شهوة ملاكم الجزء 22

عند ايمان خلات اشراق نعسات و هبطات عند معتز .. كان واقف كيساينها غير وصلات خداها فحضنو كيستنشق ريحتها.. كيحس براسو عيان و مسخسخ دوز نهار طويل و عامر مشاكل و صداع راس ..

معتز (باس يدها) : توحشتك

ايمان (بحب ) :حتا انا

ركبو بجوج غاديين ساكتين حتا حد مهضر .. ايمان كتشوف فيه عيان و ساهي مقدراتش تهضر.. بقاو غير غاديين حتى وقفو حدى البحر ..

معتز : غدا غيخرج اديب

ايمان (بفرحة ):بصح صافي

معتز : وي بقاو اجرائات و صاف باش ينسد المحضر

ايمان : واش لقاو دليل برائتو

معتز : عيطولي قبيلة ..اروى غيرات اقوالها على اساس غير كيشبه ليه ماشي هو ..

ايمان : واش لعب هادا راه خاصو يرفع عليها دعوة

معتز : ميرفع ما والو .. نحمدو الله موصلاتش صحافة سيد خاصو يرجع لهيه تابعو تدريب و يقاد حياتو دابا راه عندو مسؤولية خاص يفكر فمستقبالو مغيبقاش تابع اروى و مشاكلها

ايمان : خاصها تعاقب راه ممكن تعاود

معتز : شتي كوني اكيدة ميمكنش اروى تنساحب غير هكاك و نزيدك قطعات بيي راجعا بحالها اسبانيا

ايمان (بصدمة) : اكيد شي حد هددها و لا دوا معاها .. زعما تكون هناء

معتز : حتى انا شكيت فهناء لكن تاكدت انو مخرجات من دار دونك ماشي هي

ايمان : و شكون غيكون ...

معتز :ميهمش نساي .. المهم هو يخرج و نتهناو من صداع الراس

ايمان : و بابات اشراق شغا يوقع

معتز (تنهد) : راه فطبيب ناعس .. عيطو لمرتو قبيلة علموها

ايمان ( حلات عينيها) : كيفاش فطبيب... اشراق مفراسهاش

معتز : براسي عاد عرفت مور مخرجات من عندو اشراق جاتو ازمة قلبية و داوه

ايمان :و شنو غيوقع لييه

معتز : غيحكمو عليه فكاع الاحوال

ايمان : و عمر

معتز : كنضن غير كفالة و يخرج متبت عليه والو بالعكس زاد غرق محمد و قلب عليه كلشي على اساس هو براسو نصب عليه

ايمان (تنهدات):مشاكل مكيتقاضاوش

معتز :عيت و الله مكرهتش نبات منصبح حنا .. زيد غدا كولو مسطوكي بالاجتماعات ماعندي فين نحك راسي

ايمان (بحزن) : مغاتمشيش معاي لعند جنى

معتز: فينو الوقت ا إيمان راه نتي براسك خاصك ترجعي الخدمة .. كلشي ترون عصام و مروة كونجي.. انا مبقيت ركزت فالخدمة نتي نفس الشي كلشي تجمع

ايمان(بعناد) :بلا متغوت انا اصلا كنت قدمت استقالتي و حتى دابا منوياش نرجع .. غنبدا بروجي انا و اشراق

معتز :اشمن بروجي و كيفاش مغترجعيش ....

ايمان : مالها كيف جاتك و اصلا لاش غنرجع انا كرهت هاد لمدينة

معتز (بعصبية) :ايمان مغنكتروش فالهضرة ديري حتى 100 بروجي مي هنا حداي ماشي غتكوني نتي فشرق و انا فالغرب

ايمان: متبقاش تغوت عليا و الى معصب برد عصبيتك فجيها خرى ..

نزلات لتخات الباب وقفات اونفاص لبحر كيضرب فيها الهوا كتحاول تجمع راسها و مطيح حتى دمعة .. نهار كامل كتسناه يسالي و يدوزو وقت بجوج .. فتالي ملي جا و هو معصب كيفكر فالخدمة و المشاكل

معتز تنهد كيحاول يكالمي راسو حاس براسو كيستحمل فوق طاقتو .. حتى كيقول رتاح و غيعيش مرتاح حتى كيخرجليه شي حاجة من جنب .. كيفكر فخوه عارف مغيدوزهاش بالساهل لعمر و خايف عليه يتهور و يغفلو ..

تنهد كيشوف فيها واقفا شعرها كيديه الريح عارف راسو مقصر فحقها و حتى هي عانات و عيات و حتى لامتى غتساينو و تبقا حياتها مخربقة .. حاس بيها باغا تزيد القدام و ترتب حياتها ..

عارف ايمان ماشي منوع لي غير طالقها تسرح و كتفكر و كتخدم عقلها مزيان .. لدرجة مزال مقدرش يتقبل موضوع جنى و كيهرب منو حيت حاس براسو ممستعدش دابا و فاهم مزيان الى رفض ممكن تخلى عليه حيت شاف غريزة الامومة تحركات عندها و كان واضح من كلامها انو قررات و مقتانعة بقرارها سواء وافق و لا لا ..

حل الباب هبط عندها .. غير حسات بيه مسحات دموعها لي خانوها كتحاول متبينش ضعفها و تبقا ديك البنت القوية لي حتى حاجة متأثر فيها ..

تحرك معتز موقف غير موراها حضنها من ضهرها حاط راسو على كتفها مزيرها عندو

معتز (بهمس) : سمحيلي مقصدش ..

ايمان بقات ساهية فالبحر مجاوباتوش.. لدرجة خلاتو يشك واش مسمعاتوش .. دورها لعندو شادها من خصرها عايق بيها كتفادا تشوف فعينيه .. هز راسها لعندو ممخليهاش تهرب...حط جبهتو فوق جبهتها و دوا بصوت حنين

معتز : كنبغيك

كلمة من 6 دلحروف كانت كافيا تخلي ايمان تبتاسم بحب .. مرات قليلة لي عتارف بيها شي لي كيخليها كلمة مميزة عندها ..

كانت ساهية فيه بحب كتحس بانفاسو كيضربو فيها غمضات عينيها مور محسات بشفايفو خداو شفايفها جامعاهوم قبلة حنينة عكس المشاعر لي كيحسوها بجوج .. كانت قبلة للي رفعاتهم لعالم خاص بيهم غي هما مبقاو حاسين بحتى حاجة من المحيط الخارجي ..

كل واحد فيهم كيحاول يتفنن باش يبنين بللي حبو هو اكبر واعمق .. معارفينش بلي كون مكانت النسبة متساوية ميوصلوش لهاد النيفو.. و انو حب الطفولة كبر معاهوم ورغم كاع الضروف مقدروش ينساو بعضياتهوم او يتخلاو على مشاعرهم

اضطرو يفصلو القبلة واخا مكرهوش ان شفايفهم يبقاو متلاحمين لابد ولاكن قانون الطبيعة متيرحمش حاجتهم للاكسجين بززات عليهم يتفرقو باش ياخدو نفس ..

عند غسان طريق كلها و هو شاد فسارة على موضوع زواج شي لي خلاها تطلقات معاه و مبقاتش غير ساكتا ..

غسان: دابا قل من 10 دلمليون متنقصيش مصتدقتيش يا ختي مبغيتي لتحني فيا ديري غير بوجه غفران

سارة (كضحك ) : مكتقداش مشيت معاك فالضحك ندمتيني اسيدي 10 10 من الحاجة و 10 دلمليون و شوف تشوف واش نقبل

غسان (ساهي فضحكتها) : غا حلمي اصلا غير نقولها لاشراق تقولي ديها بلا صداق غا هنيني من صداعها ..

سارة : ياك ا سيدي اجي عمري سولتك كنشوف علاقتك باشراق زوينة عمرك قلتيلي كيفاش تلاقيتو

غسان باغكا طوموبيل نزلي و نهضرو واخا ماشي شي قصة هي جات عن طريق واحد معرفة و صاف ..

سارة دورات عينيها فلبلاصة ..

سارة (باستغراب ) : قلتي غنعشاو مبالي ريستو

غسان ( كيضحك) : انا قمشاش و دراهم يومي معدودة يا لالة الى تخلصي علينا نديك ريستو

سارة (كضحك) : غا ختار مع راسك ريستو المخير تعشا فيه اخرتنا نغسلو الماعن و هاحنا سالكين شغايطرا كاع

نزل غسان من طوموبيل كيضحك ..

شخصية سارة عجباتو و جاتو على الكانة متواضعة و ضحوكية و اهم حاجة عفوية خاطرها البروطوكولاات و لا كترت الحسابات كتحس بيها إنسانة طبيعية و عادية باغا غير تعيش مرتاحة و هانية .. مكتفكرش فغدا بلعكس باغا غير تستمتع باللحضة

غسان (مد ليها يدو) : اجي معاي

ترددات باش تشد فيدو لكن فالاخير شداتها كضحك حتى بانو غمازات ديالها شي لي خلا غسان يبتاسم بلا شعور ..

سارة : فين غنمشيو

غسان هانتي غتشوفي

هبطو مع دريجات قلال حتى بانو بزاف ديال الفلوكات صغار كانو تابعين لمطعم خاص بالاكلات البحرية ..

سارة : ياكما عوال نحركو بهاد فلوكات انا غير عشيني و سير فين بغيتي

غسان : لا غنديك حتى لوسط لبحر و نلوحك فالبحر نخلي الحوت يتعشا بيك

سارة : و تسخا بيا ديك ساعة اشراق تقطعك طراف طراف

غسان: و هو منسخاش بهاد زين كامل ياكلو الحوت

يلاه بغات تجاوبو و قاطعهوم راجل كبير لي غير شاف غسان خرج كيرحب بيه ...

مبارك : نهار كبير هادا مرحبا مرحبا زارتنا البراكة

غسان : عمي مبارك كيف بقيتي ترحب بيك الجنة

مبارك : الحمدالله اولدي اجيو اجيو ... كيف العادة ياك

غسان:اه فبلاصة المعلومة ..

