طلعات رفيف لتما و تحل السانسور..خرجات تتبحلق بعينيها فالمكان و صوت الطباسل و المعالق تيتسمع هادشي لي تيبيين انه كاينين ناس فيها..قربات من الكونتوار شادة الصف لي كان متكون من 4 ديال الناس قدامها..دازو واحد تابع لاخور حتى وصلات نوبة الراجل لي عاطيها بضهرو..قربات منو رفيف تتسناه يسالي غير شد كوب القهوة ديالو ضار و حيت هي كانت قريبة ليه دفعها شوية بدراعو...
رفيف طلعات فيه راسها بدهشة و هو يضور لعندها:ميس؟؟؟
رفيف بالفرنسية:م مووسيو فابيو؟
فابيو:واش لباس؟تنعتاذر ماشفتكش
رفيف:لا ماشي مشكل انا لي يتصحاب ليا صافي ساليتي و بغيت نشد بلاصتك هه
فابيو:المهم ماوقع ليك والو
رفيف:هه وي صبر نشد القهوة ديالي
مشات رفيف عند لي كاينة فالكونتوار و طلبات منها القهوة و طرف ديال الكيك يالاه جبدات رفيف بسطامها تخلص حتى تتحس بيد تحطات على كتفها...
فابيو:لا ا ميس راه الأكل مجاني
رفيف شافت فيديه بنص عين و جمعات بسطامها حسات بالمرگة...
فابيو بتاسم:ختك مع شخص آمن ماتخافيش مستر بنسليمان ماشي من النوع لي تتفكري فيه كون بغا يآديها ولا شي حاجة مايحتاج حتى رأيها
رفيف تنهدات:عارفة هادشي غير هو بعد المرات الحوايج تيكونو أعمق من هادشي لي قلتي نتا
فابيو:اذن تفرجي كيفما تندير انا
رفيف:هههه زوينة عندك هاد تفرجي
فابيو شرب من قهوتو:قهوتك غتبرد
رفيف:وايه نسيتها گاع
فابيو:غنخليك دابا استراحتي قربات تسالي
رفيف:واخا شكرا نهارك مبروك
بتاسم ليها محرك راسو و ناض غادي خاشي يد فجيبو و اليد الثانية تيشرب بيها فالقهوة مخلي رفيف متبعة ليه العين...
رفيف: بغيت نعرف غير من اي برج تينتامي حتى قدر يتقبل علاقة ختي مع لاخور...
فنفس الوقت بعدما فطرات عذراء مع قوس خرجو تيتمشاو شوية و هو شاد ليها يديها...
عذراء:كان الفطور بنين ههه
قوس بتاسم:مزيان ملي عجبك
عذراء غادية بجنبو و يديه شادة يديها تيبانو بحال شي أب و بنتو بداك فرق الطول لي بيناتهوم:حاسة براسي فرحانة و معرفتش علاش
قوس:ماعرفتيش زعمة؟
عذراء:بصراحة لا
قوس بثقة:اكيد حيت انا معاك
عذراء ضحكات:ههههه الثقة فالنفس
قوس:و علاه هادشي ماشي بصاح؟
عذراء بتاسمات بإعجاب:وي بصاح
قوس بتاسم ليها بنضراتو الإعجابية و جر يديها لي شادها حتى باسها و كملو الضوران ديالهوم...
من بعد فاش سالاو رجعو لعند الشيفور و رجعهوم لشركة...
بعدما سالات استراحة رفيف رجعات لخدمتها...
سديم و نيار عاد دخلو يخدمو حتى تيتصدمو برفيف....
نيار:بسماللهرحمننرحييم شتديري هنا؟
سديم مخرجة عينيها:رفيييف!
رفيف:نتوما هادو افف بقاو تعلمو خلعتوني
نيار:تي شتتديري هنا؟؟
رفيف:جيت نخدم
سديم:وااايلي؟!
نيار:احسن حاجة درتيها عوضتي فراغ ديك ثقباء ديال ختك
رفيف:عاد ساليت لواحد العارضة و معرفتش واش خصني نصوب مزال لشي وحدة
سديم:على حسب جدولك نتي عاد جديدة يمكن مزال مغيحددو ليك
عذراء دخلات عليهوم:هانيي جييت
نيار:هااء! ثقبائي جات
سديم:لباس ا عذراء؟
عذراء:ههه وي بيخير
رفيف:على السلامة
عذراء تلاحت جلسات:الله يسلمك ايوا كيف دازت الخدمة؟
رفيف:عجباتني واخا كاين شوية د ستريس و خاص الصبر
نيار:مع المدة غتولفي وا غير بلاتي فاش تحضري لعروض الأزياء و تشوفي عمرني نسا ديال باريس
سديم:ويلي هاديك كلينا الدق ولكن الصراحة دازت تسافيرة زوينة
رفيف حدرات راسها:ديك باريس سنين و انا تنحلم نمشي ليها و نكمل فيها حياتي ولكن لا حياة لمن تنادي
عذراء:صافي اختي نساي داكشي دابا
رفيف تنهدات: اودي المهم...
نيار:شفتي و نتي فهاد الشركة غتزوري شلا بلدان حنا من زهرنا تلاقينا ب باريس و نتي ماتعرفي باش تلاقاي
عذراء:نيار عندو الحق
رفيف:اشمن حق ياكما تسطيتي شكون غيغطي عليا؟؟؟
عذراء:بصراحة ماعرفتش
سديم:موضوع الرحلات و الدول باقي بعيد مزال متقالت حتى شي هضرة لشي عرض قريب
فنفس الوقت فطابق الإستقبال ديال الشركة دخلات واحد البنت تتقرقب بالطالون ديالها قاصدة مكان الإستقبال حتى وقفات على البنت لي فيه...
نواهل:سلام ممكن دقيقة من وقتك؟
العاملة بابتسامة:وي مادموزيل تفضلي
نواهل:بغيت ندوي مع عذراء مفتاح....
العاملة:مادموزيل مفتاح بانت ليا اليوم ولكن ماعندهاش عمل مع مدام بنان اطط نشوف رقم هاتفها
نواهل:واخا شكرا
دخلات العاملة لبيانات الموظفين فالبيسي حتى جبدات ضوسي عذراء مفتاح لي فيه معلوماتها الشخصية و من ضمنهوم رقم هاتفها..كتباتو فالفيكس و صونات عليها...
نرجعو لعند عذراء لي باقة مع رفيف و البقية...
عذراء:ماعرفتش شكون لي تيصوني عليا(جاوبات) الو؟
العاملة:مادموزيل مفتاح انا ريما من طابق الإستقبال كاينة واحد الآنسة جات تشوفك
عذراء طلعات حاجبها باستغراب:اينا انسة؟
العاملة شافت فنواهل:شكون لي نقول ليها؟
نواهل:قولي ليها متتعرفنيش بغيت غير ندوي معاها
العاملة:قالت متتعرفيهاش بغات غير تدوي معاك
عذراء:امم واخا انا نهبط عندها دابا
العاملة:اوكي(قطعات و شافت فنواهل)تفضلي انسة قالت غتجي دابا
نواهل حركات راسها بابتسامة:شكرا ليك
رفيف:شكون هاديك؟
عذراء:ماعرفتش حضي معاك صاكي دابا نجي
رفيف:واخا
مشات عذراء شدات السانسور لطابق الإستقبال حتى هبطات كان خاوي و فيه غير بنت وحدة جالسة فوق الفوتوي تتسنا..نواهل بانت ليها جاية ناضت مشات عندها ديريكت..عذراء طلعات فيها راسها طويلة عليها و كملاتها بالطالون...
عذراء بنضرات متفحصة:سلام،شكون نتي؟(نيشان)
نواهل لي كانت مادة يديها:اناا(بتاسمات بتوتر) سميتي نواهل يمكن لينا ندويو فبلاصة خرى؟
عذراء:اشمن بلاصة؟
نواهل:لي بغيتي
عذراء:اجي نجلسو فواحد البلاصة فيها الفوتويات هنا
سبقات عذراء حتى دخلات لديك البلاصة و نواهل تابعاها حتى جلسو...
عذراء:و دابا يمكن ليا نعرف شنو بغيتي مني؟
نواهل:احم مهم انا..انا صحفية خدامة فنفس الجريدة لي خدام فيها موسيو برناس
عذراء تنهدات معوجة عينيها:واش هو لي سيفطك؟
نواهل:لا لا ماشي هو انا لي جيت و جيت بلا خبارو
عذراء:اذن اش بغيتي؟
نواهل:بغيت نسولك على..(توترات)علاقتك بموسيو برناس
عذراء كحزات مطلعة حجبانها فيها:اش هاد السؤال؟؟واش متأكدة انه ماشي هو لي سيفطك لعندي؟؟
نواهل:تنقسم ليك انه ماسيفطنيش و مافخبارو كاع، هادشي تيهمني انا شخصيا
نواهل بتاسمات فاش سمعات هاد الكلام و طلقات تنهيدة راحة:واخاا شكرا على وقتك
عذراء:و دابا نقدر نسمع سبب هاد الأسئلة و هاد الزيارة؟
نواهل بخجل:حيت انا تنبغي موسيو برناس
عذراء بدهشة:تتبغيه؟ اختي ربحي بيه هنيني منو
نواهل تفاجآت:متوقعتش لهاد الدرجة!
