هــو : شـخص صارم ، حــدودي ، جـدي أكثر من القياس ..
هـي : الفتـاة الحشـومـية أكثـر من اللازم خـصوصا مع الـجنس الخـشن لـكن ضحـوكية أكـثر ..
قصة مشتركة ..قصة مزيـج بيـن الكوميـديا و الديــن و الرومنــسيـة ..
تحت عنوان : العـــدول وبــنــت النـــاس 💍
بــقلــم : رجــاء جاكــار و فــرح حــدادي
🎬🎬🎬
في بيت من أحد بيوت المسجد لي جا وسط المدينة ، كيتسمع صوت النساء من بعيد ، الظاهر أنهم كيقراو القرأن الكريم ! مركز محو الأمية فهاد البيييت فييه نساء من مختلف الأعمار بنات شابات و عيالات كبار داخلين على السبعينات ! كاين لي جاية من نيتها تعلم و تستافد كتحاول تعوض و متبقاش فيييها كية القراية لي مقراتهاش ، وكاينة لي جاية تلهي لوقت حيت كتقنط فالدار وفنفس الوقت تعلم أو تحفظ أية قرأنية .. مهم متخرجش خاوية !
تبسمات إبتسامة خفيفة وقالت بعفوية :
هداية : تبارك لله عليييكم سورة الضحى حفضتوها تقريبا كلكم حفضتوها ، كاينة نعيمة و خديجة لي مزال كيدخلو و يخرجو فيها غدا إن شاء لله غنبداو سورة جديدة إنتهت حصة اليوم أخواتي ..
شافو فيها كلهم مبتاسمين ليها رغم صغر سنها لكن هي تتحسسهم مكاينش فرق !
نطقات وحدة منهم و إبتسامة كبيرة على وجهها ..
: لله يسر ليييك أبنتي جزاك لله خيرا ..
شافت فيييها وتبسمات معاها دليل على شكرها لكلامها ..
خرجو من تما مجموعين و هيا وسطهم غادين ضاحكين مع بعضهم دخلو لحي فين ساكنة ومعاها جوج نساء من لي تتقريهم نيييت ساكنين في نفس الحي ..
نعيمة : ياله أبنتي هداية بسلامة عليييك وسلمي على ماماك نشوفوك يوم الإثنين
هداية : مرحبا بسلامك ، ومتنسايش تعاودي سورة الضحى مزيان حتا تسديها نييت الإثنين إن شاء لله نعاودها معاك ..
نعيمة : إن شاء لله
دقات في باب دارهم وفتحات ليها الأم ديالها غيثة
غيثة : هديل فيك جووع عطشتي بالشرح ولا لا هههههه واش نحط ليييك تاكلي ؟
هداية : نمشي نبدل حوايجي ونجي واخا ماما
دخلات لبيتها ، حيدات نظارات الشمس من فوق راسها وحيدات كذلك الشال كتحيد كل قطعة وتردها لمكانها حتى لبسات بيجامتها وخلات شعرها مجموع فقط !
غيثة : قولي ليا جات الحاجة يامنة ليوم ؟
هداية : لا أماما مجاتش تقريبا هذا الأسبوع الثاني لي مجاتش فييه لعل المانع خير ..
غيثة : خاص نمشيو نشوفو جوج سيمانات مجاتش إذن شي حاجة تما ولا لا ؟
هداية : واخا نمشيو نشوفو أش بيها على لله تكون بخير !
غادين في إتجاه منزل الحاجة يامنة عمارة ب 4 د السكنات ، مقادة على حقها و طريقها وباينة طالعة بفلوس صحيحة !
كان الباب مفتوح دقات غيثة بخفوت حتا سمعات دخلو مرحبا بيكم !
كانت الحاجة يامنة جالسة في راس الصالون و مغطية وعلى راسها زيف حياتي عينيها ذابلين بالتعب
سلمات غيثة على بنات يامنة وكذلك هداية و وقفو على راس يامنة
غيثة : الحاجة و من شحال هادي و أنا كنسول عليك بنتي هداية وتقولي والو مجاتش و أنا عارفاها ماشي ديالك حتا قلت نجي نشوف أش بيك ..
يامنة : وطيحتي أنا خايبة ...
ياله جات تهضر هديل ، تكلمات بنت يامنة
منال : هداية عفاك أختي هبطي بنتي في الزنقة وأنا ماحيلتي لكوزينة ولا ليها ولا لناس وسمحيلي بزاف ..
هداية ب إبتسامة : لا متقوليش هاكا على الراس و العين
هبطات في الدروج و عينيها كيضورو على لله تلقا بنت منال لي تطيييير من المقلة !
ياله قلبات عينيها تشوف من الجهة الأخرى على لله تبان ليييها ، حتا جات عينيها على واحد عاطيييها بالظهر مكيبانش وجهو ، ياله كيبان لييها داير نظارات د الشمس شعره مقاد مسرح و لحيته كذلك ..
هاز تلفون لي مزيناهم ساعة كيهضر و يديييه الأخرى فجيبو ..
