نيار:سي قوس بغا يرحب بالعملاء ديالو القدام و الجدد فبلادو
عذراء:و انا مالي بغيت نمشي مع 8
سديم:ههه اويلي اصاحبتي الحفلة غتبدا مع 10
عذراء:ك ك كيفاش؟
سديم:وايه خصنا نوجدو
عذراء:و علاه عندنا منلبسو؟
نيار:شيارا عطاتنا الاذن باش نمشيو لطبقة الأزياء عند واحد المصممة تما سميتها جويس هي لي غنختارو من ازيائها
سديم:متشوووقة بزااف نلبس من تصميم شي مصممة معروفة هعه
نيار:ههه حتى انا
عذراء قدامهوم تتحمار و تصفار و العرق بدا ينزل من جبهتها من كترة الخوف كيفاش حفلة عاد غتبدا ف 10د ليل يعني امتى غتسالي هادي؟؟جبدات تيليفونها من الصاك و ضورات النمرة نيشان لرفيف...
رفيف:الو؟؟
عذراء بعدات من دوك الجوج:رفيف ختي محتاجة المساعدة ديالك عفاك
رفيف:اش واقع؟؟
عذراء:ليوم مغنساليو الخدمة حتال فوق العشرة د الليل علمي الوليدة و ديرو شي حاجة بينما جيت عفااك
رفيف خرجات عينيها:كيفاااش؟؟؟و الى ساق با لخبار؟؟؟
عذراء:عفاك حاولي ميشكو فوالو انا تايقة فيك لميمة و لبزولة لي مراضعين فيها الى معاونيني
رفيف تنهدات:واخاا واخا
عذراء:شكراا بزااف انا تايقة فيك
رفيف:غبري(قطعات)
سديم:غنمشيو دابا ا عذراء واش غادة؟
عذراء حطات صاكها و قادات لبطاقة لي فعنقها:ااه اه
مشاو بثلاثة حتى طلعو بالسانسور ل الطبقة الخاصة بالأزياء بقاو حالين فمهوم تما فالديكورات و العارضات لي غاديات جايات بداك الطول حتى مشاو عند السكريتيرة تما...
سديم:احم سلام
السكريتيرة طلعات راسها:فاش نقدر نعاونك؟
نيار:عندنا موعد مع المصممة جويس
السكريتيرة تاپات فوق لكلافيي و تأكدات:يمكن ليكوم تفضلو لعندها
عذراء:فين؟
السكريتيرة:الباب رقم 8
مشاو لتما دقو و هوما يسمعو تفضل...دخلو لقاو امرأة زوينة جالسة فبيرو خاص تترسم فالوراق...
جويس حطات القلم:جلسو
جلسو تما مقابلين معاها...
جويس:نتوما عارفين انه هدا مجرد سلف؟
سديم:ا اه قالتها لينا شيارا
جويس:نتوما غتكونو اول وحدين اتلبسو هاد التصاميم داكشي علاش بغيتكوم تخالطو مع العملاء باش تبان الاطلالة لأكبر عدد ممكن
نيار:اوكي
ناضت جويس حتى تمات جارة معاها واحد العلاقة كبيرة معلقين فيها ازياء السهرات...
جويس:ختارو
ناضت عذراء تتختار اغلبية الأزياء فاضحين ولا مقزبين و هي بطبعها عمرها عرات لحمها للعلن هزات واحد الكسوة حمرة تما طويلة حتال الأرض بليدين...اما سديم هزات كسوة كحلة قصيرة و فيها خيوط من الضهر اما نيار هز واحد الكومبلي كولو ملصق بالعقيق تيبري بحال شي كرة د الديسكو...اشارت ليهوم جويس لواحد الغرفة خارج المكتب خاصة فين يقييسو..مشاو حتى قييسو و رجعو لعندها..لخرين جاوهوم مواتيين و مقادين معاهوم الا عذراء لي جاتها مزييرة شوية...
جويس فرحانة تتشوف تصاميمها ملبوسين على بنادم من بعدما كانو محطوطين غير على الدمى:انكخوايااابل مانييفييييك
سديم:و بالنسبة ل شنو نلبسو فرجلينا؟
عذراء هبطات عينيها تتشوف فسبرديلتها و من لفوق لابسة فستان السهرات:اه عندها الحق
جويس:الأحذية ديال هاد الأزياء هاهوما هنا
تحنات للتحت ديك العلاقة كانو كريطينات الأحذية مستفين واحد فوق لاخور جبداتهوم و مداتهوم ليهوم...حييدو صبابطهوم تما و لبسوهوم...
جويس:صافي مزيااان كلشي هو هداك
سديم:صافي ا مدام ياكي؟
جويس:وي صافي
مشاو حتى بدلو تاني بحوايجهوم لي كانو لابسين و قادو ازياء جويس فالبلاستيكات الخاصة بالأزياء و خرجو من تما هازينهوم هوما و الكريطينات د الأحذية...
من بعد نهار من الخدمة و المكياج ل الجلسة التصويرية الثانية و اخيرا سالا عمل عذراء مع 7 د العشية...
و فمكان العمل ديالهوم كانو جالسين الثلاثة حاسين بالملل حيت الحفلة مغتبدا حتال 10 و دابا يالاه 7...
نيار:عضلات ترمتي طابو بالجلاس
سديم:اويلي كون تحشم
عذراء:انا نيت واش مكاينش ميدار انا مكرهتش غير نضرب طليلة فالدار و نرجع نحييد غير الهم لي عليا
نيار:لا لا باين فيك الهم
عذراء:مالك؟
سديم:زعمة حيت تتوجدي للحفلة
عذراء:ايوا شغندير راني خفت يطردوني
نيار حاط يديه تحت حنكو:اففف
عذراء طاحت فكرة عليها و هي تجبد تيليفونها:عرفتو شنو اجيو نتفرجو فالأنيم غادي يطير الوقت دغيا
سديم/نيار:الأنيم؟؟
بعد ساعة من المشاهدة....
سديم تتمسح عينيها بكلينيكس:حبقلبي ايس مااات
نيار متأثر:بقا فيا ولد الهم مسكين اكاينو ولد ********************
عذراء:مكاينش لي مبكاتوش هاد اللقطة مسكين لوفي تصدم بزاف.....
نخليوهوم تينوحو و يبكيو على ون بيس و نمشيو لواحد الغرفة من ضمن غرف قسم العارضات...
كان باب الغرفة منقوش على برا ب طريقة ايطاليك راقية باسم "روبين" و لي تيبيين انه هادي هي الغرفة الخاصة بالعارضة نمرة واحد فشركة قوس...و فلداخل د الغرفة كانت جالسة فوق واحد الفوتوي و مضورينها العارضات لخرين بحال اللفعات...
✳️الحوار بالفرنسية✳️
خناثة:معرفتش علاش مستر قوس معذب راسو باش يرحب بمجموعة من الحثالة ديال العملاء
ليڨيا:نفس الشيء فكرت فيه حتى انا مجرد مجموعة من الفقراء ههههه
روبين ناضت هازة راسها لسما كيف العادة و بمشيتها الغرورة وقفات قدام كوافوز بحال شي فيترينة خاص بالمجوهرات حلاتو و جبدات منو واحد العقد الماسي ثقيل و من تصميمو باين مصنوع بعناية...حطاتو فوق عنقها و عينيها مرة فيه مرة فوجهها و نضرتها فيها واحد النوع من الحيرة واش تلبسو ولا لا...
