زاد قرب و باسها فراسها و يديه تيدوزو على شعرها برفق اما عذراء تتشوف فالأرض حشمانة و تتبلع فريقها بتوتر...
قوس حييد يديه من راسها و حطهوم على حناكها بجوج و شاف فيها بإعجاب كبير: I Like You
عذراء لمعو عينيها و احاسيسها بداو تيتجرو جيهتو فاش سمعات هادشي و نفس الشيء معاه هو لي متيفلت حتاشي فرصة الى كانو بوحدهوم بقاو لثواني تيشوفو فوجوه بعضياتهوم فجأة بدات تتحس عذراء بيدين قوس تحطو على خصرها حتى هزها من الأرض و حطها فوق واحد الطاولة تما..قرب منها و عينيه على عينيها تيقرب شفاهو من شفاهها تحت نضراتها المستغربة حتى شد ليها وجهها بشوية و زاد قرب اكتر فهاد اللحظة انجذابها زاد و بلا متحس بدات حتى هي تتقرب من شفاهو حتى نغامسو فقبلة متبادلة موصلين عن طريقها مشاعرهوم الجديدة لي عاد بدات تتولد...بدات تتحس بشنايفها تيتجرو من طرف شنايفو متذوق مذاقهوم الكرزي و متحسس ملمسهوم الناعم اما هي مسلماهوم ليه نضرا لتجربتها المنعدمة فهادشي و أكيد هو حس بعدم تفاعلها فالتقبيل فا بعد منها بشوية متفهم انها عمرها تباست كونو رجل دوز تجارب و علاقات كتيرة فحياتو هادشي مغيخفاش عليه...
عذراء بقات ساكتة حادرة راسها...
قوس قاد الكول ديال القاميجة ديالو و حط يديه تاني على خصرها حتى هزها و حطها فلارض...
قوس:المهم وجدي راسك لوقت الغدا غنتغداو انا وياك
عذراء:ا ااه واخاا
قوس حط يدو على حنكها و جرو بشوية:غنمشي دابا اوكي
عذراء بخجل:اووكيي
مشا قوس و هي بقات شحال واقفة تما حتى مشات دغيا شدات السانسور لعند بنان..وقف السانسور فطابق العارضات و تمات غادة حتى تمات جاية بنت متوسطة الطول جارة واحد الشاريو كبير عامر بالمكياج لي غيتلاح محسات حتى دخلات فعذراء لي بعدات دغيا قبل متدخل فيها..البنت هزات راسها كانت دايرة مكياج فاااقع خصوصا الأيشادو لي كان غوز باااين و الرموش الاصطناعية قدااش..شعرها قهوي و عينيها كذلك....
البنت:سمحيي لياا ياكماا وقعاات ليك شي حااجة؟؟؟
عذراء مستغربة:ل لا والو مالك كنتي ساهية شوية كنتي اختي تطييحيني
البنت قربات منها:سمحي ليا مرة خرى كنت زربانة حيت خصني نتفقد غرف عارضات خرين
عذراء بتعجب:و علاش؟؟
البنت:باش نتفقد المايكاب واش فمدة صلاحييتو ولا خصو يترما و يتستبدل
عذراء:واش نتي من قسم المايكاب ارتيست؟؟
البنت:ااه (مدات ليها يديها مبتسمة) انا دانيا المساعدة الثانية لمدام شيارا و من عائلة برج الدلو...
رمز برج الدلو هو هدا "♒" و المواليد ديالو من 20يناير الى 19فبراير...
عذراء صافحاتها مبتسمة:و انا عذراء المايكاب ارتيست الخاصة بالعارضة بنان من عائلة برج العذراء
دانيا:اوه باينة غير من سمييتك كان يحساب ليا بلي العارضة بنان باقة مع الفيليبينية
عذراء:اشمن فيليبينية؟؟
دانيا:المايكاب ارتيست لي كانت معاها قبل منك(ضحكات)ههه اصلا العارضة بنان معروفة بتبدالها لمايكاب ارتيستس بحال حوايجها
عذراء شافت فيها بواحد النضرة ديال الحزن مع عدم الرغبة فتصديق كلامها:انا و مدام من غير الخدمة ولينا صحابات
دانيا:وايلي واش كاينة الصحبة فهاد الضومين؟
عذراء:شنو قصدك؟؟
دانيا:شفتي اي واحد حط رجليه فهاد الشركة الا و عندو مصالحو الخاصة ويلي و تشوفي ديال سويسرا اما هنا تهدنو شوية العارضات مبقا ليهوم غير يتناتفو السم تيتقطر اختي
عذراء:اودي تناتفو كاع قدامي ههه
دانيا بدهشة:ويليي شكون هادوو؟؟
عذراء:تنفضل مندويش على هاد الموضوع حيت داز ولي فات مات مهم تشرفت بمعرفتك ا دانيا عندي خدمة تتسناني دابا
دانيا:ليا الشرف
مشات عذراء مبتسمة غير عطاتها بضهرها بانو ملامح عدم الارتياح لكلامها ميمكنش بنان تستغلها ولا تدوز بيها الوقت و تلوحها باش تجيب غيرها فنفس الوقت كانت واقفة دانيا مراقباها حتى غبرات قدامها و جرات الشاريو ديالها هابطة...
فقدام واحد المدرسة ثانوية شعبية باينة غير من كترة الماطر د البراهش لي غاديين جايين و الجوقة د التلاميذ لي خارجين مع 12 ولكن شادين الجماعة كانت ديالا الأخت ديال برناس و رسيل واقفة مع صحاباتها تيضحكو حتى وقف عليها واحد الموطور كحل طلعات راسها بخوف فمولاه لي هبط كان شاب عشريني قد عذراء فالعمر طويل لابس تريكو و سروال و ملامحو متتبشرش بالخير..غير شافوه صحاباتها نساحبو وحدة تابعة لوخرا بسرعة اما ديالا رجعات خطوة للوراء خايفة منو...
جبد گارو و بريكة من جيبو و جلس على موطورو مقابل معاها تيكمي على خاطرو زايد بهاد الحركات رعب فنفس ديالا حتى نطق ببرود و الدخان خارج من فمو...
الشاب:علاش مجاوبتينيش على المكالمة ديالي؟؟
ديالا تترعد:ك كنت كنت فالقسم عند الإجتماعيات و مقدرتش نجاوبك غتحييدو ليا جاب الله درت ليه سيلونسيو...
ناض لعندها و هي خبات وجهها بخوف:رامي مضربنيش عفاك
رامي شدها من تيشورتها و الناس لي حداهوم ممسوقينش موالفينهوم اصلا ديما هكا...
ديالا غتبكي حاسة بإحراج كبير قدام الناس مبغاتوش يضربها قدامهوم:ص صافي سمح ليا منعاودش
رامي قرب ودنو لعند فمها:عاوديها
ديالا: ص صافي منعاودش
رامي طلق منها و لاح الگارو فالأرض عافط عليه:ركبي نوصلك لدار يالاه
ديالا حركات راسها و ركبات فوق الموطور تتقاد فشعرها حابسة البكية اما هو طلع القدام و ديماراو من تما....
نرجعو لعند عذراء لي دخلات لغرفة بنان و بقات ساكتة...
بنان لاحظات هادشي و هي تجر كرسي و جلسات قدامها:مالك؟
عذراء طلعات راسها فايقة من سهوها:لا والوو
بنان:شنو قال ليك مستر قوس؟؟؟
عذراء:شغيقول قال انا فالملكية ديالو
بنان:اوووه ياختي شحال رومانسي هادشي عندك و شنو مزال؟؟
عذراء:عارضني للغدا
بنان:اووه هادشي مزيان راكوم غاديين و تتقربو من بعضياتكوم بهاد الخرجات و المواعيد انا نيت عارضني حبيبي انطون لغدا
عذراء:ااه مزياان ياكما باغية مني شي حاجة؟
بنان:لا والوو الخدمة كيف قلت ليك بالعشية
عذراء ناضت:ااه اذن غنمشي نشوف صحابي فقسم المايكاب ارتيستس بينما وصل وقت الغداء
بنان:واخاا خودي راحتك
عذراء خرجات من الغرفة مخلية بنان مهبطة حجبانها بقلق و احساس فشكل متملكها من جيهتها بسبب هاد المعاملة المفاجئة من طرفها...
بعد دقائق وصلات عذراء قسم المايكاب ارتيستس و لي داز من حداها تتبتاسم ليه محركة راسها حتى وقفات فالمكان لي كانت خدامة فيه اول مرة فاش حطات رجليها فهاد الشركة...
