جاتني الضحكة وشحال هادي ماضحكت قلت ليها بحال هاداك النوع كيكون داير عشرة
قالت ليا لالا راه يمكن كان كيعرف شي بنت وكان كيبغيها نييت وكان باغي يتزوجها و ماعرفتش شنو وقع بينو وبينها و يمكن تفارقو ورجع دابا غير كيدوز ماعينو فزواج ولا والو وحتى مو معكسة ليه يمكن
ردت بعفوية : نتي عارفة بابا كان كوميسير ياك .. كان صاحب باه الله يرحمو وكانت ماما كتعرف ماماه .. فاش مات باه بقات ماما على اتصال بيها وهي اللي قالتها لماما قالت ليها راه بغا شي بنت كيعرفها شحال هادي وبغا يتزوجها ولاكن وتفارقو فاللخر ماعرفتش شنو قالت ليه ولا يمكن مابقاتش مرتاحة حيت كا ممحنها فحياتها دخل بشوارو وتخرج بشوارو وماقدراتش عليه هادشي اللي فهمت من ماما .. ماعاوداتش ليا مزيان
رديت غليها وقلت: ولدو مو باااينة
حركات راسها بالنفي: لا لا .. مو فيها السكر والطونسيو كيخاف عليها توقع ليها شي حاجة وكيدير ليها خاطرها .. وهي المشكيلة عزيز عليها ولدها كتموت عليه كتقول لماما ماعندو مايدير بشي مرى وكتجري على بنات العائلة خايفة تلسق فيه شي وحدة بزز
فدوى : انا غنرجع للخدمة وضاروري نديرو شي جلسة تعاودي ليا عليك شوية اصاحبتي توحشتك ... والله بغيت نعرف شنو دوزتي وشنو كدوزي.. تبدلتي وزيانيتي اكثر دوختي لينا المحقق ديالنا هههه حتى رجع يكتب التنازلات بلهلا يطريه ليه
بقيت ساكتة كنضحك بزز وعنقتها مشات لخدمتها وطلعت فالطموبيل سديت عليا لداخل ومشيت سايقة كنبكي ونبرد على قلبي .. هاهيا بنت بحالي بحالها هي حسمات فعلاقتهم ومشات وقدرات تبدا من جديد .. علاش انا ماقدرتش وعلاش انا ضعيفة والنهار الاول وضح معايا الامور .. الذنب ذنبي انا اللي خليت راسي نغرق وندل راسي اما كن مشيت وخليتو كي دارت لخرى اللي كان كيبغي بصح وكان ناوي يتزوجها كن حتى انا كيعاودو عليا بحال هادشي .. هي كان ناوي معاها المعقول وانا كان كيدوز بيا وقته ولا يمكن كيحاول ينسا لخرى بيا .. وكنقول مالو على هاد البرود .. ولاكن نستاهل كلشي درتو بيدي .. ودابا حتى انا خاصني نشوف حياتي والى ماقدرتش نساه غنشوف شي واحد اللي ينسيني فيه
رجعت للخدمة كنفكر فكلام فدوى اللي فعلا ضرني فخاطري .. هاد العلاقة مع زايد من الاول كنت عارفاها كي غتكون حيت انا قلبي هشيش فالحب وعمرني حبيت حتى فسن المراهقة ديالي عمرني بغيت باش تكون عندي المناعة .. اما هوا سبق ليه دوز واخا ماعرفتش فوقاش وقع وجاني لفضول نعرف شكون هاد البنت وكفاش كانت شخصيتها حتى طاح فيها .. شنو اللي فيها خلاه يبغيها .. جاني فضول قوي باش نشوفها لاكن ماعندي كي ندير نشوفها المشكلة وفدوى عطاتني غير الفتات ديال علاقتهم .. بقا فيا الحال بزااف كنشوف حياتي ولات مرتاطبة بواحد الانسان اللي مامرتابطش بيا وحتى لو تزوجنا عمرنا مغنعيش معاه مرتاحة والحل الافضل هوا ندير مجهود نخرجو من حياتي باش نعرف نتصرف حيت حاليا مكنعرف ندير والو كأنني تحت شي مخضر .
دوزت ديك العشية فالخدمة وحسيت براسي شوية كنقدر ندير شي حاجة ماشي بحال من قبل كانت حياتي متوقفة عليه .. يمكن بديت كنولف شوية . ساليت الخدمة وكانت السبعة .. جاني اتصال من فدوى وفرحت اخيرا غنشم شوية ديال الهوى ونجلس مع شي واحد ، درت نتلاقاو انا وياها وخرجت لكافي وغيسطو زوينة فعين دياب وجلسنا .. توحشتها وتوحشت ايام الدراسة وديك الايام الزينة اللي دازت ماكررهتش كن رجعات توحشتها بزااف . بديت كنتحمع انا فدوى قالت ليا باللي تزوجات هاداك اللي كانت كتبغي لاكن مزال ماجاب الله وليدات وسولاتني شنو كندير قلت ليها عندي بارا فرحات ليا قالت ليا واش مافكرتيش تزوجي حتى نتي وداكشي تنهدت وبقيت كنفكر واش نعاود ليها ولالا ولقيت راسي باغا نعاود ماعندي علاش نخبي .. قلت ليها باللي كنت فعلاقة مع زايد وهي تصدم خرجو عينيها وعاودت ليها على علاقتي المريضة انا وياه وكفاش كان كيدير معايا وكفاش مرضني حتى غرغرو عيني وبديت كنبكي وفشيت خلقي عليها حتى عنقاتني وجبدنا الموضوع ديالو مع هاديك اللي كان معاها وهي تقولي
- اصلا كانت طريقو مع هاديك واضحة واخا الحب وداكشي كانو مغاديش يكملو حيت يهودية ومو قالت ليه متزوجش يهودية
تصدمت وقلت ليها : يهودية !!!
ردت : اه يهودية ولاكن مغربية بحالنا بحالها غير هي يهودية
تعجبت: وهوا كان باغي يتزوج بيها واخا يهودية !!