عذراء:اييه راه قلتها ليه و مابغاش يفهم راسو واش نتي من برج العذراء؟
نواهل بان الحزن على وجهها:للأسف لا انا من برج الميزان
عذراء:شوفي متيهمش اينا برج المهم شنو كاين هنا(حطات يديها على قلبها)
نواهل بتاسمات:شكرا كلامك رييحني(ناضت)تنتمنى ليك التوفيق فعلاقتك مع موسيو قوس جيتو مع بعضياتكوم بزاف
عذراء بدهشة:نتي منين...!
نواهل:طهلاي فراسك و شكرا على وقتك و هادشي لي تقال هنا مغيعرف بيه حتى واحد
عطاتها بضهرها و مشات بخطوات سريعة مخلية عذراء متبعة ليها عينيها بإستغراب حتى غبرات من قدامها...
رجعات عذراء لعند رفيف و البقية ولكن معاوداتش ليهوم والو حتى تنفارد برفيف و تعاود ليها..داز النهار عادي رفيف مع الخدمة و عذراء مونساها حتى سالات و رجعو لدار باش يتغداو...
لوليا:جيتو على السلامة
عذراء و رفيف دخلو:الله يسلمك
لوليا جلسات بتنهيدة:جداكوم سلافا برزطات ليا مخي اليوم
رفيف:اش واقع تاني؟
عذراء تضور فعينيها...
لوليا:قالت ليا ا لالة عرس رئال و رسيل بعد 3 ايام و هاد العشية غنتلاقاو انا وياها و دواني باش نمشيو لسوق نتقداو داكشي لي بقا
عذراء بدهشة:كيفاش؟؟؟
رفيف:اويلي! من بعد 3 ايام!
لوليا:اييه سيرو بدلو سيرو دابا يدخل باكوم و نتغداو مجموعين بينما دخل عريس الغفلة يسيق الخبار حتى هو
عذراء عقدات حجبانها:مشكلة مع هاد العادااات!
طلعات هازة صاكها و تبعاتها رفيف حتى سدو عليهوم فبيتهوم...
رفيف:ايوا هانتي تشوفي واش هدا عرس ولا مسرحية وقتما رشقات ليها توخر فيه و تقرب
عذراء:اودي ماشي حاجة جديدة علينا مهم بغيت نعاود ليك واحد الحاجة
رفيف:شنو تاني؟
عذراء عاودات ليها بلان نواهل...
رفيف:و انا نقول علاش ماعاودتي لينا والو كنت عارفة كاينة شي حاجة تما
عذراء:المهم خليها ضور ليه عالله تهنيني منو
رفيف:موحال هاداك لاصق فيك من الجدر ولكن حتى هاد البنت وجودها مزيان تقدر تلهيه ولا شي لعبة
عذراء:تماما تنتمنى تبعدو عليا....
☀️فلغد ليه☀️
و فالدرب لي ساكنين فيه كل من عائلة رواء و عائلة سنمار و رامي أبناء عم عذراء..كان واقف سنمار و فيديه باليزتو الصغيرة و مضورينو العائلة ديالو...
رضوى:صافي ا ولييدي سخيتي بيا
سنمار:مابقا والو لصيف ان شاء الله ا الواليدة و نرجع لعندك
رضوى تتبكي:طريق السلامة ا وليدي ربي يوصلك على خير
سنمار عنقها:ماتبكيش ا ميمتي ماتبكيش
عنقها و تسالم و تعانق مع خوتو حتى هوما عاد طلع فالطونوبيل لي كان صايگها أديب...
أديب:صافي نمشيو؟
سنمار شاف فعائلتو من الزاج لي تيديرو ليه باي باي و رد عليهوم حتى هو بيديه:وي صافي
ديمارا أديب من تما باش يوصلو للمطار...
أديب: بصاح غترجع فالصيف؟
سنمار:غنشوف على حسب
أديب:و خطيبتك؟ شغتدير معاها؟
سنمار تنهد:هاديك مشكلتها كبيرة معرفتش كيفاش نتفك منها
أديب:صارحها و هني الدنيا
سنمار:منقدرش غادي دير ليا حالة خصوصا بوجود ناتالي فحياتي
أديب:عاجلا أم اجلا غادي توصل لهاد المرحلة
سنمار:عارف هادشي مهم مابغيتش نفكر فهادشي دابا
أديب:واخا...
فسويسرا و فغرفة روبين كانت هاد الأخيرة جالسة حاطة رجل على رجل و تيليفونها فيديها تتسنا مكالمة مهمة..ناضت من تما بتوتر حتى تقابلات مع مرايتها الطويلة تتقاد فشعرها حتى تسمع التيلي تيصوني و هي تجاوب فالبلاصة...
روبين:الووو لقيتي شي حاجة؟؟
الشخص لي كان جالس فبيت مظلمة قدامو بيسي محلول فيه صورة عذراء:وي مادموزيل لقيت معلومات مهمة
الشخص:هاد الآنسة من برج العذراء و هاد البرج تيتزاوجو من بعضياتهوم و لقيت انها مخطوبة من الصغر لولد عمها و قريبا غيتزوجو
روبين تصدمات و فنفس الوقت بدات تترسم ابتسامة شريرة على فمها:و هادشي عندك بالدليل؟؟
الشخص:فالحقيقة لا ا مادموزيل هادو معلومات وصلوني من مصادري
روبين:صافي شكرا كمل فخدمتك انا عارفة اش غندير
قطعات عليه و ناضت بفرحة حتى طلات من البالكون ديالها لي تيطل على حديقة قصر عائلتها الضخم...
روبين:ههههههه شنو غيكون احساس قوس الى عرف انه حبيبتو البريئة انسانة اصلا مخطوبة هههههه نهايتك قربات و على يدي يا البرهوشة!
فشركة Bens-Naht تحطات طاكسي قدامها و هبطات منها عذراء و تبعاتها رفيف لي خلصاتو و طلعو فالسانسور بجوج حتى وقف برفيف فطابق المايكاب ارتيستس..خرجات منو و كملات عذراء لطابق العارضات حتى وقف عاد قررات مع راسها شي حاجة..ضغطات على الزر الذهبي و تسد السانسور تاني حتى طلعها لطابق قوس..خرجات منو و مشات عند جلنار لي غير شافتها بدات تلون بالسم تاني...
عذراء:قولي لمستر قوس بلي جيت نشوفو
جلنار بالسم:عندك شي موعد معاه؟؟
عذراء:قولي ليه لي قلتو و صافي
هزات جلنار الفيكس مغددة و صونات عليه...
فنفس الوقت كان قوس جالس فالبيرو ديالو مركز مع خدمتو حتى صونات عليه...
قوس:وي؟
جلنار:احمم مستر عذراء مفتاح بغات تشوفكوم
قوس بتاسم:قولي ليها تفضل
جلنار بتاسمات بالسم:اوكي مستر
حطات الفيكس و حركات ليها يديها و كلها سم غير بوحدها زعمة تمشي اما عذراء بتاسمات و دخلات عند حبيبها بغات تشوفو عاد تبدا خدمتها...
قوس بتاسم فاش شافها قدامو و اشار ليها تجي بيدو..مشات عندو فرحانة حاسة بقلبها تيضرب بزاف فاش شافتو حتى وقفات عليه..حط يدو على يديها حتى جرها و جلسها على ركابيه هادشي لي خلاها تصدم...
قوس شدها من وجهها بيديه بجوج و تقابل مع عينيها المستغربين:Good Morning Sunshine
عذراء بتاسمات:صباح الخير هه لباس عليك؟
قوس قرب حتى باسها فشفاهها:دابا صباحي تحلا
عذراء بتاسمات بخجل...
قوس حييد ليها شعرها على وجهها و لاحو مورا ضهرها:هي توحشتيني؟
عذراء بخجل:ااه
قوس بتاسم عجبو الحال:حتى انا توحشتك
عذراء:قول ليا مسالي ليوم؟ نقدرو نخرجو؟
قوس:اليوم عندي عامر و حتى هاد الأيام خليها حتال الويكاند عندي ليك مفاجأة بسيطة
جرها لعندو و غاصو فقبلة مطولة تيروي عطشو من شفاهها و يديه تيقيصو فجسمها حتى بدات تحس بيه بدا يخرج على السيطرة و هي تنساحب دافعاه بيديها بشوية...
عذراء تتقاد شعرها بتوتر و العكر تخربق ليها:مه..مهم غتسنا فيا مدام بنان دابا
قوس:واخاا نهارك مبروك
حركات ليه راسها دغيا و خرجات دايزة على جلنار لي قشعات العكر المرون عرفاتهوم تباوسو زييرات على يديها بعصبية و رجعات تكمل خدمتها...
وصلات 10:30 و فالسوق كانو غاديين كل من لوليا..دواني..سلافا و رسيل لي تيشريو فاللمسات الأخيرة لهاد العرس دازو على الفاكية و الحلوى و كلشي لي تيخص العراسات...
لوليا:و القفاطن و التكاشط شنو درتو بخصوصهوم؟
سلافا:كلشي هو هاداك لبارح كنا عند الخياطة جمعات كلشي
دواني:بقاو لينا الروايح لي غنرشو على الضياف
سلافا:اه عندك الحق زيدو تنعرف واحد تيبيع داكشي على مزويناتو...
🌇فالعشية🌇
بنان:الخدمة د اليوم سالات يمكن ليك تمشي
عذراء تتجمع فصاكها:اوكي (سلمات عليها) نتشاوفو غدا ان شاء الله
بنان:اوكي الزين
خرجات عذراء و هبطات لعند رفيف تطل عليها قبل ماتمشي لقاتها جالسة تضور فعينيها بتوتر...
