع لايامها على الاقل يخرجو من ديك الاجواء المضلمة . بالصدقة بدات تقلب حتى طاحت على كارط ميموار ودارتها فتيليفونها ... تفاجأت بالصور اللي شافت ... فين كانت ؟ فين كانت عايشة مانتابهاتش ليه وهوا كيصور ... صور كثيييرة لا تعد ولا تحصى .. فيديوهات لها قيمة كبيييرة حسات بسعادة كبيرة وهي كتشوفهم ... منهم فيديوهات ديال غرفة الاطفال فدارو قبل متصبغ وفاش تصبغات ... فيديوهات فاش فيهم لحضة ولادتها فاش يالاه ولدات والاطفال باقين بدمهم كيغوتو وسط الغرفة ... كفاش كانو وكفاش خرجو من الكرش وكفاش غسلو ليهم وهوا كيصور ويوثق دوك اللحضات بعفوية .. صور كذلك وهي ناعسة فالدار بكرشها فسابع نومة ... كان كل مرة يلقاها فوضعية فشكل يصورها .. صورة اخرى وهي متكية كتشوف فيه بنص عين .. تحت عينيها كحل ووجها صفر ماتوقعاتش تلقا ديك الصورة .. دارت يدها على فمها كتردد متفاجاة
- فوقاش صورني هاد الصورة ؟؟؟ ويلي ماعقلتش فوقاش؟
العديد من الصور وهي فايقة وكتشوف فيه .. ماعقلات على ختى وحدة فيهم .. بدات كدوز وتشوف تصاورها فلكلينيك وهي يالاه ولدات .. كانت غليضة بزاف ومنفوخة اكثر من لقياس .. حتى رجليها صورهم ليها منفوخين قدهم قداش .. بقات مستغربة ليه اش كيصور وشنو قاليه عقلو ... اشياء متوقعاتهاش كاع ... صور ليها ناموسة فوق ودنها غتعضها فبيت النعاس بدات كضحك وتشووف لشنو بغا يصنع .. صور ليها عينيها مقلوبين ناعسة وحالاهم وفمها محلول فالسما وعاط ليها فيهم ليزيات ديال تيليفون .. شافت فيديو فالضلام شاعل فيها ضوء التيايفون وهي كتشخر بالجهد وصوتها كيتسمع حتى كيتسد نيفها وكترجع تفش من نيفها .. عضات على شنايفها حشمات من راسها ودوك الوضعيات اللي شادها فيهم بلا متحس .. مصور ليها حبة حمرا كبيرة فقزيبتها وهي ناعسة على الجنب راسم ليها عليها عينين مدورين ونيف وفم جابت ليها الضحكة وبدات ضحك بوحدها .. وهي كدوز شي تصاور شي فيديوهات عاد بداو يبانو ليه تصاور معاها وشافت وجهه من بعد مدة طويييلة وتقاجءة بدات تكبر الصورة وتحقق فيه .. صور وذكريات مكانتش عارفاهم واش كاينين .. واغلبهم وهي ناعسة مسايقة خبار ومنفوخة قدها قداش تزدا ليها الراس مع الكتاف وفمها تنفخ وناعسة تقول ماشي هي .. معنقها من اللور وحاط وجهه على كتفها بالجنب وعينيه تقال فيه النعاس والضلام ومطول يدو مصور هو وياها والفلاش ضارب فيهم .. صورة كيبوسها وصورة ساد عينيه ناعس وصورة تحت شعرها مغطي بيه وجهه كامل .. اش كان كيقول ليه راسو يدير الله واعلم .. واش كان كيطيب النعاس ولا مالقا شغل بانت ليه فالتصاور .. ولاكن بقاو ذكريات عندها قيمة وغاليين بزااف ميتعوضوش .. ذكريات فلكلينيك معاها .. وذكريات لكرشها وهي حمراااا .. فيديوهات كان كيسرقهم وهي ناعسة للاجنة كيتحركو ومرة مرة يدق عليهم بصبعو .. العديد من الصور خلاوها تندم وعرفات بقيمة ديك الايام اللي ضيعات وكانت تقدر تستغلها واخا غير مع راسها ومضيعهاش ... لاكن لقاتو استغل الفرصة فعز المشاكيل وخلا ذكرى جميلة دخلات على قلبها السعادة وهي كتفرج فيهم
