بنان:الفرق بيني و بينك انه كنت عايشة مع الواليدة الله يرحمها و مكانتش مسوقة لهادشي د الأبراج واخا اكيد تزوجات عن طريقو يعني حتى الواليد الله يرحمو كان من برج العذراء و مكانتش تتقول ليا لا دخلتي ولا خرجتي حيت كانت باغية غير طرف د الخبز
حرك ليها قوس راسو و هي انصارفات بتوتر و السبب هو تفكيرها فديك الفيستة الكاشفة الغاملة لي دار عليها رب عملها صيحة ربيعة كاع فاش تتفكرها تتبغي تقج راسها..رجعات للبيرو ديالها و بدات فخدمتها...
في حين كانت عذراء فقسم التصوير..بنان تتاخد جلستها التصويرية و هي كاينة فغرفة تغيير الملابس..كانت جالسة تتشوف فتيليفونها بابتسامة عاجبها شكلو حتى سمعات الباب تحل عليها طلعات راسها يتصحاب ليها بنان لي سالات حتى تتبان ليها دانيا...
دانيا بابتسامة:صباح الخير هه كنت تنقلب عليك شفت فلومبلوا د خدمتك انه كاينة جلسة تصويرية فهاد القاعة
عذراء بلعات ريقها و تتطلع فيها و تهبط بعينيها و هضرة بنان غير تضور ليها فدماغها...
بنان سالات جلستها التصويرية و رجعات لفين لبسات حوايجها باش تبدلهوم حتى تتبان ليها شي وحدة واقفة قدام لباب...
عذراء:أمرك غريب و الله
دانيا:علاش غريب بلعكس انا بغيت نكونو صحابات
بنان من موراها مطلعة حاجب:عذراء ممحتاجاش لصحبة ديالك (قربات لعند ودنها) ا جاسوسة روبين
دانيا خرجات عينيها و تلفتات دغيا:م مدام بنان
بنان جراتها و سدات لباب عليهوم:اش تيقول ليك راسك ا اللفعة اا
دانيا:كيفاش؟اش تتقولي؟؟
بنان:بلا متمتلي عليا و تديري راسك ماعارفاش
عذراء ناضت من بلاصتها تتفرج...
دانيا:راه بصاح معاك قولي اش كاين
بنان ربعات يديها:واخا يا لالة نتبعو الكذاب حتال باب الدار ماشي مشكل شهر و شي سيمانات باش خدمات عذراء فالشركة عاد بانت ليك؟؟ لا و السييدة مصرة زعمة تدير معاها صداقة و منعرف شنو
دانيا:ديك الساعة كنت مشغولة زائد شنو فيها؟؟
بنان:ماشي هنا فين كاين المشكل..المشكل كاين فالنوايا لي جايين من مورا ديك الصحبة (هزات عليها صبعها) شوفي راه خبارك وصلاتني و ديك روبين لي تتحرك فيك من تما راه الى ماجمعات راسها غتشوفني على حقيقتي!
دانيا بتوتر:ع علاياش داوية؟؟
بنان:جمعي عليا تفتافك و ضرگي عليا وجهك و وصلي ليها تجمع راسها ولا ميعجبها حال تبارك الله التبرهيش الخاوي
دانيا خرجات دغيا و قلبها تيضرب بالخوف اما عذراء غير تتشوف...
عذراء:واو زعمة ديما تتبهريني بقوة شخصيتك خليتيها تهرب
بنان جلسات و لاحت شعرها لور:هادوك غير رباعة ديال الخوافات عارفين راسهوم مغيوصلوش ليك و تيديرو هكاك ههه
عذراء قربات منها تتفك ليها فشعرها:و زعمة عادي الى بيينتي لروبين انه عقنا بيها؟
بنان:غتعتابرو انذار و تنتمنى تدير بيه و تديها فسوق راسها
الإجتماع ديال المصممين بدا و فواحد القاعة من قاعات عرض الأزياء كانو المصممين جالسين و قوس قبالتهوم جالس بوحدو و جلنار واقفة عليه منصة العرض بيناتهوم خاوية و هادشي تيعني بلي حتى وحدة مزال مادخلات ولا خرجات من العارضات...
جلنار:نقول ليهوم يبداو دابا ا مستر؟
قوس طلع فيها راسو:العرض مغيبدا حتى تجي عذراء
جلنار بدهشة:كيفاش ا مستر؟
قوس:قولي لشي واحد يجيب عذراء لهنا
جلنار باقة مصدومة:و و ولكن ا مستر ع علاش؟؟؟
قوس خنزر فيها و هي تجمع الوقفة جبدات التيلي الخاص بالشركة و صونات على واحد من العمال و قالت ليه يجيب عذراء هاد الأخيرة لي كانت راجعة هي و بنان لغرفتها حتى تيبان ليها واحد الراجل قاصدهوم...
عذراء هزات راسها باستغراب و بنان دفعاتها بابتسامة:سيري تكلمي و اري الماتريال ديالك نديه معايا
عذراء:و واخا شكرا
مشات عذراء مع الراجل فالسانسور و وصلها حتال فين كاينة القاعة و مشا..دخلات عذراء لتما يتصحاب ليها غتلقا غير قوس ساعة بانو ليها عرام د المصممين و هو قدامهوم و جلنار واقفة عليه..غير بانت ليه داخلة بتاسم و وقف تيتسناها تجي حتى وقفات قدامو مبتسمة...
عذراء:صباح الخير مستر
قوس:صباح النور عذرائي اجي جلسي
جلنار كانت طالقة ودنيها حتى سمعات عذرائي و هي تخرج عينيها جلسات عذراء و جلس حداها قوس تحت انضار البقية المصوبة عليهوم أو بالأحرى عليها هي تتبان بنت بسيطة بملابس جد جد عادية غير هو ملامحها زوينة و باينة فحركاتها انها ضريفة...
قوس طلع راسو فجلنار لي غير حاضياهوم:و دابا قولي ليهوم يبداو العرض....
جلنار مشات تتقرقب بطالونها و السم غيخرج من عينيها واش رب عملها تسطا ولا شنو واا اش تدييير ماايكااب ارتييست معااه فالإجتمااع الخاص بيه هو و المصممين د الشركة لي أغلبيتهوم من الطبقات المرموقة؟؟..دخلات علمات العارضات لي كانو لابسين و مقادين ليهوم لي مايكاب ارتيستس لي تما ماكياجهوم و كلشي..تستفو وحدة مورا لوخرا فالكولوار و رجعات جلنار جلسات فالصف لي جالس فيه قوس و عذراء غير مبعدة شوية...
عذراء شافت فالمنصة و هي تطلق موسيقى لي تطلق فعروض الأزياء و تمات داخلة العارضة الأولى..المصممين جبدو دفاترهوم كل واحد تيسجل الملاحظات ديالو من غير المصمم لي صمم اللبسة ديال العارضة نفس الشيء مع جلنار تتعطي ملاحظاتها فدفتر ديالها اما قوس تيتسنا غير فردة فعل عذراء...
عذراء تتتشوف فالعارضة لي تتبوزا و تجي لهنا و تعاود حتى مشات و جات موراها وحدة خرى كانو لابسين الوان ربيعية و عليهوم لمسة من الوان خرى ولكن محتافظين بنجم العرض لي هو لون الفيستة الكاشفة...
قوس لاحظ سكوت عذراء لي مافاهماش اصلا ما محلها من الإعراب فهادشي...
قوس:شنو بان ليك؟
عذراء:فاش؟
قوس:فالعارضات؟
عذراء:فالحقيقة هادو طويلات شوية على مدام بنان
قوس:قصدت فالتصاميم؟
عذراء:ا ااه زوينين غير هو الألوان جاوني فشي شكل
قوس:هادي هي الصيحة الربيعية لي قلت ليهوم يتأنسبيراو من الفيستة ديالي باش يصمموها
عذراء بدهشة:واش درتيها بصاااح؟؟؟
المصممين طلعو راسهوم باستغراب فصوتها العالي شي طلع حاجبو معاجبوش الحال شي رجع دغيا تيكتب و يتفرج فالعارضات اما جلنار واحد الوقت زييرات على الستيلو غتقب الدفتر كيفاش داباا هاد الحاالة السييد جايبهااا شاد معاهاا الجماعة و لااش هاد الإجتماااع اذن!!!...