خناثة:روبين؟
ليڨيا مطلعة حاجبها:هي و اخيرا غتزعمي تلبسيه ولا؟
روبين ضارت عندهوم بنضرتها المتعالية:معرفتش
خناثة:ياك قلتي بلي هاد العقد مغتحطيه فعنقك غتخليه غير ديكور
روبين هزاتو تتشوف فيه:معرفتش نتوما عارفين انه هدا هدية من قوس فعيد ميلادي الفايت و ميمكنش ليا نتخييل توقع ليه شي حاجة داكشي علاش ستبعذت نلبسو بغيت غير نبقا نشوف فيه و نتأمل فجماليتو
ليڨيا:واش نتي هبيلة؟و لاش هو غيآمر يتصوب ليك عقد خاص هو و طوانگو الا و بغا يشوفك لابساهوم
خناثة:ههه فكراتني غير فجدة و التحف الاثرية لي حاطة فغرفة خاصة عندها فالفيلا
روبين رجعات حطاتو فمكانو:لا باقي لحال على لبسو
ليڨيا:نتي تعرفي ايوا خليه تما
روبين:المهم بخصوص الحفلة ضروري من حضورنا خص كلشي لي فالشركة يعرف انه حنا لفوق و غنبقاو ديما الفوق
خناثة:اكيد و علاه شنو مهمتنا هنايا من غير خطف الأضواء و الأنفاس ههه
ليڨيا:مهمتنا هي سحق اي عارضة صاعدة و التربع فقمة عرش شركة Bens-Naht هههه
روبين بتاسمات مطلعة حاجبها:اكيد انا النامبر وان و غنبقا ديما النامبر وان و قريبا مغنبقاش غير العارضة الأولى فالشركة غادي ندي مول الشركة براسو و غادي نستولي على كلشي هههههه
ليڨيا و خناثة شافو فبعضياتهوم لثواني معدودة و رجعو شافو فيها طالقين ضحكتهوم المغرورة...
فالدار ديال عذراء وصلات 9 د الليل و عذراء مزال مبان اثرها هادشي لي خلا لوليا و رفيف فتوتر كبير...
جلوان دخل ل الدار:السلام عليكم...فيناهيا عذراء؟
لوليا غير سمعات حسو و هي تخرج لعندو تتحاول تخبي توترها:راها فبيتها ناعسة عيانة من اول نهار فالخدمة
جلوان: و علاه مغتعشاش؟؟
لوليا:كلات شوية و نعسات
جلوان جلس:لعجب ممولفش ليها
رفيف:راه ا لوليد غير لعيا دارها
لوليا:انا نمشي نحط العشا
جلوان:و ضرغام و رئال مزال مجاو؟؟
لوليا:ضرغام عرضو صاحبو لعشا ايوا رئال مزال مدخل من القهوة
جلوان:واخا حطي حطي داك العشا
مشات رفيف و قلبها تيضرب للكوزينة حتى عاونات مها تعشاو و الساعة دابا تتشير ل 10 و باقي حس الكوافورة مقطوع هادشي لي زاد خوفهوم...وصات لوليا رفيف تبقا فايقة باش تحل ليها وقتما جات و مشات تابعة جلوان ينعسو...
اما عند الكوافورة لي كانت عاد مقادة مكايجها و شعرها مطلوق كيف العادة مسرح من عند الله و لابسة الكسوة الحمرة لي من تصميم المصممة جويس و الجوج لي معاها حتاهوما لابسين و مقادين الحالة و الروايح عاطيين تيجيبو الدوخة...
نيار:سربيو سربيو راه 10هادي خصنا نكونو تما
عذراء:هاني هاني وا بشوية عليك متنحملش الزربة
سديم:شيارا تتعييط تحركو
خرجو من تما لقاو شيارا حتى هي مقادة الحالة..مشاو معاها و مع عملاء خرين فسانسور حتى طلعو و هنا بدات تتسمع الموسيقى لي كانت متوسطة بين الصاخبة و الهادئة دخلو مع لباب و هنا حلات الكوافورة فمها على قدو من الديكورات و الاثاث و لي جذبها اكتر كمية الماكلة و المشروبات لي كانت فليبوفي تما...كاع لي جاو معاها تحركو الا هي لي باقة حالة فمها حتى جراتها سديم للداخل...
نيار:لا ولكن عندي القدرة نكبح نفسي اما نتي كلك تحليتي تجمعي راه البرد تيضور
سديم:اويلي حشم
نيار:بفف اش بغيتكوم
شيارا:ستمتعو بالحفلة
الثلاثة:شكرا
مشات شيارا عند صديقاتها فالعمل تما و بقاو هوما تيشوفو خصوصا عذراء باقة تتستوعب فين كاينة...
عذراء:اجيو فيا نيت الجوع من الغدا هادي
سديم:انا نيت اجي
مشاو بجوجات مخليين نيار موراهوم هزو تبصيل تما و بداو تيغرفو الماكلة تما ها المقبلات ها المملحات و الكوافورة معمرة تبصيلها و تقول واش بغات تحشم حتى سالات و هي تشوف فليكان واقف تما...
عذراء هزات تتاكل من التبصيل و تاكل و تنگر عليها حتى كملاتو:الله الحمد الله شبعت
سديم:بصحتك وا خصك اصاحبتي تعرفي كيفاش تصرفي فبحال هكدا شفتي هداك لي سولتي اتلقايه قالها لگاع لي خدامين معاه تما
عذراء:اوا صافي يقول لي بغا يقول متنصدعش راسي ب اش تيقول عليا بنادم
سديم:نتي مبقيتيش ديال راسك خصك تعرفي انه اي تصرف تيتسجل على سمعة مدام شيارا و سمعة قسم المايكاب ارتست كاملو رضي لبال ا عذراء
عذراء:وا ناري عليك ا سديم غادي تشييبيني ياختي كونو غير نتوما مزيانين انا هكا دايرة و لي بغاني مرحبا بيه
دازت و خلاتها واقفة تما و بقات غادة و معارفاش فين غادة باغية غير تبعد من الإزعاج و تستمتع بالحفلة قبل متمشي لدارهوم عارفة احتمال كبير غتهجرو داكشي علاش اللهم تستمتع و تستغل اي وقت و لحظة سعيدة فهاد الحفلة...جلسات فواحد الكرسي و بقات مراقبة الفرقة لي تتعزف و ودنيها مندامجين مع اللحن مخلية ابتسامة على شفتيها حتى وقفات عليها سديم هازة عصير فيديها...
سديم:هنا فين جالسة؟
عذراء طلعات عينيها و ميجيو غير فكاس العصير المضبب بالبرودة دار ليها العطش:ايه جلست نستاراح شوية
سديم:لي يسمعك يقول تتجري ههه
عذراء:سديم
سديم:نعام؟
عذراء:عطيني شوية(خرجات فمها تتشير جيهة العصير)
سديم مداتو ليها و ذاقتو صدق عجبها...
عذراء:بنيين ياختي فين خديتيه؟
سديم:فنفس الصف د لبوفي غير هو على ليسر و منفصل عليه
عذراء حركات ليها راسها و مشات لتما خدات نفس العصير و تمات جاية بالزربة فنفس الوقت كانت جاية روبين سابقة بتعالي و بإطلالتها الفاخرة و فيمينها و يسارها شياطينها ليڨيا و خناثة حتاهوما متيشوفوش الأرض غاديات بداك الطول متجي غير النملة بالزربة و مع روبين غادة نيشان تتشوف فالسما الكوافورة سرعتها خلاتها متفرانيش و جات نيشان لايحة العصير على روبين و مكملاها لايحة عليها ثقلها....
روبين وقفات مسمرة فبلاصتها مصدومة معارفاش اش واقع و امتى وقع خرجات الشهقة من اعماق صدرها بسبب برودة العصير و بلا متشعر دفعات عذراء حتى طاحت جالسة...
خناثة شادة روبين:روبين روبييين
روبين حركات عينيها الغاضبين جيهة عذراء:(تدوي من تحت سنانها)واش متتشوفيش
ليڨيا وقفات على عذراء تتسپيكي عليها تما بالفرونسي اما هي ممسوقاش ليها حتى جات سديم نوضاتها تما...
روبين قربات منها تتشوف فيها من الفوق و عذراء معلقة راسها فلپوطو لي قدامها...
روبين مخرجة فيها عينيها و الجوجات لي حداها تيلطفو الجو و بلي موقع والو...
روبين من تحت سنانها:واش عرفتي هاد الفستان شكون صممو و عرفتي شحال ثمنو؟!!!
عذراء:معرفتش ولكن المهم هو موقع والو لفستان جويس
روبين طلعات فيها حاجبها:كيفاش جويس؟ديك المصممة الرخيصة؟ و انا نقول نيت هاد الذوق لي لابسة ديالمن
خناثة تتهدنها:روبين كالم الحضور تيشوفو
روبين:مغنمشي حتى تنقي ليا فستاني!
ليڨيا:روبين تحركي المهم السمعة السمعة
عذراء:انا مشفتكش ولكن باش نظفو ليك انا ماشي المصبانة شوفي جمعيه و ديه لمصبنة النخيل راه خدمتهوم مزيانة يرجعوه ليك تيشعل
ناري هنا شعلاتها ديال بصاح كيفاش دابا مصبنة و النخيل حتى السمية جابت ليها الأرارة...