وهي مزالة تتحقق فتفاصيييله سمعات صوت طفولي كيناديها ..
ضارت تشوف كانت بنت منال نيت لي جات عندها هزاتها في يديها ناوية دور تكمل على أش بدات ، حتى لقات الريح و البرد السيد ركب في سيارته و زاد !
دلات شفايفها بطفوولية وقالت : كون غير بقا غا شوية نشوووفو غا وجهو !
بتاسمات ابتسامة ساحرة زاادت ملامحها نور على نور و تحناات كتشووف فهااد الصغيرة الجميلة لي قداامها و قلبها مليء بالفرحة و السرور لرؤية فتاتها الصغيرة ....بنت منال الأميرة لي لطالما هزاتها بين يديها و هي قطعة صغيرة خارجة من احشاء امها
من التعنيقة الحاارة لي دارو لبعضهم كيبان ليك مدى قرب هاد الشخصين من بعضهم و كأنهم أم و بنتها ....زادت رحاب زيرات على هداية و نطقات بشقاوة مع ضحكتها الطفولية
رحاب : هههههه زيرتك
ضحكات على كلامها الجميل و زادت زيراتها عندها كثر و نطقات
يالاه بغات تجاوبها سمعو منال كتعيط و فنفس الوقت رحاب و هداية رخاو يديهم كيحركو فيهم
هداية و رحاب : قفرناها تعطلنا
طلعو فالدروج كيتجاراو حتى دخلو لدار و هداية توجهات عند منال بحكم صديقتها عامين دبا بدا تعارفهم من مسجد محاربة الأمية لي كانت منال كتمشي مع مها مرة مرة فاش كتجي لعندها
دخلو للصالون كيوجدو الاكل فوق الطبلة و تجمعو على كاس د أتاي تيجبدو ذكرياتهم فالمسجد و ذكريات اول لقاءاتهم الاولى و صووت الضحك كيتردد فأرجاء الغرفة
هداية : هههههه عقلتي فاش كنتي كتوري لخالتي يامنة
فالامتحان
منال : ههههه راه هي لي كانت كتقول ليا نوريها و ليني ميتنساش ليا فاش نوضتيني نهز رجلي كدا صبورة و انا قد الجمل
هداية : ههههههه اوا نتي لي كل مرة نحصلك و تقولي منعاودش نوريها نجحتي ليا العيالات غا بالنقيل داك العام كاملين
منال : هههههه و لاهيلا شكون كان يقول نوليو دبا بحال العائلة غير من تماك
هداية : صراحة دوزنا ايام زوينة تما
يامنة : ههههه انا مقتلاتني غير نعيمة زلقات و جات مكوزة و ليني طيحة هاديك الغد ليه وقفات لينا عند الباب قالت ليك لي مجابش ليا دانون ميدخلش حيث طحت لبارح تموت على كرشها
منال : هههههه نتي عقلتي غا على هاديك معقلتيش شنو دارت غيثة العام الفايت ...
يوم جدييد أشعة شمسو المتساقطة على سطح الارض مزينة الكوكب ببريقها ...الشوارع عامرة بالناس ،شي غادي لخدمتو و شي كيقلب عليها ،شي كيشرب و شي كيبيع و شي غير كيدور كل واحد كسب الروتين لي مولف ...
الساعة تشير إلى السابعة صباحا دايز بسيارته بهدوء ، محتارم قوانين السير دازو من قدامه جوج د الشباب فنفس عمرو و ضوبلوه و واحد فيهم طل من الشرجم و كيضحك على سرعتو
متسوقش كيف عادتو تصرف ببرود تاام و كمل سيااقتو مجا فين يدور باش يتوجه لمكان عملو حتى بانت ليه نفس السيارة ديال الشباب محطمة و هوما داخلين فالحيط و الناس مجموعين عليهم
اي شخص فبلاصتو كان يا ايما غيبقاو فيه يا ايما غيضحك بسخرية على تصرفاتهم الصبيانية لي وصلاتهم لهاد الحالة و لكن حيث هو شخصيتو بوحدها هادشي لي وقع محرك فيه حتى حاجة بل معطاش حتى رأيو بينو و بين نفسو على الواقعة
حداء بالاسود تحط حدا الشارع الرئيسي للمدينة و خرج ببدلتو الرسمية منزل نظاراتو الشمسية على عينيه سد صدفة كانت مفتوحة من الكوستيم ديالو و بخطواات رجولية تحرك بكل تباث و رزانة حتى وقف حدا مكتب فلافتتو مكتوبة بالخط العريض
" مكتب العدول "
لقا الكاتبة لي معاه سبقاتو غير شافتو ناضت من بلاصتها و لقات السلام كتافى حرك راسو بالإيجاب فقط و مشا جلس فمكتبو الخاص و الزبائن بداو كيدخلو عندو ....فعملو كان جدي كثر من القياس و لي جا عندو على اساس القسمة او البيع كيشرح ليه بالتفاصيل باش يكون على علم بشنو كيدير كان كولشي مزيان و الى خصات شي وثيقة كتابية كتكلف بيها الكاتبة لي معاه حتى دخلو زوج د الاشخاص على اساس البيع
_ هاد الارض ديال بنتي كتبتها ليها فاش كانت باقا صغيرة و لكن دبا بغيت نبيعها
بقا كيشوف فيه بتركيز متبع مع كلامو و تكلم :
سفيان : ميمكنش ليك تبيع شي حاجة فالملك د شخص أخر واخا يكون ولدك ولا بنتك عيط ليها هي و إلا بغات تبيع أنجي تسني راسها أشريف ..