قوس:راني انسان قد كلمتي و قلت انه غندير هادشي
عذراء بتاسمات عاجبها الحال:شكرا بزاف
قوس شد ليها حنكها بشوية: مزيان ملي عجبوك
عذراء حسات بالإحراج من ديك الشدة و حدرات راسها بحشمة دغيا المصممين شي تيغمز شي مابقاوش فاهمين حتاشي لعبة اما جلنار هاديك شوية غتنوض لعندهوم من كترة الفقصة..العرض سالا فاش دازو شحال من عارضة و هنا المصممين تقادو متقابلين مع قوس...
قوس شاف فعذراء:شنو بان ليك فالصيحة ا عذراء؟
جلنار خرجات عينيها لا واش غير سمعاتو دابا تياخد برأيها على صيحة د مصممين متمكنين و ماهرين؟؟؟
عذراء رجعات خصلة من شعرها للوراء تتبتاسم للمصممين على نيتها:زوينة هه
قوس بتاسم و شاف فيهوم: التصاميم غتحط كاملها خصكوم تعرفو انه هاد الصيحة برعاية عذراء مفتاح
جلنار ناضت تدخلات بصدمة:كيفاش ا مستر؟؟
المصممين شي تيشوف فشي مابقاو فاهمين والو...
قوس:كيفما قلت و كيفما سمعتو
جلنار شافت فيها بحقد و رجعات شافت فقوس:ولكن بصفتها شكون ا مستر؟
قوس خنزر فيها بغضب و علا من نبرتو:اناااا لي عااارف اش تندييير هنااايااا
جلنار تخلعات و صقلات نفس الشيء مع المصممين اما عذراء قفزات مخلوعة ويلي كيف تبدل فثانية...
قوس خفض من نبرتو و تنهد:هادشي عارفو فابيو من قبل و نتوما ماعليكوم غير التطبيق الإجتماع سالا
شد عذراء من ذراعها و خرجو من تما مخليين كلشي مستغرب...
مصمم:ماعرفتش ولكن انا لاحظت انو مستر بنسليمان تيشوف فيها فشي شكل
مصممة2: ماشي غير بووحدي بعدا
مصمم2:حتى انا لاحظت نفس الشيء!
جلنار هزات دفتارها و خنزرات فيهوم: خصوصية مستر قوس بعيدة على عملوو و هاديك مااهي مجررد مايكااب ارتيييست رخ....اففففف
مشات ضاربة بطالونها مخليااهوم مستغربين من تصرفها حتى هي...
طلعات عذراء مع قوس فالسانسور حتال البيرو ديالو و سدو عليهوم تما...
عذراء: واش مشكلة الى سميتي تحطات فالصيحة؟انا راه ماكنتش متوقعة هادشي اصلا و عمرني شفت راسي فوق خدمتي
قوس ضار لعندها:انا لي عارف اش تندير هنايا ماشي هوما
عذراء:واخا غير هو انا ماباغياش مشاكل فهاد الخدمة ولا يكرهوني على حاجة بحال هكا
قوس طلع حاجبو: لا غير يفكرو نيت يديرو هادشي الى ما تبعو روبين حتى هوما
عذراء بتاسمات بخجل:واش لهاد الدرجة تتفكر فيا صراحة شكرا حيت داير ليا قيمة وسط العاملين لخرين
قوس قرب منها و طلع ليها راسها:نسيتي راكي حبيبتي دابا و فالملكية ديالي و حتى واحد معندو الحق يدوي فيك
عذراء زادت حشمات و قلبها بدا تيضرب تحدر عندها قوس حتى باسها فشفاهها اما هي مابييناتش حتاشي مقاومة هادشي لي خلاه يزيد من تقبيلو ليها حتى دخلات معاه فالخط و بدات تتجاوب ولكن فواحد اللحظة حبسات و حاولات تبعد منو حيت متقدرش تزيد كتر من هكا...
قوس حل عينيه و رجع خطوة للوراء: متنسخاش بمذاق شفاهك
قوس بتاسم و مشا جلس فالبيرو ديالو: غدا غادي يتم اصدار الصيحة و قبل هادشي غادي توصلك واحد الحاجة
عذراء:اينا حاجة؟؟
قوس: مفاجأة حتى توصلك
عذراء: نتا راك سيد المفاجأت ههه
قوس: هه لقب جديد هدا
عذراء:عجبك؟
قوس: هه زوين
عذراء: انا غنتسنا هاد المفاجأة بفارغ الصبر
قوس:مزيان (حل لبيسي ديالو)
عذراء:نخليك الى غتخدم
قوس بتاسم: واخا
خرجات عذراء من البيرو و فطريقها تلاقات مع جلنار عاد خرجات من السانسور خنزرات فيها بشي عينين كلهوم سم شافت فيها عذراء ب و انا مالي و دازتها بحال شي حشرة.. ضغطات على السانسور و دخلات...جلنار مزييرة على يديها بغضب غتاكلها بعينيها و هي قدامها هابطة بالسانسور..فاش اختفت كملات طريقها للبيرو ديالها و جلسات تتوكل الله فهدا لي دخل هاد الموصيبة لشركة...
في حين انه هاد الشخص لي دخلها كان جالس فالبيرو ديالو مسالي خدمتو بابتسامة هاد العشاء لي غتنضمو الجدة سلافا حيا فوجهو شوية د الروح و عطاه امل انه غيتزوج بخطيبتو و الانسانة لي بغا طول حياتو حتى تسمع الدقان فالباب..عطا الاذن ل الطارق بالدخول و هي تم داخلة الصحفية نواهل انثى برج الميزان...
نواهل:صباح الخير موسيو
برناس طلع راسو:صباح الخير نواهل كاين شي جديد؟
نواهل حطات ليه الملف:توصلنا بأخبار جديدة على شركة Limae لي غتحل فرعها المغريبي فالسيمانة الجاية
برناس:هاد الشركة ديالاش؟؟
نواهل: شركة سويسرية ديال الأزياء
برناس:شهورا هادي باش تحلات ديال داك المغريبي السويسري لا؟
نواهل:ااه شركة Bens-Naht وي موسيو تفقدت اخر اخبارهوم لقيت انه غدا غيتقام حفل ل الصيحة ديالهوم الربيعية
برناس:نتي عارفاني انه ممتبعش اخبار الموضة هه ولكن رجال الأعمال لي مسييرين هاد الشركات بجوجهوم عندهوم بصمة كبيرة فعالم الأثرياء
نواهل:عارفة ا موسيو..خبر افتتاح شركة Limae تسرب غير ليوم و تنضن بزاف مزال مفراسهومش امتى بغيتينا نحطوه فالجريدة؟
برناس:حتى نشوف مع هاد السبق الصحفي لي خدام عليه و نرد عليك
نواهل:اوكي موسيو على كل(بتاسمات) انا فرحانة حيت وليتي بيخير
برناس بتاسم:شكراا يمكن ليك تفضلي الى ساليتي
نواهل حركات ليه راسها و خرجات هازة ملفها ترجع تكمل فخدمتها...
فالغرفة ديال بنان كانت هاد الأخيرة جالسة حاطة رجل على رجل مسحات وجهها من الماكياج و جابدة كتاب تتقرا فيه حتى دخلات عليها عذراء...
بنان:ايوا امضرا؟
عذراء سدات الباب و جلسات حداها:ياختي ماعرفت منين نبدا ليك
بنان سدات الكتاب:فينما عجبك
عذراء:عييط ليا و كانو تما المصممين و حتى ديك عود الند د جلنار
بنان:اكيد غتكون راها السكريتيرة ديالو
عذراء:ايوا تصدمت فاش دخلو العارضات لابسين لباس بشي الوان الصراحة الموديل و التصاميم واعرين غير هو الألوان شوية بحال التربية التشكيلية ولكن فاش قال ليا بلي تأنسبيراو من الفيستة الغاملة ديالي فرحت بزاف هههه
بنان:بطبيعة الحال غتفرحي عرفتي شنو هي يدير صيحة على قدها على قبلك انا راه شاكة واش ولا تيبغيك
عذراء حدرات راسها تتلعب بصباعها حشمانة:واش بصاح؟
بنان:راه المواقف و التعامل لي تيبيين الحب ماشي الهضرة ابدا متغركش الهضرة شوفي الأفعال و مستر قوس راه فات معاك حدود الجنتلمانية حتال الإعجاب و دابا راه غادي فخطى الحب
عذراء تتبتاسم:حتى انا تنحس بشي حاجة بحال هكاك يعني فاش تنكون معاه وليت تنفرح بزاف
بنان بتاسمات:ههه شحال زوين الحب المتبادل
عذراء:ااه فكرتيني و قال ليا حتى على واحد المفاجأة غتجيني اليوم
بنان:ياختي على المفاجأت مكرهتش تزيد تطور علاقتكوم و تولي رسمية
عذراء بهاد الهضرة ولات بحالا فييقاتها بنان من واحد الحلم وردي عاشتو...