جر غسان سارة لي كانت ساهية فيهوم ... كتشوف غسان شخصية مسالمة و طيب مع كلشي لدرجة كلشي كيبغيه .. كيتعامل بتواضع و ضحوكي.. دابا عاد فهمات علاش رانيا ديك النهار كانت كتشكرو حيت بصح هو شخص كيستاهل ...

تحركو لواحد طبلة كانت بسيطة مصنوعة من لخشب و عليها ناب زرقة و وورد بيض فالوسط .. محطوط حداها قريعات صغار ديال ملحة و كامون... غير كلسو مشا مبارك يجيب ليهوم ماكلة و بقات سارة ساهية كتشوف فالبحر و كتستنشق ريحتو ..

غسان : واخا يباليك مطعم بسيط لكن عندو اجود انواع الحوت .. عاد عمي مبارك ديكشي عندو نقي و جديد

سارة : بلعكس هاد البلاصة كتحس فيها بالامان و الدفئ

غسان: عمي مبارك ملي كانت فعمرو 15 عام و هو خدام هنا فاش توفا الاب ديالو خلاليه هاد دار كانت غير صغيرة و بالقزدير ... خدم و تعب و شرا البقعة لي حداها كان يلاه تزوج شوية بشوية قدرو يبنيوها..

خدمو بجوج و بداو غير بكاسكروطات ديال الحوت شوية خداو كروسة كانو كيديرو المأكولات الخفيفة شلادات معقودة بحال هكا .. مرتو وقفات معاه كانو كيخدمو ليل و نهار حتى قلبوها شواية .. مكاينش لي مكانش ياكل و يعاود .. لحد الان عييت نسولهوم على الوصفة السحرية ديال البنة لي كتكون فالحوت حدو كيضحك و كيقولي الحب .. شوية بشوية قدرو يقادو هاد البلاصة .. و بالصبر و التعاون نجح ليهوم المشروع و لاو معروفين فهاد المنطقة ...

سارة (بابتسامة) :قصتهوم زوينة بزاف اكيد كانو كيبغيو بعضياتهوم بزاف

غسان : تماما لحد ساعة باقي ديك الحب جامعهوم و لو مرض غير واحد فيهوم حتى تاني كيمرض عندهوم واحد الارتباط روحاني خطير كيقدرو يحسو ببعضياتهوم و كيفهمو بعضياتهوم غير بالعينين.. عرفتي واخا ربي معطاهومش لولاد الا انو عمرهوم حسسو بعضهوم بنقص او خلاو الموضوع يأثر على علاقتهوم ..

سارة : قليل فين تبقا بحال هاد الحب لي كيكون مبني على صح الحب و الوفاء و الاخلاص

قاطعهوم مبارك لي كان جاب الشلاضة و الحوت ..

مبارك : فاش كيكون تفاهم و المودة و القناعة و الصبر كوني اكيدة انو الزواج غينجح و غيقدرو يكملو بجوج

خاص يكونو بجوج كيفكرو فبعضياتهم .. مكاينش حسابات و القلوب كتكون صافية و اكيد النية الحسنة .. (بتاسم و حط الاطباق ) بصحتكوم

مشا مخليهوم ساهيين فيه بالاخص سارة هضرتو كتعاود فودنها.. تنهدات كتقارن بينو و بين باها فرق شاسع

غسان : كولي قبل ميبرد ...

هاد ليلة كانت هادئة نوعا ما .. كلها فاش كيفكر و كلها فاش عقلو مشغول و القلوب عالم بيها غير الله ..

جا صباح لي حامل احداث كثيرة .. عند عصام كلشي فاف بكري .. غير فطرو خرجو شادين طريق عند اديب .. مع وصلو لقاو معتز تما ..

اشراق : معتز شنو واش باقي مخرج

معتز : كيديرو اجراءات روتينية شوية و يبالك

عصام ( قشعو ): ها هو

اشراق غير دارت شافتو عينيها تغرغرو بدموع بقات جامدة بلاصتها مقدراتش تقرب كتشوف معتز و عصام مشاو كيسلمو عليه .. هي بحالي دنيا وقفات بقات فبلاصتها ..

اديب غير شافها عرفها غيكونو هاد الاحداث اثرو عليها .. زاد قاصدها غير وصل حداها ترجمات فحضنو كتبكي و تشهق بحال شي بنيتة صغيرة كانت خايفة و تالفة و اخيرا لقات الامان ..

اديب (كيدوز يديه على شعرها) : تهدني شووو انا هنا

اشراق (كتشهق) خفت بزاف متقدرش تخرج خفت بزاف نبقا بوحدي و نتحرم منك

اديب ( كيمسح دموعها):انا هنا معندك مناش تخافي .. كلشي غيولي مزيان ..

عصام(كيطنز) : با اديب على سلامتك بصحتك شهر العسل

ضربو لضهرو : باز غا حشمت من مرتك اما نعطيك جوابك

معتز : بعد من صداع و المشاكل شو مرتك غطيح بالخلعة

اديب (بتخنزير) :ديك ولد الكلبة خرج و لا باقي

اشراق (بحدة) : اديب مخاصني مشاكل انا هربت من دارنا باش نعيش هانيا ماشي حتى تجمعنا و نبقاو كل مرة كنجريو موراك فالكوميساريات يخرج و لا يكلس مسوقناش

معتز :عندها صح ماشي ديما كتسلك جرة هاد مرة بقا تجمع يديك عندك

اديب :مزال ديك بنت الكلبة لا فاتها نوريها الاعتداء شكايسوا

معتز (بعصبية) : اديب لخرى مشات بحالها قلب 6 9 و شوف حياتك شوية

عصام شاف الجو توتر كيحاول يخفف: صافي نساو علينا هادشي .. شبالكوم ندوزو النهار مجموعين

ايمان: انا غير عفيوني خاص نمشي عند جنى

مروة : حتى انا عندي موعد مع طبيبة مي نقدر ناجل

معتز :خليو فليل انا عارض عليكوم .. دابا اديب خاصو يرتاح و انا عندي شي اجتماعات .. عصام خاص تمشي مع مرتك .. دونك بيناتنا طيل فلعشية نتجمعو

عصام : صاف حتى هادا بلان ..

اشراق (كدوي بشوية مع ايمان ) : متمشيش معاي عند كوثر .. اديب عيان خاصو يرتاح

ايمان: الى متعطليش مخصنيش نتعطل على جنى عندها لعشية حصة

اشراق: لا كوني هانيا غير نسالي معاه نصونيليك .. هادشي الا صلاحلي

اشراق الوجهة كانت دار اديب غير دخلو وجدات ليه دوش كان عيان ديال بصح ليل كولو مناعسش .. يلاه خرج مدوش و هو يوصلو ميساج غير شافو خرج عينيه دار كيشوف فاشراق كتوجدليه حوايجو .. معرف ميقول اصلا معندوش دماغ لي يهضر .. جاوب على لميساج و داز كيهز حوايجو باش يلبس

عند اشراق كانت ساهيا فالحوايج حتى سمعات طيل كيصوني .. لقاتو غسان

غسان: شي ناس غير تزوجو نساونا

اشراق ( كضحك و عينيها على اديب كتفادا تشوف فيه حاسة بيه حاضيها) : لا لا كندوز شهر العسل(كضحك) حقا مجابتهاش المناسبة شكرا بزاف على كلشي

غسان : تستاهلي كل الخير سمعت بلي جيتو

اشراق : اه ياكما عيطتي على ود الخدمة ( باحراج) راه باقي معرفت شنو غندير

غسان(كيطنز) : لا لا اصلا لقيت البديل نتي صافاستغنيت عن خدماتك

اشراق (كضحك) : غا بصحة اسيدي

غسان : بجدية اديب حداك ياك

اشراق ( باستغراب ) : اه علاش

غسان(تالف معرف شنو يقول ): الوليدة عارضا عليكوم لغدا و مغنقبل حتى اعتراض

اشراق (بتوتر ) : خليها لنهار خور راك عارف مع سفر باقيين عيانين

غسان: منقبل حتى اعتراد

اشراق كتشوف فاديب كتسناه يقول شي حاجة

اشراق : غير عفينا و الله نهار خور ان شاء الله و نجيو

غسان: مغنقبل حتى اعتراض عندي ليك مفاجاة غتعجبك

اشراق (ملقات متقول ) : نشوف مع اديب و رد عليك

اديب(بتعب) : نرتاح و نمشيو معنديش مشكل

غسان : سمعتو هضر شنو قال

اشراق :صاف وقيتا دلغدا نكونو عندك

غير قطعات بالها اديب تكا مغمض عينيه ..

ناضت بالخف هبطات ريدو ضلمات البيت خلات غير شوية ديال الضو كيبان .. مشات حيدات حوايجها .. دازت لحوايجو بالها تيشورط ديالو هزاتو لبساتو .. جمعات شعرها و غسالات وجها.. غير رجعات لقاتو ناعس على كرشو ..

دازت بالخف هزات واحد كريم كان عندها .. مشات طلعات فوق ضهرو بلا مدوي .. عونها حيد تيشورط و تكا مغمض عينيه .. هزات طيل دارت musique relaxante غير بدات خوات شوية دلكريم فوق ضهرو و بدات كدير ليه مساج شي لي خلاه يترخا مستمتع بالجو ..

اشراق و اديب علاقتهوم فاتت الكلام دوزو بزاف و حاربو باش قدرو يتجمعو و لاو كيفهمو بعضهوم بلا ميهضرو ... بقات كتماصي ضهرو بكل حنان حتى حسات بيه رتاح .. يلاه بغات طفي الموسيقى قاطعها

اديب ( صوت مبحوح) :غير خليها و اجي ..

نفدات الطلب ديالو و دازت جنبو غير تكات تقلب حاشيها فحضنو حاط راسو على سدرها مغمض عينيه..

