عمر كشوف فيه مصدوم و فنفس الوقت نتر محمد الجوا من يدو و قال بعصبية : انا معندي بنات ها راجلها تفاهم معاه انا تبريت منها ..
جا غادي كيسب غير بوحدو : يخليكم بالخلا التريكة الناقصة متخليش حد يرتاح
عمر ( شافو غادي ) : عمي ساين نمشي معاك
مشا غادي كزرب فالمشية ديالو و تبعو عمر مخلين الراجل موراهم كيضحك غا بوحدو ... جبد تيليفوني و صيفط مسياج كعلم فيه بلي دار لي مطلوب منو عاد زاد غادي بحالو
فالداخلة
جالسين كلهم فالجردة برا كفكرو فشنو يديرو
ايمان: وا من صباح و نتوما دويو و مزال مختاريتو
مروة: وايه ختارو خلاص و لا نطلعو نعسو حسن لينا
عصام: من نهار عرفتك و نتي غير ناعسة واش مكتعيايش من نعاس؟
ايمان: بعد من البنت خليها فخاطرها
مروة جمعات فمها بشكل طفولي و قالت : قوليها ليه
بدا كضحك عصام عليها و جرها عندو عنقها و نطق: لا كنتي عيانة و باغا تنعسي نطلعو لاشموبغ
مروة: لا ماشي مشكل نصبر
قاطعهم معتز: اش بان ليكم نهبطو للبحر نكريو يخت و مورها قاش نساليو نهبطو للمدينة ندورو
بالنسبة لدارنا مكيهمنيش رأيهوم حيت صاف غسلت يدي عليهوم .. و زيد انا لي غنتزوج ماشي هوما و انا لي عارف شنو باغي و مبقيتش دري صغير باش عاد ناسنا شوارهوم.. من شحال هادي و انا مستقل عليهوم و عايش بوحدي فمكاين لاش تفكري بزاف .. عاد متنسايش حنا غنسكنو بحدنا يعني خاص نهمك انا ميهمكش حد خور..
اشراق : معرفتش و الله زيد مع هاد ضروف و موت ياسمين و حنا تزوجنا حتى حد محضر (حنات راسها بحزن)
اديب : شوفي فيا علاش مقلقة دابا الى على دارنا راه قتلك كوني هانيا مالكي شنو كاين تاني
اشراق(دموع تغرغروليها) : خفت كوثر و مينة يبقا فيهوم الحال حيت تزوجنا بلا خبارهوم
اديب : حنا راه مدرنا والو و نتي معليك والو .. راه براسنا تفاجئنا و الى على مينة انا راه كنت داير نخطب من عندها غير راكي شفتي ضروف
اشراق (كتبكي ) : توحشتها بزاف .. ملي جيت تلهيت عليها .. حتى من طيل قليل فين كنهضرو ..
متصورش شحال كنبغيها .. هي المرأة لي حضناتني و دخلاتني لبيتها وخا مكتعرفنيش...دخلاتني من الزنقة و وقفات معاي كون ما هي منوصلش تال هدشي لي انا فيه دبا و كون راني ملاوحة من قنت لقنت... و بفضلها تلاقينا ...عطاتني الحنان لي ملقيتوش فمي...تلهيت عليها و مبقيتش شفتها حاجة مور حاجة تا مابقتيش سولت فيها....كون حضرات كانت اتفرح بزاف لينا و متخلي مدير.. ديما كانت كتقولي الله يحضرني فعرسك و نبقا عايشا حتى نشوف وليداتك..
اديب : متبكيش منبغيش دموعك يهبطو....غير نرجعو نمشيو عندها و ضوروي نعاودو حفلة اخرى و يكون كلشي حاضر و يكون عرس على حقو و طريقو... هانتي كتشوفي كلشي على غفلة و غير فاجئونا راه حتى حد معندو علاش يتقلق..
اشراق : عرفتي و الله حتى خفت يمشيو يتقلقو بالاخص كوثر حساسة بزاف
اديب : وراه ختي و مجاتش ا إشراق واش حنا كنا عارفين .. راه خاص يفرحوليك ماشي لعكس
اديب : حتى نرجعو و عاودي عيطي ليها .. دابا نساي و استمتعي بالجو.. منبغي حتى حاجة تنكدها عليك..
فكازا ..
جالسة و كضرب برجليها فالارض معصبة و كتسنا فيه...من ديما كدير ليها هكا مبقات عرفاتو واش كديرها بلعاني ولا مكقصدش
يلاه جات ناوية تنوض حتا شافتو داخل
توجه لعندها و سلم عليها بلا بيز و قال: ديزولي تعطلت عليك..جلسي
خنزرات فيه اروى و جلسات : جيتي بكري لاش معدب راسك
عيط السيرفور و طلب قهوة عاد دار شاف فيها و لقاها اطرطق بالفقصة
اركان: بشوية عليك مالك معصبة
اروى: عرفتي كون مكانت حاجتي بيك مكمتش نجلس معاك دقيقة هنا
ضحك و نطق: تانا احاجتي لي مجلساني معاك
اروى: من لخر اندخل للمفيد
اركان : هي لا درتيها من الصباح
اروى:مهم اشراق و اديب قريب يتفارقو
اركان: باش عرفتيها؟
اروى: لي خاصك تعرف هو وخا يبغييو يكملو مع بعضياتهم ميمكنش...يعني اديب ايولي ليا....نتا من جهة مزيانة ليك حيت جزء من عائلة الشافعي ايضمر و ايبعد...و انا لي ايلقاني جنبو و انكون معاه تا يولي ديالي
اركان: و كيفاش درتي هدشي؟
اروى: ياك قلت لك خلي هدشي على حسابي تا الا مصدقش ندوزو لخطتك...اوى انا خطتي اتنجح و تكمل و ديك ساعة كلشي ايتحط قدامك و اتعرف اش وقع
اركان: اشراق...اشراق مقربتيش ليها ياك؟؟
اروى بغضب: واش موكلاكم مخ ضبع ولا شنو لي داز اشراق اشراق كلشي خايف عليها شكون هي
اركان بصرامة: بلاما تبداي تهزي و تحطي..... و متنسايش راني معاونك بالفلوس و كنعطيك تقادي بلاناتك لي مقايلاهمش بشرط اشراق تخليها عليك فالتقار و متآذيهاش....بربي و نلقاك لعبتيها خايبة منعقلش عليك ..
