شهوة ملاكم الجزء الخامس

عقلو وقف .. عاد كانت موراه.. فين مشات ...

عند اشراق غير تحل الباب بانتليها العافية قربات ... خاص ضروري تحيد البوطة تخرجها حيت إلى طرطقات اكيد غتوصلهوم العافية... بالأخص انو حالة أديب مكتسمحلوش يجري و يبعد بزاااف...

رجعات كتزرب.. كتحس بسخونية ... فاي لحضة ممكن تموت ممكن تلحق عليها العافية... هزاتها و كيف ما توقعات كانت عامرة ... كتحاول تزرب حيت السقف كامل شدات فيه... و البلافو كيطيح... مع جات خارجة طاحت على رجلها خشبة شاعلة خلاتها تطيح هيا و البوطة بقات تغوت فبلاصتها بحر العافية ... مبيدها لبوطة لي فيدها و لا لخشبة لي فوق رجلها... من زهرها كانت وصلات لباب ... حطات البوطة دفعاتها لبرا... تبتات يديها فالارض معمدا عليهوم.. بقات كتعافر حتا قدات توقف... الحريق كيقطعها فرجلها بسيف باش قدرات تحني هزات البوطة.. كتعافر معاها و كتمشي كتعرج... النفس مخنوقة فيها و ضبابة كدور بيها ...

بقات كتحاول تبت نفسها... غادا كتعرج... .. يلاه بعدات شويا سمعات انفجار قوي... لدرجة الارض حسات بيها تهزات.. منظر خلاها مشوكية.. كون مكانش الممر و خرجو كانو دابا غيكونو تحولو لرماد...

بقات كتسارا بعينيها كتقلب على أديب... زادت كتعرج و الحريق عصرها... مقدراش تصبر .. مي خاصها تلقاه..

تفكرات حالتو.. و كيفاش حماها من العافية.. و بسبابها جات فيه دقة.. ندمات نوعا ما على هادشي لي دارت ... كون رجع الوقت مكانتش تعرض حياتو الخطر ..

عند أديب .. تصدم فاش ملقاهاش.. يلاه جا راجع باش يشوف فينها.. خانتو قوتو و طاح غاب على الوعي...

اشراق مع ضارت و هيا تقشعو طايح و دم حداه... حاولات تجري ساعا رجلها عاطياها صداع... بقات كتعافر باش توصل عندو دغيا.. كتمنى ميطراليه والو ...

بقات غادا حتا وصلات :

اشراق (بخوف ) :أديب فيق أديب واش كتسمعني.. (كتبكي )

كتشوف ضهرو مقيح كيسيل بدم... يدو كاملة محروقة... محيلتها لرجلها لي كضرها و لا ليلو هوا لي فاقد الوعي

بداو ايديها كيترعدو و هي كتحاول تفيق فيه و والو...غايب كليا عن الوعي منظرو كيضر فالقلب و كيعذب اي واحد شافو...عيات معاه و حاولات و لكن مزال على نفس الحال... حرارتو طالعة بزاف..

ما عندها ما دير تالفة و مبقاتش عارفة كيفاش يرجعو بحالهم... وحالتو حرجة بزاااف..

قاومات و ناضت و رجليها عاطياها الحريق....صبرات ليه و بدات كتمشى باش تقلب لا تلقا لي يعاونهم....

كتمشى بصعوبة و كتعافر مع كل خطوة كتخييطها....

غادا و عندها امل تلقا شي حد لي ممكن اعاونها يعتقو اديب...غادا و كتلوم فراسها على قلة عقلها و شنو دارت بلاما تفكر فالعواقب...ما هي ماتت ما هي دبا بخير....غير عذبات راسها و عذباتو معاها .. مغتقدرش تحمل يموت بسبابها..

هيا بصح العاقبة خرجات بأقل أضرار .. و بصح خرجو منها حيين لكن قلوبهوم محطمة.. خرجو بجروح جسدية كتنزف لكن الجروح النفسية أعمق.. و الاسوء عداب الضمير بالأخص عند اشراق .. كلما شافت حالتو كتندم.. حيت بسبابها وصل لهاد الحالة .. عطا كل ماعندو باش يحميها رغم انو هيا سبب

غادا و كدور فراسها كتقلب....و فاخر لحظة لمحات دري صغير كيهز الحجر من الارض و كيلوحو ..كيلعب بيه..

هزات اشراق ايديها و كتغوت: خوووياااا عفاااااك.....(حسات بحلقها تجرح و لكن عاودات غوتات لانه مسمعهاش) عففففففاااااااكككك شوووف هناااا محتاااااجاااك تعااااوني

هز الدري راسو و شافها كتعيط ليه...بدا كقرب ليها شوية بشوية و فنفس الوقت خايف منها و من حالتها

هو كيقرب و حتا كتقرب ليه حتا وصلو حدا بعضياتهم

الطفل(بخوف ) : نعام اخالتي؟؟

اشراق كدوي و كتكحب: عفاك ... خاصني لي يعاوني..واش نت ساكن هنا،؟ معايا واحد راجل و مغيب خاص لي يعاوني نعتقو .. عفاك عيط ليا لشي واحد يعاونا... الله يخليك (كدوي و تبكي)

الطفل(بتردد) : وخا وخا انا جاي دباا.. صبري

اشراق: شوف شوف حنا ليه حدا فين مستف لياجور ( كتنعت بايديها )جي عندنا تما صافي؟

مشا بلا ميجاوبها ...مور اخر كلمة خلاها و مشا كجري

رجعات اشراق عند أديب و هيا تصعق.. محسات براسها حتا غوتااااات

اشراق(بحرقة) : أدييييييييب لااااااااااااااااا

منضر متبغيه لعدوك... ديك الشخص لي ديما كتشوفو واقف .. حتى حاجة مكتهزو.. ديما قوي.. عمرك شفتيه ضعيف.. ها هوا اليوم فحالة خايبة.. كيصارع الموت ..

اشراق ندمات فوقت لي مينفعش فيه الندم... صعيب تعرض شخص لموت و هوا كان متشبت بالحياة..

اشراق كتشوفو طايح فالارض و دم ضاير بيه .. ضهرو كلو محروق و باينة حروق خطيرة.. يدو و دراعو حتا هيا ... كيفاش قدرات دير هادشي كيفاش تعمات بصيرتها و زادت غلط فوق غلط .. كيفاش بيديها بغات تقتل راسها و تقتلو.. لهاد درجة يأسات لهاد درجة قلبها مات..

ياك كاين لي كيعاني كتر منها و حامد الله.. لهاد درجة فقدات الايمان و سيطرات عليها الكأبة ...

علاش فاش كنطيحو فمشاكيل دغيا كنيأسو و كنتمناو الموت و نديرو حد لحياتنا... واش زعما الموت هيا راحة.. واش لي ماتو رتاحو... الإشكال انو كنتمناو نموتو .. و فاش كنحسو بلي نهايتنا قربات.. كنديرو المستحيل و كنواجهو باش نبقاو عايشين... كتفيق عندنا غريزة الحياة...

احيانا مشاكلنا الكبيرة كتكون صغيرة بزاف .. معاناتنا و احساسنا باليأس كيكون فقط ضعف الإيمان.. مكنحمدوش الله على النعم الكثيرة لي عندنا.. كنقارنو راسنا غير مع ما حسن منا.. علاش مكنشوفوش لي قل منا و نحمدو الله .. الانسان غير إلى لقى صحتو خاص يحمدالله عليها... كاين لي كيكون فاقد أحد الحواس .. كاين لي كيفقد أحد اعضائو.. كاين لي ملي تزاد و هوا مريض معدب.. كاين لي معارفش معنى الراحة و الهنا.. كاين لي النعمة حداه و مقادرش يوصلها.. و رغم هادشي كامل كتلقاهوم متشبتين بالحياة.. كيقاومو المرض و كيفرحو بأبسط الاشياء .. حيت بكل بساطة يقينهوم فالله... و ثقتهوم كبيرة فيه .. ايمانهوم قوي .. عارفين انو هداك مجرد اختبار .. و غينجحو فيه ...

"وعسى أن تكرهوا شيئا وهو خير لكم وعسى أن تحبوا شيئا وهو شر لكم ، والله يعلم وأنتم لا تعلمون.. "

اشراق صدمة لاعبا عليها.. كتحرك بلا عقل .. خايفاه يموت .. مبغاتوش يمشي ضحية...مبغاتش تكون سباب فموتو.. حاسة براسها غتحماق.. كتمشي و تجي فبلاصتها.. معارفة مدير .. دماغها مشتت.. مقدراش تركز..

باقي مستوعبات الحالة لي هوما فيها..حتى كتبالها لفعة كدور حداه..

اشراق و لات كترجف ..حاسا براسها غطيح بالخلعة... واقفا مبلوكية كتشوف فاللفعة قريبة منهوم.. معرفات تزيد معرفات تبقا.. كتمنى تكون غير كنتخيل .. هيا اصلن كتخاااف منهوم.. حاسا فأي لحضة ممكن تسخف فاي لحضة ممكن طيح.. رجليها مقداش توقف عليهم..

تشجعات قربات من أديب.. على الأقل إلى زادت قربات اللفعة تكون اشراق فالواجهة.. حالفة متخلي شيحاجة تصيبو.. يكفي لي جاه من وراها.. مبقات طالبة والو من غير يفيق و يبرى..

قربات بحضر مور مشافت اللفعة كحزات لجنب و باقي مسافة بينها و بينهوم...

كلسات اشراق حدا أديب مقدراتش تحاديه و لا تقيس فيه... مقدراتش تقلبليه حتا نبض ديالو.. خايفة تصدم.. خايفة يكون مات... كدعي من قلبها ياخد ربي من عمرها و يعطيه ..

اشراق (بهستيربة كتبكي ) : فيق أ أديب فيق انا لي خاص نكون بلاصتك.. مكانش عليك تضحي على ودي...مكانش ... كان عليها طيه عليا انا .. علاش كاليتي عليا.. علاش حالف تندمني.. علاش.. نوض أأديب فيق..

ضارت كتشوف واش جاي شيحد...

اشراق (بكاء) : ياربي عاوني .. ياربي حفضو.. ياربي راك عالم .. يا ربي مبغيتش نكون قتالة.. يا ربي خود من عمري و عطيه .. يا ربي شافيه و عافيه..

اشراق بكترث الخوف نسات كاع اللفعة.. لي كانت حداهوم.. طلقات رجلها بلا مترض البال اللفعة لي كانت قريبة .. مراهاش فهاد العالم.. مرفوعة .. متوكدات حتى كتحس بشي حاجة لدغاتها.. مجات تستوعب شنو واقع.. كتبالها لفعة لي كانت جنبهوم لدغاتها و هربات ...

نساتها كاع.. نسات بلي كاع مكان خاصها تغوت و تحرك.. نسات بلي كان خاصها ترض البال ... مجرد ما رجلها قاست طرف من لفعة خلاتها تخاف و دير رد فعل و تلدغها... و ترد على هجوم...

اشراق دنيا دارت بيها.. كتحس بالتبوريشة طالعا معاها.. سخفة و التقية حاسا بقلبها كيضرب بزاااف..كتشوف فبلاصت العضة و دور تشوف فأديب .. كتسائل واش صافي هادي هيا نهاية .. صافي واش غادي يموتو.. قصتهوم غدي تسالي هنا قبل حتا متبدا.. صافي وصل اجلهوم.. وصلات نهايتهوم....

اشراق حاسا بسخفة .. كتشوف غير ضبابة... غريزة الحياة عندها بدات كتحضر .. كتحاول تقاوم...كتحاول تبقى صاحية.. الجهد مبقاش عندها.. كتحس بالفشلة ..

فاخر لحضاتها كتشوف شيحد جاي جيهتهوم.. كتمنى متكونش غير كتخايل .. كتمنى ميكونش غير سم اللدغة أثر عليها... و خلاها تهلاي.... محسات على راسها حتا فقدات الوعي و سخفات حدى أديب...