روبين زييرات على فمها الزيار د السم:شوفي يا القزمة غبري قدامي دابا عندك الزهر جيتيني فحفلة
دفعاتها روبين بكتفها و دازت و تبعوها دوك الجوجات بحال ليگاردكور ديالها و متجي عينيها غير على قوس واقف مع شي رجال تيسلمو معاه و قالت هادي هي الفرصة قلبات ملامح الغضب لملامح المسكينة و مشات لعندو...
قوس شافها جاية بتاسم شوية و لكن سرعان ما شاف فستانها المبقع الفازگ طلعو حواجبو باستغراب...
روبين بتعواج:قوووس
قوس:مالكي؟
روبين:وحدة خدامة هنا كبات عليا العصير
قوس:كيفاش كباتو عليك اش وقع بالضبط؟
روبين:كنت جاية و هي جاية و تلاقينا و روناتني
قوس:مشافتكش ا روبين شوفي شحال من واحد فالحفلة
روبين:ااه عرفت ولكن انا سمحت ليها حيت قلبي كبير(نعام🙄)
قوس بتاسم محرك ليها راسو و هي مبتسمة عاجبها غير هاد القرب ديالهوم من بعض حيت بحال هاد الأماكن لي تيجمعوهوم بجوج نادرا فالعمل...
خناثة:احم كيدايرة مدام فابيين؟
قوس:لباس عليها تتسلم عليكوم
ليڨيا:مغتجيش للمغرب؟
قوس طلع فيها راسو و هي تصقل حيت تجاوزات شوية حدودها بهاد السؤال...
روبين:ا ااه قريبة تجي قالتها ليا مامي
ليڨيا:اا اه مزيان
قوس ستأذن منهوم و مشا ممساليش لهضور العيالات اما هوما تجمعو بثلاثة و السم تيقطر من عينيهوم تيشوفو فبعضياتهوم...
اما الكوافورة كانت جالسة صاقلة فواحد الطاولة و حداها سديم...
سديم:صافي لي وقع وقع بلا ماديري فراسك
عذراء طلعات فيها راسها:بقا فيا غير العصير لي كنت متحمسة نشربو و تكب مسكين
سديم تجمدو ملامحها من ردة فعل هاد المخلوقة معلابالهاش بالفستان لي ساوي الملاين لي ترون ولا مولاتو لي ممكن تخرج ليها على خدمتها...
سديم:واش نتي بعقلك؟ ياناري يا عذراء واش معرفتيش شكون هاديك؟
عذراء:و انا مالي انا متنحملش المتكبرين و دابا خليني منها غنمشي نجيب عصير اخور
سديم جلساتها:لا لا غير جلسي انا نجيبو لتصدقي مرونة لينا هاد المرة مول الشركة
عذراء:ا ا لا لا الله ينجيني
سديم:هو خفتي منو و هادي لا ههه من حقك مهم هانا جاية
مشات سديم جابت العصير و جلسو تما تيتفرجو فليغادي و لي جاي حتى تسمع التيست ديال الميكرو كاع لي فديك القاعة واش ضور راسو لفين جاي الصوت..كان قوس واقف و فيديه ميكروفون مقربو من فمو...
قوس بالإنجليزية:السلام عليكم..بمناسبة هاد الحفلة تنبغي نرحب ب اي عامل او عاملة مستعد و مستعدة يخدمو شركة Bens-Naht للأزياء..تنتمنى ليكوم التوفيق و العطاء باش نزيدو نهزو بهاد المجال اكتر و اكتر و شكرا...
كاع لي تما واش حماوها تصفيقات حارة و كلشي عاجبو الحال حيت النص فيهوم معارفش حتى كيف داير مول الشركة فشكلو و النص لاخور ديجا جاي من سويسرا...الكل باقي تيصفق الا الكوافورة مخبية ليشوفها على داكشي لي دارتو بحالا هو تيليسكوب ولا اصلا مفكر واش شي وحدة بحالها تتنفس فوق الأرض...حط الميكرو فبلاصتو و رجع لنقاشاتو لي فحدود العمل اكيد...
سديم:انا باقية شوية مزال و نتاصل بمول الطاكسي لي دايرة معاه
عذراء:واخا بسلامة عليك
مشات عذراء حتى بدلات حوايجها هي و نيار و خلاوهوم لجويس فالغرفة الخاصة بتصاميمها مشات حتى نقصات عليها المكياج لي فوجهها و هزات صاكها تابعة نيار لي تيلعب بالسوارت فيديه حتى خرجو من تما و دخلو فالسانسور...
عذراء:فين غادي تهبط مزال ؟ها لباب على برا
نيار ضغط على الزر:الپارك لي فلتحت
هبط بيهوم السانسور كان پارك كبيييير تحت الأرض فيه السيارات و الماطر...بقاو غاديين و عذراء حاضية جنابها جاب ليها الله بحال دوك لبلايص ديال افلام الرعب بسبب السكون و الفراغ حتى وقف نيار قدام واحد السكوتر و طلع...
نيار:طلعي
طلعات عذراء موراه شاداه من خصرو و حشمانة من ديك الشدة...
نيار:شدي فيا مزيان الى طحتي ماشي شغلي
زييرات عليه عذراء و ديمارا خارجين من تما حتى خرجو فالشانطي...
عذراء:سير لحي الأمل و من بعد غنعت ليك
نيار:اوكي
بقاو غاديين شحال حتى قربات لدارهوم و هو يحطها...
نيار:صافي؟
عذراء هبطات:ربي خليك شكرا بزااف
نيار:هانية يالاه تلاحي
مشا نيار و خلا عذراء حاضية جنابها الدنيا صاقلة و كلشي ناعس و ساد عليه فدارو...بقات غادة بشوية عليها حتى وقفات قدام باب دارهوم بان ليها الضو مطفي و هي تجبد تيليفونها سيفطات ميساج لرفيف فيه تحل ليها لباب ماهيا الا ثواني معدودة حتى تحل لباب بشوية و دخلات....
رفيف كانت شاعلة لپيل د التيلي ديالها و غادة تتسلت حفيانة جارة معاها عذراء و الدار مظلمة حتى طلعو لبيتهوم و سدو عليهوم عاد قدرات تنفس...
رفيف:نوضي تگعدي تنعسي بفو على سلعة بسبابك كان غيسكت ليا القلب لا انا لا الوليدة
عذراء تتبدل حوايجها:و تشوفي انا ولكن فاش وصيتك عرفتك غتعتقيني
رفيف:متبقايش تعولي عليا و هادشي مدايمش ليك سمعتي و دابا خليني نرگد وكلت عليك الله
تخشات رفيف فالمانطة ديالها و عطاتها بضهرها اما عذراء غير بدلات حوايجها مسحات وجهها بديماكييون..رطباتو و تكات فناموسييتها حققات لالارم د تيلي و نعسات...
🌞فالصباح الباكر🌞
و فالشركة كان قوس فواحد الإجتماع تيخص واحد العرض غادي يتقام الشهر الجاي و المنادجرز ديالو فنقاش عليه و فشغيكون تما و بزاف ديال الاقتراحات حتى كمل و كل واحد استاذن من بعد السماح ليهوم بالخروج...
خرج قوس من القاعة الخاصة بالإجتماعات و يالاه بغا يدخل للبيرو ديالو حتى تتوقف عليه السكريتيرة...
السكريتيرة:مستر قوس...
طلع فيها غير حاجبو تيتسناها اش غتقول...
السكريتيرة:توصلت من المنادجر فابيو بدعوة للغداء اليوم من طرف مدام...
قبل متكمل هضرتها:يرفضها
السكريتيرة:اوكي مستر
دخل للبيرو ديالو اما هي رجعات لخدمتها...
فقسم المايكاب ارتيست كانت الكوافورة عاد جاية ضاربة كسوة طويلة فالغوز مفتوح باليدين و شعرها ديما مليوح مطلوق نادرا فاش تتجمعو..حطات صاكها فبلاصتها تقابلات مع المرايا تتقاد فلكارط ديالها فعنقها و حقيبة فرش المايكاب تتقادها مع خصرها كلشي هو هاداك...