اروى: هد الهضرة حفظتها( وقفات) انا غادا ربحو باشراق ديالكم و راه مدرت لها والو (بهمس ) عاد ناوية ...
عند عمر مشا غادي كيزرب باش يلحق على محمد
عمر : عمي محمد عمي محمد وقف وقف
محمد ( بحدة) : مالنا شواقع
عمر (برجاء) : بغيتك تمشي معاي نرجع مرتي
محمد (بتعفرر) : ممساليش لمرا و رضيتهالك دابا شغلك هداك
جا غادي و عمر تابعو
عمر : عمي راه اشراق كتخاف منك و الى شافتك مغديش تعكس معانا دغيا غدي تزيد و متقدرش تهرب
عمر: واااا عمي غير كمل على خيرك و يالاه كلشي على حسابي
محمد (بحدة) : شحال تخلص
عمر : شنو نخلص
محمد (عصبو ) : نتا ممعاك هضرة .. زاد غادي بحالو
عمر تابعو: صاف اعمي لتقلقش غير اجي و نتفاهم
محمد(وقف) : اسمع اولد حبيبة تحط 30 الف مرحبا ينقص ريال متعرفني منعرفك(جا غادي)
عمر : صاف صاف غير متكعاش جاتك
محمد: يلاه قطع لكار صباح بكري نشدو طريق ...
عند اديب ...
دوزو نهار مجموعين كل ضحك و نشاط .. كل كوبل عايش الحياة .. حاسين كانهوم ملكو الدنيا و السعادة تفرقات عليهوم .. سالاو لي اكتيفيطي و طلعو دوشو و جمعو حوايجهوم حيت جا الوقت لي يرجعو بحالهوم .. حاملين فقلوبهم دكرايات و مشاعر حب ..
معتز : صافي منسيتو والو
عصام : لا لا كولشي هو هداك
ايمان : الى واجدين يلاه بحرا نمشيو
مروة : وي بصح مبقاش الوقت
اديب : كنت باغي ندوزو نشوف واحد سيدا ساعة مشا الحال
معتز : شكون هادي
اديب : انسة المجدي Arwa El Majdi راها ساكنة نيت هنا فداخلة ..
عصام: اه عرفتها مبقاش الوقت دابا غير يلاه مرة خرا و نسلمو عليها..
معتز :يلاه بحرا لحقو طيارة ...
خرجو كاملين متوجهين لمطار .. ايمان و اشراق كلسو شي حدا شي و عصام موراهوم هو و مروة .. خالقين جو كيهضرو و يضحكو .. معتز و اديب كلسو بجوج .. كل واحد ساهي فقنت حتى كسر معتز ديك سكون ..
معتز : عمري كرهتك بلعكس كنت و باقي معزتك متصورهاش.. جا واحد الوقت و عماني طمع و عجبني نكون شاد كولشي بيدي لكن عمري كرهتك بلعكس شجعتك و عاونتك بلا متعرف .. مكنقوليكش هادشي باش نبينليك راسي مزيان مي بغيت الا مور بيناتنا تقاد و الخاطر يصفا
اديب ( بثباث) : الخاطر صافي من جيهتي و الماضي دفنتو مشا مع ختنا دونك غير نسا و ملي زوجيني انا و اشراق راه احسن حاجا درتي و بينتي بيها حسن نية ديالك..
معتز : هو بصح مشا معاها مي راه خاصك تفهم علاش انا درت هكاك
اديب : معتز شوف و الله مكيهمني صافي وقع لي وقع دابا كلها كيقاد حياتو بلا منجبدو ضواصا لقدام
معتز : ياسمين كانت مصاحبا مع الوليد هي لي كانت كضور بيه
اديب (بصدمة) : كييييييفاااااش...
معتز بدا كيعاودليه القصة من اللول .. عاودليه على المذكرة و انو البنت ماشي بنتو... كاع لي كان عارفو عاودو ليه ..
اديب ممتيقش شنو كيسمع مقادرش يستوعب كيفاش ديك المرة كاملة و مقدرش يعرف شنو واقع .. دابا عاد بدا كيربط الاحداث و فهم باه علاش معارضش و علاش كلشي وافق على زواج معتز و ياسمين
عند كوثر
غير خرج سيف مشا للكلينيك.. بقات كوثر ساهية كتفكر.. كتحس برأسها عيانة ومهدودة وحتى لاغيگل ماثرا على نفسيتها..