---

فراس درب جاي دري صغير مع 2 رجال و مرا ..

المرأة: و الله اولدي و تكون كتكدب و مخرجنا فهاد لعشية و طيار دلبرد حتا تاكل مكلا طبل...

دري : أو الله امي مكنكدب.. راه تلاقيت معها هنا و قاتلي عتقنا.. عوني ..

المرأة: ايوا فين هيا مبالي حد

دري : راه قاتلي حدا لياجور.. و معاها شي حد مريض..

المرأة: هاحنا غنشوفو بربي و تقولي كميرة خفية تا نخفيك اولدي

الراجل 1 : صافي سكتينا باركة من نكير.. معرفتك لاش جايا معانا..

المرأة: و مالي نخليك بوحدك اسي محمد و دري كيقول القضية فيها مراة.. لا لا نربط نلقا منطلق.. نخاف دور بيك و لا يكونو شي عصابة و لا نصابة مبقات تيقة ...

الراجل : زعما نتي غتقديها..فانضام داي انا ماشي لمرا .. زمي زمي عليا ديك الفم راك وليتي تخرفي ...

الراجل 2 (كيطنز ): خايفا عليك انسيبي ليطيرو بيك و تبقا هيا بلاش ..

المرأة:هكاوا على يطيرو بيه ...ساهلة ليهوم انا .. راه سعاد و اجرك على الله .. بربي تنحرهوم نحير الجمل

بدأ دري كيغوت: هاراهوم هاراهوم شتو و الله مكنكدب عليكوم..

مشاو كيجريو جيهتهوم.. جاو مع لقطة لي سخفات فيها اشراق ..

شهقو من منضر ديالهوم..

سعاد(كضرب فجلايلها) : أرسول الله أربي لحبيب(شهقات ) الله ياربي مسكين ضهرو كولو محروق... (شدات على فمها) .. اربي هادو شواقع معاهوم..

محمد (تصدم من المنضر لي حداه ) ... هبط قلب نبض لأديب: باقي عايش .. واخا نبض قليل.. خاص نشوفو نهزوهوم .. حتى لبنت غير سخفانة..

الراجل 2 علي : انا نصوني على لحسن يجيب لبيكوب باش يوصلهوم.. من زهرهوم شتا بدات كطيح.. و مجهدة..

محمد :خاص نشوفو شنو نديرو ..طريق لأقرب صبيطار بعيدة .. موحال يبقا عايش..

دري :با يا المرأة عاضاها لفعة شوف ..

شهقات سعاد شادة على فمها

دفعاتو و دازت كتشوف ..: و اللهيلا بصح ..

تحنا علي كيشوف رجل اشراق .: خاص نرزموها و نخرج دم باش إلى كانت مسمومة مينتاشرش سم..

(شاف فسعاد ) : اريلي طرف من شال.. سربي

محمد :مكنضنش تكون مسمومة رجلها مزراقتش..

عطاتو سعاد طرف من شال مور مقطعاتو.. تحنا علي رزمليها رجلها و تحنا كيمص الدم و يبزقو..

فديك الوقت كان وصل لحسن مور معيطوليه ووصاوه يجيب ليزور باش يقدرو يهزوهوم..

شتا كانت خيط من سما .. كلهوم فزكو... حتا من أديب واخا حاولو يغطيو الحراق باش ميقيسوش لما.. إلا من زهرو فزك شويا..

محمد : سربيو نبداو بسيد راه جرح غيخماج.. تعطلتي اصاحبي هادشي غير قتليك سربي..

سعاد قشعات رجل اشراق محروقة

سعاد : احتى لبنت رجلها محروقة ملور..

محمد : يعلم الله منين جاو و شنو وصلهوم لهاد الحالة ..مصاب نقدرو نعتقوهوم.. (شاف فلحسن ) عمرك تجي دغيا ديما روطار..

لحسن :واش معارفش طريق كيف كتولي بشتا راه كلها غيوسات.. حمد الله لي قدرت نجي..

علي : دابا فين غنديوهوم.. حالتو متسمحش نوصلوه حتا لطبيب خاصو ساعة طريق و زيد مع شتا طريق كتقطع..

لحسن :واحتا من مستوصف لي هنا .. طبيبة لي فيه كونجي..

سعاد:عرفتو شنو بلا منضيعو الوقت سيد حالتو حالة ... الحل هو نديوه عند الشريفة هيا لي غتفكنا..

علي : و زعما تبغي.. راه سنين مبقات بغات داوي شي حد من نهار مات ولدها و مقدراتش تعتقو حلفات لبقات دوات شي حد

محمد: بلا منضيعو الوقت فالهضرة نديوهوم.. وتما يحن الله..

هزو ليزار دوزوه تحت أديب خلاوه ناعس على كرشو.. تعاونو هزوه طلعوه فوق بيكوب..

مشا علي هز اشراق سرحها حدى أديب.. طلعات سعاد وولدها حداهوم.. و طلع علي و محمد حدى لحسن لقدام....

سعاد :اييه يعلم الله شنو وصلهوم لهاد الحالة.. زعما يكونو مزوجين.. هااح فكروني غير فروميو و جوليت..

دري : مي مي واش غيموتو

سعاد : ديكشي بيد الله اولدي .. إلى كان مكتابلهوم يعيشو راه غيعيشو.. كان مكتابلهوم يموتو راه الاعمار بيدي الله

دري : عرفتي امي شحال كانت خايفا عليه.. قاتلي راجلي راه لهيه عاوني

سعاد :ممم هيا قولي راجلها.. حتا انا شكيت مي مديرينش لخواتم..

دري :امي راه قالي خالي مبقا حد كيدير لخواتم دابا... غا نتي كتحكري على با يديرو بلا فيدا..

نزلات عليه سعاد لراس : الله يمسخك نتا و هاد خالك .. مكاينش لي غيفلسك قدو..

حبسات بيكوب ... و نزلو رجال..

محمد :سعاد دوزي دقي على شريفة .. و دوي معاها.. مجاتش نهجمو عليها..

هبطات سعاد كطير ضقات عليها غير حلات الباب طارت كتبوس فيها .. مبعداها على دخلة دلباب ..

سعاد(كتعيط : محمد أدخول و دخل سيد ليموت

الشريفة معرفات باش تبلات: أشواقع ا سعاد و شنو ماشي دخل عليا

سعاد :عار ربي و بوجه لحبيب لي فلقبر لما عاون هاد مساكن راه طريق مقطوعة بشتا و زغبي باقي صغير ضهرو و يدو كلها مشوطة .. و زغبيا عاضها لفعة و محروقة فرجلها... يعطيك الستر أ الحبيبة دخلهوم داويهم.. تدي الاجر..

الشريفة بحالي تكب عليها سطل دلما.. كتفكر عاد لبارح حلمات ولدها لي مات وقف عليها فلمنام .. و معرفاتش تفسر لحلمة..

# فلاش باك #

كتفكر لحلمة

مي لحنينة لغالية و شريفة ديالي .. مترضيش مريض وقف فبابك.. داوي لجراح... حلي بابك لي مدارش بين لحفى و ليالي .. قريب يزورك العشق المزروب .. فغفلة يدق بابك.. ساعفي المكتوب و رضاي بلي عطاك الله ..فرزي فالقلوب و تخيري على هواك...

# نهاية لفلاش #

سعاد(زعزعاتها) : افين سهيتي اشريفتي ..

الشريفة( بتبات) : دخلوه..

زادت مجوباتهاش... مشات لواحد صنيديقة هزات منها ساروت باين قديم..

الشريفة (بصرامة) : سي محمد متحطوهومش تما.. زيدو دخلوهوم لهنا..

حلات الشريفة الباب .. كان بيت كبير مفرش بلحوفة مقسوم على جوج بيزار.. جيها كلها كتوبة ووراق و مداد و جيها فيها انواع و اشكال ديال العشوب و لقراعي ..

دخلو محمد و لحسن هازين اديب ..و علي موراهوم هاز اشراق.. حطوهوم مباعدين..

الشريفة: تقدرو تخرجو.. محمد خلي سعاد معاي غنحتاجها تعاوني..

محمد (حنحن) :ماشي مشكيل فسبيل الخير كلشي يهون

لحسن: مالقيتو معاهوم والو.. لا تيليفون لا حتى حاجة..

نطقات سعاد :ألا والو قلبت انا فاش كنا جايين..

معندهوم والو

الشريفة : سعاد ماشي وقت الهضرة .. طالعة ليهوم سخانة.. جيب بانيو دلما ..فزكي لخرقة و ديريهالهوم.. انا غنوجد لعشوب نرزم ليها رجلها بيهوم.. عندها زهر اللفعة ماشي مسمومة و عاد صغيرة..

سعاد :والراجل ..

الشريفة (تنهدات) : حالتو خايبة بزاف.. ندعيو الله يشوف من حالتو

خرجو رجال كلسو فصالون..

لحسن :عنداك غا يموتو و نوحلو فيهوم ..

علي :واخا يموتو حنا درنا غير الخير .. طريق مقطوعة ريزو فهاد جيها مكيشدش.. واخا كون عيطنا مكان يواجبنا حد.. على قليل مصونينا ديك ليلة فاش مرض ولد شريفة

لحسن :انا بعدا يا ربي تسمحلي مكنرتاحلاش.. ديما مخنزرة كتخلعني

محمد(كيتهكم) : يا رجلة يا ودي

لحسن ( انااا طالب تسليم ) : مي كيقولو بماليها.. راك سامع شكايقولو.. هالي كيقولك سحارة هالي كيقول بباركتها. هالي كيقول شريفة

علي :شتي نتا و الله مكاتحشم كون ما هيا كاع متولد مرتك ...على نسيتي شحال جريتي إلى لولاد و مخليتي سادات و فقها كضور عليهوم ..

لحسن : اييه كاينا منكرش خيرها.. انا غير كنقولك شكايقولو ..

محمد : لحسن زم فمك حسن ميعوقوك هاد ليلة مواليها

لحسن (بخوف) : تسلييم انا طااالب تسلييييم.. نوض نمشي لداري ليل هادا..

....

عند سعاد و الشريفة.. قادات الخلطة دلعشوب لاشراق.. لواتهالها على رجلها.. عطات لسعاد دق ليها شي عشبة باش تشربها الما ديالها

سعاد :اجي و إلى كانت حاملة مديرلها والو..

الشريفة (بحدة ): دخول سوق جواك ا سعاد خدم و سكت خليني نركز.. كنعرف شنو كندير..

دازت شريفة لعند اديب.. لقات ولد سعاد باقي كيبدلو الخرقة على راسو.. نعتاتلو واحد القراعي مشا مدهوم ليها..

هزات زيت الافندر خواتو فجناب الحروق.. عقمات بيه و نيت يبرد عليه لحريق حيت فأي لحضة ممكن يفيق غير الجهد و حر الحريق و دخان و ماوكلش خلاوه يفقد وعيو..

جات حداها سعاد كلسات كتشوفها شنو كدير ..

الشريفة :شربتيها شويا دلما و العسل ياك

سعاد: اه وراه خليت ولدي وليد حداها كيفزك ليها فديك الفوطة...

الشريفة : هانتي لي شفتيني درتو ديري بحالو لرجلها ..

سعاد :واخا (مدات ليها زيت ) تقدري تشرحيلي شنو غديري باش نيت ناخد فكرة...

شافت فيها الشريفة و تنهدات: العلاج كيكون على جوج سيمانات متابعين.. مي حيت وضعو ميسمحش غنضطر نزرب العلاج... اليوم غنمسحليه بالما و الحامض يعني غنهز لاسيد د الحامض كينشف دك الحرقة نسبيا و من بعدها غندوز شيفونة د الما من الفوق غنحيد اتار الحامض و الدم حيتاش مني كيدار الحامض دك الالام كيضاعف و كيتمجهد و قيح كيبدا يخرج راسو هو و دم غيبقا كيخرج سي ساعتين موراها نخليه شي ساعة ينشف عاد نقشرو بيدي...