سديم:صباح الخير عذراء
عذراء:صباح النور سديم لباس؟
سديم:بيخير و نتي ههه
عذراء:لباس باينة فيك سهرتي لبارح
سديم:اه ياختي مسخيتش بالحفلة
عذراء:سعداتك ماماك طالقة ليك السمطة
سديم:حيت عرفات انه داك التشدد مغينفع بوالو و اللهم تعرفني فين غادية و اش تندير بخبارها ولا تزييرني و ندير نفس الحوايج مورا ضهرها
عذراء بلعات ريقها تضور فعينيها: ا ااه اه بصاح
سديم:مبانش ليا نيار متلاقيتوش فالتحت؟
عذراء:لا جيت ديريكت كان تما خاوي من الغير البنت لي فالاستقبال(رضات ليها لبال بعدا)
شيارا:اوكي المهم اليوم عندنا مقابلة فواحد الجريدة غيتحطو فيها بعض التصاميم فالصفحة الخاصة بالموضة و بغيتكوم تجيو تقادو للعارضات كيف العادة...
مشاو معاها فالسانسور حتى مشاو لمكان العمل...
من بعدما سالاو وصلات وقت الغدا و مشاو لقاعة الأكل كانت عامرة بحكم قاعة مخلطين فيها جميع عمال الأقسام...هزو طباسلهوم و خداو اكلهوم و مشاو جلسو فواحد الطاولة...
عذراء شافت فالساعة:باقي الوقت بعدا شكنت غندير بلا بيك
سديم:خصك تبقاي تعقلي اصاحبتي
تسمعات رنة الهاتف لي قفزات عذراء و جبداتو دغيا من الحقيبة الخاصة بالفرش...
رواء مكشكشة:ايوا ا ل*حبة مشينا مزال ل المقاطعة؟
عذراء:اويلي لا سلام لا كلام
رواء:شغندير معاك شغندير واش فيك الزهايمر
عذراء شادة راسها:اربي ماسمحي ليااا
رواء:وااش لمك ديما هكاا شي نهار نقجك و نتهنا منك
عذراء:شوفي نسالي من واحد الرونديفو و نجي عندك فين راكي؟
رواء:هاني منشورة فصالونكوم و ختك واقفة عليا
عذراء:نسالي و نجي صافي بقاي تما
قطعات عليها رواء و هي رجعات تتاكل...
سديم:باينة نسيتي شي حاجة تاني
ضورات فيها عينيها و دوزاتها بالما اما سديم فهمات انه كلامها صحيح غير من دوك الشوفات...
من بعدما كلات هزات مشوار و مسحات فمها دغيا...
عذراء:يالاه هاني غادة
سديم:واخا انا غتلقايني فمكان العمل
مشات عذراء غادة باش تشد السانسور و فواحد اللحظة حسات بوجع خفيف فكرشها ستغربات حيت ليغيكل مزال موصلات وقيتها فالشهر ضغطات على الزر و تحل ليها السانسور و دخلات طالعة ل الطابق الخاص بالمنادجرز...السانسور تحل و مشات دخلات سولات السكريتيرة تما عليه قالت ليها دابا يجي و مشات جلسات فوق فوتوي تما فمكان مخصص للانتظار...
فنفس الوقت كان المناجدر فابيو هابط فسانسور هاز عرمة د الوراق فيديه شافتو عذراء و هي تنوض غير شافت قوس بان حداه كان عاد خرج من سانسورو الخاص و هي ترجع خطوة اللور بدهشة...
السكريتيرة:ويلي ويلي
فجأة تسمعات القهقهة و الضحك ديال السكريتيرة و العمال عذراء ضورات راسها و علامات الاستغراب فوجهها معارفاش اش ضحك هادو لقاتهوم تيشوفو فيها...
عذراء:اش تيضحك؟؟؟
السكريتيرة شييرات ليها بصبعها ل اللور و هي دور بعنقها بانت ليها طبعة قدها قداش ديال الدم بالفعل هاديك ليغيكل و غفلاتها الكلبة فوسط العمل و مكملاها لابسة كسوة فلغوز مفتوح صافي! و هنا حدرات راسها و وجهها ولا حمر تتخبي مؤخرتها بيديها بخجل...قوس سمع الضحك العالي و هو يزرب فخطواتو عاقد حجبانو مخلي فابيو حتى هو مستغرب و تابعو شكون هاد جماعة المهرجين لي يضحكو ليه فوسط اعمالهوم فشركتو! لقا الكوافورة واقفة تتخبي الطبعة و هوما تيضحكو عليها غير شافوه و هوما يسقلو مخرجين عينيهوم بخوف!
عذراء طلعات راسها لقاتو واقف حداها حتى هي خافت و بطبيعة الحال راه مول الشركة هدا...
و بعينيه لغاضبين نييشهوم نيشان على السكريتيرة و بصوتو الرجولي و نبرتو المخاطبة بصرامة:شنو لي تيضحك؟!!!
السكريتيرة تسرط لسانها ولا فيها بوتفتاف:م م مستر مستر...
قوس رفع من صوتو زعزعها من بلاصتها:شنو تيضحك!!!!
السكريتيرة تكمشات مغطية وجهها و هي تشيير ليه ل الكوافورة..هز عينو منها و شاف فعذراء لي كانت مغطية مؤخرتها بيديها و حادرة راسها بخجل...
قوس:مالك نتيا؟؟؟
عذراء قفزها مجاوباتوش...شاف فيديها و هو يبان ليه طرف من توب الكسوة فيه طبعة حمرة و عرف انها العادة الشهرية...و فوسط من خجلها قرب منها قوس حتى وقف عليها غطاها كاملها بداك الطول و العرض مبقاتش تتبان لفابيو لي كان واقف متسائل...حتى بدا تيبان ليهوم تيحييد فلڨيست ديالو الأنيقة و بقا بالقميجة المزييرة على عضلاتو...حسات عذراء بشي حاجة حاوطاتها و تحطات فوق كتافها طلعات راسها فيه لقاتو حاط عليها لفيست ديالو و يديه فوق كتافها بقات شحال تتشوف فيه و فدماغها متسائلة واش نيت هدا لي دفعها و عاملها بخشونة داك النهار فاش دخلات لسانسورو؟؟مضحكش عليها بحال الخرين و معاملهاش هاد المرة بديك الطريقة بلعكس تفهم الموقف و سكت لي ضحكو عليها و لي زاد اعجابها هو تصرفو الرجولي فاش عطاها الفيست ديالو و لي العالم الله شحال ساوي ثمنها هادشي لي خلا ابتسامة ترسم ف شفتيها اما هو فمبادلها النضرة لثواني تيشوف فوجهها...
قوس:واش بيخير؟
عذراء حركات ليه غير راسها ب اه..هز عينيه منها و شاف بحجبانو المعقودين فالعمال و نطق...
قوس رفع من صوتو:اخر مرة نشوف هاد التصرف فالشركة ديالي!!!
عذراء قفزات حداه مزييرة على لفيست لي مغطية ليها فضيحتها اما لخرين تيترعدو حيت عارفين مزيان بلي حتال الخدمة قوس بنسليمان متيرحمش!
قوس بصرامة:منلقااا حتاشي واحد واقف مزال هنا!!!!
العمال تشتتو و كل واحد رجع لخدمتو...
ضار عند فابيو لي كان واقف عادي حيت ماشي اول مرة يشوف قوس بهاد الصرامة...
قوس عطاها بضهرو بغا ينصارف و هي طلعات فيه عينيها مبتسمة حتى نطقات بتوتر:ش ش شكرا
ضار شاف فيها و بتاسم فوجهها بابتسامة خفيفة و زاد...
فابيو قرب منها:(بالإنجليزية) بيخير ا انسة؟
عذراء عينيها ف قوس لي غادي و مخلي ليها لفيست ديالو...
فابيو:انسة؟
عذراء:ام اا موسيو فابيو جيت على ود داك الموعد و...
فابيو:واخا تبعيني للبيرو
سبقها هو و تبعاتو عذراء حتى دخلو للبيرو...
فابيو جلس و هي تبقا واقفة خافت تجلس و تطبع الفوتوي ولا الفيست ديال قوس...
فابيو طلع فيها راسو واقفة عليه بحال العسكري:جلسي
عذراء بخجل:منقدرش
فابيو:جلسي راه كاينين وسائل التنظيف
عذراء جلسات باقة حشمانة من الموقف...اما فابيو شعل لبيسي ديالو...