هزات تيلي لي كانت دارتو فشارج من بعد ..تكات فبلاصتها حتى كتسمع تيلي مسكتش من كثرت لي ميساج ..
غير هزاتو لقات بزاف ديال لي ابيل من عند ايمان و اشراق وميساجات بداو كيوصلو .. دخلات لواتساب حتى كتفاجى بكثرة الصور ولي فيديو والفوكالات . .. ممتيقاش شنو كتشوف مقدراش تستوعب.. عقلها حبس عينيها خرجو بصدمة تصاور زواج اشراق .. خلاو عقلها مقادرش يستوعب كتحس براسها كتحلم
اسئلة كتيرة كضور فراسها كيفاش تزوجات و علاش مفراسهاش كيفاش عطاتهوم خاطرهوم يوجدو هادشي و هي اخر من يعلم ... كتشوف فتصاور ضاحكين .. باينا الفرحة من عينيهوم.... بقات كدوز فالتصاور و الدموع كيغشيو عينيها .. حاسا بالعافية شاعلا فقلبها ... فكرة انو اشراق صافي تزوجات مدخلاتش ليها لراس .. مع قلبات تصاور و هي تقشع وحدا فيها عصام و مروة معانقين باينين مور تصويرت اشراق ...
بلا شعور ناضت جاهلة كتشير فالحوايج و تهرس و تقلب
كوثر ( صاعرة) : علاااااااااش هي ماشي اناااااا باش حسن مني علاااااااااش انا ممنحقيش نعيش .. علاش ممحقيش نحب و نتحب علاش لي نبغيه ميبغيني .. ياك هي غير مطلقة و مخلات ت79بين مخلات والو... الى على لكوا راه كان كيكويها بلاش علاااااش تزوجها علاش ... علاش الصلكوطات كلشي كتصدق ليهوم و انا لا .. بقات كضرب و تعيش فراسها كاع لحوايج هرساتهوم كتحاول تبرد النار لي شاعلة فيها
طارت وقفات حدا مراية كتشوف فاراسها ... شعرها منتوف حالتها حالة دموع هباطين عينيها حومر وجها صفر.. محملاتش راسها كرهات راسها و حياتها .. دخلات فواحد الهستيرية لي جا قدامها كتلوحو.. الغضب والغيرة و الحقد عماو عينيها... فكرة وحدة كضور فبالها هي تموت و ترتاح من هاد العداب لي حاسة بيه .. ترتاح من هاد العيشة لي عايشاها...
جات عينها على موس دلحسانة هرساتو حتى خرج زيزوار من بلاصتو.. شداتو بديها كيرجفو .. عينيها معمين مكتقشعش قدامها والو بلا عقل ضربات يدها حتى طوش دم ...
عند عمر الفرحة مسايعاهش يضور و يفرنس غير تفارق مع محمد مشا كيتقدا و يوجد مخلا مشرا .. داخل كيعيط من الباب ..
عمر(كيعيط بجهد) : كريمة الوليدة فينكوم
كريمة : امالنا على هاد لغوات ( قشعات التقدية لي شرا خرجو عينيها) كيطرا و جرا حتا مقضي كيف ناس
عمر : اليوم انا فرحان ... شدي هاد الخير دخليه
شاف مو جايا بالكروسة كتقاتل معاها باش توصل
حبيبة : مالك اولدي شنو واقع لاش كتغوت
عمر (الفرحة غتخرج من عينيه) : غدا عيد عندي غدا الحفلة داير صداقة عيطو كاع حبابكوم و صحابكوم عرضو لجيران بغيت كلشي يعرف غدا عندي عيد
كريمة ( دارت يديها على جنبها ) : امالك اولد حبيبة منين جاك هاد الكرم و نت ولدك سبوع هو اللخر مدرتيه ليه
عمر : غناني الله هانتي غدا حسبيه سبوع صدقة حسبيه لي بغيتي مهم وجدي و حمريلي وجهي .. شوية و يوصل الباقي .
.
حبيبة : الله يا ربي حمدتك و شكرتك حيت شفت الفرحة فعينين ولدي
عمر ( تحنا عند مو باس ليها راسها ) : من اليوم مكاين غير الافراح
كريمة : هادشي ديالك معاجبني الله يعميهاليك
عمر ( غادي عندها كيفرنس ) : مالك ا كريريمة راه نتي لولة خاص تفرحي شكون بحالك
كريمة :هاد الكرم لي جاك جاني فشكل... الله يخرج هادشي بيخير وعلى خير... يعلم الله شنو راك ناوي دير ..
احيانا ماشي كاع لي كنتمناوه و نحلمو بيه كنحصلو عليه .. شي مرات كنتعلقو بأحلام و نتشبتو بيها و حنا معندناش فيها خير .. كنبقاو مصممين عليها و متشبتين و كنفلتو الفرص لي كدوز بلا منحسو بيهوم ..
هادشي لي وقع لكوثر تشبتات بحاجة غيرها غافلة على سيف و نضرات الاعجاب لي كيشوفها بيهوم ..
بقات واقفة كتشوف فالدم كيسيل .. بكل برود تحركات خارجة من دوش .. كتشوف فالاعصار لي دارت .. حاسة بودنيها كيصفرو .. هزات طيل كتشوف فتصاورهوم ضحكات بمرارة .. الارض و لات كلها نقاطي ديال دم .. واخا جرحة مقاصتش العرق و مكانتش غارقا بزاف ..
