فالشركة كانت بنان فغرفتها و بالها مشغول مع عذراء حيت معلماتها بحتى حاجة و دابا قالو ليها تلغات خدمتها اليوم و غيجيبو ليها بديل..ناضت من تما و مشات عند المسؤولة فالإستقبال...
بنان:قولي ليا واش جات عذراء بعدا عاد لغاو الخدمة؟؟
البنت:اه جات
بنان باستغراب:و شنو وقع حتى تلغات؟
البنت:كان جا مستر قوس عاد سولني عليها و على توقيت عملها اليوم حتى صدقات جاية حادرة راسها و تساطحات معاه
بنان هازة حجبانها و طالقة ودنيها:اييه كمليي
البنت:مهم و دوا معاهاا انا مفهمت والو حيت دواو بالعربية
بنان:المهم مفهمتي والو من لغة الجسد ولا شي لعبة؟؟
البنت:لي بان ليا انه وجهها كان صفر حتى المكياج مدايراهش و بان ليا انه مستر قوس هادشي مديرونجيه و هو يجرها معاه بيينات المقاومة ديالها ولكن مشات معاه مزال و تصوري طلعها فالسانسور ديالو!!!
بنان تتسمع و ابتسامتها غادية و تتوساع:ههه وايلي؟صافي غير هادشي؟
البنت هزات يديها:غير هادشي ا مدام
بنان:شكراا نخليك دابا
جلسات البنت مكملة خدمتها اما بنان رجعات لغرفتها تضحك مع راسها عاجبها التطور لي وصلات ليه علاقة قوس بكوافورتها...
فالصالون كانت رواء جالسة مع رفيف و مرام مشغولة مع واحد الكليانة...
رفيف:وا غبرتي ا صاحبتي مبقيتيش تباني
رواء:اودي زييرونا فالخدمة مبقيتش نخرج نتغدا فالدار الربيع قرب و الصيف غيجي نيشان موراه و راك عارفة تيكون اقبال على الحوايج فهاد الفترة كتر
رفيف:الحوايج ديما عليهوم الإقبال وقتما كان ههه ايوا و واحد الخطيب كيف غادة معاه؟؟
رواء:ها حنا غير التيليفون تعرفنا على بعضياتنا كتر و هاد الويكاند قررنا نخرجو مجموعين
رفيف:اه مزيان ا ختي حاولو تزوجو دغيا متمددوش فترة الخطوبة غادي يجيكوم ملل و الله
رواء فهمات انها تتحشي الهضرة لراسها:واش بيخير ا رفيف؟؟
رفيف تنهدات:نتي عارفة شنو بيا
رواء:واش صبرتي سنين هادي و مافيك لي يصبر حتال الصيف؟؟
رفيف:مبقاتش فالصيف ولا شحال داز بقات فالكلام و القول يتوفا و يتطبق ا رواء
رواء:ياك تتبغيو بعضياتكوم؟؟هدا هو المهم!!
رفيف:حبي ليه بدا تينقص هو بنفسو لي هز مقص بيديه و تيقطع فقلبي بالعرض البطيء فهاد السنوات كاملين لي دازو بهاد التعطال
رواء:شوفي عطيه فرصة اخيرة لي هي فهاد الصيف الى مشفتي منو والو غنحاولو نلقاو شي حل صافي؟؟
رفيف بتاسمات فوجهها بحزن عارفة راسها مزيان سوا الصيف سوا دابا مكاين حتاشي حل نفتارضو كلامو صحيح و المشكل جاي من القنصلية معندها غير تكمش و تصبر حيت داكشي فيد السلطات العليا اما الى كانت شي حاجة من غير هادشي فا راه ممستاعداش انها تواجهها يكفي نضرات الناس و العائلة ليها لي تيوصلو ليها من خلالها واش نتي باقة هنا؟ واش نتي مزال متزوجتي! حتى واحد مغيحس بيها من معارفها لا ختها لي رافضة الزواج اصلا و لا صاحبة ختها لي غتزوج بواحد فمدينتها...
فلبيرو ديال برناس كان عاد سالا من واحد الاجتماع مع شي صحفيين و هي تبعو الصحفية نواهل...
نواهل:موسيو
برناس ضار لعندها:وي نواهل؟؟
نواهل:واش بيخير؟هاد ليامات لاحظت التعب فوجهك
برناس:لا والو عندنا الخدمة كتيرة هاد الليامات و راك عارفة هادشي
نواهل:ا ااه عندك الحق غير هو رخف على راسك موسيو حنا هنا كاملين باش نتعاونو نطلعو الجريدة للقمة
برناس بتاسم:شكرا نواهل على كلامك
حركات ليه راسها بابتسامة و هو مشا للمكتب ديالو...
فنفس الوقت الكوافورة سالات فطورها و سكتات تزغريت كرشها اما قوس سالا قهوتو...
عذراء:شكرا على الفطور كاان بنين ههه
قوس:متحتاجيش تشكريني مرة خرى
عذراء:هادشي راه تيعني ليا بزاف انك لغيتي خدمتي و خرجتيني و جيتي معايا غير باش نفطر
قوس:تنضن اي واحد غيدير بحالي
عذراء ضحكات بخفة يمكن مزال معارف هادا المغاربة اش تيسواو:هههه نن ا مستر قليل و نادر لي غيدير هاكا
قوس:امم يعني انا شخص نادر
عذراء:تماما
قوس:حتى نتي عمرني شفتك بحالك
عذراء بخجل:ربي خليك
قوس شاف فساعتو:خصني نرجع لشركة دابا بقات ساعة لواحد الاجتماع باش يبدا
عذراء مستغربة:يعني باقي الوقت
قوس:لا خصني نكون تما
عذراء:اوكيي مستر
ناض قوس حتى خلص و خرجو لقاو الشيفور واقف قدام الطونوبيل غير شافهوم و هو يحل ليهوم الباب..جلسات عذراء و جلس قوس حداها..سد الشيفور البيبان و ركب يالاه غيديماري و هو يبدا يصوني التيلي د عذراء شافت فصاكها و تفكرات انه غتكون بنان مشوشة عليهاا..جبدات التيليفون قدام قوس لي كان متيشوفش فشاشة الهاتف احتراما لخصوصيتها..غير شافت اسم المتصل و هي تزعف قطعات عليه و رجعات التيلي لصاك...ديمارا الشيفور و دازو ثواني ها التيلي تاني تيصوني هادشي لي سبب شوية د الازعاج لقوس..جبداتو و تتحاول متبيينش غضبها عاد بغات تاني تقطع و هو يتكلم قوس...