: هي باقا صغيرة دابا داكشي باش بغيييت نوب عليها أنا هي يالاه عندها 13 عام
سفيان " عقد حواجبه مربع يديييه " : هادشي ميمكنش البنت باقا صغيرة يالاه 13 لعام ميمكنش ليها تكتب تنلعبو هناا الشريف ولا شنو ..؟
خبط السيد على البيرو بعصبية و قال :
: شوف شي حل ضروري أسي أنا ماجيت عندك إلا ومتأكد غتشوف ليا شي حل و الناس كيعاودو علييك مزيان !
عقد حواجبه وشاف فيييه بهدوء
سفيان : شي باس مكاين أ شريف ؟
تبسم السيد إبتسامة صفراء وقرب عنده أكثر وقال :
السيد : شوف هاك " مد ليه 500 درهم ليدو مكمشة " وقضي ليا السربيس و عيبنا ميخرج
وقف مخنزر معصب شاف فييييه ببرود معوج راسو ..
سفيان : سير الحاج لله يهديييك ويهدينا الرشوة هي لي منشدهاااش سير عند شي خد أخر أنا منخدمش ليييك
خرج من المكتب معصب ماشي أول مرة يوقع هادشي وماشي أول مرة يجي شي واحد ياكل شي حد فرزقو ..
يا مشاااف ناس جاين ياكلو خوتهم في رزقهم و حالات بزاااف ..
وقف جنب السرجم كيتنفس بهدوء وكيخمم
تسنا حتا خرج داك السيد راسو لأرض مزنك من الموقف لي تحط فيييه مع سفيان ..
دخل لمكتبه من جديد وهز لملفات تيشوف المواعد لي عنده اليوم
سفيان : الناس لي غيجيو يعقدو جاو ولا مزال ؟
الكاتبة : مزال موصلوو أسيدي ..
سفيان : داكووووغ
___________
صباح جديد فاقت مبتاسمة كيف كل صباح باش تصبح نشيطة و إيجابية أكثر ..
دخلات لحمام غسلات و جهها و فنفس الوقت كتكسل و كطرطق عضامها مع بعض ..
دخلات على أمها لصالون كانت كتحط النيييت فطور الصباح صبحات عليييها و جلسات تفطر بهدوء حتا نطقات أمها ..
غيثة : الحاجة يامنة البارح قالت ليييا خطبات لولدها ..
عقدات حواجبها بإستغراب وقالت :
هداية : عاد لبارح قالت ليا رحاب خالها الكبير عاد سكن فالمدينة كان خدام في مدينة أخرى ..
متسوقاتش عادي ، فطرات وغسلات الماعن ومشات خرجات كلسات فوسط الدار جبدات المقرر وبدات تراجع داكشي لي غدير ليييهم فالعشية عندها حصة مع جووج د لعشية ..
تغدات ولبسات حوايجها عبارة عن شوميز طويلة و سروال أسود ثوب دارت ميكاب خفيف ..
هزات صاك خفيف وخرجات بهدوء دازت من الدرب فييين ساكنة يامنة هاديك هي الوجهة لمسجد !
من بعيد قشعات رحاب هازها شي واحد وعاطيها بالظهر كيضحك معاها وهازة لميكة د السقاطة فرحاااانة وضحكنا كيتسمع ..
ضهر عريض و ملابس رجالية بامتياز قاميجة بالبيض مع سروال دجين بالاسود تصميمو عادي و مرتجل ديال شخص بعقلو خاطيه الزواق الخاوي د خرائط الزيزوار لي مطليين بيهم ولاد العصر ولا السراول المبنتين لي كيلبسوهم شباب اليوم قربات ليه رحاب معوجة وجهها باغا تقبل خدو حتى فجأة دورات وجهها لمور ضهرو و بدات كتشير بيديها
رحاب : خالتو هدااااية خاالتو هدااية
بدات كتنثر لخالها فيديه حتى حطها و مشات كتجري لعندها عنقاتها هاد الاخيرة لي بدات كتقبل خدهاا قبلات متتالية حتى بدات كتجر فيها من يديها
رحاب : يالاه تمشي معانا انا و خالو سفيان
بقا سفيان حاضيهم من البعد بلا اي تعبير على وجهو مراقب تصرفات بنت اختو الصغيرة فقط
بالنسبة لهداية عااد كملات صورة فداكرتها فاش طلعات عيونها العسلية فعيونو السوداء القاتمة لي مقدراتش تنزلهم عليه الحاجة لي خلقات الارتباك داخلها عيونها كيهربو لوجهو و هي رافضة الامر و كل مرة تحدر عيونها كتحاول تحكم فراسها
اما رحاب كانت فقمة السعادة و رجعات عند خ
سفيان شدات فيديه اليسرى هو الاخر و يديها اليمنى شادة بيها هداية
رحاب : خالو سفيان هادي هي صاحبت ماما هداية لي قلت ليك عزيزة عليا زوينة ياك ؟؟
خدودها حمرو من الخجل من كلام هاد المشاغبة الصغيرة حسات بحناكها كطلع معاهم السخانة و هي كيتردد فودنيها شنو قالت ...