ما اجمل الذكريات وما مأجمل الماضي ... دائما كنحننو للماضي وكنساو الحاضر ... حاضرنا اللي غيرجع فالمستقبل وماضي ونحنو ليه حتى هوا ... ونقولو ااايه يا الايام كن ترجع ... حيت ديما الحاجة حتى كتفوت عاد كنحسو بحلاوتها ، ونحسو بقيمتها ... بينما فيدينا وفحاضرنا اشياء محاسينش بيها .. ماعاطينهاش قيمة وملي كيدوز وقت وتبدل الاحوال كنرجعو نحنو ليها ... علاش؟ حيت عارفنها مغترجعش ... مستحيل ترجع .. لهاذا قيمتها كتكبر فقلوبنا .. كترسخ فعقولنا .. وكتبقا ذكرى فقط .. لو ان الانسان يوعى بالحاضر ... يستغل كل دقيقة وكل ثانية ويقول غتولي ماضي نحن ليه .. كانت غتدبل الفكرة ... غنلقاو راسنا متشبتين بخاصرنا ... خايفينو لا يفوت ويزهق من يدينا .. ونتخسرو عليه ونقول يا ليت الماضي يعود يوما .. مجرد طريق دزتي منها ... او كنتي كدوز منها .. كارهها محاملهاش .. غتفوت وقيتهلطا ودور عليها الايام وتجسبك الصدفة ودوز منها .. ساعتها غضحك وتفرح وتقول .. ايييه على الايام .. الايام اللي كنت كنخيط هاد الطريق الي وروتور ... كتنسا ساعتها كل ماهوا سلبي .. كتنسا الشمس اللي ضرباتك فيها .. كتنسا الشتا اللي طاحت عليك فيها كتذكر فقط خطواتك عليها .. حتى الجو اللي كان يتبدل عليك مع الفصول وكارهه اشد الكره كتذكرو باحساس جميل وتقول كانت وكانت وكانت .. كتنسا باللي كنتي كاره راسك ديك الوقيتة .
لهااذا فل نستغل حاضرنا .. بكل مافيه .. حلوه ومره ... جماله وبشاعته ... ودائما نخليو قدامنا صورة ليه فالماضي ونقولو غادي يفوت فنستغلوه ومنقنطوش منو ... قبل فعلا مايفوت حيت غيفوت لا محال . لا تنسو حاضركم ... كل ثانية كتمر ليها قيمة كبيرة ... فيها نشاطات كثيرة الانسان يستغلها .. يبحث ويعيش السعادة .. الان السعادة كتكمن فالبساطة ... وهادشي اللي كيخلي ماضينا وبساطته شيء جميل فحياتنا وذكرى كنتمناو يرجع بينا الزمان اللور ونعيشوها . الحاضر .. لا يقدر بثمن .. لا تعويض له .. كما هوا الماضي لا يقدر بثمن ومعمرو غيرجع . فمنخليوش حياتنا دوز ومن بعد نحنو ليها .. نعيشوها ... بمشاكلها ... بافراحها .. حيت غيجي نهار ونحنو ليها وكولشي كيفوت ❤
لربما جميلة بدات تفهم الحياة .. بدات تميز وتستوعب تدريجيا ... الذكريات والصور اللي شافت فتحو ليها عقد كثيرة ... فهمات حينها باللي كلشي كيدوز ... كولشي كيمشي .. الالم كيفوت .. التعاسة كتفوت .. الحزن كيفوت ... وحتى الفرح كيفوت . حمالتها اللي فاتت ومعاتهاش خلات عليها اثار كثيرة .. وماعرفات قيمتها حتى شافت الذكريات .. بالصدفة وسط دوك الصور تفهم ليها طبع مهدي المختالف تماما ... وعرفات باللي كيفرح ويضحك وينشط وسط المشاكيل .. مكيعطيش للمشاكل اكبر من حجمها واخا يكون سبب او ماشي سبب .. واحد بلاصتو دوز طفولة قاصية وعاش حياة صعيبة كان ممكن يكون جدي كثر من القياس وكئيب .. لاكن لا .. العكس تماما .. علاش؟ حيت الطبع كيغلب التطبع ... طبعه هوا هاكا داير .. انسان وفيه نقط مبني عليها ومبرمج عليها صعيب يتغير او يكون بحال غيرو وهادا الاختلاف بيناتهم .. فاش كتوقع الفاس فالراس ومكيبقا ميرجع .. حتى الندم مكينفعش .. كأنسان كيحزن وكيندم وكيعيش الكأبة .. لاكن الفترة ديالها مكطولش وكيرجع لعادته تلقائيا حيت بكل بساطة هاد طبعه ... ومنه عدد كبير اللي ممكن نشوفوه خسر سيارته مثلا او هاتفه النقال لاكن تأسف وزاد .. كنتسغربو ونقولو لو كان انا بلاصتك ندير وندير .. لو كان بلاصتك يوقع لي ويوقع ... نعم ممكن لاكن هنا فين كيكون الاختلاف.. ماشيو كلنا بحال بحال وماشي كلنا شخص واحد ويستحيل نكونو شخص واحد .. فينا اللي كيشدها منين خفافت ويقول العوض على الله ، او يمرض نهار يوماين وينوض ناسي الهموم وكيقلب على مايفرحو .. وفينا اللي كيشدها عام عماين مرض وهم وغم وفالاخير حتى حاجة مكترجع ..بل كنتبعو ليها طاقتنا وصحتنا فقط بلا فائدة.
