شهوة ملاكم الجزء 15

كان كلشي فريستو كيشوف كيتسناو اشراق توافق.. الا أديب كان بركان مشتعل غير شافو ركع و جبد خاتم زواج .. حس بالعرق هباطة مع ضهرو .. صوت بحال تصفار كيمشيليه فودنيه... كيشوف البنت لي بغا قلبو و ختارها من وسط قشلة دلبنات اليوم جاي واحد راكع كيطلب يدها لزواج..

عند اشراق غير قشعاتو جاي عرفات اليلة مغدوز على خير ..

اشراق (متوترة غتبول بالخلعة ) : غ..سااااان أنا

مزال مكملاتها حتى كان اديب جمع مع غسان ببونية غفلو بيها مطيحو الارض.. كلشي شهق ..

أديب : مرتي أzaمل.. ن7ويك عليها أشما ااااتاااا..

طار أركان و دراري كيشدوه تعاونو عليه .. الجهد ديالو تدوبل .. وجهو حمااار و العروقة تطراساو بالاعصاب

اركان : أديييب ماشي هكا .. مااااشي هكا كيهضرو ناااس واش مريض فمخك اصاحبي..

اديب : واش مبانتليه غير هيا واش منيتو جاي كيعرض عليها زواج..

عند اشراق غير بعدوه طارت عند غسان كتعاونو ينوض.. فمو ولا كولو دم ...

اشراق ( كتبكي ) : سمحليا سمحليا كلشي بسبابي

اديب غير قشعها حانيا عليه و سدرها كلو مدلي قدامو محس براسو حتى جرها منيدها..

اديب : اليوم نقتلك و متبردلي تحركي قدامي

غسان (شافو جارها توكض ناض بزق دم لي ففمو):طلق من البنت .. بآشمن حق كتدخل.. كالس كتقول مرتك...متقول مرتك حتى تزوج بيها.. اشراق جات معاي وفوراقها كاملين مكاين متزوجة دونك طلق من البنت حسن ليك.. و هي لي من حقها تختار معامن تكون ماشي نتا لي تقرر..

أديب كان غادي حتى سمع هضرتو وقف جامد جا ضاير بالعرض البطيء

اشراق عرفات هضرت غسان زادت نار فوق نار .. عرفات بلي مستحيل اديب يدوزها هكاك و مستحيل ميخدمش يديه تاني

اديب (ضاير مصدوم من هضرتو) :عاود شنو كلتي

غسان (يثباث) : مكيهمنيش شنو بيناتكوم.. اولا شنو كان بيناتكوم.. كتهمني إشراق و الجواب ديالها... و لو بصح كتحسبها مرتك كون مخليتيش صبعها خاوي ..

اديب : ديك صبع غنطلعو معاك ا ولد ال79بة...

يلاه جا يطير عليه وقفات اشراق

اشراق :كنقسمليك بالله أ أديب و تقيس فيه عمرك باقي تشوف وجهي...

أديب هضرتها صدماتو.. ممتيقش بلي خيراتو و علاش على ود غسان ..

اديب : كدافعي عليه .. و حدايا .. برب العالي متستاهلي.. هاهو طلسيه( دفعا و جا خارج كيغلي )

غسان غير شافو دفعها طار لعندها: اشراق نتي بيخير

دارت شافت فيه شنايفو تنفخو و حنكو زراق

اشراق : سمحليا ..

خرجات كتجري تابعة اديب .. بالها يلاه غيركب فواحد طموبيل و هي تلحق عليه

اشراق ( كتلهت ):اديب تسنى فين غادي

اديب ( معصب ):غتقلبي على عدو ربي فهاد ساعة باش من9ودش معاك سوايع.. ضرب فطوموبيل انا تحبسيني و تخيريني على ود شماتا.. انا أإشراق..

مشات لجيهتو كتحاول تهدنو

إشراق :واش منيتك كون محبستكش كون قتلتيه واش عارف راسك شنو درتي راه ممكن يدعيك.. فينها هضرتك ديال صبح ماشي هكا كيتحلو الامور ..

اديب: و نتي مااالك نتي مااالك و لا عاجبك الحال حيت راكع ليه .. عايشا دور .. ياكما كنتي غتوافقي و خصرت ليك الجو الرومنسي.. سيد تيق راسو ..خرجو عليه الافلام .. يكما صحابليه راسو هو روميو و نتي جوليت ..

. زير على يدها بغضب بربي حتى نقتلو و نتبعك ليه

إشراق كتشوفو معصب و كيتغدد مكرهش يغزز غسان بسنانو.. صدرو كيطلع بالاعصاب و عضلاتو متشنجين ...

بغفلة تعلات على صباع رجليها شادة وجهو بين يديها طبعات قبلة دافية و حنينة بردات نار لي شاعلة فأديب ...

بعدات اشراق بلا متحيد يديهاكتشوف فيه بحب متنكرش فرحات حيت شافتو غار عليها .. ولو مكانش عليه ..

اشراق بطريقة طفولية : أديب أنا قابلة نتزوج بيك ..

بلا شعور فلتات ليه ابتسامة من طريقة باش قالتها.. بسيف باش نطقات الحروف.. كتبان حشمانة و خدودها حمارو

زير كتر على الخصر ديالها مقربها ليه

اديب : و على عاد عندك اختيار بسيف عليك (هز صبعو كيضربها بيه لراسها ) دخلي هاد الهضرة لدماغك نتي ديالي و غتبقاي ديالي

إشراق ( كضحك) : غير انا تناتفت صباح و نتا دابزي لعشية..

اديب : يحمد الله حيت مقتلتوش ..

إشراق ( بتوتر ) : مدار والو أ أديب .. نتا تكون بلاصتو دير نفس شي .. مكانش عارف و المشكل عمرو بينلي.. اما كون لمحتليه.. على العموم خاص نرجع.. حشومة .. غسان ماشفت منو غير الخير و فالوقت لي مكان حتى حد معاي هو عاوني..

أديب ( خنزر فيها ): المعنى طلقيني

إشراق : خاص نرجع لغيستو متنساش كنبقا السكريتير ديالو و خاص ضروري نهضر معاه نحيدو سوء تفاهم واخا انا متأكدة غيفهم الوضع ..

أديب : زيدي كملي متمشيش تواسيه و داوي جروحو..

أتهزي امدام دوزي نوصلك شتك بديتي تحلمي و نتي فايقة ..

اشراق :اديب الى كتيق فيا خليني على خاطري .. مغنقدرش نمشي و نخليه فديك الحالة

اديب ( بعصبية) : واخا بخاطرك ..

دار ركب مخليها كتشوف فيه عرفاتو تقلق مي متقدرش تكون انانية و تمشي تخلي غسان بدون متعتدر ليه ..فكرت باش منبعد و تراضيه ...

رجعات دخلات لقاتهوم كلها شاد قنت كيهضرو ...غير دخلات كلشي كيشوف فيها حتى وتروها.. غير قشعها غسان طار لعندها كيسول ...

غسان :إشراق نتي بيخير ياكما قاصك و لا ضربك

اشراق مصدومة كتشوف سيد مضروب و باقي كيسول فيها كانت كتوقع غادي يتعصب منها و يقدر يجري عليها كاع ... مي هو باقي خايف عليها ...

إشراق ( شافت أركان واقف معاهوم ) : ممكن تخلينا بجوج بغيت ندوي مع غسان على انفراض ....

مشا اركان بلا ميجاوبها داير ضحكة استهزاء .. عجباتو المسرحية لي تفرج فيها .. حيت كانت من شر اعمالو..

---

مشا جيهت البار لقاها كالسا كتشرب و باينة مكترة شراب غير من طريقة باش كتشرب

اركان ؛ هووووب هوووب اشهادشي منيتك شنو هاد الحالة

أروى : شتيهوم كيف تقاتلو عليها ياك .. علاش هيا لي شافها كيبغيها و انا لا ..

اركان : ميغروكش المضاهر ا زين ( طلب ليلو كاس يرض بيه المجاج)

أروى :مامشيتي حتى قنعتي غسان مصدقتيش..

أركان : كان خاصني ضروري شي بيضق لي نحركو ميمكنش نبان انا فصورة

اروى : شنو هدفك مور هادشي

اركان : كنستمتع باللعبة..

اروى : و علاش عاونتيه من اللول

اركان : مكانش عندي خيار .. خوه لي دار كلشي انا غير كنت وسيط..

اروى : واش معتز و علاش دار هكا ياك مكيحملوش

اركان : عمر دم يولي ما .. عمرك تيقي فلمدابزة بين الخوت .. يكدب عليك الكداب يعياو يتقاتلو اخرتهوم كيحنو..

اروى : مبقيت فهمت والو

اركان : عمرك تفهمي و لو كان عندك لعقل مكنتيش تبغي واحد بحال أديب

اروى( سكرانة) : على مالو اديب

اركان جا نايض : مكاين والو .. كلشي بوقتو زوين نساي..

اروى:غالبا غيرجع المغريب

اركان ( باستغراب ) : علاش

اروى : لقيت هناء مخليالي ميساج و غالبا غتكون دابا عيطاتليه.. باه مريض ..

اركان ( باهتمام ) :هي قولي سي محمد كيودع ..مممم فالوقت المناسب ..

(جا نايض ) بون انا غادي تمشي و لا تبقاي ...

اروى : ديني معاك ...

عند اشراق غير مشا اركان تحركت هي و غسان كيهضرو..

اشراق : غسان سمحليا بزاف حيت حطيتك فهاد الموقف و الله

غسان (بابتسامة) : نتي لي سمحيلي حيت حرجتك كان عليا نهضر معاك هو اللول

اشراق: وخا هكاك سمحليا بسبابي كليتيها فوجهك

غسان (كيضحك) : ماشي مشكل نساي واخا حسبي بحالي موقع والو ..

اشراق : نتا شخص مزيان اي وحدة تمناك و الله

غسان : و من زهري نتي ماشي من ديك الالف وحدة

اشراق (ضحكات باحراج معرفات متقوليه )

غسان ( شد فيدها )مبغيتش هادشي يأثر على علاقتنا واخا نسايه.. حسبيني مقلت والو..

