فاش بنت عادية مولوعة بالتحف العتيقة و الآثار القديمة تجيها فرصة تزور واحد المتحف و فوسط من استكشافها و روي عطش معرفتها غادي تصادف مع واحد التمثال قديم راجع لواحد الأمير من الأمراء المغاربة القدماء و لشدة فضول هاد البنت غادي تقيص التمثال بيديها و فجأة غادي يتحول و يرجع لإنسان مرة خرى ولكن فعصرنا!! فا شغادي يوقع مع الأمير و هاد البنت؟؟؟...
القصة بجميع احداثها و أفكارها من مخييلتي الخاصة و ماعندها حتاشي علاقة بشي حاجة من الواقع جميع الأحداث التاريخية و المعلومات غتكون من وحي خيالي مكاين حتاشي اقتباس من التاريخ.
اسم البطل الكامل من اختيار و اختراع حبيبتي و صديقتي Oumaima Mega💜💜
و دابا نخليكوم مع القصة✨✨
فالمغرب و فقدام أفضل متحف فيه كانت بنت متوسطة الطول و المقاس لابسة سروال دجين زرق مع تيشورت بيض مزير عليها طالقة نص شعرها الطويل و النص لاخور دايراه فوق راسها على سفنجة بشكل عشوائي..مايكاب ترابي و بابتسامة حماسية شافت فالمتحف من الخارج معنقة مذكرتها عندها و صاكادوها فضهرها حتى جات المرشدة لي غتوريها هي و شي ناس خرين أرجاء المتحف...
المرشدة طالقة عليهوم غير لفرونسي:عفاكوم الصف تقادو واحد مورا واحد
تقادات البنت كيفما قالت المرشدة و غير تتفرنس فرحانة و ماقاداها فرحة هدا حلم بالنسبة ليها تيتحقق قدامها دابا كونها فتاة تتعشق الآثار و التحف القديمة خدمات و جمعات لفلوس و حاولات تشييط باش تشري تذكرة هاد المتحف الكبييير لي ماشي بزاف باش تحل فمدينتها...عييطات المرشدة على اسمائهم و تتسجل واش حاضرين حتى وصلات لعند البنت...
المرشدة:هاجر سعدان
طلعات هاجر راسها لي حركاتو ليها ب اه:هانيي
حدرات المرشدة عينيها و دارت كروا حدا سميتها فواحد الخانة يعني حاضرة حتى كملاتهوم و سبقات بخطوات قليلة عليهوم تتدوي بفمها و يديها فنفس الوقت هوما تابعينها و هاجر بحالا غيدخلوها تشوف شي ممثل ولا مغني معرووووف هي جاية غير على قبل تريكة فرعون و هتلر...بقاو غاديين ها اللوحات الفنية فجميع الأشكال و الأحجام ها المجسمات ها المستحثات و شي اثار و عظام المهم هاجر لي شافتها ضروري تقيسها المرة لولة ضارت فيها المرشدة و حدراتها المرات لخرين تتغفلها و تدير ما بغات راسها قاصح🤣..بقاو هكاك حتى وصلو لمكان خاص بالتماثيل كان كبير و واسع بزاااف و كل تمثال عاطي مسافة لتمثال اخور تقول مخاصمين..دخلو و بدات تاني المرشدة تتقول ليهوم على المكان و بلي هدا تمثال ديال من و كدا شي تيسمع شي جا غير على قبل خدمتو و صافي اما هاجر طالقة ودنيها بحال الرادار اي حاجة تقالت حسبوها تكتبات فمذكرتها حتى سالات المرشدة و مشات تابعينها لخرين اما هاجر وقفات تتكتب اخر جملة قالتها المرشدة فاش سالات و طلعات راسها لقات غير الريح مكاين حد من غير دوك التماثيل بقات لثواني تتفكر واش تلحق عليهوم ولا تزيد تبقا مزال..شافت حولها و بابتسامة شريرة قالت...
هاجر:ويلي جامعة فلوس التذكرة شقفة شقفة و نفلت هاد الفرصة ههه امبوسيبل
دارت مذكرتها فحقيبة ظهرها و مشات دايزة بين التماثيل ضامة يديها بابتسامة و لمعة فعينيها تقولي السييدة شايفة فارس احلامها هي راه غير حجر مضروب و خرجو منو شكل بنادم...بقات هكاك تتستكشف حتى دازو دقائق و من بعد ولات نص ساعة بحكم التماثيل كتيرة حتى بان ليها واحد التمثال الشكل ديالو فشكل على التماثيل لخرى بحالا حولو شي هالة لي تتخليها تنجاذب ليه بحال المغناطيس و بلا متشعر جسمها داها لعندو ماحسات حتى وقفات قدامو..كان تمثال كبير لرجل ذو بنية كبيرة و طويييل لحيتو كثيفة و لابس داك اللباس بحال علاء الدين حدرات هاجر راسها فاللافتة لي غتكون حداه و لي تيكونو فيها معلومات حول اي تحفة او حاجة...
هاجر:الأمير بيجاد الإسلام الفارسي
طلعات تاني راسها فيه و رجعات شافت فاللافتة:من الأمراء المغاربة الذين شاركو في عدة حروب بينهم و بين المحتلين الأجانب..عرف بانتصاراته و بطولاته على الصعيد المغربي و الأوروبي و من بين انجازاته العظيمة فتح مدينة خرشوش و قتل 1000جندي وحده في معركة باداز و العديد من الإنجازات البطولية...ازداد سنة 1570 و توفي سنة 1606.
هاجر طلعات فيه راسها:ويلي مات صغير مسكين يالاه 36عام
بقات شحال تتشوف فيه و رجع تاني داك الشعور ديال الجاذبية بينها و بين التمثال جسدها بدا تاني تيتحرك من تلقاء نفسو و بدات تتزيد تقرب منو و فنفس الوقت من غير هادشي فضولها قاتلها و بغات تحسس ملمس التمثال الحجري حتى تحطو يديها على ركابي التمثال بحكم انه عالي حيت محطوط فوق واحد الحاجة...فجأة غير تحطو يديها عليه بدا التمثال تيضوي و يشعل بأضواء بيضاء و ذهبية و شي ريح معرفت منين جات طييرات لهاجر شعرها خلاتها تخبي وجهها بيديها و تكمش من برودتها حتى ختافات و مبقاتش حسات بيها طلعات راسها و حييدات يديها على وجهها و هنا كانت الصدمة فاش لقات بلاصة التمثال رجل شاااب طويييل ذوو بنية قوية حروفو كحلين و لحيتو كثيفة لابس نفس لباس التمثال و تيشوف حولو باستغراب....
بيجاد مستغرب و غير تيضور فراسو:ف فين انا؟؟؟
هاجر حالة فمها على قدو:م م مي ميمكن نننننننننش
بيجاد شاف فيها عاقد حجبانو طلعها و هبطها بعينيه:ااش هاااد اللباس؟؟؟اش هاد الغرااابة؟؟؟؟انا تنآمرك تقولي ليا فين انا!!
هاجر باقة ممصدقاش:وا اش واقع ا عيباد الله وا غير قول لياااا
بيجاد شد راسو لي بدا تيضرب حتى فقد توازنو و طاح جا جالس على الأرض..هاجر تهزات مخلوعة ساعة موقع ليه والو عضامو صحاح...
هاجر مبعدة منو خايفة يكون شي جن:بسم الله الرحمن الرحيم
بيجاد شاد راسو تيضرو و ذاكرتو الضعيفة بدات تتستجمع بقاياها من سنة 1606...
هاجر تطل عليه بعويناتها و فنفس الوقت خايفة منو:و ش واش لباس؟؟
ناض ليها نوضة وحدة و حط يديه القوية على كتافها شهقات شهقة وحدة مبلوكية فيه بسبب تصرفو المفاجئ...
بيجاد:نتييي من ال سعدااان نتي سليلة ال سعداااان يااااكي!!
هاجر مبرقة فيه عينيها قداش كبار صدمها بكلامو:ا اااه انا من ال سعدااان
بيجاد عقد حجبانو و نضراتو ولا فيهوم واحد الغضب من جيهتها:يااا قوم المشعوووذييين!!!!(تيحرك فيها) وحدددة بحاالك وحددة بحااالك هي سبب خلاصي!!!!