بنان لاحظات سكوتها و طلعات ليها راسها بيديها:ولد عمك ياك؟
عذراء:راكي عارفة لي كاين
بنان تنهدات:خصك توقفي فوجههوم نتي ماشي لعبة و ماشي مونيكة باش يديرو فيها مابغاو
عذراء:عرفتي شنو هي نخرق عادات دامت سنين؟؟راه الفم ميجمعهاش و العقل ميتقبلهاش من بين السلالة كاملها و العائلة اجمعها نجي انا وسط منهوم و نعارض هادشي؟
بنان:ممكن تكوني نتي سبب توقف هاد الظلم فحق الأجيال القادمة!
عذراء:انا خايفة بزااف مابغييتش نفقد قوووس و فنفس الوقت محااملااش زواجي من برناااس
بنان:معروف فالحب انه غتدير المستحيل على قبل حبيبك و دابا نوضي نمشيو نتغداو راني كنت غير تنتسنا فيك
عذراء شافت فيها بحزن و ناضت معاها يتغداو و فراسها تتقول كيفاش غتواجه عائلتها و توقف زواجها...
فنفس الوقت فحمام النساء فالطابق الخاص ديال لي مايكاب ارتيستس كانت دانيا بوحدها هازة تيليفونها تدوي فيه...
دانيا بتوتر:معرفتش شنو ندير دابا ا مادموزيل
فسويسرا و فلبالكون ديال غرفة روبين كانت هاد الأخيرة تطل على لاتيراس و الخضورية ديالو و تيليفونها عند ودنها....
روبين:كيفاش قشعوك واش نتي حمقة؟؟حتى وحدة فيهوم معمرها شافتك معايا!
دانيا:ولكن العارضة بنان هدداتني و ميمكنش يجي داك التهديد غير هكاك و قالتها ديريكت قالت انا الجاسوسة ديالك
روبين خنزرات:افففف من هاديك لفعة تضرب غير من التحت غتكون شكات فيك و بحثات فالأمر عندها مصادرها الخاصة
دانيا: و شغندير دابا انا؟
روبين:مادام هدداتك غير نساحبي مابغيتهاش تآديك هاديك مافقلبها لا رحمة ولا شفقة تقدر تخرج على خدمتك
دانيا خايفة:و هادشي لي مابغيتش ا مادموزيل
روبين:صافي نتي مهامتك تتسالي هنايا و نساي كاع لي قلتو ليك غنشوف شخص اخور يكمل على لي بديتيه
دانيا بتاسمات براحة:شكرا مادموزيل
روبين:وصلات عندكوم ساندي ليوم ياك؟
دانيا:اه علاش؟
روبين:لا والو غير بغيت نتأكد من الخبر و صافي
دانيا:ياكما؟
روبين:لا لا هاديك معندي مندير بيها اصلا نهار تبيين شي نية ديال التقرب من قوس ديك الساعة نزيدها فلاليست
دانيا:ههه تيبقاو فيا مستر قوس واخا يطيرو و يهبطو نتي لي غيتزوج نتي لي خصو يتزوج بيها اصلا حسب التقاليد و العادات
روبين بتاسمات بثقة:اكيد انا لي كاينة و مغتكون حتى وحدة! دابا نخليك عندي ميدار
قطعات عليها روبين و طلعات راسها فالسما بعجرفة تتفكر فبعدها عن قوس و ديك البرهوشة لي خلات تتلوا عليه...
روبين:غير بلاتي نتي لي غنقابل حتى نمحيك من حياتو...
بعدما دازت العشية فخدمة عذراء كانت هاد الأخيرة مع بنان فغرفتها تيدويو حتى تسمع الدقان فالبيت..ناضت بنان حتى حلات و هي تلقا واحد العامل من عمال الشركة...
عذراء:ااه تماما و من انكوم توأم تيبان ليا نتوما من برج الجوزاء ياكي ههه
البنت الثانية:اكييد انا رنم و هادي أختي التوأم نغم و بجوجنا من برج الجوزاء
رمز برج الجوزاء هو هدا "♊" و المواليد ديالو من 21 ماي الى 21يونيو.
عذراء:واش بصاح ديك قضية انه صحاب برجكوم كلهوم توام؟
نغم:وي هادشي صحيح
عذراء:ياااه سبحاان الله دابا باك عندو توأم ديالو لي هو عمك و مك حتى هي عندها توأمها لي هي خالتك خوتكوم حتى هوما كل واحد غيكون عندو توأمو ههه ناري راه بزاف
رنم:ههه دمك خفيف ميس
نغم:و نتوما شنو هي العادة ديالكوم؟ تيعجبني نتعرف على ابراج خرى
عذراء:احم اينا عادة؟
رنم:نغم قصدها شنو لي تيمييزكوم نتوما بحال دابا حنا توأم و نتوما؟
نغم:مستر قوس قال لينا نجيبوك تختاري اينا فستان من فساتين الصيحة الربيعية لي عجبك
عذراء:راه قلت ليه بلي كاملين زوينين
رنم:لا مفهمتيش هو بغاك تختاري واحد فيهوم لراسك
عذراء بدهشة:كيفاش لراسي؟؟
نغم:واش مفراسك والو؟
عذراء:شنو؟؟
نغم:راه غدا كاين حفل إطلاق الصيحة الربيعية للشركة و مستر قوس بغاك تختاري واحد فيهوم باش تلبسيه فهاد الحفل
رنم:و راكي زعمة الراعية لهاد الصيحة
عذراء مافاهمة والو حاسة بكلامهوم كبير عليها كيفاش هي الراعية و لكن هاد قضية تختار فستان شحال فرحاتها...
نغم:ميس؟؟؟
عذراء:اا اه سمحي ليا كنت ساهية واخا غنختار
ضارت تتشوف فالفساتين كانو أغلبيتهوم معرين ولا مفتوقين عند الرجلين و هدا ماشي ستايل لباسها متتبغيش تعري لحمها بطريقة فاضحة ولكن فستان واحد لي قدر يجدبها و جاها مناسب لمعاييرها هو لي اشارت لجيهتو...
رنم:متأكدة بلي هدا؟
عذراء:اه متأكدة
نغم:ذوقك بسيط ولكن فنفس الوقت زوين
عذراء:شكرا
رنم:اجي معانا لغرفة التبديل نلبسوه ليك و نقادوه على جسمك
مشات معاهوم عذراء للغرفة حييدات حوايجها و لبساتو..خرجات لعندهوم و بداو خدامين عليها بجوج تيعبرو و يقادو و يرقعو حتى سالاو جابوه ليها هو هاداك على جسمها...
نغم:جاك زويين
رنم:حتى اللون جا مع عينيك
عذراء مبتسمة:شكراا ليكوم
نغم:يمكن ليك تحييديه دابا ا ميس باش نجمعو و نقادوه ليك
مشات تاني معاهوم حتى حيداتو و لبسات حوايجها...
شوية تمات داخلة واحد المرأة كبيرة شوية فالعمر لابسة صايا حد الركبة مع قاميجة...
المرأة تنهدات:اوف منكوم خصكوم ديما تحشموني مع الناس!!
نغم:عندك جلسة تصوير لبسي الفستان دغيا الى سمحتي
عذراء بدهشة:جلسة تصوير؟؟
رنم:ااه تفضلي نلبسك دغيا
عذراء حبساتها بيديها:لا لا شكرا انا نلبس راسي
دخلات عذراء تاني حتى لبسات الفستان و خرجات لعندهوم...
المرأة:تفضلي معايا انسة و نتوما تبعوني تشوفو الى غيكونو شي تعديلات فالفستان بخصوص التصوير
نغم/رنم:اوكي مدام
مشات معاهوم عذراء حتى هبطو فالسانسور لطابق التصوير ولات دابا حافظاه اصلا من كترة خدمتها فيه مع بنان..حلات المرأة واحد الباب و هي تصدم عذراء فاش شافت مكان التصوير كان عاااامر بالربيع و الالات ديال التصوير مع المصورين طبعا...
المرأة:تفضلي معايا انسة لمكان المايكاب
مشات معاها عذراء و هي تلقا واحد المايكاب ارتيست عمرها شافتها و باينة عليها گاورية و بابتسامة شييرات ليها لعند الكرسي باش تجلس تقاد ليها..عذراء جلسات و طلعات فيها راسها:انا نقاد لراسي شكرا
البنت بالألمانية:مفهمتش؟
عذراء مقشبلات والو و هي تجاوبها بالإنجليزية:قلت ليك انا نقاد لراسي
المرأة حركات راسها لهاديك باش تبدا خدمتها و خرجات من تما...