نيار لي كان جالس رجل على رجل تيقرقب فالمسكة و صباعو خدامين فالتيلي حتى حس بشي واحد دخل غير طلع راسو نقز: *حباااااااء نتي هادي قصدي عذراء
عذراء شافت يمينها و يسارها مكاين حتى واحد:ياك ا ال*امل هكا تتقول ليا!!
نيار جا عندها جرها بايسها فحناكها بجوج:توحشتك ا الخرية
عذراء بتاسمات:حتى انا ا الزمر فين سديم؟
نيار جلس فبلاصتو:عندها خدمة مع شي عارضات
عذراء جلسات قدامو:ااه وي ايوا شي جديد؟؟
نيار:ها حنا شادين غير هاد القنت حتى يتسگم سعدنا بحالك
عذراء:مكرهتش من اليوم تلقا معامن تخدم ولكن شغتدير
شيارا تمات داخلة و حداها كانت واقفة دانيا:نيا...عذراء !
عذراء ناضت مبتسمة:سلام مدام جيت غير نطل على صحابي
شيارا:ااه مزيان متنساش خدمتك ا نيار
نيار:واخا واخا مدام
عذراء هزات عينيها تتشوف فدانيا لقاتها حتى هي تتبحلق فيها بنضرات ممفسرينش شدها احساس فشكل من جيهتها ولكن حاولات متبيينوش...
عذراء:و واخا المهم غنمشي دابا عندي ميدار
شيارا:اوكيي
نساحبات عذراء و فنفس الوقت استآذنات دانيا من شيارا و مشات...
بقات عذراء غادية حتى طلعات فالسانسور و هو يصوني ليها قوس...
قوس:انا فالباركينغ تنتسناك
عذراء:نجيب صاكي و نجي دابا
قوس:اوكي
قطع عليها و هي مشات دغيا جابت صاكها فغرفة بنان و هبطات لعندو فالباركينغ ولات حافضة البلاصة لي تتكون مبلاصية فيها طونوبيلتو..حل ليها الشيفور الباب و طلعات لقاتو جالس تيدوز فالتيلي ديالو غير شافها طفاه فحضورها و رجعو لجيبو مبتسم...ركب الشيفور و ديمارا بيهوم من تما ديجا فراسو جميع المعطيات لفين غيديهوم...
قوس:قلت اليوم نتغداو بجوج حيت السيمانة الجاية الخدمة غتكتار
عذراء:ااه وي الله يحسن العوان عنداك غير تستريسا
قوس:ههه اشمن ستريس هادشي مولفو من شحال هادي
عذراء بابتسامة:ااه وي هه انا غير قلت
قوس شاف فيها:هي تيهمك الأمر ديالي لهاد الدرجة؟
عذراء حدرات راسها بحشمة تتحاول تخبا من نضراتو:ا اه
قوس عجبو الحال اي رجل اكيد غيفرح الى حس بأهمية راحتو من طرف انثاه..حط يديه على يديها:متخافيش هادشي جاري بيه العمل
عذراء بخجل:ا ااه مزيان
بقات حادرة راسها تتشوف فيديه لي شادة يديها تتبان كبيرة مقارنة بديالها و هادشي جاب ليها شوية د الضحكة ولكن خباتها و مبييناتش ليه في حين هو كان مستمتع بنعومة ملمسها و صغر حجمها هادي هي الأنثى المثالية ماشي الخباطات لي كان معاهوم من قبل...داز الوقت فهاد الجو الصامت حتى وقف بيهوم الشيفور قدام واحد المطعم معزول شوية كان مكتوب بالشينوية بحجم كبير و تحت من الكتبة الشينوية كانت سمية المطعم بالإنجليزية بحجم صغير شوية ولكن واضح..هبط الشيفور حل ليهوم الباب و هبطو..طلعات عذراء راسها و فرحة كبيرة شداتها فداخلها اول مرة غتجي لشي مطعم اسيوي فحياتها كانت تتشوف اكلهوم غير فالتلفزة و دابا جاتها فرصة انها تذوقو كاع!!تفكرات فاش عطاها كلمتو قدام ختو فالعشاء و قال غيديها هاهوا وفا بيها و فوقت قياسي! كبر فعينيها اكتر بهاد التصرف حيت اكيد اي بنت اهم حاجة عندها فشريكها انه تكون عندو الكلمة..شد ليها فيديها و تم مدخلها للمطعم..مع الدخلة ديالو عذراء سدات عينيها بسبب الضو الأحمر لي مضويه من الداخل كانت الإضائة و اللون بحال شي بار و متيبانش ابدا واش الصباح ليكاين طلعات عذراء راسها بانو ليها ملصقين فالسقف بزاااف ديال المصابيح لي معروفين بيهوم الآسيويين فاللون الأحمر كان منضرهوم جميل بزااف اثاث راقي و مكان فخم..تمات جاية عندهوم واحد المرأة كبيرة شوية فالعمر لابسة واحد الكسوة من ضمن الكساوي لي معروفين بيهوم الشينوا و عطاتهوم تحيتها من تحريك راسها على طريقتهوم...
مشاو معاها حتى وراتهوم الطاولة لي كانت مريزيرڨية من قبل..جلسو و مشات تعطيهوم مهلة يفكرو فطلباتهوم...
قوس حل لموني و عذراء حتى هي كانو الأطباق بصورهوم و المكونات لي فيهوم..بعد دقائق من الصمت...
قوس سد الموني و طلع فيها راسو:ختاريتي لي بغيتي؟
عذراء:امم غناخد هدا(حطات صبعها على صورتو)سميتو الدجاج المقرمش بالعسل و صلصلة الثوم
قوس:صافي غير هو؟
عذراء:احم علاه نقدر ناخد شي حاجة خرى؟
قوس:اش هاد السؤال؟
عذراء:صافي واخا بغيت حتى هاد ليسيگار ديال الخضرة
قوس باستغراب:سيگار؟؟
عذراء تتوريه بصبعها:هادو ههه دايرين بحال البريوات
قوس:ااه قولي Spring Rolls
عذراء:ا ااه مهم ههه
حرك يدو للسرباية و جات خدات طلباتهوم...
من بعد مدة ماشي طويلة هاهوما الأطباق تحطو فوق الطبلة...
عذراء عجباتها الريحة شحال طالعة زوينة و المنضر تيشهي:باينة بنيين
قوس:هدا اشهر و افضل مطعم فالمدينة على مقالت السكريتيرة و هادي اول تجربة ليا فيه معاك
عذراء بتاسمات هاد اول تجربة معاها واخا حاجة بسيطة الا انها تتعني ليها شي حاجة:بصااح؟؟اووه ههه
قوس:هه مالكي؟
عذراء:ههه والو..عرفتي فاش شفت مطعم صيني كنت متوقعة تكون عندهوم حتى ديك الماكلة ديال..المهم راك فاهم مبغيتش ندكرها و الماكلة محطوطة
قوس فهم قصدها:ههه لا لا لا علاقة ماشي كاع المطاعم الصينية فيها هادشي و قلال اصلا فالدول الأجنبية عليهوم
عذراء:ااه يعني مغيغامروش و يحلو داكشي فبلاد ناس خرين حيت عارفين مغاياكلوهش ليهوم
قوس:كلامك صحيح ولكن من غير هادشي المطبخ الصيني متنوع بزاف
عذراء:اه هادشي لي بان ليا فلموني ديالهوم
قوس هز عيدان الأكل و بدا تياكل و هي بقات تتشوف فيه حادر راسو تياكل بكل هدوء و رقي رجعات تاني شافت فتبصيلها بانو ليها دوك العويدات..زعمات و هزاتهوم تتحاول تهز بيهوم قطعة من قطع الدجاج ولكن والو حاولات متبيينش و تطبر لراسها ولكن منجحاتش حتى طلع قوس راسو لقاها مدابزة مع العواد بحال شي گناوية غتطبل..فهم انه معرفاتش ليهوم و هادي حاجة عادية حيت اول مرة تجي لشي مطعم اسيوي..هزهوم ليها و قادهوم فيدو..هز بيهوم قطعة الدجاج و دارها ليها ففمها...
عذراء تتمضغها بخجل السييد موكلها كاع...
قوس:كيف جاتك؟؟
عذراء:بنيينة و حلووة
قوس حط العويدات فيديها و شد صباعها قادهوم ليها:هاكا غتاكلي بيهوم
عذراء حاسة بدفئ يديه:ا ااه شكراا
طلق منها و رجع لماكلتو اما هي حاولات تشدهوم كيفما وراها حتى كملو الماكلة...