سعاد: زيدي كملي هادشي بالي ماشي اي واحد يقدر يديرو ..

الشريف :اكيد خاص يكون كيفهم.. منبعد كندير الكركم طبيعي كنطحنو مع توما و ما د بصلة و جرجير و العسل غنخليه هاد ليلة كاملة باش يتغسل الجرح و يزيد يخرج كاع القيح و دم ...

سعاد : اه وواش غيفيق

الشريفة : هوا و جهدو يقدر يدخل فغيبوبة بعض الخطرات و يقدر يفيق لاكن كيبقا ديما ناعس..

سعاد : و شنو غنبقاو نشربوه ملي ديما ناعس..

الشريفة : غي العشوب بحال الهيل و اليانسون الشوكي حيتاش فيهم طاقة...

هاد الهضرة كاملة دازت على ودن اشراق لي كانت فاقت و باقا كتستوعب فين هيا...

اشراق (كتنين بلحريق لي فرجلها ) : فين انا.. أديب فينو ...

دري وليد : خالتي فقتي متخافيش... ماما المرأة فاقت..

اشراق (لحريق كيقطع فيها .. بدات كتبكي ): فينو أديب ...

سعاد : على سلامتك اختي غير تهدني

الشريفة:متحركيش رجلك.. غتعقريها

اشراق كتبكي بالحريق و بخوفها على أديب : (شدات فيد سعاد ) : فينو أديب قوليلي راه حي .. جات تنوض

الشريفة (ضارت فيها حتا قفزاتها ) : تبتي لرد و نتي غير كطيري.. حالتو باقي ممستقراش.. راه ناعس لهيه.. كنديرليه دوا..

اشراق لحريق فرجلها كيقطع بدات كتبكي و تعض فيدها: رجلي كتقطعني بلحريق(كتغوت بلحريق ) امييييي رجلي

الشريفة: غنديرليك واحد تخليطة تبرد عليك.. عندك زهر يلاه درجة 1 شوفي .. سيد لي من درجة تانيا و تقيحليه

اشراق كتعض فيديها من حر الحريق: كدوي و تكرز إلى سنانها بلحريق: علاش مفاقش..

الشريفة : دعي معاه ميفيقش دابا حيت الحريق لي كتحسيه مغايبان والو قدام لحريق لي غيحسو هوا...

اشراق(كتبكي ) : انا سبب انا سبب انا منسواش كان خاصني نموت .. بدات كضرب فراسها .. دخلات فهستيرية دلبكا..

سعاد (بقات فيها ) :لواه لواه مديريش فراسك هاد لحالة دابا يبرى .. (كتشدلها يديها باش متنتفش راسها..)

الشريفة(بحدة) : تجمعي من البهلان.. كلسا تنقزي و ضربي فراسك.. زعما راكي ندمانة كتلومي راسك ..تقولي بكاك و غواتك غيبدل شيحاجا... مكتاب الله و هادا غير امتحان.. كنقولو الحمدالله لي خرجات سالمة.. دعي معاه و باركا من الخر.. قسمتيلي راسي...

اشراق محملاش راسها و كتزيد تكمل عليها ببرودها و طريقتها فالهضرة : نتي محساش بيا نتي مغتفهمينيش..

ناضت الشريفا طلات على اديب.. لقاتو باقي هوا هوا..

دازت هزات شنو غتحتاج.. و رجعات عند اشراق

الشريفة:سعاد وليد اجيو شدوها باش متحركش... و نتي منسمعش صوتك..

اشراق لحريق كيقطع فيها و مكملة عليها هاد المراة لي مفهماتش علاش محملاتهاش... ركبات فيها رعب من طريقة هضرتها..

هزات الشريفة الحنظل و نوا د تمر و ملحة حية و المرو البابونج و نبتة د الحميض،و التومة،و الارقطيون و السدر و نبتة الفوفل و الليمون مجفف مطحون، كلهم خلطاتهوم باللبى تاع الشجر و زادت عليهوم دك الكولا اللي كتخرجهم الشجرة تاع البامبو من الليل الليل.. رونات كلشي و رزمات ليها رجلها بلاصة العضة...

هزات واحد عشبة دقاتها و عطاتها تشربها..

اشراق قلبها طلع حاسا براسها غتقيا... يلاه شربات نص فيها حتا كان قلبها طلع.. جاب الله كان واحد سطل قريب مدوهلها خوات كرشها كاملة...

الشريفة :غترتاحي دابا..

اشراق (كتشهق ) : رجلي كضرني بزاف..

الشريفة : صبري الصبر هو كلشي.. مزيان تعرفي قيمة الحوايج لي عندك .. نيت ديري اعادة النضر فحياتك..

اشراق مصدومة من هاد لمراة و علاش كتعامل معاها هكا.. استغلات فرصة انو مشات لعند اديب و سوالات سعاد

اشراق :مالها معاي علاش حاسة بيها محملانيش

سعاد : كون مجبتكوم بيدي نقول كتعرفك و بيناتكوم شيحاجا

اشراق :لا و الله مكنعرفها.. حسيت بيها بحالي كتمعني عليا

سعاد: متديش عليها واخا هكاكا قلبها بيض.. من لي جيتو و هيا مقابلة راجلك

اشراق (باستغراب ) :كيفاش راجلي

سعاد :هاء لي معاك ياك راجلك

اشراق (بتوتر معرفات متقول .. دوات بتردد ) : اه اه راجلي .. قوليلي فين حنا دابا و علاش مديتوناش لسبيطار

سعاد : شتا طاحت و طريق مقطوعة و ملقينا معاكوم والو.. معرفناكومش تا شكون و شنو وصلكوم لهاد لحالة ..

اشراق تفادات تجاوبها: بغيت نشوفو

سعاد : خاصك متعقريش رجلك

دوات الشريفة ملهيه:غير اجي

اشراق تصدمات كيفاش سمعاتهوم: اولي عنداك تكون سمعاتني فاش دويت فيها

سعاد :طلبي تسليم رآها بمواليها..

ناضت اشراق باقات مصدومة من هاد سيدة غريبة الاطوار عاوناتها سعاد وقفات واخا الحريق مي صابرة..

غير وصلات حداه و شافتو فشلات ديال بصح... ناعس بضعف ... كانت الشريفة كدهن ليه واحد الخلطة

اشراق (شادا لبكية ) : باقي ميفيق؟ شنو ديكشي كديريلو..

الشريفة : باني الجرح مغيستحملش حتا يتقشر... درتليه

الصبار و نبتة ليمون و الكرز و الورد طبيعي معصر باش كيهمدو عليهم الالام و كيجمعو اللحم و يهدنو الالتهابات .. نسالي و نديرليك حتا نتي...

بقات اشراق ساكتا.. كتشوف فيه .. وجهو كيبان صفر.. حالتو حالة.. باينا فيه مريض.. حتا من تخنزيرة مبقاتش.. كيبان جسد بلا روح .. هزات يدها كدوزها على شعرو و كدعي الله يبرى..

الشريفة : سعاد تقدري تمشي.. دي ولدك راه عيا.. و نيت راجلك باقي برة كيساين

سعاد كانت غتعتارض غير شافت تخنزيرة الشريفة جمعات الوقفة: هاني غادا صبح و نركب عليكوم . إلى خصاتك شي حاجة عيطيلي..

دارت شافت فاشراق .. شنو سميتك بعدا ...

اشراق بدون نفس دوات : اشراق.. سميتي اشراق..

خرجات سعاد بقات اشراق راس فراس معاها متنكرش انو خايفة منها .. لي مريحها وجود اديب ... ملقات اشراق مدير قالها عقلها تغني..

اشراق غمضات غينيها و بدات :

مقسومة نصين أنا زيي زي حاجات

كثير متقسمة على اثنين

مقسومة نصين أنا ثلج ونار وشر

وخير أنا هالحالتين مقسومة نصين

أنا بانسى الغدر وباعفي

وبارجع ثاني وبكره ضعفي

وبضيع نفس الحاجة اللي

أنا ضيعت عشانها سنين

مش واضحة ملامح صورتي

ويسألوا أسئلة فوق مقدرتي

إيه متداري ورا نضارتي

ضحكة دي ولا دمعتي..

بدات اشراق كتبكي و كتفكر كاع لحضاتها معاه... بقات كتشوف الحالة لي وصلاتليه ليها... و كتحسر على حالتو..

الشريفة:نتي سباب فحالتو ياك .. دعي الله يعيش .. و إلا غتعيشي بعداب الضمير طول حياتك..

مجوباتهاش اشراق لي فيها كافيها.. رجعات تاني لحالة الانطواء .. حاطة يدها فوق شعرو .. بحالي كتقوليه انا معاك..

دازت سيمانة..

فهاد سيمانة طراو بزاف دالاحداث..

.. سيمانة كاملة و اشراق مفارقاتش أديب حتى دقيقة.. سيمانة و هيا غير ساكتة .. كدوي بلقياس.. مقابلاه غير هوا.. سيمانة بسيف كتاكل.. حتا من رجلها كانت كتنسا داويها حتا كتبقا تنكر و تعصب عليها الشريفة.. سيمانة و هيا فوق راسو..

أديب لي عايش غير بلما دالاعشاب و العسل و ما.. فهاد سيمانة ضعاف.. بان فيه المرض

اشراق :اليوم خاص يفيق ياك

الشريفة :على سلامة سمعنا صوت.. اليوم كمل سيمانة.. جرح تنقى و بدا كيتجمع.. غالبا اليوم يفيق..

----

عند عصام ... سيمانة كاملة و هوما كيقلبو عليهوم .. مخلاو حتا بلاصة .. مبغاوش يعلمو البوليس.. حيت عارفين بلي اشراق غتكون معاه.. و حاطين احتمال بلي راهوم فشي بلاصة بجوج...

كوثر : امضرا لقيتيهوم..

عصام : لا باقي تيليفوناتهوم مخدامينش. مخليت حتا بلاصة مقلبتش ...حتى من صبيطارات كاملين وصيتهوم..

كوثر : حتا انا طلع لبلايص لي شكيت تكون فيهوم اشراق ملقيتهاش.. حتا من رضا كيقلب عليها حيت خوات بيه .. كانت واحد الكومبا و محضراتش

عصام : zaمل مكيحشمش.. و دويت معاه.. يبعد منها مقابل نضمصو قضية لي فيديو

كوثر(بفضول) :حقا شنو دتو فيها صافي مسحتو كلشي؟

عصام : اه اه كلشي تقاد من ديك ناحيا..

تفكر عصام نهار دوا معا مروة على ود لي فيديو و الأخبار لي تنشرات فلي غيزو..

# فلاش باك

جالسا فكافي كتسناه و كتشرب من قهوتها.. غير عيطلها بقوة الحماس مشات قبل من الوقت لي دار معاها... متنكرش انو استغربات فاللول فاش عيطلها و طلب منها يتلقاها برا شركة و بلي حاجتو بيها

مدة قصيرة حتا وصل .. بانتليه كالسا بكل أنوثة .. غير وصل عندها تحنا سلم عليها للوجه .. شي لي خلى حناكها يحمارو..

مروة : بوجوغ عصام

عصام: الحب صافا؟؟

مروة (بحشمة ): بخير و نت؟

عصام: الحمد لله

مروة : اوى اش هد الغبور... نهار تفكرتيني... حتا حتاجيتيني(كضحك) هيا واقعا شي موصيبة

عصام: حاشا ازين راك عارفى الخدمة و تمارة.. و مبرزط هاد الايام..