ناضت بسيف كتلوح رجليها .. دازت هزات شال عقداتو على يدها بدات كتحس بالدنيا كدور بيها .. بانت ليها فاليز ديالها ..حلاتها بدات كتلوح حوايجها و السخفة شاداها .. كتخدم غير اليد صحيحة .. سمعات طيل كيصوني ناضت كتجر رجليها هزاتو شافت سيف كيصوني بقات شحال ساهية فسميتو.. كيدوز فبالها كاع اللحضات لي جمعاتهوم ... نهار غوت عليها .. نهار ضربها .. نهار وقف معاها .. نهار كانو راجعين.. نهار طيب ليها .. تنهدات شافتو رجع صونا .. جاوباتو و الدنيا كضور بيها
سيف : كوثر كيف بقيتي .. كنصونيليك مكتجاوبيش
كوثر (حاسة بسخفة شادها) : كنت ناعسا
سيف : مال صوتك بسيف باش كتهضري واش مريضة واش باقي فيك الحريق
كوثر : سيف
سيف(باستغراب ) : وي كوثر شنو واقع
كوثر : اشراق تزوجات (ضحكات بمرارة) و عرسات و انا مصفطين ليا تصاور
سيف (ملقا ميقول ) : شوفي كوثر تقدري تكوني غالطة و فاهما غلط هانتي انا غنجي عندك و نهضرو صافي
كوثر : مكاين لاش اخرتك دير بحالهوم و تعطيني بضهر ولفت لكن جا الوقت لي نساكوم كيف ما نسيتوني.. جا الوقت لي نمحيكوم من حياتي حيت متستاهلوش
سيف (عرفها ماشي حتى لهيه ) :واخا شوفي نتي رتاحي دابا شوية و نكون عندك ...
قطعات عليه مجوباتوش ..
عند سارة ..
كل نهار كتسنى امتى تلاقا بختها كتخيل كيف غتكون رد فعلها .. اكيد غتفرح و تفاجئ .. كان ساهية مبتسمة غير بوحدها حتى سمعات غفران كتعيط ليها ..
غفران: سارة سارة اجي ابنتي شربي اتاي
سارة (بابتسامة بريئة) : هانا خالتي
غفران : قالي غسان مبقا والو و ترجع ختك
سارة ( بحماس ) : اه غدا و لا بعدو تكون جات ( شدات فيدها بحماس ) متصوريش شحال فرحانة
غفران (بفرحة) : فرحت ليك و الله (جمعات ضحكتها)
اجي متقوليليش غير تجي ختك غتمشي
سارة : هو غنمشي مي راه غنبقا نجي نشوفك
غفران ( تنهدات): مكرهتكش تبقاي عمرتي عليا دار و ونستيني هانتي كتشوفي غسان مكيساليش تابع غير الخدمة و الصفقات .. حتى من حياتو هملها معرفتش امتى غيدير عقلو و يكمل دينو الى 30 عام راه دارها قرانو ولدو لولاد و هو باقي .. و انا لعمر مغيساينيش اليوم هاني حاضرة غدا لا ..
سارة : متقوليش هكا مزال ان شاء الله لعمر طويل و تشوفي ولاد و لادو و يعمرو عليك دار
غفران : اودي ولدي حنين نخاف دور بيه شي لفعة تقلبو عليا .. انا مكرهتش نزوجو على يدي .. ساعة هو غير نجبدلو حس زواج يتهرب..
سارة : شتي نهار يبغي و يقرر يتزوج راه هو غيجي عندك و يقوليك ها البنت لي بغيت .. غير خليه على خاطرو .. هاحنا بنات و راكي شفتي كون مهربتش كون راه حياتي و لات جحيم .. مبقيناش فزمان الواليدين يزوجو دابا الدنيا تقدمات و كلشي وعا ...
غفران : عندك صح هادشي لي كاين غير كنهضرو و صاف اما المكتاب معرفناه فين يوصلنا غير هو خاصو تاني يدير زواج فراسو راه كيبالي ممسوقش
داخل غسان كيضحك .. كان واقف سمع هضرتهوم..
غسان (كيطنز) : لالة غفران شكون قالك ممسوقش
غفران :قفزتيني امتى جيتي
غسان : فاش بديتو كتهضرو فيا
غفران : و محشمتيش كتصنت علينا ..
غسان (كيضح) :و محشمتوش كتهضرو فيا ..
غفران : قتليك صح مالي كدبت عليك راه بصح خاصك تنوض تزوج
غسان (كيضحك شاد فيها ) : هاهي حداك الى وافقات نوض من دابا .. يلاه قنعيها
طرطقات فيه سارة عينيها غطرطق بالحشمة صدمها بضحكو
غفران : بقا كضحك عليا تما انا ندوي معاك و نت كضحك .. واخا صراحة و الله منكره سارة تكون عروستي لعرس لمخير نديرو (شافت فسارة ) يلاه شنو كلتي نوضي نديروهاليه قد فمو
سارة (كضحك باحراج) : اويلي اخالتي راه غاكيطنز عليك (خرجات فيه عينيها) غسان
غسان (شاد فيها) :شنو غسان هي بغات تزوجني و بغات عروسة نقولها لا راه معندي منين نجيب ليها هاد العروسة اللهوما نتي حاضرا
غفران: ضحك اولد كرشي انا لي دايرا فيك راسك نوض نصلي حسن لي ...