ردت صدماتني: اه كان باغي ماعندوش مشكل تكون يهودية وهادشي وقع قلت ليك شحال هادي فاش كان باه مزال حي وماما كانت كتمشي عندهم بزاف وكانت كديني مرة مرا معاها كنت كنسمع مو كهضر عليها مع ماما .. دازت على هادشي شي سبع سنين ولا ثمن سنين حتى سميتها مكانت مغربية .. كانت سميتها ايفا و ايلا ولا ماعقلتش شنو كانت سميتها وباها وعائلتها كلهم يهود .. مشات دابا راها فإسرائيل مع عائلتها
تنهدت وقلت ليها : اصلا فالدين ديالنا ماكاينش مشكل يتزوج وحدة من ديانة اخرى ... المسلمة اللي ماخصهاش تاخد واحد مسيحي ولا يهودي حتى يسلم .. عارفة هادشي ؟
ردت بعفوية: ااه عارفة مالي ماعارفاش!.. باشوولادها هي اللي مسلمة مايمشيش على ديم باهم اما هاديك يهودية ولادها غيتبعه دين باهم مامحرماش هاد القضية ولاكن مو مابغاتش تفهم هادشي غير سمعاتها يهودية كحلات بلعمى
عاد عرفت منين جاياها هاد قصوحية الراس ولاكن حسب مافهمت داكشي فات عليه شحال وماشي شغلي فيه . اما فدزى بقات مصدومة مزال ماتيقات شنو قلت ليها وقالت ليا
تنعدت وقلت: ولاكن العقل .. العقل افدوى اختي الله يجيب ... ماغرفتش نتصرف فالحب والطيش كيحساب ليا غير انا اللي عايشة .. مقدرتش نتحكم فراسي وخليت راسي نغرق حتى وليت غير كنرون .. وهوا ماشي شي واحد اللي يميك على الاخطاء ويدوزهم .. كلمة جوج الله يعاون ويقلب ميعقلش عليا .. وانا حمارة تابعاه وكنمرض راسي .. لهلا يوريك كي كنت شحال هادي اما دابا راه شوية .. راه ماعطيتوش وجه واخا كنت غنسخف ومكنبينش ليه شنو طاري ليا ... المشكل ديالي فاش كنفرح بزااف كندير الكوارث وبلا منحس وكنبدا نتخبط .. اما هوا عارف اش كيدير وفين كيحط رجله وشنو كيخرج مع فمو .. وكما طيحني غيطيح عشرة اخرين كيتي انا اللي ماقدراش نجرب واخا غير تجربة مع واحد اخر وحتى واحد مكيحلا ليا ولا كيعجبني . . لهلا يوريك اختي اش داز عليا ولاكن خلي هادشي بيناتنا ماتخرجيهش
ردت قاىلة: اويلي واش من نيتك ! تمشي توصل ليه الهضرة يجي يقلب عليا البيرو فالكوميسارية يشوهني وندير الصدع لراسي مع راجلي . لالالا اختي اش بغيت بشيت مشاكيل .. انا كندوز من حداه كنهبط وجهي للارض منشوف فيه مايشوف فيا ونتي كتقولي نعاود هادشي . عاودت ليك نتي حيت الصحبة ديال زمان عارفاك اش كتسواي ... ونزيدك راه مو والله ماتخليه يدير شي حاجة .. مو صعيبة ماشي شي وحدة اللي ساهلة وكتشرط بزاف وفيها الوسواس واخا كتبان مهدنة من دوك الزعرات الضعيفات اللي كيدرو كاري لشعرهم اللي كيلبسو الطالون ولاكن راه قافزة
ضحكت وقلت : باينة فيها راني شفتها واحد المرة ولاكن ماركزت مزيان وباينة كتحكم فيه
هزات يدها وقالت: واسيييري يتحكم فعشرة منها راه كتخاف منو وكتحشم وشاداه من جنبو اللي كيضرو حيت فيها السكر والطونسيو مكيديرش راسو فيها .. ولاكن فاش كتمرضو كيغضب عليها كانت كتعاود لماما وقلبها طايب كتقول ليها مكيبقاش يعيط ليا ويسول فيا وكيقلب وجهه مكتبقاش تشوفو وكيرجع يهضر معاهت بالكرام ومكيضحكش كتولي طلب وتزواك ودير فالخواطر باش يرجع كي كان ... راه كما كيدير معاك ميدير مع مو فاش كتزيد فيه هاداك طبع فيه هوا هاكاك مكيشبه لا لمو لا لباه هوا داك السيد هاكاك داير مع كلشي .. ومع مو مكيهزش صوتو ولاكن كيتعامل معاها فشكل كيندمها بطريقة اخرى حتى كتبغي تبكي ... راه والله اشيماء مايصلاح ليك انا بعدا منقدرش نعيش مع واحد بحال هاكا .. واش اصاحبتي ميحزرك ما يقولوليك سمحي ليا ما يطيح كواريه .. كفاش غادي تعيشي معاه !... هاديك ليهودية هربات واقيلا معاوداتش جات للمغرب من ديك الساعة يعلم الله كي كان معاها حتى هي كوراه مشربها المرار
ضحكت بسخرية: امم .. كوراه كان عايش معاها الحب واش هوا يغا يتزوج بيها كاع ونتي كتقولي ليا
فدوى : والله مايشمها والله حتى تموت ليه مو واش نتي حمقة ... راه مو فشكل ميقدرش يخسرها قالت ليه باغي تناسب مع اسرائيل ومرضات كانت غتموت .. اما باه قاليه دير اللي عجبك حيت مكانش كيتفاهم هوا وباه .. باه صعيب حتى هوا وكان كيلقا مشكل مع ولدو .. مكتنازلش ليه و كيتعصب كانو كيقطع الهضرة شحال باش يردعو زعما ساعا والو كيقطعها حتى يعيا ويرجع يقول ولدي ماعندي مندير هادشي اللي عطاني الله . السيد معجون هاكاك متقدريش تبدليه شوفي ليك واحد فيه الضحك والنشاط يبولك فحوايجك بالضحك
رديت: وراه حتى هوا فيه الضحك ماشي معقد ولا مريض فمخو
قطعانني: غضحكي معاه نهار وتبكي شهر ...
تنهدت ودورت وجههي مأزمة وانا نلقا واحد جالس فواحد الطبلة مع صاحبو وسارح عينيه فيا .. زوين فوجهه ملامحه فاتحة شوية وضاحك بوحدو غير هوا اللي زوين فديك الكافي كيشرب قهوى . شفت فيه وضحك ليا وانا ندور وجههي بالزربة وهي تقول ليا فدوى..-د
- من الصباح وهوا حاضيك بغيت نقولها ليك وتلفتيني بالهضرة .. هانتي هاهوا جابو الله غزال كن ماكنتش مزوجة كن جربت معاه هه.. يسمعني مراد يقول ليا يالاه سيري تجربي شكاتسناي
مابغيتش نشوف فيه ولاكن فدوى بقات كدفع فيها من تحت لتحت وجلسات عليا شوفي كي داير زوين .. فن فين يبان زايد المعقد السلكوط ليهودي بلابلابلابلا حتى رمت ليه ولحت ليه واحد الابتسامة خفيفة ورجعن دورت وجههي وهي تقول ليا فدوى...- ايوا هاكاك .. عطس راسك فرصة اصاحبتي ماتعرفي يطلع حسن من لاخر ونتي ممرضة راسك
بقيت كنفكر واش نجرب ولالا وبقيت كنشوف فيه مرة مرة كنحاول نحرك فيها شعور الاعجاب اتجاهه وكنشكر فشكله غير بيني وبين راسي على الله يحلى حتى عينا بالجلاس وخرجنا من القهوى غاديين جهة الطموبييل باش نوصل فدوى وهوا يتبعني من اللور عيط ليا مادموزيل وتلفت اما فدوى زادت حانية راسها مشات ركبات وبقيت واقفة كان فالطول تقريبا بحال زايد .. افف علاش انا كنقارنو بزايد كل واحد وكي داير علاش كنشبهم لبعض واش ضاروري خاص يكونو بحال بحال؟؟ الى كان غيكون بحالو غير نمشي عند زايد احسن !
وقف كيهضر معايا بان ليا جنتلمان ومأدب وكيعرف يهضر .. بغا يتعرف عليا وكنت كنهضر معاه بكل ثقة فالنفس سميتو انوار وقلت سميتي شيماء وعاجبني راسي والابتسامة بالكرام .. بغا النمرة عطيتها ليه وشرت ليه بصبعاني وضحكة موزونة درت ليه باي وطلعت فطموبيل بقا واقف كيشوف فيا حتى ديماريت خر0ت الطموبيل ودزت حداه ضحكت ليه وهزيت يدي اشارة ليه وخرجت من تما مشيت بحالي وفدوى كتسفق ليا وتزغرت فالطموبيل ضحكاتني وكتصلي على النبي ومشينا كنضحكو .. فدوى طبعها كوميدي من يامات لافاك كانت كتفشلني وباقا كما هي ماتبدلاتش
رجعت بحالي للدار درت واحد الروتين ديال الاسترخاء كنديرو ديما ودخلت معايا العشا من برا تعشيت ومشيت تكيت نرتاح .. مالقيت مندير وشعلت تلفازة درت الاغاني لقديمة ديال الجيل ديالي .. يامات ليسي.. ليت تلك الايام تعود يوما .. مشات ديك الايام وخلاتنا بحال الايتام . جلست نتسنط ..
حبيبي بعيد محني يااه ربي عالم بيا .. غير ولي يا العمر تكون حلال مادا بيا .. موحال تبرا الكية حتى نشوفك بعينيا ... راني درت فيك نية ربي عالم بيك وبيا ...
اييه يا الايام .. كان الراي طاغي وكنت مصاحبة مع واحد كيطلقها ليا وكنوضونشطح عليها .. كان الراس خاوي والحياة السعيدة .. جيبة ديال الدجين والبودي وكنلوز فواحد الركنة فالليسي انا والطبقة ..