قوس:مذقتيش السوشي؟؟
عذراء:مزعمتش عليه
قوس هزو بالعويدات غمسو فالصلصة و مدو لفمها:دوقيه
عذراء كلاتو منو حشمانة:الصراحة مذاقو مابيهش
قوس:راه مذاقاتهوم مختلفة واحد متيشبهش ل لاخور
عذراء داقت منهوم شي عجبها شي لا ولكن مبيينة ليه ابتسامتها على انها عاجبها مجاتش تبيين ليه العكس...من بعد هادشي جابو التحلية لي كانت عبارة على بودينغ المانگو الصيني المزيين بالمانگو و الفخومبواز...
بعدما كلاو حتى التحلية تخلص الحساب و خرجو من تما...
عذراء:كانت تجربة زوينة بزااف شكراا بزااف
قوس بتاسم:مزيان ملي عجبك
عذراء:الجو شحال زويين
قوس:للأسف عندي خدمة كون ضرنا شوية بالرجل
عذراء:تيعجبك الضوران بالرجل؟؟
قوس:اكيد راني شخص رياضي
عذراء:ااه وي باينة غير من(حطات يدها على كتفها)
قوس ضحكاتو هاد الحركة:ههه العضلات زعمة
عذراء:اه هادوك
قوس:بالتمارين و البروتين و المثابرة اي واحد غيوصل لهكا
عذراء:كان يتصحابلي تزاديتي هكا ههه
الشيفور حل ليهوم الباب و طلعو...
قوس:علاه كاين لي تيتزاد هكا؟
عذراء:راه غير ضحكت معاك زعمة
قوس:اه هه
عذراء:بغيت نعرف واحد الحاجة زعمة واش متتحسش بالثقل يعني مثقلين عليك باينة قاصحين
قوس:تأكدي بنفسك ههه
عذراء:زعمة نقيسك؟(حشمات) لا لا
قوس:شنو فيها؟؟
عذراء:حشمت
قوس:نتي تعرفي
بقات غادية الطونوبيل حتى وصلو ل الشركة و هبطو...
عذراء:شكرا مرة خرى داز غداء زوين معاك
قوس:و حتى نتي My Honey (عسلي🍯)
عذراء حشمات ويلي ويلي على ماي هاني اول مرة يتغزل فيها شي راجل هكا حتى من غزلو راقي ماشي بحال شي ماركات لي لقاوها يلبقو ليها "ديالي" و هاهوا الدلع المغريبي...
قوس قرب منها و باسها فحنكها:بسلامة
حركات ليه راسها و مشات بخطوات متسارعة هاد الحركات مذوبينها و زارعين فيها حشمة كبيرة مزال مولفات عليهوم..طلعات فالسانسور حتال طابق العارضات و دخلات عند بنان...
بنان لي كانت تتقرا واحد الكتاب حطاتو من يديها و طلعات حاجبها:على السلامة
عذراء جلسات و صاكها باقي فكتفها:الله يسلمك
بنان تقادات فالجلسة و كمشات عينيها:عذراء مالك معايا؟؟؟
عذراء:كيفاش مالي معاك؟؟
بنان:راك معاجبانيش! شي برود خارج منك معرفت منين جا
عذراء:مامالي والو يمكن غير ليغيگل قريبة تجيني و صافي تدير ليا هكا
بنان شافت فيها بنضرات الشك ولكن معندها مادير خلاتها على خاطرها:المهم الجلسة التصويرية بقات ليها ساعة انا هابطة دابا نتفقد مكان التصوير
عذراء:اوكي انمشي معاك
ناضت بنان و تبعاتها عذراء حتى هبطو لمكان الجلسة التصويرية...
فالصالون كانت رفيف جالسة و مرام معاها تيدويو حتى دخلات عليهوم رواء هازة واحد الكارطونة...
رفيف:هااا السبع جااا(قصدها برج الأسد)
رواء حطات الكارطونة و سلمات معاها:ياختي توحشتكووم و واحد العووجة ناسيية واش عندها واحد صاحبتها سميتها رواء!!
رفيف:راها مع الخدمة هاد ليامات حنا نيت قليل فاش تنشوفوها
مرام جبدات تيليفونها تتشاطي ممسوقاش و رواء شدات الجماعة مع رفيف...
رواء:عرفتي ياختي الثور ديالي
رفيف:مالو ياختي؟؟
رواء:خرجنا انا وياه مزال زاد دخل ليا لخاطري و الله تصدمت من راسي عقلييتي مناسبة عقلييتو و عندي احساس انه هو الزوج المناسب
رفيف بتاسمات:ويلي ويلي على المشعككة كبرات و ولات تدوي دابا على الزواج غير داك النهار كنتي تدابزي نتي و عذراء على بيمو فالساحة و انا تنجي من القسم لاخور باش نفككوم و نجمعها معاك حيت ضربتي ختي هههه
رواء رجعات خصلة من شعرها ورا ودنها مبتسمة:دغيا الوقت تيدوز حتى من عذراء باقة كيفما كانت فصغرها ماراسياش فقنت واحد ههه
رفيف:هاديك غير خليها على الله معاها متأكدة مغتهنا حتى تجي بشي مونتيف غيسكت مناتيفها القدام
رواء:ياك لباس؟؟؟
رفيف شافت فمرام و هزات حجبانها لرواء زعمة فهمي راسك حتى هي فهماتها من الطيارة و قلبات الهضرة فلمح البصر...
رواء:اجي قولي ليا بغيت نزيد ليميش لشعري ولكن ماشي دابا قلت حتى يقرب عرسي الى بغا الله تجي معايا الشهوبية ياكي؟؟
رفيف:اكييد اكييد مع شعرك تتكريبيه هاكاا لووك بوورفاااكت لصيف
رواء بتاسمات:اه عندك الحق صافي ملي تسالي عذراء تصبغو ليا
رواء:ميمكنش عذراء تعطي فرصة لحتاشي راجل هي كانت كارهة الزواج و مباغاهاش و كان مخططها و تفكيرها مصوب على فسخ الخطوبة فقط منين جات بالحب!!و فهاد الضروف!!
رفيف:متعمقتش معاها فالهضرة حيت عارفاها لي فراسها فراسها و غادي غير نحرق الحجرات ديالي
رواء:واش حتى هو من نفس برجكوم؟؟
رفيف حطات يديها على جبهتها:قالت ليا سميتو قوس يعني احتمال كبير هو من عائلة برج القوس هوما لي تيسميو هاد السمية لدري كيفما تنسميو حنا عذراء لبنت
رواء حطات يديها على حناكها:اويلي!!واحد من برج لا علاقة ببرجها!!
رفيف:انا من هادشي كاملو خفت يضحك عليها!!هادو لي لباس عليهوم عندهوم البنات بحال الصبابط تيبدلو فيهوم و يرميوهوم
رواء:عذراء ميمكنش تعطيه راسها غير تهناي من هادشي واخا تعرف تموت بالفعل درنا شلا حوايج فالمراهقة و غامرنا بزاف د المرات ولكن عمرنا طحنااا فسطاج انه نضييعو شرفنا
رفيف:وا راني عارفة راها ختي ولكن الى بزز عليها ولا غتاصبها ميمكنش نتخييل ختي يوقع ليها هادشي!
رواء:غير تهدني مغيوقعش هادشي انثى العذراء ماشي ساهلة لهاد الدرجة و انا عارفة هادشي من معاشرتي ليكوم!
هزات صاكها و خرجات اما بنان بقات مندهشة على التعامل ديال عذراء المفاجئ عمرها شافتها هكا هادشي بزااف عليها!!و ميمكنش تكون هكا من تلقاء نفسها ضروري غتكون شي حاجة ولا شي لعبة فهادشي!!جلسات بنان قدام الشرجم و سرحات بعينيها على برا مزييرة على فمها بعصبية و فراسها ضاربين بزاف د الشكوك و الأفكار...
بنان بنضرات باردة:و نعرفك ا روبين عندك يد فهادشي يحتى نسيفطك لورا الشمس ماشي غير لسويسرا ماشي بنان الحياني لي يلعبو مورا ضهرها ولا بناسها....
هبطات عذراء فالسانسور و شدات طاكسي لدارهوم...
فدار عائلة برناس و بالضبط فغرفة رسيل كانت متكية هاد الأخيرة فوق ناموسييتها هازة تيليفونها تتقرا فيه معلومات على الأشهر الأولى من الحمل و تطورات الجنين بابتسامة على وجهها حتى تحل عليها لباب طلعات راسها لقاتها ختها ديالا...
تلاحت ديالا حداها و رسيل جمعات تيليفونها دغيا و حطات يديها على كرشها بسرعة خايفة على الجنين...