اما بالنسبة لسفيان كتفى غير بالابتسام فقط كجواب لا يحتمل الايجاب او النفي
هزات فيه رحاب وجهها و دغيا حدرات عيونها و نطقات بخفووت : سلام
جاوبها هو الاخر بنفس الكلمة بلاما يكمل فيها الشوفة كأي شخص عادي غيصادفو : سلام
بقاات رحاب كتغبن و هداية باستها من خدها قبل متمشي و بداات كتزرب فالمشية كتقول غير انتا تفوت ديك البلاصة و لكن الحاجة لي صدماات سفيان انه محدها كتمشي محد تعابير رحاب كيتبدلوو لملامح طفلة حزينة
نطق بإستغراب : رحاب مالك ؟؟
محس بيها حتى بداات كتبكي : اييي هئهئ هئهئ جريتي ليا على خااالتووو نتا خاايب
دارت لجهة الاخرى عاطياه بالضهر دليل على غضبها مخليااه موسع عيونو بالصدمة
طريق شحاال جااتها طوييلة و كتقول غير أمتا توصل للمسجد أمنها و امانها لي غير دخلات ليه حطات راسها على المكتب ديالها لحسن حظها وصلات قبل ميجيو العيالات و تأثير شخصيتو عليها باقي كيدور فعقلها و كتلوم راسها علاش بقات كتشوف فيه ....كون موقفاتش كاع متحطش فبحال هاد الموقف و اكثر حاجة حيراتها هي طريقة هضرتو لي حدودية كثر من القياس بحالا كيخلص على الهضرة سلام بوحدها لي قدر ينطق بيها من ضمن كاع الحديث لي نطقات بيه رحاب ..... شيء محير وكفاش جاوبها أكثر تحييرا ....باش فتاة صغيرة فداك العمر و يتكلم معاها بديك الجدية كاملة ....اكيد غتكون تقلقات من طريقة كلامو و هو كيقول ليها بصريح العبارة بلي ميمكنش ليها تجي معاهم ....معطاهاش حتى الفرصة فين تقول رأيها واش هي باغا تخرج معاهم ولا لا
بدااات كتخبط فراسها فوق المكتب و داخلها عتااب كيدغدغ قلبها بالم طفيف كيخليها تزيد تخبط راسها باش تخلص من داك الاحساس محسااتش غير بالاحساس ديال بصح زوج شادينها من كتافها و متبتين وجهها على المكتب مقدرات تحرك لا لهوك لا لهوك تا من الهضرة بغات تهضر و فين الفم لي يدوي
نعيمة لي شاداها شدت العمة فضلمة :شديها شديها مزيان ا فتيحة ميكونو غا صحاب الحال لي ضربوها
فتيحة : لا لا هادي كبات الماء فالقرقارة مافيهاش و الجن دخل فيها و كيقول ليها خبطي راسك خبطي راسك
نعيمة : شدووها شدووها مزيان باش نقراو عليها
بداات هداية كتهضر معاهم باش يطلقوها و ليني فمها عوج بقوة الضغط لي ضاغطين عليها مفهموهاش اشكتقول و لا كلامها كيترجموه على هواهم
هداية : واا تلكووني
فتيحة : تي اشكتقزل بسم الله الرحمن الرحيم
نعيمة : بسم الله الرحمن الرحيم طلبناكم السمن و العسل طلبنا ليكم الشرع د النبي اما طلقوها الى كنتو مسلمين
هداية : واا تلكوني اشمن تلكووني اشمن الجن
نعيمة : تيي اشساايرة تقول
فتيحة : هااااا؟؟!! قالت الجن
نعيمة : بسم الله الرحمن الرحيم واش هضر معانا مسلميين انا انقرا عليها العيالات جيبو الماء جيبو الماء ندفعو ليها لوجهها
بداات هداية كتركل ليهم و كتحااول تهضر و تفك راسها فنفس الوقت و هوما زاادو زيرو عليها
هداية : اممممممممم
اوا غا تسمعاات ديك أمممم اراك لشدان ديال بصح
نعيمة عاونوني عاونوني العيااالات ياالاه ياالاه : بسم الله بسم الله بسم الله
فتيحة كتولول و ترش عليها الماء حتى تقفزها : تي قرااي خلااص قرااي خلاااص
اوا وااحد الجهد منين جاابتو الله و علم ترطات و دفعاتهم كاامليين
هداية بالغوات و مع صوتها تبح بقوة مكانت كتحاول تهضر بلا فايدة هضرات بصوت مقجووج : واا اناااااا ماااااشي جن
لحظة صمت تعلات المكاان و ميلييها غا غوتة د نعيمة