عمرييي لو كان بيديا عمري روحي انا نفديك .. لوكان يبغو والديا انا عمري مادابا .
رضا الطالياني ويا البابور يا مونامور.. .. كان فعلا الراي طااغي .. بديت كنتسنط وندوز الاغاني لقديمة ..ديسك كريمينيل ديال فياط انديلا شحال تزدحنا عليه كان طوندونس نوض فيا الحماس بديت كنغني لقيت راسي مزال حافضاه .. ماجيك سيستيم هه .. ايييه يالايام .. بقيت ندور طحت على واحد الديسك بالفرونسي حتى هوا ردني لشي ايام ميمكنش صبحت طالقاه الصباح فالطموبيل وانا فطريقي للخدمة والبيفان ديال الطموبيل قويين وزدت ليه فالصوت تميت غادية كندندن معاه وكاع اللي تقريبا قدي فالسن بدا يغنيو معاه فين ماندوز .
J'ai préféré partir et m'isoler
Maman, comment te dire, j'suis désolé
La conseillère m'a clairement négligé
Et moi comme un teu-bé j'ai dit O.K
جاني حنين قوي لديك الايام ومزال كيجعجبني الستيل القديم .. كان الشعب قليل وكلشي واضح وباين ماشي بحال دابا .. كتر البشار كنر بزاف والزحام داكشي علاش مابقيناش حاسين بالوقت حيت مكنعطيوش لكل حاجة حقها ووقتها حتى كيفوت عليها الفوت .. و كنرجعو نقولو ياريت ترجع ديك الايام .. ديما كنبقا نحنو ادللماضي وحتى هاد الخاضر ديالي غيولي شي نهار ماضي ونبدا نعاود عليه من بعد ونقول ياريت كن يرجع الزمان اللور . وصلت للخدمة ديالي وكنحس بإحساس غريب .. واش الحنين للماضي خلاني نحس بهاد الاحساس .. لقيت راسي كنتسائل فين يكون مشا أنس ... إلهام .. عبد العالي .. فلطمة الزهراء .. وبزاف ديال الصحاب . كنت كنعرف واحد ومصاحبة معاه كيحماق عليا لاكان بالنسبة ليا عابر سبيل .. منكدبش ونقول عمرني حبيت فحياتي .. حبيت حب المراهقة لقديم لاكن ماشي بحال هاد الشكل .. هاداك كان حب مسطي ماعندو لاراس ولا رجلين .. لاكن كان زوين فالحقيقة وكاع صحباتي اللي كنت كنعرف فديك الوقت كانو مصاحبين مع شي وحدين وتزوجو بيهم ندمو من بعد ما فاتت ديك النزوة ولقا راسهم غارقين مع نفس الشخص اللي عرفه وعاد عرفه شنو هي المراهقة وفهمو المعنا ديالها .. كان كيجينا الزواج شي حاجة زوينة .. كنعرفو فيه غير الشدان فاليدين والجلاس فدار راجلك ومو كتقول للناس عروستي مرت ولدي .. كان كيجينا هادشي بحال الرمنسية المطلية بالحنا ديال الهنود .. ديك الرمنسية اللي فيها ريحة العرق والكافور . وكانت عاجبانا .. كنا باغيين نتزوجو ونديرو عرس فالسطح ويجرنا الراجل يدخل علينا زعما والناس برا كتغوت اصباح صباح ماليه الكامون والسر والسر عليه .. ضحكت .. ااه على ديك الايام .. كانت العروسة كتسكن مع حماتها ولواسها وقليل اللي كتسكن بوحدها .. مكانش عندنا بعد النضر عما شنو غيوقع ما بعد الزواج وانتهاء فاكهة الموسم .. واخا كنشوفو اللي مزوجين اشنو عايشين لاكن عمرنا نتابهنا ليهم كنشوفو غير ديك العروسة الجديدة اللي يالاه دخلات دار راجلها وكيعجبنا الحال .. مكانش كيهمنا فاش خدام .. ولا اشمن نيفو .. مهم راجل فيه الزغب يشد لينا فاليد ونبداو نفيبريو كي المونيكات صافي .. كان كيحسابنا داك الفيبرور عنرو يسالي .. ماكناش عارفين ان الطاكتيل مع الوقت كيحفا وكيولي غير المعقول وبيمن تزوجتي وفيمت طحتي .. اغلبية ديال البنات طلقو مباشرة فاش وصلو الغشرينات .. ولاو كيبانو ليهم رجالهم كي الزبل الا القليل القليييييل الليي عندها شي زهر وتزوجات شي واحد فداك الصفر وفازت بيه حيت كن تا هوا زاد كبر شوية وعرف شكون هوا وشكون يكون مكانش غيشوف فيها حتى الشوفة .. هه اودي المراهقة مصيبة سواء جاتك فصغرك ولا فكبرك كتمحنك وتعمي ليك البصيرة ... جاب الله انا ماكنتش كنفكر نتزوج وكنخاف من الزواج واخا ماعارفاش شنو كيخلعني فيه .. بقيت كندور ونلعب حتى وصلت لفين وصلت ... وماكنتش شي وحدة ساهلة ... ماشي عليا كتنطابق ديك المقولة ديال كوني جميلة واصمتي .. او جميلة وغبية .. غبية غير مع زايد حيت كتفقد التقة فالنفس معاه .. انا مع البقية كنت جنية وكنقراها فالسما وكنقول ديما ياراسي رديا راسي.
وصلت للبيرو والتيليفوت كيصوني .. هادا غير انوار من البارح وهوا كيصوني .. ياربي على فرق شحال شاسع .. صونا عليا شي عشرة دالمرات لبارح وصبح مسيفط مسج وعاود كيصوني ... لا علاقة مع زايد .. كان ميصوني مرة وجوج مايعاودش يصوني مهما كان .. هادشي اللي كيكرهني فبنادم هوا هاد قوة الصونيت والمقابلة .. صافي مجاوبتكش جمع راسك خليني نفكرك فيك .. خلي ليا الوقت فين يجي الفضول ونبغي نتعرف عليك .. ماشي طلع ليا الزعاف ماحدك كتصوني وداير ليا الآرارة وانا كنتهرب وماعنديش نفس نجاوبك . ولاكن شكون غيشرح لهاد انوار هادشي .. كنكره هاد اللسقة هاكا .. انا كنبغي الراجل اللي مامساليش .. اللي معنظوش الوقت ليا .. اللي يخليني نصوني ليه حتى نشحف ومايردش ولا يرد يقول ليا مشغول من بعد نعيط ليك ... ويكون فعلا مشغول ماعندوش الوقت .. بفيت راجل اللي واقف على الصح يخرج فيا عينيه يدخلني سوق راسي ويترجل مايخلينيش نركب بيه فوق راسه ونردو قرد حيت انا من النوع اللي كيقردن البشار وكيشطحو والى طيح النيفو قدامي مانتلفتش جيهته ولا نعقل عليه ووغادي نمرمدو تمرميدة الكلابة
ماحدو كيصوني وانا كنزيد نتعصب وكيبلنو ليا الشغلات فين مانجاوبش حتى ساليت شغالي عاد رشقات ليا عليه عرفتو غيصوني عاوتاني وجاوبتو بقا عليا صافا ما صافا .. واش انا مخلياك كتسرسر من البارح وكضحك معايا كتقول ليا ياكما برزطتك!!! ااه اسيدي راك برزطتيني من البارخ ونتا سرسر وماجاوبتكش وكتقول ليا واش برزطتك ! ماعرفتش اش نقوليه على هاد السؤال وقلت ليه كنت مشغولة شوية وانطلق بغا يتجمع ... زايد كنت كنخاف نقول ليه مشغولة يقطع عليا يقول تا تسالي وعيطي ليا .. كنت ديما مساليا انا واخا نكون فالحمام نجلس نهضر معاه ود حتى يسالي عاد نكمل دوشي .