هاجر دوخها بالتحراك مبقات فاهمة والو:طلق مني واش نتا مسطي ولا شنو وا طلق غتقطع ليا حوايجي يديك بحال البالات
بيجاد طلق منها:بالات؟؟؟شي تعويذة من تعاويذكوم هادي ياك!!
هاجر:اشمن تعويذة قول ليا كيفاش كنتي تمثال حتى وليتي بنادم انا راه مزال ممتيقة لي تنشوفو قدامي هادشي تنشوفو غير فالأفلام
بيجاد مخنزر:الأفلام؟؟؟تعويذة خرى؟؟؟
هاجر:وا عاود ليا اش واقع اشمن تعاويذ!!
بيجاد دار يدو تحت ذقنو و عينيه الحارين مصوبين عليها بتخنزيرة اكيد مغيتيقش فيها هادي هي سليلة ال سعدااان المشعوذين الكبار فالعهد ديالو...
هاجر شافتو ساكت تيفكر ولكن عينيه كيف تيشوفو فيها بحالا هاز عليها سلاح و غيطلق الرصاص صقلات فبلاصتها تتسنا شي ردة فعل منو حتى طلع فيها راسو...
بيجاد تيحاول يتمالك اعصابو: معاودش ليك شي واحد من عائلتك على شي قصة على شعوذة أمير؟
هاجر:لا عمرهوم عاودو ليا
بيجاد تيشوف حاضي جنابو هادشي غريب عليه باقي دايخ:متأكدة؟؟؟
هاجر:تنحلف ليك بالله
بيجاد مستغرب:نتي مسلمة؟؟؟
هاجر:اكيد اش هاد السؤال؟؟
بيجاد:ولكن ال سعدان كانو يهود!!
هاجر:شوف ا سي بيجاد(شافت فلافتة) الإسلام الفارسي انا هادشي كاملو لي تتقولو معارفاهش بغيتي تعاود ليا قصتك و شنو بيك عاود مابغيتيش راه باقي تابعني نكمل زيارة هاد المتحف
بيجاد تنهد و باقي مخنزر فيها:فين كاين انا بعدا هو الأول؟؟
هاجر:راك فالقرن 21 الدنيا تبدلات بزاف على كيف كنتي
بيجاد:كيفما قالت المشعوذة!!!القرن 21!!!
هاجر غيسطيها:اينا مشعوذة؟؟
بيجاد هز عليها صبعو:الجدة ديالك!!!!
هاجر حطات يديها على جبهتها:عاود ليا هاد جدة اش دارت؟؟
بيجاد بقا شحال تيفكر و قرر يعاود ليها:فالعهد ديالي كنت الأمير الأول المرشح للحكم بفضل بطولاتي و انجازاتي لي تعرفت بيهوم فديك المدة الزمنية رغم انه كنت الأخ الأصغر خديت حب الناس و كنت داك البطل فعينيهوم ولكن فوسط من هاد البطولات كاملين كان واحد الحقد تيضور جيهتي و انا غافل عليه الأخ ديالي الأكبر عطاني وجه الأخوة و فلخر طعني فضهري فاش شاف انه تفوقت عليه فكلشي و باش يحييدني من طريقو بلا ما يتير الشبوهات لجأ ل مشعوذين القصر الكبار مشعوذين ال سعدان و كانت كبيرتهوم هي الباتول ال سعدان بسبابها وليت تمثال ولكن قبل متحولني قالت انه التعويذة غتفك فقط الى لقاتني وحدة من سليلااتها و هازة دمائها...
هاجر:يعني دابا انا جداتي القديمة كانت شوافة و هي لي رجعاتك حجر و كانت التعويذة المعاكسة هي وحدة من سليلاتها لي هي انا؟
بيجاد:تماما
هاجر شدات وجهها تتندب:وانااا ماااالييييييي!!!
بيجاد مخنزر:زعمة باغية تمثلي عليا انك معندك حتاشي علاقة امم!!
هاجر:واش نتا حمق!!راه باينة معارفة والو
بيجاد شاف يمينو و يسارو و تم غادي دايز من حداها...
هاجر:فين غادي؟؟؟راه الناس غيستغربو زائد التمثال مبقاش هنا!!!
بيجاد:انا غادي نلقا ديك المشعوذة د جداك و نتفاهم معاها
هاجر لحقات عليه تتجري و شداتو من جلايل حوايجو:وا وقف وااش تسطيتيي مبقات حتاشي جدة راك فالقرن 21!!
بيجاد جر حوايجو من بين يديها بتخنزيرة:هاديك مشعوذة و المشعوذين متيموتوش
خلاها و مشات تبعاتو تاني:وا وقف و نتا تتمشا بحالا مركبين ليك الروايض
بيجاد وقف:لاش تابعاني؟؟؟
هاجر:راك ماشي فالزمن ديالك وا فهم!!
بيجاد خلاها و مشا هو عارف انه الزمن ماشي ديالو ولكن هو متشبت بواحد الفكرة انه هاد الزمن مغيتبدلش بزاف على الزمن ديالو..بقا غادي و هاجر تابعاه اكيد حيت غيدير شي موصيبة مافيهاش و لحسن الحظ مكانوش الناس تما بقاو هكاك حتى لقا راسو قدام الباب ديال المتحف هنا فين وقف و استغرب فاش حط رجليه حدا الباب و هو يتحل بوحدو..قفز بيجاد و غير حاضي جنابو اكيد هادي خطة من خطط المشعوذة باش تطييحو ف فخها مرة خرى حتى حس بشي واحد موراه ضار مخنز لقاها هاجر...
هاجر:ايوا مغتخرجش؟؟
بيجاد شدها من كتافها و و جرها لعندو بغضب:واش هادشي نتي لي درتيه؟؟؟ شي فخ؟؟ شي كمين؟؟؟؟
هاجر حطات يديها على يديه تتحيدهوم ولكن والو دايرين بحال المقابط:وا صافي راك عييقتي عليا متشوفنيش ضريفة و تبغي تحگر عليا!
بيجاد رخف القبضة ديالو:شهادشي دابا؟؟
هاجر:هدا سميتو الباب الأوتوماتيكي تيتحل بوحدو غير تتقرب ليه و غير تتخرج تيتسد تاني
بيجاد تيسمع ليها و تيحاول يستوعب لي تتقولو فالزمن ديالو كانو ابواب خشبية و حديدية متينة و تتحل غير بأيادي الرجال الأقوياء و فهاد العصر كاين هادشي؟؟...
هاجر شداتو من حوايجو و جراتو خارجين تتبان شحال قصيرة قدامو رغم انها بنت طويلة...
بيجاد:فين غادية بيا!!
هاجر:شوف مزيان حولك
بيجاد شاف قدامو و هنا تصدم فمو تحل و عينيه وساعو سارحين فضخامة البنايات..الشانطيات..لبلاكات ديال المرور..الناس لي غاديين جايين بلباس بحال هاجر و لي لا علاقة بلباسو..طلعات هاجر راسها لقاتو مبلوكي غير جاو الطونوبيلات هنا السييد بحالا جاه الحماق مشا تيجري لعندهوم و الناس مستغربين من اينا كوكب جاي هدا هاجر غير شافت هاد الديكور ضرباتها بجرية حتى جراتوو تتبتاسم لناس بتوتر بقات تدفع فيه بحالا تدفع فالحيط يالاه متحرك حتى دخلاتو لواحد الدريبة...
بيجاد:لفين جايباني فين هناا؟؟
هاجر:وا بناااادم سمعني ولو غير مرة وحدة فحيااااتك وااا سماااااااع
بيجاد تيشوف فيها بتعابير ممفهومينش و خنزر فيها:اخر مرة تغوتي عليا راني أمير متنسايش هادشي ا حفيدة المشعوذة
هاجر زييرات على يديها:خصك تفهم انك ماشي فعصرك وا ماشي فعصرك!!دابا مابقيتي لا أمير لا والو نتا انسان عااادي حتى من هوويتك مجهووولة معندك لا كارط لاا والووو خصك تعرف خطوورة هادشييي و من عندي انا الى غتبقا هكدا و تقصح معايا راسك غير رجع لداك المتحف قول ليهوم يطليوك بالسيما!!!
بيجاد:شناهيا السيما؟؟
هاجر:واش سمعتي داكشي لاخور لي قلتو!!!