جميلة عرفات باللي احسن طريق هي اللي غادي فيها مهدي ... داير حاجز بينو وبين الهموم .. ولو عندو مشاكل وصراعات كتلقاه ناشط ضاحك وعندو نشاطات وسط منهم ... صدقو مرحبا مصدقوش حتى هي مرحبا .. هوا عاش اللحضات ديال الحمل بأبسط الاشياء وخلا ذكريات .. وهي فاتت عليها المرحلة وكانت ممكن تتجاوزها بدون طبيب او علاج ... لان العلاج اللي كدوم هوا علاج انفسنا بانفسنا .. حيت حنا اللي عارفين نفسنا وكنقدمو شرح على نفسيتنا للطبيب ... فبأمكاننا نعالجو نفسنا افضل من علاش الاودية او الاطباء النفسين .. حيت حتى واحد مكيعرفنا باش كنحسو ... مكيعرفنا اكثر من نفسنا .. المشكل من هادشي كاين فينا .. فتفكيرنا .. حيت ديما معولين على غيرنا ... معولين على لحاجة تجي بين يدينا ... معولين على طبيب يعالجنا ... وماعندناش القدرة او مقادرينش نفكرو باللي حنا علاج لنفسنا ... حنا اللي عارفين شنو الخاجة اللي كتفرحنا والحاجة اللي كتقلقنا .. بلا ميحتاج شي واحد يقولها لينا وينصحنا بيها ... اذا فحنا دواء انفسنا واطباء انفسنا ... عارفة فيلم ممكن يأثر غليك ويقلقلك؟ بدليه متشوفيهش حيت غيضرك ... عارفة الموسيقى الصاخبة كتقلق راحتك ... بدليها ماتخليهاش ... ديري مجهود .. ديري محاولة ... من بعد غادي تعودي وكولشي يتيسر ومتبقايش محتاجة نصائح حيت نتي عارفة راسك اكثر ميعرفك غيرك
[3/7 18:19] 🌸حسبي الله عليه توكلت ...: هنا عرفات قيمة الحياة ... عرفات سعادتها فين كاينة ... تقدر حتى هي عاشت ضروف صعبة وهي طفلة... لاكن جاتها فرصة لا تعوض للعودة الى الطفولة رفقة اطفالها .. فرصة انها تجدد نشاطها ... فرصة انها تعيش طفولة من اختيارها .. فرصة انها تكون اميرة فعالم دينزي .. عندها شكون يتشاركها مرحها وسعادتها .. فلما لا تعيش كما هي باغا ونفسها فيه .
بما انه عيد ميلاد الاطفال اقترحت عليها مينة يمشيو يدوزوه فالفيرمة ... ترردات فالاول وكانت غتفكر بالطريقة الكئيبة وتعقد الامور.. لاكن بما انها قررات تجلب السعادة من جميع الاماكن ولمصلاحة ولادها يلعبو فالهواء الطلق وهي غتكون فرحانة اكثر ويجيها المنضر زوين .. فمكيهمش ديالمن تكون الفيرمة ... واش ديالها ولا ديالو .. الاهم انها غتستمتع اكثر من الدار ... اختارت لراسها الحياة السهلة... واخا تكون معقدة .. ماتزيدش تعقدها ... تختار لراسها اللي فرحها .. واللي فمصلاحتها . حتى من سيارة مهدي ركبات فيها ... حيت لمصلاحتها تمشي فسيارة كبيرة ولراحتها اهم شيء.