رفيف شافتها:عاد كنت غنصوني عليك قلت ممكن مزال ماسالات الخدمة
عذراء:عاد ساليت و قبل مانهبط لدار بغيت نشوفك
رفيف ناضت لعندها بارتباك:قالت ليا شيارا بلي عندنا خدمة حتال 9 د الليل و نتي عارفة ماخصناش نفوتو 8
عذراء:صافي اختي غير تهدني غنقلبو الأدوار بحال كيفما تديري معايا نتي غنديرو معاك انا اليوم
رفيف:اصلا مكاينش شي حل اخور ميمكنش ليا نخسر خدمتي على سبب تافه بحال هدا!
عذراء بتاسمات:باينة عاجباك الخدمة هنايا
رفيف:ادوات عمل باهضة و محيط مريح مع ناس ضريفين اكيد غيعجبني
عذراء:مزيان ههه المهم غنمشي دابا و نعلم الواليدة حتى هي فاش غتجي علميني باش ندوزك بلا مايشوفوك الوزراء
فدار عائلة برناس و فغرفة رسيل كانت هاد الأخيرة جالسة تتقرا على الأمومة و الحمل حتى صونا عليها رئال...
رسيل:الو حبيبي
رئال مبتسم:كيدايرة العروسة ديالي واش واجدة؟
رسيل بتاسمات بخجل:هه العروسة وجدات عامين هادي
رئال فهم قصدها:شوفي ا رسيل داكشي وقع بإرادتك و نتي عارفة هادشي
رسيل:اه عارفة غير هو ماكنتش مخططة ليه نتا لي قنعتيني بإسم الحب انا كنت مجرد مراهقة استسلمات لمشاعرها فقط
رئال:و دابا لاش هاد الكلام مادام عرسنا بعد غدا؟
رسيل:لا والو غير هرموناتي مخربقين يمكن ليغيگل غتجيني هه(ميمكنش حيت حاملة غير كذبات)
رئال:واخا مهم بغيت غير نسول فيك و نعرف كيف غادة قبل من عرسنا
رسيل:انا بيخير غير تهنا و بلا ماتشوش
رئال:واخا طهلاي فراسك
رسيل:تصبح على خير(قطعات)
حطات التيلي ديالها و شافت فالحيط تتسترجع فذكريات النهار لي فقدات فيه عذريتها...
رسيل:هاد الزواج غيحد من هاد الأفكار كاملين..بعد غدا مغنبقاش نفكر فعذرييتي لي مشات و الحمل ديالي غيكون ممكن يتقال للعائلة..بعد غدا و يسالي كلشي...
بعدما سالات رفيف خدمتها و وصلات 9 ديال الليل هبطات لتحت قدام الشركة باش تشد شي طاكسي لي توصلها لدارهوم..بقات واقفة تتسنا تما و شوية د الريح تحرك تيدي فشعرها و يجيبو فنفس الوقت كان فابيو سالا خدمتو حتى هو و هبط لباركينغ حتال فين مبلاصية طونوبيلتو و صاگها حتى خرج..فالوقت لي تم دايز فالشانطي بان ليه شي واحد واقف تيتسنا..و بتمعن شاف دغيا لقاها رفيف و هو يوقف قدامها مهبط الزاج ديال الباب لي من جيهتها...
فابيو:ميس ميفتاه؟
رفيف بتاسمات بتوتر: موسيو المنادجر
فابيو بتاسم و قال بالفرنسية:تتسناي شي واحد؟
رفيف شافت فالطريق:وي فالطاكسي ولكن مزال مابانت حتى وحدة
فابيو:طلعي نوصلك
رفيف:لا لا موسيو شكرا بزاف بلا منعذبك معايا
فابيو:مكاين حتاشي عذاب ماتعطينيش خاطري نخليك واقفة تتسناي فهاد الليل و البرد بدا يتحرك
رفيف بتاسمات:متأكد انه ماشي مشكل؟
فابيو حرك راسو بإبتسامة:اكيد راه انا لي قتارحت عليك
حلات رفيف الباب و دخلات حاطة صاكها فوق ركابيها...
فابيو:ديري لاسانتير هو الأول
رفيف:اا اه واخا
جرات حزام الأمان حتى قاداتو عاد ديماراو من تما...
🚦فالطريق🚦
و بعد مدة من الصمت...
فابيو صايگ تيشوف فالطريق:كيف جاتك الخدمة فالشركة؟
رفيف:عجباتني و حتى شيارا و لي خدامين معايا فالحقيقة مزيانين و ماندمتش حيت جربت نخدم فيها
فابيو:هادشي مزيان الى ولات عندك تجربة و شافت فيك شيارا موهبة ممكن تقدمك لشي عارضة و تولي مايكاب ارتيست ديالها الخاصة و بهاكا غتكوني ترسمتي و حتى الخدمة غتقلال عليك حيت غتبقاي تقادي غير لعارضة وحدة ماشي بحال دابا تتقادي لأي وحدة محتاجة لي يخدم ليها المايكاب
رفيف:بحال كيف وقع لختي عذراء ياك؟
فابيو:ميس ادرا فشكل كيفاش ولات مع بنان مجرد انه عرفات بلي من نفس برجها زعمات تخدمها
رفيف:اباغ هادشي ختي موهبة و عندها ماتقول فهادشي زائد روحها المرحة و الطييبة اكيد غتعجبها و تختارها
فابيو:وي بصاح ماشي غير بنان لي جذبات و انما حتى مستر بنسليمان هه
رفيف تنهدات:العلاقة ديالهوم غالطة و المشكلة ختي مافاهماش هادشي
فابيو وقف عند الضو الحمر و شاف فيها: شنو ذنبهوم الى بغاو بعضياتهوم؟
رفيف:أبراجهوم مختلفة تقاليدهوم مختلفة عوالمهوم كاع مختلفة! ختي بنت بسيطة و نية و هو لباس عليه و غيكون عارف الدنيا اش تتسوا
فابيو ديمارا: هانتي قلتي عارف الدنيا اش تتسوا يعني ختك ماعندها مناش تخاف و بلا ماتكبري الموضوع حيت صدقيني كون كان رجل مامزيانش كنت غنقولها ليك، نتي و ميس ادرا باين شحال مالايقينش لشي واحد مامزيانش
رفيف:شكرا على حسن على ظنك هه
فابيو:قلت ليكاين
رفيف شافت فالزاج شحال و نطقات:على الأقل تتبان ليا فرحانة معاه
فابيو:و حتى هو بان ليا فرحان معاها
رفيف:تستاهل الفرحة
وقفات الطونوبيل فالشارع:واش هنا؟
رفيف طلات من الزاج:اه هنا شكرا ليك بزاف و سمح ليا عذبتك معايا
فابيو:لا مكاين حتاشي عذاب ذكريني بإسمك مزال
رفيف:رفيف
فابيو:اه..(بإبتسامة)مادموزيل رفيف يمكن لينا نكونو أصدقاء؟
رفيف بتاسمات بدهشة:ا اهاه علاش لا هه
فابيو بتاسم و جبد كارط من جيب الفيستة ديالو:هادي نمرتي و بلا ماتبقاش تحشمي مني
رفيف شداتها و حطاتها فصاكها:شكرا على طيبة قلبك هادشي كتير عليا هه انا فين و نتا فين هه و تطلب مني نكونو اصدقاء
فابيو:لا ماتقوليش هكاك انا وياك فمكان واحد ختك حبيبة رب عملي لي فنفس الوقت صاحبي و نتي ختها راكي فاهمة قصدي
رفيف:وي فهمت عندنا قاسم مشترك
فابيو:تماما
رفيف:شكرا على كلشي مرة خرى و تصبح على خير
فابيو بتاسم:تصبحي على خير
سدات باب الطونوبيل و تمشات فوق التروطوار جابدة تيليفونها تخلي ميساج لعذراء اما هو بقا شحال تيشوفها من المرايا الجانبية حتى اختفت عن انضارو عاد ديمارا...
وصل الميساج لعذراء لي كانت فبيتها غير شافتو لبسات صندالتها د الميكة..هزات گاندورة لواتها فيديها و هبطات حتى طلات على باها لقاتو تيتفرج فالبيت و مها تتوجد فالماعن ديال العشا...
عذراء وشوشات:ماما رفيف دابا غتجي
لوليا حطات الطبسيل من يديها:واخا
مشات لعند جلوان و بدات تلف فيه بالهضرة حتى حلات عذراء لرفيف و دخلاتها للكوزينة...
عذراء:هاكي لبسي دغيا هادي و حييدي الصباط
رفيف لاحت الگاندورة على حوايجها..حييدات صباطها و جمعات شعرها...
عذراء:اري الصاك لهنا و سيري ديري راسك عاد فايقة و عيانة قلنا ليه شربتي الدوا د الراس و نعستي
رفيف:واخا واخا
مشات رفيف للبيت بملامح التعب حتى باست لباها راسو...
لوليا تتضور فعينيها و تحدر فيهوم:كيف بقيتي ياكما نعطيك فانيدة وحدة خرى؟
عذراء:بتاسمات شكرا ليك بزاف بغيتك الى كان ممكن تدوي حتى مع شيارا بخصوص ختي رفيف حتى هي
بنان:واخا ماتهزيش الهم غندوي معاها
عذراء بفرحة:شكرا بزاااف ههه
فمقر جريدة الأبراج كانت نواهل صابحة على غير عادتها طلعات حتال لبوسط ديالها بوجه منور و ابتسامة مزيينة شفاهها الوردية و وجهها البشوش حتى وقفات عليها صديقتها قمر...