اشراق : كنت خايفة تاخد مني موقف

غسان: لا لا كوني هانيا .... ( بجدية )بون صباح قادي المسائل لي ناقصة ناقصة عندنا لفول مع 12

اشراق : اه كون هاني .. (شافت فساعة مشا الحال نمشيو)

غسان: واخا يلاه... خاصك تعوضيني على وجهي لي ضاع

اشراق : جاتك اسيدي متكون غير على خاطرك غير امر

غسان : تعوضيني على هاد لعشا و تقبلي عراضتي فاش نرجعو المغريب .. اه مغنقبل حتى اعتراض

اشراق (باحراج معرفات متقول ) : واخا صافي ..ان شاء الله

يلاه تحركو جاو خارجين.. و هوما تلاقاو مع اركان وواروى ..

اروى ( سكرانة ): عقلي على هضرتي مزال غندمك مزال ضوقي المرار ..

اركان : زيدي زيدي ا اروى مكتعرفيش كاع تسدي فمك

جرها مخرجها.. خلاهوم متجاهلين هضرتها..

----

عند كوثر .. كاسا ساهية غير كتخمم مرفوعة بحالي مكيناش فهاد العالم .. دخلات ايمان لعندها

ايمان : مالكي اصحبتي هادي يوماين غير ندخل لقاكي يا كتبكي يا ساهية شنو واقع عاوديلي

تكمشات كوثر على وضعية جنين مخلية ايمان غير كتنهد .. هادي يوماين بسيف باش كتاكل .. ولات بحال شي روبو كتفيق كتمشي لخدمة كترجع كتكمش بلاصتها يا ساهية يا كتبكي

ايمان عصباتها حالة كوثر : وا بنتي مالنا دايرة كنازة بلا كنازة منيتك شهاد الحالة دايرة فراسك هد الحالة غير ديال شي 9واد ...باية كنتي كدوي معاه بلا خيارنا و سمح فيك..

كوثر كلمة سمح فيك زادت كملات على ما بيها لدرجة زادت فلبكي حتى خلعات ايمان

ايمان : اويلي مالكي شنو واقع.. راه غير كنت كنضحك

كوثر (ببكاء ) : تزوج أ إيمان و جا قالهالي بكل برودة و مرتو حاملة من الفوق

ايمان (باستغراب ) : اويلي شكون هادا

كوثر : عصام أإيمان ..

ايمان غير سمعات سميت عصام شداتها هستيريا ديال ضحك عقلها متقبلهاش .. مبغاتش تستوعب بلي عصام تزوج

ايمان : شكون عصام ... واش عصام ديالنا .. متأكدة واش كدوي منييتك .. مستحيل عصام يتزوج .. اويلي على تزوج واش كدوي على عصام ياك..

بقات كوثر ساكتة كتشوف فإيمان مصدومة معندهاش حتى جهد لي يجاوب.. نفسيتها مضمرة واخا مكانش عاطيها امل واخا كان اعجاب و تحول لحب من طرفها الا انو فداخل ديالها كانت كتآمن غيجي نهار و ممكن تكون شيحاجة ... بنات اوهام وفاش رجع عيطلها بحال لي عطاها أكبر امل هادشي علاش خبر زواجو نزل عليها بحال صدمة...

---

عند مروة و عصام كملو الاجراءات لجنى باش تحول لفرع خاص بأصحاب سرطان .. طلبو من سامية تركب معاهوم باش يقدرو يديو جنى معاهوم .. خرجو من لكلينيك شدو طريق لفرع لاخور.. خاص بأصحاب سرطان..

مروة حاسة براسها فاشلة و كرشها ضاراها مقدراش تهضر مكرهاتش غير تكا تنعس.. كتصبر راسها بزز ..

غير وصلو هبطو .. مشاو ديغيكت لاشومبغ.. بدلولها حوايجها مبغاوش يديوها حتى لبلوك حيت شافوها مخلوعة اضطرو يوجدوها غير فشومبغ عادية و غير بسياسة و ضحك مشات معاهوم لبلوك.. و دخل معاها عصام حتى لداخل... تا دارولها البنج عاد قدر يخرج..

عند مروة كتحس دنيا كضور بيها كيبالها عصام جاي قاصدها مقدراتش تشد فراسها حتى نزلات على طولتها ..

عصام قلبو تهز شافها تزدحات فالارض .. طار لعندها مخلوع عليها .. شافوه شي ممرضات جابو بياص هزوها..عيطو لواحد طبيبة دخلات عندها ...قالها عصام بلي راها حاملة و خرج خلاها كتشوف شنو عندها..

غير سلات خرجات لقاتو كيساين ..

عصام (مخلوع) : مالها ياك لاباس

طبيبة : سيدة موكلاش باين عليها الارهاق زيد الطونسيو طايح راه خاصها راحة

عصام : كيبقات دابا واش فاقت

طبيبة : وي فاقت خليتهوم كيركبو ليها صيروم.. واش كتبات ليكوم طبيبة ديالها شي دوى حيت راه باين كتعاني من فقر دم

عصام : وي خرجات ليها واحد دوا و دي فيطامين و حمض لفوليك

طبيبة : دونك صاف خاصها ترتاح ... ره هاد 3 شهور اللولة صعيبة شوية ..

عصام : داكوغ دوكتوغ لهلا يخطيك ...

دخل عصام عند مروة لقاها فايقة باينة فيها صفرة و عيانة

عصام (باس راسها ) : كيف بقيتي شوية

مروة (بسيف باش كدوي حاسة براسها فشلانة ) : وي حمدلله

يلاه جا يدوي و تحلات الباب مور مدق

غير دخل و مروة تصدم ممتيقاش شكون كتشوف.. و شنو كيدير هنا ...

مروة : بصدمة : لؤي شنو كدير هنا

لؤي ( بصدمة فرحان بشوفتها): ميمي ما شيغي ميس يو سو ماتش .. شهاد صدفة زوينة

مروة : لولو امتى رجعتي لمغريب .. ممتيقاش عيني شنو كنشوف

دخل لؤي فرحان بشوفتها حل يديه غادي مستقبلها بالاحضان يلاه قرب يوصل باش يدرعها و هو عصام نقز مدرعو بلاصتها..

لؤي : اوووبس(شاف فمروة نعت بعينيه لعصام ) ميمي سي كي .. معرفتوش .. (باحراج شاف فعصام داخل و مخنزر فيه ) .. احم ممكن تبعد واحد شوية .. بغيت نسلم عليها

عصام ( بعصبية دار كيشوف فمروة خواليه طريق ) : اجي بوسها نتا حسن ..

تخطاه لؤي مصوقلوش.. كلس جيهت مروة لي غير شافتو تلاحت مدرعااااه

مروة : توحشتك بزاااااف ناري غبرتي

لؤي سلم عليها بلايز كيجبد ليها حناكها: كبرتي و زيانيتي يا العفريتة..

عصام (محملوش) : ممكن شي حد فيكوم يشرحلي شنو واقع (شافو باقي حاط يدو فوق وجها.. داار مخنزر فمروة )أمدام نسيتي راسك واقيلا .. شكون هادا لي داخل فيك طول و عرض

مروة شافتو معصب عاد طلعات معاها : بلفرحة نسيت نعرفكوم .. بون عصام مون ماغي .. هادا مون كوزان لؤي

لؤي (بصدمة كيضحك) : سي با فغي تزوجتي.. مصدقش عمي عثمان كان عاطيني الكلمة

مروة ( باحراج) : هههه كنا صغار

لؤي : نووو دويت معاه غير فصيف قالي حتى تستاقر.. غفلتوني

عصام (حاس براسو شاد يديه بزز غير على قبل مروة باش متعصبش )كيطنز : دوماج المدام حاملة اما نزوجهاليك

لؤي ( وسع عينيه) : صي فغي ا مروة .. غتولي مامون.. دغيا دغيا.. على امتى تزوجتو

مروة ( كضحك كتحاول تلف هضرة عصام ) : مكاتيب وصاف.. مغتباركليش..

لؤي (بجدية ) : بون مبروك عليكوم متوقعتك غيكونو طارو بيك.. ( شاف فعصام) تهلى فيها نسمعها تشكات منك نخطفهاليك واخا تكون والدا معاك حتى 10

عصام مبقاش قادر يسكت.. زاد فيه من صباح و هو يميك مباغيش يدابز على ود مروة باش متعصبش مي مقادرش يصبر ليه كتر ..

عصام(بحدة) : كون هاني كون بغاتك كون داتك راك كنتي غير حداها مي هيا بغاتني انا .. فغير رتاح معا راسك ..

مروة (تدخلات حيت شافت الوضع غيتعقد بيناتهوم) ..

مروة :حقا شنو كدير هنا .. كنت عادا عليك باقي ففرانسا

لؤي: عاد جيت هادي واحد 10جوغ.. وتطوعت على ود لوليدات لي هنا ..

جات تجاوب و هو يصونيليه طيل ..

لؤي : بون خاص نمشي .. (مد ليها طيل ) قيدي طون نيم راه مشالي..

شدات قيداتها.. باسها فراسها و خرج مزروب

غير خرج بقا عصام كيسب فخاطرو كالس منفخ كيساين يساليلها سيغوم.. عيا شاد راسو باش ميهضرش مقدرش..

عصام (بعصبية ) : بربي يا مروة و لقاك كدوي معاه تنخسر معاك سوايع.. بلوكيه ملقاكش مجمعة معاه ..

مروة : منيتك شنو فيها راه مون كوزان عادي ..

عصام : متجهلينيش شوفي مبغيتش نهضر باش متعصبيش و كنراعي لوضعك صحي مي راه مغندوزش ليك لابيز و تدراع و تجباد لحناك... اخر مرة يقيس فيك اخر مرة راه مرة جايا منضمنش ليك راسي فخليني زوين معاك....

لاح ليها جوج كلمة و خرج زادح الباب موراه .. حاس براسو مضغوط و معصب بزاف ...