نعيمة : بيييييبييييي بيييي بييييو الجن هضر معاانا
نوضووها تاني بالغواات و مكتسمعي ليك غا عتاااااق عتاااااااق
اما نعيمة مولات زباايل لي ديما دايرة ليهم شي حاجة كانت هي لولة لي سبقات للباب فهاد لحظة تكون حطمات رقم هجام الكروج فالماراطون و العياالات تابعيينهاا هاربيين و هدااية كتوقف فيهم زعما باش تشرح لييهم
هداية : ابلاتيووو بلاااتييييو
بعد نصف ساعة و بعدما عيات هداية بالجري من وراهم جلسات فوق مكتبها حاطة يديها على خدهاا
و نعيمة و العيالات لوخرين كيطاالو و يحلو الباب غير بشوية و يوشوشو
حادة : تي كحازي لهيه شوية خليني نشوف
نعيمة : شوووت بشوية العيالات خلييوني نشووف
فتيحة : زعما يكون الجن لي ركبها مشاا شفتها زاكية مكتحركش ؟؟
نعيمة : راه هضر معانا قبيلة عندااك يكوون باغي يقولبناا ؟؟
حادة : حتى الى كان بصح خااصنا نعاونوها هداية عزيزة علينا
نعيمة : الله ا بنتي وصال و اجي تشوفي صاحبتك شنو واقع ليها الله
حادة : ياالاه ندخلو تا الى كان الجن باقي خاصنا نجريو عليه
حليمة حطات يديها على قلبها و بدات ترعد : لا اختي انا خفت خفت منقدش ندخل غا دخلو نتوما انا غنتسناكم تا تساليو
فاطمة : حتى انا خفت
جمعانها معاهم نعيمة بزوج قرصات للوحدة : يااكو هادي هي معلمتنا ؟؟ شكون لي علمك تقراي تاءو الفاء لي كنتي كتقولي ليها القاف هدا هو خير الاستاذة ا حليمة ؟ و نتي ا فاطمة شكون لي كان كيخرج ليك التمارين لولدك فاش مكتلقايش لي يخدم معاه و شكون كيشرح ليه هادي هي نتي ؟؟
نعيمة بكل ثقة و عزم غوتات : خاصنا نحاربو هاد الجن
غا كملات جملتها خبطات على الباب لي كان غا مردود محسات براسها تاا تفرع كامل و جات مخبوطة و صحاباتها فووقها
ناضت هداية جات قدامهم و شافت فيهم وحدة بوحدة و نطقات
هداية : ساليتو ولا باقي ؟؟
غا سمعوها كولشي بدا كيجمع الوقفة و شي كيمشي شي كيجي شي كينطق بسم الله الرحمن الرحيم و شي بغا يخرج يهرب حتى غوتات عااد حبساتهم
هداية : السكات
غا سمعوها تصافو قدامها بحال الباط د السردين وحدة حدا وحدة و نعيمة كتشوف فيها بنص عين
هداية : هاادشي لي بغيتو ؟؟
نعيمة : سمحي ليا و ليني بغيت نعرف دبا واش هداية لي كتهضر معانا ولا سي الجن ؟؟
هداية شاافت فيها هي بداات و نطقاات : و الله ا نعيمة و متساليني حلوف اتا كوون شاافك الجن يتووب ، مكاين شي جنون قدكوم ،.... شكون قاليكم انا تسكنت ؟؟؟ ...دبا فأخر يااامي وليت ضاربني جن ؟؟
العياالات بقااو غا يبرقو فعويناتهم و يدوروهم بيناتهم حتى نطقات وحدة منهم
مشاات سبقااتهم جلساات فبلاصتها و خلاتهم يبرقو فعويناتهم و بداات الحصة
كانت هداية بدات كتشرح ليهم درس اليوم محشات بالضحكة حتى زلقات ليها و هوما يقلبوها ضحك كاملين ..
قلبوها ضحك بيناتهم ، واخا في الأول تعصبات على الحالة و الشوهة لي دارو ليييها لدرجة الناس لي ساكنين قراب لجامع بداو كيطلو يشوفو اش واقع ! ..و يتسائلو اشواقع هوما الأخرين و هدا حال المغاربة التبركيك يتمشا ليهم فالدم فينما كانو
سالات الحصة .. خارجة كيييف العادة و هوما غادين جنبها كيهضرو حتا نطقات نعيمة مقربة من هداية باش ميسمعوهاش النساء ..
نعيمة : ابنتي ا هداية ياك انا عزيزة عليييك حشومة هاد لعقوبة لي عاطياني بغيتيني نبقا بلا نعاس ليل كامل و انا نكتب و خالتك صحتها على قد الحال !
تنهدات هداية و ردات بحسرة ..