عند مروة و عصام الحماس كان عندهوم طالع كيف لا و اليوم غيعرفو جنس الجنين .. عصام كان متشوق بزاف مطلقش من يد مروة الابتسامة مفرقاتش وجهو غير دخلو سولاتها طبيبة اسئلة روتينية و دازو لبلاصة الفحص ..

طبيبة : علاش ماجيتيش لاخر موعد كان عندك

مروة : كنت مسافرا مصلاحش نجي

طبيبة : على العموم اليوم نتاكد من واحد الحاجة

عصام (باستغراب ) : ياك لاباس

مروة (بخوف) :واش واقعا شي حاجة

طبيبة ( بابتسامة) : لا لا متخلعيش انا دابا غنتأك..

دارت لجيل على كرشها و بدات كدوز و عينين مروة و عصام عليها .. بقات شحال ساهية شوية بتاسمات..

طبيبة : مدام مروة شنو بغيتي بنوتة و لا وليد

مروة : لي جا مرحبا بيه مي مكرهتش بنوتة ..

عصام (شاف فمروة بحب و باس يدها ) : الى تكون كتشبه ليك موافق

طبيبة :على هاد الحساب خوها غيبدا يغير من دابا

عصام (مفهمش ) :واش عندنا بنت

طبيبة ضحكات خدمات صوت دقات القلب و هوما يبداو يتسمعو جوج

عصام : واش جوج و لا غير ودني كيصفرو

مروة عينيها تغرغرو بدموع :لا حتى انا كنسمع جوج

طبيبة : مبروك عليكوم عندكوم توينز بنت و دري

عصام صدمة خلاتو غير كيضحك ممتيقش شنو كيسمع .. مروة مكنتش قل منو مقدراتش تشد دموعها .. كانو دموع الفرح و الخوف باش تكون حاملة بتوينز شيحاجة كبيرة .. شعور مختالف كتحس بجوج دالارواح كتكبر وسطك..

تحنا عصام كيبوسها فراسها (بحب ) : شكرا حيت عطيتيني احسن هدية فهاد دنيا شكرا حيت ربي عوضني بيك ..

ناضت طبيبة مور معطاتها كلينيكس باش تمسح ل جيل و طلبات منهوم باش يجيو عندها لبيرو ... غير سلاو عطاتها تعليمات لي تبع و شي تحاليل .. وصاتها ترد البال مع الحلاوة باش متصابش بسكر الحوامل ..

شكروها و خرجو و الفرحة غامراهوم ..

هزات طيل مروة عيطات لماماها علماتها شي لي خلاها غطير بالفرحة عصام دوز نمرت اديب لقاه يلاه فايق من نعاس .. علمو بدورو شي لي فرح اديب و بارك ليهوم .. دارو باش يتلاقاو فليل كيف تافقو .. مروة غير سالات مع ايمان صونات ليها لقاتها باقي عند جنى .. علمات عصام و شدو طريق لعندها ..

عند اشراق غير فاقو علمها اديب بموضوع توام شي لي خلاها طير بالفرحة ..

اشراق (بفرحة ) : فرحت ليهوم و الله يستاهلو الله يثبت حملها يا ربي

اديب : امين عقبال عندنا

اشراق( بتوتر ) :باقي شوية الحال

اديب ( خنزر ) : علاش بسلامة

اشراق (كتلف) : باقيين صغار

اديب : دوي على راسك انا باغي ولادي يكبرو معاي

اشراق : وا منبعد و نهضرو زيد نخرجو تعطلنا على ناس

شاف فيها اديب تنهد عارف شي حاجة كضور ليها فبالها .. دار عين ميكة مبغاش يحكر واخا محملش كيفاش رافضا فكرة لولاد بلا متناقشو ..

طول الطريق و هوما ساكتين دازو خداو بوكي دفلوغ و طاغط دخلوها فيديهوم .. نعتات ليه اشراق دار شي لي معجبوش انو ديجا عارفاها يعني اكيد راه فايتا جات لعندو كمش يديه بعصبية مباغيش يدوي دابا

اشراق (كتحاول تكسر ديك السكات) : مالك ساكت

اديب (بنفخة) : ماماليش

اشراق : كيف طرا حتى وافقتي نتغداو عند غسان بالاخص راه ساعة ديال طريق

اديب : سيد معيط و عاد بفضلو تزوجنا حشومة ترضيهاليه فوجهو

اشراق (كضحك) :مقلت والو انا ملك معصب ..

اديب :ممعصبش ..

جمعات اشراق ضحكة كتشوفو تقلب غير بوحدو هزات طيل كتسيفط دي ميساج لكوثر و كتصوني مكتجاوبهاش ..

----

عند سارة حاسة بقلبها كيضرب متشوقة بزاف

غسان : تقولي غير جايين فيك الخطاب و باز

غفران ( كضحك) : بعد من البنت و نت ملي صبح الحال شاد فيها

سارة : ياك شفتي اخالتي ولدك حاكر عليا

غسان :مالي كدبت عليك ملي فقتي و نتي مخلوعة غا بوحدك

سارة :سميتو الحماس ماشي الخلعة

يلاه جا يجاوبها سمعو دقان .. مشا غسان و غفران حلو الباب بقات سارة كتسمع صوت ختها كدوي مع غسان.. جاها احساس فشكل ...

غسان (كيسلم على اديب لي باين عليه جاي بسيف ) : مبروك عليكوم

اديب :الله يبارك فيك عقبال عندك

غفران : كون غير يسمع منك

اشراق(كضحك) : نوضي اخالتي نزوجوه

غسان : دخلو متبقاوش واقفين فالباب ...

‎غير جاو داخلين مع هزات عينيها وقفات مبلوكية ممتيقاش اش كتشوف....تبلوكات ما فاهمة والو كيفاش جات هنا و كيفاش وصلات و داخلة وسط دار غسان‎

العقل وقف مقدراش تيق عينيها ... ختها البنت صغيرة لي عوناتها باش هربات .. البنت لي رباتها على يدها .. البنت لي من نهار هربات و هي كتفكر فيها و قلبها عليها ها هي اليوم حداها قدام عينيها ..

مستوعبات حتى حسات بسارة طارت معنقاها .. لا سارة و لا اشراق قدرو يحبسو دموعهوم لدرجة بكاو حتى غفران معاهوم واحد المنضر كيخليك تاثر بسيف عليك ..

اشراق (بلهفة و دموعها كيهبطو كدوي و تشهق ) :هادي نتي ياك مكنحلمش .. (شادة وجه سارة بيدها كتبوسها بلهفة)

سارة (حالتها مكانتش قبل من حالة اشراق كلها كترجف ) :اه اختي انا جيت هربت و تبعتك...

اشراق (باقا ممتيقاش عينيها) : متصوريش شحال توحشتك .. و شحال فكرت فيك لي كان مصبرني كنت عارفاك كتقراي مغيقدروش يديروليك مدارو فيا

سارة ( كتشهق) : دارو مكتر اختي على انا غير جيت و هربت

غفران(شافت اديب باقي واقف ) :دخلو و كلسو متبقاوش واقفين

غسان: اه اديب دخل مرحبا بيك

اشراق :شنو وقع كيفاش دارو مكتر (خنزرات و دوات بحدة ) متقوليليش حتى نتي زوجك بالوكالة ..

سارة (حركات راسها بلا ) : كانو بغاو يزوجوني و هربت (بدات كتبكي و تشهق )

اشراق تنهدات كل مرة حتى كتقول قلبها يحن و كيزيد يكحال من جيهتو بدات كدوز يديها على ضهرها و كطبطب عليها

اشراق : صافي مسحي دموعك من دابا الفوق انا معاك مغيوقع والو.. اصلا هو راه فالحبس

سارة (تصدمات ) : كيفاش فالحبس

غسان (باستغراب قاطعهوم): واش باك فالحبس

اشراق (تنهدات ) : كنحشم نقول راه بابا .. (بدات كتعاود ليهوم القصة )

سارة (مصدومة):دابا نتي تزوجتي جوج رجال

اديب (محملش راسو دوا بحدة حتى قفزهوم) : واش هاداك يتحسب زواج راه انا لي راجلها

غسان (عرفو تعصب مرضاش كيحاول يرطب ) : اشمن زواج راه كلشي مزور .. اخرتو يدوز حياتو فالحبس

غفران : كاين شي نوع ديال الاباء الله يهديهوم و صاف

(شافت فاشراق ) واخا هكاك كيبقا باك مجاتش تخليه فالحبس

اشراق :انا معندي يخلصو الله لي عليا وكلت ليه محامي من تم الهيه يعوم بحرو مكنعرفوش

غسان :واخا هكاك راه غيتحكم لقليلة واحد 3 سنين

اشراق: دابا كنفكر فماما فاش تعرف

اديب :غيكونو علموها البارح

سارة : انا بعدا كرهتهوم بجوج الام لي متحن فيك متراعيليك واش ام

اشراق (تنهدات ):كتبقا الام ديالنا ولداتنا و سهرات علينا راه غير ديك 9 شهور دلعاداب دالحمل و حريق الولادة تشفع ليها

سارة (بعصبية ): انا ما عندي واليدين صافي دفنتهوم موراي ... باز لقلبك ياك هي نيت لي مخلاتش فيك بلعصا حدا باب المحكمة غير حيت طلقتي و لا نسيتي

اشراق :راه الجهل السبب كون كانت واعية و قارية كانت غتقبل فكرة طلاق و تجيها عادي .. راه عاضراها حيت كبرات فمجتمع جاهل شنو كتنتاضري منها دير

غفران : ختك عندها صح راه شحال من ام كتبقا متشبتا بافكارها و عاداتها و لو تحاولي ديري و تقولي لي قلتي مغتقنعش حيت كيكونو متشبتين بافكارهوم و راه الى يومنا هادا كينين امهات يفضلو بناتهوم يعيشو فالعداب و مترجعش ليها مطلقة..