قوس:مالك جاوبي
عذراء بتوتر:لا مكاين لاش
شاشة الهاتف بدات تضوي تاني تيصوني و هو يهبط قوس عينيه و طلع حجبانو:شكون هاد برناس؟؟؟
عذراء هزات فيه راسها:هدا غير ولد عمي
قوس:اه ايوا جاوبيه
عذراء:لا لا مافيا مايدوي معاه دابا
قوس:نتي تعرفي
قطعات عذراء و دارت لتيلي سيلونسيو اما قوس جاه احساس غريب فاش طاحو عينيه على ديك السمية فشاشة هاتفها ولكن معندها علاش تكذب اصلا مزال ماولات حتاشي علاقة رسمية بينو و بينها يعني تتقول الحقيقة و مكاين لاش للكذوب اما هي فا كانت مزييرة على يديها بغضب لي تتحاول تخبيه قدام قوس بالفعل غتوصل لسطاج الخر مع هاد الزمر د ولد عمها حتى ديك خطيبها كاعما تتقولها ليه بينها و بين راسها بقا غير لعيباد الله..بقاو هكاك وسط من جو الصمت حتى وصلو قدام الشركة و هبطو...
عذراء مبتسمة:شكراا مستر على الفطور
قوس:العفو واش قادرة تخدمي راه مكاين لاش ديجا تلغات خدمتك ليوم
عذراء:مدام بنان غتكون تتسنا فيا انا عارفاها مغتقبل بحتاشي بديل حيت صعيب ترضيها و ديجا ولفاتني
قوس:مادام نتي تتشوفي راسك قادة على هادشي نتي تعرفي
عذراء:شكرا على تفهمك تنتمنى ليك نهار سعيد
قوس:حتى نتي
ستأذنات منو و تمات داخلة لشركة تحت انضارو المصوبة عليها حتى غبرات...
بقات عذراء غادة طالعة فالسانسور حتى دقات فغرفة بنان...
بنان حلات الباب:اوووه عذراء
عذراء دخلات و بنان سدات الباب و تبعاتها متحمسة...
بنان:هااي هاااي على ناس مستر قوس مع النبوري
عذراء:شكون قالها ليك؟؟
بنان:كورنيليا لي عند الاستقبال
عذراء:ااه وي حيت مكانش حتى واحد من غيرنا حنا وياها
بنان:اه فصباح تتكون خدمة العارضات قليلة المهم عاودي ليا عاودي ليا
عذراء عاودات ليها كلشي و بنان غير تيلمعو عينيها و تبتاسم بإعجاب جات حتال لقطة برناس و هي تجمع حجبانها منزلة ابتسامتها...
بنان:هدا مالو واش لصقة؟؟
عذراء:داكشي لي بان ليا طلع ليا فراسي و هو عاطيني بتيساع ماحساك دابا فاش جاتو عليا
بنان:ضروري خصنا نبعدوه من طريقنا خص شي حل!
عذراء:وا اشمن حل راه حنا تندويو هنا على عادة برجنا
بنان:راني عارفة هادشي ولكن نتي رافضة هاد الزواج تماما
عذراء:اكيد رافضاه و والاو تم عمرو يحلم بيا نكون الزوجة ديالو
بنان:حالتك صعيبة بزاف اصاحبتي
عذراء:راني عارفة هادشي مزيان تيبان ليا غنقز حتى نعيا و فلخر غنتزوج بيه
بنان:متقوليش هادشي!!غنلقاو حل اكيييد ميمكنش هادشي هدا راه ظلم!!
عذراء:عندك شي حل؟
بنان تتفكر:خص شي واحد عندو سلطة يوقف بجنبك
عذراء ضحكات باستخفاف:شي واحد عندو سلطة؟بجنبي؟منين غيجي شي واحد بحال هداك لوحدة بحالي؟؟
بنان ربعات يديها:ديجا عندك
عذراء:شنو قصدك؟
بنان:مستر قوس
عذراء:اويلي على مستر قوس!!
بنان:الى عاودتي ليه و فهمتيه احتمال كبير يعاونك مغيتخلاش عليك انا متأكدة
عذراء:ولكن راه مابيني و بينو والو اصاحبتي!
بنان:عارفة مزال ماولات حتاشي حاجة مؤكدة بيناتكوم ولكن يقدر يساعدك ك صديق ك معجب ك واحد فيه الانسانية متيهمش يكون تيبغيك هو الاول عاااد باش يقدر يعاونك
عذراء:فهمتك مزيان ولكن تنفضل نحل هادشي بوحدي بلا ميجيب ليا حتى واحد الخبار
بنان:اوكي حاليا غنخليك ولكن الى جيتي عندي بخناينك الى غتضربو لاكط راه معندي مندير ليك
عذراء بقات ساكتة تتشوف فالأرض و بنان ناضت جلسات قدام كوافوزها تتقاد فعكرها مخلية عذراء ساهية فحريرتها...
فلبيرو ديال شيارا كانت جالسة هاد الأخيرة فلبيرو ديالها شابكة يديها و قدامها واقفين كل من سديم و نيار...
شيارا:هي باغيين تشوفوها قلتو؟
نيار:اه ا مدام راها الزميلة ديالنا
شيارا:سابقا
نيار:وي عرفت عرفت تقدري تخلينا نمشيو؟
سديم:اه مدام غير زيارة خفيفة و صافي
شيارا:جناح العارضات مخصص للعارضات و لمايكاب ارتيستس ديالهوم فقط و لكن الى غتكون زيارة خفيفة غنخليكوم هاد المرة
نيار فرح:شكراا مداام
شيارا:متعطلووش مبقا والو للجلسة التصويرية
سديم:لا غنجيو دغيا
شيارا:اوكي راها كاينة فغرفة العارضة بنان قولوها لبنت لي فالإستقبال
نيار:اووكي مدام
خرجو من تما فرحانين رغم انه ماشي بزاف باش تعرفو على عذراء الا و انها خلات بصمتها عندهوم خصوصا نيار ولف بساطتها و تنونيخها لي متيساليش..طلعو فالسانسور حتى حطهوم فطابق العارضات و مشاو سولو على بنان حتى وراتهوم الغرفة..وقفو قدامها تيشوفو فبعضياتهوم و اخيرا قرر واحد فيهوم يدق..سمعات بنان الدقان و ناضت حلات مستغربة فاش لقات شاب و شابة اول مرة تشوفهوم..هزو فيها راسهوم حيت طوييلة...