بيجاد بقا ساكت تيحاول يفهم شنو قالت مزيان حيت واخا هكاك اللهجة ديال دابا ماشي نيت بحال ديال ناس زمان كيفما تيتطور العصر فالشكل و الملابس نفس الشيء مع اللغة و اللهجة...
بيجاد و أخيرا توصل لواحد الحل:بحكم انه نتي لي عارفة هاد القصة و متنعرف حتى واحد فهاد القرن قررت نبقا معاك مؤقتا بينما لقيت شي حل اخور..
هاجر ربعات يديها:و زعمة عندك شي حل اخور من غير هدا؟؟
بيجاد خنزر فيها:تنآمرك تديني دابا لدارك
هاجر:زيد معايا نشدو طاكسي
بيجاد باستغراب:طاكسي؟؟
هاجر:اه نسيت هي دايرة بحال دوك لي مشيتي تتجري لعندهوم لونها حمر و تتركب تتخلص لواحد الرجل صافي تيوصلك فينما بغيتي
بيجاد:مكاينش شي عاود(حصان)هنا؟؟
هاجر:اشمن عاود الله يهديك اسميتك
بيجاد:راك عارفة سميتي واقيلة!
هاجر شداتو من حوايجو:اجي معايا الى بقينا هكا غنتعطلو
خرجو من تما و بقاو غاديين فوق الطروطوار حتى وقفات هاجر و وقف حتى هو تيبحلق بعينيه مخنزر بديك الشوفة ديال الله يعميها لشي واحد الطونوبيلات غادين جايين و هو تيحاول يتمالك نفسو من هاد المنضر الغريب حتى جات واحد الطاكسي غير شافتها هاجر شييرات ليها دغيا قشعها مول الطاكسي و وقف ليها...حلات هاجر الباب لوراني و طلعات راسها فبيجاد قداش طويل...
هاجر:زيد دخل
بيجاد:شنو هادشي و كيفاش هادشي فيه باب و مكان للجلوس؟؟اش هادشي؟؟
هاجر:تيق فيا و ركب راه مول الطاكسي تيتسنا
بيجاد تحنا مكمش حتى قدر يدخل و جلس فلداخل تبعاتو هاجر جالسة حداه و سدات الباب...
هاجر:عفاك دينا لشارع البوقالي عند عمارات الزيتون
بيجاد غير تيسمع طالق ودنيه و عينيه غير تيتساراو فالطونوبيل باستغراب جاتو الجلسة مابيهاش واخا مزيير عليه تما شوية..مول الطاكسي قال ليها واخا و عينيه على المرايا تيبان ليه راجل باينة فيه طويل و مضخم نزل عينيه لحوايجو و استغرب هاجر بتاسمات بتوتر من المرايا و هو يديماري حادر راسو فالطريق و مرة مرة يخطف شوفة فيهوم...
فالمتحف كان المسؤول على كاميرات المراقبة عاد راجع هاز صينية فيها بريريد مع كاس د اتاي و شي مسيمنات و بتيبان جلس فمكانو و حطهوم قدامو يهز بيدو و يخشي ففمو و عينيه على شاشة كاميرات المراقبة حتى لاحظ شي حاجة غريبة حط المسمنة من يدو و باقي تيمضغ بفمو قرب وجهو من الشاشة تيحاول يلقا الغريب فيها حتى وحلات ليه فاش بان ليه مكان تمثال الأمير بيجاد الإسلام الفارسي مكاينش بلاصتو كاين غير لخوا مشا تيكليكي يرجع لشريط الكاميرا اكيد غتكون لتاقطات الفاعل أو الفاعلون حيت ميمكنش واحد الإنسان ولا حتى ربعة يهزو تمثال بداك الثقل و الضخامة..بدا تيرجع و يحاول حتال ديك اللقطة فاش كانت المرشدة تما مع الزوار و مشاو مخليين هاجر موراهوم تقطع الشريط هناا و ولات الشاشة بيضة متتبان حتاشي حاجة نفس الشيء مع اللقطات لخرين ديال بيجاد و هاجر بقا داكشي تيبان ليه بيض حتى رجع للقطة فاش التمثال مكاينش ضرب المسؤول فالشاشة و الأزرار والو ديك اللقطة مقطوعة شد وجهو بخوف شنو غيقول للمسؤولين على المتحف دابا؟؟و كيفاش حتى هاد اللقطات بالضبط مقطوعين هاكا؟؟ناض من كرسيه بالزربة ماشي وقت الندم دابا خصو يخبرهوم دابا دابا باش يتصرفو ولا خدمتو غتحط على المحك...
وقفات الطاكسي فين قالت ليه هاجر هبطات و هبط بيجاد حتى هو باقي بداك التعبير المستغرب جبدات هاجر بسطامها من صاكادوها و خلصاتو مشا مول الطاكسي و ضارت عند بيجاد لي واقف سارح فالعمارات بعينيه...
هاجر بتاسمات فوجهو:اجي معايا من هنا
بيجاد تبعها ساكت كان تما خاوي فهاد الوقت كلشي خدام ولا قاري حتى دخلو للعمارة و طلعو فالدروج حتى وقفو قدام باب الدار..جبدات هاجر الساروت من صاكادوها و حلات باب الدار..سبقات و بيجاد تابعها غير دخل و هو يكمش تعابير وجهو بقرف فاش لتاقط نيفو رائحة كريهة ضور عينيه فأرجاء المنزل كان مكركب و مروووون الحوايج مليوحين فلارض و الماعن غاملين فالكوزينة و قواعت الماكلة و السقاطة فوق الطبلة ضور راسو لهاجر لي كانت تتحك شعرها بابتسامة توتر:نسيت مقلت ليك داري مرونة هيهيهي
بيجاد عطاها بالضهر و مشا تيخرخش فالباب باغي يخرج هاجر شافت فيه و مشات لعندو:اش ناوي تدير؟؟؟
بيجاد ساد نيفو:مغنبقاااش هنااا
و بشي طريقة حط يدو على البوانيي و تحل لباب خرج بيجاد و تبعاتو هاجر شداتو تاني من حوايجو:وا صبر واش من نييتك ماباغيش داري!!
هاجر ربعات يديها:راني ساكنة بوحدي داكشي علاش تنخدم و نقرا معنديش وقت لجميع
بيجاد هز عليها صبعو:تنقسم ليك بالله مغندخلش لدارك حتى تكون نقية
هاجر:اويلي واش من نيتك!!
بيجاد باقي هاز صبعو:تنآمرك تجمعي ديك الدار!!!
هاجر:ياكما قالو ليك سميتك خدوج راه مي بوحدها لي عندها الحق تآمر فيا نجمع روينتي
بيجاد:بعدا نيت كنت باغي نسولك مبانوش ليا الواليدين ديالك؟؟
هاجر:راني ساكنة بوحدي هوما فمدينة خرى قريبة من هنا
بيجاد:هاه! محاكمك حد؟ بنات هاد القرن بان ليا خارجين رجليهوم الشواري فزماني تخرج البنت غير بلا خبار واليديها يترحمو عليها!
هاجر:راك قلتيها بفمك فزمانك و هدا زماني
بيجاد:سيري جمعي داكشي!!
هاجر:ايوا دخل باش نجمع
بيجاد:مداخلش حتى تجمعيها!!
هاجر:اوف منك و من شروطك
بيجاد:اخلاقي و مبادئي كأمير متسمحش ليا نعيش فمكان متيعيشو فيه حتى العبيد و الخدم ديالي
هاجر:واخا ا مولاي السلطان جلس تما و متململش حتى نجمعها ديك الساعة نشوفو باش غتخرج ليا من الجنب تاني
مشات هاجر دخلات لدار علقات الصاكادو ديالها و مشات جبدات ميكة تتجمع فيها اي حاجة غتلاح حتى سالات و جمعاتها هزات لحوايج عزلات الموسخين دارتهوم فشبكة و لي باقي نقيين كوراتهوم فالماريو و سدات عليهوم قادات جوج سداريات لي عندها و مسحات الطبلة غسلات الماعن و دوزات الشطابة من بعد الجفاف و حلات الشراجم...اما بيجاد كان جالس فين خلاتو غارق فتفكيرو حتى وقفات عليه...