رسيل:مالكي اودي على هاد الطيحة؟؟
ديالا تخشات فيها:داك الزمر د رامي تاني
رسيل:افف واش متتساليوش نتي وياه؟؟
ديالا:هداك مريض فعقلو اصاحبتي واش ا عيباد الله مصوني ليا وسط القسم و عارفني تنقرا فديك الوقيتة و جاي قالك علاش ممجاوبانيش حتى من استعمال الزمن ديالي عاطياه نسخة منو و مبغاش يفهم اففف
رسيل:هادشي و باقي مخطوبين شغيوقع الى تزوج بيك؟
ديالا:تدوي نتي بحالا عندي اختيار اخور من غير نتزوجو
رسيل:راه حيت تيبغيك تيدير معاك هكاك كل واحد كيفاش تيعبر على حبو
ديالا مسحات دموعها:العصى عمرها كانت حب
رسيل:ايوا شغنقول ليك...
ديالا حطات راسها على صدر رسيل معنقاها و سدات عينيها:كون غير كان رامي تيسمع ليا بحالك
رسيل حطات يديها على ضهرها و شافت فالسقف:تنتمنى يدير عقلو حتى هو واخا هكاك صغير و باقي مانضج 22عام راه والو
ديالا:رئال عندو 26عام و باينة فيه بعقلو
رسيل:ايوا راه 26عام الى مدارش عقلو غير يمشي يموت
ديالا:ولاهيلا مهم خليني نعس دابا
رسيل:وا تي نوضي كالاك تنعسي
ديالا ناضت تتقاد فشعرها:بحالا عندك محلبة و نتي عندك غير جوج برقوقات مصدعة بيهوم الوقت
رسيل:دوات مولات الدلاحات راه حتى نتي غير مشماشات لي عندك سيري لحقي همك راه الوطني مابقا ليه والو
ديالا غادة خارجة:واش خصك ديما تفكريني فيه اففف!!!(ضربات بالباب)
هزات تاني رسيل تيليفونها و رجعات تتقرا على المعلومات و يديها تدوزها على كرشها بفرحة...
فمكان عمل كل من رئال و ضرغام..كان ضرغام عاد سالا خدمتو بكري اليوم و قرر انه يرجع لدار..هز اغراضو خارج و فنفس الوقت عقلو مع مرام لي مشافهاش تاني من شحال هادي..بتاسم فاش تفكر اخر مرة شافها فيها كانت بيخير و تيتمنا تكون بيخير حتى دابا طلع فالطونوبيلة ديالو البسيطة و قرر يطرگ الصالون حيت غتكون تما فهاد الوقيتة مع ختو...
فالصالون كانت رفيف تتصوب لواحد الكليانة مكياج لواحد العرس و مرام تتقاد و تستف فالماكياب حتى بلاصات طونوبيلة ضرغام حدا صالونهوم..هبط و دق عاطي بضهرو للباب...
رفيف:سيري شوفي كاع ا مرام شكون تيدق
حطات مرام داكشي من يديها و مشات تشوف لي تيدق و هو يبان ليها ضرغام واقف بطولو و عرضو عليها...
مرام:ض ضرغام
ضرغام ضار دغيا مبتسم:لباس عليك؟
مرام:لباس حمد الله و نتا؟ كيف غادي مع خدمتك؟
ضرغام:لباس كيف غادة خدمتك مع رفيف؟
مرام:مزيانة مهلية فيا
ضرغام:اه مزيان
جبد من جيب سروالو واحد الجوا صغير و مدو ليها...
ضرغام:هاكي هادو غتحتاجيهوم
مرام شدات من عندو باستغراب:شنو هدا؟
ضرغام:حتى تمشي لداركوم و شوفيه المهم نخليك دابا طهلاي فراسك
مرام حركات ليه راسها:واخا حتى نتا
خشات داك الجوا فجيب كسوتها..عطاتو بضهرها غادة داخلة فنفس الوقت بتاسم فرحان فاش شافها واخا مبغاش يبيين ليها هادشي ولكن المهم قلبو مرتاح حيت هي بيخير و حيت دابا قادر يدير واجبو من جيهتها..مشا لطونوبيلتو و ديمارا...
رفيف:شكون ا مرام؟
مرام:غير ضرغام هداك سول و مشا
رفيف بتاسمات من التحت:ااه اوكي
وصل الليل و بعد نهار طويل فدار عذراء كل واحد تخشا فبلاصتو و نعس الا هي لي بقات مكمشة فغطاها شاعلة البيل ديال التيلي من بعد داك التعامل الألاسكاوي لي عاملات بيه بنان رجع عليها بالندامة فالليل و بتنهيدة تقلبات لجيهة الحيط معلقة فيه عينيها و الضو د التيلي ضارب فيه تتقول مع راسها علاش تسرعات فالحكم على بنان بهاد السرعة؟؟واش من كترة ما هي عزيزة عليا و عتابرتها اخت ليا؟؟ولا حيت مكنتش تايقة فيها فالأصل؟؟واش بيناتنا غير علاقة ربة العمل و العاملة؟؟ولكن ميمكنش هادشي!!و الحوايج لي دارت معايا؟؟ميمكنش تديرهوم اي وحدة ليا!!
شدات عذراء راسها و دخلات لتيليفونها تتقلب فليكونطاكت على نمرة بنان حتى لقاتها و دخلات لواتساب..بقات شحال مترددة تسيفط ليها و فلخر قررات متسيفطش من الأحسن متصدعهاش فهاد الوقيتة طفات تيليفونها و حاولات تنعس...
فنفس الوقت فلفيلا ديال انطون راجل بنان كانت هاد الأخيرة متكية هي وياه تيتفرجو فواحد الفيلم..كانت بنان تتسها بعد المرات تتفكر و انطون حداها حاس بشي حاجة واقعة معاها من فاش رجعات من خدمتها و هي ساكتة و تدوي غير بالكلييمات...
انطون وقف الفيلم و شاف فيها:مالك ا حبيبتي؟
بنان:والو ا انطون غير واحد سوء تفاهم يمكن و صافي اش بان ليك نعسو انا عييت
انطون طفا التلفزة:واخاا....
☀️فالصباح☀️
فاقت عذراء وجدات و خرجات لخدمتها...
بعد مدة ديال الطريق وصلات ل الشركة بالطاكسي و هبطات بعدما خلصاتو...دازت من حدا ليسيكوريتي و دخلات..طلعات فالسانسور حتال طابق العارضات يالاه دازت من حدا لي فالإستقبال حتى وقفها صوتها...
البنت:مدام بنان مغتجيش اليوم أجلات خدمتها
عذراء ضارت عندها:و لكن مقالتش ليا هادشي؟
البنت:نص ساعة هادي باش علماتني و مادام نتي خدامة عندها فا هادشي تيعني حتى نتي عملك مكاينش اليوم
عذراء:واخا شكراا
شدات تاني عذراء السانسور لتحت و هي تطيح عليها فكرة انه تمشي لقسم المايكاب ارتيست...ضغطات على زر الطابق ديالو دغيا و بدل السانسور مسارو...توقف و خرجات تتقلب بعينيها كان الصقيل...
بقات غادية حتى دخلات لمكان عمل سديم و نيار ملقات حتى واحد و قالت مع راسها انه مزال مجاو جلسات تما تتمنضر تتسنا فيهوم حتى وكان يجيو حتى حسات بشي واحد دخل طلعات راسها بفرحة يتصحاب ليها هوما حتى تتبان ليها دانيا لابسة سروال دجين مزيير و بودي بيض لاصق دايرة ضفيرة لشعرها و ضااربة واحد مولاي المكياااج خضر مشعععشععع فوق عينيها على النبوري و الرموش الاصطناعية ديما حاضرة الى مدارتهومش ميتهناش ليها البال تصدمات عذراء مسكينة فيها دايرة بحالا هاربة من شي سهرة ولا عرس خلاتها غير متسائلة مع راسها تا امتى فاقت هادي و قادات هاد المايكاب الصارخ الاحترافي؟؟؟
دانيا مبتسمة:صباح الخير عذراء شنو تديري هنا؟
عذراء:جيت نشوف نيار و سديم
دانيا:عندهوم اليوم خدمة بالعشية ماشي الصباح
عذراء ناضت:ااه ايوا نمشي نرجع لدار حسن
دانيا:علاه مخداماش نتي؟
عذراء:لا تأجلات المهم نخليك دابا
دانيا شداتها من دراعها هادشي لي خلا عذراء طلع فيها راسها باستغراب...
دانيا بابتسامة:اش بان ليك نشربو قهيوة فلكافيتيريا د الشركة؟؟
عذراء:علاه نتي مخداماش؟
دانيا:لا المساعدة الأولى متكلفة و مدام شيارا مزال معطاتني حتاشي مهمة دابا يمكن ليك تقولي هادي فترة استراحتي
عذراء قالت مع راسها مافيها والو حتى مكاين نيت ميدار:واخاا
بتاسمات ليها دانيا و مشات بجنبها خارجين من تما حتى مشاو للكافيتيريا خداو قهيوات بجوج و جلسو فطبلة كان تما خاوي كلشي خدام...