مروة : احم تيقتك...مهم قول اش عندك

تقاد عصام فالجلسة و قال: الخبر لي خرج مؤخرا على الذيب بغيتك تعرفي شكون مولاه ( غمزها) منخافش عليك طلعيه وسط مية واحد.....و دوك الاخبار بغيت يتمسحو بغيت ميبقاوش كاع .. و الخبر يتكدب

مروة: نعرف شكون اك ساهلة...مي باش نكذب الخبر اليوم و معندي تا حاجة تخليني نكدبو شوية صعيبة خاص شي حاجة لي يتيقو بيها .. إلا الى فبركنا الفيديو و درنا شي شخص اخور وصاف... و بنسبة لمسيح حالها ساهل

عصام: فكري اصحبتي غادي تلقاييها ماشي اول مرة ديري شي حاجة هكا... و لا هكر غير هكاك

مروة: ها حنا ولينا فالمعيور.. و دوي بشوية.. بقالك غير تقولها فالبوق.. من نهار فرشاتني ايمان.. و انا ماني فخير معاك..

شد ليها فايديها (كيضحك ) و قال: لا لا كوني هانيا دابا صافي دبا شدرنا؟؟

ابتاسمات و هززات راسها و قالت: وخا صافي كون هاني

# نهاية فلاش #

عند مينة

بدات كتحل عينيها شوية بشوية...كتحل شوية و كضرها الضو و كترجع تسدهم...بداات كتنين بصوت خافت من الالم لي حسات بيه مور ما تحركاات

كانو واقفين كشوفو فيها من الزاج حتا لاحظو حركاتها و مشات كوثر كتعيط دغيا لسيف يجي..

دخل سيف فحصها و رجع خرج مع ابتسامة لعندهم بعدما فحصها قال: الحمد لله على سلامتها صحتها مزيانة تجاوزات مرحلة الخطر .. مع شويا ديال ترويض غتولي كيف ما الأول

كوثر(فرحات): الحمد لله شكرا بزاف ادوكتور سيف لهلا يخطيك

سيف(باعجاب) : دوز يدو على شعرها.. سيف باراكا مكاين لاش ديك دكتور زايدون هادا واجب ..

نحنح عصام : لهلا يخطيك اخويا خيرك ثقيل منرضوليك

سيف : باقي ملقيتو خونا.. (طيطنز) ياكما خاف نشكي بيه

عصام (رضهاليه فالبلاصة ) : لا راه عايش الحياة(غمزو )

تخطاهوم سيف بلا ميجاوب و داز.. خرجات عندعم الممرضة علماتهم بلي يقدرو يدخلو عندها...

دخلات كوثر و حليمة كيعنقو فيها و يبوسو بطبيعة الحال مكايسين عليها..

مينة بسيف باش قادرا تضحك فرحانة بشوفتهم.. مقدراتش تهضر مزيان بحكم شحال مدوات .. بقات كدور فعينيها كتنسا فاشراق تبان و لكن والو و قررات تسول..

مينة(بصعوبة دوات) : إشراق.. فين هي؟؟

كوثر: احم .. جاتها خدمة على غفلة.. و اضطرات تسافر ..

عصام:متخافيش رآها مع ليكيب ممشاتش بوحدها ..

غمضات مينة عينيها و فتحاتهوم..

كتجمع الجهد باش دوي قاطعهوم دخول الممرضة

ممرضة: خاصكوم تخرجو دابا.. تخليو المريضة ترتاح...

عند اشراق

كالسا حدا اديب ساهيا فيه..

الشريفة (كطنز) : لهاد درجة كتبغيه.. سيمانة و نتي ساهيا فيه

اشراق: نكدب عليك إلى قتليك راني فاهمة باش حاسا.. واش عداب الضمير و لا حب و لا كره و لا حقد..

شريفة : شنو قصتكوم.. شنو لي وصلكوم لهاد حالة ...

اشراق حسات براسها قادرة تهضر ..قادرة تفرغ... قررات تعاود ليها على علاقتها بأديب

اشراق : غنعاودليك قصة الراقصة و الملاكم...

شافت فيها كأنها بنت صغيرة و نطقات: معارفاش منين نبدا ليك بالضبط.....من نهار شفتو حياتي تقلبات كثر من قبل.... مبقيتش فاهمة راسي مبقيتش عارفة واش باغاه يكون فحياتي و لا مباغاهش....باغا نبقا نشوفو كل نهار و لكن شوفتو كضرني.. لسانو سليط.. و نعيا نداعي لا مبالاة و بلي هضرتو مكتأثرش فيا .. لكن كيطرا العكس .....ديباسيت معاه الحدود و وصلنا لشي حوايج لي كثار و لكن حنا علاقتنا بزوج لدبا مفاهمينهاش.. بالأخص انا....معارفى راسي واش كنكرهو ولا ( و سكتات)

شريفة: ولا اش؟؟

إشراق حدرات عينيها و قالت: ولا كنبغيه... هادشي لي طرا خلاني نشك ... معرفتش واش حيت تأنيب ضمير ... و لا حيت انا كنت سبب فلي طرالو... و لا يصح راه كيهمني....معاه مكنبقاش انا...كجبد العمق ديال اشراق...كجبد اشراق وحدة اخرى....سلمت ليه راسي و مندمتش فالاول....كانت ذكرى زوينة عندي منو... تجربة و احساس لي مندماتش عليهوم... قلت مغانعاودش نشوفو ....موراها من ذكرى زوينة تحولات لأكبر غلط درتو فحياتي....محبساتش هنا.....نهار جينا عندك ( عينيها تغرغرو)كان تعاود نفس الغلط....قسمت ليه بلا الا عاودناها نحرق راسي و نحرقو معايا...متسوقش كان مستعد لاي حاجة المهم نكون ليه... معرفتش واش ضد فيا دارها و لا شهوة و لا غريزة ..مبغيتش فلول...كرهت راسي و كرهت لحمي...و لكن... فلخر انجرفت معاه لبحر الشهوات ....

كل مرة كقيسني كخليني نحس براسي بلي قلبي و انا ملكو هو فقط....بلي تخلقت ليه هو و انا الوحيدة لي خاص نكون ليه.. كيكون واحد الانسجام.. كنترفعو لعالم اخر..و لكن مور ما كنفيق من هد الأحلام كنعرف بلي هدشي ما منو والوو بلي انا عمرني نكون ليه... بلي انا مجرد شهوة ملاكم... فاش طرا لي طرا بيناتنا .. فقت بدون وعي نضت شعلت العافية فالديبو...مكنش كنشوف والو قدامي كنت مرفوعة باغا غير نتهنا...

حلفت و فيت .. كان واخد هضرتي ضحك....دكشي كان فوق طاقتي و دماغي مبقاش قادر اصبر مزال لشي حاجة ...كنت باغا نطفي العافية لي شاعلة فصدري ... هو سبب كيخليني ندير شي حوايج يكونو خايبين غير باش نرتاح و نتهنا من العذاب...

كان هو ناعس ديك الساعة..فاش فاق تصدم... متوقعنيش نديرها... العافية كانت شاعلة و ضايرة بينا...مبغيتش نخرج ليه و بزز باش قدرنا نهربو من واحد الممر.....و تما طاح علينا البلافو كلو عافية... و عرفتي شنو وقع (ضحكات بمرارة) هو حاما عليا ... كان غيطيح عليا ... مفكرش جوج مرات ... كالا عليا دقة وجات الدقة فيه..... واخا هكاك صبر و قاوم.. مبغاش يخرج بلا بيا ...كانت رجولة و شهامة منو..

كملنا هروبنا و لكن فاخر لحضة بانت ليا بوطة د غاز كان خاصني نحيدها حيت لا وصلاتها العافية كلشي ايتفرجع و مكناش غنعيشو ... ديك الوقت فكرت فيه كتر من راسي .. شفتو شحال قاوم باش نعيشو....خليتو خرج و بقيت انا تا حيدتها عاد خرجت.تما فين تقاصيت فرجلي ...غير خرجت قلبت عليه لقيتو طايح فالارض مغيب... متصوريش منضر ديالو هكاك شنو دار فيا ... و الباقي راك عارفاه

هادي هيا قصتي مع أديب ...قصة الراقصة و الملاكم ... او بالاصح قصة شهوة ملاكم....

الشريفة: غنسولك.. سيمانة دازت علاش مفكرتيش ترجعي.. علاش مفكرتيش تعلمي عائلتو.. كان ممكن نديوه لطبيب مي نتي رفضي .. شنو لي خلاك تخليه هنا و تغامري بيه ... رغما كلشي قالك الطبيب حسن ليه.. كان غيكون فاق ...

اشراق (سرطاات ريقها ): معرفتش لمصلاحتو .. هنا حاسا بيه مرتاح و نتي مقابلاه بحال ولدك و كتر ... حسن من طبيب..

الشريفة (ضحكات) : علاش كتقنعي راسك بحوايج مكينينش.. علاش متقوليش بغيتي تبقاي حداه و تقابليه بيدك.. نتي عارفة مزيان إلى بقيتو حتا رجعتو كرامتك متسمحش ليك كل مرة تمشي عندو و تشوفيه.. مغيصلاحش ليك تبقاي حداه .. مغتقدريش تقابليه بيدك...

قاطعتها بجدية : ميمشيش بالك بعيد ... بصح هادشي لي كتقولي صحيح مديتوش باش نبقا قريبة .. مي هادشي غير باش نريح ضميري.. باش نرتاح.. انا راه ندمت على حاجة وحدة فقط انو عرضت حياتو هو الخطر ...

الشريفة(كطنز) : يعني مندمتيش حيت نعستي معاه ..ندمتي غير حيت شعلتي العافيا.. ياك

اشراق (بعصبية ):هوا سبب كون مقربش ليا كاع ميطرا هادشي.. كاع ميكون دابا مريض و محروق ... هوا لي جابها راسو ..

الشريفة (ببرود) : كان فامكانو يخرج سالم.. مي هوا ضحى على ودك و شوفي شحال كلفاتو تضحية..

اشراق( صعرات وقفات غادا جايا ) : مقالو حد يضحي على ودي .. علاش اصلن من اللول يقرب ليا علاش يضغط عليا راه بسبابو حنا فهاد الحالة .. بلا مدافعي عليه.. قتليه غنحرقك و نحرق راسي هوا بغا ..

اشراق دخلات فهستيرية ديال لبكي و لغوات.. محساتش حتى جاتها طرشة فيقاتها ..

الشريفة (بحدة ) :مالنا كنقولك 100 مرة متعليش صوتك و تبقاي ترطاي عليا.. كندويو دوي بشوية... راكي عرفتي.. راكي كبيرة.. مغنبقاش نعلمك اسلوب الحوار..... شواقع كاع.. فيقي شويا متبقايش تلعبي دور ضحية ..

عرفتي نتي شنو حارقك حارقك انو عطيتيه راسك.. و بارادتك.. و عارفة راسك ميمكنش تجمعو.. كتقولي اجاب شيخة ل ملاكم.. كتقولي سلمتي ليه راسك بالرخيص... مغيشريكش بالغالي... نتي متأكدة ديما غيشوف فيك شوفة ناقصة شوفة دوحدة دزنقة.. نتي هادشي كامل منوضاه حيت متأكدة انو حتا حجا مغتجمعكوم و انو طول حياتك غتكوني غير نزوة عابرة غير شهوة ملاكم فقط..

اشراق (كلسات كتبكي ):هوا اناني لسانو سليط.. حكار.. كيطلعني بال79بة و يهبطني بيها ... نسا بلي مكيعرف ل79اب غير لي كابر فحجرهوم .. يستاهل لي طراليه.. شكون قاليه يقيس فيا عطا الله لخانزات...(مرفوعة معرفاش شنو كتقول.. عينيها تعماو ) شتي انا معندي لهلى يقلب شكون هوا كاع.. ميغركش تشوفيني حداه راني ميتا عليه.. كنبغي راسي و بس.. ميحصليش الشرف نكون معا واحد حاكمو لي بين رجليه.. وإلى كان كيحسابليه كيجي عندي يفرغ الشهوات ديالو.. راه نفس شي حتا انا.. كيفما هوا كيستغلني تا انا استغليتو.. كيفما هوا فرغ شهوتو حتا انا.. شتي كون كان راجل انا المراة لي تقولي بعد مني مبغيتكش ميدورش بيها..