عذراء:اينا لووك غادي تديري ليا؟
البنت شافت فيها من المرايا:غنضيف لمسة صيفية على عينيك باش تعطي إضاءة للووك خصوصا و انه فصل الربيع تيدوز دغيا و تيتبعو الصيف
عذراء:هي اللون الأصفر؟؟
البنت جبدات الباليت من المجر بابتسامة:راكي ذواقة
عذراء بتاسمات:ههه شنو سميتك؟؟
البنت:سميتي نورا من برج الحمل و نتي؟
عذراء:انا عذراء من برج العذراء متشرفين
نورا:ادرا هه اسمك صعيب شوية فالنطق
عذراء:فكريتيني بمستر فابيو هههه
نورا:ااه وي حيت بجوجنا سويسريين صعيب نطقو داك الحرف
عذراء:اه بصاح عندي صديق برجو الحمل
نورا تتستف المكياج فوق الكوافوز:ااه مزيان الى جات المناسبة نتعارفو
عذراء:ويي ضرييف هه
نورا هزات ليلانجيت الخاصين بالبشرة و بدات تحييد لعذراء اي بقايا مكياج فووجهها و بدات تتقاد ليها المايكاب حتى سالات و هي تجي بنت خرى قادات ليها شعرها جمعات ليها شوية من هاد الجنب و شوية من لاخور و طلعاتهوم للفوق..عذراء وجدات و داوها لمكان التصوير...
المرأة:زويينة انسة
عذراء بابتسامة:شكرا مدام
المرأة داتها حتى جلساتها فوق واحد الفوتوي غوز ديال شخص واحد و من موراه و حداه كانت واحد الكومة ديال الربيع و الورد...
المرأة بعدات و جات بنت خرى شدات لعذراء يديها تتقاد ليها فلابوز..عذراء مخلية ليها المجال و المشكلة ماعارفاش اصلا لاش غتصور...
المصور:كلشي هو هاداك؟؟
البنت ضارت عندو:وي مستر
المصور شاف فعذراء:متحركيش ا ميس
عذراء مبلوكية بحال شي تمثال تتحاول متدير لا هاه ولا هاه تبقى كيفما خلاتها و تما بداو الفلاشات و التصاور رجعات البنت تاني قادات ليها بوز خرى و نفس الشيء التصاور فاش سالات هاد البوز نوضاتها لقنت اخور تما فيه ثرية كبيرة ذهبية معلقة و الحيوط عامرين بالربيع بقاو عليها بالتصاور تما حتى دارت 5 د ليبوز و كل بوز تياخدو عليها بزاف د التصاور باش يختارو وحدة فالأخير اما الكوافورة دوخوها بالفلاش ولات بحالا ضارباها الشمس...
المرأة:صافي ا ميس يمكن ليك تفضلي الى بغيتي
عذراء ناضت دايخة:اوكي مدام
نغم و رنم جاو لعندها شدوها:واقيلة اول مرة تصوري فشي جلسة تصويرية
عذراء:وايه دختتتت
داوها لعند نورا لي مسحات ليها داك المكياج...
نورا:غدا غنقاد ليك نفس اللوك على حساب الحفل
عذراء:واخا شكراا على كل(بتاسمات مادة يديها)تشرفت بمعرفتك
نورا:حتى انا نتمنا نتلاقاو مرة خرى
عذراء:اكييد
مشات عذراء مع نغم و رنم حتى حييدو ليها الفستان..لبسات حوايجها و ودعاتهوم راجعة لعند بنان...
فالصالون ديال رفيف كانت هاد الأخيرة جالسة بوحدها تتسنا فالكليان يجيو هاد العشية حتى سمعات شي واحد داخل تلفتات و هي تصدم...
سنمار:السلام حبيبة
رفيف:عليكم السلام شنو تدير هنا؟
سنمار:هكا تتقولي ليا؟واش نتي باقة حالة هاد لگاراج؟
سنمار:نتي عارفة مزيان قضية الوراق و طلع و هبط زائد حياتنا لي تنوجد ليها تما
رفيف:واش نيت تتوجد لشي حاجة ا سنمار ولا تتفلا عليا؟
سنمار:كيفاش تنتفلا عليك؟حنا عاجلا ام اجلا غنتزوجو غنتزوجو ههه
رفيف:بغيت زواجنا يكون ناجح و عن حب ماشي حيت مخطوبين من صغرنا!
سنمار:غادي يكون هادشي خصك غير تصبري(قرب منها)
رفيف رجعات للور:متقربش مني خليك بعيد
سنمار عقد حجبانو:شنو تتقولي راني خطيبك زعمة و من حقي نتقرب منك!
رفيف:ضرب ليا اللاكط ديالي و ديك الساعة دير لي يعجبك ولا غادي تهرب تاني؟؟؟
سنمار:مانقدرش فهاد الضروف انا معولتش على هادشي
رفيف عصبها:واش لي تيقول تنبغيك لخطيبتو و غندير و نفعل على قبلك لي تيدير بحال هكدا!
سنمار:مالي شنو درت كاع؟
رفيف:نتا عارف مزيااان بلي طاال الزماان ولا قصاار غنتزوجو غنتزوجوو يعني نتاا مازرباان فين مفجج ليك فديك فرنسا و مخليني انا هنا خدامة على راسي و مخشية تحت با و مي و خوتي فاش مشيت من شحال هادي و حييدت عليهوم ثقلي حتى انا ولكن نتا متتفهمش لراسك خص ديما الشيخة رفيف طبل و تزغرت لسي سنمار و تغني ليه واحد الأغنية كل نهار "وراقي..زواجي..داري..." الخ انا راه ماشي حتى بديتت تنعيااا انا رااه عيييت واش تتفهم عييييت الى ماباغيش تزوج بيا سير قولها للجدة سلافا تفاهم مع باك و با
سنمار:هههههه فين عمر تفارقو المخطوبين فعائلتنا؟ نهاية وحدة لي عندهوم و هي الزواج
رفيف:هوما ماشي حنااا اما اناا شفتي الله ينعلبو هاد الزواج الى غندووز من هاد الدل عاد نوصل ليه
سنمار خنزر فيها:بديتي تتفوتي حدودك معايا ا رفيف!
رفيف:قلت ليك غير ليكاين نتا لي ماباغيش تفهم و دابا خرج عليا من صالوني و رجع لديك فرنسا ديالك
سنمار قرب منها حتى شدها من فكها و خنزر:شفت لسااانك طوااال شنو يتصحااب ليك اناا
رفيف طلعات فيه عينيها و بيديها بدات تدفع فيه:بعد منيي طللق منيي
سنمار يالاه غيدوي و هو يتسمع بلي شي واحد داخل..دفعاتو رفيف بالجهد و هي تلقا عذراء مبلقة عينيها فيهوم...
عذراء:سدو بعدا غير الباب ردو غير خامية واه بالعلالي
سنمار بعد منها و تم غادي خارج:السلام و بسلامة ا عذراء
داز من حداها مخليها تطلع و تهبط فيه من اللور فاش سالات ضارت عند رفيف لي واقفة تتقاد فشعرها...