بنان بالألمانية:شكون نتوما؟؟
نيار مفهم والو:عربي اختي الى تتعرفي ليها
سديم غير تتبحلق فعينيها..عذراء لي كانت فلداخل سمعات صوت ماغريبش عليها و هي تخرج لعندهوم فرحو فاش شافوها...
نيار:يا ال*حبة نسيتي الاصل نسيتي الخير و نتي مخشية ليا هنا
بنان:راه خصك مترفضيش واخا تقول ليك 6 د الصباح ا ويلي السييدة جاية عارضاك شخصيا و قالت ليك مبقا ليها والو ترجع لبلادها و من الفوق عارضاك لدار خوها لي هو رب عملك و غترفضي؟؟؟
عذراء:ويييك ويييك راه مالين الدار غيعلقوني كيف الحولي
بنان:معندك غير تخبي عليهوم هادشي الموعد صافي تقرر يالاه فين تلقاي متلبسي و تمشي
عذراء:معامن انا ا عيباد الله معاااامن
بنان:كنا غاديين نخرجو اذن زيدي نيت نخرجو...
بعدما خلات ترف بنان و عذراء طلعات فالسانسور لطابق قوس الخاص حتى وقفات على جلنار لي طلعات راسها و تصدمات!!
قوس حرك ليها راسو و هي خرجات مخلياه تيفكر فقضية انه بدا تيولي بحالها شنو بغات توصل بهاد الهضرة؟؟فنفس الوقت تيفكر فكيفاش غادي تجي تاني فهاد العشاء و اشمن لووك غادي تلون بيه تاني...
من بعدما خرجات بنان مع عذراء رجعات هاد الأخيرة لدارهوم...
جلوان:اجي نقولك نتي
عذراء لي كانت عاد مبدلة حوايجها وقفات:نعام ا لواليد؟
جلوان:شحال خلصوك ديك الشركة؟
عذراء:جوج د المليون
جلوان تصدم:جوووج د المليوون؟؟
لوليا تدخلات خارجة من الكوزينة:راني قلت ليك خلاص الشركة مزيان و بنتي تبارك الله عليها تقدات لينا كلشي
جلوان:الله يرضي عليك ا بنتي
عذراء:لي بقا ليا غنعطيه لخويا رئال فعرسو
جلوان:و نتي ماخليتي والو لراسك؟؟
عذراء:شوية و صافي هه
لوليا:اجي ا بنتي مسحي ليا شي كيسان
جراتها و دخلو للكوزينة...
لوليا تتوشوش:متعطيهش التفاصيل بزاف راك عارفاه كيف داير يقدر يتقلب عليك من بعد
عذراء:صافي واخاا
فقدام واحد الفرماسيان كانت رسيل واقفة باقة بمحفظتها تتسنا قدامو حتى خرجات منو واحد المرا كمشات ليها شي حاجة فيديها فنفس الوقت رسيل كمشات ليها الفلوس فيديها و كل وحدة شدات طريق كأنهم مكانوش مع بعضياتهوم..خشات داكشي فجيبها و بقات غادة فالطريق حتى وصلات لدارهوم...
دواني:على السلامة تعطلتي اليوم
رسيل:كنت مع صاحبتي داكشي علاش
ديالا جات:اجي وريني واحد التمرين غنتسطا مع هاد التمارين
رسيل:صبري نبدل حوايجي و هانا جاية..برناس مجاش ا ماما؟
دواني:قال غيتعطل اليوم عندو الخدمة
رسيل طلعات مع الدروج و محفظتها فيديها:اوكي انا فبيتي
دواني:متعطليش كاسكروط راه موجود
طلعات رسيل حتى بدلات حوايجها فغرفتها و جبدات داكشي من جيب سروالها و مشات لطواليت هزات واحد السطيلة صغيرة و بالت فيها نقات راسها و ناضت جبدات داكشي لي صدق اختبار الحمل حطاتو فوسط البول(حشاكوم)حتى دازت المدة لي مكتوبة فعلبتو و هي تلقا جوج شرطات حمرين وحدة واضحة مزيان و الثانية باهتة و هادشي تيأكد ايجابية الحمل..من بعد ما شافت النتيجة بقات لثواني مصدومة و الاختبار باقي فيديها تخربقو ليها المشاعر فهاد اللحظة معرفاتش واش تفرح حيت حاملة من الانسان لي تتبغيه و غتكون أم ولا تخاف حيت حاملة منو بلا زواج....
وصلات العشية و عذراء خبات الحوايج لي شرات ليها بنان فالماريو ديالها..هبطات حتى دارت كاسكروط مع عائلتها و تعاونات هي و رفيف حتى جمعو الكوزينة من بعد مشاو جلسو شدو المسلسل لي متبعاه لوليا يتفرجو معاها اما جلوان و لخرين خارجين...
من بعدما تفرجو مشات لوليا تنصب العشاء اما عذراء سبقات لبيتها و رفيف موراها حتى دخلات و سدات الباب...
رفيف:مالك شفتك معجبتينيش غير ساهية و حالة فمك فالمسلسل و حتى داك كاسكروط ماكليتيهش بحال كيف موالفة تاكلي
عذراء ضارت و بلعات ريقها:و والو
رفيف كمشات عينيها بشك:وا دوي راني ختك و عارفاك
عذراء جلسات تتلعب بصباعها بتوتر:واقيلة تنضن جا الوقت لي غنعاود ليك فيه واحد الحاجة
رفيف جلسات حداها و حطات يدها على كتفها:عاودي ليا انا تنسمعك
عذراء طلعات فيها عينيها لي تتهربهوم خايفة من ردة فعلها:مغتديري ليا والو ياكي؟؟
رفيف بابتسامة:غير تيقي بيا
عذراء وكلات امرها لله و زعمات:ت تيعجبني الباطرون ديالي
رفيف لي كانت هادئة تتسنا تسمع مشكلة ختها تعاونها حتى سمعات شنو قالت و هي تطلق منها مصدومة:ك كيفااش؟ عاودي شنو قلتي؟؟
رفيف طلقات من شعر عذراء و ناضت تتقاد ديالها:انا فالسطاح مبغيت حتى واحد يجي لعندي
خرجات من البيت و مشات تتجري فالدروج حتى سدات عليها...