هداية : راك نتي لي تديريها قد راسك أخالني نعيمة وايلي " ضحكات " لي شافك هاكا ميقولش عندك الحفايد و الحفيد الكبير قرب يخطب
نعيمة : را ابنتي كنضحكو و نخلقوها و مولاها ربي ، كنبغيو نساو هموم و مشاكيل الدار نفرجو شوية برا و نساو !
هداية : بصح عندك الحق أخالتي ، واحد وصال فين خليتيها ؟
نعيمة : راه فالدار شحال هادي مخرجتو نتي وياها ..
هداية : غا الوقت و صافي سلمي ليا عليييها ان شاء لله نديروشي وقت انا وياها و نخرجو
نعيمة : واخا ، و اجي قربي اش درنا فالعقوبة
هداية : خلي داكشي غدا و نشوف اش ندييير معاكم
نعيمة : وا رطبي قلبك اويلي تي مالك
ضحكات هداية بخفوت و حركات ليها راسها بمعنى من بعد ! حتى صغراات فيها نعيمة عينيها و هي كضور فعيونها
نعيمة : احياني عليك ا شيخة غا كنوصلو للقسم كتسيفي
__________
دخل لدار كيتكسل و يطرطق في عضامو وفي نفس الوقت كيلعب بي سوارت السيارة في يديييه
دخل لصالون تبسم إبتسامة خفيفة منين شاف الأم ديالو تبسمات ليييه هي الاخرى و قرب منها قبل جبينها بحنية ..
سفيان : الواليدة كيف بقيتي شوية ؟
يامنة " ب إبتسامة " : شوية الحمد لله اولدي الصحة إلا مشات ماترجع
سفيان " بثقالة" : بصح الصحة إلا مشات متعوض لا بمال ولا شي حاجة ! راسك شوية مزال تيعطيييك الحريق ؟
يامنة : شوية وصافي
تبسمات من جديد كطبطب على فخذه بحنية سفيان ولدها الأكبر و فرحتها الأولى .. المرضي ديالها على قولتها هي ،
و شاد ليها خاطرها و واقف على صحتها حتا توقف من المرض و تخطاااه هو الحنين العزيز ديالها و القريب لقلبها خلاصة القول سفيان مقطر ليييها من عينيها !
يامنة : كيييف غادي مع لخدمة ؟
سفيان : الحمد لله مزيان ..
يالاه غيكمل كلامه دخلات عنده رحاب من بعد ما سمعات صوته دغيا تعلقات فيييه و بدات كتبوسو !
رحاب : خااااالو توحشتك جبتي ليا حاجة ؟
ضحك سفيان كيرد ليييها الشعر ورا ودنها وقال كيمسح على شعرها بحنية ..
سفيان : راكم معروضين نهار الأربعاء عند ولد السي عبد الباقي في قاعة خمس نجوم !
يامنة : شكون فيييهم الكبير ولا صغير ؟
سفيان : الكبير ، أنا لي غادي نعقد ليييه إن شاء لله !
يامنة : نشوف إلا وليت مزيانة نمشي ! ماس لله يعمرها دار و جيرانا على الراس و لعييين
__________
الأيام تدوز روتينية كيف العادة من المسجد لدار ومن الدار لمسجد !
دخلات كتحيد الشال من شعرها الصهد قاتلها بالجهد الحرارة شاعلة !
خدماات الكليمة فالبيت و جلسات كتبرد متكية فوق النموسية ترتااح شوية كاانت الخامسة زوالا حتى كتحس بهاتفها كيصوني هزااتو بين يديه و بتااسمات مدوزة الخط
هداية : ماعرت فين مات شي حمار ؟؟
وصال : هههههه و نزلي عندي ا زين انا قدام الباب لبسي حوايجك و يالاه نخرجو توحشت نشوف الكراش
هداية : تي بااغا تشوفيه و انا تجرجريني معاك لا غا سيري اختي بصحتك عيانة
وصال : شووفي غتنزلي ولا نشوهك فداك الدرب تاني
هداية ضحكات على كلامها و كتبات ليها بطنز كيما موالفين : لا عفاك !!!!!!