عذراء:مالكي معاه تاني صداعكوم لي غادي و لي جاي واش دا خبارو
رفيف جلسات:عييت ا عذراء انا ماشي مدلولة باش نبقا نتسنا فيه يتزوج بيااا صافي عييت
عذراء حطات صاكها و جلسات حداها:تهدني اختي شنو كاين؟؟
رفيف:والو نفس السيرة ديال كل مرة الزواج و الوراق و التعطال
عذراء:معرفتش اش غنقول ليك و الله اصلا عاودات ليا رواء لبلان فتيلي لبارح و حتى هي ممرتاحاش ليه
رفيف:مابقا ليا والو و نوصل لواحد المرحلة مغنبقاش باغياه واخا يقاد الوراق واخا يوجد العرس صااافي واش انا طلااابة لهلا يحيييه كون كان عندي الاختيار كون جبت سيد سيااادووو و هو لي يرغبنيي و يطلبنييي لزوااج تفووو(غرغرو عينيها) ماالي داباا تنبكييي علااااش اش هااد الضعف
عذراء:اشمن ضعف نتي انسانة قوية و هادشي خصو مايدير فيك والو
رفيف:ولكن راه بزاف تمنيت كون انقالبو الأدوار فراسك وليت دابا حاسة ببرناس لي نتي معلقاااه
عذراء خرجات فيها عينيها:كاين فرق نتوما باينين تتبغيو بعضياتكوم اما هاداك فين عمرني حتى قلت ليه شي حاجة
فالسونطر ديال المدينة كان رئال تيتمشا و بجنبو رسيل مشادين ليدين عاد تقهواو بجوج و خرجو يتمشاو شوية حتى دازو على واحد البوتيك ديال مستلزمات الدراري الصغار غير شافتو رسيل مشات تقابلات مع الزاج ديالو بعيونها لي تيلمعو بإعجاب..جا رئال موراها و ابتاسم:ماشي بكري شوية على هادشي؟
رسيل ضارت عندو:ا ااه ولكن حنا غنتزوجو غنتزوجو من الأحسن نوجدو ليه من دابا
رئال:هه راه العرس لي خصو يوجد دابا هادشي حتال مورا الزواج و نفكرو فيه
رسيل جمعات الكسوة و حطاتها فصاكها:بغيت بنية ان شاء الله ههه
رئال:رسيل نتي باقة صغيرة واش غتقدري على الحمل؟
رسيل بتوتر:هيهي كيفاش نقدر؟ر راه 18عام كبيرة نسيتي هه ماما قالت ليا ولدات برناس فاش كانت عندها 14عام و تتقول ليا نتا انا صغيرة هه
رئال شاف فيها باستغراب:مورا عرسنا و نخططو لولادنا ان شاء الله صافي؟
رسيل عطاتو ابتسامة صفرة و شافت قدامها ساهية...
فالليل و بعدما تعشاو عائلة عذراء و كل واحد سد عليه فبيتو جبدات عذراء تيليفونها و دوزات لابيل ل بنان...
بنان:الوو؟
عذراء:سمحي ليا الى صونيت عليك فهاد لوقيتة
بنان:لا هانية مكنت تندير والو اصلا ياك لباس؟
عذراء:معرفتيش اينا وقيتة غتقام الحفلة؟
بنان:غتبدا مع 23:00 علاش؟؟
عذراء:واهيا ناري المهم غدا لي هو نفس نهار الحفلة عارضينا عائلة داك المزمر لي لاصقني
بنان:ااه خطيبك..اهاه؟
عذراء:كيفاش اصاحبتي اهاه؟ عارضينااا للعشااا
بنان:اويلي و اينا وقيتة عارضينكوم؟
عذراء شافت فرفيف لي متكية فوق ناموسيتها:امتى ا رفيف؟
رفيف: 21:00
عذراء:قالت ليا 21:00
بنان:مشكلة صافي بقات فلي غيجي من مورا العشا يعني الجماعة و الهضرة الخ...
عذراء:راه حتى ختي غنجيبها معايا غير باش تعرفي
بنان تتفكر:صبري نقطع نفكر فالبلان و نصوني عليك
عذراء:واخا و سمحي ليا ديما مصدعاك معايا
بنان:هانية هانية هادشي جاري بيه العمل(قطعات)
رفيف:اش قالت ليك؟
عذراء:قطعات تفكر فشي بلان و غتصوني عليا
رفيف:واخا
دازو دقائق و هي تعاود تصوني عليها...
عذراء جاوبات:امضرا؟؟
بنان:سمعيني مزيان قولي لختك توجد حوايجها و مكياجها فصاكها لي غادي تجي بيهوم للحفلة و بالنسبة ليك نتي كلشي كاين هنا لا الفستان لا المايكاب ارتيست نورا ها حنا حييدنا هادشي و نتوما فالعشا غادي نعطيكوم ساعة يعني قلتي كاين ف 21:00 غنعطيكوم حتال 22:00 ولا كاع 22:30 غادي نوصي الشيفور ديالي يجيبكوم من داركوم حتى تخلي ليا العنوان فميساج و هو لي غادي يجيبكوم
عذراء:ولكن و الى تعطلنا عند هادوك؟
بنان:ديك الساعة غادي ندوزو للخطة2 و هي وحدة فيكوم تمثل بلي مريضة ولا شي لعبة لي تخليهوم يرجعوها لدار
عذراء:لا راني حاسة بإبليس مقنت عندي فشي ركينة فهاد البيت و تيصفق ليك ههه
بنان:قولي ليه يصفق غير بشوية غيفييق ليا الكلييب ديالي
عذراء:ههههه وينو عندك كلاب
بنان:من شحال هادي حتى نجيبك شي نهار لداري انا و انطون ماشي للشقة لي بتتي فيها معايا داك النهار و شوفيهوم
عذراء:ان شاء الله شكرا بزاف رتاحيت دابا و غنرييح معايا ختي
بنان:مابيناتناش يالاه تشاو(قطعات)
رفيف:ايوا؟؟
عذراء نقزات عليها بفرحة:لقااات لينااا البلان
رفيف:وايلي؟؟؟
عاودات ليها عذراء كيف دايرة الخطة هادشي لي رييح حتى رفيف لي كانت هازة الهم حتى للمركوب و شكون غيوصلهوم و يرجعهوم..نعسو البنات براحة و كل وحدة متشوقة لهاد الحفلة ناسيين انه كاينين امور جدية غادي تناقش فداك العشاء...
☀️فالغد ليه☀️
فاقت عذراء وجدات راسها لخدمتها و مشات في حين رفيف بقات ناعسة مغتحل لا صالون لا والو اللهم تنعس...
فالخدمة...
بنان:صباح الخير
عذراء حطات صاكها:صباح النور كيف صبحتي؟
بنان:لباس الحمد لله و نتي؟
عذراء جلسات حداها:بيخير ناري عرفتي كونما عطيتينا ديك الخطة كون الليل منعسوش على خاطري بالخلعة و التخمام هههه
قمر:راك غير تتعذبي فراسك و توهمي فيه الشخص لي نتي تتبغيه ماصالحش ليك و عندو خطيبتو و قريب يتزوج بيها شوفي ليك مع الصحفي قاسم هو من برج الجدي و شحال من مرة بيين اعجابو بيك احسن ليك من وهم من نسج مشاعرك
نواهل ماجاوباتهاش تيتسمع غير تقرقيب الكلافيي هادشي لي خلا قمر تخليها على خاطرها...
نواهل تتشوف فشاشة لبيسي بحزن:عارفة هادشي ولكن قلبي خداه العذراء...
فنفس الوقت هاد رجل برج العذراء جالس فلبيرو ديالو كلما تيتفكر العشاء لي غيتقام اليوم فدار واليديه بخصوص موعد زواجو هو و خطيبتو تيزيد يفرح و يبتاسم بوحدو..هاد الصباح غير الصباحات بالنسبة ليه باديه بنشاط و حيوية و تيتمنى انه تكون عذراء غير معصبة ولا مديرونجياها شي حاجة ماشي قصدات داك الكلام فحقو...
برناس:من بعد هاد العشاء ان شاء الله كلشي غادي يولي كيفما بغيت
داز النهار فخدمة عذراء جد عادي من غير قوس لي مدواش معاها ولا تشاوفو بحكم الحفل لي غيكون اليوم يعني مشغول...رجعات لدارهوم بكري و تغدات معاهوم و ضرباتها بنعسة حتى بدات تتفيق فيها لوليا مع 6 د العشية...
عذراء تتحل عينيها بشوية:ماما؟
لوليا:نوضي يا الخميرة ختك تتوجد باش نمشيو لعند خالتك دواني و عمك رجاح
عذراء ناضت تتحك شعرها:شحال هادي فالساعة بعدا؟؟
لوليا:8 هادي نوضي سربي
عذراء:أويليييي مايمكنش نكون نعست هاد المدة كاملها
ناضت عذراء تمشي تأكد حتى شافت الساعة لقاتها 18:30...
عذراء:واش مزال مغتحييدي هاد القاعيدة ا ماما
لوليا:شكري ربك و حمديه ملي لقيتي لي يفييقك سيري وجدي راسك
رجعات عذراء لبيتها تتقلب فالماريو اش غتلبس تاني حتى دخلات عليها رفيف...
رفيف:لبسي ديك الجلابة لي خييطتي فالعيد الكبير لي فات هي لي عندك تقليدية و تتحمر الوجه
عذراء:ااه حتى هدا نضر باش نحييدها عليا دغيا فاش نبدل
رفيف:صافي هانتي جبتيها هي هاديك
جبدات عذراء جلابتها و هي تفكر واحد الحاجة:ناري ا الموصيبة معنديش الصباط مانلبس مع الكسوة فالحفلة
رفيف:صوني على رواء تجيبو نتي وياها تتلبسو قد قد
عذراء مشات هزات تيليفونها قداش تيبان فيديها:ههه مزال مولفت هاد الحجم صبري نصوني عليها
دوزات عذراء لابيل و هي تجاوبها رواء لي كانت فالبوتيك د الحوايج النسائية لي خدامة فيه...