---

عند ياسمين

غير خرج طبيب .. ناضت هزات حوايجها .. تسلتات لبرا .. دازت لطواليط لبساتهوم بالخف و خرجات دايرة عليها قب ديال السيغفيط...

ياسمين : غندمك ا معتز غنخليك تمنا غير تشوفنا...

بقات غادا خرجات من باب لي زوغجونس... موقفات حتى لشارع لكبير .. هزات طيل كان عندها .. دوزات واحد نيم كتصوني مشدش ليها كيعطيوها خارج تغطية .. دوزات نمرا خرى غير جاوبها طلبات منو يجي موراها .. غير قطع صفطاتلو العنوان .. و مشات كلساات فآري د طوبيس مخبية وسط طلبة ... كتساينهوم يجيو موراها..

--

عند معتز وصل لكلينيك كاره حاس براسو رجع لخنقة و العداب تاني محملش راسو يرجع ..

غير دخل لاشومبغ ملقاهاش و هو يتسعق الافكار الخايبة كاملين جاو فبالي.. كيقول ياكما وقعات ليهوم شي حاجة ..

جا خارج طاير كيسول .. و كشاكشو خارجين ... عيا يسول و تاحد معارف شي حاجة .. بدا كيسب و يعرعر و هو يقشع الممرضة ديالها..

معتز(معصب و تالف ) : فينها واش كتمرضنو عليا ... جيت ملقيتهاش.. و لي نسول يقولي معارفش ..

فرملية : سي معتز غير رتاح يمكن كدير دي زاناليز و لا شي حاجة.. انا عاد جيت .. و طبيب راه عطانا امر باش نحولوها لشومبغ وحدا خرى ...

معتز: راه قالوهالي و سولت قالو باقي متحولات فينها ...

قشع طبيب جاي كيبان عليه مخلوع

معتز (بعصبية كارز على سنانو): فينها

طبيب ( متوتر و مخلوع ) : مكيناش ...يمكن هربات

معتز مشعر حتى ضرب لحيط موراه

معتز : أولاد 79اب كيفاش هربات واش كضحكو عليا واش لعدو ربكوم حاطها فكوري باش تقولي هربات .. زبابل دلفلوس لي كتاخد كل شهر باش تقولي هربات ( شنق عليه ) بربي و متحضرهالي حتى نريب عليكوم هاد زمر كامل

طبيب ( مخلوع ) : غير تهدن تقدر تكون مزال مبعدات .. علمنا أمن الكلينيك و غنمشيو نشوفو لكاميرات .. غير تهدن ..

معتز : بغيت نعرف غير لاش غتهرب خليتها ناعسة.. مفهمتش شنو لي خلاها تخاف و تفكر تهرب

طبيب(بصعوبة ):حصلت عندها لادروك ..

معتز( عينيه خرجو ) : كيفااااااااش

بقا طبيب كيعاود ليه و معتز غادي جاي تخلع بالمعقول .. خاف طرالها شي حاجة و لا تآدي البنت .. بالاخص حالتها نفسية ممتسقراش ...

تلف مبقا عارف مايدير.. تخربق ديال بصح .. خايف تكون تعاطات و تادي لبيبي .. خايف تكون بصح هربات.. معرف ميدير ..

علمو البوليس كلشي كيقلب .. سدو بيبان لاكلينيك.. و مشاو كيشوفو لي كاميرا و هوما يقشعوها خرجات..

معتز(معصب ) : ميغد فين غتكون دابا... غنقتلك أساسيين و توقع شي حاجة البنتي غنقتلك..

خرج معتز مور مهضر مع البوليس باش يبداو يقلبو..

داز عيط كاع لصاحبات ياسمين لي كيعرف سولهوم عليها .. لكن حتى وحدة معرفاتها فين مشات ..

دنيا تلفات بيه معارف لا فين يقلب لا شنو يدير .. دنيا كحالت فعينيه ...

عند ياسمين بقا كتساين حتى وقفات لوطو كحلة.. ركبات و زادت مخلية معتز غيحماق بتقلاب..

---

عند اشراق غير رجعو لوطيل .. مشات ديريكت لاشومبغ ديالها.. دخلات دوشات حيدات لعيا كتفكر كيف دير تصالح اديب حيت عرفاتو تقلق..

بقات كتفكر و تعاود و هي طيح عليها فكرة خلاتها تبتاسم بشر

غير سلات مشات دهنات لحمها.. هزات دو بيس فلكحل.. لاحت فوقهوم بينواغ قصير .. طلقات شعرها .. جبدات عينيها بأيلاينر و دارت كلوز بنكهة الفريز..

دازت لافاليز بدات كتقلب حتى لقات شنو بغات .. رشات باغفان ديالها و مشات قاصدا بيت أديب ...

غير وصلات دقات جوج خطرات والو حتى قربات تقطع لياس و ترجع فحالها عاد حل الباب .. مشافش جيهتها باينا فيه كان ناعس و ناض خاسر..

شافتو رجع لبلاصتو .. مشافش كاع فيها .. رجع تلاح فوق ناموسية ناعس على كرشو.. لايح مخدة فوق راسو .. لابس غا سروال ديال كيطمة و من الفوق عريان..

تقدمات بشوية خلات بينوار يطيح فالارض ...جايا كتمشا على صباع رجليها ..كتحلون...

حطات فجنب ناموسية شنو كان فيدها ..هزات بانضة جابتها معاها... قلبات شعرها جمعاتو لفوق ..و ضحكات بمكر ..

قلبات شعرها جمعاتو لفوق .. ضحكات بمكر .. هزات زيت لي كانت كتقلب عليه... جابتو معاها خصيصا باش تراضيه ..

طلعات فوق ناموسية شافتو ممسوقش.. طلعات فوق خصرو بنضرات لعوبة..

اديب ( فيه نعاس و طالعليه زعاف بسيف باش هضر ) : إشراق نزلي خليني نعس ..

مداتهاش فيه مدات يدها لطيل ديالها .. قطعات لي ابيل.. باش ميقاطعهوم حد .. و دخلات كتقلب على موسيقى كترخي ..خاصة بالمساج...

حلات القرعة ديال زيت كباتليه شوية فوق ضهرو و بدات كتماصي بطريقة إحترافية خطيرة .. و موسيقى مطلوقة حداهوم..

أديب ملي حل الباب مبغاش يشوف فيها ..كان عيان و معصب مبغاش يهضر معاها .. مكان فيه لي يتخاصم و لا يصدع راسو ... غير جات حداه كان عارفها غتبغي تصالحوا و لا دوي معاه لكن متوقعش كاع ديرليه مساج .. كل نهار كتصدمو بتصرفاتها و جرأتها لي كتسطيه.. ميكنرش جا فوقتو كيحس بديك الموسيقى مع حركاتها كيخليوه يترخى كأنو كدير ليه شي تعويذة ديال الراحة ..

كتر من نص ساعة و هي كاتماسيليه ضهرو و كتافو و يديه .. حتى ولا كيحس بواحد راحة عجيبة و اعصابو طلقو لدرجة كان حاس براسو فعالم خور...

حس بيها بدات كتعيا و الاغنية سلات .. يلاه بغات تعاود وحدة خرى حتى نطق معفر

أديب ( معفر و بحدة ): باركة دوزي تنعسي مشا الحال و غدا عندك فول فصباح

اشراق ( بصوت مهموس و كلو دلع ) : نعس وولد قلبي غضبان عليا مجاتش

أديب ( بحدة ) : مغضبان موالو غير تهناي و دوزي تنعسي خليني نرتاح

اشراق : هي الى ضرتي وريتيني عيونك لي طحت فغرامهوم نهار اللول هاديك هيا راحتي و هنايا..

أديب : اشراق مراشقاليش خليني نعس طفي معاك ضو ..

اشراق ( كدوز يديها مع شعرو وضهرو) : ياك و يعطيك خاطرك تحرمني من شوفة فيك .. منبقاش فيك نبات معدبة قلبي ضارني ..

اديب تنهد عارفها مغتخليهش فتيقار الى مضارش ..غتبقا ليل كامل كدوي ...و تحاول ..

تقلب و بقات هي فوق منو غير دار شافها مبتسمة ليه ببرائة تقول ماشي هادي لي كتخلي دمو كيغلي ..

غمض عينيه منتاشي بحركاتها كتلعب فصدرو

اديب :رصاي دوزي تنعسي

اشراق : مال زين ديالي مقلق عليا ..

اديب (كيتجبد) : ممليش شوفي نتي ..

اشراق حنات باستو بخفة : دابا يعطيك خاطرك اخر ليلة ندوزوها مخاصمين..

سكت اديب مباغيش يضعاف قدامها و فنفس لوقت مباغيش يدوز ليها كيفاش خلاتو و مشات عند غسان حيت عارف ولا دوزها ليها اتولي تعاودها .. و تجيبها عادي ..

إشراق(كتحلون) : دبا يعطيك خاطرك تبقا مقلق من حبيبتك هكا مكدويش معاها؟

اديب(غمض عينيه) : نتي لي درتيها لراسك ..

إشراق بدلع: .راه غير مجاتش نخلي دكشي هكاك و صاف.. متنساش انا خدامة عندو و جيت معاه و مبغاش نخسر خدمتي و انا محتاجها

اديب عقد حجبانو و قال: اشراق راني قاد بيك دابا و ديك الخدمة لي يجي منها صداع جلسي منها....وخا نعرف ما نعس لا ليل لا نهار غير باش نوفرليك لي بغيتي و اخر مرة نسمع منك ديك محتاجة للخدمة ..

اشراق(بحب ) : وا صافي الحب...( تمات هابطة بصابعها على طول جسدو ) سمح ليا عمرني نعاود غير متقلقش مني ..

اديب سحراتو بحركاتها و بدات كتحرك فيه الرغبة ديالو من جهتها...بقات هابطة بصباعها حتا وصلات لكبالتو و هبطات من فوقو متكية جنبو و فنفس الوقت خدامة بصبعها كدوز عليه بطريقة عمودية.....نشواتو بدوك الحركات و محس براسو حتا جا فوقها و بدات كضحك بدلع و طلعات ايديها حطاتها على عنقو ..