دانيا:الله على هدوء
عذراء:عندك الحق احسن حاجة هي الهدوء
دانيا:وي بصاح الصراحة اول مرة نتعرف على بنت من برج العذراء
عذراء:حنا قلالين لهاد الدرجة؟؟
دانيا حدرات عينيها حتى رشفات من قهوتها و طلعاتهوم:حقيقة انكم تتزاوجو من نفس برجكوم يمكن تتخليكوم منغلقين على ريوسكوم و متديروش علاقات صداقة مع الأبراج الأخرى
عذراء طلعات فيها راسها باستغراب هادي كيفاش عرفات عادة برجها و هي بفمها قالت عمرها تلاقات بشي واحد منو؟؟...
ولكن عذراء مبغاتش تبيين ليها هادشي من الأفضل تمثل دور الغبية أو المتغابية و تحتافظ بذكائها لراسها...
عذراء:ا ااه عندي اصدقاء قلااال
دانيا:مدام بنان حتى هي من برج العذراء و متتخلي حتى واحد يقرب ليها حتى من العارضة روبين و صحاباتها واش نوضاتها معاهوم كلشي ساق لخبار لحقدها باغية تولي فالقمة
عذراء شربات من قهوتها ساكتة تتسمع كلامها...
دانيا:لدرجة واحد المرة كانت باغية ترشي لجنة التحكيم فواحد العرض باش تولي هي الأولى
عذراء طلعات فيها راسها:مدام بنان مدايراش هكاك!
دانيا:نتي باقة جديدة سوليني انا لي قديمة فهادشي و كلشي تيدوز قدام عينيا
عذراء سكتات لدقائق و طلعات فيها راسها:شنو دارت ليك مدام بنان باش تبقاي تقولي عليها هكا؟؟
دانيا:اكيد مادارت ليا والو قلت ليك نيت متيقرب ليها حتى واحد علاه خلاتنا
عذراء:و هاني مقربة منها!!
دانيا:راه بزز منها تقربي منها و علاه شكون غيقاد ليها مكياجها؟؟ببساطة خدمتك هاديك و تتخلصي عليها كيفما تتخلص هي على تكون مونيكة شركة Bens-Naht و تلبس ليهوم لي حطو ليها
عذراء:كيفاش مونيكة! حسني ألفاظك عليها
دانيا:هدا تعبير مجازي تيوصفها انا بغيت نعرف غير علاش وحدة مكاملاش معاها شهر تدافع عليها هكا؟؟متنظنش انه السبب برجكوم لي بحال بحال
عذراء:يكفي تعاملها و طيبتها معايا
دانيا:داكشي مؤقت حتى حاجة مدايمة
عذراء سكتات تتشرب قهوتها و دانيا غير تتقرا فتحركاتها بعينيها...
دانيا:ياكما ديرونجاتك هضرتي؟راه هادي الحقيقة
عذراء:متنتييقش شي حاجة الى مشفتهاش بعينيا
دانيا:اممم حتى هدا نضر ولكن ليام غتبيين ليك
عذراء كملات قهوتها:المهم نخليك دابا
دانيا:اوكي
ناضت عذراء بعدما خلات فنجانها فمكان الأطباق المتسخة عند البوفي و مشات داخلة لطواليت ديال النساء...
فلبيرو ديال قوس كان جالس شاعل البيسي و قدامو واقف المنادجر فابيو...
قوس:نتا شوف احدث واحد و خودو
فابيو:اوكي مستر
قوس:صافي مزيان تفقدتي أمور الصيحة الربيعية؟؟
فابيو:اكيد راني واقف عليهوم يخدمو باش تحط فالأسواق
قوس:بورفاكت خص كلشي يوجد فوقتو
فابيو:بغيتي شي حاجة خرى مستر؟
قوس:لا يمكن ليك تفضل
حرك ليه فابيو راسو و خرج من تما..مشا لعند سانسور العمال و ضغط عليه تيتسناه يطلع حتى تيبان ليه طالع و شي حد فيه..تسنا حتى وقف و هي تبان ليه عذراء خارجة منو...
فابيو:ادرا موفتاه!!
عذراء بتاسمات:هاه! مستر فابيو غبرتي
فابيو:الخدمة كتيرة نتي لباس؟
عذراء:بيخيير و نتا؟؟
فابيو:هه بيخير شكرا(تلفت) بغيتي تدخلي عند مستر بنسليمان؟
عذراء:ااه
فابيو:مزيان نخليك دابا بسلامة
ضغط على السانسور و هبط اما هي مشات ديريكت لعند جلنار لي طلعات فيها هاد الأخيرة راسها صفرة بحال الموت ضاربة فيستة فالغوز بسروالها و داخلها قاميجة فالحمر...
جلنار:علاياش تتقلبي تاني نتي؟؟؟
عذراء:قولي لمستر قوس بلي جيت نشوفو
جلنار طلعات حاجبها:بصفتك شكون؟
عذراء:قوليها ليه و صافي
جلنار زييرات على سنانها بعصبية ولكن ماشي مشكل بتاسمات ب شر ايه تقولها لمستر قوس باش يعطيها شي قمعة توضرها على طريق هاد الطابق..هزات الفيكس و صونات عليه...
قوس جاوب:وي جلنار؟؟
جلنار:مستر سمح ليا على الإزعاج ولكن عذراء مفتاح جات و طلبات مني تشوفك نشد ليها شي موعد من بعد؟
قوس بتاسم:لا غير خليها تدخل
لاي لاي لاي لايلاااي(تحية ل ليقراوها باللحن🤣🤣✌🏻✌🏻)
عذراء زادت قربات حتى جلسات قدامو:مكايناش عندي الخدمة اليوم و قلت قبل منمشي لدار نجي نشوفك
قوس:اووه هي توحشتيني
عذراء حشمات مقادراش تأكد ليه صحة هادشي...
قوس: مغتعطينيش التحية ديالي؟
عذراء:اشمن تحية؟؟
حط قوس صبعو على فمو زعمة لبوسة...
عذراء:اويلي واش ديما هادشي!
قوس:القبل رمز من رموز الحب تيوصل بيها الإنسان مشاعرو ولا لا؟
عذراء شافت فيه:الحب؟؟
قوس حنحن:زعمة الإعجاب الخ...
عذراء بتاسمات من لتحت:راني تنحشم
قوس ناض لعندها:ماشي مشكل ناخدها لراسي
عذراء بعدات مخلوعة:اويلي على تاخدها لرااسك!!
قوس وقف مستغرب:مالك راه غير غنبوسك حسستيني بحالا غنغتاصبك؟!
عذراء رصات تتقاد فشعرها:مقصدتش هادشي
قوس باقي واقف:واش مباغاش؟؟
عذراء طلعات فيه راسها قداش طويل عليها و هي واقفة دابا كملها عليها و هي جالسة و بحشمة حركات ليه راسها عاطياه الموافقة يقرب ليها...
مشا قوس جلس حداها و حط يدو على شعرها تيحييدو على وجهها و طلعو لعندو:متخافيش انا عمرني غناخد منك شي حاجة بلاما تكوني نتي باغية راني ماشي وحش!
عذراء شافت فعينيه بلمعة:بصاح؟؟
قوس:اه
عذراء:اوكي سمح ليا
قوس قرب منها حتى خطف بوسة من فمها و خلاها مصدومة:صافي دابا سمحت ليك
عذراء ضحكات بخجل:المهم نخليك غنمشي دابا الى سمحتي جيت غير نشوفك و صافي
قوس جلس فلبيرو ديالو:شوفي..ابتداءا من اليوم الى خاصاك شي حاجة و مكنتش انا ولا مشغول كاين المنادجر فابيو راني كلفتو بهادشي و عطيتو نمرتك
عذراء بتاسمات عاجبها الحال ياااه شحال مهتم بيها و مبغاهاش تبقا مخصوصة من والو:شكرااا بزااف هادشي تيعني ليا بزاف
قوس بابتسامة:العفو
حركات ليه راسها فرحانة و خرجات من المكتب مخلياه متبعها بعينيه مبتسم...
فمكتب رئيس التحرير لمجلة الأبراج كان جالس برناس غارق فخدمتو و الهالات السوداء باقة تحت عينيه من كترة التعب و التخمام فالموصيبة ديال خطيبتو لي سدات عليه جميع البيبان فوجهو و خلاتو يفكر فبلانها ليل و نهار...حتى فييقو من سهوو دقان فالباب..سمح ل الطارق بالدخول كانت الصحفية نواهل...