هزاتها وخرجات معاها صفوان وخلات صوفيا مع مينة حيت غتعدبها وغتبقا هازاها فيدها كدور بيها .. من الكارط اللي عطاتها مينة تقدا بيه دفعات ثمن جميع المشتريات ... مكيهمش ديالمن حتى هوا .. الاهم تشري كل ما خاصها وتوفر لولادها جو يلعبو فيه ويفرحو فيه وتفرح حتى هي .
[3/7 18:39] 🌸حسبي الله عليه توكلت ...: دخلات للفيرمة بعد فترة طوييلة بزااف .. انتابها احساس غريب وهي داخلة .. مع كل خطوة كتخطيها عندها فيها ذكرى قديمة ... ذكرى جميلة وحزينة ... تخطات جميع الذكريات فداء لسعادتها وسعادة اطفالها .. لقات عرفة تما هوا ...
نعم هوا لمياء .. عرفة من ديما كانت عينو على لمياء وكيشوف تعاستها فديك التزويجة ... كان صابر على القهرة فديك الفيرمة لجوج حوايج ... لصاحبو اللي كان ديما مساندو وواقف معاه ومخلي ليه رزقو وعمرو حسسو انه صاحبو بل كأخ ليه .. ولمياء اللي من نهار شاففها كان يتحسر عليها ويتمنا شي نهار ياخد بلاصة احمد . فعلا جا داك النهار .. النهار اللي ناض فيه الصدع .. النهار اللي عمرو يتنسا .. بغياب مهدي طراو احداث كثيرة . بداو النقط يتحطو على الحروف من الساعة اللي تشد فيها ومشا . هنا الصالحة طغات ورجع احمد من الكوميسارية ووقفو فوجه مينة الوحيدة ... هي مجرد امرأة صعيب عليها توقف فوجههم بوحدها ..وباخصوص نفسيتها مكتسمحش ليها لان وبدها تهز من قدام عينها وكان ضاروري يحضرو الرجال باش يوقفو فوجه احمد والصالحة .. بان عرفة اخيرا على حقيقتو قدام احمد ووقف ليه فالوجه ... ودخل ياسين حتى هوا مفقوص على مهدي اللي تشد وعلى الدخلاء اللي باغين يملكو الفيرمة بلا موجب شرع . احمد مابقا عندو ميخسر ... كان ممكن يرتاكب جريمة حيت مارضاش بالخسارة .. اما الصالحة فوصلات لثمة الغضب ديالها ... الطمع .. والجشع .. والخبزة اللي بغات تديها كاملة فالاخير خسرات كلشي ... حطات كلشي ومابقا فيديها والو ... ونية بنتها غلبات ودعاويها كاملين تقليو قلبة وحدة ورجعو ليها ... حيت من الاول غلطات وكانت غالطة ودافعة الجهد .. فالاخير شنو؟ الجهد كولو رجع عليها ... لقات راسها مافيدها لاخبزة ولا نصها
القوة ضد القوة واللي استقوى كيجيب ليه الله ماقوى منو .. احمد تصدم فعرفة .. والاخير ماهماتوش الصدمة .. هنا عرف احمد باللي كان ضحية نصب واحتيال .. الشمتة كانت حارة وخصوصا مللي عرف فلكوميسارية باللي مرتو كتبات لمهدي لفيرما بيع وشرا .. حتى واحد ماكان عارفة بمسالة الفيرمة .. لاكن فاش طاحت الرمانة ... فرشات كلشي والصالحة طاحت بالعضام فقلب الفيرمة داك النهار كضرب فخادها وتسخط عليه ... كفاش كتب الفيرمة لمرتو ؟ كفاش حتى دارها وضيعها وضيعهم معاه ؟؟ هنا استوعب حتى عرفة خطة مهدي واقترابه من لمياء وفهم مزيان لاياش كان كيدرس .