انوار بين ليا اهتمامو وقالي باللي عجبتو .. ههه ياربي كن غير سكت مكيعجبنيش اللي يقول ليا عجبتيني .. خليها عندك اصلا كن ماعحبتكش ماتجيش عندي اصلا يعندي لا داعي باش تقولها وتوضح الامور خليني نشك واش عجبتك .. خليني نشك ياكما ماعجبتكش.. اووف. بقينا كنهضرو وانا ماعنديش الوقت وهوا فيه الهضرة بزاف ..قلت ليه مشغولة عندي الشغل دابا فيدي قالي نتلاقو قلت ليه نشاء الله وبقا عليا نتلاقاو اليوم ما ليوم و تصدرتو قلت ليه مشغولة ماشي غير اجي ودير بلان راه الانسان كيكون عندو ديجا بلاناتو وشغالاتو . ماعلينا سالينا الهضرة ومباشرة موراه عيطات ليا فدوى سولاتني شنو درت مع انوار بو نواور قلت ليها شنو كاين قالت ليا واغير صبري شدي شدي معاه ماتعرفي يطلع مزيان راه عجبتيه وشد فيك بسديه ورجليه قلت ليها ماشي مهم نعجبو المهم هوا يعجبني والمشكلة فاش كان جالس فالقهوى كان عجبني كشكل حيت كن ماعجبنيش مانعطيهش نمرتي ولاكن هرب ليا خاطري منو .. سولتها شنو دارت فالخدمة كنقلب تقول ليا شي حاجة على زايد والو ماتلاقاتش بيه لا فطواليط ولا فكولوار وبقات فالبيرو ديالها مشغولة . سالينا الهضرة وخرجت مشيت بحالي للدار جلست طويت حوايجي وستفتهم وكنت عاطية السوارت لواحد المرى كبيرة امية كتخمل ليا الدار لاكن بيت النعاس كنسورتو وكنلقاها محددة ليا الحوايج وطاوياهم وحاطاهم كنجي نحطهم فالبلاكار وصافي . خدا ليا جميع الحوايج الوقت و مشيت دوشت ولبست بينواري وفوطة على راسي وجلست كناكل واحد السلاد حتى دقات عليا واحد الجارة لاسقة معايا طليت عليها من العين وفتحت ليها الباب قالت ليا راه جارتنا اللي عمرني فحياتي تواصلت معاها لا هي لا لخرى ولدات ونفيسة ودرنا خمسين درهم الوحدة وغادي ندخلو عندها وجيت نعلمك الى بغيتي دخلي .. حليت بزطامي عطيتها 100 درهم وجبدات واحد الورقة قيدات فيها سميتي وشحال عطيت وقلت ليها سمحو ليا ماعنديش كي ندير خدامة .. تفاديا لدخل عندي ندخل عندك لاكن مافيها باس مباردة طيبة يجمعو الزرورة للمرى يعاونوها .. لاكن اللي مكيعجبنيش هوا يعطيوها الزرورة ويدخلو يزردو والسيدة مريضة والدة غادي كيلفوها بزاف
هي هاديك سديت الباب ورجعت لقيت تيليفون كيصوني وطلع ليا انوار عاوتاني .. الله ياربي عاد هضرنا الصباح .. جاوبتو قالي بغيت نسول فيك وصافي لقيتني كنشرب قهوة وطحتي ليا فبالي شنو كديري !
قلت ليه غادي ندخل ندوش راني الباب وقطعت معاه حطيت تيليفون ونشفت شعري وتسنطت لعضامي .. داز الوقت بحال هاكا الروتين .غير الخدمة وكنتهرب من اللقاء ديالي مع انوار مابغيتش نتلاقا بيه واقتارحت على فدوى نمشيو نسافرو انا وياها وبزز باش قنعات راجلها خلاها ومشينا الويكاند لمراكش عرضت عليها لواحد اوتيل خمس نجوم دوزنا فيها يوماين الليلة ديال الجمعة والليلة ديال السبت والاحد رجعنا بحالنا وتيليفوني غيتفركع بليزابيل ديال انوار وقررت نتلاقاه .. واخا عيت مع السفر بدلت حوايجي وماعطيتش اهمية لشنو غنلبس معاه .. كنت شريت واحد الجلابة مخزانية رشقات ليا عليها بلدية فالكحل ومطروزة بالالوان ولبست معاها صباط كحل قاعو احمر حيت كنت دايرة مع اختي نمشيو عند واحد بنت عمي فسييطار ولدات نباركو ليها وجات المناسبة فالطريق . مكنلبسش الجلالب بزاف لاكن غادي نتلاقا العائلة فالكلينيك قلت البلدي كيهدي ولبستها وطلقت شعري مع مكياج خفيف .. اكسسواراتي اليومية اللي مكنحيدش وساعتي وصاكي ونزلت درت مع انوار نتلاقاو فالكافي اللي كنت كنجلس فيها انا وزايد وعجباتو ومشيت لقيتو جالس كيتسناني فرحان غيطير غير وصلت سبق ليا وجهه وانا نمد ليه يدي .. هاي هاي وجهي خاسرة عليه ثمن سيارة ونعطيه ليك تبوسو ... كنا وكنتو صرنا وصرتو نبقا انا غير كنشاير بوجهي شكون نتا اللي تحط حنكك على حنكي داكشي اللي بقا .. يحصل ليك الشرف عطيتك يدي قستيها !. جلست وعلى قلبي جالسة ومامرتاحاش كل شوية كنشوف فجنابي وانوار كيهضر ماسمعت والو من داكشي اللي كيقول .. اللي فهمت انه شي لعبة فشي شركة وبقا عليا انا هاشنو كنبغي وهاشنو مكنبغيش وعاجبو الحال متحمس يهضر على راسو وانا سفث ودني داب ليا بالهضرة ماخلاش ليا شي حاجة اللي نكتاشفها راسي ... بقا كيهضر على راسو حتى شحفت بلاصتو وقالي عاودي بيا على راسك .. خسرت عليه جوج كلمات قلت ليه فام دافير .. بقا عليا واش عندك علاقة ولا عندك شي واحد فحياتك .. هاد الهضرة هادي دارت ليا القبض ودوزتها يامات الشوماج ..شكون باقي كيسول بحال هاد الاسئلة ولاكن حيت انا ساكنة بقا كيهضر غير باش نبقاو نهضرو وهادا اكبر خطأ وهضرت عليه من قبل .. السكات احسن حيت الهضرة بزاف كتخلي الغباء ديال بنادم يبان . بقيت كندور عيني وكنجدب بأفكاري ورغباتي داكشي اللي بغيت يوقع حتى فعلا تحقق ودخل زايد مع واحد صاحبو وانا نتفعفع لاكن قبل ميشوفني قاديت جلستي ودرت رجل على رجل بكل ثقة فالنفس وكنشوف فيه بنص عين حتى شافني جالسة كنضحك .. حسيت بالنضرة فغينيه تبدلات وكان داير كاسكيطة ولابس سروال سورفيت وتيشورط وسبرديلة .. اميييمتي على ستيل كيجيبني فالشبكة نيشان . مشا جلس حسابني غيتقابل معايا باش نفقصو لاكن جر الكرسي قدامي وجلس عليه عطاني بضهرو وتكا على ركابيه وجبد الكارو الكماي وانا نتعصب
دخولو للقهوى نشطني وطرد داك الملل اللي كنت كنحس بيه .. واخا عطاني ضهرو وماضربتو بالعين تكا على داك الكرسي بداك الضهر السداسي وقربت من انوار لحت شعري قدامي وبديت كنهضر معاه ونضحك .. تقلبت مية وتمنين درجة مع انوار .. عجبه الحال وهوا يزعم شد ليا فيدي وانا نهربها ماحملتش راسي .. او غير ضحكت ليه شد ليا يدي ! .. صدمني وقالي .. انا عجبتيني وناوي المعقول .. ماباغيش نتفلا .. جيتك نيشان باش تعرفي صدق كلامي ونيتي .. تعجبت وقلت ليه ياك عاد كي عرفتيني الزواج بيه فيه !