قمر:هاي هاي التزييزة على الصباح اش واقع بلا خباري؟
نواهل حلات البيسي:والو مايتهلاش الواحد فراسو؟
قمر:لا حاشة غير هو مابقاتش فالزواق بقات فالفرحة باينة واقعة شي حاجة و مخبياها عليا
نواهل:مكاين مانخبي غير هو الموضوع مايستاهلش هادشي كولو
قمر:زعمة درتي عقلك؟
نواهل:صافي ا قمر خليني نخدم دابا
قمر:واخا ا لالة...
داز النهار عادي فخدمة عذراء لي خدات الروبو ديالها نفس الشيء مع رفيف و رجعو لدارهوم باش يكملو تحضيرات العرس مع مهوم و بقية العائلة...
☀️فلغد ليه☀️
لوليا:واا فيقووو يا الخامرااات هادو هوما خواتااات العريييس
رفيف فاقت تتحك عينيها و طلات على الساعة:الله يا الواليدة 9 د الصباح هادي اشمن خميرة
لوليا تتحرك فعذراء:نووضي حتى نتي
عذراء فاقت قافزة:اش كااين راني ماخداماااش
لوليا:دوزي غسلي وجهك و فطرو راه القاعة تيركبو فيها
رفيف ناضت و تبعاتها عذراء حتى كل وحدة وجدات راسها و هبطو يفطرو...
لوليا:اهيا نتوما فين قفاطنكوم ولا تكاشطكوم ولا منعرف
عذراء:راه واجدين
لوليا: صافي مزيان سيرو دابا بدلو حوايجكوم نمشيو نطلو على البرطمة ديال خوكوم واش كلشي هو هاداك حتى هو
رفيف:علاه ماكنتوش فيها البارح؟
لوليا:ايه ولكن غنرجع نشوف واش كلشي هو هاداك باش نتهنا من جيهتها
عذراء:واخا زيدي نلبسو جلالبنا
مشاو حتى لبسو حوايجهوم و خرجو معاها...
فالدار د عائلة برناس كانت رسيل جالسة فالدوش لابسة غير كيلوط و دواني واقفة عليها تطلي ليها الحنة لداتها...
دواني:حتى من حماام العرووس غنديرو لمك فالدوووش حيت الى خرجت ممك للحماام منعرف اش يوقع ل لي فكرشك
رسيل مغطية كرشها بيديها و حابسة البكية حيت ضراتها بداك الفريك القوي لي تدير ليها:وا صافي ا ماما غندوش لراسي
دواني:قطعي حسك(جرات ليها شعرها لي كان عامر بتخليطة العشوب و الحنة و بدات تتمشطو بقوة)اااه غطيي فيهاا غتهررب دايرة فيهاا ام الله ينعل والديك و تربييتي ليك
ديالا جات تدق عليهوم:مامااااا
دواني من الدوش:اش كاين؟
ديالا:خالتيي رضوى جات هي و بناتها
دواني:ضييفيهوم حتى نجي راني قربت نكمل
ديالا:واخاا
مشات ديالا و جبدات دواني الرشاشة تتشلل لرسيل لي مكمشة حتى كملات ليها و لاحت ليها الفوطة على راسها:تلاحي لبيتك و منسمعش حسك حتى نحطو الغدا
خرجات دواني و خبطات ب باب الدوش و مشات لعند رضوى و بناتها لي هي أم سنمار و خواتاتو...
دواني:كيف شفتي ا ختي رضوى خفت من العين الدرية يالاه مكملة 18 عام يضربوها ليا بلعين حتى الدوش قاضي الغراض
تغريد:كنا عوالين زعمة نمشيو للحمام كيفما موالفين
رودينا:ماشي مشكل غنديروها ان شاء الله فعرس برناس و عذراء ههه اصلا قرب حتى هو
دواني بتاسمات:عندكوم الحق رسيل درت ليها غير شوية د البروك و صافي
رضوى:العجب و زعمة بنتك الكبيرة و اول وحدة تزوجي من ولادك
دواني تتبتاسم بزز:نعوضها ان شاء الله فخطيبة ولدي عذراء و بنتي ديالا...
بعدما تفقدات لوليا مع بناتها البرطمة ديال رئال و تقاد كلشي فبلاصتو استقبالا لدار العرسان رجعو لدار لقاو الخدامة قربو يكملو تركاب القاعة..دخلو بدلو حوايجهوم و كل وحدة مشات تكمل شغلها...
داز النهار فالتجهيزات و التحضيرات و حيت كيفما عارفين عذراء و رفيف ديجا كوافورات محتاجوش يمشيو لصالون كل وحدة قادات ل لوخرا نفس الشيء مع رواء لي لحقات عليهوم حتى هي جات بقفطانها الأحمر و شعرها مجموع معولة يقادوه ليها هو و مكياجها..تقادو البنات طلعو زوينات بزاف..عذراء طالقة شعرها مع مكياج ذهبي بلمسة ربيعية فعينيها و تكشيطة فالگري مخدومة بالذهبي..رفيف غادة بقفطان فالكحل مخدوم بالذهبي مع مكياج ترابي و رواء سرحو ليها شعرها مع مكياج ذهبي مختوم بعكر احمر...
لوليا وقفات عليهوم بتكشيطتها الغوز و زيفها الفضي كلها تتلمع:صافي واجدين؟
عذراء:واش جاو الناس ولا شنو ياك العرس غيبدا مع 9؟
لوليا:دوزو راه العروسة جابوها و جالسة فالبرزة تتنقش ليها النقاشة
رفيف:اويلي علاه شحال و حنا فالبيت؟
لوليا حطات يديها على بعضياتهوم:مانعرف انا! باينة السوايع زيدو سربي كاع الدريات مجموعين عندها الا نتوما
رواء:واخاا اخالتي شفتي معاك الواليدة؟
لوليا:راها جالسة فبيت الضياف مع شي عيالات
رواء:واخاا شكرا
خلاتهوم لوليا باش تمشي طل على الطيابات و مشاو هوما جارين جلايلهوم حتى خرجو من الدار للقاعة المتنقلة لي ركبو قدامها و لي غيتقام فيها العرس..دخلو لقاو رسيل جالسة بتكشيطتها البيضة المخدومة بالذهبي مقادة شعرها و وجهها و عند رجليها جالسة النقاشة تتنقش ليها و مضورينها صحاباتها و ختها و بنات العائلة..تسالمو معاهوم البنات و جلسو فرحانين تيشوفو فهاد الأجواء لي من شحال هادي ماعاشوها رغم انه كاع هاد بنات عائلة مفتاح مخطوبات من صغرهوم لولاد عمهوم ولا خالاتهوم الا انه كأي بنت عادية تيبقاو هاد الأجواء مفرحة خصوصا و انه العرسان هوما كوبل رئال و رسيل لي صدقات ليهوم هاد الخطوبة بل بيناتهوم حب كبير...
بقات النقاشة تتنقش و البنات شي تيتحتت مع شي و الشي لاخور تيشطح على ايقاع اللعابات لي جابو حتى قربات 9 لي لقات العروسة ناقشة رجليها و يديها بل قرب ينشف و دازت لعائلتها لي تدير ليهوم فشوية د البروك..تجمعو صحابات رسيل على النقاشة و كل وحدة مدات ليها يديها تنقش فيها Best Friend Of The Bride (صديقة العروس المقربة)دارت الخاطر لكل وحدة و انساحبات بعدما دهنات ليها الحنة بالسقوة...
عذراء:ياختي تشهيت الحنة
رفيف:و مالك خليتيها حتى مشات؟
عذراء:راه مابغيتش نصدعها شحال بقات غير فصحابات رسيل
رواء ضحكات حاطة يديها على فمها:خليها حتال عرسك
عذراء:اييه ان شاء الله عرسي انا و قوسي
رفيف خنزرات فيها:قطعي حسك ليسمعك شي واحد
عذراء:شكون غيسمعني بهاد الجوق بزز باش تنسمعكوم نتوما لي حدايا
رواء حسات بڨيبرور تيلي ديالها لي فصوييكها:صبرو دابا نجي
ناضت تجاوب على المكالمة و خلات الجوج لخرين تيبرگگو فالناس و العائلة لي تيدخلو و تيعمرو فالطبالي د القاعة...
رفيف:شوف اتا شوفي أزهار خت مرام حتى هي مزيزة زعمة
عذراء:بانت ليا غلاضت بان فيها الضو فاش حبسات القرايا
رفيف:اشمن حبساتها وا عمي لي جلسها قالك داخلة عليه و خارجة
عذراء:بففف عقلية الوزراء
دخلات النگافة حتى غطات راس رسيل بلافوال ذهبية و داتها معاها باش يكرطو ليها الحنة و يلبسوها لبسة خرى...
فنفس الوقت فغرفة عذراء و رفيف لي مشات ليها رواء باش تجاوب على مكالمتها...
رواء بابتسامة:حبيبي لباس عليك؟
أديب:لباس ا حياتي و نتي كيف غادة مع العرس؟
رواء:عاد غيبدا ههه الأجواء زوينين فرحت ليهوم
أديب:مابقا والو لعرسنا حتى حنا نيت ههه
رواء:وي بصااح و عرس عذراء و يمكن حتى عرس رفيف ماتعرف نكونو فال زوين عليها
أديب فاش سمع جملتها الأخيرة جمع الضحكة ديالو...