شتي كون كان راجل ميجيش يعقد معاي صفقات ضد فعائلتو.. شتي هادا راه تاحد محاملو.. دابا عاد عرفت علاش صحيبتو سمحات فيه.. دابا عاد عرفت علاش فضلات معتز.. حيت بكل بساطة ملقاتوش راجل .. عرفاتو تابع غا كبالتو.. واخا حتا خوه فولة و نقسمات.. شتي رجال غير شمااااااااااا يت شتي كون محرقتوش كان غيحرقني.. كان غير يفيق يلوحلي تاني الفلوس و يقولي ضوري تشللي .. مهمتك سلات... انا راه كنكرهو كنكرهو...

الشريفة (برود) : قلبك عامر و عينيك تعماو ... و غيجي نهار لي غتندمي و ياخوفي لي فبالي يكون صحيح.. غلطتي غلط كبير ... خرجتي كلام كيجرح.. كلام لي غيرجع عليك بندامة.. غدفعي تمنو غالي و غالي بزاف.. كانو بيبان غيتفتحوليك.. صدقتي سادهوم بيدك.. طيرتي رزقك بيدك..

(شداتلها فيدها مدة و سكتات حتى قالت اشراق مال هادي واش تسطات) : تابعاك طريق طويلة.. طريق عامرة شوك.. حطيتي سناسل فرجلك و سديتي القفل.. جا وقت الصح و الليالي.. جا وقت تعرفي بحق لي ضلمتيه و عمر ضالم يكون هاني... بيدك جريتي على رزق و بلسانك جرحتي لقلوب.. ياخوفي عليك من لي جاي...

اشراق : يلاه بغات تستوعب شنو كتقول و تسولها على المعنى قاطعتها

الشريفة :عمرك تخلي الغضب يعميليك عينيك.. غلطتي غلط كبير و جا الوقت دفعي تمانو غالي.. (دوات ببرود) راه فاق ..

اشراق (بحالي خوات عليها سطل دلما ):فاق كيفاش فاق باش عرفتيها..

عند أديب بدأ كيسترجع الوعي ديالو..

شوية بشوية بدا واحد الصوت كيدخل لودنيه صوت ديال المشي والمجي، وتقرقيب وريحة ديال الماكلة ، عند بالو واش مات ، واش هو فجنة ولا كيتخايل واش هو ميت و لا حي ولا غير كيحلم،

شوية بشوية بدا كيحل عين وحدة بتثاقل ، كيبان ليه واحد البيت مظلم ، الضو داخل غير من واحد السرجم صغير ، كيبانو ليه شي قراعي وشي ورق ديال الشجر ...

هاد المرة فتح عينيه بجوج بيهم ، بدات كتوضاح ليه الصورة ، كيحس براسو كلو مبنج ، والبرودة على ظهرو ، حرك صباع يديه بشوية ، واليد لوخرا حتى هي بشوية، هز راسو غير بشوية ، تقرص حيت الحركة لي دار عݣراتو، حط راسو ، ورجع كيحاول هز راسو ولكن هاد المرة غير بالمهل...

كيسمع صوت لغوات و لهضرة بجهد مقادرش يركز مزيان.. بقا كيحل و يسد عينيه .. بقا مدة على ديك الحالة.. حاس بلحريق فضهرو و يدو.. يلاه بغا يحاول ينوض .. حتى تسعق بهضرت اشراق.. كل كلمة نطقات بيها دازت على ودنيه.. مقادرش يتيق بلي كتفكر فيه هكا و هوا لي كان ناوي يحط معاها نقط على الحروف .. كان باغي يعطيها فرصة..كان باغي يعطي فرصة لراسو يعاود يبغي من جديد... كانت عاجباه.. كانت كتباليه مرة و نص يعول عليها الواحد.. قوة شخصيتها كانت ميزاها.. كان كيعجبو يستفزها باش يخرج القطة الشرسة لي داخلها. .. مكانش كيهمو ماضي ديالها..كيآمن فكرة انو الانسان ممكن يتغير...

و حتا فلحظات ضعفها.. كانت كتعجبو.. ملي عرف قصتها عرف راسو ضلمها.. كان ناوي يعطيها و يعطي لراسو فرصة... لهاد درجة هانتو و كدوي عليه بسوء..

ياك ضحى براسو على ودها.. حتى من يدو و ضهرو ها هوما تحرقو... مهموش الأمر كان هامو ميقيسها والو .. كان باغيها غير تخرج سالمة و لو على حسابو هوا...

ضحى بالحلم ديالو و مهموش الامر.. دبا حتى من الملاكمة مغيقدرش يمارسها.. يدو تحرقات حتا من الحلم ديالو مشا.. و فتالي صدق ماشي راجل ... و لي حرقو كتر حكاتليه على ضبرة.. من خوه قارناتو بيه و هوا لي كان مستعد يوقف فوجهو غير باش ترجع تكمل سطاج ديالها... ضحك بالم على راسو.. ديما كيطيح فالشخص الغلط..

فلحظة رجعو ليه كاع الأحداث ،بدا كيستعقل ݣاع لي وقع معاه، كيفاش وحدة متسواش كانت أضيع ليه حيتو،كيفاش شهوة ورغبة فيها و اعجاب ..كانت أدمرو ودمر أحلامو ، ودمر كاع لي كيحاول يبني فيه جات بغات تريبو ، بغات تنتاحر وتقتلو معاها ، وحدة ماعندهاش حس المسؤولية مستهترة مكتسواش ، بايعة راسها برخيص ورخاصت عليها حياتها، كاع داكشي لي عاودات ليه وفلحظة ضعف وبقات فيه.. كاع لديك الاعجاب ، تحول لواحد الكره كبير، تعصب، كرز على يديه بجهد ، مكرهش ينوض ويخنقها بيديها ، عينيه كطاير منهم العافية ، نيفو والعضلات ديال وجهو كلهم كيترعدو، منين كيتفكر شنو دارت، كان غادي يموت فيها... فلحظة كان غايكون فعداد الموتى ... كان باغي يعوضها على كلشي .. ساعة مور هضرتها عرف بلي متستاهلش...والله لا دوزها ليها ، كيحلف فالداخل ديالو و بينو وبين راسو ... ،حلف بلي العافية لي لاحتو فيها غايشطحا عليها ، أيخليها تشطح على إيقاع النار ، وأيدوز عليها المرار ، حتى تولي طلب كون غير ماتت فالعافية ومعاشتش هادشي لي أتعيشو ....

شافها كطل مور ريدو جايا لجيهتو.. محاملش يشوف وجها ... محاملش يسمع صوتها.. يكفي شنو سمع منها.. كان كيتوقع غتكون ندمات غتكون حسات باش حس هوا ساعة خيبات ضنو...

.. غمض عينيه... مبغاهاش تعرفو فاق.. مزال مقادرش يهضر... مباغيش يدير شي تصرف يندم عليه.. كيحاول يسيطر على الغضب ديالو..

عند اشراق كطل و دعي الله ميكونش فايق.. ميكونش سمعها.. ندمات على الهضرة لي خرجات.. كانت فلحضة غضب.. مقصداتهاش و مخرجتهاش من قلبها..

تخطاتها الشريفة هازة مشروب من الاعشاب.. مشات كلسات حداه.. كدوز بحنية على راسو.. كيفكرها فولدها...

الشريفة(بغات تصدرها) : سيري عند سعاد جيبيلي ازير غنحتاجو

اشراق : راه كاين لداخل

الشريفة (بحدة ) : دويت معاك متكتريش اللغا

اشراق :واش مزال مفاق .. راه بغيت نكون حداه فاش يفيق

الشريفة (شافت فيها بمعنى منيتك) : سيري ديري شنو قتليك...(كطنز) ديكشي لي بقاليك غير تكوني حداه

خرجات اشراق على سعدها محاملاش تخليه بوحدو معاها...

عند الشريفة: تقدر تحل عينيك.. راه خرجات

أديب تنهد كارز على يدو صحيحة: فين انا و شكون نتي ..

الشريفة : جابك المكتاب .. و صاني عليك الحبيب.. لقاوكوم جيراني و جابوك.. حيت عرفو دواك عندي..

أديب كيحاول ينوض مقدرش.. ضارو ضهرو .. كيكرز عينيه بلحريق... مداتليه شريفة مشروب الاعشاب..

الشريفة: هاك شرب غيهدن عليك لحريق...

أديب (مقادرش يدوي بلحريق) : شحال و انا هنا

الشريفة : اليوم سيمانة..

أديب(تصدم) : تقدري تعطيني طيل خاص ضروري نعلمهوم..غيكون بالهوم مشطون.. حيت بالي ديك خيتي معلمات حد.. (شاف فيها ) عمري نسا خيرك..

الشريفة (شدات فيديه ) : عرفت قصتكوم.. و عرفتك سمعتي هضرتنا..

قاطعها أديب: الله يخليك مباغي نسمع والو.. ديكشي صفحة و طويتها ..

الشريفة كدوز يدها بحنان فوق شعرو: قلبك مجروح .. و هيا دواء... هيا مكتوبك و دوا لجروحك... دخلت قبر العذاب ملي شافت فراقك

ما قدراتش تحبس دموعها و قلبها ليك مشتاق

ليلهاا كيف صباحها..حبك لنومها سراق

تاتفكر فليوم اللي صباحك فيه يشرق

مضلمهاش.. متعدبهاش... يكفي لي داز عليها.. يكفي لي عاشت.. متزيدش حتى نتا.. برد برد اولدي..

أديب مستغرب من هضرت هاد المراة لي كلها معاني..

الشريفة : شرب شرب مزال تفهم هضرتي و ياخوفي يكون فات الفوت.. نصيحتي ليك عليك بصبر .. و كون حقاني و مضلمش

دخلات اشراق لعندهوم..شافتو فاق .. محساتش براسها امتى حطات ديكشي لي فيدها و طارت لعندو

اشراق (دموع فعينيها شدات فوجهو) : كيف بقيتي.. خفت عليك بزاف سمحليا.. سمحليا ندمت بزاف..

حيد وجهو عايفها تقيسو.. أديب(كارز على سنانو محاملهاش تقيسو: اخر مرة تحطي يديك عليا .. آخر مرة توسخيني

اشراق تصدمات من هضرتو قلبها كيضرب بجهد حاسا بيه غيستك .. خايفا يكون سمع كلامها فلحضة غضب

اشراق:أديب انا

)قاطعها): شنو نتي شنو واش عارفا راسك شنو درتي... واش فاهمة الضرر لي سببتيه...

اشراق (دموع فعينيها ): ادييب سمحليا... انا ...

قاطعها كيدوي ببرود عكس العافية لي شاعلة فيه ) : علاش نسمحليك بضبط غير قوليلي علاش

سمح ليا ...كنقولوها فاش كنهرسو ماعن ناس ماشي تيقتهم ...فاش كنقيصو شي حد بالغلاط ماشي كنحاولو نقتلوهم... فاش كنخرجو كلمة فلحضة غضب .. ماشي نشبعو فيهوم سبان و نهينوهم... فاش كيكون غلط بسيط ماشي نضمرو احلامهوم... وراقيك بانو ابنت الناس .. ضنيتك ماشي بحالهوم صدقتي كفس منهوم ..

دار كيشوف فالشريفة : الله يخليك عطيني طيل نعيطليهوم يجيو يديوني .. مبقيتش قاد نشرك الاكسيجين مع شي ناس.. و قوليلي فين حنا باش نعت ليهوم...