نواهل:موسيو جبت ليك واحد الملف بخصوص واحد الجريمة
برناس:مشا الفريق دوا مع البوليس؟
نواهل:اكيد جمعنا المعلومات و التفاصيل كلشي فهاد الملف(حطاتو ليه)
برناس:واخا مادامها جريمة خص الخبر يتداع هاد الصباح مزال
نواهل:اوكي موسيو تفقد كلشي بنفسك
برناس:واخا يمكن ليك تفضلي
نواهل بقات شحال تتشوف فيه:موسيو...
برناس طلع راسو:كاينة شي حاجة خرى؟
نواهل:لا لا غير هو عطي الخاطر لراسك..نخليك دابا
نساحبات بقلق حيت هاد الحالة لي غادي بيها و داير فيها راسو غادي غير تآديه فصحتو فقط...
بعدما خرجات من عندو توجهات لمكان عملها حتى بدات تعييط عليها واحد صاحبتها فالعمل...
رمز برج الميزان هو هدا "♎" و المواليد ديالو من 23شتنبر الى 23اكتوبر.
فالدار ديال عذراء كانت واقفة لوليا تتصوب الغدا و عذراء حداها ببيجامتها تتنقي ليها فالخضرة...
لوليا تتحرك فالگاميلة:لبارح كانت عندنا جداك سلافا و خالتك دواني
عذراء طلعات راسها:كاعما قلتوها ليا؟؟
لوليا كبات الما و سدات الگاميلة و ضارت تتمسح يديها بطابليتها بواحد القلق فوجهها...
عذراء:مالك اماما؟؟
لوليا:فالحقيقة كنت مترددة نقول ليك هادشي ابنتي
عذراء خايفة:اش واقع؟؟
لوليا:جداك سلافا و خالتك دواني جاو على قبل عرسك نتي و برناس
عذراء بصدمة:اهاااه؟؟؟
لوليا:الجدة سلافا قررات انه فاش يسالي عرس رئال و رسيل غيبدا التوجاد لعرسك نتي و برناس...
فنفس الوقت و فلفيلا د انطون كانت بنان جالسة فلاتيراس تتحتاسي فنجان قهوتها و حداه طبسيل طبقات د الحلويات و فوسط من هدوئها تسمعات رنة هاتفها..هزاتو و جاوبات بعدما عرفات شكون المتصل...
بنان:الووو...
بنان:وي تنسمعك
بنان شافت قدامها و ابتسامة شريرة ترسمات على وجهها:هي قلتي دانيا قحطان المساعدة الثانية لشيارا هي لي كانت معاها هاد الصباح امم...استمري بالمراقبة و مابغيت حتاشي تهور!!اوكي مزيان(قطعات)
تقادات بنان فالجلسة و باقة ديك الإبتسامة الشريرة: دانيا قحطان..هه مرحبا بيك فاللائحة السوداء جيتي عند الشيطان شخصيا تلعبي معاه....
نرجعو لعذراء لي كانت باقة مصدومة...
عذراء:ولكن انا ا ماما مموافقاش انا ماباغاش
لوليا حدرات راسها بحزن:و علاه ا بنتي عندك الحق فالموافقة ولا الرفض؟
لوليا حابسة دموعها بقات فيها بزاف:منقدرش ا بنتي (حطات يديها على كتافها) حاولي تدخلي الفكرة لراسك كيفما دخلتها حتى انا لراسي 30عام هادي
عذراء شافت فيها بتعابير ممصدقينش كلامها:بغيتيني نتقبل انني نتزوج بواحد ممتقبلاهش بلي غيكون راجلي؟و متنبغيهش؟؟حتى من الإعجاب مكاينش؟؟متيهمكومش احساسي؟؟
لوليا:معندنا مانديرو الأمر جاي من عند مي سلافا مادام هي شخصيا لي قالتو فا راه خصك توجدي لزواجك فانتظار قرارها بخصوص النهار لي غيتقام فيه بالضبط
عذراء مبقاش عندها الجهد لي يدوي عطاتها دغيا بالضهر و خرجات من الكوزينة مصدومة معارفة باش تبلات..بقات غادية طالعة ببطئ فدريجات الدروج و كل خطوة اثقل من لوخرا حتى سدات عليها فبيتها...
فالصالون عند رفيف كانت تدوز فالجفاف بالكراطة و مرام جالسة هازة التيلي حتى تمات جاية رواء تتجري...
رواء تتلهث:رفييييييف
رفيف لاحت الكراطة مخلوعة:اش واااقع؟؟؟؟
مرام هزات راسها بدهشة:بسم الله الرحمان الرحيم
رواء:سنمااااااار
رفيف قلبها ضرب بالجهد:مالووو؟؟؟؟
رواء:جااا ا المووصيبة جاااا
رفيف مشات عندها تتجري شوية متزلق و شداتها:كيفاش جااا؟؟؟ياك هو ففرنسااا؟؟؟
رواء:سولت الجيران لي حدانا قالو ليا مو مريضة و جا يشوفها
رفيف حشمات تدخل حشومة غتهجم على الناس واخا عائلتها حتى تمات جاية واحد البنت شابة ب بيجامتها و لابسة كلاكيطة تصدمات فاش شافت رفيف:ويليي واش داك بوركابي مقالش ليكوم تدخلو ويلي ويلي سمحي لينا يا الحبيبة مرحبا ب بنت عمي دخلو دخلو
رواء:احم ختي تغريد انا غادة باقة مسخرة للواليدة بسلامة(لقد تمت المهمة بنجاح)...
دخلات رفيف مع تغريد دايزين فالكولوار حتى دخلاتها لبيت الضياف...
تغريد:صبري نقول ل رودينا تصوب اتاي
مشات تغريد فرحانة تتقرقب بالكلاكيطة ديالها هكا دايرة بنت عزاز عليها الناس و العائلة حتى علماتها و رجعات تاني مبتسمة...
تغريد:دابا راها بيخير الحمد الله شداتها لكريز لبارح بليل راكي عارفة فيها الضيقة
رفيف:الحمد الله اختي فين كاينة دابا نشوفها قبل مانمشي
تغريد:فبيتها اجي معايا
هزات رفيف صاكها و طلعات معاها فالدروج حتى وقفو قدام واحد البيت..دقات تغريد و من بعدها حلات الباب على امرأة كبيرة فالعمر متكية و مغطية فناموسيتها و بجنبها واحد الشاب شاد يديها تيدوي معاها رفيف غير شافتو قلبها بدا تيجري ماشي غير تيضرب و احاسيسها بداو تيتخربقو بالفعل تتبغيه لأقصى الحدود...
سنمار طلع راسو تصدم:رفيف؟؟
رفيف دخلات بتوتر متفادية تشوف فيه:خ خالتي رضوى على سلامتك
رضوى كانت امرأة كبيرة بيضاء البشرة عينيها خضرين و كاين تشابه بينها و بين لوليا شوية كونها الأخت ديالها...
رضوى:لباس ا بنتي مجاتش معاك ختي لوليا؟
رفيف:لا جيت غير بوحدي غير الجيران لي علموني حيت صالوني قريب..واش حاسة براسك بيخير؟؟
رضوى:نشكرو ربي و نحمدوه هاد الساعة ا بنتي
رفيف:الحمد الله اخالتي المهم غنمشي دابا و منها نيت نعلم الواليدة باش تجي تشوفك
رضوى:واخا ا بنتي ربي معاك
تغريد:اويلي على تمشي بقاي تغداي معانا كالاك
سنمار ناض:تفضلي معايا كاع ا رفيف بغيت ندوي معاك
تغريد مشات جلسات فبلاصتو تقابل مها و هو مشا مع رفيف لواحد البيت سد عليهوم و بقا غادي تيقرب منها باغي يبوسها حتى وقفاتو...
رفيف:مقلتيش ليا غتجي للمغرب!!
سنمار:مكانتش عندي فرصة شديت اقرب طيارة و جيت نشوف الواليدة
رفيف:ولكن راه صبح الصباح و ماماك برات الحمد الله علاش ماسيفطيش ليا ميساج؟؟
سنمار:مزال ماشريت النمرة د المغرب
رفيف:و الواتساب؟؟ياك عندكوم الويفي فالدار!!
سنمار:الله يهديك واش انا باقي هاز لهم للواليدة و نبقا نقلب على الويفيات؟؟؟
رفيف تنهدات:شحال غتبقا هنا؟؟؟
سنمار:مقطعتش الروتور
رفيف:واخا ا سيدي على سلامتك بعدا و دابا بسلامة باقي تابعني صالوني
دفعاتو بكتفها و تمات غادة خارجة حتى هبطات مع الدروج تلاقات بختو رودينا هازة صينية اتاي...