قالي: مامحتاجش نفكر .. صافي لقيت الانسانة اللي رتاحيت ليها من اول نضرة وماعنديش علاش نزيد نفكر .
مابغيتش نضحك عليه وناخد دنوبو وقلت ليه : انا حاليا مكنفكرش فالزواج .. ولاكن خلي تعارفنا يستمر وتبقا العلاقة مفتوحة .. الى حنا تفاهمنا ومشات فسياق الزواج مزيان .. ولاكن باش نتزوجو حيت الزواج بين قوسين سميتو الزواج ومعقول لا .. خاصنا نعرفو بعدا طبع بعضياتنا .. واش نقدرو نتفاهمو .. واش نقدرو نكونو بزوج تحت رباط الزواج .. المغامرة ماشي ديما كتنجح .. راه الزواج هادا!
ابتسم وقالي: ولاكن انا مابغيتش نضيع الوقت .. المهم هوا ارتاحيت ليك وكنحس براسي كنعرفك من شحال هادي
صافي هاد الديسك طالع ليا فراسي قلت ليه: هادا اول لقاء لينا عفاك خليه يدوز زوين مادريش بحال هاداك اللي كيشوفها من السرجم مكيهضر معاها ما والو كيمشي يدي دارهم ويتزوج .. مكتعرفو مكيعرفها!.. تقدر دخل لشي دار ديال شي واحد عمرك عرفتيهم و لا هضرتي معاهم وتحط باليزتك وتقول انا غنعيش مع هاد العائلة ؟؟.. ماعرفتيهم قتالة ولا شفارة ولا جنون !!... راه الزواج بحال هاكا
بقينا كنهضؤو هوا كيعطي فكرته على الزواج وانا ضد كل الضد الزواج القديم التقليدي اللي كيجمع جوج دالناس يخلطهم بلا ميعرفو واش مناسبين لبعض ولالا غير كيتلاحو وشوف يصدق ولا مايصدقش !
تلفني بالهضرة دخلت ليه فالشرح طول وعرض ونسيت زايد اللي قدامي جالسي عاطيني بضهرو .. دور الزمر .. دووور غير شوف فيا ونشوف فيك ونفقصك شوية دوور .. يخخخ دار ليا فيها راه بعقلو ماعندوش مع التبرهيس زعما يتقابل معايا يشوف فيا ... ينعل بو هاد العقل والعقلية اللي عندك كتجيب الضغط والاعصاب
مابغاش يدور بقا هاكاك كتحرك فبلاصتو ويتكيف مع راسو وانا حامية فيا البيضة .. عييت قلت لانوار نمشيو قالي ماشخيتش بيك .. يالاه بقيتي ليا غير نتا نزيدك على هاد جبل الثلج اللي جالس لهيه . نضنا خرجنا مشا معايا جهة طموبيلتو باش نتوادعو تما وانا لقا السيهم زايد مسطاسيوني حدايا ووخشاها بزز ماعرفت كي دار ليها دخلها والبلاصة ديقة بزاف وحتى الباركين عامر مافيهش بلايص .. حرت انا ماعرفتش كي ندير نخرجها من تما وقالي انوار انا نخرجها ليك قلت ليه انا عارفة عبار طموبيلتي غنتقاتل معاها قالي اري اري نخرجها ليك .. طلع فيها باش يخرجها ورجع شوية اللور وهوا يقيس الطموبيل ديال زايد بغجها ليه من القنت شوية تسمعات طاق وانا نشد فحناكي حليت عليه الباب قلت ليه ويلي ويلي خرج خرج قلت ليك انا عارفة عبار طموبيلتي قصتي الطموبيل لمولاها مارضاش رجع حمر وطلعت بلاصتو بالزربة كنتقاتل وهوا كيوريني كي ندير ليها ماخرجتها حتى عرقت ووقفتعا طول وقلت للعساس يمشي يعيط لمول الطموبيل يجي نشوفو شنو نديرو معاه ومشا كيجري وهوا يهز انوار تيليفونو كيهضر فيه سمعته كيقول. وااايلي .. فسبيطار!!! اوااااه دااابا
طليت عليه خلعني سولته شنو واقع قاليا الواليد هزوه لكلينيك دابا وبغاوني نكون تما ضاروري وبقيت كنشوف فيه مالقيت منقول وقلت ليه لهلا يوريك باس صافي غير سير انا غادي نحل المشكل مع مول الطموبيل الله يدير ليك اللي فيه الخير
مشا حسيت بيه ضربها بسلتة .. باه ما تهز لسبيطار تا تضربات طموبيلتي انا بااز !
خرجت لبرا وقفت دايرة يدي على جنبي حتى بان ليا زايد جاي كيتهز جيهتي ضارب عليا الحطة وسيرديلة كحلة باقا جديدة وسبورتيف وانا نقلب وجههي بقا قلبي كيزدح حتى وصل شاف ديك الضربة فطموبيلتو اللور ورجع خلفة كيطلع ويهبط فيها وتحنا على واحد الرجل تحسسها ووقف شاف فيا وقالي
ماجاوبنيش بقا غير كيشوف وانا كنتملق عليه مغزززفة عليه ماكرهتش نعطيه شي طرشة وحلف حتى نردها ليه خاصني غير فرصة
خليتو واقف وحطيت ليه الشيك فوق الكوفر ديال طموبيلتو بخبطة وتميت غادية فحالي وانا سمعو قال ليا بسخرية الشيك هه.. مزيان هادا هوا اللي غادي يردك للتحقيق نشوفو من اين لكي هذا .. كنت غنحل الباب ديال الطموبيل نطلع وانا ونوقف حسيت بقلبي دار بوم وبقيت تابتة ورجعت اللور مشيت كنقرقب حتى لعندو ووقفت هازة خنافري ومكمشة فمي بكثرة ما مغزفة عليه لقيتو شاد الشيك كيشوف فيه وانا نطيرو ليه من بين يديه خليت ليه غير لهوا ودورت وجههي .. هه .. ولاهيلا زوينة هادي باغي يخرج عليا بالفن . زدت بحالي خليتو واقف لطموبيلتي وشفت فيه لقيتو مدور وجهه كيضحك عليا . ولظ لحراام كيلعب ليا على اعصابي ماكرهتش نضربو جنوني غيطيرو عليه .. رجعت نوريه الضحك ووقفت قدامو قلت ليه مكتخلعنيش... مكنخافش منك وحتى الى ديتني لهاد التحقيق ماعندك ما تلحق .. طرقتهم وساليت .. مابقا عندي حتى فرنك حمر كلشي طرقتو
بقا ميطبع ويهبط فيا وقالي مالكي مخلوعة ؟..
خزرت فيه : مامخلوعاش .. لا منك ولا من ديك الكميسارية ديالكم
هزيت صبعي عليه وكنترعد من لداخل ونزفر بقا كيشوف فيا وقالي سيري خلي هاد النهار يدوز على خير .