وصال : ههههه يالاه هي الى نزلتي عندك خمسة دقايق الى تعطلتي تصاورك عندي انشوهك
هداية : لا عفااك ا سيدي الى شرفي متقيسنيش فييه ندير لي بغيتي
وصال : ههههه تلاحي الكمارة غا لي ضحك معاك شوية تعيشي الدور
هداية : هههههه ليعطينا وجهك هاانا نازلة نازلة
مشاات هداية على سعدها و وعدها بدلات حوايجها لبسات دجاكيط طويلة بالاحمر مع سروال دجين بالاسود و سبادري خفيفة قادات زيفها لي كان مزوق باش تكسر الالوان العادية لي لابسة هزات ساكها و نزلات بعدما طبقات مرطب الشفاه على شفايفها
غا نزلات بانت ليها وصال كالسة فواحد الدريجة بنت قصيرة القامة و لكن طويلة اللسان فتاة مميزة ببشرتها الداكنة لي زايداها اشراق على اشراق روحها المرحة ..... غير شاافت هداية وقفات ....دوزات ليها السكانير بعيونها اول حاجة عاد تقدمات عندها بخطوات كل خطوة بايقاع موسيقي محدد و نطقاات بصوت ملحون و هي معنقااها
وصال : صحييييبتيي
هداية : ههههه توحشتيني تال هاد الدرجة حتى انا توحشتك
وصال : حتى انا
هداية : مالك نتي ؟؟
وصال : توحشتو هههههههه
هنا دفعاتها هداية و جمعاتها معاها لضهرها : ليمسخك
وصال : هههه اححح حشومة عليك علاش فيقتيني كنت كنتخيل راسي غير معنقاه هو
هداية هنا رفعاات يديها لسماا بدعاء لي كطلب يكون مستجاب : ياااااا ربي غير هاد البنت دير عقلها شي نهار
وصال : تي سربي سربي ا صحبة لي لقا راحتو فالهبال اشعندو ميدير بالعقل كولشي في سبيل الحب
هداية : واش مخرجاني نبدل الجو ولا نلعب الماراطون نتي غا بشوية هااااه
وصال : سربي مبقاش الوقت انتعطل
اوا طريق كاملين و هوما كل خطوة يديرو فيها زوج وصلو حتى لحدا المحلبة هي تقرصها وصال
وصال : و دبا تبثي و رزني
دفعات ليك الصدر القدام و الشوفات مكاين غير الفوق الفوق من اقوالها الشهيرة بنادم هو لي يتعفر على رزقو و تقولي ماشي هي لي كانت دايرة ديك الحالة كاملة
قداام محلبة فلافتتها مكتوبة " محلبة عصام " واقفين و وصال كتهضر مع هداية غير من تحت الدف
وصال : شوفيه واش كاين ؟
ياالاه دورات هداية وجهها تبركك لصاحبتها حتى وسعات عيوونها و هي كتشوفو قدامها حساات بالصدمة و بالخصوص هاد المرة كتشوف الضحكة دياالو الزوينة لي كتبين سنانو البيضين وصال كتسنى جوابها و تنخز فيها باش تجاوبها و لكن هداية مكانت كتقول حتى حاجة حتى نطقات
جات وسط الشارع ، دار ليها بعد التعديلات وعليها الرواج .. معروفة بالتأويل و نقية و الماكلة فيييها بنينة
دخلو مثبتات من ديما كيتصرفو بعقلانية و بشوية لا هداية ولا وصال ..
تقدمات وصال عند الولد لي شاد السربيس وقالت :
وصال : علي راك عارف بحال ديما جوج كيسان د الرايب و جوج طروفة د الحرشة و نص خبزة فيها الفرماج و البيض و الكاشير
رجعات لمكانها وفنفس الوقت كتشوف فييه بنص عينيها دائما فين ما كتجي لهاد المحلبة كتلاقاه بالصدفة وحتا اليوم كاين ! صدفة خير من ألف ميعاد
جلسات أونفاص مع هداية كيهضرو بخفوت ..
هداية : علاش جينا لهنا أوصال تقول غير هاد لمحلبة لي كاينة ..
وصال : هاهوما داخلين شكون هداك لي معاه تتعرفيييه ؟
هداية " بدون ما دور تشوف تكلمات بصوت خافت .. " : ولد خالتي يامنة على مقالت ليا رحاب عاد مؤخرا استقر معاهم
واقفين سفيان و عصام برا المحلبة ، أصحاب جمعاتهم الدنيا وقراب من بعض بزاااف ..
سفيان : فكر أ عصام مزيان ماشي حتا تدير العقد و تندم فكر و عاود فكر !
عصام : كنشوف راسي باغي ندير داري تا أنا ندخل من لخدمة نلقا علامن نحط الراس مليت من تازوفريت
سفيان : ناوي تخطب والبنت مكتعرف عليها حتا حاجة ؟ الزواااج هاذا ماشي لعب أ عصام ، غا يولي عندك نصف ثاني خاص تعاود لييه كلشي و تشارك معاها الخصوصيات ديالك ماشي تزوجو ومتفاهموووش و الشمل يتفركت راه تيجيو شي حالات ديال الطلاق عندي تافهة و تلقا المرأة شادة الضد ولا مشاكل العكوزة وداك التخربيق " ضرب لييه على كتفه " فكر من جميع الإتجاهات
عصام : يكووون خير يكوون خير ههههه
سفيان " مسح على وجهه ونطق بحيرة " : تضحك بحالا مخاصك حتا خييير تهلا أبا عصام نتشاوفو من بعد
عصام : فقاعة الزرقطوني تا أنا معروض !
سفيان : إن شاء لله " ضحك بثقالة " فتح عينيك مزيان ما تعرف تلقا نصيبك تما هه !