سارة : شتي واخا يكون قلبها حجر مديرش ديكشي لي دارتو فيا واش كاين شي ام كتعرض بنتها بحال شي سلعة رخيصة

اشراق زيرات على عينيها تفكرات نفس الموقف كانت دازت منو نهار خطبوها العمر و جات مو اول مرة

اشراق: دابا نساي الماضي اهم حاجة نتي هنا و معانا و من دابا الفوق كلشي غيتقاد

سارة( ببكاء ) : عافاك اختي مترضينيش عندها و الله منصبر نرجع نعيش معاها

اشراق (تفتحو عينيها بصدمة): واش منيتك انا قلت حتى لقيتك لاش غنرضك

سارة (كتشهق) :خفت الى تقولي دابا بابا فالحبس نرجع نعيش معاها (دارت وجها بين يديها كتبكي )

غسان عزات عليه محملش يشوفها فهاد الحالة مكرهش يجرها من يديها و يحضنها عندو عارفها بلي محتاجة تحس بالامان .. تحس بالحب .. تحس بالانتماء العائلي

غسان : سارة شوفي فيا حنا كلنا معاك هنا و نتي دابا وسطنا حتى حاجة مغتأديك و لي بغيتيها غتكون واخا

غفران سهات مبتاسمة كتشوف فولدها و فالداخل ديالها متأكدة انو نضرات غسان لسارة ماشي نضرات عادية بلعكس كتشوف فيهوم الاعجاب و كدعي من قلبها ربي يتاويهوم لخير و يجمع بيناتهوم ...

اديب ملقا ميقول باقي عقلو عامر و معندو خاطر مكرهش ينوض يمشي كالس غير بزز

اشراق كتشوف فيه عاقد حواجبو مفهماتش مالو تقلب غير بوحدو تسناتو يقول شي حاجة ساعة غير ساكت

غسان(كيحاول يلطف الجو ) : لالة غفران راه جعنا مناكلوش

سارة ضحكات على غسان غير كتشوف فيه كيغمزها خلاها كتحمار غير بوحدها ..

تحط الغدا لي كان موضوع الرئيسي هو سارة و اشراق .. غير سالاو و هو ينطق اديب

اديب : الله يقوي الخير .. اشراق الا كانت واجدة سارة نمشيو

غفران : كيفاش تمشيو هانتوما معانا سارة بنتي بقاي

اشراق: راه تابعنا طريق حتى لكازا بحرا نوصلو نيت دايرين مع معتز عارض علينا

سارة عينيها على غسان كتسناه يقول شيحاجة ..

غفران : كون غير خليتيها معانا و الله منسخا بيها معمرة عليا دار

اشراق (ضحكات) :عندك غسان كامل و عاد بغيتي لي يعمر عليك دار غير هو كيدير الجو و الحماس

هضرة قالتها عادية خلات اديب غيطرطق محملهاش دوي على راجل خور بهاد طريقة كانها كتشكرو و معاشره زير على يديه كيحاول يامالك اعصابو

غفران : لواه ابنتي و الله حتى ولفتها معاي

سارة :مزال نتشاوفو ان شاء الله كازا الرباط قريبة

اشراق: مرحبا بيكوم فاي وقت

غفران (تنهدات بحزن ) :كون زدتي بعدا غير اليوم

تدخل غسان مور معرف مو نيت بقا فيها الحال و سارة خاصها تمشي

غسان(حضن غفران) : كيف اليوم كيف غدا اخرتها غتمشي و راه ضروري غتشاوفو

غفران (بحزن ):و الله ابنتي مسخيت بيك

مشات سارة لعندها حضناتها عندها كتحس بيها قريبة ليها بزاف .. ديك المحنة لي مفروض تحس بيها مع مها لقاتها فغفران .. ايام قليلة دوزات معاها لكن قدرات تكسب مكانة كبيرة فقلبها ..

غفران: اجي معاي بدلي حوايجك ..

اديب : انا نساينكوم فطموبيل

طلعات غفران و سارة .. بقات اشراق كتساينهوم .. غير جا خارج اديب عيطليه غسان

غسان : شكرا حيت وافقتي تجي

اديب : سارة كتبقا خت مرتي من العائلة و كنت ناوي غير ترصا الامور نجيبها هي و مها .. على العموم مزيان لي وقع هكا ..

غسان :تماما سارة إنسانة حساسة متقدرش تصبر و تواجه ديكشي

اديب ( علا فيه حاجبو ) : على العموم كنشكروك و سمح لينا برزطناك بمشاكلنا العائلية

غسان (حس بالقمعة ) : و لو مدرت والو

اديب : غير مجرد علمتيني انا اللول راه درتي صواب و كتر عاد

ضحك غسان : حيت عارف اشراق مبقاتش ديال راسها مجاتش نعيطلها بلا منعلمك مبغيتش تاني لافيشور يخسر ليا

اديب : كنت غالط فيك مزيان لي صدقتي بحال هكا يلاه نخليك الى دخلتي قولهم يسربيو مشا الحال

---

عند سارة غير طلعو مشات غفران هزات واحد بواط مداتها لسارة

سارة (باستغراب ) :شنو هادي

غفران : هدية صغيرة كنتمنى تعجب .. خليها ذكرى مني ليك

شداتها من عندها غير حلاتها غرغرو عينيها بدموع ..

كانت سنسلة رقيقة من الذهب فيها فراشة صغيرة

سارة (دموع فعينيها عنقاتها بحب) :شكرا بزاف على كلشي كنواعدك عمري نحيدها

غفران (باستها) : تستاهلي حبيبتي .. اه قبل منسا خلاليك غسان هدا ديالك (مداتلها ساشي )

سارة (باستغراب ) :شنو هو

غفران : معرفتش (ضحكات) قالي عطيها لسارة عطيتوليك

جات خارجة بدلي حوايجك متخليش ختك تساين بالي راجلها مزروب

سارة حركات راسها باه غير خرجات غفران طلات على ساشي بالها مغلف .. حطاتو جنب لبسات بالخف .. هزاتو و هبطات ..

طول طريق و هوما ساكتين .. اشراق حاسة بالجو متوتر باغا غير تفهم مالو تقلب عاد كان مزيان ..

غير وصلو دخل اديب معصب .. مقادرش يهضر .. تنهد كيشوف سارة مخلوعة

اديب(بابتسامة) :سارة مرحبا بيك معانا دار دارك خودي راحتك

سارة (بابتسامة) :شكرا بزاف و سمحليا جيت برزطتكوم

اديب : منبغيش نسمع هاد الهضرة

اشراق : منيتك كدوي

اديب :خودي راحتك

مشا اديب دخل ديريكت لبيت زادح الباب .. معصب غير بوحدو

اشراق :معرفت مالو

سارة (بحزن) : ياكما بسبابي معصب .. نتوما عاد مزوجين و انا جيت

اشراق (صعرها بتصرفاتو) :لا لا اه قبل منجيو و هو مبدل معرفت مالو منفخ ..

(دخلو لبيت ) اشراق: هانتي هادا بيتك رتاحي انا نمشي نشوف مالو

مشات اشراق معولة على خزيت محملاتوش يتعامل هكاك حدى ختها ..

غير دخلات سمعات دوش مطلوق عرفاتو لداخل ..سدات باب البيت و حلات الباب عليه و دخلات ..

كان كيدوش كيحاول يهدن راسو الغيرة قتلاتو حاس براسو معصب لدرجة الما بارد هابط عليه و مقادرش يطفي العافية لي حاس بيها غير شافها كمل عادي متجاهلها

اشراق :مالنا شواقع شهاد تصرفات كدير

اديب : لا رد

اشراق : وراه داويا معاك .. مالك كتلتخ خالع البنت شهاد تعامل الى مبغيتيهاش تبقا معانا قولها نيشان بلا هاد تبرهيش دوالو

اديب خرج عينيه بصدمة من هضرتها كيفاش حتى ضنات فيه السوء و انو ممكن يتقلق من وجود ختها معاهوم فدار ....

اديب : عرفي شكاتخرجي على فمك اشراق راكي وليتي غير كدوي مكتفكريش

اشراق: وشنو نفهم من تصرفاتك

اديب (بعصبية ) : قبل متحاسبيني انا حاسبي راسك شوفي راسك هو اللول

اشراق :مالي شنو درت من قبل منخرجو و نت منفخ و غير وصلنا عند الناس تقول معرفت فين كالس ناس كيرحبو بيك و نت غير كتنفخ

اديب(كيدوي و كشاكشو خارجين ) : واش منيتك شنو بغيتيني ندير حمدي الله لي وافقت نمشيو الى نسيتي امدام نفكرك ديك سيد هو لي مشيتي معاه ديك ليلة واخا خيرتك بيني و بينو .. ديك السيد هو لي طلب يدك حدا عيني... ديك سيد لي غير كيصوني عليك كتولي كضحكي .. هو نفسو لي حافضة عنوان دارو متحتاجيش عاد تسولي عليها .. هو لي كتشكريه و انا حاضر حقا كيدير الجو و الحماس ت79بين الخاوي كيف داير و دابا جايا كتسولي مالي ..

اشراق صدمها متوقعتوش باقي كيغير من غسان بالاخص هو لي خطط يجمع بيناتهوم و يزوجهوم..

خلاها مصدومة فيه كتشوفو صاعر و مكشكش..عارفاه و لو شنو غتقول مغيسمعش ليها ..

اشراق ( بتحلوين) :اديب

قاطعها ديب صاعر :خرجي الله يرحم باك مبغيش نغلط فيك..

وقفات على صباع رجليها بحركة خفيفة كانت شدات وجهو كتبوس فيه ممخلياش من جهدها .. اديب كرز عينيه حلف لتجاوب معاها خلاها بوحدها كتبوس فيه حالف حتى يندمها يوريها شنو هي تشكر واحد خور ..