اشراق( كضحك) :صافي تصالحنا ياك

اديب: كتقلبي عليا؟؟ متخليش ليلة دوز هانيا و تخلينا نعسو

إشراق: و الا مقلبت عليك علامن نقلب احبيبي

سالات معاه و مقدرش مزال يبقا مصبر راسو عليها....شاف فيها بكل حب و حنا على شفايفها كيقبل فيها و هي مندامجة معاه و كتزيد تقربو ليها كثر

..داز على عنقها عاطيه حقو تا هو من العضان و المسان حتا خلاها كلها مطبعة ..

اشراق ترفعات معاه و طلع لودنها و نطق بصوت باح: كل نهار كنطيح فحلاوتك كثر ..

خشا ايدو باش يحل لي سوتيان و هي تحبسو....شاف فيها مستغرب و وما ليها براسو بمعنى مالك

اشراق: خليك توحش حلاوتي شوية... باش تكون زوينة كثر (غمزاتو )

اديب قوس حجبانو و شحطها ففخضها و قال: ولاش جايا مسفحة لعندي ابنت قلبي؟؟

اشراق بتحلوين: باش نتصالحو و متبقاش مقلق مني... باركة عليك غير مقبلات...اصلا عيانة و حتى نتا خاص ترتاح

سكت اديب مدة قصيرة و فلخر بعد و تكا جنبها و جرها لعندو حتا تكات فوق صدرو..

اشراق: تقلقتي؟؟

اديب : لا....عادي ....(كيطنز) ماشي مشكل نصبرو لا تصدقي حارقانا تاني

إشراق بقلق: اديب انا..( قاطعها )

اديب: غير ضحكت.... عادي موقع والو...كنحتارم رأيك (قرصها فترمتها) وخا شعلتيه و لكن نصبرو عليك.. مدام عيانة راحتك اولى

رجع خشاها فيه كثر و باسها فراسها محتارم رغباتها

غلط و دار مرة وحدة و مغتعودش.. و عمرو يفكر يقرب ليها و يمشي عكس رغبتها....مبقاش بزاف و يتجمعو فمكاينش لاش يزرب عليها و يبزز عليها شي حاجة

اديب: اشراق

إشراق: وي

اديب: الوليد مريض...غنمشي لسبانيا هو لول نكمل شي شغل على حسب هدشي د كومبا و مورها انهبط للمغرب نشوفو و نيت نقادو شي ديالنا انا وياك .. مبغيتش نبقاو كلها فجيه..

اشراق بحزن: انتوحشك بزاف متعطلش عليا ...

اديب( كلعب فايدها) : لا لا كوني هانيا.. نسالي و نجي ....

فالمغريب و بالضبط فنواحي فاس...

كانت جالسة قدام العتبة ديال الدار هي و صاحبتها مجمعين و فنفس الوقت صحبتها هازا التيليفون كدور فأنسطا ... قاتلهوم الملل..

سارة (بتضمر) : صحبتي حطي داك تيليفون شوية.. ملي كلسنا و نتي شاداه

سلمى : وا هانا حطيتو شنو انديرو؟؟ فنبقاو ندويو فنفس الحاجة اللهم ندور شوية نشوف الدنيا اش فيها و حنا هنا سادين علينا .. بعدا نشوفو ناس فين عايشين..

سارة: وايه و اللهما كدبتي كنحس براسي ساكنة فعالم اخر .. ياختي طلعلي زعاف لي نديرو اليوم نديرو غدا

سلمى: عرفتي نجيك بصراحة و الله مكرهتش ندير بحال ختك اشراق نهز حوايجي و نزيد .. نبات منصبح..

دمعو عينين سارة فاش سمعاتها جبدات سيرة اختها .. مزال حرقتها فقلبها.. توحشاتها بزاف

سارة: اودي ها هي مشات.. يعلم الله كيف راها عايشا .. معارفين عليها والو حدها فاش جات حبيبة و كريمة و ضربو بيها الطر فالحومة بلي تلاقو بيها كتغني فشي عرس....من تما ما بقينا سمعنا عليها شي خبار...معرفناها لا واش لاباس عليها واش واكلة واش شاربة ... اودي الله يسهل عليها فين ما كانت ..

سلمى: تا نتي يا سلمى واش مكتعرفيهاش راه اشراق متخافيش عليها...مرا بمية راجل....شكون فينا تقدر طلق من راجلها...شكون هنا زعمات و قدرات ديريها من غيرها؟؟ شكون تقدر توقف فوجه عائلتها و تتحدى هاد المجتمع باش تعيش حرة .. راه إشراق مرا و نص ..

سارة:اودي توحشتها بززاف .. متصوريش شحال بقات بلاصتها

تنهدات سلمى و سدات التيليفون و هزات عينيها حتا كتشوف كريمة دايزة و جارة حبيبة فشيز غولونت كتنكر عليها

سلمى: شتي هادي لي عرفات ليهم ههههه دخلاتهم سوق راسهم .. خرجات فيهوم نيت .. قولي لحبيبة دابا دير ديك تفرعين و تبورض عليها كيف كانت كدير لاشراق ... و لا حيت هادي بنت جميلة دوزاتها من عين ليبرا... و لات دوزها على البيض و متهرسوش

سارة: اودي تا هي مصدقاتش....من اول فرصة غدرات ختي...تا نتي كلشي بحال بحال .. بنادم ولا بجوج وجوه... غير باش تقبل تزوج بيه و هي شافت ختي شنو دوزات راه مافيها نفس... نساي عليا هادشي كنتفكرو كنمرض

هزات سلمى كتافها ممسوقاش و رجعات هزات تيليفونها وقالت: تا نتي ضبر لمخها نساي .. اجي اجي ندخلو نشوفو لجديد .. واحد لاباج عرفتي طحت عليها واعرة ...

رجعات سلمى كدور فانسطا كتقلب على ديك لاباج ... بقات شحال كتقلب حتى تنهدات بملل .. يلاه جات تخرج تقلبها ليوتوب و هي تحل فمها بصدمة .. ممتيقاش شنو كتشوف

سلمى( مطرطقة عينيها بصدمة ) : واي واي واي بشااااخ......واش كنشوف مزيان ولا لا .. لا واقيلة كنحلم

سارة( باستغراب) : مالكي اصحبتي حليتي فمك مبغيتي تسديه .. شنو تما شي تيتز تاني و لا ياكما لكراش ديالك تزوج ..

سلمى : عرفتي كون نا هادشي فطاليان حتى نقول غير ختك محطوطة ياختي معذور كيقولو يخلق من الشبه 40

سارة : كيفاش اري نشوف

سلمى (قلبات طيل عندها ) : هانتي شوفي ..

سارة (قلبات وجها ) : غير قوليلي شنو كتوريني

سلمى (باستغراب ) : علاش مالو .. قلبات طيل لعندها لقاتو طفا

سلمى :يخ تفو طفا قبل منوريهاليك.. انا نطلع نديرو يتشارجا .. غير يشعل و نوريهاليك عرفتي يا سارة فوطوكوبي ... تقولي غير ختك

سارة : سيري سيري راكي حواليتي واقيلة

----

صبح صباح جديد

عند إشراق سدات لافاليز ديالها و دارت فالشومبغ تشوف واش نسات شي حاجة...لقات كلشي هو هداك و خرجات من بيتها هبطات للريسيبنش فين كلشي مجموع ..

خدا غسان لي كارت د لي شومبغ من عندهم و داز يمكل الاجراءات....فنفس الوقت هبط اركان تا هو بحكم تا هو عندو معاهم الفول للمغرب

صونات اشراق لأديب باش تعلمو بلي قربو يمشيو و باش يهبط حيت كان داير معاها يشوفها قبل ما تمشي..

تسلتات اشراق لعندو مخلياهوم كيديو لي فاليز لطوموبيل .. و يقادوهوم فالكوفر...

غير وصلات عندو طارت مدرعاه

إشراق: غنتوحشك

اديب: حتا انا ( جرها من خصرها لعندو معنقها كتر )

تهلاي فراسك...و بعدي من بنادم....مغاديش نتعطل بزاف تما غير نسالي شغالي و نقاد اموري و نهبط للمغرب كيف قلت ليك .. خليك بعقلك (باسها فراسها)

هزات عينيها فيه بحب : حتا نت تهلا فراسك....و متعطلش عليا بزاف صافي؟؟

ضربها لنفيها و نطق: و كوني هانية امدام

ضحكات ليه و تعالات طبعات قبلة فحنكو .. حسات بطيل كيفيبري فجبيبها.. هزاتو لقات غسان كعيط ليها ..

اشراق: خاص نمشي

تنهد اديب حيت مقادرش على فراقها دبا و مكرهش تبقا معاه مي معندو ما يدير...مساخيش مي بزز منو خاص يقاد امورو عاد يهبط

طبع قبلة خفيفة على شفايفها بزربة و طلق من خصرها : الله اوصلكم على خير

.......

فالمطار واقفين باش يطلعو فالطيارة

و اركان واقف كيشوف فغسان و اشراق و كيخطط و يبلاني غير فراسو...

غير طلعو و كل واحد شد بلاصتو

جلسات اشراق كتشوف فالسرجم و نص ابتاسمة على وجهها..كتفكر كيفاش جات بقلب مكسور و راجعة دبا و كلشي مقاد من ناحية علاقتها معاه...كيفاش القدر جمعهم و خلاهم يوصلو لما كثر و ينويو الزواج من بعضياتهم ...

ميلانو ولات كتعابرها اشراق من احسن المدن لانه فيه قلبها ترمم .. فيها عاشت لحظات عمرها حلمات تعيشهوم .. شكون يقول البنت لي تزوجات و عاشت فقهرة و حاربات المجتمع و عائلتها وقفات فوجهوم و طلقات .. و عانات و لشيخه خدمات هاهيا اليوم راكبة فطيارة و فدرجة الاعمال ..و ولات سكريتيرة فدار الازياء و خطف قلبها ملاكم .. و خلا قلبها يحيا من جديد ...