رواء:الو؟ أديب؟
أديب:لا والو غير هو فالحقيقة بغيت غدا ان شاء الله ندوي ليك على واحد الموضوع
رواء:هاني تنسمعك
أديب:لا مع 10 د الصباح نتلاقاو فالقهوة لي موالفين تنفطرو فيها و ندويو فهادشي اوكي بب؟
رواء:اوكي بب على خاطرك
أديب:نخليك دابا و استمتعي ليا بوقتك
رواء:شكرا...
قطعات عليه و خرجات من الغرفة بإستغراب اش غيكون بغا يقول ليها و باغي حتى يتلاقاو؟؟...
حبسو اللعابات و الجوق و تسمعو الدقايقية داخلين و موراهوم رجال بجلالبهوم هازين الطيافر ديال الدفوع و قدامهوم رئال بالكومبلي ديالو فرحان تيسلم على الناس من بعيد و حداه مو لوليا داخلين و كلشي تيصفق و يشطح على ايقاعات الدقايقية لي زادو نشطو الأجواء حتى جات النگافة عند لوليا و قالت ليها فودنيها بلي العروسة واجدة..شدات رئال من ذراعو و مشاو حتال عند رسيل ليكانت واقفة بتكشيطة حمرة و مغطيين ليها وجهها بلافوال و حداها جوج نگافات..شد ليها رئال يديها و طلق ضحكة خفيفة فرحان و ماقاداه فرحة حيت اليوم غادي يتزوج بحبيبة قلبو و غيعيشو تحت سقف واحد..بداو النگافات بالصلاة و السلام طالقين حلوقهوم و الدقايقية و الجوق خدامين حتى وصلوهوم للبرزة و هنا بداو الناس تيصوورو و عذراء تيلمعو عينيها فخوها و مرتو المستقبلية جاوها كيوت بزاااف و شحال مواتييين، اصلا بالنسبة ليها مواتييين من شحال هادي حيت تيبغيو بعضياتهوم و دابا زاادو تواتاو بهاد اللباس و الزواج...
رفيف دوات فودن عذراء:شوفي إقبال غطرطق راني قلت ليك كانت حاطة عينيها على رئال
بقاو واقفات تما حتى بان ليهوم برناس جاي بكومبلي فالبلومارين و مقاد شعرو...
رواء وشوشات لعذراء:الكولة سبيسيال تتمشا على رجليها
عذراء طلعات راسها لقاتو بتاسم ليها و داز و هي تعوج فعينيها بالنفخة:لاصير اختي هدا لاصير
رواء:عجبني العصير اجي يزيدوني
عذراء:زيدي حتى انا بغيتو...
كلاو الناس الحلوة و جمعو السرباية كلشي..داز العرس كأي عرس مغريبي عادي ها الشطيح و الرديح و الناس كلاو حتى شبعو كاين لي فرحان للعرسان و كاينين المسمومات لي حاسدين العروسة على صغر سنها ولا زوجها و كاينين لي ممسوقين لحد بحال عذراء و رباعتها لي ضاربين الدنيا بركلة و عايشين كل لحظة بوقتها و حلاوتها..المهم الجو كان متنفس للعائلة كاملة لي نسات مشاكلها و ضغوطاتها فالحياة شوية...
الساعة تتشير دابا ل 2:00 القاعة بدات تتخوا و لي عندو شي دار راه مشا ليها و العرسان ركبو فطونوبيلتهوم المزينة بالورود باش يمشيو لدارهوم...
بعد مدة ديال الطريق وقفات الطونوبيلة قدام الإقامة..هبط منها رئال و شد يد عروستو رسيل حتى هبطات حتى هي،الطونوبيلة الثانية لي جات معاهوم كانو فيها الأباء و الأمهات ديالهوم...
لوليا وقفات قدامهوم مبتسمة:الله يحجبكوم من العين الله يفرحكوم اوليدي و يعطيكوم مانويتو فخاطركوم
رئال تيبوس فراسها:امين ا الواليدة اميين الله يطول ليا فعمرك
دواني واقفة جامعة يديها تتفرج ماعرفات شنو تدير..رجاح قرب من بنتو لي باست يديه و راسو بعينيها المدمعين:بابا...
رجاح بتاسم:بنتي الحبيبة كبرات حتى ولات عروسة
رسيل عنقاتو تتبكي فصمت اما دواني كتافات غير بالدعاء ليها الفعلة لي دارتها حبسات مشاعر الأمومة تفيض فهاد اللحظة..كون ماكتاشفاتش هادشي كون كانت ردة فعل وحدة خرى..كانت غتحط بنتها بين احضانها و متطلقش منها ولكن للقدر مسار اخر...
جلوان:الله يجعل كلشي مبارك و مسعود صافي مشينا ا رجاح؟
رجاح:ااه صافي
تسالمو معاهوم و مشاو مخليينهوم طالعين لعش الزوجية ديالهوم...
فنفس الوقت فدار عائلة عذراء كانت هاد الأخيرة مليوحة فوق ناموسييتها ببيجامتها و ماسحة المكياج لي فوجهها نفس الشيء مع رفيف...
عذراء:وا زعمة رجليا مابقيتش حاسة بيهوم
رفيف:خوينا سمنا فالشطيح اختي الكروب لي جبنا ماعندي مانقول فيه
عذراء:وا جدة سلافا و شطحات اختي ماحساك حنا
رفيف:تفكرتها فاش وقفات عليهوم فاش جا العدول باش يتكاتبو بحال شي كاردكور ههههه
رفيف:نعسي نعسي هاد غدا وكان لي غيدوز مزمر نتي عطاتك بنان 3ايام روبو اما انا ديك شيارا خلاتني غير اليوم قالت ليك حگا غدا كاينة خدمة مشارجية
عذراء:ايوا شنو بغيتي مزال راه العرس داز ليوم
رفيف:ولكن فايقة على النبوري على كل خليني عليك نتي صابحة خامرة و دايرة فيك عقلي
عذراء:واخا تصبحي على خير
رفيف:بونوي...
☀️فلغد ليه☀️
فاقت رفيف وجدات راسها و مشات لخدمتها بتعب باقة عيانة من سهرة البارح مخلية عذراء حالة فمها للسموات...
فالقهوة لي تافقو يتلاقاو فيها أديب و رواء كانو جالسين فيها بجوج و تيتسناو ففطورهوم يتحط...
أديب:ايوا كيف داز العرس؟
رواء:داز وااااعررر نشطنا و كلشي مانعاودش ليك
أديب بتاسم:هادشي لي بغيت انك تكوني فرحانة و مرتاحة
رواء بتاسمات:شكرا حبي احمم شنو الموضوع لي قلتي ليا باغي حتى نتلاقاو و ندويو فيه؟
أديب بجدية:ماعرفتش كيفاش نبدا الهضرة ولكن بعد تفكير مطول لقيت انه سكوتي على هادشي تيخليني مشارك بطريقة غير مباشرة فيه و بغيت نحييد عليا هاد الحمل الثقيل
رواء خلعها:انا تنسمعك غير قول
أديب:صاحبي سنمار لي هو خطيب صاحبتك...
رواء:مالو؟
أديب تنهد: تيخونها ففرنسا مع واحد الگاورية....
رواء حلات فيه فمها بصدمة:ك كيفاااش؟؟
أديب تنهد:وي هادشي ليكاين
رواء:يمكن راك شاد فيا لا؟
أديب:نتي عارفاني مزيان بلي وقت الضحك ضحك و وقت الصح صح
اديب:و هادشي علاش قلتها ليك كونما كانت بنت الناس كون مغنفقدش دابا الصحبة ديالي
رواء:لا ا اديب نكون بلاصتك بحال هاداك منعتابروش صاحبي(هزات صاكها)مرة خرى ان شاء الله و نفطرو مجموعين خصني نعلم رفيف هاد اللعب غيوقف هنا
عطاتو بضهرها و مشات بخطوات متسارعة و يديها مدخلاها فالصاك تتقلب على التيلي حتى لقاتو و دوزات المكالمة...
عند رفيف لي كانت فالخدمة تتستف و تقاد فالمكياج لي غتستعملو اليوم حتى صونا التيلي ديالها و جاوبات...
رفيف:الو؟
رواء تتلهت بسبب خطواتها المتسارعة و تتقلب براسها على شي طاكسي:رفييف
رفيف باستغراب:مالكي؟؟
رواء:عطيني عنوان الشركة فين جات نجي لعندك دابا
رفيف:ههه اويلي على النبوري؟كاع هدا وحش؟
رواء شييرات لطاكسي:سيفطيه ليا فميساج نوصل و نقول ليك
رفيف:واخا
قطعات و سيفطات ليها العنوان و فنفس الوقت طلعات
رواء و وراتو لمول الطاكسي لي داها لتما...
بعد مدة ديال الوقت وصلات رواء و سولات عند الإستقبال لي وراتها فين كاين طابق المايكاب ارتيستس..طلعات فالسانسور حتى وصلها لطابق و سولات تما حتى وراوها مكان عمل رفيف مفتاح هاد الأخيرة لي كانت تتسنا فيها و بالها مشغول من طريقة كلامها فالتيليفون...
رواء:رفيف!
رفيف ناضت لعندها:اش كاين ا رواء طريقة كلامك فالتيلي ماعجباتنيش
رواء بلعات ريقها بتوتر:ماعرفتش اختي منين نبدا ليك
رفيف:واش شي حاجة عليك و على أديب؟؟
رواء:ل لا لاا عليك نتي...