ضورات لوليا وجهها عند عذراء لي ناضت شعرها مشعكك...
لوليا:مال ختك؟؟
عذراء:ما درت ليها والووو
لوليا:امم باينة زيدي هبطي تنقي ليا ديك الجلبانة بقا ليها شوية و تغمل ليا هنا و افف اش هاد الريحة حلي معاك داك الشرجم باز ملي متتخنقوش فنعاسكوم هنا
عذراء:و واخا
هبطات لوليا اما عذراء حلات شرجم البيت و هبطات تابعاها...
فنفس الوقت فالسطاح كانت رفيف جالسة فوق السداري ساهية تتفكر و دموعها غير تيهبطو وحدة مورا لوخرا قلبها تيضرها و كلام ختها لاصق فدماغها بالفعل عندها الحق رغم انها متأكدة انه نية عذراء مزيانة و غير زلقات ليها ديك الجملة ولكن تتبقا فآخر المطاف عندها الحق خصها ضروري تلقا شي حل ميمكنش ليها تسنا عام اخور و الا غادي تاخد واحد القرار لي ممكن يضر عادة عائلتها حيت كرامتها اثمن من داك الحب لي هازة فقلبها من جهة خطيبها سنمار....
داز الوقت و العشا وجد و جميع افراد العائلة جالسين فالطبلة...
جلوان:فين رفيف؟؟
ضرغام:اه مبانتش ليا؟؟
رئال:حتى انا
تدخلات عذراء:راها مريضة غنطلع دابا ندي ليها حقها
لوليا طلعات فيها راسها خصها متبيينش للوزراء انه دابزو بناتها:اوكي بنتي الله يرضي عليك
مشات عذراء جابت طبسيل و معلقة غرفات ليها من العشا هزات نص خبزة و كاس د الما دارت كلشي فبلاطو و طلعاتو لعندها...
رفيف لي كانت باقة بنفس الوضعية غير دموعها لي نشفو مخليين حمورية فوجهها سمعات الحس و حاولات متبيينش ل ليجاي حتى دخلات عليها عذراء و هي تحدر راسها...
عذراء شافت فيها بحزن باين بزاف واش كانت تتبكي حطات البلاطو فوق الطبيلة تما و قربات منها:رفيف زيدي تاكلي
رفيف:مبغيتوش
عذراء:واااصاافي سمحيي لياااا
رفيف:علاياش غنسمح ليك؟؟
عذراء:على الكلام لي قلتو مكنتش قاصداه
رفيف:راني عارفة غير هو المؤلم فهادشي انه كلامك صحيح بالفعل شتندير لحد الان حداك!
عذراء:متقوليش هادشي!!نتي لي مسؤولة على حيااتك و تزوجي وقتماا بغيتي مستقبلك هو الاهم علاش تهزي لهم لهضرة الناس!!!
رفيف:عييت ا عذراء عييت اختي
عذراء عنقاتها و عينيها مغرغرين:صبري ا رفيف صبري كلنا معندنا غير الصبر!!
رفيف:صبرت حتى تضبرت ا عذراء قلبي بدا تيموت مع هاد الزواج
عذراء مزييرة عليها:انا معاك ا ختي عمرني نتخلا عليك نتي و ماما لي عنديي
عذراء:نفس الشيء معايا اختي كونما تقتي فيك كبيرة مغنقولش ليك على اعجابي ب قوس
رفيف:قوس؟؟
عذراء:ه هو الباطرون ديالي
رفيف بتاسمات:هي سميتو قوس
عذراء تتلعب بصباعها بتوتر شافت فرفيف و جمعات قوتها:ختي قولي ليا شنو هو الحب!
رفيف:الحب كل واحد و المفهوم ديالو كيفاش عندو ولكن تنضن هادو هوما النقط المشتركة عند بزاف د الناس لي واقعين فيه
عذراء:انا تنسمعك
رفيف:اولا لاباز ديال الحب هي الاحترام بين الطرفين تانيا الاهتمام و هادي اهم نقطة باش الحب عمرو يموت عاد المواقف لي تتبيين مصداقية حب شريك حياتك ليك و بزاف د الحوايج كتار
عذراء:و كيفاش غنعرف راسي تنبغي شي واحد؟؟
رفيف:غتكوني تتفكري فيه بزاف و مغتبغيش ليه الضرر فاش تتكوني معاه غتبقاي تحسي بقلبك تيضرب و بفرحة كبيرة تتشدك غتبقاي غير تدوي معاه لي جات على فمك غتقوليها حيت غتكوني تايقة فيه و الاهم مرتاحة معاه الحب تيخليك تحاربي اي واحد على قبلو
عذراء تتسمع و ابتسامة اعجاب غادة و تتوساع و ترسم ففمها:بلفعل
رفيف جرات عندها البلاطو:ا سبحان مالك تتفرنسي غير بوحدك راه الاعجاب هو بداية الحب
عذراء:اليوم عرضاتني ختو للعشاء و مقدرتش نرفض ليها حيت غترجع لسويسرا 9 مابقا ليها والو و بغيتك تعاونيني نخبيو هادشي على مالين الدار
رفيف:واش تسطيتي!!9 باقي متينعسووش الوزراء
عذراء:انا غنغفلهووم و هادشي غيكون بالمساعدة ديالك
رفيف تنهدات:اففف الله ياربي معااك
عذراء:عفااااك
رفيف:واخااا واخااا
عذراء عنقاتها:شكرااا شكرااا انا نهبط نوجد راسي
هبطات عذراء لبيتها و جبدات واحد الصاك كبير شوية خشات فيه الحوايج لي غتلبس و الأكسيسوارات و المكياج لي غادي تدير لاحت عليها جلابتها و لبسات السباط لي غيجي مع اللبسة...هبطات رفيف لقاتها واقفة عند الباب ديال البيت...
رفيف تتوشوش:صبري نسبق نأمن الطريق
حركات ليها عذراء راسها و هبطات لتحت كان الصالون خاوي و هي تسمع صوت التلفزة لي جاي فبيت الجلاس طلات عليها لقات لوليا و جلوان شادين السهرة تيتفرجو...