بعد عليها بلا ميدوي مخليها مخرجة فيه عينيها

اشراق (قلباتها ضحك) :ياك اسيدي هادي كاملة غضبة مخليني كنبوس فالحيط

اديب (مخنزر فيها) : سيري خليني عليك طالعلي زعاف

اشراق بتحلوين :ياك ا مون بيبي تهون عليك حبيبتك تبقا مقلق منها

اديب (كيدوي منفخ) : كون بصح كنت طون بيبي غادي تراعيلي ماشي تبقاي تشكري فشي حد خور و انا حاضر ...

اشراق : شدات وجهو بين يديه كدوي و عينيها مغرغرين بدموع: نت عارف مزيان شحال كنبغيك و مكنحملش نشوفك هكا.. عارف مزيان بلي فيك راجلي و صاحبي و بابا و ماما و كلشي يكفي انو عطيتك قلبي و بغيتك راه يستحيل يجي فبلاصتك شي حد ..

اديب : منين هادشي كامل علاش رافضا موضوع لولاد راه رضيتيني نشك انو كتستعملي الكينة

اشراق : اديب مكتشوفش وضعنا باقي مخربق مزال ماشي وقت لولاد حياتنا ممستقراش

اديب : اشراق واش كنبالك مقادش بالمسؤولية باش كتقولي هاد الهضرة

قاطعاتو :متأولش هضرتي و ترجمها كيف بغيتي ..

انا ماشي ضدد لولاد لكن نأجلو الموضوع شوية.. خاص نشوفو بعدا فين غنسكنو واش غنبقاو هنا واش غنرجعو لرباط .. تشوف نت تاني لي كومبة غيبداو يعني خاص نكونو مستقرين ماشي انا حاملة و نت مكاينش شنو الفائدة الى متكونش معانا و نحسو بيك جنبنا..

اديب: كلشي غيتقاد و مزال غنهضرو فهادشي و ناقشوه

اشراق :راه هادشي لي بغيت نوصليك متنساش كنت غندير بروجي مع ايمان يعني مزال شحال من حاجة خصها تقاد و غير نستقرو راه انا اللولة غنبغي دراري

اديب (تنهد ) فاش كيفكر بالعقل هضرتها عندها فيها الصح مزال مخداوش قرار و ناقشو شحال من حاجة ..

اشراق (بحب ) :دابا غير على وجه ولادنا لي باقي متزادوش متبقاش مقلق راه قلبي كيضرني

اديب :احياني عليك (شحطها لطرمتها) عارفا الوداد لاعبة و جايا كتبوسي فيا محشمتيش

اشراق بتحلوين حيدات تريكوها راجلي حبيبي و تشهيت نبوسو و ندوش معاه

اديب ضحكاتو حافضاليه المو دباس .. خلاتو غير بالكلام الحلو و تحلوين يتطلق و ينسا كاع بلي كان منفخ .. دوشو بجوج اكيد مع شويا دلبسالات... غير خرجو لبسو حوايجوهوم

اديب :حشومة ملي جينا و حنا هنا دوزي نكلسو مع ختك شوية و نخرجوها تسارا على ميجي الوقت و نتجمعو مع الباقي .. راه معتز اكد عليا قبيلة ..

اشراق :صاف غير نشف شعري و نتبعك..

اديب : اليوم معتز غيطلب ايمان لزواج

اشراق (بصدمة غوتات) : حلف بالله

اديب (ضحكاتو) : وي داير ليها مفاجأة ديري مفراسك والو

اشراق : هاد خوك مساهلش و الله مكان كيصحاب ليا رومنسي

اديب (على فيها حاجب ) :بديتي تاني

ضحكات جمعاتليه حناكو بجوج و باستو: يخليلي لمغيار ديالي .. عرفتي ايمان غتفرح نيت تستاهل حتى هي مدازش عليها قليل .. بقات غير كوثر و نرتاح عليها حتى هي

اديب: ايوا الله يكمل عليهوم بالخير ..

عند كوثر حالتها كانت كارثية .. عمر سيف ضن غيلقا معاها صعوبة لهاد درجة ..

ملي قطعات مع اشراق و هي كتبكي ليل كامل منعساتش لدرجة طلعات ليها سخانة و طاحت جوج خطرات بالاعصاب شي لي خلى سيف غير يصبح الحال يقترح عليها تعالج ...

غير وجد الفطور فيقها دوشات باش ترتاح كتحس براسها مسخسخة و لات حالتها تحت عينيها كحال شعرها مكتمشطوش ضعافت بزاف .. الى شفتيها تستغرب فحالتها.. غير سالات لبسات لقاتو كيقاد القهوة ..

كوثر : مشيتيش لخدمة

سيف : خديت كونجي هاد دو جوغ

كوثر (تغرغرو عينيها) : على ودي ياك سمحلي كنعدبك معاي

سيف : متقوليش هاد الهضرة كلسي فطري خاص نهضرو

كوثر :الى غدوي على اشراق و الله مقادرا نهضر

سيف : غير فطري الهضرة ماشي عليها ..

كلات كوثر علاش قدرات غير كدير ليه الخاطر اما شهية ديال الماكلة مبقاتش عندها .. غير شافها سلات تقاد فالكلسة و دوا بجدية ..

سيف : كوثر واش عاجباك حالتك هكا

كوثر (دمعو عينيها) : مالها حالتي

سيف : كتشوفي راسك فالمرايا .. شوفي كيف وليتي غير كتبكي و مكتئبة من يدك ضربتيها.. نغفل عليك لقاك قتلتي راسك هادي راه ما عيشة موالو ..

كوثر (كتبكي) :ماشي الخاطري حاسة براسي مخنوقة وليت كنتمنى نموت مكرهتش نرتاح كلشي كيبالي كحل ..

سيف : فوالا يعني نتي كتعتارفي بلي حالتك ممزياناش و خاصك حل

كوثر (زيرات على يديها) : شنو كتقصد ا سيف

سيف : كوثر بكل صراحة خاصك متابعة طبية حالتك النفسية مبقاتش مستقرة .. هدشي علاش خديتليك موعد فمصحة هوما غيقدرو يشخصو حالتك

كوثر غير سمعات هضرتو فهماتو لشنو كيلمح محساتش حتى قلبات الطبلة لدرجة خلعاتو

كوثر (كتغوت ) : انا ماشي حمقة انا ماشي مريضة واش كتفهم واش كنباليك حمقة

سيف كيحاول يشدها باش متاديش راسها : (بحدة) كوثر حبسي شهادشي كديري

كوثر (بجنون لي جا قدامها) :واش عارف راسك شنو كتقول كيفاش عطاك خاطرك تقولي مصحة كيفاش باغي تلوحني فسبيطار دلحماق واش كنبالك حمقة

سيف يلاه جا يشدها بديك جنون لي فيها بالها كاس حداها شيرات بيه و من زهرو جا فيه.. كمش عينو من حر دقة دار حس بدم هابط حط يدو على جبهتو كيحاول يبرد الحريق ...

كوثر مشعراتش براسها امتى شيرات عليه غير شافت دم وقفات جامدة فبلاصتها كترجف ...

كوثر (بخوف كتبكي و كترجف ) : سمحليا..

مقصدتش.. انا .. معرفتش كيفاش .. (بدات كضرب فراسها و تنتف شعرها) انا مكنتش هكا .. انا ماشي هكا .. مقصدتش .. انا كنت غنقتلك انا..

سيف تصدم فيها كيشوفها كضرب فراسها مبيدو لجبهتو لي تقسمات عاطياه لحريق مقدر يقرب ليها... كيشوفها دخلات فهستيرية و ممكن تاديه و تادي راسها ..

ملقاش حل خور مكانش باغي يتعامل بهاد طريقة لكن لمصلحتها خاصو يتصرف لمصلحتها خاصها تعالج ..

جبد طيل بلخف سيفط ميساج.. بانليه كليينيكس مسح جبهتو و يدو لي عمرات بدم ..

تحرك قاصدها لقاها مخلاتش فوجها كامل هبطاتو بضفارها... شدها من يديها مزير عليها ممخليهاش تحرك .. بقات كتجابد معاها كتبكي و تغوت و ضرب حتى عصباتو لدرجة كمل عليه لحريق لي فجبهتو .. مشعرش حتى جمع معاها بطرشة حتى شهقات

سيف(بلغوات) :باااااااراااااكاااا صاااااافي شهااااد الحالة فيقي شوية ..

قاطعو الدقان فالباب و طيل كيصوني .. فهم بلي وصلو .. خلاها مشا حل الباب ... غير شافتهوم زادت صعرات

كوثر (كضور راسها بهستيرية) : سيف و الله حتى نقتلك و نقتل راسي .. سيف قولهوم يبعدو (كتغوت بجهد) متقربووووش(كتبكي) بعدو مني واااا بعدو مني شنو بغيتو عندي

غير قربو يشدوها بدات كتشير باي حاجة جات قدامها

كوثر (كتبكي ) : متقربوش متقربوش

قدرو يوصلو لها غير شدوها جعرات قاسها صعر بدات كتفركل و كتغوت حتى الحلق ديالها تجرح ..

كوثر (بتوسل شدات فيدو و هوما شادين فيها باغين يخرجوها ) :سيف متخليهومش يديوني .. سيف انا ماشي حمقة .. سيف عافاك .. سيف مديرش فيا هكا ...

سيف ضرو خاطرو عليها كيحاول يقوي راسو لمصلاحتها.. كيحاول ميضعافش .. سلت يدو منها بصعوبة .. عطاهوم اشارة باش يديوها.. دار عاطيها بضهر مقدرش يشوف فيها..

كوثر (بصراخ) :سييييييييييف متخلينيش متخلااااااااااش عليااااااا سيف انا محتااااااجااااك...

وضعية صعيبة تحط فيها سيف تمنى لو قدرات تقبل العلاج بلا ميوصلو لهاد لحالة تمنى لو مضطرش يديوها بهاد طريقة ..

تنهد خرج تابعهوم ركب فطوموبيل لاحق عليهوم لمصحة ..