مهدي كان عندو عقل وخطط كيمشي عليهم ... كان ديما كيفتح جوج ابواب او اكثر حسب قدرته ... باش الى تسد هاد الباب .. يدخل من باب اخر ... مكانش كيعرف الاستسلام ... المهم هوا المحاولة وتكرار المحاولات . كانت الخطة ديالو محكومة ومدروسة ... فالبيبان بجوج دخل عرفة للفيرمة وخلاه يتقرب من احمد حتى توطدات العلاقة بيناتهم وخطة الدعوة اللي رفع هادو بجوج كان قاسم مشترك فالابواب بجوج . وهنا فرق الابواب كل واحد بوحدو ... الباب الاول كانت فيه خطة مدروسة فيها لمياء والاقتراب منها فاش احمد يكتب ليها الفيرمة ويزرب عليها هوا . والباب الثاني كان فيه عاىلة جميلة واخوتها فاش يشهدو ضدهم فالمحكمة لصالح جميلة . كانت الخطة الاولى التقرب من احمد .. ومن بعد يتعمر ليه راسو ويدخلو الوسواس والشك ويلقا راسو فدعوة مع جميلة .. كانت مجرد دعوة باش يتخلع ويتاكد من جدية الموضوع ومن بعدها يكتب الفيرمة لمياء حتى تفوت الدعوة وهنا يصداها مهدي .
الخطة الثانية كانت فيها العائلة.. اي يخليهم مهدي على الضس ومتأكد ان رشيد غيهجم عليهم للفيرمة حيت من خلال الفترة اللي دوز معاه كان كيتقربو منو باش يعرف طبعو وشخصيتو وشنو المصيدى اللي يحط ليه . فعلا خلاه الصدع ينوض على قبل الفيرمة .. وخلا الاخوات يجيو ضد امهم ..ومنها يشهدو لصالح ختهم ويربح القضية. اينا خطة من هادو تشد ليه الاولى .. بدا كيتسنى اينا خيط من هادو يتمد اللول ويجرو
[3/7 19:43] 🌸حسبي الله عليه توكلت ...: تفرشات القضية حينها وحتى لمياء اللي كتسمع ديما من مور الحيط فهمات اش واقع وعاد عرفات راسها علاش خرجات وعلاش داها احمد وعلاش لسقها مهدي .. عرفات راسها كانت غبية وكان ناقصها عقل تفكر بيه والقانون لايحمي المغفلين وهي كانت من المغفلين الكبار . . خافت علىراسها عرفات اخرتها على يدين احمد ومات كتسلت من باب الكوزينة وخرجات كتجري هربات وكتشوف موراها حتى دخلات فعرفة اللي شدها من يدها وقال كينهج سخفان بالجري
- فين غادة ؟ فين هاربة؟
ردت كترجف: غادي يقتلني احمد .. غادي يدبحني ضيعت الفيرمة
اصر عليها يحميها وفعلا حماها وطاح احمد بالفقصة فاش موصلش ليها وطلبات الطلاق من بعيد وتفكات منو وبسرعة تزوج بيها عرفة ورجع جلس معاها فالفيرمة ... اصلا كانت خاوية وماكاين اللي يحضيها .. وحتى هوا رتاح فالطبيعة وعجبو الجو ديال الفلاحة ولقا راحتو فالغرس .
استقبلو جميلة وولادها بسعادة وفرح وحطات ليهم لمياء عشا مبررع من خيراتهم ورزقهم ولقاو الاطفال فين يلعبو .. دوزو العشية فدوك الجرادي كيزوقو ويعلقو فالالوان حتى عياو وطلعات هي و اولادها لبيت النعاس بفراش جديد نعسات وكل شوية طل على داك المسج تقراه وتعاود حتى نعسات
[3/7 19:56] 🌸حسبي الله عليه توكلت ...: صبحات الصباح بكري خارجة دور فالجنانات هي ولمياء ... تبدلات عليها الفيرمة وتضاعفو خيراتها وحتى الارض اللي كانت ناوية دير فيها الزعفران لقاتهم فلحوها والدنيا عمرات وتيسعات .. الخيرات مزلعة تغني دوار بأكمله والطبيعة ياسلام ... مشات ولادها فجو الصباح الباكر يشمو الهواء نقي ويتحلو ليهم المناخر وبدات دور وتسارا .. الاسطبل بالخيل والخيل ولدات... الكوري دالبقر كيبستر الحليب وكل بقرة قداش ... النحل مربيه عرفة تما والعسل الحرة موجودة .. اللي تشهاتها تلقاها كانها جنة فوق الارض ... دازت حدا الفلاحة لقات كولشي خدام .. البهايم كثار وحوالة العيد الكبير كيترباو باش يخرجو لمرجان يتباعو .. شافت الكوري فيه ازيد من ستين حولي صردي كل حولي قدو قداش .. الدجاج البيض البط تبارك الله كولشي واجد
رجعات حدا الدار تحت الشجر فالضل وجلسات فالارض فوق الحصيرة والزربية رطبة حدا طبلة مدورة حطو ليها هي ومينة شبكة ديال الخوخ والشهدية قدو قداش معسل وطبسيل مدور فيه العسل لحر بالشهدة ديالو كتقطر وشبكة ديال الكركاع وطبسيل ديال الكرموس كل كرموسة قدها قداش
مينة : الله ياربي على فروجية هنا قتلتينا فديك الدار انا مرااجعاش معاك بغيتي ترجعي سيري ماعندي مندير بين دوك ربعة دلحيوط قتلني القنط اناااري!!!