رفيف هزات حجبانها بإستغراب:كيفاش عليا انا؟
رواء تنهدات و خدات نفس عميق:عفاك شدي فراسك و ماتديري حتى شي ردة فعل خايبة عفااك
رواء حطات يديها لي تيترعدو على كتاف رفيف لي طلعات فيها راسها:خ خطييبك سنمار
رفيف قلبها بدا تيضرب بالجهد:م..مالو؟؟؟
رواء:عندو امرأة خرى فحياتو..خطيبك لي تتحلمي يتزوجك و يطلعك لفرنسا هو أصلاا مصاحب فيها مع گاورية!!!...
رفيف خرجات فيها عينيها بصدمة:ش ش شنووو؟؟عاودي؟؟؟!!!
رواء: و الله احبيبتي متنكدب عليك صاحبو لي هو اديب لي قالها ليا و متيكدبش هادشي ليكاين
رفيف زلقات ليها الضحكة من هول الصدمة:ههههه صدق شكي فمحلو..صدق لي خايفة منو هو لي صحيح...
رواء عنقاتها بجهد عرفاتها تأثرات بزاف:تهدني عفااك ماشي هوو اول و اخر وااحد
رفيف تتشوف فالحيط لي مقابل معاها و عينيها بدات تتبان فيهوم لمعة الدموع لي حابساهوم:هي مابقيناش مخطوبين ياك؟مغنتزوجوش مزال ياك؟
رواء شافت فيها بحزن:الخيانة ديالو تتنهي العلاقة ديالكوم...
رفيف تنهدات بعمق و بدات تتهرب فعينيها و تشوف فأي حاجة من غير وجه رواء...
رواء:عارفة بلي هادشي صعيييب ولكن فهاد اللحظة بغيت برود انثى برج العذرااء بغييت قووة شخصييتك تبااان فهاد الموقف
رفيف عضات فشفتها التحتانية و بعد ثواني من التفكير مشات هزات صاكها حتى جبدات منو بانضة و جمعات بيها شعرها فاش سالات حطاتو على كتافها و شافت فرواء بعينيها لي قربو يهبطو منهوم الدموع:حتال هنا و حبس ماشي انا لي يتلعب بيا هه للأسف ختار الشخص الغلط...
رواء شداتها:شنو غتديري؟؟؟
رفيف:غير طلقي هاد القوة غتشوفيها دابا...
رواء طلقات منها:واش نقدر نعاونك فشي حاجة؟
رفيف:لا نتي غير سيري لدار دابا ولا فينما بغيتي انا غنتكلف
رواء:واش متأكدة؟؟واش غتكوني بيخير؟
رفيف:صافي ا رواء ديري لي قلتو ليك
عنقاتها رواء و مشات تضور و تضرب طليلة عليها حتى هبطات..بقات رفيف تتشوف فيها حتى غبرات قدامها و هي تمشي ديريكت قاصدة البيرو ديال شيارا...
شيارا سمعات الدقان:وي تفضل
دخلات عليها رفيف بعدما دوزات صباعها تحت عينيها:سلام مدام
شيارا حطات الستيلو و شبكات يديها:وي مادموزيل مفتاح؟
رفيف:بغيت نمشي لدارنا دابا عندي امر طارئ
شيارا:دقائق تيفصلوك على العمل ا مادموزيل
رفيف:غنرجع دغيا دغيا غير خليني
شيارا:لبارح عطيتك نهار خاوي حيت جيتي من جيهة مدام بنان ولكن اليوم عندنا خدمة كتيرة و محتاجين ليد تعاون خصوصا بحالك لي عندهوم موهبة
رفيف مامسالياش لقوة الهضرة:مغتخلينيش دابا ياك؟
شيارا:للأسف ميمكنش ليا
رفيف:اوكي
خرجات رفيف من تما و رجعات لمكان عملها و بقات تمشي و تجي تما بتوتر و عقلها تيفكر فشي تخريجة حتى تفكراتو! و من غيره؟ نعم انه صديقها الجديد!
مشات دغيا تتجري و صاكها لاصق فكتفها حتى شدات السانسور و طلعات لطابق لمانادجرز...
السكريتيرة شافتها داخلة مدرمة و هي توقفها بالفرنسية:فين غادية ا مادموزيل؟
رفيف واقفة و باينة زربانة:بغيت نشوف موسيو فابيو
السكريتيرة:عندك معاه موعد؟
رفيف:لا
السكريتيرة:اذن شديه و رجعي مرة اخرى
رفيف وقفاتها:لا دابا راه امر طارئ
السكريتيرة:القوانين هوما القوانين ا مادموزيل مايمكنش تدخلي عند المانادجر غير هكاك و خصوصا مستر فابيو اليد اليمنى لمستر قوس
رفيف ماسمعاتش منها خلاتها حتى بغات تمشي و هي تضربها بجرية حتى وقفات قدام البيرو تدق فيه و السكريتيرة تبعاتها تتخاصم..فابيو لي كان مكونسونطري مع خدمتو حتى سمع دقان مجهد خلاه يعقد حجبانو من هاد الوقاحة..حط وراقو و ناض حل الباب لقا رفيف تتعاير مع السكريتيرة...
فابيو بجدية:يمكن ليا نعرف اش واقع قدام البيرو ديالي؟
فابيو هز سماعة الفيكس بلا مايجاوبها و دووز المكالمة لشيارا لي جاوباتو فنفس الوقت رفيف تنهدات براحة حيت قبل بطلبها و بقات تسنا حتى كمل و حط السماعة...
فابيو ناض حتى هز الجاكيت ديالو:تفضلي
رفيف باستغراب:كيفاش نتفضل؟
فابيو:شيارا وافقات و دابا غنوصلك لتما
رفيف:و ولكن راك خدام؟
فابيو:عندي النهار كاملو ولكن نتي محتاجة للمساعدة فهاد اللحظة
رفيف بتاسمات وسط من الألم ديالها حيت فلحظة حساسة بحال هادي لقات لي يساندها و يساعدها:شكرا بزاف...
فنفس الوقت فييقات لوليا عذراء حتى وجدات راسها و مشاو شدو طاكسي للبرطمة ديال رئال و رسيل باش يجيبو عائلة رسيل فطور العروسة حيت عائلة البنت هي لي تتكلف بيه و عائلة الرجل تيتكلفو بالضيافة و الغدا...
فالبرطمة...
فاقت رسيل على صوت المنبه د تيليفونها و بدات تفوه..حكات عينيها مزيان و بتاسمات فاش شافت حب حياتها ناعس فهدوء حداها..ناضت من الناموسية بجسدها العاري المتبقي من علاقتهوم الحميمية لي خاضوها فالليلة الماضية حتى هزات فوطة و مشات تدوش و تقاد حالتها...
بعد مدة ديال الطريق وقفات الطاكسي و هبطات لوليا مع عذراء و هبطو معاهوم لي جابوه...
لوليا: شوفي قدامك لاتكركبي و نتي اصلا مكركبة من عندو
عذراء:حشيان الهضرة هدا ا الواليدة
لوليا:سرسري راني هازة جوج طباسل
سرسات عذراء و حلات ليهوم رسيل لابسة قفيطين جوهرة فالبيض مطرز بالذهبي و مقادة شعرها و وجهها...
رسيل:صبري نعاونك ا خالتي
لوليا دخلات:لا ا بنييتي راكي عروسة انا و مك لي غنديرو كلشي اليوم
تبعاتها عذراء بعدما تسالمو و حطو كلشي فالكوزينة...
عذراء مبتسمة:رتاحيتي شوية؟
رسيل:الحمد الله ربي خليك فين رفيف؟علاش ماجاتش معاكوم؟
لوليا جلسات فالصالون:راها خدامة ابنتي
رسيل:اه خسارة الله يعاونها
عذراء جلسات حدا مها كيفما موالفة ديما لا هي ولا ختها و رسيل جلسات قدامهوم:رئال تيوجد راسو شوية غيخرج
لوليا:غير خليه على خاطرو شفت دواني تعطلات
رسيل حدرات عينيها:ماقالت ليا والو
تسمع السرسار و هي تنوض رسيل حتى حلات لقاتهوم ختها ديالا مع سلافا و دواني و بنات العائلة..دخلو و حطو الخير كاملو لي جابو و منهوم الدفوع ديالها حيت هادي هي العادة...
ناضو لوليا و عذراء سلمو معاهوم و تجمعو فداك الصالون المغريبي مجمعين حتى دخل عليهوم رئال لي لابس جلابتو البيضة و معطر بالبارفان باينة فيه عريس جديد..سلم عليهوم و خرج لعند الرجال لي كانو تيتسناو فالتحت باش يمشيو يتجمعو فالقهوة و يخليو العيالات و البنات على راحتهوم...
عذراء:ياكما نعاونكوم اخالتي؟
دواني:لا ا بنتي غير سيري جلسي عند البنات شحال هادي ماتجمعتو كاملين
مشات عذراء جلسات مع البنات و بداو فالجماعة حتى حطو داك الفطور و فطرو مجموعين...
فنفس الوقت عاد بلاصات طونوبيلة فابيو فالشارع لي فيه درب دار عائلة رفيف و هي تفكر هاد الأخيرة واحد الحاجة...