هاجر مسبقة يديها:دستوووووور مولااااي الأمير بيجاد الإسلام الفارسيييي
بيجاد ناض شداتو الضحكة شوية ولكن غطا عليها بملامحو القاسية:صافي نقيتيها؟
هاجر:ايه زيد دخل
دخلات هاجر و تبعها ساكت غير سدات الباب طلعات مع نيفو ريحة جافيل و اوطوماتيكيا تيترجمها عقلي بريحة النقا🤣ماقال والو مشا جلس فوق السداري تيضور راسو فالدار...
هاجر:ايوا دابا بقيتي على خاطرك؟؟
بيجاد:هكا احسن من قبل بعدا
هاجر:مهم رتاح الى غترتاح حسب راسك فدارك قصدي فقصرك
بيجاد تكا فوق السداري ولكن رجليه بقاو معلقين:مال هادشي صغير عندك
هاجر:راك نتا لي كبير ماشي السداري لي صغير المهم غنمشي نبدل حوايجي
مشات هاجر سدات عليها فبيتها لي كان فيه ماريو..ناموسية..كوافوز صغير بمرايتو جبدات واحد البيجامة نص كم طويلة تحت الركبة و جمعات شعرها على شكل كودشوفال غير بالخف و خرجات حفيانة هكا موالفة...
بيجاد غير شافها خنزر:معرية سيقانك عليا؟؟
هاجر غادية للكوزينة ممسوقاش:متنساش راك فداري
بيجاد ناض لعندها و بقا تيشوف فالكوزينة بتفحص هبط عينيه تتبان ليه كيفاش جبدات كاس زجاجي من البلاكار حتى ضورات الروبيني و تكب لما و هنا السييد تصدم:الماااا هنااا!!!
هاجر قفزها:مالك تاني شوية مخويت عليا الما
بيجاد:هدا(الروبيني) خرج الما دابا! كان الما تيتعمر من البير و من الأنهار
هاجر شربات عاد دوات:كيف قلتي كان دابا الى بغيتي لما راه غتلقاه فهنا(ضورات الروبيني) الى رخفتي غينقص حتى يتسد و الى زدتي غيبقا يتكب بالجهد
بيجاد متبع معاها حتى سالات:تنآمرك تعطيني نشرب
هاجر هزات كاسها عمراتو و عطاتو ليه:هاك ا السلطان
بيجاد بقا تيشوف فيه:فين اوااني الذهب فيين اواني الفضة!
هاجر:يا مولاي معنديش راني غير مسكينة مغلوب عليها عدي بهاد الزاجة لتصدق لا ما لا هم يحزنون
بيجاد شدو من عندها مخنزر و شرب بشوية عليه تقولي تيشرب فكاس د أتاي حتى كملو عاد حطو...
هاجر:مافيكش الجوع؟؟
بيجاد:مزال علاش مسولاني؟
هاجر بتاسمات بمرح:كنت باغا نطيب ساعة بلاش مافيكش الجوع
بيجاد خرج من الكوزينة و جلس فوق السداري:و لاش مسولاني شحال غريبة ولكن اش غنتوقع من حفيدة المشعوذة!
هاجر هزات التيليكوموند و جلسات حداه:متبقاش تقول ليا هكدا
بيجاد:غنبقا نقولها حيت هادي هي الحقيقة نتي حفيدة المشعوذة!!
هاجر هزات رجليها حطاتها فوق السداري و الثانية مفرقاها ضاغطة على التلفزة تشعل حتى تفكرات انها ماشي بوحدها عاد نقزات مخلوعة جامعاهوم لعندها اما هو غير تيخنزر فيها من التحت حتى تسمع صوت التلفزة و هو ينقز حاضي جنابو بان ليه صندوق كحل محطوط على طبلة شاعل منو الضو و فيه واحد المرا واقفة تدوي ناض ليه (لعند التلفزة) و بدا تيقيص فالشاشة بيدو واحد اللحظة بغا يخشيها يتأكد واش المرأة كاينة تما حتى غوتات هاجر:والااااااااا
هاجر نقزات عليه بالجرا و شداتو من يدو قبل ميديرها:واش نتا مسطي؟؟غترزيني فتلفااازتييي!!
بيجاد رجع جلس:اصلا عادي الكذوب و الإحتيال يخرجو من حفيدة المشعوذة
هاجر جلسات حداه متجاهلة كلامو الأخير:سمعني دابا هادي ماكايناش هنا هانتا شوف(هزات تيليكوموند تدوز فالقنوات و تيطلعو ناس خرين)
بيجاد طلع راسو تيشوف فركاني الدار:اش هادشي عندك حتى الرجال هنا!!!!
هاجر:والا دابا هادو لي تيبانو ليك تما هوما كاينين فبلاصة خرى و بسبب واحد الحاجة تنقدرو نشوفوهوم حنا هنا و هاديك سميتها التلفزة
بيجاد:التلفزة؟
هاجر:ايه هاديك لي شوية مترزيني فيها
بيجاد بدا تيدخل الفكرة شوية لراسو:يعني هوما مكاينينش فالدار؟
هاجر:لا لا
بيجاد:اه واخا
هاجر تتدوز فالقنوات حتى شدات واحد الفيلم:عرفتي شنو هاك تفرج بينما صوبت لينا مناكلو
بيجاد هز راسو فيديها لي مادة بيها التيليكوموند شدها من عندها تيبقشش فيها...
هاجر:عنداك تبقا غير ضغط مهم تفرج فهاد الفيلم
هاجر خلاتو تما و مشات للكوزينة جبدات مقلة حطاتها فوق البوطاجي و حلات التلاجة جبدات ماطيشة حكاتها فالحكاكة و خواتها فالمقلة مع زيت العود و العطرية عاد بدات تتحرك حتى قفزها صوت التلفزة لي ولا مجهد..مشات دغيا لقاتو تيضغط فلبوطونات...
هاجر حييداتها ليه و نقصات الصوت:ياك قلت ليك متضغطش على البوطونات؟؟
بيجاد:شنو هاد البوطونات ولا البطبوطات انا مفاهمش اش تتقولي!
هاجر تتوريه:البوطونات هوما هادو كل وحدة و وظيفتها هادي تتزيد و تنقص بيها الصوت هادي تطلع و تهبط فطابلو و هادي باش تشعل و تطفي التلفزة
بيجاد:مابغيتش هادشي صعيب
هاجر تمشات لعند الباب و هزات ساروتها فيديها:مهم غنرجع دابا متحركش من بلاصتك واخا؟
بيجاد خنزر:متآمريش فيا!!
هاجر حلات الباب و عطاتو بالضهر:المهم غنرجع دغيا
سدات عليه الباب و سورتات مادام كتاشف انه الباب تيتحل من البوانيي الا و انه غيكون عاقل و غيقدر يخرج وقتما بغا..مشات وقفات حدا باب شقة خرى حداها نيت جيران و سرسرات بقات شوية عاد تحل الباب كانت بنت طويلة حروفها كحلين لابسة تريكو خفيف فالبيض مع سروال كيطمة فلگري...
هاجر بتاسمات و تسالمات معاها:عفاك شي بصيلة تما ا ياقوت
ياقوت:واخا دخلي دخلي
هاجر دخلات لشقة لي كانت صغيرة بحال ديالها غير هو نقية و مديكورية مزيااان عكسها هي لي غير تتلبق و ترقع..مشات ياقوت حتى جابت ليها جوج بصلات فميكة شفافة و مداتها ليها:كيف دازت زيارة المتحف زوينة؟
هاجر:ا ااه حققت حلمي اختي
ياقوت:ان شاء الله محطتك الثانية تكون متحف اللوفر ياختي(طلبتيها صعيبة شوية اختي لا)
هاجر هزات يديها لسقف:ياااربي اختي يااااربي و ديك الساعة لابغات الموت تجي مرحبا بيها
ياقوت:اويلي الله ينجيك ا ختي غتجي غدا للخدمة؟
هاجر:اكيد اكيد القرايا عندي بلعشية
ياقوت:صافي مزيان نتلاقاو تما
هاجر تمات غادية مبتسمة:طهلاي بب
خرجات و سدات ياقوت الباب..رجعات هاجر و حلات الدار لقاتو جالس فين خلاتو تيتفرج فالتلفزة قالت و أخيرااا فهم شناهيا التلفزة و الفرااجة مشات ديريكت للكوزينة و كملات التخليطة ديالها حطات المقلة فوق البوطة و هرسات عليها البيض و هاهيا الأكلة المغربية المشهورة منقذة المواقف الصعبة المسماة بالبيض و الماطيشة..هزات شبيكة ديال الخبز ديال الحانوت من لي شاط ليها من فطور الصباح و جوج كيسان د الما و ديك المقيلة حطات كلشي فوق الطبلة قدام بيجاد لي طلع راسو فهاد الوعاء الغريب(المقلة) و ديك التخليطة لي فيه..جلسات هاجر حداه و بدات تتفرق فالخبز فوق الطبلة...