واش تاكل ولا تحضي الدراري ؟ ... مينة كل مرة تحبو فوق الربيع تابعة صفوان اللي كينوض يدردك كيجري .. اما جميلة شادة صوفيا اللي واقفة مع الطبلة هزات ديك الشهدة من الوسط بيدها نيشان لاحتها ومسحات فجميلة ورجع كولشي كيتلسق وناضت لمياء تبعات الشهدة رداتها وقالت كضحك
- كتوقع راه جات فوق الربيع غير كولوها مدير ليكم والو
جميلة: اويييلي الفقصة ...ورصااي رصااي مكترصاش اختي حتى دقيقة هادشي غير مكتمشيش ولسقاتنا
ناضت هزاتها كتلسق كاملة دخلاتها غسلات ليها وغسلات حالتها ورجعات جلسات حدا لمياء اللي شادة مخدة وكتخدم الراندة .. اما مينة حمقها صفوان ... تحطو ينوض.. تحطو ويعاود ينوض ... كل شوية تابعاه تجري . كل مرة جاراه من رجل فاللخر ربطاتو مع الطبلة وخلاتو كيفرطط حداها وربعات يديها كتسوط
- يالاه ... واتشقلب دابا حدايا
[3/7 21:41] 🌸حسبي الله عليه توكلت ...: سكتات مطولا ساهية شوية ورات راسها وقالت
- ايييييه ... فينك المهدي تجي تبرع فالخير ديالك .. لمن خلتيه ولمن سمحتي فيه ماديتي معاك حتى الربع منو ... (شافت فلمياء) جمعي ليا بنتي شي قفة فيها شوية دلعسل شوية شوية شوية من لحاجة نديها ليه مسكين ..... يعلم الله واش كياكل شي حاجة ولا والو
تنهدات بأسف وجميلة كتلف مع صوفيا دارت راسها ماسمعات والو .. شبعو جلاس فداك الصباح وناضو يقادو شغل عيد الميلاد .. لبساتهم ملابس امراء ديزني بحال الرسوم ولبسات بحالهم كسوة طويلة بالفرافر فيها الوان باردة .. شيبي وزهري واصفر وازرق ودارت تاج ابيض حسات براسها طفلة وحسات بسعادة الاطفال وبغات تلعب وتعيش الطفولة معاهم .. خرجو جيهة لابيسين فين مزوقين الدنيا بالنفاخات والحلويات والطاوس مزين المنضر كيتسارا تما غادي جاي كيتمختر .. اجواء ملونة ومشكلة بالحلويات الملونة والموسيقى مطلوقة ... غير بيناتهم فرحانين ومينة جالسة فوق الكرسي كتبكي وتنخصص كتشوف الاجواء والمنضر والضحك والسعادة فوجه الجميع والعيد لكبير قريب وولدها فلحبس محبوس ومخلي خيراتو اللي دار مافجهدو باش يوصل ليها فاللخر مادا معاه والو ... جميلة كدوز حداه وكتشوف فيها بنص عين كتبكي ولاكن مكدخلش فأحاسيسها وباقا شادة الغضبة وكتميك .. اما مينة مابقاش عندها امل فجميلة تحن حيت عيات تعضر معاها فاللخر خلاتها مابقاتش كاع كتلح عليها .. خدات صور مع ولادها وفعلا كانت اميرة وسط منهم بشعرها الاسود وابتسامتها العذبة ونضراتها الحنونة ليهم وقبلاتها الحارة ... قطعو الحلوة ونشطو ومينة كل مرة تجبد المهدي وكل مرة تبكي وجميلة ساكتة حتى سالات الحفلة وبقات بداك اللباس هي وياهم جالسين فالجردة مستمتعة بالجو ورجعات لحسابها على الانستا بعد غياب طويل صدمات بيه المتابعين ديالها وحطات صورها هي ولادها من بعد ما كانت فآخر صورة ديال راسها . كاين اللي فرح كاسن اللي حسد وتمنى ديك النعمة تزول بعوض ما يتمنى يرزقو الله نفس النعمة او احسن .. لونات حسابها بصورها هي و اولادها وتشاركات الفرحة مع الجميع وكبرات الفرحة فالمشاركة وبدات كتحس بطعم الحياة من جديد وتفائل وتتحمس بعد تجربة مريرة وقاصية انتقلت خلالها من .. الى .