لوليا:كيف بقيتي ا بنتي شوية(غمزاتها)
رفيف فهمات دغيا و دارت راسها مريضة:ايه ا ماما شوية و صافي فين خويا ضرغام و رئال؟؟
لوليا:ضرغام خرج عند صاحبو و رئال قال عندو ميدار
رفيف:ااه مزيان كحح كححح(تتكح بلعاني)
عذراء طلات من الدروج سابقها شعرها و هي تبان ليها رفيف تدير ليها زيدي بيديها مورا ضهرها هبطات عذراء بشوييية حتى هبطات لتحت...
جلوان:شربي دواك و نعسي و بلاش كاع من داك الصالون غدا
رفيف:ايه ا الواليد عندك الحق دابا نجيبو من الكوزينة كح
جرات رفيف عذراء حتال عند الباب:امتى غترجعي؟؟
عذراء:حسبي ديك 11 هكااك مغنتعطلش
رفيف:اوكي غنكون باقة فايقة الى وصلتي ڨيبي عليا يالاه تلاحي
عذراء حلات الباب بشويييية و خرجات و فنفس الوقت رفيف سداتو بشوية و رجعات لبيتها بحالا موقع والو...
شدات عذراء طاكسي بالزربة ركبات فيها و قالت ليه فين يديها فنفس الوقت جبدات تيليفونها صونات على بنان سندات التيلي بحنكها مع كتفها و يديها بجوج طلعاتهوم تتقاد فشعرها...
بنان:فيينك راه الشيفور تيتسنااا فيك قدام الشركة
عذراء:اناا فالطريق لتما قولي ليه يتسناني مزال
بنان:اوكي
قطعات عذراء و كملات ضفيرات لي دارت فوق راسها و باقي شعرها خلاتو مطلوق حلات صاكها و جبدات منو كسوة كحلة ديال الحفلات الليلية حييدات جلابتها و هو يتصدم مول الطاكسي لي شافها من المرايا كانت لابسة تحت منها تيشورت و كولون كحلين لبساتها دغيا و لبسات سنسلتها لي جاية معاها و اخيرا قدرات ترتاح حيت بقا ليها غير المايكاب لي قاداتو بالخف يديها خفيفة حيت موالفة تقاد فيه ختماتها برشة من عطرها و مول الطاكسي غير تيشوف و يتعجب حتى حطها قدام الشركة خلصاتو و هبطات...
بنان:على السلامة سربي ركبييي
الشيفور شافها و هو يهبط حل ليها الباب اللوراني...
عذراء:من بعد وندويييو بسلاامة
تلاحت عذراء فالطونوبيل و الشيفور سد عليها الباب..ركب فالقدام و دار لكيت فودنيه:مستر..ها حنا جايين دابا..اوكي
ديمارا من تما فطريقو لفيلا قوس...
فنفس الوقت كانت ترف جالسة فواحد الجليسة راقية بالفوتويات فالتحت حتى بان ليها قوس هابط لابس تريكو فالبوغدو خفيف مع سروال دجين فالكحل...
ترف ناضت لعندو:خويا الغزال عاد هابط
قوس:كانو عندي مكالمات هاتفية على الخدمة على كل عذراء راها فالطريق علمني الشيفور
ترف:ااه كان يتصحاب ليا علماتك هي ههه
قوس:معنديش نمرتها
ترف:ا ااه وي المهم غنمشي نطل على الطباخين
نصارفات ترف و قوس جلس مقابل مع الساعة تيتسنا....
وقفات الطونوبيل ديال الشيفور و هبطات منها الأميرة صاحبة الفستان الأسود هازة صاكها العامر فكتفها بحالا جاية تبات متسناتش الشيفور يحل ليها معندنا منديرو الكوافورة تتبقا ديما كوافورة..توجهات جيهة الباب لقات الخدامات قدامو شدو من عندها الصاك و داوها مدخلينها للداخل..سمع قوس خطوات جايين عرفها هي و هو ينوض فنفس الوقت دخلات عليه بقا لثواني تيشوف فيها شي حاجة غريييبة زادتها اليوم اااه عاد قدر يرد البال تسريحة شعرهاا!!من غير الفستان الأسود لي ناسبها و بيين ملكية ذوقها البسيط الا انها قدرات تخطف انضارو بأي لووك داارت فالأخير تتبقا عذراء لي شافها فجميع حالاتها تقريبا...
عذراء حشمات من نضراتو الرصاصية جيهتها و هي تحدر راسها بخجل حتى جات ترف و قاطعات هاد الأجواء...
ترف:اووه مرحبا ب عذراء تفضلي
شافت فيها عذراء و رجعات شافت فقوس و مشات جلسات فالطبلة بعدما جرات ليها الخدامة الكرسي..جلس قوس و جلسات ترف مقابلة معاهوم...
ترف:اوه على الحشمة كاع خصك ترفعي راسك و تقولي(لاحت شعرها للور) اكيد انا زوينة
قوس:هادو حركاتك نتي بوحدك عذراء زوينة بلا متأكدها لناس
عذراء هزات فيه راسها عينيها تيلمعو و قلبها تيضرب و فخاطرها تتقول اكيد هدا هو الاعجاب اكيد هو معجب بيها....
ترف:اووه خويا و الاعجاب ههه
عذراء حشمانة كيف ماطيشة ويلي قالت ليه الاعجاب هكا نيشان!
قوس:ولا لا ا عذراء؟
عذراء بتوتر:ا ا ااه ا مستر
ترف:ههه شحال تتباني كيوت و نتي حشمانة
قوس تيشوف فيها و هي تتلعب بصباعها حتى جابو الخدم العشاء لي كان متكون من بسطيلات متنوعة و مملحات...رافقوهوم بالمشروبات و عصائر...عذراء غير شمات ريحة البسطيلة و شافتهوم حاطينها بزز باش حابسة راسها جنوونها هي البسطيلة بالحوت...جاو الخدم هازين موس منشاري و تيسولو فيهوم اشمن بسطيلة بغاو يقطعو منها مع ذكر المكونات لي اكيد حافظاهوم الوكالة عذراء..حطو لقوس و حطو لترف فطباسلهوم جاو يسولو الكوافورة صدقات باغية كوليكسيون...
عذراء:عطيوني طرف من كل وحدة
الخدام حدر راسو و بدا تيقطع و الخدامة لي حداه تتهز و تحط ليها فتبصيلها حتى عمر...
عذراء بتاسمات:شكراا
حنات راسها فتبصيلها و عينيها غيخرجو الريحة طالعة شحاال زويييينة...