رفيف شدات راسها بتوبيخ:اففففف مرررض صاافيي
فابيو:اش واقع؟
رفيف:نسيت بلي غيتجمعو عند خويا لي تزوج البارح
فابيو:و شغتديري دابا؟
رفيف:معرفتش
فابيو:نمشيو نجلسو فمقهى هادئ تسترجعي هدوئك فيه بعدا؟
رفيف بتردد:زعمة؟
فابيو:الى مكانش عندك شي مشكل
رفيف:تنضن احسن من نتسنا على نار بوحدي فالدار
بتاسم فابيو و ضوور الكيدون باش يمشيو للوجهة لي قال ليها اما هي بقات ساهية فالزاج تتحاول تخطط كيفاش غتفرقع هاد الرمانة عليهوم...
سالا الفطور و جمعو البنات ماعنو و تعاونو حتى غسلوهوم..و رجعو جلسو تيتحتتو حيت لوليا ديجا ضوموندات الغدا عند واحد المرأة طيابة و غيوصلها كلشي حتال الدار فضلات تدير هكاك باش يدوزو وقييت مع بعضياتهوم ماشي يبقاو واقفين فالكوزينة لي متيتسالاش شغلها...
فمقر جريدة الأبراج كانت نواهل غادية فالكولوار بفستان اسود لاصق على معالم انوثتها الرشيقة و شعرها مطلعاه كودشوفال للفوق مع اخراج البعض من خصلاتو من القدام..كانت غادية بإبتسامة ساحرة على وجهها و عينيها متلئلئة بالأمل هازة فيديها بعض الملفات حتى وقفات قدام البيرو ديالو..دقات و دخلات بعدما سمح ليها بالدخول و بقات واقفة قدامو...
نواهل:صباح الخير موسيو برناس
برناس بتاسم:صباح النور نواهل لباس عليك؟
نواهل:ااه لباس الحمد الله ونتا؟
برناس:بيخير كاين شي خبر جديد؟
نواهل:لا موسيو هادو غير بعض الملفات ساليت الخدمة عليهوم لبارح بليل
برناس:واخا حطيهوم هنا و قربي نوريك لمستي الأخيرة على هاد السبق الصحفي
قربات منو خافية ابتسامتها المتحمسة حتى وقفات بجنبو هو لي جالس..نواهل حدرات راسها تتشوف فيه من الخلف و تسقي عيونها العاشقة و تروي احاسيسها من جيهتو حتى سمعاتو دوا:و هاد البارتي عجبني بزاف
نواهل حدرات حتى قرب حنكها من حنكو و طلع عبق عطرها الأنثوي مختارق نيفو هادشي لي زعزع استقرارو و تركيزو خصوصا قربها منو...
برناس بتوتر: صافي يمكن ليك تفضلي
نواهل بعدات منو:اوكي موسيو
خرجات و سدات الباب موراها مخلياه شاد راسو من داك الشعور لي جاه فثواني و حسو زعزع حبو المقدس من جيهة خطيبتو...
اما خطيبتو لي هاز ليها الهم خدات وقييت لراسها و سدات عليها فالطواليت المكان الوحيد لي ضامنة فيه مكاين لي غيتطفل على خصوصيتها..جبدات التيلي ديالها و بدات تسيفط فصورها بالتكشيطة من لي دارت فالعرس لقوس و حتى ديال دابا فالفطور..خلات ليه ميساج تتسولو على احوالو و رجعات جلسات معاهوم...
فلاتيراس ديال واحد المقهى تيطل على البحر كانت جالسة رفيف فطبلة مع فابيو و قدامهوم طلباتهوم لي خداو...
رفيف تنهدات براحة:شحال هادي ماجيت للبحر...
فابيو:البحر من ضمن اكتر الأماكن لي تتبعث الهدوء و الإسترخاء فالنفس
رفيف:عندك الحق غير ريحتو و هاد الهوا و الصداع لي بعدنا منو حسسني بالكالم
فابيو شرب من قهوتو:على الأقل تهدنتي مقارنة من فاش جيتي عندي للبيرو
رفيف:اه عندك الحق
فابيو:شوفي ا رفيف انا مغنسولكش اش واقع معاك ولكن كيفما كان هادشي حاولي تحليه بطريقة سليمة لي و مغتضركش
رفيف:لا متخافش كلشي غيكون كيفما بغيت
فابيو:تنتمنى هادشي
رفيف:شكرا ليك بزاف عمرني نسا خيرك واخا قلتي حنا اصدقاء ولكن تواضعك و تعاملك معايا كل مرة تنتصدم فيه
فابيو:مكاين لاش تحسي بالإستغراب انا هكا داير مع الناس لي قراب ليا
رفيف طلعات فيه راسها:يعني انا قريبة ليك؟
فابيو بتاسم:وليتي قريبة ليا
رفيف بتاسمات:شرف ليا هه
فابيو:واش تيديرونجيك العمل مع شيارا؟
رفيف:اصلا عاد بديت ههه هي ضريفة غير هو بحال هاد الموقف لي طحت فيه ماقدراتوش كونما نتا كون راني تنخدم دابا للعارضات بزز و عقلي غيخرج من بلاصتو ماكتافيتيش بمساعدتي فقط بل هدنتيني بهاد الدعوة
فابيو حط يديه على كتفها بابتسامة:هادشي حيت تتستاهلي لطفي...
رفيف بتاسمات:ربي خليك
فابيو رد ليها الإبتسامة و خلاها مكونسونطرية مع البحر مابغاش يصدعها حيت عارف كيفما كانت الحاجة لي مديرونجياها ماخصوش يزيد عليها بالهضرة...
فشركة Bens-Naht كان مالكها قوس جالس فالبيرو ديالو حتى سمع لرنة هاتفو، هزو و لقا ميساجات حبيبة قلبو عذراء..دخل للمحادثة و بدات ابتسامتو تتوسع فوجهو لي بانت عليه البشاشة و هو تيشوف فجمالها و أناقتها باللباس المغريبي لي بيين جمالها بطريقة جديدة عليه حيت عمرو شافها لابسة شي حاجة هكاك..حط يدو الثانية على التيلي و هو ساهي فالجمال لي تيملكو(عذرائو)و يزومي فتصاورها ولا تيعشق جميع تفاصيلها كيفما كانو..الصورة لي ضغط عليها تيبقا يزومي بابتسامة حتى تيكمل عاد يدوز للموالية حتى وصل لآخر حاجة لي هو ميساجها..كمل قرائتو و دوز مكالمتو ليها نيشان من بعد اشباع انضارو و عيونو جا الدور على ادانو و مسامعو تستمتع بنغمات صوتها العفوي الرقيق...
عذراء لي كانت مع البنات حتى شافت المتصل و هي تنوض دغيا من وسطهوم حتى سدات عليها فالطواليت و بدات تدوي بشوية...
عذراء بفرحة:صباح الخير قوسي لباس عليك؟
قوس سد عينيه بابتسامة لثواني و رجع حلهوم هاد "قوسي" العفوية بدات تتزيد تلعب ليه بيها على احاسيسو:توحشتك My Beauty(جمالي)
عذراء بتاسمات بخجل:حتى انا..شفتي التصاور؟
قوس:شفتهوم و دابا باغي نسمع الصوت
عذراء حشمانة و تتلوا غير بوحدها:ا ااه راك تتسمعو دابا
قوس:حسيت فيه بنبرتك الخجولة ههه
عذراء تتلعب بضفيرات شعرها الصغار:وليتي عارفني
قوس:مادوزناش القليل مع بعضياتنا
عذراء:اه بصاح غدا غنرجع للخدمة ان شاء الله
قوس:اه غدا الجمعة امم دوزي عندي فالعشية
عذراء فرحات:واخاا
قوس:نخليك دابا اسمتعي بوقتك
عذراء:طهلا فراسك
قطعات بفرحة كبييرة يااه شحااال حمقها صوتو فالتيليفون و شحال حساتو قريب منها فكرها فالإحساس لي شدها فاش همس فودنها اخر مرة..جمعات تيليفونها و رجعات لعندهوم باش يكملو هاد الغدا و يفرقو المجمع...
داز الوقت و وصلات العشية لي لقات رفيف قدام دارهوم بعدما دوزات نهارها مع فابيو لي حسات بالراحة و الهدوء بفضلو..حسات بصفاء ذهنها مقارنة بديك الفترة لي عرفات فيها بالخيانة لي قتارفها الخطيب المصون ديالها ولكن لي معارفوش هاد الأخير هو هاد الخطيبة مامهاوشاش على الزواج بحال كيف يتصحاب ليه كانت مجرد انثى عاشقة تبحث عن الإستقرار و بناء حياتها مع الشخص المختار ليها ولكن للأسف طلع الشخص الغلط و هادشي متيعنيش انها غتستسلم اكيد لا هدا ماهو الا ايقاظ لقوة و برود انثى برج العذراء...
دخلات رفيف لدار لي حلاتها بالساروت ديالها و المفاجأة لي متوقعاتهاش انه يرجعو مالين الدار كاملين بل معاهوم حتى خوها ضرغام لي تيكون خدام فهاد الوقيتة يعني شد روبو حتى على قبل نهار الفطور...
لوليا:خرجتي بكري اليوم ا بنتي لا؟
باست رفيف راس مها و راس باها و سلمات على عذراء لي لاحظات شي حاجة غريبة فتحركات ختها...
عذراء تقادات فالجلسة تضور فعينيها و شافت فالدروج باش الى وقعات شي حاجة تهرب جيهتو نيشان حيت هاد الدخلة ليدايرة ختها متتبشرش بالخير...
لوليا:اش واقع؟؟ياكما خرجوك من الخدمة؟؟؟
رفيف نفات سؤالها براسها و بلعات ريقها:ولد عمي سنمار لي هو خطيبي...