عصام : نتا متزوجش باغي تبقا باير زوفري ممليتيش من حياة العزوبية حشووومة حتا لمعاودة نتزوج أنا و نخليييك ورايا ميمكنش ههه
سفيان : مسالي قبك هاد ساعة هه تلاح فحالك أسي المهندس
تم داخل عصام و الضحكة مرسووومة على وجهه البشوش ، شاف وصال تتدوي مع علي يجيب ليها الطلبية حيييت تعطل عليها شاف فيييها وتبسم ..
عصام : هاد علي متيحشمش تعطل عليييك صافي أنبدلو باباه
خرج علي هاز فيديييه بلاطو كيحط ليهم فالطابلة ضرب ليييه على كتفو ويديييه فجيبه ..
عصام : تهلى لينا ف الأنيسات أبا علي نتشاوفو من بعد وراك عارف أخر الشهر داكشي صيفط ليا صافي ؟
علي : كون هاني أسي عصام
شاف ناحية هداية و وصال وتبسم من جديد
عصام : بالصحة ..
وخرج من المحلبة بقات وصال متبعة لييييه الشوفة حتا نغزاتها هداية من رجليها باش متعيقش
بقااات وصال غير كتشوف قدامها كتحس بحالا شي حاجة واحلة ليها فحلقها شاف فيها هداية باستغراب
هداية : مالك ؟
وصال : هضر معايا
هداية : ههههه هادشي غير هضر معاك و شوفي حالتك
وصال : تجربي الحب و تعرفي فلول كيبدا ليك غير بالاعجاب بالشكل الخارجي و من بعد شوية بشوية كتلقاي راسك طحتي بلاما تحسي و كتولي باغا غير انتا تشوفي داك الشخص واخا غير من بعيد
هداية حطات يديها على حنكها : راك غارقة ا حنينتي و تخيلي دبا يكون خاطب ولا مزوج
هنا وصال عقدات غوباشتها : محنا على فالك انشاء الله تا الى كان ايخطب مغيلقاش محسن مني
هداية : هههههه اوا انشاء الله
وصال : شوفي حتى نتي تزعطي فصاحبو باش نكون فحال فحال نديرو شي عرس اخر جماعي
هداية : هههه بديتي فالاحلام تاني
جا علي حط ليهم الماكلة و بداو كياكلو بشوية عليهم و كيتبننو حتى سالاو على خاطرهم
خرجو من تماك و الوجهة ديورهم و وصال حطات يديها على كرشها
وصال : و لاهيلا كيصرع الماكلة باينة غير غنتزوج بيه انولي كيف البيدوزة تاني
هداية :هههه مالو هو لي كيصاوبو بيديه قالت ليك كيعرف يطيب
وصال : شنو بان ليك منمشيوش لدار يالاه نسرحو رجلينا
هداية : انا بعدا رجلي طيبتيهم ليا الدار ياا ختي الدار
مسافة ديال طريق و كل وحدة وصلات لدارهم كتستراح من هاد اليوم لي داز كيما ساائر الاياك الشيء الوحيد المميز فيه هو رؤيتهم لاشخاص تعرفو عليهم و اشخاص خلاو صنعو بلاصة فحياتهم بدون استئذان
يوم جدييد من اياام الاسبوع السبعة ....يوم الاحد كاينين لي كيعتابروه يوم لراحة و كاينين لي كيعتابروه يوم كسائر الأيام و هنا كنكونو كنهضرو على العامل العادي الاشخاص لي كيخدمو بعرق كتافهم و كيجيبو نهارهم بشما عطا الله كيما كاينين لي كيعتابروه يوم منحوس بسبب ان مسلسلهم المفضل مكيبداش فيه و هنا كنهضرو على الامهات ربات البيوت لي نهاهم كاملين كيدوزوه فالاهتمام بمنزلهم من قل ساعة فاليوم لي كيخصصوها لنفسهم يحيدو بيها ستريس
.... و كيبقى الأحد بالنسبة للموظفين هو يوم الرحلات يوم الخروج و تغيير الجو و الاستمتاع بالطبيعة
عند هداية فاقت فصباح بكري بالنسية ليها هي يوم الأحد هو يوم التخمال خرجات السدادر من البيوت و مسحات لي خصو يتمسح و سيقات لي خصو يتسيق زيف د حياتي فراسها على وديت الغبرة و مشمرة على درعانها و مها غيثة فالكوزينة طيب الغداء
الدار رجعاتها كتشعل بالنقاوة و نزلات الماء مع الدروج حتى هو ...... خلات فالدار غا ريحة سانيكروا و هنا بدات كترجع كل حاجة لبلاصتها من بعدما نشفات الدار
مجات وقيت الغداء حتى كانت سالات تغدات هي و امها و جلسو يستاراحو شوية حتى تكلمات غيثة
غيثة : وا شفت يامنة كعما صونات عليا من لبارح اوا نصوني ليها انا عنداك تكون واقعة ليها شي حاجة ولا تزاد عليها الحال
هداية : اه سولي عليها ا مي نيت حتى انا نسيت مسولت فيها
قصة العدول وبنت الناس
محتوى القصة
التنقل بين الأجزاء