اشراق نهارت بلبكا... مكانتش متوقعة رد فعلو هادي.. كانت متوقعاه يسبها و يجرحها.. كانت متوقعاه يجعر عليها.. او حتى يضربها ... هضرتو ببرود كملات عليها...

يلاه جات تدوي نوضاتها الشريفة:خليه يرتاح.. دابا يبرد.. خليه ...

ناضت معاها اشراق(كتبكي) : هوا سمعني اكيد غيكون سمع هضرتي.. انا راه مقصدتش نتي عارفاني مقصدتش.. قوليليه انا ماشي قتالة قوليهاليه..

عند عصام واقف كيدوي مع كوثر كيفكرو فين ممكن يكونو حتى كيقاطعو طيل بنيم ممعروفاش ...

عصام :وي شكون معايا

أديب(بصعوبة كيدوي ) : عصااام.. انا أديب

عصام (بلهفة) : صاحبي فينكوم.. عيت نقلب عليكوم.. فين مشيتو

كوثر :واش أديب سولو على اشراق .. رآها معاه ياك

عصام :فينكوم غدا المقابلة خاصك ترجع.. واش اشراق معاك ياك

أديب: شوف اجي لبلاصة ******** راحنا تما متعطلش ..

قطع أديب بلا ميجاوب على اسئلة عصام... بسيف باش قدر يدوي و يعطيه العنوان... تنهد كاره الوضع و الضعف لي هوا فيه.. كيفكر المقابلة لي كانت غتغير حياتو.. هاهيا مشات..

---

عند عصام غير قطع معاه شدها هو و كوثر ديريكت لعنوان لي عطاه...

اشراق عيات تحاول تدوي مع أديب ممصوقلهاش... عاطيها البرود التام.. قاتلها غير بالنخال.. مخلاهاش تقرب ليه ابدا.. كرهات راسها غير بالفن..حيت اشراق من نوع قتليها و متنخليهاش.. و لفات هيا لي كتنفخ و تبورض على بنادم.. دابا طرى العكس..

---

فجيها خرى ݣالسة فوق النموسية ساهية ، مهبطة الريدويات عليها ، جامعة رجليها عندها وكتفكر أيامها معاه وشنو دوزات ، تنهدات تنهيدة طويلة، شوية بدات كتحس بلحمها كيقرصها وداتها كلها منملة عليها ...راسها بدا كيضرها، ...هاد الأعراض ....، كيبينو ليها بلي جا الوقت لي خاصها تاخود لاضوز ديالها من السعادة ، جرعة النسيان ، جرعة لي كديزاكتيفيها على الواقع ، وكتنسى فيه شكون هي ولا فين كاينة ...

، ضارت لجيهت الكوافوز لي حداها كتقلب فيه كتمنى تكون باقي فيه خنيشة من "الكوكاين" بودرة السعادة كيف كتكوليها هي ،.. حلاتها ساعة تصدمات مالقات فيها والو من غير ساشيات خاويين مابقا فيهم والو ، كتحل فيهم وتعاود تاكد... ساعة مبقا والو..، العافية بدات كتشعل فيها ،

بالخف ناضت لجهة الماريو، حلاتو كتقلب فيه لاروبما تلقا فيه شي ساشية تكون بقات تماك، جبدات كاع الحوايج لاحتهم ، يد كتجبد بيها الحوايج ، ويد كتحك فنيفها... لحمها كولو كيكلها... ، مالقات والو مكاين والو، غتحماااق، ولات كدير حركاتها مامفهومينش، راسها كيترعد وكدير حركات غريبة بحال شي وحدة حماقت ، دموعها بداو هابطين بوحدهم، المسكارا خسرات ليها كاع وجها ..كتمشي و تجي و تحك فلحمها..

- (بلا عقل) :

- كيفاش مابقاوش كيفاش... انا متأكدة كانو باقيين...، مشات لبزطامها كتقلب فيه على لاكارط بونكير ديالها.. ساعة حتى هيا مكايناش، قلبات على الفلوس ، حتى هوما مكاينينش .... حاسة براسها قربات تسطى

- لا مايمكنش، بلا عقل مشات لتيليفونها هزاتو ، دورات نمرتو وبقات كتسنى فيه يجاوبها، كل تانية كدوز عليها بحال العام ،غادية جايا بحال الحمقة ، مرة تحك راسها ومرة تحك فيديها.. مرة تحك فوجها ، مابقاتش حاسة براسها شنو كدير،فداك الوقت ممكن ضرب راسها ومتحسش ..

- غير شوية بغيت غير شوية ..

- ألو ألو عفاك عفاك ، فين لاكارط ديالي عفاك فين درتيها... نتا لي هزيتيها ياك ..

-(ببرودة) : بلا متقلبي لاكارط عندي، وإلى بغيتيها، خدمي عليها ..مشا زمان انا نخدم و متي تاخديهوم باردين...

-(كتبلع ريقها بصعوبة) : عفااك كنواعد كنواعد ،... شوف غير هاد المرة ... ضروري خاصني ... غير شمة وحدة غير شمة وحدة وغادي نقطع مغانبقاش نعاود الله يرحم بيها الوالدين ..راه غنحماق .. غندير شي فضيحة... عفاااااك

-(بصرامة وببرودة) :كنعرف لي مبلي كيقد ببليتو،بغيتي داك الحرام عري قاعك وخدمي عليه ودابا انا مامساليش ليك ..

(بهستيريا) :- لا لا ميمكنش (تيت تيت ، قطع عليها) :

- غوتات بحر جهدها وضربات بتيليفون مع الحيط ، شدات على راسها كتمشي وتجي ..

- أصلا هو مكايحملنيش اصلا مكايبغينيش، كنبان ليه غير ادات كيخوي فيها رغباتو ، شنو اندير انا شنو اندير، بدات كتبكي على حر جهدها، مشات لجهة الباب، تحلو لقاتو مسورت، زادت جهلات، بلا عقل مشات لكوافوز ديالها الثاني حلاتو،جبدات بواطة كبيرة، حلاتها كان فيها كوليي كان جابوليها كادو ..،

جرات ساكها خشاتو فيه، كانت لابسة تريكو كحل وسروال دجين، زادت الباسكيط لي لبسات، دارت الساك على جنب، مشات جيهت البالكون زولات ريدويات، حلات الباب بلاما تفكر نهائيا، نقزات، واخا تقصحات فرجلها ماهمها، جارة رجلها وغاظية لوجهة ديالها فين اتلقى راحتها وسعادتها ..

عند اشراق كالسا ساكتة مصدومة.. عمرها توقعات غتعيش هادشي.. علاش قلبها كيضرها من معاملتو.. ياك مكيهمهاش.. علاش بقا فيها الحال من تصرفاتو.. ياك كانت باغاه يبعد منها.. ميقربش ليها.. و يعطيها بتيقار... ها هو نفد طلبها..

جات الشريفة كلسات حداها : اشراق يا اشراق و من نهار و عيتي و دنيا مشرقاتليك... مبقاش بزاف و طريقكوم تفرق.. يا تقاومي و تحاربي.. يا تنساحبي و تنساي ..

اشراق: عيت و الله كرهت كلشي ...

الشريفة : عندك فرصة عرفي تستاغليها.. مبقاش بزاف و يوصلو.. ...

اشراق: علاش مبغيتيش تعاوديلي قصتك مبقا والو و منعاودوش نطلقاو..

الشريفة : مزال غنتشاوفو.. و مزال غترجعي.. راه كنقولك غير صبري على خبزتك..

ناضت الشريفة من حدى اشراق تعمدات تخرج من دار تخليهوم بجوج.. واخا متأكدة مغيقدروش يداويو جراحهوم حاليا..

اشراق بقات ساهيا كتخمم.. كتسائل شنو غيطرا دابا.. واش صافي مغتبقاش تشوفو...

ناضت بلا هواها.. غادا لعندو كدعي الله يكون ناعس.. مقدراش تزيد طيح بكرامتها كتر.. و تعاود تهان ..

دخلات و من زهرها لقاتو باقي ناعس... مفكراتش جوج مرات مشات تكات حداه... غمضات عينيها كتسمع انفاسو حداها..

أديب: رتاحيتي دابا

اشراق(تصدمات كانت كتوقع يكون ناعس ) : نكدب عليك إلى قتليك رتاحيت... زدت عداب على عداب ..

أديب : باقا صغيرة.. ياقي طريق قدامك طويلة.. مزال تفهمي قيمة الحياة كتر..

اشراق: علاش مبعدتيش فاش قتليك بعد

أديب : كون مشفتش نار الرغبة لي فيك مكنتش غنقرب..مكنتش غنتمادا معاك...فاش جينا مكنتش معول غيطرا ديكشي بيناتنا... اما علاش مبغيتش نبعد حيت كنت متأكد كون درتها.. مكانش عقلك غيستوعبها.. كنتي غتقولي علاش بعد.. واخا نتي لي طلبتيها.. كنتي غتأوليها لحاجة خرى..

اشراق : و على نتا كيهمك فاش كنت غنفكر..

أديب : انا لي شعلتك و كان خاصني نبردك.. اما لأفكارك.. كنت كنفكر حيت نتوما ماشي بحالنا.. كتبقاو دققو و تحلو فتصرفاتنا.. واخا احيانا كتكون غير مقصودة.. كنتي غترضي العيب فراسك.. و تقولي علاش بعد..

اشراق : نتا اصلن كيهمك غير الشهوة و الجنس..

أديب :غالطة و بزاف.. تعقلي نهار جيتي عندي لدار عندي شنو قتليك ...

اشراق كتفكر نهار مشات لدارو ...

# فلاش باك #

أديب: فايمكاني كيفما جيتي برجليك عندي بدافع الفضول... نخليك تجي عندي بدافع الحب .. لكن رجولتي متسمحليش.. كان ممكن نستغلك بطريقة خرى.. نبنليك جسر من الاوهام بدافع الحب و الاعجاب و نقدر نتمادى و نغريك بزواج.. لكن شهامتي مكتسمحليش ..

جات تهضر اشراق و قاطعها: خليني نكمل..

تلاقينا فضروف فشكل .. جمعاتنا الشهوة و الرغبة.. كنا مرفوعين.. العقل كان غايب .. غلطنا بجوج.. او نقولو الغلط الاكبر كان ديالي.. رغما انو عقلي كان مستوعب افكار خرى و بكل صراحة كنت حاسبك مولفة حرفتك...لدرجة كرهت راسي حيت نعست معاه...

مهم هادي دازت.. اليوم مغندويش معاك بصفتك شيخة.. اليوم غندوي معاك بصفتك اشراق لي خدامة فشاركة.. البنت لي شفتها كتبكي فالكولواغ..

اشراق (مشوكية كتقول شنو كيدير هادا فشركة و ايمتى شافني و علاش مشافتوش)

باختصار.. عرفت شنو طرا بينك و بين معتز.. مغندافعش عليه .. مي كان غلطك.. هنا غنعطيك نصيحة.. عمرك تبغي تخالفي الناس او بمعنى واضح نتي عاد سطاجيغ.. يلاه بادية .. فاهما مزيان القوانين.. علاش تحطي راسك فموقف مجرج.. علاش ندل راسي لواحد لي انا متأكدة جوابو غيكون الرفض.. فمدام طلبتي شي حاجة خارج حدود المنطق ... تحملي العواقب....

(شافها غدوي و سكتها بيديه)

مخلصتش الكلينيك.. حيت طامع فيك و لا حيت باغيك و لا حيت انسانية مني.. هادشي كامل مكيهمنيش..