عند اديب

مور ما تفارق معاها طلع للشومبغ ديالو و كيحس براسو عيان ..مرض باه زاد خربقو ...... و عاد خاصو يقاد علاقتهوم كتر ...

تنهد ناض تا هو كيجمع حوايجو حيت تا هو عندو الفول لاسبانيا..حتا سمع الدقان فالباب ..

توجه ليه ساخط و غير حلو مع شافها زاد كفر..مجا فين ينطق حتا دوات هي ..

اروى: اديب خاصنا نهضرو الله يخليك ..

خلا الباب محلول تنهد و دخل سبقها ..

اديب : سديه موراك

دخلات اروى و غير حس بيها قربات دار عندها و كمل: معنديش الوقت بزاف قولي اش كاين باش نكمل شغالي

اروى:واخا نجلسو باش نهضرو؟؟

شار ليها بايديه لفوطاي مشات جالسات و جلس فوطاي لي فجنبو ..

اديب: كنسمعك

اروى بتوتر: اديب عارفة راسي درت معاك الخايب و غلطت بزاف و لكن متخيلش شحال راني نادمة بزاف و كنتمنى تسمح ليا ...انا ماشي هكا و عمرني كنت هكا معرفتش شنو وقع ليا

اديب(تنهد) : اروى حنا من لول مكان جامعنا والو و لا كانت شي حاجة من جيهتك من الاحسن تقطع من الجدر و نبقاو هانين... انا دابا مع اشراق مخاصني صداع

اروى : كون هاني اصلا هيا لي جبداتني

اديب ( كارز على سنانو ) اشراق بعدي منها....نلقاك قربتي ليها منعقلش عليك .. و كون شتك قربتي ليها كان حسابك غيكون تقيل معاي

اروى : اديب راه كان فإمكاني نضربها و ندافع على راسي .. واش نسيتي شكون انا راه واقلة مدربة ملاكمة .. كون بغيت كون دقة وحدة نخليها كتلوى فبلاصتها.. مي مبغيتش نبان قبيحة حيت اصلا مجبدتهاش بوحدها تقرسات و على وجهك مضربتهاش و لي تما راه شاهدين هي لي طارت عليا

اديب (تنهد) : شوفي أ أروى مكنتيش هكا معرفتش شنو بدلك .. عماك السم و الحقد و الغيرة .. الحياة قصيرة بلاصة متبقاي حاضياني و حاضية إشراق و ديري فالخطط و المكائد و تحفري علينا و تبغي دخلي فالوسط كي سوسة عيشي حياتك و خدمي على مستقبلك .. الحياة مفيهاش غير انا .. نصيحة خلي قلبك بيض .. نقي الداخل ديالك .. هاد الطريق لي راكي غادة فيها مغتخرجكش.. شنو كتستافدي من المشاكل و صداع ..

اروى: لبارح مكنتش قاصدة شي حاجة اهي دغيا تقلقات و تخاصمنا .. سوء تفاهم كيوقع هيا يدها طويلة و انا عارفة راسي تبدلت و غلطت و معرفتش مالي .. انا راه مكنتش هكا أ أديب ( بدات كتبكي )

اديب : شوفي الغيرة و الحقد سيطرو عليك .. تولفتي تكوني محط الانضار و من صغرك لي بغيتيها تكون .. تولفتي كلشي داير ليك الخاطر و واخا تغلطي مكاينش لي يحاسبك لكن فاش كتوصل انك ضري حياة ناس و تسببي المشاكل و تنكديها علينا هنا و سطوب .. راه شتي كون ختي ختي دارت هكا مكنتش غنرحمها..

اروى :أنا ندمت أأديب انا ماشي خايبة نتا عارفني مزيان بلي معرفتش شنو وقعلي.. انا مستعدة نعتادر من اشراق .. عارفة راسي غلطت و دماغي تخربق .. كنتي صديق طفولة و فاش تغرمتي باشراق حسيت بحالي خدات بلاصتي بحالي وليت زايدة ناقصة .. تعاملك تبدل معاي مبقيتيش اديب لي كنعرف.. مي كنواعدك مبقيتش غنوقف فطريقكوم

اديب بصرامة: تصرفاتك لي خلاوني نتبدل.. (تنهد) ..تا دبا موقع والو...بالنسبة لاشراق طريق لي دوز منها نتي خويها....و انا من الاحسن تخلي حدود بيناتنا.. ديكشي القديم غنخليوه هنا اصلا تسالا هنا .. و انا غنعطيك اخر فرصة أ أروى الى شفتك بصح تبدلتي و قلبك تنقا راه غنتعامل معاك عادي و فاحترام .. شتك كديري فالخصايل فكوني متأكدة مغنديرش بوجه العشرة و غتلقايني انا اللول فوجهك ..

هززات ليه راسها كتمسح فدموعها : المهم نتنمى تسمح ليا...و الله اكمل عليكم بالخير...تستاهلو بعضياتكم و انا عارفة و قتانعت بلي عمرك كنتي ليا و عمرك تكون...نتمنى ليك السعادة فحياتك و عمري باقي نوقف فطريقكوم غير تهنى و اشراق مبقيتش غنقرب جيهتها

اديب: شكرا و ليك حتا نتي .. كوني متأكدة من حدك كتبغي الخير لناس ربي غيرزقك و يعطيك كل خير

وقفات اروى و تمات غادة لباب و فاخر لحظة وقفات و دارت نطقات بتردد: واش نقدرو نمشيو بزوج؟؟ عندنا نفس الفول

اديب: وخا ماشي مشكل اصلا جينا بزوج

تبسمات ليه اروى و شكراتو و خرجات...و هو رجع يكمل جميع حوايجو و بالو مع معشوقة قلبو

........

فالمغرب معتز ايهبل بالتقلاب و والو ياسمين مبانش ليها اثر...جهدو تقادا و صبر مشا نهار د تقلاب و والو ليل كلو خدامين كقلبو و والو.....داخ مبقا عارف ما يدير....

حاس براسو مخنوق ...جات هي فبالو للحظة و هي لي ممكن تطفي نارو و تواسيه...بلاما يتردد جبد تيليفونو صونا ليها .. بقا شحال كيصوني عاد جوبات

معتز بصوت عيان: Imane Ell

ايمان( مدوخة بالنعاس ) : م..ع..تز

معتز: ايمااان محتاااجليك اناااا عيييت حاس براسي مخنوق

ايمان بخوف(توكدات ) : مالك ياك لاباس؟؟ (بصعوبةو قلبها ضارها )واش ياسمين؟ شنو واقع

معتز: ياسمين هربات معرفناش فين مشات من صباح و حنا نقلبو و والو....و عاد حاملة و حصولها البارح كانت باغا دروكا....مبقيت عارف ما ندير .. دنيا ضارت بيا من البارح و حنا كنقلبو

ايمان(قلبها كيضرب ) : كالم طوا دبا...ان شاء الله ميكون واقع ليها اتكون غير خافت من ردة فعلك لا سقتي الخبار....شوية و تبان غير نت متهلكش راسك عفاك .. كلشي غيتحل

معتز: تعدبت فحياتي بزاف...وليت باغي انرتاح و مباغيش ربي يعاقبني ببنتي

ايمان: كون متفائل مديرش فبالك و انا معاك وقت لي حتاجيتي شي حاجة ....( سكتات مدة كتفكر و قالت ) واش تبغي نجي عندك؟؟

معتز: محتاجك بزاف معايا و لكن مكاين لاش نعذبك....عاد خاص نرجع نقلب...غير اتعذبي و تجي

ايمان: معنديش مشكل لا كنتي محتاج لي يكون معاك .. ( بصعوبة ) نقدر نقلب معاك

معتز: معرفتش و الله غنمشي لدورية ديال البوليس نشوف واش كاين شي جديد و نرجع نعيطليك منبعد

ايمان: وخا .. باش ما كان رد عليا

معتز: شكرا بزاااف ا ايمان ..

ايمان: هدا واجب...تهلا فراسك ...

فالمطار....وصلو اشراق و البقية.....خرجو تفرقو وصل غسان اشراق منبعد كل واحد مشا للدارو

عند إشراق مكانتش عالماهم بلي جايا و كانت باغا ديرها ليهم مفاجأة ..

---

كانت كوثر جالسة على حالها غير طالع ليها الدم و كتبكي...تا الهضرة باش دوي مبقاتش عندها ليها الطاقة .. كتشوف كلها عايش حياتو الا هيا باقة فنقطة وحدا ..قلبها ضارها و زواجو تغرس بحال سهم فقلبها...مقادراش تقلبها وخا هو عمرو عطاها شي وعد و لكن بغاتو و تخيلات حياتها معاه ..بنات اوهام و عقلها الباطني تقبل الفكرة و خزنها عندو ..

حلات عليها ايمان البيت لقاتها بقا هي هي هادا حالها..

مشات جلسات حداها كتحاول تواسيني و تخرجها من الجو الكئيب لي دايرة

ايمان: كوثر يهديك الله اصحبتي اش هد الحالة درتي فراسك......نسايه عليك عفاك...عصام تزوج بلي مرتاح معاها و بلي كيعرف و متأكد من حبها ليه .. اصلا كلنا كنا عارفين مروة كتبغيه و باين بلي كان معجب بيها و كيبغيها .. شوفي غير نهار تناقشتي معاها مترددش يضور فيك على قبلها .. راه معندك لاش ديري هاد الحالة على والو .. دنيا مكتوقفش على راجل .. راه غير هوما موجودين.. و مزال ربي يلاقيك مع لي يبغيك و يقدرك و يعرف قيمتك

كوثر: تانا كنبغيه ا ايمان ( ضربات فصدرها بحرقة) كنبغيه ا ايمان و مقدرتش نتقلبهاا.. مبغيتش راجل خور بغيتو هو .. ( عاد طلعت معاها سميت مروة )

كوثر بصدمة عاد طلعات معاها : اجؤ واش قلتي مروة ياك .. مروة لي معاكوم فشركة .. مروة لي بسبابها بهدلني ياك ..

هزات ليها راسها ايمان بمعنى هيا...