عند عمر مقدرش يصبر حتى لغدا ناض مشا كيدق على محمد
محمد : امالنا على هاد دقان تقول كتسالني لكرا
عمر : زيد اعمي راني قطعت نص ساعة و يقلع بحرا نلحقو
محمد (بحدة ) : معندي فين نمشي درت معاك على ود غدا ماشي اليوم
عمر : واغير زيد اعمي غدا نجيو بحالنا راني موجد صداقة باش نستقبل اشراق
محمد : ممساليش انا باش نمشي معاك اليوم
تنهد عمر فهمو مد يدو لجيب طلع 200 درهم مدهاليه
محمد : غير حيت نسيبي اما انا منضربش معاك ضربة و نسمح فشغلي
عمر :عارف عارف غير يلاه
تحركو مور مخدا محمد الفلوس و شدو طريق لكازا..
عند دراري وصلو .. كانت الوجهة لفيلا .. حتى من عصام و مروة مخلاوهومش يمشيو على اساس يكملو سهرة مجموعين و غدا كلها يمشي لدارو ..
غير وصلو لقاوهوم مجموعين حتى من اروى كانت تما مجمعة مع كنزة و هناء .. غير دخلو و هوما يقشعو اديب شاد فيدين اشراق .. اروى زيرات على يدها بعصبية .. ناضت هناء سلمات عليهوم اما كنزة غير كتشوف فيهوم محملاتش لا ايمان و لا اشراق
كنزة : زعما مخليتولي منقول .. مخلين الكنازة و الناس كيجيو و مشيتو دايعين تقول معندكوم شغال
معتز : لالة كنزة كنقولو على سلامتكوم
كنزة : يكما كنتو فالحج و مفراسيش
اديب : الوليدة عاد دخلنا واقيلة ..خلينا غير نرتاحو
خنزرات فيهوم دارت رجل على رجل و دارت جيهت اروى ..
دخلو كلسو فصالون اديب مطلقش من يد اشراق .. بقاو دراري كيهضرو بعينيهوم.. باش يعلنو زواج اديب .. غمز معتز اديب باش يبدا
اشراق : اديب طلق منها واش باغي تقتلها و تكمل حياتك فالحبس طلق من الخنز
طلق اديب من اروى زادحها مع الارض مخليها كطلع نفس بصعوبة.. تحنات عندها هناء كتعاونها.. غير توكدات شوية طلعاتها لفوق و هبطات هي ..
كنزة : كولشي من تحت راسك ا اللفعة ضرتي على ولادي كليتيلهوم دماغ الله ياخد فيك الحق
اشراق : ها هو حداك مضربتوش على يديه مراهش صغيور بغينا بعضياتنا تزوجنا شنو فيها ..
كنزة : واش عارفاه ولد من هو .. خاصو يدي بنت القاع و الباع ماشي وحدة مطلقة و شيخة مخلات لمن شطحات
معتز(عصباتو) : الوليدة متخلينيش نغلط فيك .. و نفتحو ضواصا القدام .. سيدة بغاتو و بغاها شنو يتسناو.. خليهوم يعيشو الحياة لاش غتوقفيلهوم فطريقهوم..
خنزرات فيه كنزة عرفاتو شنو كيقصد .. تجاهلات هضرتو و دارت عند اديب
كنزة : انا مموافقاش على هاد زواج
اديب (صعراتو) : وكاع لاتوافقي هي 16 ..مالي جاي نشاورك راه غير عالماك اما زواج راه تزوجنا و سالينا ..
كنزة : طول عمرك مسخوط نوض خرج عليا من داري دي عليا شياطة لي جايب
اشراق كلمة شياطة دخلات لقلبها بحال الموس حاسة بالدل و الحكرة حاسة براسها بحال شي وحدة بلا قيمة ... جات طلق من يد اديب لكن زاد زير عليها
اديب : بغيتي غير نخرجو ليها نيشان ايوا معجبك حال نطحي راسك و دار با مخارجش منها .. حتى تكون عندك شي دار و تلقايني كالس فيها عاد جري عليا و مرتي ماشي شياطة .. بغيتي مرحبا مبغيتيش مرحبا ..
كنزة ممتيقاش ودنيها ميمكنش ولدها اديب يقول هاد الهضرة.. ممتيقاش انو كاع ديك الحريق و الوجع لي توجعات عليه و السهير لي صهراتو جا دابا داز فيها على ود وحدة يلاه عرفها ..
معتز غمض عينيه عرف خوه وصلات بيه لطوب و مو اجاب مسكتها..
كنزة (دموع تجمعو فعينيها) : حملت و تعدبت ولدتك و ربيتك حنيت عليك و طبطبت عليك باش فتالي اولد كرشي تقول هاد الكلام .. باش فتالي تنهط فيا على ود وحدة يلاه عرفتيها
اديب (مسح على وجهو بعصبية ): بلا قوة دراما شوفي نتي شنو مخرجة على فمك راه مرتي هادي عرفتي شنو هي مرتي شرفي لي سبها راه سبني انا .. ميمكنش نشوفك كتغلطي فيها و نسكت ليه و لو تكوني نتي..
اشراق : صافي غير خليها يلاه نمشيو منهنا عافاك
اديب (كيتكي على الحروف) : معندنا فين نمشيو هادي دار با وواجب على كل واحد يحتارم
كنزة كلسات مصدومة دموع كيهبطو ممتيقاش ولدها دار فيها ممتيقاش شنو كتسمع..
تدخل معتز مور مشاف القضية كبرات و مو عزات عليه ..