فابيو:ميسز موفتاه ياك؟
عذراء:ا ااه
جبدات تيليفونها و مداتو ليه اما هو خدا المعلومات و سجل داكشي كاملو و اخيرا الكوافورة ولا عندها كونط و سدات سيرتو شكراتو و استئذنات منو....
خرجات من تما و سلكات نفس الطريق لي جات منها لقات كلشي حاني راسو فخدمتو كملات طريقها و تتقول فدماغها ايه ا شنو تيديرو المكانة و الفلوس فبنادم ولاو بحال الدجاج من بعد ماكانو تيقاقيو بالضحك عليها...رجعات لمكان عملها لقات سديم تتستف فالمكياج و تقاد فيه فاش شافتها استغربات...
ناضت سديم مشات عند لبيرو ديال شيارا و عذراء بقات تتشوف فالحيوطا حتى جات عندها...
شيارا بدهشة:اويلي على حالة
عذراء:غفلاتني ا مدام بنت الحرام غفلاتني
شيارا بقات فيها:نوضي نوضي اجي معايا اجي
ناضت عذراء و شداتها شيارا من كتافها جاراها معاها مخرجاها من تما طلعو فالسانسور حتى طلعو لقسم الأزياء..جبدات شيارا لكارط ديالها و خشاتها فواحد المكان مخصص حدا الباب كتبات الكود لي كان متكون من 4 ديال الأرقام و هو يتحل الباب...دخلات و عذراء تابعاها كان تما بحال شي مخزن كان مظلم و عامر بالحوايج المعلقين مغلفين فميكات مخصصين للملابس باش يحافضو عليهوم...
شيارا شعلات الضو:خودي لي بغيتي تلبسيه و سيري لطواليت غنعطيك فوطة صحية جاب الله عندي
عذراء:علاه باقي تتجيك ليغيكل؟
شيارا خنزرات فيها اما هي جمعاتها دغيا و مشات نيشان تتعزل و هي تهز واحد التيشورت طويل بسروالو داييرين بحال سورفيت فلبلومارين و فيه شي كتبة بيضة...
شيارا:بخصوص الملابس الداخلية ها فين محطوطين
عذراء:واش نقيين بعدا؟
شيارا:اكيد نقيين هادو راه التصاميم لي دازت الصيحة و المواسم ديالهوم
عذراء:اه واخا
مشات عذراء حتى هزات كيلوط من دوك الملابس الداخلية جاب الله كان عبارها تما حيت هي عامرة شوية و العارضات تيكونو رقاقات...
شيارا:صافي هزيتي لي بغيتي؟
عذراء:ايه صافي شكرا بزاف
شيارا:العفو مرة خرى بقاي ديما تهزي معاك لباس داخلي و فوطة صحية تحسبا لبحال هاد المواقف المحرجة
عذراء:واخا
شيارا:المهم زيدي نديك تغسلي حالتك
عذراء:علاه كاين دوش هنايا؟
شيارا:اكيد كاين
خرجو من تما و داتها شيارا للحمام الخاص كانت طواليت كبيرة و فيها مكان الاستحمام و حداه مكان مخصص للفوط سوا د الجسم سوا د الشعر و ليبرودوي كانو ديال واحد الشركة تابعة لشركة قوس...
عذراء:اويلي على لابوبيل و انا كنت تنجمع ليها فلوسها درهم درهم باش نشريها بالتخفيض مزال
شيارا:غيقصاح فيها داكشي و غيصعب يخرج فيه خصوصا و اللون مفتوح
عذراء:غنصبنها بيدي هنايا
شيارا:ديري لي عجبك
خرجات شيارا من تما اما عذراء سدات الحمام و قفلاتو من الداخل بدات بالفيستة هي الاولى حييداتها و علقاتها فمكان مخصص تما و نصلات لكسوة المطبوعة تبعاتها الكولون و البقية دخلات دوشات حتى نقات حالتها مزيان من غير شعرها نشفات جسمها و لبسات دوك الحوايج مع الفوطة الصحية و عاد قدرات ترتاح و تنفس مزيان دابا..هزات الكسوة و الطبعة قدها قداش شادة ليها مكان المؤخرة كولو بدات تتصبنها بيديها و تفرك بصباعها الدم تطلق فالما لي ولا حمر ولكن الطبعة غير بهاتت ممشاتش بقات على الحكان والو و هي تلوحها فطارو بزعف و يديها كلها تتقطر بالما غسلاتهوم بالصابون و نشفاتهوم..قادات شعرها و شافت فوجهها كلشي هو هاداك رجعات شافت فالفيستة المعلقة و هي تبتاسم فاش تفكرات داك الموقف رجعات خصلة شعرها ورا ودنيها تتبتاسم و حشمانة غير بوحدها حتى مشات هزاتها بين يديها و خرجات من تما...رجعات لقسم المايكاب ارتست و نيشان مشات حتى طوات لفيستة و خباتها فصاكها..دخلات سديم لقاتها عاطياها بضهرها...
سديم:لباس بعدا لقيتي متلبسي
عذراء طلعات راسها و سدات الصاك:وايه عتقاتني شيارا بعدا
سديم:جات معاك اللبسة ههه
عذراء:هه شكرا ازين
سديم:بعدا بلا متشوشي راه نيار تاصل بشيارا كيف قالت ليا و صبح مريض شوية
عذراء:اه ميكون عندو باس مسكين المهم(هزات صاكها) خصني نمشي ندفع لباسبوري يالاه غيوجد بالضبط لوقت عرض باريس
سديم:علاه غتمشي؟؟
عذراء:ا؟ متعرفي كلشي ممكن
سديم:ههه ايوا مزيان اللمة معاك حلوة سبحان الله
عذراء:هه ربي خليك احبيبتي يالاه هاني مشيت
خرجات عذراء و مشات عند شيارا خدات من عندها الاذن و خلاتها حيت ضروري خص يكون عندها باسبور خرجات من الشركة شدات طاكسي و فالطريق ديالها صونات على رواء علماتها انها جاية...
💅🏻فالصالون💄
كانت رواء جالسة تتبرد فضفارها و رفيف محييحة فالتيلي...
رفيف:كيفااش دابا الوراق مزال!!...واش تتفلا عليا ا سنمار؟؟؟...عامين دافعة ل الزمر راه الضحك هدا!!تنعرف بنات غير داك النهار مشاو ليها و انا معلقة هنا ممزوجة ما مزمرة!!...مالي معصبة؟؟شوف نتا نيت ولا ممسوقش مباغيش نولي مرتك؟؟؟!!!...شوف ا سيدي الى هادشي غيطول ضرب ليا بعدا غير عرسي و نبقا طالعة هابطة عندك غير توريست حتى يتقاد...ايه توريست ولا هاد الحالة!!...الفلوس؟؟
قطعات عليه و ضربات بالتيليفون فوق الفوتوي لي تبومبا و طاح فالأرض...تحنات حتى هزاتو لقاتو مشقق...
رفيف:تهرسات لانكاسابل تاني
رواء طلعات فيها وجهها ببرود:و هكدا....كيما العادة
رفيف:فرع ليا *ري بالوراق ماتلوراق ياكما يتصحاب ليه ناعسة على ودنيا راه و الله و مايطلعني يحتى نشتف على بوه
رواء:وي عارفاك قدها و قدودها غير كالما حيت غادي تصالحو تاني و يتعاود السيناريو و الضحية فهادشي هو غير هاد التيليفون مسكين لي مبدلة ليه ديما لانكاسابل
رفيف:افف هاد الرجال تيعصبو و الله غير ديال اففف
دخلات عذراء:السلام عليكم
رفيف طلعات راسها و هي طلعها و تهبطها بعينيها:اهياتا فين الكسوة لي خرجتي بيها الصباح؟؟
عذراء:خرجات ليا منها ليغيكل
رواء:اهيا ناري على ليغيكل
عذراء:وايه ا لبنات على بلان متصوروش
رفيف:ناري يا ل*حبة كون درتي ليهوم الحلقة
عذراء:وا شبعو فيا ضحك
رواء:كنت عارفة ضروري توري ليهوم الشونتيو ديال فضايحك حتى هوما
عذراء:وراه ماشي لخاطري مالي قلت ليها تجي قبل الوقت
رفيف:و منين ضبرتي على هاد الحوايج؟
عذراء:الباطرونة ديالي عطاتهوم ليا
رواء:شفتي بعدا كاين لي يحن فيك
عذراء:مسكينة الله يعمرها ماركة عطاتني حتى اولويز واخا معرفتش ديك السمية منين جات ولكن مهم اوليويز ههه
رفيف:المهم دازت على خير سيري دابا سيري تقضي غراضك مضييعيش الوقت
رواء ناضت لبسات نضاضرها د الشمس و رجعات بيديها شعرها المكريبي على جنب:زيدي شحال تسنيتك
جراتها و خرجو من تما و شدو طاكسي حتى قضاو الغراض ديالهوم...