طاحت دمعة من عينيها و خلاتها ممساحتهاش : علاش هي ماشي انا .. علاش ختارها

ايمان: لانتي هبلتي صاف واش منيتك مفهمتش شنو هاد الحالة دايرة.. ا كوثر نكونو واقعيين هوما كيعرفو بعضياتهم من شحال هادي ...و من زمان مروة كتبغيه و كلنا عارفينها....يمكن صافي فاش بغا يبني حياتو شافها مناسبة...الله اكمل عليهم..(بحدة) صافي نسايهم .. مفهمتش كدبتي كدبة و تيقتيها فيقي اصحبتي من هاد البهلان .. سيد مواعدك بشي حاجة مكنتو مصاحبين محتا حاجة مالنا على هاد الحالة

رجعات كتنخصص : ماشي لخاطري .. قوليلي شكون قال لك بيمن تزوج؟؟

ايمان: فاللول متيقتش .. صونيت عليه مجاوبنيش لقيتو مشادش موراها عيطت سولت واحد البنت معانا فالشركة قالتها ليا.... دابا نتي صافي نساي السيد اصحبتي .. متمرضينيش كتر.. لي يشوفك يقول غا تقبك و سمح فيك نوضي جمعي خناينك عليا .. كتبكي على واحد ممسوقليكش كاع عايش حياتو .. انا لي مكناش كنتفارقو تزوج مقالها ليا .. بقيتي غير نتي يراعيليك.. فيقي من البهلان ديالك هادشي بدا يطلع فراس

كوثر: مقدرتتتش مقدرتشششش ماشي لخاطري علاش مكتحسيش بيا

فنفس الوقت تسمع صوتها : شنو لي مقدرتيش بسالمة ؟؟

كوثر و ايمان بصدمة: اشراااق

إشراق: مالكم تصدمتو يكما ما بغيتونيش نرجع .. شكون ولفتو الدار بلا بيا

ايمان( بفرحة ) : هاااح جيتي ( ناضت عندها ) توحشناك ازين ديالي ( عنقاتها)

ناضت كوثر تا هي سلمات عليها و عنقاتها كتحاول متبكيش حيت عارفة اشراق غتنوض ليها نيت و تعطيها القاصح ..

ايمان ( كتلف لهضرة) : اوى على سلامتك ازين....علاش معلمتيناش بلي غتجي اليوم..كون تلقينا ليك فالمطار .. واش وصلك غسان ..

اشراق:دبا خليكم مني و من شكون وصلني .. شنو واقع ... مالك اكوثر اش واقع ...

بقات ساكتة مجاوباتش و شافت فايمان كتسنا منها تهضر ..

إشراق: شي وحدة فيكم دوي خلاص

ايمان: كوثر باقا كتبغي عصام و هو تزوج بمروة ..

اشراق: واش اكوثر العام لي جا نلقاك فنفس الحاجة صافي تزوج الله يسر ليه و نتي الف واحد يتمناك...عصام ماشي ديالك تستاهلي ما حسن مالك دايرا كنازة على والو واش يبغيك بسيف

ايمان: عيت ندوي و لي فراسها فراسها

إشراق: سيد تلقايه عايش مع مرتو و هي هنا جالسة تنوح عليه

هزات كوثر عينيها فاشراق حمرين و عامرين دموع قطعات ليها فقبلها... تنهدات بلاما تفكر قرباتها ليها عنقاتهاا كطبطب عليها

اشراق: لي فيها الخير غتجي تال عندك اصحبتي...مديريش فراسك هد الحالة عفاك راك كتعذبينا معاك .. مشكل كون غير كان يستاهل راه مكان بيناتكوم والو و سيد معطاك حتى امال

كوثر : عطاني ا إشراق نتوما معارفين والو

اشراق ( باستغراب ) : شنو لي معارفينش

كوثر : قبل ميوقع المشكل بيني و بين مروة .. كنت قتلكوم تبادلنا نوامر.. ديك ليلة بضبط ..(سكتات متوترة مقدراتش تكمل ) ..

اشراق قلبها غيسكت بالخلعة كتمنى متكونش كوثر دارت نفس الغلط

اشراق ( بحدة ) : شنو وقع دوي

كوثر(بتوتر كتفرك يديها) : تباوسنا

ايمان بكثرت الصدمة بقات كضحك لدرجة اشراق كاع ديك الاعصاب مشاو فاش شافت طريقة باش ايمان كضحك

كوثر ( بعصبية ) : لاش كضحكي ( شافت فكوثر )ملك سكتي راه قتليكوم عطاني امال .. و مور ديك ليلة فاش دابزت مع مروة قلب عليا مبقاش جاوبني يعني بسبابها

ايمان ( كضحك بدموع .. معرفاتش واش كوثر بهلة و لا كتبههلل و لا شنو تركيبة ديالها)

ايمان ( مقدراش تسكت بضحك ) دابا غير باسك صاف غيتزوج بيك و كيبغيك .. لا نتي صاف وصلتي ل سطاج الوحش ..

اشراق شافت ايمان مبغاتش تسكت و كوثر تقلقات و هي تدخل ..

اشراق : كوثر رجال تفكيرهم ماشي بحالنا.. راه ممكن تكون غا لحضة تشهاها و صاف واش منيتك كتبني امال من والو ..

ايمان : عرفتو شنو نساو نساو هادشي صاف سيد تزوج .. تنساه و تشوف حياتها .. (شافت فاشراق ) عاودينا نتي دابا شنو جديد .. شنو وقع تما ..

بعدات كوثر من اشراق و مسحات دموعها مي بقات مخشية فيها : واه عاودي لينا

اشراق بفرح:احم شلا حوايج يا البنات (بحماس ) نفرحكم معايا ولا بلاش؟؟

ايمان: قولي اختي اش كاين راه من شحال ما فرحنا

إشراق بحماس: انااا و اديب انتزوجووو

ايمان و كوثر: كيييفاااششش؟؟

إشراق: كيف كتسمعو

ايمان: بلاتي كيفاش درتي ليها

اشراق: تلاقينا تماا... ( و بدات كتعاود من اول ما تلاقاو تال اخر ليلة) اوى و هدشي لي وقع ..

ايمان: ناري و الله حتا فرحت ليك اخيرا بعدا وحدة فينا امورها تقادو ..

كوثر: وايه الحمد لله....اشراق نتي اكثر وحدة فينا عانات الحمد لله ربي فاجاها عليك...العقبة ليينا ..

ايمان بسهو: امميييييينن عقبال عندي..

إشراق: هاي هاي القلب عندكم طايب....كيفاش بلانك تا نتي ا ايمان؟؟؟

ايمان : معتز.....رجع دوا معاي....جا لهنا....قالك محتاجني

اشراق: كيفاش محتاجك على فينها مرتو؟؟

ايمان: هربات البارح و مزال كيقلبو عليها و ملقاوهاش

كوثر : هد عائلة الشافعي مكتسالاش من المصائب يالطيف..

ايمان: واايه و لهلا يطيح حبك عليهم ..

قلبوها البنات ضحك بيناتهم و فنفس الوقت كيحاولو يخرجو كوثر من الجو الكئيب لي دخلات ليه ..

إشراق: ويلييي نسسييتتت مدويتش مع اديب نقول ليه وصلت

ايمان: نوضي نوضي اختي دوي مع حبيب القلب

ناضت اشراق لصاكها و حيدات مود افيون لطيل... لقات لي ابيل من عند اديب و غسان....معرفات شكون تسبق واش الخدمة ولا هو.....و هي كتفكر عاود صونا تيليفونها و كان غسان ..

إشراق: سلام

غسان: صافا اشراق؟ كيف وصلتي؟

إشراق: مزيان الحمد لله....سمح لي عاد شفت تيليفوني كان طافي ..

غسان: نن هانية مهم عارفك اتكوني عيانة اتبغي ترتاحي غير بغيت نسول فيك و صاف .. فاش تسالي صفطيلي رابور ديال ديفيلي متنسايهش

اشراق: صافا مزيان لقيتيني مزالة بحوايجي غير دخلت تلهيت مع البنات .. انا شوية و نصيفطوليك

غسان : حتى تسالي على خاطرك غير متنسايش و صاف

اشراق : اه اه كون هاني منساش

غسان : شنو درنا فالعشا نفيكسيو بوغ دومان ياك

اشراق ( باحراج ) : منخليوهاش غدا و لا كافي حسن

غسان : نووو ياك قلنا لعشا سينو الى مبغيتيش با دبخوبليم .. دو بليس نتي لي وعدتني

اشراق كدورها فدماغها..كتفكر الى ساق لخبار اديب كيغادير معاه تنهدات .. من جيهة مبغاتش ضيع خاطر غسان و اصلا هو عزيز عليها و من جيها متقدرش تقولها لاديب حيت عارفاه مغيبغيش...

-حارت معرفات واش تقبل و لا ترفض ..

عند اديب

من بعد ما سالا شغالو مشا للمطار هو و اروى....الهضرة قليلة بيناتهم و كل واحد دايها فراسو ...طلعو للطيارة و من زهرو كان كل واحد بلاصتو بعيدة على الاخر...جات اديب من الجنة و الناس باش نيت يريح دماغو ...

مدة ديال الطريق و وصلو...كل واحد فيهم شد طاكسي و مشا للدارو

اديب غير دخل لدارو حط فاليز و رجع خرج مشا للصال يتلاقى مع لوكاس يقادو الأمور ديالهم و فنفس الوقت يعلمو بلي غيهبط للمغرب ...

-----

عند اشراق مور ما قطعات مع غسان رجعات صونات لاديب و لكن لقات تيليفونو طافي و عرفاتو غيكون تا هو ركب... رجعات عند البنات و لقاتهم مزال مجموعين جلسات حداهم ..

اشراق: عرفتو فييا واحد العيا منقولش ليكم

ايمان: دوزي تنعسي رتاحي غتكوني مني مشيتي و نتي كتجري ...