كنزة من النوع لي مفشش كانت هي الكل فالكل واخا كتكون غالطة مكيقدروش يواجهوها و لا يقلقوها .. كيحاولو ما امكن يديروليها خاطرها كيعاملوها بحال شي بنيتة صغيرة .. شي لي خلاها طغا و تفرض السلطة ديالها لدرجة زادت فيه ..
معتز : نقصي شوية من هادشي ديالك راه ممسلكش خلينا نعيشو حياتنا .. راه عينا من هادشي .. بسبابك راني عشت لويل و ضحيت على ودك و سمحت فالبنت لي كنبغي دابا مغانعاودش الغلطة .. دابا جا الوقت لي نعيش حياتي مع البنت لي كنبغي
خرج مخليها غطرطق حاسة بولادها ضاعو منها ..
مع وصل عليهوم لقاهوم مجموعين كيهضرو ..
عصام : زيدو نمشيو لعندنا هاد ليلة تما نهضرو
اديب : من الاحسن كلها يمشي لدارو معنديش لكانة لهضرها
معتز : منيتك اصحبي درنا باش نكملو سهرة غا هو البلاصة غنبدلوها و صاف ..
اديب : غا عفيني معندي كانة
معتز : مكاين لا عفيني لا والو زيد نخرجو نتعشاو فشي قنت .. مغنقبل حتر اعتراض شوف غا حالة اشراق تخرج تفوج مع البنات ..
تنهد .. كيشوفها كتبكي و البنات كيسكتوها محملش لبلان انو بكات بسباب هضرة لي هي اصلا حياتها كاملة هاربا منها.. مشا قاصدها جرها من يدها حضنها عندو زادت كتنخص حسات بالحكرة مرضااش شنو فيها الى كانت مطلقة واش طول حياتها هاد اللقب غيعيش معاها واش طول حياتها غتعاير بيه..
بقا شحال معاها كيهدنها مسح دموعها
اديب : من حدي عايش معاش لي يبكيك اخر مرة نشوف دموعك مفهوم
حركات ليه راسها ..
معتز : يلاه نمشيو انا راه جعت
مروة : حتى انا
ايمان : خلاها عصام فين عمرك مكانش فيك جوع ..
معتز : يلاه زيدو نمشيو ...
يلاه جاو يركبو باش يمشيو و هوما يسمعو صطافيط دايل البوليس داخلة ..
دراري مفهمو والو شي كيشوف فشي .. غير هبطو كيشوفو لبوليس جاينين جيهتهوم .. يلاه كيحاولو يستوعبو شنو واقع و اشراق تحلو عينيها فاش شافتهوم هابطين من طاكسي جاين مع لبوليس قاصدينهوم ...
بوليسي : شكون فيكوم اديب الشافعي ..
كلشي ضارو كيشوفو فاديب ..
اديب : انا هو علاش
البوليسي : نتا متهم باعتداء على انسة أروى
اديب (معصب و زادو) : شمن اعتداء
البوليسي : تفضل معانا لكوميسارية تما عطي اقوالك
معتز : واقيلة واقع شي غلط .. اروى صديقة العائلة و راها لداخل مع الام و الاخت ديالي
البوليسي : سيدة اروى راها حاليا فالطبيب تحت العناية
اديب : كيييفااااش
# فلاش باك
غير طلعاتها هناء لفوق باش ترتاح .. رجععات النفس بصعوبة حاسة براسها باقا مخنوقة .. كاسمع غواتهوم واصل حتى لعندها ..
هبطات كتسلت خرجات من باب الكوزية دازت على جردة غير وصلات لبرا .. بقات كتصوني و تعاود لاركان ساعة مجاوبهاش .. دوزات نمرت واحد خونا كتعرفو من زهرها كان قريب جا هزها
اروى (باقا شاداها الخنقة كدوي بسيف ) : وقف هنا جيهت الغابة لي قريبة
مهدي (باستغراب ) : شنو واقع
اروى : نفد و سكت ..
غير وصلو نزلات و تبعها
اروى : ضربني
مهدي (خرج فيها عينيه) : كيييفااش
اروى : قتليك ضربني
مهدي : واش منيتك
مع كملها جمعات بونية عطاتهاليه ل نيفو حتى داخ
بديك الحر ديال دقة جمع معاها بصقلة حتى دار وجها .. بقا على ديك الحالة حتى ولات حالتها كلها دم وحنكها تنفخ..
غير وصلات لنتيجة لي بغات .. شداتها ديريكت لكلينيك تما علمات البوليس
# نهاية فلاش
البوليسي : تفضل معانا بلا مشاكل اي حاجة عندك قولها فالكوميسرية تما مقيدين محضر
اديب (جعر ) : اشمن محضر و لا زمر
تدخل معتز عرف خوه غيزيدو معاه غير شوية غيدوز فلحزاق كامل .. جر الكوميسير لجنب كيحاول يتفاهم معاه
معتز : بون باين واقع شي سوء تفاهم .. غنحلو الموضوع و انا كنضمن ليك غنجيو لعندكوم الى سمحتي مكاين لاش يمشي معاكوم و صحافة خاصها غير متكتب
البوليسي : موسيو شافعي نتا عارف مزيان القوانين ميمكنش نمشيو بلا ميكون راه جا امر من وكيل الملك الاخت عندها معارف صحاح
معتز ( تنهد عرف اروى مسهلاش ) : بون نتا عارف السمعة ديالنا مخصهاش توسخ بالاخص بشي حاجة تافها بحال هادي عطيني واحد 15 مينيت و نتبعوكوم واخا ( غمزو)
البوليسي : لي نقدر ندير هو نساينكوم قادو مسائل خرجو و نتبعكوم غيرو منقدرش
معتز :واخا غير هو دوي معاهوم مجاتش تبقاو واقفين هكا فباب ..