غترجعي لشركة كيفاش و علاش خليهوم عليا.. نتي غترجعي تخدمي عادي... نفس بوسط ديالك .. سطاجيغ كيفما قتليك... المطلوب منك فقط تكوني قافزة ... يكون راسك خفيف و تعلمي بزربة... يكون هدفك هوا تزيدي القدام..ماشي حيت محبة فيك أولا شفقة عليك باغي نعاونك... لا ابدا... بغيت منك فقط الصفقات و الاتفاقيات و المشاريع المشتركة بينا و بين باقي الشركات.. نعرفهوم..و اي حاجة مرتابطة بالخدمة تكون عندي انا اول واحد...

# نهاية فلاش

اشراق :منبعد عاد فهمت علاش طلبتي مني المشاريع.. كنتي مقرر ترجع لشركة .. كان ضروري خاصك تثبت راسك.. اما حتى حد مغيعطيك رأس الخيط بضبط.. كنتي خايف من معتز يديرليك شي فخ .. حيت كيفما كان الحال علاقتكوم ماشي حتا لتما.. شبه منعدمة.. مغيحملكش تجي تشد معاه شركة.. بالأخص انو ضرب عليها تمارة نيت.. كنت خاصاك انا نكون باش تقدر تعرف منين تبدا لي بروجي..ودير بلاصتك وسطهوم... و كيفاش تزيد الشركة القدام.. دابا عاد فهمت علاش خلصتي لكلينيك.. باش حتى إلى فكر معتز يشري سكوتي.. غتكون نتا صبقتيه... و غنكون مضطرة نعاونك.. باش نوفي الدين لي عليا..

أديب: نساي الشركة سولتك على ديك نهار واش عاقلة على الهضرة لي قتليك فاش جيتي خارجة..

اشراق : (كتفكر كلامو ) : عمرك تخلي كلام ناس يأثر فيك.. خلي ضميرك مرتاح هادا الأساس ...

أديب: تماما .. دابا غنزيدك نصيحة ... عمرك تخلي الغضب يعميك.. حيت النتائج كتكون وخيمة...

اشراق ناضت كلسات .. تقابلات معاه كيبالها باقي مغمض عينيه..

اشراق : أديب راه نتا لي وصلتينا لهاد الحالة ...

أديب(برودة ) : مكيهمش شكون دابا.. كنتمنى تكوني رتاحيتي دابا(حل عينيه كيشوف مباشرة فعينيها) حلمي مشا أإشراق .. إلى نتي فقدتي احترامك لذاتك.. انا حياتي دمرتيها.. واش كتعتاقدي انك بوحدك لي عانيتي و كتعاني.. راكي غلطة بزاف .. شتي هاد الحروق غيبراو.. غيخليو اثار... يقدر بعملية تجميل وحدة ميبقاوش كاع يتمحا اثرهوم... لكن واش غيبراو الجروح لي داخل.. واش مستقبلي لي شحال و انا كنكافح عليه غيرجع... عرفتي شنو كانت كتعنيلي هاد المقابلة.. عرفتي شحال من باب كانت غتفتحلي... بيها كنت غنتبت لكلشي اني كنستحق لقب ملاكم... انو مجيتش و عارضت عائلتي و تخليت على كلشي غير هكاك... انو نظرات الفخر لي كنت كنشوفها فعينين ناس لي كيبغيوني ممشاتش غير هكاك... هادشي كامل مغتفهميهش حيت معشتيش على أمل تحققي واحد الهدف و ضاع فاخر لحضة .. هدفك كان هوا طلقي.. تفكي من القيود و تعيشي الحرية... هاهيا دابا الحرية عندك مي معرفتيش تستاغليها... عرفتي متبقايش تلوحي اخطائك على ناس ... تعلمي تحملي المسؤولية..

من اول نهار نتي ختاريتي هاد طريق .. كان فإمكانك مور مخدمتي شيخة .. مرة و جوج.. ديك فلوس تستاغليها باش تزيدي لقدام... ياك ضمنتي راسك.. بلي راك فامان علاش مقلبتيش على خدمة شريفة .. علاش ختاريتي طريق ساهلة و لا حيت فيها لفلوس كتر صافي .. مكتعدبيش.. كتجيك ساهلة تشطحي لقوم و فتالي تشديهوم باردين...

شتي أإشراق نتوما البنات كتبغيو كلشي واجد .. باغين فلوس حياة سعيدة زهو كتفكرو غير حدى رجليكوم مكتفكروش بعيد ...تقراو تكافحو تخدمو و دمرو و تكونو راضيين على نفوسكوم...

انا راجل و تخليت على كلشي على املاك على الفلوس و بديت من زيرو.. علاش حيت ديكشي مدرتوش بدراعي مضربتش فيه تمارة مغنعرفش قيمتو...

اشراف : نتا راك مفاهم والو.. انا راه مدازش عليا قليل .. وواخا هكاك خدمت باش قدرت نعيش .. باش نقدر نكمل قرايتي باش نقدر نزيد لقدام. انا عمري عولت على شيحد ..

اديب : قاطعها ... اه سمحيلي نسيتك كتعتابري الشطيح و تعري لحمك خدمة.. على هاد لحساب كنت غالط ...

اشراق ( بعصبية ) : نتا راك غير كتخربق ..

أديب: عندك صح رتاكبت أكبر غلط فحياتي... و هاد الغلط هوا نتي.. عرفتي علاش حيت عطيتك كتر من قيمتك و حجمك.. كنت غالط فيك .. كيفاش عطاتك خاطرك تفكري تقتلي راسك و تقتليني.. لهاد درجة مفكرتيش كيفاش غتلاقي ربك.. تقتلي روح معاك.. اصلن انا معارفش علاش كنعي راسي معاك.. نتي اصلن مستهترا.. عرفتي لي حرقني كتر .. نتي عارفة انو مبقا والو و نحقق حلمي و تصرفتي بانانية بصبيانية..

عرفتي شنو هيا يبقالك خطوة و تحقق حلمك و بسباب طيش يضيع كاع لي بنيتيه... أنا راه تحرقت على ودك.. مفكرتش جوج مرات.. انا سبقت حياتي على حياتك... عرفتي شحال خاصني باش نبرا راه ماشي ساهل .. و لو معرفت شنو كنت درتليك.. متفكريش تقتليني.. راه مكانش عليك تصرفي بصبيانية.. بلا عقل ..

اشراق : أديب انا راه ندمت كون رجع الوقت كاع ما...

(قاطعها ) : كون رجع الوقت كانو بزاف دلحوايج غيتبدلو... انا راه ندمت على نهار لي شفتك فيه..

يلاه جات اشراق تجاوبو سمعات الشريفة داخلة مع شيحد..

الشريفة :دخلو هاهوما هنا...

دخل عصام تابعاه كوتر غير شافوهوم تصدمو بالأخص عصام تصدم فصاحبو لي ضعاف و المرض بان فيه...

عصام (مصدوم ) : شنو وقع معاكوم.. شنو وصلكوم لهاد لحالة ..

أديب(لحريق فاق عليه بسيف كيدوي ) : عصام ماشي وقتو... اجي عاوني نوض..

عصام مصعوق كيشوف يد أديب كلها محروقة و ضهرو.. حاجة و حدة فبالو كيفاش غيقدر يلعب.. دونك بحالتو هادي غينساحب ... حلمو مشا...

كوثر حضنات اشراق عندها: شنو وقع.. حتى نتي تحرقتي فرجلك.. مسكين أديب.. كلاها ديال بصح.. (شدات على فمها ) ... مشات المقابلة.. مغايقدرش دابا يشارك...

اشراق غير ساكتة مقدراش تهضر شنو غتقول اصلا.... تقولهوم هيا سبب .. هيا لي وصلاتهوم لهادشي اللهم تسكت حسن..

خرج أديب و عصام مور مودع الشريفة وواعدها يرجع.. جبد عصام فلوس بغا يخلصها و مبغاتش..

عند اشراق مبغاتش تمشي معاهوم حتا شافت شريفة مخنزرة فيها بمعنى ماشي وقتو... ناضت جمعات الوقفة بسيف عليها..

الشريفة : كوني قوية و جمعي راسك .. نقصي من طيران و العصبية و صلحي الاغلاط ديالك... بابي ديما مفتوح ليك و انا متأكدة قريب غترجعي عندي..

اشراق (معندها خاطر ) : شكرا بزاف على كلشي على كلشي عمري نسا خيرك...

خرجو لبنات مور مشكروها... ركبو تاهوما..

كوثر طول طريق هيا و عصام كيسولو و يعاودو باغين يعرفو شنو وقع... لكن حتا واحد فيهوم مهضر...

موقفو غير حدا كلينيك...

كوثر (شدات فيد اشراق ) : عندي خبار زوينة غتخليك ضحكي...

اشراق ( بلا خاطر) : شنو

كوثر : مينة فاقت و سولات عليك راها ولات بيخير خاصها غير ترويض..

اشراق (ابتاسمات ابتسامة باهتا ) : الحمدالله لي فاقت... (تفكرات كمال ) .. حقا فينو كمال واش عطاك الفلوس...

كوثر ( ضحكات) : كمال هكاوا على كمال ... عيت كنصوني ووالو... سولت صحابو قالو مسافر خدمة... اشمن فلوس

اشراق (ضحكات بمرارة) : خورني و مشا

كوثر : كيفاش

اشراق : صفتو ياخد فلوس من عند رضا.. ساعة بالي داهوم و غبر... ( ببرود ) حلال عليه.. فلوس الحرام مكطلعش... زيدي ندخلو..

كوثر كتشوف فاشراق و طريقتها فالهضرة كتبان ساهية فعالم اخر... متقوليش هادي هيا اشراق لي كتعرف ..

وقفاتها كوثر : مالكي ا إشراق شنو واقع معاك.. حاسا بيك مبدلة.. شنو طرا معاكوم..

اشراق(ببرود) : مواقع والو ..

زادت اشراق مخليا كوثر غير كتشوف فهاد تحول الجدري لي وقع لاشراق ..

غير دخلو طارو باديب لقاعة الفحص... غير وصلات اشراق لقات عصام كيساينها...

عصام:على سلامتكوم... شنو وقع مبغاش أديب يقولي..

اشراق(ببرود): الله يسلمك .. غنمشي نشوف مينة..

عصام (وقفها) : بهاد الحالة و رجلك كلها ملوية فلعشوب.. غير تشوفك هاكا تمشي كومة... سيري بعدا يقادولك رجلك عاد شوفيها ...

اشراق : رجلي ممضروراش بزاف بدات كتبرا.. (شافت فجنابها كتقلب بعينيها ) كيبقا هو

عصام :راه دخلوه لسوان مزال مخرج طبيب.. جرها من يديه مدخلها لعند سيف ..

عصام : خويا سيف شوف معاك الانسة العنيدة ... مبغاتش تجي ..

سيف :مالكي ياك لاباس .. فين كنتي غابرة

عصام :رجلها تحرقات..

سيف (كيشوف فاشراق ) :ياك لاباس طلعي نشوف ..كيف ويعلم

اشراق جات بغات تخرج :مكين والو رجلي برات غير عصام كيزيد فيه

سيف :اجي اجي غير غنشوف..

استسلمات مفيها متحمق راسها معاهوم.. شاف سيف الحرقة لقاها بدات كتبرى .. عيط لفرملية جابتليه شنو غيحتاج.. دارليها دوا و جمعها بوند خاصة.. ..

سيف :هاحنا سالينا.. خاص كول نهار تصوانيها...

اشراق ( باغا غير تفاك ): إن شاء الله ...

خرجات مرفوعة باغا تشوف غير مينة....

عند أديب دارولو سوان لي خاصو من زهرو الجرح بدا يبرا و دوك العشوب نفعوه بزاف .. خلاو جرح يبرا دغيا نوعا ما...

غير سالا خرج... لقا عصام كيساينو...

أديب: بغيت عينك تكون على إشراق ... خاص ضروري ترجع لشركة.. غندوي مع هناء و دوي نتا مع معتز...

عصام (تصدم) : مضنيتكش غدخل(بجدية) شنو واقع بينك و بينها.. مينين كتعرفها..