بيجاد:مغتجيبيش ليا نغسل يدي؟؟
هاجر طلعات فيه راسها:ااه نسيت خصك تغسل يديك(حطات الخبز) اجي نوريك اجي
بيجاد ناض شغتوريه هادي تاني جابتو للكوزينة عند لافابو و جرات ليه يديه حتى حطاتهوم تحت الروبيني هزات شوية دصابون فيديها و طلات بيه يديه طلقات للما لي بدا تيتكب على يديهوم و الرغوة تتشكل فيديها الصغار لي تيفركو بشوية فيديه الكبار مقارنة بديالها بقا ساكت تيشوف فيها مبتسمة رغم انه كان أمير الا انه هاد الإهتمام بهاد الطريقة عمرو تلقاه من شي واحد و مغينكرش انه عجبو الحال..سالات ليه و جبدات السريبتة المعلقة تما و بدات تتمسحهوم ليه حتى سالات و طلعات فيه راسها مبتسمة:هكا غتبقا تدير ديما لراسك وقتما باغي تغسل يديك وريتك دابا كيفاش باش مرة خرى تعرف
بيجاد خنزر فيها و بعد يدو من يديها و مشا رجع جلس فالصالون تاني..تبعاتو و جلسات حداه:هادشي لي عطا الله هاد الساعة حتى نمشي غدا و نتقدا شي لعيبات
بيجاد هز طرف د الخبز تيقلب فيه شاف فهاجر كيفاش تتغمس و تاكل يعني هاد التخليطة تتكال بالخبز دار بحالها و جاه المذاق ماخايبش...
هاجر معمرة فمها:ايوا كيف جاك طيابي؟
بيجاد تياكل فهدوء متيتكلمش فأكلو ابدا و هاد السييدة كاعما خوات فمها و باركة تبجغ فالهضرة هي و تدوي عادي تيفهمها بصعوبة محساك و فمها عامر...
هاجر:مالك ساكت مولفتش فيك السكات؟
بيجاد طلع فيها غير حاجبو مخنزر و شيير ليها لفمو زعمة راه تياكل هاجر فهماتو غلط و هزات كاس دلما تتشربوو ليه و تخبط فضهرو:ويلي بقا تاكل بشوية
بيجاد حييد الكاس بغضب:واا متندوييييووووش و حنااااا تنااااكلووووووو!!!!
هاجر كمشات وجهها:متغوتش عليا
بيجاد حدر عينيك تيكمل الماكلة و حتى هي معاوداتش دوات معاه حتى سالاو الأكل فداك الجو الصامت و جمعات الطبلة دغيا لاحت دوك الماعن فالكوزينة و مشات غسلات يديها..ناض بيجاد للكوزينة يغسل يديه كيفما وراتو حتى تيبانو ليه الماعن شاف فيهوم بقرف هاهيا بدات تاني فوسخها دازهوم و مشا لفين كاين صابون اليدين ضغط عليه كيفما دارت و تفاجأ من داك السائل كيف تحط فيديه! حط اليد الثانية على الروبيني و بدا يضورو و بالفعل خرج الما!غسل يديه و فركهوم و مسح بالسريبتة..بتاسم شوية حيت قدر انه يتعلم شي حاجة فأول يوم ليه فهاد الزمن الغريب و هنا تفكر هاجر لي وراتو هادشي و كيفاش دايرة جهدها رغم تصرفاتو معاها و كيفاش تتعاملو هي بطيبة تفكر تاني فاش غوت عليها فوق الطبلة و كان باين عليها انها تقلقات خنزر فاش حس براسو بدا تيشفق عليها ولكن فنفس الوقت مبادئو كأمير عادل و تيدير الخير ممخلياهش فا قرر يعتاذر منها بشي طريقة..رجع لصالون مالقاهاش فا استغرب مشا لواحد الباب حلو كانت غرفتها ولكن كانت خاوية بان ليه باب اخور حدا هدا و مشا ليه ديريكت حلو لقاها جالسة فوق لاشاس و الباب كان ديال الطواليت هاجر غير شافتو داخل عليها غوتات لربي لي خلقها و خبطات لباب برجليها بسرعة و سدات عليها من الداخل بالساقتة..بيجاد على برا مفاهم والو مال هادي جالسة فداك الكرسي و غير شافتو بحالا شافت شي جن؟؟...
نقات هاجر راسها دغيا..خوات الما و غسلات يديها و خرجات عندو وجهها حمر بالحشمة...بيجاد شافها خارجة و خنزر...
بيجاد:شنو داك التصرف لي درتي معايا!!
هاجر تتفتف بالحشمة:م ماا ماشفتي والو؟؟؟
بيجاد:اش غنشوف؟؟كنت تنقلب عليك حتى حليت داك الباب و لقيتك جالسة فوق داك الكرسي البيض و نتي تسدي عليا!!
هاجر تنهدات براحة يعني مشافهاش تتقضي حاجتها و معندو حتاشي فكرة على هادشي اصلا:ا ااه شنو كنتي باغي؟
بيجاد:كنت باغي نعتتذر على الغوات لي غوتو عليك فاش كنا تناكلو
هاجر تترمش بعويناتها فيه:نتا؟تتعتاذر مني دابا؟؟تاراه حتى كلمة شكر ماسمعتهاش منك و دابا تتعتاذر! لا انا تشوكيت
بيجاد:راك مشوكة أصلا(قصد الشوك)قبليه ولا متقبليهش
هاجر:لا غير حيت مع جلالتك مكاينش بحالك تعجبت فاش عتاذرتي واخا ا مولاي قابلة اعتذارك
بيجاد جلس فوق السداري و شد التيليكوموند ضغط على البوطونة الحمرة و شعلات التلفزة هاجر بتاسمات و جات جلسات حداه:وااو تعلمتي تشعل التلفزة عقلك خفيف تبارك الله
بيجاد بتاسم شوية فاش مدحاتو:اه تنعقل دغيا شنو هي واو؟
هاجر:هي زعمة شي حاجة زعمة..زعمة(تتفكر) مذهلة شي حاجة زعمة عظيمة بحال هكا
بيجاد:امم واخا
هاجر حدرات عينيها تيبانو ليها يديه نقيين:غسلتي يديك؟؟
بيجاد:ااه فديك البلاصة(شيير للكوزينة)
هاجر:زعمة معندي ميتسالك هاديك سميتها الكوزينة
بيجاد:الكوزينة؟يعني المطبخ؟
هاجر:ايه هاداك راك غادي مزيان
بيجاد تيضغط على الأزرار و تيدوزو القنوات حتى شد واحد القناة و بداو تيتفرجو...
هاجر:قول ليا ا بيجاد
بيجاد تيتفرج:شنو؟
هاجر تتلعب بصباعها:واش تتكرهني؟
بيجاد شاف فيها لقاها حتى هي تتشوف فيه تتسنا فجوابو...
بيجاد:تنكره الباتول لي هي السبب فاش وليت تمثال نتي لحد الآن مزال ماشفت شعوذتك
هاجر:واش من نيتك راني غير طالبة عادية و خدامة فخدمة عادية اش جابني لشي شعوذة!
بيجاد:معرفتش ولكن تتبقاي حفيدة الباتول و عرقكوم مافيه ثقة
هاجر:ملي مافيه ثقة علاش جالس فداري؟كليتي من مكلتي؟ نعستي على فراشي؟
بيجاد:حيت مكاين حتاشي حل من غير هدا..اول نهار ليا فهاد الزمن هو هدا حتى نستوعب هادشي و نشوف شي طريقة نرجع فيها لزمني
هاجر:تنتمنى تلقاها حيت تيبان ليا صعيب بزاف تأقلم فهاد الزمن
بيجاد:اكيد انا ماناويش نبقا هنا!