رديت عليه : ماشي نتا اللي تقول ليا سيري واجي ... عارفة فوقاش خاصني نمشي .. سمعتي
رجعت باللور وياريتني مارجعتش كان حفرة صغيرة هبط فيها طالوني حتى كنت غنبوس ليه رجليه وشديت ليه فسروالو جريتو معايا تفووو على شوارع وعلى شانطيات يخخخ الحفاري يفرق فيهم رموك ولا اصلاحات لا والو كن ماشديني من يديا وقفني كن جست ليه على سبرديلتو ومارضيتش طلع ليا الخرا وقالي بشوية عليك هانتي غتموتي .. نضت واكلاعا فالكاحل حسيت بيه كيزدح زديح ووقفت عليه غير بزز تضري ليا مع الارض مع طرف الحفرة حتى ضربني الضو ومع ذلك وقفت على مو صحا ونترت يديا قلت ليه ماتقيسنيش ... ماعندكش الحق تحط عليا يدك سمعتي
رد بسخرية : واشدي فراسك
مشيت للطموبيل كنغلغل طلعت وسديت عليا هزيت الجلابة وديماريت شافني غنمشي مشا يحل باب طموبيلتو وانا نكسيري رجعت باللور عطيتو لطموبيل تا تهزيت من بلاصتي وتهزات طموبيلتو حتى هي تصدم فاش شافني درت هاكاك ورجعت كسيريت مشيت طايبة كنكوي خليتو نوريه .. يالاه كمدها دابا على مافخيلك ركبو تفركع . حتى بردت عاد بقات فيا طمزبيلتي اللي عطبتها وديتها لغد ليه لميكانيك خليتها كتصلح ومشيت للخدمة عيطات ليا فدوى عاودت ليها شنو وقع بقات كضحك قالت ليا وييلي على مسخوطة ولاكن عبرتي عليه . بقينا مجمعين انا وياها قالت ليا راه كيبان ليها داخل خارج ولاكن مكتهضرش معاه ومابينها وبينو غير التيقار بعيدة عليه هي فجهة وهوا فجهة ثطعت معاها واجلت الزيارة دبنت عمي لمن بعد فاش نصلح الطموبيل وكريت واحد الكاط كاط كحلة كنتحرك بيها . دازت يوماين على اللي وقع وانور كيعيط مكنجاوبوش ماعنديش ليه الخاطر ولا الكانة ومامسالياش . فقت واحد الصباح كنوجد راسي كان عندي موعد مع الطبيبة .. كانت العشرة وكنفطر فالبالكون حتى سمعت الصونيط ومشيت ملوية عليا بينواري لقيت واحد خينا واقف ..سلام وعليك حقا جاتك استدعا لتاحقي بالداىرة فلان فلانية !.. علاش ياك اودي لباس ! حقا راكي ضربتي واحد الطموبيل وهربتي !!
صاافي كملات ... الكوميسارية عاوتاني .. وليت كنمشي ليها اكثر مكنشمي للحمام بقا خاصني غير شي بست النعاس فيها نبقا نرتاح فيه. وقعت وخديت والورقة وجلست كنشووف فيها .. بغا يمرمدني عاوتاني ومانقصاش .. ولاكن غزيت فيه اصلا كان خاصني نرد ليه الضربة .
مشيت للماريو كنشوف شنو نلبس .. جبت واحد الكسوة موردة بالفريفرات كتبين بالدوبلور يديها مفرفرين قصار ودرت ليها سمطة قهوية ولبست صندالة عالية طالون كومبونزي زوينة زرقاء فلون لوريدات وجمعت شعري سفنجة فازك وقاديت وجههي وتريحت بعطري المفضل ولبست اسسواراتي وخرجت مشيت للصالون كان عندي موعد نصاوب شعري .. هبط القصة لقدام بقيت كنشوف فيها وقلت ليه دير ليا بتبت ميش خفيييفة يجيوني شي زغيبات نازلين على جبهتي نشوف كي تجيني وديكرادي ليا شعري على طولو وصاوبو ليا بوكلي بالبابيليز وداكشي اللي دار ومطو ليا من بعد ما صاوبو جامي مدرج وجاتني لافخونش فنة بدلاتني جاتني كيوت زادتني واحد البرائة ماحسابش ليا غتبدلني وتجي معايا .. صورني بغا يحطني عندهم وخرجت مشيت ركبت سيارتي وتاجهت للكوميسارية .. تفووو .. داخلة والبوليس غياكلوني بعينيهم وتصادفت مع الشمكارة واكلين لعصا كلهم دمايات مدخلينهم خلعوني وهربت للدروج طلبعة وكنصوني على فدوى خرجات عندي قالت ليا شنو كديري هنا قلت ليها ها اللي كاين وهي تقوليا وييييلي بغا يبهدلك .. راني قلت خطييير وقبيح .. ولاكن ماعندو مايدير ليك باينة بغا غر يجيبك يخلعك .. ماتبيينيش ليه شوفي شنو غيدير . خليتها ومشيت عند واحد البوليسي باللبسة وريتو الورقة وبقا كيشوف فيا مكروازي رجليه وقالي
بانت ليا واحد اليد دازت حدا ودني طيرات ليه ديك الورقة وهوا يتقاد فالوقفة ضرب التحية بالزربة وتلفت مورايا لقيت زايد كيدير فيه شي شوفات ياربي السلامة ياربي السلامة وقالي طلعي للبيرو وطلعت خليتو لتحت مع هداك ماكرهتش يبهدلو ويغسلو شي غسلة طويلة على التحراش اللي تحرش بيا المعفون لاخر ومكرهتش يدير ليه شي بروصي هوا غيعرف كفاش يربيه كما جابني لهنا يربيني
وقفت حدا البيرو حتى جا شاخد من وجهه دفع الباب قالي دخلي وسد الباب وقالي بيه فيه شنو كيحساب ليك راسك؟؟ ضاربة الطموبيل وغادية السيبة فالبلاد ... اللي جا يضرب ويهرب فين غنوليو؟
جلست فوق واحد الكرسي وبررردت مع راسي .. اشنو غيدير ليا كاع فين غيوصلني ! .. سمملت عيني وهوا جالس فوق البيرو بواحد الرجل تحزم ليا عرفتو عوال يغسلني ولا يبهدلني ولا مانعرف فين غيوصل قولت ليه بيرودة
بقيت غير كنشوف وقلت ليه : كمل كمل .. غير كمل راه هوا نيت اللي خصك تكمي
ماعرفتش كفاش حتى خرجات من فمي لاكن داكشي خرج من قلبي وهوا يدور شاف فيا واللون مبدل فيه كنتسناه يدير شي حاجة وحطيت سدي على فمي حفاضا على التسامتي الييضاء
شاف فيا وكيخرج الهضرة ياغي يقول شي حاجة ورجع قالس غادي ندير راشي ماسمعتش .. مافهمتش
شعل داك الكارو وهبط الزاج حداه كيكمي وانا قالبة وجههي جهة الزاج ماهضرتش .. دور وجهه عندي متكي راسو على الكوسان وقالي
قالي زيديهم وانا نديرها ليه على قد فمو اصلا كنت باغا نمسح فيه رجليا وهزيتهم ليه بصندالتي على رجليه وتكيت على الباب قلت ليه مابقا احساس ولا يحزانون الحمد لله تهنينا منو
سولني فين الخاتم وقبل مانجاوب قالي لحتيه ؟ قلت ليه مالحتوش عطيتو .. عطيتو للناس اللي يستاهلوه وكيبغيو من القلب ومالقاوهش . سكت كيحرك راسو وكيلعب ليا فرجلي كنحس براسي كنسيح وندوب ونتزلع نسيت كاع الجروح والعذاب لاكن مانسيتش ليه الانتحار وقلت ليه الى ماسحمتش ليك ماعندك فين نبات ازايد .. الدعاوي اللي دعيت فيك زعما ماوصلاتك حتى وحدة
شد الضحكة تا عيا وطلقها قالي حيت مادعيتيش من قلبك .. قلت ليه دهيت فيك من اعماق قلبي غير دعاويا تقال وكبار تعطلو فالطريق ..
الفوغيغ جاني ميمكنش شحال ضحكت وهوا كيدفعني قالي غنهبط مع مك هنا نوريك الخاوة ..