ترف تتاكل عاجبها المذاق:عطاني الشاف اختيارات كتيرة من الطبخ المغربي و لفت انتباهي البسطيلة جاتني بحال مورقات الأكل الآسيوي حتى هوما تيستعملو هاد النوع من العجينة فالحشو
عذراء هزات بيديها تتاكل:ا ااه معندي حتاشي فكرة على الأكل الآسيوي
قوس طلع راسو:شي نهار نديك تاكليه
عذراء شافت فيه بفرحة:بصاااح؟؟
قوس:اه
عذراء:شكرااا بزااف فرحتيني
ترف:ايوا شفتو نضمت ليكوم دابا موعد اسيوي
قوس بتاسم فوجه عذراء و هي حدرات راسها عاجبها الحال اما ترف تتاكل و تبتاسم...كملو داك العشاء و جمعو الخدم الطبلة باش يجيبو التحلية أو بالأحرى التحليات عمرو الطبلة بالحلويات الراقية لي بحال التحف الفنية غير ديال التأمل تحشم تاكلها مع المرافقات اكيد لي هوما القهوة و الشاي...
ترف:اوه و اخيرا جابوها تحليتي المفضلة(شافت فالخدامة) حطي ليا و حطي لعذراء
حدرات الخدامة راسها و دارت لي قالتو ليها..شافت عذراء فتبصيلها تتبان ليها كاب كيك د الشوكولاتة مزينة بليماكاغون و الكريمة الملونة شحال زوينة...
ترف:هادي كاب كيك الشوكولاتة معمرة من الداخل بالكراميل المملح و مزين بكريمة الزبدة السويسرية و هادو ليماكاغون بنكهة النعناع
عذراء غير تتسمع شي مكونات عمرها سمعات بيهوم ولكن الأهم انه الريحة و المنضر كافي انها تاكل بشهية مفتوحة هزاتها بين يديها و خدات قضمة...
عذراء:مممم بنييينة ههه
ترف:بالصحة(حدرات راسها تتاكل)
فجأة تمات جاية واحد الخدامة هازة سماعة الفيكس..جات حتال عند ترف و تحنات لعندها...
الخدامة:اتصال ليك ا م مدام
ترف هزات راسها مستغربة شكون لي غيصوني عليها و هي فالمغرب ستأذنات من قوس و منهوم هازة السماعة حتى طلعات لبيتها و سدات عليها...
ترف:الووو؟
المتصل بضحكة خفيفة:هه و اخيرا جاوبتيني
ترف مصدومة:س س سام!!
سام:شحال زوينة سميتي على لسانك ا حبيبتي ولكن مكرهتش نسمع منك حبيبي..حياتي..حبي..بحال هاد الكلمات
ترف بغضب:شنوو بغيتييي واش مكفااكش لي عاايشااه معااك؟؟؟
طاحت ترف على ركابيها تتبكي بحرقة قلبها تيضرها و فداخلها تتمنى امتى تهناا منوو و تساالي من هاد الرعب لي معييشها فيه...
نرجعو لعند عذراء و قوس لي مجايبين لدنيا خبار جالسين تيشربو قهوتهوم و ياكلو فالتحلية...
عذراء:بالفعل ذوق ترف زوييين
قوس:عشقها هو الحلويات
عذراء:كيفما نتا عشقك هو الورود ياك؟
قوس شاف فيها شحال و بتاسم:ااه تماما و نتي شنو هو عشقك؟
عذراء:انا عشقي هو المايكاب
قوس:اه وي نفس مجالك
عذراء مبتسمة:تماما ههه
قوس ناض و حط يديه على يديها متحسسها و هي تطلع فيه راسها باستغراب...
قوس:اجي معايا
ناضت عذراء معاه و يديه باقي شادة يديها حتى دخلو ل لاتيراس و داها لجردة ديال الورود لي مشاو ليها داك النهار كان الظلام ولكن المصابيح و الأضواء منورين المكان بشكل جميل بقاو غاديين حتى جلسها فوق واحد الأرجوحة تما مصنوعة من الخشب وكلها ضواو حتى هي...
قوس جلس حداها:هكا تتكون فالليل
عذراء عجبوها الضواو:واااو هادشي زوين بزاااف
قوس:ياكما بغيتي تزعللي؟
يتصحاب ليكوم غتقول ليه لا هه تا راه لقات السبة...
عذراء حركات ليه راسها بحماس:اكيييد اكيييد بغيييت
قوس ناض بابتسامة حتى وقف حط يدو على حبال الزعلولة بجوج اما عذراء شدات فيهوم مستعدة تدفع راسها كيف موالفة حتى تتفاجئ بقوس لي قرب منها حتى لصق نيفو على نيفها طلعات عينيها تتشوف فيه بدهشة و هو يسد عينيه و زاد قرب حتى باسها ففمها..طلق منها و دفعها بشوية من القدام حتى تزعللات و علامات الصدمة فوجهها...
تزعللات عذراء مارشاريار و هو رجع تيدفع فيها من اللور...
عذراء:ص صاافي غير خليني تندفع راسي
قوس:غير خليني
عذراء تتمشي و تجي و غير تتحس يديه على ضهرها فاش تيدفعها تتبورش حتى حبسات لراسها و بدات الأرجوحة تتزعزع حتى كالاها قوس بيديه و جا قدامها مهبط راسو لعندها...
عذراء بتاسمات بتوتر:شحال هادي متزعللت
قوس شد ليها يديها و نوضها..جلس فبلاصتها و جرها حتى جلسات فوق رجليه يد شاد بيها يديها و الثانية خشاها فشعرها و صبعو على حنكها تيدوزو عليه برفق..فنفس الوقت عذراء وسعات عينيها من الجرأة ديالو حشمانة من هاد الجلسة لي داير ليها فوق رجليه شي حوايج اول مرة يتدارو ليها و فنفسها متسائلة شنو تيضور فراسو...
قوس جر وجهها لعندو و شاف فعينيها:بغيتك تكوني حبيبتي...
عذراء بقات غير تتبلق و تبرقق فعينيها تصدمات من كلامو متوقعاتوش ابدا يقول ليها هاكا قلبها بدا تيضرب تتحسو غيخرج من بلاصتو احاسيسها مخلطين من غير وضعييتها المعروفة كيف دايرة الا انها عمرها تصورات بنت بسيطة بحالها يطلب منها رب عملها هادشي...