كوثر (كضحك) : راه العيا د الكوا هداك

إشراق: الله امسخك.. مكاين لا كوا لا والو...عرفتو شنو نوضو جمعو حوايج الحمام دوزو نكمدو عضامنا و نجيو نرتاحو فخطرة

ايمان: خلي تال غدا اصحبتي...راه مبقا والو و يظلام الحال

اشراق: مغاديش نتعطلو دغيا و عاد غدا دايرة مع غسان نتعشاو اونسوبل خاص نحيد عليا التدواش اليوم ..سينو مغاداش نلقا الوقت ..

ايمان قوسات حجبانها : كيفاش غسان؟؟ واش غتعشاو بجوج و اديب؟؟؟ فخبارو و لا لا ..

بدات كدور فعينيها : مجوبنيش و لكن غادي نقولها ليه.. ضروري نعلمو ...

ايمان: اوى هكاك باش تبعدي من صداع و مشاكل ..

اشراق بغات تبدل سيجي : يلاه يلاه نوضو جمعو حوايجكم قبل ميسد الحمام..

---

صبح الصباح و البنات كلشي صابح ناعس كاو

الوحدة د نهار و مزال كل وحدة فجهة ناعسة.....بدا تيليفون اشراق كيصوني...مدات ايديها ليه طفاتو و دارت كملات نعاسها ...

رجع كصوني مرة اخرى...حلات عين و الاخرى مسدودة و مدات ايديها هزاتو و جاوبات

إشراق بصوت ناعس: الو

اديب: على سلامتنا

سمعات صوتو و هي تنوض قافزة فبلاصتها كتحك عينيها و قالت: اديب؟؟؟

اديب: فين كنتي غابرة؟؟؟من البارح كنصوني مكتوجبيش اليوم تا هو

اشراق كتفوه: راه كنت ناعسة...جيت تلهيت مع البنات و فاش صونيت ليك لقيتو طافي...موراها مشيت للحمام و جيت عيانة نعست...

اديب: غير بشوية عليك راه غير سولت .. هانية المهم نتي بخير

اشراق: و نت بخير كيف وصلتي؟؟

اديب: مزيان الحمد لله

اشراق بهمس: توحشتك

اديب: حتا انا..مبقاش بزاف و نجي مهم فهاد لاسومين نقاد شي وراق و نهبط ..نتي شنو بخوكغام ديال اليوم

إشراق مقلوبة: والو...غير ندوز نهار مع البنات و صافي ..

اديب: اوكي...المهم خاص نقطع دابا .. نوضي نتي براكة من نعاس .. غير لقا الفرصة نصوني عليك

اشراق: وخا صاف

عند ياسمين

جالسة فوق بونجا قديمة كلها راشية و موكولة.....كدور فعينيها وسط الظلام و غير الشمع لي شاعل... فنفس الوقت كضرب برجليها فالارض كتسنا فيه...الصبر قرب يتقادا و بدات كتعصب

ناضت من بلاصتها غادا جايا و مرة مرة كتحك فجسمها بجهلالة حتا كتجرح لحمها

تحل الباب لي كان من القزدير و دخل عندها

كان راجل كلو عامر وشام و لحمو مشرط و وجهو مضروب...حوايجو نقيين وخا هكاك و كيبان مهلي فراسو وخا ساكن افبراكة

ياسمين: جبتيه ليا ياك احسينة ياك؟؟

حسينة: جبتو

ياسمين: اوى عطيني طلق دغيا

حسنية : شفتك بغيتي تزربي عليا....طلعي نعطيك

ياسمين بعصبية: واا دبا عطينييي هو لول من بعد و نشوفو شنو ندير راه خلاصك اتاخدووو واش عمرني خويت بيكم؟؟ ياك اصلا فاش جيت وصاك سيمو و قال ليك لي بغيتها عطيها ليا .. بربي ميتفاك معاك فاش يرجع..

بقا ساكت كيشوف فيها و هي كتبان بدات كتجهل....مبقاتش قادرة تحكم فراسها و محتاجة تنشوي ذاتها بجرعة منو... دماغها خزن فكرة انو بغات لادروك ...

بقات غادا جايا فبلاصتها بزربة و هو جلس فالارض كيشوف فيها

ياسمين: بلا هد خصايل ديال والو...يرحممم باااكككك احسيننةة ... عرفتي شنو هاك شد

(حيدات خاتم زواجها عطاتوليه)

حسينة : شهادا

ياسمين : خاتمي غيجيبليك تمن 10 دلخنيشات يلاه طلقني..

حسينة: عارفة راسك اتخرجي على هداك لي فكرشك؟؟

ياسمين: عارفة و دكشي كيبقا بيني و بين راسي... دبا عطيني قبببلل ما ندير شي موصيبة فراسي...اصلا شكون قال لك من لول لوح ليا دكشي لي جبت معايا ...(بجهالة) فيا غتعطيني و لا لي نديرو منقولو..

خشا اديو فجيبو و جبد خنشية صغيرة لاحها ليها و دغيا شداتها و ها خاتمك معندي مندير بيه ( حصولها فوق طبلة) ..

حسينة: هديك براكة عليك... اتاقيت فيك وجه الله خفتط تسطاي ليا هنا تجي سبتك عليا..... قدي و دوزي جمدي الارض ..

متسوقاتش لهضرتو و مشات هزات طابلة صغيرة ديال البلاستيك قرباتها للبونجة و جلسات ..

حلاتها و قادات زوج سطورة بمسطارة تما و شدات ورقة صغيرة دوراتها ..

حطات الورقة قريبة ليهم و هبطات وجهها قربات و بدات كتشم بيها .. و تنشوا

سطر مور سطر و عاد رجعات لور متكية على حيط

حسينة: شحال اتبقاي هنا؟؟ راجلك لا لقاك هنا غتخرجي على درب كلو .. مخاصنا مشاكل

ياسمين: غير يجاوبني بابلو نمشي عندو للدار...تاا نريح دماغي و نشوف شنو ندير مع معتز ..

حسينة: السيد راه ممساليش دبا و صعيب توصلي ليه

ياسمين: متخافش غادي يجاوبني... ميقدرش يشوفني معيطة ليه و ميجاوبش

--

ياسمين بدا مفغول الكوكايين كيأثر عليها....بدا فلول راسها شوية كضرها و لكن موراها بحالا مكتشكا من والو....قلبها كضرب و كتحس بالدم كجري بسرعة فذاتها و لكن عاجبها هكاك

حسينة: انا مشيت نضبر فما ناكلو..

ياسمين: هههههه متجيبش معاك لينا شي كاس زعما؟؟؟

حسينة: تكمشي شوية.. اشمن كاس نتي باغا تقلتي راسك و تلصقي فينا روح هنا....مي انا لي درتها لراسها قابل بمونتيف يدخل عندي

ناض من بلاصتو و خرج مخليها كضحك بوحدها..مراهاش فهاد العالم .. حاسة براسها فعالم خور..

ياسمين من نوع المستهتر .. ممسوقاش .. مريضة نفسانيا... غير عايشة بدون هدف ..

---

فجيها خرى ففاس و بضبط فدار عائلة اشراق .. كانت سارة كتوجد لغدا هيا و مها حتى كيسمعو الباب غيتهرس بدقان..

طارت سارة حلات باب لقات باها داخل صاعر .. كيهضر مكشكش مكتفرزش كاع هضرتو عمرها غير بزاق..

نزهة : اويلي ا سي محمد مالك داخل لا سلام لا كلام و كتغوت شواقع

محمد : جابتلي العار و ليت شفايا لناس بنت الحرام مكفاهاش شنو دارت زادت وسخاتلي سميتي و لاو شمااااااا يت يدوزو بيا كيسانهوم دالقهوة .. غنقتلها مبقيتش غير غنتبرا منها .. غلقاها و نشرب من دمها

نزهة : اشنو واقع مالك يا هاد راجل شكون هادي

محمد : ينعل نهار لي ولدت فيه البنات(شاف فسارة ) نتوما غير خطيات متصلاحو لوالو ..غير خطيات و مصيبات .. كتجيبو غير العار ..

طار عند سارة شادها من يدها مزير عليها

محمد : كنتي عارفة ياك باينة كنتي عارفة و ساترا عليها بسيف ضلي محشيا فديك شقف و متشوفيهاش و حميد مول القهوة شافها

نزهة :شكون هادي و شنو شاف هاد حميد

محمد (بلغوات) : واااااشيخة اشراق بنتك

سارة و نزهة (بصدمة) : كييييييفاش

محمد : الصلكوطة ولات شيخة فلعراسات كتشطح و تلوز(عاق بشنو قال.. استغفر الله) ناس والدين لولاد و انا والد المصيبات الله يخد فيكوم الحق لهلا يجعل نهار زوين يدوز عليكوم .. بغيت ليكوم مصيبة تهزكوم و نتمنى منكوم ..

نزهة : لدعيش فيهوم ا سي محمد سارة مدارت والو و حنا تبرينا من ديك مجحومة .. كلشي عارف هادشي .. لتفقصش راسك ..

محمد (كلس شد على راسو ) : تشوهت كلشي كينعت فيا كلشي كيهضر فيا ولد سي مختار بنتو ولات شيخة ..

سارة عيات ساكتة و هي تفركع عليهوم

سارة :كلشي بسبابكوم نتوما سبب كون كنتو واعيين ماشي هي تحرر من العداب و تجريو عليها متعرفوش واكلة متعرفوها حية و لا ميتة ... باشمن حق كتحاسبوها باشمن حق كتقولو دابا جابتلكوم العار ..

نتوما عايشين مرتاحين .. فكرتو شي نهار فيها و لا لحيرا غير جابت ليكوم العار انا بلعكس ختي كنفتاخر بيها و مكرهتش نكون بحالها ..

غير سلات هضرتها محسات حتى جبهتها تقسمات غير دارت يدها و هي تلقا دم كيسيل.. مع حنات راسها بانولها شقوفة ديال زاج فالارض

يلاه كتحاول تستوعب بلي باها شير عليها بلكاس لي حداه حتى كتحس براسها تجبدات من شعرها و مها كتقرص و تنتف فيها

نزهة :باغا تولي حتى نتي شيخة انا نوريك شيخات شنو هوما.. وليتي ترضي الهضرة على باك و صوتك يترفع انا اليوم نقتلك و نوريك القدوة كيف دايرة ..