رواء:مالكي مصونية عليا فالخدمة؟
عذراء:لا سلام لا كلام ياربي السلامة اصلا ماعارفاكش خدامة اربي شي طالون ولا شي صباط د المناسبات محتاجاه
رواء:واش لمك قالو ليك انا هي قيسارية حد السوالم فينما تخصك شي حاجة تجي لعندي
عذراء:وا عتقيني بلا متخليني نبدا نحزر تاني
رواء تنهدات:اوف منك عندي واحد الصندالة ماشي بزاف باش شريتها حاطاها على حساب شي عراسية فالصيف
عذراء:هي انا لي غندشنها؟
رواء:نتي دشنتي الماريو ديالي كاملوو
عذراء:امتى غتسالي الخدمة؟
رواء:ديك جوايه 7
عذراء:جيبيهوم ليا راني محتاجاهوم
رواء:واخا صافي
عذراء:شكرا بزاااف طهلاي(قطعات)
رفيف:ايوا ها مشكل الصباط فكيناه خصها غير تجيبو ليك فالوقت
عذراء:متخافيش باقي الوقت
رفيف:مهم تيبان ليا كلشي هو هاداك زيدي نعاونو الواليدة راها من الصباح واقفة معرفتها اش تتصوب
عذراء:باينة داكشي لي تيديو زعماكين الصواب و داكشي
داز الوقت و وصلات 20:45 شدو جلوان و لوليا و بناتهوم الطريق لعند عائلة برناس اما ضرغام و رئال خدامين اليوم بالليل مقدروش يمشيو...
فدار عائلة برناس...
كانت دواني واقفة بواحد القفطان و مقادة زيفها هازة مبيخرة فيديها:ديااالااا هاكي دوزي هادي على الكولواار سربي
ديالا جات تتجري:عطيها لرسيل ا ماما انا باقي خصني نلبس
دواني:راها تتلبس حتى هي واش تلبسو ليا دقة وحدة سربي ضروك يجيو
شداتها من عندها دغيا و دارت لي قالتو ليها...فالفوق فغرفة برناس كان هاد الأخير لابس تيشورت بيض مدخلو فسروال فصالة گري مع سبرديلة بيضة..مدوش و معطر بعطرو الرجولي و واقف قدام المراية تيشوف واش كلشي هو هاداك حتى سمع الهضرة بالجهد فلتحت عرفهوم وصلو بتاسم لإنعكاسو فالمرايا و قاد خصلات من شعرو و هبط لعندهوم...
دواني تتسلم و تعنق:مرحبا بيكوم زارتنا البركة مرحبا بيكوم
لوليا:ربي خليك ا الحبيبة عارفة ليكاين
رجاح:مرحبا بيكوم اخويا الدار داركوم دخلو
جلوان:الله يبارك فيك
دخلو لبيت الضياف لي كانت مفرشة بصالون مغريبي متول لقاو الجدة سلافا جالسة فالوسط عند السرجم بحال شي سلطانة لابسة جلابة مخدومة بالراندا و جامعة شعرها الشايب على شكل سفنجة و مزيينة راسها بذهبها...
جلوان مشا حتى باس راسها و يديها و نفس الشيء مع لوليا...
عذراء غير سمعات صوتو حدرات راسها ماباغياش تشوف كمارتو سلم عليهوم كاملين جا حتال عندها مدات ليه يديها دغيا و هرباتها دخلات دواني و تبعوها بناتها و جلسو كاملين...
سلافا:ايوا كلشي تجمع هنايا دابا نقدر ندوي..بغيتكوم تعرفو انه ان شاء الله من مورا عرس رسيل و رئال غادي نبداو فإجراءات عرس عذراء و برناس
عذراء قلبها غيوقف فبلاصتو و ودنيها صماكو لا لا هادو ناويينها نيت بصاح!!!...
لوليا:احم ولكن ا مي سلافا قاصحة شوية عاد غنزوجو ولدنا و بنتهوم و نيشان موراهوم عرس ولادنا لخرين راكي عارفة المصاريف و الحالة المادية كيف دايرة
برناس نقز:متهزيش الهم ا خالتي انا قاد على بنتكوم و لي خصاتها ولا خصات العرس نشريها ليها
عذراء باقة حادرة راسها و يديها تيترعدو هضرتهوم تدوز على ودنيها بحال تشاش مابغات تسمع حتى كلمة...
رفيف شافت فيها بآسى و رجعات شافت فسلافا...
سلافا:الولد قاد بهادشي ا لوليا داكشي علاش انا تاخدت هاد القرار
لوليا سكتات مابقات عرفات ماتقول فرصة وحدة لي جاتها تعطل عرس بنتها راها فشلات بسبب داك الفرناسي...
سلافا:ايوا اش قلتو ا ولادي؟
جلوان:نتي عارفة بلي لي قلتيها لي كاينة
رجاح:نفس هضرة خويا جلوان
سلافا بتاسمات:ايوا مزيان شي سيمانات لي بقاو لعرس رئال و رسيل غنتلاهاو مع عرسهوم حتال من موراه و نفكرو فديال عذراء و برناس...
برناس فرح:ان شاء الله ا جدة
عذراء وسط منهوم بحال شي مونيكة متتحرك متادوي راسها هابط و يديها تيتفتفو تتسمع فهضرتهوم على زواجها بحالا ماشي هي لي غتزوج جالسة معاهوم بحالا مكايناش تيقررو فبلاصتها و يفصلو و يخييطو..هي مجرد دمية تيلعبو بيها كيفما بغاو الوزراء محررين عليها عيشتها بسبب السلطة ديالهوم و جداتها قاجاها بهاد الخطوبة من ولادتها..شافت فالأرض ساهية حتى بدات الرؤية تضبب قدام عينيها لي عمرو بالدموع و بداو يطيحو على ركابيها وحدة مورا لوخرا...
شافت رفيف فمها لي عطاتها الموافقة براسها و مشات معاها ناضت حتى رسيل تبعاتهوم مخليين غير الناس لكبار و برناس تما...
فالكوزينة...
دواني:غير حطي من يدك ا بنيتي بقا ليا غير نزوق بالبرقوق و صافي
عذراء حابسة دموعها باغية غير تدير شي حاجة باش تنسا:لا غير خليني حشومة باغية نعاونك
دواني حطات يديها على ضهر عذراء بقلق:بنتي مالكي؟
عذراء طلعات فيها راسها دغيا و حركاتو:لا والو لا غنمشي لطواليت و نرجع
مشات عذراء دغيا لطواليت و سدات عليها مخلية دواني في استغراب...
رسيل طلات عليها:ماما غنمشيو لبيتي انا و رفيف و ديالا فين عذراء؟
دواني:عاد خرجات من هنا مشات لطواليت
رسيل:واخا الى رجعات قولي ليها تطلع عندنا
مشاو رسيل و ديالا جرو رفيف لفوق للبيت ديال وحدة فيهوم و سدو عليهوم...
ديالا تدفع فيها:وااش بصااح لي سمعتوو سنماار رجع؟؟
رفيف عقدات حجبانها:مالقيتي باش تفكريني زعمة؟؟
رسيل:وا خطيبك ا صاحبتي و غتزوجو مالكي؟
رفيف:اشمن غنتزوجو الله يهديك تصوبو بعدا وراقي باش يكون شي زواج؟
ديالا:علاش ماديريش بحال بنت خالتي ميادة مع خطيبها لي ساكن ف اسبانيا دار ليها اللاكط و تيجي شحال من مرة فالعام يزورها حتى طلعها لعندو و هاهوماك دابا ولدات معاه 3
رفيف:وا راه المشكلة سنمار ماباغيش حتى هاد الفكرة
رسيل:و مالو على حالتو؟؟
رفيف:انا مابقيت عارفة والو و من الأحسن نسدو هاد الموضوع بليز
تسمع الباب تحل و هي تدخل عذراء...
ديالا:مراات خوويا جاات ههههه
رسيل:ههه ويلي ويلي على لي غيتزوج مورايا
عذراء تتبتاسم ليهوم بتوتر:ن نتوما هنا
رفيف جلسات فوق الناموسية:ايوا فين وصلتي فالحفاضة ا ديالا؟
ديالا:هاني تنعاون بالسوايع داك المرض د رامي واقف ليا فعودي
عذراء جلسات حدا رفيف...