---
عند اشراق حاسة براسها مضهشرا مقدراش تيق عينيها .. لدرجة ودنيها كيصفرو مقدراش تسمع شنو كيتقال حداها .. عينيها على الطاكسي لي حابسا و عمر و باها جاين قاصدينهوم
اشراق (كتمتم بخوف الدموع كيهبطو ) : ادييييب
اديب (دار شاف فيها ) : مواقع والو تكالماي .. غنمشي نشوف شنو واقع (شاف فمعتز و عصام ) مرتي امانة عندكوم
اشراق ( الخوف قاتلها ) :اديب بابا ( كتشهق ) و عمر
اديب حتى سمعها عاد هز راسو لجيهت الباب كيشوفهوم جاين.. كمش عينيه بعصبية
اديب : هادشي لي كان ناقص
ايمان : واش طليقك ياك
اديب : غير سمع طليقها حس بالدم كيغلي
اشراق كلشي تجمع عليها هزات راسها باه حتى كتسمع غوات عمر قفزها..
عمر (بلغوات) :اشرااااااااااق
اشراق صافي شوية دشجاعة مبقاتش كتشوف اديب لي غتحاما فيه واقع فمشكل .. حاسة بالدنيا كضور بيها ..
محمد (بحقد كيشوف فاشراق ): اخيييراااا طحتي بين يدي
عمر مشا قاصدها بكل شجاعة باغي يجرها من حدا اديب .. مجا فين يحط يديه حتا كان اديب شدليه يديه لواها و دخل فيه براس .. مزيرليه على يديه حتى عمر زعزع دار بغواتو مور مفدعليه اديب يديه ... نزل عليه اديب ببونية لنيف مخلاش فيه
محمد (بتحدي ) : واش كتحلم سيدة راها مزوجة و عمر هو راجلها و بيدي زوجتهاليه
نطقات اشراق بحدة : مراااجليش ديك شماااااتا مراجليش... واش انا هربت منكوم باش تبعدني هنا
محمد : راجلك و بسيف عليك و دابا غتزيدي قدامي
عصام : وا حريرة هادي الله يخرج طرح على خير
ايمان : اديب اليوم يقتل شي حد
مشا الكوميسير طلب دعم عرف البيادق لي معاه مغنفعوهش دار لعندهوم
كوميسير :نتوما بجوج الى فاتكوم منتسماش..
دار غادي جيهت اديب ناوي على خزيت
كوميسير : شواقع هنا كيفاش كل واحد كيقول مرتي ..
اديب (مسح على وجهو حاس براسو غيحماق ..) : هاد zaاامل مهجم عليا فداري و على مرتي هز ال9وواد حسن منقتلو
عمر كيحاول ينوض حاس بيدو تهرسات: كيكدب اشراق مرتي بشرع و القانون .. حشا يدو صحيحة فالجيب كيجبد عقد زواج .. مدو ل كوميسير
عمر : هاهو اسيدي راه جيت نرجع مرتي لي خطفوها
كلشي خرجو عينيهوم فاش شافوه جبد العقد ..
اديب شوية دلعقل لي عندو غيطير غير كيسمعو كيقول مرتي كيبغي يطير عليه .. طار نتر ديك الورقة من يديه غير قراها عقلو وقف .. كيحس بالقلب ديالو كيضرب .. ضغط دم طلع مبقاش كيقشع قدامو .. اكيد كاين شي غلط .. كيحس برجليه بردو مقادرش يوقف ..
---
عند سيف غير وصل بقا كيضق حاس بقلبو غيسكت عارف كوثر نفسيتها مضمرة عارفها مريضة الاكتئاب الاحباط .. كلشي تجمع كيضق بحال شي حمق .. مرتاح حتى فتحات الباب .. طار معنقها كيقلب فيها بخوف..
سيف : كوثر خلعتيني عليك (كيقلب فيها بعينيه )
كوثر واقفا بحال شي جماد جسد بلا روح..
كوثر: باراكا متشفق عليا
جات عاطياه بضهر غادا و هو يقشع الشال على يدها عاد رد البال ليها فيها دم و حوايجها و حالتها ..
جرها من كتفها غير ضارت ركز عينيه فوجها كتبان مريضة وجها صفر
سيف (بعطف ) : مكنشفقش عليك ا كوثر انا باغيك تخرجي من هاد الحالة باغيك تعيشي حياتك و تشبتي بالحياة حيت نتي باقا صغيرة وباقي تجاوزي هادشي
سيف تجاهل كلامها مد يدو لشال حيدو .. خرجو عينيه من ضربة واخا كتبان مغارقاش لكن غير مجرد فكرات ضرب يدها الى انو فكرة الانتحار كضور فبالها و هادشي لي كان خايف منو
سيف :كوثر
قاطعاتو جرات يدها:سيف سير بحالك .. كلكوم بحال بحال ( دموع تجمعو فعينيها) كتعطيو الاهتمام الحب و الحنان فتالي كتمشيو .. من واليديا ماتو و خلاوني .. مينة اشراق عصام ايمان و دابا جات نوبتك غيوصل وقت و تمشي اللهم سير دابا قبل منزيد نتعلق و نولف اهتمامك
سيف : حتى حد مخلاك حتى حد مغيخليك
هزات كوثر عينيها فيه مجموعين فيهوم دموع كتشوف فعينيه كتقلب على نضرات شفقة ..