سارة كتبكي كتحاول تفك راسها

سارة : طلقي مني ياك نتي براسك كنتي عارفاها و لات كتغني فلعراس دايرا راسك مصدومة بيدك قلتي سعادتها هربات من هاد القرينة الكحلة لي عيشينها لاش كتنافقي دابا ..

محمد غير سمع هضرة سارة و عرف بلي كانو عارفين .. سلت سمطة ديال سروال و سهل كيضرب فيهوم بجوج شركهوم .. حاس براسو تخور و تقولب...غواتهوم كيتسمع محبس حتى عيا و وجعاتو يديو..

محمد ( كينهش ) : عليا بليمين الى مزوجتك لولد عمك راني ماشي راجل ..

سارة ( كتبكي ) :و الله منديه واخا تقتلني

محمد : غتديه و بسيف على والدين.. نخليك حتى تجيبيلي شي كرش من زنقة باغيين تقتلوني عاد ترتاحو.. لي بداتو صلكوطة تكمليها نتي ..

خرج زادح الباب موراه مخليهوم فالارض كلها كتبكي على زهرها لعوج و فين طيحها...

عند اشراق كتلبس و دعي الله يكون معاها حاسا بخاطرها ديق عليها ..

كانت ساهية كتفكر فهاد الخرجة حتى قفزها صونيت طيل غير قرات سميت اديب قلبها بغا يسكت بالخلعة .. جوبات كتفتف غير بوحدها .. دغيا قطعات معاه مور مأكدات ليه بلي عيانة و باغا دوش و تنعس ... حاسة بقلبها كيضرب .. كتمنى متعاودش تكدب عليه مزال .. عارفاه مغيبغيش و مقدراتش ضيع الخاطر لغسان بالاخص مشافت منو غير الخير ...

الوقت طار .. و اشراق خلعة دنيا و دين حاسة بيها .. غير صونا طيل لقاتو غسان علماتو بلي غتهبط.. صفطات لاديب ميساج بلي غتنعس بكري .. طفات كونكسيو و خرجات مخلية لبنات كيتفرجو ...

غير هبطات لقات غسان واقف كيساينها.. تعرض ليها سلم عليها بلابيز.. غافلين على العينين لي كيشوفو فيهوم.. غير تحركو تحركات طموبيل تابعاهوم...

غسان : مالكي كتباني متوترة ملي ركبتي و نتي ساكتا..

اشراق ( كتفرك فيديها) : لا غير رجع عليا لعيا ديال سفر وصاف

غسان : غير نوصلو غيعجبك الجو مع الموسيقى و شطيح غتنشطي

اشراق (باستغراب) : كيفاش اشمن شطيح

غسان : صاحبي دار افتتاح لواحد نايت كلوب ديسكو جديد فاش كنا مسافرين و اليوم عرض عيا نجيو نقصرو عندو .. حسن نيت من ريستو ممل

اشراق ( قلبها بدا كيضرب ) :غسان و الله مقادة على شي صداع و موسيقى كتكون مجهدة و انا راسي ضارني .. غير رضني و سير نتا الى بغيتي انا غير عفيني

غسان: اشراق واش واخدا مني موقف على ديكشي لي طرا كنضن نيتي صافية مكاين لاش هاد الحساسية

اشراق تنهدات حسات براسها عيقات عليه بالاخص هو تصرفاتو محترمة و ديما كيعاملها مزيان ..

اشراق : متديش عليا غير راسي ضرني مهم الى كان عاجبك صاف نمشيو ليه معنديش مشكل ...

بقاو غادين طالقين الاغاني اشراق حولات تنسا اديب و تستمتع بالجو و قررات غير ترجع تقوليه على الخرجة و تهنى ..

طريق كانت طويلة حيت ديسكو جا فالخرجة ديال المدينة ..

غير وصلو كان صوت زدحة كيتسمع من برا ..

غير دخلو اشراق تصدمات من الاجواء .. كان عامر بناس و كلشي كيشطح.. و قوة ضواو .. جو مختلف لدرجة حسات بالخوف .. كتشوف بنات كيكميو و شيشات محطوطين .. قراعي و كيسان ديال شراب ..

شافتو جرها من يدها دارها قدامو .. قشعات شي دراري كيعيطوليه.. شد فيدها و جرها معاه .. زادو لواحد بلاصة vip كانو كليكة كالسين فكلسة بلي فوطوي مخلطين دراري و بنات .. كتشوف بنات بشيشات كيشطحو و يتعوجو فبلايصهوم على نموسيقى شرقية بدربوكا يلاه بادية...

داز غسان كيسلم على صحابو بتباتة و رزانة.. عرفهوم عليها على اساس صديقتو و خدامة معاه ... دخلو كلسو مجموعين ..

اشراق حاسة براسها تخنقات باغا غير ترجع بحالها صداع و دخان ديال شيشة خنقها.. معجبهاش الجو كاع .. حاسا بعينين دوك لبنات عليها .. كتسمع ضحكاتهوم و هضرتهوم عليها..

فجهة اخرى كان معتز مزال كيقلب عليها..لعشيا كاملة و هو كيقلب ... .قاد افيش على حسب الاختفاء ديالها و خرجو كيفرقوها على الناس و كيلصقوها فجاع البلايص باش لي شافها يعلمهم .. و دار مكافأة باش لي لقاها يعلمو ..

وصل ليل وباقي كيقلب حاس براسو تالف مخلا لا صبيطارات لا كلينيك كلشي قلب فيه

......

عند ياسمين

ناضت بثقالة من بلاصتها و حلات الباب و خرجات..استغلات فرصة انو مكاين حد ..عينيها نعسانين و مفعول الكوكايين مزال لاعب فدمها

خرجات كتمشى كتلاوح فرجليها من هنا و هنا قاصدة بلاصة وحدة .. غير وصلات لواحد الدخلة مضايقة ما بين زوج دروبة....دخلات و لقاتهم تما جالسين مع بعضياتهم حاطين قدامهم جميع انواع البليات

هز واحد فيهم راسها و نطق بصوت سكران: وا فيين اززين...على سلامتك طلقك لينا خونا .. عاش من شافك اساطا

قربات ليهم و جرات كرسي جلسات حداهم و جرات عندها كاس خاوي تما و قالت: كب كب معاك

دوا واحد اخر معاهم: ميزي بعدا.. شفتك داخلة سخونة

شافت فاول واحد دوا معاها و قالت: حسام كب بلا متفرعولي دماغي..

بدا كضحك و قال: ارا ديك القرعة اصحبي....ياسمين ديالنا....يسيق ليك الخبار سيمو يح***وينا جميع .. راه كليانا قديمة .. هيا لي فكاتنا ديك المرة فاش تشدينا..

جبد الدري قرعة و كب ليها و خداتها من عندو بنترة الكاس ..

شربات الكاس لول دقة وحدة و زادت كبات ليها كاس مور كاس

الدراري كل واحد فيهم فين مرفوع و كل واحد اش كدير ها لي كضرب الكالة ها لي ككمي جوان...و كاين لي كضرب فليكسطا

ياسمين محنية على القرعة كتشرب حتا سالاتها

هزات عينيها فحسام حمرين لي كان كبرم جوان و قالت: ارا معاك شي نترة مني تقادو

بدا كضحك و قال: هي لي متعاودش ازين نصيبو ليك واحد حنا جاع .. نهار كبير هادا لي تواضعتي كلستي معانا..

بدا كقاد فالحشيش وسط الوريقة و من سالا دورها و لصقها و مدو ليها هو و بريكة: هاكي تبرعي مع راسك

خداتو من عندو و بدات كتكمي....عينيها ولاو حمرين دم و مرة مرة كتكحب مخنوقة و لكن ممسوقاش المهم دماغها يغيب و ترضي الرغبات ديالها

بدات كتحس براسها محتاجة تشم الكوكايين...هدشي كلو كتحس بيه مكيوصلهاش للتنغيمة لي كتحس بيها فاش كتشم...جمعات شعرها الفوق و نطقات: بغيت البيضة

حسام: ايوااا الخوادرية كترتي لا؟؟؟ راه غيهربلك شوفي عينيك كي ولاو

ياسمين(سكرانة ) : عندك ارا معندكش خليني نود ن9ود نضبر على ك..ري

حسام: دوري مع دورة ي7ويوك و نتي مفوتة لادوز..... ديك ساعة اجا مفكنا من سيمو و بابلو

ياسمين: هي لا طلعتي و سكتي من الهضرة

جبد من جيبو خمسة د الخنشات صغار مدهم ليها وقال: هاكي اشكرينا و وصي علينا الباطرون .. و متنسايناش بالبينكة

بدات كضحك بفرحة بحالا معرت اش شافت و قالت: ارا ارا متخممش

بدات كتقاد فسطورة و اديها كترعدو.....بدات كتشم واحد مور واحد بلاما تريح دماغها..

يلاه بغات تحبس ترتاح بدات كتحس بالدم بدا كضخ فسرعة فجسمها...وجهها ولا حمر و كتحس بقلبها ايخرج من بلاصتو .. معدتها تقلبات.. شدات فراسها من الحريق و بدات كرشها تا هي كضرها....كتحس بيها كتقطع.....مبقاتش قادرة تصبر و هي تغوت من الحر ..

شاف فيها حسام مخلوع مفاهمش مالها: مالكي؟؟؟

شادة فكرشها كتقطع: كرشيي...ول...ولدديييي

شافو فيها الدراري مخلوعين....ناضو من بلاصتهم كتمايلو مقادرنيش اوقفو مفهمينش شنو كتقول كيشوفوها كتقيا و تلوا بلوجع ..

حسام ( مبوق ) : كيفاش ولدك منين جا فينو

ياسمين هبطات لارض كتلوى بلحريق و كتقيا ..

لباقي غير شافوها طاحت فالارض بداو شي كيدخل فشي غادين هربانين...ناض عندها حسام معارف ما يدير تالف

حسام: شواقع اzبي....مالللكييي

ياسمين(كتقطع) : مقادراااش....

يتبع...