هاجر:واخا ا سيدي
دازو السوايع و وصل الليل..كان بيجاد ناعس فوق السداري لي زداتهوم ليه هاجر باش يقدوه فالطول و ينعس عادي اما هي كانت جالسة فوق كرسي و حاطة بيسي بورطابل ديالها فوق الطبلة تتقاد شي تمارين عندها مكونسونطرية مع شغلها حتى بدا بيجاد تيفيق..شافت فيه و حييدات يديها من الكلافيي جامعاهوم تتسنا فيه اش بغا حتى فاق مزيان و ناض لعندها شدها من كتفها بقوة هادشي لي خلاها تصدم...
هاجر حشمات فبلاصتها و حدرات عينيها ويلي ويلي نسات كاع واش حتى هو بنادم خصو يقضي حاجتو شغتقول ليه دابا البلاصة لي حليتي عليا هي الطواليت؟ و فين كنت جالسة فاش تنقضيو حاجتنا؟
بيجاد تيحرك فيها:وااا سربيييي!!
هاجر ناضت دغيا مادواتش معاه و هو غادي تابعها مزيير حتى وقفات قدام الطواليت شعلات الضو و حلاتها ليه...
بيجاد:واش تضحكي عليا واش وقت الجلوس دابا؟؟؟؟
هاجر هزات الغطا ديال لاشاس و شداتو من ذراعو حتى جلساتو فوق لاشاس..شاف فيها باستغراب شنو تدير هادي؟؟حييدات ليه الرولو ديال الطواليت من بلاصتو و حطاتو بين يديه و خرجات سادة عليه الباب...مشات تتجري حتى جبدات دفتر ديالها و ستيلو و بدات تتكتب...حتى سالات قطعات الورقة من الدفتر و لاحتها ليه تحت الباب...بيجاد باقي مستغرب من تصرفاتها و صمتها حتى تتبان ليه الورقة تحنا حتى هزها و بدا تيقرا..."البلاصة لي جلستك فيها هي لي تنقضيو فيها حاجتنا فهاد العصر و هداك لي عطيتك بين يديك هو لي غتنظف بيه راسك و فاش تسالي غتبان ليك واحد البوطونة فداك الكرسي البيض(باش يفهم)ضغط عليها غيمشي داكشي و غسل يديك تما"
بيجاد عاد فهم دابا علاش غوتات و دارت ليه ديك الحالة هاد الصباح فاش دخل عليها!!...فنفس الوقت على برا رجعات هاجر لتمارينها و ناري قداش حشمانة من الموقف و زادتها دابا فاش وراتو كيفاش يقضي حاجتو فورقة...
هاجر:ايه ا هاجر تلات بيك ليام حتى وليتي تعلمي لرجالة كيفاش يخراو
دازو دقائق و خرج بيجاد من الطواليت هاجر سمعاتو خرج و تبعو صوت لاشاس يعني فهمها و طبق كلامها!! بان ليها ظلو فالأرض قاصد الصالون دغيا حدرات راسها فشغلها و هو رجع جلس فوق السداري..بقا تيشوف فيها من التحت و كيفاش باين عليها التوتر و الخجل على الأقل كاين واحد الإختلاف بينها و بين الباتول هادي تتحشم اما الباتول تتشوفها الحشمة تتهرب...هاجر حسات بنضراتو عليها هادشي لي زادها توتر اكتر و تتقول فخاطرها ناري شبع فيا ضحك ناري غيقول عليا الخراية ولا شي لقب بحال هكا من بعد هاد الأفكار مبقاتش قادرة تصبر سدات البيسي دغيا و ناضت لبيتها تنعس غدا تابعاها الخدمة على النبوري..اما بيجاد تكا و تغطا بالمانطة ابدا مفكرش فيها هكاك جاتو انثى خجولة فقط و تفكيرو كأمير مخلاهش يفكر بديك الطريقة حيت غير لبراهش لي غيفكرو هكاك..شاف فالسقف و غرق فتفكيرو الدنيا مبدلة بزاف و عصرو كأمير مات فا كيفاش غيقدر يتأقلم بينما يلقا شي وسيلة لي تمكنو من الرجوع للعصر ديالو؟؟...
☀️فالصباح☀️
فاقت هاجر وجدات راسها لبسات سروال دجين و تريكو خفيف دخلاتو فالسروال مع سمطة بيضة خلات شعرها مطلوق و دارت مكياجها اليومي هزات صاكادوها و مشات طلات على بيجاد لقاتو ناعس فهدوء و مغطي بالمانطة..مشات لدفترها و كتبات ليه رسالة قطعات الورقة و حطاتها حداه..هزات سوارتها و خرجات حتى شرات الخبز مع الفرماج و الكاشير و واحد العصير حطاتهوم فوق الطبلة و غطاتهوم بالزيف و خرجات لخدمتها...بقات هابطة فالدروج حتى بانت ليها ياقوت حتى هي لابسة و مزيزة تتسنا فيها تسالمو و مشاو مع بعضياتهوم...
هاجر:مالك ياختي على هاد التيشورت و مزال كرشك كلها تتبان ماجاكش البرد؟
ياقوت:ويلي نتي لي جبتي ليا الصهد بهاد التريكو ياختي
هاجر:لعجب جاني البرد ولكن اصلا غنبدلو حوايجنا فالخدمة
ياقوت:ايوا تحركي لا نتعطلو تاني عليه و يبدا ينگر بحالا والدنا
هاجر:ولاهيلا
بقاو غاديين تيتمشاو خارجين من العمارات حتى قطعو الشانطي للعمارات لخرين لي تيبانو احسن من فاش ساكنين هوما المكان باين ماشي شعبي و الطونوبيلات من شكلهوم باينين ماركة صحيحة حتى من الناس قلال بزاف حتى بدات تتبان ليهوم واحد المخبزة كبيرة جات على الشانطي فوقها واحد البلاكة عريضة مكتوب فيها "مقهى مخبزة البوقالي" كان زاجها شفاف و تيبان الداخل كولو من برا..دخلو البنات لقاو راجل كبير شوية فالعمر لابس سروال الفصالة مدخل فيه قاميجة واقف عند لاكيس...
ياقوت:ها حنا جينا ا سي احمد فالوقت
احمد:ايوا دوزي دغيا لبسي نتي و هي الكليان د الصباح غيبداو يجيو
مشاو لبنات تيدافعو حتى دخلو للداخل كاينة واحد لبييت صغيورة ديال التبادل و معلقين فيها حوايج الخدمة بتيكيت السمية مشات هاجر لبسات الزي الرسمي للعمل ليكان عبارة على صاية كحلة قصيرة و فوقها طابلية قهوية بنفس طول الصاية مع قاميجة نص كم فالبيج و بابيونة قهوية عند العنق..قادات هاجر راسها و جمعات شعرها كودشوفال..شافت فياقوت حتى هي واجدة و خرجو من تما حتى وقفو فالكونتوار تيتسناو يجي الكليان...
احمد فلاكيس:هاجر سيري جيبي لبتيبان من عند حفصة فلداخل و ستفيه يلقاوه الكليان باقي سخون
هاجر:واخا سي احمد
مشات هاجر بخطوات سريعة حتى دخلات تدير لي قالو ليها اما ياقوت بقات واقفة فالكونتوار حتى تم داخل واحد الشاب سابق بروايحو حروفو كحلين لابس نضاضر الشوف و مطلع شعرو على جنب من حوايجو باينة فيه مهلي فراسو..غير شافتو ياقوت بدات تتحاول متشدهاش الضحكة هدا حالها ديما كل صباح حتى تمات راجعة هاجر هازة صينية الفران قدها قداش عامرة بالبتيبان لي عاد طاب و بلا متشوف قدامها حطاتها و حلات الزاج و بدات تستف فيه محنية و مدياها فخدمتها..احمد فاش شافو بتاسم بترحيب و مشا عند هاجر تيوشوش ليها:نووضي نووضي
هاجر طلعات فيه عينيها باقة تتستف:نعام ا سي احمد؟
احمد:نوضي تقادي القهوة الصباحية لسي حاتم
هاجر غير سمعات سمييتو بدات تفتف:ح حااتم ت تاني؟؟(شافت فياقوت) س سيري نتي
ياقوت توخرات اللور:لا لا اختي باش يقمعني بحال المرة الفايتة نن نن
احمد خنزر فيها:سربي الكليان تيتسنااا و نتي لي واقفة تتكركري عليا هنا كملي تستاف هاد الكرواصة!