رفيف:ماركة وحدة الله يحفظ
رسيل:اه هو و سنمار ههههه ايوا راه خوت
عذراء:قولو ليا واش مطولين فهاد العشا؟
ديالا باستغراب:و مالك زربانة اختي؟
رفيف تدخلات:غير راها خدامة غدا مع الصباح و تتنعس بكري
رسيل:اه بصاح معرفتش ازين راك عارفة العراضة كيف دايرة ههه
بقاو لبنات تيدويو من غير عذراء لي تتشارك مرة مرة و تضربها بصقلة تتفكر فحريرتها حتى سمعو دواني تتعيط هبطو لبيت الضياف لقاو العشاء محطوط مشات ديالا حتى جابت المغسل و غسلو يديهوم من بعد تجمعو على ديك الطبلة تياكلو من غير عذراء لي كلات دغمة و رجعات للور حابسة دموعها لا يهبطو...
فنفس الوقت كانت طونوبيلة كحلة مبلاصية فدربهوم..الزاج فيمي و مع الليل متيبانش واش فيها شي حد ولا لا..تسمع هاتف السائق تيصوني..هزو و جاوب...
بنان لي كانت لابسة و واجدة:جاو ولا مزال؟
السائق:مزال ا مدام باقي تنتسنا فيهوم
بنان: 22:00 هادي اوف
السائق:شنو ندير ا مدام؟
بنان:تسنا فيهوم حتى يجيو الى جاو علمني
السائق:اوكي مدام...
بعدما كلاو العائلة و تجمعات الطبلة بداو البنات تيشوفو فبعضياتهوم خايفين يزيدو يطولو حتى سمعو...
لوليا:ايوا الله يقبل و الله يخلف عليكوم
دواني:بصحتك ا الحبيبة
لوليا:المرة الجاية دوزو عندنا ان شاء الله
جلوان شاف فيها و فهم هاد الدخلة ديال اش و هو يشوف فخوه:الله يخلف اخويا الوقيتة هادي فين نمشيو لدار
دواني:فين زربانيين بقاو مزاال
لوليا:ربي خليك ولكن الليل هدا مرة خرى ان شاء الله
سلافا:هاد ليامات غندوزو انا و دواني نتجمعو عندك بخصوص عرس رئال و رسيل ا لوليا غنعلمك فأبيل ان شاء الله
لوليا ناضت:واخا مي
تبعها جلوان و ناضو لخرين كاملين تيتسالمو حتى وصلوهوم للباب و ودعوهوم تحت انضار برناس لي تيشوف فزوجتو المستقبلية غادية حتى سدو الباب و طلع لبيتو...
في حين عذراء و البقية طلعو فالطونوبيلة و رجعو لدارهوم...
فالدار...
لوليا داخلة تتحيد فجلابتها:بغيت غير امتى نحط راسي على المخدة
جلوان سبقها:متنسايش تطفي الضواو
عذراء و رفيف:تصبحو على خير
لوليا:صافي غتنعسو؟
عذراء:راني خدامة بكري ا ماما
رفيف:انا عييت
لوليا:واخا تصبحو على خير
طلعو لبنات سدو عليهوم فبيتهوم..رفيف نقزات هزات صاكها و عذراء خشات فيه الصنيديلة لي جابت ليها رواء...
رفيف:غنديرو دابا نتسناو شوية ياكي؟
عذراء عضات فصبعها:صبري نصوني على بنان
جبدات عذراء تيليفونها و صونات عليها...
بنان:الو فينك؟؟
عذراء:انا فالدار دابا صبري عليا شوية حيت عاد دخلنا و نخرجو
بنان:الشيفور ديالي راه مبلاصي فدربكوم طونوبيلة كحلة زاجها فيمي
عذراء:وي بانت ليا طونوبيلة جديدة فالدرب صافي شوية و نجيو
بنان:واخاا(قطعات)
رفيف بلعات ريقها:نغامرو؟
عذراء بخوف:نتوكلو على الله
حلات رفيف لبوانيي ديال باب لبيت بشوييية و طلات لقات الدنيا مظلمة كاع ضواو الدار مطفيين..لاحت رجليها و تبعاتها عذراء لي سدات باب البيت بشوية و هبطو فالدروج تيتسلتو شاعلين البيل ديال تيلي حتى هبطو لتحت...
عذراء تتوشوش:هزي الساروت
رفيف:راه عندي ديالي هزيه نتي للإحتياط
عذراء هزات الساروت خباتو فالصاك:بسم الله
حطات يديها على لبوانيي و بشويييية ضغطات عليه حتى تحل..خرجات راسها حتى طلات على الدرب مكاين حد و حتى لي كاينين بعاد خرجات دغيا و تبعاتها رفيف لي سدات الباب بشوية و بالزربة مشاو لعند الشيفور لي كان عاد غيهبط يحل ليهوم الباب ساعة زربو عليه و حلوها بحالا غيگريسيوه..تلاحو بجوجات فاللور تيلهثو بالخوف ممصدقينش انه داروها...
السائق جبد التيلي ديالو و ضور النمرة ل بنان:مدام راه معايا دابا
بنان بتاسمات:مزيان جيبهوم بأقصى سرعة
السائق:اوكي مدام
ديمارا بيهوم السائق مخلي وحدة تشوف فلوخرا حتى دوات رفيف...
رفيف:حتى نتي حاولي تنساي داك الزواج دابا عقلي على اش قلتي ليا
عذراء شافت فيها بحزن:واش تضني غيكون شي حل؟
رفيف:تنتمنى توقع شي حاجة لي تعكس هادشي حتى من الواليدة حاولات تعطلو ولكن شفتي اش وقع
عذراء:مغنكون عارفة مندير كونما كنتو فصفي كون كان كلشي ضدي كنت غنتسطا
رفيف حطات يديها على يدها:نساي دابا واخا؟ بغينا نساو بجوج
عذراء:واخا غنحاول...
بعد طريق طويلة شوية و اخيرا وصلو...بلاصات الطونوبيلة قدام الشركة و هبطو منها تيزربو فخطواتهوم بعدما شكرو السائق...
عذراء:اجي من هنا كاين السانسور
رفيف تابعاها و تتمنضر فالتواسع و الفخامة فين تبان جوج دلمليون لي تخلصاتها ختها فالشهرية هادو باينين شابعين فلوس..طلعو فالسانسور حتال طابق العارضات لي كان عااااامر كانو لمادلز غادياات جاايااات بزز باش قدرات تدوز عذراء و ختها لعند بنان هاد الأخيرة لي حلات ليهوم الباب...
عذراء:و اخيراااا جيييت
بنان:واخا انا تايقة فمخططي ولكن كنت خايفة عليك
عذراء:شكرااا بزااف و الله
بنان طلات على رفيف لي واقفة تتمنضر فالغرفة:هادي هي ختك
رفيف قفزات و رجعات خطوة للوراء:تبارك الله قداااش طويييلة
بنان:ههه ايوا راني عارضة انا بنان الحياني العارضة الثانية فشركة Bens-Naht (مدات ليها يديها)
تسمع الدقان فالباب و هي تدخل نورا مع البنت لي قادات لعذراء شعرها..تسالمو و بدات ليها فالخدمة هي تتقاد فالمايكاب و لوخرا تتجبد فشعر عذراء و تقاد فيه هادشي كاملو تحت انضار بنان لي واقفة تتسنا فيهوم...بعد مدة قليلة خرجات رفيف من الغرفة و بدا تيتسمع صوت تقرقيب طالونها فالأرض طلعات عذراء راسها و هي تصدم فختها لي لابسة كسوة فالحمر طويلة يديها طايحين على كتيفاتها و مفتوقة حتال الفخض و فيديها هازة صوييك المناسبات فضي مع أكسسوارت فضية مزينة بيهوم ودنيها و يديها اما بالنسبة لوجهها كانت دايرة مايكاب مخلط بين الثقيل و السامبل مع عكر ماط فالقهوي...
بنان:اول حاجة باش تبييني لختك انك فصفها(قربات من ودنيها)هي تقبلي مستر قوس فحياتها
رفيف طلعات فيها راسها و بنان بعدات بابتسامة هاد الإبتسامة لي خلات رفيف تحس فواحد اللحظة بخوف من جيهتها...
بنان:تفضلي معايا باقي تيتسناني راجلي فلتحت...
وقف السانسور فالطابق الخاص بقوس و خرجات منو عذراء غادية نيشان قاصدة البيرو ديالو تحت انضار جلنار لي جالسة فلبيرو ديالها بواحد اللبسة لا علاقة فالأزرق و شعرها بحالا لاحساه بقرة دازتها عذراء بحالا مكايناش و هي تمشي تدق فلبيرو ديال قوس هاد الأخير لي قال ليها تفضل...