بعدما تغداو عائلة عذراء طلعات هاد الأخيرة و سدات عليها فبيتها..شافتها رفيف و ستغربات مال هادي تاني فا قررات تمشي تبعها تستفسر منها اش واقع...
دخلات رفيف لقاتها مكمشة فوق ناموسييتها..جلسات حداها و شافت فيها بقلق:مالكي؟؟
عذراء ساكتة...
رفيف:مابغيتيش تعاودي ليا اش واقع؟؟؟
عذراء:....
رفيف عصباتها:ياكما داك صاحبك اااا
عذراء طلعات راسها مخرجة عينيها:اش تتقولي نتي!!
رفيف ربعات يديها مطلعة حاجب:اش واقع معاك ا الزمر؟
عذراء:زعمة مافراسك والو؟؟
رفيف:بلعمى اختي
عذراء:فراسك بلي جدة سلافا جات عندما مع مت داك المزمر و قررات عرسي مورا عرس رئال
رفيف بصدمة:كيفاااش؟؟
عذراء:اذن ماافراسك والو
رفيف:ويلي و الله مافرااسي(حطات يديها عليها بحزن) ختي واش بصاح نتي ماباغياش برناس؟؟
عذراء:اش هادشي تتقولي اكيييد ماباغيااااهش واااا متنحممملش فيه الشعرررة صااافي
رفيف مسكينة غير تتشوف ماعارفاش اش غتقول ليها حيت اكيد حتى شي واحد ماعندو السلطة فوق الجدة سلافا هي المتحكمة فعائلة مفتاح كاملها بعدما كان المرحوم جدهوم لي كان متحكم(الحاج لي بان فأول بارت)فا شعندها ما تدير لختها؟؟
عذراء بإنكسار:هه سكتي ياك مكاين حتاشي حل ياكي؟
رفيف حدرات راسها و عينيها غرغرو:ختي...
عذراء نفاجرات بالبكا و غطات وجهها بالوسادة كاتمة صوتها حداها رفيف لي بدات تتبكي حتى هي بسبب حالة ختها لي تتشوف قدامها حاجة وحدة لي تقدر تديرها هاد الساعة و هي المواساة..قربات منها و عنقاتها ضاماها لحضنها تتحاول تهدنها ولو غير شوية اما عذراء غير تتبكي بدون توقف...
رفيف:صافي اختي عافاك تهدني غنشوفو شي حل
بقات تتربت على ضهرها معنقاها حتى حسات بيها ترخات شوية و نقص بكاها...
رفيف:دابا شوية؟؟
عذراء حركات ليها راسها ب لا تتمسح فدموعها بيديها...
رفيف:شوفي رتاحي دابا و غنشوفو انا و الواليدة كيفاش نعطلو هادشي بعدا على الأقل بينما لقينا كيفاش نسرسبوهوم
عذراء:و الى لا؟
رفيف:نعسي دابا واخا؟؟؟
تكات عذراء تتحاول تسد عينيها و رفيف حداها حتى حساتها نعسات..ناضت من حداها بعدما غطاتها و خرجات لعند لوليا...
لوليا لي كانت فالصالون شادة التلفزة شافت رفيف هابطة و نقصات الصوت:دوات معاك ياك؟
رفيف جلسات حداها:فين لخرين؟
لوليا:باك طلع ينعس خوتك رجعو لخدمتهوم
رفيف:صافي مزيان شغنديرو فهادشي دابا هي مابغاتوش محاملاهش؟؟
لوليا طلعات حاجب:محاملاهش؟ من امتى قالت ولا بيينات بلي محاملاهش؟؟؟
رفيف:هكا قالت ليا
لوليا:زعمة تكون تتبغي شي واحد اخور؟؟؟
رفيف تضور فعينيها من لتحت:لا ويلي ا الواليدة عذراء نيت
لوليا:و مالها؟ مالي انا لي تزوجت بحالها؟ ماال رسيل؟ مالك نتي؟؟مال العائلة كاملها؟؟ بوحدها لي خرجات من الجنب!
رفيف:شغنقول ليك ا ماما هي و نتوما لي تعرفو انا غنوض دابا نحل صالوني تاني
لوليا:واخا ا بنتي
رفيف:متنسايش تشوفي خالتي رضوى
لوليا:حتى نصلي العصر و نمشي لعندها
فمكتب برناس كان هاد الأخير جالس خدام حتى تتصوني ليه الواليدة ديالو...
دواني فرحانة:ولديي
برناس:اش واقع ا الواليدة؟؟
دواني:عاد صونات عليا مي سلافا و قالت من هنا ل 3 ايام غتجي لعندنا و تجمعنا مع واليدين عذراء فالعشاء
برناس بتاسم فرحان:بصااح؟؟
دواني:اييه ا ولدي بغيت غير نفرحك مقديتش نصبر حتى ترجع لدار
برناس:الله يطول فعمرك ا الواليدة
دواني:امييين ا ولدي حتى ترجع و نقييد ليك لي خاص
برناس:ان شاء الله
قطعات دواني مخلياه مبتاسم و اخيرا زواجو بدا تيتبنا فأرض الواقع بحال كيف كان تيتمنا...
☀️فالصباح الباكر☀️
وصلات عذراء لخدمتها جايبة معاها نفسية عيااانة باينة غير من شكلها بحيث مدايرة لا مكياج لا والو حتى من شعرها طالقاه عشوائيا..دارت لبطاقة ديالها فعنقها و طلعات فالسانسور هازة صاكها فكتفها حتى وصلات لطابق العارضات لقات فيه ضجة على النبوري كلشي مجموع على واحد البنت صهباء طوييلة و عينيها خضرين لابسة فستان ناعم فالغوز بارد طايح على كتيفاتها البيضين و عنقها مزييناه بسليسلات ذهبيين نفس الشيء مع وديناتها لي معلقين فيهوم طوينگات مضورين ذهبية...دازت عذراء من حداهوم غادية ممسوقاش حتى دقات على غرفة بنان هاد الأخيرة لي حلات ليها بلا متشوف فيها..دخلات و سدات الباب تتشوف فيها و تتمنى انها تكون ماهازاش عليها شي نضرة خايبة بسبب التصرف البارد لي دارت معاها بسبب دانيا...
بنان ضارت عندها بصرامة:تحركي صوبي ليا لمايكاب ديالي باقي تابعاني الخدمة
عذراء شافت فيها بدهشة حيت عمرها دوات معاها بهاد الأسلوب...
بنان:مالكي؟؟واش غتبقاي تشوفي فيا؟
عذراء قربات منها مزييرة على صاكها بقلق و مشات حطاتو و بدات تتجبد فالمايكاب فوق الكوافوز اما بنان جلسات بثقة تترد شعرها للوراء...
بنان:بغيتك تديري ليا لووك برونزي ترابي و الأيلاينر يكون طالع شوية على العادة مع تكحيلة فعينيا و فجهة نيفي بغيت تديري ليا النمش غير شوية و صافي القلم لي تيتدار بيه هاهوا محطوط هنا
عذراء مشات جبداتو و بدات تتجبد فالمايكاب لي غيجيها مع لي قالتو ليها...
بنان طلعات فيها عينيها و بتاسمات جنب:شفتي ديك الصهباء لي على برا؟
بنان:هاديك هي العارضة رقم 5 فالشركة عاد حطاتها طيارتها امم انثى برج الثور و سميتها ساندي هادي بالضبط حضي منها(و طلقاتها بضحكة خفيفة)
عذراء:و علاش غنحضي منها؟اش جابني انا للعارضات؟
بنان تتشوف فضفارها و دوات بلامبالاة:ضهور منافسة جميلة و أنيقة و محبوبة بحالها فهاد الوقيتة بالضبط(طلعات فيها راسها بقلق مصطنع) متيبشرش بلخير و نتي..قصدي(بضحكة سخرية) حنا يالاه ماتهنينا من روبين
عذراء:لاش تتلمحي؟؟
بنان:نتي متجاهلة بزاف اش تيوقع فالشركة ا ولا تديري راسك معارفاش ولا ممسوقاش خصك تعرفي انه اي وحدة فهاد البناية سوا من سويسرا ولا المغرب جاية اولا تخدم و ثانيا(بتاسمات ب شر) تلوا على مول الشركة
عذراء حسات بشي حاجة فقلبها تتقرصها فاش قالت هاد الجملة الأخيرة وقفات من التقلاب و بدات تتفتف:كيفاش؟؟
بنان:ههه راكي مبتدئة و بزاف و نتي وسط هاد المعركة عبارة فقط على قطة صغيرة تتحوم و تلعب بكرتها هاد الكرة لي جات تتدحرج حتى وصلاتك وسط اللبؤات الضارية
عذراء فهمات تلميحها:يعني انا مجرد عنصر ضعيف مقارنة بروبين و صحاباتها و هاد ساندي؟؟
بنان:تماما و الطامة الكبرى انه نتي اداة ساهل يتلعب بيها تماما ا حبيبتي
عذراء بدهشة:كيفاش اش تتقولي؟؟
بنان ناضت حتى جبدات واحد الملف من مجر واحد الخزانة و لاحتو ليها فوق الكوافوز بنضرات باردة:حلي هدا
عذراء هزات الملف و حلاتو اول حاجة بانت ليها هي صورها مع دانيا فالكافيتيريا من فاش دخلو حتى فاش خرجو...