ياقوت جمعات الضحكة و نزلات نزلة وحدة على الطاوة تتستف فلبتيبان اما هاجر مشات هزات سريبتة مسحات بيها يديها و هزات مذكرة صغيرة بستيلوها لي تتكتب فيها الطلبات و تمشات لعندو فين جالس بخطوات بطيئة و خجل كبير باين فوجهها...
كان تيشوف فالزاج ديال المخبزة تيتسنا فيها تجي بحال كل صباح تيبغي قهوتو هي لي تجيبها ليه بيديها شافها جاية من انعكاس الزاج و بتاسم زوينة بحال ديما و خجولة كيف عادتها حتى حس بيها وقفات عليه...
هاجر بابتسامة ترحيب:صباح الخير موسيو حاتم اش حب الخاطر اليوم نزيدوه على قهوتك الصباحية؟؟
تقاد حاتم فجلستو ضاير لعندها و عينيه مصكانيينها كلها:بغيت داك لبتيبان لي كنتي تتستفي
هاجر:(اويلي حضاني حتى فاش كنت تنستف لبتيبان)ا ااه ايه(كتباتها)شي حاجة خرى؟
حاتم بتاسم فوجهها اما هي باقة حادرة عينيها تتسناه يدوي متقدرش تشوف ليه فوجهو ديريكت كتر من مرة وحدة...
حاتم:لا صافي شكرا
حركات ليه هاجر راسها:غيكونو عندك واحد الشوية موسيو
مشات غادة تتقرقب بصباتها بحالا غتدي السخرة حتى وصلات لكونتوار..هزات فنجان قهوة خاوي حطاتو تحت ماكينة القهوة و شعلاتها بدات تتصدر صوت الطحن و فنفس الوقت مشات جبدات طبسيل صغير ديال الحلويات حلات الزاج و بملقط المخبوزات هزات جوج بتيبانات حطاتهوم فيه..القهوة وجدات و حطات كلشي فالبلاطو مع اضافة خنيشة سكر و ملعقة صغيرة.. هزات البلاطو و دات الطلبية حتال عندو ستفات ليه كلشي قدامو و بابتسامة استأذنات:بصحة و الراحة
رجعات لكونتوار اما هو بتاسم تاني تيشرب فقهوتو الصباحية لي تيبدا بيها صباحو هي و وجه هاد النادلة الجميلة...
داز شوية د الوقت و فالدار عند بيجاد كان هاد الأخير عاد بدا تيفيق و يتكسل بشوية عليه و يتفوه حتى كمل على خاطر خاطرو عاد ناض لطواليت بقا عاقل على كيف دار البارح و داكشي لي دار تاني غسل وجهو و يديه و نشفهوم بالفوطة المعلقة و رجع لفين كان ناعس عاد بانت ليه الرسالة ديال هاجر جلس و بدا تيقراها "صباح الخير مولاي السلطان قصدي سي بيجاد🤣 فاش تفيق من النعاس مغتلقانيش فالدار غنكون فالخدمة كول داكشي لي غطيت فوق الطبلة و دوز الوقت بالتلفزة حتى نرجع و عنداك تدير شي حاجة فداري" حييد السريبتة فوق الماكلة بان ليه داكشي لي جابتو من الحانوت..شاف فيه باستغراب يالاه الخبز لي قشع فيه قطع منو و بدا تياكل فيه هز كاشيرة و ذاقها جاه المذاق مابيهش و دوز بيها داك الخبز اما العصير هزو معرفش فين تيتحل صافي متسوقش ليه ناض للكوزينة حتى هز كاس و شرب الماء كان عاقل فين جبداتو هاجر لبارح و رجع شعل التلفزة مسنط لعضامو حتى تجي...
اما عند هاجر كانت واقفة عند الكونتوار و توتر كبير شادها هكا ديما تتكون فاش تيكون حاتم فالمخبزة هاد الأخير لي باقي تيفطر بشوية عليه باقي الوقت على خدمتو...
ياقوت تتوشوش ليها:ياختي سعداتك تيجي يفطر فهاد المخبزة غير باش يشوفك
هاجر حشمانة:تضني زعمة هادشي؟
ياقوت:اويلي سي احمد و عااق داكشي علاش ولا يسيفطك نتي لعندو بلا نقاش غير هدا راه ضرب عندو صريف بسبابك هههه
هاجر تتلعب بصباعها بخجل:تضني زعمة انا زوينة باش نعجب واحد لباس عليه بحالو؟
ياقوت ضربات يديها:اويلي اش تتقولي على مزويناتك احبيبتي تجيبي بحالو و سيدو
هاجر تتلعب بخصلة شعرها:ربي خليك ا زيني
عاد كملات جملتها حتى وقف عليها حاتم حاط الفلوس فوق الكونتوار..قفزات هاجر فاش شافتو:م م مووسيو؟؟
حاتم بتاسم:بنينة كيف العادة
هاجر تتبتاسم بتوتر:ش شكراا موسيو
شدات من عندو الفلوس و مشات ل لاكيس حيت احمد دخل لداخل طاپات حساب داكشي لي طلب و شاط ليه الصرف بزاف مداتهوم ليه بابتسامة مع الفاتورة:مرحبا موسيو
حاتم حط يديه على يديها و دفعها لعندها برفق:هادو ديالك نهارك مبروك
نساحب دغيا كيف عادتو قبل ماتبدا تاني ب لا منقدرش نشد خلاها بلاكة حتى جات عندها ياقوت:لا لا متتعجبيهش ياختي غير تتعجبيه و بالزايد(طلقاتها بضحكة) ههههه ا تي نوضي
احمد رجع لقاها تضحك:عندي سكيتش هنا لحقي خدمتك يالاه
تهزو بجوجات و مشاو يكملو خدمتهوم....
بعدما سالات هاجر خدمتها وصلات 12 هادي هي الوقيتة لي تتخرج فيها مشات بدلات حوايجها و حييدات عليها ديال الخدمة نفس الشيء مع ياقوت و رجعو غاديين فالطريق لدار حتى تفكرات هاجر واحد الحاجة مهمة...
هاجر:ياقوت غير سيري نتي انا عندي مايدار باقي
ياقوت:ويلي اش عندك؟؟
هاجر:والو حتى نقول ليك صافي
ياقوت:صافي لي بغيتي
تفارقات هاجر مع ياقوت تما هي كملات طريقها لدارها و هاجر مشات وقفات فالشانطي حتى جات طاكسي شداتها و ديمارات...
دازو السوايع و بيجاد باقي فالدار يجلس يتكا و يبدل غير فلبلايص حتى سمع السوارت فالباب طلع راسو لقاها هاجر داخلة هازة ميكة د لبوتيكات فيديها و صاكادوها فضهرها...
هاجر مبتسمة:هاني جيت
بيجاد:على السلامة شحال تسنيتك
هاجر:وايلي فخامة الأمير بيجاد تيتسنا فيا
بيجاد خنزر فيها...
هاجر:صافي صافي (جلسات حداه) عارفاك موحشني
بيجاد:اش غنتوحش فحفيدة المشعوذة
هاجر:بدينا تاني بالشعوذة صبر صبر تشوف شنو جبت ليك
بيجاد طلع حاجبو غير الله يحدر السلامة من هاد المشعوذة الصغيرة...حلات هاجر الميكة و جبدات منها واحد السورفيت و شي تيشورتات و سروال دجين...
جبدات الصاكادو و حلاتو تتقلب على القاميجة بيجاد كان تيراقبها حتى بان ليه واحد الخيط غليض فالغوز بارد تيطل من الميكة جبدو ساعة صدق السميطة ديال السوتيانات باقي بتيكيتة ديالهوم..شدهوم بين يديه مستغرب بان ليه داكشي مجوف بحال الى قسمتي سويهلة صغيرة و خويتيها من الداخل...لقات هاجر القاميجة و طلعات راسها لقاتو حط جهة من السوتيانات فوق راسو...