صبح الحال فالفيرمة وصبحات جميلة كتفطر ولادها اللي كيفيقو ليها مع الصباح .. دازت مينة حداها غادية للكوزينة كتنهد وتجمع المسائل اللي تدي لولدها حتى جمعات وسالات ورجعات طايح عليها الضيم جلسات فالطبلة ديها على خدها كتنهد وتعاود .. ماهضراتش وبقات كتشوف فحفايدها فالطبلة كيرونو ويلعبو وقالت بحزن
ردت جميلة بتردد وبعد صمت طويل كتوكلو مهبطة راسها وقالت
- انا غنمشي عندو ونديهم .
زيارة غير زيارات اللي فاتو ... خرج من نفس الباب وجلس فوق ديك الطبلة اللي مولف يجلس فيها شاد فيدو مربع احمر بلاستيكي كيحل ويسد فيها .. نفس الستيل بحال العادة .. لابس كلشي اسود ومهبط راسو ساهي كيطرطق فداك المربع ديال المداد .. كانت نفس البنت المجبة حدا مها كتشوف فيه كل مرة باعجاب وحاضياه كتحاول تلفت انتباهه .. هز راسو كيتنهد ويشتت النضر وشاف فيها بعفوية ودار ليها ابتسامة خفيفة باهتة فوجهها ورجع هبط راسو ساهي كيفكر ويتنهد .. فوقاش دخل مينة ؟ تعطلات وهوا كيتسنا يشوف ولدو بفارغ الصبر والابتسامة على وجهه كيهز راسو كل مرة فداك الباب اللي فين مايتحل يدخل شي زائر كيحل معاه عينيه ويحسابو مينة ... لحضة تحل الباب وبقا محلول .. بقا كيشوف شكون غيدخل شوية بان ليه طفل صغير لابس سالوبيط وحداء رياضي شعرو اسود كيلوح رجليه بزز ويدو معلقة فيد مرى شادى فيه كتبان غير نصها خفق قلبو فجاة فاش شافو وبلهفة وقف وبدا كيشوف فيه واقف فالارض كيمشي ويجي ورجليه كيتلواو حتى كيبغيو يطيح وفلحضتها دخلات بالجنب وكانت كتهضر مع شي حد موراها حسب القوانين وتقدمات هازة صوفيا فيدها لابسة كسيوة زهرية ووردة كبيرة جامعة بيها شوية ديال الشعر اسود فوق جبهتها وفيدها مونيكة صغيرة والسكاتة ففمها هي وصفوان .. مهبطة راسها مقاتلة معاهم بجوج بوحدها بقا غير كيشوف فيها مرفوع مامصدقش .. نفس اللباس باش موالفة .. تيشورط كحلة وكولون رياضي غليض جامعها كاملة وحداء رياضي .. شعرها الاسود مصاوب ومطلوق وعلى اسها كاسكيطة سوداء .. يالاه هزات راسها من بعد ماسرحات لصفوان الطريق اللي كيتلوى فيدها لقات مهدي قدمها هزو من الارض بخفة عنقو برمشة عين وعنقها بقوة قبل مترمش وتشوف وجهه
حسات بلحنين فديك الضمة القوية حتى غرغرو عينيها لاكن كتماتها فصدرها ماقدراتش تبينها واخا فشلات .. هي بنفسها مكانتش متوقعة هاد ردة الفعل ... حسات بالازمة مناش كيمر وحسات بالشوق والحنين والعقاب اللي كدوز عليه .. ضمة فسرات ليها كولشي .. زير عليهم بثلاتة معنقهم وراسو مكيبانش وسط منهم حتى بدا يبكي بلا ميشعر وهنا طاحو دموعها بلا صوت .. شعور لايوصف نساهم فالمكان والناس وحتى فصوت صوفيا اللي كتبكي .. هز راسو وجهه حمر مزير وعينيه فازكين باس راسها وجر صوفيا وهي كتبكي لهفة باسها وشاف فوجهه ولدو وعنقو بلهفة كيبوس فيه ويعنق ويرجع يعنق جميلة ويبوسها هي وصوفيا ... لحضات مأثرة قطعو فقلب كاع الناس اللي كانو تما كيزورو ولادهم وعاىلتهم وكلشي كيتنهد ويدعي ليه بالخير .. ربي يفك سراحو ويرجع لعائلتو حيت فعلا مشهد مأثر بكات فيه شحال من مرى كانت تما وبقاو فيها دوك الوليدات وحتى الاب وكفاش طار عليهم ماعقل لا على اللي وراه ولا على اللي قدامو