أديب(بجدية ): ماشي أديب لي يجمع بحد خور.. (حنحن ) ... بغيت لبلان لي قتليك يبقا بينتنا مبغيهاش تعرفش بلي انا لي رضيتها.. ووصي ديك إيمان غا كتسرسر.. اه باش منساش.. (زيد وصلني عند رضا ) ..

عصام : زربتي عليا وحدة وحدة .. أولا نتا مريض خاصك ترتاح.. مكاين لا رضا لا والو..

أديب: معنديش الوقت خاص نقاد كلشي قبل منمشي

عصام: فين غتمشي..

أديب: تعقل على النادي لي فاسبانيا ديال الملاكمة

عصام :اه لي كانو عيطوليك و رفضتي على ود دارو معاك متشارك فحتى بطولة مغربية.. مالهوم..

أديب(جاوبو و زاد ) : قررت نوافق..

عصام (شوكاه) : كيفاش شنو كتخربق.. واش منيتك راه الحبس هداك(وقفو) أديب شنو واقع ملي رجعتو و نتوما كتصرفو بغرابة.. مفهمتش شنو واقع معاكوم... و زيد دابا هاد الانتقال لي بالك تاني.. ياك شحال من مرة رفضتي بحال هاد العروض..ياك كتقول متبيعش بلادك.. و باغي تشرف المغريب.. ياك كتقول ميمكنش تلعب فشي نادي من غير دبلادك..

أديب: الضروف كتحكم علينا...

عصام : لا لا ميمكنش قولي كضحك معاي قولي غير باغي تعصبني ..

أديب: لاش غنعصبك.. داوي معاك بصح .. و دابا زيد وصلني.. اه راه عيطت لديباناج يهزو طوموبيل.. عطيتهوم نمرتك حتا تكلف ..

عصام :حدهومليه باغي يعرف غير شنو واقع .. راسو ضرو... ملقاليه جهد مبغاش يزيد يضغط عليه باين عيان...

عصام : و دابا شنو غدير فمقابلة دغدا ..

أديب: غنساحب ..

عند اشراق لي غير خرجات من عند سيف لقات كوثر خرجات من عند مينة ..

كوثر : كنت كنقلب عليك .. غفلت عليك لقيتك طرتي.. زيدي دخلي راه كتسول عليك راه قتليها بلي كنتي مسافرة عنداك تلفي فالهضرة ..

اشراق (تمتمات بتهكم ) : سافرت نيت ...

بقات اشراق واقفا حدا الباب .. مقدراش دخل .. خاطرها مزير .. باشمن وجه غنشوف فيها.. تنهدات كتمنى فالداخل ديالها يكون القرار لي خدات فمحلو .. و يوافقو عليه البنات...

حلات الباب لقات حليمة كالسا حداها.. غير شافتها عينيها تغرغرو بدموع.. ياه شحال توحشاتها.. كتحس بيها هيا الحاجة الزوينة فحياتها..

تلاحت اشراق فحضن مينة لي هاد الأخيرة استقبلاتها بكل حب و حنان.. كتحسها قطعة من روحها...

اشراق (بكاء تخلط عليها كلشي ) : سمحيلي سمحيلي مكنتش معاك فاش فقتي(هزات يد مينة كتبوسها) كنت غنموت كون وقعاتليك شي حاجة.. مكنتش نقدر نعيش بلا بيك .. علاش علاش خلعتيني عليك .. ياك واعدتيني تبقاي معاي.. ياك غتبقاي معاي .. مغتخلايش عليا ...

مينة (كطبطب عليها كدوي بصعوبة باقي جهد معندهاش ) : منقدرش نخليك.. نتي راك بنتي.. واش كاين شي ام غتسمح فبنتها.. راه مكتاب الله و الحمد الله ربي طولي فعمري.. و ها انا رجعت و مكملة فالوعد ديالي..

اشراق لي جملة عادية من مينة فتحات عليها المواجيع جملة ( واش كاين شي ام غتسمح فبنتها) دخلات بحال العافيا لقلب اشراق ... زادت كتبكي و تفرغ كاع ديكشي لي فداخل ديالها لدرجة خلعاتهوم... ببكاها و شهيقها..

مينة : نعلي شيطان ابنتي.. هاني مزيانة مواقعلي والو (كتشوفها كتبكي و تشهق ) استغفرالله وا اشراق ابنتي مكاين والو هاني معاك.. بلاش هاد لبكى كامل ...

اشراق مبقاتش قادرة تجمع عليها كلشي دخلات فهستيرية دلبكا لدرجة و لات كتغوت كاع.. طاحت فالارض كتبكي.. حتا خلعاتهوم كاملين.. طارت حليمة شداتها.. و كوثر خرجات كتعيط لشي فرملية.. مينة مقدراتش تحرك باقا دايرا لكبص.. مخلوعة معرفات مدير..

مرتاحت حتى دخل طبيب و معاه عصام عطاوها يبرة مهدأة.. شي لي خلاها ترخا.. هزوها حطوها فوق كانابي كان تما..

جر عصام كوثر لبرا...

عصام : مالها شنو وقع...

كوثر : بحالي بحالك مفهمتش .. ملي رجعات و هيا مبدلة كدوي فشكل ببرود خلعاتني.. مقالك والو أديب.. معرفت مالهوم..

عصام :مبغاش يهضر كنسولو مكيجاوبش .. (شدها من دراعها ) واش بيناتهوم شيحاجة

كوثر (بتوتر) : معرفتش ..

عصام(بحدة ): كوثر غنسولك آخر مرة واش عارفا شي حاجة ..

كوثر (تبتات راسها ) : لا معرفاش(تنترات من يدو و نعتات فين واقف أديب ) راه صاحبك سير سولو...

مشات كوثر خلات عصام غير كيشوف .. تحرك مشا عند أديب ..

أديب: سكنتي صفتك تجيب سمية دوا بتي عام

عصام : اودي تلفاتني اشراق لقيتها جاها انهيار عصبي.. عاد ضربوليها يبرا و علقو ليها سيروم .. خليتها ناعسة

أديب(مبغاش يبين) : زيد وصلني عند رضا...

خرجو بجوج وصلو جيهت طموبيل ركبو الوجهة عند رضى...

عصام : بغيت غير نعرف لاش باغيه

أديب(ببرود) : غنعقد معاه صفقة...

عصام : واش منيتك اش بينك و بينو.. ياك كنتي ربحتي و خديتي فلوسك.. اشمن صفقة ...

أديب: على ود اشراق ..

عصام فرانا وسط طريق: كييييييفاااااااش ..

أديب(برود) : تحرك صدعني كلاكسون...

تحركو و عصام باقي مصدوم مفاهمش شنو واقع.. كون غير شافهوم كيدويو و مشادين يقول هادو غا كيتحابو... هو ملي شافهوم شي مكيقرب لشي و كلها شاد قنت شي مكيشوف فشي... خلاه على خاطرو مباغيش يضغط عليه واخا قاتلو الفضول...

دازت سيمانة.. سيمانة لي تغيرات فيها شحال من حاجة.. فيها خرجات مينة من كلينيك.. كاع لبنات مقابلينها و كيتهلاو فيها..

عصام تكلف ليهوم بدوا علاقتو باشراق تحسنات بالأخص ملي علمها بلي غتقدر ترجع لشركة بعدما قدرات هناء تقنع معتز بطلب من أديب... هادشي لي معارفو حتى حد من غير عصام...

اشراق مور ديك ليلة قررات تلوح الماضي و تكافح باش توصل.. و لات كتعتاني براسها كتر و مركزة فسطاج ديالها.. حتى من كريم معاونها... تعلمات منو بزاف ..

بالنسبة لمعتز قليل فين كتلقى معاه.. كتصرف بواحد برود تام...

شخصيتها تبدلات بزاف... مبقاتش ديك البنت لي ضاربة الدنيا بركلة ممسوقاتش.. حسات براسها نضجات كثر.. حتى من شخصيتها قوات.. كيف لا و لي داز عليها ماشي ساهل.. كلشي لاحظ التغيير لي وقع ليها .. حتا من حليمة مبقاتش كتقدر تجاكرها و لات عاطياها تيقار..

فوسط دار كالسا اشراق حدا مينة...

اشراق : لبنات.. اجيو خاصني ندوي معاكوم...

تجمعو لبنات حداها ..

كوثر : الله يسمعنا خير ...

اشراق(بجدية* : التقضيا قربات تسالي .. رأس شهر مبقالو والو .. خاص نجمعو راسنا.. الله يخلف على لي فات.. دابا خاص نفكرو فلي جاي ..

مينة : انا هانتوما كتشوفو حالتي

(قاطعتها اشراق : مينة مدوا معاك حد نتي غير رتاحي..

كوثر حليمة سمعوني ديكشي د شيخات و شطيح وسط رجال نساوه ...

حليمة : كيفاش فاش غا نخدمو و حنا معندنا والو كنعرفو غا نغنيو و نشطحو

اشراق : متقاطعونيش خليوني نكمل : شطيح مغايبقاش .. بلاصت منكونو شيخات.. غنوليو عونيات.. مغنشطحوش غير غنغنيو ..

حليمة : مماتش غير دفنوه

خنزرات فيها اشراق : غنديرو فرقة نبقاو نغنيو و نشطو فالسبوعات و العراسات بين لعيالات.. بالنسبة لشطيح وسط الرجال و دنيا مخلطة لا ... ديك لباس دشيخات نساوه... غنبقاو نخدمو غير مع مجمع العيالات

كوثر : حنا غير ثلاتة بينا كيفاش غنديرولها

اشراق : كينين جوج بنيتات خرين ديجا كانو خدامين فهادشي و متفاهموش غيتزادو علينا..

حليمة : مي هكا راه ماشي ديما غلقاو هادشي راه الاغلبية كيكونو عراسات فلعروبيات

اشراق :نساي لي فات ... فرقت نمرة على لي ديدجي و نكافات... و واحد فدوك بنينات لاحتها ف فيس عندها.. دونك متخميش من هاد ناحية.. الخدمة كاينة خاص غير لي خدم...

كوثر : انا معاك حسن نيت منبقاو لوزو على لي يسوا و لي ميسواش ..

اشراق: خودو غا شنو وقع لمينة و ليلي عبرة احيانا كيبتالينا الله باش نفيقو ...

حليمة : صافي واخا لي درتوها انا معاكوم

مينة :حسن و الله بعدا فالمدينة متكرفسوش ... و تخدمو براحتكوم..

اشراق :حاجة خرى سيمانة جايا غنبدا خدمة خرى نتعاون بيها ..

مينة: اشمن خدمة

اشراق: غنعلم الرقص الشرقي لعيالات فواحد لاصال تفاهمت مع مولاتها...

كوثر : كيف غديري مبين سطاج و خدمة و هاد بلان

اشراق:سطاج غترخف دعوة ..غير هاد سيمانة دازت شاغجي حيت كنوجدو لحفة ..

مينة :اشمن حفلة..

اشراق :دايرين حفلة بمناسبة دكرى تأسيس الشركة ..

حليمة : ديما كنبغي نسولك ديالاش هاد شركة القابض ..

اشراق : كدير تصدير سيارات و تجميعهم.. تابعة لميرسيديس كنخدمو معاهوم بزاف..

كوثر : هيا غيكون فيها لكور ... هاااح سعداتك غتشوفي تيتيز(ببرائة ) اشراق ديني معاااك ..

اشراق : فين غانديك راه ديكشي بلي انفيطاسيو معندي كينديرليك ..

كوثر (بتوسل ) : غير شوفي الله يحفظك..

اشراق: منواعدك بوالو غنحاول

كوثر : و نضبرليك فكسوة لحفلة

اشراق : مممم نشوف مع عصام و نرد عليك

طارت كتبوسها : يخليك ليلي هاااح غتكووون القضية شااااخضا 🔥

يتبع...