بيجاد:شحال غريب شكل هاد القبعة
هاجر غوتات و حييداتو ليه دغيا مخبياه موراها بخجل:واااش نتا حمق!!
بيجاد خنزر:اش كاين؟؟؟
هاجر حشمانة:هادي حاجة شخصية تتخصني
بيجاد:افف
هاجر جبدات واحد الپاكي ديال الملابس الداخلية الرجالية و حطاتها ليه على ركابيه مضرگة وجهها بخجل: ه هداا لي تتلبسو من التحت عاد تلبس الحوايج
بيجاد حلو تيقلب فيه:تلات ليام بالسروال القندريسي حتى ولا قد هكا
هاجر: ص صافي جمع عليا هادشي و سير قييسهوم
بيجاد:قييسهوم؟
هاجر:زعمة جربهوم لبسهوم
بيجاد ناض:فين؟؟
هاجر:انا نمشي لبيتي حتى تلبس و نرجع نشوفك
ناضت دغيا باقة حشمانة تتولول فخاطرها ويلي ويلي ا هاجر وليتي تشري لگراصن لرجالة...سدات عليها فبيتها حتى داز شوية د الوقت و هي تسمع التعياط ناضت دغيا خارجة لعندو لقاتو لابس تيشورت بيض مع سروال كيطمة گري...
هاجر:واااو جاوك هوما هادوك ههه....
بيجاد تيشوف فراسو:هادشي دابا زوين عندك؟؟
هاجر:اكييد اكييد و الله حتى زوييينن خصك غير تنقص شوية د الشعر و اللحية غتبان بحال رجال هاد الزمن
بيجاد:انا متيهمنيش نبان بحالهوم ولا لا
هاجر:وا خصووو يهممك واش نتا حمق باغي تبقا تمشا بين الناس بحالا خارج من رسوم السندباد
بيجاد:اشنو هو الرسوم تاني؟
هاجر:والو حتى نوريه ليك عرفتي شنو(تتشوف فيه) راك مقاد ناري خصك غير متلبس فرجليك صبر صبر جبت ليك واحد الصنيديلة زوينة
بيجاد:هادشي كاملو كرم منك زعمة؟شكون قال تريكة الباتول غنشوف منها الخير!
هاجر مشات هزات الميكة:قول الحمد الله و سكتنا
بيجاد:انا لي تنآمر هنا ماشي نتي
هاجر حييدات تيكيت لصنيديلات و لاحتهوم ليه فالأرض:هاك لبس هادو
بيجاد خشا صباع رجليه فييهوم و بدا تيدفع حتى دخلات...
هاجر:جبت اكبر وحدة عندهوم ههه جاتك زوينة
بيجاد تيشوف فرجليه:صافي نحييدهوم؟؟
هاجر:والا اجي نتغداو على برا حتى نشمو شوية د الهوا بجوج
بيجاد:كيفاش نتغداو على برا؟؟
هاجر هزات صاكادوها و السوارت:اجي معايا و صافي(شداتو من دراعو)
بيجاد غادي معاها:واصافي طلقي مني!
هاجر:لا مغنطلقش يقدر تهرب
بيجاد:كيفاش نهرب! راه معندي فين نمشي ا المشعوذة
هاجر طلقات منو:ايوا بقا حدايا
بيجاد:وا انا لي تنآمر هنا ماشي نتي!
هاجر:تاني؟؟
بيجاد:اييه
هاجر ماداتهاش فيه:زيد نهبطو مع الدروج
هبطو مع الدروج و خرجو من العمارة...
هاجر:البلاصة مابعيداش بزاف يمكن غتعجبك الماكلة عندو
بيجاد:واخا
بقاو غاديين حتى وقفات هاجر قدام واحد السناك...
هاجر:هنا اجي معايا
دخلو بجوج و مشات لواحد الطبلة:جلس هنايا حتى نجي
بيجاد جلس تيشوف فالمكان جاه غريب بزاف و الناس تياكلو شي اكل عجيب بالنسبة ليه...
مشات هاجر ضوموندات ليهوم نص دجاجة محمرة مع فريت و الموناضة و شلاضة و الخبز و رجعات لعندو...
هاجر مبتسمة:كيف جاك المكان؟
بيجاد:عجيب
هاجر:باقي غتولف هدا سميتو سناك
بيجاد:سناك؟؟
هاجر:ااه اي مكان تيقدم اكل بحال هكدا سميتو سناك صافي؟
بيجاد:واخا
بقات تدوي معاه و تحاول تفهمو طبيعة الأكل لي تيقدموه هنايا و هو تيحاول يفهمها واخا صعيب حتى جابو ليهوم الماكلة...
هاجر تتشمشم:الله على ريحة تتحمقني ماكلتهوم
بيجاد جاتو ريحة الماكلة زوينة و معلقش بشي حاجة:هدا دجاج
هاجر:اييه هو
بيجاد:بعدا باقي تتاكلو الدجاج كيفما هو
هاجر:يتصحاب ليك حتى الدجاج غيتبدل ههه لا الحيوانات لي تناكلو باقة بحال ديال الزمن ديالك
بيجاد هز طرف د الخبز:يتصحابلي شي عجب بحال لباسكوم
هاجر تتاكل:و علاه مال لباسنا؟؟راك لابسو
بيجاد:ماعندي ماندير(غمس فالطبسيل و ذاق) فالحقيقة المذاق بنين
هاجر فرحات:كنت عارفة غيعجبك نتا غير تبع كلامي و دغيا غتأقلم كأنك ولد هاد العصر
بيجاد:انا مبغيتش نكون ولد هاد العصر!
هاجر:مثل انك غتكونو بينما لقيتي الحل
بيجاد:معنديش مع التمثيل!
هاجر:علاش ديما تتبغي تجاهل كلامي و تبغي تفرض عليا لي بغيتي؟؟
بيجاد:حيت انا أمير و نتي مجرد مشعوذة
هاجر:وا انا ماشي مشعوذة وا فهم
بيجاد:ميمكنش ليا نفهم مادام الباتول قالت ليا انه سليلتها و حفيدتها ديال القرن 21 هي لي غادي تحررني يعني أكيد غتكون زرعات فيك حتى نتيا شعوذتها!
هاجر بقات ساكتة تتفكر فكلامو و بدات تتسترجع داك الإحساس لي جاها فاش شافت التمثال ديالو كأنها بالفعل مقيوسة بشي تعويذة لي تتربطها بتمثال بيجاد!ولكن ميمكنش غتكون مهمتها فقط تحريرو صافي و سدينا كيفما واقع دابا...
بيجاد لاحظ سكوتها:تنظن كلامي صحيح؟
هاجر:ل لا لا مغيكونش صحيح المهم خلينا نكملو هاد الماكلة
كملو ماكلتهوم و ناضت هاجر خلصات من بعد خرجو...
هاجر:اش بان ليك نتمشاو شوية؟؟
بيجاد:ديري لي عجبك
هاجر:بغيت نخليك تعرف انه زمني و عصري زوين و فيه بزاف د الحاجات الزوينة
بيجاد:مستحيل نشوف هادشي
هاجر:ههه واخا غنشوفو
بقاو غاديين تيتمشاو و هاجر مرة مرة تضرب طليلة على بيجاد تهز فيه راسها بابتسامة و ترجع تشوف تاني فالطريق و تعاود نفس الشيء حتى خلاتو مستغرب...
بيجاد:مالكي؟؟؟
هاجر:معرفتش علاش حاسة براسي فرحانة
بيجاد:فرحة غير هكاك؟؟
هاجر:معرفتش ولكن تنفرح فاش تنحاول نفرح شي واحد اخور
بيجاد:شكون قال ليك انا فرحان؟؟
هاجر بقلق:كيفاش؟؟
بيجاد:نتي عارفة مزيان انه انا ماباغيش نبقا هنا خاصني غير شي وسيلة باش نرجع راني أمير و عندي دولة على قدها خصني نحميها و نديها فشعبي!!
هاجر وقفات مهبطة حجبانها:هانتا رجعتي!!شنو تتوقع غادي تلقا عليه عصرك؟؟
بيجاد:اكيد غيتبدل بسبب خويا!
هاجر:اذن علاش باغي ترجع ليه الى مغيكونش كيفما خليتيه؟؟
قصة أمير في عصرنا
محتوى القصة
التنقل بين الأجزاء