عند ايمان دوزات نهار مع جنى محساتش بالوقت معاها .. لحقو عليهوم عصام و مروة شي لي خلا جنى طير بالفرحة .. توحشاتهوم بزاف .. خلاوها تنعس ترتاح مع الحصة كتهلكها جسدية و نفسية .. خرجو مور موصاو عليها ..

عصام : شنو درتي فالاجراءات

ايمان (تنهدات) : دويت مع المديرة واخا هكاك كنعطل نشوف معتز واش غيقتانع

عصام (باستغراب) : علاش واش موافقش

ايمان : لا قالك نعاونوها مي باش نتبناوها هو ضد الفكرة مبغاش يتقبلها

مروة : و شنو غادي ديري

ايمان : مغانتراجعش

عصام (بجدية ) :ايمان مغتقدريش على مسؤولية بحدك نهار قتارحت عليك على اساس بجوج بيكوم

مروة : راه بصح ماشي غير اجي و تبنى شي حد بالاخص فوضعية جنى خصها عناية

ايمان : الى كان بصح كيبغيني غيوافق

مروة : سمحيلي مخاصكش تفكري هكا لانو الحب معندو علاقة بمواضيع مصيرية

ايمان(بانزعاج) : ممكن تبدلو الموضوع

عصام (حاول يخفف من توتر ) : حقا باركيلي غنولي اب

ايمان (ميقات فيه ) : نبقا غير كنبارك ليك

عصام : وراه من دابا الفوق اي حاجة خاصها تكون مضروبة ف جوج

ايمان ( باستغراب ) شنو كيقول راجلك راه بالي حماق

عصام: مروة حاملة بتوينز

ايمان (غوتات من صدمة ): نوووو واي مبرووووووك (طارت عنقات مروة ) متصوروش شحال فرحت غنولي عمة لتوينز

مروة (بفرح ): الله يبارك فيك عقبال لعندك

ايمان : تزوجنا بقا لينا غير لولاد

عصام (كيطنز ):شتي هادي الى بقا حتى زاد تعطل غتمشي تخطبو هي نيت (ميق فيها ) مدلولة

ايمان (طارت كضربو) : و الله مكتحشم عندك زهر دزتي فوجه مرتك وولادك اما نوريك المدلولة شكاتسوا ...

قاطعهوم معتز كان صونا على عصام .. علمو بلي ايمان معاهوم ... عطاه العنوان و دار معاه امتى يطلقاو .. عيطو لاديب و دارو يتلاقاو مجموعين علاما يوصل الوقت و يمشيو .. عند لبنات غير تجمعو عرفاتهوم على سارة رحبو بيها دغيا دخلات ليهوم لخاطر مروة غير شافتها حمقاتها بقات غير لاصقة فيها خلات لبنات كيضحكو عليها ..

----

مع 7 دلعشيا صونالهوم معتز علمهوم بلي بروكرام تبدل و طلب منهوم يتلاقاو حدى سينيما... ركبو قلبو الوجهة .. طلبات ايمان من عصام يعطيها طموبيل يركبو البنات بيناتهوم و هو يمشي مع اديب .. عتارض فالاول خوفا على مروة لكن قدرو يقنعوه..

شدو طريق طالقين الموسيقى محيحين صوتهم كيتسمع من بعيد .. اديب سايك و عينيه عليهوم

عصام : شفت خوك بدل البلان ياك كان داير نمشيو لفيرما

اديب : بحالي بحالك قالك اجيو للسينما نزل شي فيلم جديد

عصام : مصاب غا يكون كوميدي ميديرش لينا بحال شحال هادي فينما نمشيو كان يقتلنا بافلام اكشن و الخيال العلمي

اديب : كون جات عليا كون راني متكي فداري كنرتاح

عصام (كيضحك) : زيدني عليك شي عشاء رومنسي من دكشي

اديب : نوض نوض راك z ملتي z ملة م9وووودة

خرج عصام كيضحك .. قشع معتز واقف فالباب ..وصلو عليه البنات .. عرفوه بسارة لي بدورو رحب بيها .. شي لي عجب اشراق انو دغيا تقبلو ختها و تعاملوا معاها كانهوم كيعرفوها و فرد من عائلتهوم ... سارة بقات شادة فإشراق شدة العمى فختها ، كتحس براسها موحشاها لواحد الدرجة كبيرة ماتوصفش....

دخلو كاملين مور متكلف معتز .. فضلو لبنات يكلسو مجموعين باش متحسش سارة راسها بوحدها واخا هكاك عصام أصر باش يݣلس حدا مروة بحجة تبغي علامن تحط راسها وتسند عليه... تطفا الضو فالقاعة شي لي كيعلن على بداية الفلم ..كلشي ساكت كيتسمع غير توشويش ...

ايمان : فينو معتز مباليش

عصام :يمكن مشا يجيب بوبكورن(نواش /ضرا)

ايمان : منضنش الفيلم غيبدا و هو عاد جاه يخرج

مروة : شووو هاهو غيبدا ..

مع قادات ايمان بلاصتها باش تفرج و هي تخرج عينيها فشنو كتشوف .. كان فيديو بتصاورها بلاصت الفيلم ..

عصام: شهادشي واش ماشي معتز و ايمان هادو

مروة : و الله حتى هوما سمع معتز كيهضر

اشراق : شووو خلينا نتفرجو

ايمان ممتيقاش شنو كتشوف عينيها تعمرو بدموع .. قلبها كيضرب حاسة براسها كتحلم .. بقات مصدومة من اللقطات لي كتشوف فشاشة واحد الإحساس كتحس بيه مخلط عليها ، تقادات فالݣلسة وعينيها على الشاشة ، صورة بصورة كدوز... كتسمع هضرتو و دموعها كيهبطو ، ݣاع التصاور لي عند بالها ضاعو ومابقاوش عند معتز.. ها هي كتشوفهم قدام عينيها ، تصاورهم فالعروبية وهوما مراهقين ، تصاورهم فاش كبرو ، تصاورهم فاش كانو كيخرجو مع بعضياتهم ، تصاورهم وهو هازها على ظهرو وهو مخربق ليها شعرها ... ، هبطو دموع سخونة من عينيها ، عمرها جات على بالها بلي معتز أيكون مزال مخبي هاد تصاور ... كل صورة دازت كانو كيرجعو معاها ذكريات.. كل كلمة تقالت تحفرات فقلبها .. دموع الفرح كانو كيهبطو.. ممتيقاش بلي اخيرا قالها .. بقات كتحرك راسها بنعم فاش قرات اخر جملة .. مزال مستوعبات المفاجاة حتى تسلط الضو لفين كان واقف معتز .. قرب منها بابتسامة دايب فيها .. كيشوفها ديك البنت صغيرة لي بغاها و هو صغير ..

غير قرب تلاحت معنقاه فرحتها متعطيها لحد .. شحال و هي كتسناه اخيرا ضحكات ليها دنيا .. اخيرا غتعيش مرتاحة و مع لي بغا قلبها.. بعد مقبل يدها ..

معتز : ايمان تقبلي تزوجي بيا

قاطعو عصام : وراه سيدة شوية و تجي تخطبك و نت عاد كتفكر تسولها

دارت ايمان مخنزرة فيه .. اشراق و اديب كيضحكو عليه .. مروة و سارة ساهيين فيهوم باعجاب

ايمان (بحب كتحرك راسها ) :اه قابلة

قفزهوم التصفار ديال عصام و البنات بداو كيصفقو .. تبعوهوم ناس لي كانو فالقاعة ..

خرجو كاملين سامحين فالفيلم ..كل كوبل مشادين من غير سارة لي لاصقة فاشراق

اديب (كيضحك و كيدوي بهمس مع اشراق ):منزوجوش ختك باش نعيشو الرومنسية

اشراق (كضحك) : ختي باقا صغيورة منزوجهاش

اديب (غمزها) : على لي بالي غسان موحال يزيد يصبر

اشراق ( خرجات عينيها) : غسان كيفاااش

اديب (عنكش ليها شعرها كيضحك) : مقلت والو انا ..

بقاو كيضحكو تفرقو ركبو فطموبيل

مشاو كاملين لريستو فين كان حاجز معتز قبل مكملين سهرة ديالهوم..

---

عند سيف داز اكفس نهار فحياتو غوات كوثر و استنجادها بيه خلاه كيتعدب .. باغيها تفوت الصدمات لي عاشت باغيها تعالج و تزيد القدام هو عارف مزيان انو كوثر ماشي حمقة .. فقط غلبوها ضغوطات و كحالت الدنيا و لو كملات بدون علاج ممكن تحاول تنتاحر و تادي راسها ..

غير خرجات الطبيبة المكلفة بيها طار كيسولها..

سيف :كيف بقات

طبيبة : مفهمتش بنت فعمرها شنو خلاها توصل لهاد الحالة على العموم عطيناها دي كالمو دابا راها ناعسة..

غدا ان شاء الله نبداو الجلسات .. كنتمنى انو تقبلهم و تكون عندها الارادة .. و متكتمش فخاطرها .. حيت الى تقبلات انو تفرغ ديكشي باش حاسة بكل سهولة غتقدر تعالج و مغيتطلبش وقت .. الى كان العكس تما فين كيصعاب العلاج

سيف : كنضن بسهولة غتعاود حيت فاش كنسولها واخا كتهرب الا انو فاخر المطاف كتعاود

طبيبة : كوثر من البنات لي تعرضو لصدمات لدرجة فقدات الثقة فراسها و فالمحيط ديالها واخا تبالك طبيعية و كدوي و تعبر و تبكي الا انو شي لي حاسة بيه اكثر بكتير من ديكشي لي كتقول .. على العموم الجلسات الاولى غتحدد

سيف:بغيت طلب واحد العلاج بالأدوية يكون اخر بروتوكول مبغيتهاش تولف عليه

طبيبة : مع الاسف كوثر كتولي عدوانية و غالبا الى مكانتش كتنعس فليل غدي نضطرو نعطيها مي كنواعدك غيكون بدوز خفيفة و هادشي غير فضرورة..