يلاه جات تمشي حتى حسات براسها تجرات من خصرها تضربات مع صدرو
كوثر : علاش مبغيتيش تمشي شنو باغي مني
سيف :باغيك نتي
يلاه كتستوعب حتى كتحس بشنايفو سخان فوق شنايفها.. كيبوسها مغمض عينيه .. ختالط ريقها بريقو شي لي خلاه يزيد يتعمق كتر فالقبلة ... كانو كيبين ليها انو مكيشفقش عليها كانو كيعطيها رسالة مشفرة خاصها تفهمها.. تفهم سبب اهتمامو بيها ...
عند اديب عينيه غير على عقد نكاح .. حاس براسو فشي حلم و مقادرش يفيق منو .. ممتيقش عينيه .. كيترعد كلو بالاعصاب ..
داز فيهوم معتز جا حداه نترليه الورقة و اول حاجة دار كيتاكد واش ممزوراش .. غير قرا رد البال انو زواج لوكالة .. ضرب على تاريخ لقاه مور زواج اديب و اشراق تنهد بارتياح .. حط يديه على كتف اديب ..
معتز : تهدن حفرو الحفرة و طاحو فيها .. زواجهم باطل
اديب ( جاعر) :وامتقولش زواجهم وراه مرتي هاديك لي كتقول مزوجة واش على خر يامي مرتي تزوج عليا
طريق كانت قصيرة لكن على اشراق طويلة .. غير نزلو دخلو اديب يحققو معاه فقضية اروى .. و اشراق رفعات دعوة على عمر و باها .. و خداو كل واحد يحققو معاه ..
معتز و عصام تكلفو بالمحامي اول حاجة دار هي طلب ليهوم الكامرات ديال دار.. و طلب شهود...
عند عمر الخلعة قاتلاه طول حياتو كيخاف من المخزن و كيترعد منو .. مع سولوه سرسب ليهوم كلشي و قلب كلشي على محمد ..
محمد نكر بلي هو لي قتارح زواج و انو خدا فلوس فالمقابل .. بلعكس قال بلي عمر لي ضغط عليه و تفاهم مع العدول .. هو فقط استعمل لوكالة بعد مخدا الموافقة من اشراق ..
صدمة كانت قوية فاش عرفوها تزوجات .. محمد حس بالخطر ديال هادشي لي دار كيحاول ما امكن يبرأ راسو لدرجة حاول يغرق اشراق و قال بلي هي كانت موافقة على زواجها بعمر .. و هي لي طلبات منو يزوجها بلوكالة ..
اشراق كان واضح انو مفراسها والو قدم المحامي العقد ديالهوم لي كان سابق مع تصاور العرس كدليل انو زواجهوم كان برضاهوم و هكا تبتو انو زواج اشراق و عمر باطل و وقع فيه تلاعب شي لي خلاهوم يحولوهوم لمحكمة لانو القضية فيها التزوير و النصب و الاحتيال ..
عند اروى صونات لاركان علماتو بلي راها فكلينيك عاودات ليه على زواج اشراق و اديب و الخطة لي دارت باش تفرقهوم ...
فديك الوقت كان اركان واقف حدى فيلة شافعي .. كيفكر و يعاود واش يدخل و لا لا مزال معندوش الجرأة يتواجده عارف بلي جا الوقت لي كلشي غيبان فيه .. و غير ملي عيط ليه المحامي الا انو كاينا شي حاجة ..
تنهد هبط مور مقطع مع اروى.. بلا ميعطي رأيو فديكشي مخليها كدوي بحدها حتى سالات و قطع عليها ...
مع دخل كيسمع لغوات و صداع .. صوت هناء و كنزة كيتسمع من التحت .. زاد دخل عيا يشوف واش كاين شي حد لتحت مبانليه حد .. طلع تابع صوت حتى وقف ورا الباب
هناء : صاف اماما نساي الماضي واش غتبقاي كل مرة جابداه راه غير غتخسري ولادك هكا
كنزة ( بحرقة): واش مكتشوفيش نفس السيناريو كيتعاود كيفو كيف باه واش ملقا غير شيخة مطلقة ..
هناء : ماما متبقايش تقارني ماشي حيت بابا كان تزوج عليك بشيخة صاف تكرهي كلشي .. لبنت دابا راها خدامة فدار الازياء و قارية وواعية .. مكيهمش واش خدمات شي وقت شيخة و لا لا كيهم دابا انو ولدك كيبغيها و تزوجو
كنزة : كتبقا شيخة ملقطة ممعروفش اصلها شكون هي
.. ماهي من مستوانا و لا طبقتنا.. عمري نقبل بيها ..
هناء :ماما هكا غادي تخسري ولادك يكفي معتز كنتي فرقتيه على ايمان بحجة انو باها لي عرفو على ديك شيخة واخا راه لا علاقة ديكشي .. باطل حرمتيهوم و راكي شفتي نتيجة ولدك عمرو عاش فرحان مع ياسمين ..
كنزة : وراه باها سباب كون ما هو محمد كاع ميمشي ديك ليلة و يتعرف عليها هو ليكان كيلاقيهوم و زين ليه حتى داها
شهوة ملاكم الجزء 20
محتوى القصة
التنقل بين الأجزاء