نرجعو ل الشركة عند قوس لي كان ساد عليه فلبيرو ديالو و قدامو لبيسي ديالو شاعل و صبعو طالع تيتطلع فواحد الباج لي تيراقب فيها حساباتو متجي غير الكوافورة فبالو استغرب حيت اول مرة يطيح فموقف بحال هداك و لكن فديك اللحظة فاش ضحكو عليها عيواض يعاونوها و هي كيف كانت تتخبي خجلها و فضيحتها خلاتو تلقائيا يشفق عليها و تبقا فيه من خلال فاش غطاها بالفيست ديالو هاد الأخيرة لي تفكرها بلي باقة عندها ولكن عادي عندو دريسينغ فيه بحالها و احسن اخر همو شرويطة د الحوايج(واخا غالية🤣)غير هو ستغرب حيت انسان متيحملش لي يقيص ولا يقرب لحوايجو حتى جات هاد الكوافورة مولات الفضايح و لبساتها..بقا لثواني تيفكر و ذاكرتو تتستجمع ملامح وجهها لي كان مقابل مع وجهو و فراسو تيقول انه وجهها مألوف و فايت شايفو من قبل..ولكن للأسف ذاكرتو خانتو و مقدرش يتفكرها..سد البيسي ديالو و طلب ليه قهوة باش ينظم افكارو...
اما الكوافورة حتى هي القلب على القلب شادة ليها قهيوة حتى هي تسخن بيها كريشتها لي تضور بحال ماكينة التصبين بوجع خفيف و رواء قدامها تتصم فعصير لافوكا بلاباي...
عذراء:الله ياختي السخونية تتبرد الوجع
رواء:وي بصاح بعدا طرقنا مسمار لباسبور
عذراء:ياختي هازة ليه الهم بزاف نتي و رفيف لي فراسكوم واش دفعت ليه
رواء:راني عارفة غير حنا لي غيكونو عارفين علاه شكون لي تتعرفيه غيتفهم الوضع من محيطك من غيرنا؟
عذراء:عندك الحق ياختي هازة هم كبير و معرفت لمن نعاود و شكون غيعاوني 3 د الناس لي عندي فهاد الدنيا هوما نتي و ماما و ختي
رواء:لي تقالت عليك خفافت علينا اساطة راك صاحبتي
عذراء:معرفتش اش غنقول ليك حيت نتي براسك غتصدمي
رواء:ههه مبقا مجال ل الصدمات من بعد كاع لي دوزتو معاك صافي ولفت هههه
عذراء:بغيت نمشي لباريس
رواء بصدمة:نعام؟؟؟؟......
عذراء:كيفما سمعتي
رواء:واش تسطيتي؟؟؟باريس!!!ياكما يتصحاب ليك مع الضورة؟؟؟
عذراء:لا عارفة خطورة هادشي و مزيان ولكن انا عندي خطة لي تنتمنى تصدق ولكن اكيد بالمساعدة ديالكوم نتوما
رواء:اشمن خطة اصاحبتي راني تنشوف نهايتك فعينيك و بيديك غتنهي راسك عائلتك ممعاهاش اللعب
رواء:عذراء حضي راسك مزيان راه الطريق لي غادي ضربي اي خطأ و لو بسيط غادي يرجع عليك بالندامة
عذراء:لا متخافيش المهم خصني نرجع للخدمة دابا
رواء:واخا طهلاي ليا فراسك
عذراء:حتى نتي
ناضت عذراء و تفارقات مع رواء تما شدات طاكسي و رجعات ل الشركة...
فواحد الدار كبيرة فحي شعبي كانت امرأة كبيرة شوية فالعمر جالسة فواحد المراح متوسط الحجم مفرش بطريقة بلدية مغربية لابسة بيجامتها و طابلييتها د الكوزينة و عاقدة زيف حياتي تتنقي فالعدس فوق الطبلة حتى دخل برناس هاز حقيبة العمل ديالو بتاسم فاش شافها باس ليها راسها و جلس قدامها...
ناض برناس و باس راس ميمتو تاني و طلع مع الدروج حتى حل واحد الغرفة كانت غرفة عادية فيها ناموسية..بيرو..ماريو و ديكورات جد بسيطة الا الحيط لي فيه البيرو كان عامر بالجرائد و الصور الملصقين ديال الصحف و شي اوراق فيهوم علامات X و دوائر و أسهم...
حييد حوايجو و علقهوم فالماريو لبس سروال سبورتيف مع الفوق ديالو حوايج عاديين ديال الدار حييد نضاضرو د الشوف و حطهوم فوق البيرو و تكا فوق الناموسية تيشوف فالسقف و تفكيرو مخربق و عقلو مشوش مع ديك الكوافورة بزاف حتال فين غيبقا يتسناها تفهم راسها هاهوا اشهر هادي باش قفل 30عام و قريب يدخل ف 31 و من بعدها ها 32 و غيستمر هادشي حتى تكون عندو 40عام و الكوافورة باقة تتجرجر فيه..تگعد دغيا و حل المجر ديال لبيرو جبد منو واحد الصورة و رجع تكا و يدو باش شادها مهزوزة و اليد الثانية حاطها تحت راسو كانت الصورة ديالو لابس الكومبلي فرحان و حداه عذراء لابسة قفطان و جامعة شعرها على شكل مشيطة و من الأجواء باينة خطوبتهوم كان نوع من ملامح الحزن باين على وجهها واخا مخبياه بابتسامة خفيفة قدام الكاميرة...كان برناس لدقائق تيشوف فالصورة بنضراتو المتفحصة و بمنضور اخر بحيث هاد المرة خدم عيون الصحافي السابق و رئيس التحرير الحالي برناس مفتاح ماشي عيون برناس ولد 8سنين لي خطبو ليه الرضيعة عذراء و للحظات هبط يدو لي شاد بيها الصورة و على وجهو ملامح الشك...
برناس:عذراء مبغاتش تزوج بيا...
اما عند عذراء لي كانت فالشركة خدامة بكل اريحية من بعدما شرات ليها باكية اولويز فالطريق و خباتها فصاكها الى غتبدل لي عطاتها شيارا...كانت تتقاد فالمايكاب ديال واحد العارضة غادي تجي واحد المجلة باش تاخد ليها صور حتى سالات و رجعات لمكان عملها مع سديم...
سديم:5 د العشية هادي اصاحبتي فيا جوع
عذراء:نمشيو نشوفو شي حاجة فالكافيتيريا؟
سديم:داكشي نيت فاش تنفكر
عذراء:واخا
خرجو من تما و مشاو ل الكافيتيريا خداو جوج سندويتشات باش يسدو الجوع و جلسو فواحد الطاولة حدا الزاج قدو قداش تيبان ليهوم كاع لي على برا الشركة...
عذراء تتاكل:الحمد الله بعدا تهنيت من قضية الباسبور
سديم:واش غتمشي ل باريس متأكدة ا عذراء؟
عذراء:وي متأكدة غنمشي
سديم:ههه متشوقة غادي تكون رحلة ممتعة اول مرة غادي نسافر برا الدولة
عذراء:مشفتيش نتي انا لي اول مرة غنخرج برا مدينتي عاد الدولة ههه
سديم:وايلي؟عمرك سافرتي؟
عذراء:لا اول مرة
سديم:ايوا خودي احتياطك ممكن تقياي ولا دوخي ولا اي حاجة
عذراء:ههه اويلي لا داكشي متيدير فيا والو
سديم:و باش عرفتي ياك اول مرة قلتي غتسافري
عذراء:انا لي عارفة جسمي
سديم:ايه بحال نيت ليوم فاش خرجات ليك ليغيكل و شوهاتك
عذراء:هادي بعدا عمرها وقعات ليا حتى جيت لهاد الشركة
عذراء:المهم الاجتماع لي قالت لينا قريب خصنا ناكلو دغيا باش نكونو تما
سديم:وي بصاح
كلاو ماكلتهوم و ناضو رجعو لخدمتهوم تيتسناو فالاجتماع...