سيف : واخا واش ممكن نشوفها .

طبيبة : من الاحسن دابا لا خاصها تقبل فكرة انو صاف جات باش تعالج الى شافتك ممكن تحاول تقنعك انو راها مزيانة و خاصها تخرج ..

سيف ( تنهد ) :صافي فهمت على العموم رقمي عندك الى وقعات اي حاجة فاي وقت علميني ..

طبيبة : كون هاني (بابتسامة) عشت و شفت سيف طايح على راسو

سيف (بابتسامة) :الحب و ميدير

طبيبة : ان شاء الله ترجع مزيانة .. هي محضوضة لي لقات واحد بحالك يبغيها

سيف: انا لي محضوض بيها .. كوثر بنت شفافة كيف ما كان الحال مكتنافقش و فاش كتبغي كتبغيك بصدق و يستحيل تخون

طبيبة : سيف ماشي كلشي بحال بحال و كنضن راك تجاوزتي ديك الصدمة ( بمزاح) متقوليش جلساتي مشاو غير هكاك

سيف : لا بلعكس لو مكنتيش نتي كنت غنكون ضعت حتى من المهنة ديالي كنت سمحت فيها .. هادشي علاش انا فاهم كوثر حيت دزت من نفس تجربة غير كلها و كيف عاشها .. انا خاطيبتي خانتني و بعيني شهدت على خيانتها و هي خانتها دنيا و تخلاو عليها .. شي لي خلاها تحس راسها وحيدة..

طبيبة : ربي دارليك خير متنساش انو كان مكتاب عليك تعيش ديك تجربة .. و هانتا قدرتي تجاوز صدمة و دليل انو قدرات كوثر تحتل مكانة فحياتك و قلبك فوقت و جيز و بلا متحس

سيف : بصح متافق معاك .. كوثر تقدري تقولي اعجاب من اول نضرة .. ملي شفتها فكلينيك شي حاجة خلاتني نميل ليها .. يمكن عفويتها و طريقتها فالهضرة

طبيبة : ان شاء الله تولي مزيانة و تعالج و تقدرو داويو جروح بعضياتكم

سيف :شكرا بزاف على كلشي فعلا كنتي نعمة الصديقة

طبيبة: مبيناتناش يلاه نخليك دابا بيناتنا طيل.. اه متنساش تجيب ليا لاكاغط ديالها راك عارف قبلناها غير حيت من طرفك

سيف : كوني هانيا غدا تكون عندك ..

مشات طبيبة بقا سيف ساهي كيحاول ميتفكرش دكرايات لي فاتو و خلاوه يعاني لواحد الفترة و كون ملقاش يد المساعدة كانت حياتو غضيع..

---

عند اركان و محمد عياو يحاولو يهضرو مع كلثوم لكن منطقات بوالو رد الوحيد لي كان من طرفها هو البكا .. طلبو منهوم يخليوها ترتاح .. و انو غيرجعو لجلسات النفسية حيت دابا كاين احتمال تستاجب ..

محمد الفرحة مسيعاهش.. طول عمرو كيلوم راسو حيت مقدرش يحميها .. طول عمرو ضميرو كيانبو.. دابا جا الوقت لي يدير المستحيل باش تعالج و ترجع ليه ..

محمد : كنواعدك غندير كل جهدي باش تبرا و ترجع حسن من اللولة

اركان : كنتمنى تقدر تهضر و تجاوز صدمة واخا شي لي عاشتو صعيب بزاف

محمد :عارف ماشي ساهل .. كنواعدك غناخد ليها حقها شحال هادي مقدرتش نتصرف اما دابا مكاينش لي غيمنعني

اركان : فات الفوت مبقيت بغيت والو غير تعالج و ترجعلي .. كنتمنى حتى حد ميعرف بلي باقا عايشا على الاقل غير حتى تبرا منقدرش نغامر بحياتها

محمد :لكن انا بغيت

قاطعو اركان : عارف غادي تقولي باغي ترجع ليها حقها لكن راه فات الفوت الحاجة الوحيدة لي بغيت منك مدام انو دارت رد فعل فاش شافتك الا انو ممكن شي نهار تقدر تواصل معاك فكنتمنى تبقا عند كلمتك و متهملهاش

محمد : كون هاني غير هو كنت نفضل لو تعالج فدار حسن متبقا هنا فكلينيك و الجلسات يدارو فدار

اركان : فكرت فيها و بحكم الخدمة و كنسافر مقدرتش نأمن عليها

محمد : انا دابا هنا .. نقدر نتحولو لشي دار خرى هكا تحس بالانتماء العائلي

اركان : منضنش ولادك غيتقبلو الفكرة

محمد : ولادي كلها عاش حياتو .. مرانيش دري صغير باش نتسنى الموافقة ديال شي حد

اركان : غنشوف مع طبيب مكلف بالحالة ديالها الى وافقو رد عليك ..

---

عند سارة غير رجعو الدار اول حاجة دارت مشات لساشي تشوف هدية غسان .. نهار كامل مقدراتش تفتحها .. هزاتها كتشوف فيها و الفضول قاتلها .. غير حلاتو خرجو عينيها كان هاتف اخر موديل فالذهبي..

شداتو غطير بالفرحة .. لقات معاه ورقة فيها رقم كود دخلاتو مور مشعلات طيل .. بقات كتبقشش فيه و هي طلع ليها جوج نماري مقيدين غسان و غفران .. ترددات باش تصونيليه لكن كان خاص ضروري تشكرو ... دوزات نيم و قلبها كيضرب بقا شحال كيصوني حتى كانت فقدات الامل انو يجاوب عاد سمعات صوتو

غسان: الو

سارة : غسان

غسان ( باستغراب ) : سارة هادي نتي

سارة (بتوتر) : اه انا (زربات عليه) عيطت باش نشكرك على طيل

غسان (باستغراب ) : اشمن طيل

سارة : طيل لي خديتيلي راه عطاتولي خالتي غفران

غسان (مفاهمش) : اينا طيل مفهمتش

سارة (دوخها): ياكما خالتي غفران غلطات .. حيت عطاتني كادو قاتلي من عند غسان فاش حليتو لقيتو طيل و فين نوامركوم

غسان عاد طلعات معاه و فهم البلان

غسان (كيضحك) بهمس : احح عليك اغفران

سارة :شنو مسمعتكش

غسان (رشقاتليه) : بصحتك ازين تستاهلي

سارة (ضحكات) :ياك بعدا ديالي ماشي غلطتو

غسان : ديالك ديالك انا لي غير سمعت صوتك دخت .. كلشي ديالك ازين الى بغيتيني حتى انا اجي خوديني

سارة (كيحشمها بضحك ديالو ) : لا باراكا عليا غير طيل

غسان : ياك اطميميعة محشمتيش طيل تاخديه و مولاه لا

سارة (تطلقات معاه ولفات على طنيزو) : ناري مكتقاضاش..

بقاو كيهضرو و يضحكو محسوش بالوقت مرة يشد فيها مرة يضحكو مرة يعاود ليها على طفولتو ..

عند ايمان غير فاقت لقات الممرضة لي مكلفة بجنى معيطاليها .. عاودات صونات ليها جاوبتها فلبلاصة

ممرضة : مدام ايمان صباح نور سمحيلي الى فيقتك

ايمان : لا لا مكاين مشكل ياك لاباس ..

ممرضة : فاش مجاوبتيش راه علمت مسيو معتز كان مخليلينا نيم ديالو الى مكنتيش نعلموه

ايمان : داكوغ ماشي مشكل غير قولي شنو كاين خلعتيني واش وقعات شي حاجة لجنى

ممرضة: لا لا متخافيش اليوم كيف كتعرفي عيد الام و الجمعية الخيرية لي تابعة لكلينيك ديالنا دايرا نشاط خيري احتفالا بعيد الام مع وليدات المصابين بسرطان و اهل ديالهوم ..

ايمان(ضربات على راسها) :اه مشات من بالي كانت قالتهالي ديك نهار المديرة

ممرضة : النشاط غيبدا مع 11 قلت نعلمك باش تحضري مع جنى راكي عارفا كاع الامهات غيكونو مع ولادهوم

ايمان : كوني هانيا تقدري تقوليلي واش ناقص شي حاجة نساهم بيها ..

ممرضة : انا نشوف و نرد عليك واخا هوما راه تكلفو بكلشي ..

ايمان : صافي واخا انا شوية و نجي ..

غير قطعات معاها خرجات لقات عصام و مروة فايتين كيوجدو لفطور

عصام :مالكي ماشي حتى لهيه

ايمان : لبارح مقدرتش ندوي مع معتز على موضوع جنى مشكل وافقت على زواج بلا منعرف رأيو و حتى هو مجبدش الموضوع

مروة : ايمان مخاصكيش تصرفي هكا.. واش غتخلاي على معتز الى موافقش راه ميمكنش

ايمان : منقدرش نتخلى على جنى و فنفس الوقت منقدرش نسمح فمعتز (بدات كتبكي ) حاسة براسي محطوطة فالعافية ا مروة انا بين نارين

عصام (بانزعاج) : كون عرفت غيوقع هكا كاع منقتارح عليك ندمت كاع

ايمان: بلعكس احسن حاجة درتي انا راه متوقعتوش يرفض

مروة : انا شخصيا عاضراه منافقكش كون كنت بلاصتو و فوضعيتو صعيب نتقبلها بالاخص انو نتوما عاد باديين

عصام(بانزعاج) :على هاد الحساب المدام كنتي غتسمحي فيا كون انا لي قررت نتبنى جنى

مروة: قلت كون كنت بلاصة معتز واش سيد يلاه عاش صدمة البنت لي كان كيقول بنتو و كيحلم بنهار لي يهزها بين يديه فتالي كتاشف بلي ماشي من صلبو .. جيتو نتوما حطيتوليه بنت هاك ديرها بلاصة بنتك وا فكرو بالعقل شوية

ايمان : جنى بنتي و غادي نتبناها قراري مغنتراجعش عليه

مروة : مكنقولكش تراجعي كنوضحوليك انو مخاصكش تاخدي منو موقف فهمتي يعني حاولي تقنعيه و غير بالخاطر معتز كيبغيك و غيبغي يشوفك مرتاحة ..