قوس لاحظ سكوتها و تفهم الوضع المفاجئ:تنظن صدمتك(شد خصلة من شعرها و ضورها فصبعو)نخلي ليك وقت تفكري فيه
عذراء بلعات ريقها و حدرات راسها باقة مصدومة اما هو نوضها من فوقو حيت بداو اشياء خرى تيتحركو و مبغاش يبزز عليها حتاشي حاجة دابا..بقاو غاديين تيتمشاو و عذراء تقطع حسها حتى رجعو لداخل ملقاوش ترف...
عذراء بتوتر:تنستأذن منك مستر خصني نرجع لدار دابا
قوس:اوكي صبري نوصلك انا
عذراء:ل لا لا مستر غيديني غير الشيفور شكرا
جبد قوس التيلي ديالو من جيبو:عطيني النمرة ديالك
عذراء:ال..التيلي فصاكي
قوس عييط على الخدامة لي جابت صاك عذراء شداتو من عندها و جبدات التيلي فالجيب البراني اما كون لاحتو فالداخل الشوهة مع ديك الجوطية لي سادة فصاكها..فاش جبداتو لاحظ قوس انه تيليفونها نوعية قديمة السييد تيبدل التيلي كل عام وقتما خرجات شي حاجة جديدة واش شراها اما الكوافورة تيليفون واحد عندها من الليسي وقتما يخسر تقادو عند المعلم ولا تبدل ليه فلانكاسابلات...
عذراء:06.......
قوس سجلها عندو:غنصوني عليك باش تعرفي ديالي
عذراء:واخاا
قوس قرب منها و باسها فجبهتها:تصبحي على خير
عذراء تبورشات من البوسة حنات راسها دغيا و انساحبات اما هو بتاسم مراقب تفاصيلها كاملين و عينيه تيشوفو الإنسانة لي فيها متطلباتو و احساسو متأكد انها هي المناسبة ليه رما الكرة لعندها و باقي الأمور فيديها دابا...
اما الكوافورة غير خرجات تلاحت فالطونوبيل معارفة باش تبلات السييد غير يضور و يضور يبوس فيها بحالا مشابعش بوسان فصغرو و يجي يفرغو فيها هي و لكن واخا هكاك شي حاجة تتحرك احاسيسها بهاد اللمسات و القبلات رغم انها معاجبهاش الحال تقاس من رجل غريب الا انه فنفس الوقت داك الأمان لي تتحسو من جيهتو مغطي على هادشي كامل...
ديمارا الشيفور من تما و رجعها لقدام الشركة...
من بعد مدة د الطريق حط الشيفور عذراء قدام الشركة و مشا..شافت يمينها و يسارها بانت ليها الطونوبيل د الشركة الخاصة ب بنان مشات عندو ديريكت و ركبات..عطاتو العنوان و وصلها حتال الشارع و دخلات مع واحد الزنقة حتى ضربات الدورة لدارهوم و هنا جبدات التيلي و ڨيبات على رفيف لي هبطات تتسلت دايرة راسها بغات تشرب حتى حلات ليها الباب...دخلات عذراء بالزربة و تخبات فالكوزينة حتى حييدات الكسوة و الصباط خشاتهوم فالصاك لي غيتفرقع بتخربيقها و طلعو هي و رفيف تيدافعو فالدروج قاطعين الحس حتى سدو عليهوم فبيتهوم بشوية...
عذراء عاد قدرات تنفس:نااري قلت هادي هي اللخرة ليا
رفيف:ناري ا بنت الحرام شوفي يديا كيفاش تيترعدو كنت تندعي توصلي قبل دوك جوج محاميين
عذراء:اويلي مزال مرجعو لدار؟؟؟
رفيف تكات فناموسيتها:مزاال حمدي ربك و شكريه و دابا تلاحي نعس
عطاتها بضهرها اما عذراء رتاحت دابا 100٪ مسحات وجهها من المكياج و فكات ضفاير شعرها لي دارت تخشات ففراشها و تيليفونها فيديها لقات المكالمة ديال قوس و ميساج بنان فيه "واش كلشي بيخير؟" طمئناتها و دازت سجلات نمرة قوس عندها..دارت لالارم ديالها و نعسات مبتسمة...
☀️فالصباح الباكر☀️
كان قوس تيفطر فالطبلة بوحدو و جوج خدامات واقفين عليه وحدة زادتو من القهوة و الثانية تتسنا منو يطلبها تكحز ليه شي حاجة حتى هبطات ترف تابعينها الخدم مهبطيين بوالزها...
قوس طلع راسو باستغراب تيبان ليه واحد التعب فوجه ختو واضح و الخدم جارين حقائبها:فين غادية؟؟
ترف:تبدلات طيارتي غنمشي اليوم
قوس عقد حجبانو:ماعلمتينيش من قبل؟؟
ترف حدرات راسها تتحك عنقها بتوتر:هادشي جا على غفلة
قوس:واش واقعة معاك شي حاجة؟؟
ترف:لا لا غير صوناو عليا على قبل شي خدمة المهم غنفطر معاك و نمشي
قوس هبط راسو مكمل فطورو فنفس الوقت هاد الهضرة مداخلاش ليه لراسو من فاش مشات جاوبات على ديك المكالمة تقطع حسها حتال هاد الصباح و جاية ليه بغترجع لسويسرا؟؟ ولكن مادام مبغاتش تقول خلاها على خاطرها حيت تتبقا امرأة بالغة لي معتمدة على راسها...
اما عند الكوافورة ديالنا لي فاقت مبكرة بسبب لالارم طفاتها و مشات قضات حاجتها و قادات حالتها..هبطات حتى فطرات مع لوليا و شدات طريقها لخدمتها...
وصلات و طلعات لطابق العارضات لقات بنان جالسة حاطة رجل على رجل فمكان الاستقبال غير شافتها ناضت بالزربة جراتها و سدو عليهوم البيت...
عذراء مستغربة:غير بشوية اصاحبتي
بنان جلساتها:وا عاودي ليااا
عذراء جلسات تضور فعينيها:منييين نبدااا
بنان:من كلشييي اليوم مكاينة الخدمة حتال العشية
عذراء:و مااالك قايلة ليا نجي مع الصباح؟؟
بنان:ههه باش تعاودي ليا
عذراء شدات جبهتها:اوف منك ا مدام
بنان:واا طلقييي
عذراء:احمممم قال ليا نولي حبيبتو(نيشان بلا فرانات)
بنان بقاات مصدومة شحال تتستوعب الهضرة...