فقسم العارضات و بالضبط فغرفة العارضة روبين الخاصة كانت جالسة حاطة رجل على رجل و فيديها تيليفون اخر ماكاين تتدوز فيه بصبعها و عينيها تيقلبو فموقع خاص بالفساتين الفخمة و الاثمنة جد خيالية و فيمينها و يسارها شياطينها لي متيتفارقوش معاها حتى هوما مرة مرة تيشاركو برأيهوم فالفساتين حتى طلع ليها داكشي فراسها و حطات التيلي حتى حاجة مجذباتها...
روبين:اففف حتاشي حاجة ما سبيسيال لي تخليني نبان فالحفل ديال عرض باريس
ليڨيا:قلبي فشي سيت اخور باقي الوقت
خناثة:اشمن باقي الوقت راه لاليفغيزون السريعة كاع تتكون فيوماين
روبين ناضت من حداهوم و جرات علاقات الحوايج عامرين بالفساتين مشكلين قوس قزح فيه ألوان و اشكال..هزات واحد و بدات تجبد و توري...
روبين:هادشي كاملو ممقنعنيش شي حاجة تخلي قوس يشوفني غير انا تمااا بغيت نبان انا نجمة الحفل!!!
خناثة عوجات عينيها:هاهيا جاتها نوبة المثالية مرة خرى
ليڨيا:روبين نتي زوينة ماشي تسناي من الفستان يزيينك
روبين هزات حاجبها بغرور:بطبيعة الحال انا زوينة ولكن غيكونو تما بزااف ديال العااارضااات و مصمماااات و بنات من طبقتنا و غيحاولو يديرو ما فجهدهوم باش يبانو ف أبهى حلة خصني نكون انا الأحسن
خناثة:متخافيش كونما كنتي الأحسن كاعما تكوني العارضة الأولى على صعيد الشركة
ليڨيا: ناتا(خناثة) عندها الحق
روبين:المهم العشية خصني نختار الفستان لي يليق بيا...
من بعدما داز الاجتماع ديال شيارا مع لي ميكاب ارتيستس لي كان تيتمحور حول عرض باريس و شكون العارضات لي غيتكلفو بيهوم عطاتهوم الاذن يرجعو لديورهوم الى بغاو و هادي كانت الفرصة الذهبية ديال الكوافورة باش تبيين لعائلتها انها تتخرج فالوقت بحكم انه 7 د العشية لي قربات هبطات من السانسور و بقات واقفة قدام الشركة تتسنا فشي طاكسي دوز حتى بانت ليها وحدة جاية يالاه قربات و هي تبان ليها سديم جاية تتجري بغات تحل لباب ديال الطاكسي...
سديم:عذراء؟
عذراء عاد فهمات:هدا يمكن مول الطاكسي لي تديري معاه ياك؟
سديم:اه هو غير ركبي يوصلني و يوصلك
عذراء:واخا شكرا
ركبات سديم فالقدام و عذراء فاللور و ديمارا مول الطاكسي...
تحطات الطاكسي فالسيكتور ديال عذراء و هبطات منها من بعدما خلصات مولاها و ودعات سديم لي ديماراو من تما...هزات صاكها فكتفها و بقات غادة حتى دقات حلات ليها مها و دخلات...
لوليا مستغربة:اش واقع جيتي ليوم بكري؟؟
عذراء جلسات:حيت سالينا بكري اوف عييت
لوليا:اه مزيان سيري رتاحي بينما وجد العشا راه ختك فلبيت تتفرج
عذراء: و الوليد؟و لخرين؟
لوليا:منعرف ليهوم انا
عذراء:واخا المهم هاني طالعة
لوليا دخلات لكوزينة اما عذراء طلعات دغيا مع الدروج و تتلفت لتبعها رفيف حتى طلعات لبيتهوم و بدلات عليها حوايجها ب بيجامة ديال الدار جمعات شعرها على شكل شفنجة و هزات صاكها بين يديها معنقاه و بقات غادة تتسلت طالعة فالدروج حتى حلات باب السطاح بشوية و رضاتو..دخلات ديريكت لواحد لبيت عندهوم تمايا تيحطو فيها لحوايج الموسخين فقنت و دايرين بليصة للحوايج النقيين و واحد القنت عامر بشي لافيراي من عهد الاستعمار و جليسة ديال جوج سدادر مع طبيلة صغيرة تما هزات البانيو و مشات عمراتو بالما جبدات التيد و رشاتو فوقو و مشات حلات الصاك جبدات منو الفيستة و هي تلوحها فداك الما جبدات كرسي تما صغير مصنوع من الخشب جلسات عليه مطلعة كمامها و هي تبدا فالتصبين الله اكبر اجي تشوف ا قوس الفيستة ديالك لي تصنعات بعناية و تشرات بالأورووات تتصبن فالسطاح و بالتيد.. الكوافورة تتصبن من نييتها حتى سالات شللاتها مزيان بالما و عاودات شللات و عاودات شللات فاش تطلق للما تتحير عليه و يسيق ليها باها الخبار يحتى تخلصو..فاش سالات دازت ل التعصار حتى ولات ديك الفيستة مسكينة بحال الشرويطة ناضت دغيا و يديها تيقطرو بالما حتى هزات واحد العلاقة ديال الحوايج علقاتها فيها و خباتها بواحد الزيف تما احتياطا ليدخل شي واحد واخا قليل فين تيطلع من غير مها الى غتنشر لحوايج...هبطات كمامها و نقات فين صبنات و كرطاتو سالات و هبطات لبيتها هازة صاكها...
عذراء:صافي مزيان و هاني تهنيت من قضية الفيستة واخا كنت باغية نديها للمصبنة ولكن مول المصبنة غيعرفها غالية و يصدق موصلها لرئال ولا ضرغام و يديرو ليا الاستجواب الله ينجيني اودي
تحل لباب و هي دخل رفيف قفزاتها...
رفيف:مكاين عند بوك لا سلام لا هاني جيت
عذراء:ا ااه راه كنت زربانة نبدل هاد لحوايج و اولويز
رفيف:اممم اوكي (جلسات) ايوا كيف داز النهار؟
عذراء:عادي خدمة و صافي
رفيف:اوكي
عذراء:اربي عيييطي للوليدة بغيت نقول ليكوم واحد الهضرة
رفيف:شنو تاني ياربي السلامة؟؟
عذراء:غير سيري اصاحبتي و ملي تجيو بجوجات نعاود
رفيف ناضت:الله يحدر السلامة معاك و صافي
خرجات رفيف حتى عييطات ل لوليا لي طلعات مستغربة اش بغات منها الكوافورة...
لوليا داخلة:اش كاين تاني؟
عذراء:جلسي بعدا ا لوليدة
لوليا جلسات:هاهيا جاالسة
عذراء بلعات ريقها:احممم
رفيف:وا دوي سربي محدنا غير بوحدنا فالدار
عذراء:قالو ليا فالخدمة....
لوليا:اش قالو؟؟
رفيف:ياكمااا ترااو عليك ا تريكة المصايب؟
عذراء:لا لا (بلعات ريقها) غ غ غنم...غنمشيو لباريس
لوليا و رفيف بصدمة:كيفاش؟؟؟!!!!
عذراء حاطة يديها على فمها تطلبهوم:الدم الدم لي مشاركينو ريلاكس
لوليا:راه حتى انا كنت واحد النهار قدكوم و عارفة كلشي ولكن معندنا منديرو
رفيف:صافي ا ماما متبكيش كلشي غيدوز بيخير عذراء محتاجة السند ديالك باش توصل لهدفها و تحقق حلمها
لوليا:سير يا بنتي الله يبعد عليك ولاد الحرام و بنات الحرام و ينور طريقك و ينقيه من الشوك
عذراء:امين ا ماما امين و دابا ضحكي ليا الى لقيت كي ندير انجيب ليك شي كادو تشمي فيه ريحة باريس
لوليا ضحكات بعفوية:ههه يعطيك دقة يا لهبيلة
رفيف:ياختي كون لقيت كيف ندير نسيفطك غير عند داك الكلبون د سنمار ولكن راك غادة تخدمي
عذراء:ههه ضحكتيني هداك غير خليه حتى يجي فالصيف وشنقي عليه
لوليا دوزات صباعها تحت عينيها دغيا:يالاه غنوض نطل على لعشا المهم ا بنتي امتى غتمشي؟
عذراء:السيمانة الجاية
لوليا:واخا صافي انا غنعرف كيف ندير
ناضت عذراء باست راسها و يديها:يخليك ليا غادي يجي واحد النهار غادي نرد ليك كاع هاد التعب كوني اكيدة...