ضرغام عقد حجبانو:مالو؟؟؟؟؟
رفيف تنهدات:صدق تيعرف بنت خرى و تيخوني معاها ففرنسا...
هاد الجملة الأخيرة كانت كافية تزعزع الهدوء لي كانو فيه هاد العائلة قبل متدخل لدار..الصدمة علات وجوههوم و عينيهوم خرجو فيها...
لوليا: ك كيفاااش؟؟؟
عذراء:بااش عرفتي هادشي؟؟؟
رفيف:صاحبو اديب لي من عائلة برج الثور و خطيب رواء هو لي قالها لرواء لي قالتها ليا
جلوان و ضرغام ساكتين على خزيت و غير تيسمعو لكلامها...
لوليا:متأكدة من هادشي؟؟
رفيف:ااه ا ماماا رواء مايمكنش تكدب عليااا اصلااا سنين و هو تيأجل فورااقي و كل مرة خارج ليا بشي عذر كون بغا المعقوول كوون راني مزوجة دابااا ماشي تيتفلا علياااا
ضرغام ناض بالجهد قاصد الباب يخرج حتى وقفاتو غوتة خلاتو يصقل فبلاصتو...
جلوان بصوت عالي:ضرغاااااااااام ووووووقف!
رفيف جلسات مكمشة حدا عذراء لي قفزات مخلوعة و لوليا صقلات حتى هي...
لوليا تتحاول تهدئ الأجواء:جلس اولدي الله يرضي عليك
جلس ضرغام بالنفخة و خواتاتو نقص خوفهوم شوية...
جلوان:سيري دابا لبيتك و الهضرة دابا مع الناس الكبار نوريه انا يلعب ليا بوحدة من بناتي(ناض من بلاصتو و عينيه فيهوم واحد الهدوء مرعب)
لوليا تتغمز فيهوم يطلعو اما هو انساحب خارج من الدار...
ضرغام تبعو ولكن كل واحد مشا فطريق...
عذراء تنهداات:نااااااري شوية كنت غنبول فحواايجي بالخلعة
لوليا شربات الما و جلسات:حتال باكوم و خوتكوم مامعاهوم لعب الى مشاو حتى جعرو
رفيف:و دابا يشوف كيفاش يفكها
لوليا:بنتي راكي ماشي بيخير رتاحي راك ماشي فالوضع لي خصك تكوني فيه
رفيف:واش كنتي تتسنايني نبكي و نبيين ضعفي قدامكوم؟
عذراء:بحال هكاك
رفيف:النبك مهم انا غنرتاح
لوليا:واخا و نتي اجي عاونيني
شافت عذراء فختها قبل ماتسد باب البيت و هبطات تعاون مها...
وقفات طونوبيل جلوان قدام دار كبيرة و هبط حتى سرسر عليها..حلات ليه واحد البنت شابة باينة عليها خدامة و دخلاتو حتال الصالون فين كانت متربعة الجدة سلافا بأناقتها و لباسها تتفرج فمسلسلها المفضل غير شافت ولدها طفات التلفزة بإبتسامة على وجهها..خدا رضاها و جلس حداها...
سلافا:زيارة مفاجئة من ولدي جلوان و هادشي نادر نشوفو فيه
جلوان:الواليدة..رئيسة برج العذراء ديالنا و المكلفة بشؤون عائلة مفتاح كلها...
سلافا بابتسامة:تنسمعك ا ولدي
جلوان:بنتي رفيف لي ختار الحاج الله يرحمو مع ولد رضوى
سلافا:اه سنمار مالهوم؟هوما حالة خاصة خص يتقادو وراق رفيف هو الاول عاد نشوفو العرس
جلوان تنهد:داك الولد عندو وحدة خرى تيعرفها تما و صاحبو لي قالها لصاحبة بنتي
سلافا بصدمة:كيفاش!!!مايمكنش!!
جلوان:تحققي من هادشي و نتي عارفة مزيان الإجراء لي غيوقع فاش غيطلع هادشي صحيح
سلافا:اكيد النفي من العائلة
جلوان:زيدي عليها فاش يطيح فيدي غنوريه الرجال اش تيديرو لشمايت بحالو
نرجعو لعند رفيف ليكانت مكمشة فوق ناموسييتها من بعد نهار كامل داز و هي حابسة فيه دموعها و احاسيسها المجروحة..و اخيرا ولات بوحدها و دابا غتطلق العنان لكلشي..بداية بدموعها لي هبطو بوحدهوم بلا مايتسناو حتى شي انطلاقة مرورا لقلبها لي بدا تيضرها فاش تخييلات الموقف..الحلم ديالها تهدم فجوج ثواني و بجملة وحدة فقط خرجات من فم صاحبتها..وسط من بكائها و ألمها هزات تيليفونها و بدات تدوز فصورها معاه لي تلتاقطو عام من قبل فالصيف لي فات فاش جا..بقات تتبكي بحرقة و عينيها طايبين بالبكا و تيليفونها فيديها لي تيترعدو:مكنتتتتش باغة يوقع هاااادشييييي الله ياربييي شنووو درت لييييه يدير فياااا هكاااا علااااش يخوووني علاااش مااالي انااا شنو العيييب لي فيا؟؟؟؟
كملات مشاهدتها ل التصاور و اي صورة تتشوفها ديالو ولا ديالها معاه تتمسحها..نفس الشيء مع الواتساب و الفايسبوك بلوكاتو فيهوم بجوج و مسحات نمرتو..فاش سالات مسحات معاهوم حتى دموعها و طلقات تنهيدة من اعماق قلبها...
رفيف:هاني حييدت عليا هاد لحظة الضعف و محيت وجودو الإلكتروني فحياتي و دابا خصني نمحي وجودو الواقعي حتى هو...
عذراء لي كانت واقفة عند الباب مربعة يديها:تنضن غيتمحا هادشي انا شفتو فعينين بابا
رفيف ضارت:من امتى و نتي هنا؟مادرتيش الحس
عذراء:غير دابا جيت نطل عليك و نطمأن على حالتك
رفيف:وليت بيخير كيفما سمعتي
عذراء قربات منها و عنقاتها:كلشي غيكون بيخير اختي تأكدي مزيان بلي حتال العادات و التقاليد الى تخرقو متيهمش الشخص كيفما كان يكون الأهم العادة ماتخرقش و هاد بنادم خرق هادشي(ونتي🙂)
رفيف معنقاها:بغيتو مايشوووفش النهار الزوين معاها بغيتو يحس ولو غير بشوية د الشمتة لي حسيت بيها
عذراء:اكييد غيحس اكيييد عمرو غيلقا وحدة بحالك و الى لقاها يجي يعكر ليا بخراه
عذراء:ههه هادي هي رفيف لي تنعرف و دابا اش بان ليك نكمدو عضيماتنا فالحمام؟
رفيف:صافي مشات هو نيت لي خاص
عذراء:يالاه زيدي نجمعو حوايجنا...
وصل الليل و العائلة كاملها تجمعات على العشاء من غير رئال لي ولا عايش فشقتو مع زوجتو رسيل..بقاو تياكلو و حتى واحد متجرأ يسول جلوان على اش دار حتى صونا التيلي ديالو..الكل توقف عن الأكل تيشوفو فيه حتى جبدو من جيب الجلابة و جاوب...
جلوان:مسا الخير الواليدة
لوليا خرجات عينيها فالطبسيل فاش سمعات كلمة الواليدة يعني هدا هو قصدو بالهضرة مع الناس الكبار الهضرة صافي وصلات الجدة سلافا..اما البنات بقاو غير تيشوفو فبعضياتهوم...
جلوان:واخاا غدا ان شاء الله نيت؟
جلوان:اييه احسن حاجة غدا و نطويو هاد الصفحة
جلوان:تصبحي على خير(قطع)
لوليا:احمم شنو قالت مي سلافا
جلوان حط التيلي ديالو فوق الطبلة و صوب انضارو على رفيف لي حطات الخبز من يديها و تتبرق عينيها فيه...
جلوان تنهد:خطيب صاحبتك طلع متيكدبش داكشي لي كاين
ضرغام بغضب:الحماااار لاخووور الى شديييتو مغنخلي فيييه....
جلوان هز يدو و سكت ضرغام...
جلوان شاف فلوليا:غادي تجمعي كاع داك التخربيق لي جاب لبنتي هو و عائلتو و ترضيه لمو تفرتيتة من زبلو مانلقاهاش تضور فداري مفهوم؟
لوليا:بطبيعة الحال ماتحتاجش توصي
جلوان:و غدا ان شاء الله غنتجمعو معاهوم كاملين عند الواليدة
لوليا: ان شاء الله
جلوان: و اخر حاجة..قالت ليك جداك انه تفسخات الخطوبة رسميا و دابا وليتي حرة حتى تكلف مستقبلا بخطوبتك بشخص اخور
رفيف بتاسمات فاش سمعات ديك حرة و ماتسوقاتش للكلام الأخير هي فدماغها دابا كاينة غير الخدمة و تحقق مدخولها و تعيش لراسها حتى يبان الشخص المناسب لي يستاهلها...
فنفس الوقت ففرنسا..كان جالس سنمار شاد فراسو و موراه كانت شابة شقراء مسرحة شعرها و ضاربة كيلو د المكياج لملامح وجهها البلاستيكية(فيلر و بوطوكس)و لابسة فستان فالشيبي سميطات...
عذراء وقوس الجزء 13
محتوى القصة
التنقل بين الأجزاء