بنان ربعات يديها:جبدي الورقة لي موراهوم و قرايها
عذراء:دانيا قحطان..المساعدة الثانية لمدام شيارا..انثى برج الدلو..المايكاب الارتيست الخاصة بالعارضة روبين الفيلالي سابقا فالشركة السويسرية Bens-Naht...
عذراء شافت فبنان مخرجة عينيها:م م مايكاب ارتيست ديال روبين؟
بنان هزات يديها تتشوف فالسقف:وااااو انجاااز عظييييم(رجعات شافت فيها مربعة يديها)تنظن من خلال النضرة ديالك لي على وجهك الشاحب عرفتيني علاياش داوية؟
عذراء:دابا نتي تتقولي ليا بلي ستغلاتني؟
بنان:ههههه فالحقيقة ستغلاتك شويكوك حيت خلاتك تعاملتي معايا بديك الطريقة ولكن تنضن دانيا معارفانيش مزيان و حتى روبين مزوداتهاش بالمعلومات الكافية عليا حيت غرضها و هدفها نتي و لي معارفينوش انه مغتدوزش عليا ابدا!!
عذراء حسات بالشمتة فهاد اللحظة كيفاش سمحات لراسها تخلي وحدة عاد تعرفات عليها تخلق هاد سوء الفهم بينها و بين بنان لي مخلات مادارت ليها...
بنان لاحظات سكوتها و فهمات انه تأنيب الضمير داير خدمتو:حسيتي دابا بالقيمة ديالي ولا مزال؟؟
عذراء:سمحي ليا بزااف انا ظلمممتك و سئت الظن فيك
بنان تنهدات:وحدة عاد جديدة ا عذراء بجوج كلمات قدرات تقلبك عليا؟؟؟فين اللوجيك؟؟؟
عذراء:راه كنت فمرحلة صراع مع افكاري انا اكيد متييقتش الكلام ولكن شي حاجة فداخلي تتحاول تأكدو
بنان:و علاش هاد الحاجة اصلا تكون؟؟؟ واش انا تنرضع صبعي ولا؟؟واش كاينة شي بنت لمرا لي غتدير ليك داكشي لي درت؟؟
عذراء:اكييد لا ولكن حتى نتي تديري هادشي حيت انا وسيلة قوية بزاف الى دوينا على استفزاز روبين و اغضابها هادشي لي خلاني تنحاول نأكد كلام دانيا!
بنان منداهشاتش كانت متوقعة هاد الكلام:راكي غالطة و بزاف روبين سوا كنتي ولا لا يكفيها غير وجودي حداها فالقمة هادشي قادر يشعل فيها ماشي غير الاستفزاز العافية تتاكل فيها
عذراء:و شنو السبب اذن الى انا غالطة؟؟؟
بنان تنهدات:حيت تنشوف فيك كيف كنت عليه تتفكريني فاش كنت بوحدي و مكاين لي يمد ليا جغمة الما فاش كنت مقاتلة مع الزمان غير باش نشري كسوة فاش كنت نتمحن نلقا طرف د الخبز انا طلعت بصعوبة و انطون لي عاوني فالأخير حتى وصلت لهنا فاش شفتك بنت ضريفة و نقية قررت مع نفسي نطلعك للقمة حلمك تحقق اصلا فاش وليتي معايا ولكن شكون قال انا دايمة؟ فاش جا مستر قوس فالطريق و حسيت باهتمامو بيك قررت انني غنحاول نحطك فجنبو حيت حداه غتولي محمية اكتر....
طلعات بنان راسها لقات عذراء تتبكي بحرقة و الندم تياكل فيها و تتلوم فراسها على تسرعها و غبائها!!...
بنان:متبكيش كلشي تيغلط علاش ماجيتيش من الاول و قلتي ليا شنو قالت هاديك و هنيتي راسك عيواض تهزي افكار وهمية خاطئة فداك الراس؟؟
عذراء ببكاء:سمحي لياااا
بنان جلسات:مسحي عليا خنونتك ساندي جات و نتي محطمة ليا هنايا
عذراء:واش سمحتي ليا؟؟
بنان:افف معامن انا يكفيني انني ندمتك على شنو درتي ههههه
عذراء:ندمت و بزاااف
بنان:هادي دير ليك العقل و مرة خرى لي سمعتيها ولا شفتيها ديريكت جي لعندي بدون نقاش
عذراء تتمسح دموعها:صافي كوني هانية عمرني باقي غنعاود بحال هكا
بنان:ايوا مزيان هكا نبغيك كوني قوية
عذراء مشات تتجبد المايكاب و بدات تتقادو ليها حتى سالاتو بابتسامة...
عذراء:جيتي تتحمقي
بنان تتشوف فالمرايا و تقاد فشعرها:شكراا راني دايرة مع ريكا فقاعة الملابس يقاد ليا شعري تما
عذراء:ااه مصفف الشعر مالو غابر؟
بنان:عطيتو شي ايامات بغا يشوف واليديه
عذراء:ااه مزيان
بنان ناضت:صافي كلشي هوا هاداك
يالاه بغات تقاد حوايجها باش تخرج و هو يتسمع الدقان فالباب...
مشات حلات باستغراب لقات واحد من عمال الشركة مد ليها واحد الساشية فاش تيديرو الكادووات فالغوز...
الرجل:لعذراء مفتاح ا مدام
بنان:عذراء اجي لهنا
عذراء خرجات لعندها لقات الرجل و بنان هازة الساشية...
الرجل مد ليها واحد الجهاز بحال التيلي بستيلوه:سني هنا ا مادموزيل
شداتو من عندو عذراء خربقات غير فداك التاكتيل و انصارف..مدات ليها بنان داكشي و سدات الباب...
بنان بتاسمات:سي قوس مبرع ليا حبيبتو
عذراء بتاسمات بخجل و جلسات حلات الساشية لقات فيها بواطة غوز متوسطة الحجم...
عذراء:شغيكون زعمة فداخلها؟؟
بنان:معرفتش حلي و شوفي
حلاتها عذراء و هي تلقا تيليفون كبير فالغوز بليبوشيط و ليكيت ديالو و الشارجور...
عذراء بعينين تيلمعو:واااو هادشي زويييين
بنان:اوووه من ضمن اخر تصاميم شركة سامسونغ
عذراء:مكتوب Samsung Galaxy S20
بنان:زويين و بنوتي شوفي البوشيطة شحال زوينة
تسمعات رنة هاتف عذراء و مشات دغيا هزاتو لقات ميساج قوس: "تنتمنى تكون عجباتك هاد الهدية البسيطة"
قوس فمكتبو طلع ليه اوديو لقا نيت لي بغا يتمزك لصوتها فهاد الصباح سمعو بابتسامة و جاوبها بالكتبة هو انسان متيستعملش خاصية ليزوديو ابدا يا ايما ميساج ولا ابيل...
عذراء طلع ليها تاني ميساج ديالو :" بصحتك شكري معاك حتى فابيو على اختيارو"
عذراء تتكتب:ان شاء الله شكرا مرة خرى و نهارك مبروك(سيفطاتو)
طلعات عذراء راسها لقات بنان تتفيلمي فيها بتيليفونها غير شافتها حتافظات نيت بالفيديو:ياختي واحد الإبتسامة و الضحكة مصاب تجبدي السييد و تبوسيه من هنا
عذراء ناضت بخجل:والااا حرااام علييييك غيتصحابو مهاوشة عليه
بنان غادة خارجة و عذراء تابعاها معلقة معاها:والااا بليييييز
بنان:وا طلقي مني راه مابقيناش فالبيت
بقاو هكاك حتى تساطحات عذراء مع شي واحد طلعات راسها لقاتها ديك ساندي...
عذراء وقوس الجزء العاشر
محتوى القصة
التنقل بين الأجزاء