🌞فالصباح الباكر🌞
فاقت الكوافورة مبكرة اليوما طلات على رفيف باقة ناعسة ناضت حتى قضات اغراضها فالطواليت و مشات حتى هزات صاكها و راسها غير تيضور حاضية جنابها متسلتة على صبيعات رجليها حتى طلعات مع السطاح مشات ديريكت لفين معلقة الفيستة قاصتها لقاتها نشفات هزاتها و جبدات المصلوح حتى صلحاتها مزيان..طواتها و سدات عليها فالصاك و رجعات هابطة بنفس الشكل حتى تساطحات مع شي جسم قفزات لقاتو رئال...
رئال:اش تديري على النبوري؟؟
عذراء بعدات عليه شوية تطلع فيه عينيها طويل عليها:اويلي ياك خدامة و مكاين لا صباح الخير لا والو(تتهرب عينيها)
رئال:صباح الخير ا لالة صافي؟
عذراء:صباح النور المهم الى بغيتى تمشي لطواليت راه خاوية(زعمة راه كانت فيها)
رئال دازها و مشا يغسل وجهو اما هي تبعاتو بعينيها و مشات سدات عليها فلبيت...
جبدات حوايجها لي غتلبس بغات توجد راسها بكري باش تمشي مرتاحة...
جبدات سروال فالكحل دجين مزيير مع تريكو خفيف فالكحل و فيست ديال العسكر طويلة شوية لبساتهوم مع سبرديلة عالية شوية دارت مكياجها الخفيف المعتاد و جمعات شعرها بمقيبط صغير فالوسط و خلاتو مطلوق..شافت فالمرايا و تأكدات من لمساتها الأخيرة كلشي هو هداك لاحت التيلي فالصاك و هبطات لقات لوليا حاطة الفطور و رئال و ضرغام تيفطرو...
غسلات يديها و جلسات تفطر معاهوم:صباح الخير
ضرغام هز فيها عينيه:وليت كاعما تنشوفك بزاف
عذراء:راني خدامة زعمة
ضرغام:امم مزيان كيف جاتك بعدا؟
عذراء:زوينة و الناس تما مزيانين
رئال:ياكما كاين شي واحد تما تيتبسل عليك؟
عذراء:اويلي لا كلشي داخل سوق راسو مكاين لي يحاديني
ضرغام:مزيان الى وقع هادشي صوني عليا
عذراء بلعات ريقها و دوزاتها ب اتاي:و واخا
لوليا قلبات الموضوع:ايوا الله يوقف معاكوم ا وليداتي
قالو امين و نتاشرو كل واحد شد طريقو ل خدمتو...
فالشركة كان قوس عاد داخل مع لباب لقا 3 ديال ليمانادجر مصبحين عليه هازين شي ملفات دار ليهوم اشارة و تبعوه حتى طلعو للبيرو...دخلو بعد الاذن بالدخول حتى شاف شنو بغاو و عدلو لي غيتعدل و خرجو من تما واحد تابع لاخور...ضغط قوس على الزر ديال الفيكس و عييط على السكريتيرة لي جات طايرة...
السكريتيرة:نعام ا مستر
قوس طلع فيها راسو:كاينين شي مواعيد اليوم؟؟
السكريتيرة:كاين موعد مع مدير شركة rena ديال مواد التجميل مع 3 ديال العشية و....
قوس:قبلي غير لي مع مدير rena و لغي الباقي
السكريتيرة مزادتش معاه الهضرة مزال:اوكي مستر
حرك ليها يديه و نصارفات...
اما الكوافورة كانت عاد جاية بشوية عليها واصلة فوقتها كيف العادة طلعات مع السانسور لمكان عملها ملقات لا نيار لا سديم ستغربات و فنفس الوقت بتاسمات حيت هادي فرصتها باش ميسيقوش ليها الخبار..مشات عند شيارا و تتمنى تكون جات..دقات جوج دقات فباب البيرو و رجعات خطوة لور تتسنى فالرد...حتى سمعات تفضل...بتاسمات و دخلات...
خرجات عذراء من تما بملامح متيبشروش بالخير كانت نييتها صافية و مقدراتش تعاونها ولكن لهلا يوريكوم فاش تتدير شي حاجة فدماغها غير الله يستر..مشات ديريكت ل السانسور و طلعات ل الطبقة الخاصة بليمانادجر غير شافتها السكريتيرة اوطوماتيكمون تفكرات الشوهة د البارح...
عذراء:بغيت موسيو فابيو
السكريتيرة تتفتف:ش شديتي موعد؟
عذراء:لا ولكن بغيتو فواحد الحاجة
هزات السكريتيرة الفيكس و تاصلات بفابيو لي استغرب فاش بغاتو هادي؟؟قال ل السكريتيرة تخليها تدخل..مشات عندو دقات و دخلات...
فابيو:تفضلي
جلسات عذراء تضور فعينيها:مستر...
فابيو:شنو بغيتيني تنضن سالينا قضية الكونط؟
عذراء:بغيت تشد ليا موعد مع مستر قوس
فابيو بدهشة:واط؟؟
عذراء:وي مستر
فابيو:و علاش؟؟الى عندك شي مشكل راه حنا لي مكلفين نيابة عليه
فابيو بقا شحال تيفكر عاد تفكر بلي مشا قوس ملابسش الفيستة:اااه عاد عقلت اوكي حطيها ليا نردها ليه انا
عذراء:بغيت نشكرو شخصيا
فابيو:ولكن مستر قوس ممساليش لبحال هادشي
عذراء حدرات راسها مزييرة على اطراف الفيستة ديالها:دغيا و نهبط
فابيو مستغرب فهاد اللصقة ولا شاك فيها كاع واش شي وحدة من المعجبات ديالو و لكن كون كانت هكداك كون ستغلات الفرصة و دوات معاه لبارح تنهد و هز التيليفون مدوز الخط ل السكريتيرة لي قال ليها غيجي دابا عند قوس قالت ليه واخا و عذراء حداه بدات تتبان ابتسامتها بالعرض البطيء...
فابيو:اوكي ميس تبعيني
ناضت عذراء من حداه و خرجو من تما حتى طلعو فالطبقة لخاصة بقوس استغربات السكريتيرة فاش شافتو جاي مع شي وحدة...
حرك ليها قوس راسو و هي خرجات من تما تتبتاسم فرحات حيت رضاتها ليه بنفسها كيف مبلانية خصها تشكر فابيو حتى هو لي متوقعاتش يقبل كيفما رفضات شيارا..كانت غادة تشد سانسور تهبط لخدمتها حتى حسات بشي واحد شدها ضارت لقاتها السكريتيرة...
عذراء:اش كاين؟
السكريتيرة:يتصحابليك نسيتك شنو تديري هنا مزال!
عذراء:طلقي مني(جرات يديها)
السكريتيرة:معرفتش شنو قلتي و باش وسوستي لمستر فابيو حتى طلعك لهنا ولكن نصيحة غنعطيها ليك نساي الطريق لهاد الطابق!
عذراء:واقيلة هاد الطابق خاص بمول الشركة ماشي بالسكريتيرة ديالو؟
السكريتيرة:اها! لباس ملي وليتي عارفة تقراي دابا
عذراء:اكيد راني الأولى فاللغة الانجليزية على صعيد المدرسة
السكريتيرة تتنفخ:و مالك تتقوليها ليا؟شوفي هدا اخر انذار ليك انا معرفتش غير كيفاش حتى قبلات مدام شيارا بوحدة بحالك
عذراء بتاسمات فوجهها:نتلاقاو فباريس
و عطاتها بضهرها غادة هابطة مخلياها غتفقص كيفاش وحدة بحال هادي تعزلات تمشي لأهم العروض السنوية و لي هو عرض باريس؟؟!!....
عذراء وقوس الجزء الثالث
محتوى القصة
التنقل بين الأجزاء