بقينا مني منك حتى وقفو علينا البوليس محزمين بالطموبيل وجا وعندنا واحد كيتهز والبوليس ولاد لحرام فاش كيشوفو شي كوبل كيبغيو يترجلو على الراجل قدام صاحبتو ويبانو عليه . تلفت شاف فيه زايد وحط يدو على كتفي وداك البوليسي قاليه كتمعشقو هنا طلع لكارط نتا وياها
جاتني الضحكة وزايد ماحملوش دار فيه واحد الشوفة وقاليه معاك البوليس بكرو بان ليكم غا البحر مابانوش ليكم الزطايلية اللي جالسين كيفتخو فالجوانات لهيه ؟! هااه؟
جا عندو البوليسي لاخر وقالي طلعي هانا جاي وطلعت كنتفرج بان ليا كيشكش معصب ويديه كتشاير فالهوا وداك البوليسي كيفرنس ليه تا معارفتش باش فضاوها ورجع طلع زدح الباب وقلت ليه مالك ماخليتيهمش يطبقو القانون عليك وطلع فيا وهبط قالي القانون هوا اللي غنطلع معاك .. بقيت كنضحك قلت ليه يالاه نحيدو من هنا قبل ماتجي ساطفيط وكنزيد نفقصو وماجاوبنيش ..قبت ليه وايالاه قبل مايجيو يجمعونا ويديرو لينا حالة فساد ويسيفطوك جنايات .. راه القانون فوق كلشي دابا وهما جاو يجمعوك .. انا انا مجالساش معاك هنا بخاطري راك خاطفني بزز مني وكتحرش بيا وانا سيدة محترمة .
تما جيهة الباب ودار يدو حدا راسو كيتفرج فيا وقالي يعيش الاحترام اختي .. مالك ماقلتي ليهم راه خويا وجابني يوريني لبحر ودافعتي عليا ولا باغا فيا الخدمة ؟
ضحك بسخرية وقالي : نتوما البنات كتموت على التصاور ... كنشوف طوم كروز كفنان .. ممثل كيتصور وتشهر نتي كتخايليه شي حاجة اخرى يمكن .. كينقز من فوق السداري كيحساب ليك نقز من الطيارة بصح وكتحلي فمك وتقولب واو ..
قلت ليه زعما نتا كتنقز من القمر
هز حاجبو فيا وقالي هانا غنسكتك و اخا ديتني معاك فالخط .. منقز من الطيارة ومن الجرف وطحنا فالبحر وفالبر وتهرسنا ودوزنا اللي مدوزوش طوم كروز ... مقارنة تافهة اللي درتي بيني وبينو كل واحد وخدمتو وكل واحد كي داروليه الله ونتي كتخربقي دابا
دورت راسيووقلت : مارضيتيش اعتارف
ماجاوبنيش وانا باغاه يجاوبني عندي ليه شي هضور باغا نفرغهم فيهم وخاصو يرد عليا باش نعطي لمو .. بقيت كنسرسب ليه وهوا يقول ليا
وقف حدا غيسطو على الشارع وقالي نزلي نزلت .. اااويلي ياويلي مابقيت عرفت ماندير... عاد كان كيشتف عليا فالكوميسارية ومجرجرني وفادعني من يدي وغادية معاه بالفاصمة والله مكنحشم .. ولاكن كيقول المثل اللي عطا زكو لهلا يفكو . دخلنا كان مطعم خاص بالدجاج ولقيت ليه السبة قلت ليه مابغيتش الدجاج وعطاني اللائحة قالي عندهم كولشي بلا ماتقلبي على السبة . ماعلينا خديت طاكلياتيل بفخوي دميغ وطلب ليه الدجاج .. كليت بحال الى عمرني كليت حتى كملت داك الصحن و طلبت ديسير وحطو ومعاه كاس بحال كاس العرش ديال كوكتيل بقيت كنشرب فيه حتى ساليتو .. اويلي ميمكنش شحال كليت راه عمرني كملت ماكلتي ديما كنسمح فيها !! حتى ساليت وقالي هادا هوا اللي الريجيم .. قلت ليه اللي مات على شبعة لهلا يردو .. ردني بحالي دابا
قبل مايسالي ماكلتو جر تيليفوني عندو بغا يبقشش فيه .. اااش غتبقشش مافيه مايتبقشش .. قالي حلي الشيمة مابغيتش درت ليه الشك فراسو بغيتو يتنوا ويضرو راسو .. بقا عليا حليه ولا نفلاشيه ليك وانا نجر تيليفونو قلت ليه ارا ندير عليك بحث حتى انا .. مابغاش حيدو ليا من يدي قاليا فيا اسرار الدولة
بقينا كنتجابدو حلفت لا طل عليه حيت ماخلانيش حتى انا نبقشش ودرنت بناقص ونضنا بغيت نخلص وهوا يكعا .. خلص وخرجنا وفالباب تمات وحدة جايا كتلوى شافتو قال ليه اااااه زايد !!!
دغيا تلاحت عنقاتو سلمات عليه بحال الى مكايناش انا وهوا يجرني قاليها المدام
اييه على المدام اليدام !! وهي تصفار عاد سلمات عليا وبقات كتسول كي داير كي مادايرش وصدرها دغيا جرني من يدي مشينا و ماهضرتش وحتى هوا بقا ساكت حتى وصلني للبارا و نزلت مابغيتش نسلم عليه . دخلت وجاني النشاط والفرحة حسيت بالدنيا مقادانيش .. الحماس فيا تقول عاد خلاقيت من جديد . راتاحيت نفسيا وعقلي كيدور غير عليه الوقت كامل ونسيت الرونديفو ديال الطبيبة مامشيتش وعسطت ليها قلت ليها كان عندي شي شغل ماقدرتش نجي حتى ناخد موعد اخر وكملت نهاري حتى للعشية .. صونا عليا فتيليفون مجاوبتوش خليتو ... حسيت بالراحة اكثر وفنفس الوقت عقلي كيدي ويجيب مافهمت فراسي والو .. عاود صونا وانا نفرح حتى جيت نجاوب ورجعت حطيتو مابغيتش نجاوب وماعاودش صونا من هاديك ... بقيت كنتسناه قلت ياكما مغاديش يصوني ونرجعو للمرض عاوتاني .. بقيت كنقلب على مبررات باش نعيط ليه لاكن تمالكت نفسي وماعيطتش ليه . عاود داك انوار ولا الزمر نافخ ليا راسي ... كيصوني يصوني حتى بلوكيتو .. مكيعياش من التعياط هاد الزمر جاب الله كنت دايرة مود افيون اما كن جاوبو زايد ولا تقلبات العشية .. ورجعنا للهم والغم وشد ليا نقطع ليك ديال بصح .
الصباح صبحت ماشي على برجي .. تسنيتو يعيط لاكن والو ماحاشاهش ليا .. كل مرة كنبغي نصوني ليه كنتفكر باللي ماخاصنيش حيت مبينة ليه باللي ماعنديش اهمية بيه واصلا خرج معايا للعيب ونزيد نصوني ليه من لفوق ! باش نيت يعرفني مدلولة يكمل عليا ويلعب عليا العشرة . النهار كامل فالبارا ماصوناش وانا كل مرة نطل على تيليفون حتى للعشية مشيت حطيتو يتشارجا ورجعت لقيت واحد لابيل ديالو وانا نفرح ... هاد المرة مادرتهاش بلعاني ماشفتش لابيل ولاكن ماغاديش نصوني ليه .. رتاحيت نوعا ما مللي رجع عيط واخا ماهضرتش معاه لاكن حسيت بالجرح كيبرا وكملت الخدمة راشقة ليا وكنت جبنا شي سطوك حطيناه .. استغربت وقلت مع راسي علاش مكيجيش ياخد ليبخودوي من عندي .. كاع داكشي اللي شفت عندو فالحمام ديال البارا والشومبوانات وكلشي علاش زعما عمرو جا ياخد من عندنا ! ... ولا حتى دخل للبارا شي نهار ديما كيبقا فالباب ولا يجلس فطموبيل ! وحتى الى جا يشري منا وكنت انا مغاديش نتخلص من عندو اصلا واخا يعواج . المهم وصل الوقت اللي كنخرج فيه انا وكتبقا السيدة اللي كتسير تما حتى للتسعود وكيسدو يمشيو وخرجت يالاه قطعت الشانطي للطموبيل وهوا يوقف عليا بالطموبيل حساب ليا شي واحد كيضسر لاكن تلفت لقيتو هوا وشار ليا بيدو نطلع
بغيت هاد المرة ندير فيها جدية ونوصل واحد المساج قاصح من تحت الدف مادام رجع كيدور بيا واغينا نرجعو .. وحتى انا ماكرهتش لاكن ماشي بهاد السهولة غنقبل نرجع واللي داز عليا ماشي ساهل و ماشس قليل ودار غلط مكيتغفرش وكن وحدة اخرى بلاصتي دار ليها شي واحد نفس الشيء ماعمرها تشوف فيه . لاكن انا مابغيتش نخسرو وراحتي كنلقاها معاه وعمر شي قمقوم ميعمر ليا عيني واصلا من نهار عرفتو ماعرفت شي واحد بحال داك الشكل اللي انا باغا .. كاع اللي عرفت كنتفارق معاهم كيجي اللي ينسيني فيهم .. لاكن هاد المرة طحت فالشخصية اللي انا باغا ولقيت فارس احلامي .. ميمكنش نضيع الفرس ونشد فحمار واخا يركلني هاد الفرس كيبقا فرس . مابغيتش نبين ليه باللي مقصحة من جيهته غيقول اترت فيها .. لاكن بغيت نبين ليه باللي حاسباه كاي شخص اخر .. لا كتأثر فيا ولا حاسة بشي حاجة من جيهتك اصلا ولا عندي نتا فبالي .. زايد ناقص لا كتأثر فيا بالخايب ولا بالزوين ونخليه ماهوا مع الطيبين ولا مع السيئين . شفت فيه بان ليا واقيلا يالاه جا حتى هوا عندي وجا معايا قد قد عارف معاياش كنخرج وطليت عليه قلت ليه ..فين غادي ؟ شي رونديفو هادا دوزك من هنا ؟
ديك اللعبة زعما راك ماجايش عندي وراني ماعلباليش بيك . قالي طلعي براكة من الطنز .