جلسو فالطاولة ديالهم شاد صفوان وعينيه حومر وكيضحك معاه حيت ساكت مكيبكيش عكس صوفيا اللي كتشطح بيها جميلة وهي جالسة باش تسكت وتراري بيها وتحط ليها السكاتة ففمها .. ماقدراتش تهز فيه العين وتشوف فيه مباشرة ووقع ليها ماوقع لمينة ... عمرها تخيلات الحبس واحساس السجين وخصوصا بحال مهدي اللي مشتاق للعاىلة... ندمات حتى هي وحشمات من راسها على كل يوم داز وماطلاتش عليه .. كما كان الحال راه اب حتى هوا كما هي ام ... واخا هي مأزمة وكانت كتمر من ضغوطات نفسية لاكن على الاقل كانت بجنب ولادها .. عكسو هوا اللي كيمر من اصعب ايام حياتو وبعيدا على ولادو وحرماتو الحق يشوفهم .. حيت فعلا لو جات طلات عليه من قبل مكانتش تحرمو الحق فيهم وكانت غادي تجيبهم ليهم مل اسبوع يشوفهم ويشبع منهم .. يكفي السجن اللي عايش فالداخل ديالو هاداك كافي بلا متزيد ليه عذاب مضاعف
الصمت .. لاهي هضرات لا هوا هضر .. كل واحد ملهي مع واحد وغير صوفيا بغواتها واخدة الاهتمام كامل .. اما صفوان ساكت ماخصو خير .. السكانة فمو وكيشوف فجميلة ويهز راسو فمهدي اللي كيضحك عليه فاللخر وقفو على رجليه فوق حجرو وحيد ليه السكاتة كيشوف فيه ويضحك معاه وبتلقائية شاف فجميلة وقال
- درويش عندك هاد الولد
ابتسمت بخجل وشافت فصوفيا كتلهيها باش متبكيش .. عنق صفوان بقوة ووقفو قدامو كيلعب معاه وقال كيضحك
بقا صفوان كيشوف فيه وكلمة مور كلمة بدا كيكررهها ليه حتى نطق بيها وبدا يرددها .. فرح مهدي بديك الكلمة وجميلة كتشطح برجلها وتهضر مع صوفيا بهدوء وابتسامة
- سيري عندو ... سيري عند بابا
تلفت مهدي بسعادة مد يدو ليها هزها حتى هي ويالاه بغات تبكي ناض وقف بيهم بجوج جامعهم فيديه كيلعب معاهم .. عضاتو صوفيا من نيفو كتحك اللثة ديالها وبدات تعض فحناكو لاسقة عليه وهوا ساد عينو حتى بعدات وطل على فمها لقا سنينات كينوض ليها .. هوا ملهي معاهم ماشابعش من شوفتهم وهي جالسة فبلاصتها كتشوف فيه ساهية عجبهم حتى هما اللهب معاه والخاطر اللي شاد معاهم وسكتو عندو كيضحكو . جلس فوق الكرسي كيشطح برجليه وشاف فجميلة بنص عين وقال
- العام كيطير
هبطلت راسها فصمت مالقات باش تجاوب وحتى هوا سكت وجبد داك المربع ديال المداد حلو وطبع لكل واحد صبعو فيه وحطو على المعصم ديالو بحال البصمة وخشاه فجيبو ورجع للنشاط ديالو معاهم حتى نعسو ليه على كتافو .. كان ناوي يهضر مع جميلة لاكن جا مع نهاية الزيارة وقت الزيارة وناضت هزاتهم بشوية وهوا كيقاد ليه الراس فيديها ومد ليها الصاك فيدها وشاف فيها بابتسامة وعنقها كيتنهد وقال
جميلة الجزء 21
محتوى القصة
التنقل بين الأجزاء