ايمان : كنتمنى ميخلينيش نختار بيناتهوم .. اووف

عصام : معتز عمرو يدير هكا مخاصكش كاع تشكي

ايمان : عارفا و تاني مبغيتش يحس بلي جنى مفروضا عليه بغيتو يتقبلها و يبغيها

مروة : مديريش فبالك كلشي غيتقاد .. حقا شنو قررتي غادي ترجعي الخدمة

ايمان : هادشي لي بالي نهار تنين و نشوف نيت خاص ندوي مع اشراق على ود بروجي لي كنا غنديرو كيبالي دابا نديروه غير هنا فكازا

مروة : الى بغيتو نقدر ندخل معاكوم فيه ديك نهار عاوداتلي عليه اشراق عجبني

ايمان : منقدر نقولك والو نكلس مع اشراق و نتفاهمو و نرد عليك

مروة : صافي واخا شوفي معاها و لي درتوها انا معاكوم

عصام : ايمان فطري بحرا نوصلك الى كنتي غتمشي لداركوم

ايمان : حتى ليل ماشي دابا خرجليا بلان مكنتش دايرا بحسابو

عصام : شنو تما

ايمان : دايرين شي حفل بمناسبة عيد الام و خاصني نحضر مع جنى (شافت فمروة ) شنو بالك تمشي معاي

مروة (شافت فعصام و حطات يدها على كرشها) : نمشي علاش لا

عصام : عيطو لاشراق و سارة يمشيو معاكوم

ايمان : لا صبر نسول بعدا واش مسموح نجيب معاي شي حد يمشيو يكونو دايرين عدد محدود

مروة : عندها صح تاكدي بعدا

صونات ايمان عليهوم لقات بلي ممكن تجيب معاها لي بغات ... رجعات كتصوني على اشراق

ايمان : زيدي تمشي معانا اصحبتي نيت تعرفي على بنوتي

اشراق : منقدرش و الله خاص نمشي نشوف كوثر راه شوفي شحال و انا هنا و باقي محليت سوء تفاهم معاها و زيد مكتجاوبنيش فتيل

ايمان ( بتوسل ) لعشيا سيري عافاك كنرغبك يلاه معانا بغيت جنى تحس بلي نيت عندها عائلة .. اليوم راه عيد الام بغيت نقوم بدور ديالي معاها

اشراق (تنهدات) : غير عفيني ها سارة تمشي معاك انا الى سالينا بكري نلحق عليكوم

ايمان : واخلي لعشية و نمشي معاك نيت نفهموها شنو واقع

دارت اشراق كتشوف فسارة تنهدات : واخا صاف لعشية متخرجوليش تاني ببلان خور

ايمان :هاااح عليك كوني هانيا .. نص ساعة نكونو عندكوم ..

قطعات ايمان لقات عصام يلاه قطع مع معتز

عصام (بتلاعب ) : قالك مشغول عندو شي اجتماع ميصلاحش يجي

ايمان : مكلفش راسو حتى يعلمني تخيل كون مرجعاتش عيطاتلي البنت راه هادشي لي كيفقصني فيه

مروة : وراه عارفها غترجع تعيطليك اصحبتي شحال كتكبري موضوع

ايمان : باز ياختي تقولي دارك محامي عليه

مروة : كنجي مع الحق

ميقات فيها ايمان كلسو فطرو غير سالاو دازو خداو دي كادو شدات ايمان لبسة ديال الاميرة لجنى و كريمات خاصة ليها ..

شدو طريق دازو مور سارة و اشراق حيت اديب مشغول ميصلاحش يوصلهوم.. موقفو غير حدا لكلينيك.. تلاقاو ممرضة داتهوم نيشان لجناح خاص بالاطفال فين كاينة نيت غرفة جنى ...

غير دخلو طارت عندها جنى حاضناها

جنى (ببرائة) : ماما جيت

ايمان (كتبوس فيها ) : ياروح الماما انا جيت

جنى ( شافت سارة و اشراق دارت يدها على وجها حشمانة) : شكون هادو (نعتات بيدها لسارة و اشراق )

ايمان هاتها و ضارت عند لبنات : اجي نعرفك هادي طاطا اشراق و هادي طاطا سارة ..

سارة : ياختي شحال فنة

عصام : عمو شتك نسيتيني

جنى تخبعات فايمان حشمانة ... ضحكات ايمان : حشمتيلي بنوتي ..

قاطعتهوم ممرضة دخلات هازا دي ساشي خلات ايمان مستغربة

ممرضة : شنو بالكوم تخليو الاميرة جنى تلبس باش توجد راسها لحفلة

ايمان : وي انا نلبسها (شافت فعصام ) عطيني ساشي لي فيه لاغوب لي خديت

ممرضة ( باحراج) : مدات ليها ساشي .. الى ممكن تلبسي ليها هادي

ايمان ( باستغراب ) : علاش بغيتها تلبس لي شريت ليها انا

ممرضة ( معرفات متقول ) : غير حيت كاع لبنيتات غيلبسو نفس الغوب غير لي كولوغ مبدلين

ايمان (بانزعاج) : انا بغيتها تلبس لي خديت انا

تدخل عصام مور مشاف ايمان بدات كتعصب و ممرضة معرفات متقول خاف الى تفرش كولشي

عصام : ايمان بحال بحال خليها تلبس لي جابو و منبعد يلبسوها لي خديتي لاش غتعقدي الامور

مروة : بحال بحال اصحبتي

تنهدات ايمان : واخا اري

عصام : انا نمشي نشوف الى خاصهوم شي حاجة

ممرضة (تالفة ) : احم مدام ايمان الى سمحتي تقدري حتى نتي تلبسي واحد الكسوة خاصة ليك

ايمان ( مستغربة ) كيفاش

ممرضة :الامهات غيلبسو بحال وليداتهوم الى سمحتي طبعا

سارة (بابتسامة و حماس ) :فكرة زوينة

ايمان : واخا ماشي مشكل

ممرضة (شافت فالبنات ):تفضلو معايا نخليوهوم يلبسو

اشراق : ايمان ياكما تبغي نعاونك

ايمان :وي غير بقاي ...

خرجو البنات بقات اشراق مع ايمان غير حلات ساشي و هي تكمش عينيها باستغراب

ايمان : ماشي eva mode هادي ديال غسان

اشراق (باستغراب ) : اه و الله حتى هي

ايمان : اشنو جاب تصاميم ديالو لهنا

اشراق : بحالي بحالك يكون زعما مساهم فالعمل الخيري

ايمان : زعما هادي كاملة صدفة غادي يساهم من رباط حتى لكازا على اساس مكاينش جمعيات فرباط ..

اشراق :وا عادي راه ممكن الى كان كيعرف مول كلينيك و لا المنضمين..

ايمان :معرفتش بيزاغ

اشراق :هادشي لي بالي و منعرف .. ميكونش معتز هو طلب منو يصممهوم

ايمان (ضحكات باستهزاء ): معتز معيطليش حتى يقولي صباح الخير .. اودي خليني نلبس.. لبسي معاك جنى باش منتعطلوش..

---

فجيها خرى ففاس بضبط فدار عمر كريمة الفقصة مبغاتش تسرط ليها .. ملي عاقت بلبلان لي دار ليها تراجعت مبقاتش مشات عندو ..

كانت فايقا ساهية كتشوف راسها ضيعات راسها على والو تبعات كلام مها و غرها شيطان.. بقات كتراجع نفسها .. ياك هي لي شجعات اشراق .. ياك كلشي كانت شايفاه على عينيها .. هو بصح قدرات تسيطر .. خرجات فحبيبة مخلاتهاش دوز عليها لمرار و تبورضات عليها لكن شنو ستافدات حياتها ضاعة على والو هاهي ولات على كل لسان ..

تنهدات كتشوف فولدها كيلعب باقي صغير الحاجة الوحيدة لي ربحات من هاد زواج .. و لو مكانش و خافت من ناس يتشفاو فيها كانت متزيدش دقيقة معاه

جميلة : المالكي ساهية خلعتيني

كريمة : كنخمم فحياتي لي ضاعت تبعت كلامك بقيتي تزينيلي و توسوسيلي حتى ديتو و هاني طليتو خضر

جميلة ( ميقات فيها) : ياو شكون بحالك ا الهبيلة هانتي عايشا مخيرة بدارك مبرعة كتربي ولدك ضامنا راسك شنو بغيتي كتر

كريمة (ضحكات بمرارة ) : عاجباك هاد العيشة ا مي ياك راجل ماشي يجيب عليا ضرة كون ما نيتي غلبات

جميلة : راجلك هبيل بو ودينا تلقاي باين ديك الكافرة بالله هو سبب ها علاش كنقولك نوضي ولدي شديه بلولاد

كريمة (ندبات حناكها) : باش غنولدهوم و حنا عايشين كيف لخوت نحمد الله لي زهقت بوليد لهلا يخطي لفياكرة دارت خدمتها اما كون عولت عليه كون بقيت خلا

جميلة : وا عاودي ديريها مالك شنو خاسرا

كريمة ( عصباتها ) : ها العار ا حجر العافية لما عطيني بتيساع كون كانو لولاد يشدو كون شدو غير با

ناضت طافشا مها لي تحس بيها غير كتزيد تكمل عليها و تعصبها.. يلاه جات طالعة لفوق و هي تسمع الباب كيتحل ..

عمر : زيدو مرحبا بيكوم دخلو دار داركوم

جميلة مشات عوالا على خزيت حتى كتوقف مصدومة ممتيقاش شنو كتشوف ..

يتبع...