عذراء دخلات و سدات الباب موراها في حين قوس كان واقف تيشوف فالشرجم حتى سمع الباب تسد و هو يضور غير شافها بتاسم بإعجاب شحال تتبان زوينة...
قوس: My Beauty (جمالي)
عذراء حشمات:ع عجبك الفستان؟
قوس قرب منها حتى وقف قدامها:نتي لي عاجباني اكتر
عذراء زادت حشمات و حدرات راسها حتى حسات بيه طلعو ليها بصباعو:معرفتيش علاش عييطت عليك؟
عذراء:ل لا
قوس حيد صباعو على ذقنها و شدها من يديها غادي بيها حتال للبيرو و باليد الثانية هز بواطة بلومارين متوسطة الحجم مسطحة فالموبرا و مدها ليها...
عذراء شداتها بيديها بتسائل:شنو هادي؟
قوس طلق من يدها:حليها
عذراء حلات البواطة و هوما يلمعو عينيها بإعجااب فاش شافت عقد من اللؤلؤ بطوينگاتو:وااااو زوينييين بزااااف
قوس:مناسبين لطلتك الربيعية
عذراء:ويي بزاااف شوف هادو بحال وريقات الربيع ههه
قوس هز العقد بين يديه و جا موراها حتى حلو ماحسات غير بيه تحط على عنقها..سدو و طبع قبلة ف ورا رقبتها هادشي لي خلاها تبورش و تنداهش حتى حساتو جا قدامها مرجع ليها شعرها لور حتى بان عنقها كاملو مزينو داك العقد اللؤلؤي الربيعي...
مشات حطات البواطة فوق البيرو و بدات تتقاد فالطوينگات فودنيها حتى سالات و جات قدامو مبتسمة:شكراا بزاف عجبوووني ههه
قوس تحنا و تقابل مع عينيها الخضرين: My Green Flower(زهرتي الخضراء)
عذراء حشمات و هو يشد ليها وجهها برقة حتى تحنا و باسها فشنايفها...
قوس تقابل مع وجهها:الحفل غيبدا واحد الشوية فاش نسالي مع رجال الأعمال لي غيحضرو ليه نجلسو مع بعضياتنا
عذراء طلعات فيه راسها:و واش عادي ماعندك حتى مشكل؟
قوس:اينا مشكل غيكون؟
عذراء:زعمة مول الشركة يجلس مع مايكاب ارتيست عادية؟
قوس:نتي حبيبتي و ديجا فراسك هادشي
عذراء عجبها الحال و فنفس الوقت مابغاتش تبيين:واخا
قوس تحنا حتى باسها مرة اخرى:استمتعي بوقتك
عذراء حركات ليه راسها ب اه و خرجات من عندو فرحانة بالعقد و الطوينگات شحال عجبوها..جلنار سمعاتها خرجات و هي تهز عنقها بحال النعامة قشعات العقد و الطوينگات و هي تبدا تندب لا لا قوس بداا تيخرج على السيطرة هادشي بزاااف و متستااهلوووش همجية منحطة بحالها!!..اما عذراء ضغطات على السانسور و رجعها لطابق العارضات فين كانت مع ختها و بنان ولكن مالقاتهومش سولات واحد البنت تما و قالت ليها فين كاينة الحفلة و مشات لعندهوم...
وقف السانسور بعذراء فواحد الطابق كبييير كولو زينة و ديكورات بالورود و الربيع مهيأ أعين و نفسية الواحد لدخول لمكان ذو طابع ربيعي...دازت من الكولوار لي كان عامر بالناس لي غاديين جايين بملابس الحفلات الراقية و المجوهرات الفاخرة حتى خرجات فساحة كبيييييرة حاطين فيها السجادة الحمراء و شي ديكورات حداها و عليها كانو واقفين بعض الشخصيات المرموقة تيصورو فيهوم الصحافة و الدنيا كلها فلاشات تسندات عذراء مع الحيط باستغراب حتى تتبان ليها بنان واقفة هي و انطون معانقين تما تيصورو فيهوم شوية هزها و ضورات رجليها على خصرو و المصورين عاطيينها لتصاور و دوك الجوج فرحانين مامسوقينش حتى سالاو و تمشا بيها هاكاك دايزين حدا الناس و غاديين يدخلو للقاعة فين كاين الحفل...
عذراء تتعيط:بناااان بنااااان
بنان ضورات راسها سمعات سميتها حافية عرفات غتجي من شي واحد قريب و هي تبان ليها عذراء تتشيير:حبيبي حطني نشوف اش بغات
عذراء لمحات ليڨيا و خناثة حتى هوما فداك المكان واقفات مشادات بالكتاف و يضحكو للكاميرا زعمة راه حنا صحابات روح بروح:و اخيرا شفنا دوك الجوجات
بنان:شكون(ضارت) ااه دوك المقموعات هههه راه مشات حبيبتهوم داكشي علاش ضاربينها بالطم هوما والو هنا بلا بيها
عذراء:هادشي لي تيبان ليا المهم غنمشي عند ختي خليتها بوحدها
بنان عاد لاحظات العقد و الطوينگات:هااي هاااي زعمة هاد مستر قوس مبرعك ا الصگعة هههه جاوك زوينين بصحتك
عذراء:شكراا حبيبة انا نمشي
مشات بنان رجعات لعند انطون و عذراء دخلات للقاعة لي غير دخلات ليها حلااااات فمهاااا على قدوووو لا لا ماشي الزينة و الديكورات هادوك بوحدهوووم..كان فالحيط لي مقابل مع الباب غلاف صورتها مكبرة من الصور لي دارو ليها فقسم التصوير و مكتوبة حداها بشكل ايتاليك Adrae Miftah X Bens-Naht يعني اسم الشركة برعاية عذراء مفتاح فالصيحة الربيعية...الكوافورة باقة مصدومة و ماحاساش بواحد الجوج واقفين قدامها...
نيار تيحرك فيديه:هاي هاي هاي على ال*حوب وليتي تصورري و تحطي فالأغلفة ااا دوي لديلمك
سديم:عذراء اش واقع هنا كيفاش حتى نتي هي الراعية ديال الصيحة الربيعية؟؟؟
نيار حركها:واهياااتاااا
عذراء قفزات:اش اشششش هادشيييييي؟؟؟؟؟
سديم:هاد السؤال موجه ليك نتي
عذراء:راه براسي و الله ماعارفة!!
نيار:بغيت انا غير نعرف اش جاب مايكاب ارتيست للتصميم؟؟
عذراء:صافي خليوني من هادشي انا جيت نفاجي شوية على راسي!
سديم:حنا غير بغينا نعرفو و صافي حيت أمر غريب
رفيف جات لعند عذراء و جراتها بعيد عليهوم:اش داكشي ا بنت لحراام علاش تصويرتك معلقة تما؟؟؟
عذراء:دابا مول الشركة...
رفيف:اهااه لي هو صاحبك
عذراء:اووف المهم من شحال هادي كانت جاتني ليغيكل و خرجات ليا فكسوتي و كان تما و احتراما ليا زعمة حييد الفيستة ديالو و غطاني بيها و مشا انا رجعت لدار و صبنتها
رفيف:اويلييي على جاالوووف مصبنة الفيستة بالييييد!!
عذراء:واراه مابغيتش نديها للمصبنة و يقول ماركة و منين غتجيني
رفيف:افففف كمليي
عذراء:مهم صبنتها و ديتها ليه الصراحة خسرت لونها و مابقاتش كيف كانت صافي دازو ليام واحد جوج مسمومات وحدة عارضة لولة فالشركة و الثانية السكريتيرة ديالو عييطو ليا لمخزن الملابس الغير صالحة للإستعمال و وراوها ليا و بداو يعييبو فيا و يقولو شوفي فين لاحها صافي و انا بقا فيا الحال و ماعرفتش كيفاش مشيت لعندو
رفيف هزات يديها:وااو معرفاتش كيفاش حتى مشات لعندو سبحان الله معجزة ايواا كمليي
عذراء:عاودت ليه كلشي و من بعد قال ليا بلي هاد الفيستة لي غادي يتأنسبيراو منها فالصيحة الربيعية داكشي علاش دارو تصويرتي تما حيت انا زعمة الراعية ليها
رفيف:ولكن ا الموصيبة الصحافة كاينة و الى شافوك الوزراء شغيقولو؟؟؟
عذراء بتوتر:ا ا اش فيها ر راني مستوورة و و هاادي خدمتييي
عذراء وقوس الجزء 11
محتوى القصة
التنقل بين الأجزاء