عذراء:لعبني فالزعلولة و قال ليا انا زوينة و باسني و جلسني على ركابيه و باسني مرة خرى فجبهتي و شبع فيا تلماس صافي تهنيتي دابا!
بنان كل كلمة من كلامها دايرة بحالا تضربها بسهم ديال القلوبة كلمة تنسيها فلوخرا حتى عينيها غيوليو قلوبا و تنهدات واحد التنهيدة تبعاتها بواحد الغوتة:ااااااااااااااااااا😍😍😍😍😍
عذراء سدات ودنيها:ا بشوية اسميتك
بنان شداتها من كتافها تتحرك فيها:وااااانااااااري خليتيييييه يطلبك توليييي حبيبتووووو وااااااككك وااااك ا عيباد الله اليوووماااا يهزو روبين ل الروضة(سالات من الجديب و شافت فعذراء بابتسامة) قبلتي ياكي؟
بنان ختافات ابتسامتها:افففف زمر صاافي شغنديرو معااه؟؟
عذراء:مخليت مادرت والا بغا يفهم راسو
بنان شداتها من حوايجها:واخااا نيت كان عليك تقبلي فالبلاصة
عذراء:ولكن راني مخطوبة ماجاتش
بنان قربات منها:ياك متتبغيهش و مباغياش هاد الزواج؟؟
عذراء:اكييد بغيت نتفك منو
بنان بتاسمات بشر و بدات توسوس ليها و ابليس جالس تيتفرج فخدمتو تتم على اكمل وجه على يد بنان...
بنان:قبلي بقوس قلبك ماشي مخطوب نتي لي مخطوبة
عذراء حالة فيها فمها:اه قلبي ماشي مخطوب و...اهياتااا مشيت معاك!!
بنان هزات عليها صبعها:سمعي لكلامي ولا غتندمي
عذراء حدرات راسها بزعف:و مالي كرهت
بنان بدات تبتاسم شوية بشوية:هااي هااي عليك فين دوك الهضور القدام ديال مابغيتوش لا راه غير باطروني عجبك البوسان و الضوران ياكي؟؟شفتي الى رفضتيه غيطلع معاك اكبر قالب فحياتك
عذراء:ولكن نقبل و انا مخطوبة راه هادشي متيتقبلوش العقل!
داز الوقت فالشركة و كل واحد مسالي خدمتو..فلبيرو د قوس كان هاد الاخير جالس تيتابي فالبيسي ديالو حتى جات صورتها قدامو مخلياه مبتاسم بالفعل هاد عذراء دخلات لحياتو غير بالزوين و خلات صورتها عندو فأفضل الحالات..كمل خدمتو و هز الفيكس حتى طلب من جلنار انها تريزيرڨي ليه طاولة فشي مطعم اسيوي قال مع راسو من الأحسن انه يديها اليوم ماحدو هاد ليامات مسالي حيت السيمانة الجاية غيبدا الزيار فالخدمة حيت غيدخل فصل الربيع بشكل تام و غيبداو العروض و المبيعات د الملابس...
فدار عائلة عذراء كانت لوليا بوحدها لي فالدار تتجمع فيها و تقاد يالاه شطبات و جمعاتو فالبالة حتى تتسمع الدقان فالباب جمعات كلشي و رجعاتو لبلاصتو و مشات حتى حلات تصدمات فاش لقات الجدة سلافا و حداها دواني ام برناس...
سلافا:مالك مصدومة ا بنتي لوليا ههه؟
لوليا عاد عاقت براسها:ا لا والو ههه متوقعتكش تجي مرحبا و الف مرحبا ب مي سلافا زارتنا البركة دخلوو دخلوو(سلمات مع دواني)
دخلو و داتهوم لبيت الضياف...
سلافا تتمنضر فالحيوط:شحال هادي ماجيت لدار ولدي جلوان بيني و بينها سنين هادي ههه
لوليا:مرحبااا بيك دارك هادي ا مي
سلافا:ربي خليك ا حبيبتي
لوليا:صبرو نمشي نعمر اتاي...
عند عذراء لي كانت باقة مع بنان لي واقفة عليها...
بنان:سيفطي ليه دابااا!!!
عذراء تتفتف مخلوعة:د د دابا؟؟
بنان:و امتى؟؟؟كتبي ليه لي قلتو ليك
بدات عذراء تتكتب الميساج بيدين تيترعدو و قلبها تيضرب من هاد الخطوة الجديدة لي غتاخدها فحياتها.."صباح الخير مستر تنتمنى تكون بيخير المهم انا اتاخدت قراري و الى سمحتي بغيت نجاوبك فالمكان لي مشينا ليه داك النهار"...بنان حييدات ليها التيلي:ارا نشوف واش كتبتي كيف قلت..صافي مزيان(سيفطاتو)
سمع قوس رنة الرسائل و تفقدها لقا ميساج من عذراء..ضغط عليه و قراه و هو ينوض هازو فيدو مجاوبها "انا جاي ليه دابا" قراتو عذراء و دفعاتها بنان حتى خرجات من الغرفة و طلعات فالسانسور دارت ليها باي باي و بيديها بيينات ليها انه كلشي غيكون مزيان...بعد دقائق قلال هاهيا فالطابق الفارغ من العملاء و قوس تيتسنا تما شافها بتاسم ليها و هي رضات عليه بابتسامتها المتوترة و قلبها تيشطح مبقاش غير تيضرب...
قوس دار يديه فجيوبو:انا تنسمعك
عذراء بلعات ريقها بتوتر:ا انا ا انا....اناا....
فنفس الوقت لوليا رجعات مبتسمة و جلسات معاهوم...
سلافا:ايوا عرفتي علاش جينا اليوم ا بنتي لوليا
لوليا:الله يسمعنا خبار الخير ا مي سلافا
سلافا شافت فدواني بابتسامة و رجعات شافت فلوليا:ملي نساليو من عرس رئال و رسيل لي مبقا ليه والو ان شاء الله غندوزو لعرس بنتك عذراء و ولد دواني برناس...
عذراء شافت فقوس و جمعات قوتها و وسوسة بنان دايرة خدمتها:اناا قابلة....
عذراء وقوس الجزء التاسع
محتوى القصة
التنقل بين الأجزاء