ديمارا الطموبيل قلب الدورة وهي مكاينة لا رفيسة لا زمر .. شهاني فيها اش داني ندكرها كاع حطني منفخ وماعجبو حال وغير كيسوط وشد الفران كيطلع ويهبط فيا نزلت وبقا واقف حتى خرجت الطموبيل مشيت قدامو وضرب ليا الفلاش ودار مشا مع طريق اخرى وخلست انا كندور ونقلب ونسول على شي بلاصة كيديروها فيها الرفيسة نمشي نتعشا ونحيد شهوتي منها
دخلت لواحد المطعم بلدي كبير دايرينو على حسب السياح لقيت عندهم الرفيسة وجلست حطوها ليا مع كاس داتاي وتعشيت على خاطري وشربت واحد الكاس اخر معشب منعنع وبقيت مبندة حتى طبت ونضت مشيت بحالي للدار درت واحد الحمام حيدت ريحة الحلبة و المساخن وجلست دايرة الفوطة على راسي كنرتاح وهزيت تيليفون يالاه طليت لقيت لابيل ديالو دازت عليها نص ساعة .. هزيت تيليفون قلت خاصني نعيط ليه منبينش ليه باللي بلعاني كندير هادشي .. خليه يحس باللي طالع من اعماق قلبي حيت الى حس بيا كنلعب غادي يشد معايا الضد ويقلب وجهه يقول خليها تفش على خاطرها . صونيت ليه بقا كيصوني شحال ما جاوبش .. صافي غير ماجاوبنيش طلعات معايا الصهدة والخلعة قلت مشا ليا غادي نتجرجر عاوتاني وسيير شحال ديال المعانات الى غضب عليا ولا قلب عليا سيفتو .. بقا يصوني حتى تقطع وتخطف فيا اللون حسيت بالجو كيتكهرب عليا ويالاه جيت نصوني وهوا يصوني وقالي كنت فالدوش.وانا نتهدن شوية جاوبتو كنبرد ونهضر بشوية قاليا ساليتي الرفيسة
قلت ليه ساليت انا فالدار كنت كندوش فاش عيطتي
رد عليا بواحد النبرة وقالي: عاد دخلتي؟؟ ماقلناش غادي تسالي تعيطي
قلت ليه كنتحلون : شفت الحال مشا مابغيتش نبرزطك قلت غتكون ناعس ماشي وقت العيطة
قالي وقت الشعبي.. مزيان سيري ترتاحي .. يالاه تصبحي على خير
قطع قبل منهضر وقالها ليا ببرودة وانا نتعصب ماعرفتش كفاش حتى لقيت راسي واقفة وصونيت ليه قلت ليه
مكنقطعوش فالوجه
رد بعصبية : نتي كتقولي ليا مشا الحال ومشيتي للدار شنو باغا من اللخر اشيماء ... باغا نبقا تابعك ونتي كتمرضي فينا ... من اللول باغا تعيطي عيطي مابغاش بناقص من هاد النم
.يخخخخ تفو دغيا كيشعل هاد لخرا هادا بقيت ساكتة تفش وقلت ليه شنو بغيتي فهاد الليل راه الحال مشا
اهممم النفاخة ... ياربي السلامة قنبولة موقوتة نشوفو شنو غادي يقول وشمن خبار جايب ليا معاه مع الطناش دالليل
لا شعر مصاوي لا والو شداني نغسلو كاع ... مابغيتش نمشي لحتى بلاصة خاصة وانا ممستعداش ولبست جلابتي الكحل المطروزة بالالوان وواحد البلغة وهزيت صاكي خرجت مالقيت حتى قمقوم كيدور برا من غيري كي بغلة القبور .. جامعة شعري سفنجة فقرفادتي ولا مكياج لا والو وجهي ابيض والحمد لله عندي الحجبان اما كن جيت سفريطة . لقيت الطموبيل ديالو اللي خبطت ليه واقفة كتشعل شاعل الاضواء وواحد الجوجات دايزين حداه وكيطلو عليه ومشا حتى للراس ووقفو كيشوفو فيه .. بانت ليهم بورش سبور قالو جابو الله غنترفحو ساعة حليت الباب حدا عينيهم طلعت والروايح كوحوح فالطموييل لقيتو جالس لابس دجين ديالو وتيشورط وكاسكيطة بالليل كحلة والسكات .. طلعت قلت ليه شوف على حالة جايبني بيها بحال الى هاربة من الدار
ديمارا وقالي زوينة بلا داك الزواق الزايد
قلت ليه فين غنمشيو ماجاوبنيش وزاد مع الشوارع خاويين كيطير فيهم تقول كيتسابق مع الجنون حتى بان ليا خارج من المدينة والطريق خاوية وكل مرة كنقول غيوقف فشي بلاصة يمكن غنمشيو شي قنت فيؤ فالنواحي . لاكن دخل فلوتورط وزاد كيطير وانا نسرح عيني قلت ليه فين غنمشيو
قالي مانعرف ... مهم هاحنا غاديين
ربعت يدي وقلت ليه اويلي على غاديين راه عندي مايدار غدا .. قالي غدا الحد مكاين مايدار ومكتحلوش .. نعسي تا نوصلو
ماتخلعت ماتهزيت خليتو شاد الطريق وحداه واحد الكاس بيني وبينو حتطو كيشرب ومرة مرة يشعل كارو وانا شادة تيليفون فيدي ورجعت الكرسي اللور بانت ليا الطريق طويلة وسرحت رجلي قدامي هزيتهم الفوق وحاضية مع الجلابة لاتهبط عليا وانا غير بسليب .. بقيت هاكاك مرة نهز تيلي مرة نحطو والطريق بانت ليا مزال طويلة مدام جايب معاه الشراب للطموبيل يعني مغاديش نجلسو فشي بلاصة .. جمعت رجلي طويتهم وتقلب نعست جاني النعاس ونعسة ديال الطموبيل شحال زوينة وهي غادية بيك .. عطيت وهي للزاج وجبدت عليها بواحد النعسة مافقت حتى لقيت الطموبيل كتسطاسيوني ولقيت راسي ناعسة بحال شي واحد طايح من الطيارة
أنا وبعدي الطوفان الجزء الرابع
محتوى القصة
التنقل بين الأجزاء